UzbekAI

Ўзбекистон Республикаси Вазирлар Маҳкамасининг

ҚАРОРИ

НИЗОМ

Халқаро туризм академияси Самарқанд кампуси фаолиятини такомиллаштиришга доир қўшимча чора-тадбирлар тўғрисида

Ўзбекистон Республикаси Президентининг «Бутунжаҳон туризм ташкилоти шафелигида Халқаро туризм академияси Самарқанд кампуси фаолиятини ташкил этиш тўғрисида» 2025 йил 20 ноябрдаги ПҚ-350-сон қарори ижросини таъминлаш, шунингдек, БМТнинг Бутунжаҳон туризм ташкилоти Бош Ассамблеясининг 25-сессиясида Ўзбекистон Республикаси Президенти томонидан илгари сурилган ташаббусларни амалга ошириш мақсадида Вазирлар Маҳкамаси қарор қилади:

1. Қуйидагилар:

а) Ўзбекистон Республикаси Туризм қўмитаси ва БМТнинг Бутунжаҳон туризм ташкилоти ўртасида тузилган келишув битимига мувофиқ Бутунжаҳон туризм ташкилоти (кейинги ўринларда — Ташкилот) шафелигида Халқаро туризм академияси Самарқанд кампуси (кейинги ўринларда — Академия) ташкил этилгани;

б) Ўзбекистон Республикаси Президентининг «Республикага хорижий туристлар оқимини кескин ошириш ҳамда ички туризмни янада жадаллаштириш чора-тадбирлари тўғрисида» 2024 йил 12 январдаги ПФ-9-сон Фармонида Академияда юқори малакали кадрлар тайёрлаш мақсадида ҳар йили Давлат бюджети ҳисобидан маблағлар ажратиб борилиши;

в) Ўзбекистон Республикаси Президентининг «Туризм соҳасида кадрлар тайёрлаш тизимини такомиллаштириш чора-тадбирлари тўғрисида» 2024 йил 18 июлдаги ПҚ-269-сон қарорида :

2025/2026 ўқув йилидан бошлаб Академияда меҳмонхоналар ва ресторанлар учун юқори малакали хизмат кўрсатувчи ходимларни тайёрлашни йўлга қўйиш;

Академияга талабаларни қабул қилиш квоталари олий таълим муассасаларига ўқишга қабул қилишнинг давлат буюртмаси ва қўшимча қабул параметрларидан келиб чиқиб белгиланиши;

Академия Самарқанд шаҳрининг Бобур Мирзо кўчаси 3а-уй манзилидаги «Ипак йўли» туризм ва маданий мерос халқаро университетига (кейинги ўринларда — Университет) қарашли бинога бепул жойлаштирилиши назарда тутилгани маълумот учун қабул қилинсин.

2. Бутунжаҳон туризм ташкилотига аъзо хорижий давлатларнинг иқтидорли мутахассислари Халқаро туризм академияси Самарқанд кампусида таълим олиши бўйича махсус грант ажратиш тартиби тўғрисидаги низом иловага мувофиқ тасдиқлансин.

3. Қуйидагилар Академия ҳузуридаги «Глобал яшил туризм стартаплари» лабораториясининг асосий фаолият йўналишлари этиб белгилансин:

республикада «яшил туризм» талабларини кенг қўллашга кўмаклашувчи инновацион ишланмаларни яратиш;

стартап лойиҳаларга маҳаллий ва хорижий инвесторларни жалб қилишда, шу жумладан, замонавий технологиялар ва дастурий маҳсулотлар трансферини амалга оширишда кўмаклашиш;

стартап лойиҳалар ҳамда илмий-тадқиқот ишлари натижаларидан янги маърузалар, қўлланмалар, ўқув материаллари яратишда ҳамда «яшил туризм» масалалари билан боғлиқ ўқув фаолиятининг бошқа шаклларида фойдаланишни ташкил этиш;

«яшил туризм» йўналишида инновацион ишланмаларни ишлаб чиқиш, уларнинг натижаларини тижоратлаштириш ва кенг тарғиб қилишга кўмаклашиш;

«яшил туризм» йўналишидаги стартап лойиҳалари, илмий-тадқиқот ишлари ва олинган натижаларни мунтазам муҳокама қилиб бориш.

4. Белгилансинки:

Академиянинг маъмурий бошқарув штатлари сони 16 бирликни ташкил қилади;

Академиянинг профессор-ўқитувчилари, ўқув-ёрдамчи ва техник ходимлари сони олий таълим муассасалари учун белгиланган нормативлар асосида аниқланади.

5. Туризм қўмитаси Самарқанд вилояти ҳокимлиги билан биргаликда Самарқанд шаҳри Гўрўғли кўчасидаги 13-уй манзилида жойлашган бино ва иншоотларни бузиш ёки реконструкция қилиш, ушбу ҳудудда ободонлаштириш ишларини амалга ошириш ва «Бадиий галерея» ўқув лабораториясини ташкил этиш чораларини кўрсин.

6. Биноларни ободонлаштириш ишларини амалга ошириш, «Бадиий галерея» ўқув лабораториясини ташкил этиш, манзарали дарахтлар, буталар ва гул кўчатларини экиш ишларини (кейинги ўринларда — қурилиш-монтаж ва ташкилий ишлар) қисқа муддатларда якунлаш мақсадида, истисно тариқасида, Самарқанд вилояти ҳокимлигининг «Ягона буюртмачи хизмати» ДУКни буюртмачи этиб белгилашга рухсат берилсин. Бунда:

Қурилиш ва уй-жой коммунал хўжалиги вазирлиги қурилиш-монтаж ва ташкилий ишлар бўйича лойиҳа-смета ҳужжатлари қисқа муддатда экспертизадан ўтказилишини таъминласин;

Вазирлар Маҳкамаси ҳузуридаги Қурилиш ва уй-жой коммунал хўжалиги соҳасида назорат қилиш инспекцияси қурилиш-монтаж ва ташкилий ишларни амалга оширишда шаҳарсозлик тўғрисидаги қонунчилик ҳужжатлари, шаҳарсозлик норма ва қоидаларига риоя этилиши устидан назорат ўрнатсин.

7. Ушбу қарорнинг бажарилишини назорат қилиш Туризм қўмитаси раиси ҳамда Самарқанд вилояти ҳокими А.М. Бобоев зиммасига юклансин.

Вазирлар Маҳкамасининг 2025 йил 15 декабрдаги 787-сон қарорига ИЛОВА

Бутунжаҳон туризм ташкилотига аъзо хорижий давлатларнинг иқтидорли мутахассислари Халқаро туризм академияси Самарқанд кампусида таълим олиши бўйича махсус грант ажратиш тартиби тўғрисида

1-боб. Умумий қоидалар

1. Мазкур Низом Бутунжаҳон туризм ташкилотига аъзо хорижий давлатларнинг иқтидорли мутахассислари Халқаро туризм академияси Самарқанд кампусида (кейинги ўринларда — Академия) таълим олиши (қайта тайёрлаш ва малака ошириш) бўйича махсус грант ажратиш тартибини белгилайди.

2. Ҳар йили Бутунжаҳон туризм ташкилотига аъзо давлатларнинг 100 нафар иқтидорли мутахассисларига Академиянинг қайта тайёрлаш ва малака ошириш ўқув дастурларида таълим олиш учун Туризмни қўллаб-қувватлаш жамғармаси ҳисобидан махсус грант ажратилади.

3. Академиянинг қайта тайёрлаш ва малака ошириш ўқув дастурларида махсус грант асосида таълим оладиган мутахассислар йил давомида ўтказиб бориладиган танлов орқали аниқланади.

4. Танловда қуйидаги шахслар иштирок эта олмайди:

а) ҳужжат топшириш вақтида шахс 45 ёшдан ошган, илгари хорижда шу каби мутахассислик бўйича малака оширган бўлса;

б) дипломатик ва консуллик корпуси аъзолари ёки Ўзбекистон Республикасида аккредитация қилинган дипломатик ва консуллик корпуси вакилларининг оила аъзолари;

в) Ўзбекистон Республикасида аккредитациядан ўтган дипломатик ваколатхоналар ва консуллик муассасаларининг маъмурий-техник ходимлари;

г) Ўзбекистон Республикасида жойлашган халқаро ташкилотлар ходимлари ёки Ўзбекистонда жойлашган халқаро ташкилотлар ходимларининг оила аъзолари;

д) инглиз тилини билиш даражасини белгиловчи IELTS бўйича камида 5,5 балл ва ундан юқори, Common European Framework of Reference for Languages (CEFR) бўйича камида В2 ва ундан юқори, TOEFL IBT бўйича камида 72 ва ундан юқори балл кўрсаткичи билан тан олинган халқаро сертификатга эга бўлмаган шахслар (инглиз тилида таҳсил олган ёки инглиз тилида сўзлашадиган мамлакатларнинг мутахассислари бундан мустасно);

е) соҳада олий ёки ўрта махсус маълумотга эга бўлмаса.

5. Академиянинг қайта тайёрлаш ва малака ошириш ўқув дастурларида махсус грант бўйича таълим олиш учун номзодлар комиссия (кейинги ўринларда — Танлов комиссияси) томонидан танлаб олинади.

6. Танлов комиссиясининг таркиби ва иш тартиби «Ипак йўли» туризм ва маданий мерос халқаро университетининг Васийлик кенгаши (кейинги ўринларда — Васийлик кенгаши) томонидан тасдиқланади.

2-боб. Танлов ўтказилишини эълон қилиш ва унда иштирок этиш учун ҳужжатларни қабул қилиш тартиби

7. Танлов ўтказилиши тўғрисидаги эълон Васийлик кенгашининг қарорига мувофиқ «Ипак йўли» туризм ва маданий мерос халқаро университети ва Академиянинг расмий веб-сайтлари, шу жумладан, оммавий ахборот воситаларида жойлаштирилади.

Танлов ўтказилиши тўғрисидаги эълонда қуйидаги маълумотлар бўлиши керак:

махсус грант ажратиладиган таълим дастурлари рўйхати;

талаб этиладиган ҳужжатлар рўйхати, уларни қабул қилиш тартиби, муддати ва жойи;

танлов иштирокчиларига (ёши, чет тилини билиш даражаси, илмий мақолаларнинг мавжудлиги бўйича) қўйиладиган талаблар;

танлов босқичларини ўтказиш жойи ва муддати;

боғланиш учун телефон рақамлари ва электрон почта манзили.

8. Танлов иштирокчилари Академияга электрон платформа орқали қуйидаги ҳужжатларни тақдим этади:

белгиланган намунадаги ариза;

шахсини тасдиқловчи паспорт ёки ID карта нусхаси;

диплом ва сертификатларнинг нусхалари;

инглиз тилини билиш даражасини белгиловчи IELTS бўйича камида 5,5 балл ва ундан юқори, Common European Framework of Reference for Languages (CEFR) бўйича камида В2 ва ундан юқори, TOEFL IBT бўйича камида 72 ва ундан юқори балл кўрсаткичи билан тан олинган халқаро сертификат нусхаси (инглиз тилида таҳсил олган ёки инглиз тилида сўзлашадиган мамлакатларнинг мутахассислари бундан мустасно);

танлов иштирокчисининг иқтидорини намойиш этувчи қисқа ролик;

Бутунжаҳон туризм ташкилотига аъзо хорижий давлатнинг туризм соҳасига масъул бўлган юқори ташкилотининг тавсияномаси.

9. Танловнинг барча босқичларидан муваффақиятли ўтган иштирокчилар ҳужжатларни босма шаклда расмийлаштирилган ҳолда Академияга тақдим этади.

3-боб. Танловни ўтказиш тартиби

10. Танлов комиссияси танлов иштирокчилари томонидан тақдим этилган ҳужжатларни ўрганиб чиқади.

11. Тўпланган ҳужжатлар асосида танлов иштирокчилари билан уларнинг касбий билим ва кўникмалари, шахсий-касбий хусусиятлари ва қобилиятлари йўналишида суҳбат ўтказилади, бунда суҳбат жараёни видеотасвирга туширилади.

Васийлик кенгашининг қарорига асосан танлов иштирокчиси билан суҳбат онлайн-видео мулоқот шаклида ўтказилиши мумкин.

12. Суҳбат жараёнидаги номзодга бериладиган саволлар ва уларнинг жавоблари, Танлов комиссияси аъзолари томонидан танлов иштирокчисига қўйиладиган баллар ҳамда суҳбатнинг умумий натижалари қайд этиб борилади.

13. Танлов комиссияси аъзолари танлов иштирокчисининг билими, шунингдек, иш тажрибасини ҳисобга олиб, уни суҳбатдан ўтган ёки ўтмаган деб топиш ҳақида қарор қабул қилади. Бунда ушбу қарор Танлов комиссияси мажлисида ҳозир бўлган аъзоларнинг берган баллари натижаси бўйича қабул қилинади.

14. Танлов комиссияси суҳбат натижаларини умумлаштиради ва Васийлик кенгашига тасдиқлаш учун тақдим этади.

15. Васийлик кенгаши махсус грант ажратилиши тавсия этилган танлов ғолиблари рўйхатини тасдиқлайди.

16. Академия ўз веб-сайтида танлов ғолиблари рўйхатини эълон қилади.

17. Танлов ғолиби ўқиш жараёнлари бошланганидан кейин бир ой мобайнида ўқув жараёнида иштирок этмаса, яъни Академияга кела олмаса, унга грант ажратилмайди.

18. Танлов ғолиби билан Академия ўртасида ўқув жараёнларини ташкил этиш шартлари, томонларнинг мажбуриятларини кўрсатган ҳолда шартнома тузилади.

4-боб. Апелляция комиссияси

19. Танлов ўтказилиши юзасидан келиб тушган шикоятларни кўриб чиқиш учун Васийлик кенгашининг қарорига асосан Апелляция комиссияси ташкил этилади.

Апелляция комиссиясининг таркиби ва иш тартиби Васийлик кенгаши томонидан тасдиқланади.

20. Апелляция комиссиясига шикоятлар танлов натижалари эълон қилинган кундан бошлаб уч кун ичида берилади.

21. Апелляция комиссияси шикоят келиб тушган кундан бошлаб беш кун ичида кўриб чиқиши ва тегишли қарор қабул қилиши шарт.

22. Танловни ўтказиш тартиби ва Танлов комиссияси аъзолари томонидан суҳбат жараёнида хато ва камчиликларга йўл қўйилган деб топилган тақдирда, Апелляция комиссияси танлов иштирокчилари билан қайта суҳбат ўтказади ёки танлов натижаларни қайта ҳисоблайди.

5-боб. Танлов ғолибларига грантлар ажратиш миқдори ва шартлари

23. Махсус грант миқдори хорижий давлатлар мутахассисларининг (кейинги ўринларда — мутахассислар) қуйидаги харажатларини қамраб олади:

ҳар ойда 500 АҚШ доллари эквивалентидаги стипендия ва яшаш харажатлари;

бир марталик 100 АҚШ доллари эквивалентидаги саёҳат, Ўзбекистон ҳудудлари маданияти ва ҳаёти билан танишиш билан боғлиқ харажатлар;

бир марта эконом классда Ўзбекистонга келиш ва ўз Ватанига қайтиш харажатлари.

24. Танлов ғолиблари билан Академия ўртасида томонларнинг мажбурият ва ваколатларини белгилаб берувчи шартнома тузилади.

Тузилган шартномага мувофиқ махсус грантлар танлов ғолиблари Ўзбекистонга келган ва Академияга ўқишга қабул қилинган жараёндан бошлаб ўтказиб берилади.

25. Танлов ғолиблари шартнома шартларини бажармаган тақдирда, Академия тингловчилари сафидан четлатилади ва уларнинг Академияда бўлиши ҳамда ўқишини таъминлаш учун ажратилган барча молиявий харажатлар белгиланган тартибда Туризмни қўллаб-қувватлаш жамғармасига қайтарилади.

6-боб. Якунловчи қоидалар

26. Ушбу Низомни қўллашда юзага келадиган низолар қонунчилик ҳужжатларида белгиланган тартибда ҳал этилади.

27. Ушбу Низом талаблари бузилишида айбдор бўлган шахслар қонунчилик ҳужжатларида белгиланган тартибда жавоб берадилар.

Ўзбекистон Республикасининг Бош вазири А. АРИПОВ

Тошкент ш.,

2025 йил 15 декабрь,

787-сон

(Қонунчилик маълумотлари миллий базаси, 15.12.2025 й., 09/25/787/1164-сон)

lex.uz

Oʻzbekiston Respublikasi Vazirlar Mahkamasining

QARORI

NIZOM

Xalqaro turizm akademiyasi Samarqand kampusi faoliyatini takomillashtirishga doir qoʻshimcha chora-tadbirlar toʻgʻrisida

Oʻzbekiston Respublikasi Prezidentining “Butunjahon turizm tashkiloti shafeligida Xalqaro turizm akademiyasi Samarqand kampusi faoliyatini tashkil etish toʻgʻrisida” 2025-yil 20-noyabrdagi PQ-350-son qarori ijrosini taʼminlash, shuningdek, BMTning Butunjahon turizm tashkiloti Bosh Assambleyasining 25-sessiyasida Oʻzbekiston Respublikasi Prezidenti tomonidan ilgari surilgan tashabbuslarni amalga oshirish maqsadida Vazirlar Mahkamasi qaror qiladi:

1. Quyidagilar:

a) Oʻzbekiston Respublikasi Turizm qoʻmitasi va BMTning Butunjahon turizm tashkiloti oʻrtasida tuzilgan kelishuv bitimiga muvofiq Butunjahon turizm tashkiloti (keyingi oʻrinlarda — Tashkilot) shafeligida Xalqaro turizm akademiyasi Samarqand kampusi (keyingi oʻrinlarda — Akademiya) tashkil etilgani;

b) Oʻzbekiston Respublikasi Prezidentining “Respublikaga xorijiy turistlar oqimini keskin oshirish hamda ichki turizmni yanada jadallashtirish chora-tadbirlari toʻgʻrisida” 2024-yil 12-yanvardagi PF-9-son Farmonida Akademiyada yuqori malakali kadrlar tayyorlash maqsadida har yili Davlat budjeti hisobidan mablagʻlar ajratib borilishi;

v) Oʻzbekiston Respublikasi Prezidentining “Turizm sohasida kadrlar tayyorlash tizimini takomillashtirish chora-tadbirlari toʻgʻrisida” 2024-yil 18-iyuldagi PQ-269-son qarorida :

2025/2026 oʻquv yilidan boshlab Akademiyada mehmonxonalar va restoranlar uchun yuqori malakali xizmat koʻrsatuvchi xodimlarni tayyorlashni yoʻlga qoʻyish;

Akademiyaga talabalarni qabul qilish kvotalari oliy taʼlim muassasalariga oʻqishga qabul qilishning davlat buyurtmasi va qoʻshimcha qabul parametrlaridan kelib chiqib belgilanishi;

Akademiya Samarqand shahrining Bobur Mirzo koʻchasi 3a-uy manzilidagi “Ipak yoʻli” turizm va madaniy meros xalqaro universitetiga (keyingi oʻrinlarda — Universitet) qarashli binoga bepul joylashtirilishi nazarda tutilgani maʼlumot uchun qabul qilinsin.

2. Butunjahon turizm tashkilotiga aʼzo xorijiy davlatlarning iqtidorli mutaxassislari Xalqaro turizm akademiyasi Samarqand kampusida taʼlim olishi boʻyicha maxsus grant ajratish tartibi toʻgʻrisidagi nizom ilovaga muvofiq tasdiqlansin.

3. Quyidagilar Akademiya huzuridagi “Global yashil turizm startaplari” laboratoriyasining asosiy faoliyat yoʻnalishlari etib belgilansin:

respublikada “yashil turizm” talablarini keng qoʻllashga koʻmaklashuvchi innovatsion ishlanmalarni yaratish;

startap loyihalarga mahalliy va xorijiy investorlarni jalb qilishda, shu jumladan, zamonaviy texnologiyalar va dasturiy mahsulotlar transferini amalga oshirishda koʻmaklashish;

startap loyihalar hamda ilmiy-tadqiqot ishlari natijalaridan yangi maʼruzalar, qoʻllanmalar, oʻquv materiallari yaratishda hamda “yashil turizm” masalalari bilan bogʻliq oʻquv faoliyatining boshqa shakllarida foydalanishni tashkil etish;

“yashil turizm” yoʻnalishida innovatsion ishlanmalarni ishlab chiqish, ularning natijalarini tijoratlashtirish va keng targʻib qilishga koʻmaklashish;

“yashil turizm” yoʻnalishidagi startap loyihalari, ilmiy-tadqiqot ishlari va olingan natijalarni muntazam muhokama qilib borish.

4. Belgilansinki:

Akademiyaning maʼmuriy boshqaruv shtatlari soni 16 birlikni tashkil qiladi;

Akademiyaning professor-oʻqituvchilari, oʻquv-yordamchi va texnik xodimlari soni oliy taʼlim muassasalari uchun belgilangan normativlar asosida aniqlanadi.

5. Turizm qoʻmitasi Samarqand viloyati hokimligi bilan birgalikda Samarqand shahri Goʻroʻgʻli koʻchasidagi 13-uy manzilida joylashgan bino va inshootlarni buzish yoki rekonstruksiya qilish, ushbu hududda obodonlashtirish ishlarini amalga oshirish va “Badiiy galereya” oʻquv laboratoriyasini tashkil etish choralarini koʻrsin.

6. Binolarni obodonlashtirish ishlarini amalga oshirish, “Badiiy galereya” oʻquv laboratoriyasini tashkil etish, manzarali daraxtlar, butalar va gul koʻchatlarini ekish ishlarini (keyingi oʻrinlarda — qurilish-montaj va tashkiliy ishlar) qisqa muddatlarda yakunlash maqsadida, istisno tariqasida, Samarqand viloyati hokimligining “Yagona buyurtmachi xizmati” DUKni buyurtmachi etib belgilashga ruxsat berilsin. Bunda:

Qurilish va uy-joy kommunal xoʻjaligi vazirligi qurilish-montaj va tashkiliy ishlar boʻyicha loyiha-smeta hujjatlari qisqa muddatda ekspertizadan oʻtkazilishini taʼminlasin;

Vazirlar Mahkamasi huzuridagi Qurilish va uy-joy kommunal xoʻjaligi sohasida nazorat qilish inspeksiyasi qurilish-montaj va tashkiliy ishlarni amalga oshirishda shaharsozlik toʻgʻrisidagi qonunchilik hujjatlari, shaharsozlik norma va qoidalariga rioya etilishi ustidan nazorat oʻrnatsin.

7. Ushbu qarorning bajarilishini nazorat qilish Turizm qoʻmitasi raisi hamda Samarqand viloyati hokimi A.M. Boboyev zimmasiga yuklansin.

Vazirlar Mahkamasining 2025-yil 15-dekabrdagi 787-son qaroriga ILOVA

Butunjahon turizm tashkilotiga aʼzo xorijiy davlatlarning iqtidorli mutaxassislari Xalqaro turizm akademiyasi Samarqand kampusida taʼlim olishi boʻyicha maxsus grant ajratish tartibi toʻgʻrisida

1-bob. Umumiy qoidalar

1. Mazkur Nizom Butunjahon turizm tashkilotiga aʼzo xorijiy davlatlarning iqtidorli mutaxassislari Xalqaro turizm akademiyasi Samarqand kampusida (keyingi oʻrinlarda — Akademiya) taʼlim olishi (qayta tayyorlash va malaka oshirish) boʻyicha maxsus grant ajratish tartibini belgilaydi.

2. Har yili Butunjahon turizm tashkilotiga aʼzo davlatlarning 100 nafar iqtidorli mutaxassislariga Akademiyaning qayta tayyorlash va malaka oshirish oʻquv dasturlarida taʼlim olish uchun Turizmni qoʻllab-quvvatlash jamgʻarmasi hisobidan maxsus grant ajratiladi.

3. Akademiyaning qayta tayyorlash va malaka oshirish oʻquv dasturlarida maxsus grant asosida taʼlim oladigan mutaxassislar yil davomida oʻtkazib boriladigan tanlov orqali aniqlanadi.

4. Tanlovda quyidagi shaxslar ishtirok eta olmaydi:

a) hujjat topshirish vaqtida shaxs 45 yoshdan oshgan, ilgari xorijda shu kabi mutaxassislik boʻyicha malaka oshirgan boʻlsa;

b) diplomatik va konsullik korpusi aʼzolari yoki Oʻzbekiston Respublikasida akkreditatsiya qilingan diplomatik va konsullik korpusi vakillarining oila aʼzolari;

v) Oʻzbekiston Respublikasida akkreditatsiyadan oʻtgan diplomatik vakolatxonalar va konsullik muassasalarining maʼmuriy-texnik xodimlari;

g) Oʻzbekiston Respublikasida joylashgan xalqaro tashkilotlar xodimlari yoki Oʻzbekistonda joylashgan xalqaro tashkilotlar xodimlarining oila aʼzolari;

d) ingliz tilini bilish darajasini belgilovchi IELTS boʻyicha kamida 5,5 ball va undan yuqori, Common European Framework of Reference for Languages (CEFR) boʻyicha kamida V2 va undan yuqori, TOEFL IBT boʻyicha kamida 72 va undan yuqori ball koʻrsatkichi bilan tan olingan xalqaro sertifikatga ega boʻlmagan shaxslar (ingliz tilida tahsil olgan yoki ingliz tilida soʻzlashadigan mamlakatlarning mutaxassislari bundan mustasno);

e) sohada oliy yoki oʻrta maxsus maʼlumotga ega boʻlmasa.

5. Akademiyaning qayta tayyorlash va malaka oshirish oʻquv dasturlarida maxsus grant boʻyicha taʼlim olish uchun nomzodlar komissiya (keyingi oʻrinlarda — Tanlov komissiyasi) tomonidan tanlab olinadi.

6. Tanlov komissiyasining tarkibi va ish tartibi “Ipak yoʻli” turizm va madaniy meros xalqaro universitetining Vasiylik kengashi (keyingi oʻrinlarda — Vasiylik kengashi) tomonidan tasdiqlanadi.

2-bob. Tanlov oʻtkazilishini eʼlon qilish va unda ishtirok etish uchun hujjatlarni qabul qilish tartibi

7. Tanlov oʻtkazilishi toʻgʻrisidagi eʼlon Vasiylik kengashining qaroriga muvofiq “Ipak yoʻli” turizm va madaniy meros xalqaro universiteti va Akademiyaning rasmiy veb-saytlari, shu jumladan, ommaviy axborot vositalarida joylashtiriladi.

Tanlov oʻtkazilishi toʻgʻrisidagi eʼlonda quyidagi maʼlumotlar boʻlishi kerak:

maxsus grant ajratiladigan taʼlim dasturlari roʻyxati;

talab etiladigan hujjatlar roʻyxati, ularni qabul qilish tartibi, muddati va joyi;

tanlov ishtirokchilariga (yoshi, chet tilini bilish darajasi, ilmiy maqolalarning mavjudligi boʻyicha) qoʻyiladigan talablar;

tanlov bosqichlarini oʻtkazish joyi va muddati;

bogʻlanish uchun telefon raqamlari va elektron pochta manzili.

8. Tanlov ishtirokchilari Akademiyaga elektron platforma orqali quyidagi hujjatlarni taqdim etadi:

belgilangan namunadagi ariza;

shaxsini tasdiqlovchi pasport yoki ID karta nusxasi;

diplom va sertifikatlarning nusxalari;

ingliz tilini bilish darajasini belgilovchi IELTS boʻyicha kamida 5,5 ball va undan yuqori, Common European Framework of Reference for Languages (CEFR) boʻyicha kamida V2 va undan yuqori, TOEFL IBT boʻyicha kamida 72 va undan yuqori ball koʻrsatkichi bilan tan olingan xalqaro sertifikat nusxasi (ingliz tilida tahsil olgan yoki ingliz tilida soʻzlashadigan mamlakatlarning mutaxassislari bundan mustasno);

tanlov ishtirokchisining iqtidorini namoyish etuvchi qisqa rolik;

Butunjahon turizm tashkilotiga aʼzo xorijiy davlatning turizm sohasiga masʼul boʻlgan yuqori tashkilotining tavsiyanomasi.

9. Tanlovning barcha bosqichlaridan muvaffaqiyatli oʻtgan ishtirokchilar hujjatlarni bosma shaklda rasmiylashtirilgan holda Akademiyaga taqdim etadi.

3-bob. Tanlovni oʻtkazish tartibi

10. Tanlov komissiyasi tanlov ishtirokchilari tomonidan taqdim etilgan hujjatlarni oʻrganib chiqadi.

11. Toʻplangan hujjatlar asosida tanlov ishtirokchilari bilan ularning kasbiy bilim va koʻnikmalari, shaxsiy-kasbiy xususiyatlari va qobiliyatlari yoʻnalishida suhbat oʻtkaziladi, bunda suhbat jarayoni videotasvirga tushiriladi.

Vasiylik kengashining qaroriga asosan tanlov ishtirokchisi bilan suhbat onlayn-video muloqot shaklida oʻtkazilishi mumkin.

12. Suhbat jarayonidagi nomzodga beriladigan savollar va ularning javoblari, Tanlov komissiyasi aʼzolari tomonidan tanlov ishtirokchisiga qoʻyiladigan ballar hamda suhbatning umumiy natijalari qayd etib boriladi.

13. Tanlov komissiyasi aʼzolari tanlov ishtirokchisining bilimi, shuningdek, ish tajribasini hisobga olib, uni suhbatdan oʻtgan yoki oʻtmagan deb topish haqida qaror qabul qiladi. Bunda ushbu qaror Tanlov komissiyasi majlisida hozir boʻlgan aʼzolarning bergan ballari natijasi boʻyicha qabul qilinadi.

14. Tanlov komissiyasi suhbat natijalarini umumlashtiradi va Vasiylik kengashiga tasdiqlash uchun taqdim etadi.

15. Vasiylik kengashi maxsus grant ajratilishi tavsiya etilgan tanlov gʻoliblari roʻyxatini tasdiqlaydi.

16. Akademiya oʻz veb-saytida tanlov gʻoliblari roʻyxatini eʼlon qiladi.

17. Tanlov gʻolibi oʻqish jarayonlari boshlanganidan keyin bir oy mobaynida oʻquv jarayonida ishtirok etmasa, yaʼni Akademiyaga kela olmasa, unga grant ajratilmaydi.

18. Tanlov gʻolibi bilan Akademiya oʻrtasida oʻquv jarayonlarini tashkil etish shartlari, tomonlarning majburiyatlarini koʻrsatgan holda shartnoma tuziladi.

4-bob. Apellyatsiya komissiyasi

19. Tanlov oʻtkazilishi yuzasidan kelib tushgan shikoyatlarni koʻrib chiqish uchun Vasiylik kengashining qaroriga asosan Apellyatsiya komissiyasi tashkil etiladi.

Apellyatsiya komissiyasining tarkibi va ish tartibi Vasiylik kengashi tomonidan tasdiqlanadi.

20. Apellyatsiya komissiyasiga shikoyatlar tanlov natijalari eʼlon qilingan kundan boshlab uch kun ichida beriladi.

21. Apellyatsiya komissiyasi shikoyat kelib tushgan kundan boshlab besh kun ichida koʻrib chiqishi va tegishli qaror qabul qilishi shart.

22. Tanlovni oʻtkazish tartibi va Tanlov komissiyasi aʼzolari tomonidan suhbat jarayonida xato va kamchiliklarga yoʻl qoʻyilgan deb topilgan taqdirda, Apellyatsiya komissiyasi tanlov ishtirokchilari bilan qayta suhbat oʻtkazadi yoki tanlov natijalarni qayta hisoblaydi.

5-bob. Tanlov gʻoliblariga grantlar ajratish miqdori va shartlari

23. Maxsus grant miqdori xorijiy davlatlar mutaxassislarining (keyingi oʻrinlarda — mutaxassislar) quyidagi xarajatlarini qamrab oladi:

har oyda 500 AQSH dollari ekvivalentidagi stipendiya va yashash xarajatlari;

bir martalik 100 AQSH dollari ekvivalentidagi sayohat, Oʻzbekiston hududlari madaniyati va hayoti bilan tanishish bilan bogʻliq xarajatlar;

bir marta ekonom klassda Oʻzbekistonga kelish va oʻz Vataniga qaytish xarajatlari.

24. Tanlov gʻoliblari bilan Akademiya oʻrtasida tomonlarning majburiyat va vakolatlarini belgilab beruvchi shartnoma tuziladi.

Tuzilgan shartnomaga muvofiq maxsus grantlar tanlov gʻoliblari Oʻzbekistonga kelgan va Akademiyaga oʻqishga qabul qilingan jarayondan boshlab oʻtkazib beriladi.

25. Tanlov gʻoliblari shartnoma shartlarini bajarmagan taqdirda, Akademiya tinglovchilari safidan chetlatiladi va ularning Akademiyada boʻlishi hamda oʻqishini taʼminlash uchun ajratilgan barcha moliyaviy xarajatlar belgilangan tartibda Turizmni qoʻllab-quvvatlash jamgʻarmasiga qaytariladi.

6-bob. Yakunlovchi qoidalar

26. Ushbu Nizomni qoʻllashda yuzaga keladigan nizolar qonunchilik hujjatlarida belgilangan tartibda hal etiladi.

27. Ushbu Nizom talablari buzilishida aybdor boʻlgan shaxslar qonunchilik hujjatlarida belgilangan tartibda javob beradilar.

Oʻzbekiston Respublikasining Bosh vaziri A. ARIPOV

Toshkent sh.,

2025-yil 15-dekabr,

787-son

(Qonunchilik maʼlumotlari milliy bazasi, 15.12.2025-y., 09/25/787/1164-son)

lex.uz