UzbekAI

ЎЗБЕКИСТОН РЕСПУБЛИКАСИ ВАЗИРЛАР МАҲКАМАСИНИНГ

ҚАРОРИ

НИЗОМ

НОРМАТИВЛАРИ

НИЗОМ

НАМУНАСИ

ПАСПОРТИ

Автотранспорт воситаларининг атмосфера ҳавосига зарарли таъсирини камайтириш мақсадида «Экологик транспорт» тизимини жорий этиш чора-тадбирлари тўғрисида

Ўзбекистон Республикаси Президентининг «Ўзбекистон — 2030» стратегиясини «Ёшлар ва бизнесни қўллаб-қувватлаш йили»да амалга оширишга оид давлат дастури тўғрисида» 2024 йил 21 февралдаги ПФ-37-сон Фармонига мувофиқ республика ҳудудида экологик талабларга мувофиқ бўлмаган автотранспорт воситалари эксплуатациясини босқичма-босқич чеклаш, уларнинг атмосфера ҳавосига салбий таъсирини камайтириш мақсадида Вазирлар Маҳкамаси қарор қилади:

1. Қуйидагилар:

Ўзбекистон Республикаси Президентининг 2024 йил 21 февралдаги ПФ-37-сон Фармонига мувофиқ 2030 йилга қадар Тошкент ва Нукус шаҳарлари, вилоятлар марказларида «Евро-5» ва ундан юқори стандартларга мувофиқ бўлмаган автотранспорт воситалар эксплуатациясини босқичма-босқич чеклаш;

Вазирлар Маҳкамасининг «Атмосфера ҳавосига транспорт воситаларининг салбий таъсирини камайтириш бўйича чора-тадбирлар тўғрисида» 2024 йил 29 мартдаги 166-сон қарорига асосан барча тоифалардаги автотранспорт воситаларидан чиқариладиган ифлослантирувчи моддалар ташламаларининг атмосфера ҳавосига зарарли таъсири бўйича йўл қўйиладиган нормативларга мослигини назорат қилиш бўйича «Экологик транспорт» тизимини босқичма-босқич жорий этиш, бунда:

ҳудудларни улардаги атмосфера ҳавоси билан боғлиқ реал экологик ҳолатдан келиб чиқиб, илғор хорижий тажриба ва инновацион технологиялар асосида экологик зоналарга ажратиб бориш;

автотранспорт воситаларининг нормативларга мослиги даражасини автоматик баҳолаш тизими ёрдамида экологик стикерлар бериш орқали автотранспорт воситаларини «яшил», «сариқ» ва «қизил» ранглар билан белгиланадиган «тоза», «ўрта» ва «зарарли» экологик тоифаларга ажратиб бориш;

экологик тоифаси ҳудуднинг экологик зонасига мувофиқ бўлмаган автотранспорт воситаларига нисбатан экологик компенсация тўловларини жорий этиш ёхуд улардан тегишли экологик зоналар ҳудудида фойдаланишни чеклаш ёки тақиқлаш белгилангани маълумот учун қабул қилинсин.

2. «Экологик транспорт» тизими биринчи босқичда 2026 йил 1 январдан бошлаб Тошкент шаҳрида жорий этилсин.

3. «Экологик транспорт» тизимини босқичма-босқич жорий этиш мақсадида қуйидагилар:

Автотранспорт воситаларидан чиқариладиган ифлослантирувчи моддалар ташламаларининг атмосфера ҳавосига зарарли таъсири бўйича йўл қўйиладиган нормативларга мослиги даражасини аниқлаш, уларни экологик тоифаларга ажратиш ҳамда экологик стикерларни бериш тартиби тўғрисидаги низом 1-иловага мувофиқ;

Ҳудудларда экологик зоналарни ташкил этиш ҳамда уларнинг атмосфера ҳавоси бўйича электрон экологик харитасини шакллантириш ва юритиш тартиби тўғрисидаги низом 2-иловага мувофиқ тасдиқлансин.

4. Белгилансинки, 2026 йил 1 январдан бошлаб республикада ишлаб чиқарилаётган автотранспорт воситаларини техник ҳужжатларида уларнинг экологик синфи кўрсатилади.

Бунда сотувга чиқарилаётган автотранспорт воситалари электрон ҳисоб-маълумотномаларида уларнинг экологик синфлари тўғрисидаги маълумотлар акс эттирилади.

5. Ўзбекистон Республикаси Ички ишлар вазирлиги:

автотранспорт воситаларининг электрон ҳисоб-маълумотномалари асосида Ички ишлар вазирлиги Жамоат хавфсизлиги департаменти Йўл ҳаракати хавфсизлиги хизматининг Ягона автоматлаштирилган ахборот тизими «Автомототранспорт ҳисоби» модулига автотранспорт воситаларининг экологик синфига оид маълумотлар киритиб борилишини;

Транспорт вазирлиги билан биргаликда 2026 йил 1 январга қадар республикада фойдаланишда бўлган, шунингдек, ишлаб чиқарилаётган автотранспорт воситаларининг (тури, русуми, модели бўйича) ишлаб чиқарувчи томонидан тасдиқланган экологик синфига («Евро» ва унга муқобил бошқа турдаги стандартлар) доир маълумотларни умумлаштириб, тасдиқланишини таъминласин.

6. Ўзбекистон Республикаси Рақамли технологиялар вазирлиги Ички ишлар вазирлиги ҳамда Экология ва иқлим ўзгариши миллий қўмитаси билан биргаликда икки ой муддатда экологик тоифаси ҳудуднинг экологик зонасига мувофиқ бўлмаган автотранспорт воситаларидан экологик зоналар ҳудудида экологик компенсация тўловларини тўлаган ҳолда фойдаланиш учун рухсатномани ушбу қарорда белгиланган тартибда Ягона интерактив давлат хизматлари портали орқали расмийлаштириш ҳамда экологик компенсация тўловларини электрон тўлов тизимлари орқали тўлаш имкониятини яратсин.

7. Ўзбекистон Республикаси Ҳукуматининг 3-иловага мувофиқ айрим қарорларига ўзгартириш ва қўшимчалар киритилсин.

8. Ўзбекистон Республикаси Экология ва иқлим ўзгариши миллий қўмитаси Транспорт вазирлиги, Ички ишлар вазирлиги ҳамда манфаатдор вазирлик ва идоралар билан биргаликда:

уч ой муддатда ушбу қарордан келиб чиқиб, қонунчилик ҳужжатларига ўзгартириш ва қўшимчалар киритиш юзасидан Вазирлар Маҳкамасига таклифлар киритилишини;

ўзлари қабул қилган идоравий ҳужжатларини икки ой муддатда ушбу қарорга мувофиқлаштиришни;

ушбу қарорнинг моҳияти ва аҳамияти жамоатчилик ўртасида кенг тушунтирилишини таъминласин.

9. Ушбу қарорнинг бажарилишини назорат қилиш Ўзбекистон Республикаси Бош вазирининг ўринбосари А.Ж. Раматов, транспорт вазири И.Р. Махкамов ҳамда ички ишлар вазири А.А. Ташпулатов зиммасига юклансин.

Вазирлар Маҳкамасининг 2025 йил 28 ноябрдаги 750-сон қарорига 1-ИЛОВА

Автотранспорт воситаларидан чиқариладиган ифлослантирувчи моддалар ташламаларининг атмосфера ҳавосига зарарли таъсири бўйича йўл қўйиладиган нормативларга мослиги даражасини аниқлаш, уларни экологик тоифаларга ажратиш ҳамда экологик стикерларни бериш тартиби тўғрисида

1-боб. Умумий қоидалар

1. Ушбу Низом автотранспорт воситаларидан (кейинги ўринларда — транспорт воситалари) чиқариладиган ифлослантирувчи моддалар ташламаларининг атмосфера ҳавосига зарарли таъсири бўйича йўл қўйиладиган нормативларга (кейинги ўринларда — нормативлар) мослиги даражасини аниқлаш, уларни экологик тоифаларга ажратиш ҳамда экологик стикерларни бериш тартибини белгилайди.

2. Мазкур Низом талаблари қуйидаги транспорт воситаларига нисбатан татбиқ этилмайди:

Ўзбекистон Республикаси ҳудуди орқали транзит олиб ўтиладиган;

белгиланган тартибда вақтинча (тўқсон календарь кунгача) Ўзбекистон Республикаси ҳудудида бўлган;

электромобиллар, электромотоцикллар, мотоцикллар, скутерлар, мопедлар, уч ғилдиракли транспорт воситалари;

тезкор ва махсус хизматларнинг кўк ёки қизил ёхуд кўк ва қизил рангли ялтироқ маёқча билан жиҳозланган ҳамда махсус рангли бўёқ схемалар ва ёзувлар билан белгиланган транспорт воситалари ҳамда жамоат транспорти (такси ва йўналишли таксидан ташқари);

қишлоқ хўжалиги техникалари;

«ногиронлиги бўлган шахс» белгиси ўрнатилган транспорт воситаси.

3. Ушбу Низомда қуйидаги тушунчалардан фойдаланилади:

диагностика текшируви — транспорт воситаларидан ишлатилган газлар чиқариб юборилганда, улардаги ифлослантирувчи моддаларнинг миқдорини аниқлаш;

ифлослантирувчи моддалар — кимёвий моддалар, шу жумладан, бошқа моддалар учун белгиланган нормативлардан ортиқ миқдорда ва (ёки) концентрацияларда атроф-муҳитга, инсон ҳаёти ва соғлиғига салбий таъсир кўрсатадиган моддалар;

Ўзбекистон Республикаси Ички ишлар вазирлиги Жамоат хавфсизлиги департаменти Йўл ҳаракати хавфсизлиги хизмати Ягона автоматлаштирилган ахборот тизимининг «Автомототранспорт ҳисоби» модули (кейинги ўринларда — «Автомототранспорт ҳисоби» модули) — Йўл ҳаракати хавфсизлиги хизмати ҳамда «экологик транспорт» тизими фаолияти билан боғлиқ электрон маълумотлар базаси;

норматив — транспорт воситасидан чиқариладиган ифлослантирувчи моддалар ташламаларининг атмосфера ҳавосига зарарли таъсири бўйича йўл қўйиладиган миқдори;

экологик тоифа — транспорт воситаларидан чиқариладиган ифлослантирувчи моддалар ташламаларининг атмосфера ҳавосига зарарли таъсири бўйича йўл қўйиладиган нормативлар асосида «яшил», «сариқ» ва «қизил» ранглар билан белгиланадиган «тоза», «ўрта» ва «зарарли» экологик даражаси;

экологик синф («Евро» ва унга муқобил бошқа турдаги стандартлар) — транспорт воситасидан ишлатилган газлар чиқариб юборилганда, улардаги ифлослантирувчи моддаларни миқдорига қараб тавсифловчи тасниф коди;

экологик стикер — транспорт воситасининг экологик тоифасини тасдиқловчи электрон маълумотларни ўз ичига олган ёрлиқ;

экологик оператор — Ички ишлар вазирлигининг «Инновация лойиҳалари ва аҳолига сервис хизматлари кўрсатиш маркази» давлат унитар корхонасининг транспорт воситаларини диагностика текширувидан ўтказиш учун махсус билим ва тажрибага эга бўлган масъул ходими;

экологик стикерга талабгор — тасарруфидаги транспорт воситасининг экологик тоифасини аниқлаш истагини билдирган жисмоний ва юридик шахс.

4. Транспорт воситасининг экологик тоифаси унинг ишлаб чиқарувчи томонидан тасдиқланган экологик синфига («Евро» ва унга муқобил бошқа турдаги стандартлар) мувофиқ белгиланади.

5. Транспорт воситасининг экологик синфи («Евро» ва унга муқобил бошқа турдаги стандартлар) аниқ бўлмаганда, унинг экологик тоифаси диагностика текшируви натижаларига кўра экологик оператор томонидан аниқланади.

2-боб. Транспорт воситаларининг экологик тоифасини белгилаш ҳамда диагностика текширувидан ўтказиш тартиби

6. Транспорт воситалари учун биринчи марта, шунингдек, бир йил ичида бир маротаба қайта экологик тоифани белгилаш, шу жумладан, диагностик текширувдан ўтказиш ва экологик стикер бериш алоҳида тўлов ундирилмасдан Давлат йўл ҳаракати хавфсизлиги хизмати бўлинмаларида Ички ишлар вазирлигининг «Инновация лойиҳалари ва аҳолига сервис хизматлари кўрсатиш маркази» давлат унитар корхонаси томонидан амалга оширилади.

7. Транспорт воситаларини экологик тоифаларга ажратиш ҳамда нормативларга мослиги даражасини диагностика текширувидан ўтказиш уларни Давлат йўл ҳаракати хавфсизлиги бўлинмаларида рўйхатга олиш ва қайта рўйхатга олиш жараёнида, фойдаланишда бўлган транспорт воситалари эса эгасининг ихтиёрий мурожаати асосида мазкур Низомда белгиланган тартибда амалга оширилади.

8. Ишлаб чиқарувчи томонидан экологик синфи («Евро» ва унга муқобил бошқа турдаги стандартлар) тасдиқланган транспорт воситаларини рўйхатга олиш ва қайта рўйхатга олишда уларни диагностика текширувидан ўтказиш талаб этилмайди.

Бунда транспорт воситалари қуйидаги мезонларга кўра экологик тоифаларга ажратилади:

а) бензин, сиқилган ва суюлтирилган газ ёқилғиси билан ҳаракатланувчи:

«Евро-2» ва ундан юқори экологик синфига («Евро» ва унга муқобил бошқа турдаги стандартлар) кирувчи транспорт воситалари — «тоза» экологик тоифага;

«Евро-0» ва «Евро-1» (ва унга муқобил бошқа турдаги стандартлар) экологик синфига кирувчи транспорт воситалари — «ўрта» экологик тоифага;

б) дизель ёқилғи тури билан ҳаракатланувчи:

«Евро-4» ва ундан юқори экологик синфига («Евро» ва унга муқобил бошқа турдаги стандартлар) кирувчи транспорт воситалари — «тоза» экологик тоифага;

«Евро-3» (ва унга муқобил бошқа турдаги стандартлар) экологик синфига кирувчи транспорт воситалари — «ўрта» экологик тоифага;

«Евро-0», «Евро-1» ва «Евро-2» (ва унга муқобил бошқа турдаги стандартлар) экологик синфига кирувчи транспорт воситалари — «зарарли» экологик тоифага;

в) гибрид автомобиллар, муқобил ёқилғи турларида (сиқилган ва суюлтирилган газ бундан мустасно) ҳаракатланувчи транспорт воситалари ҳамда ишлаб чиқарилганига уч йилдан ошмаган транспорт воситалари — «тоза» экологик тоифага ажратилади.

9. Транспорт воситаларини экологик тоифаларга ажратиш Ўзбекистон Республикасида фойдаланишда бўлган транспорт воситаларининг тасдиқланган экологик синфига («Евро» ва унга муқобил бошқа турдаги стандартлар) доир маълумотлар базаси асосида «Автомототранспорт ҳисоби» модулида автоматик тарзда белгиланади.

10. Экологик синфини («Евро» ва унга муқобил бошқа турдаги стандартлар) аниқлаш имкони бўлмаган транспорт воситаларининг экологик тоифасини белгилаш учун улар рўйхатга олиш ва қайта рўйхатга олиш жараёнида диагностика текширувидан қуйидаги тартибда ўтказилади:

диагностика текшируви экологик оператор томонидан натижаларини автоматик баҳолаш тизимига асосланган ўлчов воситаларига мувофиқ амалга оширилади;

диагностика текшируви натижалари «Автомототранспорт ҳисоби» модулида автоматик тарзда қайд этилади;

«Автомототранспорт ҳисоби» модулининг диагностика текшируви натижаларига кўра автотранспорт воситалари мазкур Низомга 1-иловадаги транспорт воситаларидан чиқариладиган ифлослантирувчи моддалар ташламаларининг атмосфера ҳавосига зарарли таъсири бўйича йўл қўйиладиган нормативлари асосида «тоза», «ўрта» ва «зарарли» экологик тоифаларга автоматик тарзда ажратилади.

11. Транспорт воситасининг диагностика текшируви натижалари, ўлчов воситаларининг метрологик назорати натижаларини эътироф этиш сертификати, текширувни ўтказган экологик оператор ҳамда текширув ўтказилган сана ва вақтга доир электрон маълумотлар онлайн тартибда «Автомототранспорт ҳисоби» модулида акс эттирилади.

12. Транспорт воситасининг эгаси диагностика текшируви натижаларидан норози бўлган тақдирда, транспорт воситасини ихтиёрий равишда қайта диагностика текширувидан ўтказиши мумкин. Бунда қайта диагностика текшируви мазкур Низомда белгиланган тартибда амалга оширилади.

13. Илгари ўтказилган диагностика текшируви натижасига кўра «ўрта» ёки «зарарли» экологик тоифага ажратилган ва унга мос экологик стикер берилган транспорт воситаси эгаси ихтиёрий равишда бир йилда бир марта ушбу хизматлар учун алоҳида тўлов ундирилмасдан, айнан шу транспорт воситасининг экологик тоифасини «тоза» ёки «ўрта» экологик тоифага яхшилаш мақсадида қайта диагностика текширувидан ўтказиш ва натижалари бўйича янги экологик стикерга эга бўлиши мумкин.

Транспорт воситасини мазкур банднинг биринчи хатбошисида белгиланганидан ортиқча ҳар бир қайта диагностика текширувидан ўтказиш ва натижалари бўйича янги экологик стикер олиш хизматлари тўлов асосида кўрсатилади.

Бунда қайта диагностика текширувини ўтказиш билан боғлиқ кўрсатилган ҳар бир хизмат учун тўлов миқдори базавий ҳисоблаш миқдорининг бир баравари миқдорида белгиланади.

14. Транспорт воситасини тўлов асосида қайта диагностика текширувидан ўтказишдан келиб тушадиган маблағлар қуйидагича тақсимланади:

15 фоизи — Ўзбекистон Республикаси Ички ишлар вазирлиги Жамоат хавфсизлиги департаменти Давлат йўл ҳаракати хавфсизлиги хизматининг моддий-техника базасини ривожлантириш, ходимларини рағбатлантириш ва мукофотлаш жамғармасига;

15 фоизи — Ўзбекистон Республикаси Ички ишлар вазирлигининг «Инновация лойиҳалари ва аҳолига сервис хизматлари кўрсатиш маркази» давлат унитар корхонаси шахсий ҳисобварағига;

70 фоизи — Ўзбекистон Республикаси Давлат бюджетига.

15. Экологик стикерга талабгор қуйидаги ҳуқуқларга эга:

Давлат йўл ҳаракати хавфсизлиги хизмати бўлинмаларида транспорт воситасини рўйхатга олиш ва қайта рўйхатга олиш жараёнида электрон навбатдан ўтиш ва унда белгиланган вақтда транспорт воситасини диагностика текширувидан ўтказиш;

экологик оператордан диагностика ўлчов воситаларининг метрологик назорати натижаларини эътироф этиш сертификатини сўраш;

транспорт воситасининг диагностика текшируви натижаларидан норози бўлган тақдирда, уни қайта диагностика текширувидан ўтказишни талаб қилиш;

транспорт воситаси диагностика текширувидан ўтказилгандан сўнг экологик стикерни олиш ҳамда транспорт воситасининг белгиланган қисмига елимлаш.

16. Диагностика ўлчов воситалари мувофиқлик текшируви Экология ва иқлим ўзгариши миллий қўмитаси ҳузуридаги Давлат экологик сертификатлаштириш ва стандартлаштириш маркази томонидан ўтказилади.

3-боб. Транспорт воситаларига экологик стикер бериш тартиби

17. Илгари экологик стикер олганлигидан қатъи назар, транспорт воситаларини рўйхатга олиш ва қайта рўйхатга олиш жараёнида уларнинг тоифаларига мос равишдаги «яшил», «сариқ» ёки «қизил» рангли экологик стикерлар Давлат йўл ҳаракати хавфсизлиги бўлинмаларида экологик операторлар томонидан берилади.

18. Транспорт воситаларини рўйхатга олиш ва қайта рўйхатга олиш жараёнида:

ишлаб чиқарувчи томонидан экологик синфи («Евро» ва унга муқобил бошқа турдаги стандартлар) тасдиқланган транспорт воситаларига мазкур Низомнинг 8-бандида белгиланган мезонлар асосида диагностика текширувларисиз аниқланадиган экологик тоифага мос бўлган рангдаги;

экологик синфини («Евро» ва унга муқобил бошқа турдаги стандартлар) аниқлаш имкони бўлмаган транспорт воситаларига мазкур Низомнинг 10-бандига мувофиқ ўтказиладиган диагностика текширувлари натижалари асосида автоматик тарзда аниқланган экологик тоифага мос бўлган рангдаги экологик стикер расмийлаштириб берилади.

Бунда экологик стикер транспорт воситасини рўйхатга олиш (қайта рўйхатга олиш) амалиёти ўтказилган жойда махсус техника воситаларида автоматик тарзда чоп этилади ва транспорт воситасининг рўйхатдан ўтказилгани тўғрисидаги гувоҳнома ҳамда бириктирилган давлат рақами белгиси билан бирга транспорт воситасининг эгасига топширилади.

19. Фойдаланишда бўлган транспорт воситаларига экологик стикерлар қуйидаги тартибда берилади:

а) транспорт воситасининг эгаси (кейинги ўринларда — мурожаат этувчи) ихтиёрий равишда транспорт воситасига экологик стикер олиш мақсадида Ички ишлар вазирлиги Жамоат хавфсизлиги департаменти Йўл ҳаракати хавфсизлиги хизматига (кейинги ўринларда — ваколатли орган) унинг расмий веб-сайти ёки Ягона интерактив давлат хизматлари портали орқали қуйидагиларни илова қилган ҳолда мурожаат қилади:

белгиланган шаклдаги электрон ариза;

транспорт воситасининг рўйхатдан ўтказилгани тўғрисидаги гувоҳноманинг электрон шаклдаги нусхаси;

экологик стикер почта орқали юборилиши кўрсатилган манзил;

б) ваколатли орган мурожаат келиб тушган кундан бошлаб ўн кун муддатда қуйидагиларни амалга оширади:

мурожаатда кўрсатилган транспорт воситаси тўғрисидаги маълумотларни «Автомототранспорт ҳисоби» модули орқали текширади;

ишлаб чиқарувчи томонидан экологик синфи («Евро» ва унга муқобил бошқа турдаги стандартлар) тасдиқланган автотранспорт воситаларининг экологик тоифасини мазкур Низомнинг 8-бандида белгиланган мезонлар асосида «Автомототранспорт ҳисоби» модули орқали автоматик тарзда аниқлайди;

транспорт воситасининг экологик тоифасига мос экологик стикерни расмийлаштириб (стикер реквизитлари автоматик тўлдирилади) махсус техник воситаларда чоп этади ва мурожаат этувчи ҳисобидан унинг мурожаатида кўрсатилган манзилга почта орқали юборади. Бунда почта харажатлари мурожаат этувчи томонидан ваколатли орган веб-сайти ёки Ягона интерактив давлат хизматлари портали орқали ариза юбориш вақтида олдиндан электрон тўлов шаклида амалга оширилади.

Почта харажатлари базавий ҳисоблаш миқдорининг 5 фоизи миқдорида белгиланади;

в) мурожаатда кўрсатилган транспорт воситасининг экологик синфини («Евро» ва унга муқобил бошқа турдаги стандартлар) аниқлаш имкони бўлмаган ҳолатларда, мурожаат этувчига транспорт воситасининг экологик тоифасини белгилаш учун диагностика текширувидан ўтказиш тўғрисида асослантирилган электрон жавоб хати юборади.

20. Транспорт воситасига унинг экологик тоифасига мос бўлган мазкур Низомга 2-иловада келтирилган намунадаги экологик стикерлардан бири берилади.

21. Транспорт воситасининг экологик тоифаси ва унга берилган экологик стикер реквизитлари тўғрисидаги электрон маълумотлар «Автомототранспорт ҳисоби» модулида сақланади.

22. Экологик стикер транспорт воситасининг олд ойнасининг пастки ўнг бурчагига ички томондан ўрнатилади (елимланади).

Экологик стикерни транспорт воситасининг бошқа қисмларига ўрнатиш (елимлаш) ва ўзбошимчалик билан экологик стикерни ўрнатилган (елимланган) жойидан ажратиш ва қайта ўрнатиш (елимлаш) мумкин эмас.

4-боб. Экологик стикерларнинг амал қилиш муддати

23. Экологик стикерлар муддатсиз даврга берилади.

24. Қуйидаги ҳолатларда экологик стикерлар тўлов асосида қайта расмийлаштирилиши мумкин:

транспорт воситасини бошқа шахсга ўтказишда ёхуд фуқаронинг доимий яшаш манзили ёки юридик шахснинг рўйхатга олинган манзили ўзгариши, қайта ташкил этилиши муносабати билан қайта рўйхатдан ўтказилганда, шунингдек, транспорт воситасининг давлат рақамлари ўзгартирилганда;

экологик стикернинг шикастланиши ёки рангининг ўчиши натижасида ундаги транспорт воситасининг давлат рақамини ўқиш имкони бўлмаганда;

транспорт воситасининг олд ойнаси яроқсиз ҳолга келганда.

25. Экологик стикерлар мазкур Низомда белгиланган тартибда қайта расмийлаштирилади.

5-боб. Якунловчи қоидалар

26. Ушбу Низомни қўллашда юзага келадиган низолар қонунчилик ҳужжатларида белгиланган тартибда ҳал этилади.

27. Ушбу Низом талабларининг бузилишида айбдор бўлган шахслар қонунчилик ҳужжатларида белгиланган тартибда жавоб берадилар.

Автотранспорт воситаларидан чиқариладиган ифлослантирувчи моддалар ташламаларининг атмосфера ҳавосига зарарли таъсири бўйича йўл қўйиладиган нормативларга мослиги даражасини аниқлаш, уларни экологик тоифаларга ажратиш ҳамда экологик стикерларни бериш тартиби тўғрисидаги низомга 1-ИЛОВА

Автотранспорт воситаларидан чиқариладиган ифлослантирувчи моддалар ташламаларининг атмосфера ҳавосига зарарли таъсири бўйича йўл қўйиладиган

Автотранспорт тоифаси Ўлчанадиган зарарли модда Тирсакли валнинг айланиш тезлиги Белгиланган нормативларни амалга кириш санаси Экологик тоифалар нормативлари «тоза» «ўрта» «зарарли» ** «яшил» «сариқ» «қизил» I. Бензин ёқилғисида ишлашга мўлжалланган автотранспорт воситалари учун М ва N , 1986 йил 1 октябрдан аввал ишлаб чиқарилганлари * СО (углерод оксиди), ҳажм улуши, фоиз минимал 2026 йил 1 январь - 3,5 фоизгача 3,5 фоиздан 5,5 фоизгача М ва N , ишлаб чиқарилган газларни тозалаш мосламаси йўқ СО (углерод оксиди), ҳажм улуши, фоиз минимал 2026 йил 1 январь 1,0 фоиздан паст 1,0 фоиздан 1,5 фоизгача 1,5 фоиздан 3,5 фоизгача минимал 2028 йил 1 январь 0,9 фоиздан паст 0,9 фоиздан 1,4 фоизгача 1,4 фоиздан 3,5 фоизгача минимал 2029 йил 1 январь 0,8 фоиздан паст 0,8 фоиздан 1,3 фоизгача 1,3 фоиздан 3,5 фоизгача М ва N , ишлаб чиқарилган газларни тозалаш мосламаси бор СО (углерод оксиди), ҳажм улуши, фоиз минимал 2026 йил 1 январь 0,9 фоиздан паст 0,9 фоиздан 1,5 фоизгача 1,5 фоиздан 2,5 фоизгача юқори 2026 йил 1 январь 0,7 фоиздан паст 0,7 фоиздан 1,3 фоизгача 1,3 фоиздан 2,5 фоизгача минимал 2028 йил 1 январь 0,7 фоиздан паст 0,7 фоиздан 1,3 фоизгача 1,3 фоиздан 2,5 фоизгача юқори 2028 йил 1 январь 0,5 фоиздан паст 0,5 фоиздан 1,1 фоизгача 1,1 фоиздан 2,5 фоизгача минимал 2030 йил 1 январь 0,5 фоиздан паст 0,5 фоиздан 0,9 фоизгача 0,9 фоиздан 2,5 фоизгача юқори 2030 йил 1 январь 0,3 фоиздан паст 0,3 фоиздан 0,7 фоизгача 0,7 фоиздан 2,5 фоизгача II. Дизель ёқилғисида ишлашга мўлжалланган автотранспорт воситалари учун М ва N оддий дизель двигателлари учун Тутунлилик, ҳажм улуши м -1 (ёруғлик оқими сусайишининг максимал рухсат этилган коэффициенти) Максимал (максимал тезликнинг 90 фоизидан ошмаган ҳолда) 2026 йил 1 январь 2,50 м -1 дан паст 2,50 м -1 дан 3,0 м -1 гача 3,0 м -1 дан 3,50 м -1 гача М ва N оддий дизель двигателлари учун Тутунлилик, ҳажм улуши м -1 (ёруғлик оқими сусайишининг максимал рухсат этилган коэффициенти) Максимал (максимал тезликнинг 90 фоизидан ошмаган ҳолда) 2028 йил 1 январь 1,50 м -1 дан паст 1,50 м -1 дан 3,0 м м -1 гача 3,0 м -1 дан 3,50 м -1 гача М ва N оддий дизель двигателлари учун Тутунлилик, ҳажм улуши м -1 (ёруғлик оқими сусайишининг максимал рухсат этилган коэффициенти) Максимал (максимал тезликнинг 90 фоизидан ошмаган ҳолда) 2026 йил 1 январь 0,70 м -1 дан паст 0,70 м -1 дан 2,5 м -1 гача 2,5 м -1 дан 3,50 м -1 гача М ва N , турбо зарядланган дизель двигателлари учун Тутунлилик, ҳажм улуши м -1 (ёруғлик оқими сусайишининг максимал рухсат этилган коэффициенти) Максимал (максимал тезликнинг 90 фоизидан ошмаган ҳолда) 2026 йил 1 январь 2,0 м -1 дан паст 2,00 м -1 дан 3,00 м-1 гача 3,00 м -1 дан 3,50 м -1 гача М ва N , турбо зарядланган дизель двигателлари учун Тутунлилик, ҳажм улуши м -1 (ёруғлик оқими сусайишининг максимал рухсат этилган коэффициенти) Максимал (максимал тезликнинг 90 фоизидан ошмаган ҳолда) 2028 йил 1 январь 1,0 м -1 дан паст 1,00 м -1 дан 2,00 м -1 гача 2,00 м -1 дан 3,50 м -1 гача М ва N , турбо зарядланган дизель двигателлари учун Тутунлилик, ҳажм улуши м -1 (ёруғлик оқими сусайишининг максимал рухсат этилган коэффициенти) Максимал (максимал тезликнинг 90 фоизидан ошмаган ҳолда) 2030 йил 1 январь 0,5 м -1 дан паст 0,50 м -1 дан 1,50 м -1 гача 1,50 м -1 дан 3,50 м -1 гача

Автотранспорт воситаларидан чиқариладиган ифлослантирувчи моддалар ташламаларининг атмосфера ҳавосига зарарли таъсири бўйича йўл қўйиладиган нормативларга мослиги даражасини аниқлаш, уларни экологик тоифаларга ажратиш ҳамда экологик стикерларни бериш тартиби тўғрисидаги низомга 2-ИЛОВА

Автотранспорт воситаларининг экологик тоифасини ифода этувчи экологик стикерлар намуналари

«Тоза» экологик тоифага мансуб бўлган автотранспорт воситаларига бириктириладиган экологик стикер намунаси («яшил» стикер) «Ўрта» экологик тоифага мансуб бўлган автотранспорт воситаларига бириктириладиган экологик стикер намунаси («сариқ» стикер) «Зарарли» экологик тоифага мансуб бўлган автотранспорт воситаларига бириктириладиган экологик стикер намунаси («қизил» стикер)

Автотранспорт воситаларининг экологик тоифасини ифода этувчи экологик стикерлар намуналарининг тавсифи

«Тоза», «ўрта» ва «зарарли» экологик тоифаларга мансуб автотранспорт воситаларига бириктириладиган экологик стикерлар диаметри 90±2 мм ўлчамдаги доира шаклида, мос равишда яшил, сариқ ва қизил рангда, автотранспорт воситасининг ичкари томонидан олд ойнасига ёпиштириладиган эластик мустаҳкам материалдан тайёрланади. Лотин ёзувидаги давлат тилидан фойдаланилади.

Экологик стикерда қурилмалар ўртасида бевосита алоқасиз ахборот алмашиш имконини берувчи электрон белги бўлади.

Экологик стикер қалбакилаштиришдан ҳимоялашни таъминлайдиган DMC (QR) код билан ишлаб чиқарилади ҳамда 10 та белгидан иборат серия ва рақамларга эга бўлади.

Экологик стикернинг юқори қисмидаги чети бўйлаб «OʻZBEKISTON RESPUBLIKASI», пастки қисмидаги чети бўйлаб «Avtomototransport vositasining ekologik toifasi» сўзлари, юқори ўрта қисмида турли рангларда товланувчи дарахт барги шаклидаги экологик белги ва «ECO PASS» сўзлари, ўрта қисмида унинг қайси экологик тоифасига мансублигига мос номланиши: «TOZA», «OʻRTA» ёки «ZARARLI» сўзлари туширилади.

«OʻZBEKISTON RESPUBLIKASI» ва «Avtomomototransport vositasining ekologik toifasi» сўзлари икки томондан саккиз қиррали юлдузчалар билан ажратилади.

Экологик стикерда, шунингдек, оқ фонда автотранспорт воситасининг давлат рақам белгиси ва экологик стикер берилган сана мажбурий тартибда алоҳида кўрсатилади.

Вазирлар Маҳкамасининг 2025 йил 28 ноябрдаги 750-сон қарорига 2-ИЛОВА

Ҳудудларда экологик зоналарни ташкил этиш ҳамда уларнинг атмосфера ҳавоси бўйича электрон экологик харитасини шакллантириш ва юритиш тартиби тўғрисида

1-боб. Умумий қоидалар

1. Ушбу Низом ҳудудларда экологик зоналарни ташкил этиш ҳамда уларнинг атмосфера ҳавоси бўйича электрон экологик харитасини шакллантириш ва юритиш тартибини белгилайди.

2. Ҳудудларда атмосфера ҳавоси билан боғлиқ реал экологик ҳолатдан келиб чиққан ҳолда экологик зоналар ташкил этилади.

3. Мазкур Низомда қуйидаги асосий тушунчалар қўлланилади:

атмосфера ҳавосининг ифлосланиш мониторинги — атмосфера ҳавоси ифлосланишининг ўтган, ҳозирги ҳолатини баҳолаш ҳамда келажакдаги ҳолатини прогнозлаш мақсадида маълумот берувчи вақт ва макондаги доимий узоқ давом этадиган кузатувлар тизими;

атроф-муҳитни ифлослантириш манбаи — ифлослантирувчи моддалар ташламалари орқали атроф-муҳитни ифлослантирувчи антропоген стационар ва (ёки) кўчма манбалар объекти;

ифлослантирувчи ташланмалар — автотранспорт воситаларидан ишлатилган газлар чиқариб юборилганда, улардаги ифлослантирувчи моддаларнинг атмосфера ҳавосига чиқарилиши;

стационар кузатиш пункти (пост) — атмосфера ҳавоси намуналарини мунтазам олиш ва кейинчалик кимёвий таҳлил қилиш учун мўлжалланган приборлар ва ускуналар, шу жумладан, автоматик станциялар ўрнатилган ер участкасини ўз ичига олган, атроф табиий муҳитнинг ҳолатини ва унга таъсир кўрсатувчи манбаларни олдиндан тадқиқ этиш асосида танланган жойларда жойлашган комплекс;

«экологик транспорт» тизими — атмосфера ҳавосига транспорт воситаларининг салбий таъсирини камайтириш бўйича амалга ошириладиган чора-тадбирлар мажмуи;

экологик зоналар — атмосфера ҳавоси билан боғлиқ реал экологик ҳолатдан келиб чиққан ҳолда, «экологик транспорт» тизими жорий этиладиган экологик мақомга эга ҳудудлар;

электрон экологик харита — инновацион технологияларни татбиқ қилиш орқали ўзида барча экологик зоналар ҳақида умумлашган маълумотлардан иборат бўлган мамлакатнинг атмосфера ҳавоси бўйича электрон харитага киритилган даврий маълумотлар базаси.

2-боб. Ҳудудларда атмосфера ҳавоси билан боғлиқ реал экологик ҳолатдан келиб чиққан ҳолда экологик зоналарни ташкил этиш тартиби

4. Ўзбекистон Республикаси Экология ва иқлим ўзгариши миллий қўмитасининг (кейинги ўринларда — Экология қўмитаси) таклифига кўра Қорақалпоғистон Республикаси Жўқорғи Кенгеси, вилоятлар ва Тошкент шаҳар халқ депутатлари Кенгашлари қарорига мувофиқ:

мазкур Низомнинг 6-бандида кўзда тутилган экологик индикаторларга асосан ҳудудларнинг экологик зоналари чегаралари белгиланади ҳамда ўзгартирилади;

мазкур Низомга иловадаги намуна бўйича экологик зона паспорти тасдиқланади.

5. Ҳудудларда экологик зоналарни ташкил этишда Қорақалпоғистон Республикаси, вилоятлар ва Тошкент шаҳри ер фондига тегишли барча ер тоифалари инобатга олинади.

6. Ҳудудлар экологик зона ташкил этиш учун қуйидаги экологик индикаторларга асосан баҳоланади:

СО 2 эмиссияси (СО 2 интенсивлиги ва уни қисқартириш стратегияси);

энергия (энергия истеъмоли, маҳсулот бирлигини ишлаб чиқариш учун сарф бўладиган энергия миқдори, қайта тикланувчан энергия манбалари жорий этилгани);

бино (турар жой биноларининг энергия истеъмоли, энергия тежовчи бинолар бўйича ташаббуслар);

транспорт (экологик тоза транспорт воситаларидан фойдаланиш, улар учун инфратузилма яратилгани);

ердан фойдаланиш (ердан «яшил» фойдаланиш сиёсати, «яшил» ҳудудларнинг мавжудлиги);

чиқиндилар (маиший чиқиндилар ҳосил бўлиши, чиқиндиларни қайта ишлаш ва камайтириш сиёсати);

сув (сув истеъмоли, тармоқдаги йўқотишлар, оқова сувларни тозалаш, сувни самарали тозалаш сиёсати);

ҳавонинг сифати (асосий ифлослантирувчи моддалар даражаси, тоза ҳаво сиёсати);

экологик бошқариш тизими («яшил» ҳаракатлар режаси, «яшил» бошқариш, «яшил» сиёсатда жамоатчиликнинг фаоллиги);

биохилма-хиллик (флора, фауна ресурслари).

Юқорида келтирилган экологик индикаторлар асосида 100 балли баҳолаш тизими орқали энг паст баллга эга бўлган ҳудудлар экологик зона тоифасига номзод ҳудуд сифатида кўрсатилади. Бунда индикаторлар бўйича балларни ҳисоблаш тартиби Экология қўмитаси томонидан белгиланади.

7. Экология қўмитасининг таклифига кўра Қорақалпоғистон Республикаси Жўқорғи Кенгеси, вилоятлар ва Тошкент шаҳар халқ депутатлари Кенгашлари томонидан муҳофаза этиладиган табиий ҳудудлар ёки уларнинг айрим ер участкалари, шунингдек, экологик, илмий, маданий, эстетик, рекреация ва санитария-соғломлаштириш аҳамиятига эга бўлган ҳудудлар баҳоланмасдан уларда экологик зоналар ташкил этилиши мумкин.

8. Фуқароларнинг ўзини ўзи бошқариш органлари ҳудудлардаги экологик зоналар чегараларини белгилаш ва ўзгартириш бўйича тегишлича Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликларига таклиф киритиш ҳуқуқига эга.

9. Экологик зоналар ҳудудида «ўрта» ва «зарарли» экологик тоифаларга мансуб ҳамда экологик стикери мавжуд бўлмаган автотранспорт воситалари ҳаракатланиши тақиқланади, белгиланган тартибда рухсатнома олган ҳолда ҳаракатланиш ҳоллари бундан мустасно.

Экологик зоналар ҳудудида ҳаракатланиш қоидаларини бузиш амалдаги қонунчиликка мувофиқ жавобгарликка сабаб бўлади.

10. «Экологик зона ҳудудида «ўрта» ва «зарарли» экологик тоифаларга мансуб автотранспорт воситалари ҳаракатланиши тақиқланган» йўл белгиси Давлат стандарти талаблари асосида ўрнатилади.

11. «Зарарли» ва «ўрта» тоифадаги автотранспорт воситалари эгалари ихтиёрий равишда автотранспорт воситаларининг экологик тоифасига кўра белгиланган экологик компенсация тўловларини тўлаш орқали тегишли рухсатнома асосида экологик зоналар ҳудудида ҳаракатланиши ҳуқуқига эга бўлади, бунда рухсатнома бир йил муддатга берилади.

Рухсатнома бериш тартиби Вазирлар Маҳкамаси қарори билан белгиланади.

«Зарарли» ва «ўрта» тоифадаги автотранспорт воситалари эгалари экологик зоналарга кириши учун қуйидаги миқдорда экологик компенсация тўловларини тўлайди:

«ўрта» экологик тоифадаги автотранспорт воситалари эгалари — базавий ҳисоблаш миқдорининг бир баравари миқдорида;

«зарарли» экологик тоифа автотранспорт воситалари эгалари — базавий ҳисоблаш миқдорининг уч баравари миқдорида.

Бунда экологик компенсация суммаси қуйидаги тартибда тақсимланади:

40 фоизи — Ўзбекистон Республикасининг республика бюджети;

60 фоизи — Экология қўмитасининг бюджетдан ташқари жамғармаси.

12. Экологик компенсация тўловлари тўланган автотранспорт воситаси ва унинг эгаси тўғрисидаги маълумотлар Ўзбекистон Республикаси Ички ишлар вазирлиги Жамоат хавфсизлиги департаменти Йўл ҳаракати хавфсизлиги хизмати Ягона автоматлаштирилган ахборот тизимининг «Автомототранспорт ҳисоби» модулида автоматик тарзда ҳисобга олинади.

13. Шошилинч ва тезкор хизмат транспорт воситаларидан ҳамда жамоат транспортидан (такси ва йўналишли таксидан ташқари) барча экологик зоналар ҳудудида ҳеч қандай чеклов ва тақиқларсиз фойдаланилади.

Экологик зона ҳудудида доимий яшовчи ёки меҳнат фаолиятини амалга оширувчи фуқаролар, шунингдек, экологик зона ҳудудида жойлашган тиббиёт муассасаларига кечиктириб бўлмайдиган ҳолатларда ташриф буюрувчилар мазкур ҳудудда чеклов ва тақиқларсиз ҳаракат қилиш ҳуқуқига эга.

3-боб. Атмосфера ҳавоси бўйича электрон экологик харитани шакллантириш ва юритиш тартиби

14. Атмосфера ҳавосининг ҳолатини кузатиш, у ҳақидаги ахборотни тўплаш, умумлаштириш, таҳлил этиш ва истиқболни белгилаш атроф табиий муҳитнинг давлат мониторинги ягона тизими бўйича қонунчиликда белгиланган тартибда амалга оширилади.

Бунда атмосфера ҳавосининг давлат мониторинги қуйидагилардан иборат бўлади:

атмосфера ҳавосини ифлослантириш манбалари мониторинги;

атмосфера ҳавосининг ифлосланиш мониторинги;

атмосфера ҳавоси ифлосланиш (эмиссия) даражасининг ҳолати.

Атмосфера ҳавосининг давлат мониторинги натижаларига асосан ҳудудларда улардаги атмосфера ҳавоси билан боғлиқ реал экологик ҳолатдан келиб чиққан ҳолда, экологик зоналар ташкил этилади ҳамда уларнинг динамик электрон экологик харитаси юритилади.

15. Атмосфера ҳавосининг ифлосланиш (эмиссия) даражаси қонунчиликда белгиланган талабларни ҳисобга олинган ҳолда тегишли методикалар бўйича амалга оширилади.

Стационар манбалардан атмосфера ҳавосига ифлослантирувчи моддаларнинг чиқарилиши ифлосланиш манбалари мониторингини юритишда кузатув объекти ҳисобланади.

Атмосфера ҳавосининг ифлосланиш манбалари мониторинги бир ойда бир марта ўтказилади.

16. Атмосфера ҳавоси ифлосланишининг мониторинги республиканинг шаҳарлари ва аҳоли пунктларида жойлашган стационар кузатув пунктларида (постларида) амалга оширилади.

Кузатув пункти жойлашган жойдан келиб чиққан ҳолда аниқланадиган асосий ва ўзига хос ифлослантирувчи моддалар мавжудлиги юзасидан атмосфера ҳавосидан намуналар олиш ҳамда уларни синаш камида суткада уч марта ўтказилади.

Атмосфера ҳавоси намуналари таҳлилларининг натижалари иш журналида қайд этилади, унинг асл нусхаси Экология қўмитаси ҳузуридаги Гидрометеорология хизмати агентлигининг тегишли таҳлилий лабораториясида сақланади.

Кузатув постида автоматик мониторинг станцияси мавжуд бўлган тақдирда, атмосфера ҳавоси ифлосланишининг ҳолати тўғрисидаги маълумот реал вақт режимида Атроф табиий муҳит мониторинги тизимининг ягона геоахборот маълумотлар базасига узатилади.

17. Харита «Экологик транспорт» тизимини амалга оширишда экологик зоналарда атмосфера ҳавосининг мониторингини юритиш орқали уларнинг чегараларини даврий равишда ўзгартириб бориш учун маълумотлар манбаи сифатида юритилади.

Харита экологик зоналарнинг атмосфера ҳавосининг ифлосланиш (эмиссия) даражасини кузатиб бориш, манбаларни аниқлаш, атроф-муҳит ва аҳоли саломатлигини муҳофаза қилиш мақсадларида ташламалар чиқарилишининг олдини олиш борасида тезкор чоралар кўришда қўлланади.

Харита Экология қўмитаси томонидан шаҳарларда ўрнатилган стационар кузатув пунктлари маълумотларини ягона тизимга интеграция қилиш орқали маълумотлар алмашиш ва мониторинг юритиш кўринишида амалга оширилади.

Атмосфера ҳавоси сифати устидан кузатувлар автоматик мониторинг станциялари ва стационар кузатув постларида ўтказилади ҳамда харитага интеграция қилиниши орқали ҳудудларнинг атмосфера ҳавоси бўйича мониторинги шакллантирилади.

Автоматик мониторинг станцияларининг жойлашуви Экология қўмитаси ҳузуридаги Гидрометеорология хизмати агентлиги томонидан белгиланади.

Харита маълумотлари электрон платформа орқали эълон қилиб борилади ҳамда жамоатчилик учун доимий очиқ ҳисобланади.

4-боб. Якунловчи қоидалар

18. Ушбу Низом талабларини бажармаслик билан боғлиқ низолар қонунчиликда белгиланган тартибида ҳал этилади.

19. Ушбу Низом талабларининг бузилишида айбдор бўлган шахслар қонунчилик ҳужжатларида белгиланган тартибда жавоб беради.

Ҳудудларда экологик зоналарни ташкил этиш ҳамда уларнинг атмосфера ҳавоси бўйича электрон экологик харитасини шакллантириш ва юритиш тартиби тўғрисидаги низомга ИЛОВА

Экологик зона паспортининг

Экологик зона номи: Экологик зона мақоми берилган сана: Экологик зона мақомининг кучга кириш санаси: Экологик зона ҳудудида ҳаракатланиши мумкин бўлган автотранспорт воситаларининг экологик тоифаси: Экологик зона ҳудудида ҳаракатланиши тақиқланган автотранспорт воситаларининг экологик тоифаси: Жарима миқдори:

Вазирлар Маҳкамасининг 2025 йил 28 ноябрдаги 750-сон қарорига 3-ИЛОВА

Ўзбекистон Республикаси Ҳукуматининг айрим қарорларига киритилаётган ўзгартириш ва қўшимчалар

1. Вазирлар Маҳкамасининг 2022 йил 12 апрелдаги 172-сон қарори билан тасдиқланган Йўл ҳаракати қоидаларига 1-иловада :

а) қуйидаги мазмундаги 3.35-банд билан тўлдирилсин:

«3.35. Экологик зона ҳудудида «ўрта» ва «зарарли» экологик тоифаларга эга автотранспорт воситалари ҳаракатланиши тақиқланган.

3.35 белгиси экологик зона ҳудудига киришдан 150 — 300 метр олдин ўрнатилади»;

б) Йўл белгиларининг тасвирлари туширилган қисми қуйидаги тасвирдаги йўл белгиси билан тўлдирилсин:

3.35. «Экологик зона ҳудудида «ўрта» ва «зарарли» экологик тоифаларга эга автотранспорт воситалари ҳаракатланиши тақиқланган».

2. Вазирлар Маҳкамасининг 2022 йил 22 февралдаги 86-сон қарори билан тасдиқланган Махсус электрон тизим орқали рухсат этиш хусусиятига эга айрим ҳужжатларни бериш тартиб-таомиллари тўғрисидаги ягона низом қуйидаги мазмундаги 67-илова билан тўлдирилсин:

«Махсус электрон тизим орқали рухсат этиш хусусиятига эга айрим ҳужжатларни бериш тартиб-таомиллари тўғрисидаги ягона низомга 67-ИЛОВА

Экологик тоифаси экологик зонага мувофиқ бўлмаган автотранспорт воситаларида экологик зоналар ҳудудида экологик компенсация тўловларини тўлаш орқали ҳаракатланиш учун рухсатнома

1. Рухсат этиш хусусиятига эга ҳужжатнинг номи: Экологик тоифаси экологик зонага мувофиқ бўлмаган автотранспорт воситаларида экологик зоналар ҳудудида экологик компенсация тўловларини тўлаш орқали ҳаракатланиши учун рухсатнома 2. Амалга оширилиши учун рухсат этиш хусусиятига эга ҳужжатни олиш талаб этиладиган фаолият (ҳаракатлар): «Экологик зона» сифатида белгиланган ҳудудларда тоифаси «ўрта» ва «зарарли» деб топилган автотранспорт воситаларининг экологик компенсация тўловлари тўланган ҳолда ҳаракатланиши 3. Ариза берувчилар тоифаси: Жисмоний ёки юридик шахслар 4. Рухсат этиш тартиб-таомиллари соҳасидаги ваколатли орган: Ўзбекистон Республикаси Экология ва иқлим ўзгариши миллий қўмитаси 5. Рухсат этиш хусусиятига эга ҳужжатни олиш учун тақдим қилинадиган ҳужжатлар: Ариза. Аризада қуйидагилар кўрсатилади: юридик шахснинг номи, СТИРи, почта манзили, электрон почта манзили (агар мавжуд бўлса), телефон рақами; жисмоний шахснинг маълумотлари — фамилияси, исми, отасининг исми, ЖШШИР, почта манзили, электрон почта манзили (агар мавжуд бўлса), телефон рақами; рухсатнома олинаётган автотранспорт воситасининг техник паспорти; компенсация тўлови тўланганлигини тасдиқловчи ҳужжат (PDF, P N G ёки JPEG форматда илова қилиниши мумкин). 6. Аризани кўриб чиқиш учун тўланадиган йиғим миқдори: Йиғим ундирилмайди 7. Рухсат этиш хусусиятига эга ҳужжат берилгани учун ундириладиган йиғим: «Зарарли» ва «ўрта» тоифадаги автотранспорт воситалари экологик зоналарга кириши учун қуйида белгиланган миқдорда экологик компенсация тўловлари тўланади: «ўрта» экологик тоифадаги автотранспорт воситалари эгалари — базавий ҳисоблаш миқдорининг бир баравари миқдорида; «зарарли» экологик тоифа автотранспорт воситалари эгалари — базавий ҳисоблаш миқдорининг уч баравари миқдорида. 8. Аризани кўриб чиқиш муддати: 5 иш куни 9. Рухсат этишга доир талаб ва шартлар: а) транспорт воситасининг белгиланган қисмига экологик тоифани кўрсатувчи экологик стикер ёпиштирилган бўлиши; б) экологик зона ҳудудида рухсатнома амал қилиш муддати давомидагина ҳаракатланиш; д) . атмосфера ҳавосини муҳофаза қилиш тўғрисидаги қонунчилик ҳужжатларига риоя қилиш. 10. Рухсат этиш хусусиятига эга ҳужжатни беришда келишиладиган органлар: Мавжуд эмас 11. Рухсат этиш хусусиятига эга ҳужжатнинг амал қилиш муддати: 1 йил 12. Изоҳ: Экологик зоналарда «ўрта» ва «зарарли» экологик тоифадаги автотранспорт воситаларининг рухсатномасиз ҳаракатланиши тақиқланади. Экологик зоналарда рухсатномасиз ҳаракатланиш белгиланган тартибда жавобгарликка сабаб бўлади. ».

Ўзбекистон Республикасининг Бош вазири А. АРИПОВ

Тошкент ш.,

2025 йил 28 ноябрь,

750 -сон

(Қонунчилик маълумотлари миллий базаси, 29.11.2025 й., 09/25/750/1112-сон)

lex.uz

OʻZBEKISTON RESPUBLIKASI VAZIRLAR MAHKAMASINING

QARORI

NIZOM

NORMATIVLARI

NIZOM

NAMUNASI

PASPORTI

Avtotransport vositalarining atmosfera havosiga zararli taʼsirini kamaytirish maqsadida “Ekologik transport” tizimini joriy etish chora-tadbirlari toʻgʻrisida

Oʻzbekiston Respublikasi Prezidentining “Oʻzbekiston — 2030” strategiyasini “Yoshlar va biznesni qoʻllab-quvvatlash yili”da amalga oshirishga oid davlat dasturi toʻgʻrisida” 2024-yil 21-fevraldagi PF-37-son Farmoniga muvofiq respublika hududida ekologik talablarga muvofiq boʻlmagan avtotransport vositalari ekspluatatsiyasini bosqichma-bosqich cheklash, ularning atmosfera havosiga salbiy taʼsirini kamaytirish maqsadida Vazirlar Mahkamasi qaror qiladi:

1. Quyidagilar:

Oʻzbekiston Respublikasi Prezidentining 2024-yil 21-fevraldagi PF-37-son Farmoniga muvofiq 2030-yilga qadar Toshkent va Nukus shaharlari, viloyatlar markazlarida “Yevro-5” va undan yuqori standartlarga muvofiq boʻlmagan avtotransport vositalar ekspluatatsiyasini bosqichma-bosqich cheklash;

Vazirlar Mahkamasining “Atmosfera havosiga transport vositalarining salbiy taʼsirini kamaytirish boʻyicha chora-tadbirlar toʻgʻrisida” 2024-yil 29-martdagi 166-son qaroriga asosan barcha toifalardagi avtotransport vositalaridan chiqariladigan ifloslantiruvchi moddalar tashlamalarining atmosfera havosiga zararli taʼsiri boʻyicha yoʻl qoʻyiladigan normativlarga mosligini nazorat qilish boʻyicha “Ekologik transport” tizimini bosqichma-bosqich joriy etish, bunda:

hududlarni ulardagi atmosfera havosi bilan bogʻliq real ekologik holatdan kelib chiqib, ilgʻor xorijiy tajriba va innovatsion texnologiyalar asosida ekologik zonalarga ajratib borish;

avtotransport vositalarining normativlarga mosligi darajasini avtomatik baholash tizimi yordamida ekologik stikerlar berish orqali avtotransport vositalarini “yashil”, “sariq” va “qizil” ranglar bilan belgilanadigan “toza”, “oʻrta” va “zararli” ekologik toifalarga ajratib borish;

ekologik toifasi hududning ekologik zonasiga muvofiq boʻlmagan avtotransport vositalariga nisbatan ekologik kompensatsiya toʻlovlarini joriy etish yoxud ulardan tegishli ekologik zonalar hududida foydalanishni cheklash yoki taqiqlash belgilangani maʼlumot uchun qabul qilinsin.

2. “Ekologik transport” tizimi birinchi bosqichda 2026-yil 1-yanvardan boshlab Toshkent shahrida joriy etilsin.

3. “Ekologik transport” tizimini bosqichma-bosqich joriy etish maqsadida quyidagilar:

Avtotransport vositalaridan chiqariladigan ifloslantiruvchi moddalar tashlamalarining atmosfera havosiga zararli taʼsiri boʻyicha yoʻl qoʻyiladigan normativlarga mosligi darajasini aniqlash, ularni ekologik toifalarga ajratish hamda ekologik stikerlarni berish tartibi toʻgʻrisidagi nizom 1-ilovaga muvofiq;

Hududlarda ekologik zonalarni tashkil etish hamda ularning atmosfera havosi boʻyicha elektron ekologik xaritasini shakllantirish va yuritish tartibi toʻgʻrisidagi nizom 2-ilovaga muvofiq tasdiqlansin.

4. Belgilansinki, 2026-yil 1-yanvardan boshlab respublikada ishlab chiqarilayotgan avtotransport vositalarini texnik hujjatlarida ularning ekologik sinfi koʻrsatiladi.

Bunda sotuvga chiqarilayotgan avtotransport vositalari elektron hisob-maʼlumotnomalarida ularning ekologik sinflari toʻgʻrisidagi maʼlumotlar aks ettiriladi.

5. Oʻzbekiston Respublikasi Ichki ishlar vazirligi:

avtotransport vositalarining elektron hisob-maʼlumotnomalari asosida Ichki ishlar vazirligi Jamoat xavfsizligi departamenti Yoʻl harakati xavfsizligi xizmatining Yagona avtomatlashtirilgan axborot tizimi “Avtomototransport hisobi” moduliga avtotransport vositalarining ekologik sinfiga oid maʼlumotlar kiritib borilishini;

Transport vazirligi bilan birgalikda 2026-yil 1-yanvarga qadar respublikada foydalanishda boʻlgan, shuningdek, ishlab chiqarilayotgan avtotransport vositalarining (turi, rusumi, modeli boʻyicha) ishlab chiqaruvchi tomonidan tasdiqlangan ekologik sinfiga (“Yevro” va unga muqobil boshqa turdagi standartlar) doir maʼlumotlarni umumlashtirib, tasdiqlanishini taʼminlasin.

6. Oʻzbekiston Respublikasi Raqamli texnologiyalar vazirligi Ichki ishlar vazirligi hamda Ekologiya va iqlim oʻzgarishi milliy qoʻmitasi bilan birgalikda ikki oy muddatda ekologik toifasi hududning ekologik zonasiga muvofiq boʻlmagan avtotransport vositalaridan ekologik zonalar hududida ekologik kompensatsiya toʻlovlarini toʻlagan holda foydalanish uchun ruxsatnomani ushbu qarorda belgilangan tartibda Yagona interaktiv davlat xizmatlari portali orqali rasmiylashtirish hamda ekologik kompensatsiya toʻlovlarini elektron toʻlov tizimlari orqali toʻlash imkoniyatini yaratsin.

7. Oʻzbekiston Respublikasi Hukumatining 3-ilovaga muvofiq ayrim qarorlariga oʻzgartirish va qoʻshimchalar kiritilsin.

8. Oʻzbekiston Respublikasi Ekologiya va iqlim oʻzgarishi milliy qoʻmitasi Transport vazirligi, Ichki ishlar vazirligi hamda manfaatdor vazirlik va idoralar bilan birgalikda:

uch oy muddatda ushbu qarordan kelib chiqib, qonunchilik hujjatlariga oʻzgartirish va qoʻshimchalar kiritish yuzasidan Vazirlar Mahkamasiga takliflar kiritilishini;

oʻzlari qabul qilgan idoraviy hujjatlarini ikki oy muddatda ushbu qarorga muvofiqlashtirishni;

ushbu qarorning mohiyati va ahamiyati jamoatchilik oʻrtasida keng tushuntirilishini taʼminlasin.

9. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.J. Ramatov, transport vaziri I.R. Maxkamov hamda ichki ishlar vaziri A.A. Tashpulatov zimmasiga yuklansin.

Vazirlar Mahkamasining 2025-yil 28-noyabrdagi 750-son qaroriga 1-ILOVA

Avtotransport vositalaridan chiqariladigan ifloslantiruvchi moddalar tashlamalarining atmosfera havosiga zararli taʼsiri boʻyicha yoʻl qoʻyiladigan normativlarga mosligi darajasini aniqlash, ularni ekologik toifalarga ajratish hamda ekologik stikerlarni berish tartibi toʻgʻrisida

1-bob. Umumiy qoidalar

1. Ushbu Nizom avtotransport vositalaridan (keyingi oʻrinlarda — transport vositalari) chiqariladigan ifloslantiruvchi moddalar tashlamalarining atmosfera havosiga zararli taʼsiri boʻyicha yoʻl qoʻyiladigan normativlarga (keyingi oʻrinlarda — normativlar) mosligi darajasini aniqlash, ularni ekologik toifalarga ajratish hamda ekologik stikerlarni berish tartibini belgilaydi.

2. Mazkur Nizom talablari quyidagi transport vositalariga nisbatan tatbiq etilmaydi:

Oʻzbekiston Respublikasi hududi orqali tranzit olib oʻtiladigan;

belgilangan tartibda vaqtincha (toʻqson kalendar kungacha) Oʻzbekiston Respublikasi hududida boʻlgan;

elektromobillar, elektromototsikllar, mototsikllar, skuterlar, mopedlar, uch gʻildirakli transport vositalari;

tezkor va maxsus xizmatlarning koʻk yoki qizil yoxud koʻk va qizil rangli yaltiroq mayoqcha bilan jihozlangan hamda maxsus rangli boʻyoq sxemalar va yozuvlar bilan belgilangan transport vositalari hamda jamoat transporti (taksi va yoʻnalishli taksidan tashqari);

qishloq xoʻjaligi texnikalari;

“nogironligi boʻlgan shaxs” belgisi oʻrnatilgan transport vositasi.

3. Ushbu Nizomda quyidagi tushunchalardan foydalaniladi:

diagnostika tekshiruvi — transport vositalaridan ishlatilgan gazlar chiqarib yuborilganda, ulardagi ifloslantiruvchi moddalarning miqdorini aniqlash;

ifloslantiruvchi moddalar — kimyoviy moddalar, shu jumladan, boshqa moddalar uchun belgilangan normativlardan ortiq miqdorda va (yoki) konsentratsiyalarda atrof-muhitga, inson hayoti va sogʻligʻiga salbiy taʼsir koʻrsatadigan moddalar;

Oʻzbekiston Respublikasi Ichki ishlar vazirligi Jamoat xavfsizligi departamenti Yoʻl harakati xavfsizligi xizmati Yagona avtomatlashtirilgan axborot tizimining “Avtomototransport hisobi” moduli (keyingi oʻrinlarda — “Avtomototransport hisobi” moduli) — Yoʻl harakati xavfsizligi xizmati hamda “ekologik transport” tizimi faoliyati bilan bogʻliq elektron maʼlumotlar bazasi;

normativ — transport vositasidan chiqariladigan ifloslantiruvchi moddalar tashlamalarining atmosfera havosiga zararli taʼsiri boʻyicha yoʻl qoʻyiladigan miqdori;

ekologik toifa — transport vositalaridan chiqariladigan ifloslantiruvchi moddalar tashlamalarining atmosfera havosiga zararli taʼsiri boʻyicha yoʻl qoʻyiladigan normativlar asosida “yashil”, “sariq” va “qizil” ranglar bilan belgilanadigan “toza”, “oʻrta” va “zararli” ekologik darajasi;

ekologik sinf (“Yevro” va unga muqobil boshqa turdagi standartlar) — transport vositasidan ishlatilgan gazlar chiqarib yuborilganda, ulardagi ifloslantiruvchi moddalarni miqdoriga qarab tavsiflovchi tasnif kodi;

ekologik stiker — transport vositasining ekologik toifasini tasdiqlovchi elektron maʼlumotlarni oʻz ichiga olgan yorliq;

ekologik operator — Ichki ishlar vazirligining “Innovatsiya loyihalari va aholiga servis xizmatlari koʻrsatish markazi” davlat unitar korxonasining transport vositalarini diagnostika tekshiruvidan oʻtkazish uchun maxsus bilim va tajribaga ega boʻlgan masʼul xodimi;

ekologik stikerga talabgor — tasarrufidagi transport vositasining ekologik toifasini aniqlash istagini bildirgan jismoniy va yuridik shaxs.

4. Transport vositasining ekologik toifasi uning ishlab chiqaruvchi tomonidan tasdiqlangan ekologik sinfiga (“Yevro” va unga muqobil boshqa turdagi standartlar) muvofiq belgilanadi.

5. Transport vositasining ekologik sinfi (“Yevro” va unga muqobil boshqa turdagi standartlar) aniq boʻlmaganda, uning ekologik toifasi diagnostika tekshiruvi natijalariga koʻra ekologik operator tomonidan aniqlanadi.

2-bob. Transport vositalarining ekologik toifasini belgilash hamda diagnostika tekshiruvidan oʻtkazish tartibi

6. Transport vositalari uchun birinchi marta, shuningdek, bir yil ichida bir marotaba qayta ekologik toifani belgilash, shu jumladan, diagnostik tekshiruvdan oʻtkazish va ekologik stiker berish alohida toʻlov undirilmasdan Davlat yoʻl harakati xavfsizligi xizmati boʻlinmalarida Ichki ishlar vazirligining “Innovatsiya loyihalari va aholiga servis xizmatlari koʻrsatish markazi” davlat unitar korxonasi tomonidan amalga oshiriladi.

7. Transport vositalarini ekologik toifalarga ajratish hamda normativlarga mosligi darajasini diagnostika tekshiruvidan oʻtkazish ularni Davlat yoʻl harakati xavfsizligi boʻlinmalarida roʻyxatga olish va qayta roʻyxatga olish jarayonida, foydalanishda boʻlgan transport vositalari esa egasining ixtiyoriy murojaati asosida mazkur Nizomda belgilangan tartibda amalga oshiriladi.

8. Ishlab chiqaruvchi tomonidan ekologik sinfi (“Yevro” va unga muqobil boshqa turdagi standartlar) tasdiqlangan transport vositalarini roʻyxatga olish va qayta roʻyxatga olishda ularni diagnostika tekshiruvidan oʻtkazish talab etilmaydi.

Bunda transport vositalari quyidagi mezonlarga koʻra ekologik toifalarga ajratiladi:

a) benzin, siqilgan va suyultirilgan gaz yoqilgʻisi bilan harakatlanuvchi:

“Yevro-2” va undan yuqori ekologik sinfiga (“Yevro” va unga muqobil boshqa turdagi standartlar) kiruvchi transport vositalari — “toza” ekologik toifaga;

“Yevro-0” va “Yevro-1” (va unga muqobil boshqa turdagi standartlar) ekologik sinfiga kiruvchi transport vositalari — “oʻrta” ekologik toifaga;

b) dizel yoqilgʻi turi bilan harakatlanuvchi:

“Yevro-4” va undan yuqori ekologik sinfiga (“Yevro” va unga muqobil boshqa turdagi standartlar) kiruvchi transport vositalari — “toza” ekologik toifaga;

“Yevro-3” (va unga muqobil boshqa turdagi standartlar) ekologik sinfiga kiruvchi transport vositalari — “oʻrta” ekologik toifaga;

“Yevro-0”, “Yevro-1” va “Yevro-2” (va unga muqobil boshqa turdagi standartlar) ekologik sinfiga kiruvchi transport vositalari — “zararli” ekologik toifaga;

v) gibrid avtomobillar, muqobil yoqilgʻi turlarida (siqilgan va suyultirilgan gaz bundan mustasno) harakatlanuvchi transport vositalari hamda ishlab chiqarilganiga uch yildan oshmagan transport vositalari — “toza” ekologik toifaga ajratiladi.

9. Transport vositalarini ekologik toifalarga ajratish Oʻzbekiston Respublikasida foydalanishda boʻlgan transport vositalarining tasdiqlangan ekologik sinfiga (“Yevro” va unga muqobil boshqa turdagi standartlar) doir maʼlumotlar bazasi asosida “Avtomototransport hisobi” modulida avtomatik tarzda belgilanadi.

10. Ekologik sinfini (“Yevro” va unga muqobil boshqa turdagi standartlar) aniqlash imkoni boʻlmagan transport vositalarining ekologik toifasini belgilash uchun ular roʻyxatga olish va qayta roʻyxatga olish jarayonida diagnostika tekshiruvidan quyidagi tartibda oʻtkaziladi:

diagnostika tekshiruvi ekologik operator tomonidan natijalarini avtomatik baholash tizimiga asoslangan oʻlchov vositalariga muvofiq amalga oshiriladi;

diagnostika tekshiruvi natijalari “Avtomototransport hisobi” modulida avtomatik tarzda qayd etiladi;

“Avtomototransport hisobi” modulining diagnostika tekshiruvi natijalariga koʻra avtotransport vositalari mazkur Nizomga 1-ilovadagi transport vositalaridan chiqariladigan ifloslantiruvchi moddalar tashlamalarining atmosfera havosiga zararli taʼsiri boʻyicha yoʻl qoʻyiladigan normativlari asosida “toza”, “oʻrta” va “zararli” ekologik toifalarga avtomatik tarzda ajratiladi.

11. Transport vositasining diagnostika tekshiruvi natijalari, oʻlchov vositalarining metrologik nazorati natijalarini eʼtirof etish sertifikati, tekshiruvni oʻtkazgan ekologik operator hamda tekshiruv oʻtkazilgan sana va vaqtga doir elektron maʼlumotlar onlayn tartibda “Avtomototransport hisobi” modulida aks ettiriladi.

12. Transport vositasining egasi diagnostika tekshiruvi natijalaridan norozi boʻlgan taqdirda, transport vositasini ixtiyoriy ravishda qayta diagnostika tekshiruvidan oʻtkazishi mumkin. Bunda qayta diagnostika tekshiruvi mazkur Nizomda belgilangan tartibda amalga oshiriladi.

13. Ilgari oʻtkazilgan diagnostika tekshiruvi natijasiga koʻra “oʻrta” yoki “zararli” ekologik toifaga ajratilgan va unga mos ekologik stiker berilgan transport vositasi egasi ixtiyoriy ravishda bir yilda bir marta ushbu xizmatlar uchun alohida toʻlov undirilmasdan, aynan shu transport vositasining ekologik toifasini “toza” yoki “oʻrta” ekologik toifaga yaxshilash maqsadida qayta diagnostika tekshiruvidan oʻtkazish va natijalari boʻyicha yangi ekologik stikerga ega boʻlishi mumkin.

Transport vositasini mazkur bandning birinchi xatboshisida belgilanganidan ortiqcha har bir qayta diagnostika tekshiruvidan oʻtkazish va natijalari boʻyicha yangi ekologik stiker olish xizmatlari toʻlov asosida koʻrsatiladi.

Bunda qayta diagnostika tekshiruvini oʻtkazish bilan bogʻliq koʻrsatilgan har bir xizmat uchun toʻlov miqdori bazaviy hisoblash miqdorining bir baravari miqdorida belgilanadi.

14. Transport vositasini toʻlov asosida qayta diagnostika tekshiruvidan oʻtkazishdan kelib tushadigan mablagʻlar quyidagicha taqsimlanadi:

15 foizi — Oʻzbekiston Respublikasi Ichki ishlar vazirligi Jamoat xavfsizligi departamenti Davlat yoʻl harakati xavfsizligi xizmatining moddiy-texnika bazasini rivojlantirish, xodimlarini ragʻbatlantirish va mukofotlash jamgʻarmasiga;

15 foizi — Oʻzbekiston Respublikasi Ichki ishlar vazirligining “Innovatsiya loyihalari va aholiga servis xizmatlari koʻrsatish markazi” davlat unitar korxonasi shaxsiy hisobvaragʻiga;

70 foizi — Oʻzbekiston Respublikasi Davlat budjetiga.

15. Ekologik stikerga talabgor quyidagi huquqlarga ega:

Davlat yoʻl harakati xavfsizligi xizmati boʻlinmalarida transport vositasini roʻyxatga olish va qayta roʻyxatga olish jarayonida elektron navbatdan oʻtish va unda belgilangan vaqtda transport vositasini diagnostika tekshiruvidan oʻtkazish;

ekologik operatordan diagnostika oʻlchov vositalarining metrologik nazorati natijalarini eʼtirof etish sertifikatini soʻrash;

transport vositasining diagnostika tekshiruvi natijalaridan norozi boʻlgan taqdirda, uni qayta diagnostika tekshiruvidan oʻtkazishni talab qilish;

transport vositasi diagnostika tekshiruvidan oʻtkazilgandan soʻng ekologik stikerni olish hamda transport vositasining belgilangan qismiga yelimlash.

16. Diagnostika oʻlchov vositalari muvofiqlik tekshiruvi Ekologiya va iqlim oʻzgarishi milliy qoʻmitasi huzuridagi Davlat ekologik sertifikatlashtirish va standartlashtirish markazi tomonidan oʻtkaziladi.

3-bob. Transport vositalariga ekologik stiker berish tartibi

17. Ilgari ekologik stiker olganligidan qatʼi nazar, transport vositalarini roʻyxatga olish va qayta roʻyxatga olish jarayonida ularning toifalariga mos ravishdagi “yashil”, “sariq” yoki “qizil” rangli ekologik stikerlar Davlat yoʻl harakati xavfsizligi boʻlinmalarida ekologik operatorlar tomonidan beriladi.

18. Transport vositalarini roʻyxatga olish va qayta roʻyxatga olish jarayonida:

ishlab chiqaruvchi tomonidan ekologik sinfi (“Yevro” va unga muqobil boshqa turdagi standartlar) tasdiqlangan transport vositalariga mazkur Nizomning 8-bandida belgilangan mezonlar asosida diagnostika tekshiruvlarisiz aniqlanadigan ekologik toifaga mos boʻlgan rangdagi;

ekologik sinfini (“Yevro” va unga muqobil boshqa turdagi standartlar) aniqlash imkoni boʻlmagan transport vositalariga mazkur Nizomning 10-bandiga muvofiq oʻtkaziladigan diagnostika tekshiruvlari natijalari asosida avtomatik tarzda aniqlangan ekologik toifaga mos boʻlgan rangdagi ekologik stiker rasmiylashtirib beriladi.

Bunda ekologik stiker transport vositasini roʻyxatga olish (qayta roʻyxatga olish) amaliyoti oʻtkazilgan joyda maxsus texnika vositalarida avtomatik tarzda chop etiladi va transport vositasining roʻyxatdan oʻtkazilgani toʻgʻrisidagi guvohnoma hamda biriktirilgan davlat raqami belgisi bilan birga transport vositasining egasiga topshiriladi.

19. Foydalanishda boʻlgan transport vositalariga ekologik stikerlar quyidagi tartibda beriladi:

a) transport vositasining egasi (keyingi oʻrinlarda — murojaat etuvchi) ixtiyoriy ravishda transport vositasiga ekologik stiker olish maqsadida Ichki ishlar vazirligi Jamoat xavfsizligi departamenti Yoʻl harakati xavfsizligi xizmatiga (keyingi oʻrinlarda — vakolatli organ) uning rasmiy veb-sayti yoki Yagona interaktiv davlat xizmatlari portali orqali quyidagilarni ilova qilgan holda murojaat qiladi:

belgilangan shakldagi elektron ariza;

transport vositasining roʻyxatdan oʻtkazilgani toʻgʻrisidagi guvohnomaning elektron shakldagi nusxasi;

ekologik stiker pochta orqali yuborilishi koʻrsatilgan manzil;

b) vakolatli organ murojaat kelib tushgan kundan boshlab oʻn kun muddatda quyidagilarni amalga oshiradi:

murojaatda koʻrsatilgan transport vositasi toʻgʻrisidagi maʼlumotlarni “Avtomototransport hisobi” moduli orqali tekshiradi;

ishlab chiqaruvchi tomonidan ekologik sinfi (“Yevro” va unga muqobil boshqa turdagi standartlar) tasdiqlangan avtotransport vositalarining ekologik toifasini mazkur Nizomning 8-bandida belgilangan mezonlar asosida “Avtomototransport hisobi” moduli orqali avtomatik tarzda aniqlaydi;

transport vositasining ekologik toifasiga mos ekologik stikerni rasmiylashtirib (stiker rekvizitlari avtomatik toʻldiriladi) maxsus texnik vositalarda chop etadi va murojaat etuvchi hisobidan uning murojaatida koʻrsatilgan manzilga pochta orqali yuboradi. Bunda pochta xarajatlari murojaat etuvchi tomonidan vakolatli organ veb-sayti yoki Yagona interaktiv davlat xizmatlari portali orqali ariza yuborish vaqtida oldindan elektron toʻlov shaklida amalga oshiriladi.

Pochta xarajatlari bazaviy hisoblash miqdorining 5 foizi miqdorida belgilanadi;

v) murojaatda koʻrsatilgan transport vositasining ekologik sinfini (“Yevro” va unga muqobil boshqa turdagi standartlar) aniqlash imkoni boʻlmagan holatlarda, murojaat etuvchiga transport vositasining ekologik toifasini belgilash uchun diagnostika tekshiruvidan oʻtkazish toʻgʻrisida asoslantirilgan elektron javob xati yuboradi.

20. Transport vositasiga uning ekologik toifasiga mos boʻlgan mazkur Nizomga 2-ilovada keltirilgan namunadagi ekologik stikerlardan biri beriladi.

21. Transport vositasining ekologik toifasi va unga berilgan ekologik stiker rekvizitlari toʻgʻrisidagi elektron maʼlumotlar “Avtomototransport hisobi” modulida saqlanadi.

22. Ekologik stiker transport vositasining old oynasining pastki oʻng burchagiga ichki tomondan oʻrnatiladi (yelimlanadi).

Ekologik stikerni transport vositasining boshqa qismlariga oʻrnatish (yelimlash) va oʻzboshimchalik bilan ekologik stikerni oʻrnatilgan (yelimlangan) joyidan ajratish va qayta oʻrnatish (yelimlash) mumkin emas.

4-bob. Ekologik stikerlarning amal qilish muddati

23. Ekologik stikerlar muddatsiz davrga beriladi.

24. Quyidagi holatlarda ekologik stikerlar toʻlov asosida qayta rasmiylashtirilishi mumkin:

transport vositasini boshqa shaxsga oʻtkazishda yoxud fuqaroning doimiy yashash manzili yoki yuridik shaxsning roʻyxatga olingan manzili oʻzgarishi, qayta tashkil etilishi munosabati bilan qayta roʻyxatdan oʻtkazilganda, shuningdek, transport vositasining davlat raqamlari oʻzgartirilganda;

ekologik stikerning shikastlanishi yoki rangining oʻchishi natijasida undagi transport vositasining davlat raqamini oʻqish imkoni boʻlmaganda;

transport vositasining old oynasi yaroqsiz holga kelganda.

25. Ekologik stikerlar mazkur Nizomda belgilangan tartibda qayta rasmiylashtiriladi.

5-bob. Yakunlovchi qoidalar

26. Ushbu Nizomni qoʻllashda yuzaga keladigan nizolar qonunchilik hujjatlarida belgilangan tartibda hal etiladi.

27. Ushbu Nizom talablarining buzilishida aybdor boʻlgan shaxslar qonunchilik hujjatlarida belgilangan tartibda javob beradilar.

Avtotransport vositalaridan chiqariladigan ifloslantiruvchi moddalar tashlamalarining atmosfera havosiga zararli taʼsiri boʻyicha yoʻl qoʻyiladigan normativlarga mosligi darajasini aniqlash, ularni ekologik toifalarga ajratish hamda ekologik stikerlarni berish tartibi toʻgʻrisidagi nizomga 1-ILOVA

Avtotransport vositalaridan chiqariladigan ifloslantiruvchi moddalar tashlamalarining atmosfera havosiga zararli taʼsiri boʻyicha yoʻl qoʻyiladigan

Avtotransport toifasi Oʻlchanadigan zararli modda Tirsakli valning aylanish tezligi Belgilangan normativlarni amalga kirish sanasi Ekologik toifalar normativlari “toza” “oʻrta” “zararli” ** “yashil” “sariq” “qizil” I. Benzin yoqilgʻisida ishlashga moʻljallangan avtotransport vositalari uchun M va N , 1986-yil 1-oktabrdan avval ishlab chiqarilganlari * SO (uglerod oksidi), hajm ulushi, foiz minimal 2026-yil 1-yanvar - 3,5 foizgacha 3,5 foizdan 5,5 foizgacha M va N , ishlab chiqarilgan gazlarni tozalash moslamasi yoʻq SO (uglerod oksidi), hajm ulushi, foiz minimal 2026-yil 1-yanvar 1,0 foizdan past 1,0 foizdan 1,5 foizgacha 1,5 foizdan 3,5 foizgacha minimal 2028-yil 1-yanvar 0,9 foizdan past 0,9 foizdan 1,4 foizgacha 1,4 foizdan 3,5 foizgacha minimal 2029-yil 1-yanvar 0,8 foizdan past 0,8 foizdan 1,3 foizgacha 1,3 foizdan 3,5 foizgacha M va N , ishlab chiqarilgan gazlarni tozalash moslamasi bor SO (uglerod oksidi), hajm ulushi, foiz minimal 2026-yil 1-yanvar 0,9 foizdan past 0,9 foizdan 1,5 foizgacha 1,5 foizdan 2,5 foizgacha yuqori 2026-yil 1-yanvar 0,7 foizdan past 0,7 foizdan 1,3 foizgacha 1,3 foizdan 2,5 foizgacha minimal 2028-yil 1-yanvar 0,7 foizdan past 0,7 foizdan 1,3 foizgacha 1,3 foizdan 2,5 foizgacha yuqori 2028-yil 1-yanvar 0,5 foizdan past 0,5 foizdan 1,1 foizgacha 1,1 foizdan 2,5 foizgacha minimal 2030-yil 1-yanvar 0,5 foizdan past 0,5 foizdan 0,9 foizgacha 0,9 foizdan 2,5 foizgacha yuqori 2030-yil 1-yanvar 0,3 foizdan past 0,3 foizdan 0,7 foizgacha 0,7 foizdan 2,5 foizgacha II. Dizel yoqilgʻisida ishlashga moʻljallangan avtotransport vositalari uchun M va N oddiy dizel dvigatellari uchun Tutunlilik, hajm ulushi m -1 (yorugʻlik oqimi susayishining maksimal ruxsat etilgan koeffitsiyenti) Maksimal (maksimal tezlikning 90 foizidan oshmagan holda) 2026-yil 1-yanvar 2,50 m -1 dan past 2,50 m -1 dan 3,0 m -1 gacha 3,0 m -1 dan 3,50 m -1 gacha M va N oddiy dizel dvigatellari uchun Tutunlilik, hajm ulushi m -1 (yorugʻlik oqimi susayishining maksimal ruxsat etilgan koeffitsiyenti) Maksimal (maksimal tezlikning 90 foizidan oshmagan holda) 2028-yil 1-yanvar 1,50 m -1 dan past 1,50 m -1 dan 3,0 m m -1 gacha 3,0 m -1 dan 3,50 m -1 gacha M va N oddiy dizel dvigatellari uchun Tutunlilik, hajm ulushi m -1 (yorugʻlik oqimi susayishining maksimal ruxsat etilgan koeffitsiyenti) Maksimal (maksimal tezlikning 90 foizidan oshmagan holda) 2026-yil 1-yanvar 0,70 m -1 dan past 0,70 m -1 dan 2,5 m -1 gacha 2,5 m -1 dan 3,50 m -1 gacha M va N , turbo zaryadlangan dizel dvigatellari uchun Tutunlilik, hajm ulushi m -1 (yorugʻlik oqimi susayishining maksimal ruxsat etilgan koeffitsiyenti) Maksimal (maksimal tezlikning 90 foizidan oshmagan holda) 2026-yil 1-yanvar 2,0 m -1 dan past 2,00 m -1 dan 3,00 m-1 gacha 3,00 m -1 dan 3,50 m -1 gacha M va N , turbo zaryadlangan dizel dvigatellari uchun Tutunlilik, hajm ulushi m -1 (yorugʻlik oqimi susayishining maksimal ruxsat etilgan koeffitsiyenti) Maksimal (maksimal tezlikning 90 foizidan oshmagan holda) 2028-yil 1-yanvar 1,0 m -1 dan past 1,00 m -1 dan 2,00 m -1 gacha 2,00 m -1 dan 3,50 m -1 gacha M va N , turbo zaryadlangan dizel dvigatellari uchun Tutunlilik, hajm ulushi m -1 (yorugʻlik oqimi susayishining maksimal ruxsat etilgan koeffitsiyenti) Maksimal (maksimal tezlikning 90 foizidan oshmagan holda) 2030-yil 1-yanvar 0,5 m -1 dan past 0,50 m -1 dan 1,50 m -1 gacha 1,50 m -1 dan 3,50 m -1 gacha

Avtotransport vositalaridan chiqariladigan ifloslantiruvchi moddalar tashlamalarining atmosfera havosiga zararli taʼsiri boʻyicha yoʻl qoʻyiladigan normativlarga mosligi darajasini aniqlash, ularni ekologik toifalarga ajratish hamda ekologik stikerlarni berish tartibi toʻgʻrisidagi nizomga 2-ILOVA

Avtotransport vositalarining ekologik toifasini ifoda etuvchi ekologik stikerlar namunalari

“Toza” ekologik toifaga mansub boʻlgan avtotransport vositalariga biriktiriladigan ekologik stiker namunasi (“yashil” stiker) “Oʻrta” ekologik toifaga mansub boʻlgan avtotransport vositalariga biriktiriladigan ekologik stiker namunasi (“sariq” stiker) “Zararli” ekologik toifaga mansub boʻlgan avtotransport vositalariga biriktiriladigan ekologik stiker namunasi (“qizil” stiker)

Avtotransport vositalarining ekologik toifasini ifoda etuvchi ekologik stikerlar namunalarining tavsifi

“Toza”, “oʻrta” va “zararli” ekologik toifalarga mansub avtotransport vositalariga biriktiriladigan ekologik stikerlar diametri 90±2 mm oʻlchamdagi doira shaklida, mos ravishda yashil, sariq va qizil rangda, avtotransport vositasining ichkari tomonidan old oynasiga yopishtiriladigan elastik mustahkam materialdan tayyorlanadi. Lotin yozuvidagi davlat tilidan foydalaniladi.

Ekologik stikerda qurilmalar oʻrtasida bevosita aloqasiz axborot almashish imkonini beruvchi elektron belgi boʻladi.

Ekologik stiker qalbakilashtirishdan himoyalashni taʼminlaydigan DMC (QR) kod bilan ishlab chiqariladi hamda 10 ta belgidan iborat seriya va raqamlarga ega boʻladi.

Ekologik stikerning yuqori qismidagi cheti boʻylab “OʻZBEKISTON RESPUBLIKASI”, pastki qismidagi cheti boʻylab “Avtomototransport vositasining ekologik toifasi” soʻzlari, yuqori oʻrta qismida turli ranglarda tovlanuvchi daraxt bargi shaklidagi ekologik belgi va “ECO PASS” soʻzlari, oʻrta qismida uning qaysi ekologik toifasiga mansubligiga mos nomlanishi: “TOZA”, “OʻRTA” yoki “ZARARLI” soʻzlari tushiriladi.

“OʻZBEKISTON RESPUBLIKASI” va “Avtomomototransport vositasining ekologik toifasi” soʻzlari ikki tomondan sakkiz qirrali yulduzchalar bilan ajratiladi.

Ekologik stikerda, shuningdek, oq fonda avtotransport vositasining davlat raqam belgisi va ekologik stiker berilgan sana majburiy tartibda alohida koʻrsatiladi.

Vazirlar Mahkamasining 2025-yil 28-noyabrdagi 750-son qaroriga 2-ILOVA

Hududlarda ekologik zonalarni tashkil etish hamda ularning atmosfera havosi boʻyicha elektron ekologik xaritasini shakllantirish va yuritish tartibi toʻgʻrisida

1-bob. Umumiy qoidalar

1. Ushbu Nizom hududlarda ekologik zonalarni tashkil etish hamda ularning atmosfera havosi boʻyicha elektron ekologik xaritasini shakllantirish va yuritish tartibini belgilaydi.

2. Hududlarda atmosfera havosi bilan bogʻliq real ekologik holatdan kelib chiqqan holda ekologik zonalar tashkil etiladi.

3. Mazkur Nizomda quyidagi asosiy tushunchalar qoʻllaniladi:

atmosfera havosining ifloslanish monitoringi — atmosfera havosi ifloslanishining oʻtgan, hozirgi holatini baholash hamda kelajakdagi holatini prognozlash maqsadida maʼlumot beruvchi vaqt va makondagi doimiy uzoq davom etadigan kuzatuvlar tizimi;

atrof-muhitni ifloslantirish manbai — ifloslantiruvchi moddalar tashlamalari orqali atrof-muhitni ifloslantiruvchi antropogen statsionar va (yoki) koʻchma manbalar obyekti;

ifloslantiruvchi tashlanmalar — avtotransport vositalaridan ishlatilgan gazlar chiqarib yuborilganda, ulardagi ifloslantiruvchi moddalarning atmosfera havosiga chiqarilishi;

statsionar kuzatish punkti (post) — atmosfera havosi namunalarini muntazam olish va keyinchalik kimyoviy tahlil qilish uchun moʻljallangan priborlar va uskunalar, shu jumladan, avtomatik stansiyalar oʻrnatilgan yer uchastkasini oʻz ichiga olgan, atrof tabiiy muhitning holatini va unga taʼsir koʻrsatuvchi manbalarni oldindan tadqiq etish asosida tanlangan joylarda joylashgan kompleks;

“ekologik transport” tizimi — atmosfera havosiga transport vositalarining salbiy taʼsirini kamaytirish boʻyicha amalga oshiriladigan chora-tadbirlar majmui;

ekologik zonalar — atmosfera havosi bilan bogʻliq real ekologik holatdan kelib chiqqan holda, “ekologik transport” tizimi joriy etiladigan ekologik maqomga ega hududlar;

elektron ekologik xarita — innovatsion texnologiyalarni tatbiq qilish orqali oʻzida barcha ekologik zonalar haqida umumlashgan maʼlumotlardan iborat boʻlgan mamlakatning atmosfera havosi boʻyicha elektron xaritaga kiritilgan davriy maʼlumotlar bazasi.

2-bob. Hududlarda atmosfera havosi bilan bogʻliq real ekologik holatdan kelib chiqqan holda ekologik zonalarni tashkil etish tartibi

4. Oʻzbekiston Respublikasi Ekologiya va iqlim oʻzgarishi milliy qoʻmitasining (keyingi oʻrinlarda — Ekologiya qoʻmitasi) taklifiga koʻra Qoraqalpogʻiston Respublikasi Joʻqorgʻi Kengesi, viloyatlar va Toshkent shahar xalq deputatlari Kengashlari qaroriga muvofiq:

mazkur Nizomning 6-bandida koʻzda tutilgan ekologik indikatorlarga asosan hududlarning ekologik zonalari chegaralari belgilanadi hamda oʻzgartiriladi;

mazkur Nizomga ilovadagi namuna boʻyicha ekologik zona pasporti tasdiqlanadi.

5. Hududlarda ekologik zonalarni tashkil etishda Qoraqalpogʻiston Respublikasi, viloyatlar va Toshkent shahri yer fondiga tegishli barcha yer toifalari inobatga olinadi.

6. Hududlar ekologik zona tashkil etish uchun quyidagi ekologik indikatorlarga asosan baholanadi:

SO 2 emissiyasi (SO 2 intensivligi va uni qisqartirish strategiyasi);

energiya (energiya isteʼmoli, mahsulot birligini ishlab chiqarish uchun sarf boʻladigan energiya miqdori, qayta tiklanuvchan energiya manbalari joriy etilgani);

bino (turar joy binolarining energiya isteʼmoli, energiya tejovchi binolar boʻyicha tashabbuslar);

transport (ekologik toza transport vositalaridan foydalanish, ular uchun infratuzilma yaratilgani);

yerdan foydalanish (yerdan “yashil” foydalanish siyosati, “yashil” hududlarning mavjudligi);

chiqindilar (maishiy chiqindilar hosil boʻlishi, chiqindilarni qayta ishlash va kamaytirish siyosati);

suv (suv isteʼmoli, tarmoqdagi yoʻqotishlar, oqova suvlarni tozalash, suvni samarali tozalash siyosati);

havoning sifati (asosiy ifloslantiruvchi moddalar darajasi, toza havo siyosati);

ekologik boshqarish tizimi (“yashil” harakatlar rejasi, “yashil” boshqarish, “yashil” siyosatda jamoatchilikning faolligi);

bioxilma-xillik (flora, fauna resurslari).

Yuqorida keltirilgan ekologik indikatorlar asosida 100 balli baholash tizimi orqali eng past ballga ega boʻlgan hududlar ekologik zona toifasiga nomzod hudud sifatida koʻrsatiladi. Bunda indikatorlar boʻyicha ballarni hisoblash tartibi Ekologiya qoʻmitasi tomonidan belgilanadi.

7. Ekologiya qoʻmitasining taklifiga koʻra Qoraqalpogʻiston Respublikasi Joʻqorgʻi Kengesi, viloyatlar va Toshkent shahar xalq deputatlari Kengashlari tomonidan muhofaza etiladigan tabiiy hududlar yoki ularning ayrim yer uchastkalari, shuningdek, ekologik, ilmiy, madaniy, estetik, rekreatsiya va sanitariya-sogʻlomlashtirish ahamiyatiga ega boʻlgan hududlar baholanmasdan ularda ekologik zonalar tashkil etilishi mumkin.

8. Fuqarolarning oʻzini oʻzi boshqarish organlari hududlardagi ekologik zonalar chegaralarini belgilash va oʻzgartirish boʻyicha tegishlicha Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklariga taklif kiritish huquqiga ega.

9. Ekologik zonalar hududida “oʻrta” va “zararli” ekologik toifalarga mansub hamda ekologik stikeri mavjud boʻlmagan avtotransport vositalari harakatlanishi taqiqlanadi, belgilangan tartibda ruxsatnoma olgan holda harakatlanish hollari bundan mustasno.

Ekologik zonalar hududida harakatlanish qoidalarini buzish amaldagi qonunchilikka muvofiq javobgarlikka sabab boʻladi.

10. “Ekologik zona hududida “oʻrta” va “zararli” ekologik toifalarga mansub avtotransport vositalari harakatlanishi taqiqlangan” yoʻl belgisi Davlat standarti talablari asosida oʻrnatiladi.

11. “Zararli” va “oʻrta” toifadagi avtotransport vositalari egalari ixtiyoriy ravishda avtotransport vositalarining ekologik toifasiga koʻra belgilangan ekologik kompensatsiya toʻlovlarini toʻlash orqali tegishli ruxsatnoma asosida ekologik zonalar hududida harakatlanishi huquqiga ega boʻladi, bunda ruxsatnoma bir yil muddatga beriladi.

Ruxsatnoma berish tartibi Vazirlar Mahkamasi qarori bilan belgilanadi.

“Zararli” va “oʻrta” toifadagi avtotransport vositalari egalari ekologik zonalarga kirishi uchun quyidagi miqdorda ekologik kompensatsiya toʻlovlarini toʻlaydi:

“oʻrta” ekologik toifadagi avtotransport vositalari egalari — bazaviy hisoblash miqdorining bir baravari miqdorida;

“zararli” ekologik toifa avtotransport vositalari egalari — bazaviy hisoblash miqdorining uch baravari miqdorida.

Bunda ekologik kompensatsiya summasi quyidagi tartibda taqsimlanadi:

40 foizi — Oʻzbekiston Respublikasining respublika budjeti;

60 foizi — Ekologiya qoʻmitasining budjetdan tashqari jamgʻarmasi.

12. Ekologik kompensatsiya toʻlovlari toʻlangan avtotransport vositasi va uning egasi toʻgʻrisidagi maʼlumotlar Oʻzbekiston Respublikasi Ichki ishlar vazirligi Jamoat xavfsizligi departamenti Yoʻl harakati xavfsizligi xizmati Yagona avtomatlashtirilgan axborot tizimining “Avtomototransport hisobi” modulida avtomatik tarzda hisobga olinadi.

13. Shoshilinch va tezkor xizmat transport vositalaridan hamda jamoat transportidan (taksi va yoʻnalishli taksidan tashqari) barcha ekologik zonalar hududida hech qanday cheklov va taqiqlarsiz foydalaniladi.

Ekologik zona hududida doimiy yashovchi yoki mehnat faoliyatini amalga oshiruvchi fuqarolar, shuningdek, ekologik zona hududida joylashgan tibbiyot muassasalariga kechiktirib boʻlmaydigan holatlarda tashrif buyuruvchilar mazkur hududda cheklov va taqiqlarsiz harakat qilish huquqiga ega.

3-bob. Atmosfera havosi boʻyicha elektron ekologik xaritani shakllantirish va yuritish tartibi

14. Atmosfera havosining holatini kuzatish, u haqidagi axborotni toʻplash, umumlashtirish, tahlil etish va istiqbolni belgilash atrof tabiiy muhitning davlat monitoringi yagona tizimi boʻyicha qonunchilikda belgilangan tartibda amalga oshiriladi.

Bunda atmosfera havosining davlat monitoringi quyidagilardan iborat boʻladi:

atmosfera havosini ifloslantirish manbalari monitoringi;

atmosfera havosining ifloslanish monitoringi;

atmosfera havosi ifloslanish (emissiya) darajasining holati.

Atmosfera havosining davlat monitoringi natijalariga asosan hududlarda ulardagi atmosfera havosi bilan bogʻliq real ekologik holatdan kelib chiqqan holda, ekologik zonalar tashkil etiladi hamda ularning dinamik elektron ekologik xaritasi yuritiladi.

15. Atmosfera havosining ifloslanish (emissiya) darajasi qonunchilikda belgilangan talablarni hisobga olingan holda tegishli metodikalar boʻyicha amalga oshiriladi.

Statsionar manbalardan atmosfera havosiga ifloslantiruvchi moddalarning chiqarilishi ifloslanish manbalari monitoringini yuritishda kuzatuv obyekti hisoblanadi.

Atmosfera havosining ifloslanish manbalari monitoringi bir oyda bir marta oʻtkaziladi.

16. Atmosfera havosi ifloslanishining monitoringi respublikaning shaharlari va aholi punktlarida joylashgan statsionar kuzatuv punktlarida (postlarida) amalga oshiriladi.

Kuzatuv punkti joylashgan joydan kelib chiqqan holda aniqlanadigan asosiy va oʻziga xos ifloslantiruvchi moddalar mavjudligi yuzasidan atmosfera havosidan namunalar olish hamda ularni sinash kamida sutkada uch marta oʻtkaziladi.

Atmosfera havosi namunalari tahlillarining natijalari ish jurnalida qayd etiladi, uning asl nusxasi Ekologiya qoʻmitasi huzuridagi Gidrometeorologiya xizmati agentligining tegishli tahliliy laboratoriyasida saqlanadi.

Kuzatuv postida avtomatik monitoring stansiyasi mavjud boʻlgan taqdirda, atmosfera havosi ifloslanishining holati toʻgʻrisidagi maʼlumot real vaqt rejimida Atrof tabiiy muhit monitoringi tizimining yagona geoaxborot maʼlumotlar bazasiga uzatiladi.

17. Xarita “Ekologik transport” tizimini amalga oshirishda ekologik zonalarda atmosfera havosining monitoringini yuritish orqali ularning chegaralarini davriy ravishda oʻzgartirib borish uchun maʼlumotlar manbai sifatida yuritiladi.

Xarita ekologik zonalarning atmosfera havosining ifloslanish (emissiya) darajasini kuzatib borish, manbalarni aniqlash, atrof-muhit va aholi salomatligini muhofaza qilish maqsadlarida tashlamalar chiqarilishining oldini olish borasida tezkor choralar koʻrishda qoʻllanadi.

Xarita Ekologiya qoʻmitasi tomonidan shaharlarda oʻrnatilgan statsionar kuzatuv punktlari maʼlumotlarini yagona tizimga integratsiya qilish orqali maʼlumotlar almashish va monitoring yuritish koʻrinishida amalga oshiriladi.

Atmosfera havosi sifati ustidan kuzatuvlar avtomatik monitoring stansiyalari va statsionar kuzatuv postlarida oʻtkaziladi hamda xaritaga integratsiya qilinishi orqali hududlarning atmosfera havosi boʻyicha monitoringi shakllantiriladi.

Avtomatik monitoring stansiyalarining joylashuvi Ekologiya qoʻmitasi huzuridagi Gidrometeorologiya xizmati agentligi tomonidan belgilanadi.

Xarita maʼlumotlari elektron platforma orqali eʼlon qilib boriladi hamda jamoatchilik uchun doimiy ochiq hisoblanadi.

4-bob. Yakunlovchi qoidalar

18. Ushbu Nizom talablarini bajarmaslik bilan bogʻliq nizolar qonunchilikda belgilangan tartibida hal etiladi.

19. Ushbu Nizom talablarining buzilishida aybdor boʻlgan shaxslar qonunchilik hujjatlarida belgilangan tartibda javob beradi.

Hududlarda ekologik zonalarni tashkil etish hamda ularning atmosfera havosi boʻyicha elektron ekologik xaritasini shakllantirish va yuritish tartibi toʻgʻrisidagi nizomga ILOVA

Ekologik zona pasportining

Ekologik zona nomi: Ekologik zona maqomi berilgan sana: Ekologik zona maqomining kuchga kirish sanasi: Ekologik zona hududida harakatlanishi mumkin boʻlgan avtotransport vositalarining ekologik toifasi: Ekologik zona hududida harakatlanishi taqiqlangan avtotransport vositalarining ekologik toifasi: Jarima miqdori:

Vazirlar Mahkamasining 2025-yil 28-noyabrdagi 750-son qaroriga 3-ILOVA

Oʻzbekiston Respublikasi Hukumatining ayrim qarorlariga kiritilayotgan oʻzgartirish va qoʻshimchalar

1. Vazirlar Mahkamasining 2022-yil 12-apreldagi 172-son qarori bilan tasdiqlangan Yoʻl harakati qoidalariga 1-ilovada :

a) quyidagi mazmundagi 3.35-band bilan toʻldirilsin:

“3.35. Ekologik zona hududida “oʻrta” va “zararli” ekologik toifalarga ega avtotransport vositalari harakatlanishi taqiqlangan.

3.35 belgisi ekologik zona hududiga kirishdan 150 — 300 metr oldin oʻrnatiladi”;

b) Yoʻl belgilarining tasvirlari tushirilgan qismi quyidagi tasvirdagi yoʻl belgisi bilan toʻldirilsin:

3.35. “Ekologik zona hududida “oʻrta” va “zararli” ekologik toifalarga ega avtotransport vositalari harakatlanishi taqiqlangan”.

2. Vazirlar Mahkamasining 2022-yil 22-fevraldagi 86-son qarori bilan tasdiqlangan Maxsus elektron tizim orqali ruxsat etish xususiyatiga ega ayrim hujjatlarni berish tartib-taomillari toʻgʻrisidagi yagona nizom quyidagi mazmundagi 67-ilova bilan toʻldirilsin:

“Maxsus elektron tizim orqali ruxsat etish xususiyatiga ega ayrim hujjatlarni berish tartib-taomillari toʻgʻrisidagi yagona nizomga 67-ILOVA

Ekologik toifasi ekologik zonaga muvofiq boʻlmagan avtotransport vositalarida ekologik zonalar hududida ekologik kompensatsiya toʻlovlarini toʻlash orqali harakatlanish uchun ruxsatnoma

1. Ruxsat etish xususiyatiga ega hujjatning nomi: Ekologik toifasi ekologik zonaga muvofiq boʻlmagan avtotransport vositalarida ekologik zonalar hududida ekologik kompensatsiya toʻlovlarini toʻlash orqali harakatlanishi uchun ruxsatnoma 2. Amalga oshirilishi uchun ruxsat etish xususiyatiga ega hujjatni olish talab etiladigan faoliyat (harakatlar): “Ekologik zona” sifatida belgilangan hududlarda toifasi “oʻrta” va “zararli” deb topilgan avtotransport vositalarining ekologik kompensatsiya toʻlovlari toʻlangan holda harakatlanishi 3. Ariza beruvchilar toifasi: Jismoniy yoki yuridik shaxslar 4. Ruxsat etish tartib-taomillari sohasidagi vakolatli organ: Oʻzbekiston Respublikasi Ekologiya va iqlim oʻzgarishi milliy qoʻmitasi 5. Ruxsat etish xususiyatiga ega hujjatni olish uchun taqdim qilinadigan hujjatlar: Ariza. Arizada quyidagilar koʻrsatiladi: yuridik shaxsning nomi, STIRi, pochta manzili, elektron pochta manzili (agar mavjud boʻlsa), telefon raqami; jismoniy shaxsning maʼlumotlari — familiyasi, ismi, otasining ismi, JSHSHIR, pochta manzili, elektron pochta manzili (agar mavjud boʻlsa), telefon raqami; ruxsatnoma olinayotgan avtotransport vositasining texnik pasporti; kompensatsiya toʻlovi toʻlanganligini tasdiqlovchi hujjat (PDF, P N G yoki JPEG formatda ilova qilinishi mumkin). 6. Arizani koʻrib chiqish uchun toʻlanadigan yigʻim miqdori: Yigʻim undirilmaydi 7. Ruxsat etish xususiyatiga ega hujjat berilgani uchun undiriladigan yigʻim: “Zararli” va “oʻrta” toifadagi avtotransport vositalari ekologik zonalarga kirishi uchun quyida belgilangan miqdorda ekologik kompensatsiya toʻlovlari toʻlanadi: “oʻrta” ekologik toifadagi avtotransport vositalari egalari — bazaviy hisoblash miqdorining bir baravari miqdorida; “zararli” ekologik toifa avtotransport vositalari egalari — bazaviy hisoblash miqdorining uch baravari miqdorida. 8. Arizani koʻrib chiqish muddati: 5 ish kuni 9. Ruxsat etishga doir talab va shartlar: a) transport vositasining belgilangan qismiga ekologik toifani koʻrsatuvchi ekologik stiker yopishtirilgan boʻlishi; b) ekologik zona hududida ruxsatnoma amal qilish muddati davomidagina harakatlanish; d) . atmosfera havosini muhofaza qilish toʻgʻrisidagi qonunchilik hujjatlariga rioya qilish. 10. Ruxsat etish xususiyatiga ega hujjatni berishda kelishiladigan organlar: Mavjud emas 11. Ruxsat etish xususiyatiga ega hujjatning amal qilish muddati: 1 yil 12. Izoh: Ekologik zonalarda “oʻrta” va “zararli” ekologik toifadagi avtotransport vositalarining ruxsatnomasiz harakatlanishi taqiqlanadi. Ekologik zonalarda ruxsatnomasiz harakatlanish belgilangan tartibda javobgarlikka sabab boʻladi. ”.

Oʻzbekiston Respublikasining Bosh vaziri A. ARIPOV

Toshkent sh.,

2025-yil 28-noyabr,

750 -son

(Qonunchilik maʼlumotlari milliy bazasi, 29.11.2025-y., 09/25/750/1112-son)

lex.uz