UzbekAI

ЎЗБЕКИСТОН РЕСПУБЛИКАСИ СОҒЛИҚНИ САҚЛАШ ВАЗИРИНИНГ

БУЙРУҒИ

НИЗОМ

Ўзбекистон Республикасида вақтинчалик танқислиги юзага келган дори воситалари ва тиббий жиҳозларни давлат рўйхатидан ўтказмасдан мажбурий сертификатлаштириш шарти билан тиббиёт амалиётида қўллаш ва олиб киришга рухсат бериш тартиби тўғрисидаги низомни тасдиқлаш ҳақида

Ўзбекистон Республикаси Президентининг 2025 йил 19 августдаги ПФ-137-сон «Дори воситалари ва тиббий жиҳозлар муомаласини тартибга солишга доир қўшимча чора-тадбирлар тўғрисида»ги Фармонига мувофиқ буюраман:

1. Ўзбекистон Республикасида вақтинчалик танқислиги юзага келган дори воситалари ва тиббий жиҳозларни давлат рўйхатидан ўтказмасдан мажбурий сертификатлаштириш шарти билан тиббиёт амалиётида қўллаш ва олиб киришга рухсат бериш тартиби тўғрисидаги низом иловага мувофиқ тасдиқлансин.

2. Мазкур буйруқ Ўзбекистон Республикаси Иқтисодиёт ва молия вазирлиги ҳузуридаги Божхона қўмитаси, Ўзбекистон Республикаси Президенти ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил, Ўзбекистон Республикаси Савдо саноат палатаси билан келишилган.

3. Мазкур буйруқ расмий эълон қилинган кундан эътиборан кучга киради.

Келишилди:

Ўзбекистон Республикаси соғлиқни сақлаш вазирининг 2026 йил 5 январдаги 24-сон буйруғига ИЛОВА

Мазкур Низом Ўзбекистон Республикасида вақтинчалик танқислиги юзага келган дори воситалари ва тиббий жиҳозларни давлат рўйхатидан ўтказмасдан мажбурий сертификатлаштириш шарти билан тиббиёт амалиётида қўллаш ва олиб киришга рухсат бериш тартибини белгилайди .

1-боб. Умумий қоидалар

1. Ушбу Низомда қуйидаги тушунчалар қўлланилади:

вақтинчалик танқислик — дори воситалари ва тиббий жиҳозларнинг республика аҳолиси ва давлат соғлиқни сақлаш тизимидаги тиббиёт муассасаларининг (бундан буён матнда тиббиёт муассасалари деб юритилади) эҳтиёжини қондириш учун етарли миқдорда мавжуд эмаслиги ёки чекланган миқдорда мавжуд бўлиш ҳолати;

дори воситалари — касалликлар профилактикаси, уларга ташхис қўйиш ва уларни даволаш, шунингдек одам организмининг ҳолати ва функцияларини ўзгартириш учун тиббиёт амалиётида қўлланилишига рухсат этилган дори моддалари (субстанциялар) ва ёрдамчи моддалар асосида олинган воситалар, дори моддалари (субстанциялар), дори препаратлари;

тиббий жиҳозлар — касалликлар профилактикаси, ташхис қўйиш, даволаш, беморларни реабилитация қилиш ва (ёки) санаб ўтилган жараёнларни таъминлаш учун, шунингдек одам организмининг ҳолати ва функцияларини аниқлаш, тиклаш, алмаштириш ҳамда ўзгартириш, мониторинг қилиш, ҳомиладорликнинг олдини олиш учун тиббиёт амалиётида қўлланилишига рухсат этилган, қўлланилиши натижасида одам организмига фармакологик, иммунологик ёки метаболик таъсир кўрсатмайдиган, айрим ҳолда, мажмуа ёки тизимлар сифатида қўлланиладиган жиҳозлар, аппаратлар, ускуналар, приборлар, асбоблар, қурилмалар, мажмуалар ва дастурий таъминотлар;

импорт қилувчи ташкилот — Ўзбекистон Республикаси ҳудудига дори воситалари ва тиббий жиҳозларни олиб киришни (импортни) амалга оширувчи, дори воситаларини улгуржи реализация қилиш учун лицензияга эга юридик шахс.

2. Ўзбекистон Республикасида вақтинчалик танқислик юзага келган тақдирда дори воситалари ва тиббий жиҳозлар билан таъминлаш қуйидаги йўллар орқали амалга оширилади:

тиббиёт муассасаларидаги мавжуд дори воситалари ва тиббий жиҳозлар захираларини қайта тақсимлаш ;

давлат рўйхатидан ўтказмасдан, мажбурий сертификатлаштириш шарти билан дори воситалари ва тиббий жиҳозларни Ўзбекистон Республикаси ҳудудига олиб кириш (импорт қилиш) ва тиббиёт амалиётига тўғридан-тўғри фойдаланиш .

2-боб. Ўзбекистон Республикасида вақтинчалик танқислик юзага келган тақдирда дори воситалари ва тиббий жиҳозлар билан таъминлашни ташкил этиш

3. Ўзбекистон Республикасида вақтинчалик танқислик юзага келган тақдирда дори воситалари ва тиббий жиҳозлар билан таъминлашни ташкил этиш қуйидагилар томонидан тақдим этиладиган мазкур Низомнинг 4-бандида келтирилган маълумотларни таҳлил қилиш асосида аниқланади:

1) республика даражасидаги тиббиёт муассасалари;

2) тиббиётнинг ихтисослаштирилган йўналишларидаги ассоциациялари;

3) улгуржи фармацевтика ташкилотлари;

4) Ўзбекистон Республикаси Соғлиқни сақлаш вазирлиги (бундан буён матнда Вазирлик деб юритилади) ҳузуридаги Фармацевтика тармоғини ривожлантириш агентлиги;

5) Вазирликнинг тегишли таркибий бўлинмалари («Электрон соғлиқни сақлаш» ахборот тизими орқали дори воситалари ва тиббий жиҳозларнинг танқислиги аниқланганда).

4. Республика даражасидаги тиббиёт муассасалари, тиббиётнинг ихтисослаштирилган йўналишларидаги ассоциациялари, улгуржи фармацевтика ташкилотлари, Вазирлик ҳузуридаги Фармацевтика тармоғини ривожлантириш агентлиги ҳамда Вазирликнинг тегишли таркибий бўлинмалари қуйидагилар тўғрисидаги маълумотларни Ўзбекистон Республикаси соғлиқни сақлаш вазири томонидан тасдиқланган Вақтинчалик танқислиги юзага келган ҳолатларда дори воситалари ва тиббий жиҳозлар билан таъминлаш бўйича доимий ишчи гуруҳга (бундан буён матнда Ишчи гуруҳ деб юритилади) тақдим этади:

дори воситаси ва тиббий жиҳознинг клиник аҳамияти, шу жумладан қамраб олинадиган аҳоли сони, далилларга асосланган тиббиётда самарадорлиги;

дори воситаси ва тиббий жиҳознинг терапия тузилишидаги хавфлар, шу жумладан танқисликнинг келиб чиқишига сабаб бўлган омиллар ҳамда тиббиёт муассасаларида мавжуд қолдиқлари;

дори воситаси ва тиббий жиҳознинг Ўзбекистон Республикаси ҳудудига олиб кирилиши (импорт қилиниши) ёки ишлаб чиқарилиши тўхтатилиши режалаштирганлиги;

вақтинчалик танқисликни бартараф этиш учун зарур бўлган дори воситаси ва тиббий жиҳознинг 3 ойлик минимал миқдори (сони).

Бунда дори воситаларининг халқаро патентланмаган номи, доза ва шакллари, тиббий жиҳозларнинг техник талаблари кўрсатилади.

5. Мазкур Низомнинг 4-бандидаги маълумотлар Ишчи гуруҳ томонидан улар тақдим этилган кундан бошлаб 3 иш куни ичида кўриб чиқилади ва маълумотларни ўрганиш учун Вазирлик ҳузуридаги Фармацевтика тармоғини ривожлантириш агентлиги ҳамда «Фармацевтика маҳсулотлари хавфсизлиги маркази» ва «Харидлар маркази» давлат муассасаларига юборилади.

6. Вазирлик ҳузуридаги Фармацевтика тармоғини ривожлантириш агентлиги 5 иш куни ичида вақтинчалик танқислиги юзага келган дори воситаси ёки тиббий жиҳоз ҳақида қуйидаги маълумотларни ўрганади ва ўрганиш натижаларини Ишчи гуруҳга тақдим этади:

Ўзбекистон фармацевтика бозорида мавжуд ёки мавжуд эмаслиги;

маҳаллий ишлаб чиқарувчилар томонидан ишлаб чиқариш ҳолати ва ишлаб чиқариш режалари;

божхона ҳамда улгуржи ташкилотларнинг омборларида мавжудлиги.

7. Вазирлик ҳузуридаги «Фармацевтика маҳсулотлари хавфсизлиги маркази» давлат муассасаси 5 иш куни ичида вақтинчалик танқислиги юзага келган дори воситаси ёки тиббий жиҳоз ҳақида қуйидаги маълумотларни ўрганади ва ўрганиш натижаларини Ишчи гуруҳга тақдим этади:

давлат рўйхатидан ўтказилганлиги ҳамда ўрнини босувчи дори воситаларининг давлат рўйхатидан ўтказилганлиги ва сертификатлаштирилганлиги;

дозаси, дори шакли ва қўллаш йўли бўйича мослиги тўғрисидаги маълумотлар.

8. Вазирлик ҳузуридаги «Харидлар маркази» давлат муассасаси 5 иш куни ичида вақтинчалик танқислиги юзага келган дори воситаси ёки тиббий жиҳознинг давлат хариди режасига киритилганлиги ва етказиб бериш муддатлари ҳақидаги маълумотларни ўрганади ва ўрганиш натижаларини Ишчи гуруҳга тақдим этади.

9. Ишчи гуруҳ Вазирлик ҳузуридаги Фармацевтика тармоғини ривожлантириш агентлиги ҳамда «Фармацевтика маҳсулотлари хавфсизлиги маркази» ва «Харидлар маркази» давлат муассасалари томонидан тақдим этилган ўрганиш натижалари асосида 5 иш куни ичида Ўзбекистон Республикасида дори воситалари ва тиббий жиҳозларнинг вақтинчалик танқислигини бартараф этиш юзасидан қуйидаги қарорлардан бирини қабул қилади:

Ўзбекистон Республикасида вақтинчалик танқислиги юзага келган дори воситалари ва тиббий жиҳозларни мавжуд тиббиёт муассасалари доирасида қайта тақсимлаш;

Ўзбекистон Республикасида вақтинчалик танқислиги юзага келган дори воситалари ва тиббий жиҳозларни республикада фаолият юритаётган улгуржи фармацевтика ташкилотлари ёки маҳаллий ишлаб чиқарувчилардан харид қилиш мумкинлиги тўғрисида республика даражасидаги тиббиёт муассасалари ҳамда тиббиётнинг ихтисослаштирилган йўналишларидаги ассоциацияларга тавсия бериш;

Ўзбекистон Республикасида вақтинчалик танқислиги юзага келган дори воситалари ва тиббий жиҳозларни давлат рўйхатидан ўтказмасдан мажбурий сертификатлаштириш шарти билан Ўзбекистон Республикаси ҳудудига олиб кириш (импорт қилиш) ва тиббиёт амалиётида қўллаш мумкинлиги ҳамда уларнинг вақтинчалик танқислигини бартараф этиш учун зарур минимал миқдорларини белгилаш;

давлат рўйхатидан ўтказилган, бироқ Ўзбекистон Республикасида тасдиқланган қадоқланишдан фарқ қилувчи қадоқлардаги дори воситаларини мажбурий сертификатлаштириш шарти билан Ўзбекистон Республикаси ҳудудига олиб кириш (импорт қилиш) ва тиббиёт амалиётида қўллаш мумкинлиги ҳамда уларнинг вақтинчалик танқислигини бартараф этиш учун зарур минимал миқдорларини белгилаш.

10. Ишчи гуруҳда кўриб чиқиладиган масалаларнинг хусусиятига кўра манфаатдор вазирлик ва идораларнинг вакиллари, тиббиёт соҳасида фаолият юритувчи муассасаларнинг вакиллари таклиф этилиши мумкин.

11. Ишчи гуруҳни мажлисларини Ишчи гуруҳ раиси, Ишчи гуруҳ раиси бўлмаган тақдирда Ишчи гуруҳ раиси ўринбосари бошқаради.

12. Ишчи гуруҳ мажлиси унда Ишчи гуруҳ аъзоларининг камида учдан икки қисми қатнашганда ўтказилган ҳисобланади.

13. Ишчи гуруҳ қарори унинг мажлисида қатнашган аъзоларнинг кўпчилик овози билан қабул қилинади. Овозлар тенг бўлган тақдирда Ишчи гуруҳ раисининг ёки раислик қилувчининг овози ҳал қилувчи овоз ҳисобланади.

14. Ишчи гуруҳ қарорлари Ишчи гуруҳ мажлиси баёни билан расмийлаштирилади. Ишчи гуруҳ мажлисининг баёни Ишчи гуруҳ раиси ёки раислик қилувчи томонидан тасдиқланади.

15. Ишчи гуруҳнинг тегишли қарори билан Вақтинчалик танқислиги юзага келган давлат рўйхатидан ўтказмасдан мажбурий сертификатлаштириш шарти билан Ўзбекистон Республикаси ҳудудига олиб кириш (импорт қилиш) ва тиббиёт амалиётида қўллаши мумкин бўлган дори воситалари ва тиббий жиҳозларнинг рўйхати Вазирликнинг расмий веб-сайтида қарор қабул қилинган кундан эътиборан 1 иш куни ичида эълон қилинади.

16. Импорт қилувчи ташкилотлар Вазирликнинг расмий веб-сайтида Вақтинчалик танқислиги юзага келган давлат рўйхатидан ўтказмасдан мажбурий сертификатлаштириш шарти билан Ўзбекистон Республикаси ҳудудига олиб кириш (импорт қилиш) ва тиббиёт амалиётида қўллаши мумкин бўлган дори воситалари ва тиббий жиҳозларнинг рўйхати эълон қилинган кундан бошлаб 15 кун ичида Вазирликка вақтинчалик танқислиги юзага келган дори воситалари ва тиббий жиҳозларни Ўзбекистон Республикаси ҳудудига олиб кириш (импорт қилиш) имкониятлари мавжудлиги тўғрисида таклифларни киритади. Бунда ушбу таклифлар қуйидаги маълумотларни ўз ичига олиши керак:

дори воситалари ва тиббий жиҳозларнинг ишлаб чиқарувчи давлатда ёки бошқа давлатда рўйхатдан ўтказилганлик тўғрисидаги гувоҳнома нусхаси;

дори воситалари ва тиббий жиҳозларнинг сифат назоратини амалга ошириш учун корхона фармакопея мақоласи, стандарт, спецификация, Ўзбекистон Республикаси ҳудудига олиб кирилиши (импорт қилиниши) назарда тутилган сериянинг сифат сертификати, қадоқ макетлари, давлат тилидаги дори воситаларининг тиббиётда қўлланилишига доир йўриқномаси (давлат тили билан бирга бошқа тилда ҳам берилиши мумкин);

дори воситалари ва тиббий жиҳозларнинг нархи ва етказиб бериш муддатлари;

дори воситаларини мажбурий рақамли маркировкалашни амалга ошириш бўйича мажбурият;

хориждаги дори воситалари ва тиббий жиҳозларнинг ишлаб чиқарувчи ёки бошқа ташкилотлардаги мавжуд захира тасдиғи;

транспорт-логистика режаси ва кафолат хати.

Агарда импорт қилувчи ташкилотлар томонидан 15 кун ичида Ишчи гуруҳга таклиф келиб тушмаса, таклифларни қабул қилиш муддатлари қўшимча 15 кунга узайтирилиши мумкин.

17. Ишчи гуруҳ мазкур Низомнинг 16-бандида кўрсатилган муддат тугаганидан сўнг 3 иш куни ичида импорт қилувчи ташкилотларнинг таклифларини мазкур Низомнинг 3-бобида келтирилган устуворлик тартиби асосида ўрганиб чиқади ва импорт қилувчи ташкилотга ёки импорт қилувчи ташкилотларга дори воситалари ва тиббий жиҳозларнинг Ўзбекистон Республикаси ҳудудига олиб кирилиши (импорт қилиниши) мумкинлиги тўғрисида хулосани расмийлаштиради.

Бунда Ишчи гуруҳ хулосаси унинг мажлисида қатнашган аъзоларнинг кўпчилик овози билан қабул қилинади ҳамда қабул қилинган хулоса Ишчи гуруҳ мажлиси баёни билан расмийлаштирилади. Ишчи гуруҳ мажлисининг баёни Ишчи гуруҳ раиси ёки раислик қилувчи томонидан тасдиқланади.

18. Импорт қилувчи ташкилот ёки импорт қилувчи ташкилотлар хулосани олган кундан эътиборан дори воситалари ҳамда тиббий жиҳозларни хулосада белгиланган муддатларда етказиш чораларини кўради ҳамда мувофиқлик сертификатини расмийлаштириш учун Фармацевтика маҳсулотларини сертификатлаштириш қоидаларига (рўйхат рақами 3386, 2022 йил 12 сентябрь) мувофиқ сертификатлаштириш органларига мурожаат қилади, мажбурий сертификатлаштирилмайдиган тиббий жиҳозлар бундан мустасно.

Бунда сертификатлаштириш органига импорт қилувчи ташкилот томонидан сифат назоратини амалга ошириш учун тақдим қилган ҳужжатларга мувофиқ сифат назоратини амалга ошириш ҳамда референт нархдан қатъи назар сертификатлаштиришга рухсат этилади.

Вақтинчалик танқислиги юзага келган дори воситалари Ўзбекистон Республикаси ҳудудига олиб кирилишида (импорт қилинишида) ёки маҳаллий ишлаб чиқарувчилар томонидан ишлаб чиқарилишида Ўзбекистон Республикаси Вазирлар Маҳкамасининг 2022 йил 2 апрелдаги 149-сон «Дори воситалари ва тиббий буюмларни мажбурий рақамли маркировкалаш тизимини жорий этиш тўғрисида»ги қарорига мувофиқ улар рақамли маркировкаланиши лозим.

19. Тегишли сертификатлаштириш органи томонидан расмийлаштирилган мувофиқлик сертификати ва бошқа қонунчиликда тақдим этилиши белгиланган ҳужжатлар импорт қилувчи томонидан эркин муомалага чиқариш (импорт) божхона режимига расмийлаштириш учун тегишли божхона органига тақдим этилади.

20. Божхона органлари томонидан дори воситалари ҳамда тиббий жиҳозларнинг эркин муомалага чиқариш (импорт) божхона режимига расмийлаштириш тақдим этилган ҳужжатлар қонунчиликда белгиланган муддатларда ўрганиб чиқилиб, белгиланган тартибда эркин муомалага чиқариш (импорт) божхона режимига жойлаштирилади.

21. Вақтинчалик танқисликни бартараф этиш учун Ўзбекистон Республикаси ҳудудига олиб кирилган (импорт қилинган) дори воситалари ҳамда тиббий жиҳозлар тўғрисидаги маълумотлар Вазирликнинг расмий веб-сайтида доимий жойлаштириб борилади.

22. Ўзбекистон Республикасида Вақтинчалик танқисликни бартараф этиш мақсадида дори воситалари ва тиббий жиҳозларни белгиланган минимал миқдордан икки баробаргача миқдорларда Ўзбекистон Республикаси ҳудудига олиб киришга (импорт қилишга) рухсат этилади.

Бунда Ўзбекистон Республикаси ҳудудига олиб кирилган (импорт қилинган) рецепт билан бериладиган дори воситаларини улгуржи ва чакана сотишда уларни етказиб беришда иштирок этувчи воситачилар сонидан қатъи назар, улгуржи савдо учун сотиб олинган (базавий) қийматидан 15 фоиздан ва чакана савдо учун сотиб олинган қийматидан 20 фоиздан ортиқ бўлмаган миқдорларда устама қўлланади.

23. Тиббиёт муассасалари импорт қилувчи ташкилот томонидан Ўзбекистон Республикаси ҳудудига олиб кирилган (импорт қилинган) дори воситаси ва тиббий жиҳозларни сотиб олиш мажбуриятини ўз зиммасига олмайди. Бунда тиббиёт муассасалари фақатгина ўз молиявий имкониятларидан келиб чиққан ҳолда сотиб олиши мумкин.

3-боб. Устуворлик тартиби

24. Ўзбекистон Республикасида вақтинчалик танқислиги юзага келган дори воситаси ва тиббий жиҳозларни Ўзбекистон Республикаси ҳудудига олиб киришда (импорт қилишда) қуйидаги устувор йўналишларга эътибор қаратилади:

ижтимоий аҳамиятга эга касалликларнинг олдини олиш, ташхислаш ва уларни даволаш бўйича тиббий хизматлар;

шошилинч тиббий ёрдам ва интенсив терапия (жонлантириш) хизматлари;

юқумли касалликларни аниқлаш, даволаш ва эпидемиологик хавфларни бартараф этиш бўйича тиббий хизматлар;

она ва бола саломатлиги, перинатал ёрдам ҳамда акушерлик-гинекология хизматлари;

онкология касалликларини ташхислаш ва даволаш бўйича тиббий хизматлар;

юрак-қон томир ва мия қон айланиши билан боғлиқ ўта хавфли ҳолатларда диагностика ва даволаш бўйича тиббий хизматлар;

ҳаёт учун муҳим узлуксиз терапия талаб этиладиган сурункали касалликлар бўйича тиббий хизматлар;

буйрак етишмовчилигида ҳаётни сақлаб турувчи терапия хизматлари;

жарроҳлик аралашувлари, оғриқсизлантириш ва операциядан кейинги интенсив кузатув билан боғлиқ тиббий хизматлар;

қон ва қон компонентлари билан боғлиқ трансфузион терапия ва унга доир тиббий хизматлар;

кам учрайдиган (орфан) ва бошқа юқори хавфли ҳолатларда даволашни узлуксиз таъминлаш талаб этиладиган тиббий хизматлар.

25. Бир хил турдаги дори воситаси ва тиббий жиҳоз бўйича икки ёки ундан ортиқ импорт қилувчи ташкилотлардан таклифлар келиб тушган тақдирда Ишчи гуруҳ биринчи навбатда дори воситаси ва тиббий жиҳозни энг қисқа муддатларда етказиб бериш имкониятига эга импорт қилувчи ташкилотга ёки импорт қилувчи ташкилотларга устуворлик беради.

Агарда устуворлик асосида Ишчи гуруҳнинг дори воситалари ва тиббий жиҳозларни Ўзбекистон Республикаси ҳудудига олиб кириши (импорт қилиши) мумкинлиги тўғрисида хулосасини олган импорт қилувчи ташкилот ёки импорт қилувчи ташкилотлар дори воситалари ва тиббий жиҳозларни етказиб бериш муддатларини бузган тақдирда уларга берилган хулоса Ишчи гуруҳ томонидан бекор қилинади ва мазкур Низомнинг 2-бобида келтирилган тартибда бошқа импорт қилувчи ташкилотларнинг таклифлари қабул қилиниб улар кўриб чиқилади.

4-боб. Якуний қоида

26. Ушбу Низом талабларининг бузилишида айбдор бўлган шахслар қонунчилик ҳужжатларига мувофиқ жавобгар бўладилар.

Вазир А. ХУДАЯРОВ

Иқтисодиёт ва молия вазирлиги ҳузуридаги Божхона қўмита раиси А. МАВЛОНОВ

Президенти ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил ўринбосари Ж. УРУНОВ

Савдо саноат палата раи си Д. ВАХАБОВ

Тошкент ш.,

2026 йил 5 январь,

2025 йил 20 декабрь

2025 йил 16 декабрь

2025 йил 10 декабрь

24-сон

(Қонунчилик маълумотлари миллий базаси, 12.01.2026 й., 10/26/3749/0032-сон)

lex.uz

OʻZBEKISTON RESPUBLIKASI SOGʻLIQNI SAQLASH VAZIRINING

BUYRUGʻI

NIZOM

Oʻzbekiston Respublikasida vaqtinchalik tanqisligi yuzaga kelgan dori vositalari va tibbiy jihozlarni davlat roʻyxatidan oʻtkazmasdan majburiy sertifikatlashtirish sharti bilan tibbiyot amaliyotida qoʻllash va olib kirishga ruxsat berish tartibi toʻgʻrisidagi nizomni tasdiqlash haqida

Oʻzbekiston Respublikasi Prezidentining 2025-yil 19-avgustdagi PF-137-son “Dori vositalari va tibbiy jihozlar muomalasini tartibga solishga doir qoʻshimcha chora-tadbirlar toʻgʻrisida”gi Farmoniga muvofiq buyuraman:

1. Oʻzbekiston Respublikasida vaqtinchalik tanqisligi yuzaga kelgan dori vositalari va tibbiy jihozlarni davlat roʻyxatidan oʻtkazmasdan majburiy sertifikatlashtirish sharti bilan tibbiyot amaliyotida qoʻllash va olib kirishga ruxsat berish tartibi toʻgʻrisidagi nizom ilovaga muvofiq tasdiqlansin.

2. Mazkur buyruq Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasi, Oʻzbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish boʻyicha vakil, Oʻzbekiston Respublikasi Savdo sanoat palatasi bilan kelishilgan.

3. Mazkur buyruq rasmiy eʼlon qilingan kundan eʼtiboran kuchga kiradi.

Kelishildi:

Oʻzbekiston Respublikasi sogʻliqni saqlash vazirining 2026-yil 5-yanvardagi 24-son buyrugʻiga ILOVA

Mazkur Nizom Oʻzbekiston Respublikasida vaqtinchalik tanqisligi yuzaga kelgan dori vositalari va tibbiy jihozlarni davlat roʻyxatidan oʻtkazmasdan majburiy sertifikatlashtirish sharti bilan tibbiyot amaliyotida qoʻllash va olib kirishga ruxsat berish tartibini belgilaydi .

1-bob. Umumiy qoidalar

1. Ushbu Nizomda quyidagi tushunchalar qoʻllaniladi:

vaqtinchalik tanqislik — dori vositalari va tibbiy jihozlarning respublika aholisi va davlat sogʻliqni saqlash tizimidagi tibbiyot muassasalarining (bundan buyon matnda tibbiyot muassasalari deb yuritiladi) ehtiyojini qondirish uchun yetarli miqdorda mavjud emasligi yoki cheklangan miqdorda mavjud boʻlish holati;

dori vositalari — kasalliklar profilaktikasi, ularga tashxis qoʻyish va ularni davolash, shuningdek odam organizmining holati va funksiyalarini oʻzgartirish uchun tibbiyot amaliyotida qoʻllanilishiga ruxsat etilgan dori moddalari (substansiyalar) va yordamchi moddalar asosida olingan vositalar, dori moddalari (substansiyalar), dori preparatlari;

tibbiy jihozlar — kasalliklar profilaktikasi, tashxis qoʻyish, davolash, bemorlarni reabilitatsiya qilish va (yoki) sanab oʻtilgan jarayonlarni taʼminlash uchun, shuningdek odam organizmining holati va funksiyalarini aniqlash, tiklash, almashtirish hamda oʻzgartirish, monitoring qilish, homiladorlikning oldini olish uchun tibbiyot amaliyotida qoʻllanilishiga ruxsat etilgan, qoʻllanilishi natijasida odam organizmiga farmakologik, immunologik yoki metabolik taʼsir koʻrsatmaydigan, ayrim holda, majmua yoki tizimlar sifatida qoʻllaniladigan jihozlar, apparatlar, uskunalar, priborlar, asboblar, qurilmalar, majmualar va dasturiy taʼminotlar;

import qiluvchi tashkilot — Oʻzbekiston Respublikasi hududiga dori vositalari va tibbiy jihozlarni olib kirishni (importni) amalga oshiruvchi, dori vositalarini ulgurji realizatsiya qilish uchun litsenziyaga ega yuridik shaxs.

2. Oʻzbekiston Respublikasida vaqtinchalik tanqislik yuzaga kelgan taqdirda dori vositalari va tibbiy jihozlar bilan taʼminlash quyidagi yoʻllar orqali amalga oshiriladi:

tibbiyot muassasalaridagi mavjud dori vositalari va tibbiy jihozlar zaxiralarini qayta taqsimlash ;

davlat roʻyxatidan oʻtkazmasdan, majburiy sertifikatlashtirish sharti bilan dori vositalari va tibbiy jihozlarni Oʻzbekiston Respublikasi hududiga olib kirish (import qilish) va tibbiyot amaliyotiga toʻgʻridan-toʻgʻri foydalanish .

2-bob. Oʻzbekiston Respublikasida vaqtinchalik tanqislik yuzaga kelgan taqdirda dori vositalari va tibbiy jihozlar bilan taʼminlashni tashkil etish

3. Oʻzbekiston Respublikasida vaqtinchalik tanqislik yuzaga kelgan taqdirda dori vositalari va tibbiy jihozlar bilan taʼminlashni tashkil etish quyidagilar tomonidan taqdim etiladigan mazkur Nizomning 4-bandida keltirilgan maʼlumotlarni tahlil qilish asosida aniqlanadi:

1) respublika darajasidagi tibbiyot muassasalari;

2) tibbiyotning ixtisoslashtirilgan yoʻnalishlaridagi assotsiatsiyalari;

3) ulgurji farmatsevtika tashkilotlari;

4) Oʻzbekiston Respublikasi Sogʻliqni saqlash vazirligi (bundan buyon matnda Vazirlik deb yuritiladi) huzuridagi Farmatsevtika tarmogʻini rivojlantirish agentligi;

5) Vazirlikning tegishli tarkibiy boʻlinmalari (“Elektron sogʻliqni saqlash” axborot tizimi orqali dori vositalari va tibbiy jihozlarning tanqisligi aniqlanganda).

4. Respublika darajasidagi tibbiyot muassasalari, tibbiyotning ixtisoslashtirilgan yoʻnalishlaridagi assotsiatsiyalari, ulgurji farmatsevtika tashkilotlari, Vazirlik huzuridagi Farmatsevtika tarmogʻini rivojlantirish agentligi hamda Vazirlikning tegishli tarkibiy boʻlinmalari quyidagilar toʻgʻrisidagi maʼlumotlarni Oʻzbekiston Respublikasi sogʻliqni saqlash vaziri tomonidan tasdiqlangan Vaqtinchalik tanqisligi yuzaga kelgan holatlarda dori vositalari va tibbiy jihozlar bilan taʼminlash boʻyicha doimiy ishchi guruhga (bundan buyon matnda Ishchi guruh deb yuritiladi) taqdim etadi:

dori vositasi va tibbiy jihozning klinik ahamiyati, shu jumladan qamrab olinadigan aholi soni, dalillarga asoslangan tibbiyotda samaradorligi;

dori vositasi va tibbiy jihozning terapiya tuzilishidagi xavflar, shu jumladan tanqislikning kelib chiqishiga sabab boʻlgan omillar hamda tibbiyot muassasalarida mavjud qoldiqlari;

dori vositasi va tibbiy jihozning Oʻzbekiston Respublikasi hududiga olib kirilishi (import qilinishi) yoki ishlab chiqarilishi toʻxtatilishi rejalashtirganligi;

vaqtinchalik tanqislikni bartaraf etish uchun zarur boʻlgan dori vositasi va tibbiy jihozning 3 oylik minimal miqdori (soni).

Bunda dori vositalarining xalqaro patentlanmagan nomi, doza va shakllari, tibbiy jihozlarning texnik talablari koʻrsatiladi.

5. Mazkur Nizomning 4-bandidagi maʼlumotlar Ishchi guruh tomonidan ular taqdim etilgan kundan boshlab 3 ish kuni ichida koʻrib chiqiladi va maʼlumotlarni oʻrganish uchun Vazirlik huzuridagi Farmatsevtika tarmogʻini rivojlantirish agentligi hamda “Farmatsevtika mahsulotlari xavfsizligi markazi” va “Xaridlar markazi” davlat muassasalariga yuboriladi.

6. Vazirlik huzuridagi Farmatsevtika tarmogʻini rivojlantirish agentligi 5 ish kuni ichida vaqtinchalik tanqisligi yuzaga kelgan dori vositasi yoki tibbiy jihoz haqida quyidagi maʼlumotlarni oʻrganadi va oʻrganish natijalarini Ishchi guruhga taqdim etadi:

Oʻzbekiston farmatsevtika bozorida mavjud yoki mavjud emasligi;

mahalliy ishlab chiqaruvchilar tomonidan ishlab chiqarish holati va ishlab chiqarish rejalari;

bojxona hamda ulgurji tashkilotlarning omborlarida mavjudligi.

7. Vazirlik huzuridagi “Farmatsevtika mahsulotlari xavfsizligi markazi” davlat muassasasi 5 ish kuni ichida vaqtinchalik tanqisligi yuzaga kelgan dori vositasi yoki tibbiy jihoz haqida quyidagi maʼlumotlarni oʻrganadi va oʻrganish natijalarini Ishchi guruhga taqdim etadi:

davlat roʻyxatidan oʻtkazilganligi hamda oʻrnini bosuvchi dori vositalarining davlat roʻyxatidan oʻtkazilganligi va sertifikatlashtirilganligi;

dozasi, dori shakli va qoʻllash yoʻli boʻyicha mosligi toʻgʻrisidagi maʼlumotlar.

8. Vazirlik huzuridagi “Xaridlar markazi” davlat muassasasi 5 ish kuni ichida vaqtinchalik tanqisligi yuzaga kelgan dori vositasi yoki tibbiy jihozning davlat xaridi rejasiga kiritilganligi va yetkazib berish muddatlari haqidagi maʼlumotlarni oʻrganadi va oʻrganish natijalarini Ishchi guruhga taqdim etadi.

9. Ishchi guruh Vazirlik huzuridagi Farmatsevtika tarmogʻini rivojlantirish agentligi hamda “Farmatsevtika mahsulotlari xavfsizligi markazi” va “Xaridlar markazi” davlat muassasalari tomonidan taqdim etilgan oʻrganish natijalari asosida 5 ish kuni ichida Oʻzbekiston Respublikasida dori vositalari va tibbiy jihozlarning vaqtinchalik tanqisligini bartaraf etish yuzasidan quyidagi qarorlardan birini qabul qiladi:

Oʻzbekiston Respublikasida vaqtinchalik tanqisligi yuzaga kelgan dori vositalari va tibbiy jihozlarni mavjud tibbiyot muassasalari doirasida qayta taqsimlash;

Oʻzbekiston Respublikasida vaqtinchalik tanqisligi yuzaga kelgan dori vositalari va tibbiy jihozlarni respublikada faoliyat yuritayotgan ulgurji farmatsevtika tashkilotlari yoki mahalliy ishlab chiqaruvchilardan xarid qilish mumkinligi toʻgʻrisida respublika darajasidagi tibbiyot muassasalari hamda tibbiyotning ixtisoslashtirilgan yoʻnalishlaridagi assotsiatsiyalarga tavsiya berish;

Oʻzbekiston Respublikasida vaqtinchalik tanqisligi yuzaga kelgan dori vositalari va tibbiy jihozlarni davlat roʻyxatidan oʻtkazmasdan majburiy sertifikatlashtirish sharti bilan Oʻzbekiston Respublikasi hududiga olib kirish (import qilish) va tibbiyot amaliyotida qoʻllash mumkinligi hamda ularning vaqtinchalik tanqisligini bartaraf etish uchun zarur minimal miqdorlarini belgilash;

davlat roʻyxatidan oʻtkazilgan, biroq Oʻzbekiston Respublikasida tasdiqlangan qadoqlanishdan farq qiluvchi qadoqlardagi dori vositalarini majburiy sertifikatlashtirish sharti bilan Oʻzbekiston Respublikasi hududiga olib kirish (import qilish) va tibbiyot amaliyotida qoʻllash mumkinligi hamda ularning vaqtinchalik tanqisligini bartaraf etish uchun zarur minimal miqdorlarini belgilash.

10. Ishchi guruhda koʻrib chiqiladigan masalalarning xususiyatiga koʻra manfaatdor vazirlik va idoralarning vakillari, tibbiyot sohasida faoliyat yurituvchi muassasalarning vakillari taklif etilishi mumkin.

11. Ishchi guruhni majlislarini Ishchi guruh raisi, Ishchi guruh raisi boʻlmagan taqdirda Ishchi guruh raisi oʻrinbosari boshqaradi.

12. Ishchi guruh majlisi unda Ishchi guruh aʼzolarining kamida uchdan ikki qismi qatnashganda oʻtkazilgan hisoblanadi.

13. Ishchi guruh qarori uning majlisida qatnashgan aʼzolarning koʻpchilik ovozi bilan qabul qilinadi. Ovozlar teng boʻlgan taqdirda Ishchi guruh raisining yoki raislik qiluvchining ovozi hal qiluvchi ovoz hisoblanadi.

14. Ishchi guruh qarorlari Ishchi guruh majlisi bayoni bilan rasmiylashtiriladi. Ishchi guruh majlisining bayoni Ishchi guruh raisi yoki raislik qiluvchi tomonidan tasdiqlanadi.

15. Ishchi guruhning tegishli qarori bilan Vaqtinchalik tanqisligi yuzaga kelgan davlat roʻyxatidan oʻtkazmasdan majburiy sertifikatlashtirish sharti bilan Oʻzbekiston Respublikasi hududiga olib kirish (import qilish) va tibbiyot amaliyotida qoʻllashi mumkin boʻlgan dori vositalari va tibbiy jihozlarning roʻyxati Vazirlikning rasmiy veb-saytida qaror qabul qilingan kundan eʼtiboran 1 ish kuni ichida eʼlon qilinadi.

16. Import qiluvchi tashkilotlar Vazirlikning rasmiy veb-saytida Vaqtinchalik tanqisligi yuzaga kelgan davlat roʻyxatidan oʻtkazmasdan majburiy sertifikatlashtirish sharti bilan Oʻzbekiston Respublikasi hududiga olib kirish (import qilish) va tibbiyot amaliyotida qoʻllashi mumkin boʻlgan dori vositalari va tibbiy jihozlarning roʻyxati eʼlon qilingan kundan boshlab 15 kun ichida Vazirlikka vaqtinchalik tanqisligi yuzaga kelgan dori vositalari va tibbiy jihozlarni Oʻzbekiston Respublikasi hududiga olib kirish (import qilish) imkoniyatlari mavjudligi toʻgʻrisida takliflarni kiritadi. Bunda ushbu takliflar quyidagi maʼlumotlarni oʻz ichiga olishi kerak:

dori vositalari va tibbiy jihozlarning ishlab chiqaruvchi davlatda yoki boshqa davlatda roʻyxatdan oʻtkazilganlik toʻgʻrisidagi guvohnoma nusxasi;

dori vositalari va tibbiy jihozlarning sifat nazoratini amalga oshirish uchun korxona farmakopeya maqolasi, standart, spetsifikatsiya, Oʻzbekiston Respublikasi hududiga olib kirilishi (import qilinishi) nazarda tutilgan seriyaning sifat sertifikati, qadoq maketlari, davlat tilidagi dori vositalarining tibbiyotda qoʻllanilishiga doir yoʻriqnomasi (davlat tili bilan birga boshqa tilda ham berilishi mumkin);

dori vositalari va tibbiy jihozlarning narxi va yetkazib berish muddatlari;

dori vositalarini majburiy raqamli markirovkalashni amalga oshirish boʻyicha majburiyat;

xorijdagi dori vositalari va tibbiy jihozlarning ishlab chiqaruvchi yoki boshqa tashkilotlardagi mavjud zaxira tasdigʻi;

transport-logistika rejasi va kafolat xati.

Agarda import qiluvchi tashkilotlar tomonidan 15 kun ichida Ishchi guruhga taklif kelib tushmasa, takliflarni qabul qilish muddatlari qoʻshimcha 15 kunga uzaytirilishi mumkin.

17. Ishchi guruh mazkur Nizomning 16-bandida koʻrsatilgan muddat tugaganidan soʻng 3 ish kuni ichida import qiluvchi tashkilotlarning takliflarini mazkur Nizomning 3-bobida keltirilgan ustuvorlik tartibi asosida oʻrganib chiqadi va import qiluvchi tashkilotga yoki import qiluvchi tashkilotlarga dori vositalari va tibbiy jihozlarning Oʻzbekiston Respublikasi hududiga olib kirilishi (import qilinishi) mumkinligi toʻgʻrisida xulosani rasmiylashtiradi.

Bunda Ishchi guruh xulosasi uning majlisida qatnashgan aʼzolarning koʻpchilik ovozi bilan qabul qilinadi hamda qabul qilingan xulosa Ishchi guruh majlisi bayoni bilan rasmiylashtiriladi. Ishchi guruh majlisining bayoni Ishchi guruh raisi yoki raislik qiluvchi tomonidan tasdiqlanadi.

18. Import qiluvchi tashkilot yoki import qiluvchi tashkilotlar xulosani olgan kundan eʼtiboran dori vositalari hamda tibbiy jihozlarni xulosada belgilangan muddatlarda yetkazish choralarini koʻradi hamda muvofiqlik sertifikatini rasmiylashtirish uchun Farmatsevtika mahsulotlarini sertifikatlashtirish qoidalariga (roʻyxat raqami 3386, 2022-yil 12-sentabr) muvofiq sertifikatlashtirish organlariga murojaat qiladi, majburiy sertifikatlashtirilmaydigan tibbiy jihozlar bundan mustasno.

Bunda sertifikatlashtirish organiga import qiluvchi tashkilot tomonidan sifat nazoratini amalga oshirish uchun taqdim qilgan hujjatlarga muvofiq sifat nazoratini amalga oshirish hamda referent narxdan qatʼi nazar sertifikatlashtirishga ruxsat etiladi.

Vaqtinchalik tanqisligi yuzaga kelgan dori vositalari Oʻzbekiston Respublikasi hududiga olib kirilishida (import qilinishida) yoki mahalliy ishlab chiqaruvchilar tomonidan ishlab chiqarilishida Oʻzbekiston Respublikasi Vazirlar Mahkamasining 2022-yil 2-apreldagi 149-son “Dori vositalari va tibbiy buyumlarni majburiy raqamli markirovkalash tizimini joriy etish toʻgʻrisida”gi qaroriga muvofiq ular raqamli markirovkalanishi lozim.

19. Tegishli sertifikatlashtirish organi tomonidan rasmiylashtirilgan muvofiqlik sertifikati va boshqa qonunchilikda taqdim etilishi belgilangan hujjatlar import qiluvchi tomonidan erkin muomalaga chiqarish (import) bojxona rejimiga rasmiylashtirish uchun tegishli bojxona organiga taqdim etiladi.

20. Bojxona organlari tomonidan dori vositalari hamda tibbiy jihozlarning erkin muomalaga chiqarish (import) bojxona rejimiga rasmiylashtirish taqdim etilgan hujjatlar qonunchilikda belgilangan muddatlarda oʻrganib chiqilib, belgilangan tartibda erkin muomalaga chiqarish (import) bojxona rejimiga joylashtiriladi.

21. Vaqtinchalik tanqislikni bartaraf etish uchun Oʻzbekiston Respublikasi hududiga olib kirilgan (import qilingan) dori vositalari hamda tibbiy jihozlar toʻgʻrisidagi maʼlumotlar Vazirlikning rasmiy veb-saytida doimiy joylashtirib boriladi.

22. Oʻzbekiston Respublikasida Vaqtinchalik tanqislikni bartaraf etish maqsadida dori vositalari va tibbiy jihozlarni belgilangan minimal miqdordan ikki barobargacha miqdorlarda Oʻzbekiston Respublikasi hududiga olib kirishga (import qilishga) ruxsat etiladi.

Bunda Oʻzbekiston Respublikasi hududiga olib kirilgan (import qilingan) retsept bilan beriladigan dori vositalarini ulgurji va chakana sotishda ularni yetkazib berishda ishtirok etuvchi vositachilar sonidan qatʼi nazar, ulgurji savdo uchun sotib olingan (bazaviy) qiymatidan 15 foizdan va chakana savdo uchun sotib olingan qiymatidan 20 foizdan ortiq boʻlmagan miqdorlarda ustama qoʻllanadi.

23. Tibbiyot muassasalari import qiluvchi tashkilot tomonidan Oʻzbekiston Respublikasi hududiga olib kirilgan (import qilingan) dori vositasi va tibbiy jihozlarni sotib olish majburiyatini oʻz zimmasiga olmaydi. Bunda tibbiyot muassasalari faqatgina oʻz moliyaviy imkoniyatlaridan kelib chiqqan holda sotib olishi mumkin.

3-bob. Ustuvorlik tartibi

24. Oʻzbekiston Respublikasida vaqtinchalik tanqisligi yuzaga kelgan dori vositasi va tibbiy jihozlarni Oʻzbekiston Respublikasi hududiga olib kirishda (import qilishda) quyidagi ustuvor yoʻnalishlarga eʼtibor qaratiladi:

ijtimoiy ahamiyatga ega kasalliklarning oldini olish, tashxislash va ularni davolash boʻyicha tibbiy xizmatlar;

shoshilinch tibbiy yordam va intensiv terapiya (jonlantirish) xizmatlari;

yuqumli kasalliklarni aniqlash, davolash va epidemiologik xavflarni bartaraf etish boʻyicha tibbiy xizmatlar;

ona va bola salomatligi, perinatal yordam hamda akusherlik-ginekologiya xizmatlari;

onkologiya kasalliklarini tashxislash va davolash boʻyicha tibbiy xizmatlar;

yurak-qon tomir va miya qon aylanishi bilan bogʻliq oʻta xavfli holatlarda diagnostika va davolash boʻyicha tibbiy xizmatlar;

hayot uchun muhim uzluksiz terapiya talab etiladigan surunkali kasalliklar boʻyicha tibbiy xizmatlar;

buyrak yetishmovchiligida hayotni saqlab turuvchi terapiya xizmatlari;

jarrohlik aralashuvlari, ogʻriqsizlantirish va operatsiyadan keyingi intensiv kuzatuv bilan bogʻliq tibbiy xizmatlar;

qon va qon komponentlari bilan bogʻliq transfuzion terapiya va unga doir tibbiy xizmatlar;

kam uchraydigan (orfan) va boshqa yuqori xavfli holatlarda davolashni uzluksiz taʼminlash talab etiladigan tibbiy xizmatlar.

25. Bir xil turdagi dori vositasi va tibbiy jihoz boʻyicha ikki yoki undan ortiq import qiluvchi tashkilotlardan takliflar kelib tushgan taqdirda Ishchi guruh birinchi navbatda dori vositasi va tibbiy jihozni eng qisqa muddatlarda yetkazib berish imkoniyatiga ega import qiluvchi tashkilotga yoki import qiluvchi tashkilotlarga ustuvorlik beradi.

Agarda ustuvorlik asosida Ishchi guruhning dori vositalari va tibbiy jihozlarni Oʻzbekiston Respublikasi hududiga olib kirishi (import qilishi) mumkinligi toʻgʻrisida xulosasini olgan import qiluvchi tashkilot yoki import qiluvchi tashkilotlar dori vositalari va tibbiy jihozlarni yetkazib berish muddatlarini buzgan taqdirda ularga berilgan xulosa Ishchi guruh tomonidan bekor qilinadi va mazkur Nizomning 2-bobida keltirilgan tartibda boshqa import qiluvchi tashkilotlarning takliflari qabul qilinib ular koʻrib chiqiladi.

4-bob. Yakuniy qoida

26. Ushbu Nizom talablarining buzilishida aybdor boʻlgan shaxslar qonunchilik hujjatlariga muvofiq javobgar boʻladilar.

Vazir A. XUDAYAROV

Iqtisodiyot va moliya vazirligi huzuridagi Bojxona qoʻmita raisi A. MAVLONOV

Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish boʻyicha vakil oʻrinbosari J. URUNOV

Savdo sanoat palata rai si D. VAXABOV

Toshkent sh.,

2026-yil 5-yanvar,

2025-yil 20-dekabr

2025-yil 16-dekabr

2025-yil 10-dekabr

24-son

(Qonunchilik maʼlumotlari milliy bazasi, 12.01.2026-y., 10/26/3749/0032-son)

lex.uz