UzbekAI

Ўзбекистон Республикаси Вазирлар Маҳкамасининг

қарори

НИЗОМ

схемаси

Божхона ҳудудида қайта ишланган тайёр маҳсулотларни эркин муомалага чиқаришда товарларнинг божхона қийматини белгилаш ва улар бўйича божхона тўловларини ҳисоблаш тартиби тўғрисидаги низомни тасдиқлаш ҳақида

Ўзбекистон Республикаси Президентининг «Божхона маъмуриятчилиги ва ташқи савдо тартиботларини янада соддалаштириш ва самарадорлигини ошириш чора-тадбирлари тўғрисида» 2025 йил 17 декабрдаги ПФ-250-сон Фармони ижросини таъминлаш мақсадида Вазирлар Маҳкамаси қарор қилади:

1. Қуйидагиларни назарда тутувчи Божхона ҳудудида қайта ишланган тайёр маҳсулотларни эркин муомалага чиқаришда товарларнинг божхона қийматини белгилаш ва улар бўйича божхона тўловларини ҳисоблаш тартиби тўғрисидаги низом иловага мувофиқ тасдиқлансин:

Жаҳон савдо ташкилоти билан ишлаш бўйича идоралараро комиссия томонидан божхона ҳудудида қайта ишланган тайёр маҳсулотларни эркин муомалага чиқаришда божхона қиймати белгиланадиган ва улар бўйича алоҳида божхона тўловлари ҳисобланадиган товарлар рўйхатини шакллантириш;

ушбу Комиссия томонидан шакллантирилган рўйхат бўйича қайта ишланадиган маҳсулотларни эркин муомалага чиқаришда божхона божини ҳисоблаш тартиби.

2. Иқтисодиёт ва молия вазирлиги ҳузуридаги Божхона қўмитаси манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.

3. Ушбу қарорнинг бажарилишини назорат қилиш Ўзбекистон Республикаси Бош вазирининг ўринбосари — иқтисодиёт ва молия вазири Ж.А. Қўчқоров зиммасига юклансин.

Вазирлар Маҳкамасининг 2026 йил 21 майдаги 266-сон қарорига ИЛОВА

Божхона ҳудудида қайта ишланган тайёр маҳсулотларни эркин муомалага чиқаришда товарларнинг божхона қийматини белгилаш ва улар бўйича божхона тўловларини ҳисоблаш тартиби тўғрисида

1-боб. Умумий қоидалар

1. Мазкур Низом божхона ҳудудида қайта ишланган тайёр маҳсулотларни (кейинги ўринларда — қайта ишланган тайёр маҳсулотлар) эркин муомалага чиқаришда товарларнинг божхона қийматини белгилаш ва улар бўйича божхона тўловларини ҳисоблаш тартибини белгилайди.

2. Қайта ишланадиган маҳсулотларни эркин муомалага чиқаришда импорт божхона божи қайта ишлаш учун олиб кирилган хомашё ва материалларнинг божхона қийматидан ва (ёки) қайта ишлаш маҳсулотларининг чиқиш нормасига мувофиқ ишлатилган миқдоридан (сонидан) ҳисобланади.

3. Товарларни қайта ишлаш учун олиб кириладиган хомашё ва материалларни божхона ҳудудида қайта ишлаш божхона режимидан сўнг эркин муомалага чиқаришда импорт божхона божи уларнинг келиб чиқиш мамлакатидан қатъи назар, бож тарифи билан белгиланган ставкалар миқдорида қайта ишлаш маҳсулотидан ундирилади.

4. Қонунчилик ҳужжатларида назарда тутилган божхона тўловларидан имтиёзлар қайта ишланадиган маҳсулотларига нисбатан қўлланади.

5. Ушбу Низом тажриба-синов тариқасида 2027 йил 1 мартга қадар амал қилади.

6. Божхона ҳудудида қайта ишланган тайёр маҳсулотларни эркин муомалага чиқаришда божхона божи мазкур Низомга иловага мувофиқ схема асосида ҳисобланади.

2-боб. Комиссия томонидан товарлар рўйхатини шакллантириш

7. Жаҳон савдо ташкилоти билан ишлаш бўйича идоралараро комиссия (кейинги ўринларда — Комиссия) томонидан тайёр маҳсулотлар учун божхона божи суммасидан кўра уларни ишлаб чиқаришда ишлатиладиган хомашё ва материаллар импорти учун ундириладиган божхона божи суммаси баландроқ ҳисобланадиган товарлар рўйхати (кейинги ўринларда — товарлар рўйхати) манфаатдор вазирлик ва идоралар таклифларига асосан шакллантирилади.

Ушбу жараёнда тадбиркорлик субъектларининг иштирокини кенгайтириш мақсадида, улар томонидан шакллантирилган таклифлар Саноат кооперацияси ва давлат харидлари агентлиги орқали Жаҳон савдо ташкилоти билан ишлаш бўйича идоралараро комиссияга тақдим этилиши мумкин.

Таклиф этилаётган товарлар бўйича республика ҳудудида ишлаб чиқариш салоҳияти мавжуд ёки ишлаб чиқаришни ташкил этиш режалаштирилган бўлиши, қайта ишлаб чиқиш нормалари, ҳисоб-китоблари ҳамда технологик жараёнлари техник-иқтисодий асослар билан тасдиқланган бўлиши лозим.

Мисол учун, 1 дона LED лампани тўғридан-тўғри импорт қилишда ва шу лампани ишлаб чиқариш учун компонентларни олиб киришда импорт божхона божи қуйидагича ҳисобланади (ставкалар ва қийматлар шартли):

1) тайёр LED лампани тўғридан-тўғри импорт қилишда:

божхона қиймати = 2 АҚШ доллари/дона;

божхона божи ставкаси = 5 фоиз;

импорт божхона божи ҳисоби: 2 × 5 фоиз = 0,10 АҚШ доллари;

2) LED лампани ишлаб чиқариш учун компонентларни импорт қилишда:

а) LED чип/модули:

божхона қиймати = 0,80 АҚШ доллари;

божхона божи ставкаси = 10 фоиз;

импорт божхона божи ҳисоби: 0,80 × 10 фоиз = 0,08 АҚШ доллари;

б) драйвер (электрон блок):

божхона қиймати = 0,50 АҚШ доллари;

божхона божи ставкаси = 10 фоиз;

импорт божхона божи ҳисоби: 0,50 × 10 фоиз = 0,05 АҚШ доллари;

в) корпус/радиатор:

божхона қиймати = 0,40 АҚШ доллари;

божхона божи ставкаси = 15 фоиз;

импорт божхона божи ҳисоби: 0,40 × 15 фоиз = 0,06 АҚШ доллари;

г) колба/диффузор:

божхона қиймати = 0,20 АҚШ доллари;

божхона божи ставкаси = 15 фоиз;

импорт божхона божи ҳисоби: 0,20 × 15 фоиз = 0,03 АҚШ доллари.

Жами импорт қилинган компонентлар божхона божи = 0,22 АҚШ доллари;

3) солиштириш (натижа):

тайёр маҳсулот импортида божхона божи: 0,10 АҚШ доллари;

компонентлар импортида жами божхона божи: 0,22 АҚШ доллари;

ўртадаги фарқ = 0,12 АҚШ доллари.

Мазкур мисолда LED лампани ишлаб чиқариш учун компонентларни импорт қилишда ундириладиган импорт божхона божи суммаси тайёр маҳсулотни тўғридан-тўғри импорт қилишда ундириладиган импорт божхона божи суммасидан юқори ҳисобланади.

8. Комиссия томонидан 15 иш кунида киритилган таклифлар кўриб чиқилади, тайёр маҳсулотлар учун божхона божи суммасидан кўра уларни ишлаб чиқаришда ишлатиладиган хомашё ва материаллар импорти учун ундириладиган божхона божи суммаси баландроқ ҳисобланадиган товарлар рўйхати ҳар ойнинг 5-санасига қадар Комиссия баёни билан тасдиқланади.

3-боб. Комиссия томонидан шакллантирилган рўйхат бўйича қайта ишланган тайёр маҳсулотни эркин муомалага чиқаришда божхона божини ҳисоблаш тартиби

9. Рўйхатдаги товарларни қайта ишлаш учун олиб кириладиган хомашё ва материалларни божхона ҳудудида қайта ишлангандан сўнг эркин муомалага чиқаришда божхона божи қайта ишлаш маҳсулотидан ҳисобланади ва ундирилади.

10. Импорт божхона божи қуйидаги формула асосида ҳисобланади:

B = C × D

бунда:

B — ҳисобланадиган божхона божи суммаси;

C — олиб кирилган хомашё ёки материалнинг божхона қиймати (шартнома валютасида);

D — қайта ишланган тайёр маҳсулотларга нисбатан божхона божи ставкаси (%).

11. Рўйхат бўйича қайта ишланган тайёр маҳсулотларни эркин муомалага чиқаришда божхона тўловлари декларант ёки божхона брокери томонидан ҳисоб-китоб қилинади ва божхона декларациясининг тегишли графаларида белгиланган тартибда акс эттирилади.

12. Божхона органлари рўйхатдаги қайта ишланган маҳсулотларни эркин муомалага чиқаришда:

қайта ишланган тайёр маҳсулотларнинг божхона қиймати тўғри аниқлангани;

қўлланилган импорт божхона божи тўғри ҳисоблангани;

ҳисоб-китоблар мазкур Низом талабларига мувофиқ амалга оширилганини назорат қилади.

13. Рўйхат бўйича қайта ишланган тайёр маҳсулотларни эркин муомалага чиқариш декларацияси расмийлаштирилгандан сўнг эркин муомалага чиқарилган деб ҳисобланади.

4-боб. Якунловчи қоида

14. Мазкур Низом талаблари бузилишида айбдор бўлган шахслар қонунчилик ҳужжатларида белгиланган тартибда жавоб беради.

Божхона ҳудудида қайта ишланган тайёр маҳсулотларни эркин муомалага чиқаришда товарларнинг божхона қийматини белгилаш ва улар бўйича божхона тўловларини ҳисоблаш тартиби тўғрисидаги низомга ИЛОВА

Божхона ҳудудида қайта ишланган тайёр маҳсулотларни эркин муомалага чиқаришда божхона божини ҳисоблаш

Босқичлар Субъектлар Тадбирлар Муддат 1-босқич Манфаатдор вазирлик ва идоралар Тайёр маҳсулотлар учун божхона божи суммасидан кўра уларни ишлаб чиқаришда ишлатиладиган хомашё ва материаллар импорти учун ундириладиган божхона божи суммаси баландроқ ҳисобланадиган товарлар рўйхатига товарларни киритиш бўйича таклифларни Комиссияга юборади. Доимий Тадбиркорлик субъектлари Саноат кооперацияси ва давлат харидлари агентлиги орқали 2-босқич Жаҳон савдо ташкилоти билан ишлаш бўйича идоралараро комиссия Таклифлар Комиссия томонидан 15 иш кунида кўриб чиқилиб, маъқул деб топилган товарлар рўйхати Комиссия баёни билан тасдиқланади. Ҳар ойнинг 5-санасида 3-босқич Ваколатли шахс (декларант ёки божхона брокери) Рўйхат бўйича қайта ишланган тайёр маҳсулотларни эркин муомалага чиқаришда божхона тўловларини ҳисоб-китоб қилиб, божхона декларациясининг тегишли графаларида белгиланган тартибда акс эттиради. Қайта ишлаш учун берилган рухсатномада кўрсатилган муддат тугагунига қадар 4-босқич Божхона органлари Қуйидагиларни: қайта ишланган маҳсулотларнинг божхона қиймати тўғри аниқлангани; қўлланилган импорт божхона божи тўғри ҳисоблангани; ҳисоб-китоблар мазкур Низом талабларига мувофиқ амалга оширилганини назорат қилади. Қайта ишлаш маҳсулотини эркин муомалага чиқаришда

Ўзбекистон Республикасининг Бош вазири А. АРИПОВ

Тошкент ш.,

2026 йил 21 май,

266-сон

(Қонунчилик маълумотлари миллий базаси, 21.05.2026 й., 09/26/266/0523-сон)

lex.uz

Oʻzbekiston Respublikasi Vazirlar Mahkamasining

qarori

NIZOM

sxemasi

Bojxona hududida qayta ishlangan tayyor mahsulotlarni erkin muomalaga chiqarishda tovarlarning bojxona qiymatini belgilash va ular boʻyicha bojxona toʻlovlarini hisoblash tartibi toʻgʻrisidagi nizomni tasdiqlash haqida

Oʻzbekiston Respublikasi Prezidentining “Bojxona maʼmuriyatchiligi va tashqi savdo tartibotlarini yanada soddalashtirish va samaradorligini oshirish chora-tadbirlari toʻgʻrisida” 2025-yil 17-dekabrdagi PF-250-son Farmoni ijrosini taʼminlash maqsadida Vazirlar Mahkamasi qaror qiladi:

1. Quyidagilarni nazarda tutuvchi Bojxona hududida qayta ishlangan tayyor mahsulotlarni erkin muomalaga chiqarishda tovarlarning bojxona qiymatini belgilash va ular boʻyicha bojxona toʻlovlarini hisoblash tartibi toʻgʻrisidagi nizom ilovaga muvofiq tasdiqlansin:

Jahon savdo tashkiloti bilan ishlash boʻyicha idoralararo komissiya tomonidan bojxona hududida qayta ishlangan tayyor mahsulotlarni erkin muomalaga chiqarishda bojxona qiymati belgilanadigan va ular boʻyicha alohida bojxona toʻlovlari hisoblanadigan tovarlar roʻyxatini shakllantirish;

ushbu Komissiya tomonidan shakllantirilgan roʻyxat boʻyicha qayta ishlanadigan mahsulotlarni erkin muomalaga chiqarishda bojxona bojini hisoblash tartibi.

2. Iqtisodiyot va moliya vazirligi huzuridagi Bojxona qoʻmitasi manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

3. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari — iqtisodiyot va moliya vaziri J.A. Qoʻchqorov zimmasiga yuklansin.

Vazirlar Mahkamasining 2026-yil 21-maydagi 266-son qaroriga ILOVA

Bojxona hududida qayta ishlangan tayyor mahsulotlarni erkin muomalaga chiqarishda tovarlarning bojxona qiymatini belgilash va ular boʻyicha bojxona toʻlovlarini hisoblash tartibi toʻgʻrisida

1-bob. Umumiy qoidalar

1. Mazkur Nizom bojxona hududida qayta ishlangan tayyor mahsulotlarni (keyingi oʻrinlarda — qayta ishlangan tayyor mahsulotlar) erkin muomalaga chiqarishda tovarlarning bojxona qiymatini belgilash va ular boʻyicha bojxona toʻlovlarini hisoblash tartibini belgilaydi.

2. Qayta ishlanadigan mahsulotlarni erkin muomalaga chiqarishda import bojxona boji qayta ishlash uchun olib kirilgan xomashyo va materiallarning bojxona qiymatidan va (yoki) qayta ishlash mahsulotlarining chiqish normasiga muvofiq ishlatilgan miqdoridan (sonidan) hisoblanadi.

3. Tovarlarni qayta ishlash uchun olib kiriladigan xomashyo va materiallarni bojxona hududida qayta ishlash bojxona rejimidan soʻng erkin muomalaga chiqarishda import bojxona boji ularning kelib chiqish mamlakatidan qatʼi nazar, boj tarifi bilan belgilangan stavkalar miqdorida qayta ishlash mahsulotidan undiriladi.

4. Qonunchilik hujjatlarida nazarda tutilgan bojxona toʻlovlaridan imtiyozlar qayta ishlanadigan mahsulotlariga nisbatan qoʻllanadi.

5. Ushbu Nizom tajriba-sinov tariqasida 2027-yil 1-martga qadar amal qiladi.

6. Bojxona hududida qayta ishlangan tayyor mahsulotlarni erkin muomalaga chiqarishda bojxona boji mazkur Nizomga ilovaga muvofiq sxema asosida hisoblanadi.

2-bob. Komissiya tomonidan tovarlar roʻyxatini shakllantirish

7. Jahon savdo tashkiloti bilan ishlash boʻyicha idoralararo komissiya (keyingi oʻrinlarda — Komissiya) tomonidan tayyor mahsulotlar uchun bojxona boji summasidan koʻra ularni ishlab chiqarishda ishlatiladigan xomashyo va materiallar importi uchun undiriladigan bojxona boji summasi balandroq hisoblanadigan tovarlar roʻyxati (keyingi oʻrinlarda — tovarlar roʻyxati) manfaatdor vazirlik va idoralar takliflariga asosan shakllantiriladi.

Ushbu jarayonda tadbirkorlik subyektlarining ishtirokini kengaytirish maqsadida, ular tomonidan shakllantirilgan takliflar Sanoat kooperatsiyasi va davlat xaridlari agentligi orqali Jahon savdo tashkiloti bilan ishlash boʻyicha idoralararo komissiyaga taqdim etilishi mumkin.

Taklif etilayotgan tovarlar boʻyicha respublika hududida ishlab chiqarish salohiyati mavjud yoki ishlab chiqarishni tashkil etish rejalashtirilgan boʻlishi, qayta ishlab chiqish normalari, hisob-kitoblari hamda texnologik jarayonlari texnik-iqtisodiy asoslar bilan tasdiqlangan boʻlishi lozim.

Misol uchun, 1 dona LED lampani toʻgʻridan-toʻgʻri import qilishda va shu lampani ishlab chiqarish uchun komponentlarni olib kirishda import bojxona boji quyidagicha hisoblanadi (stavkalar va qiymatlar shartli):

1) tayyor LED lampani toʻgʻridan-toʻgʻri import qilishda:

bojxona qiymati = 2 AQSH dollari/dona;

bojxona boji stavkasi = 5 foiz;

import bojxona boji hisobi: 2 × 5 foiz = 0,10 AQSH dollari;

2) LED lampani ishlab chiqarish uchun komponentlarni import qilishda:

a) LED chip/moduli:

bojxona qiymati = 0,80 AQSH dollari;

bojxona boji stavkasi = 10 foiz;

import bojxona boji hisobi: 0,80 × 10 foiz = 0,08 AQSH dollari;

b) drayver (elektron blok):

bojxona qiymati = 0,50 AQSH dollari;

bojxona boji stavkasi = 10 foiz;

import bojxona boji hisobi: 0,50 × 10 foiz = 0,05 AQSH dollari;

v) korpus/radiator:

bojxona qiymati = 0,40 AQSH dollari;

bojxona boji stavkasi = 15 foiz;

import bojxona boji hisobi: 0,40 × 15 foiz = 0,06 AQSH dollari;

g) kolba/diffuzor:

bojxona qiymati = 0,20 AQSH dollari;

bojxona boji stavkasi = 15 foiz;

import bojxona boji hisobi: 0,20 × 15 foiz = 0,03 AQSH dollari.

Jami import qilingan komponentlar bojxona boji = 0,22 AQSH dollari;

3) solishtirish (natija):

tayyor mahsulot importida bojxona boji: 0,10 AQSH dollari;

komponentlar importida jami bojxona boji: 0,22 AQSH dollari;

oʻrtadagi farq = 0,12 AQSH dollari.

Mazkur misolda LED lampani ishlab chiqarish uchun komponentlarni import qilishda undiriladigan import bojxona boji summasi tayyor mahsulotni toʻgʻridan-toʻgʻri import qilishda undiriladigan import bojxona boji summasidan yuqori hisoblanadi.

8. Komissiya tomonidan 15 ish kunida kiritilgan takliflar koʻrib chiqiladi, tayyor mahsulotlar uchun bojxona boji summasidan koʻra ularni ishlab chiqarishda ishlatiladigan xomashyo va materiallar importi uchun undiriladigan bojxona boji summasi balandroq hisoblanadigan tovarlar roʻyxati har oyning 5-sanasiga qadar Komissiya bayoni bilan tasdiqlanadi.

3-bob. Komissiya tomonidan shakllantirilgan roʻyxat boʻyicha qayta ishlangan tayyor mahsulotni erkin muomalaga chiqarishda bojxona bojini hisoblash tartibi

9. Roʻyxatdagi tovarlarni qayta ishlash uchun olib kiriladigan xomashyo va materiallarni bojxona hududida qayta ishlangandan soʻng erkin muomalaga chiqarishda bojxona boji qayta ishlash mahsulotidan hisoblanadi va undiriladi.

10. Import bojxona boji quyidagi formula asosida hisoblanadi:

B = C × D

bunda:

B — hisoblanadigan bojxona boji summasi;

C — olib kirilgan xomashyo yoki materialning bojxona qiymati (shartnoma valyutasida);

D — qayta ishlangan tayyor mahsulotlarga nisbatan bojxona boji stavkasi (%).

11. Roʻyxat boʻyicha qayta ishlangan tayyor mahsulotlarni erkin muomalaga chiqarishda bojxona toʻlovlari deklarant yoki bojxona brokeri tomonidan hisob-kitob qilinadi va bojxona deklaratsiyasining tegishli grafalarida belgilangan tartibda aks ettiriladi.

12. Bojxona organlari roʻyxatdagi qayta ishlangan mahsulotlarni erkin muomalaga chiqarishda:

qayta ishlangan tayyor mahsulotlarning bojxona qiymati toʻgʻri aniqlangani;

qoʻllanilgan import bojxona boji toʻgʻri hisoblangani;

hisob-kitoblar mazkur Nizom talablariga muvofiq amalga oshirilganini nazorat qiladi.

13. Roʻyxat boʻyicha qayta ishlangan tayyor mahsulotlarni erkin muomalaga chiqarish deklaratsiyasi rasmiylashtirilgandan soʻng erkin muomalaga chiqarilgan deb hisoblanadi.

4-bob. Yakunlovchi qoida

14. Mazkur Nizom talablari buzilishida aybdor boʻlgan shaxslar qonunchilik hujjatlarida belgilangan tartibda javob beradi.

Bojxona hududida qayta ishlangan tayyor mahsulotlarni erkin muomalaga chiqarishda tovarlarning bojxona qiymatini belgilash va ular boʻyicha bojxona toʻlovlarini hisoblash tartibi toʻgʻrisidagi nizomga ILOVA

Bojxona hududida qayta ishlangan tayyor mahsulotlarni erkin muomalaga chiqarishda bojxona bojini hisoblash

Bosqichlar Subyektlar Tadbirlar Muddat 1-bosqich Manfaatdor vazirlik va idoralar Tayyor mahsulotlar uchun bojxona boji summasidan koʻra ularni ishlab chiqarishda ishlatiladigan xomashyo va materiallar importi uchun undiriladigan bojxona boji summasi balandroq hisoblanadigan tovarlar roʻyxatiga tovarlarni kiritish boʻyicha takliflarni Komissiyaga yuboradi. Doimiy Tadbirkorlik subyektlari Sanoat kooperatsiyasi va davlat xaridlari agentligi orqali 2-bosqich Jahon savdo tashkiloti bilan ishlash boʻyicha idoralararo komissiya Takliflar Komissiya tomonidan 15 ish kunida koʻrib chiqilib, maʼqul deb topilgan tovarlar roʻyxati Komissiya bayoni bilan tasdiqlanadi. Har oyning 5-sanasida 3-bosqich Vakolatli shaxs (deklarant yoki bojxona brokeri) Roʻyxat boʻyicha qayta ishlangan tayyor mahsulotlarni erkin muomalaga chiqarishda bojxona toʻlovlarini hisob-kitob qilib, bojxona deklaratsiyasining tegishli grafalarida belgilangan tartibda aks ettiradi. Qayta ishlash uchun berilgan ruxsatnomada koʻrsatilgan muddat tugaguniga qadar 4-bosqich Bojxona organlari Quyidagilarni: qayta ishlangan mahsulotlarning bojxona qiymati toʻgʻri aniqlangani; qoʻllanilgan import bojxona boji toʻgʻri hisoblangani; hisob-kitoblar mazkur Nizom talablariga muvofiq amalga oshirilganini nazorat qiladi. Qayta ishlash mahsulotini erkin muomalaga chiqarishda

Oʻzbekiston Respublikasining Bosh vaziri A. ARIPOV

Toshkent sh.,

2026-yil 21-may,

266-son

(Qonunchilik maʼlumotlari milliy bazasi, 21.05.2026-y., 09/26/266/0523-son)

lex.uz