📅 2026-yil 25-mart · Vazirlik va idoralar hujjatlari · Mudofaa vazirligi Oliy taʼlim, fan va innovatsiyalar vazirligi Sogʻliqni saqlash vazirligi
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2026 йил 25 март · Вазирлик ва идоралар ҳужжатлари · Мудофаа вазирлиги Олий таълим, фан ва инновациялар вазирлиги Соғлиқни сақлаш вазирлиги
Расмий матн. Расмий ҳужжат. Таҳририй изоҳлар киритилмаган.
📅 25 марта 2026 г. · Документы министерств и ведомств · Министерства обороны Министерства высшего образования, науки и инноваций Министерства здравоохранения
Официальный текст. Официальный документ. Редакционные примечания не включены.
📅 25 March 2026 · Ministry and agency documents · Mudofaa vazirligi Oliy taʼlim, fan va innovatsiyalar vazirligi Sogʻliqni saqlash vazirligi
Official text. Official document. Editorial notes are not included.
Ўзбекистон Республикаси Мудофаа вазирлиги Ўзбекистон Республикаси Олий таълим, фан ва инновациялар вазирлиги Ўзбекистон Республикаси Соғлиқни сақлаш вазирлигининг
қарори
НИЗОМ
Ўзбекистон Республикаси Ҳарбий хавфсизлик ва мудофаа университетининг Ҳарбий тиббиёт институтида тўлов-контракт асосида ўқитиш тўғрисидаги низомни тасдиқлаш ҳақида
Ўзбекистон Республикасининг «Мудофаа тўғрисида»ги Қонуни , Ўзбекистон Республикаси Президентининг 2022 йил 21 декабрдаги ПҚ-447-сон «Янги Ўзбекистон маъмурий ислоҳотлари доирасида республика ижро этувчи ҳокимият органлари фаолиятини самарали ташкил этиш чора-тадбирлари тўғрисида»ги қарорига мувофиқ Ўзбекистон Республикаси Мудофаа вазирлиги, Олий таълим, фан ва инновациялар вазирлиги ҳамда Соғлиқни сақлаш вазирлиги қарор қилади:
1. Ўзбекистон Республикаси Ҳарбий хавфсизлик ва мудофаа университетининг Ҳарбий тиббиёт институтида тўлов-контракт асосида ўқитиш тўғрисидаги низом иловага мувофиқ тасдиқлансин.
2. Мазкур қарор расмий эълон қилинган кундан эътиборан кучга киради.
Ўзбекистон Республикаси Мудофаа вазирлигининг 2026 йил 25 мартдаги 7-сон, Олий таълим, фан ва инновациялар вазирлигининг 2026 йил 19 мартдаги 21-қ/қ-сон, Соғлиқни сақлаш вазирлигининг 2026 йил 16 мартдаги 01-10/ҚҚ-сон қарорига ИЛОВА
Ўзбекистон Республикаси Ҳарбий хавфсизлик ва мудофаа университетининг Ҳарбий тиббиёт институтида тўлов-контракт асосида ўқитиш тўғрисидаги
Ушбу Низом Ўзбекистон Республикаси Ҳарбий хавфсизлик ва мудофаа университетининг Ҳарбий тиббиёт институтида (бундан буён матнда Институт деб юритилади) мутахассисларни қайта тайёрлаш ва уларнинг малакасини ошириш, шунингдек Институтнинг магистратура ва клиник ординатурасида тўлов-контракт асосида ўқитишни ташкил этиш тартибини белгилайди.
1-боб. Умумий қоидалар
1. Ушбу Низомда қуйидаги асосий тушунчалар қўлланилади:
қайта тайёрлаш — тиббиёт соҳасида таянч мутахассисликлар ва касбларга мувофиқ бўлган йўналишлар бўйича фаолиятни амалга ошириш учун қўшимча касбий билим, малака ва кўникмаларнинг зарур ҳажми эгалланишини таъминлашга қаратилган таълим тури;
малака ошириш — тиббиёт соҳаси бўйича касбий билим, малака ва кўникмаларнинг чуқурлаштирилиши ҳамда янгилаб борилишини таъминлашга, кадрларнинг тоифаси, даражаси, разряди ва лавозими ошишига хизмат қиладиган таълим тури;
ўқув дастури — бу ўзида билимга оид ҳамда касбий жиҳатларни қамраб оладиган, тингловчиларда билим, кўникма ва малакаларни шакллантиришга қаратилган ўқув дастурининг таркибий элементи сифатида назорат қилишнинг тегишли тури билан якунланадиган алоҳида ўқув фани (унинг қисми ёки ўзаро бир соҳага доир фанлар мажмуи);
буюртмачи — қайта тайёрлаш ва малака ошириш курсларида таълим олиш учун мурожаат қилган жисмоний ёки юридик шахслар;
тингловчи — тегишли тўловни амалга оширган ва ўқув курсларига қабул қилинган жисмоний шахс.
2. Тингловчиларни қайта тайёрлаш ва уларнинг малакасини оширишни ташкил этиш Вазирлар Маҳкамасининг 2009 йил 18 декабрдаги 319-сон «Тиббиёт ходимлари малакасини ошириш ва уларни қайта тайёрлаш тизимини такомиллаштириш тўғрисида»ги қарорига асосан амалга оширилади.
3. Тингловчиларни қайта тайёрлаш ва уларнинг малакасини ошириш ишлаб чиқаришдан ажралган ҳолда ҳамда ишлаб чиқаришдан ажралмаган ҳолда амалга оширилади.
Тингловчиларни ўқитиш ишлаб чиқаришдан ажралмаган ҳолда ташкил этилганда ўзаро келишувга кўра буюртмачининг ҳудудида амалга оширилиши мумкин. Бунда ўқув гуруҳидаги тингловчилар сони камида ўн нафарни ташкил қилиши керак.
4. Тингловчиларни қайта тайёрлаш ва уларнинг малакасини ошириш Ўзбекистон Республикаси Соғлиқни сақлаш вазирлиги ҳамда Олий таълим, фан ва инновациялар вазирлиги томонидан келишилган ҳолда Ўзбекистон Республикаси Мудофаа вазирлиги томонидан ишлаб чиқилган ва тасдиқланган ўқув режа ва ўқув дастурлари асосида ташкил этилади.
5. Тингловчиларни қайта тайёрлаш ва уларнинг малакасини ошириш курслари рўйхати (номи), ўқиш вақти, соати, муддати, шакли ва йўналиши ўқув режасида белгиланади.
2-боб. Тингловчиларни қайта тайёрлаш ва уларнинг малакасини ошириш
6. Тингловчиларни қайта тайёрлаш ва уларнинг малакасини ошириш курслари Институт билан келишилган ҳолда буюртмачи томонидан тузиладиган тақсимот-режаларга асосан ташкил этилади.
Буюртмачи томонидан тақсимот-режалар ҳар ярим йил учун тузилади ҳамда ҳар йили июнь ва декабрь ойининг 15-санасига қадар тасдиқланиб, Институтга етказилади.
Институт тақсимот-режага асосланган ҳолда ўқув гуруҳларини шакллантиради.
7. Тингловчилар қайта тайёрлаш ва малака ошириш курсларида Институт билан шартномага мувофиқ тўлов асосида ўқитилади.
8. Тингловчиларни қайта тайёрлаш ва малака ошириш курсларига қабул қилиш Институт бошлиғининг буйруғи билан ушбу курслар бошланган куннинг ўзида расмийлаштирилади.
9. Тингловчиларни қайта тайёрлаш ва уларнинг малакасини ошириш курсларининг ўқув жараёнига Институт профессор-ўқитувчилари ҳамда шартнома асосида педагог ходимлар ва бошқа мутахассислар жалб этилади.
10. Тингловчиларни қайта тайёрлаш ва уларнинг малакасини ошириш курсларида синов имтиҳонлари оралиқ ва якуний назорат турларидан иборат ҳисобланади.
Тингловчиларни қайта тайёрлаш ва уларнинг малакасини ошириш курсларида синов имтиҳонлари ўқув режа ва ўқув дастурлари асосида ишлаб чиқилган тест шаклида ўтказилади.
11. Тест саволлари синов имтиҳонлари бошланишидан камида уч кун олдин Институтнинг расмий веб-сайтига жойлаштирилади.
12. Синов имтиҳонлари ўтказилаётган хонага тингловчилар томонидан мобил алоқа воситаси, компьютер ёки бошқа алоқа ва телекоммуникация воситалари, китоб, луғат, шпаргалка ва бошқа материаллар олиб кирилиши ҳамда фойдаланилиши тақиқланади.
Бунда ушбу тақиқланган материалларни олиб кирган ёки фойдаланган тингловчи синов имтиҳонларини ўтказиш тартибини бузган деб ҳисобланади ҳамда далолатнома асосида синов имтиҳонларидан четлаштирилади.
13. Тингловчиларни қайта тайёрлаш ва уларнинг малакасини ошириш курслари мобайнидаги ўзлаштириши 100 баллик тизим асосида баҳоланади. Бунда:
оралиқ назорат 20 та тест саволларидан иборат бўлади, ҳар бир тўғри жавоб учун 1,5 балл ва жами тўпланиши мумкин бўлган балл 30 баллни ташкил этади;
якуний назорат 35 та тест саволларидан иборат бўлади, ҳар бир тўғри жавоб учун 2 балл ва жами тўпланиши мумкин бўлган балл 70 баллни ташкил этади.
Тингловчининг оралиқ ва якуний назорат турларида тўплаган натижалари умумлаштирилади. Бунда, тингловчининг умумий тўплаган натижаси 56 ва ундан юқори баллни ташкил этган тақдирда у қайта тайёрлаш ёки малака ошириш курсини тугатган деб ҳисобланади.
Синов имтиҳонларининг натижалари бўйича тингловчи 56 баллдан кам тўплаган ҳолларда у қайта тайёрлаш ёки малака ошириш курсидан ўтмаган деб ҳисобланади.
14. Синов имтиҳонидан 56 баллдан кам тўплаган тингловчиларга уларнинг натижалари эълон қилинган кундан бошлаб уч иш куни ичида қайта топшириш учун имконият берилади.
Бунда тингловчидан синов имтиҳонини қайта топшириш учун тўлов ундирилмайди.
Синов имтиҳонини қайта топшириб, яна 56 баллдан кам тўплаган тингловчи қайта тайёрлаш ёки малака ошириш курсини шартнома асосида қайта ўқиш ҳуқуқига эга.
15. Институт томонидан қайта тайёрлаш ва малака ошириш курсини муваффақиятли тамомлаган тингловчига сертификат тақдим этилади.
Синов имтиҳонини муваффақиятли топширмаган тингловчига сертификат берилмайди. Бу ҳолда тингловчига қайта тайёрлаш ёки малака ошириш курсида қатнашганлиги тўғрисида маълумотнома берилади.
16. Институтнинг магистратура ва клиник ординатурасида таълим Ўзбекистон Республикаси Вазирлар Маҳкамасининг 2025 йил 13 сентябрдаги 578-сон «Олий таълим ташкилотларига ўқишга қабул қилиш жараёнларини тартибга солувчи норматив-ҳуқуқий ҳужжатларни тасдиқлаш тўғрисида»ги қарори , 2009 йил 18 декабрдаги 319-сон «Тиббиёт ходимлари малакасини ошириш ва уларни қайта тайёрлаш тизимини такомиллаштириш тўғрисида»ги қарори ҳамда Олий таълимнинг давлат таълим стандарти. Олий таълим йўналишлари ва мутахассисликлари классификаторига (рўйхат рақам 3781, 2026 йил 28 февраль) мувофиқ амалга оширилади.
17. Институтда тўлов-контракт асосида ўқишга қуйидагилар жалб қилинади:
олий, ўрта махсус ва касбий таълим ташкилотларининг тиббиёт йўналишини тамомлаган ва тегишли мутахассисликлар бўйича тайёргарликка эга бўлган шахслар;
даволаш-профилактика муассасалари раҳбарлари;
даволаш-профилактика муассасалари мавжуд бўлган вазирлик, идоралар ва бошқа ташкилотларнинг ходимлари;
хусусий тиббиёт муассасаларининг тиббиёт ходимлари;
бирламчи тиббий-санитария ёрдам кўрсатиши шарт ҳисобланган ички ишлар органлари, ёнғиндан сақлаш, авария хизматлари, транспорт ташкилотлари ходимлари;
нотиббий маълумотга эга, лекин тиббий ёрдам кўрсатиш вазифаларини бажариш билан шуғулланувчи фуқаролар ҳамда бошқа касб вакиллари.
3-боб. Тингловчиларнинг апелляция шикоятларини кўриб чиқиш
18. Тингловчиларнинг апелляция шикоятларини кўриб чиқиш учун Институт бошлиғининг буйруғи билан Институтнинг камида беш нафар мутахассисларидан иборат таркибда Апелляция комиссияси ташкил этилади.
Апелляция комиссияси таркибига бошқа давлат органлари ва ташкилотларидан ҳам мутахассислар жалб этилиши мумкин.
Қайта тайёрлаш ва малака ошириш курсларида синов имтиҳонларини ўтказишга масъул бўлган шахсларнинг Апелляция комиссияси таркибига киритилишига йўл қўйилмайди.
19. Синов имтиҳонлари натижаларидан норози бўлган тингловчилар мазкур имтиҳонлар натижалари эълон қилинган кундан бошлаб етти иш куни ичида Апелляция комиссиясига ёзма ёки электрон шаклда Апелляция шикояти беришлари мумкин.
Бунда Апелляция комиссияси апелляция шикояти билан мурожаат қилган тингловчини шикоят кўриб чиқилишидан 2 кун олдин уни кўриб чиқиш вақти ва жойи ҳақида хабардор қилади.
20. Апелляция комиссияси апелляция шикоятини, у келиб тушган кундан бошлаб 3 кун муддат ичида кўриб чиқади. Бунда апелляция шикояти билан мурожаат қилган тингловчи мазкур шикоятни кўриб чиқишда иштирок этиш ҳуқуқига эга.
21. Апелляция комиссияси унда аъзоларнинг камида учдан икки қисми иштирок этганда ваколатли ҳисобланади. Апелляция комиссиясининг қарори оддий кўпчилик овоз билан қабул қилинади ва мажлисда иштирок этган барча аъзолар томонидан тасдиқланадиган баённома билан расмийлаштирилади.
22. Апелляция комиссияси томонидан апелляция шикоятини кўриб чиқиш давомида тингловчига уни қайта баҳолашга қаратилган саволлар берилишига йўл қўйилмайди.
23. Шикоятни кўриб чиқиш натижалари бўйича Апелляция комиссияси томонидан қуйидаги қарорлардан бири қабул қилинади:
синов натижаларини ўзгаришсиз қолдириш;
синов натижаларига ўзгартириш киритиш.
Апелляция шикоятини кўришда тингловчининг синов натижасида олган баллини пасайтиришга йўл қўйилмайди.
24. Апелляция комиссияси апелляция шикояти билан мурожаат қилган тингловчига ўз қарорини у қабул қилинган куннинг ўзида маълум қилиши керак.
25. Апелляция комиссиясининг синов натижаларига ўзгартириш киритиш тўғрисидаги қарори асосида тингловчига қайта тайёрлаш ёки малака ошириш курси бўйича сертификат берилади.
26. Апелляция комиссияси қарори устидан тингловчи юқори турувчи органга ёки судга шикоят қилиши мумкин.
4-боб. Тингловчиларнинг ҳуқуқ ва мажбуриятлари
27. Тингловчилар ўқув машғулотлари бошланишидан олдин Институтнинг ички тартиб-қоидалари билан таништирилади.
28. Тингловчилар қуйидаги ҳуқуқларга эга ҳисобланади:
ўқув дастурида назарда тутилган билимларни эгаллаш;
ўқув жараёнини янада яхшилаш, қайта тайёрлаш ва малака ошириш тизимини такомиллаштириш бўйича Институт раҳбариятига таклифлар киритиш;
маънавий-маърифий ва маданий тадбирларда қатнашиш;
Институт ахборот-ресурс маркази, ўқув хоналари ва компьютер техника воситаларидан фойдаланиш.
29. Тингловчилар қуйидагиларга мажбур ҳисобланади:
ўқув дастурлари талабларини бажариш;
ўқув машғулотларида ўз вақтида қатнашиш;
ўқув дастурларида назарда тутилган синов имтиҳон (тест)ларини топшириш;
ўқув жараёнида берилган топшириқларни ўз вақтида бажариш;
Институтга тегишли бўлган мулкларни асраб-авайлаш, Институт ички тартиб-қоидаларига қатъий риоя этиш.
30. Тингловчи қуйидаги асосларга кўра тингловчилар сафидан четлаштирилади:
ўз хоҳишига (аризасига) биноан;
вафот этганлиги сабабли;
суд томонидан озодликдан маҳрум этилганда;
ўқув интизоми ва Институт ички тартиб-қоидаларини қўпол равишда бузганлиги учун;
қайта тайёрлаш ёки малака ошириш курсининг ўқув машғулотларини узрли сабабларсиз 18 академик соатдан ортиқ қолдирганлиги сабабли (бунда узрли сабаблар тингловчининг касаллиги, яқин қариндошларининг вафоти, меҳнат таътили, Ўзбекистон Республикасидан ташқарида бўлишини ўз ичига олади).
5-боб. Якунловчи қоида
31. Мазкур Низом талабларининг бузилишида айбдор шахслар қонунчилик ҳужжатларига мувофиқ жавоб беради.
Мудофаа вазири Ш. ХАЛМУХАМЕДОВ
Олий таълим, фан ва инновациялар вазири К. ШАРИПОВ
Соғлиқни сақлаш вазири А. ХУДАЯРОВ
Тошкент ш.,
2026 йил 25 март,
Тошкент ш.,
2026 йил 19 март
Тошкент ш.,
2026 йил 16 март
7-сон
21-қ/қ-сон
01-10/ҚҚ-сон
Oʻzbekiston Respublikasi Mudofaa vazirligi Oʻzbekiston Respublikasi Oliy taʼlim, fan va innovatsiyalar vazirligi Oʻzbekiston Respublikasi Sogʻliqni saqlash vazirligining
qarori
NIZOM
Oʻzbekiston Respublikasi Harbiy xavfsizlik va mudofaa universitetining Harbiy tibbiyot institutida toʻlov-kontrakt asosida oʻqitish toʻgʻrisidagi nizomni tasdiqlash haqida
Oʻzbekiston Respublikasining “Mudofaa toʻgʻrisida”gi Qonuni , Oʻzbekiston Respublikasi Prezidentining 2022-yil 21-dekabrdagi PQ-447-son “Yangi Oʻzbekiston maʼmuriy islohotlari doirasida respublika ijro etuvchi hokimiyat organlari faoliyatini samarali tashkil etish chora-tadbirlari toʻgʻrisida”gi qaroriga muvofiq Oʻzbekiston Respublikasi Mudofaa vazirligi, Oliy taʼlim, fan va innovatsiyalar vazirligi hamda Sogʻliqni saqlash vazirligi qaror qiladi:
1. Oʻzbekiston Respublikasi Harbiy xavfsizlik va mudofaa universitetining Harbiy tibbiyot institutida toʻlov-kontrakt asosida oʻqitish toʻgʻrisidagi nizom ilovaga muvofiq tasdiqlansin.
2. Mazkur qaror rasmiy eʼlon qilingan kundan eʼtiboran kuchga kiradi.
Oʻzbekiston Respublikasi Mudofaa vazirligining 2026-yil 25-martdagi 7-son, Oliy taʼlim, fan va innovatsiyalar vazirligining 2026-yil 19-martdagi 21-q/q-son, Sogʻliqni saqlash vazirligining 2026-yil 16-martdagi 01-10/QQ-son qaroriga ILOVA
Oʻzbekiston Respublikasi Harbiy xavfsizlik va mudofaa universitetining Harbiy tibbiyot institutida toʻlov-kontrakt asosida oʻqitish toʻgʻrisidagi
Ushbu Nizom Oʻzbekiston Respublikasi Harbiy xavfsizlik va mudofaa universitetining Harbiy tibbiyot institutida (bundan buyon matnda Institut deb yuritiladi) mutaxassislarni qayta tayyorlash va ularning malakasini oshirish, shuningdek Institutning magistratura va klinik ordinaturasida toʻlov-kontrakt asosida oʻqitishni tashkil etish tartibini belgilaydi.
1-bob. Umumiy qoidalar
1. Ushbu Nizomda quyidagi asosiy tushunchalar qoʻllaniladi:
qayta tayyorlash — tibbiyot sohasida tayanch mutaxassisliklar va kasblarga muvofiq boʻlgan yoʻnalishlar boʻyicha faoliyatni amalga oshirish uchun qoʻshimcha kasbiy bilim, malaka va koʻnikmalarning zarur hajmi egallanishini taʼminlashga qaratilgan taʼlim turi;
malaka oshirish — tibbiyot sohasi boʻyicha kasbiy bilim, malaka va koʻnikmalarning chuqurlashtirilishi hamda yangilab borilishini taʼminlashga, kadrlarning toifasi, darajasi, razryadi va lavozimi oshishiga xizmat qiladigan taʼlim turi;
oʻquv dasturi — bu oʻzida bilimga oid hamda kasbiy jihatlarni qamrab oladigan, tinglovchilarda bilim, koʻnikma va malakalarni shakllantirishga qaratilgan oʻquv dasturining tarkibiy elementi sifatida nazorat qilishning tegishli turi bilan yakunlanadigan alohida oʻquv fani (uning qismi yoki oʻzaro bir sohaga doir fanlar majmui);
buyurtmachi — qayta tayyorlash va malaka oshirish kurslarida taʼlim olish uchun murojaat qilgan jismoniy yoki yuridik shaxslar;
tinglovchi — tegishli toʻlovni amalga oshirgan va oʻquv kurslariga qabul qilingan jismoniy shaxs.
2. Tinglovchilarni qayta tayyorlash va ularning malakasini oshirishni tashkil etish Vazirlar Mahkamasining 2009-yil 18-dekabrdagi 319-son “Tibbiyot xodimlari malakasini oshirish va ularni qayta tayyorlash tizimini takomillashtirish toʻgʻrisida”gi qaroriga asosan amalga oshiriladi.
3. Tinglovchilarni qayta tayyorlash va ularning malakasini oshirish ishlab chiqarishdan ajralgan holda hamda ishlab chiqarishdan ajralmagan holda amalga oshiriladi.
Tinglovchilarni oʻqitish ishlab chiqarishdan ajralmagan holda tashkil etilganda oʻzaro kelishuvga koʻra buyurtmachining hududida amalga oshirilishi mumkin. Bunda oʻquv guruhidagi tinglovchilar soni kamida oʻn nafarni tashkil qilishi kerak.
4. Tinglovchilarni qayta tayyorlash va ularning malakasini oshirish Oʻzbekiston Respublikasi Sogʻliqni saqlash vazirligi hamda Oliy taʼlim, fan va innovatsiyalar vazirligi tomonidan kelishilgan holda Oʻzbekiston Respublikasi Mudofaa vazirligi tomonidan ishlab chiqilgan va tasdiqlangan oʻquv reja va oʻquv dasturlari asosida tashkil etiladi.
5. Tinglovchilarni qayta tayyorlash va ularning malakasini oshirish kurslari roʻyxati (nomi), oʻqish vaqti, soati, muddati, shakli va yoʻnalishi oʻquv rejasida belgilanadi.
2-bob. Tinglovchilarni qayta tayyorlash va ularning malakasini oshirish
6. Tinglovchilarni qayta tayyorlash va ularning malakasini oshirish kurslari Institut bilan kelishilgan holda buyurtmachi tomonidan tuziladigan taqsimot-rejalarga asosan tashkil etiladi.
Buyurtmachi tomonidan taqsimot-rejalar har yarim yil uchun tuziladi hamda har yili iyun va dekabr oyining 15-sanasiga qadar tasdiqlanib, Institutga yetkaziladi.
Institut taqsimot-rejaga asoslangan holda oʻquv guruhlarini shakllantiradi.
7. Tinglovchilar qayta tayyorlash va malaka oshirish kurslarida Institut bilan shartnomaga muvofiq toʻlov asosida oʻqitiladi.
8. Tinglovchilarni qayta tayyorlash va malaka oshirish kurslariga qabul qilish Institut boshligʻining buyrugʻi bilan ushbu kurslar boshlangan kunning oʻzida rasmiylashtiriladi.
9. Tinglovchilarni qayta tayyorlash va ularning malakasini oshirish kurslarining oʻquv jarayoniga Institut professor-oʻqituvchilari hamda shartnoma asosida pedagog xodimlar va boshqa mutaxassislar jalb etiladi.
10. Tinglovchilarni qayta tayyorlash va ularning malakasini oshirish kurslarida sinov imtihonlari oraliq va yakuniy nazorat turlaridan iborat hisoblanadi.
Tinglovchilarni qayta tayyorlash va ularning malakasini oshirish kurslarida sinov imtihonlari oʻquv reja va oʻquv dasturlari asosida ishlab chiqilgan test shaklida oʻtkaziladi.
11. Test savollari sinov imtihonlari boshlanishidan kamida uch kun oldin Institutning rasmiy veb-saytiga joylashtiriladi.
12. Sinov imtihonlari oʻtkazilayotgan xonaga tinglovchilar tomonidan mobil aloqa vositasi, kompyuter yoki boshqa aloqa va telekommunikatsiya vositalari, kitob, lugʻat, shpargalka va boshqa materiallar olib kirilishi hamda foydalanilishi taqiqlanadi.
Bunda ushbu taqiqlangan materiallarni olib kirgan yoki foydalangan tinglovchi sinov imtihonlarini oʻtkazish tartibini buzgan deb hisoblanadi hamda dalolatnoma asosida sinov imtihonlaridan chetlashtiriladi.
13. Tinglovchilarni qayta tayyorlash va ularning malakasini oshirish kurslari mobaynidagi oʻzlashtirishi 100 ballik tizim asosida baholanadi. Bunda:
oraliq nazorat 20 ta test savollaridan iborat boʻladi, har bir toʻgʻri javob uchun 1,5 ball va jami toʻplanishi mumkin boʻlgan ball 30 ballni tashkil etadi;
yakuniy nazorat 35 ta test savollaridan iborat boʻladi, har bir toʻgʻri javob uchun 2 ball va jami toʻplanishi mumkin boʻlgan ball 70 ballni tashkil etadi.
Tinglovchining oraliq va yakuniy nazorat turlarida toʻplagan natijalari umumlashtiriladi. Bunda, tinglovchining umumiy toʻplagan natijasi 56 va undan yuqori ballni tashkil etgan taqdirda u qayta tayyorlash yoki malaka oshirish kursini tugatgan deb hisoblanadi.
Sinov imtihonlarining natijalari boʻyicha tinglovchi 56 balldan kam toʻplagan hollarda u qayta tayyorlash yoki malaka oshirish kursidan oʻtmagan deb hisoblanadi.
14. Sinov imtihonidan 56 balldan kam toʻplagan tinglovchilarga ularning natijalari eʼlon qilingan kundan boshlab uch ish kuni ichida qayta topshirish uchun imkoniyat beriladi.
Bunda tinglovchidan sinov imtihonini qayta topshirish uchun toʻlov undirilmaydi.
Sinov imtihonini qayta topshirib, yana 56 balldan kam toʻplagan tinglovchi qayta tayyorlash yoki malaka oshirish kursini shartnoma asosida qayta oʻqish huquqiga ega.
15. Institut tomonidan qayta tayyorlash va malaka oshirish kursini muvaffaqiyatli tamomlagan tinglovchiga sertifikat taqdim etiladi.
Sinov imtihonini muvaffaqiyatli topshirmagan tinglovchiga sertifikat berilmaydi. Bu holda tinglovchiga qayta tayyorlash yoki malaka oshirish kursida qatnashganligi toʻgʻrisida maʼlumotnoma beriladi.
16. Institutning magistratura va klinik ordinaturasida taʼlim Oʻzbekiston Respublikasi Vazirlar Mahkamasining 2025-yil 13-sentabrdagi 578-son “Oliy taʼlim tashkilotlariga oʻqishga qabul qilish jarayonlarini tartibga soluvchi normativ-huquqiy hujjatlarni tasdiqlash toʻgʻrisida”gi qarori , 2009-yil 18-dekabrdagi 319-son “Tibbiyot xodimlari malakasini oshirish va ularni qayta tayyorlash tizimini takomillashtirish toʻgʻrisida”gi qarori hamda Oliy taʼlimning davlat taʼlim standarti. Oliy taʼlim yoʻnalishlari va mutaxassisliklari klassifikatoriga (roʻyxat raqam 3781, 2026-yil 28-fevral) muvofiq amalga oshiriladi.
17. Institutda toʻlov-kontrakt asosida oʻqishga quyidagilar jalb qilinadi:
oliy, oʻrta maxsus va kasbiy taʼlim tashkilotlarining tibbiyot yoʻnalishini tamomlagan va tegishli mutaxassisliklar boʻyicha tayyorgarlikka ega boʻlgan shaxslar;
davolash-profilaktika muassasalari rahbarlari;
davolash-profilaktika muassasalari mavjud boʻlgan vazirlik, idoralar va boshqa tashkilotlarning xodimlari;
xususiy tibbiyot muassasalarining tibbiyot xodimlari;
birlamchi tibbiy-sanitariya yordam koʻrsatishi shart hisoblangan ichki ishlar organlari, yongʻindan saqlash, avariya xizmatlari, transport tashkilotlari xodimlari;
notibbiy maʼlumotga ega, lekin tibbiy yordam koʻrsatish vazifalarini bajarish bilan shugʻullanuvchi fuqarolar hamda boshqa kasb vakillari.
3-bob. Tinglovchilarning apellyatsiya shikoyatlarini koʻrib chiqish
18. Tinglovchilarning apellyatsiya shikoyatlarini koʻrib chiqish uchun Institut boshligʻining buyrugʻi bilan Institutning kamida besh nafar mutaxassislaridan iborat tarkibda Apellyatsiya komissiyasi tashkil etiladi.
Apellyatsiya komissiyasi tarkibiga boshqa davlat organlari va tashkilotlaridan ham mutaxassislar jalb etilishi mumkin.
Qayta tayyorlash va malaka oshirish kurslarida sinov imtihonlarini oʻtkazishga masʼul boʻlgan shaxslarning Apellyatsiya komissiyasi tarkibiga kiritilishiga yoʻl qoʻyilmaydi.
19. Sinov imtihonlari natijalaridan norozi boʻlgan tinglovchilar mazkur imtihonlar natijalari eʼlon qilingan kundan boshlab yetti ish kuni ichida Apellyatsiya komissiyasiga yozma yoki elektron shaklda Apellyatsiya shikoyati berishlari mumkin.
Bunda Apellyatsiya komissiyasi apellyatsiya shikoyati bilan murojaat qilgan tinglovchini shikoyat koʻrib chiqilishidan 2 kun oldin uni koʻrib chiqish vaqti va joyi haqida xabardor qiladi.
20. Apellyatsiya komissiyasi apellyatsiya shikoyatini, u kelib tushgan kundan boshlab 3 kun muddat ichida koʻrib chiqadi. Bunda apellyatsiya shikoyati bilan murojaat qilgan tinglovchi mazkur shikoyatni koʻrib chiqishda ishtirok etish huquqiga ega.
21. Apellyatsiya komissiyasi unda aʼzolarning kamida uchdan ikki qismi ishtirok etganda vakolatli hisoblanadi. Apellyatsiya komissiyasining qarori oddiy koʻpchilik ovoz bilan qabul qilinadi va majlisda ishtirok etgan barcha aʼzolar tomonidan tasdiqlanadigan bayonnoma bilan rasmiylashtiriladi.
22. Apellyatsiya komissiyasi tomonidan apellyatsiya shikoyatini koʻrib chiqish davomida tinglovchiga uni qayta baholashga qaratilgan savollar berilishiga yoʻl qoʻyilmaydi.
23. Shikoyatni koʻrib chiqish natijalari boʻyicha Apellyatsiya komissiyasi tomonidan quyidagi qarorlardan biri qabul qilinadi:
sinov natijalarini oʻzgarishsiz qoldirish;
sinov natijalariga oʻzgartirish kiritish.
Apellyatsiya shikoyatini koʻrishda tinglovchining sinov natijasida olgan ballini pasaytirishga yoʻl qoʻyilmaydi.
24. Apellyatsiya komissiyasi apellyatsiya shikoyati bilan murojaat qilgan tinglovchiga oʻz qarorini u qabul qilingan kunning oʻzida maʼlum qilishi kerak.
25. Apellyatsiya komissiyasining sinov natijalariga oʻzgartirish kiritish toʻgʻrisidagi qarori asosida tinglovchiga qayta tayyorlash yoki malaka oshirish kursi boʻyicha sertifikat beriladi.
26. Apellyatsiya komissiyasi qarori ustidan tinglovchi yuqori turuvchi organga yoki sudga shikoyat qilishi mumkin.
4-bob. Tinglovchilarning huquq va majburiyatlari
27. Tinglovchilar oʻquv mashgʻulotlari boshlanishidan oldin Institutning ichki tartib-qoidalari bilan tanishtiriladi.
28. Tinglovchilar quyidagi huquqlarga ega hisoblanadi:
oʻquv dasturida nazarda tutilgan bilimlarni egallash;
oʻquv jarayonini yanada yaxshilash, qayta tayyorlash va malaka oshirish tizimini takomillashtirish boʻyicha Institut rahbariyatiga takliflar kiritish;
maʼnaviy-maʼrifiy va madaniy tadbirlarda qatnashish;
Institut axborot-resurs markazi, oʻquv xonalari va kompyuter texnika vositalaridan foydalanish.
29. Tinglovchilar quyidagilarga majbur hisoblanadi:
oʻquv dasturlari talablarini bajarish;
oʻquv mashgʻulotlarida oʻz vaqtida qatnashish;
oʻquv dasturlarida nazarda tutilgan sinov imtihon (test)larini topshirish;
oʻquv jarayonida berilgan topshiriqlarni oʻz vaqtida bajarish;
Institutga tegishli boʻlgan mulklarni asrab-avaylash, Institut ichki tartib-qoidalariga qatʼiy rioya etish.
30. Tinglovchi quyidagi asoslarga koʻra tinglovchilar safidan chetlashtiriladi:
oʻz xohishiga (arizasiga) binoan;
vafot etganligi sababli;
sud tomonidan ozodlikdan mahrum etilganda;
oʻquv intizomi va Institut ichki tartib-qoidalarini qoʻpol ravishda buzganligi uchun;
qayta tayyorlash yoki malaka oshirish kursining oʻquv mashgʻulotlarini uzrli sabablarsiz 18 akademik soatdan ortiq qoldirganligi sababli (bunda uzrli sabablar tinglovchining kasalligi, yaqin qarindoshlarining vafoti, mehnat taʼtili, Oʻzbekiston Respublikasidan tashqarida boʻlishini oʻz ichiga oladi).
5-bob. Yakunlovchi qoida
31. Mazkur Nizom talablarining buzilishida aybdor shaxslar qonunchilik hujjatlariga muvofiq javob beradi.
Mudofaa vaziri SH. XALMUXAMEDOV
Oliy taʼlim, fan va innovatsiyalar vaziri K. SHARIPOV
Sogʻliqni saqlash vaziri A. XUDAYAROV
Toshkent sh.,
2026-yil 25-mart,
Toshkent sh.,
2026-yil 19-mart
Toshkent sh.,
2026-yil 16-mart
7-son
21-q/q-son
01-10/QQ-son