📅 2026-yil 26-iyun · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2026 йил 26 июнь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 26 июня 2026 г. · Постановления Кабинета Министров
Официальный текст. Официальный документ. Редакционные примечания не включены.
📅 26 June 2026 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Атом энергияси соҳасида билим ва малакалар минтақавий марказини ташкил этиш чора-тадбирлари тўғрисида
Атом энергиясидан тинчлик мақсадларида барқарор ва хавфсиз фойдаланишни таъминлаш, Атом энергияси соҳасида билим ва малакалар минтақавий марказини ташкил этиш ва унинг фаолиятини йўлга қўйиш, атом соҳасида илмий-таълим ҳамкорлигини ва технологик интеграцияни мустаҳкамлаш, ядро ва радиация хавфсизлиги даражасини оширишга кўмаклашиш, Ўзбекистон Республикасида инновацияларни ривожлантириш, шунингдек, халқаро ҳамкорликни кенгайтириш мақсадида Вазирлар Маҳкамаси қарор қилади:
1. Вазирлар Маҳкамаси ҳузуридаги Атом энергияси агентлиги (кейинги ўринларда — Агентлик) ҳамда Олий таълим, фан ва инновациялар вазирлигининг қуйидаги таклифлари маъқуллансин:
а) Тошкент шаҳридаги «ММФИ» миллий тадқиқот ядро университетининг филиали (кейинги ўринларда — Филиал) таркибида алоҳида таркибий бўлинма шаклида Атом энергияси соҳасида билим ва малакалар минтақавий марказини (кейинги ўринларда — Марказ) ташкил этиш;
б) Марказнинг ташкилий-ҳуқуқий мақоми ва бошқарув тартибини қуйидагича белгилаш:
Марказ юридик шахс мақомига эга бўлмайди ҳамда ўз фаолиятида Филиалнинг инфратузилмасидан фойдаланади ҳамда минтақа (Марказий Осиё) давлатлари мутахассислари учун илмий-амалий платформа вазифасини бажаради;
Марказ фаолиятига Филиал ижрочи директори томонидан Агентлик билан келишилган ҳолда тайинланадиган Марказ директори раҳбарлик қилади ва унинг мақоми Филиал ижрочи директорининг ўринбосарига тенглаштирилади;
Марказ тўғрисидаги низом ва унинг тузилмаси Агентлик билан келишилган ҳолда, Филиал ижрочи директори томонидан тасдиқланади;
Марказнинг чекланган штат бирлиги 15 нафар этиб белгиланади ва Филиалнинг ходимлар штатини мақбуллаштириш ҳисобидан шакллантирилади;
в) Марказнинг асосий вазифалари этиб қуйидагиларни белгилаш:
Марказий Осиё давлатлари мутахассислари учун атом энергиясидан фойдаланиш объектларини лойиҳалаштириш, қуриш ва хавфсиз эксплуатация қилиш бўйича халқаро стандартларга мувофиқ ўқув модулларини ишлаб чиқиш ва амалий тренинглар ташкил этиш;
Филиалнинг замонавий ўқув лабораториялари ҳамда АЭС симуляторлари базасида реактор ва турбина бўлимлари ходимлари учун симуляция ўқув машғулотларини ўтказиш;
Халқаро атом энергияси агентлиги тавсиялари асосида Марказий Осиё давлатларига миллий ядровий инфратузилмани яратиш ва ядровий хавфсизлик маданиятини шакллантириш бўйича эксперт-консалтинг хизматларини кўрсатиш;
атом энергиясидан фойдаланиш ва ядро технологиялари соҳасида минтақавий кадрлар захирасини шакллантириш, талабалар ва ёш олимларнинг академик ҳаракатчанлиги бўйича ягона платформа вазифасини бажариш;
республикада атом электр станцияси қурилиши тажрибаси асосида «билимлар базаси»ни шакллантириш ва ушбу тажрибани минтақанинг бошқа давлатларига трансфер қилиш механизмларини ишлаб чиқиш;
Марказий Осиёда атом энергетикасининг ижобий имижини шакллантириш, аҳоли ва кенг жамоатчилик ўртасида ядро технологияларининг хавфсизлиги ва экологик афзалликларини тарғиб қилиш бўйича ахборот-намойиш фаолиятини кўрсатиш.
2. Агентлик ва Филиал:
бир ой муддатда Марказ тўғрисидаги низом, унинг штат жадвали ва тузилмасини тасдиқласин;
уч ой муддатда Марказни малакали кадрлар билан тўлдириш чорасини кўрсин;
Филиалнинг асослантирилган ҳисоб-китоблари асосида Марказ ходимларини Агентликнинг Атом энергиясидан фойдаланиш соҳасини ривожлантириш жамғармаси ҳисобидан молиявий рағбатлантириш механизмларини жорий қилсин.
3. Белгилаб қўйилсинки, ушбу қарор ижроси билан боғлиқ харажатлар 2026 йилда Ўзбекистон Республикасининг республика бюджетидан биринчи даражали бюджет маблағларини тақсимловчи сифатида Агентликка ажратиладиган маблағлар доирасида молиялаштирилади, 2027 йилдан бошлаб Давлат бюджети параметрларида назарда тутилади.
4. Ушбу қарорнинг бажарилишини назорат қилиш «Ўзатом» агентлиги директори А.И. Ахмедхаджаев зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2026 йил 26 июнь,
334 -сон
Oʻzbekiston Respublikasi Vazirlar Mahkamasining
qarori
Atom energiyasi sohasida bilim va malakalar mintaqaviy markazini tashkil etish chora-tadbirlari toʻgʻrisida
Atom energiyasidan tinchlik maqsadlarida barqaror va xavfsiz foydalanishni taʼminlash, Atom energiyasi sohasida bilim va malakalar mintaqaviy markazini tashkil etish va uning faoliyatini yoʻlga qoʻyish, atom sohasida ilmiy-taʼlim hamkorligini va texnologik integratsiyani mustahkamlash, yadro va radiatsiya xavfsizligi darajasini oshirishga koʻmaklashish, Oʻzbekiston Respublikasida innovatsiyalarni rivojlantirish, shuningdek, xalqaro hamkorlikni kengaytirish maqsadida Vazirlar Mahkamasi qaror qiladi:
1. Vazirlar Mahkamasi huzuridagi Atom energiyasi agentligi (keyingi oʻrinlarda — Agentlik) hamda Oliy taʼlim, fan va innovatsiyalar vazirligining quyidagi takliflari maʼqullansin:
a) Toshkent shahridagi “MMFI” milliy tadqiqot yadro universitetining filiali (keyingi oʻrinlarda — Filial) tarkibida alohida tarkibiy boʻlinma shaklida Atom energiyasi sohasida bilim va malakalar mintaqaviy markazini (keyingi oʻrinlarda — Markaz) tashkil etish;
b) Markazning tashkiliy-huquqiy maqomi va boshqaruv tartibini quyidagicha belgilash:
Markaz yuridik shaxs maqomiga ega boʻlmaydi hamda oʻz faoliyatida Filialning infratuzilmasidan foydalanadi hamda mintaqa (Markaziy Osiyo) davlatlari mutaxassislari uchun ilmiy-amaliy platforma vazifasini bajaradi;
Markaz faoliyatiga Filial ijrochi direktori tomonidan Agentlik bilan kelishilgan holda tayinlanadigan Markaz direktori rahbarlik qiladi va uning maqomi Filial ijrochi direktorining oʻrinbosariga tenglashtiriladi;
Markaz toʻgʻrisidagi nizom va uning tuzilmasi Agentlik bilan kelishilgan holda, Filial ijrochi direktori tomonidan tasdiqlanadi;
Markazning cheklangan shtat birligi 15 nafar etib belgilanadi va Filialning xodimlar shtatini maqbullashtirish hisobidan shakllantiriladi;
v) Markazning asosiy vazifalari etib quyidagilarni belgilash:
Markaziy Osiyo davlatlari mutaxassislari uchun atom energiyasidan foydalanish obyektlarini loyihalashtirish, qurish va xavfsiz ekspluatatsiya qilish boʻyicha xalqaro standartlarga muvofiq oʻquv modullarini ishlab chiqish va amaliy treninglar tashkil etish;
Filialning zamonaviy oʻquv laboratoriyalari hamda AES simulyatorlari bazasida reaktor va turbina boʻlimlari xodimlari uchun simulyatsiya oʻquv mashgʻulotlarini oʻtkazish;
Xalqaro atom energiyasi agentligi tavsiyalari asosida Markaziy Osiyo davlatlariga milliy yadroviy infratuzilmani yaratish va yadroviy xavfsizlik madaniyatini shakllantirish boʻyicha ekspert-konsalting xizmatlarini koʻrsatish;
atom energiyasidan foydalanish va yadro texnologiyalari sohasida mintaqaviy kadrlar zaxirasini shakllantirish, talabalar va yosh olimlarning akademik harakatchanligi boʻyicha yagona platforma vazifasini bajarish;
respublikada atom elektr stansiyasi qurilishi tajribasi asosida “bilimlar bazasi”ni shakllantirish va ushbu tajribani mintaqaning boshqa davlatlariga transfer qilish mexanizmlarini ishlab chiqish;
Markaziy Osiyoda atom energetikasining ijobiy imijini shakllantirish, aholi va keng jamoatchilik oʻrtasida yadro texnologiyalarining xavfsizligi va ekologik afzalliklarini targʻib qilish boʻyicha axborot-namoyish faoliyatini koʻrsatish.
2. Agentlik va Filial:
bir oy muddatda Markaz toʻgʻrisidagi nizom, uning shtat jadvali va tuzilmasini tasdiqlasin;
uch oy muddatda Markazni malakali kadrlar bilan toʻldirish chorasini koʻrsin;
Filialning asoslantirilgan hisob-kitoblari asosida Markaz xodimlarini Agentlikning Atom energiyasidan foydalanish sohasini rivojlantirish jamgʻarmasi hisobidan moliyaviy ragʻbatlantirish mexanizmlarini joriy qilsin.
3. Belgilab qoʻyilsinki, ushbu qaror ijrosi bilan bogʻliq xarajatlar 2026-yilda Oʻzbekiston Respublikasining respublika budjetidan birinchi darajali budjet mablagʻlarini taqsimlovchi sifatida Agentlikka ajratiladigan mablagʻlar doirasida moliyalashtiriladi, 2027-yildan boshlab Davlat budjeti parametrlarida nazarda tutiladi.
4. Ushbu qarorning bajarilishini nazorat qilish “Oʻzatom” agentligi direktori A.I. Axmedxadjayev zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2026-yil 26-iyun,
334 -son