UzbekAI

ЎЗБЕКИСТОН РЕСПУБЛИКАСИ ҲИСОБ ПАЛАТАСИНИНГ

ҚАРОРИ

НИЗОМ

Давлат молиявий назорат органлари ва ички аудит хизматлари томонидан Ўзбекистон Республикаси Ҳисоб палатасининг «Давлат аудити» дастурий комплексидан фойдаланиш тартиби тўғрисидаги низомни тасдиқлаш ҳақида

Ўзбекистон Республикаси Президентининг 2021 йил 27 августдаги ПФ-6300-сон « Давлат молиявий назорати тизимини янада такомиллаштириш чора-тадбирлари тўғрисида »ги ва 2024 йил 10 июлдаги ПФ-100-сон « Бюджет маблағларидан фойдаланиш устидан молиявий назоратни кучайтириш бўйича қўшимча чора-тадбирлар тўғрисида »ги фармонларига мувофиқ Ўзбекистон Республикаси Ҳисоб палатаси қарор қилади:

1. Давлат молиявий назорат органлари ва ички аудит хизматлари томонидан Ўзбекистон Республикаси Ҳисоб палатасининг «Давлат аудити» дастурий комплексидан фойдаланиш тартиби тўғрисидаги низом иловага мувофиқ тасдиқлансин.

2. Мазкур қарор Ўзбекистон Республикаси Иқтисодиёт ва молия вазирлиги, Рақамли технологиялар вазирлиги ва Ўзбекистон Республикаси Бош прокуратураси билан келишилган.

3. Мазкур қарор расмий эълон қилинган кундан эътиборан кучга киради.

Келишилди:

Ўзбекистон Республикаси Ҳисоб палатасининг 2025 йил 5 ноябрдаги 95-сон қарорига ИЛОВА

Давлат молиявий назорат органлари ва ички аудит хизматлари томонидан Ўзбекистон Республикаси Ҳисоб палатасининг «Давлат аудити» дастурий комплексидан фойдаланиш тартиби тўғрисидаги

Мазкур Низом давлат молиявий назорат органлари ва ички аудит хизматлари томонидан Ўзбекистон Республикаси Ҳисоб палатасининг (бундан буён матнда Ҳисоб палатаси деб юритилади) «Давлат аудити» дастурий комплексидан фойдаланиш тартибини белгилайди.

1-боб. Умумий қоидалар

1. Мазкур Низомда қуйидаги асосий тушунчалар қўлланилади:

«Давлат аудити» дастурий комплекси (бундан буён матнда «Давлат аудити» дастури деб юритилади) — давлат молиявий назорат органлари ва ички аудит хизматларининг назорат (аудит) тадбирларини рўйхатга олиш, назорат (аудит) тадбирларининг натижаларини жамлаш, сақлаш, ишлов бериш ҳамда ҳисоботлар шакллантириш имконини берувчи Ҳисоб палатасининг ахборот тизими;

давлат молиявий назорат органлари — Ўзбекистон Республикаси Ҳисоб палатаси, Ўзбекистон Республикаси Иқтисодиёт ва молия вазирлиги ҳамда унинг тасарруфидаги ваколатли органлар ва Ўзбекистон Республикаси Бош прокуратураси ҳузуридаги Иқтисодий жиноятларга қарши курашиш департаментининг Давлат молиявий назорати инспекцияси;

давлат органлари ва ташкилотлари — ички аудит хизмати ташкил этилган республика ижро этувчи ҳокимият органлари, давлат мақсадли жамғармалари, Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликлари ҳамда бошқа бюджет ташкилотлари;

ички аудит хизмати — давлат органлари ва ташкилотларида ички аудит фаолиятини амалга оширувчи ҳамда бошқа таркибий тузилмалардан мустақил таркибий бўлинма;

назорат (аудит) тадбирлари — давлат молиявий назорат органлари ва ички аудит хизматлари ходимлари томонидан давлат молиявий назорати ва ички аудит хизмати мақсадларига эришишга қаратилган назорат (аудит) объектида, шу жумладан масофавий равишда амалга ошириладиган жараён;

назорат (аудит) тадбирлари натижалари — давлат молиявий назорат органлари ва ички аудит хизмати ходимлари томонидан назорат (аудит) объектларида, шу жумладан масофавий равишда ўтказилган назорат (аудит) тадбирларида аниқланиб, уларнинг якуни бўйича расмийлаштирилган ҳужжатларда акс эттирилган маълумотлар;

фойдаланувчи субъектлар — «Давлат аудити» дастуридан фойдаланувчи давлат молиявий назорат органлари ҳамда ички аудит хизмати ходимлари;

администратор — «Давлат аудити» дастурига ҳуқуқий эгалик қилувчи, кириш ҳуқуқларини ва ундан фойдаланишни бошқарувчи ва назорат қилувчи Ҳисоб палатаси;

техник администратор — «Давлат аудити» дастурини техник қўллаб-қувватлаш ва такомиллаштириб боришни амалга оширувчи ташкилот;

оператор — давлат молиявий назорат органлари ҳамда ички аудит хизматининг «Давлат аудити» дастурида рўйхатдан ўтган ва ҳужжатларни яратиш, маълумотларни киритиш, таҳрирлаш, янгилаб бориш, ҳисобини юритиш ва бошқа амалларни бажариш ваколати берилган масъул ходимлари.

2. «Давлат аудити» дастуридан фойдаланишнинг мақсади давлат органлари ва ташкилотларида бюджет тўғрисидаги қонунчилик ҳужжатларининг бузилиш ҳолатларини таҳлил қилиш, такрорий ва асоссиз молиявий назорат (аудит) тадбирларининг олдини олиш мақсадида уларнинг самарадорлигини ошириш учун давлат молиявий назорат органлари ва ички аудит хизматларининг назорат (аудит) тадбирларига доир маълумотларни тўплаш, қайта ишлаш, сақлаш орқали ҳисоб ва ҳисобот жараёнини автоматлаштиришдан иборат.

3. Қуйидагилар «Давлат аудити» дастуридан фойдаланишнинг асосий вазифалари ҳисобланади:

назорат (аудит) тадбирларини рўйхатга олиш;

давлат молиявий назорат органлари ва ички аудит хизматларининг йиллик иш режаларига киритиладиган назорат (аудит) тадбирларини мажбурий тартибда Ҳисоб палатаси билан келишиш;

давлат молиявий назорат органлари ва ички аудит хизматларининг назорат (аудит) объектлари, шунингдек давлат органлари ва ташкилотлари тўғрисида маълумотлар (вазифа ва функциялари, ташкилий тузилмаси, штат бирликлари, ходимлар) базасини шакллантириш;

назорат (аудит) тадбирлари натижаларини тўплаш, сақлаш ва қайта ишлаш орқали ҳисоботларни шакллантириш;

назорат (аудит) объектлари томонидан назорат (аудит) тадбирлари бўйича ёзма фикр билдириш;

фуқаролар иштирокида ўтказиладиган назорат (аудит) объектларини аниқлаш;

назорат (аудит) объектларига кўрсатмалар юбориш ва уларнинг ижросини назорат қилиш;

назорат (аудит) тадбирлари натижалари юзасидан тегишли давлат органларига хабарномалар юбориш имконини яратиш.

2-боб. Фойдаланувчи субъектларни «Давлат аудити» дастурида рўйхатдан ўтказиш

4. «Давлат аудити» дастурида қуйидагилар фойдаланувчи субъектлар сифатида рўйхатдан ўтказилади ва уларга қуйидаги кириш ҳуқуқлари берилади:

давлат молиявий назорат органлари ҳамда давлат органлари ва ташкилотларининг раҳбари ва ўринбосари учун — «тасдиқловчи» ҳуқуқи;

давлат молиявий назорат органлари ҳамда давлат органлари ва ташкилотлари раҳбари ўринбосари, таркибий бўлинмалари бошлиқлари учун — «маъқулловчи» ҳуқуқи;

давлат молиявий назорат органлари ҳамда ички аудит хизмати ходимлари (2 нафаргача) учун — «оператор» ҳуқуқи;

давлат молиявий назорат органлари ҳамда ички аудит хизматининг «оператор» ҳуқуқи берилмаган ходимлари учун — «фойдаланувчи» ҳуқуқи.

5. Давлат молиявий назорат органлари ҳамда давлат органлари ва ташкилотлари томонидан «Давлат аудити» дастурида рўйхатдан ўтказиш учун Ҳисоб палатасига сўровнома тақдим этилади. Сўровномада қуйидагилар кўрсатилиши лозим:

фойдаланувчи субъектларнинг фамилияси, исми ва отасининг исми;

фойдаланувчи субъектларнинг лавозими ва улар фаолият юритувчи бўлинманинг номи;

фойдаланувчи субъектларнинг паспорт (ID-карта) серияси ва рақами;

жисмоний шахснинг шахсий идентификация рақами (ЖШШИР);

мазкур Низомнинг 4-бандида назарда тутилган кириш ҳуқуқлари рўйхати;

Ўзбекистон Республикаси Бош прокуратураси ҳузуридаги Иқтисодий жиноятларга қарши курашиш департаментининг Давлат молиявий назорати инспекцияси ҳамда давлат органлари ва ташкилотларининг ички аудит хизматлари ходимларининг малака сертификати рақами;

фойдаланувчи субъектларнинг электрон почта манзили.

6. «Давлат аудити» дастурида ходимларни оператор сифатида рўйхатдан ўтказиш ва шахсий кабинетни очиш учун давлат молиявий назорат органлари ҳамда давлат органлари ва ташкилотлари раҳбарининг ходимга «оператор» вазифаси юклатилган буйруғи нусхаси сўровномага илова қилиниши лозим.

7. Фойдаланувчи субъектларни «Давлат аудити» дастурида рўйхатдан ўтказиш сўровнома тақдим этилган кундан бошлаб икки иш кунидан кечиктирмасдан Ҳисоб палатаси томонидан амалга оширилади.

8. Тақдим этилган сўровномада мазкур Низомнинг 5-бандида назарда тутилган маълумотлар бўлмаса ёки тўлиқ кўрсатилмаган бўлса Ҳисоб палатаси томонидан фойдаланувчи субъектларни «Давлат аудити» дастурида рўйхатдан ўтказиш рад этилади.

9. Давлат молиявий назорат органлари ҳамда давлат органлари ва ташкилотларининг фойдаланувчи субъектларини рўйхатдан ўтказиш учун камчиликларни бартараф этган ҳолда такроран сўровнома тақдим этиши мумкин.

10. Мазкур Низомнинг 8-бандида кўрсатилган рўйхатдан ўтказишни рад этиш асослари мавжуд бўлмаса, фойдаланувчи субъектлар «Давлат аудити» дастурида рўйхатдан ўтказилади ҳамда шахсий кабинет очилади.

11. Фойдаланувчи субъектларнинг «Давлат аудити» дастуридаги шахсий кабинетида қуйидаги маълумотлар сақланиши шарт:

фойдаланувчи субъектнинг идентификатори (ID-рақами);

шахсий кабинетнинг яратилган санаси ва вақти;

фойдаланувчи субъектнинг лавозими ва шахсини тасдиқловчи ҳужжат маълумотлари.

12. «Давлат аудити» дастуридан рўйхатдан ўтказилган фойдаланувчи субъектлар ушбу дастурдаги шахсий кабинетига Ягона идентификация тизими (OneID) ёки электрон рақамли имзо орқали кириш ҳуқуқига эга бўлади, бунда дастурга ўзига тегишли бўлмаган Ягона идентификация тизими (OneID) ёки электрон рақамли имзо орқали кириш тақиқланади.

13. Давлат молиявий назорат органлари, давлат органлари ва ташкилотлари фойдаланувчи субъектлари билан меҳнат шартномаси бекор қилинганда, улар бошқа лавозимга ўтказилганда ёки уларнинг «Давлат аудити» дастуридан фойдаланиш ҳуқуқи бекор қилиниши ёхуд ўзгаришига сабаб бўладиган бошқа ҳолатлар юз берган вақтдан бошлаб бир иш куни ичида Ҳисоб палатасини ёзма хабардор қилиши керак.

Бунда, Ҳисоб палатаси томонидан йигирма тўрт соат ичида фойдаланувчи субъектларнинг «Давлат аудити» дастурига кириш ҳуқуқлари янгиланади ёки уларнинг шахсий кабинети блокланади ҳамда архивга кўчирилади ва камида бир йил давомида сақланади.

14. «Давлат аудити» дастуридан фойдаланиш ҳуқуқи бекор қилинган шахслар ўрнига бошқа фойдаланувчи субъектларни рўйхатдан ўтказиш ушбу бобда белгиланган тартибда амалга оширилади.

3-боб. «Давлат аудити» дастуридан фойдаланиш тартиби

15. Фойдаланувчи субъектлар «Давлат аудити» дастуридан рўйхатдан ўтказилгандан сўнг уч иш куни ичида оператор томонидан ушбу дастурга тегишли давлат молиявий назорат органи, давлат органи ёки ташкилотининг номи, солиқ тўловчининг идентификация рақами, манзили, вазифа ва функциялари, таркибий тузилмаси, штат жадвали, давлат молиявий назорат органи ёки ички аудит хизмати ходимлари таркиби тўғрисидаги маълумотлар киритилади ҳамда доимий равишда янгилаб борилади.

16. Давлат молиявий назорат органлари ва ички аудит хизматларининг келгуси йил учун йиллик режалари (дастурлари) лойиҳаларини «Давлат аудити» дастурида шакллантириш, келишиш ва тасдиқлаш қуйидаги тартибда амалга оширилади:

а) келгуси йил учун йиллик режа (дастур) лойиҳаси ҳар йили декабрь ойининг 10-санасига қадар шакллантирилади ва Ҳисоб палатасига келишиш учун йўналтирилади;

б) Ҳисоб палатаси келишиш учун келиб тушган йиллик режа (дастур) лойиҳасини назорат (аудит) объектида ўтказилиши режалаштирилган назорат (аудит) тадбирлари такрорланмаслиги ва асосланганлиги нуқтаи назардан беш иш куни ичида кўриб чиқади.

Бунда:

давлат молиявий назорат органлари ва ички аудит хизматларининг йиллик режасида (дастурида) айни бир объектда бир хил масала юзасидан назорат (аудит) тадбирини ўтказиш режалаштирилган бўлса, ушбу назорат (аудит) тадбири такрорий ҳисобланади (бундан мавжуд жиноят ишлари доирасида ўтказиладиган назорат тадбирлари бундан мустасно) ҳамда Ҳисоб палатаси томонидан йиллик режани (дастурни) келишиш рад этилади;

давлат молиявий назорат органлари ва ички аудит хизматлари томонидан объектда назорат (аудит) тадбирини ўтказиш учун муайян асослар (қонунчиликдаги мажбурий талаб, хавф таҳлили натижалари) мавжуд бўлмаса, назорат (аудит) тадбирини ўтказиш асоссиз деб ҳисобланади ҳамда Ҳисоб палатаси томонидан йиллик режани (дастурни) келишиш рад этилади;

в) келишиш рад этилган йиллик режага (дастурга) давлат молиявий назорат органлари ва ички аудит хизматлари томонидан тегишли тузатишлар киритилган ҳолда Ҳисоб палатасига келишиш учун қайта юборилади;

г) кўриб чиқилган йиллик режа (дастур) Ҳисоб палатаси томондан келишилади;

д) Ҳисоб палатаси билан келишилган йиллик режа (дастур) давлат молиявий назорат органи, давлат органи ёки ташкилотининг раҳбари томонидан ҳар йили декабрь ойининг 25-санасига қадар тасдиқланади.

17. Давлат молиявий назорат органлари ва ички аудит хизматларининг йиллик режасига (дастурига) ўзгартириш киритиш ва тасдиқлаш ушбу Низомнинг 16-бандида назарда тутилган тартибда амалга оширилади. Бунда, Ҳисоб палатаси томонидан келишилган йиллик режага (дастурга) ўзгартиришлар давлат молиявий назорат органи, давлат органи ёки ташкилотининг раҳбари томонидан шу куннинг ўзида тасдиқланиши лозим.

Йиллик режага (дастурга) ўзгартириш киритиш асосли бўлиши лозим.

18. Давлат молиявий назорат органлари ва ички аудит хизматлари томонидан назорат (аудит) тадбирларини ўтказиш тўғрисидаги буйруқлар «Давлат аудити» дастурида яратилади ҳамда улар тасдиқланганидан сўнг ушбу дастурда автоматик равишда рўйхатга олинади ва рақам берилади.

19. «Давлат аудити» дастурида яратилган буйруқлар ушбу дастурнинг ўзида ёки «ijro.gov.uz» ижро интизоми идоралараро ҳужжат айланиш тизими орқали тасдиқланиши мумкин.

20. «Давлат аудити» дастурида рўйхатга олинмаган назорат (аудит) тадбирлари ноқонуний ҳисобланади.

21. Давлат молиявий назорат органлари ва ички аудит хизматлари томонидан ўтказилган назорат (аудит) тадбирларига доир барча ҳужжатлар ахборот тизимида жамланади, бундан давлат сири ёки қонун билан қўриқланадиган бошқа сирни ташкил этувчи маълумотлар мустасно.

Бунда, назорат (аудит) тадбирлари ҳисоботи (далолатнома, маълумотнома) тасдиқланганидан сўнг назорат (аудит) тадбирига оид ҳужжатлар ва маълумотлар уч иш кунидан кечиктирмасдан «Давлат аудити» дастурига киритилиши лозим.

22. Ички аудит хизматлари томонидан Ҳисоб палатасининг «Масофавий аудит» ахборот тизими орқали юборилган риск-таҳлилларни ўрганиш натижалари тўғрисидаги маълумотлар ўн кун ичида «Давлат аудити» дастурига киритилади.

23. Ички аудит хизматлари «Давлат аудити» дастури орқали бир иш куни ичида қуйидаги ҳолатлар юзасидан Ўзбекистон Республикаси Бош прокуратураси ҳузуридаги Иқтисодий жиноятларга қарши курашиш департаментининг Давлат молиявий назорати инспекциясини хабардор қилади:

ўзи аниқлаган ва ваколати доирасида ҳал этиш имкони бўлмаган бюджет тўғрисидаги қонунчилик ҳужжатларининг бузилиш ҳолатлари;

аниқланган бюджет тўғрисидаги қонунчилик ҳужжатларининг бузилиш ҳолатлари, молиявий хато ва камчиликлар, мақсадсиз ва ноқонуний харажатлар, пул маблағлари ва товар-моддий бойликлар камомади;

жиноят аломатлари, коррупцияга доир ҳуқуқбузарликлар аломатлари (шу жумладан, ички аудит тадбирини амалга оширган шахслар томонидан) аниқланган тақдирда, тегишли чоралар кўриш (ҳужжатлаштириш, олдини олиш чораларини кўриш) ва ҳуқуқни муҳофаза қилувчи органларга материалларни юбориш юзасидан.

24. Назорат (аудит) тадбирлари материалларининг ҳуқуқни муҳофаза қилувчи органларга юборилганлиги, тузилган маъмурий баённомалар ва судлар томонидан қўлланилган маъмурий жазо чоралари тўғрисидаги маълумотлар оператор томонидан «Давлат аудити» дастурига уч иш куни ичида киритилади.

25. «Давлат аудити» дастури орқали фуқаролар иштирокидаги аудит ўтказиладиган объектларни ва давлат молиявий назорати органлари фаолияти самарадорлигини жамоатчилик томонидан баҳолаш Ўзбекистон Республикаси Вазирлар Маҳкамасининг 2022 йил 10 июндаги 326-сон «Фуқаролар иштирокидаги аудит ўтказиладиган объектни аниқлаш ва давлат молиявий назорати органлари фаолияти самарадорлигини жамоатчилик томонидан баҳолаб бориш тартиби тўғрисидаги низомни тасдиқлаш ҳақида»ги қарорига асосан аниқланади ҳамда натижалари эълон қилиб борилади.

26. Назорат (аудит) тадбирлари натижалари бўйича назорат (аудит) объектларига ёки улардан юқори турувчи органларга киритиладиган кўрсатма, тақдимнома, таклиф ва тавсиялар «Давлат аудити» дастури орқали юборилади ҳамда уларнинг ижроси давлат молиявий назорат органлари ва ички аудит хизматлари томонидан мониторинг қилинади.

27. Назорат (аудит) тадбирлари натижалари ҳамда давлат молиявий назорат органлари ва ички аудит хизматларининг самарадорлиги бўйича ҳисоботлар «Давлат аудити» дастурига киритилган маълумотлар асосида автоматик равишда шаклланади.

28. «Давлат аудити» дастурига маълумотларнинг ўз вақтида ва тўғри киритилишини таъминлашга давлат молиявий назорат органлари ҳамда ички аудит хизмати раҳбарлари масъул ҳисобланади.

4-боб. Техник администраторнинг вазифалари

29. Техник администратор «Давлат аудити» дастурини техник қўллаб-қувватлаш ва ахборот хавфсизлиги учун масъул ҳисобланади.

30. Қуйидагилар техник администраторнинг вазифалари ҳисобланади:

техник қўллаб-қувватлаш орқали «Давлат аудити» дастурининг барқарор, узлуксиз ва самарали ишлашини таъминлаш;

тизимнинг норматив-ҳуқуқий ҳужжатлар, ахборот хавфсизлиги бўйича техник жиҳатдан тартибга солиш соҳасидаги норматив ҳужжатлар асосида фаолият юритишини таъминлаш;

тизимнинг ахборот хавфсизлигини ҳамда маълумотларнинг тўлиқлигини таъминлаш;

Ҳисоб палатаси томонидан тақдим этилган таклифлар асосида «Давлат аудити» дастурини такомиллаштириш ва унинг техник созламаларини ўзгартириш.

5-боб. Операторнинг вазифалари, ҳуқуқлари ва мажбуриятлари

31. «Давлат аудити» дастурида ҳужжатлар ва маълумотларни яратиш, киритиш, юклаш, таҳрирлаш, қайта ишлаш, юбориш, ҳисобини юритиш ва ҳисоботлар чиқариш оператор томонидан амалга оширилади.

32. Қуйидагилар операторнинг вазифалари ҳисобланади:

давлат молиявий назорат органлари ҳамда давлат органлари ва ташкилотларига оид мазкур Низомнинг 15-бандида назарда тутилган маълумотларни ўз вақтида киритиш, янгилаш ва таҳрир қилиш;

назорат (аудит) тадбирлари тўғрисидаги ҳужжатлар ва маълумотларни ўз вақтида яратиш, киритиш, юклаш, таҳрирлаш, қайта ишлаш, юбориш ва қабул қилиш;

аниқланган хатолар ёки носозликлар ҳақида Ҳисоб палатасига хабар бериш.

33. Оператор:

ўз ваколатлари доирасида «Давлат аудити» дастуридан фойдаланиш;

хизмат вазифалари учун зарур бўлган маълумотларни олиш;

администратордан ва техник администратордан ёрдам сўраш;

«Давлат аудити» дастури бўйича таклифлар киритиш ҳуқуқига эга.

34. Оператор:

ахборот хавфсизлиги қоидаларига риоя қилиш;

«Давлат аудити» дастури орқали қонунчиликка зид ҳаракатларни амалга оширмаслик;

киритилган ҳужжат ва маълумотларнинг ўз вақтида киритилиши, ҳаққонийлиги, тўлиқлиги ва тўғрилигини таъминлаш;

Ҳисоб палатасининг мазкур Низомда назарда тутилган қонуний талабларига амал қилишга мажбур.

6-боб. Якуний қоида

35. Мазкур Низом талабларининг бузилишида айбдор бўлган шахслар қонунчиликка мувофиқ жавобгар бўладилар.

Раис биринчи ўринбосари М. АБДУЛЛАЕВ

Рақамли технологиялар вазири Ш. ШЕРМАТОВ

Ўзбекистон Республикаси Бош прокурори Н. ЙЎЛДОШЕВ

Иқтисодиёт ва молия вазири Ж. КУЧКАРОВ

Тошкент ш.,

2025 йил 5 ноябрь,

2025 йил 16 октябрь

2025 йил 13 октябрь

2025 йил 6 октябрь

95-сон

(Қонунчилик маълумотлари миллий базаси, 14.11.2025 й., 10/25/3704/1049-сон)

lex.uz

OʻZBEKISTON RESPUBLIKASI HISOB PALATASINING

QARORI

NIZOM

Davlat moliyaviy nazorat organlari va ichki audit xizmatlari tomonidan Oʻzbekiston Respublikasi Hisob palatasining “Davlat auditi” dasturiy kompleksidan foydalanish tartibi toʻgʻrisidagi nizomni tasdiqlash haqida

Oʻzbekiston Respublikasi Prezidentining 2021-yil 27-avgustdagi PF-6300-son “ Davlat moliyaviy nazorati tizimini yanada takomillashtirish chora-tadbirlari toʻgʻrisida ”gi va 2024-yil 10-iyuldagi PF-100-son “ Budjet mablagʻlaridan foydalanish ustidan moliyaviy nazoratni kuchaytirish boʻyicha qoʻshimcha chora-tadbirlar toʻgʻrisida ”gi farmonlariga muvofiq Oʻzbekiston Respublikasi Hisob palatasi qaror qiladi:

1. Davlat moliyaviy nazorat organlari va ichki audit xizmatlari tomonidan Oʻzbekiston Respublikasi Hisob palatasining “Davlat auditi” dasturiy kompleksidan foydalanish tartibi toʻgʻrisidagi nizom ilovaga muvofiq tasdiqlansin.

2. Mazkur qaror Oʻzbekiston Respublikasi Iqtisodiyot va moliya vazirligi, Raqamli texnologiyalar vazirligi va Oʻzbekiston Respublikasi Bosh prokuraturasi bilan kelishilgan.

3. Mazkur qaror rasmiy eʼlon qilingan kundan eʼtiboran kuchga kiradi.

Kelishildi:

Oʻzbekiston Respublikasi Hisob palatasining 2025-yil 5-noyabrdagi 95-son qaroriga ILOVA

Davlat moliyaviy nazorat organlari va ichki audit xizmatlari tomonidan Oʻzbekiston Respublikasi Hisob palatasining “Davlat auditi” dasturiy kompleksidan foydalanish tartibi toʻgʻrisidagi

Mazkur Nizom davlat moliyaviy nazorat organlari va ichki audit xizmatlari tomonidan Oʻzbekiston Respublikasi Hisob palatasining (bundan buyon matnda Hisob palatasi deb yuritiladi) “Davlat auditi” dasturiy kompleksidan foydalanish tartibini belgilaydi.

1-bob. Umumiy qoidalar

1. Mazkur Nizomda quyidagi asosiy tushunchalar qoʻllaniladi:

“Davlat auditi” dasturiy kompleksi (bundan buyon matnda “Davlat auditi” dasturi deb yuritiladi) — davlat moliyaviy nazorat organlari va ichki audit xizmatlarining nazorat (audit) tadbirlarini roʻyxatga olish, nazorat (audit) tadbirlarining natijalarini jamlash, saqlash, ishlov berish hamda hisobotlar shakllantirish imkonini beruvchi Hisob palatasining axborot tizimi;

davlat moliyaviy nazorat organlari — Oʻzbekiston Respublikasi Hisob palatasi, Oʻzbekiston Respublikasi Iqtisodiyot va moliya vazirligi hamda uning tasarrufidagi vakolatli organlar va Oʻzbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish departamentining Davlat moliyaviy nazorati inspeksiyasi;

davlat organlari va tashkilotlari — ichki audit xizmati tashkil etilgan respublika ijro etuvchi hokimiyat organlari, davlat maqsadli jamgʻarmalari, Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari hamda boshqa budjet tashkilotlari;

ichki audit xizmati — davlat organlari va tashkilotlarida ichki audit faoliyatini amalga oshiruvchi hamda boshqa tarkibiy tuzilmalardan mustaqil tarkibiy boʻlinma;

nazorat (audit) tadbirlari — davlat moliyaviy nazorat organlari va ichki audit xizmatlari xodimlari tomonidan davlat moliyaviy nazorati va ichki audit xizmati maqsadlariga erishishga qaratilgan nazorat (audit) obyektida, shu jumladan masofaviy ravishda amalga oshiriladigan jarayon;

nazorat (audit) tadbirlari natijalari — davlat moliyaviy nazorat organlari va ichki audit xizmati xodimlari tomonidan nazorat (audit) obyektlarida, shu jumladan masofaviy ravishda oʻtkazilgan nazorat (audit) tadbirlarida aniqlanib, ularning yakuni boʻyicha rasmiylashtirilgan hujjatlarda aks ettirilgan maʼlumotlar;

foydalanuvchi subyektlar — “Davlat auditi” dasturidan foydalanuvchi davlat moliyaviy nazorat organlari hamda ichki audit xizmati xodimlari;

administrator — “Davlat auditi” dasturiga huquqiy egalik qiluvchi, kirish huquqlarini va undan foydalanishni boshqaruvchi va nazorat qiluvchi Hisob palatasi;

texnik administrator — “Davlat auditi” dasturini texnik qoʻllab-quvvatlash va takomillashtirib borishni amalga oshiruvchi tashkilot;

operator — davlat moliyaviy nazorat organlari hamda ichki audit xizmatining “Davlat auditi” dasturida roʻyxatdan oʻtgan va hujjatlarni yaratish, maʼlumotlarni kiritish, tahrirlash, yangilab borish, hisobini yuritish va boshqa amallarni bajarish vakolati berilgan masʼul xodimlari.

2. “Davlat auditi” dasturidan foydalanishning maqsadi davlat organlari va tashkilotlarida budjet toʻgʻrisidagi qonunchilik hujjatlarining buzilish holatlarini tahlil qilish, takroriy va asossiz moliyaviy nazorat (audit) tadbirlarining oldini olish maqsadida ularning samaradorligini oshirish uchun davlat moliyaviy nazorat organlari va ichki audit xizmatlarining nazorat (audit) tadbirlariga doir maʼlumotlarni toʻplash, qayta ishlash, saqlash orqali hisob va hisobot jarayonini avtomatlashtirishdan iborat.

3. Quyidagilar “Davlat auditi” dasturidan foydalanishning asosiy vazifalari hisoblanadi:

nazorat (audit) tadbirlarini roʻyxatga olish;

davlat moliyaviy nazorat organlari va ichki audit xizmatlarining yillik ish rejalariga kiritiladigan nazorat (audit) tadbirlarini majburiy tartibda Hisob palatasi bilan kelishish;

davlat moliyaviy nazorat organlari va ichki audit xizmatlarining nazorat (audit) obyektlari, shuningdek davlat organlari va tashkilotlari toʻgʻrisida maʼlumotlar (vazifa va funksiyalari, tashkiliy tuzilmasi, shtat birliklari, xodimlar) bazasini shakllantirish;

nazorat (audit) tadbirlari natijalarini toʻplash, saqlash va qayta ishlash orqali hisobotlarni shakllantirish;

nazorat (audit) obyektlari tomonidan nazorat (audit) tadbirlari boʻyicha yozma fikr bildirish;

fuqarolar ishtirokida oʻtkaziladigan nazorat (audit) obyektlarini aniqlash;

nazorat (audit) obyektlariga koʻrsatmalar yuborish va ularning ijrosini nazorat qilish;

nazorat (audit) tadbirlari natijalari yuzasidan tegishli davlat organlariga xabarnomalar yuborish imkonini yaratish.

2-bob. Foydalanuvchi subyektlarni “Davlat auditi” dasturida roʻyxatdan oʻtkazish

4. “Davlat auditi” dasturida quyidagilar foydalanuvchi subyektlar sifatida roʻyxatdan oʻtkaziladi va ularga quyidagi kirish huquqlari beriladi:

davlat moliyaviy nazorat organlari hamda davlat organlari va tashkilotlarining rahbari va oʻrinbosari uchun — “tasdiqlovchi” huquqi;

davlat moliyaviy nazorat organlari hamda davlat organlari va tashkilotlari rahbari oʻrinbosari, tarkibiy boʻlinmalari boshliqlari uchun — “maʼqullovchi” huquqi;

davlat moliyaviy nazorat organlari hamda ichki audit xizmati xodimlari (2 nafargacha) uchun — “operator” huquqi;

davlat moliyaviy nazorat organlari hamda ichki audit xizmatining “operator” huquqi berilmagan xodimlari uchun — “foydalanuvchi” huquqi.

5. Davlat moliyaviy nazorat organlari hamda davlat organlari va tashkilotlari tomonidan “Davlat auditi” dasturida roʻyxatdan oʻtkazish uchun Hisob palatasiga soʻrovnoma taqdim etiladi. Soʻrovnomada quyidagilar koʻrsatilishi lozim:

foydalanuvchi subyektlarning familiyasi, ismi va otasining ismi;

foydalanuvchi subyektlarning lavozimi va ular faoliyat yurituvchi boʻlinmaning nomi;

foydalanuvchi subyektlarning pasport (ID-karta) seriyasi va raqami;

jismoniy shaxsning shaxsiy identifikatsiya raqami (JSHSHIR);

mazkur Nizomning 4-bandida nazarda tutilgan kirish huquqlari roʻyxati;

Oʻzbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish departamentining Davlat moliyaviy nazorati inspeksiyasi hamda davlat organlari va tashkilotlarining ichki audit xizmatlari xodimlarining malaka sertifikati raqami;

foydalanuvchi subyektlarning elektron pochta manzili.

6. “Davlat auditi” dasturida xodimlarni operator sifatida roʻyxatdan oʻtkazish va shaxsiy kabinetni ochish uchun davlat moliyaviy nazorat organlari hamda davlat organlari va tashkilotlari rahbarining xodimga “operator” vazifasi yuklatilgan buyrugʻi nusxasi soʻrovnomaga ilova qilinishi lozim.

7. Foydalanuvchi subyektlarni “Davlat auditi” dasturida roʻyxatdan oʻtkazish soʻrovnoma taqdim etilgan kundan boshlab ikki ish kunidan kechiktirmasdan Hisob palatasi tomonidan amalga oshiriladi.

8. Taqdim etilgan soʻrovnomada mazkur Nizomning 5-bandida nazarda tutilgan maʼlumotlar boʻlmasa yoki toʻliq koʻrsatilmagan boʻlsa Hisob palatasi tomonidan foydalanuvchi subyektlarni “Davlat auditi” dasturida roʻyxatdan oʻtkazish rad etiladi.

9. Davlat moliyaviy nazorat organlari hamda davlat organlari va tashkilotlarining foydalanuvchi subyektlarini roʻyxatdan oʻtkazish uchun kamchiliklarni bartaraf etgan holda takroran soʻrovnoma taqdim etishi mumkin.

10. Mazkur Nizomning 8-bandida koʻrsatilgan roʻyxatdan oʻtkazishni rad etish asoslari mavjud boʻlmasa, foydalanuvchi subyektlar “Davlat auditi” dasturida roʻyxatdan oʻtkaziladi hamda shaxsiy kabinet ochiladi.

11. Foydalanuvchi subyektlarning “Davlat auditi” dasturidagi shaxsiy kabinetida quyidagi maʼlumotlar saqlanishi shart:

foydalanuvchi subyektning identifikatori (ID-raqami);

shaxsiy kabinetning yaratilgan sanasi va vaqti;

foydalanuvchi subyektning lavozimi va shaxsini tasdiqlovchi hujjat maʼlumotlari.

12. “Davlat auditi” dasturidan roʻyxatdan oʻtkazilgan foydalanuvchi subyektlar ushbu dasturdagi shaxsiy kabinetiga Yagona identifikatsiya tizimi (OneID) yoki elektron raqamli imzo orqali kirish huquqiga ega boʻladi, bunda dasturga oʻziga tegishli boʻlmagan Yagona identifikatsiya tizimi (OneID) yoki elektron raqamli imzo orqali kirish taqiqlanadi.

13. Davlat moliyaviy nazorat organlari, davlat organlari va tashkilotlari foydalanuvchi subyektlari bilan mehnat shartnomasi bekor qilinganda, ular boshqa lavozimga oʻtkazilganda yoki ularning “Davlat auditi” dasturidan foydalanish huquqi bekor qilinishi yoxud oʻzgarishiga sabab boʻladigan boshqa holatlar yuz bergan vaqtdan boshlab bir ish kuni ichida Hisob palatasini yozma xabardor qilishi kerak.

Bunda, Hisob palatasi tomonidan yigirma toʻrt soat ichida foydalanuvchi subyektlarning “Davlat auditi” dasturiga kirish huquqlari yangilanadi yoki ularning shaxsiy kabineti bloklanadi hamda arxivga koʻchiriladi va kamida bir yil davomida saqlanadi.

14. “Davlat auditi” dasturidan foydalanish huquqi bekor qilingan shaxslar oʻrniga boshqa foydalanuvchi subyektlarni roʻyxatdan oʻtkazish ushbu bobda belgilangan tartibda amalga oshiriladi.

3-bob. “Davlat auditi” dasturidan foydalanish tartibi

15. Foydalanuvchi subyektlar “Davlat auditi” dasturidan roʻyxatdan oʻtkazilgandan soʻng uch ish kuni ichida operator tomonidan ushbu dasturga tegishli davlat moliyaviy nazorat organi, davlat organi yoki tashkilotining nomi, soliq toʻlovchining identifikatsiya raqami, manzili, vazifa va funksiyalari, tarkibiy tuzilmasi, shtat jadvali, davlat moliyaviy nazorat organi yoki ichki audit xizmati xodimlari tarkibi toʻgʻrisidagi maʼlumotlar kiritiladi hamda doimiy ravishda yangilab boriladi.

16. Davlat moliyaviy nazorat organlari va ichki audit xizmatlarining kelgusi yil uchun yillik rejalari (dasturlari) loyihalarini “Davlat auditi” dasturida shakllantirish, kelishish va tasdiqlash quyidagi tartibda amalga oshiriladi:

a) kelgusi yil uchun yillik reja (dastur) loyihasi har yili dekabr oyining 10-sanasiga qadar shakllantiriladi va Hisob palatasiga kelishish uchun yoʻnaltiriladi;

b) Hisob palatasi kelishish uchun kelib tushgan yillik reja (dastur) loyihasini nazorat (audit) obyektida oʻtkazilishi rejalashtirilgan nazorat (audit) tadbirlari takrorlanmasligi va asoslanganligi nuqtai nazardan besh ish kuni ichida koʻrib chiqadi.

Bunda:

davlat moliyaviy nazorat organlari va ichki audit xizmatlarining yillik rejasida (dasturida) ayni bir obyektda bir xil masala yuzasidan nazorat (audit) tadbirini oʻtkazish rejalashtirilgan boʻlsa, ushbu nazorat (audit) tadbiri takroriy hisoblanadi (bundan mavjud jinoyat ishlari doirasida oʻtkaziladigan nazorat tadbirlari bundan mustasno) hamda Hisob palatasi tomonidan yillik rejani (dasturni) kelishish rad etiladi;

davlat moliyaviy nazorat organlari va ichki audit xizmatlari tomonidan obyektda nazorat (audit) tadbirini oʻtkazish uchun muayyan asoslar (qonunchilikdagi majburiy talab, xavf tahlili natijalari) mavjud boʻlmasa, nazorat (audit) tadbirini oʻtkazish asossiz deb hisoblanadi hamda Hisob palatasi tomonidan yillik rejani (dasturni) kelishish rad etiladi;

v) kelishish rad etilgan yillik rejaga (dasturga) davlat moliyaviy nazorat organlari va ichki audit xizmatlari tomonidan tegishli tuzatishlar kiritilgan holda Hisob palatasiga kelishish uchun qayta yuboriladi;

g) koʻrib chiqilgan yillik reja (dastur) Hisob palatasi tomondan kelishiladi;

d) Hisob palatasi bilan kelishilgan yillik reja (dastur) davlat moliyaviy nazorat organi, davlat organi yoki tashkilotining rahbari tomonidan har yili dekabr oyining 25-sanasiga qadar tasdiqlanadi.

17. Davlat moliyaviy nazorat organlari va ichki audit xizmatlarining yillik rejasiga (dasturiga) oʻzgartirish kiritish va tasdiqlash ushbu Nizomning 16-bandida nazarda tutilgan tartibda amalga oshiriladi. Bunda, Hisob palatasi tomonidan kelishilgan yillik rejaga (dasturga) oʻzgartirishlar davlat moliyaviy nazorat organi, davlat organi yoki tashkilotining rahbari tomonidan shu kunning oʻzida tasdiqlanishi lozim.

Yillik rejaga (dasturga) oʻzgartirish kiritish asosli boʻlishi lozim.

18. Davlat moliyaviy nazorat organlari va ichki audit xizmatlari tomonidan nazorat (audit) tadbirlarini oʻtkazish toʻgʻrisidagi buyruqlar “Davlat auditi” dasturida yaratiladi hamda ular tasdiqlanganidan soʻng ushbu dasturda avtomatik ravishda roʻyxatga olinadi va raqam beriladi.

19. “Davlat auditi” dasturida yaratilgan buyruqlar ushbu dasturning oʻzida yoki “ijro.gov.uz” ijro intizomi idoralararo hujjat aylanish tizimi orqali tasdiqlanishi mumkin.

20. “Davlat auditi” dasturida roʻyxatga olinmagan nazorat (audit) tadbirlari noqonuniy hisoblanadi.

21. Davlat moliyaviy nazorat organlari va ichki audit xizmatlari tomonidan oʻtkazilgan nazorat (audit) tadbirlariga doir barcha hujjatlar axborot tizimida jamlanadi, bundan davlat siri yoki qonun bilan qoʻriqlanadigan boshqa sirni tashkil etuvchi maʼlumotlar mustasno.

Bunda, nazorat (audit) tadbirlari hisoboti (dalolatnoma, maʼlumotnoma) tasdiqlanganidan soʻng nazorat (audit) tadbiriga oid hujjatlar va maʼlumotlar uch ish kunidan kechiktirmasdan “Davlat auditi” dasturiga kiritilishi lozim.

22. Ichki audit xizmatlari tomonidan Hisob palatasining “Masofaviy audit” axborot tizimi orqali yuborilgan risk-tahlillarni oʻrganish natijalari toʻgʻrisidagi maʼlumotlar oʻn kun ichida “Davlat auditi” dasturiga kiritiladi.

23. Ichki audit xizmatlari “Davlat auditi” dasturi orqali bir ish kuni ichida quyidagi holatlar yuzasidan Oʻzbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish departamentining Davlat moliyaviy nazorati inspeksiyasini xabardor qiladi:

oʻzi aniqlagan va vakolati doirasida hal etish imkoni boʻlmagan budjet toʻgʻrisidagi qonunchilik hujjatlarining buzilish holatlari;

aniqlangan budjet toʻgʻrisidagi qonunchilik hujjatlarining buzilish holatlari, moliyaviy xato va kamchiliklar, maqsadsiz va noqonuniy xarajatlar, pul mablagʻlari va tovar-moddiy boyliklar kamomadi;

jinoyat alomatlari, korrupsiyaga doir huquqbuzarliklar alomatlari (shu jumladan, ichki audit tadbirini amalga oshirgan shaxslar tomonidan) aniqlangan taqdirda, tegishli choralar koʻrish (hujjatlashtirish, oldini olish choralarini koʻrish) va huquqni muhofaza qiluvchi organlarga materiallarni yuborish yuzasidan.

24. Nazorat (audit) tadbirlari materiallarining huquqni muhofaza qiluvchi organlarga yuborilganligi, tuzilgan maʼmuriy bayonnomalar va sudlar tomonidan qoʻllanilgan maʼmuriy jazo choralari toʻgʻrisidagi maʼlumotlar operator tomonidan “Davlat auditi” dasturiga uch ish kuni ichida kiritiladi.

25. “Davlat auditi” dasturi orqali fuqarolar ishtirokidagi audit oʻtkaziladigan obyektlarni va davlat moliyaviy nazorati organlari faoliyati samaradorligini jamoatchilik tomonidan baholash Oʻzbekiston Respublikasi Vazirlar Mahkamasining 2022-yil 10-iyundagi 326-son “Fuqarolar ishtirokidagi audit oʻtkaziladigan obyektni aniqlash va davlat moliyaviy nazorati organlari faoliyati samaradorligini jamoatchilik tomonidan baholab borish tartibi toʻgʻrisidagi nizomni tasdiqlash haqida”gi qaroriga asosan aniqlanadi hamda natijalari eʼlon qilib boriladi.

26. Nazorat (audit) tadbirlari natijalari boʻyicha nazorat (audit) obyektlariga yoki ulardan yuqori turuvchi organlarga kiritiladigan koʻrsatma, taqdimnoma, taklif va tavsiyalar “Davlat auditi” dasturi orqali yuboriladi hamda ularning ijrosi davlat moliyaviy nazorat organlari va ichki audit xizmatlari tomonidan monitoring qilinadi.

27. Nazorat (audit) tadbirlari natijalari hamda davlat moliyaviy nazorat organlari va ichki audit xizmatlarining samaradorligi boʻyicha hisobotlar “Davlat auditi” dasturiga kiritilgan maʼlumotlar asosida avtomatik ravishda shakllanadi.

28. “Davlat auditi” dasturiga maʼlumotlarning oʻz vaqtida va toʻgʻri kiritilishini taʼminlashga davlat moliyaviy nazorat organlari hamda ichki audit xizmati rahbarlari masʼul hisoblanadi.

4-bob. Texnik administratorning vazifalari

29. Texnik administrator “Davlat auditi” dasturini texnik qoʻllab-quvvatlash va axborot xavfsizligi uchun masʼul hisoblanadi.

30. Quyidagilar texnik administratorning vazifalari hisoblanadi:

texnik qoʻllab-quvvatlash orqali “Davlat auditi” dasturining barqaror, uzluksiz va samarali ishlashini taʼminlash;

tizimning normativ-huquqiy hujjatlar, axborot xavfsizligi boʻyicha texnik jihatdan tartibga solish sohasidagi normativ hujjatlar asosida faoliyat yuritishini taʼminlash;

tizimning axborot xavfsizligini hamda maʼlumotlarning toʻliqligini taʼminlash;

Hisob palatasi tomonidan taqdim etilgan takliflar asosida “Davlat auditi” dasturini takomillashtirish va uning texnik sozlamalarini oʻzgartirish.

5-bob. Operatorning vazifalari, huquqlari va majburiyatlari

31. “Davlat auditi” dasturida hujjatlar va maʼlumotlarni yaratish, kiritish, yuklash, tahrirlash, qayta ishlash, yuborish, hisobini yuritish va hisobotlar chiqarish operator tomonidan amalga oshiriladi.

32. Quyidagilar operatorning vazifalari hisoblanadi:

davlat moliyaviy nazorat organlari hamda davlat organlari va tashkilotlariga oid mazkur Nizomning 15-bandida nazarda tutilgan maʼlumotlarni oʻz vaqtida kiritish, yangilash va tahrir qilish;

nazorat (audit) tadbirlari toʻgʻrisidagi hujjatlar va maʼlumotlarni oʻz vaqtida yaratish, kiritish, yuklash, tahrirlash, qayta ishlash, yuborish va qabul qilish;

aniqlangan xatolar yoki nosozliklar haqida Hisob palatasiga xabar berish.

33. Operator:

oʻz vakolatlari doirasida “Davlat auditi” dasturidan foydalanish;

xizmat vazifalari uchun zarur boʻlgan maʼlumotlarni olish;

administratordan va texnik administratordan yordam soʻrash;

“Davlat auditi” dasturi boʻyicha takliflar kiritish huquqiga ega.

34. Operator:

axborot xavfsizligi qoidalariga rioya qilish;

“Davlat auditi” dasturi orqali qonunchilikka zid harakatlarni amalga oshirmaslik;

kiritilgan hujjat va maʼlumotlarning oʻz vaqtida kiritilishi, haqqoniyligi, toʻliqligi va toʻgʻriligini taʼminlash;

Hisob palatasining mazkur Nizomda nazarda tutilgan qonuniy talablariga amal qilishga majbur.

6-bob. Yakuniy qoida

35. Mazkur Nizom talablarining buzilishida aybdor boʻlgan shaxslar qonunchilikka muvofiq javobgar boʻladilar.

Rais birinchi oʻrinbosari M. ABDULLAYEV

Raqamli texnologiyalar vaziri Sh. SHERMATOV

Oʻzbekiston Respublikasi Bosh prokurori N. YOʻLDOSHEV

Iqtisodiyot va moliya vaziri J. KUCHKAROV

Toshkent sh.,

2025-yil 5-noyabr,

2025-yil 16-oktabr

2025-yil 13-oktabr

2025-yil 6-oktabr

95-son

(Qonunchilik maʼlumotlari milliy bazasi, 14.11.2025-y., 10/25/3704/1049-son)

lex.uz