UzbekAI

ЎЗБЕКИСТОН РЕСПУБЛИКАСИ СПОРТ ВАЗИРИНИНГ

БУЙРУҒИ

Ўзбекистон Республикасида тренерлик фаолияти тўғрисидаги низомга ўзгартиришлар киритиш ҳақида

Ўзбекистон Республикасининг «Жисмоний тарбия ва спорт тўғрисида»ги Қонунига мувофиқ буюраман:

1. Ўзбекистон Республикаси маданият ва спорт ишлари вазирининг 2011 йил 9 июндаги 484-сон буйруғи (рўйхат рақами 2247, 2011 йил 22 июль) (Ўзбекистон Республикаси қонун ҳужжатлари тўплами, 2011 й., 30-сон, 318-модда) билан тасдиқланган Ўзбекистон Республикасида тренерлик фаолияти тўғрисидаги низомга иловага мувофиқ ўзгартиришлар киритилсин.

2. Мазкур буйруқ расмий эълон қилинган кундан эътиборан кучга киради.

Ўзбекистон Республикаси спорт вазирининг 2026 йил 5 июндаги 3-мҳ-сон буйруғига ИЛОВА

Ўзбекистон Республикасида тренерлик фаолияти тўғрисидаги низомга киритилаётган ўзгартиришлар

1. 2-банднинг учинчи — бешинчи хатбошилари қуйидаги таҳрирда баён этилсин:

« спорт тури — спорт мусобақаларига ўзига хос тарзда тайёргарлик кўрилиши билан ажралиб турувчи, спорт мусобақаларини ўтказишга ва уларда иштирок этишга доир талаблар ва шартлар белгиланадиган қоидаларга (низомга, регламентга) эга бўлган жисмоний тарбия ва спорт соҳасидаги фаолият тури;

спорт федерацияси (уюшмаси) — мамлакатда муайян спорт турини (турларини) ривожлантиришни, оммалаштиришни, спорт тадбирларини ташкил этиш ва ўтказишни, шунингдек Ўзбекистон Республикасининг спорт терма жамоаси аъзолигига номзодларни саралашни ва тавсия этишни ўз фаолиятининг асосий мақсади сифатида белгилаган, тегишли тартибда Спорт федерациялари (уюшмалари) реестрига киритилган нодавлат нотижорат ташкилоти;

тренер — спортчиларни тайёрлаш ҳамда уларнинг мусобақаларга тайёргарлик кўришини ташкил этиш, уларга назарий ва амалий билимларни бериш, шунингдек уларни жисмоний жиҳатдан камол топтиришни амалга оширувчи жисмоний шахс;».

2. 11-банд қуйидаги таҳрирда баён этилсин:

«11. Тренерлик фаолиятини амалга оширишда қуйидагиларга йўл қўйилмайди:

зўравонликни, диний экстремизмни, давлат тузумига, мамлакатнинг тинчлиги ва хавфсизлигига, унинг аҳолисига қарши қаратилган бошқа ҳаракатларни тарғиб қилишга;

жисмоний тарбия ва спорт билан шуғулланувчиларнинг шаъни ва қадр-қимматини камситишга;

ўқув машғулотлари жараёнида спортга алоқаси бўлмаган бошқа фаолиятни олиб боришга;

тақиқланган воситаларни, тамаки ва алкоголь маҳсулотларини истеъмол қилиш ҳамда уларни истеъмол қилишни тарғиб этишга.».

3. 17-банддан бешинчи хатбоши чиқариб ташлансин.

4. 20-банд қуйидаги таҳрирда баён этилсин:

«20. Тренерлик фаолиятини амалга оширувчи шахслар қуйидаги ҳуқуқларга эга:

тренерлик фаолиятини амалга ошириш;

қайта тайёрлаш ва малака ошириш курсларида ўқиш;

спорт мусобақаларида, жисмоний тарбия тадбирларида иштирок этиш.

Тренер қонунчиликка мувофиқ бошқа ҳуқуқларга ҳам эга бўлиши мумкин.».

5. 21-банд қуйидаги таҳрирда баён этилсин:

«21. Тренерлик фаолиятини амалга оширувчи шахслар қуйидагиларга мажбур:

қонунчилик ҳужжатларида белгиланган тартибда малака оширганлик ҳақидаги малака сертификатга эга бўлишга;

ўз фаолияти жараёнида жисмоний тарбия ва спорт билан шуғулланувчиларда ватанпарварлик, ватанга муҳаббат туйғуларини тарбиялашга, уларнинг соғлигини мустаҳкамлашга, спорт маҳоратини оширишга, уларни ахлоқий, маънавий тарбиялашга алоҳида эътибор қаратишга;

тренерга нисбатан қўйилган талабларга қатъий риоя этишга;

касбий малакасини узлуксиз ошириб боришга;

жисмоний тарбия ва спортни ҳамда соғлом турмуш тарзини тарғиб қилишга;

юксак маданият ва ташкилотчилик бўйича ўрнак бўлиш, шуғулланувчилар томонидан қўполлик, интизомсизлик ва ахлоқий меъёрлар бузилишининг олдини олишга;

ўқув-машғулотларида хавфсизлик, санитария қоидаларига, нормаларига ва гигиена нормативларига риоя этишга.

Тренернинг зиммасига қонунчиликка мувофиқ бошқа мажбуриятлар ҳам юклатилиши мумкин.».

Вазир А. ИКРАМОВ

Тошкент ш.,

2026 йил 5 июнь,

3-мҳ-сон

(Қонунчилик маълумотлари миллий базаси, 25.06.2026 й., 10/26/2247-4/0625-сон)

OʻZBEKISTON RESPUBLIKASI SPORT VAZIRINING

BUYRUGʻI

Oʻzbekiston Respublikasida trenerlik faoliyati toʻgʻrisidagi nizomga oʻzgartirishlar kiritish haqida

Oʻzbekiston Respublikasining “Jismoniy tarbiya va sport toʻgʻrisida”gi Qonuniga muvofiq buyuraman:

1. Oʻzbekiston Respublikasi madaniyat va sport ishlari vazirining 2011-yil 9-iyundagi 484-son buyrugʻi (roʻyxat raqami 2247, 2011-yil 22-iyul) (Oʻzbekiston Respublikasi qonun hujjatlari toʻplami, 2011-y., 30-son, 318-modda) bilan tasdiqlangan Oʻzbekiston Respublikasida trenerlik faoliyati toʻgʻrisidagi nizomga ilovaga muvofiq oʻzgartirishlar kiritilsin.

2. Mazkur buyruq rasmiy eʼlon qilingan kundan eʼtiboran kuchga kiradi.

Oʻzbekiston Respublikasi sport vazirining 2026-yil 5-iyundagi 3-mh-son buyrugʻiga ILOVA

Oʻzbekiston Respublikasida trenerlik faoliyati toʻgʻrisidagi nizomga kiritilayotgan oʻzgartirishlar

1. 2-bandning uchinchi — beshinchi xatboshilari quyidagi tahrirda bayon etilsin:

“ sport turi — sport musobaqalariga oʻziga xos tarzda tayyorgarlik koʻrilishi bilan ajralib turuvchi, sport musobaqalarini oʻtkazishga va ularda ishtirok etishga doir talablar va shartlar belgilanadigan qoidalarga (nizomga, reglamentga) ega boʻlgan jismoniy tarbiya va sport sohasidagi faoliyat turi;

sport federatsiyasi (uyushmasi) — mamlakatda muayyan sport turini (turlarini) rivojlantirishni, ommalashtirishni, sport tadbirlarini tashkil etish va oʻtkazishni, shuningdek Oʻzbekiston Respublikasining sport terma jamoasi aʼzoligiga nomzodlarni saralashni va tavsiya etishni oʻz faoliyatining asosiy maqsadi sifatida belgilagan, tegishli tartibda Sport federatsiyalari (uyushmalari) reyestriga kiritilgan nodavlat notijorat tashkiloti;

trener — sportchilarni tayyorlash hamda ularning musobaqalarga tayyorgarlik koʻrishini tashkil etish, ularga nazariy va amaliy bilimlarni berish, shuningdek ularni jismoniy jihatdan kamol toptirishni amalga oshiruvchi jismoniy shaxs;”.

2. 11-band quyidagi tahrirda bayon etilsin:

“11. Trenerlik faoliyatini amalga oshirishda quyidagilarga yoʻl qoʻyilmaydi:

zoʻravonlikni, diniy ekstremizmni, davlat tuzumiga, mamlakatning tinchligi va xavfsizligiga, uning aholisiga qarshi qaratilgan boshqa harakatlarni targʻib qilishga;

jismoniy tarbiya va sport bilan shugʻullanuvchilarning shaʼni va qadr-qimmatini kamsitishga;

oʻquv mashgʻulotlari jarayonida sportga aloqasi boʻlmagan boshqa faoliyatni olib borishga;

taqiqlangan vositalarni, tamaki va alkogol mahsulotlarini isteʼmol qilish hamda ularni isteʼmol qilishni targʻib etishga.”.

3. 17-banddan beshinchi xatboshi chiqarib tashlansin.

4. 20-band quyidagi tahrirda bayon etilsin:

“20. Trenerlik faoliyatini amalga oshiruvchi shaxslar quyidagi huquqlarga ega:

trenerlik faoliyatini amalga oshirish;

qayta tayyorlash va malaka oshirish kurslarida oʻqish;

sport musobaqalarida, jismoniy tarbiya tadbirlarida ishtirok etish.

Trener qonunchilikka muvofiq boshqa huquqlarga ham ega boʻlishi mumkin.”.

5. 21-band quyidagi tahrirda bayon etilsin:

“21. Trenerlik faoliyatini amalga oshiruvchi shaxslar quyidagilarga majbur:

qonunchilik hujjatlarida belgilangan tartibda malaka oshirganlik haqidagi malaka sertifikatga ega boʻlishga;

oʻz faoliyati jarayonida jismoniy tarbiya va sport bilan shugʻullanuvchilarda vatanparvarlik, vatanga muhabbat tuygʻularini tarbiyalashga, ularning sogʻligini mustahkamlashga, sport mahoratini oshirishga, ularni axloqiy, maʼnaviy tarbiyalashga alohida eʼtibor qaratishga;

trenerga nisbatan qoʻyilgan talablarga qatʼiy rioya etishga;

kasbiy malakasini uzluksiz oshirib borishga;

jismoniy tarbiya va sportni hamda sogʻlom turmush tarzini targʻib qilishga;

yuksak madaniyat va tashkilotchilik boʻyicha oʻrnak boʻlish, shugʻullanuvchilar tomonidan qoʻpollik, intizomsizlik va axloqiy meʼyorlar buzilishining oldini olishga;

oʻquv-mashgʻulotlarida xavfsizlik, sanitariya qoidalariga, normalariga va gigiyena normativlariga rioya etishga.

Trenerning zimmasiga qonunchilikka muvofiq boshqa majburiyatlar ham yuklatilishi mumkin.”.

Vazir A. IKRAMOV

Toshkent sh.,

2026-yil 5-iyun,

3-mh-son

(Qonunchilik maʼlumotlari milliy bazasi, 25.06.2026 y., 10/26/2247-4/0625-son)