UzbekAI

Ўзбекистон Республикаси Вазирлар Маҳкамасининг

қарори

ТУЗИЛМАСИ

Мирзо Улуғбек номидаги Ўзбекистон Миллий университети ҳузурида Назарий физика институтини ташкил этиш тўғрисида

Ўзбекистон Республикаси Президентининг «Физика соҳасидаги таълим сифатини ошириш ва илмий тадқиқотларни ривожлантириш чора-тадбирлари тўғрисида» 2021 йил 19 мартдаги ПҚ-5032-сон қарорига мувофиқ назарий физика соҳасида юқори малакали илмий кадрлар тайёрлаш, фундаментал ва амалий лойиҳаларни ривожлантириш ҳамда амалиётга жорий этиш самарадорлигини ошириш, физика йўналишидаги замонавий илм-фан талабларига асосланган илмий фаолиятнинг ўқув жараёни ва ишлаб чиқариш билан интеграциясини янада чуқурлаштириш мақсадида Вазирлар Маҳкамаси қарор қилади:

1. Олий таълим, фан ва инновациялар вазирлиги ҳамда Фанлар академиясининг Мирзо Улуғбек номидаги Ўзбекистон Миллий университети (кейинги ўринларда — Университет) ҳузурида Назарий физика институтини (кейинги ўринларда — Институт) ташкил этиш тўғрисидаги таклифига розилик берилсин.

2. Қуйидагилар Институтнинг асосий вазифалари этиб белгилансин:

назарий физика соҳасининг долзарб муаммолари илмий ечимига қаратилган ҳамда унинг истиқболли йўналишлари бўйича илмий-тадқиқот ишларини амалга оширишда иштирок этиш;

назарий физиканинг квант майдон назарияси, субатом физикаси, ночизиқли физика, гравитацион майдон назарияси, квант тармоқлар ва динамик тизимларнинг муаммолари бўйича илмий анжуманлар ташкил этиш;

ёш олимлар учун назарий физиканинг квант майдон назарияси, субатом физикаси, ночизиқли физика, гравитацион майдон назарияси, квант тармоқлар ва динамик тизимлар бўйича замонавий илмий-ўқув материалларни нашрга тайёрлаш;

физика соҳасида профессор-ўқитувчилар, талабалар, докторантларнинг илмий тадқиқотларда биргаликдаги иштирок этиши асосида олий таълим ташкилотларининг илмий, амалий ва ўқув фаолияти билан интеграциясини мустаҳкамлаш;

олий таълим ташкилотларида иқтидорли талабалар ва магистрантларни илмий фаолиятга жалб этиш орқали юқори салоҳиятли ёш назариётчи физикларни тайёрлашда олий таълим ташкилотларига кўмаклашиш;

физика соҳасида халқаро илмий ҳамкорликни ривожлантириш, ривожланган мамлакатларнинг назарий физика марказлари билан соҳадаги энг илғор ҳамда истиқболли тадқиқотлар бўйича халқаро алоқаларни кенгайтиришга кўмаклашиш;

физика соҳасида ривожланган мамлакатларда олиб борилаётган тадқиқотларнинг устувор йўналишлари ва истиқболлари тўғрисида таҳлилий маълумотлар тайёрлаш;

физика соҳасида нуфузли халқаро маълумотлар базаларидаги журналларда назарий физика бўйича нашрлар сонини ошириш ҳамда физика соҳасидаги илмий журналларни босқичма-босқич нуфузли халқаро маълумотлар базаларига киритишга кўмаклашиш.

3. Мирзо Улуғбек номидаги Ўзбекистон Миллий университети ҳузуридаги Назарий физика институтининг тузилмаси иловага мувофиқ тасдиқлансин.

Университет ректорига, зарур ҳолларда, Институт тузилмасига ходимларнинг тасдиқланган умумий чекланган сони ва меҳнатга ҳақ тўлаш фонди доирасида ўзгартиришлар киритиш ҳуқуқи берилсин.

4. Белгилаб қўйилсинки:

Институт юридик шахс мақомига эга давлат илмий-таълим муассасаси ҳисобланади ҳамда Ўзбекистон Республикаси Давлат герби тасвири туширилган ва ўз номи давлат тилида ёзилган муҳрга ва бланкаларга, мустақил балансга ҳамда шахсий ғазна ҳисобварақларига эга бўлади;

Институт директори Университетнинг Илмий кенгаши тавсиясига асосан Олий таълим, фан ва инновациялар вазирлиги билан келишилган ҳолда Университет ректори томонидан лавозимга тайинланади ва лавозимидан озод этилади;

Институтнинг илмий ва раҳбар ходимларининг лавозим маошлари бюджет маблағлари ҳисобидан илмий фаолиятга оид давлат дастурларини амалга оширишда иштирок этувчи илмий муассасаларнинг илмий ва раҳбар ходимларининг базавий лавозим маошига, бошқа ходимларининг лавозим маошлари эса — Фанлар академияси илмий-тадқиқот муассасаларининг тегишли лавозимлари учун белгиланган лавозим маошларига тенглаштирилади.

5. Институт фаолиятини молиялаштириш манбалари этиб қуйидагилар белгилансин:

Институтни сақлаш билан боғлиқ харажатлар, шунингдек, Институт ходимлари (илмий ходимлардан ташқари) меҳнатига ҳақ тўлаш бўйича харажатларни молиялаштириш учун Давлат бюджети маблағлари;

илмий фаолиятга оид дастурларни амалга ошириш учун Олий таълим, фан ва инновациялар вазирлиги томонидан ўтказиладиган танловлар натижалари бўйича ажратиладиган грант маблағлари;

халқаро молия институтлари ва бошқа хорижий ташкилотларнинг грантлари;

хўжалик фаолиятидан ҳамда шартнома асосида тадқиқотлар ўтказишдан тушадиган тушумлар;

Университетнинг бюджетдан ташқари маблағлари;

қонунчилик ҳужжатлари билан тақиқланмаган бошқа манбалар.

6. Институтга қуйидаги ҳуқуқлар берилсин:

бошқа илмий ташкилотлар, жамғармалар, ўқув муассасалари, шу жумладан, халқаро ва хорижий ташкилотлар билан биргаликда илмий тадқиқотлар ўтказиш учун шартномалар тузиш;

илмий тадқиқотлар соҳасида зарур ахборотларни, статистик, таҳлилий ва бошқа маълумотларни давлат органлари ва ташкилотларидан сўраш ва бепул олиш.

7. Университет икки ой муддатда:

Институтнинг уставини тасдиқласин ва унинг белгиланган тартибда давлат рўйхатидан ўтказилишини таъминласин;

Институтни Университетнинг Тошкент шаҳри Олмазор тумани Талабалар шаҳарчасида жойлашган Физика факультети биносига текин фойдаланиш ҳуқуқи асосида жойлаштирсин;

Институтни замонавий ускуналар билан жиҳозлаш учун халқаро молия институтлари ва хорижий давлатларнинг молия ташкилотлари грантларини жалб қилиш чораларини кўрсин;

Университетнинг бюджетдан ташқари маблағлари ҳисобидан Институт фаолиятини йўлга қўйиш учун уни зарур мебель, компьютер техникаси, инвентарлар ва бошқа моддий воситалар билан жиҳозласин;

Институтни илмий фаолиятни самарали ташкил этиш, салоҳиятини оширишга қодир бўлган тажрибали мутахассислар ва илмий ходимлардан иборат юқори малакали кадрлар билан очиқ танлов асосида тўлдириш чораларини кўрсин.

8. Белгилаб қўйилсинки, Институтни бюджет маблағлари ҳисобидан сақлаш харажатлари 2026 йилда Ўзбекистон Республикасининг республика бюджетидан биринчи даражали бюджет маблағларини тақсимловчи сифатида Олий таълим, фан ва инновациялар вазирлигига ажратилган маблағлар доирасида молиялаштирилади, 2027 йилдан бошлаб эса Ўзбекистон Республикаси Давлат бюджети параметрларида назарда тутилади.

9. Олий таълим, фан ва инновациялар вазирлиги:

манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни икки ой муддатда ушбу қарорга мувофиқлаштирсин;

уч ой муддатда Институтнинг илмий-инновацион фаолиятини ташкил этиш ҳамда моддий-техник базасини мустаҳкамлаш бўйича чора-тадбирлар дастурини ишлаб чиқсин ва тасдиқласин.

10. Ушбу қарорнинг бажарилишини назорат қилиш Ўзбекистон Республикаси олий таълим, фан ва инновациялар вазири К.А. Шарипов зиммасига юклансин.

Вазирлар Маҳкамасининг 2025 йил 17 декабрдаги 795-сон қарорига ИЛОВА

Мирзо Улуғбек номидаги Ўзбекистон Миллий университети ҳузуридаги Назарий физика институтининг

Илмий котиб Директор Илмий кенгаш Директорнинг илм-фан бўйича ўринбосари Бош юрисконсульт Квант майдон назарияси илмий лабораторияси 1 Ночизиқли физика илмий лабораторияси 1 Бош бухгалтер Сунъий интеллект, ҳисоблаш ва маълумотлар базаси илмий лабораторияси 1 Ходимлар билан ишлаш бўйича мутахассис Субатом физикаси илмий лабораторияси 1 Ахборот-коммуникация технологиялари бўйича мутахассис Гравитацион майдон назарияси илмий лабораторияси 1 Квант тармоқлар ва динамик тизимлар лабораторияси 1

Ўзбекистон Республикасининг Бош вазири А. АРИПОВ

Тошкент ш.,

2025 йил 17 декабрь,

795-сон

(Қонунчилик маълумотлари миллий базаси, 18.12.2025 й., 09/25/795/1175-сон)

lex.uz

Oʻzbekiston Respublikasi Vazirlar Mahkamasining

qarori

TUZILMASI

Mirzo Ulugʻbek nomidagi Oʻzbekiston Milliy universiteti huzurida Nazariy fizika institutini tashkil etish toʻgʻrisida

Oʻzbekiston Respublikasi Prezidentining “Fizika sohasidagi taʼlim sifatini oshirish va ilmiy tadqiqotlarni rivojlantirish chora-tadbirlari toʻgʻrisida” 2021-yil 19-martdagi PQ-5032-son qaroriga muvofiq nazariy fizika sohasida yuqori malakali ilmiy kadrlar tayyorlash, fundamental va amaliy loyihalarni rivojlantirish hamda amaliyotga joriy etish samaradorligini oshirish, fizika yoʻnalishidagi zamonaviy ilm-fan talablariga asoslangan ilmiy faoliyatning oʻquv jarayoni va ishlab chiqarish bilan integratsiyasini yanada chuqurlashtirish maqsadida Vazirlar Mahkamasi qaror qiladi:

1. Oliy taʼlim, fan va innovatsiyalar vazirligi hamda Fanlar akademiyasining Mirzo Ulugʻbek nomidagi Oʻzbekiston Milliy universiteti (keyingi oʻrinlarda — Universitet) huzurida Nazariy fizika institutini (keyingi oʻrinlarda — Institut) tashkil etish toʻgʻrisidagi taklifiga rozilik berilsin.

2. Quyidagilar Institutning asosiy vazifalari etib belgilansin:

nazariy fizika sohasining dolzarb muammolari ilmiy yechimiga qaratilgan hamda uning istiqbolli yoʻnalishlari boʻyicha ilmiy-tadqiqot ishlarini amalga oshirishda ishtirok etish;

nazariy fizikaning kvant maydon nazariyasi, subatom fizikasi, nochiziqli fizika, gravitatsion maydon nazariyasi, kvant tarmoqlar va dinamik tizimlarning muammolari boʻyicha ilmiy anjumanlar tashkil etish;

yosh olimlar uchun nazariy fizikaning kvant maydon nazariyasi, subatom fizikasi, nochiziqli fizika, gravitatsion maydon nazariyasi, kvant tarmoqlar va dinamik tizimlar boʻyicha zamonaviy ilmiy-oʻquv materiallarni nashrga tayyorlash;

fizika sohasida professor-oʻqituvchilar, talabalar, doktorantlarning ilmiy tadqiqotlarda birgalikdagi ishtirok etishi asosida oliy taʼlim tashkilotlarining ilmiy, amaliy va oʻquv faoliyati bilan integratsiyasini mustahkamlash;

oliy taʼlim tashkilotlarida iqtidorli talabalar va magistrantlarni ilmiy faoliyatga jalb etish orqali yuqori salohiyatli yosh nazariyotchi fiziklarni tayyorlashda oliy taʼlim tashkilotlariga koʻmaklashish;

fizika sohasida xalqaro ilmiy hamkorlikni rivojlantirish, rivojlangan mamlakatlarning nazariy fizika markazlari bilan sohadagi eng ilgʻor hamda istiqbolli tadqiqotlar boʻyicha xalqaro aloqalarni kengaytirishga koʻmaklashish;

fizika sohasida rivojlangan mamlakatlarda olib borilayotgan tadqiqotlarning ustuvor yoʻnalishlari va istiqbollari toʻgʻrisida tahliliy maʼlumotlar tayyorlash;

fizika sohasida nufuzli xalqaro maʼlumotlar bazalaridagi jurnallarda nazariy fizika boʻyicha nashrlar sonini oshirish hamda fizika sohasidagi ilmiy jurnallarni bosqichma-bosqich nufuzli xalqaro maʼlumotlar bazalariga kiritishga koʻmaklashish.

3. Mirzo Ulugʻbek nomidagi Oʻzbekiston Milliy universiteti huzuridagi Nazariy fizika institutining tuzilmasi ilovaga muvofiq tasdiqlansin.

Universitet rektoriga, zarur hollarda, Institut tuzilmasiga xodimlarning tasdiqlangan umumiy cheklangan soni va mehnatga haq toʻlash fondi doirasida oʻzgartirishlar kiritish huquqi berilsin.

4. Belgilab qoʻyilsinki:

Institut yuridik shaxs maqomiga ega davlat ilmiy-taʼlim muassasasi hisoblanadi hamda Oʻzbekiston Respublikasi Davlat gerbi tasviri tushirilgan va oʻz nomi davlat tilida yozilgan muhrga va blankalarga, mustaqil balansga hamda shaxsiy gʻazna hisobvaraqlariga ega boʻladi;

Institut direktori Universitetning Ilmiy kengashi tavsiyasiga asosan Oliy taʼlim, fan va innovatsiyalar vazirligi bilan kelishilgan holda Universitet rektori tomonidan lavozimga tayinlanadi va lavozimidan ozod etiladi;

Institutning ilmiy va rahbar xodimlarining lavozim maoshlari budjet mablagʻlari hisobidan ilmiy faoliyatga oid davlat dasturlarini amalga oshirishda ishtirok etuvchi ilmiy muassasalarning ilmiy va rahbar xodimlarining bazaviy lavozim maoshiga, boshqa xodimlarining lavozim maoshlari esa — Fanlar akademiyasi ilmiy-tadqiqot muassasalarining tegishli lavozimlari uchun belgilangan lavozim maoshlariga tenglashtiriladi.

5. Institut faoliyatini moliyalashtirish manbalari etib quyidagilar belgilansin:

Institutni saqlash bilan bogʻliq xarajatlar, shuningdek, Institut xodimlari (ilmiy xodimlardan tashqari) mehnatiga haq toʻlash boʻyicha xarajatlarni moliyalashtirish uchun Davlat budjeti mablagʻlari;

ilmiy faoliyatga oid dasturlarni amalga oshirish uchun Oliy taʼlim, fan va innovatsiyalar vazirligi tomonidan oʻtkaziladigan tanlovlar natijalari boʻyicha ajratiladigan grant mablagʻlari;

xalqaro moliya institutlari va boshqa xorijiy tashkilotlarning grantlari;

xoʻjalik faoliyatidan hamda shartnoma asosida tadqiqotlar oʻtkazishdan tushadigan tushumlar;

Universitetning budjetdan tashqari mablagʻlari;

qonunchilik hujjatlari bilan taqiqlanmagan boshqa manbalar.

6. Institutga quyidagi huquqlar berilsin:

boshqa ilmiy tashkilotlar, jamgʻarmalar, oʻquv muassasalari, shu jumladan, xalqaro va xorijiy tashkilotlar bilan birgalikda ilmiy tadqiqotlar oʻtkazish uchun shartnomalar tuzish;

ilmiy tadqiqotlar sohasida zarur axborotlarni, statistik, tahliliy va boshqa maʼlumotlarni davlat organlari va tashkilotlaridan soʻrash va bepul olish.

7. Universitet ikki oy muddatda:

Institutning ustavini tasdiqlasin va uning belgilangan tartibda davlat roʻyxatidan oʻtkazilishini taʼminlasin;

Institutni Universitetning Toshkent shahri Olmazor tumani Talabalar shaharchasida joylashgan Fizika fakulteti binosiga tekin foydalanish huquqi asosida joylashtirsin;

Institutni zamonaviy uskunalar bilan jihozlash uchun xalqaro moliya institutlari va xorijiy davlatlarning moliya tashkilotlari grantlarini jalb qilish choralarini koʻrsin;

Universitetning budjetdan tashqari mablagʻlari hisobidan Institut faoliyatini yoʻlga qoʻyish uchun uni zarur mebel, kompyuter texnikasi, inventarlar va boshqa moddiy vositalar bilan jihozlasin;

Institutni ilmiy faoliyatni samarali tashkil etish, salohiyatini oshirishga qodir boʻlgan tajribali mutaxassislar va ilmiy xodimlardan iborat yuqori malakali kadrlar bilan ochiq tanlov asosida toʻldirish choralarini koʻrsin.

8. Belgilab qoʻyilsinki, Institutni budjet mablagʻlari hisobidan saqlash xarajatlari 2026-yilda Oʻzbekiston Respublikasining respublika budjetidan birinchi darajali budjet mablagʻlarini taqsimlovchi sifatida Oliy taʼlim, fan va innovatsiyalar vazirligiga ajratilgan mablagʻlar doirasida moliyalashtiriladi, 2027-yildan boshlab esa Oʻzbekiston Respublikasi Davlat budjeti parametrlarida nazarda tutiladi.

9. Oliy taʼlim, fan va innovatsiyalar vazirligi:

manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtirsin;

uch oy muddatda Institutning ilmiy-innovatsion faoliyatini tashkil etish hamda moddiy-texnik bazasini mustahkamlash boʻyicha chora-tadbirlar dasturini ishlab chiqsin va tasdiqlasin.

10. Ushbu qarorning bajarilishini nazorat qilish Oʻzbekiston Respublikasi oliy taʼlim, fan va innovatsiyalar vaziri K.A. Sharipov zimmasiga yuklansin.

Vazirlar Mahkamasining 2025-yil 17-dekabrdagi 795-son qaroriga ILOVA

Mirzo Ulugʻbek nomidagi Oʻzbekiston Milliy universiteti huzuridagi Nazariy fizika institutining

Ilmiy kotib Direktor Ilmiy kengash Direktorning ilm-fan boʻyicha oʻrinbosari Bosh yuriskonsult Kvant maydon nazariyasi ilmiy laboratoriyasi 1 Nochiziqli fizika ilmiy laboratoriyasi 1 Bosh buxgalter Sunʼiy intellekt, hisoblash va maʼlumotlar bazasi ilmiy laboratoriyasi 1 Xodimlar bilan ishlash boʻyicha mutaxassis Subatom fizikasi ilmiy laboratoriyasi 1 Axborot-kommunikatsiya texnologiyalari boʻyicha mutaxassis Gravitatsion maydon nazariyasi ilmiy laboratoriyasi 1 Kvant tarmoqlar va dinamik tizimlar laboratoriyasi 1

Oʻzbekiston Respublikasining Bosh vaziri A. ARIPOV

Toshkent sh.,

2025-yil 17-dekabr,

795-son

(Qonunchilik maʼlumotlari milliy bazasi, 18.12.2025-y., 09/25/795/1175-son)

lex.uz