📅 2025-yil 14-noyabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2025 йил 14 ноябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 14 ноября 2025 г. · Постановления Кабинета Министров
Официальный текст. Официальный документ. Редакционные примечания не включены.
📅 14 November 2025 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Қорақалпоғистон Республикасида аҳолини мунтазам жамоат транспорти хизмати билан таъминлаш тизимини такомиллаштириш чора-тадбирлари тўғрисида
Олис ҳудудлардаги аҳолини жамоат транспорти хизмати билан таъминлаш ва жамоат транспорти йўналишлари тармоғини кенгайтириш мақсадида Вазирлар Маҳкамаси қарор қилади:
1. Қорақалпоғистон Республикасида туманлар марказларини олис ҳудудлар билан боғловчи шаҳар атрофи ёки вилоят ичидаги шаҳарлараро норентабель мунтазам микроавтобус йўналишларида кўрилган зарарларни қоплаб беришга рухсат берилсин.
Бунда Қорақалпоғистон Республикаси Вазирлар Кенгаши томонидан ҳар йили 1 январга қадар Қорақалпоғистон Республикасида туманлар марказларини олис ҳудудлар билан боғловчи норентабель мунтазам микроавтобус йўналишлари (кейинги ўринларда — норентабель микроавтобус йўналишлари) рўйхати тасдиқланади.
2. Транспорт вазирлиги Рақамли технологиялар вазирлиги билан биргаликда икки ой муддатда:
норентабель микроавтобус йўналишларида кўрилган зарарларни қоплаб бериш бўйича давлат хизматларининг Ўзбекистон Республикаси Ягона интерактив давлат хизматлари портали (кейинги ўринларда — ЯИДХП) орқали жорий этилишини;
ЯИДХП орқали келиб тушган аризаларни кўриб чиқишни «UzTrans» ягона интерактив ахборот тизими орқали амалга ошириш имконияти яратилишини таъминласин. Бунда:
ташувчилар норентабель микроавтобус йўналишларида кўрилган зарарларни қоплаб бериш юзасидан ЯИДХП орқали 2026 йил 1 февралдан бошлаб мурожаат қиладилар;
норентабель микроавтобус йўналишларида кўрилган зарарларни қоплаб беришда талаб этиладиган маълумотларни (ҳужжатларни) кўриб чиқиш учун йиғим ундирилмайди.
3. Норентабель микроавтобус йўналишларидан кўриладиган зарарлар, зарур маблағларни Қорақалпоғистон Республикаси республика бюджети параметрларида назарда тутган ҳолда, Қорақалпоғистон Республикасининг республика бюджетининг қўшимча манбалари ҳисобидан ҳар чорак якуни бўйича субсидия ажратиш йўли билан қопланади.
4. Ўзбекистон Республикаси Ҳукуматининг иловага мувофиқ айрим қарорларига ўзгартириш ва қўшимчалар киритилсин.
5. Ушбу қарорнинг бажарилишини назорат қилиш Ўзбекистон Республикаси Бош вазирининг ўринбосари А.Ж. Раматов ҳамда транспорт вазири И.Р. Махкамов зиммасига юклансин.
Вазирлар Маҳкамасининг 2025 йил 14 ноябрдаги 725-сон қарорига ИЛОВА
Ўзбекистон Республикаси Ҳукуматининг айрим қарорларига киритилаётган ўзгартириш ва қўшимчалар
1. Вазирлар Маҳкамасининг «Ҳудудларда жамоат транспорти фаолиятини янада такомиллаштириш чора-тадбирлари тўғрисида» 2021 йил 8 октябрдаги 630-сон қарорида :
а) 4-бандда :
қуйидаги мазмундаги учинчи хатбоши билан тўлдирилсин:
«Қорақалпоғистон Республикасида, истисно тариқасида, тижорат асосида йўловчилар ташиш хизматини кўрсатадиган ва бунга махсус рухсатномаси (лицензияси) бўлган юридик шахслар томонидан шаҳар атрофи ёки вилоят ичидаги шаҳарлараро автобус ва микроавтобус йўналишида кўриладиган зарар миқдори 40 фоизгача (40 фоиз ҳам шу жумлага киради) бўлган йўналиш норентабель йўналиш ҳисобланади»;
учинчи ва тўртинчи хатбошилар тегишлича тўртинчи ва бешинчи хатбошилар деб ҳисоблансин;
б) 6-банднинг иккинчи хатбошисидаги «автобус йўналишида» сўзлари «автобус ва микроавтобус йўналишларида» сўзлари билан алмаштирилсин.
2. Вазирлар Маҳкамасининг «Шаҳар атрофи ва вилоят ичи шаҳарлараро мунтазам автобус йўналишларида кўрилган зарарларни қоплаб бериш тизимини такомиллаштириш чора-тадбирлари тўғрисида» 2024 йил 30 октябрдаги 718-сон қарорининг 1-банди қуйидаги мазмундаги хатбоши билан тўлдирилсин:
«Белгилансинки, Қорақалпоғистон Республикасида шаҳар атрофи ёки вилоят ичидаги шаҳарлараро норентабель микроавтобус йўналишларида кўрилган зарарлар Маъмурий регламентда белгиланган тартибда қоплаб берилади».
Ўзбекистон Республикасининг Бош вазири А. АРИПОВ
Тошкент ш.,
2025 йил 14 ноябрь,
725-сон
Oʻzbekiston Respublikasi Vazirlar Mahkamasining
qarori
Qoraqalpogʻiston Respublikasida aholini muntazam jamoat transporti xizmati bilan taʼminlash tizimini takomillashtirish chora-tadbirlari toʻgʻrisida
Olis hududlardagi aholini jamoat transporti xizmati bilan taʼminlash va jamoat transporti yoʻnalishlari tarmogʻini kengaytirish maqsadida Vazirlar Mahkamasi qaror qiladi:
1. Qoraqalpogʻiston Respublikasida tumanlar markazlarini olis hududlar bilan bogʻlovchi shahar atrofi yoki viloyat ichidagi shaharlararo norentabel muntazam mikroavtobus yoʻnalishlarida koʻrilgan zararlarni qoplab berishga ruxsat berilsin.
Bunda Qoraqalpogʻiston Respublikasi Vazirlar Kengashi tomonidan har yili 1-yanvarga qadar Qoraqalpogʻiston Respublikasida tumanlar markazlarini olis hududlar bilan bogʻlovchi norentabel muntazam mikroavtobus yoʻnalishlari (keyingi oʻrinlarda — norentabel mikroavtobus yoʻnalishlari) roʻyxati tasdiqlanadi.
2. Transport vazirligi Raqamli texnologiyalar vazirligi bilan birgalikda ikki oy muddatda:
norentabel mikroavtobus yoʻnalishlarida koʻrilgan zararlarni qoplab berish boʻyicha davlat xizmatlarining Oʻzbekiston Respublikasi Yagona interaktiv davlat xizmatlari portali (keyingi oʻrinlarda — YIDXP) orqali joriy etilishini;
YIDXP orqali kelib tushgan arizalarni koʻrib chiqishni “UzTrans” yagona interaktiv axborot tizimi orqali amalga oshirish imkoniyati yaratilishini taʼminlasin. Bunda:
tashuvchilar norentabel mikroavtobus yoʻnalishlarida koʻrilgan zararlarni qoplab berish yuzasidan YIDXP orqali 2026-yil 1-fevraldan boshlab murojaat qiladilar;
norentabel mikroavtobus yoʻnalishlarida koʻrilgan zararlarni qoplab berishda talab etiladigan maʼlumotlarni (hujjatlarni) koʻrib chiqish uchun yigʻim undirilmaydi.
3. Norentabel mikroavtobus yoʻnalishlaridan koʻriladigan zararlar, zarur mablagʻlarni Qoraqalpogʻiston Respublikasi respublika budjeti parametrlarida nazarda tutgan holda, Qoraqalpogʻiston Respublikasining respublika budjetining qoʻshimcha manbalari hisobidan har chorak yakuni boʻyicha subsidiya ajratish yoʻli bilan qoplanadi.
4. Oʻzbekiston Respublikasi Hukumatining ilovaga muvofiq ayrim qarorlariga oʻzgartirish va qoʻshimchalar kiritilsin.
5. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.J. Ramatov hamda transport vaziri I.R. Maxkamov zimmasiga yuklansin.
Vazirlar Mahkamasining 2025-yil 14-noyabrdagi 725-son qaroriga ILOVA
Oʻzbekiston Respublikasi Hukumatining ayrim qarorlariga kiritilayotgan oʻzgartirish va qoʻshimchalar
1. Vazirlar Mahkamasining “Hududlarda jamoat transporti faoliyatini yanada takomillashtirish chora-tadbirlari toʻgʻrisida” 2021-yil 8-oktabrdagi 630-son qarorida :
a) 4-bandda :
quyidagi mazmundagi uchinchi xatboshi bilan toʻldirilsin:
“Qoraqalpogʻiston Respublikasida, istisno tariqasida, tijorat asosida yoʻlovchilar tashish xizmatini koʻrsatadigan va bunga maxsus ruxsatnomasi (litsenziyasi) boʻlgan yuridik shaxslar tomonidan shahar atrofi yoki viloyat ichidagi shaharlararo avtobus va mikroavtobus yoʻnalishida koʻriladigan zarar miqdori 40 foizgacha (40 foiz ham shu jumlaga kiradi) boʻlgan yoʻnalish norentabel yoʻnalish hisoblanadi”;
uchinchi va toʻrtinchi xatboshilar tegishlicha toʻrtinchi va beshinchi xatboshilar deb hisoblansin;
b) 6-bandning ikkinchi xatboshisidagi “avtobus yoʻnalishida” soʻzlari “avtobus va mikroavtobus yoʻnalishlarida” soʻzlari bilan almashtirilsin.
2. Vazirlar Mahkamasining “Shahar atrofi va viloyat ichi shaharlararo muntazam avtobus yoʻnalishlarida koʻrilgan zararlarni qoplab berish tizimini takomillashtirish chora-tadbirlari toʻgʻrisida” 2024-yil 30-oktabrdagi 718-son qarorining 1-bandi quyidagi mazmundagi xatboshi bilan toʻldirilsin:
“Belgilansinki, Qoraqalpogʻiston Respublikasida shahar atrofi yoki viloyat ichidagi shaharlararo norentabel mikroavtobus yoʻnalishlarida koʻrilgan zararlar Maʼmuriy reglamentda belgilangan tartibda qoplab beriladi”.
Oʻzbekiston Respublikasining Bosh vaziri A. ARIPOV
Toshkent sh.,
2025-yil 14-noyabr,
725-son