UzbekAI

Ўзбекистон Республикаси Вазирлар Маҳкамасининг

қарори

НИЗОМ

Ўзбекистон Республикаси Фанлар академиясининг жамғармаси тўғрисидаги низомни тасдиқлаш ҳақида

Ўзбекистон Республикаси Президентининг «Ўзбекистон Республикаси Фанлар академияси фаолиятини такомиллаштириш чора-тадбирлари тўғрисида» 2025 йил 27 декабрдаги ПҚ-390-сон қарори ижросини таъминлаш, шунингдек, илмий тадқиқотларни қўллаб-қувватлаш, инновацион технологияларни ривожлантириш ҳамда стратегик аҳамиятга эга илмий йўналишларни барқарор молиялаштириш мақсадида Вазирлар Маҳкамаси қарор қилади:

1. Ўзбекистон Республикаси Президентининг «Ўзбекистон Республикаси Фанлар академияси фаолиятини такомиллаштириш чора-тадбирлари тўғрисида» 2025 йил 27 декабрдаги ПҚ-390-сон қарорига мувофиқ:

а) илмий тадқиқотларни қўллаб-қувватлаш, ёш олимларни жалб қилиш ва стратегик аҳамиятга эга илмий йўналишларни барқарор молиялаштириш мақсадида Фанлар академияси жамғармаси ташкил этилиши белгилангани;

б) Фанлар академиясининг жамғармаси:

Давлат бюджетидан ҳар йили ажратиладиган 80 млрд сўм миқдоридаги маблағлар;

Жамғарманинг вақтинча бўш турган маблағларини тижорат банкларига жойлаштиришдан олинадиган даромадлар;

жисмоний ва юридик шахсларнинг, шу жумладан, хорижий ҳомийларнинг хайрия маблағлари;

халқаро молия ташкилотлари ва хорижий давлатларнинг грантлари ва техник кўмак маблағлари;

қонунчилик ҳужжатларида тақиқланмаган бошқа манбалар ҳисобидан шакллантирилиши назарда тутилгани маълумот учун қабул қилинсин.

2. Қуйидагиларни назарда тутувчи Ўзбекистон Республикаси Фанлар академиясининг жамғармаси (кейинги ўринларда — Жамғарма) тўғрисидаги низом 1-иловага мувофиқ тасдиқлансин:

Жамғарма маблағларини шакллантириш ва улардан фойдаланиш тартиби;

Жамғарма фаолиятини бошқариш ва унинг маблағларини тақсимлаш тартиби;

Жамғарма маблағларининг ҳисоби ва ҳисоботини юритиш;

Фанлар академиясининг бошқарув аппарати ва Қорақалпоғистон бўлими ходимларини моддий рағбатлантириш тартиби.

3. Вазирлар Маҳкамасининг «Ўзбекистон Республикаси Фанлар академияси илмий ташкилотларини молиялаштириш тизимини такомиллаштириш ҳамда самарадорлигини ошириш чора-тадбирлари тўғрисида» 2020 йил 8 июндаги 366-сон қарорига 2-иловага мувофиқ қўшимчалар киритилсин.

4. Ушбу қарорнинг бажарилишини назорат қилиш Ўзбекистон Республикаси Бош вазирининг ўринбосари — иқтисодиёт ва молия вазири Ж.А. Қўчқоров ҳамда Фанлар академияси президенти Ш.А. Аюпов зиммасига юклансин.

Вазирлар Маҳкамасининг 2026 йил 20 майдаги 260-сон қарорига 1-ИЛОВА

Ўзбекистон Республикаси Фанлар академиясининг жамғармаси тўғрисида

1-боб. Умумий қоидалар

1. Ушбу Низом илмий тадқиқотларни қўллаб-қувватлаш, инновацион технологияларни ривожлантириш, ёш олимларни жалб қилиш ва стратегик аҳамиятга эга илмий йўналишларни барқарор молиялаштириш мақсадида ташкил этилган Ўзбекистон Республикаси Фанлар академиясининг жамғармаси (кейинги ўринларда — Жамғарма) маблағларини шакллантириш ва улардан фойдаланиш, Жамғарма фаолиятини бошқариш, унинг маблағларини тақсимлаш, ҳисоби ва ҳисоботини юритиш тартибини белгилайди.

2. Жамғарма юридик шахс ҳисобланмайди ва унинг маблағлари Ўзбекистон Республикаси Иқтисодиёт ва молия вазирлиги ҳузуридаги Ғазначилик хизмати қўмитасида очилган Фанлар академиясининг бюджетдан ташқари шахсий ғазна ҳисобварағида жамланади ҳамда ушбу Низомда белгиланган мақсадлар учун сарфланади.

2-боб. Жамғарма маблағларини шакллантириш ва улардан фойдаланиш тартиби

3. Қуйидагилар Жамғарма маблағларини шакллантириш манбалари ҳисобланади:

Давлат бюджетидан ҳар йили Илм-фанни молиялаштириш ва инновацияларни қўллаб-қувватлаш жамғармасига ажратиладиган трансфертларни қисқартириш ҳисобидан ажратиладиган 80 миллиард сўм миқдоридаги маблағлар;

Жамғарманинг вақтинча бўш турган маблағларини тижорат банкларига жойлаштиришдан олинадиган даромадлар;

жисмоний ва юридик шахсларнинг, шу жумладан, хорижий ҳомийларнинг хайрия маблағлари;

халқаро молия ташкилотлари ва хорижий давлатларнинг грантлари ва техник кўмак маблағлари;

қонунчилик ҳужжатларида тақиқланмаган бошқа манбалар.

4. Жамғарма маблағлари қуйидагиларга йўналтирилади:

хориждаги иқтидорли ватандош олимларнинг Ўзбекистонга қайтиб келишини қўллаб-қувватлашга қаратилган реинтеграция грантларини ташкил этиш;

таянч докторантлар учун номли стипендиялар ҳамда ёш тадқиқотчилар учун грантлар ва мукофотлар таъсис қилиш;

илмий тадқиқот жараёнларини рақамлаштиришни қўллаб-қувватлаш, маълумотларни сақлаш ва таҳлил қилиш учун инновацион ахборот технологияларини жорий этиш, рақамли архивлар ва маълумотлар базаларини ривожлантириш;

илмий асбоб-ускуналар, реагент, реактив, хомашё, сарфлаш материаллари ва бутловчи қисмларни харид қилиш;

долзарб илмий тадқиқот натижаларига оид монография ва китоблар чоп этиш;

олимларнинг малакасини ошириш учун курслар, семинарлар ва тренинглар ташкил этиш;

академик алмашинув дастурларини ташкил этиш, халқаро илмий марказлар билан қўшма илмий тадқиқотлар ўтказиш ва чет эл мутахассисларини жалб қилиш;

Фанлар академияси ходимларини моддий рағбатлантириш ва хорижга хизмат сафарларига юбориш харажатларини қоплаш;

очиқ маърузалар ҳамда илмий анжуманлар ўтказиш, илмий-оммабоп адабиётлар нашр этиш, илмни тарғиб қилишда рақамли платформаларни ривожлантириш, илм-фанни оммалаштириш;

«Scopus», «Web of science» ва бошқа маълумотлар базаларига обуна бўлиш харажатларини қоплаш ҳамда халқаро ташкилотларда вакиллик харажатларини молиялаштириш.

5. Жамғарма маблағлари Ўзбекистон Республикаси Фанлар академияси жамғармасининг кенгаши (кейинги ўринларда — Кенгаш) томонидан тасдиқланган Жамғарманинг даромад ва харажатлари йиллик параметрларига мувофиқ сарфланади.

6. Жамғарма маблағлари йўналтириладиган харажатларни молиялаштириш тартиби Кенгаш қарори билан тасдиқланади.

7. Жамғарманинг жорий йилда фойдаланилмаган маблағлари Ўзбекистон Республикаси Давлат бюджетига олиб қўйилмайди ва улардан кейинги йилда фойдаланилади.

3-боб. Жамғарма фаолиятини бошқариш ва унинг маблағларини тақсимлаш тартиби

8. Жамғарма фаолиятини бошқариш ва унинг маблағларини тақсимлаш учун Кенгаш ташкил этилади.

9. Кенгаш аъзолари ўз фаолиятини жамоатчилик асосида амалга оширади.

10. Жамғарманинг маблағларини сарфлаш масалаларини ҳал этишда барча аъзоларнинг тенг ҳуқуқлилиги таъминланади.

11. Кенгаш раис, раис ўринбосари, котиб ва аъзолардан иборат бўлади.

12. Кенгаш Академия илмий ташкилотларининг 9 нафар директори ҳамда тегишли нодавлат нотижорат ташкилотларининг масъул ходимларидан иборат таркибда шакллантирилади.

Кенгашнинг таркиби бир йилда бир марта Фанлар академияси президенти томонидан тасдиқланади.

13. Фанлар академияси президенти лавозимига кўра Кенгаш раиси ҳисобланади.

14. Кенгаш раиси:

Кенгаш мажлиси кун тартибини белгилайди ва тасдиқлайди;

Кенгаш қарорларини тасдиқлайди ва уларнинг бажарилишини назорат қилади;

Кенгаш аъзоларига юкланган вазифалар бажарилиши юзасидан уларнинг ишини мувофиқлаштиради.

15. Кенгаш аъзолари:

Кенгаш мажлисларида кўриб чиқиладиган масалаларни муҳокама қилиш ва ҳал этишда иштирок этади;

долзарб масалалар бўйича Кенгашга таклифлар киритади;

Кенгаш томонидан кўриб чиқиладиган масалалар бўйича овоз беради.

16. Кенгаш аъзолари мажлисда шахсан қатнашадилар.

Бунда қатнашишнинг имкони бўлмаган тақдирда, Кенгаш аъзоси мажлиснинг кун тартиби бўйича ўз фикрини ёзма равишда тақдим этишга ҳақлидир.

17. Кенгаш котиби:

Кенгаш мажлисига барча зарур ҳужжатларнинг ўз вақтида тайёрланишини таъминлайди;

мажлисни ўтказиш муддатлари ва жойини Кенгаш раиси билан келишади;

кун тартиби масалалари бўйича Кенгаш мажлислари ўтказилишини ташкил этади;

Кенгаш аъзолари ва таклиф этилган шахсларни мажлиснинг санаси, вақти, жойи ва кун тартиби лойиҳасидан хабардор қилади;

Кенгаш баённомаларини расмийлаштиради, тасдиқланган баённомаларни кенгаш аъзоларига ҳамда бошқа манфаатдор вазирлик ва идораларга юборади;

Кенгаш қарорлари бажарилиши мониторингини юритади.

18. Кенгаш котиби Кенгаш аъзоси ҳисобланади.

19. Кенгаш ўз мажлисларини заруратга кўра, бироқ ҳар чоракда камида бир маротаба ўтказади.

20. Кенгаш мажлисини Кенгаш раиси, у бўлмаган тақдирда эса, Кенгаш раиси ўринбосари бошқаради.

21. Кенгаш мажлиси унда Кенгаш аъзоларининг камида учдан икки қисми қатнашганда, ўтказилган ҳисобланади.

22. Мажлисни ўтказиш учун кворум ёки раис ва унинг ўринбосари бўлмаганда, Кенгаш мажлисини ўтказишнинг янги санаси эълон қилинади.

23. Кенгаш мажлисида кўриб чиқиладиган масалаларнинг хусусиятига кўра давлат органлари ва бошқа ташкилотларнинг раҳбарлари, мутахассислари ҳамда илмий ташкилотларнинг ходимлари ҳам таклиф этилиши мумкин.

Кенгаш қарори Кенгашнинг мажлисда қатнашган аъзоларининг оддий кўпчилик овози билан қабул қилинади.

Овозлар тенг бўлган тақдирда, Кенгаш раисининг овози ҳал қилувчи ҳисобланади.

Жамғарманинг даромадлари ва харажатларининг йиллик молиявий режасини, шунингдек, Кенгаш маблағларидан фойдаланилишини тасдиқлаш масалалари бўйича қарорлар Кенгашнинг мажлисда қатнашган аъзоларининг учдан икки қисми овози билан қабул қилинади.

Кенгаш қарорлари Кенгаш мажлисининг баённомаси билан расмийлаштирилади.

Кенгаш мажлисининг баённомаси Кенгаш раиси томонидан тасдиқланади ҳамда Фанлар академияси президенти буйруғи асосида амалга оширилади.

Бунда Кенгаш мажлисининг баённомаси Фанлар академиясининг расмий веб-сайтида жойлаштирилгандан кейин унда назарда тутилган мақсадларга маблағлар ажратилишига рухсат берилади.

24. Қуйидагилар Кенгашнинг асосий вазифалари ҳисобланади:

ҳисобот йили якуни бўйича Жамғарма маблағларининг даромадлари ва харажатлари тўғрисидаги ҳисоботларни кўриб чиқиш ва тасдиқлаш;

Жамғарма маблағларидан мақсадли ва самарали фойдаланилишини назорат қилиш.

Академиянинг Жамғарма фаолиятини ташкил этиш бўлими Жамғарманинг ишчи органи ҳисобланади.

25. Ишчи орган қуйидаги функцияларни амалга оширади:

Жамғарманинг даромадлари ва харажатларининг йиллик молиявий режасини ишлаб чиқади;

даромадлар ва харажатлар сметаларини тайёрлайди, шунингдек, уларга қонунчилик ҳужжатларида белгиланган тартибда ўзгартиришлар киритади;

Жамғарма тушумларини кўпайтириш ва унинг маблағларидан самарали фойдаланиш бўйича таклифлар тайёрлайди;

илмий ташкилотлар ҳамда Жамғармадан сақлаш харажатлари молиялаштириладиган ташкилотларнинг Жамғармадан маблағ ажратишга оид мурожаатларини умумлаштиради ва Кенгашда кўриб чиқиш учун материаллар тайёрлайди;

Жамғарманинг тушумлар манбалари бўйича даромадлари ҳамда асосий харажатлар йўналишларига асосан ҳисобини юритади;

ҳар йил якуни бўйича Жамғарма маблағларидан фойдаланиш тўғрисида ҳисобот тайёрлайди ҳамда Кенгашга кўриб чиқиш ва тасдиқлаш учун тақдим этади.

26. Ишчи орган Жамғарма фаолиятини ташкил этиш учун вазирлик ва идоралар ҳамда олий таълим ва илмий ташкилотлар вакилларидан иборат эксперт гуруҳ(лар)ини тузиши мумкин.

Эксперт гуруҳ(лар)и фаолиятини ташкил этиш тартиби Кенгаш қарори билан тасдиқланади.

Бунда эксперт гуруҳ(лар)ининг ҳар бир аъзосига йил якуни бўйича Жамғарма маблағлари ҳисобидан базавий ҳисоблаш миқдорининг 50 баравари доирасида бир марталик мукофот пули (барча солиқлар ушлаб қолинган ҳолда) берилади.

4-боб. Жамғарма маблағларининг ҳисоби ва ҳисоботини юритиш тартиби

27. Жамғарма маблағларининг ҳисоби ва ҳисоботини юритиш ҳамда жорий хизмат кўрсатиш ишлари Академиянинг Жамғарма фаолиятини ташкил этиш бўлими томонидан амалга оширилади.

28. Жамғарма маблағларидан фойдаланиш бўйича ҳисоб ва ҳисоботлар Фанлар академиясининг бюджетдан ташқари бошқа маблағларидан алоҳида юритилади.

29. Жамғарманинг даромадлар ва харажатлар сметасининг ижроси тўғрисидаги йиллик ҳисобот Кенгаш томонидан кўриб чиқилади ҳамда ҳар йили 15 мартга қадар Фанлар академияси Президиуми мажлисида тасдиқланади.

30. Жамғарманинг даромадлар ва харажатлар сметаси ҳамда унинг ижроси тўғрисидаги ҳисоботлар, шунингдек, товарлар (ишлар, хизматлар)ни харид қилиш бўйича тузилган шартномалар рўйхатлари Фанлар академиясининг расмий веб-сайтида эълон қилинади.

31. Жамғарма маблағларидан оқилона ва мақсадли фойдаланиш юзасидан давлат молиявий назорати қонунчилик ҳужжатларида белгиланган тартибда Давлат молиявий назорати инспекцияси томонидан амалга оширилади.

5-боб. Фанлар академиясининг бошқарув аппарати ва Қорақалпоғистон бўлими ходимларини моддий рағбатлантириш тартиби

32. Ўзбекистон Республикаси Президентининг 2025 йил 27 декабрдаги ПҚ-390-сон қарорига 6-иловага асосан Жамғарма маблағлари ҳисобидан Фанлар академияси бошқарув аппарати ва Қорақалпоғистон бўлими ходимларининг лавозим маошига ойлик устамалар қуйидаги мақсадлар учун ва шаклларда тўланади:

а) лавозим маошига 200 фоизгача миқдорда ойлик рағбатлантириш устама;

б) лавозим маошига нисбатан кўп йиллик ишлаганлик учун қуйидаги ҳажмда ойлик устама тўловлари (хизмат кўрсатувчи ва техник ходимлардан ташқари):

1 йилдан 3 йилгача — 0,3;

3 йилдан 5 йилгача — 0,6;

5 йилдан 10 йилгача — 0,8;

10 йилдан 15 йилгача — 1,0;

15 йилдан 20 йилгача — 1,2;

20 йилдан юқори — 1,5.

Бунда лавозим маошига нисбатан кўп йиллик ишлаганлик учун ойлик устама тўловлари коэффициентини ҳисоблашда мазкур ходимларнинг Фанлар академияси илмий ташкилотларидаги расмий меҳнат фаолияти даври ҳисобга олинади.

33. Фанлар академияси ходимларига ҳисобот даври учун (чораклик) мукофот пуллари лавозим маошига (рағбатлантириш коэффициентини ҳисобга олган ҳолда) нисбатан 200 фоиз миқдорда тўланади.

Ўзбекистон Республикаси Меҳнат кодексининг 208-моддаси биринчи қисмида белгиланган байрам кунлари муносабати билан Фанлар академияси ходимларига меҳнатга ҳақ тўлашнинг энг кам миқдорининг ўн баравари миқдорида мукофот пуллари тўланади.

34. Бошқа ижтимоий, компенсация ва рағбатлантирувчи тусдаги тўловларга бир марталик молиявий ёрдам шаклида Фанлар академияси Касаба уюшмасининг таклифига биноан маблағларнинг мавжудлигига қараб қуйидагилар киради:

а) меҳнатга ҳақ тўлашнинг энг кам миқдорининг ўн баравари миқдоригача:

ходим никоҳдан ўтиши муносабати билан;

ходимлар ва уларнинг яқин қариндошлари (отаси, онаси, турмуш ўртоғи, фарзандлари) касал бўлган тақдирда;

ходим юбилей ёшига тўлганда (50, 60 ва 70 ёш) ва нафақага чиққанда;

б) базавий ҳисоблаш миқдорининг 10 баравигача — куз мавсумида қишлоқ хўжалиги маҳсулотларини сотиб олишга.

35. Фанлар академияси бошқарув аппарати ва Қорақалпоғистон бўлими раҳбар ва ходимларининг лавозим маошларига ҳар ойлик шахсий устамалар ва чораклик рағбатлантиришлар миқдори қуйидагича белгиланади:

Фанлар академияси президентига — Ўзбекистон Республикасининг Бош вазири томонидан бир йиллик учун;

Фанлар академияси бошқарув аппарати ва Қорақалпоғистон бўлими раисига — Фанлар академияси президентининг буйруғига мувофиқ белгиланади.

Фанлар академияси Қорақалпоғистон бўлими ходимларига Қорақалпоғистон бўлими раисининг буйруғига мувофиқ белгиланади.

6-боб. Якунловчи қоидалар

36. Мазкур Низомни қўллашда юзага келадиган низолар қонунчилик ҳужжатларида белгиланган тартибда ҳал этилади.

37. Ушбу Низом талабларининг бузилишида айбдор бўлган шахслар қонунчилик ҳужжатларида белгиланган тартибда жавоб берадилар.

Вазирлар Маҳкамасининг 2026 йил 20 майдаги 260-сон қарорига 2-ИЛОВА

Вазирлар Маҳкамасининг «Ўзбекистон Республикаси Фанлар академияси илмий ташкилотларини молиялаштириш тизимини такомиллаштириш ҳамда самарадорлигини ошириш чора-тадбирлари тўғрисида» 2020 йил 8 июндаги 366-сон қарорига киритилаётган қўшимчалар

30-илованинг «Лавозим номи» устунида:

4-позиция «бош маркетолог, хорижий алоқалар бўйича бош мутахассис» сўзлари билан тўлдирилсин;

5-позиция «етакчи маркетолог, хорижий алоқалар бўйича етакчи мутахассис» сўзлари билан тўлдирилсин;

6-позиция «маркетолог, хорижий алоқалар бўйича мутахассис» сўзлари билан тўлдирилсин.

Ўзбекистон Республикасининг Бош вазири А. АРИПОВ

Тошкент ш.,

2026 йил 20 май,

260 -сон

(Қонунчилик маълумотлари миллий базаси, 20.05.2026 й., 09/26/260/0516-сон)

lex.uz

Oʻzbekiston Respublikasi Vazirlar Mahkamasining

qarori

NIZOM

Oʻzbekiston Respublikasi Fanlar akademiyasining jamgʻarmasi toʻgʻrisidagi nizomni tasdiqlash haqida

Oʻzbekiston Respublikasi Prezidentining “Oʻzbekiston Respublikasi Fanlar akademiyasi faoliyatini takomillashtirish chora-tadbirlari toʻgʻrisida” 2025-yil 27-dekabrdagi PQ-390-son qarori ijrosini taʼminlash, shuningdek, ilmiy tadqiqotlarni qoʻllab-quvvatlash, innovatsion texnologiyalarni rivojlantirish hamda strategik ahamiyatga ega ilmiy yoʻnalishlarni barqaror moliyalashtirish maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining “Oʻzbekiston Respublikasi Fanlar akademiyasi faoliyatini takomillashtirish chora-tadbirlari toʻgʻrisida” 2025-yil 27-dekabrdagi PQ-390-son qaroriga muvofiq:

a) ilmiy tadqiqotlarni qoʻllab-quvvatlash, yosh olimlarni jalb qilish va strategik ahamiyatga ega ilmiy yoʻnalishlarni barqaror moliyalashtirish maqsadida Fanlar akademiyasi jamgʻarmasi tashkil etilishi belgilangani;

b) Fanlar akademiyasining jamgʻarmasi:

Davlat budjetidan har yili ajratiladigan 80 mlrd soʻm miqdoridagi mablagʻlar;

Jamgʻarmaning vaqtincha boʻsh turgan mablagʻlarini tijorat banklariga joylashtirishdan olinadigan daromadlar;

jismoniy va yuridik shaxslarning, shu jumladan, xorijiy homiylarning xayriya mablagʻlari;

xalqaro moliya tashkilotlari va xorijiy davlatlarning grantlari va texnik koʻmak mablagʻlari;

qonunchilik hujjatlarida taqiqlanmagan boshqa manbalar hisobidan shakllantirilishi nazarda tutilgani maʼlumot uchun qabul qilinsin.

2. Quyidagilarni nazarda tutuvchi Oʻzbekiston Respublikasi Fanlar akademiyasining jamgʻarmasi (keyingi oʻrinlarda — Jamgʻarma) toʻgʻrisidagi nizom 1-ilovaga muvofiq tasdiqlansin:

Jamgʻarma mablagʻlarini shakllantirish va ulardan foydalanish tartibi;

Jamgʻarma faoliyatini boshqarish va uning mablagʻlarini taqsimlash tartibi;

Jamgʻarma mablagʻlarining hisobi va hisobotini yuritish;

Fanlar akademiyasining boshqaruv apparati va Qoraqalpogʻiston boʻlimi xodimlarini moddiy ragʻbatlantirish tartibi.

3. Vazirlar Mahkamasining “Oʻzbekiston Respublikasi Fanlar akademiyasi ilmiy tashkilotlarini moliyalashtirish tizimini takomillashtirish hamda samaradorligini oshirish chora-tadbirlari toʻgʻrisida” 2020-yil 8-iyundagi 366-son qaroriga 2-ilovaga muvofiq qoʻshimchalar kiritilsin.

4. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari — iqtisodiyot va moliya vaziri J.A. Qoʻchqorov hamda Fanlar akademiyasi prezidenti Sh.A. Ayupov zimmasiga yuklansin.

Vazirlar Mahkamasining 2026-yil 20-maydagi 260-son qaroriga 1-ILOVA

Oʻzbekiston Respublikasi Fanlar akademiyasining jamgʻarmasi toʻgʻrisida

1-bob. Umumiy qoidalar

1. Ushbu Nizom ilmiy tadqiqotlarni qoʻllab-quvvatlash, innovatsion texnologiyalarni rivojlantirish, yosh olimlarni jalb qilish va strategik ahamiyatga ega ilmiy yoʻnalishlarni barqaror moliyalashtirish maqsadida tashkil etilgan Oʻzbekiston Respublikasi Fanlar akademiyasining jamgʻarmasi (keyingi oʻrinlarda — Jamgʻarma) mablagʻlarini shakllantirish va ulardan foydalanish, Jamgʻarma faoliyatini boshqarish, uning mablagʻlarini taqsimlash, hisobi va hisobotini yuritish tartibini belgilaydi.

2. Jamgʻarma yuridik shaxs hisoblanmaydi va uning mablagʻlari Oʻzbekiston Respublikasi Iqtisodiyot va moliya vazirligi huzuridagi Gʻaznachilik xizmati qoʻmitasida ochilgan Fanlar akademiyasining budjetdan tashqari shaxsiy gʻazna hisobvaragʻida jamlanadi hamda ushbu Nizomda belgilangan maqsadlar uchun sarflanadi.

2-bob. Jamgʻarma mablagʻlarini shakllantirish va ulardan foydalanish tartibi

3. Quyidagilar Jamgʻarma mablagʻlarini shakllantirish manbalari hisoblanadi:

Davlat budjetidan har yili Ilm-fanni moliyalashtirish va innovatsiyalarni qoʻllab-quvvatlash jamgʻarmasiga ajratiladigan transfertlarni qisqartirish hisobidan ajratiladigan 80 milliard soʻm miqdoridagi mablagʻlar;

Jamgʻarmaning vaqtincha boʻsh turgan mablagʻlarini tijorat banklariga joylashtirishdan olinadigan daromadlar;

jismoniy va yuridik shaxslarning, shu jumladan, xorijiy homiylarning xayriya mablagʻlari;

xalqaro moliya tashkilotlari va xorijiy davlatlarning grantlari va texnik koʻmak mablagʻlari;

qonunchilik hujjatlarida taqiqlanmagan boshqa manbalar.

4. Jamgʻarma mablagʻlari quyidagilarga yoʻnaltiriladi:

xorijdagi iqtidorli vatandosh olimlarning Oʻzbekistonga qaytib kelishini qoʻllab-quvvatlashga qaratilgan reintegratsiya grantlarini tashkil etish;

tayanch doktorantlar uchun nomli stipendiyalar hamda yosh tadqiqotchilar uchun grantlar va mukofotlar taʼsis qilish;

ilmiy tadqiqot jarayonlarini raqamlashtirishni qoʻllab-quvvatlash, maʼlumotlarni saqlash va tahlil qilish uchun innovatsion axborot texnologiyalarini joriy etish, raqamli arxivlar va maʼlumotlar bazalarini rivojlantirish;

ilmiy asbob-uskunalar, reagent, reaktiv, xomashyo, sarflash materiallari va butlovchi qismlarni xarid qilish;

dolzarb ilmiy tadqiqot natijalariga oid monografiya va kitoblar chop etish;

olimlarning malakasini oshirish uchun kurslar, seminarlar va treninglar tashkil etish;

akademik almashinuv dasturlarini tashkil etish, xalqaro ilmiy markazlar bilan qoʻshma ilmiy tadqiqotlar oʻtkazish va chet el mutaxassislarini jalb qilish;

Fanlar akademiyasi xodimlarini moddiy ragʻbatlantirish va xorijga xizmat safarlariga yuborish xarajatlarini qoplash;

ochiq maʼruzalar hamda ilmiy anjumanlar oʻtkazish, ilmiy-ommabop adabiyotlar nashr etish, ilmni targʻib qilishda raqamli platformalarni rivojlantirish, ilm-fanni ommalashtirish;

“Scopus”, “Web of science” va boshqa maʼlumotlar bazalariga obuna boʻlish xarajatlarini qoplash hamda xalqaro tashkilotlarda vakillik xarajatlarini moliyalashtirish.

5. Jamgʻarma mablagʻlari Oʻzbekiston Respublikasi Fanlar akademiyasi jamgʻarmasining kengashi (keyingi oʻrinlarda — Kengash) tomonidan tasdiqlangan Jamgʻarmaning daromad va xarajatlari yillik parametrlariga muvofiq sarflanadi.

6. Jamgʻarma mablagʻlari yoʻnaltiriladigan xarajatlarni moliyalashtirish tartibi Kengash qarori bilan tasdiqlanadi.

7. Jamgʻarmaning joriy yilda foydalanilmagan mablagʻlari Oʻzbekiston Respublikasi Davlat budjetiga olib qoʻyilmaydi va ulardan keyingi yilda foydalaniladi.

3-bob. Jamgʻarma faoliyatini boshqarish va uning mablagʻlarini taqsimlash tartibi

8. Jamgʻarma faoliyatini boshqarish va uning mablagʻlarini taqsimlash uchun Kengash tashkil etiladi.

9. Kengash aʼzolari oʻz faoliyatini jamoatchilik asosida amalga oshiradi.

10. Jamgʻarmaning mablagʻlarini sarflash masalalarini hal etishda barcha aʼzolarning teng huquqliligi taʼminlanadi.

11. Kengash rais, rais oʻrinbosari, kotib va aʼzolardan iborat boʻladi.

12. Kengash Akademiya ilmiy tashkilotlarining 9 nafar direktori hamda tegishli nodavlat notijorat tashkilotlarining masʼul xodimlaridan iborat tarkibda shakllantiriladi.

Kengashning tarkibi bir yilda bir marta Fanlar akademiyasi prezidenti tomonidan tasdiqlanadi.

13. Fanlar akademiyasi prezidenti lavozimiga koʻra Kengash raisi hisoblanadi.

14. Kengash raisi:

Kengash majlisi kun tartibini belgilaydi va tasdiqlaydi;

Kengash qarorlarini tasdiqlaydi va ularning bajarilishini nazorat qiladi;

Kengash aʼzolariga yuklangan vazifalar bajarilishi yuzasidan ularning ishini muvofiqlashtiradi.

15. Kengash aʼzolari:

Kengash majlislarida koʻrib chiqiladigan masalalarni muhokama qilish va hal etishda ishtirok etadi;

dolzarb masalalar boʻyicha Kengashga takliflar kiritadi;

Kengash tomonidan koʻrib chiqiladigan masalalar boʻyicha ovoz beradi.

16. Kengash aʼzolari majlisda shaxsan qatnashadilar.

Bunda qatnashishning imkoni boʻlmagan taqdirda, Kengash aʼzosi majlisning kun tartibi boʻyicha oʻz fikrini yozma ravishda taqdim etishga haqlidir.

17. Kengash kotibi:

Kengash majlisiga barcha zarur hujjatlarning oʻz vaqtida tayyorlanishini taʼminlaydi;

majlisni oʻtkazish muddatlari va joyini Kengash raisi bilan kelishadi;

kun tartibi masalalari boʻyicha Kengash majlislari oʻtkazilishini tashkil etadi;

Kengash aʼzolari va taklif etilgan shaxslarni majlisning sanasi, vaqti, joyi va kun tartibi loyihasidan xabardor qiladi;

Kengash bayonnomalarini rasmiylashtiradi, tasdiqlangan bayonnomalarni kengash aʼzolariga hamda boshqa manfaatdor vazirlik va idoralarga yuboradi;

Kengash qarorlari bajarilishi monitoringini yuritadi.

18. Kengash kotibi Kengash aʼzosi hisoblanadi.

19. Kengash oʻz majlislarini zaruratga koʻra, biroq har chorakda kamida bir marotaba oʻtkazadi.

20. Kengash majlisini Kengash raisi, u boʻlmagan taqdirda esa, Kengash raisi oʻrinbosari boshqaradi.

21. Kengash majlisi unda Kengash aʼzolarining kamida uchdan ikki qismi qatnashganda, oʻtkazilgan hisoblanadi.

22. Majlisni oʻtkazish uchun kvorum yoki rais va uning oʻrinbosari boʻlmaganda, Kengash majlisini oʻtkazishning yangi sanasi eʼlon qilinadi.

23. Kengash majlisida koʻrib chiqiladigan masalalarning xususiyatiga koʻra davlat organlari va boshqa tashkilotlarning rahbarlari, mutaxassislari hamda ilmiy tashkilotlarning xodimlari ham taklif etilishi mumkin.

Kengash qarori Kengashning majlisda qatnashgan aʼzolarining oddiy koʻpchilik ovozi bilan qabul qilinadi.

Ovozlar teng boʻlgan taqdirda, Kengash raisining ovozi hal qiluvchi hisoblanadi.

Jamgʻarmaning daromadlari va xarajatlarining yillik moliyaviy rejasini, shuningdek, Kengash mablagʻlaridan foydalanilishini tasdiqlash masalalari boʻyicha qarorlar Kengashning majlisda qatnashgan aʼzolarining uchdan ikki qismi ovozi bilan qabul qilinadi.

Kengash qarorlari Kengash majlisining bayonnomasi bilan rasmiylashtiriladi.

Kengash majlisining bayonnomasi Kengash raisi tomonidan tasdiqlanadi hamda Fanlar akademiyasi prezidenti buyrugʻi asosida amalga oshiriladi.

Bunda Kengash majlisining bayonnomasi Fanlar akademiyasining rasmiy veb-saytida joylashtirilgandan keyin unda nazarda tutilgan maqsadlarga mablagʻlar ajratilishiga ruxsat beriladi.

24. Quyidagilar Kengashning asosiy vazifalari hisoblanadi:

hisobot yili yakuni boʻyicha Jamgʻarma mablagʻlarining daromadlari va xarajatlari toʻgʻrisidagi hisobotlarni koʻrib chiqish va tasdiqlash;

Jamgʻarma mablagʻlaridan maqsadli va samarali foydalanilishini nazorat qilish.

Akademiyaning Jamgʻarma faoliyatini tashkil etish boʻlimi Jamgʻarmaning ishchi organi hisoblanadi.

25. Ishchi organ quyidagi funksiyalarni amalga oshiradi:

Jamgʻarmaning daromadlari va xarajatlarining yillik moliyaviy rejasini ishlab chiqadi;

daromadlar va xarajatlar smetalarini tayyorlaydi, shuningdek, ularga qonunchilik hujjatlarida belgilangan tartibda oʻzgartirishlar kiritadi;

Jamgʻarma tushumlarini koʻpaytirish va uning mablagʻlaridan samarali foydalanish boʻyicha takliflar tayyorlaydi;

ilmiy tashkilotlar hamda Jamgʻarmadan saqlash xarajatlari moliyalashtiriladigan tashkilotlarning Jamgʻarmadan mablagʻ ajratishga oid murojaatlarini umumlashtiradi va Kengashda koʻrib chiqish uchun materiallar tayyorlaydi;

Jamgʻarmaning tushumlar manbalari boʻyicha daromadlari hamda asosiy xarajatlar yoʻnalishlariga asosan hisobini yuritadi;

har yil yakuni boʻyicha Jamgʻarma mablagʻlaridan foydalanish toʻgʻrisida hisobot tayyorlaydi hamda Kengashga koʻrib chiqish va tasdiqlash uchun taqdim etadi.

26. Ishchi organ Jamgʻarma faoliyatini tashkil etish uchun vazirlik va idoralar hamda oliy taʼlim va ilmiy tashkilotlar vakillaridan iborat ekspert guruh(lar)ini tuzishi mumkin.

Ekspert guruh(lar)i faoliyatini tashkil etish tartibi Kengash qarori bilan tasdiqlanadi.

Bunda ekspert guruh(lar)ining har bir aʼzosiga yil yakuni boʻyicha Jamgʻarma mablagʻlari hisobidan bazaviy hisoblash miqdorining 50 baravari doirasida bir martalik mukofot puli (barcha soliqlar ushlab qolingan holda) beriladi.

4-bob. Jamgʻarma mablagʻlarining hisobi va hisobotini yuritish tartibi

27. Jamgʻarma mablagʻlarining hisobi va hisobotini yuritish hamda joriy xizmat koʻrsatish ishlari Akademiyaning Jamgʻarma faoliyatini tashkil etish boʻlimi tomonidan amalga oshiriladi.

28. Jamgʻarma mablagʻlaridan foydalanish boʻyicha hisob va hisobotlar Fanlar akademiyasining budjetdan tashqari boshqa mablagʻlaridan alohida yuritiladi.

29. Jamgʻarmaning daromadlar va xarajatlar smetasining ijrosi toʻgʻrisidagi yillik hisobot Kengash tomonidan koʻrib chiqiladi hamda har yili 15-martga qadar Fanlar akademiyasi Prezidiumi majlisida tasdiqlanadi.

30. Jamgʻarmaning daromadlar va xarajatlar smetasi hamda uning ijrosi toʻgʻrisidagi hisobotlar, shuningdek, tovarlar (ishlar, xizmatlar)ni xarid qilish boʻyicha tuzilgan shartnomalar roʻyxatlari Fanlar akademiyasining rasmiy veb-saytida eʼlon qilinadi.

31. Jamgʻarma mablagʻlaridan oqilona va maqsadli foydalanish yuzasidan davlat moliyaviy nazorati qonunchilik hujjatlarida belgilangan tartibda Davlat moliyaviy nazorati inspeksiyasi tomonidan amalga oshiriladi.

5-bob. Fanlar akademiyasining boshqaruv apparati va Qoraqalpogʻiston boʻlimi xodimlarini moddiy ragʻbatlantirish tartibi

32. Oʻzbekiston Respublikasi Prezidentining 2025-yil 27-dekabrdagi PQ-390-son qaroriga 6-ilovaga asosan Jamgʻarma mablagʻlari hisobidan Fanlar akademiyasi boshqaruv apparati va Qoraqalpogʻiston boʻlimi xodimlarining lavozim maoshiga oylik ustamalar quyidagi maqsadlar uchun va shakllarda toʻlanadi:

a) lavozim maoshiga 200 foizgacha miqdorda oylik ragʻbatlantirish ustama;

b) lavozim maoshiga nisbatan koʻp yillik ishlaganlik uchun quyidagi hajmda oylik ustama toʻlovlari (xizmat koʻrsatuvchi va texnik xodimlardan tashqari):

1 yildan 3 yilgacha — 0,3;

3 yildan 5 yilgacha — 0,6;

5 yildan 10 yilgacha — 0,8;

10 yildan 15 yilgacha — 1,0;

15 yildan 20 yilgacha — 1,2;

20 yildan yuqori — 1,5.

Bunda lavozim maoshiga nisbatan koʻp yillik ishlaganlik uchun oylik ustama toʻlovlari koeffitsiyentini hisoblashda mazkur xodimlarning Fanlar akademiyasi ilmiy tashkilotlaridagi rasmiy mehnat faoliyati davri hisobga olinadi.

33. Fanlar akademiyasi xodimlariga hisobot davri uchun (choraklik) mukofot pullari lavozim maoshiga (ragʻbatlantirish koeffitsiyentini hisobga olgan holda) nisbatan 200 foiz miqdorda toʻlanadi.

Oʻzbekiston Respublikasi Mehnat kodeksining 208-moddasi birinchi qismida belgilangan bayram kunlari munosabati bilan Fanlar akademiyasi xodimlariga mehnatga haq toʻlashning eng kam miqdorining oʻn baravari miqdorida mukofot pullari toʻlanadi.

34. Boshqa ijtimoiy, kompensatsiya va ragʻbatlantiruvchi tusdagi toʻlovlarga bir martalik moliyaviy yordam shaklida Fanlar akademiyasi Kasaba uyushmasining taklifiga binoan mablagʻlarning mavjudligiga qarab quyidagilar kiradi:

a) mehnatga haq toʻlashning eng kam miqdorining oʻn baravari miqdorigacha:

xodim nikohdan oʻtishi munosabati bilan;

xodimlar va ularning yaqin qarindoshlari (otasi, onasi, turmush oʻrtogʻi, farzandlari) kasal boʻlgan taqdirda;

xodim yubiley yoshiga toʻlganda (50, 60 va 70 yosh) va nafaqaga chiqqanda;

b) bazaviy hisoblash miqdorining 10 baravigacha — kuz mavsumida qishloq xoʻjaligi mahsulotlarini sotib olishga.

35. Fanlar akademiyasi boshqaruv apparati va Qoraqalpogʻiston boʻlimi rahbar va xodimlarining lavozim maoshlariga har oylik shaxsiy ustamalar va choraklik ragʻbatlantirishlar miqdori quyidagicha belgilanadi:

Fanlar akademiyasi prezidentiga — Oʻzbekiston Respublikasining Bosh vaziri tomonidan bir yillik uchun;

Fanlar akademiyasi boshqaruv apparati va Qoraqalpogʻiston boʻlimi raisiga — Fanlar akademiyasi prezidentining buyrugʻiga muvofiq belgilanadi.

Fanlar akademiyasi Qoraqalpogʻiston boʻlimi xodimlariga Qoraqalpogʻiston boʻlimi raisining buyrugʻiga muvofiq belgilanadi.

6-bob. Yakunlovchi qoidalar

36. Mazkur Nizomni qoʻllashda yuzaga keladigan nizolar qonunchilik hujjatlarida belgilangan tartibda hal etiladi.

37. Ushbu Nizom talablarining buzilishida aybdor boʻlgan shaxslar qonunchilik hujjatlarida belgilangan tartibda javob beradilar.

Vazirlar Mahkamasining 2026-yil 20-maydagi 260-son qaroriga 2-ILOVA

Vazirlar Mahkamasining “Oʻzbekiston Respublikasi Fanlar akademiyasi ilmiy tashkilotlarini moliyalashtirish tizimini takomillashtirish hamda samaradorligini oshirish chora-tadbirlari toʻgʻrisida” 2020-yil 8-iyundagi 366-son qaroriga kiritilayotgan qoʻshimchalar

30-ilovaning “Lavozim nomi” ustunida:

4-pozitsiya “bosh marketolog, xorijiy aloqalar boʻyicha bosh mutaxassis” soʻzlari bilan toʻldirilsin;

5-pozitsiya “yetakchi marketolog, xorijiy aloqalar boʻyicha yetakchi mutaxassis” soʻzlari bilan toʻldirilsin;

6-pozitsiya “marketolog, xorijiy aloqalar boʻyicha mutaxassis” soʻzlari bilan toʻldirilsin.

Oʻzbekiston Respublikasining Bosh vaziri A. ARIPOV

Toshkent sh.,

2026-yil 20-may,

260 -son

(Qonunchilik maʼlumotlari milliy bazasi, 20.05.2026-y., 09/26/260/0516-son)

lex.uz