📅 2026-yil 7-may · Vazirlik va idoralar hujjatlari · Istiqbolli loyihalar milliy agentligi direktori
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2026 йил 7 май · Вазирлик ва идоралар ҳужжатлари · Истиқболли лойиҳалар миллий агентлиги директори
Расмий матн. Расмий ҳужжат. Таҳририй изоҳлар киритилмаган.
📅 7 мая 2026 г. · Документы министерств и ведомств · Директор Национального Агентства Перспективных Проектов
Официальный текст. Официальный документ. Редакционные примечания не включены.
📅 7 May 2026 · Ministry and agency documents · Istiqbolli loyihalar milliy agentligi direktori
Official text. Official document. Editorial notes are not included.
ЎЗБЕКИСТОН РЕСПУБЛИКАСИ ИСТИҚБОЛЛИ ЛОЙИҲАЛАР МИЛЛИЙ АГЕНТЛИГИ ДИРЕКТОРИНИНГ
БУЙРУҒИ
НИЗОМ
Қимматли қоғозлар билан репо битимларини амалга ошириш тўғрисидаги низомни тасдиқлаш ҳақида
Ўзбекистон Республикасининг «Қимматли қоғозлар бозори тўғрисида»ги Қонуни ҳамда Ўзбекистон Республикаси Президентининг 2017 йил 27 июлдаги ПҚ-3150-сон «Ўзбекистон Республикаси Истиқболли лойиҳалар миллий агентлиги фаолиятини ташкил этиш тўғрисида»ги қарорига мувофиқ буюраман:
1. Қимматли қоғозлар билан репо битимларини амалга ошириш тўғрисидаги низом иловага мувофиқ тасдиқлансин.
2. Мазкур буйруқ расмий эълон қилинган кундан эътиборан кучга киради.
Ўзбекистон Республикаси Истиқболли лойиҳалар миллий агентлиги директорининг 2026 йил 7 майдаги 15-сон буйруғига ИЛОВА
Қимматли қоғозлар билан репо битимларини амалга ошириш тўғрисидаги
Мазкур Низом Ўзбекистон Республикаси ҳудудида қимматли қоғозлар билан репо битимларини амалга ошириш тартибини белгилайди.
1-боб. Умумий қоидалар
1. Ушбу Низомнинг амал қилиши Ўзбекистон Республикаси резидентлари томонидан Ўзбекистон Республикаси ҳудудида акциялар, облигациялар ва қимматли қоғозларнинг ҳосилалари билан амалга ошириладиган репо битимларига татбиқ этилади.
Мазкур Низом давлат қимматли қоғозлари билан амалга ошириладиган репо битимларига нисбатан татбиқ этилмайди.
2. Ушбу Низом мақсадларида қуйидаги асосий тушунчалардан фойдаланилади:
репо битими — битим шартлари билан белгиланган муддат ва баҳода қимматли қоғозларни қайта сотиб олиш (сотиш) шарти билан тузиладиган олди-сотди битими;
репо ташаббускори — савдо тизимида репо битимида иштирок этиш таклифи билан буюртма берган томон;
репо акцептанти — савдо тизимида репо ташаббускори билан битим тузган томон;
савдо тизими — репо битими бўйича электрон савдолар амалга ошириладиган, унинг асосида буюртмаларни рўйхатга олиш, қимматли қоғозлар ва пул маблағларининг ҳисобини юритиш, битимларни автоматик тарзда тузиш имконини берувчи фонд биржасининг ва қимматли қоғозларнинг биржадан ташқари савдоси ташкилотчисининг (бундан буён матнда қимматли қоғозлар савдосининг ташкилотчилари деб юритилади) автоматлаштирилган электрон тизими;
қимматли қоғозлар — ҳужжатлар бўлиб, улар мазкур ҳужжатларни чиқарган юридик шахс билан уларнинг эгаси ўртасидаги мулкий ҳуқуқларни ёки қарз муносабатларини тасдиқлайди, дивидендлар ёки фоизлар тарзида даромад тўлашни ҳамда ушбу ҳужжатлардан келиб чиқадиган ҳуқуқларни бошқа шахсларга ўтказиш имкониятини назарда тутади;
биржанинг котировкалаш варағига киритилган қимматли қоғозлар — фонд биржаси томонидан белгиланган савдо қоидалари талабларига мувофиқ фонд биржасининг котировкалаш варағига киритилган қимматли қоғозлар;
мукофот — репо битими бўйича пул маблағларидан фойдаланиш эвазига репо ташаббускори томонидан репо акцептантига тўланадиган, қимматли қоғозлар қийматига нисбатан фоизларда белгиланадиган ҳамда қимматли қоғозларни дастлабки сотиш ва қайта сотиб олиш нархлари ўртасидаги фарқни ифодалайдиган ҳақ;
қимматли қоғозлар бозорини тартибга солиш бўйича ваколатли давлат органи — Ўзбекистон Республикаси Истиқболли лойиҳалар миллий агентлиги.
2-боб. Репо битимларини амалга оширишга қўйиладиган талаблар
3. Ўзбекистон Республикаси резидентлари томонидан қимматли қоғозлар билан репо битимларини тузиш қимматли қоғозлар савдоси ташкилотчиларининг савдо тизимларида амалга оширилади.
Биржанинг котировкалаш варағига киритилган қимматли қоғозлар репо битимларининг таъминоти сифатида киритилиши мумкин. Бунда эмитент ёки қимматли қоғознинг Ўзбекистон Республикасининг суверен кредит рейтингидан кўпи билан икки поғона паст бўлган халқаро кредит рейтинги ёки унинг миллий рейтинг шкаласи бўйича эквиваленти мавжуд бўлган тақдирда, улардан таъминот сифатида фойдаланишга рухсат этилади.
4. Жойлаштирилмаган қимматли қоғозлар, шунингдек эмитент томонидан сотиб олинган ёки эмитент тасарруфига бошқача тарзда келиб тушган қимматли қоғозлар (облигациялар ва қимматли қоғозларнинг ҳосилалари бундан мустасно) билан репо битимларини амалга оширишга йўл қўйилмайди.
5. Репо битими репо ташаббускори ва репо акцептанти ўртасида тузилади ва унда қимматли қоғозларни дастлабки сотиш (сотиб олиш) шартлари (нархи, миқдори ва тарафларнинг келишувига кўра бошқа шартлар), шунингдек қимматли қоғозларни қайта сотиб олиш (сотиш) шартлари (муддати, миқдори, нархи ва тарафларнинг келишувига кўра бошқа шартлар) бўлиши керак.
6. Репо битими савдо тизимида рўйхатдан ўтказилган пайтдан эътиборан кучга киради.
7. Репо битимларини рўйхатдан ўтказиш тартиби ва шартлари, шунингдек пул маблағларини депонентлаш ва қимматли қоғозларни репо битимлари бўйича блокировка қилиш муддатлари, тартиби ва шартлари қимматли қоғозлар савдосининг ташкилотчиси томонидан унинг қоидалари билан белгиланади.
3-боб. Репо битимларини тузиш шартлари
8. Репо ташаббускори қимматли қоғозлар савдоси ташкилотчисининг савдо тизимида репо битимини тузиш бўйича буюртма бериши мумкин.
9. Тақдим этилган буюртмалар қимматли қоғозларни дастлабки сотиш (сотиб олиш) нархини, қайта сотиб олиш (сотиш) муддатини ва мукофот миқдорини (қимматли қоғозларнинг умумий қийматига нисбатан йиллик фоизларда) ўз ичига олиши керак.
Устав фондида (устав капиталида) давлат улуши бўлган ва репо битими бўйича акцептант вазифасини бажарувчи юридик шахс репо битими бўйича мукофот миқдорини битим тузилган санадаги Ўзбекистон Республикаси Марказий банкининг қайта молиялаштириш ставкасидан кам бўлмаган миқдорда белгилаши шарт.
Репо битими бўйича мукофот ўтказилган савдолар якунлари бўйича йиллик фоиз ҳисобида репо битимида белгиланади.
10. Репо битими ўзаро боғлиқ бўлган икки қисмдан иборат бўлиб, унда қуйидагилар амалга оширилади:
биринчи қисмда қимматли қоғозларни репо битимида белгиланган шартларда сотиш (сотиб олиш);
иккинчи қисмда қимматли қоғозларни репо битимида назарда тутилган муддатда ва шартларда қайта сотиб олиш (сотиш).
11. Репо битимининг муддати репо битимининг биринчи қисми рўйхатга олинган санадан репо битимининг иккинчи қисми ижро этиладиган санагача бўлган давр ҳисобланади.
12. Репо акцептанти репо ташаббускорининг репо битимини тузиш тўғрисидаги буюртмасини савдо тизимида қабул қилган пайтдан бошлаб репо битими савдо тизимида автоматик равишда тузилган ва рўйхатга олинган ҳисобланади.
13. Репо битимининг иккинчи қисми репо битимида белгиланган муддат тугаганда репо битими рўйхатдан ўтказилган савдо тизимида автоматик равишда ижро этилади ҳамда қимматли қоғозлар ва пул маблағлари бўйича ҳисоб-китоблар савдо тизими қоидаларига мувофиқ амалга оширилади.
14. Репо битимининг шартлари ва муддатларига ўзгартириш ва қўшимчалар киритиш репо битими тарафларининг ўзаро розилигига асосан амалга оширилади.
Репо битими тарафлари репо битимининг иккинчи қисми ижро этиладиган санадан камида бир иш куни олдин репо битимининг шартлари ва муддатларига ўзгартириш ва қўшимчалар киритиш тўғрисида қимматли қоғозлар савдосининг ташкилотчисига савдо тизими қоидаларига мувофиқ мурожаат қилишга ҳақли.
Бунда, репо битимининг шартлари ва муддатларига ўзгартириш ва қўшимчаларни савдо тизимида рўйхатдан ўтказиш талаб этилмайди.
15. Репо битимининг иккинчи қисми бўйича тарафларнинг ҳуқуқ ва мажбуриятлари репо битимининг биринчи қисмига нисбатан тескари тартибда амалга оширилади. Бунда, қимматли қоғозларни репо битимининг биринчи қисмида сотган тараф иккинчи қисмда уларни қайта сотиб олувчи, қимматли қоғозларни репо битимининг биринчи қисмида сотиб олган тараф эса иккинчи қисмда уларни қайта сотувчи ҳисобланади.
16. Репо битимлари бўйича қонунчилик ҳужжатларига мувофиқ қимматли қоғозларга оид ҳуқуқ ва мажбуриятлар репо битимининг муддати давомида репо ташаббускоридан репо акцептантига ўтади.
17. Репо битимининг иккинчи қисми бўйича тарафларнинг мажбуриятлари репо битимининг биринчи қисми тўлиқ ижро этилгандан сўнг юзага келади.
18. Қимматли қоғозлар савдосининг ташкилотчиси репо битимининг иккинчи қисми ижро этиладиган санадан камида бир кун олдин репо битими тарафларига репо битимининг иккинчи қисми ижро этилиши тўғрисида хабарнома юборади.
19. Савдо тизими репо битимининг иккинчи қисмини ижро этишдан олдин репо битими тарафларининг пул маблағлари ва қимматли қоғозлари репо битими бўйича мажбуриятларни тўлиқ бажариш учун етарлилигини текширади.
Репо битими тарафларининг пул маблағлари ва (ёки) қимматли қоғозлари репо битимининг иккинчи қисми бўйича мажбуриятларни тўлиқ бажариш учун етарли бўлган тақдирда, савдо тизими пул маблағлари ва қимматли қоғозлар бўйича ҳисоб-китобларни автоматик равишда амалга оширилишини таъминлайди ҳамда репо битимининг иккинчи қисми ижро этилган деб ҳисобланади.
20. Репо битимининг иккинчи қисми ижро этиладиган санада мажбуриятларни бажариш учун зарур бўлган пул маблағлари ва (ёки) қимматли қоғозларнинг етарлилиги таъминланмаган тақдирда, етарлилик шартини бажармаган тараф репо битими бўйича ўз мажбуриятларини бажармаган деб ҳисобланади ва қонунчилик ҳужжатларида ҳамда репо битими шартларида белгиланган тартибда жавобгар бўлади. Савдо тизимида ёки Қимматли қоғозлар марказий депозитарийсининг тизимида юзага келган техник носозликлар сабабли етарлилик шартларининг бажарилмаслик ҳолатлари бундан мустасно.
21. Репо битимига мувофиқ қайта сотиб олинадиган (қайта сотиладиган) қимматли қоғозлар сони репо битими бўйича дастлабки сотилган (сотиб олинган) қимматли қоғозлар сонига тенг бўлиши керак.
22. Қимматли қоғозлар билан репо битимлари, агар қонунчилик ҳужжатларида бошқача тартиб белгиланмаган бўлса, фақат Ўзбекистон Республикасининг миллий валютасида амалга оширилади.
4-боб. Репо битимлари бўйича ҳисобот
23. Қимматли қоғозлар савдосининг ташкилотчиси ўзи томонидан рўйхатга олинган репо битимларининг алоҳида хронологик ҳисобини юритиши шарт.
24. Қимматли қоғозлар савдосининг ташкилотчиси рўйхатга олинган репо битимлари доирасида амалга оширилган қимматли қоғозлар олди-сотдисининг алоҳида ҳисобини юритади.
25. Қимматли қоғозлар бозорини тартибга солиш бўйича ваколатли давлат органи қонунчилик ҳужжатларида белгиланган тартибда қимматли қоғозлар савдосининг ташкилотчисидан ва қимматли қоғозлар бозори бошқа иштирокчиларидан репо битимларига оид маълумотларни сўраб олишга ҳақли. Бунда, репо битимларига оид маълумотлар қимматли қоғозлар бозорини тартибга солиш бўйича ваколатли давлат органининг сўровида белгиланган муддатларда тақдим этилиши керак.
26. Қимматли қоғозлар савдосининг ташкилотчилари қимматли қоғозлар бозори тўғрисидаги қонунчилик ҳужжатлари бузилиши ҳолатлари аниқланган вақтдан бошлаб икки иш куни ичида қимматли қоғозлар бозорини тартибга солиш бўйича ваколатли давлат органини бу ҳақда хабардор қилишлари шарт.
5-боб. Якуний қоида
27. Мазкур Низом талабларининг бузилишида айбдор бўлган шахслар қонунчилик ҳужжатларига мувофиқ жавобгар бўладилар.
Директор Д. ЛИ
Тошкент ш.,
2026 йил 7 май,
15-сон
OʻZBEKISTON RESPUBLIKASI ISTIQBOLLI LOYIHALAR MILLIY AGENTLIGI DIREKTORINING
BUYRUGʻI
NIZOM
Qimmatli qogʻozlar bilan repo bitimlarini amalga oshirish toʻgʻrisidagi nizomni tasdiqlash haqida
Oʻzbekiston Respublikasining “Qimmatli qogʻozlar bozori toʻgʻrisida”gi Qonuni hamda Oʻzbekiston Respublikasi Prezidentining 2017-yil 27-iyuldagi PQ-3150-son “Oʻzbekiston Respublikasi Istiqbolli loyihalar milliy agentligi faoliyatini tashkil etish toʻgʻrisida”gi qaroriga muvofiq buyuraman:
1. Qimmatli qogʻozlar bilan repo bitimlarini amalga oshirish toʻgʻrisidagi nizom ilovaga muvofiq tasdiqlansin.
2. Mazkur buyruq rasmiy eʼlon qilingan kundan eʼtiboran kuchga kiradi.
Oʻzbekiston Respublikasi Istiqbolli loyihalar milliy agentligi direktorining 2026-yil 7-maydagi 15-son buyrugʻiga ILOVA
Qimmatli qogʻozlar bilan repo bitimlarini amalga oshirish toʻgʻrisidagi
Mazkur Nizom Oʻzbekiston Respublikasi hududida qimmatli qogʻozlar bilan repo bitimlarini amalga oshirish tartibini belgilaydi.
1-bob. Umumiy qoidalar
1. Ushbu Nizomning amal qilishi Oʻzbekiston Respublikasi rezidentlari tomonidan Oʻzbekiston Respublikasi hududida aksiyalar, obligatsiyalar va qimmatli qogʻozlarning hosilalari bilan amalga oshiriladigan repo bitimlariga tatbiq etiladi.
Mazkur Nizom davlat qimmatli qogʻozlari bilan amalga oshiriladigan repo bitimlariga nisbatan tatbiq etilmaydi.
2. Ushbu Nizom maqsadlarida quyidagi asosiy tushunchalardan foydalaniladi:
repo bitimi — bitim shartlari bilan belgilangan muddat va bahoda qimmatli qogʻozlarni qayta sotib olish (sotish) sharti bilan tuziladigan oldi-sotdi bitimi;
repo tashabbuskori — savdo tizimida repo bitimida ishtirok etish taklifi bilan buyurtma bergan tomon;
repo akseptanti — savdo tizimida repo tashabbuskori bilan bitim tuzgan tomon;
savdo tizimi — repo bitimi boʻyicha elektron savdolar amalga oshiriladigan, uning asosida buyurtmalarni roʻyxatga olish, qimmatli qogʻozlar va pul mablagʻlarining hisobini yuritish, bitimlarni avtomatik tarzda tuzish imkonini beruvchi fond birjasining va qimmatli qogʻozlarning birjadan tashqari savdosi tashkilotchisining (bundan buyon matnda qimmatli qogʻozlar savdosining tashkilotchilari deb yuritiladi) avtomatlashtirilgan elektron tizimi;
qimmatli qogʻozlar — hujjatlar boʻlib, ular mazkur hujjatlarni chiqargan yuridik shaxs bilan ularning egasi oʻrtasidagi mulkiy huquqlarni yoki qarz munosabatlarini tasdiqlaydi, dividendlar yoki foizlar tarzida daromad toʻlashni hamda ushbu hujjatlardan kelib chiqadigan huquqlarni boshqa shaxslarga oʻtkazish imkoniyatini nazarda tutadi;
birjaning kotirovkalash varagʻiga kiritilgan qimmatli qogʻozlar — fond birjasi tomonidan belgilangan savdo qoidalari talablariga muvofiq fond birjasining kotirovkalash varagʻiga kiritilgan qimmatli qogʻozlar;
mukofot — repo bitimi boʻyicha pul mablagʻlaridan foydalanish evaziga repo tashabbuskori tomonidan repo akseptantiga toʻlanadigan, qimmatli qogʻozlar qiymatiga nisbatan foizlarda belgilanadigan hamda qimmatli qogʻozlarni dastlabki sotish va qayta sotib olish narxlari oʻrtasidagi farqni ifodalaydigan haq;
qimmatli qogʻozlar bozorini tartibga solish boʻyicha vakolatli davlat organi — Oʻzbekiston Respublikasi Istiqbolli loyihalar milliy agentligi.
2-bob. Repo bitimlarini amalga oshirishga qoʻyiladigan talablar
3. Oʻzbekiston Respublikasi rezidentlari tomonidan qimmatli qogʻozlar bilan repo bitimlarini tuzish qimmatli qogʻozlar savdosi tashkilotchilarining savdo tizimlarida amalga oshiriladi.
Birjaning kotirovkalash varagʻiga kiritilgan qimmatli qogʻozlar repo bitimlarining taʼminoti sifatida kiritilishi mumkin. Bunda emitent yoki qimmatli qogʻozning Oʻzbekiston Respublikasining suveren kredit reytingidan koʻpi bilan ikki pogʻona past boʻlgan xalqaro kredit reytingi yoki uning milliy reyting shkalasi boʻyicha ekvivalenti mavjud boʻlgan taqdirda, ulardan taʼminot sifatida foydalanishga ruxsat etiladi.
4. Joylashtirilmagan qimmatli qogʻozlar, shuningdek emitent tomonidan sotib olingan yoki emitent tasarrufiga boshqacha tarzda kelib tushgan qimmatli qogʻozlar (obligatsiyalar va qimmatli qogʻozlarning hosilalari bundan mustasno) bilan repo bitimlarini amalga oshirishga yoʻl qoʻyilmaydi.
5. Repo bitimi repo tashabbuskori va repo akseptanti oʻrtasida tuziladi va unda qimmatli qogʻozlarni dastlabki sotish (sotib olish) shartlari (narxi, miqdori va taraflarning kelishuviga koʻra boshqa shartlar), shuningdek qimmatli qogʻozlarni qayta sotib olish (sotish) shartlari (muddati, miqdori, narxi va taraflarning kelishuviga koʻra boshqa shartlar) boʻlishi kerak.
6. Repo bitimi savdo tizimida roʻyxatdan oʻtkazilgan paytdan eʼtiboran kuchga kiradi.
7. Repo bitimlarini roʻyxatdan oʻtkazish tartibi va shartlari, shuningdek pul mablagʻlarini deponentlash va qimmatli qogʻozlarni repo bitimlari boʻyicha blokirovka qilish muddatlari, tartibi va shartlari qimmatli qogʻozlar savdosining tashkilotchisi tomonidan uning qoidalari bilan belgilanadi.
3-bob. Repo bitimlarini tuzish shartlari
8. Repo tashabbuskori qimmatli qogʻozlar savdosi tashkilotchisining savdo tizimida repo bitimini tuzish boʻyicha buyurtma berishi mumkin.
9. Taqdim etilgan buyurtmalar qimmatli qogʻozlarni dastlabki sotish (sotib olish) narxini, qayta sotib olish (sotish) muddatini va mukofot miqdorini (qimmatli qogʻozlarning umumiy qiymatiga nisbatan yillik foizlarda) oʻz ichiga olishi kerak.
Ustav fondida (ustav kapitalida) davlat ulushi boʻlgan va repo bitimi boʻyicha akseptant vazifasini bajaruvchi yuridik shaxs repo bitimi boʻyicha mukofot miqdorini bitim tuzilgan sanadagi Oʻzbekiston Respublikasi Markaziy bankining qayta moliyalashtirish stavkasidan kam boʻlmagan miqdorda belgilashi shart.
Repo bitimi boʻyicha mukofot oʻtkazilgan savdolar yakunlari boʻyicha yillik foiz hisobida repo bitimida belgilanadi.
10. Repo bitimi oʻzaro bogʻliq boʻlgan ikki qismdan iborat boʻlib, unda quyidagilar amalga oshiriladi:
birinchi qismda qimmatli qogʻozlarni repo bitimida belgilangan shartlarda sotish (sotib olish);
ikkinchi qismda qimmatli qogʻozlarni repo bitimida nazarda tutilgan muddatda va shartlarda qayta sotib olish (sotish).
11. Repo bitimining muddati repo bitimining birinchi qismi roʻyxatga olingan sanadan repo bitimining ikkinchi qismi ijro etiladigan sanagacha boʻlgan davr hisoblanadi.
12. Repo akseptanti repo tashabbuskorining repo bitimini tuzish toʻgʻrisidagi buyurtmasini savdo tizimida qabul qilgan paytdan boshlab repo bitimi savdo tizimida avtomatik ravishda tuzilgan va roʻyxatga olingan hisoblanadi.
13. Repo bitimining ikkinchi qismi repo bitimida belgilangan muddat tugaganda repo bitimi roʻyxatdan oʻtkazilgan savdo tizimida avtomatik ravishda ijro etiladi hamda qimmatli qogʻozlar va pul mablagʻlari boʻyicha hisob-kitoblar savdo tizimi qoidalariga muvofiq amalga oshiriladi.
14. Repo bitimining shartlari va muddatlariga oʻzgartirish va qoʻshimchalar kiritish repo bitimi taraflarining oʻzaro roziligiga asosan amalga oshiriladi.
Repo bitimi taraflari repo bitimining ikkinchi qismi ijro etiladigan sanadan kamida bir ish kuni oldin repo bitimining shartlari va muddatlariga oʻzgartirish va qoʻshimchalar kiritish toʻgʻrisida qimmatli qogʻozlar savdosining tashkilotchisiga savdo tizimi qoidalariga muvofiq murojaat qilishga haqli.
Bunda, repo bitimining shartlari va muddatlariga oʻzgartirish va qoʻshimchalarni savdo tizimida roʻyxatdan oʻtkazish talab etilmaydi.
15. Repo bitimining ikkinchi qismi boʻyicha taraflarning huquq va majburiyatlari repo bitimining birinchi qismiga nisbatan teskari tartibda amalga oshiriladi. Bunda, qimmatli qogʻozlarni repo bitimining birinchi qismida sotgan taraf ikkinchi qismda ularni qayta sotib oluvchi, qimmatli qogʻozlarni repo bitimining birinchi qismida sotib olgan taraf esa ikkinchi qismda ularni qayta sotuvchi hisoblanadi.
16. Repo bitimlari boʻyicha qonunchilik hujjatlariga muvofiq qimmatli qogʻozlarga oid huquq va majburiyatlar repo bitimining muddati davomida repo tashabbuskoridan repo akseptantiga oʻtadi.
17. Repo bitimining ikkinchi qismi boʻyicha taraflarning majburiyatlari repo bitimining birinchi qismi toʻliq ijro etilgandan soʻng yuzaga keladi.
18. Qimmatli qogʻozlar savdosining tashkilotchisi repo bitimining ikkinchi qismi ijro etiladigan sanadan kamida bir kun oldin repo bitimi taraflariga repo bitimining ikkinchi qismi ijro etilishi toʻgʻrisida xabarnoma yuboradi.
19. Savdo tizimi repo bitimining ikkinchi qismini ijro etishdan oldin repo bitimi taraflarining pul mablagʻlari va qimmatli qogʻozlari repo bitimi boʻyicha majburiyatlarni toʻliq bajarish uchun yetarliligini tekshiradi.
Repo bitimi taraflarining pul mablagʻlari va (yoki) qimmatli qogʻozlari repo bitimining ikkinchi qismi boʻyicha majburiyatlarni toʻliq bajarish uchun yetarli boʻlgan taqdirda, savdo tizimi pul mablagʻlari va qimmatli qogʻozlar boʻyicha hisob-kitoblarni avtomatik ravishda amalga oshirilishini taʼminlaydi hamda repo bitimining ikkinchi qismi ijro etilgan deb hisoblanadi.
20. Repo bitimining ikkinchi qismi ijro etiladigan sanada majburiyatlarni bajarish uchun zarur boʻlgan pul mablagʻlari va (yoki) qimmatli qogʻozlarning yetarliligi taʼminlanmagan taqdirda, yetarlilik shartini bajarmagan taraf repo bitimi boʻyicha oʻz majburiyatlarini bajarmagan deb hisoblanadi va qonunchilik hujjatlarida hamda repo bitimi shartlarida belgilangan tartibda javobgar boʻladi. Savdo tizimida yoki Qimmatli qogʻozlar markaziy depozitariysining tizimida yuzaga kelgan texnik nosozliklar sababli yetarlilik shartlarining bajarilmaslik holatlari bundan mustasno.
21. Repo bitimiga muvofiq qayta sotib olinadigan (qayta sotiladigan) qimmatli qogʻozlar soni repo bitimi boʻyicha dastlabki sotilgan (sotib olingan) qimmatli qogʻozlar soniga teng boʻlishi kerak.
22. Qimmatli qogʻozlar bilan repo bitimlari, agar qonunchilik hujjatlarida boshqacha tartib belgilanmagan boʻlsa, faqat Oʻzbekiston Respublikasining milliy valyutasida amalga oshiriladi.
4-bob. Repo bitimlari boʻyicha hisobot
23. Qimmatli qogʻozlar savdosining tashkilotchisi oʻzi tomonidan roʻyxatga olingan repo bitimlarining alohida xronologik hisobini yuritishi shart.
24. Qimmatli qogʻozlar savdosining tashkilotchisi roʻyxatga olingan repo bitimlari doirasida amalga oshirilgan qimmatli qogʻozlar oldi-sotdisining alohida hisobini yuritadi.
25. Qimmatli qogʻozlar bozorini tartibga solish boʻyicha vakolatli davlat organi qonunchilik hujjatlarida belgilangan tartibda qimmatli qogʻozlar savdosining tashkilotchisidan va qimmatli qogʻozlar bozori boshqa ishtirokchilaridan repo bitimlariga oid maʼlumotlarni soʻrab olishga haqli. Bunda, repo bitimlariga oid maʼlumotlar qimmatli qogʻozlar bozorini tartibga solish boʻyicha vakolatli davlat organining soʻrovida belgilangan muddatlarda taqdim etilishi kerak.
26. Qimmatli qogʻozlar savdosining tashkilotchilari qimmatli qogʻozlar bozori toʻgʻrisidagi qonunchilik hujjatlari buzilishi holatlari aniqlangan vaqtdan boshlab ikki ish kuni ichida qimmatli qogʻozlar bozorini tartibga solish boʻyicha vakolatli davlat organini bu haqda xabardor qilishlari shart.
5-bob. Yakuniy qoida
27. Mazkur Nizom talablarining buzilishida aybdor boʻlgan shaxslar qonunchilik hujjatlariga muvofiq javobgar boʻladilar.
Direktor D. LI
Toshkent sh.,
2026-yil 7-may,
15-son