📅 2025-yil 24-dekabr · Vazirlik va idoralar hujjatlari · Sogʻliqni saqlash vaziri
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2025 йил 24 декабрь · Вазирлик ва идоралар ҳужжатлари · Соғлиқни сақлаш вазири
Расмий матн. Расмий ҳужжат. Таҳририй изоҳлар киритилмаган.
📅 24 декабря 2025 г. · Документы министерств и ведомств · Министр здравоохранения
Официальный текст. Официальный документ. Редакционные примечания не включены.
📅 24 December 2025 · Ministry and agency documents · Sogʻliqni saqlash vaziri
Official text. Official document. Editorial notes are not included.
Ўзбекистон Республикаси Соғлиқни сақлаш вазирининг
буйруғи
ЙЎРИҚНОМА
Ўзбекистон Республикаси Соғлиқни сақлаш вазирлигининг «Электрон соғлиқни сақлаш» ахборот тизимида яратилган «Электрон поликлиника», «Электрон шифохона», «Электрон тиббий карта» ва «Электрон рецепт» модулларидан фойдаланиш тартиби тўғрисидаги йўриқномани тасдиқлаш ҳақида
Ўзбекистон Республикаси Вазирлар Маҳкамасининг 2025 йил 8 сентябрдаги 570-сон «Соғлиқни сақлаш тизимини рақамлаштириш жараёнларини янада жадаллаштириш бўйича қўшимча чора-тадбирлар тўғрисида»ги қарорига мувофиқ буюраман:
1. Ўзбекистон Республикаси Соғлиқни сақлаш вазирлигининг «Электрон соғлиқни сақлаш» ахборот тизимида яратилган «Электрон поликлиника», «Электрон шифохона», «Электрон тиббий карта» ва «Электрон рецепт» модулларидан фойдаланиш тартиби тўғрисидаги йўриқнома иловага мувофиқ тасдиқлансин.
2. Мазкур буйруқ Ўзбекистон Республикаси Рақамли технологиялар вазирлиги, Ўзбекистон Республикаси Президенти ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил ва Ўзбекистон Савдо саноат палатаси билан келишилган.
3. Мазкур буйруқ расмий эълон қилинган кундан эътиборан уч ой ўтгач кучга киради.
Келишилди:
Ўзбекистон Республикаси соғлиқни сақлаш вазирининг 2025 йил 24 декабрдаги 19-сон буйруғига ИЛОВА
Ўзбекистон Республикаси Соғлиқни сақлаш вазирлигининг «Электрон соғлиқни сақлаш» ахборот тизимида яратилган «Электрон поликлиника», «Электрон шифохона», «Электрон тиббий карта» ва «Электрон рецепт» модулларидан фойдаланиш тартиби тўғрисидаги
Ушбу Йўриқнома барча тиббиёт ташкилотлари ва дорихоналарда Ўзбекистон Республикаси Соғлиқни сақлаш вазирлигининг «Электрон соғлиқни сақлаш» ахборот тизимида яратилган «Электрон поликлиника», «Электрон шифохона», «Электрон тиббий карта» ва «Электрон рецепт» модулларидан (бундан буён матнда модуллар деб юритилади) фойдаланиш ҳамда ушбу модулларга тегишли маълумотларни узатиш тартибини белгилайди.
1-боб. Умумий қоидалар
1. Мазкур Йўриқномада қуйидаги асосий тушунчалардан фойдаланилади:
авторизация — маълум шахсга ёки шахслар гуруҳига муайян ҳаракатларни амалга ошириш ҳуқуқини бериш;
идентификация — фойдаланувчиларнинг шахсини аниқлаш мақсадида уларга идентификатор (ноёб номлар) тайинлаш ёки тайинланган идентификаторларни (ноёб номлар) идентификаторлар рўйхати билан солиштириш;
«Электрон поликлиника» модули — амбулатор шароитда кўрсатиладиган барча тиббий хизматлар билан боғлиқ жараёнларни (ҳаракатлар) жамлаш, маълумот алмашиш, тегишли ҳисоботларни шакллантириш каби функцияларни амалга оширувчи ахборот дастури;
«Электрон шифохона» модули — стационар шароитда кўрсатиладиган барча тиббий хизматлар билан боғлиқ жараёнларни (ҳаракатлар) жамлаш, маълумот алмашиш, тегишли ҳисоботларни шакллантириш каби функцияларни амалга оширувчи ахборот дастури;
«Электрон рецепт» модули — электрон рецепт билан боғлиқ барча жараёнларни (ҳаракатлар) жамлаш, маълумот алмашиш, тегишли ҳисоботларни шакллантириш каби функцияларни амалга оширувчи ахборот дастури;
«Электрон тиббий карта» модули — амбулатор ва стационар шароитда бемор саломатлигига оид маълумотлар шакллантириладиган, ташхислар, ташрифлар, муолажалар, таҳлиллар, касаллик тарихи ва тиббиёт ходими томонидан киритилган маълумотларни рақамли форматда жамлаб турадиган ахборот дастури.
2. Тиббиёт ташкилотлари ёки дорихоналар томонидан модулларни ўрнатиш учун Ўзбекистон Республикаси Соғлиқни сақлаш вазирлигига сўровнома тақдим этилади. Сўровномада модулга кириш ҳуқуқи берилган шахсларнинг қуйидаги маълумотлари кўрсатилиши лозим:
фамилияси, исми ва отасининг исми;
лавозими ва улар фаолият юритувчи бўлинманинг номи;
паспорт ( ID -карта) серияси ва рақами;
жисмоний шахснинг шахсий идентификация рақами (ЖШШИР);
электрон почта манзили.
3. Тиббиёт ташкилотлари ёки дорихоналарда модулларни ўрнатиш сўровнома тақдим этилган кундан бошлаб 15 иш куни ичида Ўзбекистон Республикаси Соғлиқни сақлаш вазирлиги ҳамда «Давлат ахборот тизимларини яратиш ва қўллаб-қувватлаш бўйича ягона интегратор — « UZINFOCOM » томонидан бепул амалга оширилади.
4. Модулларда шахсга доир маълумотларни қайд этиш, узатиш (алмашиш) ва сақлаш Ўзбекистон Республикасининг « Шахсга доир маълумотлар тўғрисида »ги, « Киберхавфсизлик тўғрисида »ги ва «Фуқароларнинг соғлиғини сақлаш тўғрисида»ги қонунлари ҳамда техник жиҳатдан тартибга солиш соҳасидаги норматив ҳужжатлар талабларига мувофиқ амалга оширилади.
5. Тиббиёт ташкилоти ёки дорихоналар модулларда маълумотларнинг тўлиқ ва аниқ киритиб борилиши ҳамда янгиланиши учун масъул ҳисобланади.
2-боб. Модуллардан фойдаланиш ва улардаги маълумотларни узатишга қўйиладиган талаблар
6. Тиббиёт ташкилотлари ва дорихоналардаги модулларга кириш ҳуқуқи фақат шифокор, дорихонанинг фармацевт маълумотига эга ходими, ҳамшира, рўйхатга олувчи ходимларга (бундан буён матнда фойдаланувчилар деб юритилади) берилади.
7. Фойдаланувчилар Ягона идентификация тизими ( OneID ) орқали модулларда авторизация ва идентификациядан ўтади ҳамда уларга шахсий кабинет очилади.
8. Шахсий кабинетда қуйидаги маълумотлар сақланиши шарт:
фойдаланувчининг идентификатори ( ID -рақами);
шахсий кабинетнинг яратилган санаси ва вақти;
фойдаланувчининг лавозими ва шахсини тасдиқловчи ҳужжат маълумотлари.
9. Фойдаланувчилар шахсий кабинетга Ягона идентификация тизими ( OneID ) ёки электрон рақамли имзо орқали кириш ҳуқуқига эга бўлади, бунда дастурга ўзига тегишли бўлмаган Ягона идентификация тизими ( OneID ) ёки электрон рақамли имзо орқали кириш тақиқланади.
10. Тиббиёт ташкилоти ёки дорихоналар фойдаланувчилар билан меҳнат шартномаси бекор қилинган ёки бошқа лавозимга ўтказилган вақтдан бошлаб уч иш куни ичида Ўзбекистон Республикаси Соғлиқни сақлаш вазирлигини ёзма хабардор қилиши керак.
Бунда, уч иш куни ичида Ўзбекистон Республикаси Соғлиқни сақлаш вазирлиги томонидан фойдаланувчиларнинг модулларга кириш ҳуқуқлари янгиланади ёки уларнинг шахсий кабинети блокланади ҳамда архивга кўчирилади ва камида бир йил давомида сақланади.
11. Фойдаланувчи томонидан қуйидаги маълумотлар «Электрон тиббий карта» модулига реал вақт режимида киритилади ва бир вақтнинг ўзида ушбу маълумотлар тегишли равишда қолган модулларга автоматик равишда узатилади:
беморнинг жисмоний шахснинг шахсий идентификация рақами (ЖШШИР), фамилияси, исми ва отасининг исми, туғилган санаси;
беморнинг ташхис ва тиббий кўрсаткичлари;
лаборатор ва инструментал таҳлил натижалари;
дори воситалари бўйича электрон рецептлар;
амбулатор ва (ёки) стационар даволаниш ёзувлари.
12. «Электрон рецепт модули»га маълумотларни узатиш Ўзбекистон Республикаси Вазирлар Маҳкамасининг 2025 йил 8 сентябрдаги 570-сон қарори билан тасдиқланган Тиббиёт ташкилотларида рецепт билан бериладиган дори воситаларини электрон рецепт асосида тайинлаш тартиби тўғрисидаги низомга асосан амалга оширилади.
13. Модулларда фойдаланувчилар томонидан қуйидаги асосий вазифалар амалга оширилади:
бемор ҳақидаги маълумотларни модулга киритиш (рўйхатдан ўтказиш);
ташхис ва тиббий кўрсаткичларни киритиш ва мавжуд маълумотларни янгилаш;
лаборатор ва инструментал таҳлил натижаларини шакллантириш;
дори воситалари бўйича электрон рецептларни шакллантириш;
амбулатор ва стационар даволаниш ёзувларини электрон юритиш;
даволаниш жараёнларини электрон юритиш;
электрон тиббий хизматлар тўғрисидаги маълумотлар узатиш;
бошқа модуллар билан ахборот ва маълумотлар алмашиш.
14. «Давлат ахборот тизимларини яратиш ва қўллаб-қувватлаш бўйича ягона интегратор — « UZINFOCOM »:
фойдаланувчиларни ҳар йили камида бир маротаба хатловдан (инвентаризациядан) ўтказади ва модулларга кириш ҳуқуқларини қайта кўриб чиқади;
модулларнинг ишлаши ва синовдан ўтказилиши даврида ахборот хавфсизлиги ва киберхавфсизликни таъминлайди ҳамда берилган модулларда ишлаш тўғрилигини назорат қилади.
15. Беморлар модулларга киритилган ўзлари ҳақидаги маълумотлар, электрон тиббий картаси, касаллик тарихи ёки унга тайинланган электрон рецептларни « DMED » мобил иловаси орқали кўришлари ва юклаб олишлари мумкин.
16. Фойдаланувчилар қуйидаги ҳуқуқларга эга:
модуллардаги беморнинг маълумотларига кириш;
модулларга бемор ҳақидаги маълумотларни киритиш ва мавжуд маълумотларни янгилаш;
зарур ҳолларда электрон шаклда бошқа маълумотларни узатиш.
17. Фойдаланувчилар:
модуллардаги шахсга доир маълумотларни махфий сақлаши;
модулларга кириш ҳуқуқини (шу жумладан, модулларга кириш учун Ягона идентификация тизими ( OneID ) логин ва пароли ёки электрон рақамли имзо кодларини) бошқа шахсларга бермаслиги;
ҳар бир тиббий ёзувни реал вақтда киритиши;
нотўғри ёки сохта маълумот киритиш ҳолатларига йўл қўймаслиги лозим.
3-боб. Якуний қоида
18. Мазкур Йўриқнома талабларининг бузилишида айбдор бўлган шахслар қонунчилик ҳужжатларига мувофиқ жавобгар бўладилар.
Вазир А. ХУДАЯРОВ
Рақамли технологиялар вазирининг биринчи ўринбосари О. УМАРОВ
Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакилининг ўринбосари Ж. УРУНОВ
Савдо-саноат палатаси раиси Д. ВАХАБОВ
Тошкент ш.,
2025 йил 24 декабрь,
2025 йил 17 декабрь
2025 йил 10 декабрь
2025 йил 9 декабрь
19 -сон
Oʻzbekiston Respublikasi Sogʻliqni saqlash vazirining
buyrugʻi
YOʻRIQNOMA
Oʻzbekiston Respublikasi Sogʻliqni saqlash vazirligining “Elektron sogʻliqni saqlash” axborot tizimida yaratilgan “Elektron poliklinika”, “Elektron shifoxona”, “Elektron tibbiy karta” va “Elektron retsept” modullaridan foydalanish tartibi toʻgʻrisidagi yoʻriqnomani tasdiqlash haqida
Oʻzbekiston Respublikasi Vazirlar Mahkamasining 2025-yil 8-sentabrdagi 570-son “Sogʻliqni saqlash tizimini raqamlashtirish jarayonlarini yanada jadallashtirish boʻyicha qoʻshimcha chora-tadbirlar toʻgʻrisida”gi qaroriga muvofiq buyuraman:
1. Oʻzbekiston Respublikasi Sogʻliqni saqlash vazirligining “Elektron sogʻliqni saqlash” axborot tizimida yaratilgan “Elektron poliklinika”, “Elektron shifoxona”, “Elektron tibbiy karta” va “Elektron retsept” modullaridan foydalanish tartibi toʻgʻrisidagi yoʻriqnoma ilovaga muvofiq tasdiqlansin.
2. Mazkur buyruq Oʻzbekiston Respublikasi Raqamli texnologiyalar vazirligi, Oʻzbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish boʻyicha vakil va Oʻzbekiston Savdo sanoat palatasi bilan kelishilgan.
3. Mazkur buyruq rasmiy eʼlon qilingan kundan eʼtiboran uch oy oʻtgach kuchga kiradi.
Kelishildi:
Oʻzbekiston Respublikasi sogʻliqni saqlash vazirining 2025-yil 24-dekabrdagi 19-son buyrugʻiga ILOVA
Oʻzbekiston Respublikasi Sogʻliqni saqlash vazirligining “Elektron sogʻliqni saqlash” axborot tizimida yaratilgan “Elektron poliklinika”, “Elektron shifoxona”, “Elektron tibbiy karta” va “Elektron retsept” modullaridan foydalanish tartibi toʻgʻrisidagi
Ushbu Yoʻriqnoma barcha tibbiyot tashkilotlari va dorixonalarda Oʻzbekiston Respublikasi Sogʻliqni saqlash vazirligining “Elektron sogʻliqni saqlash” axborot tizimida yaratilgan “Elektron poliklinika”, “Elektron shifoxona”, “Elektron tibbiy karta” va “Elektron retsept” modullaridan (bundan buyon matnda modullar deb yuritiladi) foydalanish hamda ushbu modullarga tegishli maʼlumotlarni uzatish tartibini belgilaydi.
1-bob. Umumiy qoidalar
1. Mazkur Yoʻriqnomada quyidagi asosiy tushunchalardan foydalaniladi:
avtorizatsiya — maʼlum shaxsga yoki shaxslar guruhiga muayyan harakatlarni amalga oshirish huquqini berish;
identifikatsiya — foydalanuvchilarning shaxsini aniqlash maqsadida ularga identifikator (noyob nomlar) tayinlash yoki tayinlangan identifikatorlarni (noyob nomlar) identifikatorlar roʻyxati bilan solishtirish;
“Elektron poliklinika” moduli — ambulator sharoitda koʻrsatiladigan barcha tibbiy xizmatlar bilan bogʻliq jarayonlarni (harakatlar) jamlash, maʼlumot almashish, tegishli hisobotlarni shakllantirish kabi funksiyalarni amalga oshiruvchi axborot dasturi;
“Elektron shifoxona” moduli — statsionar sharoitda koʻrsatiladigan barcha tibbiy xizmatlar bilan bogʻliq jarayonlarni (harakatlar) jamlash, maʼlumot almashish, tegishli hisobotlarni shakllantirish kabi funksiyalarni amalga oshiruvchi axborot dasturi;
“Elektron retsept” moduli — elektron retsept bilan bogʻliq barcha jarayonlarni (harakatlar) jamlash, maʼlumot almashish, tegishli hisobotlarni shakllantirish kabi funksiyalarni amalga oshiruvchi axborot dasturi;
“Elektron tibbiy karta” moduli — ambulator va statsionar sharoitda bemor salomatligiga oid maʼlumotlar shakllantiriladigan, tashxislar, tashriflar, muolajalar, tahlillar, kasallik tarixi va tibbiyot xodimi tomonidan kiritilgan maʼlumotlarni raqamli formatda jamlab turadigan axborot dasturi.
2. Tibbiyot tashkilotlari yoki dorixonalar tomonidan modullarni oʻrnatish uchun Oʻzbekiston Respublikasi Sogʻliqni saqlash vazirligiga soʻrovnoma taqdim etiladi. Soʻrovnomada modulga kirish huquqi berilgan shaxslarning quyidagi maʼlumotlari koʻrsatilishi lozim:
familiyasi, ismi va otasining ismi;
lavozimi va ular faoliyat yurituvchi boʻlinmaning nomi;
pasport ( ID -karta) seriyasi va raqami;
jismoniy shaxsning shaxsiy identifikatsiya raqami (JSHSHIR);
elektron pochta manzili.
3. Tibbiyot tashkilotlari yoki dorixonalarda modullarni oʻrnatish soʻrovnoma taqdim etilgan kundan boshlab 15 ish kuni ichida Oʻzbekiston Respublikasi Sogʻliqni saqlash vazirligi hamda “Davlat axborot tizimlarini yaratish va qoʻllab-quvvatlash boʻyicha yagona integrator — “ UZINFOCOM ” tomonidan bepul amalga oshiriladi.
4. Modullarda shaxsga doir maʼlumotlarni qayd etish, uzatish (almashish) va saqlash Oʻzbekiston Respublikasining “ Shaxsga doir maʼlumotlar toʻgʻrisida ”gi, “ Kiberxavfsizlik toʻgʻrisida ”gi va “Fuqarolarning sogʻligʻini saqlash toʻgʻrisida”gi qonunlari hamda texnik jihatdan tartibga solish sohasidagi normativ hujjatlar talablariga muvofiq amalga oshiriladi.
5. Tibbiyot tashkiloti yoki dorixonalar modullarda maʼlumotlarning toʻliq va aniq kiritib borilishi hamda yangilanishi uchun masʼul hisoblanadi.
2-bob. Modullardan foydalanish va ulardagi maʼlumotlarni uzatishga qoʻyiladigan talablar
6. Tibbiyot tashkilotlari va dorixonalardagi modullarga kirish huquqi faqat shifokor, dorixonaning farmatsevt maʼlumotiga ega xodimi, hamshira, roʻyxatga oluvchi xodimlarga (bundan buyon matnda foydalanuvchilar deb yuritiladi) beriladi.
7. Foydalanuvchilar Yagona identifikatsiya tizimi ( OneID ) orqali modullarda avtorizatsiya va identifikatsiyadan oʻtadi hamda ularga shaxsiy kabinet ochiladi.
8. Shaxsiy kabinetda quyidagi maʼlumotlar saqlanishi shart:
foydalanuvchining identifikatori ( ID -raqami);
shaxsiy kabinetning yaratilgan sanasi va vaqti;
foydalanuvchining lavozimi va shaxsini tasdiqlovchi hujjat maʼlumotlari.
9. Foydalanuvchilar shaxsiy kabinetga Yagona identifikatsiya tizimi ( OneID ) yoki elektron raqamli imzo orqali kirish huquqiga ega boʻladi, bunda dasturga oʻziga tegishli boʻlmagan Yagona identifikatsiya tizimi ( OneID ) yoki elektron raqamli imzo orqali kirish taqiqlanadi.
10. Tibbiyot tashkiloti yoki dorixonalar foydalanuvchilar bilan mehnat shartnomasi bekor qilingan yoki boshqa lavozimga oʻtkazilgan vaqtdan boshlab uch ish kuni ichida Oʻzbekiston Respublikasi Sogʻliqni saqlash vazirligini yozma xabardor qilishi kerak.
Bunda, uch ish kuni ichida Oʻzbekiston Respublikasi Sogʻliqni saqlash vazirligi tomonidan foydalanuvchilarning modullarga kirish huquqlari yangilanadi yoki ularning shaxsiy kabineti bloklanadi hamda arxivga koʻchiriladi va kamida bir yil davomida saqlanadi.
11. Foydalanuvchi tomonidan quyidagi maʼlumotlar “Elektron tibbiy karta” moduliga real vaqt rejimida kiritiladi va bir vaqtning oʻzida ushbu maʼlumotlar tegishli ravishda qolgan modullarga avtomatik ravishda uzatiladi:
bemorning jismoniy shaxsning shaxsiy identifikatsiya raqami (JSHSHIR), familiyasi, ismi va otasining ismi, tugʻilgan sanasi;
bemorning tashxis va tibbiy koʻrsatkichlari;
laborator va instrumental tahlil natijalari;
dori vositalari boʻyicha elektron retseptlar;
ambulator va (yoki) statsionar davolanish yozuvlari.
12. “Elektron retsept moduli”ga maʼlumotlarni uzatish Oʻzbekiston Respublikasi Vazirlar Mahkamasining 2025-yil 8-sentabrdagi 570-son qarori bilan tasdiqlangan Tibbiyot tashkilotlarida retsept bilan beriladigan dori vositalarini elektron retsept asosida tayinlash tartibi toʻgʻrisidagi nizomga asosan amalga oshiriladi.
13. Modullarda foydalanuvchilar tomonidan quyidagi asosiy vazifalar amalga oshiriladi:
bemor haqidagi maʼlumotlarni modulga kiritish (roʻyxatdan oʻtkazish);
tashxis va tibbiy koʻrsatkichlarni kiritish va mavjud maʼlumotlarni yangilash;
laborator va instrumental tahlil natijalarini shakllantirish;
dori vositalari boʻyicha elektron retseptlarni shakllantirish;
ambulator va statsionar davolanish yozuvlarini elektron yuritish;
davolanish jarayonlarini elektron yuritish;
elektron tibbiy xizmatlar toʻgʻrisidagi maʼlumotlar uzatish;
boshqa modullar bilan axborot va maʼlumotlar almashish.
14. “Davlat axborot tizimlarini yaratish va qoʻllab-quvvatlash boʻyicha yagona integrator — “ UZINFOCOM ”:
foydalanuvchilarni har yili kamida bir marotaba xatlovdan (inventarizatsiyadan) oʻtkazadi va modullarga kirish huquqlarini qayta koʻrib chiqadi;
modullarning ishlashi va sinovdan oʻtkazilishi davrida axborot xavfsizligi va kiberxavfsizlikni taʼminlaydi hamda berilgan modullarda ishlash toʻgʻriligini nazorat qiladi.
15. Bemorlar modullarga kiritilgan oʻzlari haqidagi maʼlumotlar, elektron tibbiy kartasi, kasallik tarixi yoki unga tayinlangan elektron retseptlarni “ DMED ” mobil ilovasi orqali koʻrishlari va yuklab olishlari mumkin.
16. Foydalanuvchilar quyidagi huquqlarga ega:
modullardagi bemorning maʼlumotlariga kirish;
modullarga bemor haqidagi maʼlumotlarni kiritish va mavjud maʼlumotlarni yangilash;
zarur hollarda elektron shaklda boshqa maʼlumotlarni uzatish.
17. Foydalanuvchilar:
modullardagi shaxsga doir maʼlumotlarni maxfiy saqlashi;
modullarga kirish huquqini (shu jumladan, modullarga kirish uchun Yagona identifikatsiya tizimi ( OneID ) login va paroli yoki elektron raqamli imzo kodlarini) boshqa shaxslarga bermasligi;
har bir tibbiy yozuvni real vaqtda kiritishi;
notoʻgʻri yoki soxta maʼlumot kiritish holatlariga yoʻl qoʻymasligi lozim.
3-bob. Yakuniy qoida
18. Mazkur Yoʻriqnoma talablarining buzilishida aybdor boʻlgan shaxslar qonunchilik hujjatlariga muvofiq javobgar boʻladilar.
Vazir А. XUDAYAROV
Raqamli texnologiyalar vazirining birinchi o'rinbosari O. UMAROV
Tadbirkorlik subyektlarining huquqlari va qonuniy manfaatlarini himoya qilish boʻyicha vakilining o'rinbosari J. URUNOV
Savdo-sanoat palatasi raisi D. VAXABOV
Toshkent sh.,
2025-yil 24-dekabr,
2025-yil 17-dekabr
2025-yil 10-dekabr
2025-yil 9-dekabr
19 -son