UzbekAI

Ўзбекистон Республикаси Президентининг

қарори

Чет эл фуқароларига қўшилган қиймат солиғини қайтариш тизимини такомиллаштириш чора-тадбирлари тўғрисида

Чет эл фуқароларига қўшилган қиймат солиғини қайтариш тизимидаги айрим маъмурий тўсиқларни бартараф этиш, тизимнинг қамровини кенгайтириш ва хизмат кўрсатиш сифатини яхшилаш орқали мамлакатнинг туристик жозибадорлигини янада ошириш ҳамда чакана савдо соҳасида ҳисоб-китоблар шаффофлигини таъминлаш мақсадида қарор қиламан:

I. Асосий мақсадлар

1. Қуйидагилар ушбу қарорни қабул қилишдан кўзланган асосий мақсадлар этиб белгилансин:

(а) чет эл фуқароларига қўшилган қиймат солиғини қайтариш тизими қамровини кенгайтириш;

(б) 2026-2027 йилларда чет эл фуқаролари томонидан амалга ошириладиган харидлар ҳажмини 10 бараварга ошириш;

(в) чакана савдо соҳасида ҳисоб-китоблар шаффофлигини ошириш ва яширин товар айланмасини қисқартириш.

II. Чет эл фуқароларига қўшилган қиймат солиғини қайтариш тизимини такомиллаштириш

2. 2023 йил 1 январдан бошлаб чет эл фуқаролари томонидан чакана савдо билан шуғулланувчи субъектлардан айрим турдаги товарларни сотиб олишда тўланган қўшилган қиймат солиғи суммасини қисман қайтариш тизими (кейинги ўринларда — «tax free» тизими) тажриба тариқасида жорий этилганлиги ҳамда Тошкент ва Самарқанд халқаро аэропортларида сервис шохобчалари ташкил этилганлиги маълумот учун қабул қилинсин.

3. Белгилансинки, 2026 йил 1 апрелдан бошлаб:

(а) республиканинг барча халқаро аэропортларида чет эл фуқароларига қўшилган қиймат солиғини қайтариш тизими йўлга қўйилади;

(б) чет эл фуқароларига уларнинг ихтиёрига асосан қўшилган қиймат солиғини нақд пулда қайтариб олиш имконияти яратилади. Бунда қўшилган қиймат солиғининг белгиланган ставкаси миқдорининг 85 фоизи чет эл фуқаросига қўшилган қиймат солиғи суммасини қайтаришга, 15 фоизи «tax free» тизими операторининг хизматларига йўналтирилади;

(в) қўшилган қиймат солиғини чет эл фуқароларининг банк картасига қайтариш товарлар олиб чиқиб кетилган кундан кейин 3 иш кунидан кўп бўлмаган муддатда амалга оширилади;

(г) чет эл фуқароларига қўшилган қиймат солиғини қайтаришда минимал харид қиймати қўшилган қиймат солиғини инобатга олган ҳолда уч юз минг сўм этиб белгиланади;

(д) «tax free» тизими татбиқ этиладиган товарларнинг чегараланган рўйхати (бундан озиқ-овқат маҳсулотлари мустасно) бекор қилинади.

4. Солиқ қўмитаси:

(а) бир ой муддатда солиқ органларининг махсус мобил иловасида чет эл фуқароларига қайтариладиган қўшилган қиймат солиғи суммасини ҳисобга олиш ва уни қайтариш учун электрон почта орқали идентификациядан ўтиш имкониятини яратсин;

(б) Божхона қўмитаси билан биргаликда «Ғишткўприк» чегара божхона постида реконструкция ишлари якунланиб, одамлар ва транспорт воситалари ҳаракати тиклангандан сўнг тажриба тариқасида ушбу божхона постида барча талабларга жавоб берадиган «tax free» сервис шохобчасини ташкил этсин.

III. «Tax free» тизими тарғиботини кучайтириш

5. Солиқ қўмитаси икки ой муддатда:

(а) «tax free» тизими бўйича инглиз, рус, хитой, араб тилларида ахборот материалларини тайёрлаб, расмий веб-сайт ва ижтимоий тармоқларда жойлаштирилишини;

(б) туристик марказлар, йирик савдо мажмуалари ҳамда чет эл фуқаролари кўп ташриф буюрадиган бозорлардаги чакана савдо объектларида «tax free» тизими жорий этилганлигини билдирувчи махсус белгилар (флаерлар) бўлишини таъминласин.

6. Туризм қўмитаси:

(а) Солиқ қўмитаси билан биргаликда 2026 йил 1 апрелга қадар «tax free» тизимининг афзалликлари ва қўшилган қиймат солиғини қайтариш тартиби тўғрисида инглиз, рус, хитой ва араб тилларида тақдимот ва ахборот материалларини тайёрлаб, халқаро туристик кўргазма ва ярмаркаларда тарғиб қилишни таъминласин;

(б) 2026 йил давомида Ўзбекистонга сайёҳлар оқими юқори бўлган хорижий давлатларда фаолият юритувчи туроператорлар, авиакомпаниялар ва онлайн бронлаш платформалари билан ҳамкорликда «tax free» тизими имкониятларини тарғиб қилишни ташкил этсин.

7. «Uzbekistan Airports» АЖ Солиқ қўмитаси билан биргаликда бир ой муддатда барча халқаро аэропортларда Ўзбекистон Республикасида «tax free» тизими жорий этилганлигини билдирувчи ҳамда мобил иловадан фойдаланишнинг босқичлари ҳақида маълумот берувчи флаер, буклетлар, тарқатма материаллар ва бошқа қўлланмалар бўлишини таъминласин.

IV. Қарор ижросини ташкил этиш, таъминлаш ва назорат

8. Ўзбекистон Республикаси Президентининг айрим қарорларига иловага мувофиқ ўзгартиришлар киритилсин.

9. Солиқ қўмитаси:

(а) «Uzbekistan Airports» АЖ билан биргаликда 2026 йил 1 апрелдан бошлаб республиканинг барча халқаро аэропортларида «tax free» сервис шохобчаларини ташкил этсин ҳамда халқаро авиқатновлар графиги асосида ишлашини таъминласин;

(б) Иқтисодиёт ва молия вазирлиги билан биргаликда икки ой муддатда қонунчилик ҳужжатларига ушбу қарордан келиб чиқадиган ўзгартириш ва қўшимчалар тўғрисида Вазирлар Маҳкамасига таклифлар киритсин.

10. Мазкур қарорнинг ижросини самарали ташкил қилишга масъул ва шахсан жавобгар этиб Солиқ қўмитаси раиси Ф.Ж. Пулатов белгилансин.

11. Қарор ижросини муҳокама қилиб бориш, ижро учун масъул идоралар фаолиятини мувофиқлаштириш ва назорат қилиш Бош вазир ўринбосари Ж.А. Қўчқоров зиммасига юклансин.

Ўзбекистон Республикаси Президентининг 2026 йил 5 мартдаги ПҚ-78-сон қарорига ИЛОВА

Ўзбекистон Республикаси Президентининг айрим қарорларига киритилаётган ўзгартиришлар

1. Ўзбекистон Республикаси Президентининг 2020 йил 21 августдаги «Маҳаллий ишлаб чиқарувчиларни қўллаб-қувватлашга доир қўшимча чора-тадбирлар тўғрисида»ги ПҚ-4812-сон қарорининг 4-банди иккинчи хатбошиси қуйидаги таҳрирда баён этилсин:

«бюджет ва корпоратив буюртмачилар раҳбарлари харид қилиниши назарда тутилган товарларни (ишларни, хизматларни), шу жумладан, аудит ва солиқ маслаҳати хизматларини биринчи навбатда new.cooperation.uz ёки Ишлаб чиқарувчилар экотизими порталларида (кейинги ўринларда — портал) рўйхатдан ўтган маҳаллий ишлаб чиқарувчилардан харид қилиш имкониятини мажбурий тартибда ўрганади. Бунда давлат харидлари учун зарур бўлган товарлар (ишлар, хизматлар) ушбу порталда мавжуд бўлмаган тақдирдагина портал маълумотномаси асосида уларни бошқа электрон порталлардан харид қилишга рухсат этилади».

2. Ўзбекистон Республикаси Президентининг 2025 йил 19 ноябрдаги «Ўзбекистон Республикаси Туризм қўмитаси фаолиятини ташкил этиш ва туризм соҳасини жадал ривожлантириш чора-тадбирлари тўғрисида»ги ПҚ-348-сон қарорида :

(а) 8-банднинг «а» кичик бандидаги «2026 йил 1 февралдан» сўзлари «2026 йил 1 апрелдан» сўзлари билан алмаштирилсин;

(б) 6-илова 17-позициясининг «Ижро муддати» устунидаги «2026 йил январь» сўзлари «2026 йил апрель» сўзлари билан алмаштирилсин.

Ўзбекистон Республикаси Президенти Ш. МИРЗИЁЕВ

Тошкент ш.,

2026 йил 5 март,

ПҚ-78-сон

(Қонунчилик маълумотлари миллий базаси, 06.03.2026 й., 07/26/78/0201-сон)

lex.uz

Oʻzbekiston Respublikasi Prezidentining

qarori

Chet el fuqarolariga qoʻshilgan qiymat soligʻini qaytarish tizimini takomillashtirish chora-tadbirlari toʻgʻrisida

Chet el fuqarolariga qoʻshilgan qiymat soligʻini qaytarish tizimidagi ayrim maʼmuriy toʻsiqlarni bartaraf etish, tizimning qamrovini kengaytirish va xizmat koʻrsatish sifatini yaxshilash orqali mamlakatning turistik jozibadorligini yanada oshirish hamda chakana savdo sohasida hisob-kitoblar shaffofligini taʼminlash maqsadida qaror qilaman:

I. Asosiy maqsadlar

1. Quyidagilar ushbu qarorni qabul qilishdan koʻzlangan asosiy maqsadlar etib belgilansin:

(a) chet el fuqarolariga qoʻshilgan qiymat soligʻini qaytarish tizimi qamrovini kengaytirish;

(b) 2026-2027-yillarda chet el fuqarolari tomonidan amalga oshiriladigan xaridlar hajmini 10 baravarga oshirish;

(v) chakana savdo sohasida hisob-kitoblar shaffofligini oshirish va yashirin tovar aylanmasini qisqartirish.

II. Chet el fuqarolariga qoʻshilgan qiymat soligʻini qaytarish tizimini takomillashtirish

2. 2023-yil 1-yanvardan boshlab chet el fuqarolari tomonidan chakana savdo bilan shugʻullanuvchi subyektlardan ayrim turdagi tovarlarni sotib olishda toʻlangan qoʻshilgan qiymat soligʻi summasini qisman qaytarish tizimi (keyingi oʻrinlarda — “tax free” tizimi) tajriba tariqasida joriy etilganligi hamda Toshkent va Samarqand xalqaro aeroportlarida servis shoxobchalari tashkil etilganligi maʼlumot uchun qabul qilinsin.

3. Belgilansinki, 2026-yil 1-apreldan boshlab:

(a) respublikaning barcha xalqaro aeroportlarida chet el fuqarolariga qoʻshilgan qiymat soligʻini qaytarish tizimi yoʻlga qoʻyiladi;

(b) chet el fuqarolariga ularning ixtiyoriga asosan qoʻshilgan qiymat soligʻini naqd pulda qaytarib olish imkoniyati yaratiladi. Bunda qoʻshilgan qiymat soligʻining belgilangan stavkasi miqdorining 85 foizi chet el fuqarosiga qoʻshilgan qiymat soligʻi summasini qaytarishga, 15 foizi “tax free” tizimi operatorining xizmatlariga yoʻnaltiriladi;

(v) qoʻshilgan qiymat soligʻini chet el fuqarolarining bank kartasiga qaytarish tovarlar olib chiqib ketilgan kundan keyin 3 ish kunidan koʻp boʻlmagan muddatda amalga oshiriladi;

(g) chet el fuqarolariga qoʻshilgan qiymat soligʻini qaytarishda minimal xarid qiymati qoʻshilgan qiymat soligʻini inobatga olgan holda uch yuz ming soʻm etib belgilanadi;

(d) “tax free” tizimi tatbiq etiladigan tovarlarning chegaralangan roʻyxati (bundan oziq-ovqat mahsulotlari mustasno) bekor qilinadi.

4. Soliq qoʻmitasi:

(a) bir oy muddatda soliq organlarining maxsus mobil ilovasida chet el fuqarolariga qaytariladigan qoʻshilgan qiymat soligʻi summasini hisobga olish va uni qaytarish uchun elektron pochta orqali identifikatsiyadan oʻtish imkoniyatini yaratsin;

(b) Bojxona qoʻmitasi bilan birgalikda “Gʻishtkoʻprik” chegara bojxona postida rekonstruksiya ishlari yakunlanib, odamlar va transport vositalari harakati tiklangandan soʻng tajriba tariqasida ushbu bojxona postida barcha talablarga javob beradigan “tax free” servis shoxobchasini tashkil etsin.

III. “Tax free” tizimi targʻibotini kuchaytirish

5. Soliq qoʻmitasi ikki oy muddatda:

(a) “tax free” tizimi boʻyicha ingliz, rus, xitoy, arab tillarida axborot materiallarini tayyorlab, rasmiy veb-sayt va ijtimoiy tarmoqlarda joylashtirilishini;

(b) turistik markazlar, yirik savdo majmualari hamda chet el fuqarolari koʻp tashrif buyuradigan bozorlardagi chakana savdo obyektlarida “tax free” tizimi joriy etilganligini bildiruvchi maxsus belgilar (flayerlar) boʻlishini taʼminlasin.

6. Turizm qoʻmitasi:

(a) Soliq qoʻmitasi bilan birgalikda 2026-yil 1-aprelga qadar “tax free” tizimining afzalliklari va qoʻshilgan qiymat soligʻini qaytarish tartibi toʻgʻrisida ingliz, rus, xitoy va arab tillarida taqdimot va axborot materiallarini tayyorlab, xalqaro turistik koʻrgazma va yarmarkalarda targʻib qilishni taʼminlasin;

(b) 2026-yil davomida Oʻzbekistonga sayyohlar oqimi yuqori boʻlgan xorijiy davlatlarda faoliyat yurituvchi turoperatorlar, aviakompaniyalar va onlayn bronlash platformalari bilan hamkorlikda “tax free” tizimi imkoniyatlarini targʻib qilishni tashkil etsin.

7. “Uzbekistan Airports” AJ Soliq qoʻmitasi bilan birgalikda bir oy muddatda barcha xalqaro aeroportlarda Oʻzbekiston Respublikasida “tax free” tizimi joriy etilganligini bildiruvchi hamda mobil ilovadan foydalanishning bosqichlari haqida maʼlumot beruvchi flayer, bukletlar, tarqatma materiallar va boshqa qoʻllanmalar boʻlishini taʼminlasin.

IV. Qaror ijrosini tashkil etish, taʼminlash va nazorat

8. Oʻzbekiston Respublikasi Prezidentining ayrim qarorlariga ilovaga muvofiq oʻzgartirishlar kiritilsin.

9. Soliq qoʻmitasi:

(a) “Uzbekistan Airports” AJ bilan birgalikda 2026-yil 1-apreldan boshlab respublikaning barcha xalqaro aeroportlarida “tax free” servis shoxobchalarini tashkil etsin hamda xalqaro aviqatnovlar grafigi asosida ishlashini taʼminlasin;

(b) Iqtisodiyot va moliya vazirligi bilan birgalikda ikki oy muddatda qonunchilik hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

10. Mazkur qarorning ijrosini samarali tashkil qilishga masʼul va shaxsan javobgar etib Soliq qoʻmitasi raisi F.J. Pulatov belgilansin.

11. Qaror ijrosini muhokama qilib borish, ijro uchun masʼul idoralar faoliyatini muvofiqlashtirish va nazorat qilish Bosh vazir oʻrinbosari J.A. Qoʻchqorov zimmasiga yuklansin.

Oʻzbekiston Respublikasi Prezidentining 2026-yil 5-martdagi PQ-78-son qaroriga ILOVA

Oʻzbekiston Respublikasi Prezidentining ayrim qarorlariga kiritilayotgan oʻzgartirishlar

1. Oʻzbekiston Respublikasi Prezidentining 2020-yil 21-avgustdagi “Mahalliy ishlab chiqaruvchilarni qoʻllab-quvvatlashga doir qoʻshimcha chora-tadbirlar toʻgʻrisida”gi PQ-4812-son qarorining 4-bandi ikkinchi xatboshisi quyidagi tahrirda bayon etilsin:

“budjet va korporativ buyurtmachilar rahbarlari xarid qilinishi nazarda tutilgan tovarlarni (ishlarni, xizmatlarni), shu jumladan, audit va soliq maslahati xizmatlarini birinchi navbatda new.cooperation.uz yoki Ishlab chiqaruvchilar ekotizimi portallarida (keyingi oʻrinlarda — portal) roʻyxatdan oʻtgan mahalliy ishlab chiqaruvchilardan xarid qilish imkoniyatini majburiy tartibda oʻrganadi. Bunda davlat xaridlari uchun zarur boʻlgan tovarlar (ishlar, xizmatlar) ushbu portalda mavjud boʻlmagan taqdirdagina portal maʼlumotnomasi asosida ularni boshqa elektron portallardan xarid qilishga ruxsat etiladi”.

2. Oʻzbekiston Respublikasi Prezidentining 2025-yil 19-noyabrdagi “Oʻzbekiston Respublikasi Turizm qoʻmitasi faoliyatini tashkil etish va turizm sohasini jadal rivojlantirish chora-tadbirlari toʻgʻrisida”gi PQ-348-son qarorida :

(a) 8-bandning “a” kichik bandidagi “2026-yil 1-fevraldan” soʻzlari “2026-yil 1-apreldan” soʻzlari bilan almashtirilsin;

(b) 6-ilova 17-pozitsiyasining “Ijro muddati” ustunidagi “2026-yil yanvar” soʻzlari “2026-yil aprel” soʻzlari bilan almashtirilsin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2026-yil 5-mart,

PQ-78-son

(Qonunchilik maʼlumotlari milliy bazasi, 06.03.2026-y., 07/26/78/0201-son)

lex.uz

Президента Республики Узбекистан

Постановление

О мерах по совершенствованию системы возврата налога на добавленную стоимость иностранным гражданам

В целях искоренения отдельных административных преград в системе возврата налога на добавленную стоимость иностранным гражданам, дальнейшего повышения туристской привлекательности страны путем расширения охвата данной системой и улучшения качества обслуживания, а также обеспечения прозрачности расчетов в сфере розничной торговли постановляю:

I. Основные цели

1. Определить основными целями принятия настоящего постановления:

(а) расширение охвата системой возврата налога на добавленную стоимость иностранным гражданам;

(б) увеличение объема покупок, осуществляемых иностранными гражданами в 2026-2027 годах, в 10 раз;

(в) повышение прозрачности расчетов в сфере розничной торговли и сокращение теневого товарооборота.

II. Совершенствование системы возврата налога на добавленную стоимость иностранным гражданам

2. Принять к сведению, что с 1 января 2023 года в порядке эксперимента внедрена система частичного возврата суммы налога на добавленную стоимость, уплаченной иностранными гражданами при покупке отдельных видов товаров у субъектов, занимающихся розничной торговлей, (далее — система «tax free»), а также в международных аэропортах «Ташкент» и «Самарканд» созданы сервисные пункты.

3. Установить, что начиная с 1 апреля 2026 года:

(а) система возврата налога на добавленную стоимость иностранным гражданам внедряется во всех международных аэропортах республики;

(б) для иностранных граждан создается возможность возврата налога на добавленную стоимость по их желанию в форме наличных денежных средств. При этом 85 процентов размера установленной ставки налога на добавленную стоимость направляются для возврата суммы налога на добавленную стоимость иностранному гражданину, 15 процентов — за услуги оператора системы «tax free»;

(в) возврат налога на добавленную стоимость на банковскую карту иностранных граждан осуществляется в срок не позже трех рабочих дней со дня вывоза товаров;

(г) при возврате налога на добавленную стоимость иностранным гражданам устанавливается минимальная стоимость покупки с учетом налога на добавленную стоимость — триста тысяч сумов;

(д) ограниченный перечень товаров (за исключением продовольственной продукции), на которые распространяется система «tax free», отменяется.

4. Налоговому комитету:

(а) в месячный срок создать в специальном мобильном приложении налоговых органов возможность прохождения идентификации посредством электронной почты в целях учета и возврата суммы налога на добавленную стоимость, возвращаемой иностранным гражданам;

(б) совместно с Таможенным комитетом после завершения работ по реконструкции на пограничном таможенном посту «Гишткуприк» и восстановления перемещения людей и транспортных средств создать на данном таможенном посту в порядке эксперимента сервисный пункт «tax free», соответствующий всем требованиям.

III. Усиление пропаганды системы «tax free»

5. Налоговому комитету в двухмесячный срок обеспечить:

(а) подготовку на английском, русском, китайском, арабском языках и размещение на официальном веб-сайте и в социальных сетях информационных материалов о системе «tax free»;

(б) наличие в туристических центрах, крупных торговых комплексах и на объектах розничной торговли на рынках, наиболее посещаемых иностранными гражданами, специальных знаков (флаеров), свидетельствующих о внедрении системы «tax free».

6. Комитету по туризму:

(а) совместно с Налоговым комитетом в срок до 1 апреля 2026 года подготовить презентационные и информационные материалы о преимуществах системы «tax free» и порядке возврата налога на добавленную стоимость на английском, русском, китайском и арабском языках и обеспечить их пропаганду на международных туристических выставках и ярмарках;

(б) в течение 2026 года в сотрудничестве с туроператорами, авиакомпаниями и платформами онлайн-бронирования, ведущими деятельность в зарубежных государствах с высоким потоком туристов в Узбекистан, организовать пропаганду возможностей системы «tax free».

7. АО «Uzbekistan Airports» совместно с Налоговым комитетом в месячный срок обеспечить наличие во всех международных аэропортах флаеров, буклетов, раздаточных материалов и прочих пособий, отражающих внедрение системы «tax free» в Республике Узбекистан и информирующих об этапах пользования ее мобильным приложением.

IV. Организация, обеспечение и контроль исполнения постановления

8. Внести изменения в некоторые постановления Президента Республики Узбекистан согласно приложению .

9. Налоговому комитету:

(а) совместно с АО «Uzbekistan Airports» в срок до 1 апреля 2026 года создать во всех международных аэропортах республики сервисные пункты «tax free» и обеспечить их работу на основе расписания международных авиарейсов;

(б) совместно с Министерством экономики и финансов в двухмесячный срок внести в Кабинет Министров предложения об изменениях и дополнениях в акты законодательства, вытекающих из настоящего постановления.

10. Возложить на председателя Налогового комитета Ф.Ж. Пулатова персональную ответственность за эффективную организацию исполнения настоящего постановления.

11. Обсуждение хода исполнения настоящего постановления, осуществление координации и контроля за деятельностью ведомств, ответственных за его исполнение, возложить на заместителя Премьер-министра Д.А. Кучкарова.

ПРИЛОЖЕНИЕ к постановлению Президента Республики Узбекистан от 5 марта 2026 года № ПП-78

Изменения, вносимые в некоторые постановления Президента Республики Узбекистан

1. Абзац второй пункта 4 постановления Президента Республики Узбекистан от 21 августа 2020 года № ПП-4812 «О дополнительных мерах по поддержке отечественных производителей» изложить в следующей редакции:

«руководители бюджетных и корпоративных заказчиков изучают в обязательном порядке возможность приобретения товаров (работ, услуг), включая услуги по аудиту и налоговому консультированию, предусматриваемых к закупу, в первую очередь у отечественных производителей, зарегистрированных на портале new.cooperation.uz или Портале экосистемы производителей (далее — портал). При этом товары (работы, услуги), необходимые для государственных закупок, разрешается приобретать на других электронных порталах только в случае их отсутствия на данном портале на основе справки портала».

2. В постановлении Президента Республики Узбекистан от 19 ноября 2025 года № ПП-348 «О мерах по организации деятельности Комитета по туризму Республики Узбекистан и ускоренному развитию сферы туризма»:

(а) в подпункте «а» пункта 8 слова «с 1 февраля 2026 года» заменить словами «с 1 апреля 2026 года»;

(б) в тексте на государственном языке графы «Ижро муддати» позиции 17 приложения № 6 слова «2026 йил январь» заменить словами «2026 йил апрель».

Президент Республики Узбекистан Ш. МИРЗИЁЕВ

г. Ташкент,

5 марта 2026 г.,

№ ПП-78

(Национальная база данных законодательства, 06.03.2026 г., № 07/26/78/0201)

lex.uz