📅 2026-yil 30-aprel · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2026 йил 30 апрель · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 30 апреля 2026 г. · Постановления Кабинета Министров
Официальный текст. Официальный документ. Редакционные примечания не включены.
📅 30 April 2026 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Қизириқ тумани 3-сон техникумини ташкил этиш тўғрисида
Ўзбекистон Республикаси Президентининг «Касбий таълим тизимида ислоҳотларни амалга ошириш чора-тадбирлари тўғрисида» 2025 йил 23 октябрдаги ПҚ-316-сон қарорига мувофиқ Сурхондарё вилоятида умумий ўрта таълим мактаблари битирувчиларини касбий таълим билан қамраб олишни кенгайтириш, ёшларга касб ва мутахассисликларни эгаллаши учун қулай шароитлар яратиш, ҳудуднинг ижтимоий-иқтисодий ривожланиш тенденциясига мос ўрта бўғин кадрларини тайёрлаш мақсадида Вазирлар Маҳкамаси қарор қилади:
1. Сурхондарё вилояти Қизириқ туманидаги собиқ Қизириқ иқтисодиёт коллежи негизида Қизириқ тумани 3-сон техникуми (кейинги ўринларда — техникум) ташкил этилсин.
Техникум Сурхондарё вилояти Қизириқ тумани «Янгиҳаёт» МФЙ Боғбонлар кўчаси 2-уй манзилидаги собиқ Қизириқ иқтисодиёт коллежининг бино ва иншоотларига оператив бошқариш ҳуқуқи асосида жойлаштирилсин.
2. Белгилаб қўйилсинки:
техникум Олий таълим, фан ва инновациялар вазирлиги ҳузуридаги Касбий таълим агентлиги тизимида фаолият юритувчи давлат муассасаси шаклидаги касбий таълим ташкилоти ҳисобланади ҳамда унинг фаолияти амалдаги касбий таълим ташкилотларини молиялаштириш тартиби асосида ва қонунчилик ҳужжатларида тақиқланмаган бошқа манбалар ҳисобидан молиялаштирилади;
техникумга умумий ўрта таълим ташкилотларининг битирувчилари белгиланган тартибда давлат гранти ва тўлов-контракт асосида ўқишга қабул қилинади ҳамда ўқув жараёни бошланғич, ўрта ва ўрта махсус касбий таълим дастурлари асосида ташкил этилади;
техникумда ички ва ташқи меҳнат бозори эҳтиёжлари, иш берувчи ташкилотларнинг таклифлари ҳамда Вазирлар Маҳкамаси ҳузуридаги Миграция агентлиги буюртмаси асосида касб ва хорижий тилларни ўқитишга мўлжалланган қисқа муддатли курслар ташкил этилади.
3. Техникумнинг асосий вазифалари этиб қуйидагилар белгилансин:
иқтисодиёт тармоқларида ўрта бўғин кадрларига талаб юқори бўлган касб ва мутахассисликлар бўйича кадрлар тайёрлаш;
ўрта бўғин кадрлари тайёрлашда ички ва ташқи меҳнат бозорида таклифларни ўрганиш, таълим ва ишлаб чиқариш интеграциясини таъминлаш ҳамда дуал таълим шаклида кадрлар тайёрлашни кенгайтириш;
кадрлар тайёрлаш жараёнига корхона ва ташкилотларнинг соҳа мутахассислари, малакали хорижий мутахассислар ҳамда олий таълим ташкилотларининг профессор-ўқитувчиларини жалб қилиш;
қўшма ва халқаро таълим дастурларини жорий қилиш орқали ташқи меҳнат бозори эҳтиёжи асосида кадрлар тайёрлашни кенгайтириш;
меҳнат бозорида талаб юқори бўлган касблар бўйича ишсиз ва банд бўлмаган аҳолини қисқа муддатли касбларга ҳамда хорижий тилларга ўқитиш;
тегишли касбий таълим даражалари бўйича кадрлар тайёрлаш учун зарур моддий-техник ва ўқув-методик базани яратиш.
4. Олий таълим, фан ва инновациялар вазирлиги:
а) икки ой муддатда техникумда ўқув жараёнини ташкил этиш, таълим сифатини таъминлаш ва ўқувчилар учун зарур шарт-шароитларни яратиш бўйича чора-тадбирлар дастурини ишлаб чиқсин;
б) техникумни ўқув-лаборатория жиҳозлари ва ўқув устахоналарини замонавий асбоб-ускуналар билан таъминлашда сунъий интеллект ҳамда «яшил» иқтисодиёт тенденцияларини инобатга олсин;
в) 2026 йил 1 майга қадар:
техникумнинг уставини тасдиқласин ҳамда унинг белгиланган тартибда давлат рўйхатидан ўтказилишини таъминласин;
2026/2027 ўқув йили учун Иқтисодиёт ва молия вазирлиги билан келишилган ҳолда Сурхондарё вилояти Касбий таълимни ривожлантириш ҳудудий тадбиркорлар кенгаши таклифи асосида техникумга ўқувчиларни қабул қилиш параметрларини белгиланган тартибда тасдиқласин;
ўқувчиларни қабул қилиш параметрларига мос равишда юқори малакали педагогларни ишга қабул қилишни ташкил этсин;
г) Мактабгача ва мактаб таълими вазирлиги билан биргаликда ҳар йили апрель-май ойларида «Касб ва ёшлар» очиқ мулоқот ойлигида умумий ўрта таълим ташкилотларининг битирувчиларини техникумдаги мавжуд касбларга йўналтириш чораларини кўрсин;
д) техникум биносини капитал таъмирлаш ва замонавий жиҳозлар билан таъминлаш учун Касбий таълимни ривожлантириш жамғармаси ҳисобидан зарурий маблағларни ажратсин.
5. Сурхондарё вилояти ҳокимлиги:
2026 йил 1 октябрдан бошлаб Вазирлар Маҳкамаси ҳузуридаги Миграция агентлиги билан биргаликда техникумга ўқишга қабул қилинган, хорижда ишлаш истагида бўлган ўқувчиларни хорижий иш берувчиларнинг талабларидан келиб чиқиб, инглиз, немис, корейс, япон ва рус тилларига ўқитишни йўлга қўйсин.
Бунда ўқитиш харажатлари Вазирлар Маҳкамаси ҳузуридаги Миграция агентлигининг Миграция жамғармаси маблағлари ҳисобидан қопланади;
2027/2028 ўқув йилидан бошлаб Олий таълим, фан ва инновациялар вазирлиги билан биргаликда техникумда халқаро таълим дастурларини жорий қилиш чораларини кўрсин;
ҳар йили 1 майга қадар Камбағалликни қисқартириш ва бандлик вазирлиги билан биргаликда техникум битирувчиларининг бандлигини таъминлашга қаратилган дастурларни ишлаб чиқсин ҳамда уларнинг ижросини таъминласин;
ҳар йили июль-август ойларида техникум битирувчилари учун иш берувчиларни жалб қилган ҳолда, ярмаркалар, шу жумладан, «Карьера куни» тадбирларини ўтказсин, ўқув йили давомида корхона ва ташкилотларда тасдиқланган режа-график асосида «Очиқ эшиклар куни»ни ташкил қилсин.
6. Белгилаб қўйилсинки, бюджет маблағлари ҳисобидан ушбу қарорда кўзда тутилган тадбирлар 2026 йилда Сурхондарё вилояти маҳаллий бюджет маблағлари доирасида молиялаштирилади, 2027 йилдан бошлаб эса бюджет қонунчилиги талабларига мувофиқ тақдим этилган бюджет сўровномаларига асосан Давлат бюджети параметрларида назарда тутилади.
7. Олий таълим, фан ва инновациялар вазирлиги манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни икки ой муддатда ушбу қарорга мувофиқлаштирсин.
8. Ушбу қарорнинг бажарилишини назорат қилиш Ўзбекистон Республикаси олий таълим, фан ва инновациялар вазири К.А. Шарипов ҳамда Сурхондарё вилояти ҳокими У.Б. Қосимов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2026 йил 30 апрель,
217-сон
Oʻzbekiston Respublikasi Vazirlar Mahkamasining
qarori
Qiziriq tumani 3-son texnikumini tashkil etish toʻgʻrisida
Oʻzbekiston Respublikasi Prezidentining “Kasbiy taʼlim tizimida islohotlarni amalga oshirish chora-tadbirlari toʻgʻrisida” 2025-yil 23-oktabrdagi PQ-316-son qaroriga muvofiq Surxondaryo viloyatida umumiy oʻrta taʼlim maktablari bitiruvchilarini kasbiy taʼlim bilan qamrab olishni kengaytirish, yoshlarga kasb va mutaxassisliklarni egallashi uchun qulay sharoitlar yaratish, hududning ijtimoiy-iqtisodiy rivojlanish tendensiyasiga mos oʻrta boʻgʻin kadrlarini tayyorlash maqsadida Vazirlar Mahkamasi qaror qiladi:
1. Surxondaryo viloyati Qiziriq tumanidagi sobiq Qiziriq iqtisodiyot kolleji negizida Qiziriq tumani 3-son texnikumi (keyingi oʻrinlarda — texnikum) tashkil etilsin.
Texnikum Surxondaryo viloyati Qiziriq tumani “Yangihayot” MFY Bogʻbonlar koʻchasi 2-uy manzilidagi sobiq Qiziriq iqtisodiyot kollejining bino va inshootlariga operativ boshqarish huquqi asosida joylashtirilsin.
2. Belgilab qoʻyilsinki:
texnikum Oliy taʼlim, fan va innovatsiyalar vazirligi huzuridagi Kasbiy taʼlim agentligi tizimida faoliyat yurituvchi davlat muassasasi shaklidagi kasbiy taʼlim tashkiloti hisoblanadi hamda uning faoliyati amaldagi kasbiy taʼlim tashkilotlarini moliyalashtirish tartibi asosida va qonunchilik hujjatlarida taqiqlanmagan boshqa manbalar hisobidan moliyalashtiriladi;
texnikumga umumiy oʻrta taʼlim tashkilotlarining bitiruvchilari belgilangan tartibda davlat granti va toʻlov-kontrakt asosida oʻqishga qabul qilinadi hamda oʻquv jarayoni boshlangʻich, oʻrta va oʻrta maxsus kasbiy taʼlim dasturlari asosida tashkil etiladi;
texnikumda ichki va tashqi mehnat bozori ehtiyojlari, ish beruvchi tashkilotlarning takliflari hamda Vazirlar Mahkamasi huzuridagi Migratsiya agentligi buyurtmasi asosida kasb va xorijiy tillarni oʻqitishga moʻljallangan qisqa muddatli kurslar tashkil etiladi.
3. Texnikumning asosiy vazifalari etib quyidagilar belgilansin:
iqtisodiyot tarmoqlarida oʻrta boʻgʻin kadrlariga talab yuqori boʻlgan kasb va mutaxassisliklar boʻyicha kadrlar tayyorlash;
oʻrta boʻgʻin kadrlari tayyorlashda ichki va tashqi mehnat bozorida takliflarni oʻrganish, taʼlim va ishlab chiqarish integratsiyasini taʼminlash hamda dual taʼlim shaklida kadrlar tayyorlashni kengaytirish;
kadrlar tayyorlash jarayoniga korxona va tashkilotlarning soha mutaxassislari, malakali xorijiy mutaxassislar hamda oliy taʼlim tashkilotlarining professor-oʻqituvchilarini jalb qilish;
qoʻshma va xalqaro taʼlim dasturlarini joriy qilish orqali tashqi mehnat bozori ehtiyoji asosida kadrlar tayyorlashni kengaytirish;
mehnat bozorida talab yuqori boʻlgan kasblar boʻyicha ishsiz va band boʻlmagan aholini qisqa muddatli kasblarga hamda xorijiy tillarga oʻqitish;
tegishli kasbiy taʼlim darajalari boʻyicha kadrlar tayyorlash uchun zarur moddiy-texnik va oʻquv-metodik bazani yaratish.
4. Oliy taʼlim, fan va innovatsiyalar vazirligi:
a) ikki oy muddatda texnikumda oʻquv jarayonini tashkil etish, taʼlim sifatini taʼminlash va oʻquvchilar uchun zarur shart-sharoitlarni yaratish boʻyicha chora-tadbirlar dasturini ishlab chiqsin;
b) texnikumni oʻquv-laboratoriya jihozlari va oʻquv ustaxonalarini zamonaviy asbob-uskunalar bilan taʼminlashda sunʼiy intellekt hamda “yashil” iqtisodiyot tendensiyalarini inobatga olsin;
v) 2026-yil 1-mayga qadar:
texnikumning ustavini tasdiqlasin hamda uning belgilangan tartibda davlat roʻyxatidan oʻtkazilishini taʼminlasin;
2026/2027 oʻquv yili uchun Iqtisodiyot va moliya vazirligi bilan kelishilgan holda Surxondaryo viloyati Kasbiy taʼlimni rivojlantirish hududiy tadbirkorlar kengashi taklifi asosida texnikumga oʻquvchilarni qabul qilish parametrlarini belgilangan tartibda tasdiqlasin;
oʻquvchilarni qabul qilish parametrlariga mos ravishda yuqori malakali pedagoglarni ishga qabul qilishni tashkil etsin;
g) Maktabgacha va maktab taʼlimi vazirligi bilan birgalikda har yili aprel-may oylarida “Kasb va yoshlar” ochiq muloqot oyligida umumiy oʻrta taʼlim tashkilotlarining bitiruvchilarini texnikumdagi mavjud kasblarga yoʻnaltirish choralarini koʻrsin;
d) texnikum binosini kapital taʼmirlash va zamonaviy jihozlar bilan taʼminlash uchun Kasbiy taʼlimni rivojlantirish jamgʻarmasi hisobidan zaruriy mablagʻlarni ajratsin.
5. Surxondaryo viloyati hokimligi:
2026-yil 1-oktabrdan boshlab Vazirlar Mahkamasi huzuridagi Migratsiya agentligi bilan birgalikda texnikumga oʻqishga qabul qilingan, xorijda ishlash istagida boʻlgan oʻquvchilarni xorijiy ish beruvchilarning talablaridan kelib chiqib, ingliz, nemis, koreys, yapon va rus tillariga oʻqitishni yoʻlga qoʻysin.
Bunda oʻqitish xarajatlari Vazirlar Mahkamasi huzuridagi Migratsiya agentligining Migratsiya jamgʻarmasi mablagʻlari hisobidan qoplanadi;
2027/2028 oʻquv yilidan boshlab Oliy taʼlim, fan va innovatsiyalar vazirligi bilan birgalikda texnikumda xalqaro taʼlim dasturlarini joriy qilish choralarini koʻrsin;
har yili 1-mayga qadar Kambagʻallikni qisqartirish va bandlik vazirligi bilan birgalikda texnikum bitiruvchilarining bandligini taʼminlashga qaratilgan dasturlarni ishlab chiqsin hamda ularning ijrosini taʼminlasin;
har yili iyul-avgust oylarida texnikum bitiruvchilari uchun ish beruvchilarni jalb qilgan holda, yarmarkalar, shu jumladan, “Karyera kuni” tadbirlarini oʻtkazsin, oʻquv yili davomida korxona va tashkilotlarda tasdiqlangan reja-grafik asosida “Ochiq eshiklar kuni”ni tashkil qilsin.
6. Belgilab qoʻyilsinki, budjet mablagʻlari hisobidan ushbu qarorda koʻzda tutilgan tadbirlar 2026-yilda Surxondaryo viloyati mahalliy budjet mablagʻlari doirasida moliyalashtiriladi, 2027-yildan boshlab esa budjet qonunchiligi talablariga muvofiq taqdim etilgan budjet soʻrovnomalariga asosan Davlat budjeti parametrlarida nazarda tutiladi.
7. Oliy taʼlim, fan va innovatsiyalar vazirligi manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtirsin.
8. Ushbu qarorning bajarilishini nazorat qilish Oʻzbekiston Respublikasi oliy taʼlim, fan va innovatsiyalar vaziri K.A. Sharipov hamda Surxondaryo viloyati hokimi U.B. Qosimov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2026-yil 30-aprel,
217-son