UzbekAI

ЎЗБЕКИСТОН РЕСПУБЛИКАСИ ПРЕЗИДЕНТИНИНГ

ҚАРОРИ

ТАЛАБ ВА ШАРТЛАР

Қорақалпоғистон Республикасида махсус майнинг зонасини ташкил этиш ва унинг фаолиятини йўлга қўйиш чора-тадбирлари тўғрисида

Қорақалпоғистон Республикасига инвестицияларни жалб қилиш, аҳоли фаровонлигини ошириш ва майнингни амалга ошириш учун қулай шарт-шароитлар яратиш орқали қайта тикланувчи энергия манбаларидан самарали фойдаланиш мақсадида қарор қиламан:

I. Мақсадлар

1. Қуйидагилар ушбу қарорнинг асосий мақсади ва устувор вазифалари этиб белгилансин:

(а) майнинг фаолиятини амалга ошириш учун барча турдаги қайта тикланувчи энергия манбаларидан фойдаланган ҳолда қулай шарт-шароитлар яратиш;

(б) Қорақалпоғистон Республикасининг инвестициявий жозибадорлигини ошириш ҳамда янги ишчи ўринлар яратиш орқали аҳоли даромадларини кўпайтириш.

II. Қорақалпоғистон Республикаси ҳудудида махсус майнинг зонасини ташкил этиш бўйича амалий чора-тадбирлар

2. Ўзбекистон Республикаси Президентининг 2018 йил 3 июлдаги «Ўзбекистон Республикасида рақамли иқтисодиётни ва крипто-активлар айланмаси соҳасини ривожлантириш чора-тадбирлари тўғрисида»ги ПҚ-3832-сон қарорига мувофиқ:

(а) крипто-активлар айланмаси махсус норматив-ҳуқуқий ҳужжатлар билан тартибга солиниши;

(б) майнинг фақат юридик шахс томонидан қуёш фотоэлектр станциялари орқали ишлаб чиқарилган электр энергиясидан фойдаланган ҳолда амалга оширилиши;

(в) крипто-активлар айланмаси соҳасида фаолиятни амалга ошириш учун юридик шахслар томонидан йиғимлар тўланиши белгиланганлиги маълумот учун қабул қилинсин.

3. «Besqala Mining Valley» махсус майнинг зонаси (кейинги ўринларда — махсус зона) ташкил этилсин. Бунда:

(а) махсус зонанинг ҳудуди Қорақалпоғистон Республикасининг бутун ҳудуди ҳисобланади;

(б) махсус зона доирасида қуйидагиларга:

(i) майнингни амалга ошириш учун ягона электр энергетика тизимидан ва барча турдаги қайта тикланувчи энергия манбаларидан, шунингдек, водород электр станциясида ишлаб чиқарилган электр энергиясидан фойдаланишга;

(ii) майнинг натижасида олинган крипто-активлар белгиланган тартибда миллий крипто-биржалар ёки хорижий платформалар орқали, шу жумладан, тўғридан-тўғри шартномалар асосида сотилишига ва (ёки) уларни бошқа ликвидли крипто-активларга айирбошлашга;

(iii) майнинг натижасида олинган (шу жумладан, бошқа юқори ликвидли крипто-активларга айирбошланган) крипто-активларни сотишдан тушган тушумни мажбурий тарзда Ўзбекистон Республикасидаги банкларнинг ҳисобварақларига ўтказишга;

(iv) фақатгина Қорақалпоғистон Республикаси ҳудудида давлат рўйхатидан ўтган ҳолда фаолият юритаётган юридик шахслар резидент бўлишига;

(v) резидентларга майнинг амалга ошириш натижасида ҳосил бўладиган иссиқлик энергияси ҳисобидан қишлоқ хўжалигига мўлжалланган ер участкаларида белгиланган тартибда иссиқхоналар ташкил этишга рухсат этилади.

4. Қорақалпоғистон Республикаси Вазирлар Кенгаши муассислигида масъулияти чекланган жамият шаклида «Besqala Mining Valley» махсус майнинг зонаси дирекцияси» (кейинги ўринларда — Дирекция) ташкил этилсин ва Истиқболли лойиҳалар миллий агентлиги (кейинги ўринларда — Агентлик) майнинг фаолиятини амалга ошириш учун рухсатномалар бериш бўйича ишчи орган этиб белгилансин.

5. Шундай тартиб ўрнатилсинки, унга мувофиқ махсус зона доирасида:

(а) талабгорлар (юридик шахслар) махсус зона резидентлигини ва майнинг фаолиятини амалга ошириш учун рухсатнома олиш тўғрисида ариза билан Дирекцияга мурожаат қилади;

(б) талабгорларнинг аризалари Дирекция томонидан кўриб чиқилади, ижобий хулоса берилганда:

(i) талабгорга Дирекция томонидан махсус зона резиденти (кейинги ўринларда — резидент) мақоми берилади;

(ii) резидентга майнинг фаолиятини амалга ошириш учун Агентлик томонидан қўшимча ҳужжатлар талаб қилинмасдан рухсатнома берилади;

(в) Дирекция резидентларни рўйхатдан ўтказади, уларнинг ҳисобини юритади ва аризалар сифатли кўриб чиқилишига жавобгар бўлади.

6. Белгилансинки:

(а) 2035 йил 1 январга қадар резидентларнинг майнинг фаолиятини амалга ошириш билан боғлиқ операциялардан олинган даромадлари солиқлар ва йиғимлардан озод қилинади;

(б) махсус зонада майнинг фаолиятини амалга оширганлик учун резидентлар ҳар ойда ушбу фаолиятдан олган даромадининг 1 фоизи миқдорида Дирекцияга тўлов тўлайди, бунда Дирекциянинг соф фойдаси Қорақалпоғистон Республикаси республика бюджетига ўтказилади;

(в) ягона электр энергетика тизимига уланиш орқали электр энергиясидан фойдаланилган тақдирда:

(i) истеъмол қилинган электр энергияси учун тўловлар II тариф гуруҳига нисбатан икки баравар ўсувчи коэффициентга мувофиқ тўланади, бундан Ўзбекистон Республикаси Президентининг 2025 йил 22 октябрдаги «Сунъий интеллект технологияларини янада ривожлантиришга оид қўшимча чора-тадбирлар тўғрисида»ги ПФ-189-сон Фармонига 1-иловада назарда тутилган ҳолатлар мустасно;

(ii) истеъмол қилинган электр энергиясининг ҳисоби алоҳида ҳисобга олиш ускунасини ўрнатган ҳолда юритилади;

(г) махсус зонанинг фаолият юритиш тартиби Агентлик томонидан белгиланади.

7. Агентлик Иқтисодиёт ва молия вазирлиги ҳамда Қорақалпоғистон Республикаси Вазирлар Кенгаши билан биргаликда икки ой муддатда мазкур қарорнинг 6-банди «а» кичик бандидан келиб чиқиб, Солиқ кодексига ўзгартириш ва қўшимчалар киритишни назарда тутувчи қонун лойиҳасини Вазирлар Маҳкамасига киритсин.

8. Энергетика вазирлиги, Тоғ-кон саноати ва геология вазирлиги ҳамда Агентликнинг салоҳиятли инвесторлар томонидан махсус зона ҳудудида норентабел, паст дебитли, қазиб чиқарилиши камайиб бораётган, шунингдек, углеводородларни етказиб беришнинг транспорт тизими мавжуд бўлмаган ёки эскирган конларни янада ўзлаштириш, сақлаш ва жиҳозлаш орқали электр энергиясини ишлаб чиқариш ва ундан майнингни амалга ошириш учун фойдаланиш бўйича лойиҳани ҳаётга татбиқ этиш тўғрисидаги таклифига розилик берилсин.

9. Энергетика вазирлиги Агентлик билан биргаликда икки ой муддатда норентабел, паст дебитли, қазиб чиқарилиши камайиб бораётган, шунингдек, углеводородларни етказиб беришнинг транспорт тизими мавжуд бўлмаган ёки эскирган конларни инвесторларга майнингни амалга ошириш учун фойдаланишга бериш тўғрисидаги тартиб ишлаб чиқилиши ва тасдиқланишини таъминласин.

10. «Besqala Mining Valley» махсус майнинг зонаси резиденти сифатида рўйхатдан ўтказиш учун асосий талаб ва шартлар 1-иловага мувофиқ тасдиқлансин.

11. Қорақалпоғистон Республикаси Вазирлар Кенгаши бир ой муддатда:

(а) Дирекциянинг ташкил этилиши, давлат рўйхатидан ўтказилиши ва жойлаштириш учун жой ажратилишини;

(б) Энергетика вазирлиги, бошқа вазирлик ва идоралар билан биргаликда Қорақалпоғистон Республикасида майнинг амалга ошириш учун қайта тикланувчи энергия манбалари қурилмаларини ўрнатиш мақсадида ер участкалари ажратишнинг соддалаштирилган тартибини жорий қилиш бўйича Вазирлар Маҳкамасига таклифлар киритилишини таъминласин.

12. Ўзбекистон Республикаси Президентининг ва Ўзбекистон Республикаси Ҳукуматининг айрим қарорларига 2-иловага мувофиқ ўзгартириш ва қўшимчалар киритилсин.

13. Агентлик икки ой муддатда:

(а) «Besqala Mining Valley» махсус майнинг зонаси ва резидентларни рўйхатдан ўтказиш ҳамда уларнинг фаолиятини амалга ошириш тартиби тўғрисидаги низомни ишлаб чиқсин ва тасдиқласин;

(б) Қорақалпоғистон Республикаси Вазирлар Кенгаши, бошқа вазирлик ва идоралар билан биргаликда қонунчилик ҳужжатларига ушбу қарордан келиб чиқадиган ўзгартириш ва қўшимчалар тўғрисида Вазирлар Маҳкамасига таклифлар киритсин.

III. Қарор ижросини ташкил этиш, таъминлаш ва назорат

14. Қарор ижросини самарали ташкил қилишга масъул ва шахсан жавобгар этиб Қорақалпоғистон Республикаси Вазирлар Кенгаши Раиси Ф.У. Эрманов белгилансин.

15. Қарор ижросини назорат қилиш Ўзбекистон Республикаси Бош вазири А.Н. Арипов зиммасига юклансин.

Ўзбекистон Республикаси Президентининг 2026 йил 17 апрелдаги ПҚ-143-сон қарорига 1-ИЛОВА

«Besqala Mining Valley» махсус майнинг зонаси резиденти сифатида рўйхатдан ўтказиш учун асосий

1. Юридик шахс Қорақалпоғистон Республикаси ҳудудида давлат рўйхатидан ўтган бўлиши керак.

2. Майнингни фақат рўйхатга олинган пайтда кўрсатилган манзилда амалга ошириш лозим.

3. Майнинг ускуналарини ўрнатиш учун мўлжалланган алоҳида жой мавжуд бўлиши керак.

4. Майнинг ускуналарини ўрнатиш учун мўлжалланган жойнинг санитария нормалари ва қоидаларига жавоб бериши ҳамда техник хавфсизлик талабларини инобатга олган ҳолда электр энергияси таъминоти тизимининг техник созлигини таъминлаш лозим.

5. Майнинг ягона электр энергетика тизимига уланган ҳолда амалга оширилган тақдирда, истеъмол қилинадиган электр энергияси алоҳида ҳисобланишини таъминлаш мақсадида Электр энергиясини ҳисобга олиш ва назорат қилишнинг автоматлаштирилган тизимига (ЭҲНАТ) уланиш имкониятига эга бўлган, рўйхатдан ўтказилган электр энергиясини ҳисобга олиш ускунаси бўлиши шарт.

6. Иқтисодий жиноятлар, шунингдек, жиноий фаолиятдан олинган даромадларни легаллаштириш, терроризмни молиялаштириш ва оммавий қирғин қуролларини тарқатишни молиялаштириш, уюшган жиноятчилик, коррупция ва бошқарув тартибига қарши жиноятларни содир этганлик учун гумонланаётган ёки судланганлиги олиб ташланмаган ёхуд судланганлик ҳолати тугалланмаган шахслар томонидан резидентни бошқаришга йўл қўйилмайди.

7. Резидентнинг устав капиталида эгаси ва (ёки) якуний бенефициар мулкдори сифатида қуйидаги шахсларнинг иштирок этишига йўл қўйилмайди:

(а) мазкур талаб ва шартларнинг 6-бандида кўрсатилган шахслар;

(б) жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролини тарқатишни молиялаштиришга қарши курашиш соҳасида халқаро ҳамкорликда иштирок этмаётган давлатларда рўйхатдан ўтган компаниялар ҳамда доимий яшаётган, турган ёки рўйхатга олинган шахсларнинг бўлишига (иштирок этишига).

8. Яширин майнинг, аноним крипто-активлар майнингини ҳамда муқаддам муомалада бўлган крипто-активларни муомалага киритишга йўл қўйилмайди.

9. Крипто-активлар айланмаси соҳасидаги қонунчилик ҳужжатлари талабларига риоя қилиш керак.

10. Крипто-активлар айланмаси соҳасидаги ваколатли органнинг талабига мувофиқ фаолият тўғрисидаги маълумотларни бепул тақдим қилиш лозим.

11. Махсус зонада фаолият юритиш учун қонунчилик ҳужжатлари билан белгиланган ажратмаларни ўз вақтида ва тўлиқ тўлаш шарт.

Ўзбекистон Республикаси Президентининг 2026 йил 17 апрелдаги ПҚ-143-сон қарорига 2-ИЛОВА

Ўзбекистон Республикаси Президентининг ва Ўзбекистон Республикаси Ҳукуматининг айрим қарорларига киритилаётган ўзгартириш ва қўшимчалар

1. Ўзбекистон Республикаси Президентининг 2018 йил 3 июлдаги «Ўзбекистон Республикасида рақамли иқтисодиётни ва крипто-активлар айланмаси соҳасини ривожлантириш чора-тадбирлари тўғрисида»ги ПҚ-3832-сон қарорида :

(а) 1-банднинг иккинчи хатбошисидан «(турли крипто-активларда янги бирликлар ва комиссия йиғимлари форматида мукофот олиш имконини берадиган тақсимлаш платформасини таъминлаш ва янги блоклар яратиш бўйича фаолият)» сўзлари чиқариб ташлансин;

(б) 3-бандда :

(i) «в» кичик банд қуйидаги таҳрирда баён этилсин:

«в) майнинг бу ҳисоблаш операцияларини бажариш орқали маълумотларнинг тақсимланган реестрини юритиш, блокларнинг яхлитлигини яратиш ва тасдиқлаш фаолиятидир.

Майнинг фақат юридик шахс томонидан қуёш фотоэлектр станциялари орқали ишлаб чиқарилган электр энергиясидан фойдаланган ҳолда амалга оширилади, «Besqala Mining Valley» махсус майнинг зонаси ҳудудида амалга ошириладиган майнинг бундан мустасно.

Ягона электр энергетика тизимига уланган ҳолда электр энергиядан фойдаланилган тақдирда:

истеъмол қилинган электр энергияси учун тўловлар белгиланган тарифга нисбатан 2 баробар ўсувчи коэффициентга мувофиқ тўланади, бундан Ўзбекистон Республикаси Президентининг 2025 йил 22 октябрдаги «Сунъий интеллект технологияларини янада ривожлантиришга оид қўшимча чора-тадбирлар тўғрисида»ги ПФ-189-сон Фармонига 1-иловада назарда тутилган ҳолатлар мустасно;

тиғиз даврда истеъмол қилинган электр энергия учун тегишли тарифларга Вазирлар Маҳкамаси томонидан белгиланадиган устамалар қўлланилади;

истеъмол қилинган электр энергиясининг ҳисоби алоҳида ҳисоблагич ўрнатилган ҳолда юритилади.

Майнинг Агентлик томонидан мажбурий рўйхатдан ўтказилади ва лицензияланадиган фаолият турига кирмайди.

Майнинг билан шуғулланувчи шахслар (майнерлар) қонунчилик ҳужжатларида белгиланган тартибда рўйхатдан ўтишлари шарт.

Майнерларни рўйхатдан ўтказиш фақат Интернет тармоғи орқали электрон шаклда амалга оширилади.

Майнерлар ўз фаолиятини фақат рўйхатга олинган пайтда кўрсатилган манзилда, ёнғин хавфсизлиги ҳамда санитария нормалари ва қоидаларига риоя қилган ҳолда амалга ошириши лозим»;

(ii) «д» кичик банд қуйидаги таҳрирда баён этилсин:

«д) 2023 йил 1 январдан бошлаб Ўзбекистон Республикаси фуқаролари ва юридик шахслари крипто-активларни сотиб олиш, сотиш ва (ёки) айирбошлаш бўйича операцияларни фақат миллий провайдерлар орқали белгиланган тартибда амалга оширади, қонунчилик ҳужжатларида белгиланган ҳоллар бундан мустасно»;

(iii) «и» кичик банд қуйидаги таҳрирда баён этилсин:

«и) хизматлар провайдерлари фаолиятига қўйиладиган лицензия талаблари ва шартлари қуйидагилардан иборат:

Ўзбекистон Республикаси ҳудудидаги серверларда жойлашган электрон платформа ва (ёки) техник ҳамда дастурий воситалар мажмуининг мавжудлиги;

крипто-активлар билан боғлиқ барча операциялар бўйича маълумотларни, платформа иштирокчиларининг идентификация маълумотларини, хизматлар провайдерларининг платформа иштирокчилари билан муносабатларига оид материалларни (шу жумладан, платформа иштирокчилари ўртасида), шу жумладан, иш ёзишмаларини беш йил давомида сақлаш;

крипто-активлар айланмаси, жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролларининг тарқалишини молиялаштиришга қарши курашиш ҳамда шахсга доир маълумотларни сақлаш ва улардан фойдаланиш соҳасидаги Ўзбекистон Республикаси қонунчилик ҳужжатлари талабларига риоя қилиш;

крипто-активлар айланмаси соҳасидаги рекламага қўйиладиган, шу жумладан, крипто-активлардан фойдаланиш билан боғлиқ фаолиятнинг самарадорлиги (даромади) ҳақида ваъдалар бериш, крипто-активлар билан битимларни тузиш бойишнинг енгил усули эканлиги ҳақидаги маълумотларни тарқатиш тақиқланганлиги ҳамда крипто-активлар Ўзбекистон Республикаси ҳудудида тўлов ёки тўловни қабул қилиш воситаси (қонунчилик ҳужжатларида белгиланган ҳоллар бундан мустасно) сифатида қўлланилиши мумкин эмаслиги ҳақидаги талабларга риоя қилиш;

аноним крипто-активлар билан операцияларни амалга оширмаслик;

платформа фаолиятини амалга ошириш билан боғлиқ маълумотларни ваколатли органнинг сўровига биноан бепул тақдим этиш;

жисмоний ва юридик шахсларга, шу жумладан, норезидентларга, лицензиатнинг устав капиталидаги улушини реализация қилишни лицензияловчи орган билан келишиш;

лицензиатнинг раҳбарияти (директор ва унинг ўринбосарлари), шунингдек, жиноий фаолиятдан олинган даромадларни легаллаштириш, терроризм, оммавий қирғин қуролларини тарқатиш, уларни молиялаштиришга қарши курашиш бўйича таркибий бўлинма раҳбарини алмаштириш масаласини лицензияловчи орган билан келишиш;

қонунчилик ҳужжатларига мувофиқ бошқа талаблар.

Қуйидагилар крипто-биржаларга қўйиладиган қўшимча лицензия талаблари ва шартлари ҳисобланади:

крипто-активларни котировкалашни уларга бўлган талаб ва таклиф асосида амалга ошириш;

ариза берилган санада пул маблағи шаклида базавий ҳисоблаш миқдорининг камида беш минг баравари миқдорида шакллантирилган устав жамғармаси (капитали) мавжудлиги, шундан уч минг бараварини Ўзбекистон Республикасининг тижорат банкида алоҳида ҳисобварақда захирага қўйиш»;

(iv) «м» кичик банд қуйидаги таҳрирда баён этилсин:

«м) крипто-активлар айланмаси соҳасидаги фаолиятни амалга ошириш учун юридик шахслар йиғим тўлайдилар. Йиғимлар Ўзбекистон Республикаси Давлат бюджети ва Агентлик ўртасида тақсимланади, қонунчилик ҳужжатларида назарда тутилган ҳоллар бундан мустасно.

Йиғимлар миқдори, уларни тўлаш ва уларнинг тақсимланиши Агентлик томонидан Ўзбекистон Республикаси Иқтисодиёт ва молия вазирлиги ва Солиқ қўмитаси билан биргаликда тасдиқланадиган тартиб асосида амалга оширилади»;

(в) 4-банд қуйидаги таҳрирда баён этилсин:

«4. Қуйидагиларга:

а) хизматлар провайдерларига:

кўрсатилган хизматлар учун, шу жумладан, крипто-активлар шаклида мукофот олиш, унинг миқдорини ва уни мижозлардан ундириш тартибини белгилаш;

Ўзбекистон Республикаси резидентлари ва норезидентлари билан крипто-активларни миллий ва хорижий валютага сотиб олиш ва (ёки) бегоналаштиришга, шунингдек, крипто-активларни бошқа крипто-активларга айирбошлашга қаратилган битимларини ташкил этиш;

б) крипто-дўконларга ўз фаолиятини фақат электрон платформа орқали амалга ошириш жараёнида мижозларининг маблағларини транзакция амалга оширилган ва маълумотларнинг тақсимланган реестрида тегишли ёзув пайдо бўлган пайтдан бошлаб Агентлик томонидан белгиланган муддатда сақлаш;

в) майнерларга майнинг натижасида олинган крипто-активларни миллий крипто-биржалар ёки хорижий платформалар орқали, шу жумладан, тўғридан-тўғри шартномалар бўйича, белгиланган тартибда сотиш ва (ёки) уларни бошқа крипто-активларга айирбошлаш ҳуқуқи берилсин. Бунда майнинг натижасида олинган крипто-активларни бошқа юқори ликвидли крипто-активларга айирбошлаш ва уларни кейинчалик миллий крипто-биржалар ёки хорижий платформалар орқали, шу жумладан, тўғридан-тўғри шартномалар асосида сотишга йўл қўйилади. Майнинг натижасида олинган (шу жумладан, бошқа юқори ликвидли крипто-активларга айирбошланган) крипто-активларни сотишдан тушган тушум мажбурий тарзда Ўзбекистон Республикасидаги банкнинг ҳисобварақларига ўтказилади»;

(г) қуйидаги мазмундаги 5-банд билан тўлдирилсин:

«5. Шундай тартиб ўрнатилсин, унга мувофиқ:

а) бир вақтнинг ўзида қуйидаги мезонлардан камида иккитаси мавжуд бўлганда, крипто-активлар билан операция (кейинги ўринларда — операция) ўтказиш жойи сифатида Ўзбекистон Республикаси тан олинади:

операциянинг бир томони Ўзбекистон Республикасининг резиденти (жисмоний ёки юридик шахс) бўлиши;

операция Ўзбекистон Республикасининг ҳудудида амалга оширилиши;

операция Ўзбекистон Республикасининг ҳудудида рўйхатдан ўтган IP-манзилдан ва (ёки) Ўзбекистон Республикасининг халқаро коди мавжуд бўлган мобил телефон рақамидан фойдаланган ҳолда амалга оширилиши;

операция бўйича ҳисоб-китоблар Ўзбекистон Республикасининг тижорат банки томонидан эмиссия қилинган банк картасидан фойдаланилганда ёки тўловларга ишлов бериш ва уларнинг клиринги Ўзбекистон Республикаси ҳудудида амалга оширилганда;

операцияни амалга ошириш учун хизматлар Ўзбекистон Республикасининг ҳудудида яшовчи мижозлар учун мўлжалланганда, шу жумладан, давлат тилида тақдим этилганда ёки реклама қилинганда;

б) Агентликка қуйидаги ваколатлар берилади:

Ўзбекистон Республикаси резидентларига крипто-активлар айланмаси соҳасида ноқонуний хизматлар кўрсатувчи хорижий юридик шахсларнинг (кейинги ўринларда — хорижий юридик шахслар) фаолиятини текшириш. Бунда ушбу текширишларга Ўзбекистон Республикасининг тадбиркорлик субъектлари фаолияти устидан давлат назорати соҳасидаги қонунчилик ҳужжатлари татбиқ этилмайди;

крипто-активлар айланмаси соҳасидаги қонунчилик ҳужжатларини бузганлик учун хорижий юридик шахсларга нисбатан жарималар қўллаш. Бунда ушбу жариманинг 50 фоизи лицензияловчи органнинг ҳисобварағига йўналтирилади»;

(д) 6-банднинг «а» ва «б» кичик бандлари қуйидаги таҳрирда баён этилсин:

«а) хизматлар провайдерларини:

террористик фаолиятда ёки оммавий қирғин қуролларини тарқатишда иштирок этган ёки иштирок этишда гумон қилинаётган шахслар томонидан;

иқтисодий жиноятлар, шунингдек, жиноий фаолиятдан олинган даромадларни легаллаштириш, терроризмни молиялаштириш ва оммавий қирғин қуролларини тарқатишни молиялаштириш, уюшган жиноятчилик, гиёҳванд моддаларнинг ноқонуний савдоси, коррупция ва ахборот технологиялари билан боғлиқ жиноятларни содир этганлик учун гумонланаётган ёки судланганлиги олиб ташланмаган ёхуд ўталмаган шахслар томонидан;

жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролини тарқатишни молиялаштиришга қарши курашиш соҳасида халқаро ҳамкорликда иштирок этмаётган давлатларда доимий яшаётган, бўлиб турган ёки рўйхатга олинган шахслар томонидан бошқариш;

б) хизматлар провайдерларининг устав жамғармасида:

ушбу банднинг «а» кичик бандида кўрсатилган шахсларнинг;

жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролини тарқатишни молиялаштиришга қарши курашиш соҳасида халқаро ҳамкорликда иштирок этмаётган давлатларда рўйхатдан ўтган компаниялар иштирок этиши».

2. Вазирлар Маҳкамасининг 2024 йил 31 майдаги 319-сон «Электр энергияси ва табиий газдан фойдаланиш қоидаларини тасдиқлаш тўғрисида»ги қарорига 1-иловада :

(а) 2-банднинг саккизинчи хатбошиси қуйидаги таҳрирда баён этилсин:

« майнинг — ҳисоблаш операцияларини бажариш орқали маълумотларнинг тақсимланган реестрини юритиш, блокларнинг яхлитлигини яратиш ва тасдиқлаш фаолиятидир»;

(б) 80-банд қуйидаги таҳрирда баён этилсин:

«80. Майнинг фақат юридик шахс томонидан қуёш фотоэлектр станциялари орқали ишлаб чиқарилган электр энергиясидан фойдаланган ҳолда амалга оширилади. Бунда «Besqala Mining Valley» махсус майнинг зонасида барча қайта тикланувчи энергия манбаларидан фойдаланишга рухсат этилади.

Майнинг учун ягона электр энергетика тизимига белгиланган тартибда рухсат олиб уланган ҳолда электр энергиясидан фойдаланган тақдирда:

истеъмолчилар истеъмол қилинган электр энергияси учун тўловларни II тариф гуруҳига нисбатан икки баравар ўсувчи коэффициентга мувофиқ тўлайдилар. Бундан Ўзбекистон Республикаси Президентининг 2025 йил22 октябрдаги «Сунъий интеллект технологияларини янада ривожлантиришга оид қўшимча чора-тадбирлар тўғрисида»ги ПФ-189-сон Фармонига 1-иловада белгиланган ҳолатлар бундан мустасно;

истеъмол қилинган электр энергиясининг ҳисоби алоҳида ҳисоблагич ўрнатилган ҳолда юритилади;

белгиланган тартибда рухсат олмасдан майнинг билан шуғулланувчи шахсларнинг ягона электр энергетика тизимига уланиш ҳолатлари аниқланганда, уларга II тариф гуруҳига нисбатан амалдаги тарифга беш баравар ўсувчи коэффициент қўлланилади».

Ўзбекистон Республикаси Президенти Ш. МИРЗИЁЕВ

Тошкент ш.,

2026 йил 17 апрель,

ПҚ-143-сон

(Қонунчилик маълумотлари миллий базаси, 20.04.2026 й., 07/26/143/0386-сон)

lex.uz

OʻZBEKISTON RESPUBLIKASI PREZIDENTINING

QARORI

TALAB VA SHARTLAR

Qoraqalpogʻiston Respublikasida maxsus mayning zonasini tashkil etish va uning faoliyatini yoʻlga qoʻyish chora-tadbirlari toʻgʻrisida

Qoraqalpogʻiston Respublikasiga investitsiyalarni jalb qilish, aholi farovonligini oshirish va mayningni amalga oshirish uchun qulay shart-sharoitlar yaratish orqali qayta tiklanuvchi energiya manbalaridan samarali foydalanish maqsadida qaror qilaman:

I. Maqsadlar

1. Quyidagilar ushbu qarorning asosiy maqsadi va ustuvor vazifalari etib belgilansin:

(a) mayning faoliyatini amalga oshirish uchun barcha turdagi qayta tiklanuvchi energiya manbalaridan foydalangan holda qulay shart-sharoitlar yaratish;

(b) Qoraqalpogʻiston Respublikasining investitsiyaviy jozibadorligini oshirish hamda yangi ishchi oʻrinlar yaratish orqali aholi daromadlarini koʻpaytirish.

II. Qoraqalpogʻiston Respublikasi hududida maxsus mayning zonasini tashkil etish boʻyicha amaliy chora-tadbirlar

2. Oʻzbekiston Respublikasi Prezidentining 2018-yil 3-iyuldagi “Oʻzbekiston Respublikasida raqamli iqtisodiyotni va kripto-aktivlar aylanmasi sohasini rivojlantirish chora-tadbirlari toʻgʻrisida”gi PQ-3832-son qaroriga muvofiq:

(a) kripto-aktivlar aylanmasi maxsus normativ-huquqiy hujjatlar bilan tartibga solinishi;

(b) mayning faqat yuridik shaxs tomonidan quyosh fotoelektr stansiyalari orqali ishlab chiqarilgan elektr energiyasidan foydalangan holda amalga oshirilishi;

(v) kripto-aktivlar aylanmasi sohasida faoliyatni amalga oshirish uchun yuridik shaxslar tomonidan yigʻimlar toʻlanishi belgilanganligi maʼlumot uchun qabul qilinsin.

3. “Besqala Mining Valley” maxsus mayning zonasi (keyingi oʻrinlarda — maxsus zona) tashkil etilsin. Bunda:

(a) maxsus zonaning hududi Qoraqalpogʻiston Respublikasining butun hududi hisoblanadi;

(b) maxsus zona doirasida quyidagilarga:

(i) mayningni amalga oshirish uchun yagona elektr energetika tizimidan va barcha turdagi qayta tiklanuvchi energiya manbalaridan, shuningdek, vodorod elektr stansiyasida ishlab chiqarilgan elektr energiyasidan foydalanishga;

(ii) mayning natijasida olingan kripto-aktivlar belgilangan tartibda milliy kripto-birjalar yoki xorijiy platformalar orqali, shu jumladan, toʻgʻridan-toʻgʻri shartnomalar asosida sotilishiga va (yoki) ularni boshqa likvidli kripto-aktivlarga ayirboshlashga;

(iii) mayning natijasida olingan (shu jumladan, boshqa yuqori likvidli kripto-aktivlarga ayirboshlangan) kripto-aktivlarni sotishdan tushgan tushumni majburiy tarzda Oʻzbekiston Respublikasidagi banklarning hisobvaraqlariga oʻtkazishga;

(iv) faqatgina Qoraqalpogʻiston Respublikasi hududida davlat roʻyxatidan oʻtgan holda faoliyat yuritayotgan yuridik shaxslar rezident boʻlishiga;

(v) rezidentlarga mayning amalga oshirish natijasida hosil boʻladigan issiqlik energiyasi hisobidan qishloq xoʻjaligiga moʻljallangan yer uchastkalarida belgilangan tartibda issiqxonalar tashkil etishga ruxsat etiladi.

4. Qoraqalpogʻiston Respublikasi Vazirlar Kengashi muassisligida masʼuliyati cheklangan jamiyat shaklida “Besqala Mining Valley” maxsus mayning zonasi direksiyasi” (keyingi oʻrinlarda — Direksiya) tashkil etilsin va Istiqbolli loyihalar milliy agentligi (keyingi oʻrinlarda — Agentlik) mayning faoliyatini amalga oshirish uchun ruxsatnomalar berish boʻyicha ishchi organ etib belgilansin.

5. Shunday tartib oʻrnatilsinki, unga muvofiq maxsus zona doirasida:

(a) talabgorlar (yuridik shaxslar) maxsus zona rezidentligini va mayning faoliyatini amalga oshirish uchun ruxsatnoma olish toʻgʻrisida ariza bilan Direksiyaga murojaat qiladi;

(b) talabgorlarning arizalari Direksiya tomonidan koʻrib chiqiladi, ijobiy xulosa berilganda:

(i) talabgorga Direksiya tomonidan maxsus zona rezidenti (keyingi oʻrinlarda — rezident) maqomi beriladi;

(ii) rezidentga mayning faoliyatini amalga oshirish uchun Agentlik tomonidan qoʻshimcha hujjatlar talab qilinmasdan ruxsatnoma beriladi;

(v) Direksiya rezidentlarni roʻyxatdan oʻtkazadi, ularning hisobini yuritadi va arizalar sifatli koʻrib chiqilishiga javobgar boʻladi.

6. Belgilansinki:

(a) 2035-yil 1-yanvarga qadar rezidentlarning mayning faoliyatini amalga oshirish bilan bogʻliq operatsiyalardan olingan daromadlari soliqlar va yigʻimlardan ozod qilinadi;

(b) maxsus zonada mayning faoliyatini amalga oshirganlik uchun rezidentlar har oyda ushbu faoliyatdan olgan daromadining 1 foizi miqdorida Direksiyaga toʻlov toʻlaydi, bunda Direksiyaning sof foydasi Qoraqalpogʻiston Respublikasi respublika budjetiga oʻtkaziladi;

(v) yagona elektr energetika tizimiga ulanish orqali elektr energiyasidan foydalanilgan taqdirda:

(i) isteʼmol qilingan elektr energiyasi uchun toʻlovlar II tarif guruhiga nisbatan ikki baravar oʻsuvchi koeffitsiyentga muvofiq toʻlanadi, bundan Oʻzbekiston Respublikasi Prezidentining 2025-yil 22-oktabrdagi “Sunʼiy intellekt texnologiyalarini yanada rivojlantirishga oid qoʻshimcha chora-tadbirlar toʻgʻrisida”gi PF-189-son Farmoniga 1-ilovada nazarda tutilgan holatlar mustasno;

(ii) isteʼmol qilingan elektr energiyasining hisobi alohida hisobga olish uskunasini oʻrnatgan holda yuritiladi;

(g) maxsus zonaning faoliyat yuritish tartibi Agentlik tomonidan belgilanadi.

7. Agentlik Iqtisodiyot va moliya vazirligi hamda Qoraqalpogʻiston Respublikasi Vazirlar Kengashi bilan birgalikda ikki oy muddatda mazkur qarorning 6-bandi “a” kichik bandidan kelib chiqib, Soliq kodeksiga oʻzgartirish va qoʻshimchalar kiritishni nazarda tutuvchi qonun loyihasini Vazirlar Mahkamasiga kiritsin.

8. Energetika vazirligi, Togʻ-kon sanoati va geologiya vazirligi hamda Agentlikning salohiyatli investorlar tomonidan maxsus zona hududida norentabel, past debitli, qazib chiqarilishi kamayib borayotgan, shuningdek, uglevodorodlarni yetkazib berishning transport tizimi mavjud boʻlmagan yoki eskirgan konlarni yanada oʻzlashtirish, saqlash va jihozlash orqali elektr energiyasini ishlab chiqarish va undan mayningni amalga oshirish uchun foydalanish boʻyicha loyihani hayotga tatbiq etish toʻgʻrisidagi taklifiga rozilik berilsin.

9. Energetika vazirligi Agentlik bilan birgalikda ikki oy muddatda norentabel, past debitli, qazib chiqarilishi kamayib borayotgan, shuningdek, uglevodorodlarni yetkazib berishning transport tizimi mavjud boʻlmagan yoki eskirgan konlarni investorlarga mayningni amalga oshirish uchun foydalanishga berish toʻgʻrisidagi tartib ishlab chiqilishi va tasdiqlanishini taʼminlasin.

10. “Besqala Mining Valley” maxsus mayning zonasi rezidenti sifatida roʻyxatdan oʻtkazish uchun asosiy talab va shartlar 1-ilovaga muvofiq tasdiqlansin.

11. Qoraqalpogʻiston Respublikasi Vazirlar Kengashi bir oy muddatda:

(a) Direksiyaning tashkil etilishi, davlat roʻyxatidan oʻtkazilishi va joylashtirish uchun joy ajratilishini;

(b) Energetika vazirligi, boshqa vazirlik va idoralar bilan birgalikda Qoraqalpogʻiston Respublikasida mayning amalga oshirish uchun qayta tiklanuvchi energiya manbalari qurilmalarini oʻrnatish maqsadida yer uchastkalari ajratishning soddalashtirilgan tartibini joriy qilish boʻyicha Vazirlar Mahkamasiga takliflar kiritilishini taʼminlasin.

12. Oʻzbekiston Respublikasi Prezidentining va Oʻzbekiston Respublikasi Hukumatining ayrim qarorlariga 2-ilovaga muvofiq oʻzgartirish va qoʻshimchalar kiritilsin.

13. Agentlik ikki oy muddatda:

(a) “Besqala Mining Valley” maxsus mayning zonasi va rezidentlarni roʻyxatdan oʻtkazish hamda ularning faoliyatini amalga oshirish tartibi toʻgʻrisidagi nizomni ishlab chiqsin va tasdiqlasin;

(b) Qoraqalpogʻiston Respublikasi Vazirlar Kengashi, boshqa vazirlik va idoralar bilan birgalikda qonunchilik hujjatlariga ushbu qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

III. Qaror ijrosini tashkil etish, taʼminlash va nazorat

14. Qaror ijrosini samarali tashkil qilishga masʼul va shaxsan javobgar etib Qoraqalpogʻiston Respublikasi Vazirlar Kengashi Raisi F.U. Ermanov belgilansin.

15. Qaror ijrosini nazorat qilish Oʻzbekiston Respublikasi Bosh vaziri A.N. Aripov zimmasiga yuklansin.

Oʻzbekiston Respublikasi Prezidentining 2026-yil 17-apreldagi PQ-143-son qaroriga 1-ILOVA

“Besqala Mining Valley” maxsus mayning zonasi rezidenti sifatida roʻyxatdan oʻtkazish uchun asosiy

1. Yuridik shaxs Qoraqalpogʻiston Respublikasi hududida davlat roʻyxatidan oʻtgan boʻlishi kerak.

2. Mayningni faqat roʻyxatga olingan paytda koʻrsatilgan manzilda amalga oshirish lozim.

3. Mayning uskunalarini oʻrnatish uchun moʻljallangan alohida joy mavjud boʻlishi kerak.

4. Mayning uskunalarini oʻrnatish uchun moʻljallangan joyning sanitariya normalari va qoidalariga javob berishi hamda texnik xavfsizlik talablarini inobatga olgan holda elektr energiyasi taʼminoti tizimining texnik sozligini taʼminlash lozim.

5. Mayning yagona elektr energetika tizimiga ulangan holda amalga oshirilgan taqdirda, isteʼmol qilinadigan elektr energiyasi alohida hisoblanishini taʼminlash maqsadida Elektr energiyasini hisobga olish va nazorat qilishning avtomatlashtirilgan tizimiga (EHNAT) ulanish imkoniyatiga ega boʻlgan, roʻyxatdan oʻtkazilgan elektr energiyasini hisobga olish uskunasi boʻlishi shart.

6. Iqtisodiy jinoyatlar, shuningdek, jinoiy faoliyatdan olingan daromadlarni legallashtirish, terrorizmni moliyalashtirish va ommaviy qirgʻin qurollarini tarqatishni moliyalashtirish, uyushgan jinoyatchilik, korrupsiya va boshqaruv tartibiga qarshi jinoyatlarni sodir etganlik uchun gumonlanayotgan yoki sudlanganligi olib tashlanmagan yoxud sudlanganlik holati tugallanmagan shaxslar tomonidan rezidentni boshqarishga yoʻl qoʻyilmaydi.

7. Rezidentning ustav kapitalida egasi va (yoki) yakuniy benefitsiar mulkdori sifatida quyidagi shaxslarning ishtirok etishiga yoʻl qoʻyilmaydi:

(a) mazkur talab va shartlarning 6-bandida koʻrsatilgan shaxslar;

(b) jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirgʻin qurolini tarqatishni moliyalashtirishga qarshi kurashish sohasida xalqaro hamkorlikda ishtirok etmayotgan davlatlarda roʻyxatdan oʻtgan kompaniyalar hamda doimiy yashayotgan, turgan yoki roʻyxatga olingan shaxslarning boʻlishiga (ishtirok etishiga).

8. Yashirin mayning, anonim kripto-aktivlar mayningini hamda muqaddam muomalada boʻlgan kripto-aktivlarni muomalaga kiritishga yoʻl qoʻyilmaydi.

9. Kripto-aktivlar aylanmasi sohasidagi qonunchilik hujjatlari talablariga rioya qilish kerak.

10. Kripto-aktivlar aylanmasi sohasidagi vakolatli organning talabiga muvofiq faoliyat toʻgʻrisidagi maʼlumotlarni bepul taqdim qilish lozim.

11. Maxsus zonada faoliyat yuritish uchun qonunchilik hujjatlari bilan belgilangan ajratmalarni oʻz vaqtida va toʻliq toʻlash shart.

Oʻzbekiston Respublikasi Prezidentining 2026-yil 17-apreldagi PQ-143-son qaroriga 2-ILOVA

Oʻzbekiston Respublikasi Prezidentining va Oʻzbekiston Respublikasi Hukumatining ayrim qarorlariga kiritilayotgan oʻzgartirish va qoʻshimchalar

1. Oʻzbekiston Respublikasi Prezidentining 2018-yil 3-iyuldagi “Oʻzbekiston Respublikasida raqamli iqtisodiyotni va kripto-aktivlar aylanmasi sohasini rivojlantirish chora-tadbirlari toʻgʻrisida”gi PQ-3832-son qarorida :

(a) 1-bandning ikkinchi xatboshisidan “(turli kripto-aktivlarda yangi birliklar va komissiya yigʻimlari formatida mukofot olish imkonini beradigan taqsimlash platformasini taʼminlash va yangi bloklar yaratish boʻyicha faoliyat)” soʻzlari chiqarib tashlansin;

(b) 3-bandda :

(i) “v” kichik band quyidagi tahrirda bayon etilsin:

“v) mayning bu hisoblash operatsiyalarini bajarish orqali maʼlumotlarning taqsimlangan reyestrini yuritish, bloklarning yaxlitligini yaratish va tasdiqlash faoliyatidir.

Mayning faqat yuridik shaxs tomonidan quyosh fotoelektr stansiyalari orqali ishlab chiqarilgan elektr energiyasidan foydalangan holda amalga oshiriladi, “Besqala Mining Valley” maxsus mayning zonasi hududida amalga oshiriladigan mayning bundan mustasno.

Yagona elektr energetika tizimiga ulangan holda elektr energiyadan foydalanilgan taqdirda:

isteʼmol qilingan elektr energiyasi uchun toʻlovlar belgilangan tarifga nisbatan 2 barobar oʻsuvchi koeffitsiyentga muvofiq toʻlanadi, bundan Oʻzbekiston Respublikasi Prezidentining 2025-yil 22-oktabrdagi “Sunʼiy intellekt texnologiyalarini yanada rivojlantirishga oid qoʻshimcha chora-tadbirlar toʻgʻrisida”gi PF-189-son Farmoniga 1-ilovada nazarda tutilgan holatlar mustasno;

tigʻiz davrda isteʼmol qilingan elektr energiya uchun tegishli tariflarga Vazirlar Mahkamasi tomonidan belgilanadigan ustamalar qoʻllaniladi;

isteʼmol qilingan elektr energiyasining hisobi alohida hisoblagich oʻrnatilgan holda yuritiladi.

Mayning Agentlik tomonidan majburiy roʻyxatdan oʻtkaziladi va litsenziyalanadigan faoliyat turiga kirmaydi.

Mayning bilan shugʻullanuvchi shaxslar (maynerlar) qonunchilik hujjatlarida belgilangan tartibda roʻyxatdan oʻtishlari shart.

Maynerlarni roʻyxatdan oʻtkazish faqat Internet tarmogʻi orqali elektron shaklda amalga oshiriladi.

Maynerlar oʻz faoliyatini faqat roʻyxatga olingan paytda koʻrsatilgan manzilda, yongʻin xavfsizligi hamda sanitariya normalari va qoidalariga rioya qilgan holda amalga oshirishi lozim”;

(ii) “d” kichik band quyidagi tahrirda bayon etilsin:

“d) 2023-yil 1-yanvardan boshlab Oʻzbekiston Respublikasi fuqarolari va yuridik shaxslari kripto-aktivlarni sotib olish, sotish va (yoki) ayirboshlash boʻyicha operatsiyalarni faqat milliy provayderlar orqali belgilangan tartibda amalga oshiradi, qonunchilik hujjatlarida belgilangan hollar bundan mustasno”;

(iii) “i” kichik band quyidagi tahrirda bayon etilsin:

“i) xizmatlar provayderlari faoliyatiga qoʻyiladigan litsenziya talablari va shartlari quyidagilardan iborat:

Oʻzbekiston Respublikasi hududidagi serverlarda joylashgan elektron platforma va (yoki) texnik hamda dasturiy vositalar majmuining mavjudligi;

kripto-aktivlar bilan bogʻliq barcha operatsiyalar boʻyicha maʼlumotlarni, platforma ishtirokchilarining identifikatsiya maʼlumotlarini, xizmatlar provayderlarining platforma ishtirokchilari bilan munosabatlariga oid materiallarni (shu jumladan, platforma ishtirokchilari oʻrtasida), shu jumladan, ish yozishmalarini besh yil davomida saqlash;

kripto-aktivlar aylanmasi, jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirgʻin qurollarining tarqalishini moliyalashtirishga qarshi kurashish hamda shaxsga doir maʼlumotlarni saqlash va ulardan foydalanish sohasidagi Oʻzbekiston Respublikasi qonunchilik hujjatlari talablariga rioya qilish;

kripto-aktivlar aylanmasi sohasidagi reklamaga qoʻyiladigan, shu jumladan, kripto-aktivlardan foydalanish bilan bogʻliq faoliyatning samaradorligi (daromadi) haqida vaʼdalar berish, kripto-aktivlar bilan bitimlarni tuzish boyishning yengil usuli ekanligi haqidagi maʼlumotlarni tarqatish taqiqlanganligi hamda kripto-aktivlar Oʻzbekiston Respublikasi hududida toʻlov yoki toʻlovni qabul qilish vositasi (qonunchilik hujjatlarida belgilangan hollar bundan mustasno) sifatida qoʻllanilishi mumkin emasligi haqidagi talablarga rioya qilish;

anonim kripto-aktivlar bilan operatsiyalarni amalga oshirmaslik;

platforma faoliyatini amalga oshirish bilan bogʻliq maʼlumotlarni vakolatli organning soʻroviga binoan bepul taqdim etish;

jismoniy va yuridik shaxslarga, shu jumladan, norezidentlarga, litsenziatning ustav kapitalidagi ulushini realizatsiya qilishni litsenziyalovchi organ bilan kelishish;

litsenziatning rahbariyati (direktor va uning oʻrinbosarlari), shuningdek, jinoiy faoliyatdan olingan daromadlarni legallashtirish, terrorizm, ommaviy qirgʻin qurollarini tarqatish, ularni moliyalashtirishga qarshi kurashish boʻyicha tarkibiy boʻlinma rahbarini almashtirish masalasini litsenziyalovchi organ bilan kelishish;

qonunchilik hujjatlariga muvofiq boshqa talablar.

Quyidagilar kripto-birjalarga qoʻyiladigan qoʻshimcha litsenziya talablari va shartlari hisoblanadi:

kripto-aktivlarni kotirovkalashni ularga boʻlgan talab va taklif asosida amalga oshirish;

ariza berilgan sanada pul mablagʻi shaklida bazaviy hisoblash miqdorining kamida besh ming baravari miqdorida shakllantirilgan ustav jamgʻarmasi (kapitali) mavjudligi, shundan uch ming baravarini Oʻzbekiston Respublikasining tijorat bankida alohida hisobvaraqda zaxiraga qoʻyish”;

(iv) “m” kichik band quyidagi tahrirda bayon etilsin:

“m) kripto-aktivlar aylanmasi sohasidagi faoliyatni amalga oshirish uchun yuridik shaxslar yigʻim toʻlaydilar. Yigʻimlar Oʻzbekiston Respublikasi Davlat budjeti va Agentlik oʻrtasida taqsimlanadi, qonunchilik hujjatlarida nazarda tutilgan hollar bundan mustasno.

Yigʻimlar miqdori, ularni toʻlash va ularning taqsimlanishi Agentlik tomonidan Oʻzbekiston Respublikasi Iqtisodiyot va moliya vazirligi va Soliq qoʻmitasi bilan birgalikda tasdiqlanadigan tartib asosida amalga oshiriladi”;

(v) 4-band quyidagi tahrirda bayon etilsin:

“4. Quyidagilarga:

a) xizmatlar provayderlariga:

koʻrsatilgan xizmatlar uchun, shu jumladan, kripto-aktivlar shaklida mukofot olish, uning miqdorini va uni mijozlardan undirish tartibini belgilash;

Oʻzbekiston Respublikasi rezidentlari va norezidentlari bilan kripto-aktivlarni milliy va xorijiy valyutaga sotib olish va (yoki) begonalashtirishga, shuningdek, kripto-aktivlarni boshqa kripto-aktivlarga ayirboshlashga qaratilgan bitimlarini tashkil etish;

b) kripto-doʻkonlarga oʻz faoliyatini faqat elektron platforma orqali amalga oshirish jarayonida mijozlarining mablagʻlarini tranzaksiya amalga oshirilgan va maʼlumotlarning taqsimlangan reyestrida tegishli yozuv paydo boʻlgan paytdan boshlab Agentlik tomonidan belgilangan muddatda saqlash;

v) maynerlarga mayning natijasida olingan kripto-aktivlarni milliy kripto-birjalar yoki xorijiy platformalar orqali, shu jumladan, toʻgʻridan-toʻgʻri shartnomalar boʻyicha, belgilangan tartibda sotish va (yoki) ularni boshqa kripto-aktivlarga ayirboshlash huquqi berilsin. Bunda mayning natijasida olingan kripto-aktivlarni boshqa yuqori likvidli kripto-aktivlarga ayirboshlash va ularni keyinchalik milliy kripto-birjalar yoki xorijiy platformalar orqali, shu jumladan, toʻgʻridan-toʻgʻri shartnomalar asosida sotishga yoʻl qoʻyiladi. Mayning natijasida olingan (shu jumladan, boshqa yuqori likvidli kripto-aktivlarga ayirboshlangan) kripto-aktivlarni sotishdan tushgan tushum majburiy tarzda Oʻzbekiston Respublikasidagi bankning hisobvaraqlariga oʻtkaziladi”;

(g) quyidagi mazmundagi 5-band bilan toʻldirilsin:

“5. Shunday tartib oʻrnatilsin, unga muvofiq:

a) bir vaqtning oʻzida quyidagi mezonlardan kamida ikkitasi mavjud boʻlganda, kripto-aktivlar bilan operatsiya (keyingi oʻrinlarda — operatsiya) oʻtkazish joyi sifatida Oʻzbekiston Respublikasi tan olinadi:

operatsiyaning bir tomoni Oʻzbekiston Respublikasining rezidenti (jismoniy yoki yuridik shaxs) boʻlishi;

operatsiya Oʻzbekiston Respublikasining hududida amalga oshirilishi;

operatsiya Oʻzbekiston Respublikasining hududida roʻyxatdan oʻtgan IP-manzildan va (yoki) Oʻzbekiston Respublikasining xalqaro kodi mavjud boʻlgan mobil telefon raqamidan foydalangan holda amalga oshirilishi;

operatsiya boʻyicha hisob-kitoblar Oʻzbekiston Respublikasining tijorat banki tomonidan emissiya qilingan bank kartasidan foydalanilganda yoki toʻlovlarga ishlov berish va ularning kliringi Oʻzbekiston Respublikasi hududida amalga oshirilganda;

operatsiyani amalga oshirish uchun xizmatlar Oʻzbekiston Respublikasining hududida yashovchi mijozlar uchun moʻljallanganda, shu jumladan, davlat tilida taqdim etilganda yoki reklama qilinganda;

b) Agentlikka quyidagi vakolatlar beriladi:

Oʻzbekiston Respublikasi rezidentlariga kripto-aktivlar aylanmasi sohasida noqonuniy xizmatlar koʻrsatuvchi xorijiy yuridik shaxslarning (keyingi oʻrinlarda — xorijiy yuridik shaxslar) faoliyatini tekshirish. Bunda ushbu tekshirishlarga Oʻzbekiston Respublikasining tadbirkorlik subyektlari faoliyati ustidan davlat nazorati sohasidagi qonunchilik hujjatlari tatbiq etilmaydi;

kripto-aktivlar aylanmasi sohasidagi qonunchilik hujjatlarini buzganlik uchun xorijiy yuridik shaxslarga nisbatan jarimalar qoʻllash. Bunda ushbu jarimaning 50 foizi litsenziyalovchi organning hisobvaragʻiga yoʻnaltiriladi”;

(d) 6-bandning “a” va “b” kichik bandlari quyidagi tahrirda bayon etilsin:

“a) xizmatlar provayderlarini:

terroristik faoliyatda yoki ommaviy qirgʻin qurollarini tarqatishda ishtirok etgan yoki ishtirok etishda gumon qilinayotgan shaxslar tomonidan;

iqtisodiy jinoyatlar, shuningdek, jinoiy faoliyatdan olingan daromadlarni legallashtirish, terrorizmni moliyalashtirish va ommaviy qirgʻin qurollarini tarqatishni moliyalashtirish, uyushgan jinoyatchilik, giyohvand moddalarning noqonuniy savdosi, korrupsiya va axborot texnologiyalari bilan bogʻliq jinoyatlarni sodir etganlik uchun gumonlanayotgan yoki sudlanganligi olib tashlanmagan yoxud oʻtalmagan shaxslar tomonidan;

jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirgʻin qurolini tarqatishni moliyalashtirishga qarshi kurashish sohasida xalqaro hamkorlikda ishtirok etmayotgan davlatlarda doimiy yashayotgan, boʻlib turgan yoki roʻyxatga olingan shaxslar tomonidan boshqarish;

b) xizmatlar provayderlarining ustav jamgʻarmasida:

ushbu bandning “a” kichik bandida koʻrsatilgan shaxslarning;

jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirgʻin qurolini tarqatishni moliyalashtirishga qarshi kurashish sohasida xalqaro hamkorlikda ishtirok etmayotgan davlatlarda roʻyxatdan oʻtgan kompaniyalar ishtirok etishi”.

2. Vazirlar Mahkamasining 2024-yil 31-maydagi 319-son “Elektr energiyasi va tabiiy gazdan foydalanish qoidalarini tasdiqlash toʻgʻrisida”gi qaroriga 1-ilovada :

(a) 2-bandning sakkizinchi xatboshisi quyidagi tahrirda bayon etilsin:

“ mayning — hisoblash operatsiyalarini bajarish orqali maʼlumotlarning taqsimlangan reyestrini yuritish, bloklarning yaxlitligini yaratish va tasdiqlash faoliyatidir”;

(b) 80-band quyidagi tahrirda bayon etilsin:

“80. Mayning faqat yuridik shaxs tomonidan quyosh fotoelektr stansiyalari orqali ishlab chiqarilgan elektr energiyasidan foydalangan holda amalga oshiriladi. Bunda “Besqala Mining Valley” maxsus mayning zonasida barcha qayta tiklanuvchi energiya manbalaridan foydalanishga ruxsat etiladi.

Mayning uchun yagona elektr energetika tizimiga belgilangan tartibda ruxsat olib ulangan holda elektr energiyasidan foydalangan taqdirda:

isteʼmolchilar isteʼmol qilingan elektr energiyasi uchun toʻlovlarni II tarif guruhiga nisbatan ikki baravar oʻsuvchi koeffitsiyentga muvofiq toʻlaydilar. Bundan Oʻzbekiston Respublikasi Prezidentining 2025-yil22-oktabrdagi “Sunʼiy intellekt texnologiyalarini yanada rivojlantirishga oid qoʻshimcha chora-tadbirlar toʻgʻrisida”gi PF-189-son Farmoniga 1-ilovada belgilangan holatlar bundan mustasno;

isteʼmol qilingan elektr energiyasining hisobi alohida hisoblagich oʻrnatilgan holda yuritiladi;

belgilangan tartibda ruxsat olmasdan mayning bilan shugʻullanuvchi shaxslarning yagona elektr energetika tizimiga ulanish holatlari aniqlanganda, ularga II tarif guruhiga nisbatan amaldagi tarifga besh baravar oʻsuvchi koeffitsiyent qoʻllaniladi”.

Oʻzbekiston Respublikasi Prezidenti Sh. MIRZIYOYEV

Toshkent sh.,

2026-yil 17-aprel,

PQ-143-son

(Qonunchilik maʼlumotlari milliy bazasi, 20.04.2026-y., 07/26/143/0386-son)

lex.uz