UzbekAI

Ўзбекистон Республикаси Вазирлар Маҳкамасининг

қарори

ТАРКИБИ

Атоқли давлат ва жамоат арбоби Қаллибек Камалов таваллудининг 100 йиллигини кенг нишонлаш тўғрисида

Ўзбек ва қорақалпоқ халқларининг азалий дўстлиги ва қардошлигини мустаҳкамлаш йўлида фидокорона хизмат қилган, ижтимоий-сиёсий фаолияти билан мамлакатимиз тараққиётига катта ҳисса қўшган атоқли давлат ва жамоат арбоби Қаллибек Камалов таваллудининг 100 йиллигини муносиб нишонлаш ва хотирасини абадийлаштириш мақсадида:

1. Қорақалпоғистон Республикаси Жўқорғи Кенгеси ва Вазирлар Кенгаши, Ўзбекистон Республикаси Маданият вазирлиги, Республика Маънавият ва маърифат маркази ҳамда кенг жамоатчилик вакилларининг 2026 йилда атоқли давлат ва жамоат арбоби Қаллибек Камалов таваллудининг 100 йиллигини нишонлаш тўғрисидаги таклифи қўллаб-қувватлансин.

2. Атоқли давлат ва жамоат арбоби Қаллибек Камалов таваллудининг 100 йиллигини кенг нишонлаш бўйича ташкилий қўмита (кейинги ўринларда — Ташкилий қўмита) таркиби иловага мувофиқ тасдиқлансин.

3. Ташкилий қўмита (А. Орынбаев) уч кун муддатда Қаллибек Камалов таваллудининг 100 йиллигини нишонлаш бўйича қуйидаги чора-тадбирларни назарда тутувчи дастурни, уни молиялаштиришнинг аниқ манбаларини белгилаган ҳолда, ишлаб чиқсин ва тасдиқласин:

муқаддас Рамазон ойи муносабати билан ҳамда Қаллибек Камалов таваллудининг 100 йиллигига бағишлаб 2026 йил 18 март куни Нукус шаҳридаги «Оқ қуш» мажмуасида ифторлик дастурхонини ташкил этиш;

«9 май — Хотира ва қадрлаш куни» ҳамда Қаллибек Камаловнинг бир асрлик юбилейига бағишланган «Уч авлод учрашуви» тадбири ҳамда ушбу тадбир доирасида илмий-амалий конференцияни Нукус шаҳридаги «Оқ қуш» мажмуасида ўтказиш;

Қаллибек Камаловнинг ҳаёти ва ижтимоий-сиёсий фаолияти ҳақида ҳужжатли фильм яратиш;

Қаллибек Камаловнинг ҳаёти ва фаолиятига бағишланган китоб-альбомни нашрга тайёрлаш ва чоп этиш;

Қаллибек Камалов яшаган хонадонда ёдгорлик лавҳаси ўрнатиш;

таниқли сиёсатшунос ва олимлар ҳамда нуронийлар иштирокида хотира тадбирлари, давра суҳбатлари ва учрашувлар ташкил этиш.

Белгилансинки, ушбу банднинг:

иккинчи , учинчи ва бешинчи хатбошиларидаги вазифалар Қорақалпоғистон Республикасининг республика бюджети ҳисобидан;

тўртинчи хатбошисидаги вазифалар Ўзбекистон Республикаси Маданият вазирлиги ҳузуридаги Кинематография агентлигига Давлат бюджетидан фильмлар ишлаб чиқариш учун ажратилган маблағлар доирасида;

олтинчи хатбошисидаги вазифалар Ўзбекистон Бадиий академиясига Давлат бюджетидан ҳайкалтарошлик асарларини яратиш учун ажратилган маблағлар доирасида қопланади.

4. Ташкилий қўмитага атоқли давлат ва жамоат арбоби Қаллибек Камалов таваллудининг 100 йиллигини нишонлаш доирасида ўтказиладиган тадбирларни юксак савияда ташкил этиш, мазкур қарор ва чора-тадбирлар дастурининг ўз вақтида, сифатли ва тўлиқ амалга оширилишини мувофиқлаштириб бориш вазифаси юклансин.

5. Ўзбекистон Миллий ахборот агентлиги, Ўзбекистон Миллий телерадиокомпаниясига атоқли давлат ва жамоат арбоби Қаллибек Камалов таваллудининг 100 йиллигини нишонлаш билан боғлиқ тадбирларни оммавий ахборот воситаларида кенг ёритиш тавсия этилсин.

6. Мазкур қарорнинг бажарилишини назорат қилиш Қорақалпоғистон Республикаси Вазирлар Кенгаши Раиси Ф.У. Эрманов зиммасига юклансин.

Вазирлар Маҳкамасининг 2026 йил 16 мартдаги 103-сон қарорига ИЛОВА

Атоқли давлат ва жамоат арбоби Қаллибек Камалов таваллудининг 100 йиллигини кенг нишонлаш бўйича ташкилий қўмита

1. А.Т. Орынбаев — Қорақалпоғистон Республикаси Жўқорғи Кенгеси Раиси, Ташкилий қўмита раҳбари (келишувга асосан) 2. Ф.У. Эрманов — Қорақалпоғистон Республикаси Вазирлар Кенгаши Раиси 3. О.А. Атаниязова — Ўзбекистон Республикаси Олий Мажлиси Сенати аъзоси 4. М.К. Камалов — Қаллибек Камаловнинг фарзанди 5. А.Б. Таджиханов — Ўзбекистон Республикаси маданият вазирининг биринчи ўринбосари 6. А.Я. Хайдаров — Ўзбекистон Республикаси иқтисодиёт ва молия вазири ўринбосари 7. Б.Б. Алимов — Республика Маънавият ва маърифат маркази раҳбарининг биринчи ўринбосари 8. Ф.Э. Ташмухамедов — Ўзбекистон Бадиий академияси раиси ўринбосари 9. Ш.Т. Ризаев — Кинематография агентлиги бош директори в.б 10. М.А. Сафаров — Ўзбекистон Миллий телерадиокомпанияси раиси ўринбосари 11. М.М. Ҳожиматов — Ўзбекистон Ёзувчилар уюшмаси раисининг биринчи ўринбосари 12. С.Т. Турманов — Ўзбекистон маҳаллалари уюшмаси Қорақалпоғистон Республикаси бошқарма бошлиғи 13. К.К. Каримов — Қорақалпоғистон Ёзувчилар уюшмаси раиси 14. Т. Абдужаббаров — «Нуроний» жамғармаси Қорақалпоғистон бўлими бошлиғи 15. У.А. Жалменов — Ўзбекистон Касаба уюшмалари федерациясининг Қорақалпоғистон Кенгаши раиси 16. Т.Ж. Атамуратов — Республика Маънавият ва маърифат маркази Қорақалпоғистон бўлими раҳбари 17. А.М. Реймов — Ўзбекистон Республикаси Фанлар академияси Қорақалпоғистон бўлими раиси 18. Б.Б. Жоллыбеков — Бердақ номидаги Қорақалпоқ давлат университети ректори 19. А.С. Данияров — Нукус шаҳри ҳокими

Ўзбекистон Республикасининг Бош вазири А. АРИПОВ

Тошкент ш.,

2026 йил 16 март,

103 -сон

(Қонунчилик маълумотлари миллий базаси, 16.03.2026 й., 09/26/103/0240-сон)

lex.uz

Oʻzbekiston Respublikasi Vazirlar Mahkamasining

qarori

TARKIBI

Atoqli davlat va jamoat arbobi Qallibek Kamalov tavalludining 100 yilligini keng nishonlash toʻgʻrisida

Oʻzbek va qoraqalpoq xalqlarining azaliy doʻstligi va qardoshligini mustahkamlash yoʻlida fidokorona xizmat qilgan, ijtimoiy-siyosiy faoliyati bilan mamlakatimiz taraqqiyotiga katta hissa qoʻshgan atoqli davlat va jamoat arbobi Qallibek Kamalov tavalludining 100 yilligini munosib nishonlash va xotirasini abadiylashtirish maqsadida:

1. Qoraqalpogʻiston Respublikasi Joʻqorgʻi Kengesi va Vazirlar Kengashi, Oʻzbekiston Respublikasi Madaniyat vazirligi, Respublika Maʼnaviyat va maʼrifat markazi hamda keng jamoatchilik vakillarining 2026-yilda atoqli davlat va jamoat arbobi Qallibek Kamalov tavalludining 100 yilligini nishonlash toʻgʻrisidagi taklifi qoʻllab-quvvatlansin.

2. Atoqli davlat va jamoat arbobi Qallibek Kamalov tavalludining 100 yilligini keng nishonlash boʻyicha tashkiliy qoʻmita (keyingi oʻrinlarda — Tashkiliy qoʻmita) tarkibi ilovaga muvofiq tasdiqlansin.

3. Tashkiliy qoʻmita (A. Orinbayev) uch kun muddatda Qallibek Kamalov tavalludining 100 yilligini nishonlash boʻyicha quyidagi chora-tadbirlarni nazarda tutuvchi dasturni, uni moliyalashtirishning aniq manbalarini belgilagan holda, ishlab chiqsin va tasdiqlasin:

muqaddas Ramazon oyi munosabati bilan hamda Qallibek Kamalov tavalludining 100 yilligiga bagʻishlab 2026-yil 18-mart kuni Nukus shahridagi “Oq qush” majmuasida iftorlik dasturxonini tashkil etish;

“9-may — Xotira va qadrlash kuni” hamda Qallibek Kamalovning bir asrlik yubileyiga bagʻishlangan “Uch avlod uchrashuvi” tadbiri hamda ushbu tadbir doirasida ilmiy-amaliy konferensiyani Nukus shahridagi “Oq qush” majmuasida oʻtkazish;

Qallibek Kamalovning hayoti va ijtimoiy-siyosiy faoliyati haqida hujjatli film yaratish;

Qallibek Kamalovning hayoti va faoliyatiga bagʻishlangan kitob-albomni nashrga tayyorlash va chop etish;

Qallibek Kamalov yashagan xonadonda yodgorlik lavhasi oʻrnatish;

taniqli siyosatshunos va olimlar hamda nuroniylar ishtirokida xotira tadbirlari, davra suhbatlari va uchrashuvlar tashkil etish.

Belgilansinki, ushbu bandning:

ikkinchi , uchinchi va beshinchi xatboshilaridagi vazifalar Qoraqalpogʻiston Respublikasining respublika budjeti hisobidan;

toʻrtinchi xatboshisidagi vazifalar Oʻzbekiston Respublikasi Madaniyat vazirligi huzuridagi Kinematografiya agentligiga Davlat budjetidan filmlar ishlab chiqarish uchun ajratilgan mablagʻlar doirasida;

oltinchi xatboshisidagi vazifalar Oʻzbekiston Badiiy akademiyasiga Davlat budjetidan haykaltaroshlik asarlarini yaratish uchun ajratilgan mablagʻlar doirasida qoplanadi.

4. Tashkiliy qoʻmitaga atoqli davlat va jamoat arbobi Qallibek Kamalov tavalludining 100 yilligini nishonlash doirasida oʻtkaziladigan tadbirlarni yuksak saviyada tashkil etish, mazkur qaror va chora-tadbirlar dasturining oʻz vaqtida, sifatli va toʻliq amalga oshirilishini muvofiqlashtirib borish vazifasi yuklansin.

5. Oʻzbekiston Milliy axborot agentligi, Oʻzbekiston Milliy teleradiokompaniyasiga atoqli davlat va jamoat arbobi Qallibek Kamalov tavalludining 100 yilligini nishonlash bilan bogʻliq tadbirlarni ommaviy axborot vositalarida keng yoritish tavsiya etilsin.

6. Mazkur qarorning bajarilishini nazorat qilish Qoraqalpogʻiston Respublikasi Vazirlar Kengashi Raisi F.U. Ermanov zimmasiga yuklansin.

Vazirlar Mahkamasining 2026-yil 16-martdagi 103-son qaroriga ILOVA

Atoqli davlat va jamoat arbobi Qallibek Kamalov tavalludining 100 yilligini keng nishonlash boʻyicha tashkiliy qoʻmita

1. A.T. Orinbayev — Qoraqalpogʻiston Respublikasi Joʻqorgʻi Kengesi Raisi, Tashkiliy qoʻmita rahbari (kelishuvga asosan) 2. F.U. Ermanov — Qoraqalpogʻiston Respublikasi Vazirlar Kengashi Raisi 3. O.A. Ataniyazova — Oʻzbekiston Respublikasi Oliy Majlisi Senati aʼzosi 4. M.K. Kamalov — Qallibek Kamalovning farzandi 5. A.B. Tadjixanov — Oʻzbekiston Respublikasi madaniyat vazirining birinchi oʻrinbosari 6. A.Ya. Xaydarov — Oʻzbekiston Respublikasi iqtisodiyot va moliya vaziri oʻrinbosari 7. B.B. Alimov — Respublika Maʼnaviyat va maʼrifat markazi rahbarining birinchi oʻrinbosari 8. F.E. Tashmuxamedov — Oʻzbekiston Badiiy akademiyasi raisi oʻrinbosari 9. Sh.T. Rizayev — Kinematografiya agentligi bosh direktori v.b 10. M.A. Safarov — Oʻzbekiston Milliy teleradiokompaniyasi raisi oʻrinbosari 11. M.M. Hojimatov — Oʻzbekiston Yozuvchilar uyushmasi raisining birinchi oʻrinbosari 12. S.T. Turmanov — Oʻzbekiston mahallalari uyushmasi Qoraqalpogʻiston Respublikasi boshqarma boshligʻi 13. K.K. Karimov — Qoraqalpogʻiston Yozuvchilar uyushmasi raisi 14. T. Abdujabbarov — “Nuroniy” jamgʻarmasi Qoraqalpogʻiston boʻlimi boshligʻi 15. U.A. Jalmenov — Oʻzbekiston Kasaba uyushmalari federatsiyasining Qoraqalpogʻiston Kengashi raisi 16. T.J. Atamuratov — Respublika Maʼnaviyat va maʼrifat markazi Qoraqalpogʻiston boʻlimi rahbari 17. A.M. Reymov — Oʻzbekiston Respublikasi Fanlar akademiyasi Qoraqalpogʻiston boʻlimi raisi 18. B.B. Jollibekov — Berdaq nomidagi Qoraqalpoq davlat universiteti rektori 19. A.S. Daniyarov — Nukus shahri hokimi

Oʻzbekiston Respublikasining Bosh vaziri A. ARIPOV

Toshkent sh.,

2026-yil 16-mart,

103 -son

(Qonunchilik maʼlumotlari milliy bazasi, 16.03.2026-y., 09/26/103/0240-son)

lex.uz