📅 2025-yil 30-dekabr · Vazirlik va idoralar hujjatlari · Adliya vaziri
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2025 йил 30 декабрь · Вазирлик ва идоралар ҳужжатлари · Адлия вазири
Расмий матн. Расмий ҳужжат. Таҳририй изоҳлар киритилмаган.
📅 30 декабря 2025 г. · Документы министерств и ведомств · Министр юстиции
Официальный текст. Официальный документ. Редакционные примечания не включены.
📅 30 December 2025 · Ministry and agency documents · Adliya vaziri
Official text. Official document. Editorial notes are not included.
ЎЗБЕКИСТОН РЕСПУБЛИКАСИ АДЛИЯ ВАЗИРИНИНГ
БУЙРУҒИ
НИЗОМ
Нотариал ҳаракатларни видеоконференцалоқа режими орқали амалга ошириш тартиби тўғрисидаги низомни тасдиқлаш ҳақида
Ўзбекистон Республикасининг «Нотариат тўғрисида»ги Қонуни , Ўзбекистон Республикаси Президентининг 2018 йил 13 апрелдаги ПҚ-3666-сон « Ўзбекистон Республикаси Адлия вазирлиги фаолиятини янада такомиллаштиришга доир ташкилий чора-тадбирлар тўғрисида »ги ҳамда 2025 йил 9 сентябрдаги ПҚ-280-сон « Нотариат институтини янада ривожлантириш ҳамда соҳага замонавий ахборот-коммуникация технологияларини кенг жорий этишга оид қўшимча чора-тадбирлар тўғрисида »ги қарорларига мувофиқ буюраман:
1. Нотариал ҳаракатларни видеоконференцалоқа режими орқали амалга ошириш тартиби тўғрисидаги низом иловага мувофиқ тасдиқлансин.
2. Мазкур буйруқ Ўзбекистон Республикаси Нотариал палатаси билан келишилган.
3. Ушбу буйруқ расмий эълон қилинган кундан эътиборан кучга киради.
Келишилди:
Ўзбекистон Республикаси адлия вазирининг 2025 йил 30 декабрдаги 29-мҳ-сон буйруғига ИЛОВА
Нотариал ҳаракатларни видеоконференцалоқа режими орқали амалга ошириш тартиби тўғрисидаги
Мазкур Низом нотариуслар томонидан жисмоний шахс ёки юридик шахснинг вакили (бундан буён матнда мурожаат қилувчи деб юритилади) нотариал идорага келмаган ҳолда масофадан видеоконференцалоқа режими (бундан буён матнда видеоконференцалоқа режими деб юритилади) орқали нотариал ҳаракатларни амалга ошириш тартибини белгилайди.
1-боб. Умумий қоидалар
1. Ушбу Низом талаблари нотариал ҳаракатларни амалга ошириш жараёнида нотариус, нотариус ёрдамчиси, стажёри, котиби ҳамда нотариал ҳаракат тарафларига нисбатан татбиқ этилади.
Ўзбекистон Республикасининг «Нотариат тўғрисида»ги Қонунида назарда тутилган нотариал ҳаракатлар видеоконференцалоқа режимида орқали кўрсатилиши мумкин.
2. Нотариус, нотариус ёрдамчиси, стажёри ҳамда котиби ўз фаолиятини амалга ошириши натижасида ўзларига маълум бўлган нотариал ҳаракат тараф(лар)и ҳақидаги маълумотларнинг махфийлигини таъминлаши керак .
3. Ўзбекистон Республикаси Адлия вазирлиги, Қорақалпоғистон Республикаси Адлия вазирлиги, вилоятлар ва Тошкент шаҳар адлия бошқармалари ҳамда Ўзбекистон Республикаси Нотариал палатаси ва унинг ҳудудий бошқармалари ушбу Низом талаблари ижроси бўйича нотариал фаолият устидан доимий назорат ва мониторингни амалга оширадилар .
2-боб. Нотариал ҳаракатларни видеоконференцалоқа режимида амалга оширишни ташкил этиш
4. Нотариал ҳаракатлар видеоконференцалоқа режимида «E-notarius.uz» ахборот портали (бундан буён матнда электрон тармоқ деб юритилади) ҳамда «Нотариус» автоматлаштирилган ахборот тизими (бундан буён матнда Тизим деб юритилади) орқали тасдиқланади.
5. Мурожаат қилувчи нотариал ҳаракатларни видеоконференцалоқа режимида амалга ошириш учун электрон тармоқда шахсини тасдиқлаган ҳолда рўйхатдан ўтади.
6. Мурожаат қилувчи нотариал ҳаракатларни видеоконференцалоқа режимида амалга ошириш учун электрон тармоқдан фойдаланиш шартлари билан танишади ва розилигини тасдиқлайди.
7. Мурожаат қилувчи электрон тармоқда тасдиқлашни (шаҳодатлашни) сўраётган нотариал ҳаракатнинг номини аниқ кўрсатади ҳамда ушбу ҳаракатни амалга ошириш учун зарур бўлган маълумотларни тўлдиради.
8. Нотариал ҳаракатни амалга ошириш тўғрисидаги мурожаат (бундан буён матнда мурожаат деб юритилади) электрон тармоқ орқали мурожаат қилувчи томонидан ёки автоматик тарзда танланган нотариуснинг Тизимдаги профилига юборилади.
Нотариус мурожаат келиб тушган кундан бошлаб бир иш куни ичида мурожаатни ўрганиб чиқади ҳамда мурожаатда камчиликлар мавжуд ёки мавжуд эмаслиги тўғрисида мурожаат қилувчига электрон тармоқ орқали хабарнома юборади. Бунда мурожаатда кўрсатилган мурожаат қилувчининг телефон рақамига ҳам хабарнома юборилиши мумкин.
Мурожаатда камчиликлар аниқланган ҳолларда нотариус электрон тармоқ орқали юборилган хабарномада ушбу камчиликларни аниқ кўрсатиши лозим.
Мурожаат қилувчи камчиликларни унга маълум қилинган пайтдан бошлаб беш иш куни ичида бартараф этган тақдирда нотариал ҳаракат давом эттирилади. Камчиликлар беш иш куни ичида бартараф этилмаган тақдирда, мурожаат Ўзбекистон Республикасининг «Нотариат тўғрисида»ги Қонунига асосан рад этилади.
Нотариус томонидан ҳужжатларни ўрганиб чиқишда камчиликлар аниқланмаганлиги тўғрисидаги хабарнома юборилган ёки аниқланган камчиликлар бартараф этилган пайтдан бошлаб беш иш куни ичида мурожаат қилувчи электрон тармоқ орқали нотариал ҳаракатни давом эттиришни тасдиқлайди.
9. Мурожаат қилувчи томонидан нотариал ҳаракатни давом эттириш тасдиқланган кундан бошлаб бир иш куни ичида амалга ошириладиган нотариал ҳаракат тўғрисидаги маълумотлар нотариус, нотариус ёрдамчиси, стажёри ёки котиби томонидан Тизимга тўлиқ киритилади.
Нотариал ҳаракат учун ундириладиган тўловлар миқдори Тизим томонидан автоматик равишда ҳисобланади ҳамда электрон тармоқ орқали тўлов квитанциялари(инвойс) мурожаат қилувчига юборилади. Бунда мурожаатда кўрсатилган мурожаат қилувчининг телефон рақамига ҳам тўлов квитанциялари (инвойс) юборилиши мумкин.
10. Тўлов квитанциялари (инвойс) мурожаат қилувчига юборилган куннинг ўзида нотариус Тизим орқали нотариал ҳаракатни амалга ошириш вақтини белгилайди ҳамда нотариал ҳаракатни амалга ошириш вақти тўғрисида мурожаат қилувчига электрон тармоқ орқали хабарнома юборилади. Бунда мурожаатда кўрсатилган мурожаат қилувчининг телефон рақамига ҳам хабарнома юборилиши мумкин.
Нотариал ҳаракатни амалга ошириш вақти тўлов квитанциялари (инвойс) мурожаат қилувчига юборилгандан бошлаб уч иш кунидан кўп бўлмаган муддат ичида белгиланади.
11. Нотариус томонидан белгиланган нотариал ҳаракатни амалга ошириш вақти мурожаат қилувчига маъқул бўлмаган тақдирда, мурожаат қилувчи электрон тармоқ орқали нотариусдан икки иш кунидан кўп бўлмаган муддат ичидаги ўзига қулай бўлган бошқа вақтни белгилашни сўраши мумкин. Бунда нотариус мурожаат қилувчи билан келишган ҳолда мақбул вақтни белгилайди.
12. Мурожаат қилувчи нотариал ҳаракат амалга оширилиши белгиланган вақтга қадар тўлов квитанцияларида (инвойсда) кўрсатилган тўловларни амалга ошириши шарт.
13. Нотариал ҳаракат амалга оширилиши белгиланган вақтда нотариус Тизим орқали ҳамда нотариал ҳаракат тарафлари электрон тармоқ орқали видеоконференцалоқа режимида боғланишлари лозим.
14. Нотариус ёки нотариал ҳаракат тараф(лар)и нотариал ҳаракат амалга оширилиши белгиланган вақтда узрли сабабларга кўра видеоконференцалоқа режимида боғлана олмаслиги маълум бўлган ҳолларда у(лар) бошқа нотариал ҳаракат тараф(лар)ини (нотариусни) бу тўғрисида хабардор қилиши шарт.
Бунда нотариал ҳаракат ўзаро келишилган ҳолда нотариал ҳаракат амалга оширилиши белгиланган кундан бошлаб уч иш кунидан кўп бўлмаган бошқа вақтда амалга оширилиши мумкин.
15. Нотариал ҳаракат амалга оширилиши белгиланган вақтда нотариал ҳаракат тараф(лар)и видеоконференцалоқа режимида боғланмаган ҳолларда нотариал ҳаракатни амалга ошириш вақти бир иш кунига узайтирилади ҳамда бу тўғрисида электрон тармоқ орқали мурожаат қилувчига хабарнома юборилади. Бунда мурожаатда кўрсатилган мурожаат қилувчининг телефон рақамига ҳам хабарнома юборилиши мумкин.
16. Нотариал ҳаракат тараф(лар)и узрли сабабларга кўра боғлана олмаслигини маълум қилмаган ёки нотариал ҳаракатни амалга ошириш учун узайтирилган вақтда видеоконференцалоқа режимида боғланмаган ҳолларда мурожаат рад этилади ҳамда нотариал ҳаракатни тасдиқлаш учун тўланган тўловлар қайтарилади.
17. Нотариал ҳаракат тараф(лар)и нотариал хизматдан фойдаланишдан уни кўрсатишнинг ҳар қандай босқичида бош тортиш ҳуқуқига эга.
Нотариал ҳаракат тараф(лар) нотариал хизматдан фойдаланишдан бош тортган тақдирда, мурожаат кўрмасдан қолдирилади ҳамда нотариал ҳаракатни тасдиқлаш учун тўланган тўловлар қайтарилади.
3-боб. Нотариал ҳаракат тарафларининг шахсини, муомала ва ҳуқуқ лаёқатини аниқлаш ҳамда Тизимга маълумотларни киритиш
18. Нотариал ҳаракат тараф(лар)ининг шахси у(лар)нинг шахсини тасдиқловчи ҳужжатларни тақдим этмаган ҳолда ушбу ҳужжатларнинг реквизитлари орқали замонавий ахборот технологияларидан фойдаланган ҳолда идентификация ҳамда биометрик маълумотлар (Face-ID) орқали верификация қилинади, шунингдек қонунчилик ҳужжатларида белгиланган бошқа усуллар билан аниқланиши мумкин.
Мурожаат қилувчининг ҳуқуқ лаёқатини аниқлашда нотариус тегишли ахборот ресурсларидан фойдаланади.
Нотариус видеоконференцалоқа режимида мулоқот қилаётган шахс(лар) айнан шу эканлигини Тизим ёрдамида (Face-ID орқали солиштириш усули) аниқлайди.
19. Нотариус нотариал ҳаракат тараф(лар)ининг муомала лаёқатини видеоконференцалоқа режимида у(лар) билан шахсий мулоқот давомида аниқлайди.
20. Нотариал ҳаракат тараф(лар)ининг руҳий ҳолати бузилганлиги ёки ақли заифлиги оқибатида ўз хатти-ҳаракатларининг аҳамиятини тушуна олмайди ёки шу ҳаракатларни бошқара олмайди деб ёхуд спиртли ичимликларни ёки гиёҳвандлик ва психотроп моддаларни истеъмол қилиши оқибатида ўз оиласини оғир моддий аҳволга солиб қўяди деб ҳисоблаш учун асоси бўлса (шубҳа туғилса), аммо шу фуқаронинг муомалага лаёқатсиз ёки муомала лаёқати чекланганлиги тўғрисида маълумотлар бўлмаса, у нотариал ҳаракатни амалга оширишни кечиктиради ва суднинг шу шахсни муомалага лаёқатсиз ёки муомала лаёқати чекланган деб топганлиги тўғрисидаги қарори мавжуд ёки мавжуд эмаслигини Тизим орқали текширади.
Нотариус нотариал ҳаракат тараф(лар)ининг босим ёки кучли руҳий ҳаяжонланиш остида деб ҳисоблаш учун асоси бўлса (шубҳа туғдирса), нотариал ҳаракатни амалга оширишни кечиктиради ва зарур ҳолларда ҳуқуқни муҳофаза қилувчи органларга хабар беради.
Агар мазкур шахс(лар) суд томонидан муомалага лаёқатсиз деб топилган бўлса, нотариус нотариал ҳаракатни амалга оширишни рад этиш ҳақида қарор чиқаради. Нотариус ушбу қарордан норози томон(лар)нинг судга мурожаат қилиш ҳуқуқини тушунтириши лозим.
Агар мазкур шахс(лар) суд томонидан муомала лаёқати чекланган деб топилган бўлса, нотариус нотариал ҳаракатни амалга оширишда муомала лаёқати чекланган шахс(лар) ҳомий(лари)ининг ёзма розилигини талаб этади. Бунда ҳомийнинг розилиги нотариал ҳаракатни тўғридан-тўғри имзолаш ёки алоҳида ариза тақдим этиш кўринишида бўлиши мумкин.
21. Нотариал ҳаракатнинг мазмуни Тизимга аниқ ва тўлиқ киритилиши лозим.
Нотариус, нотариус ёрдамчиси, стажёри ёки котиби томонидан нотариал ҳаракат Тизимга киритилади ҳамда ҳар бир нотариал ҳаракат тегишли тартиб рақами билан рўйхатга олинади ва нотариал ҳаракатни тасдиқловчи ёзувда кўрсатилади.
22. Нотариал ҳаракатни расмийлаштиришда нотариус, нотариус ёрдамчиси, стажёри ёки котиби томонидан Тизимга жисмоний шахснинг шахсий идентификация рақами киритилиши шарт.
23. Нотариус билан шахсий мулоқот давомида нотариал ҳаракат тараф(лар)и жойлашган жойда улардан бошқа шахсларнинг бўлмаслиги, улар жойлашган жой, шовқиндан ҳоли, ёруғ бўлиши ва видеотасвир тиниқ кўриниши шарт.
Нотариус шахсий мулоқот давомида нотариал ҳаракат тараф(лар)и жойлашган жойда бошқа шахсларнинг йўқлигига ишонч ҳосил қилиш учун жойнинг 360 градус айланасини кўрсатишни талаб қилиши лозим.
4-боб. Нотариал ҳаракатни имзолаш тартиби
24. Нотариал ҳаракат лойиҳаси имзолаш учун тайёр бўлганидан сўнг, нотариус томонидан нотариал ҳаракат тараф(лар)ига у(лар)нинг ҳуқуқ ва мажбуриятлари, амалга оширилаётган нотариал ҳаракатнинг мазмуни ва оқибатлари тушунтирилади.
25. Нотариус тегишли тасдиқловчи ёзувни киритиб, Тизимда қайд қилинган тартиб рақами ва ундирилган тўловлар (давлат божи, герб йиғими ҳамда ҳуқуқий ва техник тусдаги қўшимча ҳаракатлар амалга оширилганлиги учун ҳақ) миқдорини кўрсатади ҳамда ҳужжат лойиҳасини Тизимда сақлайди.
26. Видеоконференцалоқа режимида амалга оширилган нотариал ҳаракатлар бўйича видеоёзувлар автоматик равишда ёзиб олинади ва Тизимда қонунчиликда белгиланган муддатлар мобайнида сақланади, шунингдек Тизим орқали нотариус томонидан тасдиқланади.
27. Видеоконференцалоқа режимида амалга оширилган нотариал ҳаракатлар бўйича видеоёзувлар нотариал ҳаракат тараф(лар)и томонидан нотариал ҳаракат тасдиқланганлигининг (имзоланганлигининг) асоси ҳисобланади.
28. Нотариус томонидан нотариал ҳаракат тараф(лар)ига нотариал ҳаракат билан тасдиқланган (шаҳодатланган) ҳужжат(лар)нинг асл нусха(лар)и шахсан топширилади ёки курерлик хизматидан фойдаланган ҳолда ёхуд бошқа усуллар орқали етказилади.
5-боб. Якуний қоида
29. Мазкур Низом талабларининг бузилишида айбдор бўлган шахслар қонунчилик ҳужжатларида белгиланган тартибда жавобгар бўлади.
Вазир А. ТАШКУЛОВ
Нотариал палата раиси Д. АШУРОВ
Тошкент ш.,
2025 йил 30 декабрь,
2025 йил 12 декабрь
29-мҳ-сон
OʻZBEKISTON RESPUBLIKASI ADLIYA VAZIRINING
BUYRUGʻI
NIZOM
Notarial harakatlarni videokonferensaloqa rejimi orqali amalga oshirish tartibi toʻgʻrisidagi nizomni tasdiqlash haqida
Oʻzbekiston Respublikasining “Notariat toʻgʻrisida”gi Qonuni , Oʻzbekiston Respublikasi Prezidentining 2018-yil 13-apreldagi PQ-3666-son “ Oʻzbekiston Respublikasi Adliya vazirligi faoliyatini yanada takomillashtirishga doir tashkiliy chora-tadbirlar toʻgʻrisida ”gi hamda 2025-yil 9-sentabrdagi PQ-280-son “ Notariat institutini yanada rivojlantirish hamda sohaga zamonaviy axborot-kommunikatsiya texnologiyalarini keng joriy etishga oid qoʻshimcha chora-tadbirlar toʻgʻrisida ”gi qarorlariga muvofiq buyuraman:
1. Notarial harakatlarni videokonferensaloqa rejimi orqali amalga oshirish tartibi toʻgʻrisidagi nizom ilovaga muvofiq tasdiqlansin.
2. Mazkur buyruq Oʻzbekiston Respublikasi Notarial palatasi bilan kelishilgan.
3. Ushbu buyruq rasmiy eʼlon qilingan kundan eʼtiboran kuchga kiradi.
Kelishildi:
Oʻzbekiston Respublikasi adliya vazirining 2025-yil 30-dekabrdagi 29-mh-son buyrugʻiga ILOVA
Notarial harakatlarni videokonferensaloqa rejimi orqali amalga oshirish tartibi toʻgʻrisidagi
Mazkur Nizom notariuslar tomonidan jismoniy shaxs yoki yuridik shaxsning vakili (bundan buyon matnda murojaat qiluvchi deb yuritiladi) notarial idoraga kelmagan holda masofadan videokonferensaloqa rejimi (bundan buyon matnda videokonferensaloqa rejimi deb yuritiladi) orqali notarial harakatlarni amalga oshirish tartibini belgilaydi.
1-bob. Umumiy qoidalar
1. Ushbu Nizom talablari notarial harakatlarni amalga oshirish jarayonida notarius, notarius yordamchisi, stajyori, kotibi hamda notarial harakat taraflariga nisbatan tatbiq etiladi.
Oʻzbekiston Respublikasining “Notariat toʻgʻrisida”gi Qonunida nazarda tutilgan notarial harakatlar videokonferensaloqa rejimida orqali koʻrsatilishi mumkin.
2. Notarius, notarius yordamchisi, stajyori hamda kotibi oʻz faoliyatini amalga oshirishi natijasida oʻzlariga maʼlum boʻlgan notarial harakat taraf(lar)i haqidagi maʼlumotlarning maxfiyligini taʼminlashi kerak .
3. Oʻzbekiston Respublikasi Adliya vazirligi, Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari hamda Oʻzbekiston Respublikasi Notarial palatasi va uning hududiy boshqarmalari ushbu Nizom talablari ijrosi boʻyicha notarial faoliyat ustidan doimiy nazorat va monitoringni amalga oshiradilar .
2-bob. Notarial harakatlarni videokonferensaloqa rejimida amalga oshirishni tashkil etish
4. Notarial harakatlar videokonferensaloqa rejimida “E-notarius.uz” axborot portali (bundan buyon matnda elektron tarmoq deb yuritiladi) hamda “Notarius” avtomatlashtirilgan axborot tizimi (bundan buyon matnda Tizim deb yuritiladi) orqali tasdiqlanadi.
5. Murojaat qiluvchi notarial harakatlarni videokonferensaloqa rejimida amalga oshirish uchun elektron tarmoqda shaxsini tasdiqlagan holda roʻyxatdan oʻtadi.
6. Murojaat qiluvchi notarial harakatlarni videokonferensaloqa rejimida amalga oshirish uchun elektron tarmoqdan foydalanish shartlari bilan tanishadi va roziligini tasdiqlaydi.
7. Murojaat qiluvchi elektron tarmoqda tasdiqlashni (shahodatlashni) soʻrayotgan notarial harakatning nomini aniq koʻrsatadi hamda ushbu harakatni amalga oshirish uchun zarur boʻlgan maʼlumotlarni toʻldiradi.
8. Notarial harakatni amalga oshirish toʻgʻrisidagi murojaat (bundan buyon matnda murojaat deb yuritiladi) elektron tarmoq orqali murojaat qiluvchi tomonidan yoki avtomatik tarzda tanlangan notariusning Tizimdagi profiliga yuboriladi.
Notarius murojaat kelib tushgan kundan boshlab bir ish kuni ichida murojaatni oʻrganib chiqadi hamda murojaatda kamchiliklar mavjud yoki mavjud emasligi toʻgʻrisida murojaat qiluvchiga elektron tarmoq orqali xabarnoma yuboradi. Bunda murojaatda koʻrsatilgan murojaat qiluvchining telefon raqamiga ham xabarnoma yuborilishi mumkin.
Murojaatda kamchiliklar aniqlangan hollarda notarius elektron tarmoq orqali yuborilgan xabarnomada ushbu kamchiliklarni aniq koʻrsatishi lozim.
Murojaat qiluvchi kamchiliklarni unga maʼlum qilingan paytdan boshlab besh ish kuni ichida bartaraf etgan taqdirda notarial harakat davom ettiriladi. Kamchiliklar besh ish kuni ichida bartaraf etilmagan taqdirda, murojaat Oʻzbekiston Respublikasining “Notariat toʻgʻrisida”gi Qonuniga asosan rad etiladi.
Notarius tomonidan hujjatlarni oʻrganib chiqishda kamchiliklar aniqlanmaganligi toʻgʻrisidagi xabarnoma yuborilgan yoki aniqlangan kamchiliklar bartaraf etilgan paytdan boshlab besh ish kuni ichida murojaat qiluvchi elektron tarmoq orqali notarial harakatni davom ettirishni tasdiqlaydi.
9. Murojaat qiluvchi tomonidan notarial harakatni davom ettirish tasdiqlangan kundan boshlab bir ish kuni ichida amalga oshiriladigan notarial harakat toʻgʻrisidagi maʼlumotlar notarius, notarius yordamchisi, stajyori yoki kotibi tomonidan Tizimga toʻliq kiritiladi.
Notarial harakat uchun undiriladigan toʻlovlar miqdori Tizim tomonidan avtomatik ravishda hisoblanadi hamda elektron tarmoq orqali toʻlov kvitansiyalari(invoys) murojaat qiluvchiga yuboriladi. Bunda murojaatda koʻrsatilgan murojaat qiluvchining telefon raqamiga ham toʻlov kvitansiyalari (invoys) yuborilishi mumkin.
10. Toʻlov kvitansiyalari (invoys) murojaat qiluvchiga yuborilgan kunning oʻzida notarius Tizim orqali notarial harakatni amalga oshirish vaqtini belgilaydi hamda notarial harakatni amalga oshirish vaqti toʻgʻrisida murojaat qiluvchiga elektron tarmoq orqali xabarnoma yuboriladi. Bunda murojaatda koʻrsatilgan murojaat qiluvchining telefon raqamiga ham xabarnoma yuborilishi mumkin.
Notarial harakatni amalga oshirish vaqti toʻlov kvitansiyalari (invoys) murojaat qiluvchiga yuborilgandan boshlab uch ish kunidan koʻp boʻlmagan muddat ichida belgilanadi.
11. Notarius tomonidan belgilangan notarial harakatni amalga oshirish vaqti murojaat qiluvchiga maʼqul boʻlmagan taqdirda, murojaat qiluvchi elektron tarmoq orqali notariusdan ikki ish kunidan koʻp boʻlmagan muddat ichidagi oʻziga qulay boʻlgan boshqa vaqtni belgilashni soʻrashi mumkin. Bunda notarius murojaat qiluvchi bilan kelishgan holda maqbul vaqtni belgilaydi.
12. Murojaat qiluvchi notarial harakat amalga oshirilishi belgilangan vaqtga qadar toʻlov kvitansiyalarida (invoysda) koʻrsatilgan toʻlovlarni amalga oshirishi shart.
13. Notarial harakat amalga oshirilishi belgilangan vaqtda notarius Tizim orqali hamda notarial harakat taraflari elektron tarmoq orqali videokonferensaloqa rejimida bogʻlanishlari lozim.
14. Notarius yoki notarial harakat taraf(lar)i notarial harakat amalga oshirilishi belgilangan vaqtda uzrli sabablarga koʻra videokonferensaloqa rejimida bogʻlana olmasligi maʼlum boʻlgan hollarda u(lar) boshqa notarial harakat taraf(lar)ini (notariusni) bu toʻgʻrisida xabardor qilishi shart.
Bunda notarial harakat oʻzaro kelishilgan holda notarial harakat amalga oshirilishi belgilangan kundan boshlab uch ish kunidan koʻp boʻlmagan boshqa vaqtda amalga oshirilishi mumkin.
15. Notarial harakat amalga oshirilishi belgilangan vaqtda notarial harakat taraf(lar)i videokonferensaloqa rejimida bogʻlanmagan hollarda notarial harakatni amalga oshirish vaqti bir ish kuniga uzaytiriladi hamda bu toʻgʻrisida elektron tarmoq orqali murojaat qiluvchiga xabarnoma yuboriladi. Bunda murojaatda koʻrsatilgan murojaat qiluvchining telefon raqamiga ham xabarnoma yuborilishi mumkin.
16. Notarial harakat taraf(lar)i uzrli sabablarga koʻra bogʻlana olmasligini maʼlum qilmagan yoki notarial harakatni amalga oshirish uchun uzaytirilgan vaqtda videokonferensaloqa rejimida bogʻlanmagan hollarda murojaat rad etiladi hamda notarial harakatni tasdiqlash uchun toʻlangan toʻlovlar qaytariladi.
17. Notarial harakat taraf(lar)i notarial xizmatdan foydalanishdan uni koʻrsatishning har qanday bosqichida bosh tortish huquqiga ega.
Notarial harakat taraf(lar) notarial xizmatdan foydalanishdan bosh tortgan taqdirda, murojaat koʻrmasdan qoldiriladi hamda notarial harakatni tasdiqlash uchun toʻlangan toʻlovlar qaytariladi.
3-bob. Notarial harakat taraflarining shaxsini, muomala va huquq layoqatini aniqlash hamda Tizimga maʼlumotlarni kiritish
18. Notarial harakat taraf(lar)ining shaxsi u(lar)ning shaxsini tasdiqlovchi hujjatlarni taqdim etmagan holda ushbu hujjatlarning rekvizitlari orqali zamonaviy axborot texnologiyalaridan foydalangan holda identifikatsiya hamda biometrik maʼlumotlar (Face-ID) orqali verifikatsiya qilinadi, shuningdek qonunchilik hujjatlarida belgilangan boshqa usullar bilan aniqlanishi mumkin.
Murojaat qiluvchining huquq layoqatini aniqlashda notarius tegishli axborot resurslaridan foydalanadi.
Notarius videokonferensaloqa rejimida muloqot qilayotgan shaxs(lar) aynan shu ekanligini Tizim yordamida (Face-ID orqali solishtirish usuli) aniqlaydi.
19. Notarius notarial harakat taraf(lar)ining muomala layoqatini videokonferensaloqa rejimida u(lar) bilan shaxsiy muloqot davomida aniqlaydi.
20. Notarial harakat taraf(lar)ining ruhiy holati buzilganligi yoki aqli zaifligi oqibatida oʻz xatti-harakatlarining ahamiyatini tushuna olmaydi yoki shu harakatlarni boshqara olmaydi deb yoxud spirtli ichimliklarni yoki giyohvandlik va psixotrop moddalarni isteʼmol qilishi oqibatida oʻz oilasini ogʻir moddiy ahvolga solib qoʻyadi deb hisoblash uchun asosi boʻlsa (shubha tugʻilsa), ammo shu fuqaroning muomalaga layoqatsiz yoki muomala layoqati cheklanganligi toʻgʻrisida maʼlumotlar boʻlmasa, u notarial harakatni amalga oshirishni kechiktiradi va sudning shu shaxsni muomalaga layoqatsiz yoki muomala layoqati cheklangan deb topganligi toʻgʻrisidagi qarori mavjud yoki mavjud emasligini Tizim orqali tekshiradi.
Notarius notarial harakat taraf(lar)ining bosim yoki kuchli ruhiy hayajonlanish ostida deb hisoblash uchun asosi boʻlsa (shubha tugʻdirsa), notarial harakatni amalga oshirishni kechiktiradi va zarur hollarda huquqni muhofaza qiluvchi organlarga xabar beradi.
Agar mazkur shaxs(lar) sud tomonidan muomalaga layoqatsiz deb topilgan boʻlsa, notarius notarial harakatni amalga oshirishni rad etish haqida qaror chiqaradi. Notarius ushbu qarordan norozi tomon(lar)ning sudga murojaat qilish huquqini tushuntirishi lozim.
Agar mazkur shaxs(lar) sud tomonidan muomala layoqati cheklangan deb topilgan boʻlsa, notarius notarial harakatni amalga oshirishda muomala layoqati cheklangan shaxs(lar) homiy(lari)ining yozma roziligini talab etadi. Bunda homiyning roziligi notarial harakatni toʻgʻridan-toʻgʻri imzolash yoki alohida ariza taqdim etish koʻrinishida boʻlishi mumkin.
21. Notarial harakatning mazmuni Tizimga aniq va toʻliq kiritilishi lozim.
Notarius, notarius yordamchisi, stajyori yoki kotibi tomonidan notarial harakat Tizimga kiritiladi hamda har bir notarial harakat tegishli tartib raqami bilan roʻyxatga olinadi va notarial harakatni tasdiqlovchi yozuvda koʻrsatiladi.
22. Notarial harakatni rasmiylashtirishda notarius, notarius yordamchisi, stajyori yoki kotibi tomonidan Tizimga jismoniy shaxsning shaxsiy identifikatsiya raqami kiritilishi shart.
23. Notarius bilan shaxsiy muloqot davomida notarial harakat taraf(lar)i joylashgan joyda ulardan boshqa shaxslarning boʻlmasligi, ular joylashgan joy, shovqindan holi, yorugʻ boʻlishi va videotasvir tiniq koʻrinishi shart.
Notarius shaxsiy muloqot davomida notarial harakat taraf(lar)i joylashgan joyda boshqa shaxslarning yoʻqligiga ishonch hosil qilish uchun joyning 360 gradus aylanasini koʻrsatishni talab qilishi lozim.
4-bob. Notarial harakatni imzolash tartibi
24. Notarial harakat loyihasi imzolash uchun tayyor boʻlganidan soʻng, notarius tomonidan notarial harakat taraf(lar)iga u(lar)ning huquq va majburiyatlari, amalga oshirilayotgan notarial harakatning mazmuni va oqibatlari tushuntiriladi.
25. Notarius tegishli tasdiqlovchi yozuvni kiritib, Tizimda qayd qilingan tartib raqami va undirilgan toʻlovlar (davlat boji, gerb yigʻimi hamda huquqiy va texnik tusdagi qoʻshimcha harakatlar amalga oshirilganligi uchun haq) miqdorini koʻrsatadi hamda hujjat loyihasini Tizimda saqlaydi.
26. Videokonferensaloqa rejimida amalga oshirilgan notarial harakatlar boʻyicha videoyozuvlar avtomatik ravishda yozib olinadi va Tizimda qonunchilikda belgilangan muddatlar mobaynida saqlanadi, shuningdek Tizim orqali notarius tomonidan tasdiqlanadi.
27. Videokonferensaloqa rejimida amalga oshirilgan notarial harakatlar boʻyicha videoyozuvlar notarial harakat taraf(lar)i tomonidan notarial harakat tasdiqlanganligining (imzolanganligining) asosi hisoblanadi.
28. Notarius tomonidan notarial harakat taraf(lar)iga notarial harakat bilan tasdiqlangan (shahodatlangan) hujjat(lar)ning asl nusxa(lar)i shaxsan topshiriladi yoki kurerlik xizmatidan foydalangan holda yoxud boshqa usullar orqali yetkaziladi.
5-bob. Yakuniy qoida
29. Mazkur Nizom talablarining buzilishida aybdor boʻlgan shaxslar qonunchilik hujjatlarida belgilangan tartibda javobgar boʻladi.
Vazir A. TASHKULOV
Notarial palata raisi D. ASHUROV
Toshkent sh.,
2025-yil 30-dekabr,
2025-yil 12-dekabr
29-mh-son