📅 2025-yil 26-dekabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2025 йил 26 декабрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 26 декабря 2025 г. · Постановления Кабинета Министров
Официальный текст. Официальный документ. Редакционные примечания не включены.
📅 26 December 2025 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
МАЪМУРИЙ РЕГЛАМЕНТИ
СХЕМАСИ
ДЕКЛАРАЦИЯ
ИЛОВА
Маҳсулотларнинг мувофиқлик тўғрисидаги декларациясини ҳисобга олиш бўйича давлат хизматини кўрсатишнинг маъмурий регламентини тасдиқлаш ҳақида
Ўзбекистон Республикаси Президентининг «Ишлаб чиқариш, экспорт ва тадбиркорлик фаолиятини рағбатлантириш, савдо ва саноат сиёсати самарадорлигини ошириш чора-тадбирлари тўғрисида» 2025 йил 18 апрелдаги ПФ-67-сон Фармони ижросини таъминлаш, мувофиқликни баҳолаш тизимини соддалаштириш ҳамда тадбиркорлик субъектларига қўшимча қулайлик яратиш мақсадида Вазирлар Маҳкамаси қарор қилади:
1. Қуйидагиларни назарда тутувчи Маҳсулотларнинг мувофиқлик тўғрисидаги декларациясини ҳисобга олиш бўйича давлат хизматини кўрсатишнинг маъмурий регламенти иловага мувофиқ тасдиқлансин:
маҳсулотларнинг мувофиқлик тўғрисидаги декларациясини «Техник тартибга солиш» миллий ахборот тизимида (кейинги ўринларда — ахборот тизими) ҳисобга олиш;
маҳсулотларнинг мувофиқлик тўғрисидаги декларациясини ҳисобга олишда тақдим этиладиган ҳужжатлар ва маълумотларни шакллантириш тартиби.
2. Адлия вазирлиги давлат хизмати ахборот тизимида ҳамда Ягона интерактив давлат хизматлари портали орқали кўрсатилиши устидан доимий назорат ўрнатсин.
3. Белгилансинки, ахборот тизими орқали ҳисобга олинган мувофиқлик тўғрисидаги декларациялари бозор назорати талабларига мувофиқ доимий мониторинг қилиб борилади. Бунда бозор назорати органлари тайинлангунга қадар бозор назорати вазифалари Вазирлар Маҳкамаси ҳузуридаги Ўзбекистон техник жиҳатдан тартибга солиш агентлигининг Техник жиҳатдан тартибга солиш соҳасида назорат инспекцияси томонидан амалга оширилади.
4. Иқтисодиёт ва молия вазирлиги ҳузуридаги Божхона қўмитаси бир ой муддатда ушбу қарор билан тасдиқланган Маъмурий регламентга мувофиқ, идоралараро назоратни амалга ошириш мақсадида Солиқ қўмитаси ва Вазирлар Маҳкамаси ҳузуридаги Ўзбекистон техник жиҳатдан тартибга солиш агентлигига тегишли маълумотларни доимий тақдим этиб бориш ҳамда ҳисобга олинган мувофиқлик тўғрисидаги декларацияларни «Ягона дарча» божхона ахборот тизимида кўриб бориш учун тегишли тизимларни интеграция қилиш чораларини кўрсин.
5. Вазирлар Маҳкамасининг «Маҳсулотларни давлат рўйхатидан ўтказиш ва мувофиқликни баҳолаш тартибларига оид низомларни тасдиқлаш тўғрисида» 2024 йил 14 августдаги 502-сон қарори 1-бандининг «в» кичик банди ҳамда қарорга 3-илова ўз кучини йўқотган деб ҳисоблансин.
6. Ушбу қарорнинг бажарилишини назорат қилиш Вазирлар Маҳкамаси ҳузуридаги Ўзбекистон техник жиҳатдан тартибга солиш агентлиги директори А.Р. Жуманазаров зиммасига юклансин.
Вазирлар Маҳкамасининг 2025 йил 26 декабрдаги 831-сон қарорига ИЛОВА
Маҳсулотларнинг мувофиқлик тўғрисидаги декларациясини ҳисобга олиш бўйича давлат хизматини кўрсатишнинг
1-боб. Умумий қоидалар
1. Ушбу Регламент маҳсулотларнинг мувофиқлик тўғрисидаги декларациясини ҳисобга олиш бўйича давлат хизматини кўрсатиш тартибини белгилайди.
2. Маҳсулотларнинг мувофиқлик тўғрисидаги декларацияси (кейинги ўринларда — мувофиқлик декларацияси) мувофиқлик декларациясини берувчи шахс ташаббуси билан Вазирлар Маҳкамаси ҳузуридаги Ўзбекистон техник жиҳатдан тартибга солиш агентлигининг (кейинги ўринларда — Агентлик) «Техник тартибга солиш» миллий ахборот тизими (кейинги ўринларда — ахборот тизими) орқали ҳисобга олинади.
3. Ушбу Регламентда қуйидаги асосий тушунчалардан фойдаланилади:
бозор назорати — маҳсулотлар бозорга муомалага киритилганидан сўнг уларнинг хавфсизлигини, инсон ҳаёти, соғлиғига, жисмоний ва юридик шахслар ҳамда давлат манфаатларига, атроф-муҳитга зарар етказмаслигини таъминлашга қаратилган, бозор назорати органлари томонидан амалга ошириладиган тадбирлар ва чоралар мажмуи;
бозор назорати органи — қонунчилик ҳужжатларига мувофиқ ўз фаолияти йўналиши бўйича бозор назоратини амалга оширишга ваколатли бўлган давлат органи;
дистрибютор — таъминот занжирида маҳсулотни ишлаб чиқарувчи ёки импорт қилувчидан фарқли равишда муомалага чиқарувчи юридик ёки жисмоний шахс;
ишлаб чиқарувчи — маҳсулот ишлаб чиқарувчи ёки лойиҳалаштирилган ва ишлаб чиқарилган маҳсулотга эга бўлган ҳамда ўз номи ёки товар белгиси остида сотувчи юридик шахс;
импорт қилувчи — бошқа давлатдан маҳсулотларни Ўзбекистон Республикаси бозорига киритувчи Ўзбекистон Республикаси резиденти ҳисобланган тадбиркорлик субъекти ёки жисмоний шахс;
иқтисодий оператор — маҳсулотларни ишлаб чиқариш ёки уларни бозорга киритиш ёки муомалага чиқариш ҳуқуқига эга юридик ёхуд жисмоний шахс, хусусан, ишлаб чиқарувчи, унинг ваколатли вакили, импорт қилувчи ёки дистрибютор;
маҳсулот тўпи — мувофиқлик декларациясини берувчи томонидан тақдим этилган юк ҳужжатига мувофиқ (агар мавжуд бўлса) бир турдаги, бир номдаги ва белгидаги маҳсулот бирлиги;
мувофиқлик декларациясини берувчи — мувофиқлик декларациясини ҳисобга олиш ташаббуси билан мурожаат қилган иқтисодий оператор;
мувофиқлик декларацияси — мувофиқлик декларациясини берувчининг, бозорга киритиладиган ёки муомалага чиқариладиган маҳсулотнинг белгиланган талабларга мувофиқлиги юзасидан жавобгарликни зиммасига олгани тўғрисидаги расмий баёноти. Бунда мувофиқлик декларацияси, ҳар бир маҳсулот тўпига ёки ягона (якка) маҳсулотга нисбатан расмийлаштирилади;
МХИК коди — маҳсулотлар (товар ва хизматларнинг) Ягона электрон миллий каталогидаги идентификация коди;
ТИФ ТН коди — Ўзбекистон Республикасининг Ташқи иқтисодий фаолиятининг товар номенклатурасига мувофиқ маҳсулот коди;
юкка илова қилинадиган ҳужжатлар — маҳсулот номенклатураси ва миқдорини белгиловчи ҳужжатлар;
ягона (якка) маҳсулот — бир дона, алоҳида ҳолда ишлаб чиқарилган ёки етказиб берилаётган маҳсулотнинг ягона нусхаси;
ҳисобга олиш — мувофиқлик декларациясини берувчи шахс томонидан мувофиқлик декларациясини ахборот тизимида ҳисобга олиш.
4. Мувофиқлик декларацияси:
Ўзбекистон Республикасида ишлаб чиқарилаётган маҳсулотлар учун улар ишлаб чиқарилгандан сўнг, аммо реализация қилингунга қадар;
Ўзбекистон Республикасига олиб кирилаётган (импорт) маҳсулотлар учун улар «эркин муомалага чиқариш (импорт)» божхона режимига расмийлаштирилгунга қадар ахборот тизимида ҳисобга олиниши лозим.
5. Мувофиқлик декларациясини ҳисобга олишда унда кўрсатилган маҳсулот тури, тўпи ёки ягона (якка) маҳсулотнинг мувофиқлигини тасдиқловчи ҳужжатлари айнан ушбу маҳсулот тури, тўпи ёки ягона (якка) маҳсулотга тегишлилиги талаб этилади.
Ҳисобга олинган мувофиқлик декларацияси, унда кўрсатилган маҳсулотнинг яроқлилик муддатидан қатъи назар, ушбу маҳсулот тури, тўпи ёки ягона (якка) маҳсулот учун амал қилади.
Ҳисобга олинган мувофиқлик декларациясида хатолик (модель, марка, тўпи, ишлаб чиқарувчи номи ва шунга ўхшаш маълумотлар) ўтган бўлса, унга ўзгартириш ва қўшимчалар киритишга йўл қўйилмайди.
Бунда хато ҳисобга олинган мувофиқлик декларациясига ўзгартириш ва (ёки) қўшимчалар янги декларацияни ҳисобга олиш тарзида амалга оширилиб, эскиси ахборот тизимида сақланади.
6. Ҳисобга олинган мувофиқлик декларациялари Божхона қўмитасининг «Ягона дарча» ахборот тизимига интеграция қилинади ва улар тўғрисидаги маълумотлар ахборот тизими орқали манфаатдор томонлар танишишлари учун очиқ бўлади.
7. Мувофиқлиги декларация қилинадиган маҳсулотлар рўйхати Вазирлар Маҳкамаси қарори билан тасдиқланади.
2-боб. Мувофиқлик декларациясини ҳисобга олиш тартиби
8. Мувофиқлик декларацияси ушбу Регламентга 1-иловада келтирилган Маҳсулотларнинг мувофиқлик тўғрисидаги декларациясини ҳисобга олиш схемаси асосида ҳисобга олинади.
9. Мувофиқлик декларациясини ҳисобга олишда, қуйидаги ҳужжатлар илова қилинади:
а) маҳсулотнинг Ўзбекистон Республикасида мувофиқлик декларацияси бериладиган маҳсулот учун белгиланган талабларга мувофиқлигини тасдиқловчи ҳужжатлар;
б) менежмент тизимининг мувофиқлик сертификати (мавжуд бўлганда);
в) маҳсулот тўпи ёки ягона (якка) маҳсулот учун маҳсулот ҳажмини белгиловчи шартнома (етказиб бериш шартномаси) ва юк кузатув ҳужжатлари нусхаси.
10. Мувофиқлик декларациясини берувчи ахборот тизимида ўзи томонидан тўлдирилган маълумотларнинг тўғрилигига ва унда илова қилинган ҳужжатларнинг ҳаққонийлигига жавобгар ҳисобланади.
11. Мувофиқлик декларациясини берувчи давлат хизматидан фойдаланиш учун ахборот тизими ёки давлат хизматлари марказига бевосита ўзи келиб ёхуд давлат хизматидан электрон шаклда фойдаланиш учун Ягона интерактив давлат хизматлари порталида (кейинги ўринларда — ЯИДХП) рўйхатдан ўтган ҳолда мурожаат қилади.
12. Мувофиқлик декларациясини берувчи:
давлат хизматлари марказига бевосита ўзи келиб мурожаат қилган тақдирда, унинг номидан рўйхатдан ўтказувчи орган ходими;
ЯИДХП орқали мустақил равишда замонавий воситалар (электрон рақамли имзо, мобил-ID, One-ID тизими, дактилоскопия ва бошқалар) ёрдамида;
ахборот тизими орқали мустақил равишда замонавий воситалар (мобил-ID, One-ID тизими ва бошқалар) ёрдамида мувофиқлик декларациясига оид тегишли маълумотларни ахборот тизимида ҳисобга олиш учун киритади.
Мувофиқлик декларациясини берувчи ЯИДХП ёки ахборот тизими орқали мурожаат қилган тақдирда, мувофиқлик декларациясини электрон рақамли имзо билан тасдиқлаш талаб этилмайди.
Мувофиқлик декларацияси ахборот тизимида бепул ҳисобга олинади.
13. Мувофиқлик декларацияси ушбу Регламентга 2-иловада келтирилган Мувофиқлик декларацияси шакли бўйича ҳисобга олинади ва унда қуйидаги маълумотлар акс эттирилади:
а) мувофиқлик декларациясини берувчи шахс тўғрисида маълумотлар (юридик ёки жисмоний шахс номи, СТИР ёки ЖШШИР, юридик ва жойлашган манзили, телефон рақами ва электрон почта манзили), ЭРИ орқали декларацияни беришга ваколатли шахснинг Ф.И.О.);
б) мувофиқлик декларацияси берилаётган маҳсулотга нисбатан Ўзбекистон Республикасида белгиланган талаб(лар)ни ўз ичига олувчи ҳужжат(лар) рақам(лари)и ва банд(лар)и;
в) ишлаб чиқарувчининг тўлиқ номи ва манзили (агар, 13-банднинг иккинчи хатбошисида назарда тутилган мувофиқлик декларациясини берувчи шахс ишлаб чиқарувчидан бошқа иқтисодий оператор бўлса);
г) маҳсулот номи, рўйхатдан ўтказилган товар белгиси (мавжуд бўлса), модель ва маркаси, ТИФ ТН ва МХИК кодлари, маҳсулот тури, тўпи ва (ёки) серия рақами (тегишли ҳолларда), товар йўл ҳужжатларига ҳавола ва маҳсулотларнинг ҳажми (сони ёки ягона (якка) маҳсулот);
д) мазкур банднинг «г» кичик бандига мувофиқ акс эттирилган маълумотларда келтирилган маҳсулотга нисбатан Миллий аккредитация тизимида рўйхатга олинган лабораторияларда ахборот тизими орқали расмийлаштирилган синов баённомаси рақами ва санасига ҳавола;
е) менежмент тизимининг мувофиқлик сертификати рақами ва санаси (мавжуд бўлганда);
ж) мувофиқлик декларациясида кўрсатилган маълумотларни тўғри ва ҳаққонийлиги кафолати юзасидан баёнот.
Мувофиқлик декларацияси ҳисобга олинган сана, унинг рақами ҳамда мувофиқлик декларацияси ҳисобга олинганини тасдиқловчи махсус QR-код ахборот тизими орқали берилади.
14. Мувофиқлик декларацияси ахборот тизимида ҳисобга олинган кундан бошлаб амал қилади ва ушбу Регламентнинг 13-бандида келтирилган маълумотлардаги маҳсулотларга тегишли ҳисобланади.
3-боб. Якунловчи қоидалар
15. Ҳисобга олинган мувофиқлик декларацияси ва унга илова қилинган ҳужжатлар ҳамда маълумотлар ахборот тизимига киритилган кундан бошлаб ўн йил мобайнида сақланиши ҳамда тегишли ваколатли органларга уларнинг сўрови бўйича тақдим этилиши керак.
16. Ваколатли бозор назорати органи ҳисобга олинган мувофиқлик декларациялари тўғрисидаги маълумотлар ва уларга илова қилинган ҳужжатлар билан ахборот тизими орқали танишишлари мумкин. Ваколатли бозор назорати органи ахборот тизими орқали ҳисобга олинган мувофиқлик декларацияларини доимий мониторинг қилиб боради.
17. Мувофиқлик декларациясида кўрсатилган маҳсулотлар мажбурий талабларга номувофиқ деб топилган тақдирда ёки мувофиқлик декларациясини берувчи томонидан мувофиқлик декларациясини ҳисобга олишда илова қилинган ҳужжатлар ва маълумотлар ҳаққонийлиги ҳамда ишончлилигининг акси исботланганда, ваколатли бозор назорати органи томонидан мувофиқлик декларациясини берувчига нисбатан қонунчилик ҳужжатларида белгиланган тартибда таъсир чоралари кўрилади.
18. Ушбу Регламент талаблари бузилишида айбдор бўлган шахслар қонунчилик ҳужжатларига мувофиқ жавоб берадилар.
Маҳсулотларнинг мувофиқлик тўғрисидаги декларациясини ҳисобга олиш бўйича давлат хизматини кўрсатишнинг маъмурий регламентига 1-ИЛОВА
Маҳсулотларнинг мувофиқлик тўғрисидаги декларациясини ҳисобга олиш
Босқичлар Субъектлар Тадбирлар Бажариш муддатлари 1-босқич Мувофиқлик декларациясини берувчи Мувофиқлик тўғрисидаги декларацияни шакллантириш ва тасдиқлаш учун Регламентда белгиланган ҳужжатларни тайёрлайди. Ихтиёрий 2-босқич Мувофиқлик декларациясини берувчи Давлат хизматлари марказига борган ҳолда ёки Ягона интерактив давлат хизматлари портали ёхуд «Техник тартибга солиш» миллий ахборот тизими орқали Регламент талаблари асосида мувофиқлик декларациясини шакллантиради ва ҳисобга олиш учун юборади. Ихтиёрий 3-босқич «Техник тартибга солиш» миллий ахборот тизими Мувофиқлик тўғрисидаги декларацияни автоматик равишда ҳисобга олади. Дарҳол (автоматик равишда)
Маҳсулотларнинг мувофиқлик тўғрисидаги декларациясини ҳисобга олиш бўйича давлат хизматини кўрсатишнинг маъмурий регламентига 2-ИЛОВА
МУВОФИҚЛИК ТЎҒРИСИДАГИ
Мувофиқлик декларациясини берувчи: Номи: СТИР: Манзили: а) юридик: б) жойлашган жойи: в) телефон рақами: г) электрон почта: д) ваколатли шахс Ф.И.О. Маҳсулотни ишлаб чиқарувчи: Ишлаб чиқарувчи давлат: Манзили : а) юридик: б) жойлашган жойи: Маҳсулот номи: Товар белгиси: Модель: Марка: Миқдори: ТИФ ТН коди: МХИК коди: Товар йўл ҳужжатлари: а) инвойс б) товар-транспорт юк хати (СМР) Маҳсулот қуйидаги ҳужжат талабларига мувофиқ: Мувофиқлик тўғрисидаги декларацияни тасдиқлашга асос: а) синаш лабораторияси б) синов баённомаси в) менежмент тизими сертификати (мавжуд бўлса) Мувофиқлик тўғрисидаги декларация: Махсус QR-код жойи а) тасдиқланган сана: б) ҳисоб рақами Мазкур мувофиқлик тўғрисидаги декларацияда кўрсатилган барча маълумотларни тўғрилиги, ҳаққонийлиги ва ишончлилигини кафолатлаган ҳолда, кўрсатилган маҳсулот тўпи, ушбу ҳужжатда белгиланган талабларга мувофиқлигини тасдиқлайман ҳамда унга оид жавобгарликни ўз зиммамга оламан.
Мувофиқлик тўғрисидаги декларацияга
Т/р Маҳсулот номи Миқдори Синов баённомаси Ҳужжат ва унинг бандлари 1 ... ... Қабул қилувчи масъул шахс Ф.И.О. QR-код Ушбу илова мувофиқлик тўғрисидаги декларация билан бирга ҳақиқий ҳисобланади. Эслатма: мувофиқлик тўғрисидаги декларация бир тўп ва турдаги маҳсулот учун ҳисобга олинади.
Ўзбекистон Республикасининг Бош вазири А. АРИПОВ
Тошкент ш.,
2025 йил 26 декабрь,
831-сон
Oʻzbekiston Respublikasi Vazirlar Mahkamasining
qarori
MAʼMURIY REGLAMENTI
SXEMASI
DEKLARATSIYA
ILOVA
Mahsulotlarning muvofiqlik toʻgʻrisidagi deklaratsiyasini hisobga olish boʻyicha davlat xizmatini koʻrsatishning maʼmuriy reglamentini tasdiqlash haqida
Oʻzbekiston Respublikasi Prezidentining “Ishlab chiqarish, eksport va tadbirkorlik faoliyatini ragʻbatlantirish, savdo va sanoat siyosati samaradorligini oshirish chora-tadbirlari toʻgʻrisida” 2025-yil 18-apreldagi PF-67-son Farmoni ijrosini taʼminlash, muvofiqlikni baholash tizimini soddalashtirish hamda tadbirkorlik subyektlariga qoʻshimcha qulaylik yaratish maqsadida Vazirlar Mahkamasi qaror qiladi:
1. Quyidagilarni nazarda tutuvchi Mahsulotlarning muvofiqlik toʻgʻrisidagi deklaratsiyasini hisobga olish boʻyicha davlat xizmatini koʻrsatishning maʼmuriy reglamenti ilovaga muvofiq tasdiqlansin:
mahsulotlarning muvofiqlik toʻgʻrisidagi deklaratsiyasini “Texnik tartibga solish” milliy axborot tizimida (keyingi oʻrinlarda — axborot tizimi) hisobga olish;
mahsulotlarning muvofiqlik toʻgʻrisidagi deklaratsiyasini hisobga olishda taqdim etiladigan hujjatlar va maʼlumotlarni shakllantirish tartibi.
2. Adliya vazirligi davlat xizmati axborot tizimida hamda Yagona interaktiv davlat xizmatlari portali orqali koʻrsatilishi ustidan doimiy nazorat oʻrnatsin.
3. Belgilansinki, axborot tizimi orqali hisobga olingan muvofiqlik toʻgʻrisidagi deklaratsiyalari bozor nazorati talablariga muvofiq doimiy monitoring qilib boriladi. Bunda bozor nazorati organlari tayinlangunga qadar bozor nazorati vazifalari Vazirlar Mahkamasi huzuridagi Oʻzbekiston texnik jihatdan tartibga solish agentligining Texnik jihatdan tartibga solish sohasida nazorat inspeksiyasi tomonidan amalga oshiriladi.
4. Iqtisodiyot va moliya vazirligi huzuridagi Bojxona qoʻmitasi bir oy muddatda ushbu qaror bilan tasdiqlangan Maʼmuriy reglamentga muvofiq, idoralararo nazoratni amalga oshirish maqsadida Soliq qoʻmitasi va Vazirlar Mahkamasi huzuridagi Oʻzbekiston texnik jihatdan tartibga solish agentligiga tegishli maʼlumotlarni doimiy taqdim etib borish hamda hisobga olingan muvofiqlik toʻgʻrisidagi deklaratsiyalarni “Yagona darcha” bojxona axborot tizimida koʻrib borish uchun tegishli tizimlarni integratsiya qilish choralarini koʻrsin.
5. Vazirlar Mahkamasining “Mahsulotlarni davlat roʻyxatidan oʻtkazish va muvofiqlikni baholash tartiblariga oid nizomlarni tasdiqlash toʻgʻrisida” 2024-yil 14-avgustdagi 502-son qarori 1-bandining “v” kichik bandi hamda qarorga 3-ilova oʻz kuchini yoʻqotgan deb hisoblansin.
6. Ushbu qarorning bajarilishini nazorat qilish Vazirlar Mahkamasi huzuridagi Oʻzbekiston texnik jihatdan tartibga solish agentligi direktori A.R. Jumanazarov zimmasiga yuklansin.
Vazirlar Mahkamasining 2025-yil 26-dekabrdagi 831-son qaroriga ILOVA
Mahsulotlarning muvofiqlik toʻgʻrisidagi deklaratsiyasini hisobga olish boʻyicha davlat xizmatini koʻrsatishning
1-bob. Umumiy qoidalar
1. Ushbu Reglament mahsulotlarning muvofiqlik toʻgʻrisidagi deklaratsiyasini hisobga olish boʻyicha davlat xizmatini koʻrsatish tartibini belgilaydi.
2. Mahsulotlarning muvofiqlik toʻgʻrisidagi deklaratsiyasi (keyingi oʻrinlarda — muvofiqlik deklaratsiyasi) muvofiqlik deklaratsiyasini beruvchi shaxs tashabbusi bilan Vazirlar Mahkamasi huzuridagi Oʻzbekiston texnik jihatdan tartibga solish agentligining (keyingi oʻrinlarda — Agentlik) “Texnik tartibga solish” milliy axborot tizimi (keyingi oʻrinlarda — axborot tizimi) orqali hisobga olinadi.
3. Ushbu Reglamentda quyidagi asosiy tushunchalardan foydalaniladi:
bozor nazorati — mahsulotlar bozorga muomalaga kiritilganidan soʻng ularning xavfsizligini, inson hayoti, sogʻligʻiga, jismoniy va yuridik shaxslar hamda davlat manfaatlariga, atrof-muhitga zarar yetkazmasligini taʼminlashga qaratilgan, bozor nazorati organlari tomonidan amalga oshiriladigan tadbirlar va choralar majmui;
bozor nazorati organi — qonunchilik hujjatlariga muvofiq oʻz faoliyati yoʻnalishi boʻyicha bozor nazoratini amalga oshirishga vakolatli boʻlgan davlat organi;
distribyutor — taʼminot zanjirida mahsulotni ishlab chiqaruvchi yoki import qiluvchidan farqli ravishda muomalaga chiqaruvchi yuridik yoki jismoniy shaxs;
ishlab chiqaruvchi — mahsulot ishlab chiqaruvchi yoki loyihalashtirilgan va ishlab chiqarilgan mahsulotga ega boʻlgan hamda oʻz nomi yoki tovar belgisi ostida sotuvchi yuridik shaxs;
import qiluvchi — boshqa davlatdan mahsulotlarni Oʻzbekiston Respublikasi bozoriga kirituvchi Oʻzbekiston Respublikasi rezidenti hisoblangan tadbirkorlik subyekti yoki jismoniy shaxs;
iqtisodiy operator — mahsulotlarni ishlab chiqarish yoki ularni bozorga kiritish yoki muomalaga chiqarish huquqiga ega yuridik yoxud jismoniy shaxs, xususan, ishlab chiqaruvchi, uning vakolatli vakili, import qiluvchi yoki distribyutor;
mahsulot toʻpi — muvofiqlik deklaratsiyasini beruvchi tomonidan taqdim etilgan yuk hujjatiga muvofiq (agar mavjud boʻlsa) bir turdagi, bir nomdagi va belgidagi mahsulot birligi;
muvofiqlik deklaratsiyasini beruvchi — muvofiqlik deklaratsiyasini hisobga olish tashabbusi bilan murojaat qilgan iqtisodiy operator;
muvofiqlik deklaratsiyasi — muvofiqlik deklaratsiyasini beruvchining, bozorga kiritiladigan yoki muomalaga chiqariladigan mahsulotning belgilangan talablarga muvofiqligi yuzasidan javobgarlikni zimmasiga olgani toʻgʻrisidagi rasmiy bayonoti. Bunda muvofiqlik deklaratsiyasi, har bir mahsulot toʻpiga yoki yagona (yakka) mahsulotga nisbatan rasmiylashtiriladi;
MXIK kodi — mahsulotlar (tovar va xizmatlarning) Yagona elektron milliy katalogidagi identifikatsiya kodi;
TIF TN kodi — Oʻzbekiston Respublikasining Tashqi iqtisodiy faoliyatining tovar nomenklaturasiga muvofiq mahsulot kodi;
yukka ilova qilinadigan hujjatlar — mahsulot nomenklaturasi va miqdorini belgilovchi hujjatlar;
yagona (yakka) mahsulot — bir dona, alohida holda ishlab chiqarilgan yoki yetkazib berilayotgan mahsulotning yagona nusxasi;
hisobga olish — muvofiqlik deklaratsiyasini beruvchi shaxs tomonidan muvofiqlik deklaratsiyasini axborot tizimida hisobga olish.
4. Muvofiqlik deklaratsiyasi:
Oʻzbekiston Respublikasida ishlab chiqarilayotgan mahsulotlar uchun ular ishlab chiqarilgandan soʻng, ammo realizatsiya qilingunga qadar;
Oʻzbekiston Respublikasiga olib kirilayotgan (import) mahsulotlar uchun ular “erkin muomalaga chiqarish (import)” bojxona rejimiga rasmiylashtirilgunga qadar axborot tizimida hisobga olinishi lozim.
5. Muvofiqlik deklaratsiyasini hisobga olishda unda koʻrsatilgan mahsulot turi, toʻpi yoki yagona (yakka) mahsulotning muvofiqligini tasdiqlovchi hujjatlari aynan ushbu mahsulot turi, toʻpi yoki yagona (yakka) mahsulotga tegishliligi talab etiladi.
Hisobga olingan muvofiqlik deklaratsiyasi, unda koʻrsatilgan mahsulotning yaroqlilik muddatidan qatʼi nazar, ushbu mahsulot turi, toʻpi yoki yagona (yakka) mahsulot uchun amal qiladi.
Hisobga olingan muvofiqlik deklaratsiyasida xatolik (model, marka, toʻpi, ishlab chiqaruvchi nomi va shunga oʻxshash maʼlumotlar) oʻtgan boʻlsa, unga oʻzgartirish va qoʻshimchalar kiritishga yoʻl qoʻyilmaydi.
Bunda xato hisobga olingan muvofiqlik deklaratsiyasiga oʻzgartirish va (yoki) qoʻshimchalar yangi deklaratsiyani hisobga olish tarzida amalga oshirilib, eskisi axborot tizimida saqlanadi.
6. Hisobga olingan muvofiqlik deklaratsiyalari Bojxona qoʻmitasining “Yagona darcha” axborot tizimiga integratsiya qilinadi va ular toʻgʻrisidagi maʼlumotlar axborot tizimi orqali manfaatdor tomonlar tanishishlari uchun ochiq boʻladi.
7. Muvofiqligi deklaratsiya qilinadigan mahsulotlar roʻyxati Vazirlar Mahkamasi qarori bilan tasdiqlanadi.
2-bob. Muvofiqlik deklaratsiyasini hisobga olish tartibi
8. Muvofiqlik deklaratsiyasi ushbu Reglamentga 1-ilovada keltirilgan Mahsulotlarning muvofiqlik toʻgʻrisidagi deklaratsiyasini hisobga olish sxemasi asosida hisobga olinadi.
9. Muvofiqlik deklaratsiyasini hisobga olishda, quyidagi hujjatlar ilova qilinadi:
a) mahsulotning Oʻzbekiston Respublikasida muvofiqlik deklaratsiyasi beriladigan mahsulot uchun belgilangan talablarga muvofiqligini tasdiqlovchi hujjatlar;
b) menejment tizimining muvofiqlik sertifikati (mavjud boʻlganda);
v) mahsulot toʻpi yoki yagona (yakka) mahsulot uchun mahsulot hajmini belgilovchi shartnoma (yetkazib berish shartnomasi) va yuk kuzatuv hujjatlari nusxasi.
10. Muvofiqlik deklaratsiyasini beruvchi axborot tizimida oʻzi tomonidan toʻldirilgan maʼlumotlarning toʻgʻriligiga va unda ilova qilingan hujjatlarning haqqoniyligiga javobgar hisoblanadi.
11. Muvofiqlik deklaratsiyasini beruvchi davlat xizmatidan foydalanish uchun axborot tizimi yoki davlat xizmatlari markaziga bevosita oʻzi kelib yoxud davlat xizmatidan elektron shaklda foydalanish uchun Yagona interaktiv davlat xizmatlari portalida (keyingi oʻrinlarda — YIDXP) roʻyxatdan oʻtgan holda murojaat qiladi.
12. Muvofiqlik deklaratsiyasini beruvchi:
davlat xizmatlari markaziga bevosita oʻzi kelib murojaat qilgan taqdirda, uning nomidan roʻyxatdan oʻtkazuvchi organ xodimi;
YIDXP orqali mustaqil ravishda zamonaviy vositalar (elektron raqamli imzo, mobil-ID, One-ID tizimi, daktiloskopiya va boshqalar) yordamida;
axborot tizimi orqali mustaqil ravishda zamonaviy vositalar (mobil-ID, One-ID tizimi va boshqalar) yordamida muvofiqlik deklaratsiyasiga oid tegishli maʼlumotlarni axborot tizimida hisobga olish uchun kiritadi.
Muvofiqlik deklaratsiyasini beruvchi YIDXP yoki axborot tizimi orqali murojaat qilgan taqdirda, muvofiqlik deklaratsiyasini elektron raqamli imzo bilan tasdiqlash talab etilmaydi.
Muvofiqlik deklaratsiyasi axborot tizimida bepul hisobga olinadi.
13. Muvofiqlik deklaratsiyasi ushbu Reglamentga 2-ilovada keltirilgan Muvofiqlik deklaratsiyasi shakli boʻyicha hisobga olinadi va unda quyidagi maʼlumotlar aks ettiriladi:
a) muvofiqlik deklaratsiyasini beruvchi shaxs toʻgʻrisida maʼlumotlar (yuridik yoki jismoniy shaxs nomi, STIR yoki JSHSHIR, yuridik va joylashgan manzili, telefon raqami va elektron pochta manzili), ERI orqali deklaratsiyani berishga vakolatli shaxsning F.I.O.);
b) muvofiqlik deklaratsiyasi berilayotgan mahsulotga nisbatan Oʻzbekiston Respublikasida belgilangan talab(lar)ni oʻz ichiga oluvchi hujjat(lar) raqam(lari)i va band(lar)i;
v) ishlab chiqaruvchining toʻliq nomi va manzili (agar, 13-bandning ikkinchi xatboshisida nazarda tutilgan muvofiqlik deklaratsiyasini beruvchi shaxs ishlab chiqaruvchidan boshqa iqtisodiy operator boʻlsa);
g) mahsulot nomi, roʻyxatdan oʻtkazilgan tovar belgisi (mavjud boʻlsa), model va markasi, TIF TN va MXIK kodlari, mahsulot turi, toʻpi va (yoki) seriya raqami (tegishli hollarda), tovar yoʻl hujjatlariga havola va mahsulotlarning hajmi (soni yoki yagona (yakka) mahsulot);
d) mazkur bandning “g” kichik bandiga muvofiq aks ettirilgan maʼlumotlarda keltirilgan mahsulotga nisbatan Milliy akkreditatsiya tizimida roʻyxatga olingan laboratoriyalarda axborot tizimi orqali rasmiylashtirilgan sinov bayonnomasi raqami va sanasiga havola;
e) menejment tizimining muvofiqlik sertifikati raqami va sanasi (mavjud boʻlganda);
j) muvofiqlik deklaratsiyasida koʻrsatilgan maʼlumotlarni toʻgʻri va haqqoniyligi kafolati yuzasidan bayonot.
Muvofiqlik deklaratsiyasi hisobga olingan sana, uning raqami hamda muvofiqlik deklaratsiyasi hisobga olinganini tasdiqlovchi maxsus QR-kod axborot tizimi orqali beriladi.
14. Muvofiqlik deklaratsiyasi axborot tizimida hisobga olingan kundan boshlab amal qiladi va ushbu Reglamentning 13-bandida keltirilgan maʼlumotlardagi mahsulotlarga tegishli hisoblanadi.
3-bob. Yakunlovchi qoidalar
15. Hisobga olingan muvofiqlik deklaratsiyasi va unga ilova qilingan hujjatlar hamda maʼlumotlar axborot tizimiga kiritilgan kundan boshlab oʻn yil mobaynida saqlanishi hamda tegishli vakolatli organlarga ularning soʻrovi boʻyicha taqdim etilishi kerak.
16. Vakolatli bozor nazorati organi hisobga olingan muvofiqlik deklaratsiyalari toʻgʻrisidagi maʼlumotlar va ularga ilova qilingan hujjatlar bilan axborot tizimi orqali tanishishlari mumkin. Vakolatli bozor nazorati organi axborot tizimi orqali hisobga olingan muvofiqlik deklaratsiyalarini doimiy monitoring qilib boradi.
17. Muvofiqlik deklaratsiyasida koʻrsatilgan mahsulotlar majburiy talablarga nomuvofiq deb topilgan taqdirda yoki muvofiqlik deklaratsiyasini beruvchi tomonidan muvofiqlik deklaratsiyasini hisobga olishda ilova qilingan hujjatlar va maʼlumotlar haqqoniyligi hamda ishonchliligining aksi isbotlanganda, vakolatli bozor nazorati organi tomonidan muvofiqlik deklaratsiyasini beruvchiga nisbatan qonunchilik hujjatlarida belgilangan tartibda taʼsir choralari koʻriladi.
18. Ushbu Reglament talablari buzilishida aybdor boʻlgan shaxslar qonunchilik hujjatlariga muvofiq javob beradilar.
Mahsulotlarning muvofiqlik toʻgʻrisidagi deklaratsiyasini hisobga olish boʻyicha davlat xizmatini koʻrsatishning maʼmuriy reglamentiga 1-ILOVA
Mahsulotlarning muvofiqlik toʻgʻrisidagi deklaratsiyasini hisobga olish
Bosqichlar Subyektlar Tadbirlar Bajarish muddatlari 1-bosqich Muvofiqlik deklaratsiyasini beruvchi Muvofiqlik toʻgʻrisidagi deklaratsiyani shakllantirish va tasdiqlash uchun Reglamentda belgilangan hujjatlarni tayyorlaydi. Ixtiyoriy 2-bosqich Muvofiqlik deklaratsiyasini beruvchi Davlat xizmatlari markaziga borgan holda yoki Yagona interaktiv davlat xizmatlari portali yoxud “Texnik tartibga solish” milliy axborot tizimi orqali Reglament talablari asosida muvofiqlik deklaratsiyasini shakllantiradi va hisobga olish uchun yuboradi. Ixtiyoriy 3-bosqich “Texnik tartibga solish” milliy axborot tizimi Muvofiqlik toʻgʻrisidagi deklaratsiyani avtomatik ravishda hisobga oladi. Darhol (avtomatik ravishda)
Mahsulotlarning muvofiqlik toʻgʻrisidagi deklaratsiyasini hisobga olish boʻyicha davlat xizmatini koʻrsatishning maʼmuriy reglamentiga 2-ILOVA
MUVOFIQLIK TOʻGʻRISIDAGI
Muvofiqlik deklaratsiyasini beruvchi: Nomi: STIR: Manzili: a) yuridik: b) joylashgan joyi: v) telefon raqami: g) elektron pochta: d) vakolatli shaxs F.I.O. Mahsulotni ishlab chiqaruvchi: Ishlab chiqaruvchi davlat: Manzili : a) yuridik: b) joylashgan joyi: Mahsulot nomi: Tovar belgisi: Model: Marka: Miqdori: TIF TN kodi: MXIK kodi: Tovar yoʻl hujjatlari: a) invoys b) tovar-transport yuk xati (SMR) Mahsulot quyidagi hujjat talablariga muvofiq: Muvofiqlik toʻgʻrisidagi deklaratsiyani tasdiqlashga asos: a) sinash laboratoriyasi b) sinov bayonnomasi v) menejment tizimi sertifikati (mavjud boʻlsa) Muvofiqlik toʻgʻrisidagi deklaratsiya: Maxsus QR-kod joyi a) tasdiqlangan sana: b) hisob raqami Mazkur muvofiqlik toʻgʻrisidagi deklaratsiyada koʻrsatilgan barcha maʼlumotlarni toʻgʻriligi, haqqoniyligi va ishonchliligini kafolatlagan holda, koʻrsatilgan mahsulot toʻpi, ushbu hujjatda belgilangan talablarga muvofiqligini tasdiqlayman hamda unga oid javobgarlikni oʻz zimmamga olaman.
Muvofiqlik toʻgʻrisidagi deklaratsiyaga
T/r Mahsulot nomi Miqdori Sinov bayonnomasi Hujjat va uning bandlari 1 ... ... Qabul qiluvchi masʼul shaxs F.I.O. QR-kod Ushbu ilova muvofiqlik toʻgʻrisidagi deklaratsiya bilan birga haqiqiy hisoblanadi. Eslatma: muvofiqlik toʻgʻrisidagi deklaratsiya bir toʻp va turdagi mahsulot uchun hisobga olinadi.
Oʻzbekiston Respublikasining Bosh vaziri A. ARIPOV
Toshkent sh.,
2025-yil 26-dekabr,
831-son