UzbekAI

Ўзбекистон Республикаси Вазирлар Маҳкамасининг

қарори

НИЗОМ

Саноат зоналарини бошқариш тизимини такомиллаштиришга оид қўшимча чора-тадбирлар тўғрисида

Республика ҳудудларида фаолият кўрсатаётган саноат зоналарини бошқариш тизимини такомиллаштириш ҳамда Ўзбекистон Республикаси Президентининг «Бухоро вилоятида саноат ва хизмат кўрсатиш соҳасини ривожлантириш бўйича қўшимча чора-тадбирлар тўғрисида» 2024 йил 5 декабрдаги ПҚ-423-сон қарорига мувофиқ Вазирлар Маҳкамаси қарор қилади:

1. Қорақалпоғистон Республикаси, вилоятлар ва Тошкент шаҳридаги саноат зоналари дирекциялари саноат зоналари иштирокчиларининг хизмат кўрсатишни ташкил этиш лойиҳаларини жойлаштириш мақсадида тайёр бино ва иншоотларни қуриш (саноат ипотекаси) учун ер участкаларининг ижара ҳуқуқи билан улушдор бўлиб кириш тартиби тўғрисидаги низом иловага мувофиқ тасдиқлансин.

2. Қорақалпоғистон Республикаси Вазирлар Кенгаши Раиси, вилоятлар ва Тошкент шаҳри ҳокимлари ушбу қарорнинг бажарилишини самарали ташкил қилиш учун масъул ва шахсан жавобгар этиб белгилансинлар.

3. Ушбу қарорнинг бажарилишини назорат қилиш Ўзбекистон Республикаси Бош вазирининг ўринбосари Ж.А. Ходжаев зиммасига юклансин.

Вазирлар Маҳкамасининг 2025 йил 19 декабрдаги 802-сон қарорига ИЛОВА

Қорақалпоғистон Республикаси, вилоятлар ва Тошкент шаҳридаги саноат зоналари дирекциялари саноат зоналари иштирокчиларининг хизмат кўрсатишни ташкил этиш лойиҳаларини жойлаштириш мақсадида тайёр бино ва иншоотларни қуриш (саноат ипотекаси) учун ер участкаларининг ижара ҳуқуқи билан улушдор бўлиб кириш тартиби тўғрисида

1-боб. Умумий қоидалар

1. Мазкур Низом Ўзбекистон Республикаси ҳудудидаги саноат зоналари дирекциялари (кейинги ўринларда — дирекциялар) саноат зоналари иштирокчиларининг хизмат кўрсатишни ташкил этиш лойиҳаларини жойлаштириш мақсадида тайёр бино ва иншоотларни қуриш (саноат ипотекаси) учун ер участкаларининг ижара ҳуқуқи билан улушдор бўлиб кириш тартибини белгилайди.

2. Дирекциялар саноат зоналари иштирокчиларининг хизмат кўрсатишни ташкил этиш лойиҳаларини жойлаштириш мақсадида тайёр бино ва иншоотларни қуриш (саноат ипотекаси) учун тадбиркорлик субъектларининг розилиги асосида ер участкаларининг ижара ҳуқуқи билан улушдор бўлиб киради.

3. Ушбу Низомда қуйидаги асосий тушунчалардан фойдаланилади:

Дирекция — Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликларининг қарорларига асосан саноат зонаси фаолиятини тезкор бошқариш учун Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликлари ҳузурида ташкил этилган давлат муассасаси шаклидаги юридик шахс;

саноат зонаси иштирокчиси — белгиланган тартибда саноат зонаси иштирокчиси мақомини олган ва саноат зонаси ҳудудида лойиҳани амалга ошираётган тадбиркорлик субъекти;

саноат зонаси — саноат, ишлаб чиқариш корхоналарини бир жойда жойлаштириш, инфратузилма объектларидан оқилона фойдаланиш, аҳолини иш билан таъминлаш мақсадида аҳоли пункти ҳудудининг қонунчилик ҳужжатлари билан муайян мақом берилган ва ҳудуди доирасида хизмат кўрсатувчи инфратузилмага эга бўлган ишлаб чиқариш майдонлари жойлашадиган ҳамда чегаралари аниқ белгиланган қисми;

улушдорлик — дирекциянинг саноат зоналари иштирокчилари учун хизмат кўрсатиш лойиҳаларига ер участкаларининг ижара ҳуқуқи билан улушдор бўлиб кирган қиймати, маълум фоизга эга бўлиши, яъни унда ҳисса (улуш) билан қатнашиши;

хизмат кўрсатишни ташкил этиш лойиҳалари — саноат зоналари ҳудудида саноат зоналари иштирокчилари учун хизмат кўрсатиш объектлари фаолиятини йўлга қўйиш борасидаги лойиҳалар мажмуи.

2-боб. Улушдорликни ташкил этиш ва бошқариш тартиби

4. Улушдорлик саноат зоналари ҳудудида фаолият кўрсатмаётган ишлаб чиқариш майдонлари ва қишлоқ хўжалиги учун мўлжалланмаган бўш турган ер участкалари негизида саноат зоналари иштирокчиларининг хизмат кўрсатишни ташкил этиш лойиҳаларини жойлаштириш мақсадида тайёр бино ва иншоотларни қуриш (саноат ипотекаси) учун лойиҳаларни жойлаштириш мақсадида ташкил этилади.

5. Саноат зоналарига саноат зоналари иштирокчиларининг хизмат кўрсатишни ташкил этиш лойиҳаларини жойлаштириш мақсадида тайёр бино ва иншоотларни қуриш (саноат ипотекаси) учун ер участкаларининг ижара ҳуқуқи билан улушдор бўлиб кириш қиймати 100 минг АҚШ доллари эквивалентидан ортиқ бўлган хизмат кўрсатишни ташкил этиш лойиҳалари учун амал қилади.

6. Саноат зоналари ҳудудида хизмат кўрсатишни ташкил этиш лойиҳаларини жойлаштириш учун қиймати 100 минг АҚШ доллари эквивалентидан ортиқ бўлган хизмат кўрсатиш лойиҳасини амалга ошириш, тайёр бино ва иншоотларни қуриш (саноат ипотекаси) учун саноат зоналарида ер участкалари электрон онлайн-аукцион савдолари орқали ажратилади ҳамда ушбу ер участкаларига бўлган ижара ҳуқуқининг бозор қиймати хўжалик жамиятининг устав фондига дирекциянинг улуши сифатида киритилади.

3-боб. Хизмат кўрсатишни ташкил этиш лойиҳаларини жойлаштириш мақсадида тайёр бино ва иншоотларни қуриб берувчи (саноат ипотекаси) тадбиркорлик субъектларини танлаб олиш тартиби

7. Ер участкасининг электрон онлайн-аукцион савдоларида аниқланган ижара ҳуқуқи қиймати дирекция ва иштирокчи томонидан ташкил этиладиган хўжалик жамиятининг (масъулияти чекланган, акциядорлик жамияти, қўшма корхона) устав фондига дирекция улуши (ушбу жамиятнинг устав фондидаги давлат улушини оширган ҳолда) сифатида киритилади.

8. Хўжалик жамиятининг устав фондига киритиш белгиланган ер участкаси дирекциянинг мулки сифатида давлат рўйхатидан ўтказилган бўлиши лозим.

9. Ер участкасининг қиймати, устав фондига киритилган пайтдан бошлаб ер участкасига бўлган ижара ҳуқуқи хўжалик жамиятига тегишли бўлади ва белгиланган тартибда давлат рўйхатидан ўтказилади.

4-боб. Томонларнинг мажбуриятларни қабул қилиши

10. Ер участкасининг ижара ҳуқуқи қиймати шаклидаги дирекция улуши хўжалик жамияти устав фондининг 49 фоизидан ошмаслиги шарт.

11. Хўжалик жамиятининг устав фондидаги иштирокчиларнинг биргаликда фаолият юритиш шартлари инвестиция битимида белгиланиши лозим.

12. Ер участкасининг ижара ҳуқуқи қиймати шаклида хўжалик жамиятининг устав фондига киритилган дирекция улуши, агар бошқа муассислар томонидан уни имтиёзли сотиб олиш рад этилган тақдирда, инвестиция битимида кўрсатилган муддатда (қоида тариқасида уч йилдан кейин) қонунчиликда белгиланган тартибда электрон онлайн-аукцион савдолари орқали хусусийлаштирилиши мумкин.

Барча ҳолларда ер участкасининг ижара ҳуқуқи қиймати ҳисобидан шакллантирилган улуш уни сотиш пайтида баҳоланган қийматда сотилади.

5-боб. Улушдорларнинг ҳуқуқ ва мажбуриятлари

13. Улушдорлар қуйидаги ҳуқуқларга эга:

узоқ муддатли ижара шартномалари доирасида ажратилган ер участкалари ва (ёки) хизмат кўрсатиш майдонларига мустақил эгалик қилиш ҳамда инвестиция битимида кўрсатилган хизмат кўрсатишни ташкил этиш лойиҳаси доирасида фойдаланиш;

хизмат кўрсатишни ташкил этиш фаолиятининг бошланиши кечикишига объектив сабаблар мавжуд бўлганда, дирекциянинг қарори асосида инвестиция лойиҳасини амалга ошириш доирасида ишлаб чиқариш қувватларини ишга тушириш муддатини (бир марта 6 ой муддатдан ошмаган ҳолда) узайтириш.

14. Улушдорлар саноат зоналари иштирокчиларининг хизмат кўрсатишни ташкил этиш лойиҳаларига ер участкаларининг ижара ҳуқуқи билан улушдорлик тўғрисида тузилган инвестиция битимида назарда тутилган мажбуриятларни бажариш жадвалининг муддатлари ва параметрларига риоя этиши шарт.

6-боб. Якунловчи қоида

15. Ушбу Низомнинг талабларини бажаришда юзага келадиган низолар томонларнинг ўзаро музокаралари натижасида ҳал этилмаса, суд тартибида кўриб чиқилади.

Ўзбекистон Республикасининг Бош вазири А. АРИПОВ

Тошкент ш.,

2025 йил 19 декабрь,

802-сон

(Қонунчилик маълумотлари миллий базаси, 20.12.2025 й., 09/25/802/1190-сон)

lex.uz

Oʻzbekiston Respublikasi Vazirlar Mahkamasining

qarori

NIZOM

Sanoat zonalarini boshqarish tizimini takomillashtirishga oid qoʻshimcha chora-tadbirlar toʻgʻrisida

Respublika hududlarida faoliyat koʻrsatayotgan sanoat zonalarini boshqarish tizimini takomillashtirish hamda Oʻzbekiston Respublikasi Prezidentining “Buxoro viloyatida sanoat va xizmat koʻrsatish sohasini rivojlantirish boʻyicha qoʻshimcha chora-tadbirlar toʻgʻrisida” 2024-yil 5-dekabrdagi PQ-423-son qaroriga muvofiq Vazirlar Mahkamasi qaror qiladi:

1. Qoraqalpogʻiston Respublikasi, viloyatlar va Toshkent shahridagi sanoat zonalari direksiyalari sanoat zonalari ishtirokchilarining xizmat koʻrsatishni tashkil etish loyihalarini joylashtirish maqsadida tayyor bino va inshootlarni qurish (sanoat ipotekasi) uchun yer uchastkalarining ijara huquqi bilan ulushdor boʻlib kirish tartibi toʻgʻrisidagi nizom ilovaga muvofiq tasdiqlansin.

2. Qoraqalpogʻiston Respublikasi Vazirlar Kengashi Raisi, viloyatlar va Toshkent shahri hokimlari ushbu qarorning bajarilishini samarali tashkil qilish uchun masʼul va shaxsan javobgar etib belgilansinlar.

3. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari J.A. Xodjayev zimmasiga yuklansin.

Vazirlar Mahkamasining 2025-yil 19-dekabrdagi 802-son qaroriga ILOVA

Qoraqalpogʻiston Respublikasi, viloyatlar va Toshkent shahridagi sanoat zonalari direksiyalari sanoat zonalari ishtirokchilarining xizmat koʻrsatishni tashkil etish loyihalarini joylashtirish maqsadida tayyor bino va inshootlarni qurish (sanoat ipotekasi) uchun yer uchastkalarining ijara huquqi bilan ulushdor boʻlib kirish tartibi toʻgʻrisida

1-bob. Umumiy qoidalar

1. Mazkur Nizom Oʻzbekiston Respublikasi hududidagi sanoat zonalari direksiyalari (keyingi oʻrinlarda — direksiyalar) sanoat zonalari ishtirokchilarining xizmat koʻrsatishni tashkil etish loyihalarini joylashtirish maqsadida tayyor bino va inshootlarni qurish (sanoat ipotekasi) uchun yer uchastkalarining ijara huquqi bilan ulushdor boʻlib kirish tartibini belgilaydi.

2. Direksiyalar sanoat zonalari ishtirokchilarining xizmat koʻrsatishni tashkil etish loyihalarini joylashtirish maqsadida tayyor bino va inshootlarni qurish (sanoat ipotekasi) uchun tadbirkorlik subyektlarining roziligi asosida yer uchastkalarining ijara huquqi bilan ulushdor boʻlib kiradi.

3. Ushbu Nizomda quyidagi asosiy tushunchalardan foydalaniladi:

Direksiya — Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklarining qarorlariga asosan sanoat zonasi faoliyatini tezkor boshqarish uchun Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari huzurida tashkil etilgan davlat muassasasi shaklidagi yuridik shaxs;

sanoat zonasi ishtirokchisi — belgilangan tartibda sanoat zonasi ishtirokchisi maqomini olgan va sanoat zonasi hududida loyihani amalga oshirayotgan tadbirkorlik subyekti;

sanoat zonasi — sanoat, ishlab chiqarish korxonalarini bir joyda joylashtirish, infratuzilma obyektlaridan oqilona foydalanish, aholini ish bilan taʼminlash maqsadida aholi punkti hududining qonunchilik hujjatlari bilan muayyan maqom berilgan va hududi doirasida xizmat koʻrsatuvchi infratuzilmaga ega boʻlgan ishlab chiqarish maydonlari joylashadigan hamda chegaralari aniq belgilangan qismi;

ulushdorlik — direksiyaning sanoat zonalari ishtirokchilari uchun xizmat koʻrsatish loyihalariga yer uchastkalarining ijara huquqi bilan ulushdor boʻlib kirgan qiymati, maʼlum foizga ega boʻlishi, yaʼni unda hissa (ulush) bilan qatnashishi;

xizmat koʻrsatishni tashkil etish loyihalari — sanoat zonalari hududida sanoat zonalari ishtirokchilari uchun xizmat koʻrsatish obyektlari faoliyatini yoʻlga qoʻyish borasidagi loyihalar majmui.

2-bob. Ulushdorlikni tashkil etish va boshqarish tartibi

4. Ulushdorlik sanoat zonalari hududida faoliyat koʻrsatmayotgan ishlab chiqarish maydonlari va qishloq xoʻjaligi uchun moʻljallanmagan boʻsh turgan yer uchastkalari negizida sanoat zonalari ishtirokchilarining xizmat koʻrsatishni tashkil etish loyihalarini joylashtirish maqsadida tayyor bino va inshootlarni qurish (sanoat ipotekasi) uchun loyihalarni joylashtirish maqsadida tashkil etiladi.

5. Sanoat zonalariga sanoat zonalari ishtirokchilarining xizmat koʻrsatishni tashkil etish loyihalarini joylashtirish maqsadida tayyor bino va inshootlarni qurish (sanoat ipotekasi) uchun yer uchastkalarining ijara huquqi bilan ulushdor boʻlib kirish qiymati 100 ming AQSH dollari ekvivalentidan ortiq boʻlgan xizmat koʻrsatishni tashkil etish loyihalari uchun amal qiladi.

6. Sanoat zonalari hududida xizmat koʻrsatishni tashkil etish loyihalarini joylashtirish uchun qiymati 100 ming AQSH dollari ekvivalentidan ortiq boʻlgan xizmat koʻrsatish loyihasini amalga oshirish, tayyor bino va inshootlarni qurish (sanoat ipotekasi) uchun sanoat zonalarida yer uchastkalari elektron onlayn-auksion savdolari orqali ajratiladi hamda ushbu yer uchastkalariga boʻlgan ijara huquqining bozor qiymati xoʻjalik jamiyatining ustav fondiga direksiyaning ulushi sifatida kiritiladi.

3-bob. Xizmat koʻrsatishni tashkil etish loyihalarini joylashtirish maqsadida tayyor bino va inshootlarni qurib beruvchi (sanoat ipotekasi) tadbirkorlik subyektlarini tanlab olish tartibi

7. Yer uchastkasining elektron onlayn-auksion savdolarida aniqlangan ijara huquqi qiymati direksiya va ishtirokchi tomonidan tashkil etiladigan xoʻjalik jamiyatining (masʼuliyati cheklangan, aksiyadorlik jamiyati, qoʻshma korxona) ustav fondiga direksiya ulushi (ushbu jamiyatning ustav fondidagi davlat ulushini oshirgan holda) sifatida kiritiladi.

8. Xoʻjalik jamiyatining ustav fondiga kiritish belgilangan yer uchastkasi direksiyaning mulki sifatida davlat roʻyxatidan oʻtkazilgan boʻlishi lozim.

9. Yer uchastkasining qiymati, ustav fondiga kiritilgan paytdan boshlab yer uchastkasiga boʻlgan ijara huquqi xoʻjalik jamiyatiga tegishli boʻladi va belgilangan tartibda davlat roʻyxatidan oʻtkaziladi.

4-bob. Tomonlarning majburiyatlarni qabul qilishi

10. Yer uchastkasining ijara huquqi qiymati shaklidagi direksiya ulushi xoʻjalik jamiyati ustav fondining 49 foizidan oshmasligi shart.

11. Xoʻjalik jamiyatining ustav fondidagi ishtirokchilarning birgalikda faoliyat yuritish shartlari investitsiya bitimida belgilanishi lozim.

12. Yer uchastkasining ijara huquqi qiymati shaklida xoʻjalik jamiyatining ustav fondiga kiritilgan direksiya ulushi, agar boshqa muassislar tomonidan uni imtiyozli sotib olish rad etilgan taqdirda, investitsiya bitimida koʻrsatilgan muddatda (qoida tariqasida uch yildan keyin) qonunchilikda belgilangan tartibda elektron onlayn-auksion savdolari orqali xususiylashtirilishi mumkin.

Barcha hollarda yer uchastkasining ijara huquqi qiymati hisobidan shakllantirilgan ulush uni sotish paytida baholangan qiymatda sotiladi.

5-bob. Ulushdorlarning huquq va majburiyatlari

13. Ulushdorlar quyidagi huquqlarga ega:

uzoq muddatli ijara shartnomalari doirasida ajratilgan yer uchastkalari va (yoki) xizmat koʻrsatish maydonlariga mustaqil egalik qilish hamda investitsiya bitimida koʻrsatilgan xizmat koʻrsatishni tashkil etish loyihasi doirasida foydalanish;

xizmat koʻrsatishni tashkil etish faoliyatining boshlanishi kechikishiga obyektiv sabablar mavjud boʻlganda, direksiyaning qarori asosida investitsiya loyihasini amalga oshirish doirasida ishlab chiqarish quvvatlarini ishga tushirish muddatini (bir marta 6 oy muddatdan oshmagan holda) uzaytirish.

14. Ulushdorlar sanoat zonalari ishtirokchilarining xizmat koʻrsatishni tashkil etish loyihalariga yer uchastkalarining ijara huquqi bilan ulushdorlik toʻgʻrisida tuzilgan investitsiya bitimida nazarda tutilgan majburiyatlarni bajarish jadvalining muddatlari va parametrlariga rioya etishi shart.

6-bob. Yakunlovchi qoida

15. Ushbu Nizomning talablarini bajarishda yuzaga keladigan nizolar tomonlarning oʻzaro muzokaralari natijasida hal etilmasa, sud tartibida koʻrib chiqiladi.

Oʻzbekiston Respublikasining Bosh vaziri A. ARIPOV

Toshkent sh.,

2025-yil 19-dekabr,

802-son

(Qonunchilik maʼlumotlari milliy bazasi, 20.12.2025-y., 09/25/802/1190-son)

lex.uz