📅 2026-yil 30-aprel · Vazirlik va idoralar hujjatlari · Sogʻliqni saqlash vaziri
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2026 йил 30 апрель · Вазирлик ва идоралар ҳужжатлари · Соғлиқни сақлаш вазири
Расмий матн. Расмий ҳужжат. Таҳририй изоҳлар киритилмаган.
📅 30 апреля 2026 г. · Документы министерств и ведомств · Министр здравоохранения
Официальный текст. Официальный документ. Редакционные примечания не включены.
📅 30 April 2026 · Ministry and agency documents · Sogʻliqni saqlash vaziri
Official text. Official document. Editorial notes are not included.
ЎЗБЕКИСТОН РЕСПУБЛИКАСИ СОҒЛИҚНИ САҚЛАШ ВАЗИРИНИНГ
буйруғи
ЙЎРИҚНОМА
Дори воситаларини давлат рўйхатидан ўтказиш ҳужжатларига қўйиладиган талаблар тўғрисидаги йўриқномани тасдиқлаш ҳақида
Ўзбекистон Республикаси Президентининг 2025 йил 19 августдаги ПФ-137-сон «Дори воситалари ва тиббий жиҳозлар муомаласини тартибга солишга доир қўшимча чора-тадбирлар тўғрисида»ги Фармони ҳамда Ўзбекистон Республикаси Вазирлар Маҳкамасининг 2025 йил 24 ноябрдаги 738-сон «Дори воситаларини давлат рўйхатидан ўтказиш тартиби тўғрисидаги ҳамда Тиббий жиҳозларни давлат рўйхатидан ўтказиш тартиби тўғрисидаги низомларни тасдиқлаш ҳақида»ги қарорига мувофиқ буюраман:
1. Дори воситаларини давлат рўйхатидан ўтказиш ҳужжатларига қўйиладиган талаблар тўғрисидаги йўриқнома иловага мувофиқ тасдиқлансин.
2. Мазкур буйруқ Ўзбекистон Республикаси Президенти ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил, Ўзбекистон Республикаси Рақобатни ривожлантириш ва истеъмолчилар ҳуқуқларини ҳимоя қилиш қўмитаси ҳамда Ўзбекистон Савдо-саноат палатаси билан келишилган.
3. Ушбу буйруқ расмий эълон қилинган кундан эътиборан уч ойдан кейин кучга киради.
Келишилди:
Ўзбекистон Республикаси соғлиқни сақлаш вазирининг 2026 йил 4 июндаги 788-сон қарорига мувофиқ-сон буйруғига ИЛОВА
Дори воситаларини давлат рўйхатидан ўтказиш ҳужжатларига қўйиладиган талаблар тўғрисидаги
Мазкур Йўриқнома дори воситаларини давлат рўйхатидан ўтказиш ҳужжатларига қўйиладиган талабларни белгилайди.
1-боб. Умумий қоидалар
Ушбу Йўриқномада қуйидаги асосий тушунчалардан фойдаланилади:
ариза берувчи — Ўзбекистон Республикаси Соғлиқни сақлаш вазирлигининг «Фармацевтика маҳсулотлари хавфсизлиги маркази» давлат муассасасига (бундан буён матнда Марказ деб юритилади) дори воситаларини рўйхатдан ўтказиш ва гувоҳнома олиш учун мурожаат қилувчи ишлаб чиқувчи, ишлаб чиқарувчи, рўйхатдан ўтказилганлик гувоҳномасининг эгаси ёки улар номидан ишончнома асосида ҳаракат қилувчи юридик шахс;
ахборот тизими — Марказнинг дори воситаларини давлат рўйхатидан ўтказиш билан боғлиқ жараёнларни амалга ошириш мақсадида яратилган махсус электрон тизими;
дори моддалари (субстанциялари) — фармакологик, иммунологик ёки метаболик фаолликка эга бўлган ёхуд ташхис қўйиш мақсади учун фойдаланиладиган, тиббиёт амалиётида қўлланилишига рухсат этилган, келиб чиқиши табиий ёки синтетик моддалар;
дори воситалари — касалликлар профилактикаси, уларга ташхис қўйиш ва уларни даволаш, шунингдек, одам организмининг ҳолати ва функцияларини ўзгартириш учун тиббиёт амалиётида қўлланилишига рухсат этилган дори моддалари (субстанциялар) ва ёрдамчи моддалар асосида олинган воситалар, дори моддалари (субстанциялар), дори препаратлари;
корхона фармакопея мақоласи — муайян ишлаб чиқарувчининг дори воситаси, доривор ўсимлик хом ашёси ёки ёрдамчи модданинг сифатига доир талабларни белгиловчи ҳужжат;
рўйхатдан ўтказиш ҳужжатлари — ариза берувчи томонидан дори воситасининг сифати, самарадорлиги, безарарлиги ва бошқа маълумотларни ўз ичига олган рўйхатдан ўтказиш, рўйхатдан ўтказилганлик гувоҳномасининг амал қилиш муддатини узайтириш, дори воситасини рўйхатдан ўтказиш ҳужжатларига ўзгартириш ва қўшимчалар киритиш мақсадида Марказга тақдим этиладиган ҳужжатлар;
технологиялар трансфери — дори воситасини яратиш ва (ёки) ишлаб чиқариш технологик жараёнларини, маълумотлари ва тажрибаларини, шу жумладан, дори воситасининг сифат ва миқдорий таркибини ўзгартирмаган ҳолда бир фармацевтика ташкилотидан бошқа фармацевтика ташкилотининг ишлаб чиқариш майдонига кўчириш, «ин булк» маҳсулотлари бундан мустасно.
Дори воситаларини давлат рўйхатидан ўтказиш ҳужжатларига қўйиладиган талаблар Ўзбекистон Республикаси Вазирлар Маҳкамасининг 2025 йил 24 ноябрдаги 738-сон «Дори воситаларини давлат рўйхатидан ўтказиш тартиби тўғрисидаги ҳамда Тиббий жиҳозларни давлат рўйхатидан ўтказиш тартиби тўғрисидаги низомларни тасдиқлаш ҳақида»ги қарори асосида ҳамда Инсон учун қўлланиладиган дори воситаларига қўйиладиган техник талабларни уйғунлаштириш бўйича халқаро кенгашнинг ( ICH ) (бундан буён матнда Кенгаш деб юритилади) талабларига ( ICH CTD формати) мувофиқ белгиланади.
3. Ариза берувчи дори воситасининг хусусиятларидан келиб чиққан ҳолда, айрим талаб этиладиган ҳужжатлар ёки улардаги маълумотлар мавжуд бўлмаган тақдирда, ушбу ҳолатни асослаб берувчи расмий хат (асосланган тушунтириш хати) орқали тақдим этиши мумкин .
2-боб. Дори воситаларини давлат рўйхатидан ўтказиш ҳужжатларига талаблар
4. Ариза берувчи томонидан Ўзбекистон Республикаси Вазирлар Маҳкамасининг 2025 йил 24 ноябрдаги 738-сон қарори билан тасдиқланган Дори воситаларини давлат рўйхатидан ўтказиш тартиби тўғрисидаги низомнинг 2-иловасига мувофиқ ариза тақдим этилади.
5. Ариза вакил орқали тақдим этилганда вакилнинг ваколатини тасдиқловчи ҳужжатда (ишончнома) унинг берилган санаси ҳамда вакиллик қилувчи юридик шахснинг номи ва ташкилий-ҳуқуқий шакли кўрсатилади.
Хорижий ишлаб чиқарувчи юридик шахслар томонидан тақдим этиладиган ишончнома давлат тили, қорақалпоқ, рус ва инглиз тилларидан бошқа тилларда расмийлаштирилган бўлса, мазкур ишончнома ўзбек тилига тўғри таржима қилинганлиги нотариал шаҳодатланиши лозим.
Агар ваколатли шахс ўзгарган бўлса ёки янги ишончнома тақдим этилган бўлса, янги ишончноманинг нусхаси аризага илова қилинади.
6. Тўлов амалга оширилганлигини тасдиқловчи ҳужжат ариза берувчи томонидан Ўзбекистон Республикасида нақд пулсиз ҳисоб-китоблар тўғрисидаги низомнинг (рўйхат рақами 3229, 2020 йил 13 апрель) 2-иловасига мувофиқ тўлов топшириқномаси шаклида расмийлаштирилиши лозим.
7. Хорижий ишлаб чиқарувчилар учун ваколатли органлар, халқаро ёки хорижий ташкилотлар томонидан берилган рўйхатдан ўтказилганлик гувоҳномаси ва (ёки) Жаҳон соғлиқни сақлаш ташкилоти тавсияларига мувофиқ расмийлаштирилган фармацевтика маҳсулоти сертификати ( CPP ) тақдим этилади.
Ваколатли органлар, халқаро ёки хорижий ташкилотлар томонидан берилган рўйхатдан ўтказилганлик гувоҳномаси ёки фармацевтика маҳсулоти сертификати ( CPP ) уларни берган ваколатли органнинг расмий рўйхатларидан (веб-сайтлари) ҳаққонийлиги текширилади, уларнинг ҳаққонийлигини очиқ манбалар орқали текшириш имкони бўлмаганда, мазкур ҳужжатлар апостил муҳрли ёки консуллик томонидан тасдиқланган бўлиши шарт.
Тақдим қилинган фармацевтика маҳсулоти сертификати ( СPP да) дори воситасининг ишлаб чиқарувчи мамлакатида рўйхатдан ўтказилмаганлиги кўрсатилган бўлса, бошқа мамлакатларда нотариал тасдиқланган ёки апостил қўйилган рўйхатдан ўтказилганлик гувоҳномасини тақдим этиш зарур.
Ваколатли органлар, халқаро ёки хорижий ташкилотлар томонидан берилган рўйхатдан ўтказилганлик гувоҳномаси ёки фармацевтика маҳсулоти сертификати ( CPP ) амал қилиш муддати тугамаган, амал қилиш муддати аниқ кўрсатилган, барча саҳифалари тўлиқ ва ўзгартирилмаган ҳамда яхши ўқиладиган ҳолда тақдим этилиши зарур.
8. Дори воситасини ишлаб чиқаришда қўлланиладиган, ҳайвон хомашёсидан олинадиган моддаларнинг прионлар сақлаши бўйича маълумотлар устунида дори воситасини ишлаб чиқаришда ҳайвон хомашёсидан олинадиган моддалар қўлланилган ҳолларда, ушбу моддалар таркибида прионларнинг мавжудлиги ёки мавжуд эмаслиги «мавжуд»/«мавжуд эмас» шаклида аниқ кўрсатилади.
Ҳайвон хомашёсидан олинадиган моддалар таркибида прионлар мавжуд бўлган ҳолда ишлаб чиқарувчи томонидан тақдим этилган Ҳайвонлардан олинадиган маҳсулотларда хавфли прион касалликлари хавфсизлиги бўйича маълумот (ТСЕ/БСЕ) ариза берувчи томонидан илова қилинади.
Ҳайвон хомашёсидан олинадиган моддалар таркибида прионлар мавжуд бўлмаганда ишлаб чиқарувчи томонидан тақдим этилган Ҳайвонлардан олинадиган маҳсулотларда хавфли прион касалликлари йўқлиги бўйича маълумот ( TSE/BSE-free ) ариза берувчи томонидан илова қилинади.
9. Дори воситаларининг бирламчи (ички) ва иккиламчи (истеъмол), оралиқ қадоқлари маркировкалари, оралиқ қадоқлар, ёрлиқлар, стикерлар макетлари (мавжуд бўлса) Ўзбекистон Республикаси Вазирлар Маҳкамасининг 2016 йил 27 октябрдаги 365-сон «Дори воситаларининг хавфсизлиги тўғрисидаги умумий техник регламентни тасдиқлаш ҳақида»ги қарори талабларига мос келиши лозим.
Маркировка тан олиш йўли билан рўйхатдан ўтказиладиган дори воситалари учун бошқа хорижий давлатлар учун ишлаб чиқарилган тилда бўлиши мумкин.
Дори воситаси қадоғининг маркировкаси аниқ, тушунарли, осон кўринадиган ва ўчиб кетмайдиган ҳарфлар билан, яхши ўқиладиган шрифт билан ёзилади ва дори воситасининг бутун яроқлилик муддати давомида сақланиши керак.
10. Дори воситасининг истеъмол ўрами, ёрлиғи, стикерининг рангли макетлари электрон шаклда ( PDF ёки JPG форматида, камида 300 дпи), рангларнинг пантон коди, макетларда ўлчамлар, кесим (трим) ва буклама чизиқлари, бирламчи ва иккиламчи ўрамларнинг аниқ ўлчамлари (эни, бўйи, баландлиги) кўрсатилади.
11. Ариза берувчи томонидан дори воситасининг умумий тавсифи, ўзбек тилидаги қўлланилишга доир йўриқнома ва қистирма варақанинг лойиҳаси тақдим этилади. Ариза берувчи дори воситасининг умумий тавсифи, қўлланилишга доир йўриқнома ва қистирма варақанинг лойиҳасини қўшимча равишда бошқа тилда ҳам бериши мумкин.
Дори воситасининг тиббиётда қўлланилишига доир йўриқномаси Ўзбекистон Республикаси Вазирлар Маҳкамасининг 2016 йил 27 октябрдаги 365-сон қарори билан тасдиқланган Дори воситаларининг хавфсизлиги тўғрисидаги умумий техник регламентининг 47-банди талабларига мос келиши лозим.
Дори воситасини тиббиётда қўлланилишига доир йўриқномасида халқаро талаблар ва қонунчилик ҳужжатларига мувофиқ келувчи, реклама хусусиятига эга бўлмаган қўшимча маълумотлар жойлаштирилиши мумкин.
12. Дори воситасининг сифатига тааллуқли ҳужжатларда қуйидагилар кўрсатилади:
дори моддасининг (субстанциянинг) Европа фармакопеяси талабларига мувофиқлик сертификати нусхаси (мавжуд бўлганда). Сертификат амал қилиш муддати аниқ кўрсатилган, барча саҳифалари тўлиқ тўлдирилган ва ўзгартирилмаган ҳамда яхши ўқиладиган ҳолда тақдим этилиши лозим;
дори моддаси (субстанция) мастер файли эгасининг ушбу мастер-файлнинг ёпиқ қисмини Марказ сўровига асосан тақдим этишга розилиги хати. Бунда мастер-файлнинг ушбу ёпиқ қисмини (ишлаб чиқариш жараёни, технологик тафсилотлар ва интеллектуал мулк билан боғлиқ махфий маълумотлар) тақдим этишга дори моддаси (субстанция) мастер файли эгасининг розилиги кўрсатилади;
дори воситасининг корхона фармакопея мақоласи лойиҳаси. Бунда Ўзбекистон Республикаси Давлат фармакопеяси ва дунёнинг етакчи фармакопеялари асосида тузилади;
дори воситасининг корхона фармакопея мақоласи лойиҳасига тушунтириш хати. Бунда корхона фармакопея мақоласи лойиҳасида келтирилган сифат кўрсаткичлари, уларни танлаш сабаблари ва уларнинг илмий асослари баён этилади. Шунингдек, ҳар бир сифат кўрсаткичи учун танланган сифат назорати усулининг қисқача тавсифи берилади;
гувоҳноманинг амал қилиш муддатини узайтиришда дори воситасининг амалдаги корхона фармакопея мақоласи.
13. Ишлаб чиқариш ҳужжатларида қуйидагилар кўрсатилади:
Ўзбекистон Республикасининг «Зарур ишлаб чиқариш амалиёти GMP » миллий стандарти талабларига мувофиқлиги тўғрисидаги сертификат (мавжуд бўлганда);
«Зарур ишлаб чиқариш амалиёти GMP » стандарти талабларига мувофиқлиги тўғрисидаги сертификат ҳамда охирги инспекция натижалари бўйича ҳисобот (хорижий ишлаб чиқарувчилар учун). Бунда охирги инспекция натижалари бўйича ҳисоботда аниқланган камчиликлар, уларни бартараф этиш бўйича кўрилган чора-тадбирлар ҳамда қайта кўриб чиқиш натижалари ва якуний хулоса келтирилади;
дори воситаларини ишлаб чиқариш учун берилган лицензия.
Ариза берувчи томонидан ишлаб чиқариш ҳужжатларидаги маълумотларнинг тўғрилигини таъминлаш мақсадида мазкур ҳужжатларни берган тегишли ваколатли органнинг расмий веб-сайтларига ҳавола келтирилиши мумкин.
14. Технологиялар трансфери асосида рўйхатдан ўтказиладиган дори воситалари учун қуйидагилар тақдим этилади:
трансфер технологиясини амалга оширишда томонларнинг сифатни таъминлаш бўйича шартномаси. Бунда технологиялар трансфери орқали дори воситасини ишлаб чиқаришда юридик шахслар ўртасидаги дори воситасининг сифатига тааллуқли ҳуқуқ ва мажбуриятлар белгиланади. Трансфер технологиясини амалга оширишда томонларнинг сифатни таъминлаш бўйича шартномасида технологиялар трансфери асосида ишлаб чиқарилган дори воситаларининг хавфсизлиги, сифати ҳамда самарадорлиги учун жавобгарлик буюртмачи, технологиялар трансфери эгаси ва ишлаб чиқарувчи зиммасига юкланганлиги кўрсатилади;
технологиялар трансфери дастури. Бунда технологияни бир жойдан бошқасига ўтказиш босқичлари, муддатлари ва масъул шахслари ҳамда ишлаб чиқариш, сифат назорати, ўрганиш ва жараён валидацияси кўрсатилади;
технологиялар трансфери эгасининг трансфер амалга оширилганлиги тўғрисидаги ҳисоботи. Мазкур ҳисобот технологиялар трансфери эгаси томонидан тайёрланади ҳамда унда технология трансфери амалга оширилганлиги, барча жараёнлар амалда синовдан ўтказилгани ва ишлаб чиқариш натижалари асосий жараён кўрсаткичларига мос келиши, шунингдек, ходимларнинг тайёргарлиги ва ишлаб чиқариш муҳитининг асосий жараёнга мувофиқлиги кўрсатилади.
15. Шартнома асосида ишлаб чиқарувчилар учун фармацевтика ташкилоти қувватларидаги технологияларни ўзгартирмаган ҳолда рўйхатдан ўтказилган дори воситаларини ишлаб чиқариш тўғрисидаги шартномада мазкур дори воситасини ишлаб чиқаришда юридик шахслар ўртасидаги дори воситасининг сифатига тааллуқли ҳуқуқ ва мажбуриятлар белгиланади ҳамда шартнома асосида ишлаб чиқарилган дори воситаларининг хавфсизлиги, сифати ҳамда самарадорлиги учун жавобгарлик буюртмачи ва ишлаб чиқарувчи зиммасига юкланганлиги кўрсатилади.
16. Дори воситасининг генетик модификацияланган организмлар сақлаши ёки улардан олинганлиги тўғрисида «мавжуд»/«мавжуд эмас» шаклида маълумот кўрсатилади.
Дори воситасининг генетик модификацияланган организмлар сақлаши ёки улардан олинганлиги тўғрисида маълумотда қуйидагилар кўрсатилади:
генетик модификация тури ва манбаси (ўсимлик, ҳайвон ёки микроорганизм ва бошқалардан олинганлиги);
қўлланилган генетик конструкция ва экспрессия тизими ҳақида қисқача тавсиф;
генетик модификацияланган организмдан олинганда, генетик, биологик хавфсизлик ва атроф-муҳитга зарар етказмаслигини таъминлаш чоралари кўрилганлиги тўғрисида маълумот;
ишлаб чиқариш жараёнининг қайси босқичларида генетик модификацияланган организмдан олинган моддалар қўлланилганлиги ва уларнинг якуний маҳсулотдан тўлиқ олиб ташланганлиги ёки фаолсизлантирилганлигини тасдиқловчи маълумотлар;
генетик хавфсизликни баҳолаш бўйича ҳисоботлар ва биологик хавфсизлик ҳужжатлари тўғрисида маълумотлар.
17. Ўзбекистон Республикасида фармаконазорат тизимининг амалга оширилиши бўйича ҳужжатлар:
«Зарур фармаконазорат амалиёти — GVP » миллий стандарти талаблари асосида тайёрланган фармаконазорат тизими мастер-файли;
Ўзбекистон Республикаси ҳудудида олий тиббий ёки фармацевтика маълумотли, фармаконазорат бўйича тегишли малакага эга бўлган (сертификат), фармаконазорат талабларини бажариш учун масъул шахс тўғрисидаги маълумотда масъул шахснинг фамилияси, исми, отасининг исми, лавозими, алоқа ва иш жойи манзили, ишга тайинланганлиги тўғрисидаги буйруқ рақами ва санаси, олий тиббий ёки фармацевтика маълумотига эгалиги тўғрисида диплом маълумотлари, фармаконазорат бўйича тегишли малакага эга бўлган (сертификат) рақами, санаси ва амал қилиш муддати кўрсатилади;
рўйхатдан ўтказишга тақдим этилган дори воситаларининг «Зарур фармаконазорат амалиёти — GVP » миллий стандарти талаблари асосида хавфларни бошқариш режаси;
гувоҳноманинг амал қилиш муддатини узайтириш ёки рўйхатдан ўтказиш ҳужжатларига ўзгартириш ва қўшимчалар киритишда — «Зарур фармаконазорат амалиёти — GVP » миллий стандарти талабларига мувофиқ тайёрланадиган даврий ҳисобот тақдим этилади.
18. Ариза берувчи томонидан дори воситаларида қўлланилган интеллектуал мулк объектларига (товар белгилари ва саноат намуналари) бўлган ҳуқуқларни тасдиқловчи муҳофаза ҳужжати (гувоҳнома, патент ва уларга илова) ёки улардан фойдаланиш тўғрисидаги шартнома ёки дори воситасининг савдо номи ҳамда дизайни бўйича интеллектуал мулк соҳасидаги ваколатли органнинг хулосаси тақдим этилади.
19. Ўзбекистон Республикаси Вазирлар Маҳкамасининг 2025 йил 24 ноябрдаги 738-сон қарори билан тасдиқланган Дори воситаларини давлат рўйхатидан ўтказиш тартиби тўғрисидаги низомга 3-иловадаги Дори воситаларини давлат рўйхатидан ўтказиш ҳужжатлари рўйхатининг 2 — 5-бўлимларидаги ҳужжатлар Инсон учун қўлланиладиган дори воситаларига қўйиладиган техник талабларни уйғунлаштириш бўйича халқаро кенгашнинг халқаро талабларига ( ICH CTD формати) мувофиқ тақдим этилади.
Бунда, Дори воситаларини давлат рўйхатидан ўтказиш ҳужжатлари рўйхатининг:
«2-бўлим. Умумий техник ҳужжатлар » бўлимида белгиланган ҳужжатлар Кенгашнинг Инсон учун мўлжалланган дори воситаларини рўйхатдан ўтказишнинг умумий техник ҳужжати: Сифат — M4Q (R1 ), Хавфсизлик — M4S (R2 ), Самарадорлик — M4E (R2 );
«3-бўлим. Дори воситасининг сифатини белгиловчи маълумотлар » бўлимида белгиланган ҳужжатлар Кенгашнинг Инсон учун мўлжалланган дори воситаларини рўйхатдан ўтказишнинг умумий техник ҳужжати: Сифат — M4Q (R1 );
«4-бўлим. Клиник олди тадқиқотлари тўғрисидаги маълумотлар » бўлимида белгиланган ҳужжатлар Кенгашнинг Инсон учун мўлжалланган дори воситаларини рўйхатдан ўтказишнинг умумий техник ҳужжати: Хавфсизлик — M4S (R2 );
«5-бўлим. Клиник тадқиқотлар тўғрисидаги маълумотлар» бўлимида белгиланган ҳужжатлар Кенгашнинг Инсон учун мўлжалланган дори воситаларини рўйхатдан ўтказишнинг умумий техник ҳужжати: Самарадорлик — M4E (R2 ) талаблари асосида тақдим этилади.
3-боб. Якуний қоидалар
20. Манфаатдор шахслар давлат рўйхатидан ўтказиш ҳужжатларига қўйиладиган талаблардан норози бўлган тақдирда, судга ёки ваколатли органларга қонунчиликда белгиланган тартибда мурожаат қилиш ҳуқуқига эга.
21. Мазкур Йўриқнома талабларининг бузилишида айбдор бўлган шахслар қонунчиликда белгиланган тартибда жавобгар бўладилар.
Вазир А. ХУДАЯРОВ
Рақобатни ривожлантириш ва истеъмолчилар ҳуқуқларини ҳимоя қилиш қўмитаси раиси Ҳ. ТУРАХУЖАЕВ
Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил А. БУРИЕВ
Савдо-саноат палатаси раиси Д. ВАХАБОВ
Тошкент ш.,
2026 йил 30 апрель,
2026 йил 29 апрель
2026 йил 17 февраль
2026 йил 12 февраль
7 -сон
OʻZBEKISTON RESPUBLIKASI SOGʻLIQNI SAQLASH VAZIRINING
buyrugʻi
YOʻRIQNOMA
Dori vositalarini davlat roʻyxatidan oʻtkazish hujjatlariga qoʻyiladigan talablar toʻgʻrisidagi yoʻriqnomani tasdiqlash haqida
Oʻzbekiston Respublikasi Prezidentining 2025-yil 19-avgustdagi PF-137-son “Dori vositalari va tibbiy jihozlar muomalasini tartibga solishga doir qoʻshimcha chora-tadbirlar toʻgʻrisida”gi Farmoni hamda Oʻzbekiston Respublikasi Vazirlar Mahkamasining 2025-yil 24-noyabrdagi 738-son “Dori vositalarini davlat roʻyxatidan oʻtkazish tartibi toʻgʻrisidagi hamda Tibbiy jihozlarni davlat roʻyxatidan oʻtkazish tartibi toʻgʻrisidagi nizomlarni tasdiqlash haqida”gi qaroriga muvofiq buyuraman:
1. Dori vositalarini davlat roʻyxatidan oʻtkazish hujjatlariga qoʻyiladigan talablar toʻgʻrisidagi yoʻriqnoma ilovaga muvofiq tasdiqlansin.
2. Mazkur buyruq Oʻzbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish boʻyicha vakil, Oʻzbekiston Respublikasi Raqobatni rivojlantirish va isteʼmolchilar huquqlarini himoya qilish qoʻmitasi hamda Oʻzbekiston Savdo-sanoat palatasi bilan kelishilgan.
3. Ushbu buyruq rasmiy eʼlon qilingan kundan eʼtiboran uch oydan keyin kuchga kiradi.
Kelishildi:
Oʻzbekiston Respublikasi sogʻliqni saqlash vazirining 2026-yil 4-iyundagi 788-son qaroriga muvofiq-son buyrugʻiga ILOVA
Dori vositalarini davlat roʻyxatidan oʻtkazish hujjatlariga qoʻyiladigan talablar toʻgʻrisidagi
Mazkur Yoʻriqnoma dori vositalarini davlat roʻyxatidan oʻtkazish hujjatlariga qoʻyiladigan talablarni belgilaydi.
1-bob. Umumiy qoidalar
Ushbu Yoʻriqnomada quyidagi asosiy tushunchalardan foydalaniladi:
ariza beruvchi — Oʻzbekiston Respublikasi Sogʻliqni saqlash vazirligining “Farmatsevtika mahsulotlari xavfsizligi markazi” davlat muassasasiga (bundan buyon matnda Markaz deb yuritiladi) dori vositalarini roʻyxatdan oʻtkazish va guvohnoma olish uchun murojaat qiluvchi ishlab chiquvchi, ishlab chiqaruvchi, roʻyxatdan oʻtkazilganlik guvohnomasining egasi yoki ular nomidan ishonchnoma asosida harakat qiluvchi yuridik shaxs;
axborot tizimi — Markazning dori vositalarini davlat roʻyxatidan oʻtkazish bilan bogʻliq jarayonlarni amalga oshirish maqsadida yaratilgan maxsus elektron tizimi;
dori moddalari (substansiyalari) — farmakologik, immunologik yoki metabolik faollikka ega boʻlgan yoxud tashxis qoʻyish maqsadi uchun foydalaniladigan, tibbiyot amaliyotida qoʻllanilishiga ruxsat etilgan, kelib chiqishi tabiiy yoki sintetik moddalar;
dori vositalari — kasalliklar profilaktikasi, ularga tashxis qoʻyish va ularni davolash, shuningdek, odam organizmining holati va funksiyalarini oʻzgartirish uchun tibbiyot amaliyotida qoʻllanilishiga ruxsat etilgan dori moddalari (substansiyalar) va yordamchi moddalar asosida olingan vositalar, dori moddalari (substansiyalar), dori preparatlari;
korxona farmakopeya maqolasi — muayyan ishlab chiqaruvchining dori vositasi, dorivor oʻsimlik xom ashyosi yoki yordamchi moddaning sifatiga doir talablarni belgilovchi hujjat;
roʻyxatdan oʻtkazish hujjatlari — ariza beruvchi tomonidan dori vositasining sifati, samaradorligi, bezararligi va boshqa maʼlumotlarni oʻz ichiga olgan roʻyxatdan oʻtkazish, roʻyxatdan oʻtkazilganlik guvohnomasining amal qilish muddatini uzaytirish, dori vositasini roʻyxatdan oʻtkazish hujjatlariga oʻzgartirish va qoʻshimchalar kiritish maqsadida Markazga taqdim etiladigan hujjatlar;
texnologiyalar transferi — dori vositasini yaratish va (yoki) ishlab chiqarish texnologik jarayonlarini, maʼlumotlari va tajribalarini, shu jumladan, dori vositasining sifat va miqdoriy tarkibini oʻzgartirmagan holda bir farmatsevtika tashkilotidan boshqa farmatsevtika tashkilotining ishlab chiqarish maydoniga koʻchirish, “in bulk” mahsulotlari bundan mustasno.
Dori vositalarini davlat roʻyxatidan oʻtkazish hujjatlariga qoʻyiladigan talablar Oʻzbekiston Respublikasi Vazirlar Mahkamasining 2025-yil 24-noyabrdagi 738-son “Dori vositalarini davlat roʻyxatidan oʻtkazish tartibi toʻgʻrisidagi hamda Tibbiy jihozlarni davlat roʻyxatidan oʻtkazish tartibi toʻgʻrisidagi nizomlarni tasdiqlash haqida”gi qarori asosida hamda Inson uchun qoʻllaniladigan dori vositalariga qoʻyiladigan texnik talablarni uygʻunlashtirish boʻyicha xalqaro kengashning ( ICH ) (bundan buyon matnda Kengash deb yuritiladi) talablariga ( ICH CTD formati) muvofiq belgilanadi.
3. Ariza beruvchi dori vositasining xususiyatlaridan kelib chiqqan holda, ayrim talab etiladigan hujjatlar yoki ulardagi maʼlumotlar mavjud boʻlmagan taqdirda, ushbu holatni asoslab beruvchi rasmiy xat (asoslangan tushuntirish xati) orqali taqdim etishi mumkin .
2-bob. Dori vositalarini davlat roʻyxatidan oʻtkazish hujjatlariga talablar
4. Ariza beruvchi tomonidan Oʻzbekiston Respublikasi Vazirlar Mahkamasining 2025-yil 24-noyabrdagi 738-son qarori bilan tasdiqlangan Dori vositalarini davlat roʻyxatidan oʻtkazish tartibi toʻgʻrisidagi nizomning 2-ilovasiga muvofiq ariza taqdim etiladi.
5. Ariza vakil orqali taqdim etilganda vakilning vakolatini tasdiqlovchi hujjatda (ishonchnoma) uning berilgan sanasi hamda vakillik qiluvchi yuridik shaxsning nomi va tashkiliy-huquqiy shakli koʻrsatiladi.
Xorijiy ishlab chiqaruvchi yuridik shaxslar tomonidan taqdim etiladigan ishonchnoma davlat tili, qoraqalpoq, rus va ingliz tillaridan boshqa tillarda rasmiylashtirilgan boʻlsa, mazkur ishonchnoma oʻzbek tiliga toʻgʻri tarjima qilinganligi notarial shahodatlanishi lozim.
Agar vakolatli shaxs oʻzgargan boʻlsa yoki yangi ishonchnoma taqdim etilgan boʻlsa, yangi ishonchnomaning nusxasi arizaga ilova qilinadi.
6. Toʻlov amalga oshirilganligini tasdiqlovchi hujjat ariza beruvchi tomonidan Oʻzbekiston Respublikasida naqd pulsiz hisob-kitoblar toʻgʻrisidagi nizomning (roʻyxat raqami 3229, 2020-yil 13-aprel) 2-ilovasiga muvofiq toʻlov topshiriqnomasi shaklida rasmiylashtirilishi lozim.
7. Xorijiy ishlab chiqaruvchilar uchun vakolatli organlar, xalqaro yoki xorijiy tashkilotlar tomonidan berilgan roʻyxatdan oʻtkazilganlik guvohnomasi va (yoki) Jahon sogʻliqni saqlash tashkiloti tavsiyalariga muvofiq rasmiylashtirilgan farmatsevtika mahsuloti sertifikati ( CPP ) taqdim etiladi.
Vakolatli organlar, xalqaro yoki xorijiy tashkilotlar tomonidan berilgan roʻyxatdan oʻtkazilganlik guvohnomasi yoki farmatsevtika mahsuloti sertifikati ( CPP ) ularni bergan vakolatli organning rasmiy roʻyxatlaridan (veb-saytlari) haqqoniyligi tekshiriladi, ularning haqqoniyligini ochiq manbalar orqali tekshirish imkoni boʻlmaganda, mazkur hujjatlar apostil muhrli yoki konsullik tomonidan tasdiqlangan boʻlishi shart.
Taqdim qilingan farmatsevtika mahsuloti sertifikati ( СPP da) dori vositasining ishlab chiqaruvchi mamlakatida roʻyxatdan oʻtkazilmaganligi koʻrsatilgan boʻlsa, boshqa mamlakatlarda notarial tasdiqlangan yoki apostil qoʻyilgan roʻyxatdan oʻtkazilganlik guvohnomasini taqdim etish zarur.
Vakolatli organlar, xalqaro yoki xorijiy tashkilotlar tomonidan berilgan roʻyxatdan oʻtkazilganlik guvohnomasi yoki farmatsevtika mahsuloti sertifikati ( CPP ) amal qilish muddati tugamagan, amal qilish muddati aniq koʻrsatilgan, barcha sahifalari toʻliq va oʻzgartirilmagan hamda yaxshi oʻqiladigan holda taqdim etilishi zarur.
8. Dori vositasini ishlab chiqarishda qoʻllaniladigan, hayvon xomashyosidan olinadigan moddalarning prionlar saqlashi boʻyicha maʼlumotlar ustunida dori vositasini ishlab chiqarishda hayvon xomashyosidan olinadigan moddalar qoʻllanilgan hollarda, ushbu moddalar tarkibida prionlarning mavjudligi yoki mavjud emasligi “mavjud”/“mavjud emas” shaklida aniq koʻrsatiladi.
Hayvon xomashyosidan olinadigan moddalar tarkibida prionlar mavjud boʻlgan holda ishlab chiqaruvchi tomonidan taqdim etilgan Hayvonlardan olinadigan mahsulotlarda xavfli prion kasalliklari xavfsizligi boʻyicha maʼlumot (TSE/BSE) ariza beruvchi tomonidan ilova qilinadi.
Hayvon xomashyosidan olinadigan moddalar tarkibida prionlar mavjud boʻlmaganda ishlab chiqaruvchi tomonidan taqdim etilgan Hayvonlardan olinadigan mahsulotlarda xavfli prion kasalliklari yoʻqligi boʻyicha maʼlumot ( TSE/BSE-free ) ariza beruvchi tomonidan ilova qilinadi.
9. Dori vositalarining birlamchi (ichki) va ikkilamchi (isteʼmol), oraliq qadoqlari markirovkalari, oraliq qadoqlar, yorliqlar, stikerlar maketlari (mavjud boʻlsa) Oʻzbekiston Respublikasi Vazirlar Mahkamasining 2016-yil 27-oktabrdagi 365-son “Dori vositalarining xavfsizligi toʻgʻrisidagi umumiy texnik reglamentni tasdiqlash haqida”gi qarori talablariga mos kelishi lozim.
Markirovka tan olish yoʻli bilan roʻyxatdan oʻtkaziladigan dori vositalari uchun boshqa xorijiy davlatlar uchun ishlab chiqarilgan tilda boʻlishi mumkin.
Dori vositasi qadogʻining markirovkasi aniq, tushunarli, oson koʻrinadigan va oʻchib ketmaydigan harflar bilan, yaxshi oʻqiladigan shrift bilan yoziladi va dori vositasining butun yaroqlilik muddati davomida saqlanishi kerak.
10. Dori vositasining isteʼmol oʻrami, yorligʻi, stikerining rangli maketlari elektron shaklda ( PDF yoki JPG formatida, kamida 300 dpi), ranglarning panton kodi, maketlarda oʻlchamlar, kesim (trim) va buklama chiziqlari, birlamchi va ikkilamchi oʻramlarning aniq oʻlchamlari (eni, boʻyi, balandligi) koʻrsatiladi.
11. Ariza beruvchi tomonidan dori vositasining umumiy tavsifi, oʻzbek tilidagi qoʻllanilishga doir yoʻriqnoma va qistirma varaqaning loyihasi taqdim etiladi. Ariza beruvchi dori vositasining umumiy tavsifi, qoʻllanilishga doir yoʻriqnoma va qistirma varaqaning loyihasini qoʻshimcha ravishda boshqa tilda ham berishi mumkin.
Dori vositasining tibbiyotda qoʻllanilishiga doir yoʻriqnomasi Oʻzbekiston Respublikasi Vazirlar Mahkamasining 2016-yil 27-oktabrdagi 365-son qarori bilan tasdiqlangan Dori vositalarining xavfsizligi toʻgʻrisidagi umumiy texnik reglamentining 47-bandi talablariga mos kelishi lozim.
Dori vositasini tibbiyotda qoʻllanilishiga doir yoʻriqnomasida xalqaro talablar va qonunchilik hujjatlariga muvofiq keluvchi, reklama xususiyatiga ega boʻlmagan qoʻshimcha maʼlumotlar joylashtirilishi mumkin.
12. Dori vositasining sifatiga taalluqli hujjatlarda quyidagilar koʻrsatiladi:
dori moddasining (substansiyaning) Yevropa farmakopeyasi talablariga muvofiqlik sertifikati nusxasi (mavjud boʻlganda). Sertifikat amal qilish muddati aniq koʻrsatilgan, barcha sahifalari toʻliq toʻldirilgan va oʻzgartirilmagan hamda yaxshi oʻqiladigan holda taqdim etilishi lozim;
dori moddasi (substansiya) master fayli egasining ushbu master-faylning yopiq qismini Markaz soʻroviga asosan taqdim etishga roziligi xati. Bunda master-faylning ushbu yopiq qismini (ishlab chiqarish jarayoni, texnologik tafsilotlar va intellektual mulk bilan bogʻliq maxfiy maʼlumotlar) taqdim etishga dori moddasi (substansiya) master fayli egasining roziligi koʻrsatiladi;
dori vositasining korxona farmakopeya maqolasi loyihasi. Bunda Oʻzbekiston Respublikasi Davlat farmakopeyasi va dunyoning yetakchi farmakopeyalari asosida tuziladi;
dori vositasining korxona farmakopeya maqolasi loyihasiga tushuntirish xati. Bunda korxona farmakopeya maqolasi loyihasida keltirilgan sifat koʻrsatkichlari, ularni tanlash sabablari va ularning ilmiy asoslari bayon etiladi. Shuningdek, har bir sifat koʻrsatkichi uchun tanlangan sifat nazorati usulining qisqacha tavsifi beriladi;
guvohnomaning amal qilish muddatini uzaytirishda dori vositasining amaldagi korxona farmakopeya maqolasi.
13. Ishlab chiqarish hujjatlarida quyidagilar koʻrsatiladi:
Oʻzbekiston Respublikasining “Zarur ishlab chiqarish amaliyoti GMP ” milliy standarti talablariga muvofiqligi toʻgʻrisidagi sertifikat (mavjud boʻlganda);
“Zarur ishlab chiqarish amaliyoti GMP ” standarti talablariga muvofiqligi toʻgʻrisidagi sertifikat hamda oxirgi inspeksiya natijalari boʻyicha hisobot (xorijiy ishlab chiqaruvchilar uchun). Bunda oxirgi inspeksiya natijalari boʻyicha hisobotda aniqlangan kamchiliklar, ularni bartaraf etish boʻyicha koʻrilgan chora-tadbirlar hamda qayta koʻrib chiqish natijalari va yakuniy xulosa keltiriladi;
dori vositalarini ishlab chiqarish uchun berilgan litsenziya.
Ariza beruvchi tomonidan ishlab chiqarish hujjatlaridagi maʼlumotlarning toʻgʻriligini taʼminlash maqsadida mazkur hujjatlarni bergan tegishli vakolatli organning rasmiy veb-saytlariga havola keltirilishi mumkin.
14. Texnologiyalar transferi asosida roʻyxatdan oʻtkaziladigan dori vositalari uchun quyidagilar taqdim etiladi:
transfer texnologiyasini amalga oshirishda tomonlarning sifatni taʼminlash boʻyicha shartnomasi. Bunda texnologiyalar transferi orqali dori vositasini ishlab chiqarishda yuridik shaxslar oʻrtasidagi dori vositasining sifatiga taalluqli huquq va majburiyatlar belgilanadi. Transfer texnologiyasini amalga oshirishda tomonlarning sifatni taʼminlash boʻyicha shartnomasida texnologiyalar transferi asosida ishlab chiqarilgan dori vositalarining xavfsizligi, sifati hamda samaradorligi uchun javobgarlik buyurtmachi, texnologiyalar transferi egasi va ishlab chiqaruvchi zimmasiga yuklanganligi koʻrsatiladi;
texnologiyalar transferi dasturi. Bunda texnologiyani bir joydan boshqasiga oʻtkazish bosqichlari, muddatlari va masʼul shaxslari hamda ishlab chiqarish, sifat nazorati, oʻrganish va jarayon validatsiyasi koʻrsatiladi;
texnologiyalar transferi egasining transfer amalga oshirilganligi toʻgʻrisidagi hisoboti. Mazkur hisobot texnologiyalar transferi egasi tomonidan tayyorlanadi hamda unda texnologiya transferi amalga oshirilganligi, barcha jarayonlar amalda sinovdan oʻtkazilgani va ishlab chiqarish natijalari asosiy jarayon koʻrsatkichlariga mos kelishi, shuningdek, xodimlarning tayyorgarligi va ishlab chiqarish muhitining asosiy jarayonga muvofiqligi koʻrsatiladi.
15. Shartnoma asosida ishlab chiqaruvchilar uchun farmatsevtika tashkiloti quvvatlaridagi texnologiyalarni oʻzgartirmagan holda roʻyxatdan oʻtkazilgan dori vositalarini ishlab chiqarish toʻgʻrisidagi shartnomada mazkur dori vositasini ishlab chiqarishda yuridik shaxslar oʻrtasidagi dori vositasining sifatiga taalluqli huquq va majburiyatlar belgilanadi hamda shartnoma asosida ishlab chiqarilgan dori vositalarining xavfsizligi, sifati hamda samaradorligi uchun javobgarlik buyurtmachi va ishlab chiqaruvchi zimmasiga yuklanganligi koʻrsatiladi.
16. Dori vositasining genetik modifikatsiyalangan organizmlar saqlashi yoki ulardan olinganligi toʻgʻrisida “mavjud”/“mavjud emas” shaklida maʼlumot koʻrsatiladi.
Dori vositasining genetik modifikatsiyalangan organizmlar saqlashi yoki ulardan olinganligi toʻgʻrisida maʼlumotda quyidagilar koʻrsatiladi:
genetik modifikatsiya turi va manbasi (oʻsimlik, hayvon yoki mikroorganizm va boshqalardan olinganligi);
qoʻllanilgan genetik konstruksiya va ekspressiya tizimi haqida qisqacha tavsif;
genetik modifikatsiyalangan organizmdan olinganda, genetik, biologik xavfsizlik va atrof-muhitga zarar yetkazmasligini taʼminlash choralari koʻrilganligi toʻgʻrisida maʼlumot;
ishlab chiqarish jarayonining qaysi bosqichlarida genetik modifikatsiyalangan organizmdan olingan moddalar qoʻllanilganligi va ularning yakuniy mahsulotdan toʻliq olib tashlanganligi yoki faolsizlantirilganligini tasdiqlovchi maʼlumotlar;
genetik xavfsizlikni baholash boʻyicha hisobotlar va biologik xavfsizlik hujjatlari toʻgʻrisida maʼlumotlar.
17. Oʻzbekiston Respublikasida farmakonazorat tizimining amalga oshirilishi boʻyicha hujjatlar:
“Zarur farmakonazorat amaliyoti — GVP ” milliy standarti talablari asosida tayyorlangan farmakonazorat tizimi master-fayli;
Oʻzbekiston Respublikasi hududida oliy tibbiy yoki farmatsevtika maʼlumotli, farmakonazorat boʻyicha tegishli malakaga ega boʻlgan (sertifikat), farmakonazorat talablarini bajarish uchun masʼul shaxs toʻgʻrisidagi maʼlumotda masʼul shaxsning familiyasi, ismi, otasining ismi, lavozimi, aloqa va ish joyi manzili, ishga tayinlanganligi toʻgʻrisidagi buyruq raqami va sanasi, oliy tibbiy yoki farmatsevtika maʼlumotiga egaligi toʻgʻrisida diplom maʼlumotlari, farmakonazorat boʻyicha tegishli malakaga ega boʻlgan (sertifikat) raqami, sanasi va amal qilish muddati koʻrsatiladi;
roʻyxatdan oʻtkazishga taqdim etilgan dori vositalarining “Zarur farmakonazorat amaliyoti — GVP ” milliy standarti talablari asosida xavflarni boshqarish rejasi;
guvohnomaning amal qilish muddatini uzaytirish yoki roʻyxatdan oʻtkazish hujjatlariga oʻzgartirish va qoʻshimchalar kiritishda — “Zarur farmakonazorat amaliyoti — GVP ” milliy standarti talablariga muvofiq tayyorlanadigan davriy hisobot taqdim etiladi.
18. Ariza beruvchi tomonidan dori vositalarida qoʻllanilgan intellektual mulk obyektlariga (tovar belgilari va sanoat namunalari) boʻlgan huquqlarni tasdiqlovchi muhofaza hujjati (guvohnoma, patent va ularga ilova) yoki ulardan foydalanish toʻgʻrisidagi shartnoma yoki dori vositasining savdo nomi hamda dizayni boʻyicha intellektual mulk sohasidagi vakolatli organning xulosasi taqdim etiladi.
19. Oʻzbekiston Respublikasi Vazirlar Mahkamasining 2025-yil 24-noyabrdagi 738-son qarori bilan tasdiqlangan Dori vositalarini davlat roʻyxatidan oʻtkazish tartibi toʻgʻrisidagi nizomga 3-ilovadagi Dori vositalarini davlat roʻyxatidan oʻtkazish hujjatlari roʻyxatining 2 — 5-boʻlimlaridagi hujjatlar Inson uchun qoʻllaniladigan dori vositalariga qoʻyiladigan texnik talablarni uygʻunlashtirish boʻyicha xalqaro kengashning xalqaro talablariga ( ICH CTD formati) muvofiq taqdim etiladi.
Bunda, Dori vositalarini davlat roʻyxatidan oʻtkazish hujjatlari roʻyxatining:
“2-boʻlim. Umumiy texnik hujjatlar ” boʻlimida belgilangan hujjatlar Kengashning Inson uchun moʻljallangan dori vositalarini roʻyxatdan oʻtkazishning umumiy texnik hujjati: Sifat — M4Q (R1 ), Xavfsizlik — M4S (R2 ), Samaradorlik — M4E (R2 );
“3-boʻlim. Dori vositasining sifatini belgilovchi maʼlumotlar ” boʻlimida belgilangan hujjatlar Kengashning Inson uchun moʻljallangan dori vositalarini roʻyxatdan oʻtkazishning umumiy texnik hujjati: Sifat — M4Q (R1 );
“4-boʻlim. Klinik oldi tadqiqotlari toʻgʻrisidagi maʼlumotlar ” boʻlimida belgilangan hujjatlar Kengashning Inson uchun moʻljallangan dori vositalarini roʻyxatdan oʻtkazishning umumiy texnik hujjati: Xavfsizlik — M4S (R2 );
“5-boʻlim. Klinik tadqiqotlar toʻgʻrisidagi maʼlumotlar” boʻlimida belgilangan hujjatlar Kengashning Inson uchun moʻljallangan dori vositalarini roʻyxatdan oʻtkazishning umumiy texnik hujjati: Samaradorlik — M4E (R2 ) talablari asosida taqdim etiladi.
3-bob. Yakuniy qoidalar
20. Manfaatdor shaxslar davlat roʻyxatidan oʻtkazish hujjatlariga qoʻyiladigan talablardan norozi boʻlgan taqdirda, sudga yoki vakolatli organlarga qonunchilikda belgilangan tartibda murojaat qilish huquqiga ega.
21. Mazkur Yoʻriqnoma talablarining buzilishida aybdor boʻlgan shaxslar qonunchilikda belgilangan tartibda javobgar boʻladilar.
Vazir A. XUDAYAROV
Raqobatni rivojlantirish va isteʼmolchilar huquqlarini himoya qilish qoʻmitasi raisi H. TURAXUJAYEV
Tadbirkorlik subyektlarining huquqlari va qonuniy manfaatlarini himoya qilish boʻyicha vakil A. BURIYEV
Savdo-sanoat palatasi raisi D. VAXABOV
Toshkent sh.,
2026-yil 30-aprel,
2026-yil 29-aprel
2026-yil 17-fevral
2026-yil 12-fevral
7 -son