UzbekAI

Ўзбекистон Республикаси Президентининг

Фармойиши

ТАРКИБИ

рўйхати

тартиби

рўйхати

рўйхати

Давлат корхоналарида таннархни камайтириш ва самарадорликни ошириш чора-тадбирлари тўғрисида

Глобал рақобат кучайиб бораётган ҳозирги шароитда барқарорлик ва самарадорликни таъминлаш, давлат секторида харажатларни кескин камайтириш ва ишлаб чиқаришни модернизация қилиш, давлат корхоналарида тежамкор бошқарув, рақамли иқтисодиёт ва халқаро корпоратив стандартларга асосланган иш услубини жорий этиш мақсадида қарор қиламан:

I. Мақсадлар

1. Мазкур фармойишни қабул қилишдан кўзланган асосий мақсад этиб 2026 йилда давлат улуши 50 фоиз ва ундан юқори бўлган корхоналарда (кейинги ўринларда — давлат корхоналари) маҳсулот таннархини камайтириш ва фаолияти самарадорлигини ошириш белгилансин.

II. Маҳсулот таннархини камайтириш ва меҳнат унумдорлигини ошириш

2. Давлат корхоналарида маҳсулот таннархини камайтириш ва меҳнат унумдорлигини оширишнинг қуйидаги асосий йўналишлари белгилансин:

(а) харажатларни ҳар чоракда қайта таҳлил қилиш (spending review) орқали келгуси даврдаги ҳар бир йўналиш устуворлигидан келиб чиқиб, бюджетни тўлиқ «нолдан» қайта кўриб чиқиш (zero-based budgeting) амалиётини йўлга қўйиш;

(б) моддий-техник таъминот харажатларини мақбуллаштириш — ўхшаш турдаги товар ва ресурсларни биргаликда харид қилиш орқали таннархни пасайтириш, логистика жараёнларини такомиллаштириш;

(в) ёрдамчи функция ва хизматларни аутсорсингга топшириш, асосий бўлмаган ишларга ихтисослашган ташкилотларни жалб этиб, ортиқча бошқарув харажатларини қисқартириш;

(г) тежамкор ишлаб чиқариш ва меъёрлаш тамойилларини жорий этиш, меҳнат ва ресурслар сарфи бўйича илғор меъёрларни амалиётга татбиқ қилиш орқали чиқимларни камайтириш;

(д) замонавий ахборот технологияларини жорий этиш орқали ишлаб чиқариш ва бошқарув операцияларини автоматлаштириш, самарадорликни ошириш, сунъий интеллект технологияларини жорий этиш;

(ж) бухгалтерия ҳисоби ва ҳисоботини молиявий ҳисоботнинг халқаро стандартлари (МҲХС) талаблари асосида шаффоф юритиш орқали молиявий интизомни мустаҳкамлаш;

(з) ходимлар ташаббусларини рағбатлантириш — иқтисодий самара берадиган таклифлар учун мукофотлар ва бошқа рағбатлантирувчи чораларни кўриш орқали тежамкорлик ғояларини қўллаб-қувватлаш;

(и) очиқлик ва жамоатчилик назорати — компаниянинг молиявий ва маъмурий фаолияти очиқлигини таъминлаш, жамоатчиликка ахборот етказиш ҳамда фуқаролар томонидан назорат ва фикр-мулоҳаза билдириш учун шароит яратиш;

(к) энергия самарадорлиги — энергия аудити ўтказиш орқали энергия истеъмолини таҳлил қилиш, тежамкор технологияларни жорий этиш ҳамда энергия ресурсларидан оқилона фойдаланиш;

(л) ташкилий тузилма ва кадрлар сонини мақбуллаштириш — корхоналарнинг ташкилий тузилмасини қайта кўриб чиқиш, такрорланувчи ва самарасиз лавозимларни қисқартириш ҳамда меҳнат унумдорлигини ошириш;

(м) ресурслардан фойдаланишда суиистеъмолчиликка йўл қўймаслик учун ички назорат ва комплаенс тизимини кучайтириш, молиявий операцияларнинг шаффофлигини таъминлаш.

3. Давлат корхоналари бир ой муддатда мазкур фармойишнинг 2-бандида белгиланган йўналишлар асосида таннархни камайтириш ва самарадорликни оширишга қаратилган ўз дастурларини ишлаб чиқиб, кузатув кенгашларида тасдиқласин.

4. Давлат корхоналарида таннархни камайтириш ва самарадорликни ошириш масалаларини мувофиқлаштириш бўйича республика комиссияси (кейинги ўринларда — Республика комиссияси) 1-иловага мувофиқ таркибда тузилсин ва унинг асосий вазифалари этиб қуйидагилар белгилансин:

(а) фармойиш ижросини таъминлаш доирасида давлат корхоналарида амалга ошириладиган чора-тадбирларнинг бажарилиши устидан тизимли мониторинг ва таҳлил олиб бориш;

(б) давлат корхоналарига харажатларни мақбуллаштириш ва самарадорликни ошириш бўйича дастурлар тайёрлашда методологик ёрдам бериш, ушбу йўналишда зарур услубий тавсиялар ишлаб чиқиш;

(в) харажатларни қисқартириш ва иш унумдорлигини ошириш бўйича қўшимча ички захираларни аниқлаш ҳамда улардан фойдаланиш юзасидан таклифлар тайёрлаш;

(г) тўлов тизимини такомиллаштириш орқали дебитор ва кредитор қарздорликларни камайтириш;

(д) корхоналарнинг кредит портфели бўйича мавжуд мажбуриятлари, шу жумладан, қўшимча маблағларни жалб қилиш заруратини таҳлил қилиш;

(ж) кузатув кенгашлари аъзолари томонидан уларга юклатилган вазифаларнинг ўз вақтида ва самарали амалга оширилишини таҳлил қилиш;

(з) белгиланган чораларнинг натижадорлиги юзасидан ҳар чорак якуни бўйича Ўзбекистон Республикаси Президенти Администрациясига ахборот киритиб бориш.

5. Ҳисоб палатаси (М. Абдуллаев) икки ой муддатда «UzAssets» АЖ билан унинг бошқарувидаги стратегик йирик давлат корхоналари томонидан 2026 йил учун ишлаб чиқилган бизнес-режаларни танқидий кўриб чиқиб, уларни такомиллаштириш юзасидан кузатув кенгашларига таклифлар беришни таъминласин.

6. Республика комиссияси (Ж. Қўчқоров, М. Абдуллаев) икки ой муддатда:

(а) Давлат активларини бошқариш агентлиги билан биргаликда давлат корхоналари бошқарув ходимлари сонини 10 фоизгача қисқартириш юзасидан Ўзбекистон Республикаси Президенти Администрациясига таклиф киритсин;

(б) давлат корхоналарининг кенг истеъмол товарлари бўйича умумий эҳтиёжларини қондириш мақсадида биргаликда харидларни ташкил этиш ишларини таъминласин;

(в) зарур ҳолларда, биргаликда харидларни амалга ошириш учун қонунчиликда белгиланган тартибда экспертлар, эксперт ташкилотлари ёки махсус харид ташкилотчилари (профессионал агентлар ёки харид комиссиялари) жалб этилишини таъминласин.

7. Қуйидагилар:

(а) Давлат корхоналари учун биргаликда харид қилиниши мумкин бўлган асосий товарлар рўйхати 2-иловага мувофиқ;

(б) Биргаликдаги давлат харидларини амалга оширишнинг вақтинчалик тартиби 3-иловага мувофиқ;

(в) Давлат корхоналарида аутсорсинг асосида бажарилиши лозим бўлган функция ва хизматлар рўйхати 4-иловага мувофиқ;

(г) Давлат корхоналарида рақамлаштириш жорий этиладиган жараёнлар ва ахборот технологиялари маҳсулотлари рўйхати 5-иловага мувофиқ тасдиқлансин.

8. Республика комиссиясига мазкур фармойишга 2 — 5-иловаларга давлат буюртмачиларининг асосланган таклифларидан келиб чиқиб, ўзгартириш ва қўшимчалар киритиш ваколати берилсин.

9. Давлат корхоналари Ўзбекистон Республикаси Президенти қарорлари ва топшириқларидан ташқари бошқа ҳолларда ҳомийлик ёрдамларини кўрсатишни тўхтатсин.

10. Иқтисодиёт ва молия вазирлиги, «Ўзбекистон Республикаси миллий инвестиция жамғармаси» АЖ ҳамда Давлат активларини бошқариш агентлиги:

(а) 2025 йил 1 декабрга қадар 2026 йил учун тегишли корхоналар раҳбарлари фаолиятининг энг муҳим самарадорлик кўрсаткичларини (KPI) ишлаб чиқиб, тасдиқлаш учун акциядорларнинг умумий йиғилишига киритсин;

(б) давлат корхоналари бўйича энг муҳим самарадорлик кўрсаткичлари тасдиқлангандан сўнг 2026 йил 1 февралга қадар ҳар бир давлат корхонаси бўйича акциядорлар кутилмасини тасдиқласин ҳамда энг муҳим самарадорлик кўрсаткичлари ижросини мониторинг қилиб бориш мақсадида Бошқарув самарадорлиги агентлигига киритсин.

11. Белгилансинки:

(а) 2026 йил 1 июлга қадар корхонада ERP ахборот тизимини ишга туширмаган ёки харажатларни қисқартириш бўйича мақсадли кўрсаткичларни бажармаган компания раҳбарларининг тегишли ўринбосарлари лавозимидан озод этилади;

(б) 2026 йил 1 мартдан бошлаб «UzAssets» АЖ бошқарувидаги стратегик йирик давлат корхоналарида:

(i) Бухгалтерия ҳисобини юритиш ахборот тизимида молиявий режалаштириш, харидлар, шартномалар ижроси, ғазначилик тўловлари, савдо операциялари ва комплаенс назорат қилиш имкониятини берадиган «Ягона ғазначилик» ахборот тизими жорий этилади. Бунда «Ягона ғазначилик» ахборот тизими орқали мазкур корхона ва уларнинг тизимидаги корхоналарнинг барча даромад ва харажатлари марказлашган ҳолда амалга оширилади;

(ii) ишлаб чиқариш ва молиявий оқимлар, таннарх, инвестиция ва кредитлар тўғрисидаги маълумотларни онлайн таҳлил қилиш ҳамда бизнес-режа ижросини назорат қилиш имконини берувчи «Молиявий модель» электрон дастури ишга туширилади;

(iii) умумий хизмат кўрсатиш марказлари (Shared Service Centers) фаолияти йўлга қўйилиб, улар орқали ёрдамчи хизматлар ва функциялар (харидлар, кадрлар, бухгалтерия, ахборот технологиялари, юридик хизматлар) марказлаштирилади;

(iv) бизнес жараёнларини автоматлаштириш мақсадида Божхона қўмитаси, Солиқ қўмитаси, харид операторлари, давлат харидлари электрон тизимининг операторлари, электрон ҳисобварақ-фактураларни расмийлаштирувчи операторлар, хизмат кўрсатувчи тижорат банклари ва бошқа ташкилотлар ахборот тизимларини ўзаро интеграция қилишга рухсат берилади.

III. Фармойиш ижросини ташкил этиш, таъминлаш ва назорат

12. Маҳсулот таннархини камайтириш бўйича мақсадли кўрсаткичларга эришиш учун давлат корхоналари ижроия органлари раҳбарлари, кузатув кенгашлари раислари, Иқтисодиёт ва молия вазирлиги ҳамда Давлат активларини бошқариш агентлигига шахсий масъулият юклатилсин.

13. Рақамли технологиялар вазирлиги бир ой муддатда йирик давлат корхоналари фаолиятида фойдаланилаётган ахборот ва рақамли маҳсулотларни хатловдан ўтказиш, рақамлашмаган жараёнларни рақамлаштириш бўйича дастур ишлаб чиқиб, Вазирлар Маҳкамасига киритсин.

14. Ҳисоб палатаси (М. Абдуллаев) икки ой муддатда «UzAssets» АЖ билан биргаликда унинг бошқарувидаги стратегик йирик давлат корхоналарида давлат харидларини мониторинг қилиш мақсадида «Масофавий аудит» автоматлаштирилган ахборот тизимида янги модулни жорий қилсин.

15. Коррупцияга қарши курашиш агентлиги давлат корхоналарида мазкур фармойиш доирасидаги вазифалар ижросида коррупцияга қарши қонунчилик талабларига риоя этилиши устидан назоратни амалга оширсин.

16. Рақобатни ривожлантириш ва истеъмолчилар ҳуқуқларини ҳимоя қилиш қўмитаси давлат корхоналарида биргаликда харидларни ташкил этиш ва бошқа белгиланган чораларни амалга ошириш жараёнида рақобат қоидалари бузилмаслигини таъминласин.

17. Мазкур фармойишнинг ижросини назорат қилиш Ўзбекистон Республикаси Бош вазири А.Н. Арипов зиммасига юклансин.

Ўзбекистон Республикаси Президентининг 2025 йил 18 ноябрдаги Ф-59-сон фармойишига 1-ИЛОВА

Давлат корхоналарида таннархни камайтириш ва самарадорликни ошириш масалаларини мувофиқлаштириш бўйича республика комиссияси

М.Р. Абдуллаев — Ҳисоб палатаси раисининг биринчи ўринбосари, Республика комиссияси ҳамраиси Ж.А. Қўчқоров — Бош вазир ўринбосари — иқтисодиёт ва молия вазири, Республика комиссияси ҳамраиси Ж.Т. Мирзамаҳмудов — энергетика вазири Б.Ф. Исламов — тоғ-кон саноати ва геология вазири Ш.Х. Шерматов — рақамли технологиялар вазири И.Р. Махкамов — транспорт вазири Х.Б. Мустафаев — иқтисодиёт ва молия вазири ўринбосари А.Ж. Ортиков — Давлат активларини бошқариш агентлиги директори У.Б. Давлатов — Рақобатни ривожлантириш ва истеъмолчилар ҳуқуқларини ҳимоя қилиш қўмитаси раиси ўринбосари Ф.М. Хамраев — Ҳисоб палатаси шўъба мудири, Республика комиссияси котиби

Ўзбекистон Республикаси Президентининг 2025 йил 18 ноябрдаги Ф-59-сон фармойишига 2-ИЛОВА

Давлат корхоналари учун биргаликда харид қилиниши мумкин бўлган асосий товарлар

1. Офис қоғози (турли ўлчамлардаги ёзув қоғозлари).

2. Канцелярия буюмлари (ручка, дафтар ва бошқалар).

3. Компьютерлар ва периферия қурилмалари (мониторлар, принтерлар, ташкилот учун бошқа техникалар).

4. Нусха кўчириш ва босма ускуналари ҳамда уларнинг сарф материаллари (картриж, тонер ва бошқалар).

5. Махсус иш кийимлари ва шахсий ҳимоя воситалари (формали кийим-бош, каска, қўлқоп ва ҳ.к.).

6. Офис мебеллари (стол, стул, шкаф ва бошқалар).

7. Гигиена ва тозалаш воситалари (совун, ювиш ва дезинфекциялаш маҳсулотлари).

8. Озиқ-овқат маҳсулотлари (ходимлар ошхонаси ва умумий овқатланиш эҳтиёжлари учун).

9. Ёнилғи-мойлаш материаллари (бензин, дизель ёқилғиси, мотор мойлари).

10. Автотранспорт воситалари учун эҳтиёт қисмлар (шиналар, фильтрлар ва бошқалар).

11. Қурилиш ва таъмирлаш материаллари (цемент, бўёқ ва бошқалар).

12. Ёруғлик чироқлари ва электротехника товарлари (лампочка, кабель, розетка ва бошқалар).

13. Кондиционерлар ва вентиляция ускуналари.

14. Алоқа ва телекоммуникация воситалари (стационар телефонлар, мобил алоқа қурилмалари).

15. Стандарт дастурий таъминот маҳсулотлари учун лицензиялар (операцион тизимлар, офис дастурлари ва бошқалар).

Ўзбекистон Республикаси Президентининг 2025 йил 18 ноябрдаги Ф-59-сон фармойишига 3-ИЛОВА

Биргаликдаги давлат харидларини амалга оширишнинг вақтинчалик

1. Икки ва ундан ортиқ давлат корхоналари бир турдаги товарлар, ишлар, хизматларни харид қилишда аукцион, танлаш, тендер воситасида биргаликдаги давлат харидларини амалга оширишга ҳақли.

2. Икки ёки ундан ортиқ давлат корхоналари биргаликдаги давлат харидларини амалга ошириши учун томонлар ўртасида ўзаро битим тузилиши талаб этилади.

Биргаликдаги давлат харидларини амалга оширишда давлат корхоналарининг ҳуқуқлари, мажбуриятлари ва жавобгарлиги қонунчиликда белгиланган тартибда томонларнинг келишуви билан тузилган битимга асосан белгиланади.

3. Биргаликдаги давлат харидларининг ташкилотчиси сифатида давлат корхоналари ўртасида тузилган битимга асосан давлат харидларини ташкил этиш ва ўтказиш ваколати берилган давлат корхоналаридан бири белгиланади. Битимга қуйидаги ахборотлар киритилади:

(а) битим томонлари тўғрисидаги;

(б) биргаликдаги давлат хариди предмети, ҳажми, етказиб бериш муддати тўғрисидаги;

(в) битим томонларининг биргаликдаги давлат харидларини амалга ошириш учун молиялаштириш манбалари ва миқдорлари тўғрисидаги;

(г) битим томонларининг ҳуқуқлари, мажбуриятлари ва жавобгарлиги ҳақидаги;

(д) биргаликдаги давлат харидлари ташкилотчиси тўғрисидаги;

(ж) ташкилотчига битимга асосан берилган ваколатлар тўғрисидаги;

(з) харид комиссиясини шакллантириш шартлари ҳақидаги;

(и) харид қилиш ҳужжатларни ишлаб чиқиш, келишиш ва тасдиқлаш тартиби ва муддатлари тўғрисидаги;

(к) биргаликдаги давлат харидларини амалга оширишда харид қилиш тартиб-таомиллари тури ва савдоларни ўтказиш муддатлари ҳақидаги;

(л) биргаликдаги давлат харидларини ташкил этиш ва ўтказиш харажатларини тўлаш тартиби ҳақидаги;

(м) битимнинг амал қилиш муддати ҳақидаги;

(н) низоларни кўриб чиқиш тартиби тўғрисидаги.

Биргаликдаги харидларни ўтказишда битимга тарафларнинг ўзаро муносабатларини белгиловчи бошқа ахборотлар киритилиши мумкин.

4. Биргаликдаги давлат харидлари ташкилотчиси харидларни амалга ошириш бўйича комиссия таркибини битим томонлари билан келишилган ҳолда тасдиқлайди (бундан аукцион воситасидаги давлат харидлари мустасно).

5. Биргаликдаги давлат харидларини ўтказиш тўғрисидаги эълонда қонунчиликда белгиланган ахборотларга қўшимча равишда битим томонларининг манзиллари, товарларни етказиб бериш, ишларни бажариш ва хизматларни кўрсатиш манзиллари (ҳар бир томон учун), тўловларни амалга ошириш учун молиялаштириш манбалари ва миқдорлари кўрсатилади.

6. Давлат харидига доир тендер бўйича харид қилиш ҳужжатлари ёки техник топшириқлар қонунчилик ҳужжатларига мувофиқ «Лойиҳалар ва импорт контрактларини комплекс экспертиза қилиш маркази» ДУКда комплекс экспертизадан ўтказилиши талаб этилса, комплекс экспертизадан ўтказиш учун тўловлар битим томонлари ўртасида тенг улушларда тақсимланади.

7. Биргаликдаги давлат харидлари натижаларига кўра шартномалар ҳар бир давлат корхонаси ҳамда ғолиб ўртасида белгиланган тартибда алоҳида-алоҳида тузилади.

8. Ушбу вақтинчалик тартиб биргаликдаги давлат харидларини амалга ошириш тартибини белгиловчи тегишли норматив-ҳуқуқий ҳужжат қабул қилингунига қадар амал қилади.

Ўзбекистон Республикаси Президентининг 2025 йил 18 ноябрдаги Ф-59-сон фармойишига 4-ИЛОВА

Давлат корхоналарида аутсорсинг асосида бажарилиши лозим бўлган функция ва хизматлар

1. Бино ва ҳудудларни тозалаш (клининг) хизмати.

2. Қоровуллик ва объектларни муҳофаза қилиш хизмати.

3. Ишчилар овқатланишини ташкил этиш (кейтеринг) хизмати.

4. Ходимларни хизмат автотранспорти билан таъминлаш хизмати (ҳайдовчи билан бирга).

5. Бино ва иншоотларни техник қўллаб-қувватлаш (сантехника, электр таъминоти ва бошқа муҳандислик хизматлари).

6. Ишлаб чиқариш ускуналарига техник хизмат кўрсатиш.

7. Ахборот технологиялари инфраструктурасига хизмат кўрсатиш (IT-аутсорсинг).

8. Дастурий таъминотни ишлаб чиқиш ва техник қўллаб-қувватлаш хизмати.

9. Бухгалтерия ҳисоби ва молиявий ҳисоботни юритиш хизмати.

10. Юридик маслаҳат ва ҳуқуқий ҳамроҳлик хизмати.

11. Ходимларни танлаш ва ишга қабул қилиш (рекрутинг) хизмати.

12. Иш ҳақини ҳисоблаш ва кадрлар бўйича ҳужжат юритиш хизмати.

13. Маркетинг, реклама ва жамоатчилик билан алоқалар хизмати.

14. Мижозлар учун колл-марказ ва ахборот хизмати.

15. Почта-курьерлик ва ҳужжат етказиб бериш хизмати.

16. Полиграфия ва босмахона хизмати (матбаачилик ва нусха кўпайтириш ишлари).

17. Конференция, семинар ва бошқа тадбирларни ташкил этиш хизмати.

18. Автопаркни бошқариш ва автотранспортларга сервис хизмати.

19. Лаборатория синовлари ва сертификатлаш хизматлари.

20. Ички аудит ва консалтинг хизмати.

Ўзбекистон Республикаси Президентининг 2025 йил 18 ноябрдаги Ф-59-сон фармойишига 5-ИЛОВА

Давлат корхоналарида рақамлаштириш жорий этиладиган жараёнлар ва ахборот технологиялари маҳсулотлари

1. Омбор ва захираларни бошқариш ахборот тизими.

2. Маълумотлар базаси ва ҳисоботларни визуализация қилиш учун ягона таҳлилий тизим.

3. Ишлаб чиқариш жараёнларини реал вақт режимида кузатиб бориш ва таҳлил қилиш тизими (масалан, SCADA/MES платформалари).

4. Компания бюджети ва харажатларини режалаштириш ҳамда таҳлил қилиш учун бизнес таҳлил (Business Intelligence — BI) платформаси.

5. Энергия истеъмолини мониторинг қилиш ва тежамкорликни таҳлил қилиш учун ахборот тизими.

6. Бухгалтерия ва молиявий ҳисобот жараёнларини автоматлаштириш тизими (бухгалтерия учун ERP модули).

7. Харидлар ва тендерларни электрон тарзда ташкил этиш тизими (электрон харидлар e-procurement платформаси).

8. Электрон ҳужжатлар айланиш тизими (Document Management System).

9. Кадрлар ҳисоби ва маош бошқаруви учун электрон HR-менежмент тизими.

10. Мижозлар билан ишлаш ва сотув жараёнлари учун CRM (Customer Relationship Management) ахборот тизими.

11. Компаниянинг веб-сайти ва онлайн хизматлар (рақамли маркетинг ва коммуникация) платформаси.

12. Ахборот хавфсизлиги ва киберхавфсизликни таъминлаш тизимлари.

Ўзбекистон Республикаси Президенти Ш. МИРЗИЁЕВ

Тошкент ш.,

2025 йил 18 ноябрь,

Ф-59-сон

lex.uz

Oʻzbekiston Respublikasi Prezidentining

Farmoyishi

TARKIBI

roʻyxati

tartibi

roʻyxati

roʻyxati

Davlat korxonalarida tannarxni kamaytirish va samaradorlikni oshirish chora-tadbirlari toʻgʻrisida

Global raqobat kuchayib borayotgan hozirgi sharoitda barqarorlik va samaradorlikni taʼminlash, davlat sektorida xarajatlarni keskin kamaytirish va ishlab chiqarishni modernizatsiya qilish, davlat korxonalarida tejamkor boshqaruv, raqamli iqtisodiyot va xalqaro korporativ standartlarga asoslangan ish uslubini joriy etish maqsadida qaror qilaman:

I. Maqsadlar

1. Mazkur farmoyishni qabul qilishdan koʻzlangan asosiy maqsad etib 2026-yilda davlat ulushi 50 foiz va undan yuqori boʻlgan korxonalarda (keyingi oʻrinlarda — davlat korxonalari) mahsulot tannarxini kamaytirish va faoliyati samaradorligini oshirish belgilansin.

II. Mahsulot tannarxini kamaytirish va mehnat unumdorligini oshirish

2. Davlat korxonalarida mahsulot tannarxini kamaytirish va mehnat unumdorligini oshirishning quyidagi asosiy yoʻnalishlari belgilansin:

(a) xarajatlarni har chorakda qayta tahlil qilish (spending review) orqali kelgusi davrdagi har bir yoʻnalish ustuvorligidan kelib chiqib, budjetni toʻliq “noldan” qayta koʻrib chiqish (zero-based budgeting) amaliyotini yoʻlga qoʻyish;

(b) moddiy-texnik taʼminot xarajatlarini maqbullashtirish — oʻxshash turdagi tovar va resurslarni birgalikda xarid qilish orqali tannarxni pasaytirish, logistika jarayonlarini takomillashtirish;

(v) yordamchi funksiya va xizmatlarni autsorsingga topshirish, asosiy boʻlmagan ishlarga ixtisoslashgan tashkilotlarni jalb etib, ortiqcha boshqaruv xarajatlarini qisqartirish;

(g) tejamkor ishlab chiqarish va meʼyorlash tamoyillarini joriy etish, mehnat va resurslar sarfi boʻyicha ilgʻor meʼyorlarni amaliyotga tatbiq qilish orqali chiqimlarni kamaytirish;

(d) zamonaviy axborot texnologiyalarini joriy etish orqali ishlab chiqarish va boshqaruv operatsiyalarini avtomatlashtirish, samaradorlikni oshirish, sunʼiy intellekt texnologiyalarini joriy etish;

(j) buxgalteriya hisobi va hisobotini moliyaviy hisobotning xalqaro standartlari (MHXS) talablari asosida shaffof yuritish orqali moliyaviy intizomni mustahkamlash;

(z) xodimlar tashabbuslarini ragʻbatlantirish — iqtisodiy samara beradigan takliflar uchun mukofotlar va boshqa ragʻbatlantiruvchi choralarni koʻrish orqali tejamkorlik gʻoyalarini qoʻllab-quvvatlash;

(i) ochiqlik va jamoatchilik nazorati — kompaniyaning moliyaviy va maʼmuriy faoliyati ochiqligini taʼminlash, jamoatchilikka axborot yetkazish hamda fuqarolar tomonidan nazorat va fikr-mulohaza bildirish uchun sharoit yaratish;

(k) energiya samaradorligi — energiya auditi oʻtkazish orqali energiya isteʼmolini tahlil qilish, tejamkor texnologiyalarni joriy etish hamda energiya resurslaridan oqilona foydalanish;

(l) tashkiliy tuzilma va kadrlar sonini maqbullashtirish — korxonalarning tashkiliy tuzilmasini qayta koʻrib chiqish, takrorlanuvchi va samarasiz lavozimlarni qisqartirish hamda mehnat unumdorligini oshirish;

(m) resurslardan foydalanishda suiisteʼmolchilikka yoʻl qoʻymaslik uchun ichki nazorat va komplayens tizimini kuchaytirish, moliyaviy operatsiyalarning shaffofligini taʼminlash.

3. Davlat korxonalari bir oy muddatda mazkur farmoyishning 2-bandida belgilangan yoʻnalishlar asosida tannarxni kamaytirish va samaradorlikni oshirishga qaratilgan oʻz dasturlarini ishlab chiqib, kuzatuv kengashlarida tasdiqlasin.

4. Davlat korxonalarida tannarxni kamaytirish va samaradorlikni oshirish masalalarini muvofiqlashtirish boʻyicha respublika komissiyasi (keyingi oʻrinlarda — Respublika komissiyasi) 1-ilovaga muvofiq tarkibda tuzilsin va uning asosiy vazifalari etib quyidagilar belgilansin:

(a) farmoyish ijrosini taʼminlash doirasida davlat korxonalarida amalga oshiriladigan chora-tadbirlarning bajarilishi ustidan tizimli monitoring va tahlil olib borish;

(b) davlat korxonalariga xarajatlarni maqbullashtirish va samaradorlikni oshirish boʻyicha dasturlar tayyorlashda metodologik yordam berish, ushbu yoʻnalishda zarur uslubiy tavsiyalar ishlab chiqish;

(v) xarajatlarni qisqartirish va ish unumdorligini oshirish boʻyicha qoʻshimcha ichki zaxiralarni aniqlash hamda ulardan foydalanish yuzasidan takliflar tayyorlash;

(g) toʻlov tizimini takomillashtirish orqali debitor va kreditor qarzdorliklarni kamaytirish;

(d) korxonalarning kredit portfeli boʻyicha mavjud majburiyatlari, shu jumladan, qoʻshimcha mablagʻlarni jalb qilish zaruratini tahlil qilish;

(j) kuzatuv kengashlari aʼzolari tomonidan ularga yuklatilgan vazifalarning oʻz vaqtida va samarali amalga oshirilishini tahlil qilish;

(z) belgilangan choralarning natijadorligi yuzasidan har chorak yakuni boʻyicha Oʻzbekiston Respublikasi Prezidenti Administratsiyasiga axborot kiritib borish.

5. Hisob palatasi (M. Abdullayev) ikki oy muddatda “UzAssets” AJ bilan uning boshqaruvidagi strategik yirik davlat korxonalari tomonidan 2026-yil uchun ishlab chiqilgan biznes-rejalarni tanqidiy koʻrib chiqib, ularni takomillashtirish yuzasidan kuzatuv kengashlariga takliflar berishni taʼminlasin.

6. Respublika komissiyasi (J. Qoʻchqorov, M. Abdullayev) ikki oy muddatda:

(a) Davlat aktivlarini boshqarish agentligi bilan birgalikda davlat korxonalari boshqaruv xodimlari sonini 10 foizgacha qisqartirish yuzasidan Oʻzbekiston Respublikasi Prezidenti Administratsiyasiga taklif kiritsin;

(b) davlat korxonalarining keng isteʼmol tovarlari boʻyicha umumiy ehtiyojlarini qondirish maqsadida birgalikda xaridlarni tashkil etish ishlarini taʼminlasin;

(v) zarur hollarda, birgalikda xaridlarni amalga oshirish uchun qonunchilikda belgilangan tartibda ekspertlar, ekspert tashkilotlari yoki maxsus xarid tashkilotchilari (professional agentlar yoki xarid komissiyalari) jalb etilishini taʼminlasin.

7. Quyidagilar:

(a) Davlat korxonalari uchun birgalikda xarid qilinishi mumkin boʻlgan asosiy tovarlar roʻyxati 2-ilovaga muvofiq;

(b) Birgalikdagi davlat xaridlarini amalga oshirishning vaqtinchalik tartibi 3-ilovaga muvofiq;

(v) Davlat korxonalarida autsorsing asosida bajarilishi lozim boʻlgan funksiya va xizmatlar roʻyxati 4-ilovaga muvofiq;

(g) Davlat korxonalarida raqamlashtirish joriy etiladigan jarayonlar va axborot texnologiyalari mahsulotlari roʻyxati 5-ilovaga muvofiq tasdiqlansin.

8. Respublika komissiyasiga mazkur farmoyishga 2 — 5-ilovalarga davlat buyurtmachilarining asoslangan takliflaridan kelib chiqib, oʻzgartirish va qoʻshimchalar kiritish vakolati berilsin.

9. Davlat korxonalari Oʻzbekiston Respublikasi Prezidenti qarorlari va topshiriqlaridan tashqari boshqa hollarda homiylik yordamlarini koʻrsatishni toʻxtatsin.

10. Iqtisodiyot va moliya vazirligi, “Oʻzbekiston Respublikasi milliy investitsiya jamgʻarmasi” AJ hamda Davlat aktivlarini boshqarish agentligi:

(a) 2025-yil 1-dekabrga qadar 2026-yil uchun tegishli korxonalar rahbarlari faoliyatining eng muhim samaradorlik koʻrsatkichlarini (KPI) ishlab chiqib, tasdiqlash uchun aksiyadorlarning umumiy yigʻilishiga kiritsin;

(b) davlat korxonalari boʻyicha eng muhim samaradorlik koʻrsatkichlari tasdiqlangandan soʻng 2026-yil 1-fevralga qadar har bir davlat korxonasi boʻyicha aksiyadorlar kutilmasini tasdiqlasin hamda eng muhim samaradorlik koʻrsatkichlari ijrosini monitoring qilib borish maqsadida Boshqaruv samaradorligi agentligiga kiritsin.

11. Belgilansinki:

(a) 2026-yil 1-iyulga qadar korxonada ERP axborot tizimini ishga tushirmagan yoki xarajatlarni qisqartirish boʻyicha maqsadli koʻrsatkichlarni bajarmagan kompaniya rahbarlarining tegishli oʻrinbosarlari lavozimidan ozod etiladi;

(b) 2026-yil 1-martdan boshlab “UzAssets” AJ boshqaruvidagi strategik yirik davlat korxonalarida:

(i) Buxgalteriya hisobini yuritish axborot tizimida moliyaviy rejalashtirish, xaridlar, shartnomalar ijrosi, gʻaznachilik toʻlovlari, savdo operatsiyalari va komplayens nazorat qilish imkoniyatini beradigan “Yagona gʻaznachilik” axborot tizimi joriy etiladi. Bunda “Yagona gʻaznachilik” axborot tizimi orqali mazkur korxona va ularning tizimidagi korxonalarning barcha daromad va xarajatlari markazlashgan holda amalga oshiriladi;

(ii) ishlab chiqarish va moliyaviy oqimlar, tannarx, investitsiya va kreditlar toʻgʻrisidagi maʼlumotlarni onlayn tahlil qilish hamda biznes-reja ijrosini nazorat qilish imkonini beruvchi “Moliyaviy model” elektron dasturi ishga tushiriladi;

(iii) umumiy xizmat koʻrsatish markazlari (Shared Service Centers) faoliyati yoʻlga qoʻyilib, ular orqali yordamchi xizmatlar va funksiyalar (xaridlar, kadrlar, buxgalteriya, axborot texnologiyalari, yuridik xizmatlar) markazlashtiriladi;

(iv) biznes jarayonlarini avtomatlashtirish maqsadida Bojxona qoʻmitasi, Soliq qoʻmitasi, xarid operatorlari, davlat xaridlari elektron tizimining operatorlari, elektron hisobvaraq-fakturalarni rasmiylashtiruvchi operatorlar, xizmat koʻrsatuvchi tijorat banklari va boshqa tashkilotlar axborot tizimlarini oʻzaro integratsiya qilishga ruxsat beriladi.

III. Farmoyish ijrosini tashkil etish, taʼminlash va nazorat

12. Mahsulot tannarxini kamaytirish boʻyicha maqsadli koʻrsatkichlarga erishish uchun davlat korxonalari ijroiya organlari rahbarlari, kuzatuv kengashlari raislari, Iqtisodiyot va moliya vazirligi hamda Davlat aktivlarini boshqarish agentligiga shaxsiy masʼuliyat yuklatilsin.

13. Raqamli texnologiyalar vazirligi bir oy muddatda yirik davlat korxonalari faoliyatida foydalanilayotgan axborot va raqamli mahsulotlarni xatlovdan oʻtkazish, raqamlashmagan jarayonlarni raqamlashtirish boʻyicha dastur ishlab chiqib, Vazirlar Mahkamasiga kiritsin.

14. Hisob palatasi (M. Abdullayev) ikki oy muddatda “UzAssets” AJ bilan birgalikda uning boshqaruvidagi strategik yirik davlat korxonalarida davlat xaridlarini monitoring qilish maqsadida “Masofaviy audit” avtomatlashtirilgan axborot tizimida yangi modulni joriy qilsin.

15. Korrupsiyaga qarshi kurashish agentligi davlat korxonalarida mazkur farmoyish doirasidagi vazifalar ijrosida korrupsiyaga qarshi qonunchilik talablariga rioya etilishi ustidan nazoratni amalga oshirsin.

16. Raqobatni rivojlantirish va isteʼmolchilar huquqlarini himoya qilish qoʻmitasi davlat korxonalarida birgalikda xaridlarni tashkil etish va boshqa belgilangan choralarni amalga oshirish jarayonida raqobat qoidalari buzilmasligini taʼminlasin.

17. Mazkur farmoyishning ijrosini nazorat qilish Oʻzbekiston Respublikasi Bosh vaziri A.N. Aripov zimmasiga yuklansin.

Oʻzbekiston Respublikasi Prezidentining 2025-yil 18-noyabrdagi F-59-son farmoyishiga 1-ILOVA

Davlat korxonalarida tannarxni kamaytirish va samaradorlikni oshirish masalalarini muvofiqlashtirish boʻyicha respublika komissiyasi

M.R. Abdullayev — Hisob palatasi raisining birinchi oʻrinbosari, Respublika komissiyasi hamraisi J.A. Qoʻchqorov — Bosh vazir oʻrinbosari — iqtisodiyot va moliya vaziri, Respublika komissiyasi hamraisi J.T. Mirzamahmudov — energetika vaziri B.F. Islamov — togʻ-kon sanoati va geologiya vaziri Sh.X. Shermatov — raqamli texnologiyalar vaziri I.R. Maxkamov — transport vaziri X.B. Mustafayev — iqtisodiyot va moliya vaziri oʻrinbosari A.J. Ortikov — Davlat aktivlarini boshqarish agentligi direktori U.B. Davlatov — Raqobatni rivojlantirish va isteʼmolchilar huquqlarini himoya qilish qoʻmitasi raisi oʻrinbosari F.M. Xamrayev — Hisob palatasi shoʻba mudiri, Respublika komissiyasi kotibi

Oʻzbekiston Respublikasi Prezidentining 2025-yil 18-noyabrdagi F-59-son farmoyishiga 2-ILOVA

Davlat korxonalari uchun birgalikda xarid qilinishi mumkin boʻlgan asosiy tovarlar

1. Ofis qogʻozi (turli oʻlchamlardagi yozuv qogʻozlari).

2. Kanselyariya buyumlari (ruchka, daftar va boshqalar).

3. Kompyuterlar va periferiya qurilmalari (monitorlar, printerlar, tashkilot uchun boshqa texnikalar).

4. Nusxa koʻchirish va bosma uskunalari hamda ularning sarf materiallari (kartrij, toner va boshqalar).

5. Maxsus ish kiyimlari va shaxsiy himoya vositalari (formali kiyim-bosh, kaska, qoʻlqop va h.k.).

6. Ofis mebellari (stol, stul, shkaf va boshqalar).

7. Gigiyena va tozalash vositalari (sovun, yuvish va dezinfeksiyalash mahsulotlari).

8. Oziq-ovqat mahsulotlari (xodimlar oshxonasi va umumiy ovqatlanish ehtiyojlari uchun).

9. Yonilgʻi-moylash materiallari (benzin, dizel yoqilgʻisi, motor moylari).

10. Avtotransport vositalari uchun ehtiyot qismlar (shinalar, filtrlar va boshqalar).

11. Qurilish va taʼmirlash materiallari (sement, boʻyoq va boshqalar).

12. Yorugʻlik chiroqlari va elektrotexnika tovarlari (lampochka, kabel, rozetka va boshqalar).

13. Konditsionerlar va ventilyatsiya uskunalari.

14. Aloqa va telekommunikatsiya vositalari (statsionar telefonlar, mobil aloqa qurilmalari).

15. Standart dasturiy taʼminot mahsulotlari uchun litsenziyalar (operatsion tizimlar, ofis dasturlari va boshqalar).

Oʻzbekiston Respublikasi Prezidentining 2025-yil 18-noyabrdagi F-59-son farmoyishiga 3-ILOVA

Birgalikdagi davlat xaridlarini amalga oshirishning vaqtinchalik

1. Ikki va undan ortiq davlat korxonalari bir turdagi tovarlar, ishlar, xizmatlarni xarid qilishda auksion, tanlash, tender vositasida birgalikdagi davlat xaridlarini amalga oshirishga haqli.

2. Ikki yoki undan ortiq davlat korxonalari birgalikdagi davlat xaridlarini amalga oshirishi uchun tomonlar oʻrtasida oʻzaro bitim tuzilishi talab etiladi.

Birgalikdagi davlat xaridlarini amalga oshirishda davlat korxonalarining huquqlari, majburiyatlari va javobgarligi qonunchilikda belgilangan tartibda tomonlarning kelishuvi bilan tuzilgan bitimga asosan belgilanadi.

3. Birgalikdagi davlat xaridlarining tashkilotchisi sifatida davlat korxonalari oʻrtasida tuzilgan bitimga asosan davlat xaridlarini tashkil etish va oʻtkazish vakolati berilgan davlat korxonalaridan biri belgilanadi. Bitimga quyidagi axborotlar kiritiladi:

(a) bitim tomonlari toʻgʻrisidagi;

(b) birgalikdagi davlat xaridi predmeti, hajmi, yetkazib berish muddati toʻgʻrisidagi;

(v) bitim tomonlarining birgalikdagi davlat xaridlarini amalga oshirish uchun moliyalashtirish manbalari va miqdorlari toʻgʻrisidagi;

(g) bitim tomonlarining huquqlari, majburiyatlari va javobgarligi haqidagi;

(d) birgalikdagi davlat xaridlari tashkilotchisi toʻgʻrisidagi;

(j) tashkilotchiga bitimga asosan berilgan vakolatlar toʻgʻrisidagi;

(z) xarid komissiyasini shakllantirish shartlari haqidagi;

(i) xarid qilish hujjatlarni ishlab chiqish, kelishish va tasdiqlash tartibi va muddatlari toʻgʻrisidagi;

(k) birgalikdagi davlat xaridlarini amalga oshirishda xarid qilish tartib-taomillari turi va savdolarni oʻtkazish muddatlari haqidagi;

(l) birgalikdagi davlat xaridlarini tashkil etish va oʻtkazish xarajatlarini toʻlash tartibi haqidagi;

(m) bitimning amal qilish muddati haqidagi;

(n) nizolarni koʻrib chiqish tartibi toʻgʻrisidagi.

Birgalikdagi xaridlarni oʻtkazishda bitimga taraflarning oʻzaro munosabatlarini belgilovchi boshqa axborotlar kiritilishi mumkin.

4. Birgalikdagi davlat xaridlari tashkilotchisi xaridlarni amalga oshirish boʻyicha komissiya tarkibini bitim tomonlari bilan kelishilgan holda tasdiqlaydi (bundan auksion vositasidagi davlat xaridlari mustasno).

5. Birgalikdagi davlat xaridlarini oʻtkazish toʻgʻrisidagi eʼlonda qonunchilikda belgilangan axborotlarga qoʻshimcha ravishda bitim tomonlarining manzillari, tovarlarni yetkazib berish, ishlarni bajarish va xizmatlarni koʻrsatish manzillari (har bir tomon uchun), toʻlovlarni amalga oshirish uchun moliyalashtirish manbalari va miqdorlari koʻrsatiladi.

6. Davlat xaridiga doir tender boʻyicha xarid qilish hujjatlari yoki texnik topshiriqlar qonunchilik hujjatlariga muvofiq “Loyihalar va import kontraktlarini kompleks ekspertiza qilish markazi” DUKda kompleks ekspertizadan oʻtkazilishi talab etilsa, kompleks ekspertizadan oʻtkazish uchun toʻlovlar bitim tomonlari oʻrtasida teng ulushlarda taqsimlanadi.

7. Birgalikdagi davlat xaridlari natijalariga koʻra shartnomalar har bir davlat korxonasi hamda gʻolib oʻrtasida belgilangan tartibda alohida-alohida tuziladi.

8. Ushbu vaqtinchalik tartib birgalikdagi davlat xaridlarini amalga oshirish tartibini belgilovchi tegishli normativ-huquqiy hujjat qabul qilinguniga qadar amal qiladi.

Oʻzbekiston Respublikasi Prezidentining 2025-yil 18-noyabrdagi F-59-son farmoyishiga 4-ILOVA

Davlat korxonalarida autsorsing asosida bajarilishi lozim boʻlgan funksiya va xizmatlar

1. Bino va hududlarni tozalash (klining) xizmati.

2. Qorovullik va obyektlarni muhofaza qilish xizmati.

3. Ishchilar ovqatlanishini tashkil etish (keytering) xizmati.

4. Xodimlarni xizmat avtotransporti bilan taʼminlash xizmati (haydovchi bilan birga).

5. Bino va inshootlarni texnik qoʻllab-quvvatlash (santexnika, elektr taʼminoti va boshqa muhandislik xizmatlari).

6. Ishlab chiqarish uskunalariga texnik xizmat koʻrsatish.

7. Axborot texnologiyalari infrastrukturasiga xizmat koʻrsatish (IT-autsorsing).

8. Dasturiy taʼminotni ishlab chiqish va texnik qoʻllab-quvvatlash xizmati.

9. Buxgalteriya hisobi va moliyaviy hisobotni yuritish xizmati.

10. Yuridik maslahat va huquqiy hamrohlik xizmati.

11. Xodimlarni tanlash va ishga qabul qilish (rekruting) xizmati.

12. Ish haqini hisoblash va kadrlar boʻyicha hujjat yuritish xizmati.

13. Marketing, reklama va jamoatchilik bilan aloqalar xizmati.

14. Mijozlar uchun koll-markaz va axborot xizmati.

15. Pochta-kuryerlik va hujjat yetkazib berish xizmati.

16. Poligrafiya va bosmaxona xizmati (matbaachilik va nusxa koʻpaytirish ishlari).

17. Konferensiya, seminar va boshqa tadbirlarni tashkil etish xizmati.

18. Avtoparkni boshqarish va avtotransportlarga servis xizmati.

19. Laboratoriya sinovlari va sertifikatlash xizmatlari.

20. Ichki audit va konsalting xizmati.

Oʻzbekiston Respublikasi Prezidentining 2025-yil 18-noyabrdagi F-59-son farmoyishiga 5-ILOVA

Davlat korxonalarida raqamlashtirish joriy etiladigan jarayonlar va axborot texnologiyalari mahsulotlari

1. Ombor va zaxiralarni boshqarish axborot tizimi.

2. Maʼlumotlar bazasi va hisobotlarni vizualizatsiya qilish uchun yagona tahliliy tizim.

3. Ishlab chiqarish jarayonlarini real vaqt rejimida kuzatib borish va tahlil qilish tizimi (masalan, SCADA/MES platformalari).

4. Kompaniya budjeti va xarajatlarini rejalashtirish hamda tahlil qilish uchun biznes tahlil (Business Intelligence — BI) platformasi.

5. Energiya isteʼmolini monitoring qilish va tejamkorlikni tahlil qilish uchun axborot tizimi.

6. Buxgalteriya va moliyaviy hisobot jarayonlarini avtomatlashtirish tizimi (buxgalteriya uchun ERP moduli).

7. Xaridlar va tenderlarni elektron tarzda tashkil etish tizimi (elektron xaridlar e-procurement platformasi).

8. Elektron hujjatlar aylanish tizimi (Document Management System).

9. Kadrlar hisobi va maosh boshqaruvi uchun elektron HR-menejment tizimi.

10. Mijozlar bilan ishlash va sotuv jarayonlari uchun CRM (Customer Relationship Management) axborot tizimi.

11. Kompaniyaning veb-sayti va onlayn xizmatlar (raqamli marketing va kommunikatsiya) platformasi.

12. Axborot xavfsizligi va kiberxavfsizlikni taʼminlash tizimlari.

Oʻzbekiston Respublikasi Prezidenti Sh. MIRZIYOYEV

Toshkent sh.,

2025-yil 18-noyabr,

F-59-son

lex.uz