📅 2026-yil 26-mart · Qonunlar va kodekslar
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2026 йил 26 март · Қонунлар ва кодекслар
Расмий матн. Расмий ҳужжат. Таҳририй изоҳлар киритилмаган.
📅 26 марта 2026 г. · Законы и кодексы
Официальный текст. Официальный документ. Редакционные примечания не включены.
📅 26 March 2026 · Laws and codes
Official text. Official document. Editorial notes are not included.
Ўзбекистон Республикасининг Қонуни
«Шахсга доир маълумотлар тўғрисида»ги Ўзбекистон Республикаси Қонунига ўзгартиришлар ва қўшимча киритиш ҳақида
Қонунчилик палатаси томонидан 2026 йил 20 январда қабул қилинган Сенат томонидан 2026 йил 5 февралда маъқулланган
Кейинги йилларда мамлакатимизда замонавий рақамли иқтисодиётни ривожлантиришга ҳамда шахсга доир маълумотларни ҳимоя қилиш соҳасини янада такомиллаштиришга қаратилган кенг кўламли чора-тадбирлар амалга оширилмоқда.
Шу билан бирга шахсга доир маълумотларни сақлаш ва уларга ишлов беришнинг алоҳида шартларини, шахсга доир маълумотлар базаларини рўйхатдан ўтказиш тартибига оид нормаларни янада такомиллаштириш зарурияти юзага келмоқда.
Мазкур Қонун билан «Шахсга доир маълумотлар тўғрисида»ги Ўзбекистон Республикаси Қонунига Ўзбекистон Республикаси ҳудудида сақланиши лозим бўлган шахсга доир маълумотларнинг рўйхатини аниқлаштирувчи, ушбу маълумотлар базалари Шахсга доир маълумотлар базаларининг давлат реестрида рўйхатдан ўтказилиши лозимлигини, шунингдек шахсга доир маълумотларнинг Ўзбекистон Республикаси ҳудудидан ташқарида сақланишига хамда уларга ишлов берилишига оид шартларни белгиловчи ўзгартиришлар ва қўшимча киритилмоқда.
Ушбу Қонун шахсга доир маълумотларнинг самарали ҳимоя қилинишини таъминлашга хизмат қилади.
1-модда . Ўзбекистон Республикасининг 2019 йил 2 июлда қабул қилинган «Шахсга доир маълумотлар тўғрисида»ги ЎРҚ-547-сонли Қонунига (Ўзбекистон Республикаси Олий Мажлиси палаталарининг Ахборотномаси, 2019 йил, № 7, 385-модда; 2021 йил, № 1, 13-модда, 4-сонга илова; 2023 йил, № 11, 923-модда) куйидаги ўзгартиришлар ва қўшимча киритилсин:
1) 3-модда иккинчи қисмининг :
иккинчи хатбошиси куйидаги таҳрирда баён этилсин:
«жисмоний шахс томонидан шахсга доир маълумотларга шахсий ва маиший мақсадларда ишлов бериш»;
тўртинчи хатбошиси «давлат сирларини ташкил этадиган маълумотлар» деган сўзлардан кейин «ҳамда мудофаа ва миллий хавфсизлик масалаларига тааллуқли маълумотлар» деган сўзлар билан тўлдирилсин;
2) 20-модданинг биринчи қисми қуйидаги таҳрирда баён этилсин:
«Ушбу Қонун 27 1 -моддасининг иккинчи қисмига мувофиқ Ўзбекистон Республикаси ҳудудида сақланиши шарт бўлган шахсга доир маълумотлар базалари Шахсга доир маълумотлар базаларининг давлат реестрида рўйхатдан ўтказилиши лозим»;
3) 27 1 -модда куйидаги таҳрирда баён этилсин:
«27 1 -модда. Шахсга доир маълумотларни сақлаш ва уларга ишлов беришнинг алоҳида шартлари
Ўзбекистон Республикаси фуқароларининг шахсга доир маълумотлари ушбу Қонуннинг асосий принциплари таъминланган ҳолда сақланиши лозим.
Қуйидаги шахсга доир маълумотлар Ўзбекистон Республикаси ҳудудида сақланиши шарт:
жисмоний шахсларнинг биометрик маълумотлари;
жисмоний шахсларнинг генетик маълумотлари;
Ўзбекистон Республикаси ҳудудида ўз фаолиятини амалга ошираётган телекоммуникациялар операторларидаги уларнинг хизматларидан фойдаланувчи жисмоний шахсларнинг маълумотлари.
Ушбу модданинг иккинчи қисмида назарда тутилмаган шахсга доир маълумотлар куйидаги шартлардан бири бажарилган тақдирда, Ўзбекистон Республикаси ҳудудидан ташқарида сақланиши ва уларга ишлов берилиши мумкин:
чет давлатни шахсга доир маълумотларнинг бир хил ҳимоя қилинишини таъминловчи давлат сифатида тан олиш;
оператор томонидан ваколатли давлат органи тасдиқлайдиган талабларга жавоб берувчи стандарт шартномавий шартлар ёки мажбурий корпоратив қоидалар қабул қилиниши ва уларга риоя этилиши;
рўйхати ваколатли давлат органи томонидан тасдиқланадиган шахсга доир маълумотларни бошқариш ва сақлаш соҳасидаги халқаро стандартларга оператор томонидан риоя этилиши.
Шахсга доир маълумотлар бир хил ҳимоя қилинишини таъминловчи чет давлатлар рўйхати Ўзбекистон Республикаси Вазирлар Маҳкамаси томонидан белгиланади».
2-модда . Ўзбекистон Республикаси Ички ишлар вазирлиги ва бошқа манфаатдор ташкилотлар ушбу Қонуннинг ижросини, ижрочиларга етказилишини ҳамда моҳияти ва аҳамияти аҳоли ўртасида тушунтирилишини таъминласин.
3-модда . Ўзбекистон Республикаси Вазирлар Маҳкамаси:
ҳукумат қарорларини ушбу Қонунга мувофиқлаштирсин;
республика ижро этувчи ҳокимият органлари ушбу Қонунга зид бўлган ўз норматив-ҳуқуқий ҳужжатларини қайта кўриб чиқишлари ва бекор қилишларини таъминласин.
4-модда . Ушбу Қонун расмий эълон қилинган кундан эътиборан кучга киради.
Ўзбекистон Республикасининг Президенти Ш. МИРЗИЁЕВ
Тошкент ш.,
2026 йил 26 март,
ЎРҚ-1125-сон
Oʻzbekiston Respublikasining Qonuni
“Shaxsga doir maʼlumotlar toʻgʻrisida”gi Oʻzbekiston Respublikasi Qonuniga oʻzgartirishlar va qoʻshimcha kiritish haqida
Qonunchilik palatasi tomonidan 2026-yil 20-yanvarda qabul qilingan Senat tomonidan 2026-yil 5-fevralda maʼqullangan
Keyingi yillarda mamlakatimizda zamonaviy raqamli iqtisodiyotni rivojlantirishga hamda shaxsga doir maʼlumotlarni himoya qilish sohasini yanada takomillashtirishga qaratilgan keng koʻlamli chora-tadbirlar amalga oshirilmoqda.
Shu bilan birga shaxsga doir maʼlumotlarni saqlash va ularga ishlov berishning alohida shartlarini, shaxsga doir maʼlumotlar bazalarini roʻyxatdan oʻtkazish tartibiga oid normalarni yanada takomillashtirish zaruriyati yuzaga kelmoqda.
Mazkur Qonun bilan “Shaxsga doir maʼlumotlar toʻgʻrisida”gi Oʻzbekiston Respublikasi Qonuniga Oʻzbekiston Respublikasi hududida saqlanishi lozim boʻlgan shaxsga doir maʼlumotlarning roʻyxatini aniqlashtiruvchi, ushbu maʼlumotlar bazalari Shaxsga doir maʼlumotlar bazalarining davlat reyestrida roʻyxatdan oʻtkazilishi lozimligini, shuningdek shaxsga doir maʼlumotlarning Oʻzbekiston Respublikasi hududidan tashqarida saqlanishiga xamda ularga ishlov berilishiga oid shartlarni belgilovchi oʻzgartirishlar va qoʻshimcha kiritilmoqda.
Ushbu Qonun shaxsga doir maʼlumotlarning samarali himoya qilinishini taʼminlashga xizmat qiladi.
1-modda . Oʻzbekiston Respublikasining 2019-yil 2-iyulda qabul qilingan “Shaxsga doir maʼlumotlar toʻgʻrisida”gi OʻRQ-547-sonli Qonuniga (Oʻzbekiston Respublikasi Oliy Majlisi palatalarining Axborotnomasi, 2019-yil, № 7, 385-modda; 2021-yil, № 1, 13-modda, 4-songa ilova; 2023-yil, № 11, 923-modda) kuyidagi oʻzgartirishlar va qoʻshimcha kiritilsin:
1) 3-modda ikkinchi qismining :
ikkinchi xatboshisi kuyidagi tahrirda bayon etilsin:
“jismoniy shaxs tomonidan shaxsga doir maʼlumotlarga shaxsiy va maishiy maqsadlarda ishlov berish”;
toʻrtinchi xatboshisi “davlat sirlarini tashkil etadigan maʼlumotlar” degan soʻzlardan keyin “hamda mudofaa va milliy xavfsizlik masalalariga taalluqli maʼlumotlar” degan soʻzlar bilan toʻldirilsin;
2) 20-moddaning birinchi qismi quyidagi tahrirda bayon etilsin:
“Ushbu Qonun 27 1 -moddasining ikkinchi qismiga muvofiq Oʻzbekiston Respublikasi hududida saqlanishi shart boʻlgan shaxsga doir maʼlumotlar bazalari Shaxsga doir maʼlumotlar bazalarining davlat reyestrida roʻyxatdan oʻtkazilishi lozim”;
3) 27 1 -modda kuyidagi tahrirda bayon etilsin:
“27 1 -modda. Shaxsga doir maʼlumotlarni saqlash va ularga ishlov berishning alohida shartlari
Oʻzbekiston Respublikasi fuqarolarining shaxsga doir maʼlumotlari ushbu Qonunning asosiy prinsiplari taʼminlangan holda saqlanishi lozim.
Quyidagi shaxsga doir maʼlumotlar Oʻzbekiston Respublikasi hududida saqlanishi shart:
jismoniy shaxslarning biometrik maʼlumotlari;
jismoniy shaxslarning genetik maʼlumotlari;
Oʻzbekiston Respublikasi hududida oʻz faoliyatini amalga oshirayotgan telekommunikatsiyalar operatorlaridagi ularning xizmatlaridan foydalanuvchi jismoniy shaxslarning maʼlumotlari.
Ushbu moddaning ikkinchi qismida nazarda tutilmagan shaxsga doir maʼlumotlar kuyidagi shartlardan biri bajarilgan taqdirda, Oʻzbekiston Respublikasi hududidan tashqarida saqlanishi va ularga ishlov berilishi mumkin:
chet davlatni shaxsga doir maʼlumotlarning bir xil himoya qilinishini taʼminlovchi davlat sifatida tan olish;
operator tomonidan vakolatli davlat organi tasdiqlaydigan talablarga javob beruvchi standart shartnomaviy shartlar yoki majburiy korporativ qoidalar qabul qilinishi va ularga rioya etilishi;
roʻyxati vakolatli davlat organi tomonidan tasdiqlanadigan shaxsga doir maʼlumotlarni boshqarish va saqlash sohasidagi xalqaro standartlarga operator tomonidan rioya etilishi.
Shaxsga doir maʼlumotlar bir xil himoya qilinishini taʼminlovchi chet davlatlar roʻyxati Oʻzbekiston Respublikasi Vazirlar Mahkamasi tomonidan belgilanadi”.
2-modda . Oʻzbekiston Respublikasi Ichki ishlar vazirligi va boshqa manfaatdor tashkilotlar ushbu Qonunning ijrosini, ijrochilarga yetkazilishini hamda mohiyati va ahamiyati aholi oʻrtasida tushuntirilishini taʼminlasin.
3-modda . Oʻzbekiston Respublikasi Vazirlar Mahkamasi:
hukumat qarorlarini ushbu Qonunga muvofiqlashtirsin; respublika ijro etuvchi hokimiyat organlari ushbu Qonunga zid boʻlgan oʻz normativ-huquqiy hujjatlarini qayta koʻrib chiqishlari va bekor qilishlarini taʼminlasin.
4-modda . Ushbu Qonun rasmiy eʼlon qilingan kundan eʼtiboran kuchga kiradi.
Oʻzbekiston Respublikasining Prezidenti Sh. MIRZIYOYEV
Toshkent sh.,
2026-yil 26-mart,
OʻRQ-1125-son