UzbekAI

Ўзбекистон Республикаси Вазирлар Маҳкамасининг

қарори

НИЗОМ

НИЗОМ

Ижод мактаблари фаолиятини тартибга солиш соҳасидаги айрим норматив-ҳуқуқий ҳужжатларни тасдиқлаш тўғрисида

Ўзбекистон Республикаси Президентининг «Ижод мактаблари фаолиятини янада такомиллаштириш чора-тадбирлари тўғрисида» 2024 йил 1 апрелдаги ПҚ-147-сон қарорининг ижросини таъминлаш, шунингдек, ижод мактабларида таълим сифатини янада ошириш, ўқувчиларни касбга ўргатиш, ходимларнинг меҳнатини рағбатлантириш тизимини янада такомиллаштириш мақсадида Вазирлар Маҳкамаси қарор қилади:

1. Қуйидагилар:

Ўзбекистон Республикаси Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлиги тизимидаги ижод мактаблари тўғрисидаги низом 1-иловага мувофиқ;

Ўзбекистон Республикаси Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлиги тизимидаги ижод мактаблари ходимларини рағбатлантириш жамғармаси тўғрисидаги низом 2-иловага мувофиқ тасдиқлансин.

2. Белгилансинки, 2026 йил 1 январдан бошлаб Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлиги тизимидаги таълим муассасаларида:

беш кунлик таълим жараёни йўлга қўйилади;

шанба куни барча фан ўқитувчилари учун «Касбий ривожланиш куни» этиб белгиланади;

халқаро аккредитациядан ўтказиладиган ҳамда халқаро дастурлар асосида таълим бериладиган таълим муассасаларида икки семестрли ўқиш тизими жорий этилади.

3. Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлиги:

2026 йилдан бошлаб ижод мактабларининг фаолияти самарадорлигини баҳолаш орқали уларнинг рейтингини эълон қилиб борсин;

бир ой муддатда ўз тизимдаги таълим ташкилотлари уставларини ушбу қарорга мувофиқ қайта кўриб чиқсин.

4. Мактабгача ва мактаб таълими вазирлиги:

манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни икки ой муддатда ушбу қарорга мувофиқлаштирсин;

Ихтисослаштирилган таълим муассасалари агентлиги тизимидаги ижод мактаблари ходимларини рағбатлантириш жамғармасига ажратилган маблағлардан мақсадли фойдаланилиши устидан доимий назорат ўрнатсин.

5. Ўзбекистон Республикаси Ҳукуматининг 3-иловага мувофиқ айрим қарорларига ўзгартириш ва қўшимчалар киритилсин.

6. Ушбу қарорнинг бажарилишини назорат қилиш Ўзбекистон Республикаси мактабгача ва мактаб таълими вазири Э.Г. Каримова зиммасига юклансин.

Вазирлар Маҳкамасининг 2025 йил 17 декабрдаги 797-сон қарорига 1-ИЛОВА

Ўзбекистон Республикаси Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлиги тизимидаги ижод мактаблари тўғрисида

1-боб. Умумий қоидалар

1. Ушбу Низом Ўзбекистон Республикаси Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлиги (кейинги ўринларда — Агентлик) тизимидаги ижод мактабларининг (кейинги ўринларда — ижод мактаблари) ҳуқуқий мақоми, мақсади, асосий вазифалари, ҳуқуқлари ва мажбуриятлари, уларни ташкил этиш ҳамда фаолиятини назорат қилиш тартибини белгилайди.

2. Ижод мактаблари ўз фаолиятида Ўзбекистон Республикасининг Конституцияси ва қонунларига, Ўзбекистон Республикаси Олий Мажлиси палаталарининг қарорларига, Ўзбекистон Республикаси Президентининг фармонлари, қарорлари ва фармойишларига, Ўзбекистон Республикаси Вазирлар Маҳкамасининг қарорлари ва фармойишларига, ушбу Низомга, ўз уставига, шунингдек, бошқа қонунчилик ҳужжатларига амал қилади.

3. Агентлик ижод мактаблари фаолиятига умумий раҳбарлик қилади ва уларни назорат қилади.

4. Ижод мактаблари бадиий адабиёт ва ижоднинг бошқа турларига қизиқадиган иқтидорли ўқувчиларни саралаб олиш орқали 7 — 11-синфлар кесимида уларнинг интеллектуал салоҳияти ва ижодий истеъдодини янада ривожлантиришга мўлжалланган давлат умумий ўрта таълим муассасаси ҳисобланади.

5. Ижод мактаблари Ўзбекистон Республикаси Давлат герби тасвири туширилган ва ўз номи давлат тилида ёзилган муҳрга ва бланкаларга, мустақил балансга, Ўзбекистон Республикаси Иқтисодиёт ва молия вазирлиги ҳузуридаги Ғазначилик хизмати қўмитаси бўлинмаларида шахсий ғазна ҳисобварақларига, банк ҳисобварақларига, шу жумладан, хорижий валютадаги шахсий ғазна ҳисобварақларига эга бўлади.

6. Ижод мактаблари белгиланган тартибда ўз номидан мулкий ва шахсий номулкий ҳуқуқларга эга бўлиши ва уларни амалга ошириши, шунингдек, зиммасига мажбуриятлар олиши, судда даъвогар ва жавобгар бўлиши мумкин.

2-боб. Ижод мактабларининг мақсади, асосий вазифалари, ҳуқуқлари ва мажбуриятлари

7. Ижод мактабларининг мақсади давлат таълим стандартлари ҳамда мақбуллаштирилган ўқув режаси ва таълим дастурларига мувофиқ бадиий адабиёт ва ижоднинг бошқа турлари бўйича иқтидорли ўқувчиларнинг таълим-тарбия олишдаги конституциявий ҳуқуқини рўёбга чиқариш ҳисобланади.

8. Ижод мактабларининг асосий вазифалари қуйидагилардан иборат:

бадиий адабиёт ва бошқа ижод соҳаларига қизиқадиган ўқувчиларни аниқлаш, саралаш ва уларнинг интеллектуал ва ижодий (шеърият, наср, халқ оғзаки ижоди, драматургия, публицистика ва бошқалар) истеъдодини янада ривожлантириш тизимини яратиш;

ўқувчиларни ватанпарварлик ва фидойилик руҳида тарбиялаш, уларда ўз Ватани билан фахрланиш ва миллий маданий-тарихий анъаналарни ҳурмат қилиш туйғусини шакллантириш;

аниқ фуқаролик позициясига эга бўлган, ўзбек тили ва адабиётини жаҳонга танитишга хизмат қиладиган ижодкор ёшларни тарбиялаш;

миллий қадриятларга таянган ҳолда, илғор педагогик технологиялар асосида она тили ва адабиёт ҳамда ижтимоий фанлардан сифатли таълим бериш тизимини жорий этиш;

ўқувчиларни креатив ва танқидий фикрлаш, тизимли таҳлил қилиш, олинган билим, малака ва кўникмаларни амалиётда қўллаш, нотиқлик санъати, лойиҳаларни бошқариш кўникмаларига ўргатиш;

ўқувчиларга хорижий тилларни чуқур ўргатиш, уларда жаҳон адабиёти дурдоналарини, турли услубдаги матнларни ўзбек тилига таржима қилиш асосларини ҳамда кўникмаларини ривожлантириш;

ўқувчиларни меҳнат бозорида талаб юқори бўлган касб-ҳунарларга ўргатиш тизимини жорий қилиш;

моддий-техник базани мустаҳкамлаш, таълим-тарбия сифати ва самарадорлигини оширишга қаратилган чора-тадбирларни амалга ошириш.

9. Ижод мактаблари қуйидаги ҳуқуқларга эга:

ваколатига кирадиган масалалар ҳамда ўзига юкланган вазифалар ва функцияларни бажариш билан боғлиқ бўлган қарорлар, буйруқлар, кўрсатмалар қабул қилиш, зарур бўлганда бошқа давлат ташкилотлари билан биргаликда тегишли қарорлар қабул қилиш;

ваколатига кирадиган масалаларда белгиланган тартибда судларга аризалар ва даъволар киритиш;

қонунчилик ҳужжатларида белгиланган тартибда бюджетдан ташқари жамғармаларга эга бўлиш;

ўз уставида белгиланган фаолиятни амалга ошириш учун қонунчилик ҳужжатларида тақиқланмаган молиявий манбаларни жалб қилиш;

белгиланган тартибда шартномалар тузиш;

давлат органлари ва манфаатдор шахслардан ўз ваколати доирасида зарур ахборотларни сўраш ва олиш;

Агентлик билан биргаликда юқори малакали чет эллик мутахассислар ва бошқа ходимларни ижод мактаблари фаолиятига жалб қилиш;

Агентлик билан ўзига юкланган вазифаларни ўз вақтида, самарали ва сифатли бажариш учун белгиланган тартибда ўзаро ҳамкорлик қилиш.

Ижод мактаблари қонунчилик ҳужжатларига мувофиқ бошқа ҳуқуқларга ҳам эга бўлиши мумкин.

10. Ижод мактаблари:

ўзига юкланган вазифа ва функцияларни самарали бажариши;

фаолиятини ривожлантириш бўйича тасдиқланган дастурлар, чора-тадбирлар режаси, «йўл хариталари» ва бошқа дастурий ҳужжатлар ижросини таъминлаши;

ўзига бириктирилган мулклар, шу жумладан, кўчмас мулклардан мақсадли ва самарали фойдаланиши;

таълим-тарбия жараёнларини Агентлик томонидан тасдиқланадиган ўқув режалари ва таълим дастурлари асосида сифатли амалга ошириши;

раҳбар ва педагог ходимларни белгиланган тартибда танлов асосида ишга қабул қилиши;

раҳбар, педагог ва ходимларнинг ҳуқуқлари ҳамда қонуний манфаатларини ҳимоя қилиши;

халқаро тан олинган дастур ва дарсликларни қўллаган ҳолда давлат таълим стандартларига мувофиқ таълим жараёнини ташкил қилиши;

ўқувчиларнинг қизиқишларидан келиб чиққан ҳолда, синфдан ташқари, ижодий ҳамда касбга йўналтирилган амалий машғулотлар ўтказиши;

ўқувчилар учун қонунчилик ҳужжатларида белгиланган тартибда аутсорсинг усулида бепул соғлом овқатлантиришни ташкил этиши лозим.

Ижод мактабларига қонунчилик ҳужжатларига мувофиқ бошқа мажбуриятлар ҳам юкланиши мумкин.

11. Ижод мактаблари давлат активларини, шу жумладан, уларнинг товар-моддий бойликлари ва бошқа мол-мулкларининг бут сақланиши бўйича моддий жавобгар ҳисобланади.

3-боб. Ижод мактабларида таълим-тарбия жараёнини ташкил этиш

12. Ижод мактабларида таълим-тарбия жараёни 7 — 11-синфларда амалга оширилади.

Бир синфдаги ўқувчилар сони 20 нафардан ортиқ бўлишига йўл қўйилмайди.

13. Ижод мактабларига ўқувчилар Вазирлар Маҳкамасининг «Президент, ижод, ихтисослаштирилган мактаб ва мактаб-интернатларга ўқувчиларни саралаб олиш ҳамда қабул қилиш тартибига оид норматив-ҳуқуқий ҳужжатларни тасдиқлаш тўғрисида» 2023 йил 27 майдаги 214-сон қарори асосида қабул қилинади.

14. Ўқув ҳафтаси 5 кун давом этади. Бунда ижод мактаби Педагогик кенгаш қарори асосида 6 кунлик ўқув ҳафтасига ўтказилиши мумкин.

15. Ижод мактабларида таълим-тарбия жараёни ихтисослик фанлари бўйича Агентлик томонидан тасдиқланадиган ўқув режаси ва таълим дастурларига мувофиқ, умумтаълим фанлари бўйича эса умумий ўрта таълимнинг таянч таълим дастури асосида амалга оширилади.

Агентлик томонидан тасдиқланган ўқув режасига мувофиқ халқаро аккредитациядан ўтказиладиган ҳамда халқаро дастурлар асосида таълим бериладиган ижод мактабларида икки семестрли ўқиш тизими жорий этилиши мумкин.

16. Ижод мактабларининг ихтисослик йўналишлари Агентлик томонидан белгиланади.

17. Ижод мактаблари битирувчиларига давлат намунасидаги таълим тўғрисидаги ҳужжат берилади.

18. Ўқувчилар Агентлик томонидан тасдиқланган ўқув режасидаги фанлардан йиллик сумматив баҳолашдан муваффақиятли ўтганда, ижод мактаби директорининг буйруғи билан кейинги синфга ўтказилади.

19. Ўқувчилар қуйидаги ҳолларда ижод мактабининг ўқувчилари сафидан чиқарилади ёки четлаштирилади:

ўқувчи ўз ташаббуси билан бошқа умумий ўрта таълим муассасасига кўчириш (ота-онасининг ёки қонуний вакилларининг аризаси асосида) истагини билдирганда;

кириш имтиҳонларини топшириш жараёнларида ўқувчи томонидан тақдим этилган (топширилган) ҳужжатларнинг қалбакилиги аниқланганда;

ўқувчи томонидан ижод мактабининг ички тартиб-қоидалари қўпол равишда бузилганда;

ўқувчининг ўзлаштиришида тизимли пасайиш бўлганда. Бунда:

фанлардан чораклик, ярим йиллик (сумматив баҳолаш) натижалар асосида 65 балл ва ундан кам балл тўплаган ўқувчилар ва уларнинг ота-оналари (уларнинг ўрнини босувчи шахслар) ёзма равишда огоҳлантирилади, йиллик ўзлаштириш мониторинг натижаларида ҳам ушбу ҳолатлар қайд этилган тақдирда, ушбу ўқувчиларни Педагогик кенгаш қарорига асосан ўқувчилар сафидан чиқариш, аввал ўқиган мактабига ёки бошқа умумий ўрта таълим муассасасига ўтказиш чоралари кўрилади;

ўқувчининг ота-онаси (уларнинг ўрнини босувчи шахслар) томонидан ихтиёрий равишда ўқиш бошқа мактабда кўчирилмаган тақдирда, ўқувчи Педагогик кенгаш қарори асосида Болалар масалалари бўйича Қорақалпоғистон Республикаси, вилоятлар ва Тошкент шаҳри комиссиялари билан келишилган ҳолда, аввал ўқиган мактабига қайтариб юборилади (ўқувчининг яшаш жойи ўзгарган тақдирда, ҳудуддаги бошқа мактабга);

ўзлаштириш кўрсаткичи инобатга олинадиган фанлар рўйхати ҳар ўқув йили бошланишидан аввал Педагогик кенгаш қарори билан тасдиқланади ҳамда ўқувчилар ва уларнинг ота-оналарига (уларнинг ўрнини босувчи шахсларга) таништирилади.

20. Ижод мактабининг ўқувчиларида даволаш-профилактика муассасаларида стационар шароитда узоқ муддат даволанишга муҳтожлик юзага келган тақдирда, улар Педагогик кенгаш қарори асосида ўқувчилар сафидан чиқарилади ҳамда аввал ўқиган мактабига (ўқувчининг яшаш жойи ўзгарган тақдирда, ҳудуддаги бошқа мактабга) қайтариб юборилади.

Даволаш-профилактика муассасаларида стационар шароитда узоқ муддат даволанишга муҳтож болалар белгиланган тартибда аввал ўқиган ёки яшаш жойи ўзгарган ҳудуддаги умумий ўрта таълим мактабида ўқишини давом эттиради.

4-боб. Ижод мактабларида ўқувчиларни соғлом овқатлантириш ва уларнинг саломатлигини таъминлаш

21. Ижод мактабларида Вазирлар Маҳкамасининг «Ўзбекистон Республикаси Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлиги тизимидаги мактабларда соғлом овқатлантиришни аутсорсинг усулида ташкил этиш тўғрисида» 2021 йил 14 апрелдаги 218-сон қарори асосида ўқувчиларни хавфсиз ва сифатли овқатлантириш ташкил этилади.

22. Ижод мактабининг тиббиёт ходимлари томонидан ўқувчиларга тиббий хизмат кўрсатилади.

Бунда тиббиёт ходимлари ижод мактаби раҳбарияти ва педагог ходимлари билан биргаликда даволаш-профилактика тадбирларини ташкил этиш, ўқув биноси ва ўқувчилар турар жойида санитария нормалари, қоидалари ва гигиена нормативларига риоя қилиш, овқатланиш режими ва сифати, ўқувчиларни тиббий кўрикдан ўтказиш ва соғломлаштириш учун масъул ҳисобланади.

23. Ижод мактабларининг раҳбарияти томонидан тиббиёт ходимларининг фаолият юритиши учун зарур шарт-шароитлар яратиб берилиши шарт.

24. Ижод мактаблари ўқувчилари белгиланган тартибда Ўзбекистон Республикаси Соғлиқни сақлаш вазирлиги томонидан ҳар йили бир маротаба чуқурлаштирилган тиббий кўрикдан ўтказилади.

25. Ижод мактабларида таълим-тарбия жараёни психологик жиҳатдан ижод мактаблари психологлари томонидан таъминланади.

5-боб. Ижод мактабларининг фаолиятини назорат қилиш

26. Ижод мактаблари ҳар йили ҳисобот даври тугагач, Агентликка фаолияти тўғрисида ҳисобот тақдим этади.

27. Ижод мактабларида бюджет тўғрисидаги қонунчилик талабларига риоя этилиши Ўзбекистон Республикаси Мактабгача ва мактаб таълими вазирлигининг ички аудит ва молиявий назорат масаласига масъул таркибий бўлинмаси томонидан назорат қилинади.

28. Агентлик ижод мактаблари раҳбарияти зиммасига юкланган вазифаларнинг самарали бажарилишини мунтазам мониторинг қилиб боради, мониторинг натижаларига кўра ижод мактаблари фаолияти самарадорлигига баҳо беради.

29. Мониторинг ва баҳолаш якунлари бўйича юқори кўрсаткичга эришган ижод мактабларининг раҳбарияти ва ходимлари рағбатлантирилади ёки йўл қўйилган камчиликлари учун интизомий жавобгарликка тортилиши мумкин.

30. Ижод мактаблари фаолиятига оид ҳужжатларнинг сақланишига ижод мактаблари раҳбарлари жавобгар ҳисобланади.

6-боб. Якунловчи қоидалар

31. Ижод мактаблари қонунчилик ҳужжатларига мувофиқ ўқув йили якунида муассис томонидан қайта ташкил этилади ёки тугатилади.

Агентлик ижод мактаблари тугатилганда, ўқувчиларни ота-оналарининг (уларнинг ўрнини босувчи шахсларнинг) розилиги билан бошқа умумий ўрта таълим муассасаларига ўтказиш масъулиятини ўз зиммасига олади.

32. Ижод мактаблари тугатилган тақдирда, унинг маблағлари ва мол-мулкидан унинг мажбуриятларини қоплаш бўйича тўловлар чегирилган ҳолда қонунчилик ҳужжатларига ва ижод мактаблари уставига мувофиқ фойдаланилади.

33. Ушбу Низом талабларининг бузилишида айбдор бўлган шахслар қонунчилик ҳужжатларида белгиланган тартибда жавоб берадилар.

Вазирлар Маҳкамасининг 2025 йил 17 декабрдаги 797-сон қарорига 2-ИЛОВА

Ўзбекистон Республикаси Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлиги тизимидаги ижод мактаблари ходимларини рағбатлантириш жамғармаси тўғрисида

1-боб. Умумий қоидалар

1. Ушбу Низом Ўзбекистон Республикаси Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлиги (кейинги ўринларда — Агентлик) тизимидаги ижод мактабларининг (кейинги ўринларда — ижод мактаблари) маъмурий-бошқарув, педагогик, ўқув-ёрдамчи, техник ва хизмат кўрсатувчи ходимларини рағбатлантириш жамғармаси (кейинги ўринларда — Жамғарма) маблағларидан фойдаланиш тартибини белгилайди.

2. Ушбу Низомда кўрсатилган устамалар ходимларнинг моддий рағбатлантириш турларига қўшимча тарзда берилади.

3. Ушбу Низомда қуйидаги асосий тушунчалар қўлланилади:

рейтинг — ижод мактабларининг маъмурий-бошқарув, педагогик, ўқув-ёрдамчи ходимларининг (кейинги ўринларда — ходимлар) фаолияти самарадорлигини баҳолаш мезонлари асосида уларнинг энг юқори кўрсаткичдан камайиш тартибида ўрнини аниқлаш;

рейтинг кўрсаткичлари — ижод мактаблари ходимларининг фаолияти самарадорлигини белгилаш мезонлари;

ходимларни рағбатлантириш комиссияси (кейинги ўринларда — Комиссия) — рейтинг кўрсаткичларини умумлаштириш, таҳлил қилиш орқали ижод мактабининг фаолияти самарадорлигини баҳолаш, шунингдек, ходимларга устама миқдори, рағбатлантириш ҳамда моддий ёрдамни белгилаш бўйича комиссия.

4. Жамғарма ижод мактабида ходимларнинг меҳнатга ҳақ тўлаш фондининг 50 фоизидан кўп бўлмаган миқдорда Давлат бюджети маблағлари ҳисобидан шакллантирилади.

Ижод мактабларининг ходимларига устама, рағбатлантириш ҳамда моддий ёрдам Жамғарма маблағлари ҳисобидан амалга оширилади.

Жамғарма маблағлари харажатлар сметасида иқтисодий тасниф бўйича 41 11 230 сатрида режалаштирилади.

2-боб. Ижод мактабларининг рейтингини аниқлаш тартиби

5. Ижод мактаблари ва уларда фаолият юритаётган ходимлар ўртасида соғлом рақобат муҳитини яратиш мақсадида рейтинг кўрсаткичлари Агентлик томонидан тасдиқланади.

6. Агентлик:

тасдиқланган рейтинг кўрсаткичлари асосида ижод мактаблари томонидан тақдим этилган кўрсаткичларни умумлаштиради ва таҳлил қилади;

зарур ҳолларда, маълумотларни ўрганиш даврида кўрсатилган ҳолатларни аниқлаштириш бўйича ижод мактаблари ёки тегишли ташкилотларга сўровлар юборади. Бунда асоссиз киритилган балларни бекор қилиши ёки асосли балларни қўшиб ҳисоблаши мумкин;

умумлаштирилган рейтинг кўрсаткичлари натижалари асосида ҳар йили 1 сентябрга қадар ижод мактабларининг рейтингини эълон қилади.

7. Рейтинг натижалари кейинги рейтинг эълон қилингунга қадар амал қилади.

3-боб. Комиссия фаолиятини ташкил этиш

8. Комиссия таркиби 7 нафардан кам бўлмаган тоқ таркибда ижод мактаби директори буйруғи билан тасдиқланади.

Комиссия таркибига ижод мактаби директори, директор ўринбосарлари, кадрлар бўйича менежер, касаба уюшмаси қўмитаси раиси ва жамоатчилик вакиллари (ота-оналар) киритилади.

Ижод мактаби директори (ёки унинг вазифаси юкланган шахс) комиссия раиси, ўқув ишлари бўйича директор ўринбосари Комиссия котиби ҳисобланади.

Комиссия таркибидаги жамоатчилик (ота-оналар) вакиллари ҳар йили янгиланиб борилиши шарт.

9. Комиссия йиғилишлари аъзоларининг учдан икки қисми иштирок этган тақдирда ваколатли ҳисобланади.

10. Ходимларга устама ва рағбатлантирувчи тўловлар миқдорларини белгилаш тўғрисидаги қарор Комиссия аъзоларининг очиқ овоз бериш йўли билан қабул қилинади.

Ходимларга ҳар ойлик устама, бир марталик рағбатлантириш ёки моддий ёрдамларни белгилаш Комиссия баёни асосида ижод мактаби директорининг буйруғи билан расмийлаштирилади (ўзгартирилади ёки бекор қилинади).

11. Қонунчилик ҳужжатларида устама ва рағбатлантириш тўловлари берилмаслиги назарда тутилган ҳолларда, ходимларга устама ва рағбатлантириш тўловлари белгиланмайди.

4-боб. Комиссиянинг ваколатлари

12. Қуйидагилар Комиссиянинг ваколатлари ҳисобланади:

ижод мактабининг фаолияти самарадорлиги бўйича тасдиқланган рейтинг кўрсаткичлари бўйича дастлабки асослантирувчи ҳужжатларни тайёрлаш, уларни ўрганиш ва Агентликка тақдим этиш;

Агентлик томонидан эълон қилинган рейтинг асосида ижод мактабининг маъмурий-бошқарув ва ўқув-ёрдамчи ходимлари учун устамаларни белгилаш (бекор қилиш);

ўқитувчиларнинг фаолияти самарадорлигини таҳлил қилиш, уларнинг рейтинг кўрсаткичини аниқлаш ва уларга ушбу Низом асосида ҳар ойлик устамаларни белгилаш;

техник ва хизмат кўрсатувчи ходимларнинг ҳар ойлик устамаларини белгилаш (бекор қилиш);

Агентликнинг тавсияси асосида ходимларга бир марталик рағбатлантириш миқдорини белгилаш;

ходимларга моддий ёрдам ажратиш бўйича ҳужжатларни кўриб чиқиш ва моддий ёрдам ажратиш ёки ажратмаслик тўғрисида қарор қабул қилиш.

5-боб. Ҳар ойлик устамаларнинг миқдорлари ҳамда уларни ҳисоблаш тартиби

13. Ижод мактаблари ходимларининг лавозим маоши ёки базавий тариф ставкасига қўшиладиган ҳар ойлик устамалар Комиссия хулосасига асосан қуйидаги миқдорларда белгиланади:

а) маъмурий-бошқарув (штатлар жадвали асосида) ходимларига:

Агентлик томонидан эълон қилинган ижод мактабларининг рейтингига мос равишда 1-ўрин учун 250 фоиз, охирги ўринни олган ижод мактаби учун 100 фоиз миқдорида.

Қолган ижод мактаби рейтингда олган ўрнига қараб, устама миқдори интерполяция усули орқали қуйидаги формула асосида аниқланади:

F м = 250 - R ў - 1 x 150. М -1

Бу ерда:

F м — ижод мактабининг маъмурий-бошқарув ходимларига белгиланадиган устама миқдори;

R ў — ижод мактабининг рейтингдаги ўрни;

М — жами ижод мактаблари сони.

Ижод мактабининг тўплаган балли рейтинг учун белгиланган энг юқори баллнинг 30 фоизидан кам бўлган ҳолларда устама белгиланмайди;

б) ўқитувчиларга:

рейтинг кўрсаткичлари асосида энг юқори балл (1-ўрин) тўплаган ўқитувчига 50 фоиз миқдорида;

кейинги ўринлар учун устама миқдори қуйидаги формула асосида аниқланади:

F ў = 50 x B ў . maxB

Бу ерда:

F ў — ижод мактаби ўқитувчисига белгиланадиган устама миқдори;

maxB — ижод мактаби ўқитувчисининг рейтинг кўрсаткичлари асосида энг юқори тўплаган балли;

B ў — устама белгиланаётган ўқитувчининг рейтинг кўрсаткичлари асосида тўплаган балли.

Рейтинг кўрсаткичлари ҳар бир ижод мактабида алоҳида аниқланади. Бунда рейтинг кўрсаткичлари натижасига кўра ижод мактабида ўқитувчининг энг юқори тўплаган балли 100 фоизлик кўрсаткич сифатида қабул қилинади.

Ташқи ўриндошлик асосида соатбай дарс машғулотларини ўтказувчи педагогларга ҳар ойлик устамалар дарс соатлари учун қўлланилмайди;

в) ўқув-ёрдамчи (штатлар жадвали асосида) ходимларга Агентлик томонидан эълон қилинган ижод мактабларининг рейтингига мос равишда маъмурий-бошқарув ходимларига белгиланган устаманинг 40 фоизи миқдорида;

г) техник ва хизмат кўрсатувчи ходимларга бажарилган ишига кўра 100 фоизгача миқдорда.

Барча ҳисобланган фоизлар математик қоидаларга кўра бутун сонгача яхлитланади.

14. Устамалар рейтинг эълон қилингандан сўнг кейинги ойнинг биринчи санасидан бошлаб ҳисоблаб борилади ва янги рейтинг эълон қилингунга қадар амал қилади (рейтинг эълон қилинган ой учун ҳам).

15. Ижод мактабларининг ходимлари бошқа ижод мактабида фаолиятини узлуксиз давом эттирганда, устамалар аввал белгиланган миқдорда навбатдаги рейтинг эълон қилингунга қадар ажратилган маблағ доирасида сақланиб қолади.

Рейтинг аниқланишидан икки ой олдин ёки рейтинг аниқланганидан кейин ишга қабул қилинган ходимлар учун ижод мактабларининг навбатдаги рейтинги эълон қилингунга қадар устама белгиланмайди (тўгарак раҳбарлари бундан мустасно).

16. Педагогларнинг хорижий тилларни билиш даражасини белгиловчи халқаро сертификатлари ҳамда уларнинг фалсафа доктори (Doctor of Philosophy, PhD) ва фан доктори (Doctor of Sciences, DSc) илмий даражалари учун тўловлар тарификация жадвалига мувофиқ белгиланган тартибда Жамғарма маблағлари доирасида тўлаб берилади.

6-боб. Бир марталик рағбатлантириш ва уларнинг миқдорларини белгилаш тартиби

17. Ходимларга қуйидаги ҳолларда Агентликнинг тавсиясига асосан меҳнатга ҳақ тўлашнинг энг кам миқдорининг уч бараваригача бўлган миқдорда бир марталик рағбатлантириш тўловлари берилиши мумкин:

ижод мактабларига ўқувчиларни саралаш ва қабул қилиш жараёнидаги самарали иштирок этгани;

ўқувчиларнинг ижодий ишларини таҳрир қилиш ва нашр этилишига кўмаклашгани;

ўқувчиси асосий фан олимпиадасининг республика босқичида совринли ўринларни қўлга киритгани (ҳар бир совриндор ўқувчи учун);

ўқувчиси халқаро олимпиада терма жамоаси таркибига қабул қилингани;

ўқув йили давомида ижод мактаблари фаолияти самарадорлигини, ўқувчилар билимини ошириш, уларга қулай шарт-шароит яратиш ва бошқа хизматлари учун;

«1-октябрь — Ўқитувчи ва мураббийлар куни» муносабати билан.

Бунда йил давомида ходимни айни бир мезон учун такроран рағбатлантиришга йўл қўйилмайди.

7-боб. Моддий ёрдам бериш ва унинг миқдорларини белгилаш тартиби

18. Ходимларга қуйидаги ҳолларда Комиссия қарори билан меҳнатга ҳақ тўлашнинг энг кам миқдорининг беш бараваригача миқдорда бир марталик моддий ёрдам белгиланиши мумкин:

ходимнинг никоҳ тўйи муносабати билан;

ходим ёки унинг фарзанди ихтисослашган тиббий ёрдамга муҳтож бўлганда;

ходимнинг пенсияга чиқиши муносабати билан меҳнат шартномаси бекор қилинганда;

ходим вафот этганда.

Ижод мактабида бир оиланинг икки ва ундан ортиқ аъзоси фаолият юритган ҳолларда, мазкур банднинг иккинчи ва учинчи хатбошиларида назарда тутилган моддий ёрдам улардан фақат биттасига берилади.

8-боб. Якунловчи қоидалар

19. Ижод мактаблари ходимлари жисмоний ва юридик шахсларнинг ҳомийлик хайриялари ҳамда қонунчилик ҳужжатларида тақиқланмаган бошқа манбалардан жалб этилган маблағлар ҳисобидан ушбу Низом талабларига мувофиқ рағбатлантирилиши мумкин.

20. Ушбу Низомнинг 6 ва 7-бобларида назарда тутилган тўловларни тўлаш даврида Жамғарманинг амалдаги молиявий ҳолатидан келиб чиқиб, унинг миқдори мавжуд маблағлар доирасида белгиланади.

21. Ходимларга устама, рағбатлантириш ва моддий ёрдамлар белгилаш жараёнларининг шаффоф ва ҳаққонийлигини таъминлаш учун Комиссия аъзолари, уларнинг тўғри тўланиши бўйича ижод мактаблари директорлари ва бош ҳисобчилари жавобгар ҳисобланади.

22. Жамғарма маблағларидан фойдаланиш Ўзбекистон Республикаси Мактабгача ва мактаб таълими вазирлигининг ички аудит ва молиявий назорат масалаларига масъул таркибий бўлинмаси томонидан назорат қилинади.

23. Ушбу Низом талабларининг бузилишида айбдор бўлган шахслар қонунчилик ҳужжатларида белгиланган тартибда жавоб берадилар.

Вазирлар Маҳкамасининг 2025 йил 17 декабрдаги 797-сон қарорига 3-ИЛОВА

Ўзбекистон Республикаси Ҳукуматининг айрим қарорларига киритилаётган ўзгартириш ва қўшимчалар

1. Вазирлар Маҳкамасининг 2017 йил 15 мартдаги 140-сон қарори билан тасдиқланган Умумий ўрта таълим тўғрисидаги низомда :

25-бандда :

иккинчи хатбоши қуйидаги таҳрирда баён этилсин:

«ўқув йилининг давомийлиги — 34 ҳафта (1 синфлар учун 33 ҳафта), Президент мактаблари ва спорт мактаблари бундан мустасно»;

қуйидаги мазмундаги тўртинчи хатбоши билан тўлдирилсин:

«Президент, ижод, ихтисослаштирилган мактаб ва мактаб-интернатларда — 5 кун»;

тўртинчи — еттинчи хатбошилар тегишлича бешинчи — саккизинчи хатбошилар деб ҳисоблансин;

45-банд қуйидаги таҳрирда баён этилсин:

«45. Ихтисослаштирилган мусиқа ва санъат мактабларига ҳамда Президент, ижод, спорт ва ихтисослаштирилган мактабларга ўқувчиларни қабул қилиш тартиби Ўзбекистон Республикаси Вазирлар Маҳкамаси томонидан белгиланади».

2. Вазирлар Маҳкамасининг «Қарши шаҳрида Абдулла Орипов номидаги она тили ва адабиёти фанини чуқурлаштириб ўқитишга ихтисослаштирилган мактаб-интернатини ташкил этиш тўғрисида» 2017 йил 24 майдаги 312-сон қарорида :

номи қуйидаги таҳрирда баён этилсин:

«Қарши шаҳрида Абдулла Орипов номидаги ижод мактабини ташкил этиш тўғрисида»;

1 ва 2-бандлар қуйидаги таҳрирда баён этилсин:

«1. Қарши шаҳрида Абдулла Орипов номидаги ижод мактаби (кейинги ўринларда — ижод мактаби) ташкил этилсин.

2. Белгилаб қўйилсинки, ижод мактабида ҳар бир синфдаги ўқувчилар сони 20 нафарни ташкил қилади, 7-синфларга эса ижодий танловлар, тест ва бошқа синовлар асосида қабул қилинади.

Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлигига ижод мактабининг моддий-техник базаси, имкониятлари, педагог кадрлар салоҳиятидан ҳамда мавжуд талаб ва эҳтиёждан келиб чиққан ҳолда, кейинги йилларда ўқувчиларни қабул қилиш квоталарига ўзгартиришлар киритиш ҳуқуқи берилади»;

7-банд қуйидаги таҳрирда баён этилсин:

«7. Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлиги Иқтисодиёт ва молия вазирлиги билан биргаликда мазкур ижод мактабининг моддий-техника базасини мустаҳкамлаш мақсадида ўқув-лаборатория жиҳозлари, компьютер техникалари, ўқув-методик мажмуалар, ўқитувчилар учун методик қўлланмалар ҳамда бадиий адабиётлар билан таъминлаш чораларини кўрсин»;

8-банд ўз кучини йўқотган деб ҳисоблансин.

3. Вазирлар Маҳкамасининг «Жиззах шаҳрида Ҳамид Олимжон ва Зулфия номидаги она тили ва адабиёти фанини чуқурлаштириб ўқитишга ихтисослаштирилган мактаб-интернатини ташкил этиш тўғрисида» 2017 йил 23 июндаги 418-сон қарорида :

номи қуйидаги таҳрирда баён қилинсин:

«Жиззах шаҳрида Ҳамид Олимжон ва Зулфия номидаги ижод мактабини ташкил этиш тўғрисида»;

1 ва 2-бандлар қуйидаги таҳрирда баён этилсин:

«1. Жиззах шаҳрида Ҳамид Олимжон ва Зулфия номидаги ижод мактаби (кейинги ўринларда — ижод мактаб) ташкил этилсин.

2. Белгилаб қўйилсинки, ижод мактабида ҳар бир синфдаги ўқувчилар сони 20 нафарни ташкил қилади, 7-синфларга эса ижодий танловлар, тест ва бошқа синовлар асосида қабул қилинади.

Ўзбекистон Республикаси Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлигига ижод мактабининг моддий-техник базаси, имкониятлари, педагог кадрларнинг салоҳияти ва мавжуд талаб ва эҳтиёждан келиб чиққан ҳолда кейинги йилларда ўқувчиларни қабул қилиш квоталарига ўзгартиришлар киритиш ҳуқуқи берилади»;

6-банднинг иккинчи хатбошиси қуйидаги таҳрирда баён этилсин:

«ижод мактаби биноларида бажариладиган қурилиш-таъмирлаш ва жиҳозлаш ишлари Ўзбекистон Республикаси Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлиги ҳузуридаги Иқтидорли ёшларни қўллаб-қувватлаш жамғармаси маблағлари ҳисобидан»;

8-банд қуйидаги таҳрирда баён этилсин:

«8. Ўзбекистон Республикаси Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлиги Иқтисодиёт ва молия вазирлиги билан биргаликда ижод мактабининг моддий-техник базасини мустаҳкамлаш мақсадида ўқув-лаборатория жиҳозлари, компьютер техникалари, ўқув-методик мажмуалар, ўқитувчилар учун методик қўлланмалар ҳамда бадиий адабиётлар билан таъминлаш чораларини кўрсин»;

9-банд ўз кучини йўқотган деб ҳисоблансин;

10-банд қуйидаги таҳрирда баён этилсин:

«10. Ўзбекистон Республикаси Иқтисодиёт ва молия вазирлиги Давлат бюджети параметрларида Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлигига ажратилган маблағлар доирасида ижод мактабининг таъминоти учун зарур маблағларни назарда тутсин».

4. Вазирлар Маҳкамасининг «Андижон шаҳрида Муҳаммад Юсуф номидаги она тили ва адабиёти фанини чуқурлаштириб ўқитишга ихтисослаштирилган мактаб ва Муҳаммад Юсуфнинг бюсти ўрнатилган хиёбонни ташкил этиш тўғрисида» 2017 йил 25 июлдаги 539-сон қарорида :

номи қуйидаги таҳрирда баён этилсин:

«Андижон шаҳрида Муҳаммад Юсуф номидаги ижод мактабини ва Муҳаммад Юсуфнинг бюсти ўрнатилган хиёбонни ташкил этиш тўғрисида»;

1 ва 2-бандлар қуйидаги таҳрирда баён этилсин:

«1. Андижон давлат университети қошидаги 4-сон академик лицей ҳудудида Муҳаммад Юсуф номидаги ижод мактаби (кейинги ўринларда — ижод мактаби) ва Муҳаммад Юсуфнинг бюсти (кейинги ўринларда — бюст) ўрнатилган хиёбон ташкил этилсин.

2. Белгилаб қўйилсинки, ижод мактабида ҳар бир синфдаги ўқувчилар сони 20 нафарни ташкил қилади, 7-синфларга эса ижодий танловлар, тест ва бошқа синовлар асосида қабул қилинади.

Ўзбекистон Республикаси Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлигига ижод мактабининг моддий-техник базаси, имкониятлари, педагог кадрлар салоҳиятидан ҳамда мавжуд талаб ва эҳтиёждан келиб чиққан ҳолда, кейинги йилларда ўқувчиларни қабул қилиш квоталарига ўзгартиришлар киритиш ҳуқуқи берилади»;

5-банддаги «ихтисослаштирилган» сўзи чиқариб ташлансин;

7-банд қуйидаги таҳрирда баён этилсин:

«7. Ўзбекистон Республикаси Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлиги Иқтисодиёт ва молия вазирлиги билан биргаликда ижод мактабининг моддий-техник базасини мустаҳкамлаш мақсадида уни ўқув-лаборатория жиҳозлари, компьютер техникаси, ўқув-методик мажмуалар, ўқитувчилар учун методик қўлланмалар ҳамда бадиий адабиётлар билан таъминлаш чораларини кўрсин»;

8-банд ўз кучини йўқотган деб ҳисоблансин;

9-банд қуйидаги таҳрирда баён этилсин:

«9. Ўзбекистон Республикаси Иқтисодиёт ва молия вазирлиги Ўзбекистон Республикаси Давлат бюджети параметрларида Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлигига ажратилган маблағлар доирасида ижод мактабининг таъминоти учун зарур маблағларни назарда тутсин».

5. Вазирлар Маҳкамасининг «Тўрақўрғон туманида Исҳоқхон Ибрат номидаги хорижий тилларга ихтисослаштирилган мактаб-интернатни ташкил этиш тўғрисида» 2017 йил 5 сентябрдаги 698-сон қарорида :

номи қуйидаги таҳрирда баён этилсин:

«Тўрақўрғон туманида Исҳоқхон Ибрат номидаги ижод мактабини ташкил этиш тўғрисида»;

1 — 3-бандлар қуйидаги таҳрирда баён этилсин:

«1. Наманган вилояти ҳокимлиги, Олий таълим, фан ва инновациялар вазирлиги, Мактабгача ва мактаб таълими вазирлигининг Наманган шаҳрида Исҳоқхон Ибрат номидаги ижод мактаби (кейинги ўринларда — ижод мактаби) ҳамда ижод мактаби ҳузурида Наманган давлат университети томонидан 7 та хорижий тилни ўргатишга ихтисослашган марказини (кейинги ўринларда — марказ) ташкил этиш тўғрисидаги таклифлари маъқуллансин.

2. Белгилаб қўйилсинки:

ижод мактабида ҳар бир синфдаги ўқувчилар сони 20 нафарни ташкил қилади, 7-синфларга эса ижодий танловлар, тест ва бошқа синовлар асосида қабул қилинади;

Марказда дарс машғулотлари 7 та тил бўйича ўқувчи-талабалар сони 10 нафардан ошмайдиган гуруҳларда ташкил этилади.

3. Олий таълим, фан ва инновациялар вазирлиги ҳамда Наманган давлат университетига ижод мактабида ташкил этиладиган дарс машғулотларига Ўзбекистон давлат жаҳон тиллари университети, Алишер Навоий номидаги Тошкент давлат ўзбек тили ва адабиёти университети, Тошкент давлат шарқшунослик институтининг малакали профессор-ўқитувчиларини жалб этсинлар»;

9 ва 10-бандлар қуйидаги таҳрирда баён этилсин:

«9. Ўзбекистон Республикаси Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлиги Наманган вилояти ҳокимлиги билан биргаликда ижод мактаби ва марказни ўқув-методик мажмуалар, ўқитувчилар учун методик қўлланмалар, бадиий адабиётлар билан таъминлаш чораларини кўрсин.

10. Ўзбекистон Республикаси Иқтисодиёт ва молия вазирлиги Ўзбекистон Республикаси Давлат бюджети параметрларида «Таълим» соҳасига ажратилган маблағлар доирасида ижод мактаби, марказ ва музейнинг таъминоти учун зарур маблағларни назарда тутсин».

6. Вазирлар Маҳкамасининг «Фарғона вилояти Марғилон шаҳрида Эркин Воҳидов номидаги она тили ва адабиёти фанини чуқур ўқитишга ҳамда хорижий тилларга ихтисослаштирилган мактаб-интернатни ташкил этиш тўғрисида» 2018 йил 14 майдаги 361-сон қарорида :

номи қуйидаги таҳрирда баён этилсин:

«Фарғона вилояти Марғилон шаҳрида Эркин Воҳидов номидаги ижод мактабини ташкил этиш тўғрисида»;

1-банд қуйидаги таҳрирда баён этилсин:

«1. Фарғона вилояти Марғилон шаҳрида Эркин Воҳидов номидаги ижод мактаби (кейинги ўринларда — ижод мактаби) ташкил этилсин»;

3-банд қуйидаги таҳрирда баён этилсин:

«3. Белгилаб қўйилсинки:

ижод мактабида ҳар бир синфдаги ўқувчилар сони 20 нафарни ташкил қилади, 7-синфларга эса ижодий танловлар, тест ва бошқа синовлар асосида қабул қилинади;

Ўзбекистон Республикаси Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлигига ижод мактабининг моддий-техник базаси, имкониятлари, педагог кадрлар салоҳиятидан ҳамда мавжуд талаб ва эҳтиёждан келиб чиққан ҳолда, кейинги йилларда ўқувчиларни қабул қилиш квоталарига ўзгартиришлар киритиш ҳуқуқи берилади»;

6-банднинг биринчи хатбошисидаги «мактаб-интернатнинг» сўзлари «ижод мактабининг» сўзлари билан алмаштирилсин;

8 ва 9-бандлар қуйидаги таҳрирда баён этилсин:

«8. Ўзбекистон Республикаси Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлиги:

Иқтисодиёт ва молия вазирлиги билан биргаликда ушбу ижод мактабининг моддий-техник базасини мустаҳкамлаш мақсадида уни ётоқхона, ошхона, кутубхона, фаоллар зали ва ўқув-лаборатория жиҳозлари ҳамда компьютер техникаси, ўқув-методик мажмуалар, ўқитувчилар учун методик қўлланмалар ва бадиий адабиётлар билан таъминлаш чораларини кўрсин;

бир ой муддатда ижод мактабининг устави тасдиқланишини ва белгиланган тартибда давлат рўйхатидан ўтказилишини таъминласин.

9. Ўзбекистон Республикаси Иқтисодиёт ва молия вазирлиги Ўзбекистон Республикаси Давлат бюджети параметрларида Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлигига ажратилган маблағлар доирасида ижод мактабининг таъминоти учун зарур маблағларни назарда тутсин».

7. Вазирлар Маҳкамасининг «Муҳаммад Ризо Эрниёзбек ўғли Огаҳий таваллудининг 210 йиллигини нишонлаш ҳамда Хива шаҳрида Огаҳий ижод мактабини ташкил этиш тўғрисида» 2019 йил 20 мартдаги 238-сон қарорида :

номи қуйидаги таҳрирда баён этилсин:

«Муҳаммад Ризо Эрниёзбек ўғли Огаҳий таваллудининг 210 йиллигини нишонлаш ҳамда Хива шаҳрида Муҳаммад Ризо Огаҳий номидаги ижод мактабини ташкил этиш тўғрисида»;

5 ва 6-бандлар қуйидаги таҳрирда баён этилсин:

«5. Хива шаҳрида Муҳаммад Ризо Огаҳий номидаги ижод мактаби (кейинги ўринларда — ижод мактаби) ташкил этилсин.

6. Белгилаб қўйилсинки:

ижод мактаби Ўзбекистон Республикаси Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлиги тизимидаги давлат умумтаълим муассасаси ҳисобланади, шахсий ғазна ҳисобрақамига, Ўзбекистон Республикаси Давлат герби тасвири туширилган ва ўз номи ёзилган муҳрга, штампга, бланкаларга эга бўлади;

ижод мактабида ҳар бир синфдаги ўқувчилар сони 20 нафарни ташкил қилади, 7-синфларга эса ижодий танловлар, тест ва бошқа синовлар асосида қабул қилинади;

ижод мактабида ўқитувчилик фаолияти билан шуғулланаётган Ўзбекистон Ёзувчилар уюшмаси аъзолари меҳнатига умумий ўрта таълим мактаблари ўқитувчилари меҳнатига соатбай ҳақ тўлашга мувофиқ ҳақ тўланади.

Ўзбекистон Республикаси Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлигига ижод мактабининг моддий-техник базаси, имкониятлари, педагог кадрлар салоҳиятидан ҳамда мавжуд талаб ва эҳтиёждан келиб чиққан ҳолда, кейинги йилларда ўқувчиларни қабул қилиш квоталарига ўзгартиришлар киритиш ҳуқуқи берилади».

8. Вазирлар Маҳкамасининг «Гулистон шаҳрида Ҳалима Худойбердиева номидаги она тили ва адабиёти фанини чуқур ўқитишга ихтисослаштирилган мактаб-интернатни ташкил этиш тўғрисида» 2019 йил 18 майдаги 419-сон қарорида :

номи қуйидаги таҳрирда баён этилсин:

«Гулистон шаҳрида Ҳалима Худойбердиева номидаги ижод мактабини ташкил этиш тўғрисида»;

1-банд қуйидаги таҳрирда баён этилсин:

«1. Гулистон шаҳрида Ҳалима Худойбердиева номидаги ижод мактаби (кейинги ўринларда — ижод мактаби) ташкил этилсин»;

2-банддаги «мактаб-интернатни» сўзлари «ижод мактабини» сўзлари билан алмаштирилсин;

3-банд қуйидаги таҳрирда баён этилсин:

«3. Белгилаб қўйилсинки:

мактаб Ўзбекистон Республикаси Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлиги тизимидаги давлат умумтаълим муассасаси ҳисобланади, шахсий ғазна ҳисобрақамига, Ўзбекистон Республикаси Давлат герби тасвири туширилган ва ўз номи ёзилган муҳрга, штампга, бланкаларга эга бўлади;

ижод мактабида ҳар бир синфдаги ўқувчилар сони 20 нафарни ташкил қилади, 7-синфларга эса ижодий танловлар, тест ва бошқа синовлар асосида қабул қилинади.

Ўзбекистон Республикаси Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлигига ижод мактабининг моддий-техник базаси, имкониятлари, педагог кадрлар салоҳиятидан ҳамда мавжуд талаб ва эҳтиёждан келиб чиққан ҳолда, кейинги йилларда ўқувчиларни қабул қилиш квоталарига ўзгартиришлар киритиш ҳуқуқи берилади»;

6-банднинг биринчи хатбошисидаги «мактаб-интернатнинг» сўзлари «ижод мактабининг» сўзлари билан алмаштирилсин;

7-бандда :

биринчи хатбошидаги «Молия» сўзи «Иқтисодиёт ва молия» сўзлари билан алмаштирилсин;

учинчи хатбоши қуйидаги таҳрирда баён этилсин:

«Ўзбекистон Республикаси Давлат бюджети параметрларида Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлигига ажратилган маблағлар доирасида ижод мактабининг таъминоти учун зарур маблағларни назарда тутсин»;

8-банд қуйидаги таҳрирда баён этилсин:

«8. Ўзбекистон Республикаси Олий таълим, фан ва инновациялар вазирлиги Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлиги билан биргаликда мактабга олий таълим муассасаларининг ўзбек тили ва адабиёти факультетларини тамомлаган иқтидорли педагог-кадрларни жалб этишни таъминласин»;

9-банд ўз кучини йўқотган деб ҳисоблансин.

9. Вазирлар Маҳкамасининг «Президент мактаблари тўғрисида низомни тасдиқлаш ҳақида» 2019 йил 25 июндаги 526-сон қарори билан тасдиқланган Президент мактаблари тўғрисидаги низомнинг 19-банди бешинчи хатбошиси чиқариб ташлансин.

10. Вазирлар Маҳкамасининг «Ўзбекистон Республикаси Вазирлар Маҳкамаси ҳузуридаги Президент, ижод ва ихтисослаштирилган мактабларни ривожлантириш агентлигининг фаолиятини янада такомиллаштириш бўйича қўшимча чора-тадбирлар тўғрисида» 2020 йил 18 апрелдаги 240-сон қарорида :

1-бандда :

иккинчи хатбоши чиқариб ташлансин;

учинчи — бешинчи хатбошилар тегишлича иккинчи — тўртинчи хатбошилар деб ҳисоблансин;

1-илова ўз кучини йўқотган деб ҳисоблансин.

11. Вазирлар Маҳкамасининг 2021 йил 9 сентябрдаги 562-сон қарори билан тасдиқланган Умумий ўрта таълим ташкилотлари, академик лицей ва касб-ҳунар мактаблари ўқувчилари ўртасида фан олимпиадаларини ташкил этиш, ўтказиш ҳамда халқаро олимпиадалар иштирокчиларини саралаш ва ғолибларни рағбатлантириш тартиби тўғрисидаги низомга 2-илова қуйидаги мазмундаги 29-позиция билан тўлдирилсин:

« 29. Халқаро сунъий интеллект олимпиадаси International Olympiad in Artificial Intelligence (IOAI) » .

12. Вазирлар Маҳкамасининг «Президент таълим муассасалари агентлиги тизимидаги болалар оромгоҳи фаолиятини ташкил этиш чора-тадбирлари тўғрисида» 2022 йил 9 февралдаги 65-сон қарорида :

номи қуйидаги таҳрирда баён этилсин:

«Ўзбекистон Республикаси Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлиги тизимидаги болалар оромгоҳи фаолиятини ташкил этиш чора-тадбирлари тўғрисида»;

1-банднинг иккинчи хатбошисидаги «Президент таълим муассасалари агентлиги» сўзлари «Ўзбекистон Республикаси Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлиги» сўзлари билан алмаштирилсин;

4-банднинг «е» кичик бандидаги «Инновацион ривожланиш вазирлигининг» сўзлари «Олий таълим, фан ва инновациялар вазирлиги ҳузуридаги Инновацион ривожланиш агентлигининг» сўзлари билан алмаштирилсин;

7-банднинг учинчи хатбошисидаги «Президент таълим муассасалари агентлиги» сўзлари «Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлиги» сўзлари билан алмаштирилсин.

13. Вазирлар Маҳкамасининг «Президент таълим муассасалари агентлиги тизимидаги ихтисослаштирилган мактаб-интернатлар ва ихтисослаштирилган мактаблар тўғрисидаги низомни тасдиқлаш ҳақида» 2022 йил 5 майдаги 233-сон қарорида :

номи қуйидаги таҳрирда баён этилсин:

«Ўзбекистон Республикаси Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлиги тизимидаги ихтисослаштирилган мактаб-интернатлар ва ихтисослаштирилган мактаблар тўғрисидаги низомни тасдиқлаш ҳақида»;

муқаддимадаги , 1-банддаги , 2-банднинг биринчи ва иккинчи хатбошиларидаги «Президент таълим муассасалари агентлиги» сўзлари «Ўзбекистон Республикаси Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлиги» сўзлари билан алмаштирилсин;

иловада :

номидаги ва 1-банддаги «Президент таълим муассасалари агентлиги» сўзлари «Ўзбекистон Республикаси Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлиги» сўзлари билан алмаштирилсин;

5-банднинг тўққизинчи хатбошиси қуйидаги таҳрирда баён этилсин:

«кириш имтиҳонларини Агентлик ҳузуридаги Педагогик маҳорат ва халқаро баҳолаш илмий-амалий маркази (кейинги ўринларда — Марказ) томонидан хорижий ташкилотлар ҳамда Ўзбекистон Республикаси Олий таълим, фан ва инновациялар вазирлиги ҳузуридаги Билим ва малакаларни баҳолаш агентлиги билан ҳамкорликда ўтказиш»;

9-банднинг иккинчи хатбошисидаги «халқ» сўзи «мактабгача ва мактаб» сўзлари билан алмаштирилсин.

14. Вазирлар Маҳкамасининг «Ўзбекистон Республикаси Мактабгача ва мактаб таълими вазирлиги ҳузуридаги Ихтисослаштирилган таълим муассасалари агентлиги тизимидаги ихтисослаштирилган спорт мактаблари фаолиятини такомиллаштириш тўғрисида» 2025 йил 20 августдаги 524-сон қарорининг 3-банд «а» кичик бандидаги ҳамда 1-иловаси 16-бандидаги «ихтисослаштирилган давлат мактаб-интернатлари учун тасдиқланган шаклда диплом» сўзлари «касбий таълим тўғрисидаги диплом» сўзлари билан алмаштирилсин.

Ўзбекистон Республикасининг Бош вазири А. АРИПОВ

Тошкент ш.,

2025 йил 17 декабрь,

797-сон

(Қонунчилик маълумотлари миллий базаси, 19.12.2025 й., 09/25/797/1181-сон)

lex.uz

Oʻzbekiston Respublikasi Vazirlar Mahkamasining

qarori

NIZOM

NIZOM

Ijod maktablari faoliyatini tartibga solish sohasidagi ayrim normativ-huquqiy hujjatlarni tasdiqlash toʻgʻrisida

Oʻzbekiston Respublikasi Prezidentining “Ijod maktablari faoliyatini yanada takomillashtirish chora-tadbirlari toʻgʻrisida” 2024-yil 1-apreldagi PQ-147-son qarorining ijrosini taʼminlash, shuningdek, ijod maktablarida taʼlim sifatini yanada oshirish, oʻquvchilarni kasbga oʻrgatish, xodimlarning mehnatini ragʻbatlantirish tizimini yanada takomillashtirish maqsadida Vazirlar Mahkamasi qaror qiladi:

1. Quyidagilar:

Oʻzbekiston Respublikasi Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligi tizimidagi ijod maktablari toʻgʻrisidagi nizom 1-ilovaga muvofiq;

Oʻzbekiston Respublikasi Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligi tizimidagi ijod maktablari xodimlarini ragʻbatlantirish jamgʻarmasi toʻgʻrisidagi nizom 2-ilovaga muvofiq tasdiqlansin.

2. Belgilansinki, 2026-yil 1-yanvardan boshlab Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligi tizimidagi taʼlim muassasalarida:

besh kunlik taʼlim jarayoni yoʻlga qoʻyiladi;

shanba kuni barcha fan oʻqituvchilari uchun “Kasbiy rivojlanish kuni” etib belgilanadi;

xalqaro akkreditatsiyadan oʻtkaziladigan hamda xalqaro dasturlar asosida taʼlim beriladigan taʼlim muassasalarida ikki semestrli oʻqish tizimi joriy etiladi.

3. Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligi:

2026-yildan boshlab ijod maktablarining faoliyati samaradorligini baholash orqali ularning reytingini eʼlon qilib borsin;

bir oy muddatda oʻz tizimdagi taʼlim tashkilotlari ustavlarini ushbu qarorga muvofiq qayta koʻrib chiqsin.

4. Maktabgacha va maktab taʼlimi vazirligi:

manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtirsin;

Ixtisoslashtirilgan taʼlim muassasalari agentligi tizimidagi ijod maktablari xodimlarini ragʻbatlantirish jamgʻarmasiga ajratilgan mablagʻlardan maqsadli foydalanilishi ustidan doimiy nazorat oʻrnatsin.

5. Oʻzbekiston Respublikasi Hukumatining 3-ilovaga muvofiq ayrim qarorlariga oʻzgartirish va qoʻshimchalar kiritilsin.

6. Ushbu qarorning bajarilishini nazorat qilish Oʻzbekiston Respublikasi maktabgacha va maktab taʼlimi vaziri E.G. Karimova zimmasiga yuklansin.

Vazirlar Mahkamasining 2025-yil 17-dekabrdagi 797-son qaroriga 1-ILOVA

Oʻzbekiston Respublikasi Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligi tizimidagi ijod maktablari toʻgʻrisida

1-bob. Umumiy qoidalar

1. Ushbu Nizom Oʻzbekiston Respublikasi Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligi (keyingi oʻrinlarda — Agentlik) tizimidagi ijod maktablarining (keyingi oʻrinlarda — ijod maktablari) huquqiy maqomi, maqsadi, asosiy vazifalari, huquqlari va majburiyatlari, ularni tashkil etish hamda faoliyatini nazorat qilish tartibini belgilaydi.

2. Ijod maktablari oʻz faoliyatida Oʻzbekiston Respublikasining Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, ushbu Nizomga, oʻz ustaviga, shuningdek, boshqa qonunchilik hujjatlariga amal qiladi.

3. Agentlik ijod maktablari faoliyatiga umumiy rahbarlik qiladi va ularni nazorat qiladi.

4. Ijod maktablari badiiy adabiyot va ijodning boshqa turlariga qiziqadigan iqtidorli oʻquvchilarni saralab olish orqali 7 — 11-sinflar kesimida ularning intellektual salohiyati va ijodiy isteʼdodini yanada rivojlantirishga moʻljallangan davlat umumiy oʻrta taʼlim muassasasi hisoblanadi.

5. Ijod maktablari Oʻzbekiston Respublikasi Davlat gerbi tasviri tushirilgan va oʻz nomi davlat tilida yozilgan muhrga va blankalarga, mustaqil balansga, Oʻzbekiston Respublikasi Iqtisodiyot va moliya vazirligi huzuridagi Gʻaznachilik xizmati qoʻmitasi boʻlinmalarida shaxsiy gʻazna hisobvaraqlariga, bank hisobvaraqlariga, shu jumladan, xorijiy valyutadagi shaxsiy gʻazna hisobvaraqlariga ega boʻladi.

6. Ijod maktablari belgilangan tartibda oʻz nomidan mulkiy va shaxsiy nomulkiy huquqlarga ega boʻlishi va ularni amalga oshirishi, shuningdek, zimmasiga majburiyatlar olishi, sudda daʼvogar va javobgar boʻlishi mumkin.

2-bob. Ijod maktablarining maqsadi, asosiy vazifalari, huquqlari va majburiyatlari

7. Ijod maktablarining maqsadi davlat taʼlim standartlari hamda maqbullashtirilgan oʻquv rejasi va taʼlim dasturlariga muvofiq badiiy adabiyot va ijodning boshqa turlari boʻyicha iqtidorli oʻquvchilarning taʼlim-tarbiya olishdagi konstitutsiyaviy huquqini roʻyobga chiqarish hisoblanadi.

8. Ijod maktablarining asosiy vazifalari quyidagilardan iborat:

badiiy adabiyot va boshqa ijod sohalariga qiziqadigan oʻquvchilarni aniqlash, saralash va ularning intellektual va ijodiy (sheʼriyat, nasr, xalq ogʻzaki ijodi, dramaturgiya, publitsistika va boshqalar) isteʼdodini yanada rivojlantirish tizimini yaratish;

oʻquvchilarni vatanparvarlik va fidoyilik ruhida tarbiyalash, ularda oʻz Vatani bilan faxrlanish va milliy madaniy-tarixiy anʼanalarni hurmat qilish tuygʻusini shakllantirish;

aniq fuqarolik pozitsiyasiga ega boʻlgan, oʻzbek tili va adabiyotini jahonga tanitishga xizmat qiladigan ijodkor yoshlarni tarbiyalash;

milliy qadriyatlarga tayangan holda, ilgʻor pedagogik texnologiyalar asosida ona tili va adabiyot hamda ijtimoiy fanlardan sifatli taʼlim berish tizimini joriy etish;

oʻquvchilarni kreativ va tanqidiy fikrlash, tizimli tahlil qilish, olingan bilim, malaka va koʻnikmalarni amaliyotda qoʻllash, notiqlik sanʼati, loyihalarni boshqarish koʻnikmalariga oʻrgatish;

oʻquvchilarga xorijiy tillarni chuqur oʻrgatish, ularda jahon adabiyoti durdonalarini, turli uslubdagi matnlarni oʻzbek tiliga tarjima qilish asoslarini hamda koʻnikmalarini rivojlantirish;

oʻquvchilarni mehnat bozorida talab yuqori boʻlgan kasb-hunarlarga oʻrgatish tizimini joriy qilish;

moddiy-texnik bazani mustahkamlash, taʼlim-tarbiya sifati va samaradorligini oshirishga qaratilgan chora-tadbirlarni amalga oshirish.

9. Ijod maktablari quyidagi huquqlarga ega:

vakolatiga kiradigan masalalar hamda oʻziga yuklangan vazifalar va funksiyalarni bajarish bilan bogʻliq boʻlgan qarorlar, buyruqlar, koʻrsatmalar qabul qilish, zarur boʻlganda boshqa davlat tashkilotlari bilan birgalikda tegishli qarorlar qabul qilish;

vakolatiga kiradigan masalalarda belgilangan tartibda sudlarga arizalar va daʼvolar kiritish;

qonunchilik hujjatlarida belgilangan tartibda budjetdan tashqari jamgʻarmalarga ega boʻlish;

oʻz ustavida belgilangan faoliyatni amalga oshirish uchun qonunchilik hujjatlarida taqiqlanmagan moliyaviy manbalarni jalb qilish;

belgilangan tartibda shartnomalar tuzish;

davlat organlari va manfaatdor shaxslardan oʻz vakolati doirasida zarur axborotlarni soʻrash va olish;

Agentlik bilan birgalikda yuqori malakali chet ellik mutaxassislar va boshqa xodimlarni ijod maktablari faoliyatiga jalb qilish;

Agentlik bilan oʻziga yuklangan vazifalarni oʻz vaqtida, samarali va sifatli bajarish uchun belgilangan tartibda oʻzaro hamkorlik qilish.

Ijod maktablari qonunchilik hujjatlariga muvofiq boshqa huquqlarga ham ega boʻlishi mumkin.

10. Ijod maktablari:

oʻziga yuklangan vazifa va funksiyalarni samarali bajarishi;

faoliyatini rivojlantirish boʻyicha tasdiqlangan dasturlar, chora-tadbirlar rejasi, “yoʻl xaritalari” va boshqa dasturiy hujjatlar ijrosini taʼminlashi;

oʻziga biriktirilgan mulklar, shu jumladan, koʻchmas mulklardan maqsadli va samarali foydalanishi;

taʼlim-tarbiya jarayonlarini Agentlik tomonidan tasdiqlanadigan oʻquv rejalari va taʼlim dasturlari asosida sifatli amalga oshirishi;

rahbar va pedagog xodimlarni belgilangan tartibda tanlov asosida ishga qabul qilishi;

rahbar, pedagog va xodimlarning huquqlari hamda qonuniy manfaatlarini himoya qilishi;

xalqaro tan olingan dastur va darsliklarni qoʻllagan holda davlat taʼlim standartlariga muvofiq taʼlim jarayonini tashkil qilishi;

oʻquvchilarning qiziqishlaridan kelib chiqqan holda, sinfdan tashqari, ijodiy hamda kasbga yoʻnaltirilgan amaliy mashgʻulotlar oʻtkazishi;

oʻquvchilar uchun qonunchilik hujjatlarida belgilangan tartibda autsorsing usulida bepul sogʻlom ovqatlantirishni tashkil etishi lozim.

Ijod maktablariga qonunchilik hujjatlariga muvofiq boshqa majburiyatlar ham yuklanishi mumkin.

11. Ijod maktablari davlat aktivlarini, shu jumladan, ularning tovar-moddiy boyliklari va boshqa mol-mulklarining but saqlanishi boʻyicha moddiy javobgar hisoblanadi.

3-bob. Ijod maktablarida taʼlim-tarbiya jarayonini tashkil etish

12. Ijod maktablarida taʼlim-tarbiya jarayoni 7 — 11-sinflarda amalga oshiriladi.

Bir sinfdagi oʻquvchilar soni 20 nafardan ortiq boʻlishiga yoʻl qoʻyilmaydi.

13. Ijod maktablariga oʻquvchilar Vazirlar Mahkamasining “Prezident, ijod, ixtisoslashtirilgan maktab va maktab-internatlarga oʻquvchilarni saralab olish hamda qabul qilish tartibiga oid normativ-huquqiy hujjatlarni tasdiqlash toʻgʻrisida” 2023-yil 27-maydagi 214-son qarori asosida qabul qilinadi.

14. Oʻquv haftasi 5 kun davom etadi. Bunda ijod maktabi Pedagogik kengash qarori asosida 6 kunlik oʻquv haftasiga oʻtkazilishi mumkin.

15. Ijod maktablarida taʼlim-tarbiya jarayoni ixtisoslik fanlari boʻyicha Agentlik tomonidan tasdiqlanadigan oʻquv rejasi va taʼlim dasturlariga muvofiq, umumtaʼlim fanlari boʻyicha esa umumiy oʻrta taʼlimning tayanch taʼlim dasturi asosida amalga oshiriladi.

Agentlik tomonidan tasdiqlangan oʻquv rejasiga muvofiq xalqaro akkreditatsiyadan oʻtkaziladigan hamda xalqaro dasturlar asosida taʼlim beriladigan ijod maktablarida ikki semestrli oʻqish tizimi joriy etilishi mumkin.

16. Ijod maktablarining ixtisoslik yoʻnalishlari Agentlik tomonidan belgilanadi.

17. Ijod maktablari bitiruvchilariga davlat namunasidagi taʼlim toʻgʻrisidagi hujjat beriladi.

18. Oʻquvchilar Agentlik tomonidan tasdiqlangan oʻquv rejasidagi fanlardan yillik summativ baholashdan muvaffaqiyatli oʻtganda, ijod maktabi direktorining buyrugʻi bilan keyingi sinfga oʻtkaziladi.

19. Oʻquvchilar quyidagi hollarda ijod maktabining oʻquvchilari safidan chiqariladi yoki chetlashtiriladi:

oʻquvchi oʻz tashabbusi bilan boshqa umumiy oʻrta taʼlim muassasasiga koʻchirish (ota-onasining yoki qonuniy vakillarining arizasi asosida) istagini bildirganda;

kirish imtihonlarini topshirish jarayonlarida oʻquvchi tomonidan taqdim etilgan (topshirilgan) hujjatlarning qalbakiligi aniqlanganda;

oʻquvchi tomonidan ijod maktabining ichki tartib-qoidalari qoʻpol ravishda buzilganda;

oʻquvchining oʻzlashtirishida tizimli pasayish boʻlganda. Bunda:

fanlardan choraklik, yarim yillik (summativ baholash) natijalar asosida 65 ball va undan kam ball toʻplagan oʻquvchilar va ularning ota-onalari (ularning oʻrnini bosuvchi shaxslar) yozma ravishda ogohlantiriladi, yillik oʻzlashtirish monitoring natijalarida ham ushbu holatlar qayd etilgan taqdirda, ushbu oʻquvchilarni Pedagogik kengash qaroriga asosan oʻquvchilar safidan chiqarish, avval oʻqigan maktabiga yoki boshqa umumiy oʻrta taʼlim muassasasiga oʻtkazish choralari koʻriladi;

oʻquvchining ota-onasi (ularning oʻrnini bosuvchi shaxslar) tomonidan ixtiyoriy ravishda oʻqish boshqa maktabda koʻchirilmagan taqdirda, oʻquvchi Pedagogik kengash qarori asosida Bolalar masalalari boʻyicha Qoraqalpogʻiston Respublikasi, viloyatlar va Toshkent shahri komissiyalari bilan kelishilgan holda, avval oʻqigan maktabiga qaytarib yuboriladi (oʻquvchining yashash joyi oʻzgargan taqdirda, hududdagi boshqa maktabga);

oʻzlashtirish koʻrsatkichi inobatga olinadigan fanlar roʻyxati har oʻquv yili boshlanishidan avval Pedagogik kengash qarori bilan tasdiqlanadi hamda oʻquvchilar va ularning ota-onalariga (ularning oʻrnini bosuvchi shaxslarga) tanishtiriladi.

20. Ijod maktabining oʻquvchilarida davolash-profilaktika muassasalarida statsionar sharoitda uzoq muddat davolanishga muhtojlik yuzaga kelgan taqdirda, ular Pedagogik kengash qarori asosida oʻquvchilar safidan chiqariladi hamda avval oʻqigan maktabiga (oʻquvchining yashash joyi oʻzgargan taqdirda, hududdagi boshqa maktabga) qaytarib yuboriladi.

Davolash-profilaktika muassasalarida statsionar sharoitda uzoq muddat davolanishga muhtoj bolalar belgilangan tartibda avval oʻqigan yoki yashash joyi oʻzgargan hududdagi umumiy oʻrta taʼlim maktabida oʻqishini davom ettiradi.

4-bob. Ijod maktablarida oʻquvchilarni sogʻlom ovqatlantirish va ularning salomatligini taʼminlash

21. Ijod maktablarida Vazirlar Mahkamasining “Oʻzbekiston Respublikasi Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligi tizimidagi maktablarda sogʻlom ovqatlantirishni autsorsing usulida tashkil etish toʻgʻrisida” 2021-yil 14-apreldagi 218-son qarori asosida oʻquvchilarni xavfsiz va sifatli ovqatlantirish tashkil etiladi.

22. Ijod maktabining tibbiyot xodimlari tomonidan oʻquvchilarga tibbiy xizmat koʻrsatiladi.

Bunda tibbiyot xodimlari ijod maktabi rahbariyati va pedagog xodimlari bilan birgalikda davolash-profilaktika tadbirlarini tashkil etish, oʻquv binosi va oʻquvchilar turar joyida sanitariya normalari, qoidalari va gigiyena normativlariga rioya qilish, ovqatlanish rejimi va sifati, oʻquvchilarni tibbiy koʻrikdan oʻtkazish va sogʻlomlashtirish uchun masʼul hisoblanadi.

23. Ijod maktablarining rahbariyati tomonidan tibbiyot xodimlarining faoliyat yuritishi uchun zarur shart-sharoitlar yaratib berilishi shart.

24. Ijod maktablari oʻquvchilari belgilangan tartibda Oʻzbekiston Respublikasi Sogʻliqni saqlash vazirligi tomonidan har yili bir marotaba chuqurlashtirilgan tibbiy koʻrikdan oʻtkaziladi.

25. Ijod maktablarida taʼlim-tarbiya jarayoni psixologik jihatdan ijod maktablari psixologlari tomonidan taʼminlanadi.

5-bob. Ijod maktablarining faoliyatini nazorat qilish

26. Ijod maktablari har yili hisobot davri tugagach, Agentlikka faoliyati toʻgʻrisida hisobot taqdim etadi.

27. Ijod maktablarida budjet toʻgʻrisidagi qonunchilik talablariga rioya etilishi Oʻzbekiston Respublikasi Maktabgacha va maktab taʼlimi vazirligining ichki audit va moliyaviy nazorat masalasiga masʼul tarkibiy boʻlinmasi tomonidan nazorat qilinadi.

28. Agentlik ijod maktablari rahbariyati zimmasiga yuklangan vazifalarning samarali bajarilishini muntazam monitoring qilib boradi, monitoring natijalariga koʻra ijod maktablari faoliyati samaradorligiga baho beradi.

29. Monitoring va baholash yakunlari boʻyicha yuqori koʻrsatkichga erishgan ijod maktablarining rahbariyati va xodimlari ragʻbatlantiriladi yoki yoʻl qoʻyilgan kamchiliklari uchun intizomiy javobgarlikka tortilishi mumkin.

30. Ijod maktablari faoliyatiga oid hujjatlarning saqlanishiga ijod maktablari rahbarlari javobgar hisoblanadi.

6-bob. Yakunlovchi qoidalar

31. Ijod maktablari qonunchilik hujjatlariga muvofiq oʻquv yili yakunida muassis tomonidan qayta tashkil etiladi yoki tugatiladi.

Agentlik ijod maktablari tugatilganda, oʻquvchilarni ota-onalarining (ularning oʻrnini bosuvchi shaxslarning) roziligi bilan boshqa umumiy oʻrta taʼlim muassasalariga oʻtkazish masʼuliyatini oʻz zimmasiga oladi.

32. Ijod maktablari tugatilgan taqdirda, uning mablagʻlari va mol-mulkidan uning majburiyatlarini qoplash boʻyicha toʻlovlar chegirilgan holda qonunchilik hujjatlariga va ijod maktablari ustaviga muvofiq foydalaniladi.

33. Ushbu Nizom talablarining buzilishida aybdor boʻlgan shaxslar qonunchilik hujjatlarida belgilangan tartibda javob beradilar.

Vazirlar Mahkamasining 2025-yil 17-dekabrdagi 797-son qaroriga 2-ILOVA

Oʻzbekiston Respublikasi Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligi tizimidagi ijod maktablari xodimlarini ragʻbatlantirish jamgʻarmasi toʻgʻrisida

1-bob. Umumiy qoidalar

1. Ushbu Nizom Oʻzbekiston Respublikasi Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligi (keyingi oʻrinlarda — Agentlik) tizimidagi ijod maktablarining (keyingi oʻrinlarda — ijod maktablari) maʼmuriy-boshqaruv, pedagogik, oʻquv-yordamchi, texnik va xizmat koʻrsatuvchi xodimlarini ragʻbatlantirish jamgʻarmasi (keyingi oʻrinlarda — Jamgʻarma) mablagʻlaridan foydalanish tartibini belgilaydi.

2. Ushbu Nizomda koʻrsatilgan ustamalar xodimlarning moddiy ragʻbatlantirish turlariga qoʻshimcha tarzda beriladi.

3. Ushbu Nizomda quyidagi asosiy tushunchalar qoʻllaniladi:

reyting — ijod maktablarining maʼmuriy-boshqaruv, pedagogik, oʻquv-yordamchi xodimlarining (keyingi oʻrinlarda — xodimlar) faoliyati samaradorligini baholash mezonlari asosida ularning eng yuqori koʻrsatkichdan kamayish tartibida oʻrnini aniqlash;

reyting koʻrsatkichlari — ijod maktablari xodimlarining faoliyati samaradorligini belgilash mezonlari;

xodimlarni ragʻbatlantirish komissiyasi (keyingi oʻrinlarda — Komissiya) — reyting koʻrsatkichlarini umumlashtirish, tahlil qilish orqali ijod maktabining faoliyati samaradorligini baholash, shuningdek, xodimlarga ustama miqdori, ragʻbatlantirish hamda moddiy yordamni belgilash boʻyicha komissiya.

4. Jamgʻarma ijod maktabida xodimlarning mehnatga haq toʻlash fondining 50 foizidan koʻp boʻlmagan miqdorda Davlat budjeti mablagʻlari hisobidan shakllantiriladi.

Ijod maktablarining xodimlariga ustama, ragʻbatlantirish hamda moddiy yordam Jamgʻarma mablagʻlari hisobidan amalga oshiriladi.

Jamgʻarma mablagʻlari xarajatlar smetasida iqtisodiy tasnif boʻyicha 41 11 230 satrida rejalashtiriladi.

2-bob. Ijod maktablarining reytingini aniqlash tartibi

5. Ijod maktablari va ularda faoliyat yuritayotgan xodimlar oʻrtasida sogʻlom raqobat muhitini yaratish maqsadida reyting koʻrsatkichlari Agentlik tomonidan tasdiqlanadi.

6. Agentlik:

tasdiqlangan reyting koʻrsatkichlari asosida ijod maktablari tomonidan taqdim etilgan koʻrsatkichlarni umumlashtiradi va tahlil qiladi;

zarur hollarda, maʼlumotlarni oʻrganish davrida koʻrsatilgan holatlarni aniqlashtirish boʻyicha ijod maktablari yoki tegishli tashkilotlarga soʻrovlar yuboradi. Bunda asossiz kiritilgan ballarni bekor qilishi yoki asosli ballarni qoʻshib hisoblashi mumkin;

umumlashtirilgan reyting koʻrsatkichlari natijalari asosida har yili 1-sentabrga qadar ijod maktablarining reytingini eʼlon qiladi.

7. Reyting natijalari keyingi reyting eʼlon qilingunga qadar amal qiladi.

3-bob. Komissiya faoliyatini tashkil etish

8. Komissiya tarkibi 7 nafardan kam boʻlmagan toq tarkibda ijod maktabi direktori buyrugʻi bilan tasdiqlanadi.

Komissiya tarkibiga ijod maktabi direktori, direktor oʻrinbosarlari, kadrlar boʻyicha menejer, kasaba uyushmasi qoʻmitasi raisi va jamoatchilik vakillari (ota-onalar) kiritiladi.

Ijod maktabi direktori (yoki uning vazifasi yuklangan shaxs) komissiya raisi, oʻquv ishlari boʻyicha direktor oʻrinbosari Komissiya kotibi hisoblanadi.

Komissiya tarkibidagi jamoatchilik (ota-onalar) vakillari har yili yangilanib borilishi shart.

9. Komissiya yigʻilishlari aʼzolarining uchdan ikki qismi ishtirok etgan taqdirda vakolatli hisoblanadi.

10. Xodimlarga ustama va ragʻbatlantiruvchi toʻlovlar miqdorlarini belgilash toʻgʻrisidagi qaror Komissiya aʼzolarining ochiq ovoz berish yoʻli bilan qabul qilinadi.

Xodimlarga har oylik ustama, bir martalik ragʻbatlantirish yoki moddiy yordamlarni belgilash Komissiya bayoni asosida ijod maktabi direktorining buyrugʻi bilan rasmiylashtiriladi (oʻzgartiriladi yoki bekor qilinadi).

11. Qonunchilik hujjatlarida ustama va ragʻbatlantirish toʻlovlari berilmasligi nazarda tutilgan hollarda, xodimlarga ustama va ragʻbatlantirish toʻlovlari belgilanmaydi.

4-bob. Komissiyaning vakolatlari

12. Quyidagilar Komissiyaning vakolatlari hisoblanadi:

ijod maktabining faoliyati samaradorligi boʻyicha tasdiqlangan reyting koʻrsatkichlari boʻyicha dastlabki asoslantiruvchi hujjatlarni tayyorlash, ularni oʻrganish va Agentlikka taqdim etish;

Agentlik tomonidan eʼlon qilingan reyting asosida ijod maktabining maʼmuriy-boshqaruv va oʻquv-yordamchi xodimlari uchun ustamalarni belgilash (bekor qilish);

oʻqituvchilarning faoliyati samaradorligini tahlil qilish, ularning reyting koʻrsatkichini aniqlash va ularga ushbu Nizom asosida har oylik ustamalarni belgilash;

texnik va xizmat koʻrsatuvchi xodimlarning har oylik ustamalarini belgilash (bekor qilish);

Agentlikning tavsiyasi asosida xodimlarga bir martalik ragʻbatlantirish miqdorini belgilash;

xodimlarga moddiy yordam ajratish boʻyicha hujjatlarni koʻrib chiqish va moddiy yordam ajratish yoki ajratmaslik toʻgʻrisida qaror qabul qilish.

5-bob. Har oylik ustamalarning miqdorlari hamda ularni hisoblash tartibi

13. Ijod maktablari xodimlarining lavozim maoshi yoki bazaviy tarif stavkasiga qoʻshiladigan har oylik ustamalar Komissiya xulosasiga asosan quyidagi miqdorlarda belgilanadi:

a) maʼmuriy-boshqaruv (shtatlar jadvali asosida) xodimlariga:

Agentlik tomonidan eʼlon qilingan ijod maktablarining reytingiga mos ravishda 1-oʻrin uchun 250 foiz, oxirgi oʻrinni olgan ijod maktabi uchun 100 foiz miqdorida.

Qolgan ijod maktabi reytingda olgan oʻrniga qarab, ustama miqdori interpolyatsiya usuli orqali quyidagi formula asosida aniqlanadi:

F m = 250 - R oʻ - 1 x 150. M -1

Bu yerda:

F m — ijod maktabining maʼmuriy-boshqaruv xodimlariga belgilanadigan ustama miqdori;

R oʻ — ijod maktabining reytingdagi oʻrni;

M — jami ijod maktablari soni.

Ijod maktabining toʻplagan balli reyting uchun belgilangan eng yuqori ballning 30 foizidan kam boʻlgan hollarda ustama belgilanmaydi;

b) oʻqituvchilarga:

reyting koʻrsatkichlari asosida eng yuqori ball (1-oʻrin) toʻplagan oʻqituvchiga 50 foiz miqdorida;

keyingi oʻrinlar uchun ustama miqdori quyidagi formula asosida aniqlanadi:

F oʻ = 50 x B oʻ . maxB

Bu yerda:

F oʻ — ijod maktabi oʻqituvchisiga belgilanadigan ustama miqdori;

maxB — ijod maktabi oʻqituvchisining reyting koʻrsatkichlari asosida eng yuqori toʻplagan balli;

B oʻ — ustama belgilanayotgan oʻqituvchining reyting koʻrsatkichlari asosida toʻplagan balli.

Reyting koʻrsatkichlari har bir ijod maktabida alohida aniqlanadi. Bunda reyting koʻrsatkichlari natijasiga koʻra ijod maktabida oʻqituvchining eng yuqori toʻplagan balli 100 foizlik koʻrsatkich sifatida qabul qilinadi.

Tashqi oʻrindoshlik asosida soatbay dars mashgʻulotlarini oʻtkazuvchi pedagoglarga har oylik ustamalar dars soatlari uchun qoʻllanilmaydi;

v) oʻquv-yordamchi (shtatlar jadvali asosida) xodimlarga Agentlik tomonidan eʼlon qilingan ijod maktablarining reytingiga mos ravishda maʼmuriy-boshqaruv xodimlariga belgilangan ustamaning 40 foizi miqdorida;

g) texnik va xizmat koʻrsatuvchi xodimlarga bajarilgan ishiga koʻra 100 foizgacha miqdorda.

Barcha hisoblangan foizlar matematik qoidalarga koʻra butun songacha yaxlitlanadi.

14. Ustamalar reyting eʼlon qilingandan soʻng keyingi oyning birinchi sanasidan boshlab hisoblab boriladi va yangi reyting eʼlon qilingunga qadar amal qiladi (reyting eʼlon qilingan oy uchun ham).

15. Ijod maktablarining xodimlari boshqa ijod maktabida faoliyatini uzluksiz davom ettirganda, ustamalar avval belgilangan miqdorda navbatdagi reyting eʼlon qilingunga qadar ajratilgan mablagʻ doirasida saqlanib qoladi.

Reyting aniqlanishidan ikki oy oldin yoki reyting aniqlanganidan keyin ishga qabul qilingan xodimlar uchun ijod maktablarining navbatdagi reytingi eʼlon qilingunga qadar ustama belgilanmaydi (toʻgarak rahbarlari bundan mustasno).

16. Pedagoglarning xorijiy tillarni bilish darajasini belgilovchi xalqaro sertifikatlari hamda ularning falsafa doktori (Doctor of Philosophy, PhD) va fan doktori (Doctor of Sciences, DSc) ilmiy darajalari uchun toʻlovlar tarifikatsiya jadvaliga muvofiq belgilangan tartibda Jamgʻarma mablagʻlari doirasida toʻlab beriladi.

6-bob. Bir martalik ragʻbatlantirish va ularning miqdorlarini belgilash tartibi

17. Xodimlarga quyidagi hollarda Agentlikning tavsiyasiga asosan mehnatga haq toʻlashning eng kam miqdorining uch baravarigacha boʻlgan miqdorda bir martalik ragʻbatlantirish toʻlovlari berilishi mumkin:

ijod maktablariga oʻquvchilarni saralash va qabul qilish jarayonidagi samarali ishtirok etgani;

oʻquvchilarning ijodiy ishlarini tahrir qilish va nashr etilishiga koʻmaklashgani;

oʻquvchisi asosiy fan olimpiadasining respublika bosqichida sovrinli oʻrinlarni qoʻlga kiritgani (har bir sovrindor oʻquvchi uchun);

oʻquvchisi xalqaro olimpiada terma jamoasi tarkibiga qabul qilingani;

oʻquv yili davomida ijod maktablari faoliyati samaradorligini, oʻquvchilar bilimini oshirish, ularga qulay shart-sharoit yaratish va boshqa xizmatlari uchun;

“1-oktabr — Oʻqituvchi va murabbiylar kuni” munosabati bilan.

Bunda yil davomida xodimni ayni bir mezon uchun takroran ragʻbatlantirishga yoʻl qoʻyilmaydi.

7-bob. Moddiy yordam berish va uning miqdorlarini belgilash tartibi

18. Xodimlarga quyidagi hollarda Komissiya qarori bilan mehnatga haq toʻlashning eng kam miqdorining besh baravarigacha miqdorda bir martalik moddiy yordam belgilanishi mumkin:

xodimning nikoh toʻyi munosabati bilan;

xodim yoki uning farzandi ixtisoslashgan tibbiy yordamga muhtoj boʻlganda;

xodimning pensiyaga chiqishi munosabati bilan mehnat shartnomasi bekor qilinganda;

xodim vafot etganda.

Ijod maktabida bir oilaning ikki va undan ortiq aʼzosi faoliyat yuritgan hollarda, mazkur bandning ikkinchi va uchinchi xatboshilarida nazarda tutilgan moddiy yordam ulardan faqat bittasiga beriladi.

8-bob. Yakunlovchi qoidalar

19. Ijod maktablari xodimlari jismoniy va yuridik shaxslarning homiylik xayriyalari hamda qonunchilik hujjatlarida taqiqlanmagan boshqa manbalardan jalb etilgan mablagʻlar hisobidan ushbu Nizom talablariga muvofiq ragʻbatlantirilishi mumkin.

20. Ushbu Nizomning 6 va 7-boblarida nazarda tutilgan toʻlovlarni toʻlash davrida Jamgʻarmaning amaldagi moliyaviy holatidan kelib chiqib, uning miqdori mavjud mablagʻlar doirasida belgilanadi.

21. Xodimlarga ustama, ragʻbatlantirish va moddiy yordamlar belgilash jarayonlarining shaffof va haqqoniyligini taʼminlash uchun Komissiya aʼzolari, ularning toʻgʻri toʻlanishi boʻyicha ijod maktablari direktorlari va bosh hisobchilari javobgar hisoblanadi.

22. Jamgʻarma mablagʻlaridan foydalanish Oʻzbekiston Respublikasi Maktabgacha va maktab taʼlimi vazirligining ichki audit va moliyaviy nazorat masalalariga masʼul tarkibiy boʻlinmasi tomonidan nazorat qilinadi.

23. Ushbu Nizom talablarining buzilishida aybdor boʻlgan shaxslar qonunchilik hujjatlarida belgilangan tartibda javob beradilar.

Vazirlar Mahkamasining 2025-yil 17-dekabrdagi 797-son qaroriga 3-ILOVA

Oʻzbekiston Respublikasi Hukumatining ayrim qarorlariga kiritilayotgan oʻzgartirish va qoʻshimchalar

1. Vazirlar Mahkamasining 2017-yil 15-martdagi 140-son qarori bilan tasdiqlangan Umumiy oʻrta taʼlim toʻgʻrisidagi nizomda :

25-bandda :

ikkinchi xatboshi quyidagi tahrirda bayon etilsin:

“oʻquv yilining davomiyligi — 34 hafta (1 sinflar uchun 33 hafta), Prezident maktablari va sport maktablari bundan mustasno”;

quyidagi mazmundagi toʻrtinchi xatboshi bilan toʻldirilsin:

“Prezident, ijod, ixtisoslashtirilgan maktab va maktab-internatlarda — 5 kun”;

toʻrtinchi — yettinchi xatboshilar tegishlicha beshinchi — sakkizinchi xatboshilar deb hisoblansin;

45-band quyidagi tahrirda bayon etilsin:

“45. Ixtisoslashtirilgan musiqa va sanʼat maktablariga hamda Prezident, ijod, sport va ixtisoslashtirilgan maktablarga oʻquvchilarni qabul qilish tartibi Oʻzbekiston Respublikasi Vazirlar Mahkamasi tomonidan belgilanadi”.

2. Vazirlar Mahkamasining “Qarshi shahrida Abdulla Oripov nomidagi ona tili va adabiyoti fanini chuqurlashtirib oʻqitishga ixtisoslashtirilgan maktab-internatini tashkil etish toʻgʻrisida” 2017-yil 24-maydagi 312-son qarorida :

nomi quyidagi tahrirda bayon etilsin:

“Qarshi shahrida Abdulla Oripov nomidagi ijod maktabini tashkil etish toʻgʻrisida”;

1 va 2-bandlar quyidagi tahrirda bayon etilsin:

“1. Qarshi shahrida Abdulla Oripov nomidagi ijod maktabi (keyingi oʻrinlarda — ijod maktabi) tashkil etilsin.

2. Belgilab qoʻyilsinki, ijod maktabida har bir sinfdagi oʻquvchilar soni 20 nafarni tashkil qiladi, 7-sinflarga esa ijodiy tanlovlar, test va boshqa sinovlar asosida qabul qilinadi.

Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligiga ijod maktabining moddiy-texnik bazasi, imkoniyatlari, pedagog kadrlar salohiyatidan hamda mavjud talab va ehtiyojdan kelib chiqqan holda, keyingi yillarda oʻquvchilarni qabul qilish kvotalariga oʻzgartirishlar kiritish huquqi beriladi”;

7-band quyidagi tahrirda bayon etilsin:

“7. Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligi Iqtisodiyot va moliya vazirligi bilan birgalikda mazkur ijod maktabining moddiy-texnika bazasini mustahkamlash maqsadida oʻquv-laboratoriya jihozlari, kompyuter texnikalari, oʻquv-metodik majmualar, oʻqituvchilar uchun metodik qoʻllanmalar hamda badiiy adabiyotlar bilan taʼminlash choralarini koʻrsin”;

8-band oʻz kuchini yoʻqotgan deb hisoblansin.

3. Vazirlar Mahkamasining “Jizzax shahrida Hamid Olimjon va Zulfiya nomidagi ona tili va adabiyoti fanini chuqurlashtirib oʻqitishga ixtisoslashtirilgan maktab-internatini tashkil etish toʻgʻrisida” 2017-yil 23-iyundagi 418-son qarorida :

nomi quyidagi tahrirda bayon qilinsin:

“Jizzax shahrida Hamid Olimjon va Zulfiya nomidagi ijod maktabini tashkil etish toʻgʻrisida”;

1 va 2-bandlar quyidagi tahrirda bayon etilsin:

“1. Jizzax shahrida Hamid Olimjon va Zulfiya nomidagi ijod maktabi (keyingi oʻrinlarda — ijod maktab) tashkil etilsin.

2. Belgilab qoʻyilsinki, ijod maktabida har bir sinfdagi oʻquvchilar soni 20 nafarni tashkil qiladi, 7-sinflarga esa ijodiy tanlovlar, test va boshqa sinovlar asosida qabul qilinadi.

Oʻzbekiston Respublikasi Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligiga ijod maktabining moddiy-texnik bazasi, imkoniyatlari, pedagog kadrlarning salohiyati va mavjud talab va ehtiyojdan kelib chiqqan holda keyingi yillarda oʻquvchilarni qabul qilish kvotalariga oʻzgartirishlar kiritish huquqi beriladi”;

6-bandning ikkinchi xatboshisi quyidagi tahrirda bayon etilsin:

“ijod maktabi binolarida bajariladigan qurilish-taʼmirlash va jihozlash ishlari Oʻzbekiston Respublikasi Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligi huzuridagi Iqtidorli yoshlarni qoʻllab-quvvatlash jamgʻarmasi mablagʻlari hisobidan”;

8-band quyidagi tahrirda bayon etilsin:

“8. Oʻzbekiston Respublikasi Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligi Iqtisodiyot va moliya vazirligi bilan birgalikda ijod maktabining moddiy-texnik bazasini mustahkamlash maqsadida oʻquv-laboratoriya jihozlari, kompyuter texnikalari, oʻquv-metodik majmualar, oʻqituvchilar uchun metodik qoʻllanmalar hamda badiiy adabiyotlar bilan taʼminlash choralarini koʻrsin”;

9-band oʻz kuchini yoʻqotgan deb hisoblansin;

10-band quyidagi tahrirda bayon etilsin:

“10. Oʻzbekiston Respublikasi Iqtisodiyot va moliya vazirligi Davlat budjeti parametrlarida Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligiga ajratilgan mablagʻlar doirasida ijod maktabining taʼminoti uchun zarur mablagʻlarni nazarda tutsin”.

4. Vazirlar Mahkamasining “Andijon shahrida Muhammad Yusuf nomidagi ona tili va adabiyoti fanini chuqurlashtirib oʻqitishga ixtisoslashtirilgan maktab va Muhammad Yusufning byusti oʻrnatilgan xiyobonni tashkil etish toʻgʻrisida” 2017-yil 25-iyuldagi 539-son qarorida :

nomi quyidagi tahrirda bayon etilsin:

“Andijon shahrida Muhammad Yusuf nomidagi ijod maktabini va Muhammad Yusufning byusti oʻrnatilgan xiyobonni tashkil etish toʻgʻrisida”;

1 va 2-bandlar quyidagi tahrirda bayon etilsin:

“1. Andijon davlat universiteti qoshidagi 4-son akademik litsey hududida Muhammad Yusuf nomidagi ijod maktabi (keyingi oʻrinlarda — ijod maktabi) va Muhammad Yusufning byusti (keyingi oʻrinlarda — byust) oʻrnatilgan xiyobon tashkil etilsin.

2. Belgilab qoʻyilsinki, ijod maktabida har bir sinfdagi oʻquvchilar soni 20 nafarni tashkil qiladi, 7-sinflarga esa ijodiy tanlovlar, test va boshqa sinovlar asosida qabul qilinadi.

Oʻzbekiston Respublikasi Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligiga ijod maktabining moddiy-texnik bazasi, imkoniyatlari, pedagog kadrlar salohiyatidan hamda mavjud talab va ehtiyojdan kelib chiqqan holda, keyingi yillarda oʻquvchilarni qabul qilish kvotalariga oʻzgartirishlar kiritish huquqi beriladi”;

5-banddagi “ixtisoslashtirilgan” soʻzi chiqarib tashlansin;

7-band quyidagi tahrirda bayon etilsin:

“7. Oʻzbekiston Respublikasi Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligi Iqtisodiyot va moliya vazirligi bilan birgalikda ijod maktabining moddiy-texnik bazasini mustahkamlash maqsadida uni oʻquv-laboratoriya jihozlari, kompyuter texnikasi, oʻquv-metodik majmualar, oʻqituvchilar uchun metodik qoʻllanmalar hamda badiiy adabiyotlar bilan taʼminlash choralarini koʻrsin”;

8-band oʻz kuchini yoʻqotgan deb hisoblansin;

9-band quyidagi tahrirda bayon etilsin:

“9. Oʻzbekiston Respublikasi Iqtisodiyot va moliya vazirligi Oʻzbekiston Respublikasi Davlat budjeti parametrlarida Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligiga ajratilgan mablagʻlar doirasida ijod maktabining taʼminoti uchun zarur mablagʻlarni nazarda tutsin”.

5. Vazirlar Mahkamasining “Toʻraqoʻrgʻon tumanida Isʼhoqxon Ibrat nomidagi xorijiy tillarga ixtisoslashtirilgan maktab-internatni tashkil etish toʻgʻrisida” 2017-yil 5-sentabrdagi 698-son qarorida :

nomi quyidagi tahrirda bayon etilsin:

“Toʻraqoʻrgʻon tumanida Isʼhoqxon Ibrat nomidagi ijod maktabini tashkil etish toʻgʻrisida”;

1 — 3-bandlar quyidagi tahrirda bayon etilsin:

“1. Namangan viloyati hokimligi, Oliy taʼlim, fan va innovatsiyalar vazirligi, Maktabgacha va maktab taʼlimi vazirligining Namangan shahrida Isʼhoqxon Ibrat nomidagi ijod maktabi (keyingi oʻrinlarda — ijod maktabi) hamda ijod maktabi huzurida Namangan davlat universiteti tomonidan 7 ta xorijiy tilni oʻrgatishga ixtisoslashgan markazini (keyingi oʻrinlarda — markaz) tashkil etish toʻgʻrisidagi takliflari maʼqullansin.

2. Belgilab qoʻyilsinki:

ijod maktabida har bir sinfdagi oʻquvchilar soni 20 nafarni tashkil qiladi, 7-sinflarga esa ijodiy tanlovlar, test va boshqa sinovlar asosida qabul qilinadi;

Markazda dars mashgʻulotlari 7 ta til boʻyicha oʻquvchi-talabalar soni 10 nafardan oshmaydigan guruhlarda tashkil etiladi.

3. Oliy taʼlim, fan va innovatsiyalar vazirligi hamda Namangan davlat universitetiga ijod maktabida tashkil etiladigan dars mashgʻulotlariga Oʻzbekiston davlat jahon tillari universiteti, Alisher Navoiy nomidagi Toshkent davlat oʻzbek tili va adabiyoti universiteti, Toshkent davlat sharqshunoslik institutining malakali professor-oʻqituvchilarini jalb etsinlar”;

9 va 10-bandlar quyidagi tahrirda bayon etilsin:

“9. Oʻzbekiston Respublikasi Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligi Namangan viloyati hokimligi bilan birgalikda ijod maktabi va markazni oʻquv-metodik majmualar, oʻqituvchilar uchun metodik qoʻllanmalar, badiiy adabiyotlar bilan taʼminlash choralarini koʻrsin.

10. Oʻzbekiston Respublikasi Iqtisodiyot va moliya vazirligi Oʻzbekiston Respublikasi Davlat budjeti parametrlarida “Taʼlim” sohasiga ajratilgan mablagʻlar doirasida ijod maktabi, markaz va muzeyning taʼminoti uchun zarur mablagʻlarni nazarda tutsin”.

6. Vazirlar Mahkamasining “Fargʻona viloyati Margʻilon shahrida Erkin Vohidov nomidagi ona tili va adabiyoti fanini chuqur oʻqitishga hamda xorijiy tillarga ixtisoslashtirilgan maktab-internatni tashkil etish toʻgʻrisida” 2018-yil 14-maydagi 361-son qarorida :

nomi quyidagi tahrirda bayon etilsin:

“Fargʻona viloyati Margʻilon shahrida Erkin Vohidov nomidagi ijod maktabini tashkil etish toʻgʻrisida”;

1-band quyidagi tahrirda bayon etilsin:

“1. Fargʻona viloyati Margʻilon shahrida Erkin Vohidov nomidagi ijod maktabi (keyingi oʻrinlarda — ijod maktabi) tashkil etilsin”;

3-band quyidagi tahrirda bayon etilsin:

“3. Belgilab qoʻyilsinki:

ijod maktabida har bir sinfdagi oʻquvchilar soni 20 nafarni tashkil qiladi, 7-sinflarga esa ijodiy tanlovlar, test va boshqa sinovlar asosida qabul qilinadi;

Oʻzbekiston Respublikasi Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligiga ijod maktabining moddiy-texnik bazasi, imkoniyatlari, pedagog kadrlar salohiyatidan hamda mavjud talab va ehtiyojdan kelib chiqqan holda, keyingi yillarda oʻquvchilarni qabul qilish kvotalariga oʻzgartirishlar kiritish huquqi beriladi”;

6-bandning birinchi xatboshisidagi “maktab-internatning” soʻzlari “ijod maktabining” soʻzlari bilan almashtirilsin;

8 va 9-bandlar quyidagi tahrirda bayon etilsin:

“8. Oʻzbekiston Respublikasi Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligi:

Iqtisodiyot va moliya vazirligi bilan birgalikda ushbu ijod maktabining moddiy-texnik bazasini mustahkamlash maqsadida uni yotoqxona, oshxona, kutubxona, faollar zali va oʻquv-laboratoriya jihozlari hamda kompyuter texnikasi, oʻquv-metodik majmualar, oʻqituvchilar uchun metodik qoʻllanmalar va badiiy adabiyotlar bilan taʼminlash choralarini koʻrsin;

bir oy muddatda ijod maktabining ustavi tasdiqlanishini va belgilangan tartibda davlat roʻyxatidan oʻtkazilishini taʼminlasin.

9. Oʻzbekiston Respublikasi Iqtisodiyot va moliya vazirligi Oʻzbekiston Respublikasi Davlat budjeti parametrlarida Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligiga ajratilgan mablagʻlar doirasida ijod maktabining taʼminoti uchun zarur mablagʻlarni nazarda tutsin”.

7. Vazirlar Mahkamasining “Muhammad Rizo Erniyozbek oʻgʻli Ogahiy tavalludining 210 yilligini nishonlash hamda Xiva shahrida Ogahiy ijod maktabini tashkil etish toʻgʻrisida” 2019-yil 20-martdagi 238-son qarorida :

nomi quyidagi tahrirda bayon etilsin:

“Muhammad Rizo Erniyozbek oʻgʻli Ogahiy tavalludining 210 yilligini nishonlash hamda Xiva shahrida Muhammad Rizo Ogahiy nomidagi ijod maktabini tashkil etish toʻgʻrisida”;

5 va 6-bandlar quyidagi tahrirda bayon etilsin:

“5. Xiva shahrida Muhammad Rizo Ogahiy nomidagi ijod maktabi (keyingi oʻrinlarda — ijod maktabi) tashkil etilsin.

6. Belgilab qoʻyilsinki:

ijod maktabi Oʻzbekiston Respublikasi Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligi tizimidagi davlat umumtaʼlim muassasasi hisoblanadi, shaxsiy gʻazna hisobraqamiga, Oʻzbekiston Respublikasi Davlat gerbi tasviri tushirilgan va oʻz nomi yozilgan muhrga, shtampga, blankalarga ega boʻladi;

ijod maktabida har bir sinfdagi oʻquvchilar soni 20 nafarni tashkil qiladi, 7-sinflarga esa ijodiy tanlovlar, test va boshqa sinovlar asosida qabul qilinadi;

ijod maktabida oʻqituvchilik faoliyati bilan shugʻullanayotgan Oʻzbekiston Yozuvchilar uyushmasi aʼzolari mehnatiga umumiy oʻrta taʼlim maktablari oʻqituvchilari mehnatiga soatbay haq toʻlashga muvofiq haq toʻlanadi.

Oʻzbekiston Respublikasi Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligiga ijod maktabining moddiy-texnik bazasi, imkoniyatlari, pedagog kadrlar salohiyatidan hamda mavjud talab va ehtiyojdan kelib chiqqan holda, keyingi yillarda oʻquvchilarni qabul qilish kvotalariga oʻzgartirishlar kiritish huquqi beriladi”.

8. Vazirlar Mahkamasining “Guliston shahrida Halima Xudoyberdiyeva nomidagi ona tili va adabiyoti fanini chuqur oʻqitishga ixtisoslashtirilgan maktab-internatni tashkil etish toʻgʻrisida” 2019-yil 18-maydagi 419-son qarorida :

nomi quyidagi tahrirda bayon etilsin:

“Guliston shahrida Halima Xudoyberdiyeva nomidagi ijod maktabini tashkil etish toʻgʻrisida”;

1-band quyidagi tahrirda bayon etilsin:

“1. Guliston shahrida Halima Xudoyberdiyeva nomidagi ijod maktabi (keyingi oʻrinlarda — ijod maktabi) tashkil etilsin”;

2-banddagi “maktab-internatni” soʻzlari “ijod maktabini” soʻzlari bilan almashtirilsin;

3-band quyidagi tahrirda bayon etilsin:

“3. Belgilab qoʻyilsinki:

maktab Oʻzbekiston Respublikasi Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligi tizimidagi davlat umumtaʼlim muassasasi hisoblanadi, shaxsiy gʻazna hisobraqamiga, Oʻzbekiston Respublikasi Davlat gerbi tasviri tushirilgan va oʻz nomi yozilgan muhrga, shtampga, blankalarga ega boʻladi;

ijod maktabida har bir sinfdagi oʻquvchilar soni 20 nafarni tashkil qiladi, 7-sinflarga esa ijodiy tanlovlar, test va boshqa sinovlar asosida qabul qilinadi.

Oʻzbekiston Respublikasi Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligiga ijod maktabining moddiy-texnik bazasi, imkoniyatlari, pedagog kadrlar salohiyatidan hamda mavjud talab va ehtiyojdan kelib chiqqan holda, keyingi yillarda oʻquvchilarni qabul qilish kvotalariga oʻzgartirishlar kiritish huquqi beriladi”;

6-bandning birinchi xatboshisidagi “maktab-internatning” soʻzlari “ijod maktabining” soʻzlari bilan almashtirilsin;

7-bandda :

birinchi xatboshidagi “Moliya” soʻzi “Iqtisodiyot va moliya” soʻzlari bilan almashtirilsin;

uchinchi xatboshi quyidagi tahrirda bayon etilsin:

“Oʻzbekiston Respublikasi Davlat budjeti parametrlarida Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligiga ajratilgan mablagʻlar doirasida ijod maktabining taʼminoti uchun zarur mablagʻlarni nazarda tutsin”;

8-band quyidagi tahrirda bayon etilsin:

“8. Oʻzbekiston Respublikasi Oliy taʼlim, fan va innovatsiyalar vazirligi Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligi bilan birgalikda maktabga oliy taʼlim muassasalarining oʻzbek tili va adabiyoti fakultetlarini tamomlagan iqtidorli pedagog-kadrlarni jalb etishni taʼminlasin”;

9-band oʻz kuchini yoʻqotgan deb hisoblansin.

9. Vazirlar Mahkamasining “Prezident maktablari toʻgʻrisida nizomni tasdiqlash haqida” 2019-yil 25-iyundagi 526-son qarori bilan tasdiqlangan Prezident maktablari toʻgʻrisidagi nizomning 19-bandi beshinchi xatboshisi chiqarib tashlansin.

10. Vazirlar Mahkamasining “Oʻzbekiston Respublikasi Vazirlar Mahkamasi huzuridagi Prezident, ijod va ixtisoslashtirilgan maktablarni rivojlantirish agentligining faoliyatini yanada takomillashtirish boʻyicha qoʻshimcha chora-tadbirlar toʻgʻrisida” 2020-yil 18-apreldagi 240-son qarorida :

1-bandda :

ikkinchi xatboshi chiqarib tashlansin;

uchinchi — beshinchi xatboshilar tegishlicha ikkinchi — toʻrtinchi xatboshilar deb hisoblansin;

1-ilova oʻz kuchini yoʻqotgan deb hisoblansin.

11. Vazirlar Mahkamasining 2021-yil 9-sentabrdagi 562-son qarori bilan tasdiqlangan Umumiy oʻrta taʼlim tashkilotlari, akademik litsey va kasb-hunar maktablari oʻquvchilari oʻrtasida fan olimpiadalarini tashkil etish, oʻtkazish hamda xalqaro olimpiadalar ishtirokchilarini saralash va gʻoliblarni ragʻbatlantirish tartibi toʻgʻrisidagi nizomga 2-ilova quyidagi mazmundagi 29-pozitsiya bilan toʻldirilsin:

“ 29. Xalqaro sunʼiy intellekt olimpiadasi International Olympiad in Artificial Intelligence (IOAI) ” .

12. Vazirlar Mahkamasining “Prezident taʼlim muassasalari agentligi tizimidagi bolalar oromgohi faoliyatini tashkil etish chora-tadbirlari toʻgʻrisida” 2022-yil 9-fevraldagi 65-son qarorida :

nomi quyidagi tahrirda bayon etilsin:

“Oʻzbekiston Respublikasi Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligi tizimidagi bolalar oromgohi faoliyatini tashkil etish chora-tadbirlari toʻgʻrisida”;

1-bandning ikkinchi xatboshisidagi “Prezident taʼlim muassasalari agentligi” soʻzlari “Oʻzbekiston Respublikasi Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligi” soʻzlari bilan almashtirilsin;

4-bandning “e” kichik bandidagi “Innovatsion rivojlanish vazirligining” soʻzlari “Oliy taʼlim, fan va innovatsiyalar vazirligi huzuridagi Innovatsion rivojlanish agentligining” soʻzlari bilan almashtirilsin;

7-bandning uchinchi xatboshisidagi “Prezident taʼlim muassasalari agentligi” soʻzlari “Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligi” soʻzlari bilan almashtirilsin.

13. Vazirlar Mahkamasining “Prezident taʼlim muassasalari agentligi tizimidagi ixtisoslashtirilgan maktab-internatlar va ixtisoslashtirilgan maktablar toʻgʻrisidagi nizomni tasdiqlash haqida” 2022-yil 5-maydagi 233-son qarorida :

nomi quyidagi tahrirda bayon etilsin:

“Oʻzbekiston Respublikasi Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligi tizimidagi ixtisoslashtirilgan maktab-internatlar va ixtisoslashtirilgan maktablar toʻgʻrisidagi nizomni tasdiqlash haqida”;

muqaddimadagi , 1-banddagi , 2-bandning birinchi va ikkinchi xatboshilaridagi “Prezident taʼlim muassasalari agentligi” soʻzlari “Oʻzbekiston Respublikasi Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligi” soʻzlari bilan almashtirilsin;

ilovada :

nomidagi va 1-banddagi “Prezident taʼlim muassasalari agentligi” soʻzlari “Oʻzbekiston Respublikasi Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligi” soʻzlari bilan almashtirilsin;

5-bandning toʻqqizinchi xatboshisi quyidagi tahrirda bayon etilsin:

“kirish imtihonlarini Agentlik huzuridagi Pedagogik mahorat va xalqaro baholash ilmiy-amaliy markazi (keyingi oʻrinlarda — Markaz) tomonidan xorijiy tashkilotlar hamda Oʻzbekiston Respublikasi Oliy taʼlim, fan va innovatsiyalar vazirligi huzuridagi Bilim va malakalarni baholash agentligi bilan hamkorlikda oʻtkazish”;

9-bandning ikkinchi xatboshisidagi “xalq” soʻzi “maktabgacha va maktab” soʻzlari bilan almashtirilsin.

14. Vazirlar Mahkamasining “Oʻzbekiston Respublikasi Maktabgacha va maktab taʼlimi vazirligi huzuridagi Ixtisoslashtirilgan taʼlim muassasalari agentligi tizimidagi ixtisoslashtirilgan sport maktablari faoliyatini takomillashtirish toʻgʻrisida” 2025-yil 20-avgustdagi 524-son qarorining 3-band “a” kichik bandidagi hamda 1-ilovasi 16-bandidagi “ixtisoslashtirilgan davlat maktab-internatlari uchun tasdiqlangan shaklda diplom” soʻzlari “kasbiy taʼlim toʻgʻrisidagi diplom” soʻzlari bilan almashtirilsin.

Oʻzbekiston Respublikasining Bosh vaziri A. ARIPOV

Toshkent sh.,

2025-yil 17-dekabr,

797-son

(Qonunchilik maʼlumotlari milliy bazasi, 19.12.2025-y., 09/25/797/1181-son)

lex.uz