UzbekAI

ЎЗБЕКИСТОН РЕСПУБЛИКАСИ ПРЕЗИДЕНТИНИНГ

ФАРМОЙИШИ

Бирлашган Араб Амирликлари билан ҳамкорликда «Сифатли давлат бошқаруви» дастурини амалга ошириш чора-тадбирлари тўғрисида

Ўзбекистон Республикаси ва Бирлашган Араб Амирликлари ўртасидаги икки томонлама муносабатларни янада мустаҳкамлаш, давлат бошқаруви тизимини такомиллаштириш соҳасида Бирлашган Араб Амирликларининг илғор тажрибасини жорий этиш, шунингдек, республика ижро этувчи ҳокимият органлари фаолияти самарадорлигини ягона мезонлар асосида баҳолаш тизимини йўлга қўйиш мақсадида қарор қиламан:

1. Қуйидагилар:

(а) Ўзбекистон Республикаси ва Бирлашган Араб Амирликлари ўртасидаги икки томонлама келишувлар доирасида «Сифатли давлат бошқаруви» дастурини (кейинги ўринларда — Дастур) амалга ошириш юзасидан ўзаро келишувга эришилгани;

(б) Ўзбекистон Республикаси Президенти ҳузуридаги Стратегик ривожланиш ва ислоҳотлар агентлиги (кейинги ўринларда — Агентлик) Бошқарув самарадорлиги агентлиги билан биргаликда Бирлашган Араб Амирликлари тажрибаси асосида ижро этувчи ҳокимият органлари фаолияти самарадорлигини баҳолаш методикасини ишлаб чиққанлиги маълумот учун қабул қилинсин.

2. Белгилансинки:

(а) Агентлик ва Бошқарув самарадорлиги агентлиги Дастурни амалга ошириш учун масъул органлар ҳисобланади;

(б) 2026 йилдан бошлаб ҳар икки йилда республика ижро этувчи ҳокимият органлари (вазирлик, қўмита, агентлик ва инспекциялар)нинг фаолияти самарадорлигини Дастур асосида баҳолаш тизими жорий этилади;

(в) Дастурда иштирок этувчи республика ва маҳаллий ижро этувчи ҳокимият органлари ҳамда мукофот номинациялари рўйхатлари Агентлик ва Бошқарув самарадорлиги агентлиги томонидан тасдиқланади;

(г) Агентлик Бирлашган Араб Амирликлари экспертларининг Ўзбекистон Республикаси ҳудудидаги фаолиятини ташкилий жиҳатдан қўллаб-қувватлайди ҳамда Дастур юзасидан якуний ҳисоботни тайёрлайди.

3. Бошқарув самарадорлиги агентлиги ва Агентлик:

(а) бир ҳафта муддатда Дастурни амалга ошириш бўйича «йўл харитаси»ни ҳамда Дастур ғолибларини тақдирлаш тартибини тасдиқласин;

(б) Дастур бандларининг бажарилишини ташкил этиш, Дастурнинг якуний ҳисоботлари ва тавсиялари асосида ижро этувчи ҳокимият органлари фаолиятида аниқланган камчиликларни бартараф этиш бўйича тизимли ишларни амалга оширсин;

(в) барча номинациялар ғолибларининг илғор тажрибаси Дастур доирасида иштирок этган қолган давлат органлари фаолиятига кенг жорий этилишини таъминласин.

4. Республика ижро этувчи ҳокимият органлари биринчи раҳбарлари зиммасига Дастурни амалга ошириш доирасида белгиланган тадбирларнинг ўз вақтида ва сифатли бажарилиши ҳамда илғор тажрибаларни ўз фаолиятига жорий этиш бўйича шахсий жавобгарлик юклансин.

5. Мазкур фармойиш ижроси учун масъул ташкилотлар фаолиятини мувофиқлаштириш ва назорат қилиш Ўзбекистон Республикаси Бош вазири А.Н. Арипов ҳамда Ўзбекистон Республикаси Президенти Администрацияси раҳбари С.Ш. Мирзиёева зиммасига юклансин.

Ўзбекистон Республикаси Президенти Ш. МИРЗИЁЕВ

Тошкент ш.,

2026 йил 22 май,

Ф- 32 -сон

lex.uz

OʻZBEKISTON RESPUBLIKASI PREZIDENTINING

FARMOYISHI

Birlashgan Arab Amirliklari bilan hamkorlikda “Sifatli davlat boshqaruvi” dasturini amalga oshirish chora-tadbirlari toʻgʻrisida

Oʻzbekiston Respublikasi va Birlashgan Arab Amirliklari oʻrtasidagi ikki tomonlama munosabatlarni yanada mustahkamlash, davlat boshqaruvi tizimini takomillashtirish sohasida Birlashgan Arab Amirliklarining ilgʻor tajribasini joriy etish, shuningdek, respublika ijro etuvchi hokimiyat organlari faoliyati samaradorligini yagona mezonlar asosida baholash tizimini yoʻlga qoʻyish maqsadida qaror qilaman:

1. Quyidagilar:

(a) Oʻzbekiston Respublikasi va Birlashgan Arab Amirliklari oʻrtasidagi ikki tomonlama kelishuvlar doirasida “Sifatli davlat boshqaruvi” dasturini (keyingi oʻrinlarda — Dastur) amalga oshirish yuzasidan oʻzaro kelishuvga erishilgani;

(b) Oʻzbekiston Respublikasi Prezidenti huzuridagi Strategik rivojlanish va islohotlar agentligi (keyingi oʻrinlarda — Agentlik) Boshqaruv samaradorligi agentligi bilan birgalikda Birlashgan Arab Amirliklari tajribasi asosida ijro etuvchi hokimiyat organlari faoliyati samaradorligini baholash metodikasini ishlab chiqqanligi maʼlumot uchun qabul qilinsin.

2. Belgilansinki:

(a) Agentlik va Boshqaruv samaradorligi agentligi Dasturni amalga oshirish uchun masʼul organlar hisoblanadi;

(b) 2026-yildan boshlab har ikki yilda respublika ijro etuvchi hokimiyat organlari (vazirlik, qoʻmita, agentlik va inspeksiyalar)ning faoliyati samaradorligini Dastur asosida baholash tizimi joriy etiladi;

(v) Dasturda ishtirok etuvchi respublika va mahalliy ijro etuvchi hokimiyat organlari hamda mukofot nominatsiyalari roʻyxatlari Agentlik va Boshqaruv samaradorligi agentligi tomonidan tasdiqlanadi;

(g) Agentlik Birlashgan Arab Amirliklari ekspertlarining Oʻzbekiston Respublikasi hududidagi faoliyatini tashkiliy jihatdan qoʻllab-quvvatlaydi hamda Dastur yuzasidan yakuniy hisobotni tayyorlaydi.

3. Boshqaruv samaradorligi agentligi va Agentlik:

(a) bir hafta muddatda Dasturni amalga oshirish boʻyicha “yoʻl xaritasi”ni hamda Dastur gʻoliblarini taqdirlash tartibini tasdiqlasin;

(b) Dastur bandlarining bajarilishini tashkil etish, Dasturning yakuniy hisobotlari va tavsiyalari asosida ijro etuvchi hokimiyat organlari faoliyatida aniqlangan kamchiliklarni bartaraf etish boʻyicha tizimli ishlarni amalga oshirsin;

(v) barcha nominatsiyalar gʻoliblarining ilgʻor tajribasi Dastur doirasida ishtirok etgan qolgan davlat organlari faoliyatiga keng joriy etilishini taʼminlasin.

4. Respublika ijro etuvchi hokimiyat organlari birinchi rahbarlari zimmasiga Dasturni amalga oshirish doirasida belgilangan tadbirlarning oʻz vaqtida va sifatli bajarilishi hamda ilgʻor tajribalarni oʻz faoliyatiga joriy etish boʻyicha shaxsiy javobgarlik yuklansin.

5. Mazkur farmoyish ijrosi uchun masʼul tashkilotlar faoliyatini muvofiqlashtirish va nazorat qilish Oʻzbekiston Respublikasi Bosh vaziri A.N. Aripov hamda Oʻzbekiston Respublikasi Prezidenti Administratsiyasi rahbari S.Sh. Mirziyoyeva zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2026-yil 22-may,

F- 32 -son

lex.uz