UzbekAI

Ўзбекистон Республикаси Президенти Администрацияси ҳузуридаги Таълим сифатини таъминлаш миллий агентлиги директорининг

буйруғи

НИЗОМ

Ўзбекистон Республикасида тан олинадиган халқаро, хорижий ва нодавлат аккредитация ташкилотлари реестрини юритиш ҳамда уларнинг таълим дастурларини аккредитациядан ўтказиш бўйича фаолиятини мониторинг қилиш тартиби тўғрисидаги низомни тасдиқлаш ҳақида

Ўзбекистон Республикаси Президентининг 2025 йил 5 майдаги ПФ-76-сон «Таълим сифатини таъминлаш ва таълим хизматлари кўрсатиш тизимини такомиллаштириш бўйича қўшимча чора-тадбирлар тўғрисида»ги Фармони ҳамда Вазирлар Маҳкамасининг 2025 йил 6 августдаги 498-сон «Ўрта махсус, касбий, олий ва олий таълимдан кейинги таълим, шунингдек, кадрларни қайта тайёрлаш ва уларнинг малакасини ошириш ташкилотларини комплекс ҳамда махсус давлат аккредитациясидан ўтказиш тизимини жорий этиш тўғрисида»ги қарорига мувофиқ буюраман:

1. Ўзбекистон Республикасида тан олинадиган халқаро, хорижий ва нодавлат аккредитация ташкилотлари реестрини юритиш ҳамда уларнинг таълим дастурларини аккредитациядан ўтказиш бўйича фаолиятини мониторинг қилиш тартиби тўғрисидаги низом иловага мувофиқ тасдиқлансин.

2. Мазкур буйруқ Ўзбекистон Республикаси Олий таълим, фан ва инновациялар вазирлиги билан келишилган.

3. Ушбу буйруқ расмий эълон қилинган кундан эътиборан кучга киради.

Келишилди:

Ўзбекистон Республикаси Президенти Администрацияси ҳузуридаги Таълим сифатини таъминлаш миллий агентлиги директорининг 2026 йил 27 январдаги 9-сон буйруғига ИЛОВА

Ўзбекистон Республикасида тан олинадиган халқаро, хорижий ва нодавлат аккредитация ташкилотлари реестрини юритиш ҳамда уларнинг таълим дастурларини аккредитациядан ўтказиш бўйича фаолиятини мониторинг қилиш тартиби тўғрисидаги

Мазкур Низом Ўзбекистон Республикаси Президенти Администрацияси ҳузуридаги Таълим сифатини таъминлаш миллий агентлиги (бундан буён матнда Агентлик деб юритилади) томонидан Ўзбекистон Республикасида тан олинадиган халқаро, хорижий ва нодавлат аккредитация ташкилотларининг реестрини юритиш ҳамда уларнинг таълим дастурларини аккредитациядан ўтказиш бўйича фаолиятини мониторинг қилиш тартибини белгилайди.

1-боб. Умумий қоидалар

1. Ўзбекистон Республикасида тан олинадиган халқаро, хорижий ва нодавлат аккредитация ташкилотларининг реестри (бундан буён матнда реестр деб юритилади) халқаро, хорижий ва нодавлат аккредитация ташкилотларининг Агентлик томонидан юритиладиган рўйхати ҳамда улар ҳақида маълумотлардан иборат ягона маълумотлар банки ҳисобланади.

2. Халқаро, хорижий ва нодавлат аккредитация ташкилотларини (бундан буён матнда аккредитация ташкилотлари деб юритилади) реестрга киритиш Аккредитация ташкилотлари реестрини юритиш комиссиясининг (бундан буён матнда Комиссия деб юритилади) қарорига асосан амалга оширилади.

3. Таълим ташкилотларини комплекс давлат аккредитациясидан ўтказиш даврида реестрга киритилган аккредитация ташкилотлари томонидан аккредитациядан ўтказилган таълим дастурлари Ўзбекистон Республикаси Вазирлар Маҳкамасининг 2025 йил 6 августдаги 498-сон «Ўрта махсус, касбий, олий ва олий таълимдан кейинги таълим, шунингдек, кадрларни қайта тайёрлаш ва уларнинг малакасини ошириш ташкилотларини комплекс ҳамда махсус давлат аккредитациясидан ўтказиш тизимини жорий этиш тўғрисида»ги қарорида белгиланган мезонлар бўйича ижобий баҳоланган деб ҳисобланади.

2-боб. Аккредитация ташкилотларини реестрга киритиш шартлари ва ариза бериш тартиби

4. Аккредитация ташкилотларини реестрга киритиш шартлари қуйидагилардан иборат:

аккредитация ташкилоти сифатида фаолият юритиши учун тегишли ваколат (ҳужжат)га эга бўлиши;

аккредитация ташкилотининг халқаро аккредитациядан ўтказиш талаблари, баҳолаш мезонлари ва ўтказиш тартиблари Ўзбекистон Республикасининг давлат аккредитациясидан ўтказиш талаблари, баҳолаш мезонлари ва ўтказиш тартибларига зид бўлмаслиги;

таълим сифатини таъминлаш тармоқларининг тўла ҳуқуқли аъзоси бўлиши (нуфузли халқаро таълим сифатини таъминлаш ассоциацияларидан камида биттасига аъзо бўлиши);

нуфузли халқаро рейтингларнинг ТОП-300 талик рўйхатида бўлган камида 5 та олий таълим ташкилотининг таълим дастурларини халқаро аккредитациядан ўтказган бўлиши;

умумий экспертларининг камида 30 фоизи хорижий эксперт бўлиши (халқаро ва хорижий аккредитация ташкилотлари учун);

аккредитация ташкилоти Ўзбекистон Республикасининг ҳуқуқий ва маънавий асосларига мутаносиб бўлиши, миллий қадриятлар ва ижтимоий-сиёсий ҳаётига қарши бўлмаслиги;

ўзининг расмий веб-сайтида халқаро аккредитациядан ўтказган таълим ташкилотлари тўғрисида маълумотларнинг мавжудлиги.

5. Аккредитация ташкилотини реестрга киритиш мазкур аккредитация ташкилотининг ёзма ёки электрон шаклдаги аризаси асосида амалга оширилади.

Реестрга киритиш шартларига тўлиқ мос келадиган халқаро аккредитация ташкилоти Агентлик ташаббуси асосида реестрга киритилиши мумкин.

6. Аккредитация ташкилотини реестрга киритиш бўйича аризага қуйидагилар илова қилиниши лозим:

аккредитация ташкилотининг таъсис ҳужжатлари нусхалари (халқаро ва хорижий аккредитация ташкилотлари учун);

хорижий аккредитация ташкилоти учун у жойлашган хорижий давлатнинг ваколатли органи ёки халқаро ташкилотлар томонидан тан олинганлигини (фаолият юритишга рухсат берилганлиги) тасдиқловчи ҳужжатлар;

аккредитациядан ўтказиш талаблари, баҳолаш мезонлари ва ўтказиш тартиблари, шу жумладан аккредитация стандартлари ва методологияси;

нуфузли халқаро рейтингларнинг ТОП-300 талик рўйхатида бўлган камида 3 та олий таълим ташкилотининг таълим дастурларини халқаро аккредитациядан ўтказганлиги бўйича ҳисоботлар.

7. Аккредитация ташкилотини реестрга киритиш бўйича ариза ва унга илова қилинган ҳужжатлар Агентлик томонидан ариза келиб тушган кундан бошлаб беш иш куни ичида кўриб чиқилади.

Агентлик аккредитация ташкилотини реестрга киритиш бўйича тақдим этилган ҳужжатларнинг тўлиқлигини кўриб чиқиб, хато ва камчиликлар аниқланмаган ҳолларда ариза ва унга илова қилинган ҳужжатларни ўрганиб чиқиш учун Комиссияга тақдим этади ҳамда бир иш куни ичида бу ҳақида аккредитация ташкилотини хабардор қилади.

Аккредитация ташкилотини реестрга киритиш бўйича тақдим этилган ҳужжатларда хато ва камчиликлар аниқланганда, Агентлик ўн иш кунидан кам бўлмаган муддатда аниқланган хато ва камчиликларни бартараф этиш ҳамда етишмаётган ҳужжатларни тақдим этиш учун бир иш куни ичида аккредитация ташкилотини хабардор қилади.

Бунда, аризани кўриб чиқиш муддати мазкур банднинг учинчи хатбошисида белгиланган муддат мобайнида тўхтатиб турилади.

8. Аккредитация ташкилоти томонидан мазкур Низомнинг 7-банди учинчи хатбошисида белгиланган муддат мобайнида хато ва камчиликларни бартараф этилмаган ёки етишмаётган ҳужжатлар тақдим этилмаган ҳолларда аризани кўриб чиқиш рад этилади ҳамда бир иш куни ичида бу ҳақида аккредитация ташкилоти хабардор қилинади.

3-боб. Комиссиянинг фаолиятини ташкил этиш ва аккредитация ташкилотларини реестрга киритиш тартиби

9. Комиссия таркиби раис, Комиссия аъзолари ва масъул котибдан иборат 5 нафардан кам бўлмаган тоқ сонда Агентлик директорининг буйруғи асосида шакллантирилади.

Комиссия таркибига жамоатчилик асосида ташқи экспертлар жалб этилиши мумкин.

10. Комиссияга Агентлик директорининг ўринбосари раислик қилади.

Комиссия раиси Комиссия фаолиятини мустақиллик, холислик, тенглик ва далилларга асосланганлик тамойиллари асосида ташкил этилишини таъминлайди.

11. Манфаатлар тўқнашуви ёки аккредитация ташкилоти билан зиддиятлар мавжудлиги аниқланганда ёхуд Комиссия аъзосининг холислигига шубҳа туғилганда мазкур Комиссия аъзоси Комиссия таркибидан чиқарилади.

12. Комиссия йиғилишларида Комиссия аъзоларининг камида учдан икки қисми иштирок этган тақдирда, Комиссия қарор қабул қилиш учун ваколатли (кворумга эга) ҳисобланади.

13. Комиссия томонидан аккредитация ташкилотининг мазкур Низомнинг 4-бандида назарда тутилган шартларга мувофиқлиги ўрганиб чиқилади.

14. Аккредитация ташкилотини реестрга киритиш ёки киритишни рад этиш тўғрисидаги Комиссия қарори (бундан буён матнда Комиссия қарори деб юритилади) Комиссия аъзоларининг учдан икки қисмидан иборат кўпчилик овози билан қабул қилинади.

Овозлар сони тенг бўлиб қолган тақдирда, Комиссия раисининг овози ҳал қилувчи ҳисобланади.

15. Комиссия қарори баённома шаклида расмийлаштирилади ҳамда Комиссия раиси томонидан имзоланади.

16. Комиссия қарори ариза ва унга илова қилинган ҳужжатлар Комиссияга келиб тушган кундан бошлаб ўттиз кун ичида қабул қилинади.

17. Реестрга киритилган аккредитация ташкилотига Комиссия қарори қабул қилинган кундан бошлаб уч иш куни ичида ушбу Низомнинг иловасига мувофиқ Аккредитация ташкилотининг Ўзбекистон Республикасида тан олинадиган халқаро, хорижий ва нодавлат аккредитация ташкилотлари реестрига киритилганлиги тўғрисидаги гувоҳнома (бундан буён матнда гувоҳнома деб юритилади) берилади.

Аккредитация ташкилотига гувоҳнома берилганлиги Агентликнинг расмий веб-сайтида эълон қилинади.

Аккредитация ташкилотига берилган гувоҳноманинг амал қилиш муддати беш йил ҳисобланади.

18. Қуйидаги ҳолларда аккредитация ташкилотини реестрга киритиш рад этилади:

тақдим этилган ҳужжатларда нотўғри ёки бузиб кўрсатилган маълумотлар мавжудлиги аниқланса;

аккредитация ташкилоти сифатида фаолият юритиши учун тегишли ваколат (ҳужжат)га эга бўлмаса;

таълим тўғрисидаги қонунчилик ҳужжатларида белгиланган талабларга мувофиқ бўлмаса.

19. Агентлик томонидан аккредитация ташкилотини реестрга киритиш рад этилган тақдирда, бу ҳақида Комиссия қарори қабул қилинган кундан бошлаб бир иш куни ичида аккредитация ташкилотини хабардор қилади.

20. Аризани кўриб чиқиш, аккредитация ташкилотини реестрга киритиш ва гувоҳнома бериш учун йиғим ундирилмайди.

4-боб. Таълим дастурларини аккредитациядан ўтказиш бўйича аккредитация ташкилотларининг фаолиятини мониторинг қилиш ва уларни реестрдан чиқариш

21. Агентлик реестрга киритилган аккредитация ташкилотларининг таълим дастурларини аккредитациядан ўтказиш бўйича фаолиятини ҳар уч йилда бир маротаба мониторингдан ўтказади.

22. Мониторинг доирасида қуйидагилар амалга оширилиши мумкин:

манфаатдор томонлардан (таълим ташкилотлари, иш берувчилар, таълим олувчилар ва бошқалар) Агентликка келиб тушаётган ёки Интернет жаҳон ахборот тармоғида кенг муҳокамага сабаб бўлган ариза ва шикоятларни ўрганиш;

аккредитация ташкилоти томонидан белгиланган аккредитациядан ўтказиш талаблари, баҳолаш мезонлари ва ўтказиш тартиблари, шу жумладан аккредитация стандартлари ва методологияси асосида аккредитация фаолияти амалга оширилаётганлигини таҳлил қилиш.

Мониторинг ўтказиш муддати бир ойдан ошмаслиги лозим.

23. Мониторинг натижасида аккредитация ташкилоти фаолиятида камчиликлар аниқланган ҳолларда аккредитация ташкилотига ушбу камчиликларни бартараф этиш бўйича хабарнома юборилади, бундан мазкур Низомнинг 24-бандида назарда тутилган ҳоллар мустасно.

Хабарномада аккредитация ташкилоти фаолиятида аниқланган камчиликларни бартараф этиш юзасидан Агентликнинг тавсиялари баён этилиши мумкин.

Аккредитация ташкилоти ўз фаолиятида аниқланган камчиликларни Агентлик томонидан белгилаган муддатда бартараф этиши ҳамда бу ҳақида Агентликни хабардор қилиши лозим. Бунда, камчиликларни бартараф этиш муддати бир ойдан кам бўлмаслиги керак.

Мазкур банднинг учинчи хатбошисида белгиланган муддатда аккредитация ташкилоти томонидан камчиликлар бартараф этилмаган ҳолларда Агентлик мониторинг натижалари бўйича маълумотномани асослантирувчи ҳужжатлар билан бирга Комиссияга тақдим этади ҳамда бир иш куни ичида бу ҳақида аккредитация ташкилотини хабардор қилади.

24. Мониторинг натижаси бўйича ушбу Низомнинг 26-банди тўртинчи — олтинчи хатбошиларида назарда тутилган ҳолатлар аниқланганда Агентлик мониторинг натижалари бўйича маълумотномани асослантирувчи ҳужжатлар билан бирга Комиссияга тақдим этади ҳамда бир иш куни ичида бу ҳақида аккредитация ташкилотини хабардор қилади.

25. Аккредитация ташкилотини реестрдан чиқариш тўғрисидаги масалани Комиссия томонидан кўриб чиқишда Комиссия йиғилиши ўтказилишидан камида бир ҳафта олдин Комиссия йиғилишининг жойи, санаси ва вақти тўғрисида аккредитация ташкилоти хабардор қилинади. Бунда, аккредитация ташкилотининг вакили Комиссия йиғилишида иштирок этиб, ўзининг фикр-мулоҳазалари ва эътирозларини билдиришга ҳақли.

26. Қуйидагилар аккредитация ташкилотини реестрдан чиқариш тўғрисидаги Комиссиянинг қарорини қабул қилиш учун асос ҳисобланади:

аккредитация ташкилоти тугатилганда;

аккредитация ташкилоти ихтиёрий равишда реестрдан чиқариш тўғрисида ариза билан мурожаат қилганда;

таълим ташкилотларини аккредитациядан ўтказиш бўйича қарорларни қабул қилишда коррупция ёки бошқа ноқонуний хатти-ҳаракатлар юз берганлиги аниқланганда;

аккредитация ташкилотининг ташқи баҳолаш бўйича ҳисоботи нотўғри ёки қалбаки ҳужжатлар асосида шакллантирилганлиги аниқланганда;

аккредитация ташкилотлари таълим ташкилотларини таълим тўғрисидаги қонунчилик ҳужжатлари ҳамда ушбу Низомда белгиланган талабларга зид равишда аккредитациядан ўтказаётганлиги тасдиқланганда;

аккредитация ташкилотини мониторинг қилиш натижасида аниқланган камчиликлар аккредитация ташкилоти томонидан мазкур Низомнинг 23-банди учинчи хатбошисида белгиланган муддатда бартараф этилмаган тақдирда.

Аккредитация ташкилотини реестрдан чиқариш тўғрисидаги қарор мазкур қарор қабул қилинган куннинг ўзида Агентликнинг расмий веб-сайтда эълон қилинади.

5-боб. Реестрга киритилган аккредитация ташкилотининг ҳуқуқлари ва мажбуриятлари

27. Реестрга киритилган аккредитация ташкилоти қуйидаги ҳуқуқларга эга:

аккредитация ўтказиш тартиб-таомиллари тўғрисида Агентликдан тавсиялар олиш;

таълим дастурларини шартнома асосида аккредитациядан ўтказиш;

аккредитациядан ўтказиш талаблари, баҳолаш мезонлари ва ўтказиш тартиблари, шу жумладан аккредитация стандартлари ва методологиясини таълим тўғрисидаги қонунчиликка зид бўлмаган ҳолда мустақил ишлаб чиқиш ва такомиллаштириш.

Аккредитация ташкилоти қонунчиликка мувофиқ бошқа ҳуқуқларга ҳам эга бўлиши мумкин.

28. Реестрга киритилган аккредитация ташкилоти қуйидагиларни бажариши лозим:

таълим тўғрисидаги қонунчилик ва ушбу Низомда белгиланган талабларга зид бўлмаган тарзда аккредитация фаолиятини олиб бориш;

аккредитация жараёнларини қонуний, холис ва манфаатлар тўқнашувига йўл қўймаган ҳолда амалга ошириш;

аккредитациядан ўтказиш талаблари, баҳолаш мезонлари ва ўтказиш тартиблари, шу жумладан аккредитация стандартлари ва методологиясини ўзининг расмий веб-сайтида эълон қилиш;

аккредитация фаолиятида олинган махфий ахборотни ошкор этмаслик;

аккредитация қарорларини асослантирган ҳолда тизимли равишда ҳужжатлаштириш;

аккредитация ҳисоботи ва аккредитация қарорининг бир нусхасини аккредитация жараёнлари якунлангандан сўнг икки ҳафта муддатда Агентликка тақдим этиш.

Аккредитация ташкилоти қонунчилик ҳужжатларига мувофиқ бошқа мажбуриятларга ҳам эга бўлиши мумкин.

6-боб. Якуний қоида

29. Ушбу Низом талабларининг бузилишида айбдор бўлган шахслар қонунчилик ҳужжатларида белгиланган тартибда жавобгар бўладилар.

Ўзбекистон Республикасида тан олинадиган халқаро, хорижий ва нодавлат аккредитация ташкилотлари реестрини юритиш ҳамда уларнинг таълим дастурларини аккредитациядан ўтказиш бўйича фаолиятини мониторинг қилиш тартиби тўғрисидаги низомга ИЛОВА

ЎЗБЕКИСТОН РЕСПУБЛИКАСИ ПРЕЗИДЕНТИ АДМИНИСТРАЦИЯСИ ҲУЗУРИДАГИ ТАЪЛИМ СИФАТИНИ ТАЪМИНЛАШ МИЛЛИЙ АГЕНТЛИГИ Аккредитация ташкилотининг Ўзбекистон Республикасида тан олинадиган халқаро, хорижий ва нодавлат аккредитация ташкилотлари реестрига киритилганлиги тўғрисидаги ГУВОҲНОМАСИ «____» __________20___-й. Ушбу гувоҳнома _________________________________________________________________ (аккредитация ташкилоти номи) ______________________________________________________________________ни Ўзбекистон Республикасида тан олинадиган халқаро, хорижий ва нодавлат аккредитация ташкилотлари реестрига киритилганлиги ҳамда Ўзбекистон Республикасида фаолият юритаётган таълим ташкилотларининг таълим дастурларини аккредитациядан ўтказишга рухсат берилганлигини тасдиқлайди. ______-сон Амал қилиш муддати: «____»-_________20___-й. Директор __________________ _______________________ (электрон рақамли имзо) (Ф.И.О.) QR код

Директор Б. ЮЛДАШЕВ

Олий таълим, фан ва инновациялар вазири К. ШАРИПОВ

Тошкент ш.,

2026 йил 27 январь,

2026 йил 12 январь

9 -сон

(Қонунчилик маълумотлари миллий базаси, 16.02.2026 й., 10/26/3774/0144-сон)

lex.uz

Oʻzbekiston Respublikasi Prezidenti Administratsiyasi huzuridagi Taʼlim sifatini taʼminlash milliy agentligi direktorining

buyrugʻi

NIZOM

Oʻzbekiston Respublikasida tan olinadigan xalqaro, xorijiy va nodavlat akkreditatsiya tashkilotlari reyestrini yuritish hamda ularning taʼlim dasturlarini akkreditatsiyadan oʻtkazish boʻyicha faoliyatini monitoring qilish tartibi toʻgʻrisidagi nizomni tasdiqlash haqida

Oʻzbekiston Respublikasi Prezidentining 2025-yil 5-maydagi PF-76-son “Taʼlim sifatini taʼminlash va taʼlim xizmatlari koʻrsatish tizimini takomillashtirish boʻyicha qoʻshimcha chora-tadbirlar toʻgʻrisida”gi Farmoni hamda Vazirlar Mahkamasining 2025-yil 6-avgustdagi 498-son “Oʻrta maxsus, kasbiy, oliy va oliy taʼlimdan keyingi taʼlim, shuningdek, kadrlarni qayta tayyorlash va ularning malakasini oshirish tashkilotlarini kompleks hamda maxsus davlat akkreditatsiyasidan oʻtkazish tizimini joriy etish toʻgʻrisida”gi qaroriga muvofiq buyuraman:

1. Oʻzbekiston Respublikasida tan olinadigan xalqaro, xorijiy va nodavlat akkreditatsiya tashkilotlari reyestrini yuritish hamda ularning taʼlim dasturlarini akkreditatsiyadan oʻtkazish boʻyicha faoliyatini monitoring qilish tartibi toʻgʻrisidagi nizom ilovaga muvofiq tasdiqlansin.

2. Mazkur buyruq Oʻzbekiston Respublikasi Oliy taʼlim, fan va innovatsiyalar vazirligi bilan kelishilgan.

3. Ushbu buyruq rasmiy eʼlon qilingan kundan eʼtiboran kuchga kiradi.

Kelishildi:

Oʻzbekiston Respublikasi Prezidenti Administratsiyasi huzuridagi Taʼlim sifatini taʼminlash milliy agentligi direktorining 2026-yil 27-yanvardagi 9-son buyrugʻiga ILOVA

Oʻzbekiston Respublikasida tan olinadigan xalqaro, xorijiy va nodavlat akkreditatsiya tashkilotlari reyestrini yuritish hamda ularning taʼlim dasturlarini akkreditatsiyadan oʻtkazish boʻyicha faoliyatini monitoring qilish tartibi toʻgʻrisidagi

Mazkur Nizom Oʻzbekiston Respublikasi Prezidenti Administratsiyasi huzuridagi Taʼlim sifatini taʼminlash milliy agentligi (bundan buyon matnda Agentlik deb yuritiladi) tomonidan Oʻzbekiston Respublikasida tan olinadigan xalqaro, xorijiy va nodavlat akkreditatsiya tashkilotlarining reyestrini yuritish hamda ularning taʼlim dasturlarini akkreditatsiyadan oʻtkazish boʻyicha faoliyatini monitoring qilish tartibini belgilaydi.

1-bob. Umumiy qoidalar

1. Oʻzbekiston Respublikasida tan olinadigan xalqaro, xorijiy va nodavlat akkreditatsiya tashkilotlarining reyestri (bundan buyon matnda reyestr deb yuritiladi) xalqaro, xorijiy va nodavlat akkreditatsiya tashkilotlarining Agentlik tomonidan yuritiladigan roʻyxati hamda ular haqida maʼlumotlardan iborat yagona maʼlumotlar banki hisoblanadi.

2. Xalqaro, xorijiy va nodavlat akkreditatsiya tashkilotlarini (bundan buyon matnda akkreditatsiya tashkilotlari deb yuritiladi) reyestrga kiritish Akkreditatsiya tashkilotlari reyestrini yuritish komissiyasining (bundan buyon matnda Komissiya deb yuritiladi) qaroriga asosan amalga oshiriladi.

3. Taʼlim tashkilotlarini kompleks davlat akkreditatsiyasidan oʻtkazish davrida reyestrga kiritilgan akkreditatsiya tashkilotlari tomonidan akkreditatsiyadan oʻtkazilgan taʼlim dasturlari Oʻzbekiston Respublikasi Vazirlar Mahkamasining 2025-yil 6-avgustdagi 498-son “Oʻrta maxsus, kasbiy, oliy va oliy taʼlimdan keyingi taʼlim, shuningdek, kadrlarni qayta tayyorlash va ularning malakasini oshirish tashkilotlarini kompleks hamda maxsus davlat akkreditatsiyasidan oʻtkazish tizimini joriy etish toʻgʻrisida”gi qarorida belgilangan mezonlar boʻyicha ijobiy baholangan deb hisoblanadi.

2-bob. Akkreditatsiya tashkilotlarini reyestrga kiritish shartlari va ariza berish tartibi

4. Akkreditatsiya tashkilotlarini reyestrga kiritish shartlari quyidagilardan iborat:

akkreditatsiya tashkiloti sifatida faoliyat yuritishi uchun tegishli vakolat (hujjat)ga ega boʻlishi;

akkreditatsiya tashkilotining xalqaro akkreditatsiyadan oʻtkazish talablari, baholash mezonlari va oʻtkazish tartiblari Oʻzbekiston Respublikasining davlat akkreditatsiyasidan oʻtkazish talablari, baholash mezonlari va oʻtkazish tartiblariga zid boʻlmasligi;

taʼlim sifatini taʼminlash tarmoqlarining toʻla huquqli aʼzosi boʻlishi (nufuzli xalqaro taʼlim sifatini taʼminlash assotsiatsiyalaridan kamida bittasiga aʼzo boʻlishi);

nufuzli xalqaro reytinglarning TOP-300 talik roʻyxatida boʻlgan kamida 5 ta oliy taʼlim tashkilotining taʼlim dasturlarini xalqaro akkreditatsiyadan oʻtkazgan boʻlishi;

umumiy ekspertlarining kamida 30 foizi xorijiy ekspert boʻlishi (xalqaro va xorijiy akkreditatsiya tashkilotlari uchun);

akkreditatsiya tashkiloti Oʻzbekiston Respublikasining huquqiy va maʼnaviy asoslariga mutanosib boʻlishi, milliy qadriyatlar va ijtimoiy-siyosiy hayotiga qarshi boʻlmasligi;

oʻzining rasmiy veb-saytida xalqaro akkreditatsiyadan oʻtkazgan taʼlim tashkilotlari toʻgʻrisida maʼlumotlarning mavjudligi.

5. Akkreditatsiya tashkilotini reyestrga kiritish mazkur akkreditatsiya tashkilotining yozma yoki elektron shakldagi arizasi asosida amalga oshiriladi.

Reyestrga kiritish shartlariga toʻliq mos keladigan xalqaro akkreditatsiya tashkiloti Agentlik tashabbusi asosida reyestrga kiritilishi mumkin.

6. Akkreditatsiya tashkilotini reyestrga kiritish boʻyicha arizaga quyidagilar ilova qilinishi lozim:

akkreditatsiya tashkilotining taʼsis hujjatlari nusxalari (xalqaro va xorijiy akkreditatsiya tashkilotlari uchun);

xorijiy akkreditatsiya tashkiloti uchun u joylashgan xorijiy davlatning vakolatli organi yoki xalqaro tashkilotlar tomonidan tan olinganligini (faoliyat yuritishga ruxsat berilganligi) tasdiqlovchi hujjatlar;

akkreditatsiyadan oʻtkazish talablari, baholash mezonlari va oʻtkazish tartiblari, shu jumladan akkreditatsiya standartlari va metodologiyasi;

nufuzli xalqaro reytinglarning TOP-300 talik roʻyxatida boʻlgan kamida 3 ta oliy taʼlim tashkilotining taʼlim dasturlarini xalqaro akkreditatsiyadan oʻtkazganligi boʻyicha hisobotlar.

7. Akkreditatsiya tashkilotini reyestrga kiritish boʻyicha ariza va unga ilova qilingan hujjatlar Agentlik tomonidan ariza kelib tushgan kundan boshlab besh ish kuni ichida koʻrib chiqiladi.

Agentlik akkreditatsiya tashkilotini reyestrga kiritish boʻyicha taqdim etilgan hujjatlarning toʻliqligini koʻrib chiqib, xato va kamchiliklar aniqlanmagan hollarda ariza va unga ilova qilingan hujjatlarni oʻrganib chiqish uchun Komissiyaga taqdim etadi hamda bir ish kuni ichida bu haqida akkreditatsiya tashkilotini xabardor qiladi.

Akkreditatsiya tashkilotini reyestrga kiritish boʻyicha taqdim etilgan hujjatlarda xato va kamchiliklar aniqlanganda, Agentlik oʻn ish kunidan kam boʻlmagan muddatda aniqlangan xato va kamchiliklarni bartaraf etish hamda yetishmayotgan hujjatlarni taqdim etish uchun bir ish kuni ichida akkreditatsiya tashkilotini xabardor qiladi.

Bunda, arizani koʻrib chiqish muddati mazkur bandning uchinchi xatboshisida belgilangan muddat mobaynida toʻxtatib turiladi.

8. Akkreditatsiya tashkiloti tomonidan mazkur Nizomning 7-bandi uchinchi xatboshisida belgilangan muddat mobaynida xato va kamchiliklarni bartaraf etilmagan yoki yetishmayotgan hujjatlar taqdim etilmagan hollarda arizani koʻrib chiqish rad etiladi hamda bir ish kuni ichida bu haqida akkreditatsiya tashkiloti xabardor qilinadi.

3-bob. Komissiyaning faoliyatini tashkil etish va akkreditatsiya tashkilotlarini reyestrga kiritish tartibi

9. Komissiya tarkibi rais, Komissiya aʼzolari va masʼul kotibdan iborat 5 nafardan kam boʻlmagan toq sonda Agentlik direktorining buyrugʻi asosida shakllantiriladi.

Komissiya tarkibiga jamoatchilik asosida tashqi ekspertlar jalb etilishi mumkin.

10. Komissiyaga Agentlik direktorining oʻrinbosari raislik qiladi.

Komissiya raisi Komissiya faoliyatini mustaqillik, xolislik, tenglik va dalillarga asoslanganlik tamoyillari asosida tashkil etilishini taʼminlaydi.

11. Manfaatlar toʻqnashuvi yoki akkreditatsiya tashkiloti bilan ziddiyatlar mavjudligi aniqlanganda yoxud Komissiya aʼzosining xolisligiga shubha tugʻilganda mazkur Komissiya aʼzosi Komissiya tarkibidan chiqariladi.

12. Komissiya yigʻilishlarida Komissiya aʼzolarining kamida uchdan ikki qismi ishtirok etgan taqdirda, Komissiya qaror qabul qilish uchun vakolatli (kvorumga ega) hisoblanadi.

13. Komissiya tomonidan akkreditatsiya tashkilotining mazkur Nizomning 4-bandida nazarda tutilgan shartlarga muvofiqligi oʻrganib chiqiladi.

14. Akkreditatsiya tashkilotini reyestrga kiritish yoki kiritishni rad etish toʻgʻrisidagi Komissiya qarori (bundan buyon matnda Komissiya qarori deb yuritiladi) Komissiya aʼzolarining uchdan ikki qismidan iborat koʻpchilik ovozi bilan qabul qilinadi.

Ovozlar soni teng boʻlib qolgan taqdirda, Komissiya raisining ovozi hal qiluvchi hisoblanadi.

15. Komissiya qarori bayonnoma shaklida rasmiylashtiriladi hamda Komissiya raisi tomonidan imzolanadi.

16. Komissiya qarori ariza va unga ilova qilingan hujjatlar Komissiyaga kelib tushgan kundan boshlab o'ttiz kun ichida qabul qilinadi.

17. Reyestrga kiritilgan akkreditatsiya tashkilotiga Komissiya qarori qabul qilingan kundan boshlab uch ish kuni ichida ushbu Nizomning ilovasiga muvofiq Akkreditatsiya tashkilotining Oʻzbekiston Respublikasida tan olinadigan xalqaro, xorijiy va nodavlat akkreditatsiya tashkilotlari reyestriga kiritilganligi toʻgʻrisidagi guvohnoma (bundan buyon matnda guvohnoma deb yuritiladi) beriladi.

Akkreditatsiya tashkilotiga guvohnoma berilganligi Agentlikning rasmiy veb-saytida eʼlon qilinadi.

Akkreditatsiya tashkilotiga berilgan guvohnomaning amal qilish muddati besh yil hisoblanadi.

18. Quyidagi hollarda akkreditatsiya tashkilotini reyestrga kiritish rad etiladi:

taqdim etilgan hujjatlarda notoʻgʻri yoki buzib koʻrsatilgan maʼlumotlar mavjudligi aniqlansa;

akkreditatsiya tashkiloti sifatida faoliyat yuritishi uchun tegishli vakolat (hujjat)ga ega boʻlmasa;

taʼlim toʻgʻrisidagi qonunchilik hujjatlarida belgilangan talablarga muvofiq boʻlmasa.

19. Agentlik tomonidan akkreditatsiya tashkilotini reyestrga kiritish rad etilgan taqdirda, bu haqida Komissiya qarori qabul qilingan kundan boshlab bir ish kuni ichida akkreditatsiya tashkilotini xabardor qiladi.

20. Arizani koʻrib chiqish, akkreditatsiya tashkilotini reyestrga kiritish va guvohnoma berish uchun yigʻim undirilmaydi.

4-bob. Taʼlim dasturlarini akkreditatsiyadan oʻtkazish boʻyicha akkreditatsiya tashkilotlarining faoliyatini monitoring qilish va ularni reyestrdan chiqarish

21. Agentlik reyestrga kiritilgan akkreditatsiya tashkilotlarining taʼlim dasturlarini akkreditatsiyadan oʻtkazish boʻyicha faoliyatini har uch yilda bir marotaba monitoringdan oʻtkazadi.

22. Monitoring doirasida quyidagilar amalga oshirilishi mumkin:

manfaatdor tomonlardan (taʼlim tashkilotlari, ish beruvchilar, taʼlim oluvchilar va boshqalar) Agentlikka kelib tushayotgan yoki Internet jahon axborot tarmogʻida keng muhokamaga sabab boʻlgan ariza va shikoyatlarni oʻrganish;

akkreditatsiya tashkiloti tomonidan belgilangan akkreditatsiyadan oʻtkazish talablari, baholash mezonlari va oʻtkazish tartiblari, shu jumladan akkreditatsiya standartlari va metodologiyasi asosida akkreditatsiya faoliyati amalga oshirilayotganligini tahlil qilish.

Monitoring oʻtkazish muddati bir oydan oshmasligi lozim.

23. Monitoring natijasida akkreditatsiya tashkiloti faoliyatida kamchiliklar aniqlangan hollarda akkreditatsiya tashkilotiga ushbu kamchiliklarni bartaraf etish boʻyicha xabarnoma yuboriladi, bundan mazkur Nizomning 24-bandida nazarda tutilgan hollar mustasno.

Xabarnomada akkreditatsiya tashkiloti faoliyatida aniqlangan kamchiliklarni bartaraf etish yuzasidan Agentlikning tavsiyalari bayon etilishi mumkin.

Akkreditatsiya tashkiloti oʻz faoliyatida aniqlangan kamchiliklarni Agentlik tomonidan belgilagan muddatda bartaraf etishi hamda bu haqida Agentlikni xabardor qilishi lozim. Bunda, kamchiliklarni bartaraf etish muddati bir oydan kam boʻlmasligi kerak.

Mazkur bandning uchinchi xatboshisida belgilangan muddatda akkreditatsiya tashkiloti tomonidan kamchiliklar bartaraf etilmagan hollarda Agentlik monitoring natijalari boʻyicha maʼlumotnomani asoslantiruvchi hujjatlar bilan birga Komissiyaga taqdim etadi hamda bir ish kuni ichida bu haqida akkreditatsiya tashkilotini xabardor qiladi.

24. Monitoring natijasi boʻyicha ushbu Nizomning 26-bandi toʻrtinchi — oltinchi xatboshilarida nazarda tutilgan holatlar aniqlanganda Agentlik monitoring natijalari boʻyicha maʼlumotnomani asoslantiruvchi hujjatlar bilan birga Komissiyaga taqdim etadi hamda bir ish kuni ichida bu haqida akkreditatsiya tashkilotini xabardor qiladi.

25. Akkreditatsiya tashkilotini reyestrdan chiqarish toʻgʻrisidagi masalani Komissiya tomonidan koʻrib chiqishda Komissiya yigʻilishi oʻtkazilishidan kamida bir hafta oldin Komissiya yigʻilishining joyi, sanasi va vaqti toʻgʻrisida akkreditatsiya tashkiloti xabardor qilinadi. Bunda, akkreditatsiya tashkilotining vakili Komissiya yigʻilishida ishtirok etib, oʻzining fikr-mulohazalari va eʼtirozlarini bildirishga haqli.

26. Quyidagilar akkreditatsiya tashkilotini reyestrdan chiqarish toʻgʻrisidagi Komissiyaning qarorini qabul qilish uchun asos hisoblanadi:

akkreditatsiya tashkiloti tugatilganda;

akkreditatsiya tashkiloti ixtiyoriy ravishda reyestrdan chiqarish toʻgʻrisida ariza bilan murojaat qilganda;

taʼlim tashkilotlarini akkreditatsiyadan oʻtkazish boʻyicha qarorlarni qabul qilishda korrupsiya yoki boshqa noqonuniy xatti-harakatlar yuz berganligi aniqlanganda;

akkreditatsiya tashkilotining tashqi baholash boʻyicha hisoboti notoʻgʻri yoki qalbaki hujjatlar asosida shakllantirilganligi aniqlanganda;

akkreditatsiya tashkilotlari taʼlim tashkilotlarini taʼlim toʻgʻrisidagi qonunchilik hujjatlari hamda ushbu Nizomda belgilangan talablarga zid ravishda akkreditatsiyadan oʻtkazayotganligi tasdiqlanganda;

akkreditatsiya tashkilotini monitoring qilish natijasida aniqlangan kamchiliklar akkreditatsiya tashkiloti tomonidan mazkur Nizomning 23-bandi uchinchi xatboshisida belgilangan muddatda bartaraf etilmagan taqdirda.

Akkreditatsiya tashkilotini reyestrdan chiqarish toʻgʻrisidagi qaror mazkur qaror qabul qilingan kunning oʻzida Agentlikning rasmiy veb-saytda eʼlon qilinadi.

5-bob. Reyestrga kiritilgan akkreditatsiya tashkilotining huquqlari va majburiyatlari

27. Reyestrga kiritilgan akkreditatsiya tashkiloti quyidagi huquqlarga ega:

akkreditatsiya oʻtkazish tartib-taomillari toʻgʻrisida Agentlikdan tavsiyalar olish;

taʼlim dasturlarini shartnoma asosida akkreditatsiyadan oʻtkazish;

akkreditatsiyadan oʻtkazish talablari, baholash mezonlari va oʻtkazish tartiblari, shu jumladan akkreditatsiya standartlari va metodologiyasini taʼlim toʻgʻrisidagi qonunchilikka zid boʻlmagan holda mustaqil ishlab chiqish va takomillashtirish.

Akkreditatsiya tashkiloti qonunchilikka muvofiq boshqa huquqlarga ham ega boʻlishi mumkin.

28. Reyestrga kiritilgan akkreditatsiya tashkiloti quyidagilarni bajarishi lozim:

taʼlim toʻgʻrisidagi qonunchilik va ushbu Nizomda belgilangan talablarga zid boʻlmagan tarzda akkreditatsiya faoliyatini olib borish;

akkreditatsiya jarayonlarini qonuniy, xolis va manfaatlar toʻqnashuviga yoʻl qoʻymagan holda amalga oshirish;

akkreditatsiyadan oʻtkazish talablari, baholash mezonlari va oʻtkazish tartiblari, shu jumladan akkreditatsiya standartlari va metodologiyasini oʻzining rasmiy veb-saytida eʼlon qilish;

akkreditatsiya faoliyatida olingan maxfiy axborotni oshkor etmaslik;

akkreditatsiya qarorlarini asoslantirgan holda tizimli ravishda hujjatlashtirish;

akkreditatsiya hisoboti va akkreditatsiya qarorining bir nusxasini akkreditatsiya jarayonlari yakunlangandan soʻng ikki hafta muddatda Agentlikka taqdim etish.

Akkreditatsiya tashkiloti qonunchilik hujjatlariga muvofiq boshqa majburiyatlarga ham ega boʻlishi mumkin.

6-bob. Yakuniy qoida

29. Ushbu Nizom talablarining buzilishida aybdor boʻlgan shaxslar qonunchilik hujjatlarida belgilangan tartibda javobgar boʻladilar.

Oʻzbekiston Respublikasida tan olinadigan xalqaro, xorijiy va nodavlat akkreditatsiya tashkilotlari reyestrini yuritish hamda ularning taʼlim dasturlarini akkreditatsiyadan oʻtkazish boʻyicha faoliyatini monitoring qilish tartibi toʻgʻrisidagi nizomga ILOVA

OʻZBEKISTON RESPUBLIKASI PREZIDENTI ADMINISTRATSIYASI HUZURIDAGI TAʼLIM SIFATINI TAʼMINLASH MILLIY AGENTLIGI Akkreditatsiya tashkilotining Oʻzbekiston Respublikasida tan olinadigan xalqaro, xorijiy va nodavlat akkreditatsiya tashkilotlari reyestriga kiritilganligi toʻgʻrisidagi GUVOHNOMASI “____” __________20___-y. Ushbu guvohnoma _________________________________________________________________ (akkreditatsiya tashkiloti nomi) ______________________________________________________________________ni Oʻzbekiston Respublikasida tan olinadigan xalqaro, xorijiy va nodavlat akkreditatsiya tashkilotlari reyestriga kiritilganligi hamda Oʻzbekiston Respublikasida faoliyat yuritayotgan taʼlim tashkilotlarining taʼlim dasturlarini akkreditatsiyadan oʻtkazishga ruxsat berilganligini tasdiqlaydi. ______-son Amal qilish muddati: “____”-_________20___-y. Direktor __________________ _______________________ (elektron raqamli imzo) (F.I.O.) QR kod

Direktor B. YULDASHEV

Oliy taʼlim, fan va innovatsiyalar vaziri K. SHARIPOV

Toshkent sh.,

2026-yil 27-yanvar,

2026-yil 12-yanvar

9 -son

(Qonunchilik maʼlumotlari milliy bazasi, 16.02.2026-y., 10/26/3774/0144-son)

lex.uz