📅 2026-yil 20-may · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2026 йил 20 май · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 20 мая 2026 г. · Постановления Кабинета Министров
Официальный текст. Официальный документ. Редакционные примечания не включены.
📅 20 May 2026 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Чирчиқ шаҳрида қаровсиз ҳайвонларни тутиш ва сақлаш тизимини такомиллаштириш тўғрисида
Қаровсиз ҳайвонларни тутиш, парваришлар ва сақлаш соҳасида замонавий ёндашувларни жорий қилиш, ушбу жараёнда жамоатчиликнинг фаол ёрдамидан фойдаланиш, ушбу ҳайвонларга нисбатан инсонпарвар муносабатда бўлиш принципларини кенг тарғиб этиш, ҳудудларда барча шароитларга эга янги типдаги питомникларни ташкил қилиш мақсадида Вазирлар Маҳкамаси қарор қилади:
1. Қуйидагилар:
Чирчиқ шаҳридаги «Маърифат» МФЙ ҳудудида қаровсиз қолган ҳайвонларни сақлаш питомниги ташкил этилгани;
2024 йилдан бошлаб қаровсиз қолган ҳайвонларни сақлаш питомниги ташқи бошқарувга берилгани;
қаровсиз қолган ҳайвонларни сақлаш питомнигида асосан кўнгилли ишчилар (волонтёрлар) меҳнат қилаётгани ва доимий равишда 600 тадан 1 000 тагача ҳайвонлар сақланаётгани;
бугунги кунда ташқи бошқарувчининг молиявий ҳолати барқарор эмаслиги, ҳомийлик маблағлари эса даврийлиги сабабли питомникни сақлаш билан боғлиқ харажатларни қоплашда қийинчиликлар юзага келаётгани маълумот учун қабул қилинсин.
2. Тошкент вилояти ҳокимлиги ҳамда Қишлоқ хўжалиги вазирлиги ҳузуридаги Ветеринария ва чорвачиликни ривожлантириш қўмитасининг:
Чирчиқ шаҳридаги «Маърифат» МФЙ ҳудудида жойлашган қаровсиз қолган ҳайвонларни сақлаш питомниги негизида замонавий ёндашувлар асосида 4 минг бош қаровсиз қолган ҳайвонларни сақлаш учун мўлжалланган янги питомникни (кейинги ўринларда — питомник) қуриш ва жиҳозлаш;
питомникни лойиҳалаштириш, қуриш ва жиҳозлаш ишлари бўйича буюртмачи функциясини Чирчиқ шаҳри ҳокимлиги ҳузуридаги Ободонлаштириш бошқармасига юклаш;
питомник ҳудудида ветеринария пунктлари, карантин зоналари ва изоляция хоналарини ташкил этиш;
Чирчиқ шаҳри ҳокимлиги ҳузуридаги Ободонлаштириш бошқармасининг Қаровсиз қолган ҳайвонларни тутиш бўлими (кейинги ўринларда — ҳайвонларни тутиш бўлими) штат бирликларини амалдаги 2 нафардан 15 нафаргача ошириш тўғрисидаги таклифлари маъқуллансин.
3. Ҳайвонларни тутиш бўлимига қуйидаги қўшимча вазифалар юклансин:
питомник фаолиятини ягона бошқарув тизими асосида ташкил этиш, қаровсиз ҳайвонларни тутиш, ташиш, вақтинча сақлаш ҳамда уларга ветеринария хизматларини кўрсатиш;
жисмоний ва юридик шахсларнинг уй ҳайвонларини парваришлаш, стерилизация, вакцинация қилиш ҳамда уларни чиплаш бўйича пулли хизматларни кўрсатиш;
питомник фаолиятини рақамлаштириш, ҳайвонларни ҳисобга олишнинг ягона электрон реестрини юритиш, ҳар бир ҳайвонга идентификация воситаларини жорий этиш;
қаровсиз ҳайвонлар сонини қисқартириш (крематорий, стерилизация, кострация ва бошқалар) бўйича комплекс чора-тадбирлар дастурини амалга ошириш;
нодавлат нотижорат ташкилотлари, волонтёрлар ва хайрия жамғармалари билан ҳамкорликни йўлга қўйиш, хайрия маблағлари ва грантларни жалб этиш;
питомникнинг молиявий-иқтисодий барқарорлигини таъминлаш, даромад ва харажатларнинг шаффоф ҳисобини юритиш, питомникни босқичма-босқич ўзини ўзи молиялаштириш тизимига ўтказиш.
4. Белгилансинки, қуйидаги харажатлар:
2026 йилда питомникни қуриш, жиҳозлаш, унинг атрофини ободонлаштириш, фаолият юритишини таъминлаш, шунингдек, ҳайвонларни тутиш бўлимига ажратилган қўшимча 13 штат бирликларини сақлаш — Вазирлар Маҳкамасининг захира жамғармаси ҳисобидан;
ҳайвонларни тутиш бўлими учун 2 та махсус автотранспорт воситалари, кийим-кечак ва зарур тутиш анжомларини харид қилиш — Чирчиқ шаҳри маҳаллий бюджети ҳисобидан амалга оширилади.
5. Иқтисодиёт ва молия вазирлиги бир ой муддатда питомникни қуриш, жиҳозлаш, унинг атрофини ободонлаштириш, фаолият юритишини таъминлаш, шунингдек, ҳайвонларни тутиш бўлимига ажратилган қўшимча штат бирликларини сақлаш учун Вазирлар Маҳкамасининг захира жамғармасидан Чирчиқ шаҳри ҳокимлиги ҳузуридаги Ободонлаштириш бошқармасига 8 миллиард сўм ажратсин.
Тошкент вилояти ҳокимлиги Иқтисодиёт ва молия вазирлиги билан биргаликда 2027 йилдан бошлаб питомникнинг фаолият юритишини таъминлаш, шунингдек, ҳайвонларни тутиш бўлимига ажратилган қўшимча штат бирликларини сақлаш учун зарур маблағлар Чирчиқ шаҳри маҳаллий бюджети параметрларида назарда тутилишини таъминласин.
6. Чирчиқ шаҳри ҳокимлиги ҳузуридаги Ободонлаштириш бошқармасига ажратилган маблағлар ҳисобидан қурилиш соҳасида техник назорат қилувчи малакали мутахассисларни (консультантларни) тўғридан-тўғри шартномалар асосида вақтинчалик жалб қилишга рухсат берилсин.
7. Тошкент вилояти ҳокимлиги Қишлоқ хўжалиги вазирлиги ҳузуридаги Ветеринария ва чорвачиликни ривожлантириш қўмитаси билан биргаликда:
2026 йил 1 ноябрга қадар питомникни қуриш, жиҳозлаш ва унинг атрофини ободонлаштириш чораларини кўрсин. Бунда питомник инфратузилмасини модернизация қилиш ва қўшимча даромад манбаларини яратиш мақсадида унинг ҳудудида зоотоварлар дўкони, ветеринария дорихонаси ва ўқув майдончаларини ташкил этсин;
питомник фаолиятини оммавий ахборот воситалари ва ижтимоий тармоқларда кенг ёритсин ҳамда ҳайвонларни асраб олиш маданиятини тарғиб қилсин;
2028 йил якунига қадар питомникда пулли хизматлар турларини кўпайтириш орқали уни босқичма-босқич ўзини ўзи молиялаштириш тизимига ўтказсин.
8. Ушбу қарорнинг бажарилишини назорат қилиш Ўзбекистон Республикаси Бош вазирининг ўринбосари — иқтисодиёт ва молия вазири Ж.А. Қўчқоров ҳамда Тошкент вилояти ҳокими З.Т. Мирзаев зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2026 йил 20 май,
265 -сон
Oʻzbekiston Respublikasi Vazirlar Mahkamasining
qarori
Chirchiq shahrida qarovsiz hayvonlarni tutish va saqlash tizimini takomillashtirish toʻgʻrisida
Qarovsiz hayvonlarni tutish, parvarishlar va saqlash sohasida zamonaviy yondashuvlarni joriy qilish, ushbu jarayonda jamoatchilikning faol yordamidan foydalanish, ushbu hayvonlarga nisbatan insonparvar munosabatda boʻlish prinsiplarini keng targʻib etish, hududlarda barcha sharoitlarga ega yangi tipdagi pitomniklarni tashkil qilish maqsadida Vazirlar Mahkamasi qaror qiladi:
1. Quyidagilar:
Chirchiq shahridagi “Maʼrifat” MFY hududida qarovsiz qolgan hayvonlarni saqlash pitomnigi tashkil etilgani;
2024-yildan boshlab qarovsiz qolgan hayvonlarni saqlash pitomnigi tashqi boshqaruvga berilgani;
qarovsiz qolgan hayvonlarni saqlash pitomnigida asosan koʻngilli ishchilar (volontyorlar) mehnat qilayotgani va doimiy ravishda 600 tadan 1 000 tagacha hayvonlar saqlanayotgani;
bugungi kunda tashqi boshqaruvchining moliyaviy holati barqaror emasligi, homiylik mablagʻlari esa davriyligi sababli pitomnikni saqlash bilan bogʻliq xarajatlarni qoplashda qiyinchiliklar yuzaga kelayotgani maʼlumot uchun qabul qilinsin.
2. Toshkent viloyati hokimligi hamda Qishloq xoʻjaligi vazirligi huzuridagi Veterinariya va chorvachilikni rivojlantirish qoʻmitasining:
Chirchiq shahridagi “Maʼrifat” MFY hududida joylashgan qarovsiz qolgan hayvonlarni saqlash pitomnigi negizida zamonaviy yondashuvlar asosida 4 ming bosh qarovsiz qolgan hayvonlarni saqlash uchun moʻljallangan yangi pitomnikni (keyingi oʻrinlarda — pitomnik) qurish va jihozlash;
pitomnikni loyihalashtirish, qurish va jihozlash ishlari boʻyicha buyurtmachi funksiyasini Chirchiq shahri hokimligi huzuridagi Obodonlashtirish boshqarmasiga yuklash;
pitomnik hududida veterinariya punktlari, karantin zonalari va izolyatsiya xonalarini tashkil etish;
Chirchiq shahri hokimligi huzuridagi Obodonlashtirish boshqarmasining Qarovsiz qolgan hayvonlarni tutish boʻlimi (keyingi oʻrinlarda — hayvonlarni tutish boʻlimi) shtat birliklarini amaldagi 2 nafardan 15 nafargacha oshirish toʻgʻrisidagi takliflari maʼqullansin.
3. Hayvonlarni tutish boʻlimiga quyidagi qoʻshimcha vazifalar yuklansin:
pitomnik faoliyatini yagona boshqaruv tizimi asosida tashkil etish, qarovsiz hayvonlarni tutish, tashish, vaqtincha saqlash hamda ularga veterinariya xizmatlarini koʻrsatish;
jismoniy va yuridik shaxslarning uy hayvonlarini parvarishlash, sterilizatsiya, vaksinatsiya qilish hamda ularni chiplash boʻyicha pulli xizmatlarni koʻrsatish;
pitomnik faoliyatini raqamlashtirish, hayvonlarni hisobga olishning yagona elektron reyestrini yuritish, har bir hayvonga identifikatsiya vositalarini joriy etish;
qarovsiz hayvonlar sonini qisqartirish (krematoriy, sterilizatsiya, kostratsiya va boshqalar) boʻyicha kompleks chora-tadbirlar dasturini amalga oshirish;
nodavlat notijorat tashkilotlari, volontyorlar va xayriya jamgʻarmalari bilan hamkorlikni yoʻlga qoʻyish, xayriya mablagʻlari va grantlarni jalb etish;
pitomnikning moliyaviy-iqtisodiy barqarorligini taʼminlash, daromad va xarajatlarning shaffof hisobini yuritish, pitomnikni bosqichma-bosqich oʻzini oʻzi moliyalashtirish tizimiga oʻtkazish.
4. Belgilansinki, quyidagi xarajatlar:
2026-yilda pitomnikni qurish, jihozlash, uning atrofini obodonlashtirish, faoliyat yuritishini taʼminlash, shuningdek, hayvonlarni tutish boʻlimiga ajratilgan qoʻshimcha 13 shtat birliklarini saqlash — Vazirlar Mahkamasining zaxira jamgʻarmasi hisobidan;
hayvonlarni tutish boʻlimi uchun 2 ta maxsus avtotransport vositalari, kiyim-kechak va zarur tutish anjomlarini xarid qilish — Chirchiq shahri mahalliy budjeti hisobidan amalga oshiriladi.
5. Iqtisodiyot va moliya vazirligi bir oy muddatda pitomnikni qurish, jihozlash, uning atrofini obodonlashtirish, faoliyat yuritishini taʼminlash, shuningdek, hayvonlarni tutish boʻlimiga ajratilgan qoʻshimcha shtat birliklarini saqlash uchun Vazirlar Mahkamasining zaxira jamgʻarmasidan Chirchiq shahri hokimligi huzuridagi Obodonlashtirish boshqarmasiga 8 milliard soʻm ajratsin.
Toshkent viloyati hokimligi Iqtisodiyot va moliya vazirligi bilan birgalikda 2027-yildan boshlab pitomnikning faoliyat yuritishini taʼminlash, shuningdek, hayvonlarni tutish boʻlimiga ajratilgan qoʻshimcha shtat birliklarini saqlash uchun zarur mablagʻlar Chirchiq shahri mahalliy budjeti parametrlarida nazarda tutilishini taʼminlasin.
6. Chirchiq shahri hokimligi huzuridagi Obodonlashtirish boshqarmasiga ajratilgan mablagʻlar hisobidan qurilish sohasida texnik nazorat qiluvchi malakali mutaxassislarni (konsultantlarni) toʻgʻridan-toʻgʻri shartnomalar asosida vaqtinchalik jalb qilishga ruxsat berilsin.
7. Toshkent viloyati hokimligi Qishloq xoʻjaligi vazirligi huzuridagi Veterinariya va chorvachilikni rivojlantirish qoʻmitasi bilan birgalikda:
2026-yil 1-noyabrga qadar pitomnikni qurish, jihozlash va uning atrofini obodonlashtirish choralarini koʻrsin. Bunda pitomnik infratuzilmasini modernizatsiya qilish va qoʻshimcha daromad manbalarini yaratish maqsadida uning hududida zootovarlar doʻkoni, veterinariya dorixonasi va oʻquv maydonchalarini tashkil etsin;
pitomnik faoliyatini ommaviy axborot vositalari va ijtimoiy tarmoqlarda keng yoritsin hamda hayvonlarni asrab olish madaniyatini targʻib qilsin;
2028-yil yakuniga qadar pitomnikda pulli xizmatlar turlarini koʻpaytirish orqali uni bosqichma-bosqich oʻzini oʻzi moliyalashtirish tizimiga oʻtkazsin.
8. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari — iqtisodiyot va moliya vaziri J.A. Qoʻchqorov hamda Toshkent viloyati hokimi Z.T. Mirzayev zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2026-yil 20-may,
265 -son