UzbekAI

ЎЗБЕКИСТОН РЕСПУБЛИКАСИ СОҒЛИҚНИ САҚЛАШ ВАЗИРИНИНГ

БУЙРУҒИ

НИЗОМ

РЎЙХАТИ

РЎЙХАТИ

Референт нарх шакллантириш тизими доирасида рецепт билан бериладиган дори воситалари нархларини қайд этиш тартиби тўғрисидаги низомни тасдиқлаш ҳақида

Ўзбекистон Республикаси Президентининг 2025 йил 28 январдаги ПФ-13-сон «Фармацевтика тармоғини жадал ривожлантиришга оид қўшимча чора-тадбирлар тўғрисида»ги Фармони ҳамда 2019 йил 30 декабрдаги ПҚ-4554-сон « Ўзбекистон Республикаси фармацевтика тармоғида ислоҳотларни чуқурлаштиришга доир қўшимча чора-тадбирлар тўғрисида »ги, 2022 йил 26 октябрдаги ПҚ-411-сон « Аҳолини сифатли дори воситалари ва тиббий буюмлар билан таъминлаш юзасидан қўшимча чора-тадбирлар тўғрисида »ги қарорларига мувофиқ буюраман:

1. Референт нарх шакллантириш тизими доирасида рецепт билан бериладиган дори воситалари нархларини қайд этиш тартиби тўғрисидаги низом 1-иловага мувофиқ тасдиқлансин.

2. Айрим идоравий норматив-ҳуқуқий ҳужжатлар 2-иловага мувофиқ ўз кучини йўқотган деб топилсин.

3. Мазкур буйруқ Ўзбекистон Республикаси Иқтисодиёт ва молия вазирлиги, Солиқ қўмитаси, Рақобатни ривожлантириш ва истеъмолчилар ҳуқуқларини ҳимоя қилиш қўмитаси, Ўзбекистон Республикаси Президенти ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил ва Ўзбекистон Республикаси Савдо-саноат палатаси билан келишилган.

4. Ушбу буйруқ расмий эълон қилинган кундан эътиборан уч ой ўтгач кучга киради.

Келишилди:

Ўзбекистон Республикаси соғлиқни сақлаш вазирининг 2025 йил 10 декабрдаги 23-сон буйруғига 1-ИЛОВА

Референт нарх шакллантириш тизими доирасида рецепт билан бериладиган дори воситалари нархларини қайд этиш тартиби тўғрисидаги

Мазкур Низом референт нарх шакллантириш тизими доирасида рецепт билан бериладиган маҳаллий ва импорт дори воситалари нархларини қайд этиш тартибини белгилайди.

Ушбу Низом Ўзбекистон Республикаси ҳудудида тиббиёт амалиётида қўллаш учун рухсат этилган ҳамда давлат рўйхатидан ўтказилганлик гувоҳномасининг амал қилиш даврида ишлаб чиқарилган рецепт билан бериладиган дори воситаларига нисбатан татбиқ этилади.

Референт нарх шакллантириш тизими доирасида нархларни қайд этиш дори моддалари (субстанциялар), кам учрайдиган касалликларни даволаш учун мўлжалланган орфан дори воситалари ҳамда кам учрайдиган (орфан) касалликларга ташхис қўйиш ва уларни даволаш учун мўлжалланган тиббий буюмлар рўйхатида (рўйхат рақами 3258, 2020 йил 30 июнь) келтирилган орфан дори воситаларига ва рецептсиз бериладиган дори воситаларига татбиқ этилмайди.

1-боб. Умумий қоидалар

1. Ушбу Низомда қуйидаги асосий тушунчалардан фойдаланилади:

референт нарх шакллантириш тизими — дори шакли, қадоқдаги сони, дозаси, концентрацияси, ҳажми ва қадоқланишини ҳисобга олган ҳолда худди шундай фаол моддага эга дори воситаларини ишлаб чиқарувчи мамлакатда ва референт мамлакатларда, Pharmaceutical Inspection Co-operation Scheme» (PIC/S) халқаро ташкилотига аъзо мамлакатларда ва Ўзбекистон Республикасида сотиш нархларини таҳлил қилиш натижаси асосида ҳар бир савдо номи учун референт нархларни қайд этиш тизими;

референт мамлакатлар — Жаҳон банкининг аҳоли жон бошига нисбатан ялпи ички маҳсулотнинг ҳисобланган даромадлар даражасидан юқори, ўртачадан юқорироқ ва ўртачадан пастроқ бўлган давлатлар гуруҳига кирувчи Ўзбекистон Республикаси билан макроиқтисодий жиҳатдан таққосланадиган мамлакатлар;

референт нарх — референт нарх шакллантириш тизими доирасида қайд этилган нарх;

чекланган нархлар — референт нарх шакллантириш тизими доирасида референт нархларга чекланган савдо устамаларини қўллаш йўли билан ҳисобланган улгуржи ва чакана нархлар;

референт ва чекланган нархлар реестри — дори шакли, қадоқдаги сони, дозаси, концентрацияси, ҳажми ва қадоқланишини ҳисобга олган ҳолда рецепт билан бериладиган дори воситаларининг ҳар бир савдо номи учун Ўзбекистон Республикасида қайд этилган референт ва чекланган нархларнинг электрон (онлайн) реестри;

автоматлаштирилган ахборот тизими (бундан буён матнда ахборот тизими деб юритилади) — аризаларни қабул қилиш, референт нарх шакллантириш тизими доирасидаги маълумотларни қайта ишлаш ва сақлаш, референт нархларни қайд этиш ҳамда референт ва чекланган нархлар реестрини юритиш учун мўлжалланган махсус электрон тизим;

ваколатли орган — референт нархларни қайд этиш ва қайта қайд этиш учун масъул бўлган Ўзбекистон Республикаси Соғлиқни сақлаш вазирлиги ҳузуридаги Фармацевтика тармоғини ривожлантириш агентлиги;

ишчи орган — референт нархларни қайд этиш учун аризаларни қабул қилиш ва кўриб чиқиш ҳамда ахборот тизимининг узлуксиз ва барқарор ишлашини таъминлаш учун масъул бўлган ваколатли органнинг референт нархлар билан ишловчи масъул бўлинмаси;

рецепт билан бериладиган дори воситалари — истеъмолчиларга қонунчиликда белгиланган талабларга мувофиқ шаклдаги рецепт (электрон рецепт) тақдим этилгандан кейингина реализация қилинадиган дори воситалари;

ариза — рецепт билан бериладиган дори воситаларининг референт ёки илгари қайд этилган референт нархларини қайта қайд этиш ҳақидаги мурожаат;

ариза берувчи — дори воситаларининг давлат рўйхатидан ўтказилганлик гувоҳномаси эгаси бўлган юридик шахс ёки унинг ишончли вакили;

маҳаллий ишлаб чиқарувчи — Ўзбекистон Республикасида дори воситаларини ишлаб чиқариш учун лицензияга эга бўлган юридик шахс;

маҳаллий дори воситалари — Ўзбекистон Республикаси ҳудудида маҳаллий ишлаб чиқарувчилар томонидан ишлаб чиқарилган дори воситалари;

импорт дори воситалари — хорижий фармацевтика корхоналари томонидан ишлаб чиқарилиб, Ўзбекистон Республикаси божхона ҳудудига олиб кирилган ва ушбу ҳудуддан қайтариб олиб чиқиш мажбуриятисиз эркин муомалага чиқарилган дори воситалари;

оригинал дори воситаси — сифати, самарадорлиги ва хавфсизлиги клиник олди ва клиник тадқиқотлар натижалари асосида тасдиқланган, дунё фармацевтика бозорида биринчи бўлиб рўйхатга олинган янги таъсир этувчи моддага ёки моддаларга эга бўлган дори воситаси;

женерик дори воситаси — оригинал (патентланган) дори воситасининг фаол моддаси билан сифат ва миқдорий жиҳатдан бир хил таркибга, дори шаклига эга бўлган, лекин патент муддати тугагандан сўнг ишлаб чиқарилган дори воситаси бўлиб, хавфсизлиги, таъсир кучи, хоссалари, қўлланилиш соҳаси ҳамда биоэквивалентлиги оригинал дори воситасига нисбатан тасдиқланган дори воситаси. Фаол модданинг турли тузлари, эфирлари, изомерлари, изомерлар аралашмалари, комплекслари ёки ҳосилалари хавфсизлиги ва самарадорлиги жиҳатидан сезиларли фарқ қилмаса, бир хил фаол модда сифатида эътироф этилади. Оғиз орқали қабул қилиш учун мўлжалланган ва таъсир этувчи моддаси тез ажраладиган турли дори шакллари биокираолишликни ўрганиш доирасида бир хил дори шакли сифатида тан олинади;

биосимиляр дори воситаси — табиий манбалардан олинадиган, таркибида рўйхатдан ўтказилган оригинал (референс) дори воситасининг таъсир этувчисини сақловчи ҳамда сифати, биологик фаоллиги, самарадорлиги ва хавфсизлиги кўрсаткичлари бўйича оригинал (референс) дори воситасига солиштириш тадқиқотлари асосида ўхшашлиги исботланган биологик дори воситаси;

рўйхатдан ўтказилганлик гувоҳномаси (бундан буён матнда гувоҳнома деб юритилади) — дори воситасининг давлат рўйхатидан ўтказилганлигини ва унинг Ўзбекистон Республикаси Соғлиқни сақлаш вазирлиги томонидан тиббиёт амалиётида қўлланилишига рухсат берилганини тасдиқловчи ҳужжат.

2. Ваколатли орган доимий тарзда Интернет жаҳон ахборот тармоғидаги ўз расмий веб-сайтида ҳамда Ягона интерактив давлат хизматлари порталида хронологик тартибда қайд этилган ва қайта қайд этилган референт нархлар ҳақидаги маълумотларни жойлаштириб боради. Бунда аввалги маълумотлар сақланган ҳолда ўзгартиришлар киритилади ҳамда референт нархлар ҳақидаги маълумотлардан эркин фойдаланиш имконияти яратилади.

3. Қайд этилган референт нархлар ҳақидаги маълумотлар ахборот тизимида рўйхатдан ўтганлик гувоҳномасининг амал қилиш муддати даврида ва муддати тугаган кундан кейин беш йил давомида сақланади.

2-боб. Референт ва чекланган нархларни қайд этиш ва қайта қайд этиш

4. Ариза берувчи референт нархларни қайд этиш ва қайта қайд этиш учун электрон рақамли имзо билан ахборот тизимига кириб, референт нархларни қайд этиш ёки қайта қайд этиш ҳуқуқини тасдиқловчи ҳужжатларини (гувоҳнома, ишончнома) ҳамда референт нархлар қайд этиладиган Ўзбекистон Республикасида давлат рўйхатидан ўтказилган дори воситалари ҳақида маълумотни киритади ва ишчи органга юборади.

5. Ишчи орган ариза қабул қилинган санадан бошлаб икки иш куни ичида ариза берувчининг гувоҳнома эгаси ёки унинг ишончли вакили эканлигини текширади.

Ишчи орган ариза берувчини ҳақиқатдан ҳам гувоҳноманинг эгаси ёки унинг ишончли вакили эканлигини тасдиқлагандан сўнг уни ахборот тизимида рўйхатдан ўтказади ва бу ҳақидаги маълумотни ариза берувчига дарҳол ахборот тизими ёки электрон почта манзили орқали юборади.

Ариза берувчи ахборот тизимида рўйхатдан ўтказилганидан сўнг аризада кўрсатилган дори воситаларига референт нархларни қайд этиш учун маълумотларни киритиш ҳуқуқига эга бўлади.

Агарда ариза берувчининг гувоҳнома эгаси ёки унинг ишончли вакили эканлигини тасдиқловчи ҳужжатлари нотўғри ёки бузиб кўрсатилган бўлса, ишчи орган рўйхатдан ўтказиш рад этилганлиги тўғрисидаги электрон хабарни дарҳол ахборот тизими орқали ариза берувчига жўнатади.

6. Ариза берувчи (маҳаллий дори воситалари учун) ахборот тизими орқали ишчи органга дори шакли, қадоқдаги сони, дозаси, концентрацияси, ҳажми ва қадоқланишини ҳисобга олган ҳолда рецепт билан бериладиган дори воситаларининг ҳар бир савдо номи учун Ўзбекистон Республикаси миллий валютасида референт нархларни (ҚҚСни қўшмаган ҳолда) ахборот тизимига киритади.

Аризага рецепт билан бериладиган дори воситасининг сотиш қийматини шакллантириш бўйича ушбу Низомнинг 1-иловасига мувофиқ ҳисоб-китоб ва бошқа нархни шакллантиришга оид маълумотлар илова қилинади.

Бунда киритилган референт нархларнинг тўғри шаклланганлиги юзасидан жавобгарлик ариза берувчи зиммасига юклатилади.

7. Ариза берувчи (импорт дори воситалари учун) ахборот тизими орқали ишчи органига дори шакли, қадоқдаги сони, дозаси, концентрацияси, ҳажми ва қадоқланишини ҳисобга олган ҳолда рецепт билан бериладиган дори воситаларининг ҳар бир савдо номи учун қуйидаги маълумотларни тақдим этади:

мазкур Низомнинг 2-иловасида кўрсатилган референт мамлакатларда ушбу дори воситасини ишлаб чиқарувчи учун белгиланган расмий нархлар (агар расмий нархлар улгуржи ёки чакана савдо учун белгиланган нархлар бўлса, уларнинг устамалари, шунингдек божхона тўловлари, ҚҚС ва бошқа қўшимча тўловлар чегириб ташланади);

ушбу дори воситасини ишлаб чиқарувчи мамлакатда ишлаб чиқарувчи учун белгиланган расмий нарх (агар расмий нархлар улгуржи ёки чакана савдо учун белгиланган нархлар бўлса, уларнинг устамалари, шунингдек ҚҚС ва бошқа қўшимча тўловлар чегириб ташланади);

сўнгги ўн икки ой давомида импорт қилинган дори воситаларини Ўзбекистон Республикаси Иқтисодиёт ва молия вазирлиги ҳузуридаги Божхона қўмитаси томонидан Inkoterms халқаро қоидаларининг CIP (ташиш ва суғурта ҳақи тўланган) шарти (бундан буён матнда Inkoterms CIP шарти деб юритилади) асосида берилган миқдор ва нархлар.

Мазкур банднинг иккинчи ва учинчи хатбошиларидаги маълумотларни тақдим этиш имконияти бўлмаса, аризачи томонидан ишлаб чиқарувчи мамлакатда, «Pharmaceutical Inspection Co-operation Scheme» (PIC/S) халқаро ташкилотига аъзо мамлакатларда ҳамда Ўзбекистон Республикасидаги бир хил фаол модда ва бир хил дори шаклидаги қуйидагилар асосида расмий нархлар тақдим этилади:

бир хил фаол модда дозасига эга бўлган бир хил қадоқ ва миқдордаги дори воситаларининг энг арзон нархи. Бунда ушбу маълумот мавжуд бўлмаса, бир хил фаол модда дозасига эга энг яқин катта қадоқ ҳажмидаги дори воситасининг нархига нисбатан пропорционал ҳисобланган нарх;

мазкур банднинг олтинчи хатбошисидаги ҳолатлар мавжуд бўлмаса, бир хил фаол модда дозасига эга энг яқин кичик қадоқ ҳажмидаги дори воситасининг нархи.

Ишлаб чиқарувчи мамлакат референт мамлакатлар рўйхатига киритилган бўлса, мазкур мамлакат референт мамлакат сифатида эмас, балки ишлаб чиқарувчи мамлакат сифатида ҳисобга олинади.

Ариза берувчи томонидан ахборот тизимига нарх ҚҚС суммаси қўшилмаган ҳолда киритилади.

8. Ишчи орган ахборот тизими орқали етти иш куни ичида аризани кўриб чиқади. Ахборот тизимига киритилган маълумотлар тўлиқ бўлмаса ёки тақдим этилган маълумотларга аниқлик киритиш зарурати мавжуд бўлса, ишчи орган камчиликларни бартараф этиш зарурлиги тўғрисидаги хабарномани дарҳол ариза берувчига юборади.

9. Ишчи орган томонидан хабарнома юборилган кундан бошлаб йигирма иш куни ичида ариза берувчи маълумотларидаги ноаниқликлар ва камчиликларни бартараф этган ҳолда икки мартагача референт нархларни қайд этиш ёки қайта қайд этиш учун аризани топшириши мумкин.

10. Ариза берувчи томонидан тақдим этилган маълумотлар тўғри ва тўлиқ тақдим этилгандан сўнг ваколатли орган ишчи органнинг тавсиясига биноан уч иш куни ичида таклиф этилган референт нархларни қайд этади ёки қайта қайд этади ҳамда референт ва чекланган нархлар реестрига киритади.

Ишчи орган талаб қилган маълумотлар ариза берувчи томонидан ахборот тизимига ўз вақтида киритилмаса ёки тўлиқ бўлмаса, камчиликлар бартараф этилмаса, референт нарх ишчи орган тавсиясига биноан ваколатли орган томонидан қайд этилади ҳамда бу ҳақида аризачи хабардор қилинади.

11. Ахборот тизими рецепт билан бериладиган импорт дори воситалари нархлари бўйича маълумотларни қабул қилиб, қуйидагиларни автоматик тарзда ҳисоблаб чиқади:

референт мамлакатлардаги нархларнинг умумлаштирилган ўртача қиймати;

рецепт билан бериладиган дори воситаларини ишлаб чиқарувчи мамлакатда белгиланган референт нархга маҳсулот нархининг 15 фоизидан кўп бўлмаган суғурта ва транспортда ташиш харажатларининг қўшилган қиймати;

сўнгги ўн икки ой давомида импорт қилинган рецепт билан бериладиган дори воситаларининг Ўзбекистон Республикаси Иқтисодиёт ва молия вазирлиги ҳузуридаги Божхона қўмитаси томонидан Inkoterms CIP шарти асосида берилган нархларининг ўртача қиймати.

Ахборот тизими мазкур банднинг иккинчи — тўртинчи хатбошиларида кўрсатилган асослар бўйича ҳисобланган қийматлардан энг кам қийматни, ариза тўлдирилган кунда Ўзбекистон Республикаси Марказий банки томонидан белгиланган валюталарнинг расмий айирбошлаш курси бўйича ариза берувчининг танловига асосан АҚШ доллари, евро ёки Россия рублида референт нархлар сифатида қабул қилишни тавсия этади.

Референт нархлар Ўзбекистон Республикаси Марказий банки томонидан белгиланган валюталарнинг расмий айирбошлаш курси бўйича миллий валютада шакллантирилади.

12. Женерик дори воситаларининг референт нархлари оригинал дори воситалари референт нархларининг 80 фоизидан қиммат бўлиши мумкин эмас. Бунда нархлар пропорционал асосда таққосланади.

Биосимиляр дори воситаларининг референт нархлари оригинал дори воситаларининг референт нархларидан қиммат бўлиши мумкин эмас Бунда, нархлар пропорционал асосда таққосланади.

Оригинал дори воситалари Ўзбекистон Республикасида давлат рўйхатидан ўтмаган ҳолларда, уларнинг референт нархлари мазкур Низомнинг 2-иловасида кўрсатилган референт мамлакатлардаги дори воситаларининг умумлаштирилган ўртача нархи асосида шакллантирилади.

Бир ишлаб чиқарувчи томонидан турли савдо номлари остида таркиби бир хил бўлган дори воситаларининг барчасига нисбатан энг паст референт нарх қўлланади (дори моддалари (субстанция) ишлаб чиқарувчиларида фарқ бўлган ҳоллар бундан мустасно).

13. Ариза берувчи қайд этилган референт нархлардан норози бўлган тақдирда, референт нархлар қайд этилган санадан бошлаб ўн иш куни ичида ваколатли органнинг Апелляция кенгашига шикоят бериш ҳуқуқига эга.

Ваколатли орган раҳбарининг буйруғига асосан камида етти нафар мутахассислардан иборат таркибда Апелляция кенгаши ташкил этилади.

Бунда Апелляция кенгаши таркибига бошқа давлат органлари ва ташкилотларидан ҳам мутахассислар жалб этилиши мумкин.

14. Апелляция кенгаши қайд этилган референт нарх бўйича шикоятни кўриб чиқади.

Апелляция кенгаши томонидан шикоятни кўриб чиқишда ариза берувчи иштирок этиши мумкин. Бунда Апелляция кенгаши ариза берувчини шикоят кўриб чиқилишидан икки иш куни олдин уни кўриб чиқиш вақти ва жойи ҳақида огоҳлантиради.

15. Апелляция кенгаши шикоят келиб тушган кундан бошлаб, ўн иш куни ичида ариза берувчининг шикоятини кўриб чиқиб, қарор қабул қилиши шарт.

16. Шикоятни кўриб чиқиш натижалари бўйича Апелляция кенгаши томонидан қуйидаги қарорлардан бири қабул қилинади:

референт нархини ўзгаришсиз қолдириш;

референт нархга ўзгартириш киритиш.

17. Апелляция кенгаши қарори устидан ариза берувчи томонидан юқори турувчи органга ёки судга шикоят қилиниши мумкин.

18. Тиббиёт амалиётида қўлланишига рухсат этилган дори воситалари, тиббий буюмлар ва тиббий техника давлат реестрига киритилган рецепт билан бериладиган дори воситаларининг референт нархлари ваколатли орган томонидан ариза берувчининг тегишли ариза тақдим этишидан қатъи назар қайд этилади.

19. Импорт қилинадиган, шунингдек маҳаллий ишлаб чиқарувчилардан сотиб олинадиган рецепт билан бериладиган дори воситаларини улгуржи ва чакана сотиш уларни етказиб беришда иштирок этувчи воситачилар сонидан қатъи назар, улгуржи савдо учун сотиб олинган қийматидан 15 фоиздан, чакана савдо учун улгуржи нархидан 20 фоиздан ортиқ бўлмаган қийматларда чекланган савдо устамаларини қўллаш орқали амалга оширилади.

Импорт қилинадиган дори воситаларининг чекланган улгуржи ва чакана нархи қуйидаги формула бўйича аниқланади:

ChUN = (Rn + B + Bx + QQS) * UU;

ChChN = ChUN * CНU;

бунда:

ChUN — чекланган улгуржи нарх;

Rn — референт нарх;

B — Ўзбекистон Республикасининг миллий валютасида ҳисобланган божхона тўловлари (ҚҚСдан ташқари);

Bx — бошқа харажатлар (референт нархнинг 2 фоизи);

QQS — қўшилган қиймат солиғи (12 фоиз);

UU — улгуржи устама (15 фоиз = 1,15);

ChChN — чекланган чакана нарх;

ChU — чакана устама (20 фоиз = 1,20).

Маҳаллий дори воситаларининг чекланган улгуржи ва чакана нархи қуйидаги формула бўйича аниқланади:

ChUN = (Rn + QQS) * UU;

ChChN = ChUN * ChU;

бунда:

ChUN — чекланган улгуржи нарх;

Rn — референт нарх;

QQS — қўшилган қиймат солиғи (12 фоиз);

UU — улгуржи устама (15 фоиз = 1,15);

ChChN — чекланган чакана нарх;

ChU — чакана устама (20 фоиз = 1,20).

Референт ва чекланган нархлар реестрида чет эл валютасидаги нархлар бутун сондан сўнг юздан бир қисмгача, миллий валютадаги нархлар бутун сонгача яхлитланган ҳолда акс эттирилади.

20. Референт ва чекланган нархлар реестри ахборот тизимида қайд этилган чекланган нархларни, шунингдек ариза тўлдирилган кунга нисбатан Ўзбекистон Республикаси Марказий банки томонидан белгиланган валюталарнинг расмий айирбошлаш курси бўйича Ўзбекистон Республикасининг миллий валютасида мазкур Низомнинг 19-бандига мувофиқ ҳисобланган чекланган нархларни акс эттиради.

Референт ва чекланган нархлар реестрида чекланган нархлар ҚҚС суммаси қўшилган ҳолда акс эттирилади.

Ваколатли орган томонидан референт ва чекланган нархлар реестрида кўрсатилган рецепт билан бериладиган импорт дори воситаларининг референт нархлари ҳар йили 1 январь ва 1 июль саналарида Ўзбекистон Республикаси Марказий банки томонидан белгиланган валюталарнинг расмий айирбошлаш курси бўйича Ўзбекистон Республикасининг миллий валютасига автоматик тарзда индексация қилинади.

Бунда автоматик тарзда индексация қилиш фақат хорижий валютадаги референт нархнинг жорий кунда миллий валютадаги қиймати охирги қайд этилган миллий валютадаги референт нархга нисбатан камида 3 фоизга ошган дори воситаларига нисбатан татбиқ этилади.

Агар хорижий валютадаги референт нархнинг миллий валютадаги қиймати охирги қайд этилган миллий валютадаги референт нархга нисбатан 5 фоиздан ошган ҳолларда автоматик индексация белгиланган муддатдан қатъи назар амалга оширилади.

21. Ариза берувчи ваколатли орган томонидан референт нархлар қайд этилган санадан эътиборан камида олти ой ўтгандан сўнг ишчи органга референт нархларни қайта қайд этиш учун ариза топширишга ҳақли.

Бунда, ариза берувчи томонидан аризада нархлар ўсишининг аниқ сабабларини кўрсатган ҳолда тасдиқловчи ҳужжатларни аризага илова қилади.

Референт нархларни олти ойдан кам бўлган муддатда қайта қайд этиш учун фақат дори воситалари ишлаб чиқариладиган мамлакатда енгиб бўлмайдиган куч (форс-мажор) ҳолатларининг юз бериши асос бўлиши мумкин.

22. Ваколатли орган томонидан ҳар олти ойда референт ва чекланган нархлар реестри таҳлил қилинади ҳамда ўрганиш натижасида рецепт билан бериладиган дори воситаларининг нархлари қайд этилган нархларга нисбатан 15 ва ундан юқори фоизга пасайганлиги, шунингдек, нотўғри ёки ишончли бўлмаган маълумотлар тақдим этилганлиги аниқланса, ваколатли орган ахборот тизими ёки электрон почта манзили орқали ариза берувчига кўрсатилган дори воситаларига референт нархларни қайта қайд этиш лозимлиги тўғрисида хабар беради.

Бунда ариза берувчи ўн иш куни ичида ушбу дори воситасига референт нархни қайта қайд этиш тўғрисида ишчи органга ариза билан мурожаат қилиши лозим.

Ариза берувчи томонидан мазкур муддат ичида референт нархни қайта қайд этиш тўғрисида ариза тақдим этилмаса, ваколатли орган томонидан рецепт билан бериладиган дори воситасининг пасайтирилган референт нархи ва чекланган улгуржи нархи референт ва чекланган нархлар реестрида қайта қайд этилади ва эълон қилинади. Бунда чекланган чакана нархлар уч ойдан сўнг ўзгартирилади.

23. Ишчи орган ариза берувчи томонидан референт нархни қайд этиш ёки қайта қайд этиш учун тақдим этилган маълумотларни ошкор қилиши мумкин эмас.

3-боб. Якуний қоида

24. Мазкур Низом талаблари бузилишида айбдор бўлган шахслар қонунчилик ҳужжатларига мувофиқ жавобгар бўладилар.

Референт нарх шакллантириш тизими доирасида рецепт билан бериладиган дори воситалари нархларини қайд этиш тартиби тўғрисидаги низомга 1-ИЛОВА

Маҳаллий ишлаб чиқарувчининг рецепт билан бериладиган дори воситасини сотиш қийматини шакллантириш бўйича ҳисоб-китоб шакли

Т/р Кўрсаткичлар номи Дори воситасининг бир қадоғи учун тўғри келадиган қиймат (сўмда) I Дори воситасининг таннархи, шу жумладан: 1.1. Асосий хомашё 1.2. Ёрдамчи моддалар 1.3. Қадоқлаш материаллари 1.4. Ишлаб чиқариш хусусиятига эга бўлган меҳнатга ҳақ тўлаш харажатлари 1.5. Ишлаб чиқаришга тегишли бўлган ижтимоий суғуртага ажратмалар 1.6. Коммунал тўловлар 1.7. Бошқа асослар II Бошқа харажатлар, шу жумладан: 2.1. Маъмурий харажатлар 2.2. Сотиш харажатлари 2.2.1. шу жумладан, маркетингга, рекламага сарфланган харажатлар 2.3. Бошқа операция харажатлари 2.4. Молиявий фаолият бўйича харажатлар III Жами харажатлар (I + II сатрлар) Соф фойда (%) Дори воситасининг сотиш қиймати, ҚҚСсиз Дори воситасининг сотиш қиймати, ҚҚС билан Раҳбар Бош ҳисобчи __________________________ режа-иқтисод бўлими бошлиғи (ёки режалаштириш функциясини амалга оширувчи бошқа шахс)

Референт нарх шакллантириш тизими доирасида рецепт билан бериладиган дори воситалари нархларини қайд этиш тартиби тўғрисидаги низомга 2-ИЛОВА

Аҳоли жон бошига нисбатан даромадлар даражаси юқори, ўртачадан юқорироқ ва ўртачадан пастроқ бўлган давлатлар гуруҳига кирувчи референт мамлакатлар

1. Венгрия Республикаси 2. Россия Федерацияси 3. Украина Республикаси 4. Польша Республикаси 5. Туркия Республикаси 6. Руминия Республикаси 7. Қозоғистон Республикаси 8. Болгария Республикаси 9. Молдова Республикаси 10. Миср Араб Республикаси

Ўзбекистон Республикаси соғлиқни сақлаш вазирининг 2025 йил 10 декабрдаги 23-сон буйруғига 2-ИЛОВА

Ўз кучини йўқотган деб топилаётган идоравий норматив-ҳуқуқий ҳужжатлар

1. Ўзбекистон Республикаси соғлиқни сақлаш вазирининг 2020 йил 24 мартдаги 115-сон «Референт нарх шакллантириш тизими доирасида рецепт билан бериладиган дори воситалари нархларини қайд этиш тартиби тўғрисидаги низомни тасдиқлаш ҳақида»ги буйруғи (рўйхат рақами 3242, 2020 йил 10 июнь) (Қонун ҳужжатлари маълумотлари миллий базаси, 10.06.2020 й., 10/20/3242/0752-сон).

2. Ўзбекистон Республикаси соғлиқни сақлаш вазирининг 2025 йил 14 апрелдаги 3-сон «Референт нарх шакллантириш тизими доирасида дори воситалари нархларини қайд этиш тартиби тўғрисидаги низомни тасдиқлаш ҳақида»ги буйруққа ўзгартириш ва қўшимчалар киритиш тўғрисида»ги буйруғи (рўйхат рақами 3242-1, 2025 йил 12 май) (Қонунчилик маълумотлари миллий базаси, 12.05.2025 й., 10/25/3242-1/0431-сон).

Вазир А. ХУДАЯРОВ

Иқтисодиёт ва молия вазири Ж. КУЧКАРОВ

Рақобатни ривожлантириш ва истеъмолчилар ҳуқуқларини ҳимоя қилиш қўмита раиси Ҳ. ТУРАХУЖАЕВ

Савдо-саноат палатаси раиси Д. ВАХАБОВ

Президенти ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил ўринбосари Ж. УРУНОВ

Солиқ қўмитаси раиси Ш. КУДБИЕВ

Тошкент ш.,

2025 йил 10 декабрь,

2025 йил 28 ноябрь

2025 йил 26 ноябрь

2025 йил 24 ноябрь

2025 йил 21 ноябрь

2025 йил 22 октябрь

23-сон

(Қонунчилик маълумотлари миллий базаси, 27.12.2025 й., 10/25/3735/1222-сон)

lex.uz

OʻZBEKISTON RESPUBLIKASI SOGʻLIQNI SAQLASH VAZIRINING

BUYRUGʻI

NIZOM

ROʻYXATI

ROʻYXATI

Referent narx shakllantirish tizimi doirasida retsept bilan beriladigan dori vositalari narxlarini qayd etish tartibi toʻgʻrisidagi nizomni tasdiqlash haqida

Oʻzbekiston Respublikasi Prezidentining 2025-yil 28-yanvardagi PF-13-son “Farmatsevtika tarmogʻini jadal rivojlantirishga oid qoʻshimcha chora-tadbirlar toʻgʻrisida”gi Farmoni hamda 2019-yil 30-dekabrdagi PQ-4554-son “ Oʻzbekiston Respublikasi farmatsevtika tarmogʻida islohotlarni chuqurlashtirishga doir qoʻshimcha chora-tadbirlar toʻgʻrisida ”gi, 2022-yil 26-oktabrdagi PQ-411-son “ Aholini sifatli dori vositalari va tibbiy buyumlar bilan taʼminlash yuzasidan qoʻshimcha chora-tadbirlar toʻgʻrisida ”gi qarorlariga muvofiq buyuraman:

1. Referent narx shakllantirish tizimi doirasida retsept bilan beriladigan dori vositalari narxlarini qayd etish tartibi toʻgʻrisidagi nizom 1-ilovaga muvofiq tasdiqlansin.

2. Ayrim idoraviy normativ-huquqiy hujjatlar 2-ilovaga muvofiq oʻz kuchini yoʻqotgan deb topilsin.

3. Mazkur buyruq Oʻzbekiston Respublikasi Iqtisodiyot va moliya vazirligi, Soliq qoʻmitasi, Raqobatni rivojlantirish va isteʼmolchilar huquqlarini himoya qilish qoʻmitasi, Oʻzbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish boʻyicha vakil va Oʻzbekiston Respublikasi Savdo-sanoat palatasi bilan kelishilgan.

4. Ushbu buyruq rasmiy eʼlon qilingan kundan eʼtiboran uch oy oʻtgach kuchga kiradi.

Kelishildi:

Oʻzbekiston Respublikasi sogʻliqni saqlash vazirining 2025-yil 10-dekabrdagi 23-son buyrugʻiga 1-ILOVA

Referent narx shakllantirish tizimi doirasida retsept bilan beriladigan dori vositalari narxlarini qayd etish tartibi toʻgʻrisidagi

Mazkur Nizom referent narx shakllantirish tizimi doirasida retsept bilan beriladigan mahalliy va import dori vositalari narxlarini qayd etish tartibini belgilaydi.

Ushbu Nizom Oʻzbekiston Respublikasi hududida tibbiyot amaliyotida qoʻllash uchun ruxsat etilgan hamda davlat roʻyxatidan oʻtkazilganlik guvohnomasining amal qilish davrida ishlab chiqarilgan retsept bilan beriladigan dori vositalariga nisbatan tatbiq etiladi.

Referent narx shakllantirish tizimi doirasida narxlarni qayd etish dori moddalari (substansiyalar), kam uchraydigan kasalliklarni davolash uchun moʻljallangan orfan dori vositalari hamda kam uchraydigan (orfan) kasalliklarga tashxis qoʻyish va ularni davolash uchun moʻljallangan tibbiy buyumlar roʻyxatida (roʻyxat raqami 3258, 2020-yil 30-iyun) keltirilgan orfan dori vositalariga va retseptsiz beriladigan dori vositalariga tatbiq etilmaydi.

1-bob. Umumiy qoidalar

1. Ushbu Nizomda quyidagi asosiy tushunchalardan foydalaniladi:

referent narx shakllantirish tizimi — dori shakli, qadoqdagi soni, dozasi, konsentratsiyasi, hajmi va qadoqlanishini hisobga olgan holda xuddi shunday faol moddaga ega dori vositalarini ishlab chiqaruvchi mamlakatda va referent mamlakatlarda, Pharmaceutical Inspection Co-operation Scheme” (PIC/S) xalqaro tashkilotiga aʼzo mamlakatlarda va Oʻzbekiston Respublikasida sotish narxlarini tahlil qilish natijasi asosida har bir savdo nomi uchun referent narxlarni qayd etish tizimi;

referent mamlakatlar — Jahon bankining aholi jon boshiga nisbatan yalpi ichki mahsulotning hisoblangan daromadlar darajasidan yuqori, oʻrtachadan yuqoriroq va oʻrtachadan pastroq boʻlgan davlatlar guruhiga kiruvchi Oʻzbekiston Respublikasi bilan makroiqtisodiy jihatdan taqqoslanadigan mamlakatlar;

referent narx — referent narx shakllantirish tizimi doirasida qayd etilgan narx;

cheklangan narxlar — referent narx shakllantirish tizimi doirasida referent narxlarga cheklangan savdo ustamalarini qoʻllash yoʻli bilan hisoblangan ulgurji va chakana narxlar;

referent va cheklangan narxlar reyestri — dori shakli, qadoqdagi soni, dozasi, konsentratsiyasi, hajmi va qadoqlanishini hisobga olgan holda retsept bilan beriladigan dori vositalarining har bir savdo nomi uchun Oʻzbekiston Respublikasida qayd etilgan referent va cheklangan narxlarning elektron (onlayn) reyestri;

avtomatlashtirilgan axborot tizimi (bundan buyon matnda axborot tizimi deb yuritiladi) — arizalarni qabul qilish, referent narx shakllantirish tizimi doirasidagi maʼlumotlarni qayta ishlash va saqlash, referent narxlarni qayd etish hamda referent va cheklangan narxlar reyestrini yuritish uchun moʻljallangan maxsus elektron tizim;

vakolatli organ — referent narxlarni qayd etish va qayta qayd etish uchun masʼul boʻlgan Oʻzbekiston Respublikasi Sogʻliqni saqlash vazirligi huzuridagi Farmatsevtika tarmogʻini rivojlantirish agentligi;

ishchi organ — referent narxlarni qayd etish uchun arizalarni qabul qilish va koʻrib chiqish hamda axborot tizimining uzluksiz va barqaror ishlashini taʼminlash uchun masʼul boʻlgan vakolatli organning referent narxlar bilan ishlovchi masʼul boʻlinmasi;

retsept bilan beriladigan dori vositalari — isteʼmolchilarga qonunchilikda belgilangan talablarga muvofiq shakldagi retsept (elektron retsept) taqdim etilgandan keyingina realizatsiya qilinadigan dori vositalari;

ariza — retsept bilan beriladigan dori vositalarining referent yoki ilgari qayd etilgan referent narxlarini qayta qayd etish haqidagi murojaat;

ariza beruvchi — dori vositalarining davlat roʻyxatidan oʻtkazilganlik guvohnomasi egasi boʻlgan yuridik shaxs yoki uning ishonchli vakili;

mahalliy ishlab chiqaruvchi — Oʻzbekiston Respublikasida dori vositalarini ishlab chiqarish uchun litsenziyaga ega boʻlgan yuridik shaxs;

mahalliy dori vositalari — Oʻzbekiston Respublikasi hududida mahalliy ishlab chiqaruvchilar tomonidan ishlab chiqarilgan dori vositalari;

import dori vositalari — xorijiy farmatsevtika korxonalari tomonidan ishlab chiqarilib, Oʻzbekiston Respublikasi bojxona hududiga olib kirilgan va ushbu hududdan qaytarib olib chiqish majburiyatisiz erkin muomalaga chiqarilgan dori vositalari;

original dori vositasi — sifati, samaradorligi va xavfsizligi klinik oldi va klinik tadqiqotlar natijalari asosida tasdiqlangan, dunyo farmatsevtika bozorida birinchi boʻlib roʻyxatga olingan yangi taʼsir etuvchi moddaga yoki moddalarga ega boʻlgan dori vositasi;

jenerik dori vositasi — original (patentlangan) dori vositasining faol moddasi bilan sifat va miqdoriy jihatdan bir xil tarkibga, dori shakliga ega boʻlgan, lekin patent muddati tugagandan soʻng ishlab chiqarilgan dori vositasi boʻlib, xavfsizligi, taʼsir kuchi, xossalari, qoʻllanilish sohasi hamda bioekvivalentligi original dori vositasiga nisbatan tasdiqlangan dori vositasi. Faol moddaning turli tuzlari, efirlari, izomerlari, izomerlar aralashmalari, komplekslari yoki hosilalari xavfsizligi va samaradorligi jihatidan sezilarli farq qilmasa, bir xil faol modda sifatida eʼtirof etiladi. Ogʻiz orqali qabul qilish uchun moʻljallangan va taʼsir etuvchi moddasi tez ajraladigan turli dori shakllari biokiraolishlikni oʻrganish doirasida bir xil dori shakli sifatida tan olinadi;

biosimilyar dori vositasi — tabiiy manbalardan olinadigan, tarkibida roʻyxatdan oʻtkazilgan original (referens) dori vositasining taʼsir etuvchisini saqlovchi hamda sifati, biologik faolligi, samaradorligi va xavfsizligi koʻrsatkichlari boʻyicha original (referens) dori vositasiga solishtirish tadqiqotlari asosida oʻxshashligi isbotlangan biologik dori vositasi;

roʻyxatdan oʻtkazilganlik guvohnomasi (bundan buyon matnda guvohnoma deb yuritiladi) — dori vositasining davlat roʻyxatidan oʻtkazilganligini va uning Oʻzbekiston Respublikasi Sogʻliqni saqlash vazirligi tomonidan tibbiyot amaliyotida qoʻllanilishiga ruxsat berilganini tasdiqlovchi hujjat.

2. Vakolatli organ doimiy tarzda Internet jahon axborot tarmogʻidagi oʻz rasmiy veb-saytida hamda Yagona interaktiv davlat xizmatlari portalida xronologik tartibda qayd etilgan va qayta qayd etilgan referent narxlar haqidagi maʼlumotlarni joylashtirib boradi. Bunda avvalgi maʼlumotlar saqlangan holda oʻzgartirishlar kiritiladi hamda referent narxlar haqidagi maʼlumotlardan erkin foydalanish imkoniyati yaratiladi.

3. Qayd etilgan referent narxlar haqidagi maʼlumotlar axborot tizimida roʻyxatdan oʻtganlik guvohnomasining amal qilish muddati davrida va muddati tugagan kundan keyin besh yil davomida saqlanadi.

2-bob. Referent va cheklangan narxlarni qayd etish va qayta qayd etish

4. Ariza beruvchi referent narxlarni qayd etish va qayta qayd etish uchun elektron raqamli imzo bilan axborot tizimiga kirib, referent narxlarni qayd etish yoki qayta qayd etish huquqini tasdiqlovchi hujjatlarini (guvohnoma, ishonchnoma) hamda referent narxlar qayd etiladigan Oʻzbekiston Respublikasida davlat roʻyxatidan oʻtkazilgan dori vositalari haqida maʼlumotni kiritadi va ishchi organga yuboradi.

5. Ishchi organ ariza qabul qilingan sanadan boshlab ikki ish kuni ichida ariza beruvchining guvohnoma egasi yoki uning ishonchli vakili ekanligini tekshiradi.

Ishchi organ ariza beruvchini haqiqatdan ham guvohnomaning egasi yoki uning ishonchli vakili ekanligini tasdiqlagandan soʻng uni axborot tizimida roʻyxatdan oʻtkazadi va bu haqidagi maʼlumotni ariza beruvchiga darhol axborot tizimi yoki elektron pochta manzili orqali yuboradi.

Ariza beruvchi axborot tizimida roʻyxatdan oʻtkazilganidan soʻng arizada koʻrsatilgan dori vositalariga referent narxlarni qayd etish uchun maʼlumotlarni kiritish huquqiga ega boʻladi.

Agarda ariza beruvchining guvohnoma egasi yoki uning ishonchli vakili ekanligini tasdiqlovchi hujjatlari notoʻgʻri yoki buzib koʻrsatilgan boʻlsa, ishchi organ roʻyxatdan oʻtkazish rad etilganligi toʻgʻrisidagi elektron xabarni darhol axborot tizimi orqali ariza beruvchiga joʻnatadi.

6. Ariza beruvchi (mahalliy dori vositalari uchun) axborot tizimi orqali ishchi organga dori shakli, qadoqdagi soni, dozasi, konsentratsiyasi, hajmi va qadoqlanishini hisobga olgan holda retsept bilan beriladigan dori vositalarining har bir savdo nomi uchun Oʻzbekiston Respublikasi milliy valyutasida referent narxlarni (QQSni qoʻshmagan holda) axborot tizimiga kiritadi.

Arizaga retsept bilan beriladigan dori vositasining sotish qiymatini shakllantirish boʻyicha ushbu Nizomning 1-ilovasiga muvofiq hisob-kitob va boshqa narxni shakllantirishga oid maʼlumotlar ilova qilinadi.

Bunda kiritilgan referent narxlarning toʻgʻri shakllanganligi yuzasidan javobgarlik ariza beruvchi zimmasiga yuklatiladi.

7. Ariza beruvchi (import dori vositalari uchun) axborot tizimi orqali ishchi organiga dori shakli, qadoqdagi soni, dozasi, konsentratsiyasi, hajmi va qadoqlanishini hisobga olgan holda retsept bilan beriladigan dori vositalarining har bir savdo nomi uchun quyidagi maʼlumotlarni taqdim etadi:

mazkur Nizomning 2-ilovasida koʻrsatilgan referent mamlakatlarda ushbu dori vositasini ishlab chiqaruvchi uchun belgilangan rasmiy narxlar (agar rasmiy narxlar ulgurji yoki chakana savdo uchun belgilangan narxlar boʻlsa, ularning ustamalari, shuningdek bojxona toʻlovlari, QQS va boshqa qoʻshimcha toʻlovlar chegirib tashlanadi);

ushbu dori vositasini ishlab chiqaruvchi mamlakatda ishlab chiqaruvchi uchun belgilangan rasmiy narx (agar rasmiy narxlar ulgurji yoki chakana savdo uchun belgilangan narxlar boʻlsa, ularning ustamalari, shuningdek QQS va boshqa qoʻshimcha toʻlovlar chegirib tashlanadi);

soʻnggi oʻn ikki oy davomida import qilingan dori vositalarini Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasi tomonidan Inkoterms xalqaro qoidalarining CIP (tashish va sugʻurta haqi toʻlangan) sharti (bundan buyon matnda Inkoterms CIP sharti deb yuritiladi) asosida berilgan miqdor va narxlar.

Mazkur bandning ikkinchi va uchinchi xatboshilaridagi maʼlumotlarni taqdim etish imkoniyati boʻlmasa, arizachi tomonidan ishlab chiqaruvchi mamlakatda, “Pharmaceutical Inspection Co-operation Scheme” (PIC/S) xalqaro tashkilotiga aʼzo mamlakatlarda hamda Oʻzbekiston Respublikasidagi bir xil faol modda va bir xil dori shaklidagi quyidagilar asosida rasmiy narxlar taqdim etiladi:

bir xil faol modda dozasiga ega boʻlgan bir xil qadoq va miqdordagi dori vositalarining eng arzon narxi. Bunda ushbu maʼlumot mavjud boʻlmasa, bir xil faol modda dozasiga ega eng yaqin katta qadoq hajmidagi dori vositasining narxiga nisbatan proporsional hisoblangan narx;

mazkur bandning oltinchi xatboshisidagi holatlar mavjud boʻlmasa, bir xil faol modda dozasiga ega eng yaqin kichik qadoq hajmidagi dori vositasining narxi.

Ishlab chiqaruvchi mamlakat referent mamlakatlar roʻyxatiga kiritilgan boʻlsa, mazkur mamlakat referent mamlakat sifatida emas, balki ishlab chiqaruvchi mamlakat sifatida hisobga olinadi.

Ariza beruvchi tomonidan axborot tizimiga narx QQS summasi qoʻshilmagan holda kiritiladi.

8. Ishchi organ axborot tizimi orqali yetti ish kuni ichida arizani koʻrib chiqadi. Axborot tizimiga kiritilgan maʼlumotlar toʻliq boʻlmasa yoki taqdim etilgan maʼlumotlarga aniqlik kiritish zarurati mavjud boʻlsa, ishchi organ kamchiliklarni bartaraf etish zarurligi toʻgʻrisidagi xabarnomani darhol ariza beruvchiga yuboradi.

9. Ishchi organ tomonidan xabarnoma yuborilgan kundan boshlab yigirma ish kuni ichida ariza beruvchi maʼlumotlaridagi noaniqliklar va kamchiliklarni bartaraf etgan holda ikki martagacha referent narxlarni qayd etish yoki qayta qayd etish uchun arizani topshirishi mumkin.

10. Ariza beruvchi tomonidan taqdim etilgan maʼlumotlar toʻgʻri va toʻliq taqdim etilgandan soʻng vakolatli organ ishchi organning tavsiyasiga binoan uch ish kuni ichida taklif etilgan referent narxlarni qayd etadi yoki qayta qayd etadi hamda referent va cheklangan narxlar reyestriga kiritadi.

Ishchi organ talab qilgan maʼlumotlar ariza beruvchi tomonidan axborot tizimiga oʻz vaqtida kiritilmasa yoki toʻliq boʻlmasa, kamchiliklar bartaraf etilmasa, referent narx ishchi organ tavsiyasiga binoan vakolatli organ tomonidan qayd etiladi hamda bu haqida arizachi xabardor qilinadi.

11. Axborot tizimi retsept bilan beriladigan import dori vositalari narxlari boʻyicha maʼlumotlarni qabul qilib, quyidagilarni avtomatik tarzda hisoblab chiqadi:

referent mamlakatlardagi narxlarning umumlashtirilgan oʻrtacha qiymati;

retsept bilan beriladigan dori vositalarini ishlab chiqaruvchi mamlakatda belgilangan referent narxga mahsulot narxining 15 foizidan koʻp boʻlmagan sugʻurta va transportda tashish xarajatlarining qoʻshilgan qiymati;

soʻnggi oʻn ikki oy davomida import qilingan retsept bilan beriladigan dori vositalarining Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasi tomonidan Inkoterms CIP sharti asosida berilgan narxlarining oʻrtacha qiymati.

Axborot tizimi mazkur bandning ikkinchi — toʻrtinchi xatboshilarida koʻrsatilgan asoslar boʻyicha hisoblangan qiymatlardan eng kam qiymatni, ariza toʻldirilgan kunda Oʻzbekiston Respublikasi Markaziy banki tomonidan belgilangan valyutalarning rasmiy ayirboshlash kursi boʻyicha ariza beruvchining tanloviga asosan AQSH dollari, yevro yoki Rossiya rublida referent narxlar sifatida qabul qilishni tavsiya etadi.

Referent narxlar Oʻzbekiston Respublikasi Markaziy banki tomonidan belgilangan valyutalarning rasmiy ayirboshlash kursi boʻyicha milliy valyutada shakllantiriladi.

12. Jenerik dori vositalarining referent narxlari original dori vositalari referent narxlarining 80 foizidan qimmat boʻlishi mumkin emas. Bunda narxlar proporsional asosda taqqoslanadi.

Biosimilyar dori vositalarining referent narxlari original dori vositalarining referent narxlaridan qimmat boʻlishi mumkin emas Bunda, narxlar proporsional asosda taqqoslanadi.

Original dori vositalari Oʻzbekiston Respublikasida davlat roʻyxatidan oʻtmagan hollarda, ularning referent narxlari mazkur Nizomning 2-ilovasida koʻrsatilgan referent mamlakatlardagi dori vositalarining umumlashtirilgan oʻrtacha narxi asosida shakllantiriladi.

Bir ishlab chiqaruvchi tomonidan turli savdo nomlari ostida tarkibi bir xil boʻlgan dori vositalarining barchasiga nisbatan eng past referent narx qoʻllanadi (dori moddalari (substansiya) ishlab chiqaruvchilarida farq boʻlgan hollar bundan mustasno).

13. Ariza beruvchi qayd etilgan referent narxlardan norozi boʻlgan taqdirda, referent narxlar qayd etilgan sanadan boshlab oʻn ish kuni ichida vakolatli organning Apellyatsiya kengashiga shikoyat berish huquqiga ega.

Vakolatli organ rahbarining buyrugʻiga asosan kamida yetti nafar mutaxassislardan iborat tarkibda Apellyatsiya kengashi tashkil etiladi.

Bunda Apellyatsiya kengashi tarkibiga boshqa davlat organlari va tashkilotlaridan ham mutaxassislar jalb etilishi mumkin.

14. Apellyatsiya kengashi qayd etilgan referent narx boʻyicha shikoyatni koʻrib chiqadi.

Apellyatsiya kengashi tomonidan shikoyatni koʻrib chiqishda ariza beruvchi ishtirok etishi mumkin. Bunda Apellyatsiya kengashi ariza beruvchini shikoyat koʻrib chiqilishidan ikki ish kuni oldin uni koʻrib chiqish vaqti va joyi haqida ogohlantiradi.

15. Apellyatsiya kengashi shikoyat kelib tushgan kundan boshlab, oʻn ish kuni ichida ariza beruvchining shikoyatini koʻrib chiqib, qaror qabul qilishi shart.

16. Shikoyatni koʻrib chiqish natijalari boʻyicha Apellyatsiya kengashi tomonidan quyidagi qarorlardan biri qabul qilinadi:

referent narxini oʻzgarishsiz qoldirish;

referent narxga oʻzgartirish kiritish.

17. Apellyatsiya kengashi qarori ustidan ariza beruvchi tomonidan yuqori turuvchi organga yoki sudga shikoyat qilinishi mumkin.

18. Tibbiyot amaliyotida qoʻllanishiga ruxsat etilgan dori vositalari, tibbiy buyumlar va tibbiy texnika davlat reyestriga kiritilgan retsept bilan beriladigan dori vositalarining referent narxlari vakolatli organ tomonidan ariza beruvchining tegishli ariza taqdim etishidan qatʼi nazar qayd etiladi.

19. Import qilinadigan, shuningdek mahalliy ishlab chiqaruvchilardan sotib olinadigan retsept bilan beriladigan dori vositalarini ulgurji va chakana sotish ularni yetkazib berishda ishtirok etuvchi vositachilar sonidan qatʼi nazar, ulgurji savdo uchun sotib olingan qiymatidan 15 foizdan, chakana savdo uchun ulgurji narxidan 20 foizdan ortiq boʻlmagan qiymatlarda cheklangan savdo ustamalarini qoʻllash orqali amalga oshiriladi.

Import qilinadigan dori vositalarining cheklangan ulgurji va chakana narxi quyidagi formula boʻyicha aniqlanadi:

ChUN = (Rn + B + Bx + QQS) * UU;

ChChN = ChUN * CNU;

bunda:

ChUN — cheklangan ulgurji narx;

Rn — referent narx;

B — Oʻzbekiston Respublikasining milliy valyutasida hisoblangan bojxona toʻlovlari (QQSdan tashqari);

Bx — boshqa xarajatlar (referent narxning 2 foizi);

QQS — qoʻshilgan qiymat soligʻi (12 foiz);

UU — ulgurji ustama (15 foiz = 1,15);

ChChN — cheklangan chakana narx;

ChU — chakana ustama (20 foiz = 1,20).

Mahalliy dori vositalarining cheklangan ulgurji va chakana narxi quyidagi formula boʻyicha aniqlanadi:

ChUN = (Rn + QQS) * UU;

ChChN = ChUN * ChU;

bunda:

ChUN — cheklangan ulgurji narx;

Rn — referent narx;

QQS — qoʻshilgan qiymat soligʻi (12 foiz);

UU — ulgurji ustama (15 foiz = 1,15);

ChChN — cheklangan chakana narx;

ChU — chakana ustama (20 foiz = 1,20).

Referent va cheklangan narxlar reyestrida chet el valyutasidagi narxlar butun sondan soʻng yuzdan bir qismgacha, milliy valyutadagi narxlar butun songacha yaxlitlangan holda aks ettiriladi.

20. Referent va cheklangan narxlar reyestri axborot tizimida qayd etilgan cheklangan narxlarni, shuningdek ariza toʻldirilgan kunga nisbatan Oʻzbekiston Respublikasi Markaziy banki tomonidan belgilangan valyutalarning rasmiy ayirboshlash kursi boʻyicha Oʻzbekiston Respublikasining milliy valyutasida mazkur Nizomning 19-bandiga muvofiq hisoblangan cheklangan narxlarni aks ettiradi.

Referent va cheklangan narxlar reyestrida cheklangan narxlar QQS summasi qoʻshilgan holda aks ettiriladi.

Vakolatli organ tomonidan referent va cheklangan narxlar reyestrida koʻrsatilgan retsept bilan beriladigan import dori vositalarining referent narxlari har yili 1-yanvar va 1-iyul sanalarida Oʻzbekiston Respublikasi Markaziy banki tomonidan belgilangan valyutalarning rasmiy ayirboshlash kursi boʻyicha Oʻzbekiston Respublikasining milliy valyutasiga avtomatik tarzda indeksatsiya qilinadi.

Bunda avtomatik tarzda indeksatsiya qilish faqat xorijiy valyutadagi referent narxning joriy kunda milliy valyutadagi qiymati oxirgi qayd etilgan milliy valyutadagi referent narxga nisbatan kamida 3 foizga oshgan dori vositalariga nisbatan tatbiq etiladi.

Agar xorijiy valyutadagi referent narxning milliy valyutadagi qiymati oxirgi qayd etilgan milliy valyutadagi referent narxga nisbatan 5 foizdan oshgan hollarda avtomatik indeksatsiya belgilangan muddatdan qatʼi nazar amalga oshiriladi.

21. Ariza beruvchi vakolatli organ tomonidan referent narxlar qayd etilgan sanadan eʼtiboran kamida olti oy oʻtgandan soʻng ishchi organga referent narxlarni qayta qayd etish uchun ariza topshirishga haqli.

Bunda, ariza beruvchi tomonidan arizada narxlar oʻsishining aniq sabablarini koʻrsatgan holda tasdiqlovchi hujjatlarni arizaga ilova qiladi.

Referent narxlarni olti oydan kam boʻlgan muddatda qayta qayd etish uchun faqat dori vositalari ishlab chiqariladigan mamlakatda yengib boʻlmaydigan kuch (fors-major) holatlarining yuz berishi asos boʻlishi mumkin.

22. Vakolatli organ tomonidan har olti oyda referent va cheklangan narxlar reyestri tahlil qilinadi hamda oʻrganish natijasida retsept bilan beriladigan dori vositalarining narxlari qayd etilgan narxlarga nisbatan 15 va undan yuqori foizga pasayganligi, shuningdek, notoʻgʻri yoki ishonchli boʻlmagan maʼlumotlar taqdim etilganligi aniqlansa, vakolatli organ axborot tizimi yoki elektron pochta manzili orqali ariza beruvchiga koʻrsatilgan dori vositalariga referent narxlarni qayta qayd etish lozimligi toʻgʻrisida xabar beradi.

Bunda ariza beruvchi oʻn ish kuni ichida ushbu dori vositasiga referent narxni qayta qayd etish toʻgʻrisida ishchi organga ariza bilan murojaat qilishi lozim.

Ariza beruvchi tomonidan mazkur muddat ichida referent narxni qayta qayd etish toʻgʻrisida ariza taqdim etilmasa, vakolatli organ tomonidan retsept bilan beriladigan dori vositasining pasaytirilgan referent narxi va cheklangan ulgurji narxi referent va cheklangan narxlar reyestrida qayta qayd etiladi va eʼlon qilinadi. Bunda cheklangan chakana narxlar uch oydan soʻng oʻzgartiriladi.

23. Ishchi organ ariza beruvchi tomonidan referent narxni qayd etish yoki qayta qayd etish uchun taqdim etilgan maʼlumotlarni oshkor qilishi mumkin emas.

3-bob. Yakuniy qoida

24. Mazkur Nizom talablari buzilishida aybdor boʻlgan shaxslar qonunchilik hujjatlariga muvofiq javobgar boʻladilar.

Referent narx shakllantirish tizimi doirasida retsept bilan beriladigan dori vositalari narxlarini qayd etish tartibi toʻgʻrisidagi nizomga 1-ILOVA

Mahalliy ishlab chiqaruvchining retsept bilan beriladigan dori vositasini sotish qiymatini shakllantirish boʻyicha hisob-kitob shakli

T/r Koʻrsatkichlar nomi Dori vositasining bir qadogʻi uchun toʻgʻri keladigan qiymat (soʻmda) I Dori vositasining tannarxi, shu jumladan: 1.1. Asosiy xomashyo 1.2. Yordamchi moddalar 1.3. Qadoqlash materiallari 1.4. Ishlab chiqarish xususiyatiga ega boʻlgan mehnatga haq toʻlash xarajatlari 1.5. Ishlab chiqarishga tegishli boʻlgan ijtimoiy sugʻurtaga ajratmalar 1.6. Kommunal toʻlovlar 1.7. Boshqa asoslar II Boshqa xarajatlar, shu jumladan: 2.1. Maʼmuriy xarajatlar 2.2. Sotish xarajatlari 2.2.1. shu jumladan, marketingga, reklamaga sarflangan xarajatlar 2.3. Boshqa operatsiya xarajatlari 2.4. Moliyaviy faoliyat boʻyicha xarajatlar III Jami xarajatlar (I + II satrlar) Sof foyda (%) Dori vositasining sotish qiymati, QQSsiz Dori vositasining sotish qiymati, QQS bilan Rahbar Bosh hisobchi __________________________ reja-iqtisod boʻlimi boshligʻi (yoki rejalashtirish funksiyasini amalga oshiruvchi boshqa shaxs)

Referent narx shakllantirish tizimi doirasida retsept bilan beriladigan dori vositalari narxlarini qayd etish tartibi toʻgʻrisidagi nizomga 2-ILOVA

Aholi jon boshiga nisbatan daromadlar darajasi yuqori, oʻrtachadan yuqoriroq va oʻrtachadan pastroq boʻlgan davlatlar guruhiga kiruvchi referent mamlakatlar

1. Vengriya Respublikasi 2. Rossiya Federatsiyasi 3. Ukraina Respublikasi 4. Polsha Respublikasi 5. Turkiya Respublikasi 6. Ruminiya Respublikasi 7. Qozogʻiston Respublikasi 8. Bolgariya Respublikasi 9. Moldova Respublikasi 10. Misr Arab Respublikasi

Oʻzbekiston Respublikasi sogʻliqni saqlash vazirining 2025-yil 10-dekabrdagi 23-son buyrugʻiga 2-ILOVA

Oʻz kuchini yoʻqotgan deb topilayotgan idoraviy normativ-huquqiy hujjatlar

1. Oʻzbekiston Respublikasi sogʻliqni saqlash vazirining 2020-yil 24-martdagi 115-son “Referent narx shakllantirish tizimi doirasida retsept bilan beriladigan dori vositalari narxlarini qayd etish tartibi toʻgʻrisidagi nizomni tasdiqlash haqida”gi buyrugʻi (roʻyxat raqami 3242, 2020-yil 10-iyun) (Qonun hujjatlari maʼlumotlari milliy bazasi, 10.06.2020-y., 10/20/3242/0752-son).

2. Oʻzbekiston Respublikasi sogʻliqni saqlash vazirining 2025-yil 14-apreldagi 3-son “Referent narx shakllantirish tizimi doirasida dori vositalari narxlarini qayd etish tartibi toʻgʻrisidagi nizomni tasdiqlash haqida”gi buyruqqa oʻzgartirish va qoʻshimchalar kiritish toʻgʻrisida”gi buyrugʻi (roʻyxat raqami 3242-1, 2025-yil 12-may) (Qonunchilik maʼlumotlari milliy bazasi, 12.05.2025-y., 10/25/3242-1/0431-son).

Vazir A. XUDAYAROV

Iqtisodiyot va moliya vaziri J. KUCHKAROV

Raqobatni rivojlantirish va isteʼmolchilar huquqlarini himoya qilish qoʻmita raisi H. TURAXUJAYEV

Savdo-sanoat palatasi raisi D. VAXABOV

Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish boʻyicha vakil oʻrinbosari J. URUNOV

Soliq qoʻmitasi raisi Sh. KUDBIYEV

Toshkent sh.,

2025-yil 10-dekabr,

2025-yil 28-noyabr

2025-yil 26-noyabr

2025-yil 24-noyabr

2025-yil 21-noyabr

2025-yil 22-oktabr

23-son

(Qonunchilik maʼlumotlari milliy bazasi, 27.12.2025-y., 10/25/3735/1222-son)

lex.uz