📅 2026-yil 30-yanvar · Vazirlik va idoralar hujjatlari · Adliya vaziri
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2026 йил 30 январь · Вазирлик ва идоралар ҳужжатлари · Адлия вазири
Расмий матн. Расмий ҳужжат. Таҳририй изоҳлар киритилмаган.
📅 30 января 2026 г. · Документы министерств и ведомств · Министр юстиции
Официальный текст. Официальный документ. Редакционные примечания не включены.
📅 30 January 2026 · Ministry and agency documents · Adliya vaziri
Official text. Official document. Editorial notes are not included.
Ўзбекистон Республикаси адлия вазирининг
буйруғи
НИЗОМ
БАҲОЛАШ БЮЛЛЕТЕНИ
ЙИҒМА БАҲОЛАШ БЮЛЛЕТЕНИ
Қорақалпоғистон Республикаси Адлия вазирлиги, вилоятлар ва Тошкент шаҳар адлия бошқармалари ҳузуридаги медиаторлар малака комиссиялари тўғрисидаги низомни тасдиқлаш ҳақида
Ўзбекистон Республикасининг «Медиация тўғрисида»ги Қонунига мувофиқ буюраман:
1. Қорақалпоғистон Республикаси Адлия вазирлиги, вилоятлар ва Тошкент шаҳар адлия бошқармалари ҳузуридаги медиаторлар малака комиссиялари тўғрисидаги низом иловага мувофиқ тасдиқлансин.
2. Ушбу буйруқ расмий эълон қилинган кундан эътиборан кучга киради.
Ўзбекистон Республикаси адлия вазирининг 2026 йил 30 январдаги 3-мҳ-сон буйруғига ИЛОВА
Қорақалпоғистон Республикаси Адлия вазирлиги, вилоятлар ва Тошкент шаҳар адлия бошқармалари ҳузуридаги медиаторлар малака комиссиялари тўғрисидаги
Мазкур Низом Қорақалпоғистон Республикаси Адлия вазирлиги, вилоятлар ва Тошкент шаҳар адлия бошқармалари ҳузуридаги медиаторлар малака комиссиялари (бундан буён матнда малака комиссиялари деб юритилади) фаолиятини ташкил этиш тартибини белгилайди.
1-боб. Умумий қоидалар
1. Мазкур Низомда қуйидаги асосий тушунчалар қўлланилади:
мурожаат — медиаторларнинг ноқонуний хатти-ҳаракатлари юзасидан жисмоний ва юридик шахсларнинг мурожаатлари, шунингдек ҳуқуқни муҳофаза қилувчи органларнинг тақдимномалари ва хат-хабарлари;
малака имтиҳони — Медиаторлар реестрига (бундан буён матнда Реестр деб юритилади) кириш истагида бўлган шахсларнинг медиация тўғрисидаги қонунчилик ҳужжатлари ҳамда медиацияни амалга ошириш бўйича билим ва малакасини аниқлаш жараёни;
интизомий иш юритиш — медиаторлар томонидан медиация тўғрисидаги қонунчилик ҳужжатлари, Медиаторнинг касб этикаси қоидалари (рўйхат рақами 3741, 2026 йил 5 январь) (бундан буён матнда Медиаторнинг касб этикаси қоидалари деб юритилади) бузилиши Қорақалпоғистон Республикаси Адлия вазирлиги, вилоятлар ва Тошкент шаҳар адлия бошқармалари (бундан буён матнда ҳудудий адлия органлари деб юритилади) томонидан аниқланганлиги, медиаторларнинг ноқонуний хатти-ҳаракатлари юзасидан мурожаатлар, суднинг медиаторларга нисбатан чиқарган хусусий ажрими бўйича малака комиссияси томонидан ўтказиладиган ўрганиш;
талабгор — Реестрга кириш мақсадида малака имтиҳонида иштирок этиш учун мурожаат қилган жисмоний шахс.
2. Малака комиссиялари медиаторларни Реестрга киритиш учун малака имтиҳонини ўтказиш ва уларнинг интизомий жавобгарлиги билан боғлиқ ишларни кўриб чиқиш мақсадида тузилади.
3. Малака комиссиялари ўз фаолиятида Ўзбекистон Республикасининг қонунчилик ҳужжатларига, Медиаторнинг касб этикаси қоидаларига ва мазкур Низомга амал қилади.
4. Малака комиссияси ўз ваколатлари доирасида қарорлар қабул қилишда мустақил ҳисобланади ва унинг фаолиятига аралашишга йўл қўйилмайди.
5. Малака комиссияларининг моддий-техника таъминоти тегишлилиги бўйича ҳудудий адлия органлари томонидан амалга оширилади.
2-боб. Малака комиссияларининг ҳуқуқ ва мажбуриятлари
6. Малака комиссияси ўз зиммасига юклатилган вазифаларни бажариш учун қуйидаги ҳуқуқларга эга:
мазкур Низомда назарда тутилган мурожаатларни кўриб чиқиш;
зарур бўлганда, медиаторлар, манфаатдор шахслар ва тегишли ташкилотлардан қўшимча ҳужжатларни сўраб олиш;
малака имтиҳонлари натижалари бўйича қарорлар қабул қилиш;
интизомий иш юритишни кўриб чиқиш натижалари бўйича қарорлар қабул қилиш.
7. Малака комиссиялари ўз зиммаларига юклатилган вазифаларни бажаришда қуйидагиларга мажбур:
малака комиссиясига киритилган масалаларни ҳар томонлама ва холисона кўриб чиқиш;
қонунчилик ҳужжатларига, Медиаторнинг касб этикаси қоидаларига ва медиациянинг асосий принципларига қатъий риоя этиш;
медиациянинг махфийлигини таъминлаш чораларини кўриш;
Ўзбекистон Республикаси Адлия вазирлиги ҳузуридаги Медиаторлар олий малака комиссиясининг (бундан буён матнда Олий малака комиссияси деб юритилади) қарорларини ижро этиш.
3-боб. Малака комиссияларининг фаолиятини ташкил этиш
8. Малака комиссияси медиаторлар, фуқаролик жамияти институтлари вакиллари, ҳудудий адлия органларининг ҳамда бошқа ташкилотларнинг ҳуқуқ соҳасида тажрибага эга бўлган ходимлари орасидан етти нафар аъзодан иборат бўлган таркибда ҳудудий адлия органлари биринчи раҳбарининг буйруғи билан уч йил муддатга тасдиқланади.
Бунда, малака комиссиясининг аъзолигига медиаторлардан номзодлар медиаторлик фаолияти бўйича камида икки йиллик иш стажига эга бўлган медиаторлар орасидан танлаб олинади.
9. Бир шахс бир вақтнинг ўзида малака комиссиясининг ва Олий малака комиссияси аъзоси бўлиши мумкин эмас.
10. Ҳудудий адлия органларининг нотариат, адвокатура ва медиация соҳасига раҳбарлик қилувчи ўринбосари малака комиссияси раиси ҳисобланади.
Ҳудудий адлия органлари нотариат, адвокатура ва медиация бўлимининг (шўбасининг) медиация соҳаси бўйича масъул ходими малака комиссияси котиби (бундан буён матнда котиб деб юритилади) этиб тайинланади.
Котиб малака комиссияси аъзоси ҳисобланмайди ва мажлисларда овоз бериш ҳуқуқига эга бўлмайди.
11. Қуйидаги ҳолатларда малака комиссияси аъзоси малака комиссияси таркибидан чиқарилади:
ўз аризасига биноан;
медиаторнинг фаолияти тўхтатиб турилганда ёки медиатор Реестрдан чиқарилганда;
ҳудудий адлия органлари ва бошқа ташкилотлар ходимларининг иш жойи ўзгарганда ёки ходимлар ишдан бўшатилганда;
малака комиссияси аъзоси томонидан мазкур Низом талаблари қўпол равишда бузилганда;
малака комиссияси аъзоси соғлиғининг ҳолатига кўра вазифаларини бажариш имкони бўлмаганда;
малака комиссияси аъзоси комиссия йиғилишларида кетма-кет уч марта узрли сабабларсиз иштирок этмаган тақдирда.
Ушбу банднинг бешинчи — еттинчи хатбошиларида назарда тутилган асослар бўйича малака комиссияси аъзосини малака комиссияси таркибидан чиқариш масаласи комиссия раиси томонидан навбатдаги малака комиссияси мажлисига киритилади.
Малака комиссияси аъзосини комиссия таркибидан чиқариш тўғрисидаги қарор комиссия аъзоларининг кўпчилик овози билан қабул қилинади.
Қарор қабул қилинган кундан эътиборан уч иш куни ичида комиссия таркибидан чиқарилган комиссия аъзосига ёзма равишда маълум қилинади.
Малака комиссияси аъзоси комиссия таркибидан чиқарилганлиги тўғрисидаги қарорни олган кундан эътиборан бир ой муддатда Олий малака комиссиясига ёки судга шикоят қилиши мумкин.
Малака комиссияси аъзосини ушбу банднинг иккинчи — еттинчи хатбошиларида назарда тутилмаган асослар бўйича комиссия таркибидан чиқарилишига йўл қўйилмайди.
Малака комиссия таркибидан чиқарилган аъзо ўрнига малака комиссияси раиси тақдимномасига кўра, ҳудудий адлия органи раҳбарининг буйруғи билан янги комиссия аъзоси киритилади.
12. Малака комиссиясининг аъзоси бўлган медиаторга нисбатан интизомий иш юритиш кўриб чиқилаётганда ёки малака комиссияси аъзосидан малака имтиҳони қабул қилинаётганда улар тегишли малака комиссияси мажлисида қатнашишга ҳақли эмас.
Малака комиссияси аъзоси:
малака комиссияси мажлисида кўрилаётган масалалар бўйича талабгор, медиатор ва бошқа манфаатдор шахснинг яқин қариндоши бўлса;
малака комиссияси мажлисининг натижасидан ва унда қабул қилинадиган қарордан бевосита ёки билвосита манфаатдор бўлса ёхуд унинг беғаразлигига шубҳа туғдирадиган бошқа ҳолатлар мавжуд бўлса, малака комиссияси мажлисида иштирок этиши мумкин эмас ва у рад этилиши лозим.
Мазкур банднинг учинчи ва тўртинчи хатбошиларида кўрсатилган ҳолатлар мавжуд бўлган тақдирда, малака комиссияси аъзоси ўзини ўзи рад этиши шарт. Агар у бундай қилмаса, айни шу асослар бўйича малака комиссиянинг бошқа аъзолари томонидан, шунингдек масаласи кўрилаётган талабгорлар, медиаторлар ва бошқа манфаатдор шахслар томонидан рад этилиши мумкин.
Рад этиш ҳақидаги баёнот асослантирилган бўлиши керак.
Рад этилиши билдирилган малака комиссияси аъзоси рад этиш тўғрисидаги масала кўрилишидан олдин ўз тушунтиришини беришга ҳақли.
Рад этиш тўғрисидаги масала рад қилинаётган шахснинг йўқлигида малака комиссиясининг қолган аъзолари томонидан кўпчилик овози билан ҳал этилади. Овозлар тенг бўлиб қолган тақдирда ҳам, ушбу комиссия аъзоси рад этилган ҳисобланади.
13. Малака комиссияси раиси узрли сабабларга кўра (касаллиги, яқин қариндошларининг вафоти, меҳнат таътили, Ўзбекистон Республикасидан ташқарида бўлиши сабабли) ишда бўлмаган ҳолларда ҳудудий адлия органи раҳбарининг буйруғи билан унинг бошқа ўринбосари вақтинча малака комиссияси раиси этиб тайинланади.
14. Малака комиссияси раиси комиссиянинг навбатдаги йиғилиши ўтказиладиган кун ва вақтни белгилайди, шунингдек комиссия йиғилишларини ўтказади ва уларга раҳбарлик қилади.
15. Малака комиссияси раиси комиссия ишини ташкил қилиш ҳамда унинг ўз вақтида, тўғри ва ҳаққоний ўтказилиши учун масъул ҳисобланади.
16. Малака комиссияси мажлиси, агар унда тегишли комиссия аъзоларининг камида учдан икки қисми қатнашса, ваколатли (кворумга эга) ҳисобланади.
Ваколатли (кворумга эга) бўлмаган ҳолда тегишли комиссиянинг мажлисда ҳозир бўлган аъзолари томонидан мажлисни кейинга қолдириш тўғрисида қарор қабул қилинади ҳамда манфаатдор шахслар мажлис ўтказиладиган сана, вақт ва жой ҳақида қўшимча равишда хабар қилинади.
17. Малака комиссиясининг мажлисларида Олий малака комиссиясининг аъзолари овоз бериш ҳуқуқисиз кузатувчи сифатида иштирок этишга ҳақли.
18. Малака комиссиясининг мажлислари заруратга қараб, лекин бир ойда камида бир марта ўтказилади.
Малака комиссияси раиси комиссия мажлиси ўтказилишидан камида етти кун олдин мажлиснинг кун тартиби, санаси, вақти ва жойини белгилайди.
Котиб комиссия мажлиси ўтказилишидан камида беш кун олдин мажлис ўтказиладиган сана, вақт ва жой ҳақида комиссия мажлисида иштирок этадиган манфаатдор шахсларни ёзма ёки электрон шаклда хабардор қилади.
19. Малака комиссиясининг қарорлари унинг мажлисида қатнашаётган комиссия аъзоларининг оддий кўпчилик овози билан, очиқ овоз бериш орқали қабул қилинади. Овозлар тенг бўлганда, раислик қилувчининг овози ҳал қилувчи овоз ҳисобланади.
Малака комиссиясининг қарорлари улар қайси мажлисда қабул қилинган бўлса, ўша мажлисда раислик қилувчи томонидан эълон қилинади.
20. Малака комиссиясининг ишини юритиш котиб томонидан амалга оширилади.
21. Котиб:
малака имтиҳонини топшириш бўйича талабгорларнинг ариза ва ҳужжатларини ўрганиб чиқади;
интизомий иш юритишга тааллуқли ҳужжатларни қабул қилади;
малака комиссияси мажлисида кўриб чиқиш учун материалларни тайёрлашни амалга оширади ва уларнинг сақланишини таъминлайди;
малака комиссияси аъзоларини, шунингдек қайси медиаторга нисбатан интизомий иш юритиш олиб борилаётган бўлса, ўша медиаторни ва бошқа манфаатдор шахсларни комиссия мажлиси ўтказиладиган сана, вақт ва жой тўғрисида хабардор қилади;
малака комиссияси аъзолари ва манфаатдор шахсларнинг мажлисда ҳозир бўлганлигини текширади, ҳозир бўлмаганлик сабабларини аниқлайди ва бу ҳақида малака комиссиясига ахборот беради;
интизомий иш юритиш билан боғлиқ маълумот олиш учун тегишли ташкилотлар ёки шахсларга сўровнома юборилишини ташкил этади;
малака комиссияси мажлисларининг баённомаларини юритади;
малака имтиҳонини топширган ва топширмаган талабгорларнинг ҳисобини юритади;
раислик қилувчининг малака комиссияси мажлисига тайёргарлик кўриш ва уни ўтказиш билан боғлиқ бошқа топшириқларини, шунингдек мазкур Низомга мувофиқ бошқа вазифаларни ҳам бажаради.
22. Малака комиссияси мажлисларида манфаатдор шахслар, шу жумладан талабгорлар видеоконференцалоқа тизимида иштирок этиши мумкин.
23. Малака комиссиясининг мажлисларида баённома юритилади, у мажлисда раислик этувчи ва котиб томонидан имзоланади.
Малака комиссиясининг қароридан норози бўлган малака комиссиясининг аъзоси комиссия мажлисининг баённомасига киритиладиган ўзининг нуқтаи назарини ёзма ёки электрон шаклда баён этишга ҳақли.
Малака комиссияси мажлислари баённомаси ёзма ёки электрон шаклда расмийлаштирилиши мумкин.
24. Малака комиссияси мажлисининг кун тартибига киритилган масалаларга қараб, баённомада:
мажлис ўтказилган сана ва жой (видеоконференцалоқа орқали мажлис ўтказилганда, бу ҳақида алоҳида кўрсатилади);
мажлисда қатнашган малака комиссияси аъзоларининг рўйхати;
мажлиснинг кун тартиби;
талабгорлар тўғрисидаги маълумот;
талабгор томонидан малака имтиҳонини топшириш учун тасодифий танланган саволлар мазмуни ва жавоблари;
малака комиссияси аъзолари томонидан берилган қўшимча саволлар ва талабгорнинг жавоблари;
баҳолаш бюллетенларидаги балларни ҳисоблаш натижалари, шу жумладан талабгор томонидан тўпланган баллар;
мурожаатлар мазмуни;
интизомий иш юритишга оид ҳолатлар, малака комиссияси аъзоларининг, манфаатдор шахсларнинг сўзга чиқишлари ҳамда тегишли ташкилотлар томонидан тақдим этилган ҳужжатларнинг асосий мазмуни;
интизомий иш юритишни кўриб чиқиш натижалари бўйича овоз бериш якунлари;
малака комиссияси аъзолари томонидан билдирилган фикрлар;
мажлиснинг кун тартибига киритилган ҳар бир масала бўйича қарорлар;
малака комиссияси қарорлари устидан шикоят қилиш тартиби;
қарор қабул қилиш учун зарур бўлган бошқа маълумотлар акс эттирилади.
Баҳолаш бюллетенлари ва малака комиссияси аъзолари рўйхати мажлис баённомасига илова қилинади.
25. Малака комиссияси мажлисининг баённомасидан кўчирмалар қарор қабул қилинган кундан эътиборан уч иш кунидан кечиктирмай котибнинг имзоси (электрон имзоси) билан манфаатдор шахсларга ёзма ёки электрон шаклда юборилади.
Малака комиссияси мажлиси баённомасидан кўчирмаларда комиссия мажлиси ўтказилган сана ва жой тўғрисидаги маълумотлар, комиссия мажлисининг кун тартибига киритилган қисмидаги, тегишли манфаатдор шахсларга тааллуқли бўлган масала бўйича қарор ва ушбу қарор устидан шикоят қилиш тартиби баён этилади.
4-боб. Талабгорлардан малака имтиҳонини қабул қилиш
26. Малака имтиҳони Ўзбекистон Республикаси Вазирлар Маҳкамасининг 2026 йил 1 апрелдаги 140-сон қарори билан тасдиқланган Жисмоний шахсларни Медиаторлар реестрига киритиш бўйича давлат хизматини кўрсатишнинг маъмурий регламентига мувофиқ талабгорлар ҳужжат топширган кундан эътиборан бир ой ичида ўтказилади.
27. Талабгорлар малака комиссиясининг мажлисига узрли сабабларга кўра (касаллиги, яқин қариндошларининг вафоти, меҳнат таътили, Ўзбекистон Республикасидан ташқарида бўлиши сабабли) иштирок эта олмаса, бу ҳақида малака комиссияси мажлиси бошланишидан аввал, узрли сабабларни баён қилган ҳолда хабар бериши шарт. Бунда, котиб талабгорга навбатдаги малака комиссиясида мазкур Низомнинг 18-бандида белгиланган муддатда мажлис ўтказиладиган сана, вақт ва жой тўғрисида хабардор қилади.
28. Котиб малака имтиҳонида иштирок этадиган талабгорлар рўйхатини ва талабгорлар ҳақидаги маълумотларни малака комиссияси аъзоларига малака имтиҳони ўтказиладиган кундан камида бир иш куни олдин тақдим этади.
Малака имтиҳонида иштирок этадиган талабгорлар рўйхатига аввалги малака имтиҳонида узрли сабабларга кўра иштирок этмаган талабгорлар ҳам киритилади.
29. Малака имтиҳони барча талабгорлар учун битта хонада, оғзаки суҳбат тарзида ўтказилади.
Малака имтиҳони ўтказилаётган хонада бегона шахсларнинг бўлмаслиги улар жойлашган жой шовқиндан ҳоли, ёруғ бўлиши ва видеотасвир тиниқ кўриниши лозим.
Малака имтиҳони видеоконференцалоқа режимида ўтказилган ҳолларда, малака комиссияси аъзолари талабгор билан видеоконференцалоқа режимида мулоқот қилишни бошлашдан аввал, талабгор жойлашган жойда бошқа шахсларнинг йўқлигига ишонч ҳосил қилиш учун талабгордан жойнинг 360 градус айланасини кўрсатишни талаб қилиши лозим.
Малака имтиҳони жараёни аудио ва видеоёзувларда қайд этиб борилади ҳамда ҳудудий адлия органларининг ижтимоий тармоқлари ва (ёки) расмий веб-сайтида реал вақт режимида трансляция қилинади.
30. Малака имтиҳони учун Ўзбекистон Республикаси Адлия вазирлиги томонидан медиаторларни тайёрлаш дастури асосида ўқитилган мавзулар доирасида саволлар рўйхати тузилади ҳамда Олий малака комиссияси раиси томонидан тасдиқланади.
Саволлар рўйхати Ўзбекистон Республикаси Адлия вазирлигининг расмий веб-сайтида эълон қилиниб, қонунчиликка киритилган ўзгартириш ва қўшимчаларга асосан доимий равишда янгилаб борилади.
31. Малака имтиҳони учта саволдан иборат бўлиб, саволлар талабгор томонидан малака имтиҳони топширилаётган вақтда электрон дастур орқали тасодифий тарзда танланади ҳамда талабгорга имтиҳон саволларига тайёрланиш учун 15 дақиқа вақт берилади.
Бунда, малака имтиҳони видеоконференцалоқа режимида ўтказилган ҳолларда тайёрланиш учун қўшимча вақт берилмайди.
32. Имтиҳон саволларига жавоб беришга тайёрланишда талабгорларга:
бошқа талабгорлар билан суҳбатлашиш;
ахборот манбаи сифатида хизмат қилиши мумкин бўлган қонунчилик ҳужжатларидан, адабиётлардан, ҳар қандай турдаги техника воситалари ёки бошқа ҳужжатлар ва воситалардан фойдаланиш;
имтиҳон саволларига жавоб бермасдан олдин хонани тарк этиш ёки видеоконференцалоқани чеклаш (тўхтатиш) тақиқланади.
33. Видеоконференцалоқа ёрдамида малака имтиҳонини топшириш жараёнида саволлар танлангандан сўнг техник носозликлар сабабли видеоконференцалоқада узилишлар юзага келган тақдирда, видеоконференцалоқа қайта тиклангандан сўнг малака имтиҳони саволлари такроран танланади.
34. Малака комиссияси аъзолари томонидан электрон дастур орқали танланган саволларга берилган жавобларни аниқлаштириш мақсадида қўшимча саволлар берилиши мумкин.
Бунда, қўшимча саволлар танланган саволлар доирасидан четга чиқмаслиги лозим.
35. Малака имтиҳони натижасини аниқлаш учун комиссиянинг ҳар бир аъзоси бошқа аъзолардан мустақил ҳолда мазкур Низомнинг 1-иловасига мувофиқ шаклда баҳолаш бюллетенида талабгорнинг саволларга берган жавобини 10 баллик тизимда баҳолайди.
Бунда, малака комиссиясининг ҳар бир аъзоси талабгорни қуйидаги мезонларга асосан баҳолайди:
берилган саволларга тўлиқ ва аниқ жавоб бериши, фаолият соҳаси билан боғлиқ тизимли билимларга эга бўлиши, улардан ўз касб фаолиятида мустақил фойдаланишни билиши — 9-10 балл;
берилган саволларга аниқ, бироқ тўлиқ жавоб беролмаслиги, фаолият соҳаси билан боғлиқ билимларга эга бўлиши, улардан ўз касб фаолиятида фойдаланишни билиши — 7-8 балл;
берилган саволларга тўлиқ жавоб беролмаслиги, фаолият соҳаси билан боғлиқ билимларга етарли даражада эга бўлиши, улардан ўз касб фаолиятида фойдаланишни билиши — 5-6 балл;
берилган саволларга ноаниқ жавоб бериши, фаолият соҳаси билан боғлиқ билимларга эга бўлиши, улардан ўз касб фаолиятида фойдаланишни билмаслиги — 3-4 балл;
берилган саволларга ноаниқ жавоб бериши, фаолият соҳаси билан боғлиқ билимларга етарли даражада эга эмаслиги — 1-2 балл;
берилган саволларга умуман жавоб бера олмаслиги — 0 балл.
36. Талабгорлар имтиҳон саволларига жавоб бериб бўлгандан кейин малака имтиҳони ўтказилган хонани тарк этиши керак.
Видеоконференцалоқа ёрдамида малака имтиҳонида иштирок этган талабгорлар малака имтиҳони якунлангунига қадар видеоконференцалоқада қолиши мумкин. Бунда, малака комиссияси аъзолари томонидан овоз бериш ва баҳолаш жараёнлари амалга оширилаётган вақтда талабгорлар учун аудио ва видео алоқадан фойдаланиш чекланади.
37. Малака имтиҳони якунлари бўйича малака комиссияси аъзолари томонидан талабгорга қўйилган баллар комиссия котиби томонидан ҳисоблаб чиқарилади. Ҳисоблаш натижалари мазкур Низомнинг 2-иловасига мувофиқ шаклдаги йиғма баҳолаш бюллетенига киритилади ва комиссия аъзоларига тақдим этилади.
Талабгор тўплаган балл тўпланиши мумкин бўлган энг юқори баллнинг 56 фоизидан кам бўлмаган тақдирда, талабгорни малака имтиҳонини топширган деб топиш тўғрисида малака комиссиясининг қарори қабул қилинади.
Талабгор тўплаган балл тўпланиши мумкин бўлган энг юқори баллнинг 56 фоизидан кам бўлган тақдирда, талабгорни малака имтиҳонини топширмаган деб топиш тўғрисида малака комиссиясининг қарори қабул қилинади.
38. Малака имтиҳони натижалари талабгорлар иштирокида малака комиссияси раиси томонидан ўқиб эшиттирилади.
39. Малака имтиҳонига оид ҳужжатлар уч йил мобайнида ҳудудий адлия органларида сақланади.
40. Малака комиссиясининг талабгорларни малака имтиҳонини топширган деб топиш тўғрисидаги қарори талабгорларни Реестрга киритиш учун асос бўлади.
5-боб. Медиаторларга нисбатан интизомий иш юритиш
41. Интизомий иш юритишни қўзғатиш учун қуйидагилар асос бўлади:
медиация тўғрисидаги қонунчилик ҳужжатларининг, Медиаторнинг касб этикаси қоидаларининг медиаторлар томонидан бузилиш ҳолатлари ҳудудий адлия органлари томонидан аниқланганлиги;
мурожаатлар;
суднинг медиаторга нисбатан чиқарган хусусий ажрими.
42. Интизомий иш юритишни қўзғатиш масаласини кўриб чиқиш бўйича мурожаатлар ҳудудий адлия органлари томонидан рўйхатга олинади ҳамда барча ҳужжатлар билан бирга котибга топширилади.
Котиб интизомий иш билан боғлиқ ҳужжатларни ўрганиб чиқиб, медиатор томонидан медиация тўғрисидаги қонунчилик ҳужжатларининг, Медиаторнинг касб этикаси қоидаларининг бузилганлигини кўрсатувчи асослар мавжуд ёки мавжуд эмаслиги ҳақида малака комиссияси раисига ахборот беради.
Малака комиссияси раиси медиатор томонидан медиация тўғрисидаги қонунчилик ҳужжатларининг, Медиаторнинг касб этикаси қоидаларининг бузилганлигини кўрсатувчи асослар мавжуд бўлган ҳолларда мурожаатни навбатдаги малака комиссиясида кўриб чиқиш ҳақида қарор қабул қилади ва бу ҳақда мурожаат муаллифи хабардор қилинади.
Мурожаат малака комиссияси мажлисида кўриб чиқилмаслиги ҳақида қарор қабул қилинган тақдирда, мурожаат муаллифига асослантирилган жавоб хати юборилади.
43. Медиаторлар ёки бошқа манфаатдор шахслар малака комиссияси мажлисининг ўтказиладиган санаси, вақти ва жойи тўғрисида белгиланган тартибда хабардор қилинганлигига қарамасдан малака комиссиясининг мажлисида иштирок этмаган тақдирда, малака комиссиясининг қарори билан мурожаатни кўриб чиқиш кейинги мажлисга қолдирилиши ёки унинг иштирокисиз кўриб чиқилиши мумкин.
Мурожаатни кўриб чиқишни икки мартадан ортиқ кейинги мажлисга қолдиришга йўл қўйилмайди.
Медиаторларнинг ноқонуний ҳаракатлари юзасидан мурожаатларни кўриб чиқиш натижалари бўйича малака комиссияси интизомий иш юритишни қўзғатиш ёки интизомий иш юритишни қўзғатишни рад қилиш ҳақида қарор қабул қилади.
Малака комиссияси интизомий иш юритишни қўзғатиш ҳақида қарор қабул қилган тақдирда, интизомий иш юритиш комиссиянинг мазкур мажлисида кўриб чиқилади.
Агар интизомий иш юритишни кўриб чиқишда малака комиссияси айрим масалаларни қўшимча ўрганиш талаб қилинади деган хулосага келса, комиссия қарори билан интизомий иш юритиш қўзғатилиб, қўшимча ўрганиш учун котибга қайтарилади ва интизомий ишни кўриб чиқиш кейинги малака комиссиясига қолдирилади.
Қўшимча ўрганиш натижалари малака комиссиясига котиб томонидан навбатдаги малака комиссияси мажлисидан камида бир иш куни аввал тақдим қилиниши керак.
44. Котиб қайси медиаторга нисбатан интизомий иш юритиш қўзғатилган бўлса, медиаторнинг сўровига кўра, ўша медиаторни иш материаллари билан таништириши керак.
Медиаторга нисбатан интизомий иш қўзғатилишига асос бўлган мурожаат муаллифини интизомий иш юритиш тўғрисидаги материаллар билан таништириш ва улардан нусха бериш медиациянинг махфийлик принципларига қатъий риоя этилган ҳолда амалга оширилиши лозим.
45. Ўзига нисбатан интизомий иш кўриб чиқилаётган медиатор:
интизомий иш юритишга асос бўлган барча материаллар билан танишиб чиқишга ва ўз ҳисобидан қоғоз ёки электрон шаклда нусха олишга;
интизомий иш юритиш ҳолатлари бўйича ёзма ёки электрон шаклда тушунтиришлар беришга, қўшимча маълумотлар тақдим этишга;
малака комиссиясига ҳолат юзасидан аниқлик киритиш учун зарур бўлган маълумотга эга бўлган шахсларни комиссия йиғилишига таклиф қилиш ва тушунтиришларини эшитиш тўғрисида илтимоснома киритишга;
малака комиссияси ёки Олий малака комиссияси қарор қабул қилгунига қадар (агар бу унинг кўриб чиқиш предмети бўлса) интизомий иш қўзғатилишига сабаб бўлган шикоятни берган шахс билан ярашув чораларини кўришга;
интизомий иш юритиш жараёнида адвокат хизматидан фойдаланишга ҳақли.
Медиаторга нисбатан интизомий иш юритиш қўзғатиш учун асос бўлган мурожаат муаллифи:
мазкур Низомнинг 44-бандига асосан интизомий иш юритиш қўзғатилишига асос бўлган барча материаллар билан танишиб чиқишга ва қоғоз ёки электрон шаклда ўз ҳисобидан нусха олишга;
интизомий иш юритиш ҳолатлари бўйича ёзма шаклда тушунтиришлар беришга, қўшимча маълумотлар тақдим этишга;
малака комиссиясига ҳолат юзасидан аниқлик киритиш учун зарур бўлган маълумотга эга бўлган шахсларни комиссия йиғилишига таклиф қилиш ва тушунтиришларини эшитиш тўғрисида илтимоснома киритишга;
интизомий иш юритиш жараёнида адвокат хизматидан фойдаланишга ҳақли.
46. Малака комиссияси томонидан медиаторлар медиация тўғрисидаги қонунчилик ҳужжатлари талаблари, Медиаторнинг касб этикаси қоидаларини мунтазам равишда ёки бир марта қўпол равишда бузган, медиаторларнинг шаъни ва қадр-қимматига доғ туширадиган ҳамда медиация соҳасининг обрўсини туширадиган қилмиш содир этган деб топилган тақдирда, ярашув қабул қилинмасдан, интизомий иш юритиш мазмунан кўриб чиқилади.
47. Медиаторларнинг ноқонуний хатти-ҳаракатлари юзасидан мурожаатларни кўриб чиқишда, шунингдек интизомий иш юритиш жараёнида қуйидаги ҳолатлар аниқланган тақдирда, интизомий иш юритишни қўзғатиш рад этилади, қўзғатилган интизомий иш юритиш тугатилади:
кўриб чиқилаётган ёки интизомий иш юритишни қўзғатиш учун асос бўлган мурожаат аноним эканлиги ёки унда кўрсатилган муаллиф ҳақидаги маълумотлар ҳақиқатга тўғри келмаслиги;
мурожаат медиация тарафлари бўлмаган учинчи шахслар томонидан асоссиз маълумотлар асосида берилганлиги;
кўриб чиқилаётган ҳолат юзасидан медиаторни интизомий жавобгарликка тортиш муддати ўтиб кетганлиги;
айнан шу медиаторга нисбатан айнан шу ҳолатлар бўйича муқаддам тегишли қарор қабул қилинганлиги;
айнан шу медиаторга нисбатан айнан шу ҳолатлар бўйича муқаддам адвокат ёки нотариус сифатида интизомий жавобгарликка тортилганлиги;
кўриб чиқилаётган ҳолат медиаторлик фаолиятига тааллуқли эмаслиги;
мурожаатда кўрсатилган медиатор Реестрда мавжуд эмаслиги.
48. Интизомий иш юритишни қўзғатиш масаласини кўриб чиқиш ёки интизомий иш юритиш жараёнида кўриб чиқилаётган мурожаатда жиноят тўғрисидаги хабар мавжудлиги аниқланса, малака комиссия қарори билан интизомий иш юритишни тўхтатади ва материалларни тегишли ҳуқуқни муҳофаза қилувчи органга юборади, натижаси бўйича маълумот олиш чораларини кўради.
Ҳуқуқни муҳофаза қилувчи орган томонидан медиаторга нисбатан жиноят иши қўзғатиш рад этилган тақдирда интизомий иш юритиш тикланади ва умумий тартибда кўриб чиқилади.
49. Малака комиссияси томонидан медиаторларга нисбатан интизомий жазо чоралари қўллаш тўғрисида қарор қабул қилинишида содир этилган ҳуқуқбузарликнинг оғирлиги, унинг содир этилган ҳолатлари, медиаторларнинг олдинги фаолияти ва хулқ-атвори эътиборга олинади.
Интизомий жавобгарликка тортилган кундан эътиборан бир йил ичида медиатор томонидан такроран медиация тўғрисидаги қонунчилик ҳужжатлари талаблари ва Медиаторнинг касб этикаси қоидалари бузилганлиги аниқланганлиги мунтазам равишда содир этилган қоидабузарлик деб ҳисобланади.
Қуйидаги қоидабузарликлар медиаторнинг бир марта қўпол равишда қоидабузарлик содир этганлиги деб ҳисобланади:
медиациянинг махфийлиги принципини бузганлиги, медиацияга оид маълумотларни тарафларнинг розилигисиз ошкор этганлиги;
интизомий ишни кўриб чиқишда бир нечта қонунчилик ҳужжатларининг талаблари ёки Медиаторнинг касб этикаси қоидалари бузишда ифодаланган ҳуқуқбузарликни содир этганлиги;
медиатор томонидан медиацияни қўллаш тўғрисидаги келишув ёки медиатив келишув сохталаштирганлиги;
медиатор фаолияти олти ойгача муддатга тўхтатиб турилган даврда медиаторлик фаолиятини амалга оширганлиги.
50. Медиаторга нисбатан интизомий иш юритишни кўриб чиқиш натижалари бўйича малака комиссияси қуйидаги қарорлардан бирини қабул қилади:
огоҳлантириш тўғрисида;
медиатор фаолиятини олти ойгача муддатга тўхтатиб туриш тўғрисида;
медиаторни Реестрдан чиқариш тўғрисида;
қўшимча ўрганиш зарурати туфайли интизомий ишни кўриб чиқишни кейинги малака комиссиясига қолдириш тўғрисида;
интизомий жазо чоралари қўллашни рад этиш ва интизомий иш юритишни тугатиш тўғрисида.
51. Медиаторга нисбатан интизомий жазо чораси ножўя хатти-ҳаракат содир этилган кундан эътиборан, давом этаётган хатти-ҳаракатларда эса улар аниқланган кундан эътиборан бир йилдан кечиктирмай қўлланилиши мумкин.
52. Интизомий жазо чоралари қўллашни рад этиш ва интизомий иш юритишни тугатиш тўғрисидаги қарор малака комиссияси томонидан, агар интизомий иш юритишни кўриб чиқиш вақтида у медиаторга нисбатан интизомий иш юритишни кўриб чиқиш тўғрисидаги масалада баён этилган важлар тасдиқланмади деган хулосага келса, шунингдек қилмишнинг кам аҳамиятлилиги ва медиаторнинг интизомий иш қўзғатилишига сабаб бўлган шикоятни берган шахс билан ярашувга эришганлиги муносабати билан қабул қилинади.
6-боб. Якунловчи қоидалар
53. Манфаатдор шахслар томонидан малака комиссияларининг қарорлари устидан малака комиссияси мажлисининг баённомасидан кўчирма олинган кундан эътиборан бир ой ичида Олий малака комиссиясига шикоят берилиши мумкин.
54. Малака комиссияларининг қарорлари устидан судга шикоят қилиниши мумкин.
55. Мазкур Низомни бузилишида айбдор бўлган шахслар қонунчилик ҳужжатларига мувофиқ жавоб беради.
Қорақалпоғистон Республикаси Адлия вазирлиги, вилоятлар ва Тошкент шаҳар адлия бошқармалари ҳузуридаги Медиаторлар малака комиссиялари тўғрисидаги низомга 1-ИЛОВА
Қорақалпоғистон Республикаси Адлия вазирлиги, вилоятлар ва Тошкент шаҳар адлия бошқармалари ҳузуридаги Медиаторлар малака комиссияси аъзосининг
Т/р Тингловчи нинг Ф.И.О. Қўйилган бал 1. 2. 3. ... Комиссия аъзоси _______________ __________________ (имзо) (Ф.И.О.)
Қорақалпоғистон Республикаси Адлия вазирлиги, вилоятлар ва Тошкент шаҳар адлия бошқармалари ҳузуридаги Медиаторлар малака комиссиялари тўғрисидаги низомга 2-ИЛОВА
Қорақалпоғистон Республикаси Адлия вазирлиги, вилоятлар ва Тошкент шаҳар адлия бошқармалари ҳузуридаги Медиаторлар малака комиссияси аъзоларининг
Т/р Тингловчининг Ф.И.О. Комиссия аъзоларининг Ф.И.О. ва улар томонидан қўйилган баллар Ф.И.О. Ф.И.О. Ф.И.О. Ф.И.О. Ф.И.О. Ф.И.О. Ф.И.О. 1. 2. 3. ... Комиссия аъзоси _______________ __________________ (имзо) (Ф.И.О.) Комиссия аъзоси _______________ __________________ (имзо) (Ф.И.О.) Комиссия аъзоси _______________ __________________ (имзо) (Ф.И.О.) Комиссия аъзоси _______________ __________________ (имзо) (Ф.И.О.) Комиссия аъзоси _______________ __________________ (имзо) (Ф.И.О.) Комиссия аъзоси _______________ __________________ (имзо) (Ф.И.О.) Комиссия аъзоси _______________ __________________ (имзо) (Ф.И.О.) Комиссия аъзоси _______________ __________________ (имзо) (Ф.И.О.)
Вазир А. ТАШКУЛОВ
Тошкент ш.,
2026 йил 30 январь,
3-mh -сон
Oʻzbekiston Respublikasi adliya vazirining
buyrugʻi
NIZOM
BAHOLASH BYULLETENI
YIGʻMA BAHOLASH BYULLETENI
Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari huzuridagi mediatorlar malaka komissiyalari toʻgʻrisidagi nizomni tasdiqlash haqida
Oʻzbekiston Respublikasining “Mediatsiya toʻgʻrisida”gi Qonuniga muvofiq buyuraman:
1. Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari huzuridagi mediatorlar malaka komissiyalari toʻgʻrisidagi nizom ilovaga muvofiq tasdiqlansin.
2. Ushbu buyruq rasmiy eʼlon qilingan kundan eʼtiboran kuchga kiradi.
Oʻzbekiston Respublikasi adliya vazirining 2026-yil 30-yanvardagi 3-mh-son buyrugʻiga ILOVA
Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari huzuridagi mediatorlar malaka komissiyalari toʻgʻrisidagi
Mazkur Nizom Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari huzuridagi mediatorlar malaka komissiyalari (bundan buyon matnda malaka komissiyalari deb yuritiladi) faoliyatini tashkil etish tartibini belgilaydi.
1-bob. Umumiy qoidalar
1. Mazkur Nizomda quyidagi asosiy tushunchalar qoʻllaniladi:
murojaat — mediatorlarning noqonuniy xatti-harakatlari yuzasidan jismoniy va yuridik shaxslarning murojaatlari, shuningdek huquqni muhofaza qiluvchi organlarning taqdimnomalari va xat-xabarlari;
malaka imtihoni — Mediatorlar reyestriga (bundan buyon matnda Reyestr deb yuritiladi) kirish istagida boʻlgan shaxslarning mediatsiya toʻgʻrisidagi qonunchilik hujjatlari hamda mediatsiyani amalga oshirish boʻyicha bilim va malakasini aniqlash jarayoni;
intizomiy ish yuritish — mediatorlar tomonidan mediatsiya toʻgʻrisidagi qonunchilik hujjatlari, Mediatorning kasb etikasi qoidalari (roʻyxat raqami 3741, 2026 yil 5 yanvar) (bundan buyon matnda Mediatorning kasb etikasi qoidalari deb yuritiladi) buzilishi Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari (bundan buyon matnda hududiy adliya organlari deb yuritiladi) tomonidan aniqlanganligi, mediatorlarning noqonuniy xatti-harakatlari yuzasidan murojaatlar, sudning mediatorlarga nisbatan chiqargan xususiy ajrimi boʻyicha malaka komissiyasi tomonidan oʻtkaziladigan oʻrganish;
talabgor — Reyestrga kirish maqsadida malaka imtihonida ishtirok etish uchun murojaat qilgan jismoniy shaxs.
2. Malaka komissiyalari mediatorlarni Reyestrga kiritish uchun malaka imtihonini oʻtkazish va ularning intizomiy javobgarligi bilan bogʻliq ishlarni koʻrib chiqish maqsadida tuziladi.
3. Malaka komissiyalari oʻz faoliyatida Oʻzbekiston Respublikasining qonunchilik hujjatlariga, Mediatorning kasb etikasi qoidalariga va mazkur Nizomga amal qiladi.
4. Malaka komissiyasi oʻz vakolatlari doirasida qarorlar qabul qilishda mustaqil hisoblanadi va uning faoliyatiga aralashishga yoʻl qoʻyilmaydi.
5. Malaka komissiyalarining moddiy-texnika taʼminoti tegishliligi boʻyicha hududiy adliya organlari tomonidan amalga oshiriladi.
2-bob. Malaka komissiyalarining huquq va majburiyatlari
6. Malaka komissiyasi oʻz zimmasiga yuklatilgan vazifalarni bajarish uchun quyidagi huquqlarga ega:
mazkur Nizomda nazarda tutilgan murojaatlarni koʻrib chiqish;
zarur boʻlganda, mediatorlar, manfaatdor shaxslar va tegishli tashkilotlardan qoʻshimcha hujjatlarni soʻrab olish;
malaka imtihonlari natijalari boʻyicha qarorlar qabul qilish;
intizomiy ish yuritishni koʻrib chiqish natijalari boʻyicha qarorlar qabul qilish.
7. Malaka komissiyalari oʻz zimmalariga yuklatilgan vazifalarni bajarishda quyidagilarga majbur:
malaka komissiyasiga kiritilgan masalalarni har tomonlama va xolisona koʻrib chiqish;
qonunchilik hujjatlariga, Mediatorning kasb etikasi qoidalariga va mediatsiyaning asosiy prinsiplariga qatʼiy rioya etish;
mediatsiyaning maxfiyligini taʼminlash choralarini koʻrish;
Oʻzbekiston Respublikasi Adliya vazirligi huzuridagi Mediatorlar oliy malaka komissiyasining (bundan buyon matnda Oliy malaka komissiyasi deb yuritiladi) qarorlarini ijro etish.
3-bob. Malaka komissiyalarining faoliyatini tashkil etish
8. Malaka komissiyasi mediatorlar, fuqarolik jamiyati institutlari vakillari, hududiy adliya organlarining hamda boshqa tashkilotlarning huquq sohasida tajribaga ega boʻlgan xodimlari orasidan yetti nafar aʼzodan iborat boʻlgan tarkibda hududiy adliya organlari birinchi rahbarining buyrugʻi bilan uch yil muddatga tasdiqlanadi.
Bunda, malaka komissiyasining aʼzoligiga mediatorlardan nomzodlar mediatorlik faoliyati boʻyicha kamida ikki yillik ish stajiga ega boʻlgan mediatorlar orasidan tanlab olinadi.
9. Bir shaxs bir vaqtning oʻzida malaka komissiyasining va Oliy malaka komissiyasi aʼzosi boʻlishi mumkin emas.
10. Hududiy adliya organlarining notariat, advokatura va mediatsiya sohasiga rahbarlik qiluvchi oʻrinbosari malaka komissiyasi raisi hisoblanadi.
Hududiy adliya organlari notariat, advokatura va mediatsiya boʻlimining (shoʻbasining) mediatsiya sohasi boʻyicha masʼul xodimi malaka komissiyasi kotibi (bundan buyon matnda kotib deb yuritiladi) etib tayinlanadi.
Kotib malaka komissiyasi aʼzosi hisoblanmaydi va majlislarda ovoz berish huquqiga ega boʻlmaydi.
11. Quyidagi holatlarda malaka komissiyasi aʼzosi malaka komissiyasi tarkibidan chiqariladi:
oʻz arizasiga binoan;
mediatorning faoliyati toʻxtatib turilganda yoki mediator Reyestrdan chiqarilganda;
hududiy adliya organlari va boshqa tashkilotlar xodimlarining ish joyi oʻzgarganda yoki xodimlar ishdan boʻshatilganda;
malaka komissiyasi aʼzosi tomonidan mazkur Nizom talablari qoʻpol ravishda buzilganda;
malaka komissiyasi aʼzosi sogʻligʻining holatiga koʻra vazifalarini bajarish imkoni boʻlmaganda;
malaka komissiyasi aʼzosi komissiya yigʻilishlarida ketma-ket uch marta uzrli sabablarsiz ishtirok etmagan taqdirda.
Ushbu bandning beshinchi — yettinchi xatboshilarida nazarda tutilgan asoslar boʻyicha malaka komissiyasi aʼzosini malaka komissiyasi tarkibidan chiqarish masalasi komissiya raisi tomonidan navbatdagi malaka komissiyasi majlisiga kiritiladi.
Malaka komissiyasi aʼzosini komissiya tarkibidan chiqarish toʻgʻrisidagi qaror komissiya aʼzolarining koʻpchilik ovozi bilan qabul qilinadi.
Qaror qabul qilingan kundan eʼtiboran uch ish kuni ichida komissiya tarkibidan chiqarilgan komissiya aʼzosiga yozma ravishda maʼlum qilinadi.
Malaka komissiyasi aʼzosi komissiya tarkibidan chiqarilganligi toʻgʻrisidagi qarorni olgan kundan eʼtiboran bir oy muddatda Oliy malaka komissiyasiga yoki sudga shikoyat qilishi mumkin.
Malaka komissiyasi aʼzosini ushbu bandning ikkinchi — yettinchi xatboshilarida nazarda tutilmagan asoslar boʻyicha komissiya tarkibidan chiqarilishiga yoʻl qoʻyilmaydi.
Malaka komissiya tarkibidan chiqarilgan aʼzo oʻrniga malaka komissiyasi raisi taqdimnomasiga koʻra, hududiy adliya organi rahbarining buyrugʻi bilan yangi komissiya aʼzosi kiritiladi.
12. Malaka komissiyasining aʼzosi boʻlgan mediatorga nisbatan intizomiy ish yuritish koʻrib chiqilayotganda yoki malaka komissiyasi aʼzosidan malaka imtihoni qabul qilinayotganda ular tegishli malaka komissiyasi majlisida qatnashishga haqli emas.
Malaka komissiyasi aʼzosi:
malaka komissiyasi majlisida koʻrilayotgan masalalar boʻyicha talabgor, mediator va boshqa manfaatdor shaxsning yaqin qarindoshi boʻlsa;
malaka komissiyasi majlisining natijasidan va unda qabul qilinadigan qarordan bevosita yoki bilvosita manfaatdor boʻlsa yoxud uning begʻarazligiga shubha tugʻdiradigan boshqa holatlar mavjud boʻlsa, malaka komissiyasi majlisida ishtirok etishi mumkin emas va u rad etilishi lozim.
Mazkur bandning uchinchi va toʻrtinchi xatboshilarida koʻrsatilgan holatlar mavjud boʻlgan taqdirda, malaka komissiyasi aʼzosi oʻzini oʻzi rad etishi shart. Agar u bunday qilmasa, ayni shu asoslar boʻyicha malaka komissiyaning boshqa aʼzolari tomonidan, shuningdek masalasi koʻrilayotgan talabgorlar, mediatorlar va boshqa manfaatdor shaxslar tomonidan rad etilishi mumkin.
Rad etish haqidagi bayonot asoslantirilgan boʻlishi kerak.
Rad etilishi bildirilgan malaka komissiyasi aʼzosi rad etish toʻgʻrisidagi masala koʻrilishidan oldin oʻz tushuntirishini berishga haqli.
Rad etish toʻgʻrisidagi masala rad qilinayotgan shaxsning yoʻqligida malaka komissiyasining qolgan aʼzolari tomonidan koʻpchilik ovozi bilan hal etiladi. Ovozlar teng boʻlib qolgan taqdirda ham, ushbu komissiya aʼzosi rad etilgan hisoblanadi.
13. Malaka komissiyasi raisi uzrli sabablarga koʻra (kasalligi, yaqin qarindoshlarining vafoti, mehnat taʼtili, Oʻzbekiston Respublikasidan tashqarida boʻlishi sababli) ishda boʻlmagan hollarda hududiy adliya organi rahbarining buyrugʻi bilan uning boshqa oʻrinbosari vaqtincha malaka komissiyasi raisi etib tayinlanadi.
14. Malaka komissiyasi raisi komissiyaning navbatdagi yigʻilishi oʻtkaziladigan kun va vaqtni belgilaydi, shuningdek komissiya yigʻilishlarini oʻtkazadi va ularga rahbarlik qiladi.
15. Malaka komissiyasi raisi komissiya ishini tashkil qilish hamda uning oʻz vaqtida, toʻgʻri va haqqoniy oʻtkazilishi uchun masʼul hisoblanadi.
16. Malaka komissiyasi majlisi, agar unda tegishli komissiya aʼzolarining kamida uchdan ikki qismi qatnashsa, vakolatli (kvorumga ega) hisoblanadi.
Vakolatli (kvorumga ega) boʻlmagan holda tegishli komissiyaning majlisda hozir boʻlgan aʼzolari tomonidan majlisni keyinga qoldirish toʻgʻrisida qaror qabul qilinadi hamda manfaatdor shaxslar majlis oʻtkaziladigan sana, vaqt va joy haqida qoʻshimcha ravishda xabar qilinadi.
17. Malaka komissiyasining majlislarida Oliy malaka komissiyasining aʼzolari ovoz berish huquqisiz kuzatuvchi sifatida ishtirok etishga haqli.
18. Malaka komissiyasining majlislari zaruratga qarab, lekin bir oyda kamida bir marta oʻtkaziladi.
Malaka komissiyasi raisi komissiya majlisi oʻtkazilishidan kamida yetti kun oldin majlisning kun tartibi, sanasi, vaqti va joyini belgilaydi.
Kotib komissiya majlisi oʻtkazilishidan kamida besh kun oldin majlis oʻtkaziladigan sana, vaqt va joy haqida komissiya majlisida ishtirok etadigan manfaatdor shaxslarni yozma yoki elektron shaklda xabardor qiladi.
19. Malaka komissiyasining qarorlari uning majlisida qatnashayotgan komissiya aʼzolarining oddiy koʻpchilik ovozi bilan, ochiq ovoz berish orqali qabul qilinadi. Ovozlar teng boʻlganda, raislik qiluvchining ovozi hal qiluvchi ovoz hisoblanadi.
Malaka komissiyasining qarorlari ular qaysi majlisda qabul qilingan boʻlsa, oʻsha majlisda raislik qiluvchi tomonidan eʼlon qilinadi.
20. Malaka komissiyasining ishini yuritish kotib tomonidan amalga oshiriladi.
21. Kotib:
malaka imtihonini topshirish boʻyicha talabgorlarning ariza va hujjatlarini oʻrganib chiqadi;
intizomiy ish yuritishga taalluqli hujjatlarni qabul qiladi;
malaka komissiyasi majlisida koʻrib chiqish uchun materiallarni tayyorlashni amalga oshiradi va ularning saqlanishini taʼminlaydi;
malaka komissiyasi aʼzolarini, shuningdek qaysi mediatorga nisbatan intizomiy ish yuritish olib borilayotgan boʻlsa, oʻsha mediatorni va boshqa manfaatdor shaxslarni komissiya majlisi oʻtkaziladigan sana, vaqt va joy toʻgʻrisida xabardor qiladi;
malaka komissiyasi aʼzolari va manfaatdor shaxslarning majlisda hozir boʻlganligini tekshiradi, hozir boʻlmaganlik sabablarini aniqlaydi va bu haqida malaka komissiyasiga axborot beradi;
intizomiy ish yuritish bilan bogʻliq maʼlumot olish uchun tegishli tashkilotlar yoki shaxslarga soʻrovnoma yuborilishini tashkil etadi;
malaka komissiyasi majlislarining bayonnomalarini yuritadi;
malaka imtihonini topshirgan va topshirmagan talabgorlarning hisobini yuritadi;
raislik qiluvchining malaka komissiyasi majlisiga tayyorgarlik koʻrish va uni oʻtkazish bilan bogʻliq boshqa topshiriqlarini, shuningdek mazkur Nizomga muvofiq boshqa vazifalarni ham bajaradi.
22. Malaka komissiyasi majlislarida manfaatdor shaxslar, shu jumladan talabgorlar videokonferensaloqa tizimida ishtirok etishi mumkin.
23. Malaka komissiyasining majlislarida bayonnoma yuritiladi, u majlisda raislik etuvchi va kotib tomonidan imzolanadi.
Malaka komissiyasining qaroridan norozi boʻlgan malaka komissiyasining aʼzosi komissiya majlisining bayonnomasiga kiritiladigan oʻzining nuqtai nazarini yozma yoki elektron shaklda bayon etishga haqli.
Malaka komissiyasi majlislari bayonnomasi yozma yoki elektron shaklda rasmiylashtirilishi mumkin.
24. Malaka komissiyasi majlisining kun tartibiga kiritilgan masalalarga qarab, bayonnomada:
majlis oʻtkazilgan sana va joy (videokonferensaloqa orqali majlis oʻtkazilganda, bu haqida alohida koʻrsatiladi);
majlisda qatnashgan malaka komissiyasi aʼzolarining roʻyxati;
majlisning kun tartibi;
talabgorlar toʻgʻrisidagi maʼlumot;
talabgor tomonidan malaka imtihonini topshirish uchun tasodifiy tanlangan savollar mazmuni va javoblari;
malaka komissiyasi aʼzolari tomonidan berilgan qoʻshimcha savollar va talabgorning javoblari;
baholash byulletenlaridagi ballarni hisoblash natijalari, shu jumladan talabgor tomonidan toʻplangan ballar;
murojaatlar mazmuni;
intizomiy ish yuritishga oid holatlar, malaka komissiyasi aʼzolarining, manfaatdor shaxslarning soʻzga chiqishlari hamda tegishli tashkilotlar tomonidan taqdim etilgan hujjatlarning asosiy mazmuni;
intizomiy ish yuritishni koʻrib chiqish natijalari boʻyicha ovoz berish yakunlari;
malaka komissiyasi aʼzolari tomonidan bildirilgan fikrlar;
majlisning kun tartibiga kiritilgan har bir masala boʻyicha qarorlar;
malaka komissiyasi qarorlari ustidan shikoyat qilish tartibi;
qaror qabul qilish uchun zarur boʻlgan boshqa maʼlumotlar aks ettiriladi.
Baholash byulletenlari va malaka komissiyasi aʼzolari roʻyxati majlis bayonnomasiga ilova qilinadi.
25. Malaka komissiyasi majlisining bayonnomasidan koʻchirmalar qaror qabul qilingan kundan eʼtiboran uch ish kunidan kechiktirmay kotibning imzosi (elektron imzosi) bilan manfaatdor shaxslarga yozma yoki elektron shaklda yuboriladi.
Malaka komissiyasi majlisi bayonnomasidan koʻchirmalarda komissiya majlisi oʻtkazilgan sana va joy toʻgʻrisidagi maʼlumotlar, komissiya majlisining kun tartibiga kiritilgan qismidagi, tegishli manfaatdor shaxslarga taalluqli boʻlgan masala boʻyicha qaror va ushbu qaror ustidan shikoyat qilish tartibi bayon etiladi.
4-bob. Talabgorlardan malaka imtihonini qabul qilish
26. Malaka imtihoni Oʻzbekiston Respublikasi Vazirlar Mahkamasining 2026-yil 1-apreldagi 140-son qarori bilan tasdiqlangan Jismoniy shaxslarni Mediatorlar reyestriga kiritish boʻyicha davlat xizmatini koʻrsatishning maʼmuriy reglamentiga muvofiq talabgorlar hujjat topshirgan kundan eʼtiboran bir oy ichida oʻtkaziladi.
27. Talabgorlar malaka komissiyasining majlisiga uzrli sabablarga koʻra (kasalligi, yaqin qarindoshlarining vafoti, mehnat taʼtili, Oʻzbekiston Respublikasidan tashqarida boʻlishi sababli) ishtirok eta olmasa, bu haqida malaka komissiyasi majlisi boshlanishidan avval, uzrli sabablarni bayon qilgan holda xabar berishi shart. Bunda, kotib talabgorga navbatdagi malaka komissiyasida mazkur Nizomning 18-bandida belgilangan muddatda majlis oʻtkaziladigan sana, vaqt va joy toʻgʻrisida xabardor qiladi.
28. Kotib malaka imtihonida ishtirok etadigan talabgorlar roʻyxatini va talabgorlar haqidagi maʼlumotlarni malaka komissiyasi aʼzolariga malaka imtihoni oʻtkaziladigan kundan kamida bir ish kuni oldin taqdim etadi.
Malaka imtihonida ishtirok etadigan talabgorlar roʻyxatiga avvalgi malaka imtihonida uzrli sabablarga koʻra ishtirok etmagan talabgorlar ham kiritiladi.
29. Malaka imtihoni barcha talabgorlar uchun bitta xonada, ogʻzaki suhbat tarzida oʻtkaziladi.
Malaka imtihoni oʻtkazilayotgan xonada begona shaxslarning boʻlmasligi ular joylashgan joy shovqindan holi, yorugʻ boʻlishi va videotasvir tiniq koʻrinishi lozim.
Malaka imtihoni videokonferensaloqa rejimida oʻtkazilgan hollarda, malaka komissiyasi aʼzolari talabgor bilan videokonferensaloqa rejimida muloqot qilishni boshlashdan avval, talabgor joylashgan joyda boshqa shaxslarning yoʻqligiga ishonch hosil qilish uchun talabgordan joyning 360 gradus aylanasini koʻrsatishni talab qilishi lozim.
Malaka imtihoni jarayoni audio va videoyozuvlarda qayd etib boriladi hamda hududiy adliya organlarining ijtimoiy tarmoqlari va (yoki) rasmiy veb-saytida real vaqt rejimida translyatsiya qilinadi.
30. Malaka imtihoni uchun Oʻzbekiston Respublikasi Adliya vazirligi tomonidan mediatorlarni tayyorlash dasturi asosida oʻqitilgan mavzular doirasida savollar roʻyxati tuziladi hamda Oliy malaka komissiyasi raisi tomonidan tasdiqlanadi.
Savollar roʻyxati Oʻzbekiston Respublikasi Adliya vazirligining rasmiy veb-saytida eʼlon qilinib, qonunchilikka kiritilgan oʻzgartirish va qoʻshimchalarga asosan doimiy ravishda yangilab boriladi.
31. Malaka imtihoni uchta savoldan iborat boʻlib, savollar talabgor tomonidan malaka imtihoni topshirilayotgan vaqtda elektron dastur orqali tasodifiy tarzda tanlanadi hamda talabgorga imtihon savollariga tayyorlanish uchun 15 daqiqa vaqt beriladi.
Bunda, malaka imtihoni videokonferensaloqa rejimida oʻtkazilgan hollarda tayyorlanish uchun qoʻshimcha vaqt berilmaydi.
32. Imtihon savollariga javob berishga tayyorlanishda talabgorlarga:
boshqa talabgorlar bilan suhbatlashish;
axborot manbai sifatida xizmat qilishi mumkin boʻlgan qonunchilik hujjatlaridan, adabiyotlardan, har qanday turdagi texnika vositalari yoki boshqa hujjatlar va vositalardan foydalanish;
imtihon savollariga javob bermasdan oldin xonani tark etish yoki videokonferensaloqani cheklash (toʻxtatish) taqiqlanadi.
33. Videokonferensaloqa yordamida malaka imtihonini topshirish jarayonida savollar tanlangandan soʻng texnik nosozliklar sababli videokonferensaloqada uzilishlar yuzaga kelgan taqdirda, videokonferensaloqa qayta tiklangandan soʻng malaka imtihoni savollari takroran tanlanadi.
34. Malaka komissiyasi aʼzolari tomonidan elektron dastur orqali tanlangan savollarga berilgan javoblarni aniqlashtirish maqsadida qoʻshimcha savollar berilishi mumkin.
Bunda, qoʻshimcha savollar tanlangan savollar doirasidan chetga chiqmasligi lozim.
35. Malaka imtihoni natijasini aniqlash uchun komissiyaning har bir aʼzosi boshqa aʼzolardan mustaqil holda mazkur Nizomning 1-ilovasiga muvofiq shaklda baholash byulletenida talabgorning savollarga bergan javobini 10 ballik tizimda baholaydi.
Bunda, malaka komissiyasining har bir aʼzosi talabgorni quyidagi mezonlarga asosan baholaydi:
berilgan savollarga toʻliq va aniq javob berishi, faoliyat sohasi bilan bogʻliq tizimli bilimlarga ega boʻlishi, ulardan oʻz kasb faoliyatida mustaqil foydalanishni bilishi — 9-10 ball;
berilgan savollarga aniq, biroq toʻliq javob berolmasligi, faoliyat sohasi bilan bogʻliq bilimlarga ega boʻlishi, ulardan oʻz kasb faoliyatida foydalanishni bilishi — 7-8 ball;
berilgan savollarga toʻliq javob berolmasligi, faoliyat sohasi bilan bogʻliq bilimlarga yetarli darajada ega boʻlishi, ulardan oʻz kasb faoliyatida foydalanishni bilishi — 5-6 ball;
berilgan savollarga noaniq javob berishi, faoliyat sohasi bilan bogʻliq bilimlarga ega boʻlishi, ulardan oʻz kasb faoliyatida foydalanishni bilmasligi — 3-4 ball;
berilgan savollarga noaniq javob berishi, faoliyat sohasi bilan bogʻliq bilimlarga yetarli darajada ega emasligi — 1-2 ball;
berilgan savollarga umuman javob bera olmasligi — 0 ball.
36. Talabgorlar imtihon savollariga javob berib boʻlgandan keyin malaka imtihoni oʻtkazilgan xonani tark etishi kerak.
Videokonferensaloqa yordamida malaka imtihonida ishtirok etgan talabgorlar malaka imtihoni yakunlanguniga qadar videokonferensaloqada qolishi mumkin. Bunda, malaka komissiyasi aʼzolari tomonidan ovoz berish va baholash jarayonlari amalga oshirilayotgan vaqtda talabgorlar uchun audio va video aloqadan foydalanish cheklanadi.
37. Malaka imtihoni yakunlari boʻyicha malaka komissiyasi aʼzolari tomonidan talabgorga qoʻyilgan ballar komissiya kotibi tomonidan hisoblab chiqariladi. Hisoblash natijalari mazkur Nizomning 2-ilovasiga muvofiq shakldagi yigʻma baholash byulleteniga kiritiladi va komissiya aʼzolariga taqdim etiladi.
Talabgor toʻplagan ball toʻplanishi mumkin boʻlgan eng yuqori ballning 56 foizidan kam boʻlmagan taqdirda, talabgorni malaka imtihonini topshirgan deb topish toʻgʻrisida malaka komissiyasining qarori qabul qilinadi.
Talabgor toʻplagan ball toʻplanishi mumkin boʻlgan eng yuqori ballning 56 foizidan kam boʻlgan taqdirda, talabgorni malaka imtihonini topshirmagan deb topish toʻgʻrisida malaka komissiyasining qarori qabul qilinadi.
38. Malaka imtihoni natijalari talabgorlar ishtirokida malaka komissiyasi raisi tomonidan oʻqib eshittiriladi.
39. Malaka imtihoniga oid hujjatlar uch yil mobaynida hududiy adliya organlarida saqlanadi.
40. Malaka komissiyasining talabgorlarni malaka imtihonini topshirgan deb topish toʻgʻrisidagi qarori talabgorlarni Reyestrga kiritish uchun asos boʻladi.
5-bob. Mediatorlarga nisbatan intizomiy ish yuritish
41. Intizomiy ish yuritishni qoʻzgʻatish uchun quyidagilar asos boʻladi:
mediatsiya toʻgʻrisidagi qonunchilik hujjatlarining, Mediatorning kasb etikasi qoidalarining mediatorlar tomonidan buzilish holatlari hududiy adliya organlari tomonidan aniqlanganligi;
murojaatlar;
sudning mediatorga nisbatan chiqargan xususiy ajrimi.
42. Intizomiy ish yuritishni qoʻzgʻatish masalasini koʻrib chiqish boʻyicha murojaatlar hududiy adliya organlari tomonidan roʻyxatga olinadi hamda barcha hujjatlar bilan birga kotibga topshiriladi.
Kotib intizomiy ish bilan bogʻliq hujjatlarni oʻrganib chiqib, mediator tomonidan mediatsiya toʻgʻrisidagi qonunchilik hujjatlarining, Mediatorning kasb etikasi qoidalarining buzilganligini koʻrsatuvchi asoslar mavjud yoki mavjud emasligi haqida malaka komissiyasi raisiga axborot beradi.
Malaka komissiyasi raisi mediator tomonidan mediatsiya toʻgʻrisidagi qonunchilik hujjatlarining, Mediatorning kasb etikasi qoidalarining buzilganligini koʻrsatuvchi asoslar mavjud boʻlgan hollarda murojaatni navbatdagi malaka komissiyasida koʻrib chiqish haqida qaror qabul qiladi va bu haqda murojaat muallifi xabardor qilinadi.
Murojaat malaka komissiyasi majlisida koʻrib chiqilmasligi haqida qaror qabul qilingan taqdirda, murojaat muallifiga asoslantirilgan javob xati yuboriladi.
43. Mediatorlar yoki boshqa manfaatdor shaxslar malaka komissiyasi majlisining oʻtkaziladigan sanasi, vaqti va joyi toʻgʻrisida belgilangan tartibda xabardor qilinganligiga qaramasdan malaka komissiyasining majlisida ishtirok etmagan taqdirda, malaka komissiyasining qarori bilan murojaatni koʻrib chiqish keyingi majlisga qoldirilishi yoki uning ishtirokisiz koʻrib chiqilishi mumkin.
Murojaatni koʻrib chiqishni ikki martadan ortiq keyingi majlisga qoldirishga yoʻl qoʻyilmaydi.
Mediatorlarning noqonuniy harakatlari yuzasidan murojaatlarni koʻrib chiqish natijalari boʻyicha malaka komissiyasi intizomiy ish yuritishni qoʻzgʻatish yoki intizomiy ish yuritishni qoʻzgʻatishni rad qilish haqida qaror qabul qiladi.
Malaka komissiyasi intizomiy ish yuritishni qoʻzgʻatish haqida qaror qabul qilgan taqdirda, intizomiy ish yuritish komissiyaning mazkur majlisida koʻrib chiqiladi.
Agar intizomiy ish yuritishni koʻrib chiqishda malaka komissiyasi ayrim masalalarni qoʻshimcha oʻrganish talab qilinadi degan xulosaga kelsa, komissiya qarori bilan intizomiy ish yuritish qoʻzgʻatilib, qoʻshimcha oʻrganish uchun kotibga qaytariladi va intizomiy ishni koʻrib chiqish keyingi malaka komissiyasiga qoldiriladi.
Qoʻshimcha oʻrganish natijalari malaka komissiyasiga kotib tomonidan navbatdagi malaka komissiyasi majlisidan kamida bir ish kuni avval taqdim qilinishi kerak.
44. Kotib qaysi mediatorga nisbatan intizomiy ish yuritish qoʻzgʻatilgan boʻlsa, mediatorning soʻroviga koʻra, oʻsha mediatorni ish materiallari bilan tanishtirishi kerak.
Mediatorga nisbatan intizomiy ish qoʻzgʻatilishiga asos boʻlgan murojaat muallifini intizomiy ish yuritish toʻgʻrisidagi materiallar bilan tanishtirish va ulardan nusxa berish mediatsiyaning maxfiylik prinsiplariga qatʼiy rioya etilgan holda amalga oshirilishi lozim.
45. Oʻziga nisbatan intizomiy ish koʻrib chiqilayotgan mediator:
intizomiy ish yuritishga asos boʻlgan barcha materiallar bilan tanishib chiqishga va oʻz hisobidan qogʻoz yoki elektron shaklda nusxa olishga;
intizomiy ish yuritish holatlari boʻyicha yozma yoki elektron shaklda tushuntirishlar berishga, qoʻshimcha maʼlumotlar taqdim etishga;
malaka komissiyasiga holat yuzasidan aniqlik kiritish uchun zarur boʻlgan maʼlumotga ega boʻlgan shaxslarni komissiya yigʻilishiga taklif qilish va tushuntirishlarini eshitish toʻgʻrisida iltimosnoma kiritishga;
malaka komissiyasi yoki Oliy malaka komissiyasi qaror qabul qilguniga qadar (agar bu uning koʻrib chiqish predmeti boʻlsa) intizomiy ish qoʻzgʻatilishiga sabab boʻlgan shikoyatni bergan shaxs bilan yarashuv choralarini koʻrishga;
intizomiy ish yuritish jarayonida advokat xizmatidan foydalanishga haqli.
Mediatorga nisbatan intizomiy ish yuritish qoʻzgʻatish uchun asos boʻlgan murojaat muallifi:
mazkur Nizomning 44-bandiga asosan intizomiy ish yuritish qoʻzgʻatilishiga asos boʻlgan barcha materiallar bilan tanishib chiqishga va qogʻoz yoki elektron shaklda oʻz hisobidan nusxa olishga;
intizomiy ish yuritish holatlari boʻyicha yozma shaklda tushuntirishlar berishga, qoʻshimcha maʼlumotlar taqdim etishga;
malaka komissiyasiga holat yuzasidan aniqlik kiritish uchun zarur boʻlgan maʼlumotga ega boʻlgan shaxslarni komissiya yigʻilishiga taklif qilish va tushuntirishlarini eshitish toʻgʻrisida iltimosnoma kiritishga;
intizomiy ish yuritish jarayonida advokat xizmatidan foydalanishga haqli.
46. Malaka komissiyasi tomonidan mediatorlar mediatsiya toʻgʻrisidagi qonunchilik hujjatlari talablari, Mediatorning kasb etikasi qoidalarini muntazam ravishda yoki bir marta qoʻpol ravishda buzgan, mediatorlarning shaʼni va qadr-qimmatiga dogʻ tushiradigan hamda mediatsiya sohasining obroʻsini tushiradigan qilmish sodir etgan deb topilgan taqdirda, yarashuv qabul qilinmasdan, intizomiy ish yuritish mazmunan koʻrib chiqiladi.
47. Mediatorlarning noqonuniy xatti-harakatlari yuzasidan murojaatlarni koʻrib chiqishda, shuningdek intizomiy ish yuritish jarayonida quyidagi holatlar aniqlangan taqdirda, intizomiy ish yuritishni qoʻzgʻatish rad etiladi, qoʻzgʻatilgan intizomiy ish yuritish tugatiladi:
koʻrib chiqilayotgan yoki intizomiy ish yuritishni qoʻzgʻatish uchun asos boʻlgan murojaat anonim ekanligi yoki unda koʻrsatilgan muallif haqidagi maʼlumotlar haqiqatga toʻgʻri kelmasligi;
murojaat mediatsiya taraflari boʻlmagan uchinchi shaxslar tomonidan asossiz maʼlumotlar asosida berilganligi;
koʻrib chiqilayotgan holat yuzasidan mediatorni intizomiy javobgarlikka tortish muddati oʻtib ketganligi;
aynan shu mediatorga nisbatan aynan shu holatlar boʻyicha muqaddam tegishli qaror qabul qilinganligi;
aynan shu mediatorga nisbatan aynan shu holatlar boʻyicha muqaddam advokat yoki notarius sifatida intizomiy javobgarlikka tortilganligi;
koʻrib chiqilayotgan holat mediatorlik faoliyatiga taalluqli emasligi;
murojaatda koʻrsatilgan mediator Reyestrda mavjud emasligi.
48. Intizomiy ish yuritishni qoʻzgʻatish masalasini koʻrib chiqish yoki intizomiy ish yuritish jarayonida koʻrib chiqilayotgan murojaatda jinoyat toʻgʻrisidagi xabar mavjudligi aniqlansa, malaka komissiya qarori bilan intizomiy ish yuritishni toʻxtatadi va materiallarni tegishli huquqni muhofaza qiluvchi organga yuboradi, natijasi boʻyicha maʼlumot olish choralarini koʻradi.
Huquqni muhofaza qiluvchi organ tomonidan mediatorga nisbatan jinoyat ishi qoʻzgʻatish rad etilgan taqdirda intizomiy ish yuritish tiklanadi va umumiy tartibda koʻrib chiqiladi.
49. Malaka komissiyasi tomonidan mediatorlarga nisbatan intizomiy jazo choralari qoʻllash toʻgʻrisida qaror qabul qilinishida sodir etilgan huquqbuzarlikning ogʻirligi, uning sodir etilgan holatlari, mediatorlarning oldingi faoliyati va xulq-atvori eʼtiborga olinadi.
Intizomiy javobgarlikka tortilgan kundan eʼtiboran bir yil ichida mediator tomonidan takroran mediatsiya toʻgʻrisidagi qonunchilik hujjatlari talablari va Mediatorning kasb etikasi qoidalari buzilganligi aniqlanganligi muntazam ravishda sodir etilgan qoidabuzarlik deb hisoblanadi.
Quyidagi qoidabuzarliklar mediatorning bir marta qoʻpol ravishda qoidabuzarlik sodir etganligi deb hisoblanadi:
mediatsiyaning maxfiyligi prinsipini buzganligi, mediatsiyaga oid maʼlumotlarni taraflarning roziligisiz oshkor etganligi;
intizomiy ishni koʻrib chiqishda bir nechta qonunchilik hujjatlarining talablari yoki Mediatorning kasb etikasi qoidalari buzishda ifodalangan huquqbuzarlikni sodir etganligi;
mediator tomonidan mediatsiyani qoʻllash toʻgʻrisidagi kelishuv yoki mediativ kelishuv soxtalashtirganligi;
mediator faoliyati olti oygacha muddatga toʻxtatib turilgan davrda mediatorlik faoliyatini amalga oshirganligi.
50. Mediatorga nisbatan intizomiy ish yuritishni koʻrib chiqish natijalari boʻyicha malaka komissiyasi quyidagi qarorlardan birini qabul qiladi:
ogohlantirish toʻgʻrisida;
mediator faoliyatini olti oygacha muddatga toʻxtatib turish toʻgʻrisida;
mediatorni Reyestrdan chiqarish toʻgʻrisida;
qoʻshimcha oʻrganish zarurati tufayli intizomiy ishni koʻrib chiqishni keyingi malaka komissiyasiga qoldirish toʻgʻrisida;
intizomiy jazo choralari qoʻllashni rad etish va intizomiy ish yuritishni tugatish toʻgʻrisida.
51. Mediatorga nisbatan intizomiy jazo chorasi nojoʻya xatti-harakat sodir etilgan kundan eʼtiboran, davom etayotgan xatti-harakatlarda esa ular aniqlangan kundan eʼtiboran bir yildan kechiktirmay qoʻllanilishi mumkin.
52. Intizomiy jazo choralari qoʻllashni rad etish va intizomiy ish yuritishni tugatish toʻgʻrisidagi qaror malaka komissiyasi tomonidan, agar intizomiy ish yuritishni koʻrib chiqish vaqtida u mediatorga nisbatan intizomiy ish yuritishni koʻrib chiqish toʻgʻrisidagi masalada bayon etilgan vajlar tasdiqlanmadi degan xulosaga kelsa, shuningdek qilmishning kam ahamiyatliligi va mediatorning intizomiy ish qoʻzgʻatilishiga sabab boʻlgan shikoyatni bergan shaxs bilan yarashuvga erishganligi munosabati bilan qabul qilinadi.
6-bob. Yakunlovchi qoidalar
53. Manfaatdor shaxslar tomonidan malaka komissiyalarining qarorlari ustidan malaka komissiyasi majlisining bayonnomasidan koʻchirma olingan kundan eʼtiboran bir oy ichida Oliy malaka komissiyasiga shikoyat berilishi mumkin.
54. Malaka komissiyalarining qarorlari ustidan sudga shikoyat qilinishi mumkin.
55. Mazkur Nizomni buzilishida aybdor boʻlgan shaxslar qonunchilik hujjatlariga muvofiq javob beradi.
Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari huzuridagi Mediatorlar malaka komissiyalari toʻgʻrisidagi nizomga 1-ILOVA
Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari huzuridagi Mediatorlar malaka komissiyasi aʼzosining
T/r Tinglovchi ning F.I.O. Qoʻyilgan bal 1. 2. 3. ... Komissiya aʼzosi _______________ __________________ (imzo) (F.I.O.)
Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari huzuridagi Mediatorlar malaka komissiyalari toʻgʻrisidagi nizomga 2-ILOVA
Qoraqalpogʻiston Respublikasi Adliya vazirligi, viloyatlar va Toshkent shahar adliya boshqarmalari huzuridagi Mediatorlar malaka komissiyasi aʼzolarining
T/r Tinglovchining F.I.O. Komissiya aʼzolarining F.I.O. va ular tomonidan qoʻyilgan ballar F.I.O. F.I.O. F.I.O. F.I.O. F.I.O. F.I.O. F.I.O. 1. 2. 3. ... Komissiya aʼzosi _______________ __________________ (imzo) (F.I.O.) Komissiya aʼzosi _______________ __________________ (imzo) (F.I.O.) Komissiya aʼzosi _______________ __________________ (imzo) (F.I.O.) Komissiya aʼzosi _______________ __________________ (imzo) (F.I.O.) Komissiya aʼzosi _______________ __________________ (imzo) (F.I.O.) Komissiya aʼzosi _______________ __________________ (imzo) (F.I.O.) Komissiya aʼzosi _______________ __________________ (imzo) (F.I.O.) Komissiya aʼzosi _______________ __________________ (imzo) (F.I.O.)
Vazir A. TASHKULOV
Toshkent sh.,
2026-yil 30-yanvar,
3-mh -son