UzbekAI

Ўзбекистон Республикаси Вазирлар Маҳкамасининг

Қарори

ВАҚТИНЧАЛИК НИЗОМ

Саноат зоналарида лойиҳалар амалга оширилишини жадаллаштириш бўйича қўшимча чора-тадбирлар тўғрисида

Ҳудудларда фаолият юритаётган саноат зоналарини бошқариш тизимини такомиллаштириш, инвестиция лойиҳаларининг амалга оширилишини янада жадаллаштириш ҳамда Ўзбекистон Республикаси Президентининг «Тадбиркорлар учун тенг шароитлар ва адолатли рақобат муҳитини таъминлаш бўйича навбатдаги чора-тадбирлар тўғрисида» 2024 йил 27 декабрдаги ПФ-229-сон Фармони ижросини таъминлаш мақсадида Вазирлар Маҳкамаси қарор қилади:

1. Ўзбекистон Республикаси Инвестициялар, саноат ва савдо вазирлиги, Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликларининг саноат зоналарида саноат зоналари иштирокчилари томонидан якунига етказилмаган лойиҳаларни амалга оширишга киритилган инвестицияларни баҳолаш ҳамда қурилиши тугалланмаган бино ва иншоотларда инвестиция киритиш ва қурилиш ишларини амалга оширган саноат зоналари иштирокчилари томонидан сарфланган маблағларни қоплаб бериш шарти билан янги иштирокчиларга бериш тартибини жорий этиш тўғрисидаги таклифлари маъқуллансин.

2. Саноат зоналари иштирокчилари томонидан якунига етказилмаган лойиҳаларни амалга оширишга киритилган инвестицияларни баҳолаш ҳамда қурилиши тугалланмаган бино ва иншоотларда инвестиция киритиш ва қурилиш ишларини амалга оширган саноат зоналари иштирокчилари томонидан сарфланган маблағларни қоплаб бериш шарти билан янги иштирокчиларга бериш тартиби тўғрисидаги вақтинчалик низом иловага мувофиқ тасдиқлансин.

3. Қорақалпоғистон Республикаси Вазирлар Кенгаши Раиси, вилоятлар ва Тошкент шаҳри ҳокимлиги ҳамда саноат зоналари дирекциялари ушбу қарорга иловада тасдиқланган вақтинчалик низомда белгиланган талабларнинг бажарилишига шахсан жавобгар этиб белгилансин.

4. Ушбу қарорнинг бажарилишини назорат қилиш Ўзбекистон Республикаси Бош вазирининг ўринбосари Ж.А. Ходжаев зиммасига юклансин.

Вазирлар Маҳкамасининг 2025 йил 19 декабрдаги 803-сон қарорига ИЛОВА

Саноат зоналари иштирокчилари томонидан якунига етказилмаган лойиҳаларни амалга оширишга киритилган инвестицияларни баҳолаш ҳамда қурилиши тугалланмаган бино ва иншоотларда инвестиция киритиш ва қурилиш ишларини амалга оширган саноат зоналари иштирокчилари томонидан сарфланган маблағларни қоплаб бериш шарти билан янги иштирокчиларга бериш тартиби тўғрисида

1-боб. Умумий қоидалар

1. Ушбу Вақтинчалик низом саноат зоналари иштирокчилари томонидан якунига етказилмаган лойиҳаларни амалга оширишга киритилган инвестицияларни баҳолаш, қурилиши тугалланмаган бино ва иншоотларда инвестиция киритиш ҳамда қурилиш ишларини амалга оширган саноат зоналари иштирокчилари томонидан сарфланган маблағларни қоплаб бериш шарти билан янги иштирокчиларга бериш тартибини белгилайди.

Ушбу Вақтинчалик низом Ўзбекистон Республикаси Президентининг «Махсус иқтисодий ва саноат зоналари фаолиятининг самарадорлигини ошириш бўйича қўшимча чора-тадбирлар тўғрисида» 2025 йил 4 мартдаги ПФ-41-сон Фармонига мувофиқ «Саноат зоналари тўғрисидаги» Ўзбекистон Республикаси Қонуни кучга киргунга қадар амал қилади.

Бунда киритилган инвестициялар миқдори ҳамда қурилиши тугалланмаган бино ва иншоотлар қиймати ваколатли баҳоловчи ташкилот томонидан баҳоланади.

2. Ушбу Вақтинчалик низомда қуйидаги асосий тушунчалардан фойдаланилади:

дирекция — Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликларининг қарорларига асосан саноат зонаси фаолиятини тезкор бошқариш учун Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликлари ҳузурида ташкил этилган давлат муассасаси шаклидаги юридик шахс;

инвестиция битими — иқтисодий, ижтимоий ва фойда олиш учун инвестицияларни амалга оширишга қаратилган, томонлар мажбурияти кўрсатилган Дирекция ва иштирокчи ўртасида тузиладиган битим;

лойиҳа ташаббускори — саноат зонаси иштирокчиси мақомини олишга талабгор юридик шахс;

саноат зонаси иштирокчиси — белгиланган тартибда саноат зонаси иштирокчиси мақомини олган ва саноат зонаси ҳудудида лойиҳани амалга ошираётган тадбиркорлик субъекти;

саноат зонаси — саноат, ишлаб чиқариш корхоналарини бир жойда жойлаштириш, инфратузилма объектларидан оқилона фойдаланиш, аҳолини иш билан таъминлаш мақсадида, аҳоли пункти ҳудудининг қонунчилик ҳужжатлари билан муайян мақом берилган ва ҳудуди доирасида хизмат кўрсатувчи инфратузилмага эга бўлган ишлаб чиқариш майдонлари жойлашадиган ҳамда чегаралари аниқ белгиланган қисми;

якунига етказилмаган лойиҳа — саноат зонасида амалга оширилиши белгиланган, бироқ саноат зонаси иштирокчиси томонидан инвестиция битимида кўрсатилган мажбуриятларни муддатида бажарилмаслиги ёки бажара олмаслиги маълум қилинган лойиҳа.

2-боб. Саноат зоналарида якунига етказилмаган лойиҳаларни амалга оширишга киритилган инвестицияларни баҳолаш ҳамда қурилиши якунланмаган бино ва иншоотларни дирекцияга ўтказиш тартиби

3. Саноат зонасидаги якунига етказилмаган лойиҳаларни амалга оширишга киритилган инвестицияларни баҳолаш инвесторнинг саноат зонаси иштирокчиси мақомини йўқотгандан сўнг унинг лойиҳа доирасида амалга оширган харажатларини маълум шартлар асосида қоплаб бериш мақсадида амалга оширилади.

Бунда саноат зонаси иштирокчиси мақомини йўқотган инвестор ва дирекция ўртасидаги келишув битими асосида иштирокчи томонидан қурилиши бошланиб, қурилиши тугалланмаган объектлар улар қурилишига сарфланган харажатларни қоплаш шарти билан дирекцияга ўтказилади.

Қурилиши тугалланмаган объектларни баҳолашдан ўтказиш харажатларини қоплаш ва баҳолашдан ўтказиш натижалари бўйича икки томоннинг розилигини тасдиқлаш масалалари келишув битимида акс этади.

4. Инвесторнинг саноат зонаси иштирокчиси мақоми қонунчиликда белгиланган тартибда бекор қилингандан сўнг ер участкаси қурилиши тугалланмаган объект билан биргаликда дирекцияга қайтарилади.

Бунда икки ҳафта муддатда дирекция қурилиши тугалланмаган объектни ўрнатилган тартибда давлат рўйхатидан ўтказиб, бир ой муддатда мазкур объектни баҳолашдан ўтказади.

5. Объект баҳолангандан сўнг, дирекция ер участкасини қурилиши тугалланмаган объект билан биргаликда ёки объект қурилишини якунлаб, фойдаланиш учун рухсатнома олингандан сўнг уч кунлик муддатда янги инвестиция лойиҳасини амалга ошириш учун ўрнатилган тартибда электрон-онлайн аукционга жойлаштиради.

6. Электрон-онлайн аукцион савдолари якуни ғолиб аниқланиб, тўловлар амалга оширилгандан сўнг, электрон-онлайн аукцион оператори маблағларни Дирекцияга йўналтиради ҳамда дирекция бир кун муддатда келишув битимига мувофиқ қурилиши тугалланмаган объектнинг баҳоланган қийматини иштирокчи мақоми бекор қилинган инвесторнинг банк ҳисобварағига ўтказади.

Бунда электрон-онлайн аукцион савдосидан тушган маблағнинг қурилиши тугалланмаган объектнинг баҳоланган қийматидан ортиқча қисми дирекция ҳисобида қолади.

7. Инвестиция битимида янги саноат зонаси иштирокчиси (лойиҳа ташаббускори) компенсация тўлови мажбуриятини олаётган вақтда баҳоловчи хулосаси билан таништирилади ҳамда хулосанинг бир нусхаси битимга илова қилинади.

3-боб. Якунловчи қоида

8. Мазкур Вақтинчалик низом талабларини бажаришда юзага келадиган низолар томонларнинг ўзаро музокаралари натижасида ҳал этилмаса, суд тартибида кўриб чиқилади.

Ўзбекистон Республикасининг Бош вазири А. АРИПОВ

Тошкент ш.,

2025 йил 19 декабрь,

803-сон

(Қонунчилик маълумотлари миллий базаси, 20.12.2025 й., 09/25/803/1191-сон)

lex.uz

Oʻzbekiston Respublikasi Vazirlar Mahkamasining

Qarori

VAQTINCHALIK NIZOM

Sanoat zonalarida loyihalar amalga oshirilishini jadallashtirish boʻyicha qoʻshimcha chora-tadbirlar toʻgʻrisida

Hududlarda faoliyat yuritayotgan sanoat zonalarini boshqarish tizimini takomillashtirish, investitsiya loyihalarining amalga oshirilishini yanada jadallashtirish hamda Oʻzbekiston Respublikasi Prezidentining “Tadbirkorlar uchun teng sharoitlar va adolatli raqobat muhitini taʼminlash boʻyicha navbatdagi chora-tadbirlar toʻgʻrisida” 2024-yil 27-dekabrdagi PF-229-son Farmoni ijrosini taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Investitsiyalar, sanoat va savdo vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklarining sanoat zonalarida sanoat zonalari ishtirokchilari tomonidan yakuniga yetkazilmagan loyihalarni amalga oshirishga kiritilgan investitsiyalarni baholash hamda qurilishi tugallanmagan bino va inshootlarda investitsiya kiritish va qurilish ishlarini amalga oshirgan sanoat zonalari ishtirokchilari tomonidan sarflangan mablagʻlarni qoplab berish sharti bilan yangi ishtirokchilarga berish tartibini joriy etish toʻgʻrisidagi takliflari maʼqullansin.

2. Sanoat zonalari ishtirokchilari tomonidan yakuniga yetkazilmagan loyihalarni amalga oshirishga kiritilgan investitsiyalarni baholash hamda qurilishi tugallanmagan bino va inshootlarda investitsiya kiritish va qurilish ishlarini amalga oshirgan sanoat zonalari ishtirokchilari tomonidan sarflangan mablagʻlarni qoplab berish sharti bilan yangi ishtirokchilarga berish tartibi toʻgʻrisidagi vaqtinchalik nizom ilovaga muvofiq tasdiqlansin.

3. Qoraqalpogʻiston Respublikasi Vazirlar Kengashi Raisi, viloyatlar va Toshkent shahri hokimligi hamda sanoat zonalari direksiyalari ushbu qarorga ilovada tasdiqlangan vaqtinchalik nizomda belgilangan talablarning bajarilishiga shaxsan javobgar etib belgilansin.

4. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari J.A. Xodjayev zimmasiga yuklansin.

Vazirlar Mahkamasining 2025-yil 19-dekabrdagi 803-son qaroriga ILOVA

Sanoat zonalari ishtirokchilari tomonidan yakuniga yetkazilmagan loyihalarni amalga oshirishga kiritilgan investitsiyalarni baholash hamda qurilishi tugallanmagan bino va inshootlarda investitsiya kiritish va qurilish ishlarini amalga oshirgan sanoat zonalari ishtirokchilari tomonidan sarflangan mablagʻlarni qoplab berish sharti bilan yangi ishtirokchilarga berish tartibi toʻgʻrisida

1-bob. Umumiy qoidalar

1. Ushbu Vaqtinchalik nizom sanoat zonalari ishtirokchilari tomonidan yakuniga yetkazilmagan loyihalarni amalga oshirishga kiritilgan investitsiyalarni baholash, qurilishi tugallanmagan bino va inshootlarda investitsiya kiritish hamda qurilish ishlarini amalga oshirgan sanoat zonalari ishtirokchilari tomonidan sarflangan mablagʻlarni qoplab berish sharti bilan yangi ishtirokchilarga berish tartibini belgilaydi.

Ushbu Vaqtinchalik nizom Oʻzbekiston Respublikasi Prezidentining “Maxsus iqtisodiy va sanoat zonalari faoliyatining samaradorligini oshirish boʻyicha qoʻshimcha chora-tadbirlar toʻgʻrisida” 2025-yil 4-martdagi PF-41-son Farmoniga muvofiq “Sanoat zonalari toʻgʻrisidagi” Oʻzbekiston Respublikasi Qonuni kuchga kirgunga qadar amal qiladi.

Bunda kiritilgan investitsiyalar miqdori hamda qurilishi tugallanmagan bino va inshootlar qiymati vakolatli baholovchi tashkilot tomonidan baholanadi.

2. Ushbu Vaqtinchalik nizomda quyidagi asosiy tushunchalardan foydalaniladi:

direksiya — Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklarining qarorlariga asosan sanoat zonasi faoliyatini tezkor boshqarish uchun Qoraqalpogʻiston Respublikasi Vazirlar Kengashi, viloyatlar va Toshkent shahri hokimliklari huzurida tashkil etilgan davlat muassasasi shaklidagi yuridik shaxs;

investitsiya bitimi — iqtisodiy, ijtimoiy va foyda olish uchun investitsiyalarni amalga oshirishga qaratilgan, tomonlar majburiyati koʻrsatilgan Direksiya va ishtirokchi oʻrtasida tuziladigan bitim;

loyiha tashabbuskori — sanoat zonasi ishtirokchisi maqomini olishga talabgor yuridik shaxs;

sanoat zonasi ishtirokchisi — belgilangan tartibda sanoat zonasi ishtirokchisi maqomini olgan va sanoat zonasi hududida loyihani amalga oshirayotgan tadbirkorlik subyekti;

sanoat zonasi — sanoat, ishlab chiqarish korxonalarini bir joyda joylashtirish, infratuzilma obyektlaridan oqilona foydalanish, aholini ish bilan taʼminlash maqsadida, aholi punkti hududining qonunchilik hujjatlari bilan muayyan maqom berilgan va hududi doirasida xizmat koʻrsatuvchi infratuzilmaga ega boʻlgan ishlab chiqarish maydonlari joylashadigan hamda chegaralari aniq belgilangan qismi;

yakuniga yetkazilmagan loyiha — sanoat zonasida amalga oshirilishi belgilangan, biroq sanoat zonasi ishtirokchisi tomonidan investitsiya bitimida koʻrsatilgan majburiyatlarni muddatida bajarilmasligi yoki bajara olmasligi maʼlum qilingan loyiha.

2-bob. Sanoat zonalarida yakuniga yetkazilmagan loyihalarni amalga oshirishga kiritilgan investitsiyalarni baholash hamda qurilishi yakunlanmagan bino va inshootlarni direksiyaga oʻtkazish tartibi

3. Sanoat zonasidagi yakuniga yetkazilmagan loyihalarni amalga oshirishga kiritilgan investitsiyalarni baholash investorning sanoat zonasi ishtirokchisi maqomini yoʻqotgandan soʻng uning loyiha doirasida amalga oshirgan xarajatlarini maʼlum shartlar asosida qoplab berish maqsadida amalga oshiriladi.

Bunda sanoat zonasi ishtirokchisi maqomini yoʻqotgan investor va direksiya oʻrtasidagi kelishuv bitimi asosida ishtirokchi tomonidan qurilishi boshlanib, qurilishi tugallanmagan obyektlar ular qurilishiga sarflangan xarajatlarni qoplash sharti bilan direksiyaga oʻtkaziladi.

Qurilishi tugallanmagan obyektlarni baholashdan oʻtkazish xarajatlarini qoplash va baholashdan oʻtkazish natijalari boʻyicha ikki tomonning roziligini tasdiqlash masalalari kelishuv bitimida aks etadi.

4. Investorning sanoat zonasi ishtirokchisi maqomi qonunchilikda belgilangan tartibda bekor qilingandan soʻng yer uchastkasi qurilishi tugallanmagan obyekt bilan birgalikda direksiyaga qaytariladi.

Bunda ikki hafta muddatda direksiya qurilishi tugallanmagan obyektni oʻrnatilgan tartibda davlat roʻyxatidan oʻtkazib, bir oy muddatda mazkur obyektni baholashdan oʻtkazadi.

5. Obyekt baholangandan soʻng, direksiya yer uchastkasini qurilishi tugallanmagan obyekt bilan birgalikda yoki obyekt qurilishini yakunlab, foydalanish uchun ruxsatnoma olingandan soʻng uch kunlik muddatda yangi investitsiya loyihasini amalga oshirish uchun oʻrnatilgan tartibda elektron-onlayn auksionga joylashtiradi.

6. Elektron-onlayn auksion savdolari yakuni gʻolib aniqlanib, toʻlovlar amalga oshirilgandan soʻng, elektron-onlayn auksion operatori mablagʻlarni Direksiyaga yoʻnaltiradi hamda direksiya bir kun muddatda kelishuv bitimiga muvofiq qurilishi tugallanmagan obyektning baholangan qiymatini ishtirokchi maqomi bekor qilingan investorning bank hisobvaragʻiga oʻtkazadi.

Bunda elektron-onlayn auksion savdosidan tushgan mablagʻning qurilishi tugallanmagan obyektning baholangan qiymatidan ortiqcha qismi direksiya hisobida qoladi.

7. Investitsiya bitimida yangi sanoat zonasi ishtirokchisi (loyiha tashabbuskori) kompensatsiya toʻlovi majburiyatini olayotgan vaqtda baholovchi xulosasi bilan tanishtiriladi hamda xulosaning bir nusxasi bitimga ilova qilinadi.

3-bob. Yakunlovchi qoida

8. Mazkur Vaqtinchalik nizom talablarini bajarishda yuzaga keladigan nizolar tomonlarning oʻzaro muzokaralari natijasida hal etilmasa, sud tartibida koʻrib chiqiladi.

Oʻzbekiston Respublikasining Bosh vaziri A. ARIPOV

Toshkent sh.,

2025-yil 19-dekabr,

803-son

(Qonunchilik maʼlumotlari milliy bazasi, 20.12.2025-y., 09/25/803/1191-son)

lex.uz