UzbekAI

ЎЗБЕКИСТОН РЕСПУБЛИКАСИ ВАЗИРЛАР МАҲКАМАСИНИНГ

ҚАРОРИ

НИЗОМ

СХЕМАСИ

НИЗОМ

СХЕМАСИ

Истиқболли кадрларни қайта тайёрлаш ҳамда уларнинг хорижда мақсадли стажировкасини ташкил этиш чора-тадбирлари тўғрисида

Ўзбекистон Республикаси Президентининг « Иқтидорли мутахассисларнинг хорижда таълим олишини қўллаб-қувватлаш, уларда касбий кўникмаларини ривожлантириш ва рағбатлантиришга оид қўшимча чора-тадбирлар тўғрисида » 2025 йил 5 майдаги ПФ-77-сон ҳамда « Истиқболли кадрларни мақсадли тайёрлаш ҳамда уларни давлат бошқаруви ва хизматига самарали жалб этиш тизимини янада такомиллаштириш чора-тадбирлари тўғрисида » ПФ-78-сон фармонлари ижросини таъминлаш мақсадида Вазирлар Маҳкамаси қарор қилади:

1. Қуйидагилар:

а) Ўзбекистон Республикаси Президентининг 2025 йил 5 майдаги ПФ-77-сон Фармонига мувофиқ истиқболли мутахассисларнинг хорижий университетлар, илмий марказлар, компания ва ташкилотларда мақсадли стажировкасини ташкил этиш тартибини ишлаб чиқиш;

б) Ўзбекистон Республикаси Президентининг 2025 йил 5 майдаги ПФ-78-сон Фармонига мувофиқ:

2026 йил 1 январдан бошлаб Ўзбекистон Республикаси Президенти ҳузуридаги Давлат сиёсати ва бошқаруви академиясида муддати 6 ойгача бўлган қайта тайёрлаш дастурлари жорий этилиши;

давлат хизматчиларининг малакасини ошириш ва қайта тайёрлаш тизимини тубдан такомиллаштириш белгилангани маълумот учун қабул қилинсин.

2. Қуйидагилар:

Истиқболли мутахассисларнинг «Эл-юрт умиди» жамғармаси маблағлари ҳисобидан мақсадли стажировкасини ташкил этиш тартиби тўғрисидаги низом 1-иловага мувофиқ;

Ўзбекистон Республикаси Президенти ҳузуридаги Давлат сиёсати ва бошқаруви академиясида қайта тайёрлаш таълим дастурлари учун номзодларни саралаш тартиби тўғрисидаги низом 2-иловага мувофиқ тасдиқлансин.

3. Истиқболли кадрларни тайёрлаш бўйича «Эл-юрт умиди» жамғармаси Бошқарув самарадорлиги агентлиги билан биргаликда Ташқи ишлар вазирлигининг кўмагида салоҳиятли тингловчиларни хорижий давлатларда мақсадли стажировка ўташини ташкил этиш, уларнинг консуллик ҳисобида туришини ҳамда хориждаги стажировка жараёни доимий равишда кузатиб борилишини таъминлаш чораларини кўрсин.

4. Ушбу қарорнинг бажарилишини назорат қилиш Ўзбекистон Республикаси Бош вазирининг ўринбосарлари зиммасига юклансин.

Вазирлар Маҳкамасининг 2025 йил 26 ноябрдаги 743-сон қарорига 1-ИЛОВА

Истиқболли мутахассисларнинг «Эл-юрт умиди» жамғармаси маблағлари ҳисобидан мақсадли стажировкасини ташкил этиш тартиби тўғрисида

1-боб. Умумий қоидалар

1. Ушбу Низом вазирлик, идора, иқтисодиёт тармоқлари стратегик корхоналари, шунингдек, етакчи олий таълим муассасалари, тадқиқот ва таҳлилий марказлари истиқболли мутахассисларининг Ўзбекистон Республикаси Президенти ҳузуридаги Истиқболли кадрларни тайёрлаш бўйича «Эл-юрт умиди» жамғармаси (кейинги ўринларда — «Эл-юрт умиди» жамғармаси) томонидан қисман ёки тўлиқ молиялаштириладиган ривожланган мамлакатлардаги етакчи университетлар, илмий марказлар, турли компания ва ташкилотларда мақсадли стажировкасини ташкил этиш тартибини белгилайди.

2. Мазкур Низомда қуйидаги асосий тушунчалар қўлланилади:

буюртмачи ташкилотлар — номзодларни мақсадли стажировкага юбориш учун тавсия этадиган вазирлик, идора, иқтисодиёт тармоқларининг стратегик корхоналари, етакчи олий таълим муассасалари, тадқиқот ва таҳлилий марказлар ҳамда Президент, ижод ва ихтисослаштирилган мактаблар;

мақсадли стажировка — мамлакатнинг ижтимоий-иқтисодий ривожланишига хизмат қилувчи устувор соҳаларда буюртмачи ташкилотлар мутахассисларининг касбий билим, кўникма ва малакаларини замон талабларига мувофиқ ривожлантириш мақсадида хорижий ҳамкор ташкилотларда 1 ойдан 6 ойгача бўлган муддатда амалий тажриба олиш жараёни;

мақсадли стажировка иштирокчиси — мақсадли стажировкага танлов асосида қабул қилинган ва хорижий ташкилотда стажировка ўтаётган мутахассис;

номзод — мақсадли стажировкага буюртмачи томонидан тавсия этилган истиқболли мутахассис;

хорижий ҳамкор ташкилот — «Эл-юрт умиди» жамғармаси ва (ёки) буюртмачи ташкилотлар билан ҳамкорлик алоқаларига эга бўлган ҳамда ўзаро келишув ёки шартномага мувофиқ мақсадли стажировка бевосита ўталадиган хорижий таълим, илмий ёки бошқа ташкилот.

3. Вазирлик, идора, иқтисодиёт тармоқларининг стратегик корхоналари, етакчи олий таълим муассасалари, тадқиқот ва таҳлилий марказларида меҳнат фаолиятини олиб бораётган мутахассислар учун буюртмачи ташкилот томонидан «Эл-юрт умиди» жамғармасининг имкониятларидан келиб чиқиб, хорижий ҳамкор ташкилотлар иштирокида бошқа стажировкалар ташкил этилиши мумкин.

Мазкур стажировкаларни ташкил этиш ва молиялаштириш тартиби «Эл-юрт умиди» жамғармаси Бошқарув кенгаши томонидан белгиланади.

4. Буюртмачи ташкилотлар томонидан «Эл-юрт умиди» жамғармаси маблағлари ҳисобидан мақсадли стажировкага юборилган ходимнинг стажировка муддати давомида эгаллаб турган лавозими ва ўртача ойлик иш ҳақи сақланиши таъминланади, шунингдек, ушбу ходимларни хизмат бўйича биринчи навбатда ўстириш чоралари кўрилади.

5. Мақсадли стажировкани ўтаган мутахассисларга тўлиқ бандлик режимида икки йил буюртмачи ташкилотда узлуксиз ишлаб бериш мажбурияти юкланади.

2-боб. Мақсадли стажировка йўналишларини шакллантириш ва номзодларни саралаб олиш тартиби

6. Мақсадли стажировкага юбориш бўйича таклифларни умумлаштириш, номзодларни саралаб олишни ташкил этиш ва ўтказиш Ўзбекистон Республикаси Президенти ҳузуридаги Бошқарув самарадорлиги агентлиги (кейинги ўринларда — Агентлик) томонидан амалга оширилади.

7. Буюртмачи ташкилотлар ҳар йили 10 ноябрга қадар кадрлар тайёрлашга бўлган эҳтиёжлар тўғрисида лавозим ва йўналишлар кесимида, танланган номзодларнинг стажировкасини ташкил қилиш мумкин бўлган хорижий ташкилотлар ва стажировка муддати бўйича асослантирилган маълумотларни, шунингдек, номзодлар стажировкани тамомлагач бажарадиган вазифалари ва эришиши лозим бўлган мақсадли кўрсаткичлар рўйхатини ўрганиб чиқиш ва умумлаштириш учун Агентликка тақдим этади. Бунда:

мақсадли стажировкани ташкил этишга бўлган эҳтиёж асослантирилиши, шу жумладан, уни мамлакатимиздаги ташкилотларда амалга оширишдан фарқли жиҳатлари санаб ўтилиши;

мақсадли стажировка ўташ таклиф этилаётган хорижий ҳамкор ташкилот ҳақида маълумот ва унда стажировка ўташ имкониятлари мавжудлиги (тегишли ёзишмалар ёки келишувни илова қилган ҳолда);

мақсадли стажировка ўташнинг муддатлари ҳамда у билан боғлиқ харажатлар;

мақсадли стажировкадан кутилаётган натижалар акс эттирилиши лозим.

8. Агентлик буюртмачи ташкилотлар томонидан тақдим этилган маълумотларни умумлаштириш ва таҳлили асосида тармоқ йўналишлари бўйича стажировка дастурининг хорижий мамлакатлар кесимидаги квоталарини белгилаш учун асослантирилган таклифларни ҳар йили 10 декабрга қадар «Эл-юрт умиди» жамғармасининг Бошқарув кенгаши мажлисларида кўриб чиқиш учун «Эл-юрт умиди» жамғармасига тақдим этади.

9. «Эл-юрт умиди» жамғармасининг Бошқарув кенгаши ҳар йили 15 январга қадар Агентлик томонидан тақдим этилган асослантирилган таклифлар асосида тармоқ йўналишлари бўйича стажировка дастурининг хорижий мамлакатлар кесимидаги квоталарини тасдиқлайди.

10. Стажировка ташкил этиладиган хорижий ташкилотлар ва стажировка муддати буюртмачи ташкилотлар, Агентлик ва «Эл-юрт умиди» жамғармаси билан биргаликда белгиланади.

Мақсадли стажировка дастурининг хорижий мамлакатлар кесимидаги тасдиқланган квоталари, уларнинг йўналишлари ва муддатлари бўйича маълумотлар Агентлик ва «Эл-юрт умиди» жамғармасининг расмий веб-саҳифаларида ҳамда ижтимоий тармоқлардаги саҳифаларда эълон қилинади.

11. Буюртмачи ташкилотлар ҳар йили 1 февралга қадар мақсадли стажировкага юбориладиган номзодлар рўйхатини шакллантириб, расмий хат асосида Агентликка тақдим этади.

Бунда буюртмачи ташкилотлар биринчи навбатда, Миллий кадрлар захираси таркибига киритилган номзодларни рўйхатга киритиши лозим.

Буюртмачи ташкилотлар томонидан номзодлар рўйхатини шакллантиришда қуйидагилар инобатга олиниши лозим:

стажировка дастурига мос мутахассислиги бўйича камида 3 йиллик иш тажрибаси, шу жумладан охирги 12 ой давомида ушбу соҳада ишлаган бўлиши;

давлат тилини билиши;

стажировка ўташ режалаштирилган хорижий ташкилотнинг шартсиз таклифномаси (молиявий шартлар бундан мустасно) мавжудлиги (буюртмачи томонидан тавсия этилган номзодлар учун).

12. Буюртмачи ташкилотлар томонидан мақсадли стажировкага юбориладиган номзодлар рўйхатини шакллантириб, Агентликка тақдим этишда қуйидаги ҳужжатлар илова қилинади:

Жамғарма ижрочи директори номига белгиланган шаклдаги ариза (стажировкани амалга ошириш бўйича танланган мутахассислик, хорижий мамлакат ва хорижий ташкилот кўрсатилган ҳолда);

иш жойи ва лавозими сақланиши ёки тегишли таълим дастури тугаганидан сўнг ишга жойлаштириш бўйича мажбуриятлар акс этган буюртмачи ташкилотнинг кафолат хати;

стажировка ўташ режалаштирилган хорижий ташкилотнинг шартсиз таклифномаси (молиявий шартлар бундан мустасно);

буюртмачи ташкилот ва стажировка ўташ режалаштирилган ташкилот томонидан ишлаб чиқилган стажировка дастури;

стажировкадан кейинги икки йил давомида бажариши лозим бўлган аниқ вазифалар ва мақсадли кўрсаткичлар.

Бунда тақдим этиладиган ҳужжатлар шакллари Агентлик томонидан ишлаб чиқилади ва буюртмачиларга ҳар йили 1 январга қадар тақдим этилади.

13. Мақсадли стажировка дастурида қуйидаги шахслар иштирок эта олмайди:

а) 25 ёшдан кичик бўлганлар;

б) аввал айни ёки турдош йўналиш бўйича хорижда мақсадли стажировка ўтаб, узлуксиз ишлаб бериш мажбурияти муддати тугамаганлар;

в) коррупцияга оид жиноятларни содир этишда суд томонидан айбдор деб топилган шахслар;

г) оғир ва ўта оғир жиноятларни содир этганлик учун судланганлик ҳолати тугалланмаган ёки олиб ташланмаган шахслар.

14. Агентлик буюртмачи ташкилотлар томонидан тақдим этган номзодлар тўғрисидаги ҳужжатлар ушбу Низом талабларига мувофиқлигини ўрганади.

15. Ҳужжатларни тўлиқ тақдим этмаган ёки тақдим этилган ҳужжатлари белгиланган талабларга мувофиқ бўлмаганда, камчиликларни бартараф этиш учун буюртмачига уч иш кунидан иборат муддат берилади.

16. Белгиланган муддатда буюртмачи ташкилотлар томонидан камчиликлар бартараф этилмаганда, номзодлар Агентлик томонидан танловдан чиқарилади.

17. Мақсадли стажировкага номзодларни саралаш бўйича Агентликда камида етти кишидан иборат, тоқ сонда бўлган танлов комиссияси (кейинги ўринларда — Комиссия) тузилади.

Комиссия таркибига Агентлик, «Эл-юрт умиди» жамғармаси ва Давлат сиёсати ва бошқаруви академияси вакиллари киритилади, шунингдек, давлат органлари ва ташкилотлари ходимлари ҳамда мустақил экспертлар жалб этилиши мумкин.

Бунда Агентлик директори ўринбосарларидан бири Комиссия раиси этиб белгиланади.

18. Саралаш тартиби қуйидагиларни ўз ичига олади:

тест синовлари — билим ва кўникмаларини аниқлаш;

номзодлар билан суҳбат — уларнинг касбий салоҳияти, хорижий тил билиш даражаси ва касбий ҳамда малакавий ривожланишга бўлган интилишини баҳолаш.

19. Тавсия этилган номзодлар интеллект даражаси (IQ-тест), психологик барқарорлик, давлат тилини билиш, рақамли технологиялар ҳамда сиёсий-ҳуқуқий ва ижтимоий-иқтисодий ислоҳотлар соҳасидаги билим даражасини аниқлаш бўйича Агентликнинг ҳудудий филиаллари базасида Агентлик ҳузуридаги Раҳбар кадрларни баҳолаш маркази (кейинги ўринларда — Раҳбар кадрларни баҳолаш маркази) томонидан марказлаштирилган тартибда онлайн режимида тест синовларидан ўтказилади.

20. Раҳбар кадрларни баҳолаш марказида тест синовларидан 71 фоиз ва ундан юқори кўрсаткичга эга номзодлар суҳбат жараёнига жалб этилади.

21. Саралаш жараёни шаффоф ва адолатли ўтказилади. Суҳбат жараёнлари видеотасвирга ёзиб олинади ҳамда онлайн режимда видеотрансляция қилиниши мумкин.

22. Суҳбат натижалари 100 баллик тизимда баҳоланади. Комиссия томонидан якка тартибда, ҳар бир номзод билан алоҳида ўтказилади. Унда номзоднинг қуйидаги компетенциялари баҳоланади:

давлат сиёсатини тушуниш ва таҳлил қилиш, сиёсий-ҳуқуқий, ижтимоий-иқтисодий соҳалари бўйича билими (25 балл);

стажировка ўташда зарур бўладиган хорижий тилни билиш даражаси (15 балл);

стратегик фикрлаш ва қарор қабул қилиш қобилияти (20 балл);

эмоционал барқарорлик ва стрессга чидамлилик (20 балл);

лидерлик қобилиятлари ва жамоа билан ишлаш салоҳияти (10 балл);

ижтимоий фаоллик, ташаббускорлик ва масъулият ҳисси (10 балл).

Номзодларнинг якуний натижалари комиссия аъзолари томонидан суҳбат натижасига кўра қўйган балларнинг қўшган ҳолдаги ўртачасидан келиб чиқиб аниқланади ва комиссиянинг баённомаси билан расмийлаштирилади.

Суҳбат жараёни онлайн шаклда ўтказилиши мумкин.

23. Суҳбатдан энг юқори балл тўплаган номзодлар баллар рейтинги асосида мазкур Низомнинг 9-бандига мувофиқ тасдиқланадиган квота доирасида мақсадли стажировкага тавсия этилади.

24. Агентлик томонидан ўтказиладиган танлов натижалари асосида ҳар йили 1 апрелга қадар танлов ғолиблари аниқланади ва «Эл-юрт умиди» жамғармасининг Бошқарув кенгаши томонидан тасдиқлаш учун «Эл-юрт умиди» жамғармасига тақдим этилади.

25. Танлов ғолиблари рўйхати Агентлик ва «Эл-юрт умиди» жамғармасининг расмий веб-саҳифаларида ҳамда ижтимоий тармоқлардаги саҳифаларида эълон қилинади.

26. «Эл-юрт умиди» жамғармаси Бошқарув кенгаши қарорига асосан ғолиб деб топилган мутахассислар, «Эл-юрт умиди» жамғармаси, Агентлик, буюртмачи ташкилот ва молиявий (қўшимча) кафил ўртасида шартнома тузилади.

Мутахассисларнинг хорижда мақсадли стажировкани ўташи, яшаш ва юриш-туриш тартиб-қоидалари ҳамда томонларнинг ҳуқуқ ва мажбуриятлари ушбу шартномада белгилаб қўйилади.

3-боб. Номзодларнинг шикоятларини кўриб чиқиш тартиби

27. Тест ва суҳбат натижалари бўйича номзодларнинг шикоятлари, улар эълон қилинган санадан бошлаб икки иш куни ичида Агентликка ёзма шаклда тақдим этилади.

Суҳбат натижаларига кўра номзоднинг мурожаатини кўриб чиқиш жараёнида ёзиб олинган видеотасвир ўрганилади ҳамда ушбу Низом тартибига риоя қилинганлик ҳолати кўриб чиқилади.

28. Баҳолаш натижаларидан норози бўлган номзодларнинг апелляция шикоятларини кўриб чиқиш учун Агентликда уч кишидан иборат таркибда апелляция комиссияси тузилади.

Апелляция комиссиясига Агентлик директорининг Комиссияга раислик қилмаган бошқа ўринбосарларидан бири раис этиб белгиланади ва унинг таркиби Комиссия ишида иштирок этмаган шахслардан тузилади.

29. Апелляция комиссияси шикоятни у берилган кундан бошлаб уч иш куни ичида кўриб чиқиб, қарор қабул қилади.

Бунда Апелляция комиссияси шикоятни кўриб чиқиш натижаларига кўра қуйидаги қарорлардан бирини қабул қилади:

шикоятни асосланган деб ҳисоблаш ҳамда уни қаноатлантириш;

шикоятни асоссиз деб ҳисоблаш ҳамда уни қаноатлантиришни рад этиш.

30. Апелляция комиссияси қарор қабул қилинган куни номзодни шикоят қаноатлантирилган ёки рад этилганлигини кўрсатган ҳолда, ёзма равишда хабардор қилади.

4-боб. Мақсадли стажировкаларни ташкил этиш тартиби

31. Мақсадли стажировкага юбориладиган мутахассисларнинг стажировка ўташда зарур бўладиган хорижий тилни ўрганиши учун буюртмачи ташкилот томонидан тегишли шароитлар яратиб берилади, шу жумладан, хорижий тилни ўрганиш билан боғлиқ харажатлар қопланади.

Айрим ҳолларда таржимон хизматидан фойдаланиш орқали мақсадли стажировка дастури ташкил этилиши мумкин.

32. «Эл-юрт умиди» жамғармаси хорижда мақсадли стажировка нархлари, муддатлари ва шарт-шароитларининг мақсадга мувофиқлигидан келиб чиқиб, мақсадли стажировка иштирокчиси учун нисбатан афзал бўлган хорижий ташкилотни танлаш ҳуқуқига эга.

33. Мақсадли стажировка дастури «Эл-юрт умиди» жамғармаси томонидан хорижий ҳамкорлар билан тузилган келишувлар асосида махсус назарий ёки ўқув-амалий курслар, тадқиқот, ўқув модуллари ва цикллар кўринишида ташкил этилади.

34. Мақсадли стажировкага юборилган мутахассис мақсадли стажировка давомида:

мақсадли стажировка бўйича услубий ва кўрсатма материаллар билан танишиши;

мақсадли стажировкани ташкил этиш ва ундан ўтиш билан боғлиқ тадбирларда иштирок этиши;

мақсадли стажировка дастурида назарда тутилган барча тадбирларни белгиланган муддат ичида, тўлиқ ҳажмда ва сифатли бажариши;

амалий фаолиятда фойдаланилиши мумкин бўлган ҳужжатлар намуналари ва бошқа муҳим материаллар тўпламини юритиши;

тегишли ташкилотда ўрнатилган тартиб-қоидаларга риоя қилиши шарт.

35. Мақсадли стажировка «Эл-юрт умиди» жамғармаси маблағлари, шунингдек, хорижий грантлар ва буюртмачилар маблағлари ҳисобидан молиялаштирилади.

36. Мақсадли стажировка дастури доирасида қуйидаги харажатлар қопланади:

мақсадли стажировка ўташ бўйича хорижий ташкилотга тўланадиган стажировка учун тўлов;

виза харажатлари;

мақсадли стажировка даврида тиббий суғурталаш харажатлари;

барча турдаги транспорт воситалари билан стажировкадан ўтиш жойигача бўлган йўлкира харажатлари (иккала томонга, кўпи билан бир марта);

мақсадли стажировка дастури билан боғлиқ турар-жой, кунлик харажатлар.

«Эл-юрт умиди» жамғармаси Бошқарув кенгаши қарорига кўра мақсадли стажировкага юборилган мутахассиснинг хорижда стажировкаси билан бевосита боғлиқ бўлган бошқа харажатлар ҳам қопланиши мумкин.

37. Мақсадли стажировка дастурини молиялаштириш бир номзод учун энг юқори миқдори ва молиялаштириш тартиби «Эл-юрт умиди» жамғармасининг Бошқарув кенгаши томонидан белгиланади.

5-боб. Мақсадли стажировкага юборилган мутахассисларнинг стажировка ўташини ва кейинги меҳнат фаолиятини мониторинг қилиш

38. «Эл-юрт умиди» жамғармаси мақсадли стажировкага юборилган мутахассисларнинг стажировкани ўташ жараёнлари мониторингини олиб боради.

39. «Эл-юрт умиди» жамғармаси мақсадли стажировкани ўтаётган мутахассисларнинг стажировка жараёни ҳамда хориждаги ҳаёти ва ижтимоий ҳолатига тегишли бўлган маълумотларни олиб туриш мақсадида Ўзбекистон Республикасининг хорижий давлатдаги Элчихонаси ёки консуллик хизмати кўмагидан фойдаланади.

40. Буюртмачи ташкилотлар ходимларининг мақсадли стажировкасини ташкил этишда Ўзбекистон Республикасининг хорижий давлатдаги Элчихонаси ёки консуллик хизмати билан биргаликда стажировкага юборилган мутахассиснинг консуллик ҳисобида туришини таъминлайди, хориждаги ҳаёти ва соғлиғидан, шунингдек, уларнинг стажировкаси, моддий ва маиший аҳволидан хабардор бўлиб боради ҳамда «Эл-юрт умиди» жамғармаси билан ҳамкорликда унинг муаммоларини бартараф этиш чораларини кўради.

41. Мақсадли стажировка дастури бўйича белгиланган муддат тугаганидан сўнг мутахассис узоғи билан бир ҳафта ичида Ўзбекистон Республикасига қайтиб келиши талаб этилади.

42. Мақсадли стажировкага юборилган мутахассислар томонидан стажировкани ўташ якунлари бўйича «Эл-юрт умиди» жамғармасига стажировка якунлангандан сўнг 15 (ўн беш) иш куни ичида қуйидаги маълумотлар ва ҳужжатлар тақдим этилади:

а) мақсадли стажировка якунлари бўйича ҳисобот;

б) молиявий ҳисобот, шу жумладан мақсадли стажировка ўташ бўйича хорижий ташкилотга стажировка учун тўлов тўланганини тасдиқловчи ҳужжат (агарда тўловлар мутахассис банк пластик картаси орқали ўтказилган бўлса);

в) мақсадли стажировка ўтаганлиги бўйича сертификат ёки бошқа тасдиқловчи ҳужжат нусхаси.

43. Мақсадли стажировкани ўтаган мутахассислар қайтгандан сўнг, хорижда олган илғор назарий билим ва тажрибаларини амалиётга жорий этиши ҳамда хизмат бўйича ўсишига зарур шароитлар яратиб боришга тегишли буюртмачи ташкилотлар раҳбарлари масъул ҳисобланади.

Мазкур жараёнлар Агентлик томонидан мувофиқлаштирилади ва мониторинг қилиб борилади. Бунда мониторинг икки йил давомида бир йилда камида икки маротаба хорижда мақсадли стажировкани ўтаган мутахассисларнинг узлуксиз ишлаб бериш мажбурияти ўталаётган тегишли ташкилотлардан олинган маълумотлар асосида амалга оширилади.

44. «Эл-юрт умиди» жамғармаси маблағлари ҳисобидан мақсадли стажировка ўтаган мутахассислар томонидан шартнома шартлари бажарилмаган тақдирда, сарфланган барча харажатларнинг икки баробари миқдорида мақсадли стажировка ўтаган мутахассиснинг ўзи ва молиявий (қўшимча) кафиллари томонидан қопланади.

6-боб. Якунловчи қоида

45. Мазкур Низомнинг талабларини бузишда айбдор бўлган шахслар қонунчилик ҳужжатларига мувофиқ жавобгар бўладилар.

Истиқболли мутахассисларнинг «Эл-юрт умиди» жамғармаси маблағлари ҳисобидан мақсадли стажировкасини ташкил этиш тартиби тўғрисидаги низомга ИЛОВА

Истиқболли мутахассисларнинг хорижий университетлар, илмий марказлар, компания ва ташкилотларда мақсадли стажировкасини ташкил этиш

Босқичлар Субъектлар Тадбирлар Бажариш муддати 1-босқич Буюртмачи ташкилотлар Кадрлар тайёрлашга бўлган эҳтиёжлар тўғрисида лавозим ва йўналишлар кесимида, танланган номзодларнинг стажировкасини ташкил қилиш мумкин бўлган хорижий ташкилотлар ва стажировка муддати бўйича асослантирилган маълумотларни, шунингдек, номзодлар стажировкани тамомлагач бажарадиган вазифалари ва эришиши лозим бўлган мақсадли кўрсаткичларни Ўзбекистон Республикаси Президенти ҳузуридаги Бошқарув самарадорлиги агентлигига (кейинги ўринларда — Агентлик) тақдим этади. Ҳар йили 10 ноябрга қадар 2-босқич Агентлик, «Эл-юрт умиди» жамғармаси Буюртмачи ташкилотлар томонидан тақдим этилган маълумотларни умумлаштириш ва таҳлили асосида тармоқ йўналишлари бўйича стажировка дастурининг хорижий мамлакатлар кесимидаги квоталарини белгилаш учун асослантирилган таклифларни «Эл-юрт умиди» жамғармасининг Бошқарув кенгашига тақдим этади. Ҳар йили 10 декабрга қадар «Эл-юрт умиди» жамғармасининг Бошқарув кенгаши Агентлик томонидан тақдим этилган асослантирилган таклифлар асосида тармоқ йўналишлари бўйича стажировка дастурининг хорижий мамлакатлар кесимидаги квоталарини тасдиқлайди. Ҳар йили 15 январга қадар 3-босқич Буюртмачи ташкилотлар Мақсадли стажировкага юбориладиган номзодлар рўйхатини шакллантириб, хат асосида Агентликка тақдим этади. Ҳар йили 1 февралга қадар 4-босқич Агентлик, Раҳбар кадрларни баҳолаш маркази 1. Мақсадли стажировкага номзодларни саралаш бўйича танлов комиссиясини тузади. 2. Саралаш тартиби икки босқичда: биринчи босқич — номзодларни билим ва кўникмаларини аниқлаш бўйича тест синовлари; иккинчи босқич — номзодларнинг касбий салоҳияти, хорижий тил билиш даражаси ва касбий ҳамда малакавий ривожланишга бўлган интилишини баҳолаш бўйича суҳбат шаклида ўтказилади. Ҳар йили февраль-март ойларида 5-босқич Агентлик Тест синовларидан 71 фоиз ва ундан юқори кўрсаткичга эга номзодлар суҳбат жараёнига жалб этилган ҳамда суҳбатдан энг юқори балл тўплаган номзодларни баллар рейтинги асосида, квота доирасида мақсадли стажировкага тавсия этади. Ҳар бир саралаш босқичи якунига кўра 2 иш кунида 6-босқич Агентлик, «Эл-юрт умиди» жамғармаси Танлов натижалари асосида танлов ғолибларини тасдиқлаш учун «Эл-юрт умиди» жамғармасининг Бошқарув кенгашига тақдим этади. Танлов ғолиблари рўйхати Агентлик ва «Эл-юрт умиди» жамғармасининг расмий веб-саҳифаларида ҳамда ижтимоий тармоқлардаги саҳифаларда эълон қилинади. Ҳар йили 1 апрелга қадар 7-босқич «Эл-юрт умиди» жамғармаси, буюртмачи ташкилот «Эл-юрт умиди» жамғармаси Бошқарув кенгаши қарорига асосан ғолиб деб топилган мутахассислар «Эл-юрт умиди» жамғармаси, Агентлик, буюртмачи ташкилот ва молиявий (қўшимча) кафил ўртасида шартнома тузади. 15 иш куни ичида 8-босқич «Эл-юрт умиди» жамғармаси, буюртмачи ташкилот Истиқболли мутахассисларнинг хорижий университетлар, илмий марказлар, компания ва ташкилотларда мақсадли стажировка ўташини ташкил этади. Мақсадли стажировка ўташ даври давомида «Эл-юрт умиди» жамғармаси, Агентлик Мақсадли стажировкага юборилган мутахассисларни стажировкадан кейинги меҳнат фаолиятини мониторинг қилади. Мақсадли стажировкадан кейин 2 йил давомида

Вазирлар Маҳкамасининг 2025 йил 26 ноябрдаги 743-сон қарорига 2-ИЛОВА

Ўзбекистон Республикаси Президенти ҳузуридаги Давлат сиёсати ва бошқаруви академиясида қайта тайёрлаш таълим дастурлари учун номзодларни саралаш тартиби тўғрисида

1-боб. Умумий қоидалар

1. Ушбу Низом Ўзбекистон Республикаси Президенти ҳузуридаги Давлат сиёсати ва бошқаруви академиясида (кейинги ўринларда — Академия) давлат органлари, хўжалик бирлашмалари, Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликлари (кейинги ўринларда — давлат органлари ва ташкилотлари) ходимлари учун муддати 6 ойгача бўлган қайта тайёрлаш таълим дастурларига номзодларни саралаш тартибини белгилайди.

2. Академияда муддати 6 ойгача бўлган қуйидаги қайта тайёрлаш таълим дастурлари (кейинги ўринларда — қайта тайёрлаш дастурлари) жорий этилади:

геосиёсат, глобал хавфсизлик, барқарор ривожланиш, лойиҳа бошқаруви, ижтимоий-иқтисодий сиёсат ва бошқа долзарб йўналишларда Ўзбекистон Республикаси Президенти Администрацияси топшириғига мувофиқ ташкил этиладиган махсус курслар;

ташаббускор аёлларнинг раҳбарлик кўникмаларини ривожлантириш ва уларни давлат хизматига тайёрлаш учун «Раҳбар аёллар» дастури;

истиқболли ёшларни давлат хизматига жалб этиш ҳамда ёш давлат хизматчиларининг етакчилик ва бошқарувчилик қобилиятларини ривожлантириш учун «Келажак лидерлари» дастури;

давлат органлари ва ташкилотларининг раҳбар ва бошқарув кадрлари ҳамда мазкур лавозимларга номзодлар учун «Тизимли таҳлил, стратегик режалаштириш ва мақсадли кўрсаткичларга эришиш» дастури;

ҳокимлар ва уларнинг ўринбосарлари ҳамда мазкур лавозимларга номзодлар учун «Ҳудудларни ижтимоий-иқтисодий ривожлантириш ва хорижий инвестицияларни жалб этиш» дастури;

давлат органлари ва ташкилотларининг кадрлар сиёсатига масъул таркибий тузилма раҳбарлари учун «Кадрлар захирасини шакллантириш ва инсон ресурсларини ривожлантириш» дастури;

давлат, тармоқ ва ҳудудий ривожлантириш дастурлари бўйича лойиҳавий бошқарув ва мониторинг кўникмаларини ривожлантириш учун «Давлат дастурлари ва лойиҳаларини самарали бошқариш» дастури.

3. Академияда қайта тайёрлаш дастурлари учун номзодларни саралашнинг асосий вазифалари қуйидагилардан иборат:

давлат органлари ва ташкилотларида фаолият олиб бораётган юқори малакали кадрларни аниқлаш;

давлат хизматчилари ўртасида соғлом рақобат муҳитини шакллантириш, интеллектуал ва профессионал салоҳиятни ҳамда ташаббускорлик ва етакчилик фазилатларини баҳолаш;

етакчилик фазилатлари ва бошқарувчилик билимлари юқори даражада бўлган истиқболли раҳбар ходимларни танлаш ва махсус ўқувларга жалб қилиш;

давлат органлари ва ташкилотлари учун истиқболли бошқарув кадрлари захирасига номзодларни шакллантириш.

4. Қайта тайёрлаш дастурлари учун номзодларни саралаш қонунийлик, холислик, шаффофлик, коллегиаллик ва тенг ҳуқуқлилик тамойиллари асосида ўтказилади.

5. Қайта тайёрлаш дастурларига номзодларни саралаш Ўзбекистон Республикаси Президенти ҳузуридаги Бошқарув самарадорлиги агентлиги (кейинги ўринларда — Агентлик) томонидан манфаатдор давлат органлари ва ташкилотлари билан ҳамкорликда ташкил этилади.

6. Агентлик ҳар бир қайта тайёрлаш дастурларига қабул қилиш жараёни бўйича саралаш босқичларини ўтказиш билан боғлиқ чора-тадбирлар, ҳужжатларни тақдим этиш шакли ва муддатлари ҳамда бошқа зарур масалалар юзасидан саралаш бошланишидан камида 15 кун олдин давлат органлари ва ташкилотларига маълум қилади.

7. Қайта тайёрлаш дастурларига оид маълумотлар Агентлик ҳамда Академиянинг расмий веб-сайти ва ижтимоий тармоқлардаги саҳифаларида эълон қилиб борилади.

2-боб. Қайта тайёрлаш дастурлари учун номзодларни дастлабки саралаш тартиби

8. Қайта тайёрлаш дастурлари учун номзодларни дастлабки саралаш давлат органлари ва ташкилотларида номзодларни саралаб олиш бўйича ҳар йили 1 апрелга қадар идоравий комиссия (кейинги ўринларда — Идоравий комиссия) тузилади.

Идоравий комиссия ҳудудларнинг, иқтисодиёт тармоқлари ва ташкилотларнинг бошқарув кадрларига бўлган жорий ва келажакдаги талаб-эҳтиёжлари ўрганиб чиқади ҳамда шу асосда ходимлар, ташаббускор аёллар, истиқболли ёшлардан иборат қайта тайёрлаш дастурлари саралаш босқичида иштирок этиш учун номзодлар рўйхатини шакллантиради.

9. Номзодлар олий маълумотли ва камида 2 йил бошқарув лавозимларида иш тажрибасига эга бўлган, давлат бошқаруви ва ижтимоий-сиёсий ҳаётнинг турли соҳаларида самарали фаолият олиб бораётган, «Келажак лидерлари» дастури учун 25 ёшдан 35 ёшгача (35 ёш ҳам қўшилган ҳолда), қолган дастурларга 30 ёшдан 45 ёшгача бўлган (45 ёш ҳам қўшилган ҳолда) Ўзбекистон Республикаси фуқаролари номзод бўлишлари мумкин.

Бунда қайта тайёрлов дастурларига номзод сифатида кадрлар захирасига киритилган (Миллий кадрлар захираси, Салоҳиятли кадрлар захираси, Истиқболли кадрлар захираси каби) давлат хизматчилари ҳамда фуқаролик жамияти институтлари ва тадбиркорлик субъектлари ходимлари тавсия этилиши мумкин.

Кадрлар захирасига киритилган давлат хизматчилари орасидан етарлича номзодлар шаклланмаган ҳолатда, ташкилот тизимида фаолият юритаётган бошқа бошқарув ходимлари тавсия қилиниши мумкин.

10. Қайта тайёрлаш дастурларида иштирок этишлари учун номзодлар дастлаб ҳар йили 15 апрелга қадар Идоравий комиссияга мурожаат қилади ва тегишли ҳужжатларини тақдим этади.

11. Идоравий комиссия номзод ва унинг ҳужжатларини ҳар томонлама ўрганиб, қайта тайёрлаш дастурлари талабларига мос келадиган номзодларнинг рўйхатини шакллантиради ва ҳар йили 1 майга қадар Агентликка тавсия этади.

3-боб. Қайта тайёрлаш дастурларида таҳсил оладиган давлат хизматчилари контингентини шакллантириш тартиби

12. Қайта тайёрлаш дастурларида таҳсил оладиган давлат хизматчилари контингентини саралаш ва шакллантириш бўйича ҳар йили 1 июнга қадар Агентликда камида етти кишидан иборат, тоқ сонда бўлган махсус комиссия тузилади.

Махсус комиссия таркибига Агентлик, Академия вакиллари киритилади, шунингдек, давлат органлари ва ташкилотлари ходимлари ҳамда мустақил экспертлар жалб этилиши мумкин.

Агентлик директори ўринбосарларидан бири Комиссия раиси этиб белгиланади.

13. Махсус комиссия томонидан номзодларни саралаш тартиби қуйидагиларни ўз ичига олади:

а) тест синовлари — Агентлик ҳузуридаги Раҳбар кадрларни баҳолаш маркази (кейинги ўринларда — Раҳбар кадрларни баҳолаш маркази) томонидан интеллект даражаси (IQ-тест), психологик барқарорлик, давлат тилини билиш, ахборот технологиялари ҳамда сиёсий-ҳуқуқий ва ижтимоий-иқтисодий ислоҳотлар соҳасидаги билим ва кўникмаларини аниқлаш мақсадида марказлаштирилган тартибда онлайн режимда тест синовларидан ўтказилади.

Бунда давлат органлари ва ташкилотлари томонидан тақдим этилган номзодлардан тест синовларини ўтказиш Агентликнинг ҳудудий филиаллари ахборот технологиялари базасидан фойдаланган ҳолда шартнома асосида ташкил этилади. Давлат органлари ва ташкилотларининг марказий аппарати номзодлари Агентликнинг Тошкент шаҳри филиалига бириктирилади;

б) номзодлар билан суҳбат — уларнинг касбий салоҳияти, билим даражаси ҳамда малакавий ривожланишга бўлган интилиши баҳоланади.

Раҳбар кадрларни баҳолаш марказида тест синовларидан 71 фоиз ва ундан юқори кўрсаткичга эга номзодлар суҳбат жараёнига жалб этилади.

14. Саралаш жараёни шаффоф ва адолатли ўтказилади. Суҳбат жараёнлари видеотасвирга ёзиб олинади ҳамда онлайн режимда видеотрансляция қилиниши мумкин.

15. Суҳбат натижалари 100 баллик тизимда баҳоланади. Суҳбат махсус комиссия томонидан якка тартибда, ҳар бир номзод билан алоҳида ўтказилади. Унда номзоднинг қуйидаги компетенциялари баҳоланади:

давлат сиёсатини тушуниш ва таҳлил қилиш, сиёсий-ҳуқуқий, ижтимоий-иқтисодий соҳалари бўйича билими (25 балл);

стратегик фикрлаш ва қарор қабул қилиш қобилияти (20 балл);

эмоционал барқарорлик ва стрессга чидамлилик (20 балл);

хорижий тилни билиш даражаси (15 балл);

лидерлик қобилиятлари ва жамоа билан ишлаш салоҳияти (10 балл);

ижтимоий фаоллик, ташаббускорлик ва масъулият ҳисси (10 балл).

Номзодларнинг якуний натижалари комиссия аъзолари томонидан суҳбат натижасига кўра қўйган балларнинг қўшган ҳолдаги ўртачасидан келиб чиқиб аниқланади.

Суҳбат жараёни онлайн шаклда ўтказилиши мумкин.

16. Суҳбатдан энг юқори балл тўплаган номзодлар Академиянинг қабул параметрларида белгиланган квота доирасида мазкур Низомнинг 2-бандида кўрсатиб ўтилган қайта тайёрлаш дастурларининг бирида иштирок этиш учун ҳар бир йўналиш бўйича алоҳида тавсия этилади.

17. Агентлик қайта тайёрлаш таълим дастурларида иштирок этиш учун тавсия этилган номзодларни ҳар йили 1 июлга қадар Академияга тақдим этади.

18. Ўқув жараёнлари бошлангунга қадар қайта тайёрлаш дастурлари учун номзодларни саралаш натижаларига кўра дастурларга тавсия қилинган, бироқ оилавий ва (ёки) шахсий сабаблар туфайли дастурда иштирок эта олмайдиган номзодлар аризаларига биноан рўйхатдан чиқарилиши мумкин. Бунда мазкур номзод ўрнига натижалар кетма-кетлигидаги кейинги номзод Агентлик томонидан ўқувларга тавсия этилиши мумкин.

19. Қайта тайёрлаш дастурларига тавсия қилинган номзодлар рўйхати апелляция комиссияси қарори инобатга олинган ҳолда махсус комиссиянинг баёни билан тасдиқланади. Мазкур баён асосида Академия ректори томонидан белгиланган тартибда тингловчиларни қайта тайёрлаш дастурига ўқишга қабул қилиш тўғрисида буйруқ қабул қилинади.

4-боб. Номзодларнинг шикоятларини кўриб чиқиш тартиби

20. Тест ва суҳбат натижалари бўйича номзодларнинг шикоятлари, улар эълон қилинган санадан бошлаб икки иш куни мобайнида Агентликка ёзма шаклда тақдим этилади.

Суҳбат натижаларига кўра номзоднинг мурожаатини кўриб чиқиш жараёнида ёзиб олинган видеотасвир ўрганилади ҳамда ушбу Низом тартибига риоя қилинганлик ҳолати кўриб чиқилади.

21. Баҳолаш натижаларидан норози бўлган номзодларнинг апелляция шикоятларини кўриб чиқиш учун Агентликда уч кишидан иборат таркибда апелляция комиссияси тузилади.

Апелляция комиссиясига Агентлик директорининг махсус комиссияга раислик қилмаган бошқа ўринбосарларидан бири раис этиб белгиланади ва унинг таркиби махсус комиссия ишида иштирок этмаган шахслардан тузилади.

22. Апелляция комиссияси шикоятни у берилган кундан бошлаб уч иш куни ичида кўриб чиқади.

Бунда Апелляция комиссияси шикоятни кўриб чиқиш натижаларига кўра қуйидаги қарорлардан бирини қабул қилади:

шикоятни асосланган деб ҳисоблаш ҳамда уни қаноатлантириш;

шикоятни асоссиз деб ҳисоблаш ҳамда уни қаноатлантиришни рад этиш.

23. Апелляция комиссияси қарор қабул қилинган куни номзодни шикоят қаноатлантирилган ёки рад этилганлигини кўрсатган ҳолда, ёзма равишда хабардор қилади.

5-боб. Якунловчи қоида

24. Мазкур Низомнинг талабларини бузишда айбдор бўлган шахслар қонунчилик ҳужжатларига мувофиқ жавобгар бўладилар.

Ўзбекистон Республикаси Президенти ҳузуридаги Давлат сиёсати ва бошқаруви академиясида қайта тайёрлаш таълим дастурлари учун номзодларни саралаш тартиби тўғрисидаги низомга ИЛОВА

Ўзбекистон Республикаси Президенти ҳузуридаги Давлат сиёсати ва бошқаруви академиясида қайта тайёрлаш таълим дастурлари учун номзодларни саралаш тартиби бўйича

Босқичлар Субъектлар Тадбирлар Бажариш муддати 1-босқич Ўзбекистон Республикаси Президенти ҳузуридаги Бошқарув самарадорлиги агентлиги (кейинги ўринларда — Агентлик) Ўзбекистон Республикаси Президенти ҳузуридаги Давлат сиёсати ва бошқаруви академиясида (кейинги ўринларда — Академия) қайта тайёрлаш таълим дастурлари учун номзодларни саралаш босқичларини ўтказиш билан боғлиқ чора-тадбирлар, ҳужжатларни тақдим этиш шакли ва муддатлари ҳамда бошқа зарур масалалар юзасидан давлат органлари ва ташкилотларига маълум қилади. Саралаш бошланишидан камида 15 кун олдин 2-босқич Давлат органлари, хўжалик бирлашмалари, Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликлари Агентликнинг хатига мувофиқ Академияга қайта тайёрлаш таълим дастурларига қабулни ташкил этиш ва ўтказиш учун номзодларни бирламчи саралаб олиш бўйича идоравий комиссия (кейинги ўринларда — Идоравий комиссия) тузади. Ҳар йили 1 апрелга қадар 3-босқич Номзод Академиянинг қайта тайёрлаш таълим дастурларига кирмоқчи бўлган Ўзбекистон Республикаси фуқаролари — давлат хизматчилари, фуқаролик жамияти институтлари ва тадбиркорлик субъектлари ходимлари Идоравий комиссияга мурожаат қилади ва тегишли ҳужжатларини тақдим этади. Ҳар йили 15 апрелга қадар Идоравий комиссия 1. Академияда қайта тайёрлаш таълим дастурларига қабул қилиш учун ҳудудларнинг, иқтисодиёт тармоқлари ва ташкилотларнинг бошқарув кадрларига бўлган жорий ва келажакдаги талаб-эҳтиёжларини ўрганиб чиқади ҳамда шу асосда ходимлар, ташаббускор аёллар, истиқболли ёшлардан иборат қайта тайёрлаш дастурлари саралаш босқичида иштирок этиш учун номзодлар рўйхатини шакллантиради. 2. Академияда қайта тайёрлаш таълим дастурларига қабул қилиш учун номзодларнинг рўйхати, уларнинг ҳар бирига алоҳида тавсиянома ҳамда ҳужжатлар тўпламини электрон шаклда Агентликка тақдим этади. Ҳар йили 1 майга қадар 4-босқич Агентлик Қайта тайёрлаш дастурларида таҳсил оладиган давлат хизматчилари контингентини саралаш ва шакллантириш бўйича махсус комиссия тузади. Ҳар йили 1 июнга қадар 5-босқич Агентлик, Раҳбар кадрларни баҳолаш маркази Саралаш тартиби икки босқичда: 1-босқич — номзодларни билим ва кўникмаларини аниқлаш бўйича тест синовлари; 2-босқич — номзодларнинг касбий салоҳияти, хорижий тил билиш даражаси ва касбий ҳамда малакавий ривожланишга бўлган интилишини баҳолаш бўйича суҳбат шаклида ўтказилади. Ҳар йили июнь ойи давомида 6-босқич Агентлик Тест синовларидан 71 фоиз ва ундан юқори кўрсаткичга эга номзодлар суҳбат жараёнига жалб этилган ҳамда суҳбатдан энг юқори балл тўплаган номзодлар Академиянинг қабул параметрларида белгиланган квота доирасида ҳар бир қайта тайёрлаш таълим дастурлари бўйича алоҳида тавсия этилган номзодларни Академияга тақдим этади. Ҳар йили 1 июлга қадар

Ўзбекистон Республикасининг Бош вазири А. АРИПОВ

Тошкент ш.,

2025 йил 26 ноябрь,

743 -сон

(Қонунчилик маълумотлари миллий базаси, 27.11.2025 й., 09/25/743/1100-сон)

lex.uz

OʻZBEKISTON RESPUBLIKASI VAZIRLAR MAHKAMASINING

QARORI

NIZOM

SXEMASI

NIZOM

SXEMASI

Istiqbolli kadrlarni qayta tayyorlash hamda ularning xorijda maqsadli stajirovkasini tashkil etish chora-tadbirlari toʻgʻrisida

Oʻzbekiston Respublikasi Prezidentining “ Iqtidorli mutaxassislarning xorijda taʼlim olishini qoʻllab-quvvatlash, ularda kasbiy koʻnikmalarini rivojlantirish va ragʻbatlantirishga oid qoʻshimcha chora-tadbirlar toʻgʻrisida ” 2025-yil 5-maydagi PF-77-son hamda “ Istiqbolli kadrlarni maqsadli tayyorlash hamda ularni davlat boshqaruvi va xizmatiga samarali jalb etish tizimini yanada takomillashtirish chora-tadbirlari toʻgʻrisida ” PF-78-son farmonlari ijrosini taʼminlash maqsadida Vazirlar Mahkamasi qaror qiladi:

1. Quyidagilar:

a) Oʻzbekiston Respublikasi Prezidentining 2025-yil 5-maydagi PF-77-son Farmoniga muvofiq istiqbolli mutaxassislarning xorijiy universitetlar, ilmiy markazlar, kompaniya va tashkilotlarda maqsadli stajirovkasini tashkil etish tartibini ishlab chiqish;

b) Oʻzbekiston Respublikasi Prezidentining 2025-yil 5-maydagi PF-78-son Farmoniga muvofiq:

2026-yil 1-yanvardan boshlab Oʻzbekiston Respublikasi Prezidenti huzuridagi Davlat siyosati va boshqaruvi akademiyasida muddati 6 oygacha boʻlgan qayta tayyorlash dasturlari joriy etilishi;

davlat xizmatchilarining malakasini oshirish va qayta tayyorlash tizimini tubdan takomillashtirish belgilangani maʼlumot uchun qabul qilinsin.

2. Quyidagilar:

Istiqbolli mutaxassislarning “El-yurt umidi” jamgʻarmasi mablagʻlari hisobidan maqsadli stajirovkasini tashkil etish tartibi toʻgʻrisidagi nizom 1-ilovaga muvofiq;

Oʻzbekiston Respublikasi Prezidenti huzuridagi Davlat siyosati va boshqaruvi akademiyasida qayta tayyorlash taʼlim dasturlari uchun nomzodlarni saralash tartibi toʻgʻrisidagi nizom 2-ilovaga muvofiq tasdiqlansin.

3. Istiqbolli kadrlarni tayyorlash boʻyicha “El-yurt umidi” jamgʻarmasi Boshqaruv samaradorligi agentligi bilan birgalikda Tashqi ishlar vazirligining koʻmagida salohiyatli tinglovchilarni xorijiy davlatlarda maqsadli stajirovka oʻtashini tashkil etish, ularning konsullik hisobida turishini hamda xorijdagi stajirovka jarayoni doimiy ravishda kuzatib borilishini taʼminlash choralarini koʻrsin.

4. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari zimmasiga yuklansin.

Vazirlar Mahkamasining 2025-yil 26-noyabrdagi 743-son qaroriga 1-ILOVA

Istiqbolli mutaxassislarning “El-yurt umidi” jamgʻarmasi mablagʻlari hisobidan maqsadli stajirovkasini tashkil etish tartibi toʻgʻrisida

1-bob. Umumiy qoidalar

1. Ushbu Nizom vazirlik, idora, iqtisodiyot tarmoqlari strategik korxonalari, shuningdek, yetakchi oliy taʼlim muassasalari, tadqiqot va tahliliy markazlari istiqbolli mutaxassislarining Oʻzbekiston Respublikasi Prezidenti huzuridagi Istiqbolli kadrlarni tayyorlash boʻyicha “El-yurt umidi” jamgʻarmasi (keyingi oʻrinlarda — “El-yurt umidi” jamgʻarmasi) tomonidan qisman yoki toʻliq moliyalashtiriladigan rivojlangan mamlakatlardagi yetakchi universitetlar, ilmiy markazlar, turli kompaniya va tashkilotlarda maqsadli stajirovkasini tashkil etish tartibini belgilaydi.

2. Mazkur Nizomda quyidagi asosiy tushunchalar qoʻllaniladi:

buyurtmachi tashkilotlar — nomzodlarni maqsadli stajirovkaga yuborish uchun tavsiya etadigan vazirlik, idora, iqtisodiyot tarmoqlarining strategik korxonalari, yetakchi oliy taʼlim muassasalari, tadqiqot va tahliliy markazlar hamda Prezident, ijod va ixtisoslashtirilgan maktablar;

maqsadli stajirovka — mamlakatning ijtimoiy-iqtisodiy rivojlanishiga xizmat qiluvchi ustuvor sohalarda buyurtmachi tashkilotlar mutaxassislarining kasbiy bilim, koʻnikma va malakalarini zamon talablariga muvofiq rivojlantirish maqsadida xorijiy hamkor tashkilotlarda 1 oydan 6 oygacha boʻlgan muddatda amaliy tajriba olish jarayoni;

maqsadli stajirovka ishtirokchisi — maqsadli stajirovkaga tanlov asosida qabul qilingan va xorijiy tashkilotda stajirovka oʻtayotgan mutaxassis;

nomzod — maqsadli stajirovkaga buyurtmachi tomonidan tavsiya etilgan istiqbolli mutaxassis;

xorijiy hamkor tashkilot — “El-yurt umidi” jamgʻarmasi va (yoki) buyurtmachi tashkilotlar bilan hamkorlik aloqalariga ega boʻlgan hamda oʻzaro kelishuv yoki shartnomaga muvofiq maqsadli stajirovka bevosita oʻtaladigan xorijiy taʼlim, ilmiy yoki boshqa tashkilot.

3. Vazirlik, idora, iqtisodiyot tarmoqlarining strategik korxonalari, yetakchi oliy taʼlim muassasalari, tadqiqot va tahliliy markazlarida mehnat faoliyatini olib borayotgan mutaxassislar uchun buyurtmachi tashkilot tomonidan “El-yurt umidi” jamgʻarmasining imkoniyatlaridan kelib chiqib, xorijiy hamkor tashkilotlar ishtirokida boshqa stajirovkalar tashkil etilishi mumkin.

Mazkur stajirovkalarni tashkil etish va moliyalashtirish tartibi “El-yurt umidi” jamgʻarmasi Boshqaruv kengashi tomonidan belgilanadi.

4. Buyurtmachi tashkilotlar tomonidan “El-yurt umidi” jamgʻarmasi mablagʻlari hisobidan maqsadli stajirovkaga yuborilgan xodimning stajirovka muddati davomida egallab turgan lavozimi va oʻrtacha oylik ish haqi saqlanishi taʼminlanadi, shuningdek, ushbu xodimlarni xizmat boʻyicha birinchi navbatda oʻstirish choralari koʻriladi.

5. Maqsadli stajirovkani oʻtagan mutaxassislarga toʻliq bandlik rejimida ikki yil buyurtmachi tashkilotda uzluksiz ishlab berish majburiyati yuklanadi.

2-bob. Maqsadli stajirovka yoʻnalishlarini shakllantirish va nomzodlarni saralab olish tartibi

6. Maqsadli stajirovkaga yuborish boʻyicha takliflarni umumlashtirish, nomzodlarni saralab olishni tashkil etish va oʻtkazish Oʻzbekiston Respublikasi Prezidenti huzuridagi Boshqaruv samaradorligi agentligi (keyingi oʻrinlarda — Agentlik) tomonidan amalga oshiriladi.

7. Buyurtmachi tashkilotlar har yili 10-noyabrga qadar kadrlar tayyorlashga boʻlgan ehtiyojlar toʻgʻrisida lavozim va yoʻnalishlar kesimida, tanlangan nomzodlarning stajirovkasini tashkil qilish mumkin boʻlgan xorijiy tashkilotlar va stajirovka muddati boʻyicha asoslantirilgan maʼlumotlarni, shuningdek, nomzodlar stajirovkani tamomlagach bajaradigan vazifalari va erishishi lozim boʻlgan maqsadli koʻrsatkichlar roʻyxatini oʻrganib chiqish va umumlashtirish uchun Agentlikka taqdim etadi. Bunda:

maqsadli stajirovkani tashkil etishga boʻlgan ehtiyoj asoslantirilishi, shu jumladan, uni mamlakatimizdagi tashkilotlarda amalga oshirishdan farqli jihatlari sanab oʻtilishi;

maqsadli stajirovka oʻtash taklif etilayotgan xorijiy hamkor tashkilot haqida maʼlumot va unda stajirovka oʻtash imkoniyatlari mavjudligi (tegishli yozishmalar yoki kelishuvni ilova qilgan holda);

maqsadli stajirovka oʻtashning muddatlari hamda u bilan bogʻliq xarajatlar;

maqsadli stajirovkadan kutilayotgan natijalar aks ettirilishi lozim.

8. Agentlik buyurtmachi tashkilotlar tomonidan taqdim etilgan maʼlumotlarni umumlashtirish va tahlili asosida tarmoq yoʻnalishlari boʻyicha stajirovka dasturining xorijiy mamlakatlar kesimidagi kvotalarini belgilash uchun asoslantirilgan takliflarni har yili 10-dekabrga qadar “El-yurt umidi” jamgʻarmasining Boshqaruv kengashi majlislarida koʻrib chiqish uchun “El-yurt umidi” jamgʻarmasiga taqdim etadi.

9. “El-yurt umidi” jamgʻarmasining Boshqaruv kengashi har yili 15-yanvarga qadar Agentlik tomonidan taqdim etilgan asoslantirilgan takliflar asosida tarmoq yoʻnalishlari boʻyicha stajirovka dasturining xorijiy mamlakatlar kesimidagi kvotalarini tasdiqlaydi.

10. Stajirovka tashkil etiladigan xorijiy tashkilotlar va stajirovka muddati buyurtmachi tashkilotlar, Agentlik va “El-yurt umidi” jamgʻarmasi bilan birgalikda belgilanadi.

Maqsadli stajirovka dasturining xorijiy mamlakatlar kesimidagi tasdiqlangan kvotalari, ularning yoʻnalishlari va muddatlari boʻyicha maʼlumotlar Agentlik va “El-yurt umidi” jamgʻarmasining rasmiy veb-sahifalarida hamda ijtimoiy tarmoqlardagi sahifalarda eʼlon qilinadi.

11. Buyurtmachi tashkilotlar har yili 1-fevralga qadar maqsadli stajirovkaga yuboriladigan nomzodlar roʻyxatini shakllantirib, rasmiy xat asosida Agentlikka taqdim etadi.

Bunda buyurtmachi tashkilotlar birinchi navbatda, Milliy kadrlar zaxirasi tarkibiga kiritilgan nomzodlarni roʻyxatga kiritishi lozim.

Buyurtmachi tashkilotlar tomonidan nomzodlar roʻyxatini shakllantirishda quyidagilar inobatga olinishi lozim:

stajirovka dasturiga mos mutaxassisligi boʻyicha kamida 3 yillik ish tajribasi, shu jumladan oxirgi 12 oy davomida ushbu sohada ishlagan boʻlishi;

davlat tilini bilishi;

stajirovka oʻtash rejalashtirilgan xorijiy tashkilotning shartsiz taklifnomasi (moliyaviy shartlar bundan mustasno) mavjudligi (buyurtmachi tomonidan tavsiya etilgan nomzodlar uchun).

12. Buyurtmachi tashkilotlar tomonidan maqsadli stajirovkaga yuboriladigan nomzodlar roʻyxatini shakllantirib, Agentlikka taqdim etishda quyidagi hujjatlar ilova qilinadi:

Jamgʻarma ijrochi direktori nomiga belgilangan shakldagi ariza (stajirovkani amalga oshirish boʻyicha tanlangan mutaxassislik, xorijiy mamlakat va xorijiy tashkilot koʻrsatilgan holda);

ish joyi va lavozimi saqlanishi yoki tegishli taʼlim dasturi tugaganidan soʻng ishga joylashtirish boʻyicha majburiyatlar aks etgan buyurtmachi tashkilotning kafolat xati;

stajirovka oʻtash rejalashtirilgan xorijiy tashkilotning shartsiz taklifnomasi (moliyaviy shartlar bundan mustasno);

buyurtmachi tashkilot va stajirovka oʻtash rejalashtirilgan tashkilot tomonidan ishlab chiqilgan stajirovka dasturi;

stajirovkadan keyingi ikki yil davomida bajarishi lozim boʻlgan aniq vazifalar va maqsadli koʻrsatkichlar.

Bunda taqdim etiladigan hujjatlar shakllari Agentlik tomonidan ishlab chiqiladi va buyurtmachilarga har yili 1-yanvarga qadar taqdim etiladi.

13. Maqsadli stajirovka dasturida quyidagi shaxslar ishtirok eta olmaydi:

a) 25 yoshdan kichik boʻlganlar;

b) avval ayni yoki turdosh yoʻnalish boʻyicha xorijda maqsadli stajirovka oʻtab, uzluksiz ishlab berish majburiyati muddati tugamaganlar;

v) korrupsiyaga oid jinoyatlarni sodir etishda sud tomonidan aybdor deb topilgan shaxslar;

g) ogʻir va oʻta ogʻir jinoyatlarni sodir etganlik uchun sudlanganlik holati tugallanmagan yoki olib tashlanmagan shaxslar.

14. Agentlik buyurtmachi tashkilotlar tomonidan taqdim etgan nomzodlar toʻgʻrisidagi hujjatlar ushbu Nizom talablariga muvofiqligini oʻrganadi.

15. Hujjatlarni toʻliq taqdim etmagan yoki taqdim etilgan hujjatlari belgilangan talablarga muvofiq boʻlmaganda, kamchiliklarni bartaraf etish uchun buyurtmachiga uch ish kunidan iborat muddat beriladi.

16. Belgilangan muddatda buyurtmachi tashkilotlar tomonidan kamchiliklar bartaraf etilmaganda, nomzodlar Agentlik tomonidan tanlovdan chiqariladi.

17. Maqsadli stajirovkaga nomzodlarni saralash boʻyicha Agentlikda kamida yetti kishidan iborat, toq sonda boʻlgan tanlov komissiyasi (keyingi oʻrinlarda — Komissiya) tuziladi.

Komissiya tarkibiga Agentlik, “El-yurt umidi” jamgʻarmasi va Davlat siyosati va boshqaruvi akademiyasi vakillari kiritiladi, shuningdek, davlat organlari va tashkilotlari xodimlari hamda mustaqil ekspertlar jalb etilishi mumkin.

Bunda Agentlik direktori oʻrinbosarlaridan biri Komissiya raisi etib belgilanadi.

18. Saralash tartibi quyidagilarni oʻz ichiga oladi:

test sinovlari — bilim va koʻnikmalarini aniqlash;

nomzodlar bilan suhbat — ularning kasbiy salohiyati, xorijiy til bilish darajasi va kasbiy hamda malakaviy rivojlanishga boʻlgan intilishini baholash.

19. Tavsiya etilgan nomzodlar intellekt darajasi (IQ-test), psixologik barqarorlik, davlat tilini bilish, raqamli texnologiyalar hamda siyosiy-huquqiy va ijtimoiy-iqtisodiy islohotlar sohasidagi bilim darajasini aniqlash boʻyicha Agentlikning hududiy filiallari bazasida Agentlik huzuridagi Rahbar kadrlarni baholash markazi (keyingi oʻrinlarda — Rahbar kadrlarni baholash markazi) tomonidan markazlashtirilgan tartibda onlayn rejimida test sinovlaridan oʻtkaziladi.

20. Rahbar kadrlarni baholash markazida test sinovlaridan 71 foiz va undan yuqori koʻrsatkichga ega nomzodlar suhbat jarayoniga jalb etiladi.

21. Saralash jarayoni shaffof va adolatli oʻtkaziladi. Suhbat jarayonlari videotasvirga yozib olinadi hamda onlayn rejimda videotranslyatsiya qilinishi mumkin.

22. Suhbat natijalari 100 ballik tizimda baholanadi. Komissiya tomonidan yakka tartibda, har bir nomzod bilan alohida oʻtkaziladi. Unda nomzodning quyidagi kompetensiyalari baholanadi:

davlat siyosatini tushunish va tahlil qilish, siyosiy-huquqiy, ijtimoiy-iqtisodiy sohalari boʻyicha bilimi (25 ball);

stajirovka oʻtashda zarur boʻladigan xorijiy tilni bilish darajasi (15 ball);

strategik fikrlash va qaror qabul qilish qobiliyati (20 ball);

emotsional barqarorlik va stressga chidamlilik (20 ball);

liderlik qobiliyatlari va jamoa bilan ishlash salohiyati (10 ball);

ijtimoiy faollik, tashabbuskorlik va masʼuliyat hissi (10 ball).

Nomzodlarning yakuniy natijalari komissiya aʼzolari tomonidan suhbat natijasiga koʻra qoʻygan ballarning qoʻshgan holdagi oʻrtachasidan kelib chiqib aniqlanadi va komissiyaning bayonnomasi bilan rasmiylashtiriladi.

Suhbat jarayoni onlayn shaklda oʻtkazilishi mumkin.

23. Suhbatdan eng yuqori ball toʻplagan nomzodlar ballar reytingi asosida mazkur Nizomning 9-bandiga muvofiq tasdiqlanadigan kvota doirasida maqsadli stajirovkaga tavsiya etiladi.

24. Agentlik tomonidan oʻtkaziladigan tanlov natijalari asosida har yili 1-aprelga qadar tanlov gʻoliblari aniqlanadi va “El-yurt umidi” jamgʻarmasining Boshqaruv kengashi tomonidan tasdiqlash uchun “El-yurt umidi” jamgʻarmasiga taqdim etiladi.

25. Tanlov gʻoliblari roʻyxati Agentlik va “El-yurt umidi” jamgʻarmasining rasmiy veb-sahifalarida hamda ijtimoiy tarmoqlardagi sahifalarida eʼlon qilinadi.

26. “El-yurt umidi” jamgʻarmasi Boshqaruv kengashi qaroriga asosan gʻolib deb topilgan mutaxassislar, “El-yurt umidi” jamgʻarmasi, Agentlik, buyurtmachi tashkilot va moliyaviy (qoʻshimcha) kafil oʻrtasida shartnoma tuziladi.

Mutaxassislarning xorijda maqsadli stajirovkani oʻtashi, yashash va yurish-turish tartib-qoidalari hamda tomonlarning huquq va majburiyatlari ushbu shartnomada belgilab qoʻyiladi.

3-bob. Nomzodlarning shikoyatlarini koʻrib chiqish tartibi

27. Test va suhbat natijalari boʻyicha nomzodlarning shikoyatlari, ular eʼlon qilingan sanadan boshlab ikki ish kuni ichida Agentlikka yozma shaklda taqdim etiladi.

Suhbat natijalariga koʻra nomzodning murojaatini koʻrib chiqish jarayonida yozib olingan videotasvir oʻrganiladi hamda ushbu Nizom tartibiga rioya qilinganlik holati koʻrib chiqiladi.

28. Baholash natijalaridan norozi boʻlgan nomzodlarning apellyatsiya shikoyatlarini koʻrib chiqish uchun Agentlikda uch kishidan iborat tarkibda apellyatsiya komissiyasi tuziladi.

Apellyatsiya komissiyasiga Agentlik direktorining Komissiyaga raislik qilmagan boshqa oʻrinbosarlaridan biri rais etib belgilanadi va uning tarkibi Komissiya ishida ishtirok etmagan shaxslardan tuziladi.

29. Apellyatsiya komissiyasi shikoyatni u berilgan kundan boshlab uch ish kuni ichida koʻrib chiqib, qaror qabul qiladi.

Bunda Apellyatsiya komissiyasi shikoyatni koʻrib chiqish natijalariga koʻra quyidagi qarorlardan birini qabul qiladi:

shikoyatni asoslangan deb hisoblash hamda uni qanoatlantirish;

shikoyatni asossiz deb hisoblash hamda uni qanoatlantirishni rad etish.

30. Apellyatsiya komissiyasi qaror qabul qilingan kuni nomzodni shikoyat qanoatlantirilgan yoki rad etilganligini koʻrsatgan holda, yozma ravishda xabardor qiladi.

4-bob. Maqsadli stajirovkalarni tashkil etish tartibi

31. Maqsadli stajirovkaga yuboriladigan mutaxassislarning stajirovka oʻtashda zarur boʻladigan xorijiy tilni oʻrganishi uchun buyurtmachi tashkilot tomonidan tegishli sharoitlar yaratib beriladi, shu jumladan, xorijiy tilni oʻrganish bilan bogʻliq xarajatlar qoplanadi.

Ayrim hollarda tarjimon xizmatidan foydalanish orqali maqsadli stajirovka dasturi tashkil etilishi mumkin.

32. “El-yurt umidi” jamgʻarmasi xorijda maqsadli stajirovka narxlari, muddatlari va shart-sharoitlarining maqsadga muvofiqligidan kelib chiqib, maqsadli stajirovka ishtirokchisi uchun nisbatan afzal boʻlgan xorijiy tashkilotni tanlash huquqiga ega.

33. Maqsadli stajirovka dasturi “El-yurt umidi” jamgʻarmasi tomonidan xorijiy hamkorlar bilan tuzilgan kelishuvlar asosida maxsus nazariy yoki oʻquv-amaliy kurslar, tadqiqot, oʻquv modullari va sikllar koʻrinishida tashkil etiladi.

34. Maqsadli stajirovkaga yuborilgan mutaxassis maqsadli stajirovka davomida:

maqsadli stajirovka boʻyicha uslubiy va koʻrsatma materiallar bilan tanishishi;

maqsadli stajirovkani tashkil etish va undan oʻtish bilan bogʻliq tadbirlarda ishtirok etishi;

maqsadli stajirovka dasturida nazarda tutilgan barcha tadbirlarni belgilangan muddat ichida, toʻliq hajmda va sifatli bajarishi;

amaliy faoliyatda foydalanilishi mumkin boʻlgan hujjatlar namunalari va boshqa muhim materiallar toʻplamini yuritishi;

tegishli tashkilotda oʻrnatilgan tartib-qoidalarga rioya qilishi shart.

35. Maqsadli stajirovka “El-yurt umidi” jamgʻarmasi mablagʻlari, shuningdek, xorijiy grantlar va buyurtmachilar mablagʻlari hisobidan moliyalashtiriladi.

36. Maqsadli stajirovka dasturi doirasida quyidagi xarajatlar qoplanadi:

maqsadli stajirovka oʻtash boʻyicha xorijiy tashkilotga toʻlanadigan stajirovka uchun toʻlov;

viza xarajatlari;

maqsadli stajirovka davrida tibbiy sugʻurtalash xarajatlari;

barcha turdagi transport vositalari bilan stajirovkadan oʻtish joyigacha boʻlgan yoʻlkira xarajatlari (ikkala tomonga, koʻpi bilan bir marta);

maqsadli stajirovka dasturi bilan bogʻliq turar-joy, kunlik xarajatlar.

“El-yurt umidi” jamgʻarmasi Boshqaruv kengashi qaroriga koʻra maqsadli stajirovkaga yuborilgan mutaxassisning xorijda stajirovkasi bilan bevosita bogʻliq boʻlgan boshqa xarajatlar ham qoplanishi mumkin.

37. Maqsadli stajirovka dasturini moliyalashtirish bir nomzod uchun eng yuqori miqdori va moliyalashtirish tartibi “El-yurt umidi” jamgʻarmasining Boshqaruv kengashi tomonidan belgilanadi.

5-bob. Maqsadli stajirovkaga yuborilgan mutaxassislarning stajirovka oʻtashini va keyingi mehnat faoliyatini monitoring qilish

38. “El-yurt umidi” jamgʻarmasi maqsadli stajirovkaga yuborilgan mutaxassislarning stajirovkani oʻtash jarayonlari monitoringini olib boradi.

39. “El-yurt umidi” jamgʻarmasi maqsadli stajirovkani oʻtayotgan mutaxassislarning stajirovka jarayoni hamda xorijdagi hayoti va ijtimoiy holatiga tegishli boʻlgan maʼlumotlarni olib turish maqsadida Oʻzbekiston Respublikasining xorijiy davlatdagi Elchixonasi yoki konsullik xizmati koʻmagidan foydalanadi.

40. Buyurtmachi tashkilotlar xodimlarining maqsadli stajirovkasini tashkil etishda Oʻzbekiston Respublikasining xorijiy davlatdagi Elchixonasi yoki konsullik xizmati bilan birgalikda stajirovkaga yuborilgan mutaxassisning konsullik hisobida turishini taʼminlaydi, xorijdagi hayoti va sogʻligʻidan, shuningdek, ularning stajirovkasi, moddiy va maishiy ahvolidan xabardor boʻlib boradi hamda “El-yurt umidi” jamgʻarmasi bilan hamkorlikda uning muammolarini bartaraf etish choralarini koʻradi.

41. Maqsadli stajirovka dasturi boʻyicha belgilangan muddat tugaganidan soʻng mutaxassis uzogʻi bilan bir hafta ichida Oʻzbekiston Respublikasiga qaytib kelishi talab etiladi.

42. Maqsadli stajirovkaga yuborilgan mutaxassislar tomonidan stajirovkani oʻtash yakunlari boʻyicha “El-yurt umidi” jamgʻarmasiga stajirovka yakunlangandan soʻng 15 (oʻn besh) ish kuni ichida quyidagi maʼlumotlar va hujjatlar taqdim etiladi:

a) maqsadli stajirovka yakunlari boʻyicha hisobot;

b) moliyaviy hisobot, shu jumladan maqsadli stajirovka oʻtash boʻyicha xorijiy tashkilotga stajirovka uchun toʻlov toʻlanganini tasdiqlovchi hujjat (agarda toʻlovlar mutaxassis bank plastik kartasi orqali oʻtkazilgan boʻlsa);

v) maqsadli stajirovka oʻtaganligi boʻyicha sertifikat yoki boshqa tasdiqlovchi hujjat nusxasi.

43. Maqsadli stajirovkani oʻtagan mutaxassislar qaytgandan soʻng, xorijda olgan ilgʻor nazariy bilim va tajribalarini amaliyotga joriy etishi hamda xizmat boʻyicha oʻsishiga zarur sharoitlar yaratib borishga tegishli buyurtmachi tashkilotlar rahbarlari masʼul hisoblanadi.

Mazkur jarayonlar Agentlik tomonidan muvofiqlashtiriladi va monitoring qilib boriladi. Bunda monitoring ikki yil davomida bir yilda kamida ikki marotaba xorijda maqsadli stajirovkani oʻtagan mutaxassislarning uzluksiz ishlab berish majburiyati oʻtalayotgan tegishli tashkilotlardan olingan maʼlumotlar asosida amalga oshiriladi.

44. “El-yurt umidi” jamgʻarmasi mablagʻlari hisobidan maqsadli stajirovka oʻtagan mutaxassislar tomonidan shartnoma shartlari bajarilmagan taqdirda, sarflangan barcha xarajatlarning ikki barobari miqdorida maqsadli stajirovka oʻtagan mutaxassisning oʻzi va moliyaviy (qoʻshimcha) kafillari tomonidan qoplanadi.

6-bob. Yakunlovchi qoida

45. Mazkur Nizomning talablarini buzishda aybdor boʻlgan shaxslar qonunchilik hujjatlariga muvofiq javobgar boʻladilar.

Istiqbolli mutaxassislarning “El-yurt umidi” jamgʻarmasi mablagʻlari hisobidan maqsadli stajirovkasini tashkil etish tartibi toʻgʻrisidagi nizomga ILOVA

Istiqbolli mutaxassislarning xorijiy universitetlar, ilmiy markazlar, kompaniya va tashkilotlarda maqsadli stajirovkasini tashkil etish

Bosqichlar Subyektlar Tadbirlar Bajarish muddati 1-bosqich Buyurtmachi tashkilotlar Kadrlar tayyorlashga boʻlgan ehtiyojlar toʻgʻrisida lavozim va yoʻnalishlar kesimida, tanlangan nomzodlarning stajirovkasini tashkil qilish mumkin boʻlgan xorijiy tashkilotlar va stajirovka muddati boʻyicha asoslantirilgan maʼlumotlarni, shuningdek, nomzodlar stajirovkani tamomlagach bajaradigan vazifalari va erishishi lozim boʻlgan maqsadli koʻrsatkichlarni Oʻzbekiston Respublikasi Prezidenti huzuridagi Boshqaruv samaradorligi agentligiga (keyingi oʻrinlarda — Agentlik) taqdim etadi. Har yili 10-noyabrga qadar 2-bosqich Agentlik, “El-yurt umidi” jamgʻarmasi Buyurtmachi tashkilotlar tomonidan taqdim etilgan maʼlumotlarni umumlashtirish va tahlili asosida tarmoq yoʻnalishlari boʻyicha stajirovka dasturining xorijiy mamlakatlar kesimidagi kvotalarini belgilash uchun asoslantirilgan takliflarni “El-yurt umidi” jamgʻarmasining Boshqaruv kengashiga taqdim etadi. Har yili 10-dekabrga qadar “El-yurt umidi” jamgʻarmasining Boshqaruv kengashi Agentlik tomonidan taqdim etilgan asoslantirilgan takliflar asosida tarmoq yoʻnalishlari boʻyicha stajirovka dasturining xorijiy mamlakatlar kesimidagi kvotalarini tasdiqlaydi. Har yili 15-yanvarga qadar 3-bosqich Buyurtmachi tashkilotlar Maqsadli stajirovkaga yuboriladigan nomzodlar roʻyxatini shakllantirib, xat asosida Agentlikka taqdim etadi. Har yili 1-fevralga qadar 4-bosqich Agentlik, Rahbar kadrlarni baholash markazi 1. Maqsadli stajirovkaga nomzodlarni saralash boʻyicha tanlov komissiyasini tuzadi. 2. Saralash tartibi ikki bosqichda: birinchi bosqich — nomzodlarni bilim va koʻnikmalarini aniqlash boʻyicha test sinovlari; ikkinchi bosqich — nomzodlarning kasbiy salohiyati, xorijiy til bilish darajasi va kasbiy hamda malakaviy rivojlanishga boʻlgan intilishini baholash boʻyicha suhbat shaklida oʻtkaziladi. Har yili fevral-mart oylarida 5-bosqich Agentlik Test sinovlaridan 71 foiz va undan yuqori koʻrsatkichga ega nomzodlar suhbat jarayoniga jalb etilgan hamda suhbatdan eng yuqori ball toʻplagan nomzodlarni ballar reytingi asosida, kvota doirasida maqsadli stajirovkaga tavsiya etadi. Har bir saralash bosqichi yakuniga koʻra 2 ish kunida 6-bosqich Agentlik, “El-yurt umidi” jamgʻarmasi Tanlov natijalari asosida tanlov gʻoliblarini tasdiqlash uchun “El-yurt umidi” jamgʻarmasining Boshqaruv kengashiga taqdim etadi. Tanlov gʻoliblari roʻyxati Agentlik va “El-yurt umidi” jamgʻarmasining rasmiy veb-sahifalarida hamda ijtimoiy tarmoqlardagi sahifalarda eʼlon qilinadi. Har yili 1-aprelga qadar 7-bosqich “El-yurt umidi” jamgʻarmasi, buyurtmachi tashkilot “El-yurt umidi” jamgʻarmasi Boshqaruv kengashi qaroriga asosan gʻolib deb topilgan mutaxassislar “El-yurt umidi” jamgʻarmasi, Agentlik, buyurtmachi tashkilot va moliyaviy (qoʻshimcha) kafil oʻrtasida shartnoma tuzadi. 15 ish kuni ichida 8-bosqich “El-yurt umidi” jamgʻarmasi, buyurtmachi tashkilot Istiqbolli mutaxassislarning xorijiy universitetlar, ilmiy markazlar, kompaniya va tashkilotlarda maqsadli stajirovka oʻtashini tashkil etadi. Maqsadli stajirovka oʻtash davri davomida “El-yurt umidi” jamgʻarmasi, Agentlik Maqsadli stajirovkaga yuborilgan mutaxassislarni stajirovkadan keyingi mehnat faoliyatini monitoring qiladi. Maqsadli stajirovkadan keyin 2 yil davomida

Vazirlar Mahkamasining 2025-yil 26-noyabrdagi 743-son qaroriga 2-ILOVA

Oʻzbekiston Respublikasi Prezidenti huzuridagi Davlat siyosati va boshqaruvi akademiyasida qayta tayyorlash taʼlim dasturlari uchun nomzodlarni saralash tartibi toʻgʻrisida

1-bob. Umumiy qoidalar

1. Ushbu Nizom Oʻzbekiston Respublikasi Prezidenti huzuridagi Davlat siyosati va boshqaruvi akademiyasida (keyingi oʻrinlarda — Akademiya) davlat organlari, xoʻjalik birlashmalari, Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari (keyingi oʻrinlarda — davlat organlari va tashkilotlari) xodimlari uchun muddati 6 oygacha boʻlgan qayta tayyorlash taʼlim dasturlariga nomzodlarni saralash tartibini belgilaydi.

2. Akademiyada muddati 6 oygacha boʻlgan quyidagi qayta tayyorlash taʼlim dasturlari (keyingi oʻrinlarda — qayta tayyorlash dasturlari) joriy etiladi:

geosiyosat, global xavfsizlik, barqaror rivojlanish, loyiha boshqaruvi, ijtimoiy-iqtisodiy siyosat va boshqa dolzarb yoʻnalishlarda Oʻzbekiston Respublikasi Prezidenti Administratsiyasi topshirigʻiga muvofiq tashkil etiladigan maxsus kurslar;

tashabbuskor ayollarning rahbarlik koʻnikmalarini rivojlantirish va ularni davlat xizmatiga tayyorlash uchun “Rahbar ayollar” dasturi;

istiqbolli yoshlarni davlat xizmatiga jalb etish hamda yosh davlat xizmatchilarining yetakchilik va boshqaruvchilik qobiliyatlarini rivojlantirish uchun “Kelajak liderlari” dasturi;

davlat organlari va tashkilotlarining rahbar va boshqaruv kadrlari hamda mazkur lavozimlarga nomzodlar uchun “Tizimli tahlil, strategik rejalashtirish va maqsadli koʻrsatkichlarga erishish” dasturi;

hokimlar va ularning oʻrinbosarlari hamda mazkur lavozimlarga nomzodlar uchun “Hududlarni ijtimoiy-iqtisodiy rivojlantirish va xorijiy investitsiyalarni jalb etish” dasturi;

davlat organlari va tashkilotlarining kadrlar siyosatiga masʼul tarkibiy tuzilma rahbarlari uchun “Kadrlar zaxirasini shakllantirish va inson resurslarini rivojlantirish” dasturi;

davlat, tarmoq va hududiy rivojlantirish dasturlari boʻyicha loyihaviy boshqaruv va monitoring koʻnikmalarini rivojlantirish uchun “Davlat dasturlari va loyihalarini samarali boshqarish” dasturi.

3. Akademiyada qayta tayyorlash dasturlari uchun nomzodlarni saralashning asosiy vazifalari quyidagilardan iborat:

davlat organlari va tashkilotlarida faoliyat olib borayotgan yuqori malakali kadrlarni aniqlash;

davlat xizmatchilari oʻrtasida sogʻlom raqobat muhitini shakllantirish, intellektual va professional salohiyatni hamda tashabbuskorlik va yetakchilik fazilatlarini baholash;

yetakchilik fazilatlari va boshqaruvchilik bilimlari yuqori darajada boʻlgan istiqbolli rahbar xodimlarni tanlash va maxsus oʻquvlarga jalb qilish;

davlat organlari va tashkilotlari uchun istiqbolli boshqaruv kadrlari zaxirasiga nomzodlarni shakllantirish.

4. Qayta tayyorlash dasturlari uchun nomzodlarni saralash qonuniylik, xolislik, shaffoflik, kollegiallik va teng huquqlilik tamoyillari asosida oʻtkaziladi.

5. Qayta tayyorlash dasturlariga nomzodlarni saralash Oʻzbekiston Respublikasi Prezidenti huzuridagi Boshqaruv samaradorligi agentligi (keyingi oʻrinlarda — Agentlik) tomonidan manfaatdor davlat organlari va tashkilotlari bilan hamkorlikda tashkil etiladi.

6. Agentlik har bir qayta tayyorlash dasturlariga qabul qilish jarayoni boʻyicha saralash bosqichlarini oʻtkazish bilan bogʻliq chora-tadbirlar, hujjatlarni taqdim etish shakli va muddatlari hamda boshqa zarur masalalar yuzasidan saralash boshlanishidan kamida 15 kun oldin davlat organlari va tashkilotlariga maʼlum qiladi.

7. Qayta tayyorlash dasturlariga oid maʼlumotlar Agentlik hamda Akademiyaning rasmiy veb-sayti va ijtimoiy tarmoqlardagi sahifalarida eʼlon qilib boriladi.

2-bob. Qayta tayyorlash dasturlari uchun nomzodlarni dastlabki saralash tartibi

8. Qayta tayyorlash dasturlari uchun nomzodlarni dastlabki saralash davlat organlari va tashkilotlarida nomzodlarni saralab olish boʻyicha har yili 1-aprelga qadar idoraviy komissiya (keyingi oʻrinlarda — Idoraviy komissiya) tuziladi.

Idoraviy komissiya hududlarning, iqtisodiyot tarmoqlari va tashkilotlarning boshqaruv kadrlariga boʻlgan joriy va kelajakdagi talab-ehtiyojlari oʻrganib chiqadi hamda shu asosda xodimlar, tashabbuskor ayollar, istiqbolli yoshlardan iborat qayta tayyorlash dasturlari saralash bosqichida ishtirok etish uchun nomzodlar roʻyxatini shakllantiradi.

9. Nomzodlar oliy maʼlumotli va kamida 2 yil boshqaruv lavozimlarida ish tajribasiga ega boʻlgan, davlat boshqaruvi va ijtimoiy-siyosiy hayotning turli sohalarida samarali faoliyat olib borayotgan, “Kelajak liderlari” dasturi uchun 25 yoshdan 35 yoshgacha (35 yosh ham qoʻshilgan holda), qolgan dasturlarga 30 yoshdan 45 yoshgacha boʻlgan (45 yosh ham qoʻshilgan holda) Oʻzbekiston Respublikasi fuqarolari nomzod boʻlishlari mumkin.

Bunda qayta tayyorlov dasturlariga nomzod sifatida kadrlar zaxirasiga kiritilgan (Milliy kadrlar zaxirasi, Salohiyatli kadrlar zaxirasi, Istiqbolli kadrlar zaxirasi kabi) davlat xizmatchilari hamda fuqarolik jamiyati institutlari va tadbirkorlik subyektlari xodimlari tavsiya etilishi mumkin.

Kadrlar zaxirasiga kiritilgan davlat xizmatchilari orasidan yetarlicha nomzodlar shakllanmagan holatda, tashkilot tizimida faoliyat yuritayotgan boshqa boshqaruv xodimlari tavsiya qilinishi mumkin.

10. Qayta tayyorlash dasturlarida ishtirok etishlari uchun nomzodlar dastlab har yili 15-aprelga qadar Idoraviy komissiyaga murojaat qiladi va tegishli hujjatlarini taqdim etadi.

11. Idoraviy komissiya nomzod va uning hujjatlarini har tomonlama oʻrganib, qayta tayyorlash dasturlari talablariga mos keladigan nomzodlarning roʻyxatini shakllantiradi va har yili 1-mayga qadar Agentlikka tavsiya etadi.

3-bob. Qayta tayyorlash dasturlarida tahsil oladigan davlat xizmatchilari kontingentini shakllantirish tartibi

12. Qayta tayyorlash dasturlarida tahsil oladigan davlat xizmatchilari kontingentini saralash va shakllantirish boʻyicha har yili 1-iyunga qadar Agentlikda kamida yetti kishidan iborat, toq sonda boʻlgan maxsus komissiya tuziladi.

Maxsus komissiya tarkibiga Agentlik, Akademiya vakillari kiritiladi, shuningdek, davlat organlari va tashkilotlari xodimlari hamda mustaqil ekspertlar jalb etilishi mumkin.

Agentlik direktori oʻrinbosarlaridan biri Komissiya raisi etib belgilanadi.

13. Maxsus komissiya tomonidan nomzodlarni saralash tartibi quyidagilarni oʻz ichiga oladi:

a) test sinovlari — Agentlik huzuridagi Rahbar kadrlarni baholash markazi (keyingi oʻrinlarda — Rahbar kadrlarni baholash markazi) tomonidan intellekt darajasi (IQ-test), psixologik barqarorlik, davlat tilini bilish, axborot texnologiyalari hamda siyosiy-huquqiy va ijtimoiy-iqtisodiy islohotlar sohasidagi bilim va koʻnikmalarini aniqlash maqsadida markazlashtirilgan tartibda onlayn rejimda test sinovlaridan oʻtkaziladi.

Bunda davlat organlari va tashkilotlari tomonidan taqdim etilgan nomzodlardan test sinovlarini oʻtkazish Agentlikning hududiy filiallari axborot texnologiyalari bazasidan foydalangan holda shartnoma asosida tashkil etiladi. Davlat organlari va tashkilotlarining markaziy apparati nomzodlari Agentlikning Toshkent shahri filialiga biriktiriladi;

b) nomzodlar bilan suhbat — ularning kasbiy salohiyati, bilim darajasi hamda malakaviy rivojlanishga boʻlgan intilishi baholanadi.

Rahbar kadrlarni baholash markazida test sinovlaridan 71 foiz va undan yuqori koʻrsatkichga ega nomzodlar suhbat jarayoniga jalb etiladi.

14. Saralash jarayoni shaffof va adolatli oʻtkaziladi. Suhbat jarayonlari videotasvirga yozib olinadi hamda onlayn rejimda videotranslyatsiya qilinishi mumkin.

15. Suhbat natijalari 100 ballik tizimda baholanadi. Suhbat maxsus komissiya tomonidan yakka tartibda, har bir nomzod bilan alohida oʻtkaziladi. Unda nomzodning quyidagi kompetensiyalari baholanadi:

davlat siyosatini tushunish va tahlil qilish, siyosiy-huquqiy, ijtimoiy-iqtisodiy sohalari boʻyicha bilimi (25 ball);

strategik fikrlash va qaror qabul qilish qobiliyati (20 ball);

emotsional barqarorlik va stressga chidamlilik (20 ball);

xorijiy tilni bilish darajasi (15 ball);

liderlik qobiliyatlari va jamoa bilan ishlash salohiyati (10 ball);

ijtimoiy faollik, tashabbuskorlik va masʼuliyat hissi (10 ball).

Nomzodlarning yakuniy natijalari komissiya aʼzolari tomonidan suhbat natijasiga koʻra qoʻygan ballarning qoʻshgan holdagi oʻrtachasidan kelib chiqib aniqlanadi.

Suhbat jarayoni onlayn shaklda oʻtkazilishi mumkin.

16. Suhbatdan eng yuqori ball toʻplagan nomzodlar Akademiyaning qabul parametrlarida belgilangan kvota doirasida mazkur Nizomning 2-bandida koʻrsatib oʻtilgan qayta tayyorlash dasturlarining birida ishtirok etish uchun har bir yoʻnalish boʻyicha alohida tavsiya etiladi.

17. Agentlik qayta tayyorlash taʼlim dasturlarida ishtirok etish uchun tavsiya etilgan nomzodlarni har yili 1-iyulga qadar Akademiyaga taqdim etadi.

18. Oʻquv jarayonlari boshlangunga qadar qayta tayyorlash dasturlari uchun nomzodlarni saralash natijalariga koʻra dasturlarga tavsiya qilingan, biroq oilaviy va (yoki) shaxsiy sabablar tufayli dasturda ishtirok eta olmaydigan nomzodlar arizalariga binoan roʻyxatdan chiqarilishi mumkin. Bunda mazkur nomzod oʻrniga natijalar ketma-ketligidagi keyingi nomzod Agentlik tomonidan oʻquvlarga tavsiya etilishi mumkin.

19. Qayta tayyorlash dasturlariga tavsiya qilingan nomzodlar roʻyxati apellyatsiya komissiyasi qarori inobatga olingan holda maxsus komissiyaning bayoni bilan tasdiqlanadi. Mazkur bayon asosida Akademiya rektori tomonidan belgilangan tartibda tinglovchilarni qayta tayyorlash dasturiga oʻqishga qabul qilish toʻgʻrisida buyruq qabul qilinadi.

4-bob. Nomzodlarning shikoyatlarini koʻrib chiqish tartibi

20. Test va suhbat natijalari boʻyicha nomzodlarning shikoyatlari, ular eʼlon qilingan sanadan boshlab ikki ish kuni mobaynida Agentlikka yozma shaklda taqdim etiladi.

Suhbat natijalariga koʻra nomzodning murojaatini koʻrib chiqish jarayonida yozib olingan videotasvir oʻrganiladi hamda ushbu Nizom tartibiga rioya qilinganlik holati koʻrib chiqiladi.

21. Baholash natijalaridan norozi boʻlgan nomzodlarning apellyatsiya shikoyatlarini koʻrib chiqish uchun Agentlikda uch kishidan iborat tarkibda apellyatsiya komissiyasi tuziladi.

Apellyatsiya komissiyasiga Agentlik direktorining maxsus komissiyaga raislik qilmagan boshqa oʻrinbosarlaridan biri rais etib belgilanadi va uning tarkibi maxsus komissiya ishida ishtirok etmagan shaxslardan tuziladi.

22. Apellyatsiya komissiyasi shikoyatni u berilgan kundan boshlab uch ish kuni ichida koʻrib chiqadi.

Bunda Apellyatsiya komissiyasi shikoyatni koʻrib chiqish natijalariga koʻra quyidagi qarorlardan birini qabul qiladi:

shikoyatni asoslangan deb hisoblash hamda uni qanoatlantirish;

shikoyatni asossiz deb hisoblash hamda uni qanoatlantirishni rad etish.

23. Apellyatsiya komissiyasi qaror qabul qilingan kuni nomzodni shikoyat qanoatlantirilgan yoki rad etilganligini koʻrsatgan holda, yozma ravishda xabardor qiladi.

5-bob. Yakunlovchi qoida

24. Mazkur Nizomning talablarini buzishda aybdor boʻlgan shaxslar qonunchilik hujjatlariga muvofiq javobgar boʻladilar.

Oʻzbekiston Respublikasi Prezidenti huzuridagi Davlat siyosati va boshqaruvi akademiyasida qayta tayyorlash taʼlim dasturlari uchun nomzodlarni saralash tartibi toʻgʻrisidagi nizomga ILOVA

Oʻzbekiston Respublikasi Prezidenti huzuridagi Davlat siyosati va boshqaruvi akademiyasida qayta tayyorlash taʼlim dasturlari uchun nomzodlarni saralash tartibi boʻyicha

Bosqichlar Subyektlar Tadbirlar Bajarish muddati 1-bosqich Oʻzbekiston Respublikasi Prezidenti huzuridagi Boshqaruv samaradorligi agentligi (keyingi oʻrinlarda — Agentlik) Oʻzbekiston Respublikasi Prezidenti huzuridagi Davlat siyosati va boshqaruvi akademiyasida (keyingi oʻrinlarda — Akademiya) qayta tayyorlash taʼlim dasturlari uchun nomzodlarni saralash bosqichlarini oʻtkazish bilan bogʻliq chora-tadbirlar, hujjatlarni taqdim etish shakli va muddatlari hamda boshqa zarur masalalar yuzasidan davlat organlari va tashkilotlariga maʼlum qiladi. Saralash boshlanishidan kamida 15 kun oldin 2-bosqich Davlat organlari, xoʻjalik birlashmalari, Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari Agentlikning xatiga muvofiq Akademiyaga qayta tayyorlash taʼlim dasturlariga qabulni tashkil etish va oʻtkazish uchun nomzodlarni birlamchi saralab olish boʻyicha idoraviy komissiya (keyingi oʻrinlarda — Idoraviy komissiya) tuzadi. Har yili 1-aprelga qadar 3-bosqich Nomzod Akademiyaning qayta tayyorlash taʼlim dasturlariga kirmoqchi boʻlgan Oʻzbekiston Respublikasi fuqarolari — davlat xizmatchilari, fuqarolik jamiyati institutlari va tadbirkorlik subyektlari xodimlari Idoraviy komissiyaga murojaat qiladi va tegishli hujjatlarini taqdim etadi. Har yili 15-aprelga qadar Idoraviy komissiya 1. Akademiyada qayta tayyorlash taʼlim dasturlariga qabul qilish uchun hududlarning, iqtisodiyot tarmoqlari va tashkilotlarning boshqaruv kadrlariga boʻlgan joriy va kelajakdagi talab-ehtiyojlarini oʻrganib chiqadi hamda shu asosda xodimlar, tashabbuskor ayollar, istiqbolli yoshlardan iborat qayta tayyorlash dasturlari saralash bosqichida ishtirok etish uchun nomzodlar roʻyxatini shakllantiradi. 2. Akademiyada qayta tayyorlash taʼlim dasturlariga qabul qilish uchun nomzodlarning roʻyxati, ularning har biriga alohida tavsiyanoma hamda hujjatlar toʻplamini elektron shaklda Agentlikka taqdim etadi. Har yili 1-mayga qadar 4-bosqich Agentlik Qayta tayyorlash dasturlarida tahsil oladigan davlat xizmatchilari kontingentini saralash va shakllantirish boʻyicha maxsus komissiya tuzadi. Har yili 1-iyunga qadar 5-bosqich Agentlik, Rahbar kadrlarni baholash markazi Saralash tartibi ikki bosqichda: 1-bosqich — nomzodlarni bilim va koʻnikmalarini aniqlash boʻyicha test sinovlari; 2-bosqich — nomzodlarning kasbiy salohiyati, xorijiy til bilish darajasi va kasbiy hamda malakaviy rivojlanishga boʻlgan intilishini baholash boʻyicha suhbat shaklida oʻtkaziladi. Har yili iyun oyi davomida 6-bosqich Agentlik Test sinovlaridan 71 foiz va undan yuqori koʻrsatkichga ega nomzodlar suhbat jarayoniga jalb etilgan hamda suhbatdan eng yuqori ball toʻplagan nomzodlar Akademiyaning qabul parametrlarida belgilangan kvota doirasida har bir qayta tayyorlash taʼlim dasturlari boʻyicha alohida tavsiya etilgan nomzodlarni Akademiyaga taqdim etadi. Har yili 1-iyulga qadar

Oʻzbekiston Respublikasining Bosh vaziri A. ARIPOV

Toshkent sh.,

2025-yil 26-noyabr,

743 -son

(Qonunchilik maʼlumotlari milliy bazasi, 27.11.2025-y., 09/25/743/1100-son)

lex.uz