UzbekAI

ЎЗБЕКИСТОН РЕСПУБЛИКАСИ ВАЗИРЛАР МАҲКАМАСИНИНГ

ҚАРОРИ

Давлат аудити соҳасига иқтидорли ёшларни мақсадли йўналтириш, етук ва юқори малакали мутахассисларни тайёрлашни йўлга қўйиш тўғрисида

Ўзбекистон Республикаси Президентининг «Давлат аудити ва молиявий назорати фаолиятини янада такомиллаштиришга доир қўшимча чора-тадбирлар тўғрисида» 2025 йил 18 декабрдаги ПФ-252-сон Фармонига мувофиқ, халқаро стандартлар ва илғор хорижий тажрибалар асосида мамлакатимизда давлат аудити йўналишида етук ва малакали кадрлар тайёрланишини таъминлаш мақсадида Вазирлар Маҳкамаси қарор қилади:

1. Ўзбекистон Республикаси Президентининг «Давлат аудити ва молиявий назорати фаолиятини янада такомиллаштиришга доир қўшимча чора-тадбирлар тўғрисида» 2025 йил 18 декабрдаги ПФ-252-сон Фармонига асосан:

а) иқтидорли ёшларни давлат аудити соҳасига мақсадли йўналтириш, соҳада таълим ва илмий-тадқиқот интеграциясини таъминлаш мақсадида 2026/2027 ўқув йилидан бошлаб Тошкент давлат иқтисодиёт университетида таълим йўналиши шаклида ҳуқуқий мақоми олий таълим ташкилоти факультетига тенглаштирилган Давлат аудити олий мактаби ташкил этилгани;

б) «Давлат аудити» бакалавриат таълим йўналишига қабул параметрлари амалдаги қонунчиликда белгиланган тартибга мувофиқ кадрлар буюртмачилари таклифлари асосида шакллантирилиши;

«Давлат аудити» бакалавриат таълим йўналишининг ўқув дастурлари дунёнинг нуфузли Quacquarelli Symonds (QS) ва Times Нigher Education (TНE) ташкилотлари рейтингларида соҳалар бўйича биринчи 300 талик рўйхатдаги олий таълим ташкилотлари тажрибаси асосида ишлаб чиқилиши белгилангани маълумот учун қабул қилинсин.

2. Белгилаб қўйилсинки:

а) тест синови топшириладиган фанлар мажмуаси ва кетма-кетлиги бир хил бўлган бештагача бакалавриат таълим йўналиши ҳамда таълим шаклларини танлаш жараёнида давлат олий таълим ташкилотларининг «Давлат аудити» бакалавриат таълим йўналишини танлаган талабгорлардан миллий ёки халқаро даражада тан олинадиган қуйидаги сертификатларга эга бўлиш талаб этилади:

чет тили бўйича — В2 ва ундан юқори;

математика фанидан — В ва ундан юқори.

Ушбу сертификатларга эга абитуриентлар тегишлича чет тили ва математика фанлари бўйича тест синовларидан қонунчилик ҳужжатларида белгиланган тартибда озод этилади ҳамда барча бакалавриат таълим йўналишлари учун мажбурий бўлган учта фандан фақат иккитаси — она тили ва Ўзбекистон тарихи фанларидан тест синовларини топширади;

б) «Давлат аудити» бакалавриат таълим йўналишига ўқишга қабул қилиш Вазирлар Маҳкамасининг 2025 йил 13 сентябрдаги 578-сон қарори билан тасдиқланган Олий таълим ташкилотларининг бакалавриатига ўқишга қабул қилиш тартиби тўғрисидаги низомда белгиланган тартибда амалга оширилади, ушбу банднинг «а» кичик бандида белгиланган қоидалар бундан мустасно.

3. Олий таълим, фан ва инновациялар вазирлиги:

«Давлат аудити» бакалавриат таълим йўналишининг ўқув дастурлари дунёнинг нуфузли Quacquarelli Symonds (QS) ва Times Нigher Education (TНE) ташкилотлари рейтингларида соҳалар бўйича биринчи 300 талик рўйхатдаги олий таълим ташкилотлари тажрибаси асосида ишлаб чиқилиб, Ҳисоб палатаси ҳамда Иқтисодиёт ва молия вазирлиги билан келишилган ҳолда тасдиқланишини таъминласин;

Мактабгача ва мактаб таълими вазирлиги билан биргаликда умумий ўрта таълим ташкилотлари ўқувчилари ўртасида «Давлат аудити» бакалавриат таълим йўналиши, ушбу йўналиш талабалари учун яратилган шароитлар, ўқиш даврида ва ўқишни тамомлагандан сўнг тақдим этиладиган имкониятлар тўғрисида тарғибот-ташвиқот ишларини олиб борсин;

манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни икки ой муддатда ушбу қарорга мувофиқлаштирсин.

4. Ушбу қарорнинг бажарилишини назорат қилиш Ўзбекистон Республикаси олий таълим, фан ва инновациялар вазири К.А. Шарипов зиммасига юклансин.

Ўзбекистон Республикасининг Бош вазири А. АРИПОВ

Тошкент ш.,

2026 йил 16 май,

248 -сон

(Қонунчилик маълумотлари миллий базаси, 18.05.2026 й., 09/26/248/0493-сон)

lex.uz

OʻZBEKISTON RESPUBLIKASI VAZIRLAR MAHKAMASINING

QARORI

Davlat auditi sohasiga iqtidorli yoshlarni maqsadli yoʻnaltirish, yetuk va yuqori malakali mutaxassislarni tayyorlashni yoʻlga qoʻyish toʻgʻrisida

Oʻzbekiston Respublikasi Prezidentining “Davlat auditi va moliyaviy nazorati faoliyatini yanada takomillashtirishga doir qoʻshimcha chora-tadbirlar toʻgʻrisida” 2025-yil 18-dekabrdagi PF-252-son Farmoniga muvofiq, xalqaro standartlar va ilgʻor xorijiy tajribalar asosida mamlakatimizda davlat auditi yoʻnalishida yetuk va malakali kadrlar tayyorlanishini taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining “Davlat auditi va moliyaviy nazorati faoliyatini yanada takomillashtirishga doir qoʻshimcha chora-tadbirlar toʻgʻrisida” 2025-yil 18-dekabrdagi PF-252-son Farmoniga asosan:

a) iqtidorli yoshlarni davlat auditi sohasiga maqsadli yoʻnaltirish, sohada taʼlim va ilmiy-tadqiqot integratsiyasini taʼminlash maqsadida 2026/2027 oʻquv yilidan boshlab Toshkent davlat iqtisodiyot universitetida taʼlim yoʻnalishi shaklida huquqiy maqomi oliy taʼlim tashkiloti fakultetiga tenglashtirilgan Davlat auditi oliy maktabi tashkil etilgani;

b) “Davlat auditi” bakalavriat taʼlim yoʻnalishiga qabul parametrlari amaldagi qonunchilikda belgilangan tartibga muvofiq kadrlar buyurtmachilari takliflari asosida shakllantirilishi;

“Davlat auditi” bakalavriat taʼlim yoʻnalishining oʻquv dasturlari dunyoning nufuzli Quacquarelli Symonds (QS) va Times Nigher Education (TNE) tashkilotlari reytinglarida sohalar boʻyicha birinchi 300 talik roʻyxatdagi oliy taʼlim tashkilotlari tajribasi asosida ishlab chiqilishi belgilangani maʼlumot uchun qabul qilinsin.

2. Belgilab qoʻyilsinki:

a) test sinovi topshiriladigan fanlar majmuasi va ketma-ketligi bir xil boʻlgan beshtagacha bakalavriat taʼlim yoʻnalishi hamda taʼlim shakllarini tanlash jarayonida davlat oliy taʼlim tashkilotlarining “Davlat auditi” bakalavriat taʼlim yoʻnalishini tanlagan talabgorlardan milliy yoki xalqaro darajada tan olinadigan quyidagi sertifikatlarga ega boʻlish talab etiladi:

chet tili boʻyicha — V2 va undan yuqori;

matematika fanidan — V va undan yuqori.

Ushbu sertifikatlarga ega abituriyentlar tegishlicha chet tili va matematika fanlari boʻyicha test sinovlaridan qonunchilik hujjatlarida belgilangan tartibda ozod etiladi hamda barcha bakalavriat taʼlim yoʻnalishlari uchun majburiy boʻlgan uchta fandan faqat ikkitasi — ona tili va Oʻzbekiston tarixi fanlaridan test sinovlarini topshiradi;

b) “Davlat auditi” bakalavriat taʼlim yoʻnalishiga oʻqishga qabul qilish Vazirlar Mahkamasining 2025-yil 13-sentabrdagi 578-son qarori bilan tasdiqlangan Oliy taʼlim tashkilotlarining bakalavriatiga oʻqishga qabul qilish tartibi toʻgʻrisidagi nizomda belgilangan tartibda amalga oshiriladi, ushbu bandning “a” kichik bandida belgilangan qoidalar bundan mustasno.

3. Oliy taʼlim, fan va innovatsiyalar vazirligi:

“Davlat auditi” bakalavriat taʼlim yoʻnalishining oʻquv dasturlari dunyoning nufuzli Quacquarelli Symonds (QS) va Times Nigher Education (TNE) tashkilotlari reytinglarida sohalar boʻyicha birinchi 300 talik roʻyxatdagi oliy taʼlim tashkilotlari tajribasi asosida ishlab chiqilib, Hisob palatasi hamda Iqtisodiyot va moliya vazirligi bilan kelishilgan holda tasdiqlanishini taʼminlasin;

Maktabgacha va maktab taʼlimi vazirligi bilan birgalikda umumiy oʻrta taʼlim tashkilotlari oʻquvchilari oʻrtasida “Davlat auditi” bakalavriat taʼlim yoʻnalishi, ushbu yoʻnalish talabalari uchun yaratilgan sharoitlar, oʻqish davrida va oʻqishni tamomlagandan soʻng taqdim etiladigan imkoniyatlar toʻgʻrisida targʻibot-tashviqot ishlarini olib borsin;

manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtirsin.

4. Ushbu qarorning bajarilishini nazorat qilish Oʻzbekiston Respublikasi oliy taʼlim, fan va innovatsiyalar vaziri K.A. Sharipov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2026-yil 16-may,

248 -son

(Qonunchilik maʼlumotlari milliy bazasi, 18.05.2026-y., 09/26/248/0493-son)

lex.uz