UzbekAI

Ўзбекистон Республикаси Президентининг

ҚАРОРИ

РЎЙХАТИ

МАНЗИЛЛИ РЎЙХАТИ

Самарқанд вилоятида машинасозлик саноатини ривожлантириш чора-тадбирлари тўғрисида

Ҳудудларда машинасозлик саноатини ривожлантириш, шунингдек, юқори технологияли ишлаб чиқаришларни ташкил этиш орқали аҳоли бандлиги ва фаровонлигини таъминлаш мақсадида қарор қиламан:

I. Мақсадлар

1. Қуйидагилар мазкур қарорнинг асосий мақсадлари этиб белгилансин:

(а) Самарқанд вилоятида машинасозлик кластерини ривожлантириш, вилоят саноатида машинасозлик тармоғининг улушини 2030 йилгача 15 фоизга, саноатда қўшилган қиймат улушини 40 фоизга етказиш;

(б) мазкур қарорга мувофиқ ташкил этиладиган машинасозлик саноат зонасида йиллик 10 минг дона тижорат транспорт воситалари (юк автомобиллари, автобус, микроавтобус, пикап ва махсус транспорт воситалари, шу жумладан, электрда ҳаракатланувчи) ишлаб чиқариш қувватларини яратиш;

(в) эҳтиёт қисмлар ва бутловчи буюмлар ишлаб чиқариш ҳамда саноат кооперацияси асосида йиллик «маҳаллий контент» ҳажмини 100 млн АҚШ долларигача етказиш;

(г) машинасозлик саноат зонасида ишлаб чиқарилган техникалар экспорти бўйича Марказий Осиё ва МДҲ давлатлари бозорларини ўзлаштириш, 2 мингдан ортиқ юқори даромадли иш ўринлари яратиш.

II. Машинасозлик саноат зонасини ташкил этиш

2. Иқтисодиёт ва молия вазирлиги ҳамда Самарқанд вилояти ҳокимлигининг Каттақўрғон тумани ҳудудининг 100 гектар ер майдонида Машинасозлик саноат зонасини ташкил этиш тўғрисидаги таклифига розилик берилсин.

3. Белгилансинки:

(а) Машинасозлик саноат зонаси иштирокчилари сифатида фақат N, M2, M3, O ва L тоифага кирувчи транспорт воситалари ҳамда улар учун эҳтиёт қисмлар ва бутловчи буюмлар ишлаб чиқаришни ташкил этувчи корхоналар рўйхатдан ўтказилади;

(б) Машинасозлик саноат зонасининг фаолияти «Самарқанд вилояти саноат зоналарини бошқариш дирекцияси» давлат муассасаси томонидан бошқарилади.

4. Самарқанд вилояти ҳокимлиги:

(а) Машинасозлик саноат зонасини ташкил этиш учун ўрнатилган тартибда 1-иловага мувофиқ ажратиладиган контурларда 100 гектар ер майдонини қишлоқ хўжалигига мўлжалланган ерлар тоифасидан саноат, транспорт, алоқа, мудофаа ва бошқа мақсадларга мўлжалланган ерлар тоифасига ўтказиш бўйича Қишлоқ хўжалигига мўлжалланган ва ўрмон фонди ерларининг ер фонди тоифаларини ўзгартириш масалаларини кўриб чиқиш бўйича Ҳукумат комиссиясига таклиф киритиш;

(б) ер фонди тоифаси ўзгартирилиши муносабати билан юзага келадиган қишлоқ хўжалиги ишлаб чиқариши нобудгарчиликларининг ўрни белгиланган тартибда қопланишини таъминлаш;

(в) Давлат активларини бошқариш агентлиги билан биргаликда 100 гектар ер майдонининг ер фонди тоифаси ўзгартирилгандан сўнг ер участкаларини лотларга бўлган ҳолда реализация қилишда N, M2, M3, O ва L тоифага кирувчи транспорт воситалари ҳамда улар учун эҳтиёт қисмлар ва бутловчи буюмлар ишлаб чиқариш мақсадида ушбу ер участкаларини ижара ҳуқуқи асосида электрон онлайн аукцион савдоларига чиқариш чораларини кўрсин.

5. Машинасозлик саноат зонасида хорижий ҳамкорлар томонидан дастлабки босқичда 116 млн АҚШ доллари миқдоридаги 5 та инвестиция лойиҳасини амалга ошириш бўйича таклифлар келиб тушганлиги маълумот учун қабул қилинсин.

6. Машинасозлик саноат зонасида амалга ошириладиган инвестиция лойиҳаларининг манзилли рўйхати 2-иловага мувофиқ маъқуллансин.

III. Машинасозлик саноат зонасини зарур инфратузилма ва малакали кадрлар билан таъминлаш чоралари

7. Самарқанд вилояти ҳокимлиги:

(а) бир ой муддатда Машинасозлик саноат зонасининг бош режаси ишлаб чиқилишини ҳамда Қурилиш ва уй-жой коммунал хўжалиги вазирлиги билан келишган ҳолда тасдиқланишини таъминласин. Бунда бош режа лойиҳаси Самарқанд вилояти ҳокимлиги ҳузуридаги Самарқанд вилоятини ривожлантириш жамғармаси маблағлари ҳисобидан ишлаб чиқилади;

(б) Автомобиль йўллари қўмитаси, «Ўзбекистон темир йўллари» АЖ, «Ҳудудий электр тармоқлари» АЖ, «Ҳудудгазтаъминот» АЖ ва «Ўзсувтаъминот» АЖ билан биргаликда Машинасозлик саноат зонасининг бош режаси тасдиқлангандан сўнг бир ой муддатда ушбу бош режага асосан 2026-2027 йилларда муҳандислик-коммуникация, автомобиль ва темир йўл инфратузилмаси билан таъминлаш лозим бўлган объектлар рўйхатини шакллантирсин ва тасдиқласин.

8. Белгилансинки, Машинасозлик саноат зонасининг муҳандислик-коммуникация, автомобиль ва темир йўл инфратузилмасини:

(а) қуриш ишлари Ўзбекистон Республикаси Президентининг 2020 йил 18 декабрдаги «Ҳудудларда муҳандислик-коммуникация инфратузилмасини янада ривожлантириш чора-тадбирлари тўғрисида»ги ПҚ-4929-сон қарорига мувофиқ молиялаштирилади;

(б) қуриш ишлари бўйича буюртмачи вазифаси Ўзбекистон Республикаси Президентининг 2021 йил 30 апрелдаги «Махсус иқтисодий ва кичик саноат зоналари муҳандислик-коммуникация инфратузилмасини янада ривожлантириш чора-тадбирлари тўғрисида»ги ПҚ-5101-сон қарорида белгиланган ташкилотлар томонидан амалга оширилади.

9. Самарқанд вилояти саноат зоналарини бошқариш дирекцияси, Машинасозлик саноат зонаси иштирокчилари билан биргаликда:

(а) ишлаб чиқаришни ташкил этиш билан бир вақтда камида 3 йиллик маҳаллий кадрлар тайёрлаш дастурини ишлаб чиқсин;

(б) ҳар йили иш ўринларининг камида 5 фоизи миқдорида дуал таълим асосида тайёрлашни таъминласин.

IV. Қарор ижросини таъминлаш ва назорат

10. Самарқанд вилояти ҳокимлиги Иқтисодиёт ва молия вазирлиги билан биргаликда лойиҳалар тўлиқ ишга туширилгунга қадар тасдиқланган лойиҳа-смета ҳужжатларидаги иш ҳажмининг бажарилганлиги ва самарадорлигини мониторинг қилсин ва натижаси бўйича ҳар ярим йилда Вазирлар Маҳкамасига ахборот киритиб борсин.

11. Мазкур қарор ижросини самарали ташкил қилишга масъул ва шахсий жавобгар этиб Бош вазир ўринбосари Ж.А. Қўчқоров ва Самарқанд вилояти ҳокими А.М. Бобоев белгилансин.

12. Қарор ижросига масъул идоралар фаолиятини мувофиқлаштириш ва назорат қилиш Ўзбекистон Республикаси Бош вазири А.Н. Арипов зиммасига юклансин.

Ўзбекистон Республикаси Президентининг 2026 йил 20 апрелдаги ПҚ-145-сон қарорига 1-ИЛОВА

Самарқанд вилояти Каттақўрғон тумани ҳудудидаги қишлоқ хўжалигига мўлжалланган ерлар тоифасидан саноат, транспорт, алоқа, мудофаа ва бошқа мақсадларга мўлжалланган ерлар тоифасига ўтказилиши таклиф этилаётган ер участкалари

T/р Ҳудуд номи Ердан фойдаланувчи номи Контур рақами * Жами ер майдони, га * Шундан: Ўтказилаётган ер фонди тоифаси суғориладиган ерлар лалми, яйлов ва бошқа ерлар 1 . Каттақўрғон тумани «Янгиҳаёт» массиви ҳудуди Каттақўрғон тумани ҳокимлиги захирасида 149қ 16,5 - 16,5 Саноат, транспорт, алоқа, мудофаа ва бошқа мақсадларга мўлжалланган ерлар 2 . 150қ 16,5 - 16,5 3 . 151қ 35,2 - 35,2 4 . 152қ 27,2 - 27,2 5 . 159қ 4,6 - 4,6 Жами: 100,0 х 100,0 х

Ўзбекистон Республикаси Президентининг 2026 йил 20 апрелдаги ПҚ-145-сон қарорига 2-ИЛОВА

Машинасозлик саноат зонасида амалга ошириладиган инвестиция лойиҳаларининг

Т/р Лойиҳанинг номи Лойиҳа қуввати Лойиҳа қиймати * ( м лн доллар ) шундан, таъсисчиларнинг ўз маблағлари ( млн доллар ) Иш ўрни Ишга тушиш муддати Зарур ер майдони **** ( га ) ЖАМИ: 116,0 46,0 1050 70 1. Тижорат транспорт воситалари (юк автомобиллари, автобус, микроавтобус, пикап ва махсус транспорт воситалари) ишлаб чиқаришни ташкил этиш *** 5 минг дона 4 0,0 30,0 400 2029 йил декабрь 30 Тижорат транспорт воситалари ишлаб чиқаришни кенгайтириш 5 минг дона 45,0 ** 300 2031 йил декабрь 2. Мототранспорт воситалари ва болалар аравачаларини ишлаб чиқариш 50 минг дона 17 ,0 10,0 200 2028 йил июнь 12 3. Тижорат техникалари учун осма ва тиркама техникалар ишлаб чиқариш 5 минг дона 5 ,0 3,0 50 2028 йил декабрь 10 4. Тижорат техникалари учун гидравлика ускуналари ва тизимлари ишлаб чиқариш 5 минг дона 7 ,0 2,0 50 2029 йил март 8 5. Транспорт-логистика хизматлари ва юкларни қайта ишлаш бўйича замонавий логистика марказини ташкил этиш 200 минг тонна 2,0 1,0 50 2028 йил март 10

Ўзбекистон Республикаси Президенти Ш. МИРЗИЁЕВ

Тошкент ш.,

2026 йил 20 апрель,

ПҚ-145-сон

(Қонунчилик маълумотлари миллий базаси, 20.04.2026 й., 07/26/145/0388-сон)

lex.uz

Oʻzbekiston Respublikasi Prezidentining

QARORI

ROʻYXATI

MANZILLI ROʻYXATI

Samarqand viloyatida mashinasozlik sanoatini rivojlantirish chora-tadbirlari toʻgʻrisida

Hududlarda mashinasozlik sanoatini rivojlantirish, shuningdek, yuqori texnologiyali ishlab chiqarishlarni tashkil etish orqali aholi bandligi va farovonligini taʼminlash maqsadida qaror qilaman:

I. Maqsadlar

1. Quyidagilar mazkur qarorning asosiy maqsadlari etib belgilansin:

(a) Samarqand viloyatida mashinasozlik klasterini rivojlantirish, viloyat sanoatida mashinasozlik tarmogʻining ulushini 2030-yilgacha 15 foizga, sanoatda qoʻshilgan qiymat ulushini 40 foizga yetkazish;

(b) mazkur qarorga muvofiq tashkil etiladigan mashinasozlik sanoat zonasida yillik 10 ming dona tijorat transport vositalari (yuk avtomobillari, avtobus, mikroavtobus, pikap va maxsus transport vositalari, shu jumladan, elektrda harakatlanuvchi) ishlab chiqarish quvvatlarini yaratish;

(v) ehtiyot qismlar va butlovchi buyumlar ishlab chiqarish hamda sanoat kooperatsiyasi asosida yillik “mahalliy kontent” hajmini 100 mln AQSH dollarigacha yetkazish;

(g) mashinasozlik sanoat zonasida ishlab chiqarilgan texnikalar eksporti boʻyicha Markaziy Osiyo va MDH davlatlari bozorlarini oʻzlashtirish, 2 mingdan ortiq yuqori daromadli ish oʻrinlari yaratish.

II. Mashinasozlik sanoat zonasini tashkil etish

2. Iqtisodiyot va moliya vazirligi hamda Samarqand viloyati hokimligining Kattaqoʻrgʻon tumani hududining 100 gektar yer maydonida Mashinasozlik sanoat zonasini tashkil etish toʻgʻrisidagi taklifiga rozilik berilsin.

3. Belgilansinki:

(a) Mashinasozlik sanoat zonasi ishtirokchilari sifatida faqat N, M2, M3, O va L toifaga kiruvchi transport vositalari hamda ular uchun ehtiyot qismlar va butlovchi buyumlar ishlab chiqarishni tashkil etuvchi korxonalar roʻyxatdan oʻtkaziladi;

(b) Mashinasozlik sanoat zonasining faoliyati “Samarqand viloyati sanoat zonalarini boshqarish direksiyasi” davlat muassasasi tomonidan boshqariladi.

4. Samarqand viloyati hokimligi:

(a) Mashinasozlik sanoat zonasini tashkil etish uchun oʻrnatilgan tartibda 1-ilovaga muvofiq ajratiladigan konturlarda 100 gektar yer maydonini qishloq xoʻjaligiga moʻljallangan yerlar toifasidan sanoat, transport, aloqa, mudofaa va boshqa maqsadlarga moʻljallangan yerlar toifasiga oʻtkazish boʻyicha Qishloq xoʻjaligiga moʻljallangan va oʻrmon fondi yerlarining yer fondi toifalarini oʻzgartirish masalalarini koʻrib chiqish boʻyicha Hukumat komissiyasiga taklif kiritish;

(b) yer fondi toifasi oʻzgartirilishi munosabati bilan yuzaga keladigan qishloq xoʻjaligi ishlab chiqarishi nobudgarchiliklarining oʻrni belgilangan tartibda qoplanishini taʼminlash;

(v) Davlat aktivlarini boshqarish agentligi bilan birgalikda 100 gektar yer maydonining yer fondi toifasi oʻzgartirilgandan soʻng yer uchastkalarini lotlarga boʻlgan holda realizatsiya qilishda N, M2, M3, O va L toifaga kiruvchi transport vositalari hamda ular uchun ehtiyot qismlar va butlovchi buyumlar ishlab chiqarish maqsadida ushbu yer uchastkalarini ijara huquqi asosida elektron onlayn auksion savdolariga chiqarish choralarini koʻrsin.

5. Mashinasozlik sanoat zonasida xorijiy hamkorlar tomonidan dastlabki bosqichda 116 mln AQSH dollari miqdoridagi 5 ta investitsiya loyihasini amalga oshirish boʻyicha takliflar kelib tushganligi maʼlumot uchun qabul qilinsin.

6. Mashinasozlik sanoat zonasida amalga oshiriladigan investitsiya loyihalarining manzilli roʻyxati 2-ilovaga muvofiq maʼqullansin.

III. Mashinasozlik sanoat zonasini zarur infratuzilma va malakali kadrlar bilan taʼminlash choralari

7. Samarqand viloyati hokimligi:

(a) bir oy muddatda Mashinasozlik sanoat zonasining bosh rejasi ishlab chiqilishini hamda Qurilish va uy-joy kommunal xoʻjaligi vazirligi bilan kelishgan holda tasdiqlanishini taʼminlasin. Bunda bosh reja loyihasi Samarqand viloyati hokimligi huzuridagi Samarqand viloyatini rivojlantirish jamgʻarmasi mablagʻlari hisobidan ishlab chiqiladi;

(b) Avtomobil yoʻllari qoʻmitasi, “Oʻzbekiston temir yoʻllari” AJ, “Hududiy elektr tarmoqlari” AJ, “Hududgaztaʼminot” AJ va “Oʻzsuvtaʼminot” AJ bilan birgalikda Mashinasozlik sanoat zonasining bosh rejasi tasdiqlangandan soʻng bir oy muddatda ushbu bosh rejaga asosan 2026-2027-yillarda muhandislik-kommunikatsiya, avtomobil va temir yoʻl infratuzilmasi bilan taʼminlash lozim boʻlgan obyektlar roʻyxatini shakllantirsin va tasdiqlasin.

8. Belgilansinki, Mashinasozlik sanoat zonasining muhandislik-kommunikatsiya, avtomobil va temir yoʻl infratuzilmasini:

(a) qurish ishlari Oʻzbekiston Respublikasi Prezidentining 2020-yil 18-dekabrdagi “Hududlarda muhandislik-kommunikatsiya infratuzilmasini yanada rivojlantirish chora-tadbirlari toʻgʻrisida”gi PQ-4929-son qaroriga muvofiq moliyalashtiriladi;

(b) qurish ishlari boʻyicha buyurtmachi vazifasi Oʻzbekiston Respublikasi Prezidentining 2021-yil 30-apreldagi “Maxsus iqtisodiy va kichik sanoat zonalari muhandislik-kommunikatsiya infratuzilmasini yanada rivojlantirish chora-tadbirlari toʻgʻrisida”gi PQ-5101-son qarorida belgilangan tashkilotlar tomonidan amalga oshiriladi.

9. Samarqand viloyati sanoat zonalarini boshqarish direksiyasi, Mashinasozlik sanoat zonasi ishtirokchilari bilan birgalikda:

(a) ishlab chiqarishni tashkil etish bilan bir vaqtda kamida 3 yillik mahalliy kadrlar tayyorlash dasturini ishlab chiqsin;

(b) har yili ish oʻrinlarining kamida 5 foizi miqdorida dual taʼlim asosida tayyorlashni taʼminlasin.

IV. Qaror ijrosini taʼminlash va nazorat

10. Samarqand viloyati hokimligi Iqtisodiyot va moliya vazirligi bilan birgalikda loyihalar toʻliq ishga tushirilgunga qadar tasdiqlangan loyiha-smeta hujjatlaridagi ish hajmining bajarilganligi va samaradorligini monitoring qilsin va natijasi boʻyicha har yarim yilda Vazirlar Mahkamasiga axborot kiritib borsin.

11. Mazkur qaror ijrosini samarali tashkil qilishga masʼul va shaxsiy javobgar etib Bosh vazir oʻrinbosari J.A. Qoʻchqorov va Samarqand viloyati hokimi A.M. Boboyev belgilansin.

12. Qaror ijrosiga masʼul idoralar faoliyatini muvofiqlashtirish va nazorat qilish Oʻzbekiston Respublikasi Bosh vaziri A.N. Aripov zimmasiga yuklansin.

Oʻzbekiston Respublikasi Prezidentining 2026-yil 20-apreldagi PQ-145-son qaroriga 1-ILOVA

Samarqand viloyati Kattaqoʻrgʻon tumani hududidagi qishloq xoʻjaligiga moʻljallangan yerlar toifasidan sanoat, transport, aloqa, mudofaa va boshqa maqsadlarga moʻljallangan yerlar toifasiga oʻtkazilishi taklif etilayotgan yer uchastkalari

T/r Hudud nomi Yerdan foydalanuvchi nomi Kontur raqami * Jami yer maydoni, ga * Shundan: Oʻtkazilayotgan yer fondi toifasi sugʻoriladigan yerlar lalmi, yaylov va boshqa yerlar 1 . Kattaqoʻrgʻon tumani “Yangihayot” massivi hududi Kattaqoʻrgʻon tumani hokimligi zaxirasida 149q 16,5 - 16,5 Sanoat, transport, aloqa, mudofaa va boshqa maqsadlarga moʻljallangan yerlar 2 . 150q 16,5 - 16,5 3 . 151q 35,2 - 35,2 4 . 152q 27,2 - 27,2 5 . 159q 4,6 - 4,6 Jami: 100,0 x 100,0 x

Oʻzbekiston Respublikasi Prezidentining 2026-yil 20-apreldagi PQ-145-son qaroriga 2-ILOVA

Mashinasozlik sanoat zonasida amalga oshiriladigan investitsiya loyihalarining

T/r Loyihaning nomi Loyiha quvvati Loyiha qiymati * ( m ln dollar ) shundan, taʼsischilarning oʻz mablagʻlari ( mln dollar ) Ish oʻrni Ishga tushish muddati Zarur yer maydoni **** ( ga ) JAMI: 116,0 46,0 1050 70 1. Tijorat transport vositalari (yuk avtomobillari, avtobus, mikroavtobus, pikap va maxsus transport vositalari) ishlab chiqarishni tashkil etish *** 5 ming dona 4 0,0 30,0 400 2029-yil dekabr 30 Tijorat transport vositalari ishlab chiqarishni kengaytirish 5 ming dona 45,0 ** 300 2031-yil dekabr 2. Mototransport vositalari va bolalar aravachalarini ishlab chiqarish 50 ming dona 17 ,0 10,0 200 2028-yil iyun 12 3. Tijorat texnikalari uchun osma va tirkama texnikalar ishlab chiqarish 5 ming dona 5 ,0 3,0 50 2028-yil dekabr 10 4. Tijorat texnikalari uchun gidravlika uskunalari va tizimlari ishlab chiqarish 5 ming dona 7 ,0 2,0 50 2029-yil mart 8 5. Transport-logistika xizmatlari va yuklarni qayta ishlash boʻyicha zamonaviy logistika markazini tashkil etish 200 ming tonna 2,0 1,0 50 2028-yil mart 10

Oʻzbekiston Respublikasi Prezidenti Sh. MIRZIYOYEV

Toshkent sh.,

2026-yil 20-aprel,

PQ-145-son

(Qonunchilik maʼlumotlari milliy bazasi, 20.04.2026-y., 07/26/145/0388-son)

lex.uz