📅 2026-yil 16-aprel · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2026 йил 16 апрель · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 16 апреля 2026 г. · Постановления Кабинета Министров
Официальный текст. Официальный документ. Редакционные примечания не включены.
📅 16 April 2026 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
«Янги Ўзбекистон» университетида «Ректорлар мактаби» дастурини йўлга қўйиш чора-тадбирлари тўғрисида
Олий таълим соҳасида бошқарув самарадорлигини ошириш, истиқболли ва замонавий қарашларга эга раҳбар кадрларни тайёрлаш, шунингдек, илғор билим ҳамда юксак малакаларни ўзида мужассам этган ректорлар корпусини шакллантириш мақсадида Вазирлар Маҳкамаси қарор қилади:
1. 2026 йил 1 июлдан бошлаб «Янги Ўзбекистон» университетида (кейинги ўринларда — Университет) давлат олий таълим ташкилотлари ректори (директори) лавозимига номзодларни тайёрлаш бўйича «Ректорлар мактаби» дастури (кейинги ўринларда — Дастур) йўлга қўйилсин.
2. Белгилансинки:
Дастур давлат олий таълим ташкилотлари ректори (директори) лавозимига номзодлар захирасини шакллантириш мақсадида ташкил этилади;
Дастур доирасида 30 ёшга тўлган, камида магистр академик даражасига ва олий таълим соҳасида камида 5 йиллик иш тажрибасига эга бўлган, шу жумладан, 2 йил раҳбарлик лавозимларида ишлаган шахслар очиқ танлов асосида ўқишга қабул қилинади;
Дастур тингловчиларида академик, молиявий, илмий ва инновацион бошқарув, сунъий интеллект ва рақамлаштириш, стратегик бошқарув ва трансформация йўналишларида билим ва кўникмалар ривожлантирилади;
Дастурнинг ўқув жараёнлари масофавий (онлайн) ва ишлаб чиқаришдан ажралган ҳолда (оффлайн) олти ойгача бўлган муддатда ташкил этилади;
Дастурга ҳар йили 80 нафар тингловчи қабул қилинади ҳамда Дастур якунлари бўйича энг яхши натижа кўрсатган 40 нафаргача тингловчи Гарвард университети (АҚШ) ва (ёки) бошқа хорижий нуфузли олий таълим ташкилотларига малака оширишга юборилади.
3. Шундай тартиб ўрнатилсинки, унга кўра:
а) Олий таълим, фан ва инновациялар вазирлиги Дастур доирасида давлат олий таълим ташкилоти ректори (директори) лавозимига тингловчиларни ўқитиш бўйича давлат буюртмачиси ҳисобланади;
Бунда Дастур доирасида тингловчиларнинг ишлаб чиқаришдан ажралган ҳолда ўқиш даврида уларнинг асосий иш жойи бўйича лавозими ва амалдаги ўртача иш ҳақи сақлаб қолинади;
б) Дастурни муваффақиятли тамомлаган тингловчиларга белгиланган намунадаги сертификат берилади ва Олий таълим, фан ва инновациялар вазирлиги томонидан юритиладиган давлат олий таълим ташкилотлари ректори (директори) лавозимига номзодлар захирасига киритилади;
в) давлат олий таълим ташкилотлари ректори (директори) лавозимига номзодлар фақат Дастурни муваффақиятли тамомлаган ва олий таълим ташкилотлари ректори (директори) захирасига киритилган шахслар орасидан танлаб олинади.
4. Олий таълим, фан ва инновациялар вазирлиги, Мактабгача ва мактаб таълими вазирлиги 2026 йил 1 июлга қадар:
Дастурга номзодларни саралаш тартибини тасдиқласин;
мазкур қарорда белгиланган талаблардан келиб чиқиб, ўқув дастурини ишлаб чиқсин ҳамда халқаро эътироф этилган ташкилотлар рейтингида юқори 200 талик рўйхатга кирган олий таълим ташкилоти билан келишиш чораларини кўрсин;
Ташқи ишлар вазирлиги билан биргаликда энг яхши натижа кўрсатган тингловчиларни Гарвард университети (АҚШ) ва (ёки) бошқа хорижий нуфузли олий таълим ташкилотларига малака оширишга юбориш бўйича музокаралар олиб борсин ҳамда тегишли келишувларни имзоласин.
5. Дастур қуйидагича молиялаштирилади:
Дастур доирасида тингловчиларни ўқитиш ҳамда Дастур якуни бўйича ҳар йили 40 нафаргача тингловчини Гарвард университети (АҚШ) ва (ёки) бошқа хорижий нуфузли олий таълим ташкилотларига малака оширишга юбориш харажатлари Давлат бюджети маблағлари ҳисобидан қопланади;
тингловчиларни ўқитиш ва хорижий нуфузли олий таълим ташкилотларига малака оширишга юбориш харажатлари учун зарур маблағлар Олий таълим, фан ва инновациялар вазирлиги томонидан шартнома асосида Университетга ўтказиб берилади;
битта тингловчини ўқитиш харажатлари миқдори ҳар йили Университет томонидан Олий таълим, фан ва инновациялар вазирлиги ҳамда Иқтисодиёт ва молия вазирлиги билан келишилган ҳолда тасдиқланади.
6. Иқтисодиёт ва молия вазирлиги 2026 йилда ушбу қарорнинг ижроси учун талаб этиладиган маблағларни Ўзбекистон Республикаси бюджетидан биринчи даражали бюджет маблағларини тақсимловчи сифатида Олий таълим, фан ва инновациялар вазирлигига ажратиладиган маблағлар доирасида молиялаштирсин, 2027 йилдан бошлаб эса Олий таълим, фан ва инновациялар вазирлигининг асосланган ҳисоб-китобларига кўра ҳар йилги Давлат бюджети параметрларида назарда тутсин.
7. Ушбу қарорнинг бажарилишини назорат қилиш Ўзбекистон Республикаси олий таълим, фан ва инновациялар вазири К.А. Шарипов ҳамда мактабгача ва мактаб таълими вазири Э.Г. Каримова зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2026 йил 16 апрель,
177-сон
Oʻzbekiston Respublikasi Vazirlar Mahkamasining
qarori
“Yangi Oʻzbekiston” universitetida “Rektorlar maktabi” dasturini yoʻlga qoʻyish chora-tadbirlari toʻgʻrisida
Oliy taʼlim sohasida boshqaruv samaradorligini oshirish, istiqbolli va zamonaviy qarashlarga ega rahbar kadrlarni tayyorlash, shuningdek, ilgʻor bilim hamda yuksak malakalarni oʻzida mujassam etgan rektorlar korpusini shakllantirish maqsadida Vazirlar Mahkamasi qaror qiladi:
1. 2026-yil 1-iyuldan boshlab “Yangi Oʻzbekiston” universitetida (keyingi oʻrinlarda — Universitet) davlat oliy taʼlim tashkilotlari rektori (direktori) lavozimiga nomzodlarni tayyorlash boʻyicha “Rektorlar maktabi” dasturi (keyingi oʻrinlarda — Dastur) yoʻlga qoʻyilsin.
2. Belgilansinki:
Dastur davlat oliy taʼlim tashkilotlari rektori (direktori) lavozimiga nomzodlar zaxirasini shakllantirish maqsadida tashkil etiladi;
Dastur doirasida 30 yoshga toʻlgan, kamida magistr akademik darajasiga va oliy taʼlim sohasida kamida 5 yillik ish tajribasiga ega boʻlgan, shu jumladan, 2 yil rahbarlik lavozimlarida ishlagan shaxslar ochiq tanlov asosida oʻqishga qabul qilinadi;
Dastur tinglovchilarida akademik, moliyaviy, ilmiy va innovatsion boshqaruv, sunʼiy intellekt va raqamlashtirish, strategik boshqaruv va transformatsiya yoʻnalishlarida bilim va koʻnikmalar rivojlantiriladi;
Dasturning oʻquv jarayonlari masofaviy (onlayn) va ishlab chiqarishdan ajralgan holda (offlayn) olti oygacha boʻlgan muddatda tashkil etiladi;
Dasturga har yili 80 nafar tinglovchi qabul qilinadi hamda Dastur yakunlari boʻyicha eng yaxshi natija koʻrsatgan 40 nafargacha tinglovchi Garvard universiteti (AQSH) va (yoki) boshqa xorijiy nufuzli oliy taʼlim tashkilotlariga malaka oshirishga yuboriladi.
3. Shunday tartib oʻrnatilsinki, unga koʻra:
a) Oliy taʼlim, fan va innovatsiyalar vazirligi Dastur doirasida davlat oliy taʼlim tashkiloti rektori (direktori) lavozimiga tinglovchilarni oʻqitish boʻyicha davlat buyurtmachisi hisoblanadi;
Bunda Dastur doirasida tinglovchilarning ishlab chiqarishdan ajralgan holda oʻqish davrida ularning asosiy ish joyi boʻyicha lavozimi va amaldagi oʻrtacha ish haqi saqlab qolinadi;
b) Dasturni muvaffaqiyatli tamomlagan tinglovchilarga belgilangan namunadagi sertifikat beriladi va Oliy taʼlim, fan va innovatsiyalar vazirligi tomonidan yuritiladigan davlat oliy taʼlim tashkilotlari rektori (direktori) lavozimiga nomzodlar zaxirasiga kiritiladi;
v) davlat oliy taʼlim tashkilotlari rektori (direktori) lavozimiga nomzodlar faqat Dasturni muvaffaqiyatli tamomlagan va oliy taʼlim tashkilotlari rektori (direktori) zaxirasiga kiritilgan shaxslar orasidan tanlab olinadi.
4. Oliy taʼlim, fan va innovatsiyalar vazirligi, Maktabgacha va maktab taʼlimi vazirligi 2026-yil 1-iyulga qadar:
Dasturga nomzodlarni saralash tartibini tasdiqlasin;
mazkur qarorda belgilangan talablardan kelib chiqib, oʻquv dasturini ishlab chiqsin hamda xalqaro eʼtirof etilgan tashkilotlar reytingida yuqori 200 talik roʻyxatga kirgan oliy taʼlim tashkiloti bilan kelishish choralarini koʻrsin;
Tashqi ishlar vazirligi bilan birgalikda eng yaxshi natija koʻrsatgan tinglovchilarni Garvard universiteti (AQSH) va (yoki) boshqa xorijiy nufuzli oliy taʼlim tashkilotlariga malaka oshirishga yuborish boʻyicha muzokaralar olib borsin hamda tegishli kelishuvlarni imzolasin.
5. Dastur quyidagicha moliyalashtiriladi:
Dastur doirasida tinglovchilarni oʻqitish hamda Dastur yakuni boʻyicha har yili 40 nafargacha tinglovchini Garvard universiteti (AQSH) va (yoki) boshqa xorijiy nufuzli oliy taʼlim tashkilotlariga malaka oshirishga yuborish xarajatlari Davlat budjeti mablagʻlari hisobidan qoplanadi;
tinglovchilarni oʻqitish va xorijiy nufuzli oliy taʼlim tashkilotlariga malaka oshirishga yuborish xarajatlari uchun zarur mablagʻlar Oliy taʼlim, fan va innovatsiyalar vazirligi tomonidan shartnoma asosida Universitetga oʻtkazib beriladi;
bitta tinglovchini oʻqitish xarajatlari miqdori har yili Universitet tomonidan Oliy taʼlim, fan va innovatsiyalar vazirligi hamda Iqtisodiyot va moliya vazirligi bilan kelishilgan holda tasdiqlanadi.
6. Iqtisodiyot va moliya vazirligi 2026-yilda ushbu qarorning ijrosi uchun talab etiladigan mablagʻlarni Oʻzbekiston Respublikasi budjetidan birinchi darajali budjet mablagʻlarini taqsimlovchi sifatida Oliy taʼlim, fan va innovatsiyalar vazirligiga ajratiladigan mablagʻlar doirasida moliyalashtirsin, 2027-yildan boshlab esa Oliy taʼlim, fan va innovatsiyalar vazirligining asoslangan hisob-kitoblariga koʻra har yilgi Davlat budjeti parametrlarida nazarda tutsin.
7. Ushbu qarorning bajarilishini nazorat qilish Oʻzbekiston Respublikasi oliy taʼlim, fan va innovatsiyalar vaziri K.A. Sharipov hamda maktabgacha va maktab taʼlimi vaziri E.G. Karimova zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2026-yil 16-aprel,
177-son