UzbekAI

Ўзбекистон Республикаси Вазирлар Маҳкамасининг

қарори

ТУЗИЛМАСИ

УСТАВИ

НИЗОМ

СЕРТИФИКАТ

РЎЙХАТИ

Ўзбекистон Республикаси Оила ва хотин-қизлар қўмитаси ҳузуридаги Оила ва гендер илмий-тадқиқот институти фаолиятини ташкил этиш тўғрисида

Ўзбекистон Республикаси Президентининг «Оила ва хотин-қизлар қўмитасининг фаолиятини такомиллаштиришга оид қўшимча чора-тадбирлар тўғрисида» 2023 йил 21 декабрдаги ПФ-208-сон Фармони ҳамда «Оилаларни мустаҳкамлаш ва хотин-қизларнинг фаоллигини ошириш бўйича қўшимча чора-тадбирлар тўғрисида» ПҚ-401-сон қарори ижросини таъминлаш мақсадида Вазирлар Маҳкамаси қарор қилади:

1. Ўзбекистон Республикаси Президентининг 2023 йил 21 декабрдаги ПФ-208-сон Фармони билан «Оила ва хотин-қизлар» илмий-тадқиқот институти негизида Оила ва гендер илмий-тадқиқот институти (кейинги ўринларда — Институт) ташкил этилгани ва Институт Ўзбекистон Республикаси Оила ва хотин-қизлар қўмитаси (кейинги ўринларда — Қўмита) тузилмасига ўтказилгани маълумот учун қабул қилинсин.

2. Қуйидагилар:

Ўзбекистон Республикаси Оила ва хотин-қизлар қўмитаси ҳузуридаги Оила ва гендер илмий-тадқиқот институтининг тузилмаси 1-иловага мувофиқ;

Ўзбекистон Республикаси Оила ва хотин-қизлар қўмитаси ҳузуридаги Оила ва гендер илмий-тадқиқот институтининг устави 2-иловага мувофиқ;

Оила институтини мустаҳкамлаш, хотин-қизлар ва гендер тенгликни таъминлаш йўналишида кадрларнинг малакасини ошириш бўйича ўқув курсларини ташкил этиш тартиби тўғрисидаги низом 3-иловага мувофиқ тасдиқлансин.

3. Белгилансинки:

Институт оила институтини мустаҳкамлаш ва хотин-қизларни қўллаб-қувватлаш ишлари ҳамда гендер тенгликни таъминлаш бўйича илмий-услубий ва ахборот-таҳлилий фаолиятни амалга оширувчи ихтисослаштирилган давлат илмий-тадқиқот муассасаси ҳисобланади;

Институт директори Ўзбекистон Республикаси Бош вазири ўринбосари — Оила ва хотин-қизлар қўмитаси раисининг тавсиясига асосан Вазирлар Маҳкамаси томонидан лавозимга тайинланади ва лавозимидан озод этилади;

Институт директори ўринбосарлари Институт директорининг тавсиясига асосан Ўзбекистон Республикаси Бош вазири ўринбосари — Оила ва хотин-қизлар қўмитаси раиси томонидан лавозимга тайинланади ва лавозимидан озод этилади;

Институт ходимларига Фанлар академияси илмий-тадқиқот муассасаларининг тегишли лавозимлари учун белгиланган меҳнатга ҳақ тўлаш шартлари татбиқ этилади;

Институт «Оила ва хотин-қизлар» илмий-тадқиқот институтининг ҳуқуқлари ва мажбуриятлари, шунингдек, тузилган шартномалари бўйича ҳуқуқий вориси ҳисобланади.

4. Институт фаолиятини молиялаштириш манбалари этиб қуйидагилар белгилансин:

Ўзбекистон Республикасининг республика бюджети маблағлари (ходимлар меҳнатига ҳақ тўлаш, бино ва иншоотларни сақлаш харажатларини молиялаштириш ҳамда илмий фаолиятга оид давлат дастурларини амалга ошириш учун);

Олий таълим, фан ва инновациялар вазирлиги ҳузуридаги Инновацион ривожланиш агентлиги томонидан ўтказиладиган танловлар натижалари бўйича Ўзбекистон Республикаси Давлат бюджетидан илмий фаолиятга оид дастурларни амалга ошириш учун ажратилган маблағлар;

Қўмитанинг бюджетдан ташқари маблағлари;

халқаро молия институтлари ва бошқа хорижий ташкилотларнинг грантлари;

республика илмий-тадқиқот лойиҳалари грантлари;

шартнома асосида тадқиқотлар ўтказишдан тушадиган тушумлар;

қонунчилик ҳужжатлари билан тақиқланмаган бошқа манбалар.

5. Институтга Тошкент шаҳри Чилонзор тумани Чилонзор кўчаси 25-уй манзилидаги бино оператив бошқариш ҳуқуқи асосида берилсин.

6. Белгилаб қўйилсинки:

Институтни сақлаш харажатлари 2025 йилда Ўзбекистон Республикасининг республика бюджетидан биринчи даражали бюджет маблағларини тақсимловчи сифатида Қўмитага йўналтириладиган маблағлар доирасида бюджет маблағлари ҳисобидан молиялаштирилади, 2026 йилдан бошлаб эса Ўзбекистон Республикаси Давлат бюджети параметрларида назарда тутилади;

Институтга юклатилган асосий вазифаларни амалга ошириш билан боғлиқ харажатлар, шунингдек, Институтнинг моддий-техник базасини мустаҳкамлаш, тизимда фаолият юритаётган ходимларни моддий қўллаб-қувватлаш ҳамда Институтда бажариладиган илмий лойиҳалар учун харажатлар Қўмита томонидан Институтнинг бюджетдан ташқари шахсий ғазна ҳисобварақларига ажратилган маблағлар ҳисобидан амалга оширилади.

7. Институтга 3 та, жумладан, 2 та шахсий бириктирилган ва 1 та навбатчи енгил автотранспорт воситаларини сақлаш учун лимит ажратилсин.

8. Ўзбекистон Республикаси Ҳукуматининг 4-иловага мувофиқ айрим қарорларига ўзгартиришлар киритилсин.

9. Ўзбекистон Республикаси Ҳукуматининг 5-иловага мувофиқ баъзи қарорлари ўз кучини йўқотган деб ҳисоблансин.

10. Қўмита манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни икки ой муддатда ушбу қарорга мувофиқлаштирсин.

11. Мазкур қарорнинг бажарилишини назорат қилиш Ўзбекистон Республикаси Бош вазири ўринбосари — Оила ва хотин-қизлар қўмитаси раиси З.Б. Махкамова зиммасига юклансин.

Вазирлар Маҳкамасининг 2025 йил 9 декабрдаги 774-сон қарорига 1-ИЛОВА

Ўзбекистон Республикаси Оила ва хотин-қизлар қўмитаси ҳузуридаги Оила ва гендер илмий-тадқиқот институтининг

Илмий кенгаш Илмий котиб 1 Директор Гендер стратегия ва баҳолаш бўлими 3 Директорнинг илмий ишлар бўйича ўринбосари Директорнинг ташкилий ишлар бўйича ўринбосари Кадрлар билан ишлаш бўйича бош мутахассис 1 Оила психологияси ва социологияси бўлими 2 Тизим ходимларининг малакасини оширишни ташкил этиш ва мониторинг қилиш бўлими 4 Бош юрисконсульт 1 Оила демографияси ва хотин-қизларнинг иқтисодий ҳолати таҳлили бўлими 3 Бухгалтерия 1 Халқаро алоқалар бўйича бош мутахассис 1 Гендер тенглиги, хотин-қизлар ва оила ҳуқуқи бўлими 3 Матбуот котиби 1 «Оила, гендер ва ижтимоий ҳаёт» электрон илмий журнали таҳририяти * Оилавий қадриятларни мустаҳкамлаш бўлими 3 Девонхона 1 Илмий ва инновацион фаолиятни ривожлантириш бўлими 2 Хўжалик бўлими 1 Оила демографияси лабораторияси * Таҳририй-ноширлик ва ахборот технологияларини ривожлантириш бўлими 3 Гендер тадқиқотлар лабораторияси *

Вазирлар Маҳкамасининг 2025 йил 9 декабрдаги 774-сон қарорига 2-ИЛОВА

Ўзбекистон Республикаси Оила ва хотин-қизлар қўмитаси ҳузуридаги Оила ва гендер илмий-тадқиқот институтининг

1-боб. Умумий қоидалар

1. Ушбу Устав Ўзбекистон Республикаси Оила ва хотин-қизлар қўмитаси ҳузуридаги Оила ва гендер илмий-тадқиқот институти (кейинги ўринларда — Институт)нинг асосий вазифалари ва функциялари, ҳуқуқлари, жавобгарлиги, фаолиятини ташкил этиш тартибини белгилайди.

2. Институт оила институтини мустаҳкамлаш ва хотин-қизларни қўллаб-қувватлаш ишлари ва гендер тенгликни таъминлаш бўйича илмий-услубий ва ахборот-таҳлилий фаолиятни амалга оширувчи ихтисослаштирилган давлат илмий-тадқиқот муассасаси ҳисобланади.

3. Институт ўз фаолиятида Ўзбекистон Республикаси Конституцияси ва қонунларига, Ўзбекистон Республикаси Олий Мажлиси палаталарининг қарорларига, Ўзбекистон Республикаси Президентининг фармонлари, қарорлари ва фармойишларига, Вазирлар Маҳкамасининг қарорлари ва фармойишларига, Ўзбекистон Республикаси Оила ва хотин-қизлар қўмитаси (кейинги ўринларда — Қўмита)нинг қарорлари ва буйруқларига, ушбу Уставга ва бошқа қонунчилик ҳужжатларига амал қилади.

4. Институт ўз фаолиятини республика ва маҳаллий ижро этувчи ҳокимият органлари, хўжалик бирлашмалари ва бошқа ташкилотлар билан ўзаро ҳамкорликда амалга оширади.

5. Институтнинг расмий номи:

а) давлат тилида:

тўлиқ номи — Ўзбекистон Республикаси Оила ва хотин-қизлар қўмитаси ҳузуридаги Оила ва гендер илмий-тадқиқот институти, қисқартирилган номи — Оила ва гендер институти;

б) рус тилида:

тўлиқ номи — Научно-исследовательский институт семьи и гендера при Комитете семьи и женщин Республики Узбекистан, қисқартирилган номи — Институт семьи и гендера;

в) инглиз тилида:

тўлиқ номи — Scientific Research Institute Family and gender under the Committee on Family and Women of the Republic of Uzbekistan, қисқартирилган номи — Institute Family and gender.

6. Институтнинг жойлашган ери (почта манзили): Тошкент шаҳри, Чилонзор тумани Чилонзор кўчаси 25-уй, 100115.

2-боб. Институтнинг тузилмаси

7. Институт тизимига қуйидагилар киради:

Институт аппарати;

«Оила, гендер ва ижтимоий ҳаёт» электрон илмий журнали;

Оила демографияси лабораторияси;

Гендер тадқиқотлар лабораторияси.

3-боб. Институтнинг асосий вазифалари ва функциялари

8. Қуйидагилар Институтнинг асосий вазифалари ҳисобланади:

Қўмита тизими ходимлари, шунингдек, маҳаллалардаги хотин-қизлар фаолларининг малакасини ошириш, уларнинг фаолиятини услубий қўллаб-қувватлаш;

оила, хотин-қизлар ва гендер тенглик масалаларига оид муаммоларни чуқур таҳлил қилиш, натижалари бўйича муаммолар ечими юзасидан давлат органлари ва ташкилотлари учун тавсиялар ишлаб чиқиш ва киритиш;

оила, хотин-қизлар ва гендер тенглик масалалари бўйича аҳоли ўртасида ўтказиладиган тарғибот ишлари учун услубий қўлланмалар ва тарғибот материалларини тайёрлаш;

оила, хотин-қизлар ва гендер тенглик масалалари бўйича фанлараро фундаментал, илмий-амалий тадқиқотлар, социологик сўров, илмий конференциялар ўтказиш, инновацион лойиҳаларни амалга ошириш;

олимлар ва илмий салоҳиятли кадрларни тайёрлаш, оила, хотин-қизлар ва гендер тенглик масалаларида илмий тадқиқот ўтказаётган изланувчиларни қўллаб-қувватлаш ҳамда уларнинг ишланмалари амалиётга жорий этилишига кўмаклашиш;

оила, хотин-қизлар ва гендер тенглик масалаларига оид халқаро индекс ва рейтингларда Ўзбекистон ўрнини яхшилаш бўйича илмий асосланган таклифларни ишлаб чиқиш ва тегишлилиги бўйича вазирлик ва идораларга киритиб бориш.

9. Институт ўзига юкланган асосий вазифаларга мувофиқ қуйидаги функцияларни амалга оширади:

а) Қўмита тизими ходимлари, шунингдек, маҳаллалардаги хотин-қизлар фаолларининг малакасини ошириш, уларнинг фаолиятини услубий қўллаб-қувватлаш соҳасида:

Қўмита, унинг ҳудудий бўлинмалари ва маҳаллалардаги хотин-қизлар фаоллари учун уларнинг вазифа ва функцияларидан келиб чиққан ҳолда, малака ошириш курсларини ташкил этади;

малака ошириш курслари ўқув режаси, ўқув-методик дастурлар ва материалларни тайёрлайди, мунтазам янгилаб боради, илмий-услубий жиҳатдан кўмаклашади ва ўқув-методик раҳбарликни амалга оширади ҳамда малака ошириш тизимига ўқитишнинг замонавий шакл ва методларини, илғор педагогик технологияларини жорий этади;

ўқув дастури асосида ўқитилган тингловчиларни баҳолайди ва малака сертификатини тақдим этади;

малака ошириш курсларида таълим олиш ва ўқитиш жараёни мониторингини юритади ҳамда натижаларини Қўмитага тақдим этади;

Қўмита, унинг ҳудудий бўлинмалари ва маҳаллалардаги хотин-қизлар фаоллари ишини самарали ташкил этиш бўйича услубий қўлланмалар ва тавсиялар ишлаб чиқади;

жойларда хотин-қизларнинг муаммоларини ўз вақтида аниқлайди ҳамда бартараф этади, оғир ижтимоий аҳволга тушиб қолган ногиронлиги бўлган хотин-қизлар билан манзилли ишларни олиб боради;

Қўмита қуйи тузилмаларининг фаолиятини намунали йўлга қўйиш бўйича ўрганишлар олиб боради ҳамда ижобий тажрибаларни бошқа ҳудудларда (туман (шаҳар) ва маҳаллаларда) қўллаш амалиётини жорий этишга кўмаклашади;

хотин-қизлар билан самарали ишлаш соҳасида кадрлар малакасини ошириш билан шуғулланувчи хорижий таълим муассасалари ва илмий-тадқиқот марказлари билан ҳамкорликни йўлга қўяди;

б) оила, хотин-қизлар ва гендер тенглик масалаларига оид муаммоларни чуқур таҳлил қилиш, натижалари бўйича муаммолар ечими юзасидан давлат органлари ва ташкилотлари учун тавсиялар ишлаб чиқиш ва киритиш соҳасида:

доимий равишда ҳудудлар кесимида оила, хотин-қизлар ҳамда гендер тенглик масалаларига оид муаммоларни ҳар тарафлама чуқур таҳлил қилади ва «маҳалла — туман (шаҳар) — вилоят — республика» тамойили асосида муаммоларни бартараф этиш юзасидан амалий таклифлар ва тавсиялар ишлаб чиқади, уларнинг амалиётга татбиқ этилишида кўмаклашади;

оиланинг жамиятдаги ўрнини оширишга қаратилган ҳамда гендер тенглик, хотин-қизларни қўллаб-қувватлашга доир давлат сиёсатининг устувор йўналишларини шакллантиришга, оила институтининг барқарорлигини таъминлашга оид таҳлилий материаллар тайёрлайди ҳамда илмий асосланган таклифларни ишлаб чиқади;

оилалардаги ижтимоий муаммоларнинг гендер жиҳатлари, оилавий низоларнинг олдини олиш, соғлом муҳитни сақлаб қолиш, оғир ижтимоий вазиятга тушиб қолган оилалар билан ишлаш, хотин-қизларнинг ҳуқуқ ва манфаатларини ҳимоя қилишга қаратилган таклифлар ва методик тавсиялар ишлаб чиқади;

оила институтида кутилаётган ўзгаришлар таҳлили ва прогнозларини ишлаб чиқади, ижтимоий-демографик ривожланиш ва оила фаровонлигининг ўсиш даражасини ўрганади, таҳлил қилади ҳамда концептуал йўналишлар бўйича илмий асосланган таклифлар ва материаллар тайёрлайди;

оила, хотин-қизлар ва гендер тенглик масалаларига оид норматив-ҳуқуқий базани такомиллаштириш бўйича таклифлар ишлаб чиқади ва белгиланган тартибда вазирлик ва идораларга киритиб боради;

оила, хотин-қизлар ва гендер тенглик масалаларига оид муаммоларни чуқур таҳлил қилиш натижасида тайёрланган маълумот ҳамда таклифларни давлат органлари ва ташкилотларга киритади;

оила, хотин-қизлар ва гендер тенглик масалалари бўйича илғор халқаро тажрибани ўрганади ва таҳлил қилади ҳамда ўрганишлар асосида таклифлар ишлаб чиқади, амалиётга жорий қилиш бўйича хулосаларни Қўмитага тақдим этади;

хорижий ҳамда халқаро ташкилотлардан қонунчилик ҳужжатларида белгиланган тартибда грантлар олади, тақдим этилган грантлар ҳисобидан илмий тадқиқотлар ўтказади, шунингдек, хорижий мутахассисларни жалб этган ҳолда маҳорат дарсларини ташкил этади;

оила, хотин-қизлар ва гендер тенгликни таъминлаш масалалари юзасидан хулосалар, ахборот-таҳлилий материаллар ва таклифлар тайёрлаш учун зарур бўлганда, республика ва хорижий давлатларнинг олимлари, мутахассисларидан иборат, шу жумладан, шартнома асосида ишчи гуруҳларни ташкил этади;

в) оила, хотин-қизлар ва гендер тенглик масалалари бўйича аҳоли ўртасида ўтказиладиган тарғибот ишлари учун услубий қўлланмалар ва тарғибот материалларини тайёрлаш соҳасида:

оила мустаҳкамлиги, соғлом турмуш тарзи, оиланинг фарзанд тарбиясидаги масъулияти, гендер тенглик, хотин-қизларни тазйиқ ва зўравонликлардан ҳимоя қилиш масалаларига қаратилган турли услубий қўлланмалар тайёрлайди, чоп этади ҳамда тарғибот лойиҳаларини ишлаб чиқади ва амалга оширади;

оила институтини мустаҳкамлаш, гендер тенгликни таъминлаш ва хотин-қизларни қўллаб-қувватлаш ҳамда уларнинг ижтимоий-сиёсий, иқтисодий фаоллигини ошириш билан боғлиқ йўналишларда мутахассислар тайёрловчи таълим муассасалари учун илмий, ўқув-методик адабиётларнинг янги авлодини нашр этишга тайёрлашда иштирок этади;

ўз фаолияти, шу жумладан, амалга оширилган илмий-тадқиқот ишлари натижалари тўғрисидаги материалларни оммавий ахборот воситаларида кенг ёритиб боради ҳамда ушбу мақсадда расмий веб-сайтлар, ижтимоий тармоқларда саҳифалар яратади;

аҳолининг оила институтини мустаҳкамлаш, гендер тенгликни таъминлаш ва хотин-қизларни қўллаб-қувватлашдаги дахлдорлик ҳиссини ҳамда фуқаролик масъулиятини ошириш бўйича оммавий ахборот воситаларида, шу жумладан, ижтимоий тармоқларда ташвиқот ишларини ташкил этади;

г) оила, хотин-қизлар ва гендер тенглик масалалари бўйича фанлараро фундаментал, илмий-амалий тадқиқотлар, социологик сўров, илмий конференциялар ўтказиш, инновацион лойиҳаларни амалга ошириш соҳасида:

тадқиқотчилар томонидан Қўмита фаолияти йўналишларига мос келадиган илмий-тадқиқот ишларини амалиётга жорий қилади;

ҳимоя қилинган диссертацияларнинг илмий янгиликлари ва натижаларини Қўмита орқали амалиётга татбиқ этишни таъминлайди, илмий тадқиқотларнинг аҳоли манфаатларига хизмат қилиш самарадорлигини мониторинг қилиб боради;

илмий тадқиқотлардан олинган натижалардан ҳудудларнинг муаммолари ечимлари юзасидан ишланмалар, маҳаллалардаги хотин-қизлар фаоллари тизимда қўллаши учун содда, халқона тилда, кичик ҳажмдаги қўлланмалар ишлаб чиқиб, Қўмитага тақдим этиб боради;

институтнинг асосий вазифа ва функциялари билан боғлиқ йўналишларда илмий конференциялар, семинарлар, ҳамкорликдаги тадқиқотлар, лойиҳалар, ходимларнинг тажриба алмашиши ва уларни ўқитиш бўйича хорижий илмий-тадқиқот муассасалари, институтлар ва марказлар билан ҳамкорлик қилади;

хотин-қизлар ва эркаклар учун тенг ҳуқуқ ҳамда имкониятлар кафолатларини таъминлаш борасидаги устувор вазифалар билан боғлиқ мавзулар бўйича илмий-амалий конференциялар ўтказади;

оилаларни мустаҳкамлаш, хотин-қизларни қўллаб-қувватлаш, уларнинг бандлигини таъминлаш, тадбиркорликни ривожлантириш, аҳоли саломатлигини сақлаш каби йўналишларга бағишланган илмий-амалий конференция ва семинарлар ташкил этади;

олий таълим ташкилотлари, илмий-тадқиқот муассасалари, хўжалик бирлашмалари ва бошқа манфаатдор ташкилотлар, шунингдек, нодавлат нотижорат ташкилотлари билан оила, хотин-қизлар ва гендер тенглик соҳасида инновацияларни жорий этишга йўналтирилган чора-тадбирларни ҳамкорликда амалга оширади;

фундаментал, илмий-амалий тадқиқотларни амалга ошириш жараёнида ижтимоий ҳаётдаги ҳақиқий муаммоларни аниқлайди ва уларнинг ечими бўйича таклифларни тайёрлайди;

д) олимлар ва илмий салоҳиятли кадрларни тайёрлаш, оила, хотин-қизлар ва гендер тенглик масалаларида илмий тадқиқот ўтказаётган изланувчиларни қўллаб-қувватлаш ҳамда уларнинг ишланмалари амалиётга жорий этилишига кўмаклашиш соҳасида:

оила институтини мустаҳкамлаш, гендер тенгликни таъминлаш ва хотин-қизларни қўллаб-қувватлаш ҳамда уларнинг ижтимоий-сиёсий ва иқтисодий фаоллигини ошириш билан боғлиқ йўналишларда илмий кадрлар тайёрлайди, илмий ходимларнинг касбий даражасини доимий ошириб бориш тизимини жорий этади;

оила институтини мустаҳкамлаш, гендер тенгликни таъминлаш ва хотин-қизларни қўллаб-қувватлаш ҳамда уларнинг ижтимоий-сиёсий ва иқтисодий фаоллигини ошириш масалалари бўйича ёзги ва қишки мактаблар, илмий маърузалар ва мунозаралар майдончаларини ташкил этади;

оила, хотин-қизлар ва гендер тенглик муаммоларини тадқиқ этиш бўйича тадқиқотчи ва изланувчиларни қўллаб-қувватлайди ҳамда уларнинг тадқиқот натижалари амалиётга жорий этилишига кўмаклашади;

е) оила, хотин-қизлар ва гендер тенглик масалаларига оид халқаро индекс ва рейтингларда Ўзбекистон ўрнини яхшилаш бўйича илмий асосланган таклифларни ишлаб чиқиш ва тегишлилиги бўйича вазирлик ва идораларга киритиб бориш соҳасида:

оила, хотин-қизлар ва гендер тенглик масалаларига оид халқаро рейтингларни тузувчилар, рейтинг агентликлари, шунингдек халқаро рейтингларга алоқадор бошқа халқаро, илмий-тадқиқот, нодавлат ташкилотлар билан ҳамкорлик ўрнатади;

оила, хотин-қизлар, гендер тенглик, аёллар тадбиркорлиги, хотин-қизлар ва эркакларга нисбатан тазйиқ ва зўравонлик ҳолатларини баҳоловчи халқаро рейтинг ва индексларнинг индикаторлари, уларни аниқлаш ҳамда баҳолаш методологиясини ўрганади ва таҳлил қилади;

халқаро гендер тенгликка оид рейтингларда юқори балл тўплаган ва рейтинги баланд ҳисобланган, ижобий натижага эришаётган мамлакатларнинг тажрибасини ўрганади;

оила, хотин-қизлар, гендер тенглик, аёллар тадбиркорлиги, хотин-қизлар ва эркакларга нисбатан тазйиқ ва зўравонлик ҳолатларини баҳоловчи халқаро рейтинг ва индексларнинг индикаторларида Ўзбекистоннинг ўрни яхшиланишига тўсқинлик қилувчи омиллар ҳамда муаммоларни аниқлайди;

жамият ҳаётининг барча соҳаларида хотин-қизлар ва эркакларнинг ҳолатини акс эттирадиган статистика ахборотини тўплаш, унга ишлов бериш, таҳлил ва эълон қилиш ҳамда халқаро тажриба ва стандартларга мувофиқ миллий гендер кўрсаткичларини такомиллаштириб боришга оид таклифлар ишлаб чиқади;

таҳлиллар асосида Ўзбекистоннинг устувор халқаро гендер индекс ва рейтинглардаги ўрнини яхшилаш бўйича илмий асосланган таклифлар ишлаб чиқади ҳамда тегишлилиги бўйича вазирлик ва идораларга Қўмита орқали ўрнатилган тартибда киритиб боради, гендер кўрсаткичлар бўйича мониторинг ўтказади.

4-боб. Институтнинг ҳуқуқлари ва жавобгарлиги

10. Институт ўзига юкланган асосий вазифалар ва функцияларни бажаришда қуйидаги ҳуқуқларга эга:

норматив-ҳуқуқий ҳужжатлар лойиҳаларини, шунингдек, Институтга юкланган вазифалар ва функцияларни бажариш билан боғлиқ бўлган бошқа ҳужжатларни Қўмитага киритиш;

Институтнинг ваколатига кирадиган масалалар бўйича зарур маълумотларни статистика органлари, солиқ хизмати органлари ҳамда бошқа вазирликлар ва идоралардан бепул олиш;

Институтга юкланган вазифаларни бажариш учун давлат органлари, хўжалик бирлашмалари ва бошқа ташкилотларнинг мутахассисларини, шу жумладан, хорижий мутахассисларни шартнома асосида жалб этиш;

оила институтини мустаҳкамлаш, гендер тенгликни таъминлаш ва хотин-қизларни қўллаб-қувватлаш ҳамда уларнинг ижтимоий-сиёсий ва иқтисодий фаоллигини ошириш соҳаларини такомиллаштириш, амалга оширилаётган чора-тадбирларнинг самарадорлигини ошириш масалалари бўйича Қўмитага таклифлар киритиш;

оила институтини мустаҳкамлаш, гендер тенгликни таъминлаш ва хотин-қизларни қўллаб-қувватлаш ҳамда уларнинг ижтимоий-сиёсий ва иқтисодий фаоллигини ошириш соҳаларидаги долзарб ҳамда истиқболли вазифаларни ҳал қилиш учун ташкил этилган ишчи гуруҳлар йиғилишларида, эксперт кенгашлари ва комиссиялар ишида иштирок этиш;

Институтга юкланган вазифалар билан боғлиқ масалалар бўйича илмий-амалий конференциялар, семинарлар, кўргазмалар, ярмаркалар ўтказиш, шунингдек, халқаро лойиҳаларни амалга оширишда иштирок этиш;

оила институтини мустаҳкамлаш, гендер тенгликни таъминлаш ва хотин-қизларни қўллаб-қувватлаш учун илмий кенгаш тузиш;

Институт ваколатига кирадиган масалаларни ҳал этиш учун шартнома асосида маҳаллий ва хорижий илмий муассасалар, олим ва мутахассисларни жалб қилиш ҳамда ходимлар иштирокида вақтинча ижодий гуруҳларни тузиш;

Институт ходимларини қонунчилик ҳужжатларида белгиланган тартибда моддий рағбатлантириш, Институтнинг моддий-техник базасини мустаҳкамлаш ва ижтимоий масалаларни ҳал қилиш учун даромад шаклида олинган маблағларни жалб этиш;

ўз ваколати доирасида халқаро ва хорижий ташкилотлар, илмий-тадқиқот институтлари билан ҳамкорлик қилиш;

белгиланган тартибда ноширлик фаолиятини амалга ошириш, оила, хотин-қизлар ва гендер тенглик билан боғлиқ даврий илмий, услубий ва амалий нашрлар чиқариш ҳамда тарқатиш.

Институт қонунчилик ҳужжатларига мувофиқ бошқа ҳуқуқларга ҳам эга бўлиши мумкин.

11. Институт:

ушбу Уставда белгиланган асосий вазифалар ва функцияларнинг сифатли ва ўз вақтида бажарилишини таъминлаш;

Қўмитага ҳар ойда камида бир марта таҳлилий материаллар ва илмий асосланган таклифларни тақдим этиб бориш;

ўз фаолияти тўғрисидаги ахборот билан танишиш эркинлигини таъминлаш;

қонунчилик ҳужжатларида белгиланган тартибда тегишли давлат органларига ҳисобот бериш учун жавобгар ҳисобланади.

5-боб. Институт фаолиятини ташкил этиш

12. Институт ўз фаолиятида бевосита Қўмитага бўйсунади ва унга ҳисобот беради.

13. Институтга Ўзбекистон Республикаси Бош вазири ўринбосари — Оила ва хотин-қизлар қўмитаси раисининг (кейинги ўринларда — Қўмита раиси) тавсиясига кўра Вазирлар Маҳкамаси томонидан лавозимга тайинланадиган ва лавозимидан озод қилинадиган директор раҳбарлик қилади.

14. Институт директорининг унинг тавсиясига асосан Қўмита раиси томонидан лавозимга тайинланадиган ва лавозимидан озод этиладиган ўринбосарлари бўлади.

Институт директори бўлмаган вақтда, унинг ваколатларини вазифалар тақсимотига мувофиқ ўринбосарлари амалга оширади.

15. Институт директори:

Институт фаолиятига умумий раҳбарлик қилади;

Қўмита раиси билан келишган ҳолда, бошқарув ходимларининг умумий чекланган сони ва меҳнатга ҳақ тўлаш фонди доирасида Институтнинг штат жадвалини тасдиқлайди;

Қўмита раиси билан келишган ҳолда, зарур назарий билим ва амалий кўникмаларга эга бўлган юқори малакали хорижлик мутахассислар билан белгиланган тартибда меҳнат шартномаларини тузади ва бекор қилади;

Институт ходимлари бажариши мажбурий бўлган буйруқ ва йўриқномаларни қабул қилади;

Институт директорининг ўринбосарлари ва бўлим бошлиқларининг ҳисоботларини Илмий кенгашда эшитади;

Институт ходимларини қонунчилик ҳужжатларига мувофиқ рағбатлантириш шаклларини, лавозим маошларига устама ва қўшимча тўловларни белгилайди, ходимларга моддий ёрдам кўрсатиш бўйича буйруқлар чиқаради, уларни интизомий жазога тортиш масалаларини ҳал қилади;

Институтнинг таркибий бўлинмалари тўғрисидаги низомларни, бўлим бошлиқлари ва ходимларининг функционал вазифаларини тасдиқлайди;

Қўмита раиси билан келишган ҳолда, Институтнинг иш режасини тасдиқлайди;

Институтнинг ҳисоботларини тасдиқлайди;

Институтнинг харажатлар сметасини тасдиқлайди;

Институтнинг активларини қонунчилик ҳужжатларида белгиланган тартибда тасарруф этади, мол-мулкни бошқариш тўғрисида қарорлар қабул қилади, молиявий, тўлов ҳисоб-китоб ва бошқа ҳужжатларни имзолайди, зарур ҳолларда Институтнинг масъул мансабдор шахсларига ишончномалар беради;

Институт номидан юридик ва жисмоний шахслар, шу жумладан халқаро ташкилотлар ва хорижий давлатларнинг илмий-тадқиқот муассасалари ҳамда бошқа мутасадди ташкилотлар билан шартнома ва меморандумлар тузади;

Институт тузилмасига ходимларнинг белгиланган чекланган умумий сони ва иш ҳақи фонди доирасида ўзгартиришлар киритиш бўйича Қўмита раисига таклифлар киритади.

Институт директори қонунчилик ҳужжатларига мувофиқ бошқа ваколатларни ҳам амалга ошириши мумкин.

16. Институт ходимларининг ҳуқуқ ва мажбуриятлари меҳнат қонунчилиги, лавозим йўриқномаси, ички меҳнат қоидалари, жамоа ҳамда меҳнат шартномаларига мувофиқ белгиланади.

17. Институт директорининг ўринбосарлари:

таркибий бўлинмалар фаолиятига бевосита раҳбарлик қилади, ушбу бўлинмаларга юкланган вазифалар ва функциялар бажарилишини ташкил этади;

Қўмита раисининг буйруқлари, қарорлари ва фармойишлари, Институт директорининг буйруқлари ва топшириқлари ўз вақтида ҳамда сифатли бажарилишини таъминлайди;

таркибий бўлинмаларга юкланган вазифалар бажарилишини назорат қилади ва мувофиқлаштиради;

таркибий бўлинмалар фаолиятини такомиллаштириш бўйича таклифлар ишлаб чиқади ва уларни кўриб чиқиш учун Институт директорига киритади;

Институт директорига таркибий бўлинмаларда ходимларни танлаш ва жой-жойига қўйиш бўйича таклифлар киритади, уларнинг касбий маҳорати, малакаси, амалий тажрибаси, ишчанлик ва ахлоқий фазилатлари юқори даражада бўлишини таъминлаш, касбий малакаларини ошириш, таркибий бўлинмаларда кадрлар захирасини шакллантириш чораларини кўради;

Институтнинг таркибий бўлинмалари ходимлари фаолиятининг самарадорлиги (KPI) ва натижадорлигини тизимли танқидий таҳлил қилади, йиғилишларда уларнинг шахсий ҳисоботларини эшитади, якунлари бўйича зарур чоралар кўради.

18. Институт ҳузурида Илмий кенгаш фаолиятининг асосий йўналишларини мувофиқлаштирувчи директор ўринбосарлари (лавозимига кўра), Илмий котиб, Институт таркибий бўлинмалари раҳбарлари, Қўмита масъул ходимлари, Фанлар академияси вакиллари, шунингдек, турдош илмий-тадқиқот институтларида ва ташкилотларда ишловчи етакчи олимлар, малакали мутахассислардан иборат таркибда Илмий кенгаш ташкил этилади. Илмий кенгашга Институт директори раислик қилади.

Институт Илмий кенгашининг шахсий таркиби, аъзолари сони ва низоми Институт директори томонидан Қўмита билан келишилган ҳолда тасдиқланади.

Институт Илмий кенгашининг иш тартиби Институтнинг иш режаларига мувофиқ белгиланади.

6-боб. Институт фаолиятини молиялаштириш

19. Институт фаолиятини молиялаштириш манбалари қуйидагилардан иборат:

Ўзбекистон Республикасининг республика бюджети маблағлари (ходимлар меҳнатига ҳақ тўлаш, бино ва иншоотларни сақлаш харажатларини молиялаштириш ҳамда илмий фаолиятга оид давлат дастурларини амалга ошириш учун);

Ўзбекистон Республикаси Олий таълим, фан ва инновациялар вазирлиги ҳузуридаги Инновацион ривожланиш агентлиги томонидан ўтказиладиган танловлар натижалари бўйича Ўзбекистон Республикасининг Давлат бюджетидан илмий фаолиятга оид дастурларни амалга ошириш учун ажратилган маблағлар;

Қўмитанинг бюджетдан ташқари маблағлари;

халқаро молия институтлари ва бошқа хорижий ташкилотларнинг грантлари;

республика илмий-тадқиқот лойиҳалари грантлари;

шартнома асосида тадқиқотлар ўтказишдан тушадиган тушумлар;

қонунчилик ҳужжатлари билан тақиқланмаган бошқа манбалар.

20. Институт ўзининг кўчмас ва кўчар мол-мулкига, маблағларига, шу жумладан, чет эл валютасидаги маблағлари, қимматли қоғозлари ва бошқа мол-мулкига эга бўлиши мумкин.

Хўжалик, илмий-техник фаолиятдан тушган даромадлар, шунингдек, юридик ва жисмоний шахсларнинг ҳомийлик хайриялари ҳисобидан сотиб олинган мулк ва воситалар Институт мулки ҳисобланади.

21. Институт томонидан тайёрланган барча тадқиқот материаллари унинг интеллектуал мулки ҳисобланади.

22. Институт директори белгиланган иш ҳақи фондини тежашдан ҳамда бюджетдан ташқари тушган, шунингдек, ходимларнинг тасдиқланган штатлар жадвалида назарда тутилган штат бирликлари етишмаслигидан иқтисод қилинган маблағлардан ходимларни моддий рағбатлантиришда, Институтнинг моддий-техник базасини мустаҳкамлашда фойдаланишга ҳақлидир.

23. Институт ходимларига Ўзбекистон Республикаси Фанлар академияси илмий-тадқиқот муассасаларининг тегишли лавозимлари учун белгиланган меҳнатга ҳақ тўлаш шартлари татбиқ этилади.

Институт ходимларининг аввалги узоқ йиллик иш стажи учун оладиган қўшимча ҳақлари ва устамалари сақлаб қолинади.

24. Институт директори Қўмита раиси билан келишган ҳолда, Институтнинг бюджетдан ташқари маблағлари ҳисобидан ходимлар ўз хизмат вазифаларини ташаббус кўрсатиб ва виждонан бажаришини рағбатлантириш мақсадида уларга белгиланган тартибда лавозим маошининг 100 фоизигача миқдорда ойлик устамалар белгилашга, ҳар чоракда лавозим маошининг 50 фоизигача мукофотлашга, бир йилда бир лавозим маоши миқдорида моддий ёрдам тайинлашга ҳақли.

7-боб. Институт фаолиятининг самарадорлиги ва натижадорлигини баҳолаш мезонлари ва иш индикаторлари

25. Институт фаолиятининг самарадорлиги мунтазам баҳоланади.

26. Институт фаолиятининг самарадорлиги ва натижадорлигига берилган баҳо Қўмита раиси томонидан тасдиқланадиган Институт фаолияти самарадорлиги ва натижадорлигини баҳолаш мезонлари ва иш индикаторларига асосланади.

27. Институт фаолиятининг самарадорлиги ва натижадорлигини баҳолаш якунлари бўйича:

Институт раҳбарлари ва ходимларини рағбатлантириш (мукофотлаш) ёки интизомий жавобгарлик чоралари;

Институт фаолиятида аниқланган камчиликларни бартараф этиш ва унинг фаолиятини янада такомиллаштириш чоралари кўрилади.

28. Институт фаолиятининг самарадорлиги ва натижадорлигини баҳолаш мезонлари Қўмита томонидан белгиланади.

8-боб. Якунловчи қоида

29. Институт қонунчилик ҳужжатларида белгиланган тартибда қайта ташкил этилади ва тугатилади.

Вазирлар Маҳкамасининг 2025 йил 9 декабрдаги 774-сон қарорига 3-ИЛОВА

Оила институтини мустаҳкамлаш, хотин-қизлар ва гендер тенгликни таъминлаш йўналишида кадрларнинг малакасини ошириш бўйича ўқув курсларини ташкил этиш тартиби тўғрисида

1-боб. Умумий қоидалар

1. Ушбу Низом Ўзбекистон Республикаси Оила ва хотин-қизлар қўмитаси (кейинги ўринларда — Қўмита) тизимида фаолият кўрсатаётган масъул ходимлар малакасини ошириш ўқув курсларининг (кейинги ўринларда — малака ошириш ўқув курслари) мақсад ва вазифаларини, ўқув курсларида ўқиш, шунингдек, малака ошириш ўқув курсларида ўқув жараёнини ташкил этиш ва тингловчиларнинг билимини баҳолаш тартибини белгилайди.

2. Малака ошириш ўқув курслари Қўмита марказий аппаратининг, Қорақалпоғистон Республикаси Оила ва хотин-қизлар қўмитасининг, вилоятлар ва Тошкент шаҳри оила ва хотин-қизлар бошқармаларининг, туман (шаҳар)лар оила ва хотин-қизлар бўлимларининг ходимлари, маҳаллалардаги хотин-қизлар фаоллари касбий малакасини оширишга йўналтирилади.

3. Малака ошириш ўқув курслари ҳар уч йилда бир марта бепул асосда онлайн ва оффлайн шаклда ташкил этилади.

4. Оила институтини мустаҳкамлаш, хотин-қизлар ва гендер тенгликни таъминлаш йўналишида фаолият кўрсатувчи бошқа ташкилотларнинг ходимлари ҳам малака ошириш ўқув курсларида ихтиёрий иштирок этиши мумкин.

5. Малака ошириш ўқув курслари Қорақалпоғистон Республикаси Оила ва хотин-қизлар қўмитаси, вилоятлар ва Тошкент шаҳри оила ва хотин-қизлар бошқармалари ҳузурида ташкил этилади.

2-боб. Малака ошириш курсларининг мақсади ва асосий вазифалари

6. Малака ошириш курсларининг мақсади — Қўмита тизими ходимлари, шунингдек, маҳаллалардаги хотин-қизлар фаолларининг хотин-қизлар ва оилаларни ҳар томонлама қўллаб-қувватлаш, гендер тенгликни таъминлаш, улар билан тизимли ишларни ташкил этиш, оилалардаги маънавий-ахлоқий муҳитни мустаҳкамлаш, соғломлаштириш йўналишлари бўйича билим ва кўникмаларини ривожлантиришдан иборат.

7. Қуйидагилар малака ошириш ўқув курсларининг асосий вазифалари ҳисобланади:

Қўмита ходимлари, маҳаллалардаги хотин-қизлар фаолларининг касбий билими, кўникмаси ва маҳоратини узлуксиз ривожлантириб бориш, оила ва хотин-қизлар билан ишлашда замонавий билим, кўникма ҳамда малакалари, шунингдек, касбий тайёргарлигини ошириш;

хотин-қизларни оила, маҳалла ва меҳнат жамоаларида ижтимоий-ҳуқуқий жиҳатдан қўллаб-қувватлаш, уларнинг ижтимоий-сиёсий фаоллигини ошириш ва маънавиятини юксалтиришга кўмаклашиш;

ёшларни оилавий ҳаётга тайёрлаш, оиладаги низоли ҳолатларни ҳал қилишнинг ҳуқуқий ва психологик асосларини ҳамда медиатив усулларини ўргатиш, ажралишларнинг олдини олиш ҳамда оиладаги маънавий-ахлоқий қадриятларни мустаҳкамлаш соҳасида ходимларнинг малакасини ошириш;

хотин-қизларнинг тадбиркорлик ғояларини амалга ошириш, уларни касаначилик, ҳунармандчилик ва бошқа шаклда ўзини ўзи банд қилиши бўйича соҳа ходимларининг тегишли компетентлигини ошириш;

соҳа ходимларининг ижтимоий ҳимояга муҳтож, оғир ижтимоий аҳволга тушиб қолган хотин-қизлар билан якка тартибда ҳамда аниқ мақсадга йўналтирилган ишларни олиб бориш, уларга ижтимоий-ҳуқуқий, психологик ва моддий ёрдам кўрсатиш ишларини ташкил этиш бўйича кўникма ва малакаларга эга бўлишини таъминлаш.

3-боб. Малака ошириш ўқув курсларида ўқиш тартиби

8. Малака ошириш ўқув курсларида ўқиш тегишли йўналишлар бўйича Институт томонидан тасдиқланган ўқув режалари ва дастурларига мувофиқ ташкил этилади. Ўқув режалари ва дастурлари ҳар йили оила ва хотин-қизларга оид давлат сиёсатининг устувор йўналишлари асосида такомиллаштириб борилади.

9. Ўқув юкламасининг умумий ҳажми йўналиш блоклари бўйича малака ошириш талабларидан келиб чиққан ҳолда тақсимланади.

10. Малака ошириш ўқув курсларида ўқиш Қўмита ҳузуридаги Оила ва гендер илмий-тадқиқот институти (кейинги ўринларда — Институт) томонидан тасдиқланган 36 соатлик ўқув дастурлари бўйича бир ҳафта давомида ишдан ажралган ҳолда ташкил этилади.

11. Институт Қўмита, жойлардаги давлат олий таълим ташкилотлари, Қорақалпоғистон Республикаси Оила ва хотин-қизлар қўмитаси, вилоятлар ва Тошкент шаҳри оила ва хотин-қизлар бошқармалари билан биргаликда ҳар йили апрель ойида малака ошириш ўқув курсларида ўқишнинг белгиланган даврийлигига мувофиқ ўқитиш йўналишлари бўйича малака ошириш курслари тингловчилари таркиби ва режа-жадвални шакллантиради ҳамда тасдиқлайди.

12. Малака ошириш ўқув курслари тингловчилари тасдиқланган режа-жадвал асосида тегишлича Қорақалпоғистон Республикаси Оила ва хотин-қизлар қўмитаси раисининг, вилоятлар ва Тошкент шаҳри оила ва хотин-қизлар бошқармаси бошлиғининг буйруғи билан қабул қилинади.

13. Тасдиқланган режа-жадвалга киритилган ва малака ошириш ўқув курсларига ўқишга йўлланган тингловчиларнинг асосий иш жойи бўйича ўртача ойлик иш ҳақи ўқиш даврида сақланиб қолади.

14. Малака ошириш ўқув курсларига йўлланган тингловчиларга таълим олиш жойига бир марта бориб келиш харажатлари уларни юбораётган томон ҳисобидан белгиланган тартибда қопланади.

15. Маҳаллалардаги хотин-қизлар фаолларининг малака ошириш ўқув курсларида иштирок этишини таъминлашга Қорақалпоғистон Республикаси Оила ва хотин-қизлар қўмитаси раиси, вилоятлар ва Тошкент шаҳри оила ва хотин-қизлар бошқармалари бошлиқлари масъул ҳисобланади.

4-боб. Малака ошириш ўқув курсларини ташкил этишда манфаатдор ташкилотларнинг вазифалари

16. Институт:

ҳар йили март ойига қадар малака ошириш ўқув курслари тингловчилари учун ўқув режаси, дастурлари ва материалларни тайёрлайди, мунтазам янгилаб боради, илмий-услубий кўмаклашади ва ўқув-методик раҳбарлик қилади;

малака ошириш ўқув курсларини таъминловчи ягона электрон тизим (платформа) ишлаб чиқади ва уни доимий ўқув материаллари билан таъминлаб боради;

малака ошириш тизимига ўқитишнинг замонавий шакл ва методларини, илғор педагогик технологияларини жорий этади;

Қўмита, Ўзбекистон Республикаси Соғлиқни сақлаш вазирлиги, Камбағалликни қисқартириш ва бандлик вазирлиги, Олий таълим, фан ва инновациялар вазирлиги, Ўзбекистон маҳаллалари уюшмаси билан биргаликда малака ошириш бўйича ўқув режалари ва дастурларини ишлаб чиқади ва тасдиқлайди ҳамда уларнинг доимий янгиланишини таъминлайди;

малака ошириш тизимини такомиллаштириш механизмлари ва усулларини белгилайди;

малака ошириш тизимига ўқитишнинг замонавий шакл ва методларини, илғор педагогика, ахборот-коммуникация ва инновация технологияларини жорий этади;

малака ошириш ўқув курси тингловчиларига зарур методик ёрдам бериш, модулларни ўзлаштириш, машғулотларни бажариш юзасидан назоратни амалга оширади;

малака ошириш ўқув курсларида таълим олиш ва ўқитиш жараёни мониторингини юритади ва натижаларини Қўмитага тақдим этади;

малака ошириш ўқув курслари учун тайёрланган ўқув материалларини электрон тизимга жойлаштириш, мавжуд контентни янгилаб бориш, малака ошириш ўқув курсининг фаолиятини сифатли ташкил этиш чораларини кўради;

малака ошириш ўқув курсларининг техник таъминотини амалга оширади.

17. Ўзбекистон Республикаси Олий таълим, фан ва инновациялар вазирлиги:

малака ошириш ўқув курслари ўқув режалари ва дастурларини ишлаб чиқишга кўмаклашади;

малака ошириш ўқув курсларида ўқув машғулотларини ўтказиш учун олий таълим ташкилотларининг юқори малакали профессор-ўқитувчиларини жалб этишда амалий ёрдам кўрсатади.

18. Тингловчилар ҳар бир модул якунида оралиқ тестлар ва умумий малака ошириш курси охирида якуний тест топширади. Тестдан камида 56 фоиз ўзлаштириш кўрсаткичини қайд этган тингловчилар курсдан муваффақиятли ўтган деб ҳисобланади.

19. Малака ошириш ўқув курсини муваффақиятли якунлай олмаган тингловчиларга сертификат берилмайди ҳамда улар бир йил муддатда белгиланган тартибда қайта малака оширишдан ўтади.

5-боб. Ўқув жараёнини ташкил этиш ва тингловчиларнинг билимларини баҳолаш

20. Малака ошириш ўқув курслари тегишли йўналишлар бўйича малака талаблари, ўқув режалари ва дастурларини ҳисобга олган ҳолда, курслар фаолиятини ва ресурс таъминотини бюджетдан ташқари молиялаштириш асосида тингловчиларни ўқитиш учун моддий-техник база, профессор-ўқитувчилар таркиби мавжуд бўлган ҳолда ташкил этилади.

Мутахассислар ва профессор-ўқитувчилар шартнома асосида жалб этилади.

21. Малака ошириш курслари маъруза, интерактив семинар, амалий машғулот, сайёр машғулот, тажриба алмашиш, мустақил ўқиш, онлайн ва оффлайн машғулотлар шаклида ташкил этилади.

Тегишли ахборот-методик ва ташкилий-техник база мавжуд бўлган тақдирда, малака ошириш ўқув курслари масофадан ўқитиш усуллари қўлланган ҳолда ташкил этилиши мумкин.

22. Малака ошириш ўқув курсларидаги ўқув жараёни гуруҳларнинг тўлдирилишига боғлиқ ҳолда тингловчилар сони, қоида тариқасида, камида 30 нафардан иборат гуруҳларда ташкил этилади.

23. Малака ошириш жараёнида гуруҳдаги тингловчиларнинг сони 50 нафардан ошмаслиги лозим.

24. Малака ошириш ўқув курсларида машғулотлар ўтказишга шартнома асосида юқори малакали кадрлар, хорижий мутахассислар, ходимлар ва амалиётчи мутахассислар жалб этилиши мумкин.

25. Малака ошириш ўқув курслари тингловчиларини баҳолашни ташкил этиш ва ўтказиш учун Қўмита марказий аппарати, Қорақалпоғистон Республикаси Оила ва хотин-қизлар қўмитаси, вилоятлар ва Тошкент шаҳри оила ва хотин-қизлар бошқармалари томонидан тегишли соҳаларнинг илғор мутахассислари орасидан камида 3 — 5 кишидан иборат таркибда комиссия шакллантирилади.

26. Малака ошириш ўқув дастурлари талабларини муваффақиятли бажарган тингловчиларга ушбу Низомга иловага мувофиқ сертификат берилади.

6-боб. Якунловчи қоидалар

27. Тингловчилар малака ошириш ўқув курсларини ташкил қилиш ва ўтказиш жараёнлари бўйича малака ошириш ўқув курслари учун масъул ташкилотнинг хатти-ҳаракатлари (ҳаракатсизлиги) юзасидан қонунчилик ҳужжатларида белгиланган тартибда шикоят қилишлари мумкин.

28. Малака ошириш ўқув курсларини ташкил этиш ва ўтказиш билан боғлиқ харажатлар, шу жумладан, ўқув машғулотларини ўтказишга жалб этиладиган мутахассислар меҳнатига ҳақ тўлаш, малака ошириш ўқув курсларини таъминловчи ягона электрон тизимини техник қўллаб-қувватлаш, курслар тингловчилари учун ўқув, тарқатма материаллар ва канцелярия анжомларини харид қилиш харажатлари қонунчилик ҳужжатларида тақиқланмаган манбалар ҳисобидан молиялаштирилади.

Оила институтини мустаҳкамлаш, хотин-қизлар ва гендер тенглигини таъминлаш йўналишида кадрларнинг малакасини ошириш бўйича ўқув курсларини ташкил этиш тартиби тўғрисидаги низомга ИЛОВА

Oʻzbekiston Respublikasi Davlat gerbi tasviri Oila institutini mustahkamlash, xotin-qizlar va gender tengligini taʼminlash yoʻnalishida m alaka oshirganlik haqida SERTIFIKAT MO № 000000 __________________________________________________________________ (mutaxassisning familiyasi, ismi, otasining ismi) 20___-yil ______________dan 20___-yil ______________gacha _______________________________________________________________da (malaka oshirish muassasasining nomi) jami _____________________________________________________ soatli ____________________________________________________________________ (malaka oshirish kursining nomi) boʻyicha malakasini oshirdi. Oʻzbekiston Respublikasi Oila va xotin-qizlar qoʻmitasi raisining QR-kod li imzosi Sana ________________

Оила институтини мустаҳкамлаш, хотин-қизлар ва гендер тенглигини таъминлаш йўналишида малака оширганлик ҳақида

(тавсифи)

Малака оширганлик ҳақида давлат намунасидаги сертификат А4 форматли оқ қоғоздаги варақда офсет усулида беш хил рангдан фойдаланган ҳолда: матн учун — қора рангда, расмлар тасвири учун — яшил, кўк, қизил рангларда, фон учун — оч кул рангда босиб чиқарилади.

Варақнинг чап қисмида четидан 10 мм чекинган ҳолда эни 32 мм бўлган Ўзбекистон Республикаси Давлат байроғи тасвирланган тасма жойлаштирилади. Тасманинг юқори қисмида диаметри 30 мм бўлган Ўзбекистон Республикаси Давлат герби тасвири, паст қисмида эса — 35 мм ўлчамли иккита квадрат қўшилишидан ҳосил бўлган саккиз қиррали юлдуз, юлдузнинг ўртасида муҳр учун 25 мм диаметрли оқ айлана жойлашган.

Варақнинг юқори қисми марказида лотин ёзуви билан давлат тилида «Oila institutini mustahkamlash, xotin-qizlar va gender tengligini taʼminlash yoʻnalishida malaka oshirganlik haqida SERTIFIKAT» сўзлари босилади. Сертификат икки лотин ҳарфи — «MO» ва олти рақамли сондан иборат тартиб рақами билан таъминланган. Барча матн нақшли растрдан иборат оч кул ранг фонда босиб чиқарилади.

Сертификат:

босиб чиқаришнинг икки усули — рақамли ва юқори усули;

ёруғлик воситасида нусха кўчиришни қийинлаштириш учун очиқ ранглар;

нақшли растр;

ҳар хил рангли растрлардан фойдаланиш йўли билан турли рангларни ташкил этиш;

махсус қоғозлар;

ўзгарадиган рақамлардан иборат тартиб рақами қўлланган ҳолда олтита ҳимояга эга.

Вазирлар Маҳкамасининг 2025 йил 9 декабрдаги 774-сон қарорига 4-ИЛОВА

Ўзбекистон Республикаси Ҳукуматининг айрим қарорларига киритилаётган ўзгартиришлар

1. Вазирлар Маҳкамасининг 2019 йил 31 декабрдаги 1059-сон қарори билан тасдиқланган Узлуксиз маънавий тарбия концепциясини амалга ошириш чора-тадбирлари режасининг «Ижро учун масъуллар» устунида:

3-позициядаги «Оила ва хотин-қизлар давлат қўмитаси» сўзлари «Оила ва хотин-қизлар қўмитаси» сўзлари билан алмаштирилсин;

4, 9, 50, 51 ва 52-позициялардаги «Оила ва хотин-қизлар давлат қўмитаси» ва «Оила ва хотин-қизлар» илмий-тадқиқот институти» сўзлари тегишлича «Оила ва хотин-қизлар қўмитаси» ва «Оила ва гендер илмий-тадқиқот институти» сўзлари билан алмаштирилсин;

10-позициядаги «Оила ва хотин-қизлар» илмий-тадқиқот институти» сўзлари «Оила ва гендер илмий-тадқиқот институти» сўзлари билан алмаштирилсин.

2. Вазирлар Маҳкамасининг 2021 йил 18 июндаги 380-сон қарори билан тасдиқланган Фуқаролар йиғини ҳузуридаги жамоатчилик тузилмалари тўғрисидаги намунавий низомнинг 8-банди еттинчи хатбошисидаги ва 28-бандидаги «Оила ва хотин-қизлар» илмий-тадқиқот институти» сўзлари «Оила ва гендер илмий-тадқиқот институти» сўзлари билан алмаштирилсин.

3. Вазирлар Маҳкамасининг 2021 йил 6 октябрдаги 625-сон қарори билан тасдиқланган Хотин-қизлар ўртасида ўз жонига қасд қилишнинг олдини олиш бўйича чора-тадбирлар дастурининг «Масъул ижрочилар» устунида:

4-позициядаги «Оила ва хотин-қизлар давлат қўмитаси» ва «Оила ва хотин-қизлар» илмий-тадқиқот институти» сўзлари тегишлича «Оила ва хотин-қизлар қўмитаси» ва «Оила ва гендер илмий-тадқиқот институти» сўзлари билан алмаштирилсин;

12, 16 ва 18-позициялардаги «Оила ва хотин-қизлар давлат қўмитаси» сўзлари «Оила ва хотин-қизлар қўмитаси» сўзлари билан алмаштирилсин.

Вазирлар Маҳкамасининг 2025 йил 9 декабрдаги 774-сон қарорига 5-ИЛОВА

Ўзбекистон Республикаси Ҳукуматининг ўз кучини йўқотган деб ҳисобланаётган баъзи қарорлари

1. Вазирлар Маҳкамасининг «Ўзбекистон Республикаси Маҳалла ва оилани қўллаб-қувватлаш вазирлиги ҳузуридаги «Маҳалла ва оила» илмий-тадқиқот институти фаолиятини ташкил этиш тўғрисида» 2020 йил 10 июндаги 367-сон қарори .

2. Вазирлар Маҳкамасининг «Ўзбекистон Республикаси Ҳукуматининг айрим қарорларига ўзгартириш ва қўшимчалар киритиш тўғрисида (Ўзбекистон Республикаси Президентининг «Зўрлик ишлатишдан жабр кўрган хотин-қизларни реабилитация қилишга оид қўшимча чора-тадбирлар тўғрисида» 2021 йил 19 майдаги ПҚ-5116-сон қарори)» 2021 йил 6 октябрдаги 624-сон қарорига илованинг 4-банди .

Ўзбекистон Республикасининг Бош вазири А. АРИПОВ

Тошкент ш.,

2025 йил 9 декабрь,

774-сон

(Қонунчилик маълумотлари миллий базаси, 11.12.2025 й., 09/25/774/1150-сон)

lex.uz

Oʻzbekiston Respublikasi Vazirlar Mahkamasining

qarori

TUZILMASI

USTAVI

NIZOM

SERTIFIKAT

ROʻYXATI

Oʻzbekiston Respublikasi Oila va xotin-qizlar qoʻmitasi huzuridagi Oila va gender ilmiy-tadqiqot instituti faoliyatini tashkil etish toʻgʻrisida

Oʻzbekiston Respublikasi Prezidentining “Oila va xotin-qizlar qoʻmitasining faoliyatini takomillashtirishga oid qoʻshimcha chora-tadbirlar toʻgʻrisida” 2023-yil 21-dekabrdagi PF-208-son Farmoni hamda “Oilalarni mustahkamlash va xotin-qizlarning faolligini oshirish boʻyicha qoʻshimcha chora-tadbirlar toʻgʻrisida” PQ-401-son qarori ijrosini taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining 2023-yil 21-dekabrdagi PF-208-son Farmoni bilan “Oila va xotin-qizlar” ilmiy-tadqiqot instituti negizida Oila va gender ilmiy-tadqiqot instituti (keyingi oʻrinlarda — Institut) tashkil etilgani va Institut Oʻzbekiston Respublikasi Oila va xotin-qizlar qoʻmitasi (keyingi oʻrinlarda — Qoʻmita) tuzilmasiga oʻtkazilgani maʼlumot uchun qabul qilinsin.

2. Quyidagilar:

Oʻzbekiston Respublikasi Oila va xotin-qizlar qoʻmitasi huzuridagi Oila va gender ilmiy-tadqiqot institutining tuzilmasi 1-ilovaga muvofiq;

Oʻzbekiston Respublikasi Oila va xotin-qizlar qoʻmitasi huzuridagi Oila va gender ilmiy-tadqiqot institutining ustavi 2-ilovaga muvofiq;

Oila institutini mustahkamlash, xotin-qizlar va gender tenglikni taʼminlash yoʻnalishida kadrlarning malakasini oshirish boʻyicha oʻquv kurslarini tashkil etish tartibi toʻgʻrisidagi nizom 3-ilovaga muvofiq tasdiqlansin.

3. Belgilansinki:

Institut oila institutini mustahkamlash va xotin-qizlarni qoʻllab-quvvatlash ishlari hamda gender tenglikni taʼminlash boʻyicha ilmiy-uslubiy va axborot-tahliliy faoliyatni amalga oshiruvchi ixtisoslashtirilgan davlat ilmiy-tadqiqot muassasasi hisoblanadi;

Institut direktori Oʻzbekiston Respublikasi Bosh vaziri oʻrinbosari — Oila va xotin-qizlar qoʻmitasi raisining tavsiyasiga asosan Vazirlar Mahkamasi tomonidan lavozimga tayinlanadi va lavozimidan ozod etiladi;

Institut direktori oʻrinbosarlari Institut direktorining tavsiyasiga asosan Oʻzbekiston Respublikasi Bosh vaziri oʻrinbosari — Oila va xotin-qizlar qoʻmitasi raisi tomonidan lavozimga tayinlanadi va lavozimidan ozod etiladi;

Institut xodimlariga Fanlar akademiyasi ilmiy-tadqiqot muassasalarining tegishli lavozimlari uchun belgilangan mehnatga haq toʻlash shartlari tatbiq etiladi;

Institut “Oila va xotin-qizlar” ilmiy-tadqiqot institutining huquqlari va majburiyatlari, shuningdek, tuzilgan shartnomalari boʻyicha huquqiy vorisi hisoblanadi.

4. Institut faoliyatini moliyalashtirish manbalari etib quyidagilar belgilansin:

Oʻzbekiston Respublikasining respublika budjeti mablagʻlari (xodimlar mehnatiga haq toʻlash, bino va inshootlarni saqlash xarajatlarini moliyalashtirish hamda ilmiy faoliyatga oid davlat dasturlarini amalga oshirish uchun);

Oliy taʼlim, fan va innovatsiyalar vazirligi huzuridagi Innovatsion rivojlanish agentligi tomonidan oʻtkaziladigan tanlovlar natijalari boʻyicha Oʻzbekiston Respublikasi Davlat budjetidan ilmiy faoliyatga oid dasturlarni amalga oshirish uchun ajratilgan mablagʻlar;

Qoʻmitaning budjetdan tashqari mablagʻlari;

xalqaro moliya institutlari va boshqa xorijiy tashkilotlarning grantlari;

respublika ilmiy-tadqiqot loyihalari grantlari;

shartnoma asosida tadqiqotlar oʻtkazishdan tushadigan tushumlar;

qonunchilik hujjatlari bilan taqiqlanmagan boshqa manbalar.

5. Institutga Toshkent shahri Chilonzor tumani Chilonzor koʻchasi 25-uy manzilidagi bino operativ boshqarish huquqi asosida berilsin.

6. Belgilab qoʻyilsinki:

Institutni saqlash xarajatlari 2025-yilda Oʻzbekiston Respublikasining respublika budjetidan birinchi darajali budjet mablagʻlarini taqsimlovchi sifatida Qoʻmitaga yoʻnaltiriladigan mablagʻlar doirasida budjet mablagʻlari hisobidan moliyalashtiriladi, 2026-yildan boshlab esa Oʻzbekiston Respublikasi Davlat budjeti parametrlarida nazarda tutiladi;

Institutga yuklatilgan asosiy vazifalarni amalga oshirish bilan bogʻliq xarajatlar, shuningdek, Institutning moddiy-texnik bazasini mustahkamlash, tizimda faoliyat yuritayotgan xodimlarni moddiy qoʻllab-quvvatlash hamda Institutda bajariladigan ilmiy loyihalar uchun xarajatlar Qoʻmita tomonidan Institutning budjetdan tashqari shaxsiy gʻazna hisobvaraqlariga ajratilgan mablagʻlar hisobidan amalga oshiriladi.

7. Institutga 3 ta, jumladan, 2 ta shaxsiy biriktirilgan va 1 ta navbatchi yengil avtotransport vositalarini saqlash uchun limit ajratilsin.

8. Oʻzbekiston Respublikasi Hukumatining 4-ilovaga muvofiq ayrim qarorlariga oʻzgartirishlar kiritilsin.

9. Oʻzbekiston Respublikasi Hukumatining 5-ilovaga muvofiq baʼzi qarorlari oʻz kuchini yoʻqotgan deb hisoblansin.

10. Qoʻmita manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtirsin.

11. Mazkur qarorning bajarilishini nazorat qilish Oʻzbekiston Respublikasi Bosh vaziri oʻrinbosari — Oila va xotin-qizlar qoʻmitasi raisi Z.B. Maxkamova zimmasiga yuklansin.

Vazirlar Mahkamasining 2025-yil 9-dekabrdagi 774-son qaroriga 1-ILOVA

Oʻzbekiston Respublikasi Oila va xotin-qizlar qoʻmitasi huzuridagi Oila va gender ilmiy-tadqiqot institutining

Ilmiy kengash Ilmiy kotib 1 Direktor Gender strategiya va baholash boʻlimi 3 Direktorning ilmiy ishlar boʻyicha oʻrinbosari Direktorning tashkiliy ishlar boʻyicha oʻrinbosari Kadrlar bilan ishlash boʻyicha bosh mutaxassis 1 Oila psixologiyasi va sotsiologiyasi boʻlimi 2 Tizim xodimlarining malakasini oshirishni tashkil etish va monitoring qilish boʻlimi 4 Bosh yuriskonsult 1 Oila demografiyasi va xotin-qizlarning iqtisodiy holati tahlili boʻlimi 3 Buxgalteriya 1 Xalqaro aloqalar boʻyicha bosh mutaxassis 1 Gender tengligi, xotin-qizlar va oila huquqi boʻlimi 3 Matbuot kotibi 1 “Oila, gender va ijtimoiy hayot” elektron ilmiy jurnali tahririyati * Oilaviy qadriyatlarni mustahkamlash boʻlimi 3 Devonxona 1 Ilmiy va innovatsion faoliyatni rivojlantirish boʻlimi 2 Xoʻjalik boʻlimi 1 Oila demografiyasi laboratoriyasi * Tahririy-noshirlik va axborot texnologiyalarini rivojlantirish boʻlimi 3 Gender tadqiqotlar laboratoriyasi *

Vazirlar Mahkamasining 2025-yil 9-dekabrdagi 774-son qaroriga 2-ILOVA

Oʻzbekiston Respublikasi Oila va xotin-qizlar qoʻmitasi huzuridagi Oila va gender ilmiy-tadqiqot institutining

1-bob. Umumiy qoidalar

1. Ushbu Ustav Oʻzbekiston Respublikasi Oila va xotin-qizlar qoʻmitasi huzuridagi Oila va gender ilmiy-tadqiqot instituti (keyingi oʻrinlarda — Institut)ning asosiy vazifalari va funksiyalari, huquqlari, javobgarligi, faoliyatini tashkil etish tartibini belgilaydi.

2. Institut oila institutini mustahkamlash va xotin-qizlarni qoʻllab-quvvatlash ishlari va gender tenglikni taʼminlash boʻyicha ilmiy-uslubiy va axborot-tahliliy faoliyatni amalga oshiruvchi ixtisoslashtirilgan davlat ilmiy-tadqiqot muassasasi hisoblanadi.

3. Institut oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlari va farmoyishlariga, Oʻzbekiston Respublikasi Oila va xotin-qizlar qoʻmitasi (keyingi oʻrinlarda — Qoʻmita)ning qarorlari va buyruqlariga, ushbu Ustavga va boshqa qonunchilik hujjatlariga amal qiladi.

4. Institut oʻz faoliyatini respublika va mahalliy ijro etuvchi hokimiyat organlari, xoʻjalik birlashmalari va boshqa tashkilotlar bilan oʻzaro hamkorlikda amalga oshiradi.

5. Institutning rasmiy nomi:

a) davlat tilida:

toʻliq nomi — Oʻzbekiston Respublikasi Oila va xotin-qizlar qoʻmitasi huzuridagi Oila va gender ilmiy-tadqiqot instituti, qisqartirilgan nomi — Oila va gender instituti;

b) rus tilida:

toʻliq nomi — Nauchno-issledovatelskiy institut semi i gendera pri Komitete semi i jenshin Respubliki Uzbekistan, qisqartirilgan nomi — Institut semi i gendera;

v) ingliz tilida:

toʻliq nomi — Scientific Research Institute Family and gender under the Committee on Family and Women of the Republic of Uzbekistan, qisqartirilgan nomi — Institute Family and gender.

6. Institutning joylashgan yeri (pochta manzili): Toshkent shahri, Chilonzor tumani Chilonzor koʻchasi 25-uy, 100115.

2-bob. Institutning tuzilmasi

7. Institut tizimiga quyidagilar kiradi:

Institut apparati;

“Oila, gender va ijtimoiy hayot” elektron ilmiy jurnali;

Oila demografiyasi laboratoriyasi;

Gender tadqiqotlar laboratoriyasi.

3-bob. Institutning asosiy vazifalari va funksiyalari

8. Quyidagilar Institutning asosiy vazifalari hisoblanadi:

Qoʻmita tizimi xodimlari, shuningdek, mahallalardagi xotin-qizlar faollarining malakasini oshirish, ularning faoliyatini uslubiy qoʻllab-quvvatlash;

oila, xotin-qizlar va gender tenglik masalalariga oid muammolarni chuqur tahlil qilish, natijalari boʻyicha muammolar yechimi yuzasidan davlat organlari va tashkilotlari uchun tavsiyalar ishlab chiqish va kiritish;

oila, xotin-qizlar va gender tenglik masalalari boʻyicha aholi oʻrtasida oʻtkaziladigan targʻibot ishlari uchun uslubiy qoʻllanmalar va targʻibot materiallarini tayyorlash;

oila, xotin-qizlar va gender tenglik masalalari boʻyicha fanlararo fundamental, ilmiy-amaliy tadqiqotlar, sotsiologik soʻrov, ilmiy konferensiyalar oʻtkazish, innovatsion loyihalarni amalga oshirish;

olimlar va ilmiy salohiyatli kadrlarni tayyorlash, oila, xotin-qizlar va gender tenglik masalalarida ilmiy tadqiqot oʻtkazayotgan izlanuvchilarni qoʻllab-quvvatlash hamda ularning ishlanmalari amaliyotga joriy etilishiga koʻmaklashish;

oila, xotin-qizlar va gender tenglik masalalariga oid xalqaro indeks va reytinglarda Oʻzbekiston oʻrnini yaxshilash boʻyicha ilmiy asoslangan takliflarni ishlab chiqish va tegishliligi boʻyicha vazirlik va idoralarga kiritib borish.

9. Institut oʻziga yuklangan asosiy vazifalarga muvofiq quyidagi funksiyalarni amalga oshiradi:

a) Qoʻmita tizimi xodimlari, shuningdek, mahallalardagi xotin-qizlar faollarining malakasini oshirish, ularning faoliyatini uslubiy qoʻllab-quvvatlash sohasida:

Qoʻmita, uning hududiy boʻlinmalari va mahallalardagi xotin-qizlar faollari uchun ularning vazifa va funksiyalaridan kelib chiqqan holda, malaka oshirish kurslarini tashkil etadi;

malaka oshirish kurslari oʻquv rejasi, oʻquv-metodik dasturlar va materiallarni tayyorlaydi, muntazam yangilab boradi, ilmiy-uslubiy jihatdan koʻmaklashadi va oʻquv-metodik rahbarlikni amalga oshiradi hamda malaka oshirish tizimiga oʻqitishning zamonaviy shakl va metodlarini, ilgʻor pedagogik texnologiyalarini joriy etadi;

oʻquv dasturi asosida oʻqitilgan tinglovchilarni baholaydi va malaka sertifikatini taqdim etadi;

malaka oshirish kurslarida taʼlim olish va oʻqitish jarayoni monitoringini yuritadi hamda natijalarini Qoʻmitaga taqdim etadi;

Qoʻmita, uning hududiy boʻlinmalari va mahallalardagi xotin-qizlar faollari ishini samarali tashkil etish boʻyicha uslubiy qoʻllanmalar va tavsiyalar ishlab chiqadi;

joylarda xotin-qizlarning muammolarini oʻz vaqtida aniqlaydi hamda bartaraf etadi, ogʻir ijtimoiy ahvolga tushib qolgan nogironligi boʻlgan xotin-qizlar bilan manzilli ishlarni olib boradi;

Qoʻmita quyi tuzilmalarining faoliyatini namunali yoʻlga qoʻyish boʻyicha oʻrganishlar olib boradi hamda ijobiy tajribalarni boshqa hududlarda (tuman (shahar) va mahallalarda) qoʻllash amaliyotini joriy etishga koʻmaklashadi;

xotin-qizlar bilan samarali ishlash sohasida kadrlar malakasini oshirish bilan shugʻullanuvchi xorijiy taʼlim muassasalari va ilmiy-tadqiqot markazlari bilan hamkorlikni yoʻlga qoʻyadi;

b) oila, xotin-qizlar va gender tenglik masalalariga oid muammolarni chuqur tahlil qilish, natijalari boʻyicha muammolar yechimi yuzasidan davlat organlari va tashkilotlari uchun tavsiyalar ishlab chiqish va kiritish sohasida:

doimiy ravishda hududlar kesimida oila, xotin-qizlar hamda gender tenglik masalalariga oid muammolarni har taraflama chuqur tahlil qiladi va “mahalla — tuman (shahar) — viloyat — respublika” tamoyili asosida muammolarni bartaraf etish yuzasidan amaliy takliflar va tavsiyalar ishlab chiqadi, ularning amaliyotga tatbiq etilishida koʻmaklashadi;

oilaning jamiyatdagi oʻrnini oshirishga qaratilgan hamda gender tenglik, xotin-qizlarni qoʻllab-quvvatlashga doir davlat siyosatining ustuvor yoʻnalishlarini shakllantirishga, oila institutining barqarorligini taʼminlashga oid tahliliy materiallar tayyorlaydi hamda ilmiy asoslangan takliflarni ishlab chiqadi;

oilalardagi ijtimoiy muammolarning gender jihatlari, oilaviy nizolarning oldini olish, sogʻlom muhitni saqlab qolish, ogʻir ijtimoiy vaziyatga tushib qolgan oilalar bilan ishlash, xotin-qizlarning huquq va manfaatlarini himoya qilishga qaratilgan takliflar va metodik tavsiyalar ishlab chiqadi;

oila institutida kutilayotgan oʻzgarishlar tahlili va prognozlarini ishlab chiqadi, ijtimoiy-demografik rivojlanish va oila farovonligining oʻsish darajasini oʻrganadi, tahlil qiladi hamda konseptual yoʻnalishlar boʻyicha ilmiy asoslangan takliflar va materiallar tayyorlaydi;

oila, xotin-qizlar va gender tenglik masalalariga oid normativ-huquqiy bazani takomillashtirish boʻyicha takliflar ishlab chiqadi va belgilangan tartibda vazirlik va idoralarga kiritib boradi;

oila, xotin-qizlar va gender tenglik masalalariga oid muammolarni chuqur tahlil qilish natijasida tayyorlangan maʼlumot hamda takliflarni davlat organlari va tashkilotlarga kiritadi;

oila, xotin-qizlar va gender tenglik masalalari boʻyicha ilgʻor xalqaro tajribani oʻrganadi va tahlil qiladi hamda oʻrganishlar asosida takliflar ishlab chiqadi, amaliyotga joriy qilish boʻyicha xulosalarni Qoʻmitaga taqdim etadi;

xorijiy hamda xalqaro tashkilotlardan qonunchilik hujjatlarida belgilangan tartibda grantlar oladi, taqdim etilgan grantlar hisobidan ilmiy tadqiqotlar oʻtkazadi, shuningdek, xorijiy mutaxassislarni jalb etgan holda mahorat darslarini tashkil etadi;

oila, xotin-qizlar va gender tenglikni taʼminlash masalalari yuzasidan xulosalar, axborot-tahliliy materiallar va takliflar tayyorlash uchun zarur boʻlganda, respublika va xorijiy davlatlarning olimlari, mutaxassislaridan iborat, shu jumladan, shartnoma asosida ishchi guruhlarni tashkil etadi;

v) oila, xotin-qizlar va gender tenglik masalalari boʻyicha aholi oʻrtasida oʻtkaziladigan targʻibot ishlari uchun uslubiy qoʻllanmalar va targʻibot materiallarini tayyorlash sohasida:

oila mustahkamligi, sogʻlom turmush tarzi, oilaning farzand tarbiyasidagi masʼuliyati, gender tenglik, xotin-qizlarni tazyiq va zoʻravonliklardan himoya qilish masalalariga qaratilgan turli uslubiy qoʻllanmalar tayyorlaydi, chop etadi hamda targʻibot loyihalarini ishlab chiqadi va amalga oshiradi;

oila institutini mustahkamlash, gender tenglikni taʼminlash va xotin-qizlarni qoʻllab-quvvatlash hamda ularning ijtimoiy-siyosiy, iqtisodiy faolligini oshirish bilan bogʻliq yoʻnalishlarda mutaxassislar tayyorlovchi taʼlim muassasalari uchun ilmiy, oʻquv-metodik adabiyotlarning yangi avlodini nashr etishga tayyorlashda ishtirok etadi;

oʻz faoliyati, shu jumladan, amalga oshirilgan ilmiy-tadqiqot ishlari natijalari toʻgʻrisidagi materiallarni ommaviy axborot vositalarida keng yoritib boradi hamda ushbu maqsadda rasmiy veb-saytlar, ijtimoiy tarmoqlarda sahifalar yaratadi;

aholining oila institutini mustahkamlash, gender tenglikni taʼminlash va xotin-qizlarni qoʻllab-quvvatlashdagi daxldorlik hissini hamda fuqarolik masʼuliyatini oshirish boʻyicha ommaviy axborot vositalarida, shu jumladan, ijtimoiy tarmoqlarda tashviqot ishlarini tashkil etadi;

g) oila, xotin-qizlar va gender tenglik masalalari boʻyicha fanlararo fundamental, ilmiy-amaliy tadqiqotlar, sotsiologik soʻrov, ilmiy konferensiyalar oʻtkazish, innovatsion loyihalarni amalga oshirish sohasida:

tadqiqotchilar tomonidan Qoʻmita faoliyati yoʻnalishlariga mos keladigan ilmiy-tadqiqot ishlarini amaliyotga joriy qiladi;

himoya qilingan dissertatsiyalarning ilmiy yangiliklari va natijalarini Qoʻmita orqali amaliyotga tatbiq etishni taʼminlaydi, ilmiy tadqiqotlarning aholi manfaatlariga xizmat qilish samaradorligini monitoring qilib boradi;

ilmiy tadqiqotlardan olingan natijalardan hududlarning muammolari yechimlari yuzasidan ishlanmalar, mahallalardagi xotin-qizlar faollari tizimda qoʻllashi uchun sodda, xalqona tilda, kichik hajmdagi qoʻllanmalar ishlab chiqib, Qoʻmitaga taqdim etib boradi;

institutning asosiy vazifa va funksiyalari bilan bogʻliq yoʻnalishlarda ilmiy konferensiyalar, seminarlar, hamkorlikdagi tadqiqotlar, loyihalar, xodimlarning tajriba almashishi va ularni oʻqitish boʻyicha xorijiy ilmiy-tadqiqot muassasalari, institutlar va markazlar bilan hamkorlik qiladi;

xotin-qizlar va erkaklar uchun teng huquq hamda imkoniyatlar kafolatlarini taʼminlash borasidagi ustuvor vazifalar bilan bogʻliq mavzular boʻyicha ilmiy-amaliy konferensiyalar oʻtkazadi;

oilalarni mustahkamlash, xotin-qizlarni qoʻllab-quvvatlash, ularning bandligini taʼminlash, tadbirkorlikni rivojlantirish, aholi salomatligini saqlash kabi yoʻnalishlarga bagʻishlangan ilmiy-amaliy konferensiya va seminarlar tashkil etadi;

oliy taʼlim tashkilotlari, ilmiy-tadqiqot muassasalari, xoʻjalik birlashmalari va boshqa manfaatdor tashkilotlar, shuningdek, nodavlat notijorat tashkilotlari bilan oila, xotin-qizlar va gender tenglik sohasida innovatsiyalarni joriy etishga yoʻnaltirilgan chora-tadbirlarni hamkorlikda amalga oshiradi;

fundamental, ilmiy-amaliy tadqiqotlarni amalga oshirish jarayonida ijtimoiy hayotdagi haqiqiy muammolarni aniqlaydi va ularning yechimi boʻyicha takliflarni tayyorlaydi;

d) olimlar va ilmiy salohiyatli kadrlarni tayyorlash, oila, xotin-qizlar va gender tenglik masalalarida ilmiy tadqiqot oʻtkazayotgan izlanuvchilarni qoʻllab-quvvatlash hamda ularning ishlanmalari amaliyotga joriy etilishiga koʻmaklashish sohasida:

oila institutini mustahkamlash, gender tenglikni taʼminlash va xotin-qizlarni qoʻllab-quvvatlash hamda ularning ijtimoiy-siyosiy va iqtisodiy faolligini oshirish bilan bogʻliq yoʻnalishlarda ilmiy kadrlar tayyorlaydi, ilmiy xodimlarning kasbiy darajasini doimiy oshirib borish tizimini joriy etadi;

oila institutini mustahkamlash, gender tenglikni taʼminlash va xotin-qizlarni qoʻllab-quvvatlash hamda ularning ijtimoiy-siyosiy va iqtisodiy faolligini oshirish masalalari boʻyicha yozgi va qishki maktablar, ilmiy maʼruzalar va munozaralar maydonchalarini tashkil etadi;

oila, xotin-qizlar va gender tenglik muammolarini tadqiq etish boʻyicha tadqiqotchi va izlanuvchilarni qoʻllab-quvvatlaydi hamda ularning tadqiqot natijalari amaliyotga joriy etilishiga koʻmaklashadi;

e) oila, xotin-qizlar va gender tenglik masalalariga oid xalqaro indeks va reytinglarda Oʻzbekiston oʻrnini yaxshilash boʻyicha ilmiy asoslangan takliflarni ishlab chiqish va tegishliligi boʻyicha vazirlik va idoralarga kiritib borish sohasida:

oila, xotin-qizlar va gender tenglik masalalariga oid xalqaro reytinglarni tuzuvchilar, reyting agentliklari, shuningdek xalqaro reytinglarga aloqador boshqa xalqaro, ilmiy-tadqiqot, nodavlat tashkilotlar bilan hamkorlik oʻrnatadi;

oila, xotin-qizlar, gender tenglik, ayollar tadbirkorligi, xotin-qizlar va erkaklarga nisbatan tazyiq va zoʻravonlik holatlarini baholovchi xalqaro reyting va indekslarning indikatorlari, ularni aniqlash hamda baholash metodologiyasini oʻrganadi va tahlil qiladi;

xalqaro gender tenglikka oid reytinglarda yuqori ball toʻplagan va reytingi baland hisoblangan, ijobiy natijaga erishayotgan mamlakatlarning tajribasini oʻrganadi;

oila, xotin-qizlar, gender tenglik, ayollar tadbirkorligi, xotin-qizlar va erkaklarga nisbatan tazyiq va zoʻravonlik holatlarini baholovchi xalqaro reyting va indekslarning indikatorlarida Oʻzbekistonning oʻrni yaxshilanishiga toʻsqinlik qiluvchi omillar hamda muammolarni aniqlaydi;

jamiyat hayotining barcha sohalarida xotin-qizlar va erkaklarning holatini aks ettiradigan statistika axborotini toʻplash, unga ishlov berish, tahlil va eʼlon qilish hamda xalqaro tajriba va standartlarga muvofiq milliy gender koʻrsatkichlarini takomillashtirib borishga oid takliflar ishlab chiqadi;

tahlillar asosida Oʻzbekistonning ustuvor xalqaro gender indeks va reytinglardagi oʻrnini yaxshilash boʻyicha ilmiy asoslangan takliflar ishlab chiqadi hamda tegishliligi boʻyicha vazirlik va idoralarga Qoʻmita orqali oʻrnatilgan tartibda kiritib boradi, gender koʻrsatkichlar boʻyicha monitoring oʻtkazadi.

4-bob. Institutning huquqlari va javobgarligi

10. Institut oʻziga yuklangan asosiy vazifalar va funksiyalarni bajarishda quyidagi huquqlarga ega:

normativ-huquqiy hujjatlar loyihalarini, shuningdek, Institutga yuklangan vazifalar va funksiyalarni bajarish bilan bogʻliq boʻlgan boshqa hujjatlarni Qoʻmitaga kiritish;

Institutning vakolatiga kiradigan masalalar boʻyicha zarur maʼlumotlarni statistika organlari, soliq xizmati organlari hamda boshqa vazirliklar va idoralardan bepul olish;

Institutga yuklangan vazifalarni bajarish uchun davlat organlari, xoʻjalik birlashmalari va boshqa tashkilotlarning mutaxassislarini, shu jumladan, xorijiy mutaxassislarni shartnoma asosida jalb etish;

oila institutini mustahkamlash, gender tenglikni taʼminlash va xotin-qizlarni qoʻllab-quvvatlash hamda ularning ijtimoiy-siyosiy va iqtisodiy faolligini oshirish sohalarini takomillashtirish, amalga oshirilayotgan chora-tadbirlarning samaradorligini oshirish masalalari boʻyicha Qoʻmitaga takliflar kiritish;

oila institutini mustahkamlash, gender tenglikni taʼminlash va xotin-qizlarni qoʻllab-quvvatlash hamda ularning ijtimoiy-siyosiy va iqtisodiy faolligini oshirish sohalaridagi dolzarb hamda istiqbolli vazifalarni hal qilish uchun tashkil etilgan ishchi guruhlar yigʻilishlarida, ekspert kengashlari va komissiyalar ishida ishtirok etish;

Institutga yuklangan vazifalar bilan bogʻliq masalalar boʻyicha ilmiy-amaliy konferensiyalar, seminarlar, koʻrgazmalar, yarmarkalar oʻtkazish, shuningdek, xalqaro loyihalarni amalga oshirishda ishtirok etish;

oila institutini mustahkamlash, gender tenglikni taʼminlash va xotin-qizlarni qoʻllab-quvvatlash uchun ilmiy kengash tuzish;

Institut vakolatiga kiradigan masalalarni hal etish uchun shartnoma asosida mahalliy va xorijiy ilmiy muassasalar, olim va mutaxassislarni jalb qilish hamda xodimlar ishtirokida vaqtincha ijodiy guruhlarni tuzish;

Institut xodimlarini qonunchilik hujjatlarida belgilangan tartibda moddiy ragʻbatlantirish, Institutning moddiy-texnik bazasini mustahkamlash va ijtimoiy masalalarni hal qilish uchun daromad shaklida olingan mablagʻlarni jalb etish;

oʻz vakolati doirasida xalqaro va xorijiy tashkilotlar, ilmiy-tadqiqot institutlari bilan hamkorlik qilish;

belgilangan tartibda noshirlik faoliyatini amalga oshirish, oila, xotin-qizlar va gender tenglik bilan bogʻliq davriy ilmiy, uslubiy va amaliy nashrlar chiqarish hamda tarqatish.

Institut qonunchilik hujjatlariga muvofiq boshqa huquqlarga ham ega boʻlishi mumkin.

11. Institut:

ushbu Ustavda belgilangan asosiy vazifalar va funksiyalarning sifatli va oʻz vaqtida bajarilishini taʼminlash;

Qoʻmitaga har oyda kamida bir marta tahliliy materiallar va ilmiy asoslangan takliflarni taqdim etib borish;

oʻz faoliyati toʻgʻrisidagi axborot bilan tanishish erkinligini taʼminlash;

qonunchilik hujjatlarida belgilangan tartibda tegishli davlat organlariga hisobot berish uchun javobgar hisoblanadi.

5-bob. Institut faoliyatini tashkil etish

12. Institut oʻz faoliyatida bevosita Qoʻmitaga boʻysunadi va unga hisobot beradi.

13. Institutga Oʻzbekiston Respublikasi Bosh vaziri oʻrinbosari — Oila va xotin-qizlar qoʻmitasi raisining (keyingi oʻrinlarda — Qoʻmita raisi) tavsiyasiga koʻra Vazirlar Mahkamasi tomonidan lavozimga tayinlanadigan va lavozimidan ozod qilinadigan direktor rahbarlik qiladi.

14. Institut direktorining uning tavsiyasiga asosan Qoʻmita raisi tomonidan lavozimga tayinlanadigan va lavozimidan ozod etiladigan oʻrinbosarlari boʻladi.

Institut direktori boʻlmagan vaqtda, uning vakolatlarini vazifalar taqsimotiga muvofiq oʻrinbosarlari amalga oshiradi.

15. Institut direktori:

Institut faoliyatiga umumiy rahbarlik qiladi;

Qoʻmita raisi bilan kelishgan holda, boshqaruv xodimlarining umumiy cheklangan soni va mehnatga haq toʻlash fondi doirasida Institutning shtat jadvalini tasdiqlaydi;

Qoʻmita raisi bilan kelishgan holda, zarur nazariy bilim va amaliy koʻnikmalarga ega boʻlgan yuqori malakali xorijlik mutaxassislar bilan belgilangan tartibda mehnat shartnomalarini tuzadi va bekor qiladi;

Institut xodimlari bajarishi majburiy boʻlgan buyruq va yoʻriqnomalarni qabul qiladi;

Institut direktorining oʻrinbosarlari va boʻlim boshliqlarining hisobotlarini Ilmiy kengashda eshitadi;

Institut xodimlarini qonunchilik hujjatlariga muvofiq ragʻbatlantirish shakllarini, lavozim maoshlariga ustama va qoʻshimcha toʻlovlarni belgilaydi, xodimlarga moddiy yordam koʻrsatish boʻyicha buyruqlar chiqaradi, ularni intizomiy jazoga tortish masalalarini hal qiladi;

Institutning tarkibiy boʻlinmalari toʻgʻrisidagi nizomlarni, boʻlim boshliqlari va xodimlarining funksional vazifalarini tasdiqlaydi;

Qoʻmita raisi bilan kelishgan holda, Institutning ish rejasini tasdiqlaydi;

Institutning hisobotlarini tasdiqlaydi;

Institutning xarajatlar smetasini tasdiqlaydi;

Institutning aktivlarini qonunchilik hujjatlarida belgilangan tartibda tasarruf etadi, mol-mulkni boshqarish toʻgʻrisida qarorlar qabul qiladi, moliyaviy, toʻlov hisob-kitob va boshqa hujjatlarni imzolaydi, zarur hollarda Institutning masʼul mansabdor shaxslariga ishonchnomalar beradi;

Institut nomidan yuridik va jismoniy shaxslar, shu jumladan xalqaro tashkilotlar va xorijiy davlatlarning ilmiy-tadqiqot muassasalari hamda boshqa mutasaddi tashkilotlar bilan shartnoma va memorandumlar tuzadi;

Institut tuzilmasiga xodimlarning belgilangan cheklangan umumiy soni va ish haqi fondi doirasida oʻzgartirishlar kiritish boʻyicha Qoʻmita raisiga takliflar kiritadi.

Institut direktori qonunchilik hujjatlariga muvofiq boshqa vakolatlarni ham amalga oshirishi mumkin.

16. Institut xodimlarining huquq va majburiyatlari mehnat qonunchiligi, lavozim yoʻriqnomasi, ichki mehnat qoidalari, jamoa hamda mehnat shartnomalariga muvofiq belgilanadi.

17. Institut direktorining oʻrinbosarlari:

tarkibiy boʻlinmalar faoliyatiga bevosita rahbarlik qiladi, ushbu boʻlinmalarga yuklangan vazifalar va funksiyalar bajarilishini tashkil etadi;

Qoʻmita raisining buyruqlari, qarorlari va farmoyishlari, Institut direktorining buyruqlari va topshiriqlari oʻz vaqtida hamda sifatli bajarilishini taʼminlaydi;

tarkibiy boʻlinmalarga yuklangan vazifalar bajarilishini nazorat qiladi va muvofiqlashtiradi;

tarkibiy boʻlinmalar faoliyatini takomillashtirish boʻyicha takliflar ishlab chiqadi va ularni koʻrib chiqish uchun Institut direktoriga kiritadi;

Institut direktoriga tarkibiy boʻlinmalarda xodimlarni tanlash va joy-joyiga qoʻyish boʻyicha takliflar kiritadi, ularning kasbiy mahorati, malakasi, amaliy tajribasi, ishchanlik va axloqiy fazilatlari yuqori darajada boʻlishini taʼminlash, kasbiy malakalarini oshirish, tarkibiy boʻlinmalarda kadrlar zaxirasini shakllantirish choralarini koʻradi;

Institutning tarkibiy boʻlinmalari xodimlari faoliyatining samaradorligi (KPI) va natijadorligini tizimli tanqidiy tahlil qiladi, yigʻilishlarda ularning shaxsiy hisobotlarini eshitadi, yakunlari boʻyicha zarur choralar koʻradi.

18. Institut huzurida Ilmiy kengash faoliyatining asosiy yoʻnalishlarini muvofiqlashtiruvchi direktor oʻrinbosarlari (lavozimiga koʻra), Ilmiy kotib, Institut tarkibiy boʻlinmalari rahbarlari, Qoʻmita masʼul xodimlari, Fanlar akademiyasi vakillari, shuningdek, turdosh ilmiy-tadqiqot institutlarida va tashkilotlarda ishlovchi yetakchi olimlar, malakali mutaxassislardan iborat tarkibda Ilmiy kengash tashkil etiladi. Ilmiy kengashga Institut direktori raislik qiladi.

Institut Ilmiy kengashining shaxsiy tarkibi, aʼzolari soni va nizomi Institut direktori tomonidan Qoʻmita bilan kelishilgan holda tasdiqlanadi.

Institut Ilmiy kengashining ish tartibi Institutning ish rejalariga muvofiq belgilanadi.

6-bob. Institut faoliyatini moliyalashtirish

19. Institut faoliyatini moliyalashtirish manbalari quyidagilardan iborat:

Oʻzbekiston Respublikasining respublika budjeti mablagʻlari (xodimlar mehnatiga haq toʻlash, bino va inshootlarni saqlash xarajatlarini moliyalashtirish hamda ilmiy faoliyatga oid davlat dasturlarini amalga oshirish uchun);

Oʻzbekiston Respublikasi Oliy taʼlim, fan va innovatsiyalar vazirligi huzuridagi Innovatsion rivojlanish agentligi tomonidan oʻtkaziladigan tanlovlar natijalari boʻyicha Oʻzbekiston Respublikasining Davlat budjetidan ilmiy faoliyatga oid dasturlarni amalga oshirish uchun ajratilgan mablagʻlar;

Qoʻmitaning budjetdan tashqari mablagʻlari;

xalqaro moliya institutlari va boshqa xorijiy tashkilotlarning grantlari;

respublika ilmiy-tadqiqot loyihalari grantlari;

shartnoma asosida tadqiqotlar oʻtkazishdan tushadigan tushumlar;

qonunchilik hujjatlari bilan taqiqlanmagan boshqa manbalar.

20. Institut oʻzining koʻchmas va koʻchar mol-mulkiga, mablagʻlariga, shu jumladan, chet el valyutasidagi mablagʻlari, qimmatli qogʻozlari va boshqa mol-mulkiga ega boʻlishi mumkin.

Xoʻjalik, ilmiy-texnik faoliyatdan tushgan daromadlar, shuningdek, yuridik va jismoniy shaxslarning homiylik xayriyalari hisobidan sotib olingan mulk va vositalar Institut mulki hisoblanadi.

21. Institut tomonidan tayyorlangan barcha tadqiqot materiallari uning intellektual mulki hisoblanadi.

22. Institut direktori belgilangan ish haqi fondini tejashdan hamda budjetdan tashqari tushgan, shuningdek, xodimlarning tasdiqlangan shtatlar jadvalida nazarda tutilgan shtat birliklari yetishmasligidan iqtisod qilingan mablagʻlardan xodimlarni moddiy ragʻbatlantirishda, Institutning moddiy-texnik bazasini mustahkamlashda foydalanishga haqlidir.

23. Institut xodimlariga Oʻzbekiston Respublikasi Fanlar akademiyasi ilmiy-tadqiqot muassasalarining tegishli lavozimlari uchun belgilangan mehnatga haq toʻlash shartlari tatbiq etiladi.

Institut xodimlarining avvalgi uzoq yillik ish staji uchun oladigan qoʻshimcha haqlari va ustamalari saqlab qolinadi.

24. Institut direktori Qoʻmita raisi bilan kelishgan holda, Institutning budjetdan tashqari mablagʻlari hisobidan xodimlar oʻz xizmat vazifalarini tashabbus koʻrsatib va vijdonan bajarishini ragʻbatlantirish maqsadida ularga belgilangan tartibda lavozim maoshining 100 foizigacha miqdorda oylik ustamalar belgilashga, har chorakda lavozim maoshining 50 foizigacha mukofotlashga, bir yilda bir lavozim maoshi miqdorida moddiy yordam tayinlashga haqli.

7-bob. Institut faoliyatining samaradorligi va natijadorligini baholash mezonlari va ish indikatorlari

25. Institut faoliyatining samaradorligi muntazam baholanadi.

26. Institut faoliyatining samaradorligi va natijadorligiga berilgan baho Qoʻmita raisi tomonidan tasdiqlanadigan Institut faoliyati samaradorligi va natijadorligini baholash mezonlari va ish indikatorlariga asoslanadi.

27. Institut faoliyatining samaradorligi va natijadorligini baholash yakunlari boʻyicha:

Institut rahbarlari va xodimlarini ragʻbatlantirish (mukofotlash) yoki intizomiy javobgarlik choralari;

Institut faoliyatida aniqlangan kamchiliklarni bartaraf etish va uning faoliyatini yanada takomillashtirish choralari koʻriladi.

28. Institut faoliyatining samaradorligi va natijadorligini baholash mezonlari Qoʻmita tomonidan belgilanadi.

8-bob. Yakunlovchi qoida

29. Institut qonunchilik hujjatlarida belgilangan tartibda qayta tashkil etiladi va tugatiladi.

Vazirlar Mahkamasining 2025-yil 9-dekabrdagi 774-son qaroriga 3-ILOVA

Oila institutini mustahkamlash, xotin-qizlar va gender tenglikni taʼminlash yoʻnalishida kadrlarning malakasini oshirish boʻyicha oʻquv kurslarini tashkil etish tartibi toʻgʻrisida

1-bob. Umumiy qoidalar

1. Ushbu Nizom Oʻzbekiston Respublikasi Oila va xotin-qizlar qoʻmitasi (keyingi oʻrinlarda — Qoʻmita) tizimida faoliyat koʻrsatayotgan masʼul xodimlar malakasini oshirish oʻquv kurslarining (keyingi oʻrinlarda — malaka oshirish oʻquv kurslari) maqsad va vazifalarini, oʻquv kurslarida oʻqish, shuningdek, malaka oshirish oʻquv kurslarida oʻquv jarayonini tashkil etish va tinglovchilarning bilimini baholash tartibini belgilaydi.

2. Malaka oshirish oʻquv kurslari Qoʻmita markaziy apparatining, Qoraqalpogʻiston Respublikasi Oila va xotin-qizlar qoʻmitasining, viloyatlar va Toshkent shahri oila va xotin-qizlar boshqarmalarining, tuman (shahar)lar oila va xotin-qizlar boʻlimlarining xodimlari, mahallalardagi xotin-qizlar faollari kasbiy malakasini oshirishga yoʻnaltiriladi.

3. Malaka oshirish oʻquv kurslari har uch yilda bir marta bepul asosda onlayn va offlayn shaklda tashkil etiladi.

4. Oila institutini mustahkamlash, xotin-qizlar va gender tenglikni taʼminlash yoʻnalishida faoliyat koʻrsatuvchi boshqa tashkilotlarning xodimlari ham malaka oshirish oʻquv kurslarida ixtiyoriy ishtirok etishi mumkin.

5. Malaka oshirish oʻquv kurslari Qoraqalpogʻiston Respublikasi Oila va xotin-qizlar qoʻmitasi, viloyatlar va Toshkent shahri oila va xotin-qizlar boshqarmalari huzurida tashkil etiladi.

2-bob. Malaka oshirish kurslarining maqsadi va asosiy vazifalari

6. Malaka oshirish kurslarining maqsadi — Qoʻmita tizimi xodimlari, shuningdek, mahallalardagi xotin-qizlar faollarining xotin-qizlar va oilalarni har tomonlama qoʻllab-quvvatlash, gender tenglikni taʼminlash, ular bilan tizimli ishlarni tashkil etish, oilalardagi maʼnaviy-axloqiy muhitni mustahkamlash, sogʻlomlashtirish yoʻnalishlari boʻyicha bilim va koʻnikmalarini rivojlantirishdan iborat.

7. Quyidagilar malaka oshirish oʻquv kurslarining asosiy vazifalari hisoblanadi:

Qoʻmita xodimlari, mahallalardagi xotin-qizlar faollarining kasbiy bilimi, koʻnikmasi va mahoratini uzluksiz rivojlantirib borish, oila va xotin-qizlar bilan ishlashda zamonaviy bilim, koʻnikma hamda malakalari, shuningdek, kasbiy tayyorgarligini oshirish;

xotin-qizlarni oila, mahalla va mehnat jamoalarida ijtimoiy-huquqiy jihatdan qoʻllab-quvvatlash, ularning ijtimoiy-siyosiy faolligini oshirish va maʼnaviyatini yuksaltirishga koʻmaklashish;

yoshlarni oilaviy hayotga tayyorlash, oiladagi nizoli holatlarni hal qilishning huquqiy va psixologik asoslarini hamda mediativ usullarini oʻrgatish, ajralishlarning oldini olish hamda oiladagi maʼnaviy-axloqiy qadriyatlarni mustahkamlash sohasida xodimlarning malakasini oshirish;

xotin-qizlarning tadbirkorlik gʻoyalarini amalga oshirish, ularni kasanachilik, hunarmandchilik va boshqa shaklda oʻzini oʻzi band qilishi boʻyicha soha xodimlarining tegishli kompetentligini oshirish;

soha xodimlarining ijtimoiy himoyaga muhtoj, ogʻir ijtimoiy ahvolga tushib qolgan xotin-qizlar bilan yakka tartibda hamda aniq maqsadga yoʻnaltirilgan ishlarni olib borish, ularga ijtimoiy-huquqiy, psixologik va moddiy yordam koʻrsatish ishlarini tashkil etish boʻyicha koʻnikma va malakalarga ega boʻlishini taʼminlash.

3-bob. Malaka oshirish oʻquv kurslarida oʻqish tartibi

8. Malaka oshirish oʻquv kurslarida oʻqish tegishli yoʻnalishlar boʻyicha Institut tomonidan tasdiqlangan oʻquv rejalari va dasturlariga muvofiq tashkil etiladi. Oʻquv rejalari va dasturlari har yili oila va xotin-qizlarga oid davlat siyosatining ustuvor yoʻnalishlari asosida takomillashtirib boriladi.

9. Oʻquv yuklamasining umumiy hajmi yoʻnalish bloklari boʻyicha malaka oshirish talablaridan kelib chiqqan holda taqsimlanadi.

10. Malaka oshirish oʻquv kurslarida oʻqish Qoʻmita huzuridagi Oila va gender ilmiy-tadqiqot instituti (keyingi oʻrinlarda — Institut) tomonidan tasdiqlangan 36 soatlik oʻquv dasturlari boʻyicha bir hafta davomida ishdan ajralgan holda tashkil etiladi.

11. Institut Qoʻmita, joylardagi davlat oliy taʼlim tashkilotlari, Qoraqalpogʻiston Respublikasi Oila va xotin-qizlar qoʻmitasi, viloyatlar va Toshkent shahri oila va xotin-qizlar boshqarmalari bilan birgalikda har yili aprel oyida malaka oshirish oʻquv kurslarida oʻqishning belgilangan davriyligiga muvofiq oʻqitish yoʻnalishlari boʻyicha malaka oshirish kurslari tinglovchilari tarkibi va reja-jadvalni shakllantiradi hamda tasdiqlaydi.

12. Malaka oshirish oʻquv kurslari tinglovchilari tasdiqlangan reja-jadval asosida tegishlicha Qoraqalpogʻiston Respublikasi Oila va xotin-qizlar qoʻmitasi raisining, viloyatlar va Toshkent shahri oila va xotin-qizlar boshqarmasi boshligʻining buyrugʻi bilan qabul qilinadi.

13. Tasdiqlangan reja-jadvalga kiritilgan va malaka oshirish oʻquv kurslariga oʻqishga yoʻllangan tinglovchilarning asosiy ish joyi boʻyicha oʻrtacha oylik ish haqi oʻqish davrida saqlanib qoladi.

14. Malaka oshirish oʻquv kurslariga yoʻllangan tinglovchilarga taʼlim olish joyiga bir marta borib kelish xarajatlari ularni yuborayotgan tomon hisobidan belgilangan tartibda qoplanadi.

15. Mahallalardagi xotin-qizlar faollarining malaka oshirish oʻquv kurslarida ishtirok etishini taʼminlashga Qoraqalpogʻiston Respublikasi Oila va xotin-qizlar qoʻmitasi raisi, viloyatlar va Toshkent shahri oila va xotin-qizlar boshqarmalari boshliqlari masʼul hisoblanadi.

4-bob. Malaka oshirish oʻquv kurslarini tashkil etishda manfaatdor tashkilotlarning vazifalari

16. Institut:

har yili mart oyiga qadar malaka oshirish oʻquv kurslari tinglovchilari uchun oʻquv rejasi, dasturlari va materiallarni tayyorlaydi, muntazam yangilab boradi, ilmiy-uslubiy koʻmaklashadi va oʻquv-metodik rahbarlik qiladi;

malaka oshirish oʻquv kurslarini taʼminlovchi yagona elektron tizim (platforma) ishlab chiqadi va uni doimiy oʻquv materiallari bilan taʼminlab boradi;

malaka oshirish tizimiga oʻqitishning zamonaviy shakl va metodlarini, ilgʻor pedagogik texnologiyalarini joriy etadi;

Qoʻmita, Oʻzbekiston Respublikasi Sogʻliqni saqlash vazirligi, Kambagʻallikni qisqartirish va bandlik vazirligi, Oliy taʼlim, fan va innovatsiyalar vazirligi, Oʻzbekiston mahallalari uyushmasi bilan birgalikda malaka oshirish boʻyicha oʻquv rejalari va dasturlarini ishlab chiqadi va tasdiqlaydi hamda ularning doimiy yangilanishini taʼminlaydi;

malaka oshirish tizimini takomillashtirish mexanizmlari va usullarini belgilaydi;

malaka oshirish tizimiga oʻqitishning zamonaviy shakl va metodlarini, ilgʻor pedagogika, axborot-kommunikatsiya va innovatsiya texnologiyalarini joriy etadi;

malaka oshirish oʻquv kursi tinglovchilariga zarur metodik yordam berish, modullarni oʻzlashtirish, mashgʻulotlarni bajarish yuzasidan nazoratni amalga oshiradi;

malaka oshirish oʻquv kurslarida taʼlim olish va oʻqitish jarayoni monitoringini yuritadi va natijalarini Qoʻmitaga taqdim etadi;

malaka oshirish oʻquv kurslari uchun tayyorlangan oʻquv materiallarini elektron tizimga joylashtirish, mavjud kontentni yangilab borish, malaka oshirish oʻquv kursining faoliyatini sifatli tashkil etish choralarini koʻradi;

malaka oshirish oʻquv kurslarining texnik taʼminotini amalga oshiradi.

17. Oʻzbekiston Respublikasi Oliy taʼlim, fan va innovatsiyalar vazirligi:

malaka oshirish oʻquv kurslari oʻquv rejalari va dasturlarini ishlab chiqishga koʻmaklashadi;

malaka oshirish oʻquv kurslarida oʻquv mashgʻulotlarini oʻtkazish uchun oliy taʼlim tashkilotlarining yuqori malakali professor-oʻqituvchilarini jalb etishda amaliy yordam koʻrsatadi.

18. Tinglovchilar har bir modul yakunida oraliq testlar va umumiy malaka oshirish kursi oxirida yakuniy test topshiradi. Testdan kamida 56 foiz oʻzlashtirish koʻrsatkichini qayd etgan tinglovchilar kursdan muvaffaqiyatli oʻtgan deb hisoblanadi.

19. Malaka oshirish oʻquv kursini muvaffaqiyatli yakunlay olmagan tinglovchilarga sertifikat berilmaydi hamda ular bir yil muddatda belgilangan tartibda qayta malaka oshirishdan oʻtadi.

5-bob. Oʻquv jarayonini tashkil etish va tinglovchilarning bilimlarini baholash

20. Malaka oshirish oʻquv kurslari tegishli yoʻnalishlar boʻyicha malaka talablari, oʻquv rejalari va dasturlarini hisobga olgan holda, kurslar faoliyatini va resurs taʼminotini budjetdan tashqari moliyalashtirish asosida tinglovchilarni oʻqitish uchun moddiy-texnik baza, professor-oʻqituvchilar tarkibi mavjud boʻlgan holda tashkil etiladi.

Mutaxassislar va professor-oʻqituvchilar shartnoma asosida jalb etiladi.

21. Malaka oshirish kurslari maʼruza, interaktiv seminar, amaliy mashgʻulot, sayyor mashgʻulot, tajriba almashish, mustaqil oʻqish, onlayn va offlayn mashgʻulotlar shaklida tashkil etiladi.

Tegishli axborot-metodik va tashkiliy-texnik baza mavjud boʻlgan taqdirda, malaka oshirish oʻquv kurslari masofadan oʻqitish usullari qoʻllangan holda tashkil etilishi mumkin.

22. Malaka oshirish oʻquv kurslaridagi oʻquv jarayoni guruhlarning toʻldirilishiga bogʻliq holda tinglovchilar soni, qoida tariqasida, kamida 30 nafardan iborat guruhlarda tashkil etiladi.

23. Malaka oshirish jarayonida guruhdagi tinglovchilarning soni 50 nafardan oshmasligi lozim.

24. Malaka oshirish oʻquv kurslarida mashgʻulotlar oʻtkazishga shartnoma asosida yuqori malakali kadrlar, xorijiy mutaxassislar, xodimlar va amaliyotchi mutaxassislar jalb etilishi mumkin.

25. Malaka oshirish oʻquv kurslari tinglovchilarini baholashni tashkil etish va oʻtkazish uchun Qoʻmita markaziy apparati, Qoraqalpogʻiston Respublikasi Oila va xotin-qizlar qoʻmitasi, viloyatlar va Toshkent shahri oila va xotin-qizlar boshqarmalari tomonidan tegishli sohalarning ilgʻor mutaxassislari orasidan kamida 3 — 5 kishidan iborat tarkibda komissiya shakllantiriladi.

26. Malaka oshirish oʻquv dasturlari talablarini muvaffaqiyatli bajargan tinglovchilarga ushbu Nizomga ilovaga muvofiq sertifikat beriladi.

6-bob. Yakunlovchi qoidalar

27. Tinglovchilar malaka oshirish oʻquv kurslarini tashkil qilish va oʻtkazish jarayonlari boʻyicha malaka oshirish oʻquv kurslari uchun masʼul tashkilotning xatti-harakatlari (harakatsizligi) yuzasidan qonunchilik hujjatlarida belgilangan tartibda shikoyat qilishlari mumkin.

28. Malaka oshirish oʻquv kurslarini tashkil etish va oʻtkazish bilan bogʻliq xarajatlar, shu jumladan, oʻquv mashgʻulotlarini oʻtkazishga jalb etiladigan mutaxassislar mehnatiga haq toʻlash, malaka oshirish oʻquv kurslarini taʼminlovchi yagona elektron tizimini texnik qoʻllab-quvvatlash, kurslar tinglovchilari uchun oʻquv, tarqatma materiallar va kanselyariya anjomlarini xarid qilish xarajatlari qonunchilik hujjatlarida taqiqlanmagan manbalar hisobidan moliyalashtiriladi.

Oila institutini mustahkamlash, xotin-qizlar va gender tengligini taʼminlash yoʻnalishida kadrlarning malakasini oshirish boʻyicha oʻquv kurslarini tashkil etish tartibi toʻgʻrisidagi nizomga ILOVA

Oʻzbekiston Respublikasi Davlat gerbi tasviri Oila institutini mustahkamlash, xotin-qizlar va gender tengligini taʼminlash yoʻnalishida m alaka oshirganlik haqida SERTIFIKAT MO № 000000 __________________________________________________________________ (mutaxassisning familiyasi, ismi, otasining ismi) 20___-yil ______________dan 20___-yil ______________gacha _______________________________________________________________da (malaka oshirish muassasasining nomi) jami _____________________________________________________ soatli ____________________________________________________________________ (malaka oshirish kursining nomi) boʻyicha malakasini oshirdi. Oʻzbekiston Respublikasi Oila va xotin-qizlar qoʻmitasi raisining QR-kod li imzosi Sana ________________

Oila institutini mustahkamlash, xotin-qizlar va gender tengligini taʼminlash yoʻnalishida malaka oshirganlik haqida

(tavsifi)

Malaka oshirganlik haqida davlat namunasidagi sertifikat A4 formatli oq qogʻozdagi varaqda ofset usulida besh xil rangdan foydalangan holda: matn uchun — qora rangda, rasmlar tasviri uchun — yashil, koʻk, qizil ranglarda, fon uchun — och kul rangda bosib chiqariladi.

Varaqning chap qismida chetidan 10 mm chekingan holda eni 32 mm boʻlgan Oʻzbekiston Respublikasi Davlat bayrogʻi tasvirlangan tasma joylashtiriladi. Tasmaning yuqori qismida diametri 30 mm boʻlgan Oʻzbekiston Respublikasi Davlat gerbi tasviri, past qismida esa — 35 mm oʻlchamli ikkita kvadrat qoʻshilishidan hosil boʻlgan sakkiz qirrali yulduz, yulduzning oʻrtasida muhr uchun 25 mm diametrli oq aylana joylashgan.

Varaqning yuqori qismi markazida lotin yozuvi bilan davlat tilida “Oila institutini mustahkamlash, xotin-qizlar va gender tengligini taʼminlash yoʻnalishida malaka oshirganlik haqida SERTIFIKAT” soʻzlari bosiladi. Sertifikat ikki lotin harfi — “MO” va olti raqamli sondan iborat tartib raqami bilan taʼminlangan. Barcha matn naqshli rastrdan iborat och kul rang fonda bosib chiqariladi.

Sertifikat:

bosib chiqarishning ikki usuli — raqamli va yuqori usuli;

yorugʻlik vositasida nusxa koʻchirishni qiyinlashtirish uchun ochiq ranglar;

naqshli rastr;

har xil rangli rastrlardan foydalanish yoʻli bilan turli ranglarni tashkil etish;

maxsus qogʻozlar;

oʻzgaradigan raqamlardan iborat tartib raqami qoʻllangan holda oltita himoyaga ega.

Vazirlar Mahkamasining 2025-yil 9-dekabrdagi 774-son qaroriga 4-ILOVA

Oʻzbekiston Respublikasi Hukumatining ayrim qarorlariga kiritilayotgan oʻzgartirishlar

1. Vazirlar Mahkamasining 2019-yil 31-dekabrdagi 1059-son qarori bilan tasdiqlangan Uzluksiz maʼnaviy tarbiya konsepsiyasini amalga oshirish chora-tadbirlari rejasining “Ijro uchun masʼullar” ustunida:

3-pozitsiyadagi “Oila va xotin-qizlar davlat qoʻmitasi” soʻzlari “Oila va xotin-qizlar qoʻmitasi” soʻzlari bilan almashtirilsin;

4, 9, 50, 51 va 52-pozitsiyalardagi “Oila va xotin-qizlar davlat qoʻmitasi” va “Oila va xotin-qizlar” ilmiy-tadqiqot instituti” soʻzlari tegishlicha “Oila va xotin-qizlar qoʻmitasi” va “Oila va gender ilmiy-tadqiqot instituti” soʻzlari bilan almashtirilsin;

10-pozitsiyadagi “Oila va xotin-qizlar” ilmiy-tadqiqot instituti” soʻzlari “Oila va gender ilmiy-tadqiqot instituti” soʻzlari bilan almashtirilsin.

2. Vazirlar Mahkamasining 2021-yil 18-iyundagi 380-son qarori bilan tasdiqlangan Fuqarolar yigʻini huzuridagi jamoatchilik tuzilmalari toʻgʻrisidagi namunaviy nizomning 8-bandi yettinchi xatboshisidagi va 28-bandidagi “Oila va xotin-qizlar” ilmiy-tadqiqot instituti” soʻzlari “Oila va gender ilmiy-tadqiqot instituti” soʻzlari bilan almashtirilsin.

3. Vazirlar Mahkamasining 2021-yil 6-oktabrdagi 625-son qarori bilan tasdiqlangan Xotin-qizlar oʻrtasida oʻz joniga qasd qilishning oldini olish boʻyicha chora-tadbirlar dasturining “Masʼul ijrochilar” ustunida:

4-pozitsiyadagi “Oila va xotin-qizlar davlat qoʻmitasi” va “Oila va xotin-qizlar” ilmiy-tadqiqot instituti” soʻzlari tegishlicha “Oila va xotin-qizlar qoʻmitasi” va “Oila va gender ilmiy-tadqiqot instituti” soʻzlari bilan almashtirilsin;

12, 16 va 18-pozitsiyalardagi “Oila va xotin-qizlar davlat qoʻmitasi” soʻzlari “Oila va xotin-qizlar qoʻmitasi” soʻzlari bilan almashtirilsin.

Vazirlar Mahkamasining 2025-yil 9-dekabrdagi 774-son qaroriga 5-ILOVA

Oʻzbekiston Respublikasi Hukumatining oʻz kuchini yoʻqotgan deb hisoblanayotgan baʼzi qarorlari

1. Vazirlar Mahkamasining “Oʻzbekiston Respublikasi Mahalla va oilani qoʻllab-quvvatlash vazirligi huzuridagi “Mahalla va oila” ilmiy-tadqiqot instituti faoliyatini tashkil etish toʻgʻrisida” 2020-yil 10-iyundagi 367-son qarori .

2. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida (Oʻzbekiston Respublikasi Prezidentining “Zoʻrlik ishlatishdan jabr koʻrgan xotin-qizlarni reabilitatsiya qilishga oid qoʻshimcha chora-tadbirlar toʻgʻrisida” 2021-yil 19-maydagi PQ-5116-son qarori)” 2021-yil 6-oktabrdagi 624-son qaroriga ilovaning 4-bandi .

Oʻzbekiston Respublikasining Bosh vaziri A. ARIPOV

Toshkent sh.,

2025-yil 9-dekabr,

774-son

(Qonunchilik maʼlumotlari milliy bazasi, 11.12.2025-y., 09/25/774/1150-son)

lex.uz