UzbekAI

Ўзбекистон Республикаси Вазирлар Маҳкамасининг

қарори

НИЗОМ

Ўзбекистон Республикасининг «Корпоратив муносабатларнинг ҳуқуқий асослари янада такомиллаштирилиши муносабати билан айрим қонун ҳужжатларига ўзгартириш ва қўшимчалар киритиш тўғрисида»ги Қонуни ижросини таъминлаш, шунингдек, Ўзбекистон Республикасидаги хорижий давлатларнинг дипломатик ваколатхоналари, консуллик муассасалари ва уларга тенглаштирилган Ташқи ишлар вазирлигида аккредитациядан ўтган ташкилотларнинг республикада бўлиш ва фаолият юритиш шароитларини янада яхшилаш, уларнинг ходимлари ҳаёти ва фаолияти учун муносиб шарт-шароитлар яратиш мақсадида Вазирлар Маҳкамаси қарор қилади:

1. Ўзбекистон Республикасининг «Корпоратив муносабатларнинг ҳуқуқий асослари янада такомиллаштирилиши муносабати билан Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида»ги Қонунига мувофиқ Ўзбекистон Республикасининг айрим қонун ҳужжатларига унитар корхона шаклини тугатиш билан боғлиқ ўзгартиришлар киритилгани маълумот учун қабул қилинсин.

2. Ташқи ишлар вазирлиги ҳузуридаги «Дипломатик сервис хизмати» давлат унитар корхонаси негизида Ташқи ишлар вазирлиги ҳузуридаги «Дипломатик сервис хизмати» давлат муассасаси (кейинги ўринларда — Дипсервис хизмати) ташкил этилсин.

3. Қуйидагилар Дипсервис хизматининг асосий вазифалари этиб белгилансин:

Ўзбекистон Республикасидаги хорижий давлатларнинг дипломатик ваколатхоналари, консуллик муассасалари ва уларга тенглаштирилган Ташқи ишлар вазирлигида аккредитациядан ўтган ташкилотларнинг (кейинги ўринларда — дипломатик ваколатхоналар) Ўзбекистон Республикасида фаолияти учун зарур шарт-шароитлар яратиш, уларга комплекс сервис хизматлари кўрсатиш, дипломатик ваколатхоналарнинг тегишли равишда фаолият кўрсатишини таъминлашга доир масалаларни ҳал этиш ва тегишли чора-тадбирларни амалга ошириш;

Ўзбекистон Республикасининг халқаро мажбуриятларда назарда тутилган дипломатик ваколатхоналарга хизмат кўрсатиш ва уларни жойлаштириш тадбирларини амалга ошириш;

дипломатик ваколатхоналар ва уларнинг ходимларини жойлаштириш учун ажратилган бино ҳамда хоналарни ижарага бериш, кўчмас мулкнинг ижара ва олди-сотди шартномаларини расмийлаштиришда кўмаклашиш (воситачилик қилиш), шунингдек, ушбу бино ва хоналардан фойдаланишни таъминлаш;

Ташқи ишлар вазирлигига хорижий давлатлар расмий делегацияларининг Ўзбекистонда бўлиши билан боғлиқ масалаларни ҳал этишда, Ҳукумат ва Ташқи ишлар вазирлиги томонидан халқаро тадбирларни Ҳукумат даражасида, шу жумладан, хорижий давлатларда ўтказишга, хорижий давлатларга хизмат сафарига борадиган ходимларга авиачипталар харид қилиш, шунингдек, автотранспорт хизматларини кўрсатишда кўмаклашиш;

Дипсервис хизмати вазифаларига тааллуқли масалаларда давлат органлари ва ташкилотларида дипломатик ваколатхоналарнинг манфаатларини ифода этиш, шунингдек, дипломатик ваколатхоналарда ишлайдиган Ўзбекистон Республикаси фуқароларининг меҳнат ҳуқуқларини ҳимоя қилиш;

дипломатик ваколатхоналар ходимларининг бўш вақти ва дам олишини ташкил этиш, туризм, жисмоний тарбия ва спорт соҳасида хизматлар кўрсатиш;

дипломатик ваколатхоналар, халқаро ҳукуматлараро ва ноҳукумат ташкилотлар, хорижий давлатларнинг ҳукумат ва ноҳукумат ташкилотлари, уларнинг ваколатхона ва филиаллари, мухбирлари, мухбирлик пунктлари (бюро, офислари), савдо ваколатхоналари, хорижий банклар ва бошқа тижорат ташкилотлари ваколатхоналари, доимий муассасалар, шунингдек чет эл инвестицияси ва капитали иштирокидаги корхоналар ҳамда Ўзбекистон Республикасида шахсий, хизмат ишлари бўйича, ўқиш ёки туризм мақсадида доимий яшайдиган ёки вақтинча бўладиган хорижий фуқароларга ва фуқаролиги бўлмаган шахсларга тегишли бўлган ёки улар томонидан ижарага олинган автотранспорт воситаларини рўйхатга олиш (қайта рўйхатга олиш), рўйхатдан чиқариш, техник кўрикдан ўтказиш, ҳайдовчилик гувоҳномаларининг эквивалентларини бериш (алмаштириш) ва рўйхатдан ўтказиш давлат рақами белгиларини бериш;

божхона ҳужжатларини расмийлаштириш, дипломатик ваколатхоналар номига келадиган юкларни декларациялаш, божхонада ишлов бериш;

дипломатик ваколатхоналарнинг радиоэлектрон алоқа воситалари ва радиоузатувчи қурилмаларни сотиб олиш, ўрнатиш, олиб кириш ва улардан фойдаланиш учун зарур ҳужжатларни расмийлаштириш;

дипломатик ваколатхоналар меҳмонларини рўйхатга олиш, уларнинг кириш визаларини расмийлаштириш ва уларга виза берилишида кўмаклашиш, дипломатик ваколатхоналарда ишлайдиган Ўзбекистон Республикаси фуқароларининг хорижга чиқиш ҳужжатларини расмийлаштириш;

Ўзбекистон Республикаси фуқароларини дипломатик ваколатхоналарга, шунингдек Ўзбекистон Республикаси ҳудудидаги хорижий тижорат ташкилотларининг ваколатхоналарига тегишли мурожаатга мувофиқ муддатли меҳнат шартномалари асосида уларнинг маҳаллий ходимларини ишга жойлаштиришни, ишга қабул қилиш ёки бўшатиш тўғрисида тегишли буйруқларни расмийлаштириш, иш стажи ҳисобини юритиш, меҳнат дафтарчаларини шакллантириш ва юритишни «Ягона миллий меҳнат тизими» идоралараро дастурий-аппарат комплекси орқали техник жиҳатдан амалга оширишда кўмаклашиш.

4. Белгилансинки:

а) Дипсервис хизмати:

Ташқи ишлар вазирлиги ҳузуридаги «Дипломатик сервис хизмати» давлат унитар корхонасининг барча ҳуқуқлари, мажбуриятлари ҳамда тузилган шартномалари бўйича ҳуқуқий вориси ҳисобланади;

фаолиятини ўзини ўзи молиялаштириш (хўжалик ҳисобида фаолият юритиш) асосида, қонунчилик ҳужжатлари билан тақиқланмаган пуллик хизматлар кўрсатиш орқали амалга оширади;

дипломатик ваколатхоналар ҳамда Ўзбекистондан харид қилинадиган маҳсулотлар (ишлар, хизматлар) қисмида Ташқи ишлар вазирлиги, Ўзбекистоннинг чет давлатлардаги дипломатик ваколатхоналари ва консуллик муассасаларига хизмат кўрсатиш, Ўзбекистон Республикаси ҳудудида дипломатик ваколатхоналар, шунингдек, Ўзбекистон Республикасининг хориждаги дипломатик ваколатхоналари ва консуллик муассасалари учун мўлжалланган объектлар ва уй-жойларни қуриш ҳамда реконструкция қилиш бўйича ягона буюртмачи ҳисобланади;

б) Дипсервис хизматининг устави, тузилмаси ва штатлар жадвали Ташқи ишлар вазирлиги томонидан тасдиқланади;

в) Дипсервис хизмати Тошкент шаҳри Шайхонтоҳур тумани Лабзак кўчаси 1а-уй манзилида ушбу бино ва иншоот белгиланган тартибда сотилгунга қадар оператив бошқариш ҳуқуқи билан жойлаштирилади.

5. Дипсервис хизмати қуйидаги ҳуқуқларга эга:

Дипсервис хизматининг оператив бошқарувида бўлган бўш бинолар (бинолар қисмлари) ва хоналарни хорижий тижорат ташкилотлари ваколатхоналарига, юридик ва жисмоний, шу жумладан чет эллик шахсларга тўғридан-тўғри кўчмас мулк ижараси шартномасини тузиш (электрон онлайн аукцион ўтказмасдан) орқали ижарага бериш, шунингдек ижара тўловларини мустақил тасарруф этиш;

хорижий тижорат ташкилотлари ваколатхона ва филиалларига, юридик ва жисмоний, шу жумладан, чет эллик шахсларга ўз хизматларини (ишларини) кўрсатиш;

Дипсервис хизмати фаолиятидан олинган даромадлардан Ўзбекистон Республикаси қонунчилигида белгиланган солиқлар ва йиғимлар тўланганидан сўнг ўзига юкланган вазифаларни амалга ошириш учун фойдаланиш.

6. Давлат активларини бошқариш агентлиги Ташқи ишлар вазирлигининг буюртманомалари бўйича янги очиладиган дипломатик ваколатхоналарни жойлаштириш учун қўшимча зарур бинолар ва хизмат хоналари ажратиб борилишини таъминласин.

7. Ўзбекистон Республикасидаги хорижий давлатларнинг дипломатик ваколатхоналари, консуллик муассасалари ва уларга тенглаштирилган Ташқи ишлар вазирлигида аккредитациядан ўтган ташкилотларига бинолар (бинолар қисми), хоналар ва ер участкаларини тақдим этиш (сотиш) тартиби тўғрисидаги низом 1-иловага мувофиқ тасдиқлансин.

8. Ташқи ишлар вазирлиги бир ой муддатда Дипсервис хизматининг устави, тузилмаси ва штатлар жадвалини тасдиқласин.

9. Ўзбекистон Республикаси Ҳукуматининг айрим қарорларига 2-иловага мувофиқ ўзгартиришлар киритилсин.

10. Ўзбекистон Республикаси Ҳукуматининг 3-иловага мувофиқ айрим қарорлари ўз кучини йўқотган деб ҳисоблансин.

11. Ушбу қарорнинг бажарилишини назорат қилиш Ўзбекистон Республикаси ташқи ишлар вазири Б.О. Саидов зиммасига юклансин.

Вазирлар Маҳкамасининг 2026 йил 23 январдаги 26-сон қарорига 1-ИЛОВА

1-боб. Умумий қоидалар

1. Ушбу Низом Ўзбекистон Республикасидаги хорижий давлатларнинг дипломатик ваколатхоналари, консуллик муассасалари ва уларга тенглаштирилган Ташқи ишлар вазирлигида аккредитациядан ўтган ташкилотларига (кейинги ўринларда дипломатик ваколатхоналар деб аталади) бинолар (бинолар қисми), хоналар ва ер участкаларини тақдим этиш (ижарага бериш, сотиш) тартибини белгилайди.

2. Дипломатик ваколатхоналарни жойлаштириш, уларнинг раҳбарлари ва чет эллик ходимлари яшаши учун ажратиладиган бинолар (бинолар қисми), хоналар ва уларга туташ ер участкалари Ўзбекистон Республикаси Ташқи ишлар вазирлигининг «Дипломатик сервис хизмати» давлат муассасаси (кейинги ўринларда — Дипсервис хизмати) томонидан ҳисобга олинади.

Дипломатик ваколатхоналар ва уларнинг чет эллик ходимларини жойлаштириш учун ажратилган бинолар (бинолар қисми) ва хоналарни ижарага бериш ҳуқуқи Дипсервис хизматига тегишлидир.

Дипломатик ваколатхоналарни жойлаштириш, уларнинг раҳбарлари ва чет эллик ходимлари яшаши учун ажратиладиган бинолар (бинолар қисми), хоналар ва уларга туташ ер участкалари, қоида тариқасида, Тошкент шаҳри ҳудудидан ажратилади.

3. Бинолар, хоналар ва ер участкаларини ижарага ва ўзгага бериш бўйича битимларни расмийлаштириш, шунингдек, уларга бўлган ҳуқуқларни давлат рўйхатидан ўтказиш қонунчилик ҳужжатларида, Ўзбекистон Республикасининг халқаро шартномаларида ва ушбу Низомда белгиланган тартибда амалга оширилади.

2-боб. Бинолар (бинолар қисми) ва хоналарни ижарага бериш тартиби

4. Дипломатик ваколатхоналар дипломатик ваколатхоналарни жойлаштириш, уларнинг раҳбарлари ва ходимлари яшаши учун бинолар (бинолар қисми) ва хоналарни мустақил равишда танлаш ёки зарур биноларни танлашда кўмаклашиш учун Дипсервис хизматига улардан фойдаланиш мақсади, майдони, хоналари сони, жойлашган жойи ва бошқа шартларни кўрсатган ҳолда мурожаат қилиш ҳуқуқига эга.

5. Дипломатик ваколатхонадан бинолар (бинолар қисми) ва хоналарни ижарага бериш тўғрисида мурожаат келиб тушганда, Дипсервис хизмати ўз оператив бошқарувида бўлган бўш бинолар (бинолар қисми) ва хоналарни кўриб чиқишни таклиф этади.

6. Келишувга эришилган тақдирда, Дипсервис хизмати дипломатик ваколатхона билан бинолар (бинолар қисми) ва хоналар ижараси бўйича икки томонлама кўчмас мулк ижара шартномасини тўғридан-тўғри (электрон онлайн аукцион ўтказмасдан) расмийлаштиради.

7. Ижара шартномаси Дипсервис хизмати билан дипломатик ваколатхона ўртасидаги муносабатларни тартибга солувчи асосий ҳужжат ҳисобланади ва унда жумладан, қуйидагилар назарда тутилиши керак:

ижарага бериладиган бино (бинонинг қисми) ва хонанинг таркиби, майдони ва техник тавсифи;

ижара тўлови, шунингдек, коммунал тўловлар миқдори;

бино (бинонинг қисми) ва хонани таъмирлаш ва жорий сақлаш бўйича томонлар мажбуриятларининг тақсимланиши;

ижара муддати, ижара тўлови ва бошқа тегишли тўловларни тўлаш муддатлари;

дипломатик ваколатхона томонидан коммунал хизматлар ва бино (бинонинг қисми), хоналар ва туташ ҳудудларни жорий сақлаш бўйича тўловларни тўлаш шартлари;

ижарага олинган бино (бинонинг қисми) ва хоналарга етказилган зарар учун ижарачининг жавобгарлиги;

томонларнинг шартнома шартларини бажармаганлиги учун жавобгарлик чоралари.

8. Дипсервис хизмати ижара тўлови ставкалари миқдорини мустақил равишда, бироқ давлат кўчмас мулкидан фойдаланганлик учун ижара тўловининг энг кам ставкаларидан келиб чиққан ҳолда ҳисобланган суммадан кам бўлмаган миқдорда белгилайди.

9. Халқаро шартномаларга асосан ижара тўлови бўйича харажатлар қуйидаги шартлар бўйича қопланади:

тўловларни ўзаро ҳисоблаш;

икки томонлама бепул (паритет асосида) асосда.

10. Бино (бинонинг қисми) ва хоналар тузилган ижара шартномаси бўйича томонларнинг ваколатли вакиллари иштирокида икки томонлама далолатномани тузиш орқали топширилади ва қабул қилинади ҳамда унда қуйидагилар кўрсатилади:

далолатнома тузилган жой ва сана;

иштирокчиларга томонлар манфаатларини ифода этиш ҳуқуқини берувчи ҳужжатларнинг номи ва реквизитлари;

бино (бинонинг қисми) ва хоналарни топшириш-қабул қилишда асос бўладиган ижара шартномасининг рақами ва имзоланган санаси;

тақдим этиладиган бино (бинонинг қисми) ва хоналарнинг техник ҳолати;

аниқланган носозликларни бартараф қилиш муддатлари ва тартиби;

томонларнинг муҳрлари билан тасдиқланган вакиллар имзолари.

Топшириш-қабул қилиш далолатномаси икки нусхада, ҳар икки томон учун бир нусхадан тузилади.

11. Дипломатик ваколатхоналар бинолар (бинолар қисми) ва хоналарни мустақил танлашда уни ижарага олиши тўғрисида Дипсервис хизматини олдиндан хабардор қилади ва ушбу бино ҳақидаги батафсил ахборотни (фойдаланиш мақсади, майдони, жойлашган жойи, мулкдор тўғрисида маълумотлар, тузиладиган битим шартлари ва бошқалар ҳақида) тақдим этади.

Бунда, дипломатик ваколатхоналарни давлат мулки ҳисобланган бинолар (бинолар қисми) ва хоналарга жойлаштириш Ўзбекистон Республикаси Президентининг қарорларига мувофиқ Давлат активларини бошқариш агентлиги, дипломатик ваколатхона ҳамда балансда сақловчи билан тузиладиган уч томонлама ижара шартномаси асосида амалга оширилади.

Қўшимча бино (бинонинг қисми) ва хоналарни ижарага олиш зарурати юзага келганда, дипломатик ваколатхона бунинг учун тегишли асос тақдим этади.

12. Дипсервис хизмати дипломатик ваколатхона томонидан бино (бинонинг қисми) ва хоналар тўғрисида тақдим этилган ахборотни хавфсизлик (шу жумладан ёнғин хавфсизлиги) талабларига жавоб бериши, техник ва санитария шартларига мувофиқлиги, дипломатик ваколатхона вазифаларининг тегишли равишда бажарилишини таъминлаш учун объектнинг ҳолати ва яроқлилигини баҳолаш бўйича ўрганади. Дипсервис хизмати ўрганиш якунлари бўйича дипломатик ваколатхонага тегишли тавсияларини юборади.

Ташқи ишлар вазирлиги дипломатик ваколатхонанинг кўрсатилган бино (бинонинг қисми) ва хоналарда жойлашиши мақсадга мувофиқлиги тўғрисидаги Ўзбекистон Республикасининг манфаатдор вазирлик ҳамда идоралари билан келишилган хулосасини Дипсервис хизматига тақдим этади.

13. Ўзбекистон Республикасининг жисмоний ёки нодавлат юридик шахслари мулки бўлган бинолар (бинолар қисми), хоналар ва уларга туташ ер участкалари дипломатик ваколатхонани жойлаштириш, уларнинг раҳбарлари ва ходимлари яшаши учун мулкдор томонидан мажбурий равишда Дипсервис хизмати орқали уч томонлама кўчмас мулк ижара шартномаларини тўғридан-тўғри (электрон онлайн аукцион ўтказмасдан) расмийлаштириш йўли билан тақдим этилади. Бунда, уч томонлама ижара шартномалари мазкур Низомнинг 7-бандида кўрсатилган талабларга мувофиқ расмийлаштирилади.

14. Дипломатик ваколатхоналар, уларнинг раҳбарлари ва ходимлари тақдим этилган бинолар (бинолар қисми), хоналар ва уларга туташ ер участкаларидан тузилган шартномалар шартларига мувофиқ, фақат мўлжалланган мақсад бўйича фойдаланади ва уларнинг тегишли ҳолатда сақланишини таъминлайди.

15. Дипломатик ваколатхоналар ва бинолар (бинолар қисми) ва хоналарнинг мулкдорлари ижара шартномаси шартларининг ҳар қандай ўзгартирилиши, муддати узайтирилиши ёки амал қилишининг бекор қилиниши тўғрисида Дипсервис хизматини олдиндан хабардор қилишлари шарт.

3-боб. Бинолар (бинолар қисми), хоналар ва ер участкаларини дипломатик ваколатхоналарга мулк қилиб сотиш тартиби

16. Дипломатик ваколатхоналар қонунчиликда белгиланган тартибда ваколатхоналар биноси, шу жумладан ваколатхона раҳбарининг қароргоҳи сифатида фойдаланиладиган бинолар ёки уларнинг қисмини ваколатхоналар жойлашган ер участкалари билан биргаликда, шунингдек, дипломатик ваколатхоналар биноларини қуриш учун ер участкаларини мулк қилиб сотиб олиш ҳуқуқига эга.

17. Дипломатик ваколатхоналар давлат мулки бўлган бинолар (бинолар қисми), хоналар ва ер участкаларини сотиб олиш учун Дипсервис хизматига улардан фойдаланиш мақсади, майдони, жойлашган жойи ва бошқа шартларини кўрсатган ҳолда мурожаат қилади.

Дипломатик ваколатхоналар қўшимча ва (ёки) мавжудларининг ўрнига бинолар (бинолар қисми), хоналар ва ер участкаларини сотиб олиш тўғрисида мурожаат қилса, Дипсервис хизматига ушбу бинолар ва ер участкаларининг батафсил тавсифини (фойдаланиш мақсади, майдони, жойлашган жойи) тақдим этади.

18. Дипсервис хизмати давлат мулки бўлган бинолар (бинолар қисми), хоналар ва ер участкаларини мулк қилиб сотиш тўғрисидаги масалани маҳаллий ижро этувчи ҳокимият органлари ва Ўзбекистон Республикасининг манфаатдор вазирлик ҳамда идоралари билан биргаликда қуйидаги мезонлардан келиб чиққан ҳолда кўриб чиқади:

дипломатик ваколатхона томонидан давлат мулки бўлган бинолар (бинолар қисми), хоналар ва ер участкаларини мулк қилиб сотиб олишнинг мақсадга мувофиқлиги тўғрисида Давлат активларини бошқариш агентлиги, Қурилиш ва уй-жой коммунал хўжалиги вазирлиги ҳамда Ташқи ишлар вазирлигининг хулосалари мавжудлиги;

Ўзбекистон томонининг бинолар (бинолар қисми), хоналар ва ер участкаларини сотиб олиш эҳтиёжлари ҳисобга олинган ҳолда, уларни мулк қилиб сотиш масалаларида Ўзбекистон Республикаси ва мурожаат қилган дипломатик ваколатхона давлати ўртасидаги ўзаро келишув принципларига риоя этиш;

мурожаат қилган дипломатик ваколатхона давлатида Ўзбекистон Республикасининг дипломатик ваколатхоналари ва консуллик муассасаларининг фаолият юритиши учун яратилган шарт-шароитлар даражаси.

19. Дипломатик ваколатхоналар тақдим этишни сўраган давлат мулки бўлган бинолар (бинолар қисми), хоналар ва ер участкаларининг мулк қилиб сотилишига тўсқинлик қилувчи асослар мавжуд бўлганда, Дипсервис хизмати Ўзбекистон Республикаси Ташқи ишлар вазирлиги билан келишган ҳолда бошқа муқобил бинолар (бинолар қисми), хоналар ва ер участкаларини тавсия қилиши мумкин.

20. Дипломатик ваколатхоналарга давлат мулки бўлган бинолар (бинолар қисми), хоналар ва ер участкаларини мулк қилиб сотиш мақсадга мувофиқ деб топилганда, Ўзбекистон Республикаси Ташқи ишлар вазирлиги Ўзбекистон Республикаси Президенти Администрациясига ёки Ўзбекистон Республикаси Вазирлар Маҳкамасига дипломатик ваколатхонага бинолар (бинолар қисми), хоналар ва ер участкаларини мулк қилиб сотиш тўғрисида таклиф киритади.

21. Агар дипломатик ваколатхонанинг таклифи ушбу Низомнинг 18-бандида кўрсатилган мезонларга мос келмаса, Ўзбекистон Республикаси Ташқи ишлар вазирлиги мурожаат қилган дипломатик ваколатхона давлати билан икки томонлама муносабатларнинг эришилган даражасини ҳисобга олиб, дипломатик ваколатхона томонидан эгаллаб турган бинолар (бинолар қисми), хоналар ва ер участкаларини бўшатиш шарти билан, давлат мулки бўлган бинолар (бинолар қисми), хоналар ва ер участкаларини мулк сифатида тақдим этиш тўғрисида дипломатик ваколатхонанинг мурожаатини қаноатлантириш ҳақида Ўзбекистон Республикаси Президенти Администрациясига ёки Ўзбекистон Республикаси Вазирлар Маҳкамасига таклиф киритиш ҳуқуқига эга.

22. Давлат кўчмас мулк объекти (бино қисми, хоналар) тегишли ер участкаси билан бирга мурожаат қилган дипломатик ваколатхонага халқаро шартномаларга мувофиқ Ўзбекистон Республикаси Президентининг қарорларига мувофиқ бозор қийматида реализация қилинади.

23. Дипломатик ваколатхоналарга бинолар (бинолар қисми), хоналар ва ер участкалари мурожаат қилган дипломатик ваколатхона давлати билан халқаро шартнома тузиш орқали ўзаро келишув (паритет) асосида мулк сифатида тақдим этилади.

24. Дипломатик ваколатхоналар бинолар (бинолар қисми), хоналар ва уларга туташ ер участкаларини Ўзбекистон Республикасининг жисмоний ва нодавлат юридик шахсларидан сотиб олган тақдирда, мазкур бинолар (бинолар қисми), хоналар ва ер участкаларининг мулкдори тўғрисида улардан фойдаланиш мақсади, майдони, жойлашган жойи ва бошқа шартлар кўрсатилган маълумотни ўз ичига олган хабарномани Дипсервис хизматига ўз вақтида юборади.

25. Ўзбекистон Республикасининг жисмоний ва нодавлат юридик шахсларига тегишли бинолар (бинолар қисми), хоналар ва ер участкаларини дипломатик ваколатхоналарга мулк сифатида сотиш тўғрисидаги битимлар нотариуслар томонидан Дипсервис хизмати билан келишилгандан сўнг расмийлаштирилади.

4-боб. Якунловчи қоида

26. Ушбу Низом талаблари бузилишида айбдор бўлган шахслар Ўзбекистон Республикаси қонун ҳужжатларида белгиланган тартибда жавобгар бўлади.

Вазирлар Маҳкамасининг 2026 йил 23 январдаги 26-сон қарорига 2-ИЛОВА

Ўзбекистон Республикаси Ҳукуматининг айрим қарорларига киритилаётган ўзгартиришлар

1. Вазирлар Маҳкамасининг 2001 йил 8 майдаги 207-сон қарори билан тасдиқланган Хорижий давлатларнинг Ўзбекистон Республикасидаги дипломатик ваколатхоналари ва консуллик муассасалари тўғрисидаги низомнинг 2.6-бандидаги «Ташқи ишлар вазирлигининг Дипломатик корпусга хизмат кўрсатиш бюроси» сўзлари «Ташқи ишлар вазирлиги ҳузуридаги «Дипломатик сервис хизмати» давлат муассасаси» сўзлари билан алмаштирилсин.

2. Вазирлар Маҳкамасининг 2006 йил 24 февралдаги 33-сон қарори билан тасдиқланган Ўзбекистон Республикаси ҳудудида хорижий давлатлар оммавий ахборот воситалари мухбирларининг касб фаолиятини тартибга солувчи асосий қоидаларда :

а) 17-бандда :

биринчи хатбошидаги «Ташқи ишлар вазирлиги Дипломатик корпусга хизмат кўрсатиш бюросининг» сўзлари «Ташқи ишлар вазирлиги ҳузуридаги «Дипломатик сервис хизмати» давлат муассасасининг» сўзлари билан алмаштирилсин;

иккинчи хатбошидаги «Дипломатик корпусга хизмат кўрсатиш бюроси» сўзлари ««Дипломатик сервис хизмати» давлат муассасаси» сўзлари билан алмаштирилсин;

б) 24-банддаги «Дипломатик корпусга хизмат кўрсатиш бюроси» сўзлари «Ташқи ишлар вазирлиги ҳузуридаги «Дипломатик сервис хизмати» давлат муассасаси» сўзлари билан алмаштирилсин.

3. Вазирлар Маҳкамасининг 2007 йил 27 июндаги 131-сон қарори билан тасдиқланган Автомототранспорт воситаларига ва уларнинг тиркамаларига бериладиган рўйхатдан ўтказиш давлат рақами белгиларида :

I типнинг биринчи хатбошиси қуйидаги таҳрирда баён этилсин:

«I тип — рўйхатдан ўтказиш давлат рақами белгилари юридик шахсларнинг автомобилларига берилади (чет эл инвестицияси ва капитали иштирокидаги корхоналар бундан мустасно)»;

IX типнинг бешинчи хатбошиси қуйидаги таҳрирда баён этилсин:

«аккредитация қилинган ва Ўзбекистон Республикаси ҳудудида фаолият кўрсатувчи хорижий тижорат ташкилотлари ваколатхоналарининг ва банкларнинг, шунингдек, чет эл инвестицияси ва капитали иштирокидаги корхоналарнинг хизмат эҳтиёжидаги автотранспорт воситаларига берилади»;

X типнинг биринчи хатбошиси қуйидаги таҳрирда баён этилсин:

«X тип — «H» серияли рўйхатдан ўтказиш давлат рақами белгилари Ташқи ишлар вазирлигининг хати асосида Ўзбекистон Республикасида шахсий, хизмат ишлари бўйича, ўқиш ёки туризм мақсадида доимий яшайдиган ёки вақтинча бўладиган хорижий фуқароларга ва фуқаролиги бўлмаган шахсларга тегишли бўлган ёки улар томонидан ижарага олинган транспорт воситаларига берилади».

4. Вазирлар Маҳкамасининг 2017 йил 31 августдаги 683-сон қарори билан тасдиқланган Автомототранспорт воситаларини давлат рўйхатидан ўтказиш тартиби тўғрисидаги низомнинг 15-банди иккинчи хатбошисидаги «Ташқи ишлар вазирлигининг Дипломатик корпусга хизмат кўрсатиш бюроси» сўзлари «Ташқи ишлар вазирлиги ҳузуридаги «Дипломатик сервис хизмати» давлат муассасаси» сўзлари билан алмаштирилсин.

5. Вазирлар Маҳкамасининг 2019 йил 17 сентябрдаги 778-сон қарори билан тасдиқланган Ўзбекистон Республикаси ҳудудида фойдаланилаётган, сотиш ёки шахсий фойдаланиш учун олиб кириладиган ва ишлаб чиқариладиган мобил қурилмаларни рўйхатга олиш тартиби тўғрисидаги низомнинг 10 1 -бандининг биринчи ва иккинчи хатбошиларидаги тегишли келишикдаги «Дипломатик корпусга хизмат кўрсатиш бюроси» сўзлари тегишли келишикдаги ««Дипломатик сервис хизмати» давлат муассасаси» сўзлари билан алмаштирилсин.

Вазирлар Маҳкамасининг 2026 йил 23 январдаги 26-сон қарорига 3-ИЛОВА

Ўзбекистон Республикаси Ҳукуматининг ўз кучини йўқотган деб ҳисобланаётган айрим қарорлари рўйхати

1. Вазирлар Маҳкамасининг «Хорижий давлатларнинг Ўзбекистон Республикасида аккредитациядан ўтган дипломатик ваколатхоналари, консуллик муассасалари ва уларга тенглаштирилган ташкилотларга хизмат кўрсатишни тубдан такомиллаштириш чора-тадбирлари тўғрисида» 2019 йил 2 июлдаги 550-сон қарори .

2. Вазирлар Маҳкамасининг «Ўзбекистон Республикаси Ҳукуматининг айрим қарорларига ўзгартиришлар ва қўшимча киритиш тўғрисида (Ўзбекистон Республикаси Президентининг «Ўзбекистон Республикасида нотариат тизимини тубдан ислоҳ қилиш чора-тадбирлари тўғрисида» 2019 йил 9 сентябрдаги ПФ-5816-сон Фармони)» 2020 йил 1 апрелдаги 195-сон қарорига илованинг 10-банди .

3. Вазирлар Маҳкамасининг «Ўзбекистон Республикаси Ҳукуматининг айрим қарорларига ўзгартиришлар киритиш тўғрисида (Ўзбекистон Республикасининг «Норматив-ҳуқуқий ҳужжатлар тўғрисида» 2021 йил 20 апрелдаги ЎРҚ-682-сон Қонуни)» 2022 йил 4 апрелдаги 153-сон қарорига илованинг 654-банди .

4. Вазирлар Маҳкамасининг «Савдо ва хизмат кўрсатиш соҳасида жамоатчилик назорати самарадорлигини оширишга доир қўшимча чора-тадбирлар тўғрисида» 2022 йил 12 майдаги 255-сон қарорига 3-илованинг 20-банди .

Ўзбекистон Республикасининг Бош вазири А. АРИПОВ

Тошкент ш.,

2026 йил 23 январь,

26-сон

(Қонунчилик маълумотлари миллий базаси, 26.01.2026 й., 09/26/26/0076-сон)

lex.uz

Oʻzbekiston Respublikasi Vazirlar Mahkamasining

qarori

NIZOM

Oʻzbekiston Respublikasining “Korporativ munosabatlarning huquqiy asoslari yanada takomillashtirilishi munosabati bilan ayrim qonun hujjatlariga oʻzgartirish va qoʻshimchalar kiritish toʻgʻrisida”gi Qonuni ijrosini taʼminlash, shuningdek, Oʻzbekiston Respublikasidagi xorijiy davlatlarning diplomatik vakolatxonalari, konsullik muassasalari va ularga tenglashtirilgan Tashqi ishlar vazirligida akkreditatsiyadan oʻtgan tashkilotlarning respublikada boʻlish va faoliyat yuritish sharoitlarini yanada yaxshilash, ularning xodimlari hayoti va faoliyati uchun munosib shart-sharoitlar yaratish maqsadida Vazirlar Mahkamasi qaror qiladi:

1. Oʻzbekiston Respublikasining “Korporativ munosabatlarning huquqiy asoslari yanada takomillashtirilishi munosabati bilan Oʻzbekiston Respublikasining ayrim qonun hujjatlariga oʻzgartirish va qoʻshimchalar kiritish toʻgʻrisida”gi Qonuniga muvofiq Oʻzbekiston Respublikasining ayrim qonun hujjatlariga unitar korxona shaklini tugatish bilan bogʻliq oʻzgartirishlar kiritilgani maʼlumot uchun qabul qilinsin.

2. Tashqi ishlar vazirligi huzuridagi “Diplomatik servis xizmati” davlat unitar korxonasi negizida Tashqi ishlar vazirligi huzuridagi “Diplomatik servis xizmati” davlat muassasasi (keyingi oʻrinlarda — Dipservis xizmati) tashkil etilsin.

3. Quyidagilar Dipservis xizmatining asosiy vazifalari etib belgilansin:

Oʻzbekiston Respublikasidagi xorijiy davlatlarning diplomatik vakolatxonalari, konsullik muassasalari va ularga tenglashtirilgan Tashqi ishlar vazirligida akkreditatsiyadan oʻtgan tashkilotlarning (keyingi oʻrinlarda — diplomatik vakolatxonalar) Oʻzbekiston Respublikasida faoliyati uchun zarur shart-sharoitlar yaratish, ularga kompleks servis xizmatlari koʻrsatish, diplomatik vakolatxonalarning tegishli ravishda faoliyat koʻrsatishini taʼminlashga doir masalalarni hal etish va tegishli chora-tadbirlarni amalga oshirish;

Oʻzbekiston Respublikasining xalqaro majburiyatlarda nazarda tutilgan diplomatik vakolatxonalarga xizmat koʻrsatish va ularni joylashtirish tadbirlarini amalga oshirish;

diplomatik vakolatxonalar va ularning xodimlarini joylashtirish uchun ajratilgan bino hamda xonalarni ijaraga berish, koʻchmas mulkning ijara va oldi-sotdi shartnomalarini rasmiylashtirishda koʻmaklashish (vositachilik qilish), shuningdek, ushbu bino va xonalardan foydalanishni taʼminlash;

Tashqi ishlar vazirligiga xorijiy davlatlar rasmiy delegatsiyalarining Oʻzbekistonda boʻlishi bilan bogʻliq masalalarni hal etishda, Hukumat va Tashqi ishlar vazirligi tomonidan xalqaro tadbirlarni Hukumat darajasida, shu jumladan, xorijiy davlatlarda oʻtkazishga, xorijiy davlatlarga xizmat safariga boradigan xodimlarga aviachiptalar xarid qilish, shuningdek, avtotransport xizmatlarini koʻrsatishda koʻmaklashish;

Dipservis xizmati vazifalariga taalluqli masalalarda davlat organlari va tashkilotlarida diplomatik vakolatxonalarning manfaatlarini ifoda etish, shuningdek, diplomatik vakolatxonalarda ishlaydigan Oʻzbekiston Respublikasi fuqarolarining mehnat huquqlarini himoya qilish;

diplomatik vakolatxonalar xodimlarining boʻsh vaqti va dam olishini tashkil etish, turizm, jismoniy tarbiya va sport sohasida xizmatlar koʻrsatish;

diplomatik vakolatxonalar, xalqaro hukumatlararo va nohukumat tashkilotlar, xorijiy davlatlarning hukumat va nohukumat tashkilotlari, ularning vakolatxona va filiallari, muxbirlari, muxbirlik punktlari (byuro, ofislari), savdo vakolatxonalari, xorijiy banklar va boshqa tijorat tashkilotlari vakolatxonalari, doimiy muassasalar, shuningdek chet el investitsiyasi va kapitali ishtirokidagi korxonalar hamda Oʻzbekiston Respublikasida shaxsiy, xizmat ishlari boʻyicha, oʻqish yoki turizm maqsadida doimiy yashaydigan yoki vaqtincha boʻladigan xorijiy fuqarolarga va fuqaroligi boʻlmagan shaxslarga tegishli boʻlgan yoki ular tomonidan ijaraga olingan avtotransport vositalarini roʻyxatga olish (qayta roʻyxatga olish), roʻyxatdan chiqarish, texnik koʻrikdan oʻtkazish, haydovchilik guvohnomalarining ekvivalentlarini berish (almashtirish) va roʻyxatdan oʻtkazish davlat raqami belgilarini berish;

bojxona hujjatlarini rasmiylashtirish, diplomatik vakolatxonalar nomiga keladigan yuklarni deklaratsiyalash, bojxonada ishlov berish;

diplomatik vakolatxonalarning radioelektron aloqa vositalari va radiouzatuvchi qurilmalarni sotib olish, oʻrnatish, olib kirish va ulardan foydalanish uchun zarur hujjatlarni rasmiylashtirish;

diplomatik vakolatxonalar mehmonlarini roʻyxatga olish, ularning kirish vizalarini rasmiylashtirish va ularga viza berilishida koʻmaklashish, diplomatik vakolatxonalarda ishlaydigan Oʻzbekiston Respublikasi fuqarolarining xorijga chiqish hujjatlarini rasmiylashtirish;

Oʻzbekiston Respublikasi fuqarolarini diplomatik vakolatxonalarga, shuningdek Oʻzbekiston Respublikasi hududidagi xorijiy tijorat tashkilotlarining vakolatxonalariga tegishli murojaatga muvofiq muddatli mehnat shartnomalari asosida ularning mahalliy xodimlarini ishga joylashtirishni, ishga qabul qilish yoki boʻshatish toʻgʻrisida tegishli buyruqlarni rasmiylashtirish, ish staji hisobini yuritish, mehnat daftarchalarini shakllantirish va yuritishni “Yagona milliy mehnat tizimi” idoralararo dasturiy-apparat kompleksi orqali texnik jihatdan amalga oshirishda koʻmaklashish.

4. Belgilansinki:

a) Dipservis xizmati:

Tashqi ishlar vazirligi huzuridagi “Diplomatik servis xizmati” davlat unitar korxonasining barcha huquqlari, majburiyatlari hamda tuzilgan shartnomalari boʻyicha huquqiy vorisi hisoblanadi;

faoliyatini oʻzini oʻzi moliyalashtirish (xoʻjalik hisobida faoliyat yuritish) asosida, qonunchilik hujjatlari bilan taqiqlanmagan pullik xizmatlar koʻrsatish orqali amalga oshiradi;

diplomatik vakolatxonalar hamda Oʻzbekistondan xarid qilinadigan mahsulotlar (ishlar, xizmatlar) qismida Tashqi ishlar vazirligi, Oʻzbekistonning chet davlatlardagi diplomatik vakolatxonalari va konsullik muassasalariga xizmat koʻrsatish, Oʻzbekiston Respublikasi hududida diplomatik vakolatxonalar, shuningdek, Oʻzbekiston Respublikasining xorijdagi diplomatik vakolatxonalari va konsullik muassasalari uchun moʻljallangan obyektlar va uy-joylarni qurish hamda rekonstruksiya qilish boʻyicha yagona buyurtmachi hisoblanadi;

b) Dipservis xizmatining ustavi, tuzilmasi va shtatlar jadvali Tashqi ishlar vazirligi tomonidan tasdiqlanadi;

v) Dipservis xizmati Toshkent shahri Shayxontohur tumani Labzak koʻchasi 1a-uy manzilida ushbu bino va inshoot belgilangan tartibda sotilgunga qadar operativ boshqarish huquqi bilan joylashtiriladi.

5. Dipservis xizmati quyidagi huquqlarga ega:

Dipservis xizmatining operativ boshqaruvida boʻlgan boʻsh binolar (binolar qismlari) va xonalarni xorijiy tijorat tashkilotlari vakolatxonalariga, yuridik va jismoniy, shu jumladan chet ellik shaxslarga toʻgʻridan-toʻgʻri koʻchmas mulk ijarasi shartnomasini tuzish (elektron onlayn auksion oʻtkazmasdan) orqali ijaraga berish, shuningdek ijara toʻlovlarini mustaqil tasarruf etish;

xorijiy tijorat tashkilotlari vakolatxona va filiallariga, yuridik va jismoniy, shu jumladan, chet ellik shaxslarga oʻz xizmatlarini (ishlarini) koʻrsatish;

Dipservis xizmati faoliyatidan olingan daromadlardan Oʻzbekiston Respublikasi qonunchiligida belgilangan soliqlar va yigʻimlar toʻlanganidan soʻng oʻziga yuklangan vazifalarni amalga oshirish uchun foydalanish.

6. Davlat aktivlarini boshqarish agentligi Tashqi ishlar vazirligining buyurtmanomalari boʻyicha yangi ochiladigan diplomatik vakolatxonalarni joylashtirish uchun qoʻshimcha zarur binolar va xizmat xonalari ajratib borilishini taʼminlasin.

7. Oʻzbekiston Respublikasidagi xorijiy davlatlarning diplomatik vakolatxonalari, konsullik muassasalari va ularga tenglashtirilgan Tashqi ishlar vazirligida akkreditatsiyadan oʻtgan tashkilotlariga binolar (binolar qismi), xonalar va yer uchastkalarini taqdim etish (sotish) tartibi toʻgʻrisidagi nizom 1-ilovaga muvofiq tasdiqlansin.

8. Tashqi ishlar vazirligi bir oy muddatda Dipservis xizmatining ustavi, tuzilmasi va shtatlar jadvalini tasdiqlasin.

9. Oʻzbekiston Respublikasi Hukumatining ayrim qarorlariga 2-ilovaga muvofiq oʻzgartirishlar kiritilsin.

10. Oʻzbekiston Respublikasi Hukumatining 3-ilovaga muvofiq ayrim qarorlari oʻz kuchini yoʻqotgan deb hisoblansin.

11. Ushbu qarorning bajarilishini nazorat qilish Oʻzbekiston Respublikasi tashqi ishlar vaziri B.O. Saidov zimmasiga yuklansin.

Vazirlar Mahkamasining 2026-yil 23-yanvardagi 26-son qaroriga 1-ILOVA

1-bob. Umumiy qoidalar

1. Ushbu Nizom Oʻzbekiston Respublikasidagi xorijiy davlatlarning diplomatik vakolatxonalari, konsullik muassasalari va ularga tenglashtirilgan Tashqi ishlar vazirligida akkreditatsiyadan oʻtgan tashkilotlariga (keyingi oʻrinlarda diplomatik vakolatxonalar deb ataladi) binolar (binolar qismi), xonalar va yer uchastkalarini taqdim etish (ijaraga berish, sotish) tartibini belgilaydi.

2. Diplomatik vakolatxonalarni joylashtirish, ularning rahbarlari va chet ellik xodimlari yashashi uchun ajratiladigan binolar (binolar qismi), xonalar va ularga tutash yer uchastkalari Oʻzbekiston Respublikasi Tashqi ishlar vazirligining “Diplomatik servis xizmati” davlat muassasasi (keyingi oʻrinlarda — Dipservis xizmati) tomonidan hisobga olinadi.

Diplomatik vakolatxonalar va ularning chet ellik xodimlarini joylashtirish uchun ajratilgan binolar (binolar qismi) va xonalarni ijaraga berish huquqi Dipservis xizmatiga tegishlidir.

Diplomatik vakolatxonalarni joylashtirish, ularning rahbarlari va chet ellik xodimlari yashashi uchun ajratiladigan binolar (binolar qismi), xonalar va ularga tutash yer uchastkalari, qoida tariqasida, Toshkent shahri hududidan ajratiladi.

3. Binolar, xonalar va yer uchastkalarini ijaraga va oʻzgaga berish boʻyicha bitimlarni rasmiylashtirish, shuningdek, ularga boʻlgan huquqlarni davlat roʻyxatidan oʻtkazish qonunchilik hujjatlarida, Oʻzbekiston Respublikasining xalqaro shartnomalarida va ushbu Nizomda belgilangan tartibda amalga oshiriladi.

2-bob. Binolar (binolar qismi) va xonalarni ijaraga berish tartibi

4. Diplomatik vakolatxonalar diplomatik vakolatxonalarni joylashtirish, ularning rahbarlari va xodimlari yashashi uchun binolar (binolar qismi) va xonalarni mustaqil ravishda tanlash yoki zarur binolarni tanlashda koʻmaklashish uchun Dipservis xizmatiga ulardan foydalanish maqsadi, maydoni, xonalari soni, joylashgan joyi va boshqa shartlarni koʻrsatgan holda murojaat qilish huquqiga ega.

5. Diplomatik vakolatxonadan binolar (binolar qismi) va xonalarni ijaraga berish toʻgʻrisida murojaat kelib tushganda, Dipservis xizmati oʻz operativ boshqaruvida boʻlgan boʻsh binolar (binolar qismi) va xonalarni koʻrib chiqishni taklif etadi.

6. Kelishuvga erishilgan taqdirda, Dipservis xizmati diplomatik vakolatxona bilan binolar (binolar qismi) va xonalar ijarasi boʻyicha ikki tomonlama koʻchmas mulk ijara shartnomasini toʻgʻridan-toʻgʻri (elektron onlayn auksion oʻtkazmasdan) rasmiylashtiradi.

7. Ijara shartnomasi Dipservis xizmati bilan diplomatik vakolatxona oʻrtasidagi munosabatlarni tartibga soluvchi asosiy hujjat hisoblanadi va unda jumladan, quyidagilar nazarda tutilishi kerak:

ijaraga beriladigan bino (binoning qismi) va xonaning tarkibi, maydoni va texnik tavsifi;

ijara toʻlovi, shuningdek, kommunal toʻlovlar miqdori;

bino (binoning qismi) va xonani taʼmirlash va joriy saqlash boʻyicha tomonlar majburiyatlarining taqsimlanishi;

ijara muddati, ijara toʻlovi va boshqa tegishli toʻlovlarni toʻlash muddatlari;

diplomatik vakolatxona tomonidan kommunal xizmatlar va bino (binoning qismi), xonalar va tutash hududlarni joriy saqlash boʻyicha toʻlovlarni toʻlash shartlari;

ijaraga olingan bino (binoning qismi) va xonalarga yetkazilgan zarar uchun ijarachining javobgarligi;

tomonlarning shartnoma shartlarini bajarmaganligi uchun javobgarlik choralari.

8. Dipservis xizmati ijara toʻlovi stavkalari miqdorini mustaqil ravishda, biroq davlat koʻchmas mulkidan foydalanganlik uchun ijara toʻlovining eng kam stavkalaridan kelib chiqqan holda hisoblangan summadan kam boʻlmagan miqdorda belgilaydi.

9. Xalqaro shartnomalarga asosan ijara toʻlovi boʻyicha xarajatlar quyidagi shartlar boʻyicha qoplanadi:

toʻlovlarni oʻzaro hisoblash;

ikki tomonlama bepul (paritet asosida) asosda.

10. Bino (binoning qismi) va xonalar tuzilgan ijara shartnomasi boʻyicha tomonlarning vakolatli vakillari ishtirokida ikki tomonlama dalolatnomani tuzish orqali topshiriladi va qabul qilinadi hamda unda quyidagilar koʻrsatiladi:

dalolatnoma tuzilgan joy va sana;

ishtirokchilarga tomonlar manfaatlarini ifoda etish huquqini beruvchi hujjatlarning nomi va rekvizitlari;

bino (binoning qismi) va xonalarni topshirish-qabul qilishda asos boʻladigan ijara shartnomasining raqami va imzolangan sanasi;

taqdim etiladigan bino (binoning qismi) va xonalarning texnik holati;

aniqlangan nosozliklarni bartaraf qilish muddatlari va tartibi;

tomonlarning muhrlari bilan tasdiqlangan vakillar imzolari.

Topshirish-qabul qilish dalolatnomasi ikki nusxada, har ikki tomon uchun bir nusxadan tuziladi.

11. Diplomatik vakolatxonalar binolar (binolar qismi) va xonalarni mustaqil tanlashda uni ijaraga olishi toʻgʻrisida Dipservis xizmatini oldindan xabardor qiladi va ushbu bino haqidagi batafsil axborotni (foydalanish maqsadi, maydoni, joylashgan joyi, mulkdor toʻgʻrisida maʼlumotlar, tuziladigan bitim shartlari va boshqalar haqida) taqdim etadi.

Bunda, diplomatik vakolatxonalarni davlat mulki hisoblangan binolar (binolar qismi) va xonalarga joylashtirish Oʻzbekiston Respublikasi Prezidentining qarorlariga muvofiq Davlat aktivlarini boshqarish agentligi, diplomatik vakolatxona hamda balansda saqlovchi bilan tuziladigan uch tomonlama ijara shartnomasi asosida amalga oshiriladi.

Qoʻshimcha bino (binoning qismi) va xonalarni ijaraga olish zarurati yuzaga kelganda, diplomatik vakolatxona buning uchun tegishli asos taqdim etadi.

12. Dipservis xizmati diplomatik vakolatxona tomonidan bino (binoning qismi) va xonalar toʻgʻrisida taqdim etilgan axborotni xavfsizlik (shu jumladan yongʻin xavfsizligi) talablariga javob berishi, texnik va sanitariya shartlariga muvofiqligi, diplomatik vakolatxona vazifalarining tegishli ravishda bajarilishini taʼminlash uchun obyektning holati va yaroqliligini baholash boʻyicha oʻrganadi. Dipservis xizmati oʻrganish yakunlari boʻyicha diplomatik vakolatxonaga tegishli tavsiyalarini yuboradi.

Tashqi ishlar vazirligi diplomatik vakolatxonaning koʻrsatilgan bino (binoning qismi) va xonalarda joylashishi maqsadga muvofiqligi toʻgʻrisidagi Oʻzbekiston Respublikasining manfaatdor vazirlik hamda idoralari bilan kelishilgan xulosasini Dipservis xizmatiga taqdim etadi.

13. Oʻzbekiston Respublikasining jismoniy yoki nodavlat yuridik shaxslari mulki boʻlgan binolar (binolar qismi), xonalar va ularga tutash yer uchastkalari diplomatik vakolatxonani joylashtirish, ularning rahbarlari va xodimlari yashashi uchun mulkdor tomonidan majburiy ravishda Dipservis xizmati orqali uch tomonlama koʻchmas mulk ijara shartnomalarini toʻgʻridan-toʻgʻri (elektron onlayn auksion oʻtkazmasdan) rasmiylashtirish yoʻli bilan taqdim etiladi. Bunda, uch tomonlama ijara shartnomalari mazkur Nizomning 7-bandida koʻrsatilgan talablarga muvofiq rasmiylashtiriladi.

14. Diplomatik vakolatxonalar, ularning rahbarlari va xodimlari taqdim etilgan binolar (binolar qismi), xonalar va ularga tutash yer uchastkalaridan tuzilgan shartnomalar shartlariga muvofiq, faqat moʻljallangan maqsad boʻyicha foydalanadi va ularning tegishli holatda saqlanishini taʼminlaydi.

15. Diplomatik vakolatxonalar va binolar (binolar qismi) va xonalarning mulkdorlari ijara shartnomasi shartlarining har qanday oʻzgartirilishi, muddati uzaytirilishi yoki amal qilishining bekor qilinishi toʻgʻrisida Dipservis xizmatini oldindan xabardor qilishlari shart.

3-bob. Binolar (binolar qismi), xonalar va yer uchastkalarini diplomatik vakolatxonalarga mulk qilib sotish tartibi

16. Diplomatik vakolatxonalar qonunchilikda belgilangan tartibda vakolatxonalar binosi, shu jumladan vakolatxona rahbarining qarorgohi sifatida foydalaniladigan binolar yoki ularning qismini vakolatxonalar joylashgan yer uchastkalari bilan birgalikda, shuningdek, diplomatik vakolatxonalar binolarini qurish uchun yer uchastkalarini mulk qilib sotib olish huquqiga ega.

17. Diplomatik vakolatxonalar davlat mulki boʻlgan binolar (binolar qismi), xonalar va yer uchastkalarini sotib olish uchun Dipservis xizmatiga ulardan foydalanish maqsadi, maydoni, joylashgan joyi va boshqa shartlarini koʻrsatgan holda murojaat qiladi.

Diplomatik vakolatxonalar qoʻshimcha va (yoki) mavjudlarining oʻrniga binolar (binolar qismi), xonalar va yer uchastkalarini sotib olish toʻgʻrisida murojaat qilsa, Dipservis xizmatiga ushbu binolar va yer uchastkalarining batafsil tavsifini (foydalanish maqsadi, maydoni, joylashgan joyi) taqdim etadi.

18. Dipservis xizmati davlat mulki boʻlgan binolar (binolar qismi), xonalar va yer uchastkalarini mulk qilib sotish toʻgʻrisidagi masalani mahalliy ijro etuvchi hokimiyat organlari va Oʻzbekiston Respublikasining manfaatdor vazirlik hamda idoralari bilan birgalikda quyidagi mezonlardan kelib chiqqan holda koʻrib chiqadi:

diplomatik vakolatxona tomonidan davlat mulki boʻlgan binolar (binolar qismi), xonalar va yer uchastkalarini mulk qilib sotib olishning maqsadga muvofiqligi toʻgʻrisida Davlat aktivlarini boshqarish agentligi, Qurilish va uy-joy kommunal xoʻjaligi vazirligi hamda Tashqi ishlar vazirligining xulosalari mavjudligi;

Oʻzbekiston tomonining binolar (binolar qismi), xonalar va yer uchastkalarini sotib olish ehtiyojlari hisobga olingan holda, ularni mulk qilib sotish masalalarida Oʻzbekiston Respublikasi va murojaat qilgan diplomatik vakolatxona davlati oʻrtasidagi oʻzaro kelishuv prinsiplariga rioya etish;

murojaat qilgan diplomatik vakolatxona davlatida Oʻzbekiston Respublikasining diplomatik vakolatxonalari va konsullik muassasalarining faoliyat yuritishi uchun yaratilgan shart-sharoitlar darajasi.

19. Diplomatik vakolatxonalar taqdim etishni soʻragan davlat mulki boʻlgan binolar (binolar qismi), xonalar va yer uchastkalarining mulk qilib sotilishiga toʻsqinlik qiluvchi asoslar mavjud boʻlganda, Dipservis xizmati Oʻzbekiston Respublikasi Tashqi ishlar vazirligi bilan kelishgan holda boshqa muqobil binolar (binolar qismi), xonalar va yer uchastkalarini tavsiya qilishi mumkin.

20. Diplomatik vakolatxonalarga davlat mulki boʻlgan binolar (binolar qismi), xonalar va yer uchastkalarini mulk qilib sotish maqsadga muvofiq deb topilganda, Oʻzbekiston Respublikasi Tashqi ishlar vazirligi Oʻzbekiston Respublikasi Prezidenti Administratsiyasiga yoki Oʻzbekiston Respublikasi Vazirlar Mahkamasiga diplomatik vakolatxonaga binolar (binolar qismi), xonalar va yer uchastkalarini mulk qilib sotish toʻgʻrisida taklif kiritadi.

21. Agar diplomatik vakolatxonaning taklifi ushbu Nizomning 18-bandida koʻrsatilgan mezonlarga mos kelmasa, Oʻzbekiston Respublikasi Tashqi ishlar vazirligi murojaat qilgan diplomatik vakolatxona davlati bilan ikki tomonlama munosabatlarning erishilgan darajasini hisobga olib, diplomatik vakolatxona tomonidan egallab turgan binolar (binolar qismi), xonalar va yer uchastkalarini boʻshatish sharti bilan, davlat mulki boʻlgan binolar (binolar qismi), xonalar va yer uchastkalarini mulk sifatida taqdim etish toʻgʻrisida diplomatik vakolatxonaning murojaatini qanoatlantirish haqida Oʻzbekiston Respublikasi Prezidenti Administratsiyasiga yoki Oʻzbekiston Respublikasi Vazirlar Mahkamasiga taklif kiritish huquqiga ega.

22. Davlat koʻchmas mulk obyekti (bino qismi, xonalar) tegishli yer uchastkasi bilan birga murojaat qilgan diplomatik vakolatxonaga xalqaro shartnomalarga muvofiq Oʻzbekiston Respublikasi Prezidentining qarorlariga muvofiq bozor qiymatida realizatsiya qilinadi.

23. Diplomatik vakolatxonalarga binolar (binolar qismi), xonalar va yer uchastkalari murojaat qilgan diplomatik vakolatxona davlati bilan xalqaro shartnoma tuzish orqali oʻzaro kelishuv (paritet) asosida mulk sifatida taqdim etiladi.

24. Diplomatik vakolatxonalar binolar (binolar qismi), xonalar va ularga tutash yer uchastkalarini Oʻzbekiston Respublikasining jismoniy va nodavlat yuridik shaxslaridan sotib olgan taqdirda, mazkur binolar (binolar qismi), xonalar va yer uchastkalarining mulkdori toʻgʻrisida ulardan foydalanish maqsadi, maydoni, joylashgan joyi va boshqa shartlar koʻrsatilgan maʼlumotni oʻz ichiga olgan xabarnomani Dipservis xizmatiga oʻz vaqtida yuboradi.

25. Oʻzbekiston Respublikasining jismoniy va nodavlat yuridik shaxslariga tegishli binolar (binolar qismi), xonalar va yer uchastkalarini diplomatik vakolatxonalarga mulk sifatida sotish toʻgʻrisidagi bitimlar notariuslar tomonidan Dipservis xizmati bilan kelishilgandan soʻng rasmiylashtiriladi.

4-bob. Yakunlovchi qoida

26. Ushbu Nizom talablari buzilishida aybdor boʻlgan shaxslar Oʻzbekiston Respublikasi qonun hujjatlarida belgilangan tartibda javobgar boʻladi.

Vazirlar Mahkamasining 2026-yil 23-yanvardagi 26-son qaroriga 2-ILOVA

Oʻzbekiston Respublikasi Hukumatining ayrim qarorlariga kiritilayotgan oʻzgartirishlar

1. Vazirlar Mahkamasining 2001-yil 8-maydagi 207-son qarori bilan tasdiqlangan Xorijiy davlatlarning Oʻzbekiston Respublikasidagi diplomatik vakolatxonalari va konsullik muassasalari toʻgʻrisidagi nizomning 2.6-bandidagi “Tashqi ishlar vazirligining Diplomatik korpusga xizmat koʻrsatish byurosi” soʻzlari “Tashqi ishlar vazirligi huzuridagi “Diplomatik servis xizmati” davlat muassasasi” soʻzlari bilan almashtirilsin.

2. Vazirlar Mahkamasining 2006-yil 24-fevraldagi 33-son qarori bilan tasdiqlangan Oʻzbekiston Respublikasi hududida xorijiy davlatlar ommaviy axborot vositalari muxbirlarining kasb faoliyatini tartibga soluvchi asosiy qoidalarda :

a) 17-bandda :

birinchi xatboshidagi “Tashqi ishlar vazirligi Diplomatik korpusga xizmat koʻrsatish byurosining” soʻzlari “Tashqi ishlar vazirligi huzuridagi “Diplomatik servis xizmati” davlat muassasasining” soʻzlari bilan almashtirilsin;

ikkinchi xatboshidagi “Diplomatik korpusga xizmat koʻrsatish byurosi” soʻzlari ““Diplomatik servis xizmati” davlat muassasasi” soʻzlari bilan almashtirilsin;

b) 24-banddagi “Diplomatik korpusga xizmat koʻrsatish byurosi” soʻzlari “Tashqi ishlar vazirligi huzuridagi “Diplomatik servis xizmati” davlat muassasasi” soʻzlari bilan almashtirilsin.

3. Vazirlar Mahkamasining 2007-yil 27-iyundagi 131-son qarori bilan tasdiqlangan Avtomototransport vositalariga va ularning tirkamalariga beriladigan roʻyxatdan oʻtkazish davlat raqami belgilarida :

I tipning birinchi xatboshisi quyidagi tahrirda bayon etilsin:

“I tip — roʻyxatdan oʻtkazish davlat raqami belgilari yuridik shaxslarning avtomobillariga beriladi (chet el investitsiyasi va kapitali ishtirokidagi korxonalar bundan mustasno)”;

IX tipning beshinchi xatboshisi quyidagi tahrirda bayon etilsin:

“akkreditatsiya qilingan va Oʻzbekiston Respublikasi hududida faoliyat koʻrsatuvchi xorijiy tijorat tashkilotlari vakolatxonalarining va banklarning, shuningdek, chet el investitsiyasi va kapitali ishtirokidagi korxonalarning xizmat ehtiyojidagi avtotransport vositalariga beriladi”;

X tipning birinchi xatboshisi quyidagi tahrirda bayon etilsin:

“X tip — “H” seriyali roʻyxatdan oʻtkazish davlat raqami belgilari Tashqi ishlar vazirligining xati asosida Oʻzbekiston Respublikasida shaxsiy, xizmat ishlari boʻyicha, oʻqish yoki turizm maqsadida doimiy yashaydigan yoki vaqtincha boʻladigan xorijiy fuqarolarga va fuqaroligi boʻlmagan shaxslarga tegishli boʻlgan yoki ular tomonidan ijaraga olingan transport vositalariga beriladi”.

4. Vazirlar Mahkamasining 2017-yil 31-avgustdagi 683-son qarori bilan tasdiqlangan Avtomototransport vositalarini davlat roʻyxatidan oʻtkazish tartibi toʻgʻrisidagi nizomning 15-bandi ikkinchi xatboshisidagi “Tashqi ishlar vazirligining Diplomatik korpusga xizmat koʻrsatish byurosi” soʻzlari “Tashqi ishlar vazirligi huzuridagi “Diplomatik servis xizmati” davlat muassasasi” soʻzlari bilan almashtirilsin.

5. Vazirlar Mahkamasining 2019-yil 17-sentabrdagi 778-son qarori bilan tasdiqlangan Oʻzbekiston Respublikasi hududida foydalanilayotgan, sotish yoki shaxsiy foydalanish uchun olib kiriladigan va ishlab chiqariladigan mobil qurilmalarni roʻyxatga olish tartibi toʻgʻrisidagi nizomning 10 1 -bandining birinchi va ikkinchi xatboshilaridagi tegishli kelishikdagi “Diplomatik korpusga xizmat koʻrsatish byurosi” soʻzlari tegishli kelishikdagi ““Diplomatik servis xizmati” davlat muassasasi” soʻzlari bilan almashtirilsin.

Vazirlar Mahkamasining 2026-yil 23-yanvardagi 26-son qaroriga 3-ILOVA

Oʻzbekiston Respublikasi Hukumatining oʻz kuchini yoʻqotgan deb hisoblanayotgan ayrim qarorlari roʻyxati

1. Vazirlar Mahkamasining “Xorijiy davlatlarning Oʻzbekiston Respublikasida akkreditatsiyadan oʻtgan diplomatik vakolatxonalari, konsullik muassasalari va ularga tenglashtirilgan tashkilotlarga xizmat koʻrsatishni tubdan takomillashtirish chora-tadbirlari toʻgʻrisida” 2019-yil 2-iyuldagi 550-son qarori .

2. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar va qoʻshimcha kiritish toʻgʻrisida (Oʻzbekiston Respublikasi Prezidentining “Oʻzbekiston Respublikasida notariat tizimini tubdan isloh qilish chora-tadbirlari toʻgʻrisida” 2019-yil 9-sentabrdagi PF-5816-son Farmoni)” 2020-yil 1-apreldagi 195-son qaroriga ilovaning 10-bandi .

3. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish toʻgʻrisida (Oʻzbekiston Respublikasining “Normativ-huquqiy hujjatlar toʻgʻrisida” 2021-yil 20-apreldagi OʻRQ-682-son Qonuni)” 2022-yil 4-apreldagi 153-son qaroriga ilovaning 654-bandi .

4. Vazirlar Mahkamasining “Savdo va xizmat koʻrsatish sohasida jamoatchilik nazorati samaradorligini oshirishga doir qoʻshimcha chora-tadbirlar toʻgʻrisida” 2022-yil 12-maydagi 255-son qaroriga 3-ilovaning 20-bandi .

Oʻzbekiston Respublikasining Bosh vaziri A. ARIPOV

Toshkent sh.,

2026-yil 23-yanvar,

26-son

(Qonunchilik maʼlumotlari milliy bazasi, 26.01.2026-y., 09/26/26/0076-son)

lex.uz