📅 2026-yil 12-may · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2026 йил 12 май · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 12 мая 2026 г. · Постановления Кабинета Министров
Официальный текст. Официальный документ. Редакционные примечания не включены.
📅 12 May 2026 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
«Лазги ва Авесто» музейи фаолиятини ташкил этиш чора-тадбирлари тўғрисида
Мамлакатимиздаги музейлар фаолиятини қўллаб-қувватлаш, ЮНЕСКО томонидан инсониятнинг номоддий маданий мероси рўйхатига киритилган «Хоразм лазги рақси» санъати ҳамда Авесто мероси тарихини ўрганиш ва тарғиб қилиш, шунингдек, ноёб экспонатларни намойиш этиш орқали фуқароларда, айниқса, ёш авлодда миллий ва умуминсоний қадриятлар, бебаҳо тарихий ва маданий меросга ҳурмат, ғурур ва ифтихор, Ватанга садоқат ва муҳаббат туйғуларини кучайтириш мақсадида Вазирлар Маҳкамаси қарор қилади:
1. Маданий мерос агентлиги ва Хоразм вилояти ҳокимлигининг Урганч шаҳри Хонқа кўчаси 7-уй манзилидаги бинода «Лазги ва Авесто» музейини (кейинги ўринларда — музей) Ўзбекистон замонавий санъат музейининг филиали сифатида ташкил этиш тўғрисидаги таклифи маъқуллансин.
2. Қуйидагилар Музейнинг асосий вазифалари этиб белгилансин:
музейда халқимизнинг бой маданий меросини, унинг инсоният тарихидаги ролини ҳаққоний ёритиш;
музей фондида сақланаётган музей ашёлари ва музей коллекцияларини асраб-авайлаш, бойитиб бориш, намойиш этиш, дунё жамоатчилигига танитиш ва тарғиб этиш;
музейдаги ноёб экспонатлар орқали фуқароларни, айниқса, ёш авлодни миллий ва умуминсоний қадриятлар, бебаҳо тарихий ва маданий меросга ҳурмат руҳида тарбиялаш, уларда ғурур ва ифтихор, Ватанга садоқат ва муҳаббат туйғуларини кучайтириш;
музей экспозицияларини ташкил этишда замонавий ахборот технологияларидан кенг фойдаланиш;
жаҳон музейшунослиги тажрибасидан фойдаланиш учун зарур шарт-шароитлар яратиш, музейлар билан кўргазмалар ташкил этиш борасида ўзаро манфаатли ҳамкорлик алоқаларини мустаҳкамлаш.
3. Қуйидагилар музей фаолиятини молиялаштириш манбалари этиб белгилансин:
Хоразм вилояти маҳаллий бюджети маблағлари;
ўз фаолиятидан тушадиган даромадлар;
жисмоний ва юридик шахсларнинг ҳомийлик хайриялари;
қонунчилик ҳужжатлари билан тақиқланмаган бошқа манбалар.
4. Белгилаб қўйилсинки:
музейни сақлаш, шу жумладан, ходимлар меҳнатига ҳақ тўлаш билан боғлиқ харажатлар 2026 йилда Хоразм вилояти маҳаллий бюджети параметрларида назарда тутилган маблағлар доирасида молиялаштирилади, 2027 йилдан бошлаб эса Хоразм вилояти маҳаллий бюджети параметрларида назарда тутилади;
Музейга штат бирликларини ажратиш ҳамда ходимлар меҳнатига ҳақ тўлаш Маданий мерос агентлиги тизимидаги музейлар учун белгиланган тартибга мувофиқ амалга оширилади.
5. Хоразм вилояти ҳокимлиги 2026 йил 1 июлга қадар музей биносида таъмирлаш ишларини якунлаш, экспозиция яратиш, моддий-техник базани такомиллаштириш ҳамда музейни фойдаланишга топшириш бўйича зарур чоралар кўрсин.
6. Маданий мерос агентлиги Хоразм вилояти ҳокимлиги ҳамда манфаатдор вазирлик ва идоралар билан биргаликда:
музейнинг штатлар жадвалини белгиланган тартибда тасдиқлаш ҳамда уни малакали кадрлар билан тўлдириш;
музейга маҳаллий ва хорижий сайёҳларни кенг жалб этиш;
музейга замонавий ахборот-коммуникация технологияларини кенг жорий этиш, музей фонди ҳамда экспозициясини тегишли музей ашёлари билан тўлдириш чораларини кўрсин.
7. Ўзбекистон Миллий телерадиокомпанияси ва Ўзбекистон Миллий ахборот агентлигига оммавий ахборот воситаларида музей фаолиятини кенг ёритиш тавсия этилсин.
8. Вазирлар Маҳкамасининг 2017 йил 11 декабрдаги 975-сон қарори билан тасдиқланган Ўзбекистон Республикаси Давлат бюджети ҳисобидан молиялаштириладиган давлат музейлари, уларнинг филиал ва бўлимлари рўйхатига иловага мувофиқ ўзгартириш киритилсин.
9. Ушбу қарорнинг бажарилишини назорат қилиш Ўзбекистон Республикаси Маданий мерос агентлиги директори Б.Г. Абдикаримов ҳамда Хоразм вилояти ҳокими Ж.Р. Рахимов зиммасига юклансин.
Вазирлар Маҳкамасининг 2026 йил 12 майдаги 241-сон қарорига ИЛОВА
Вазирлар Маҳкамасининг 2017 йил 11 декабрдаги 975-сон қарори билан тасдиқланган Ўзбекистон Республикаси Давлат бюджети ҳисобидан молиялаштириладиган давлат музейлари, уларнинг филиал ва бўлимлари рўйхатига киритилаётган ўзгартириш
«Қорақалпоғистон Республикаси бюджети, вилоятлар ва Тошкент шаҳар маҳаллий бюджетларидан молиялаштириладиган музейлар» бўлимининг 21-позицияси қуйидаги таҳрирда баён этилсин:
« 21. Ўзбекистон замонавий санъати музейи ва унинг қуйидаги филиаллари: Урганч шаҳри «Хоразм тарихи ва маданияти» музейи * Урганч шаҳри Комилжон Отаниёзов уй-музейи Урганч шаҳри Урганч шаҳар тарихи музейи Урганч шаҳри «Лазги ва Авесто» музейи* Урганч шаҳри ».
Ўзбекистон Республикасининг Бош вазири А. АРИПОВ
Тошкент ш.,
2026 йил 12 май,
241 -сон
Oʻzbekiston Respublikasi Vazirlar Mahkamasining
qarori
“Lazgi va Avesto” muzeyi faoliyatini tashkil etish chora-tadbirlari toʻgʻrisida
Mamlakatimizdagi muzeylar faoliyatini qoʻllab-quvvatlash, YUNESKO tomonidan insoniyatning nomoddiy madaniy merosi roʻyxatiga kiritilgan “Xorazm lazgi raqsi” sanʼati hamda Avesto merosi tarixini oʻrganish va targʻib qilish, shuningdek, noyob eksponatlarni namoyish etish orqali fuqarolarda, ayniqsa, yosh avlodda milliy va umuminsoniy qadriyatlar, bebaho tarixiy va madaniy merosga hurmat, gʻurur va iftixor, Vatanga sadoqat va muhabbat tuygʻularini kuchaytirish maqsadida Vazirlar Mahkamasi qaror qiladi:
1. Madaniy meros agentligi va Xorazm viloyati hokimligining Urganch shahri Xonqa koʻchasi 7-uy manzilidagi binoda “Lazgi va Avesto” muzeyini (keyingi oʻrinlarda — muzey) Oʻzbekiston zamonaviy sanʼat muzeyining filiali sifatida tashkil etish toʻgʻrisidagi taklifi maʼqullansin.
2. Quyidagilar Muzeyning asosiy vazifalari etib belgilansin:
muzeyda xalqimizning boy madaniy merosini, uning insoniyat tarixidagi rolini haqqoniy yoritish;
muzey fondida saqlanayotgan muzey ashyolari va muzey kolleksiyalarini asrab-avaylash, boyitib borish, namoyish etish, dunyo jamoatchiligiga tanitish va targʻib etish;
muzeydagi noyob eksponatlar orqali fuqarolarni, ayniqsa, yosh avlodni milliy va umuminsoniy qadriyatlar, bebaho tarixiy va madaniy merosga hurmat ruhida tarbiyalash, ularda gʻurur va iftixor, Vatanga sadoqat va muhabbat tuygʻularini kuchaytirish;
muzey ekspozitsiyalarini tashkil etishda zamonaviy axborot texnologiyalaridan keng foydalanish;
jahon muzeyshunosligi tajribasidan foydalanish uchun zarur shart-sharoitlar yaratish, muzeylar bilan koʻrgazmalar tashkil etish borasida oʻzaro manfaatli hamkorlik aloqalarini mustahkamlash.
3. Quyidagilar muzey faoliyatini moliyalashtirish manbalari etib belgilansin:
Xorazm viloyati mahalliy budjeti mablagʻlari;
oʻz faoliyatidan tushadigan daromadlar;
jismoniy va yuridik shaxslarning homiylik xayriyalari;
qonunchilik hujjatlari bilan taqiqlanmagan boshqa manbalar.
4. Belgilab qoʻyilsinki:
muzeyni saqlash, shu jumladan, xodimlar mehnatiga haq toʻlash bilan bogʻliq xarajatlar 2026-yilda Xorazm viloyati mahalliy budjeti parametrlarida nazarda tutilgan mablagʻlar doirasida moliyalashtiriladi, 2027-yildan boshlab esa Xorazm viloyati mahalliy budjeti parametrlarida nazarda tutiladi;
Muzeyga shtat birliklarini ajratish hamda xodimlar mehnatiga haq toʻlash Madaniy meros agentligi tizimidagi muzeylar uchun belgilangan tartibga muvofiq amalga oshiriladi.
5. Xorazm viloyati hokimligi 2026-yil 1-iyulga qadar muzey binosida taʼmirlash ishlarini yakunlash, ekspozitsiya yaratish, moddiy-texnik bazani takomillashtirish hamda muzeyni foydalanishga topshirish boʻyicha zarur choralar koʻrsin.
6. Madaniy meros agentligi Xorazm viloyati hokimligi hamda manfaatdor vazirlik va idoralar bilan birgalikda:
muzeyning shtatlar jadvalini belgilangan tartibda tasdiqlash hamda uni malakali kadrlar bilan toʻldirish;
muzeyga mahalliy va xorijiy sayyohlarni keng jalb etish;
muzeyga zamonaviy axborot-kommunikatsiya texnologiyalarini keng joriy etish, muzey fondi hamda ekspozitsiyasini tegishli muzey ashyolari bilan toʻldirish choralarini koʻrsin.
7. Oʻzbekiston Milliy teleradiokompaniyasi va Oʻzbekiston Milliy axborot agentligiga ommaviy axborot vositalarida muzey faoliyatini keng yoritish tavsiya etilsin.
8. Vazirlar Mahkamasining 2017-yil 11-dekabrdagi 975-son qarori bilan tasdiqlangan Oʻzbekiston Respublikasi Davlat budjeti hisobidan moliyalashtiriladigan davlat muzeylari, ularning filial va boʻlimlari roʻyxatiga ilovaga muvofiq oʻzgartirish kiritilsin.
9. Ushbu qarorning bajarilishini nazorat qilish Oʻzbekiston Respublikasi Madaniy meros agentligi direktori B.G. Abdikarimov hamda Xorazm viloyati hokimi J.R. Raximov zimmasiga yuklansin.
Vazirlar Mahkamasining 2026-yil 12-maydagi 241-son qaroriga ILOVA
Vazirlar Mahkamasining 2017-yil 11-dekabrdagi 975-son qarori bilan tasdiqlangan Oʻzbekiston Respublikasi Davlat budjeti hisobidan moliyalashtiriladigan davlat muzeylari, ularning filial va boʻlimlari roʻyxatiga kiritilayotgan oʻzgartirish
“Qoraqalpogʻiston Respublikasi budjeti, viloyatlar va Toshkent shahar mahalliy budjetlaridan moliyalashtiriladigan muzeylar” boʻlimining 21-pozitsiyasi quyidagi tahrirda bayon etilsin:
“ 21. Oʻzbekiston zamonaviy sanʼati muzeyi va uning quyidagi filiallari: Urganch shahri “Xorazm tarixi va madaniyati” muzeyi * Urganch shahri Komiljon Otaniyozov uy-muzeyi Urganch shahri Urganch shahar tarixi muzeyi Urganch shahri “Lazgi va Avesto” muzeyi* Urganch shahri ”.
Oʻzbekiston Respublikasining Bosh vaziri A. ARIPOV
Toshkent sh.,
2026-yil 12-may,
241 -son