📅 2026-yil 6-iyul · Vazirlik va idoralar hujjatlari · Favqulodda vaziyatlar vaziri
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2026 йил 6 июль · Вазирлик ва идоралар ҳужжатлари · Фавқулодда вазиятлар вазири
Расмий матн. Расмий ҳужжат. Таҳририй изоҳлар киритилмаган.
📅 6 июля 2026 г. · Документы министерств и ведомств · Министр по чрезвычайным ситуациям
Официальный текст. Официальный документ. Редакционные примечания не включены.
📅 6 July 2026 · Ministry and agency documents · Favqulodda vaziyatlar vaziri
Official text. Official document. Editorial notes are not included.
Ўзбекистон Республикаси фавқулодда вазиятлар вазирининг
буйруғи
НИЗОМ
КЎРСАТКИЧЛАРИ
КЎРСАТКИЧЛАРИ *
Фавқулодда вазиятлар юзага келишининг олдини олиш ҳамда ёнғин хавфсизлиги талабларига риоя қилиниши устидан назоратни амалга оширишда «Хавфни таҳлил қилиш» электрон тизимини жорий этиш тартиби тўғрисидаги низомни тасдиқлаш ҳақида
Ўзбекистон Республикасининг «Ёнғин хавфсизлиги тўғрисида»ги Қонуни , Ўзбекистон Республикаси Президентининг 2024 йил 14 ноябрдаги ПФ-184-сон «Тадбиркорлар ҳуқуқлари ва қонуний манфаатларини ишончли ҳимоя қилиш чора-тадбирлари тўғрисида»ги Фармони ҳамда 2022 йил 13 сентябрдаги ПҚ-374-сон «Тадбиркорлик субъектлари фаолиятида текширувлар ўтказишни мувофиқлаштириш тартибини такомиллаштириш чора-тадбирлари тўғрисида»ги қарори , Ўзбекистон Республикаси Вазирлар Маҳкамасининг 2013 йил 4 октябрдаги 272-сон « Давлат ёнғин назорати тўғрисидаги низомни тасдиқлаш ҳақида »ги ва 2022 йил 19 октябрдаги 611-сон « Назорат қилувчи органлар томонидан тадбиркорлик субъектлари фаолиятида давлат назоратини ташкил этиш бўйича қўшимча чора-тадбирлар тўғрисида »ги қарорларига мувофиқ буюраман:
1. Фавқулодда вазиятлар юзага келишининг олдини олиш ҳамда ёнғин хавфсизлиги талабларига риоя қилиниши устидан назоратни амалга оширишда «Хавфни таҳлил қилиш» электрон тизимини жорий этиш тартиби тўғрисидаги низом иловага мувофиқ тасдиқлансин.
2. Мазкур буйруқ Ўзбекистон Республикаси Президенти ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил ҳамда Ўзбекистон Республикаси Савдо-саноат палатаси билан келишилган.
3. Мазкур буйруқ расмий эълон қилинган кундан эътиборан уч ой ўтгач кучга киради.
Келишилди:
Ўзбекистон Республикаси фавқулодда вазиятлар вазирининг 2026 йил 6 июлдаги 137-сон буйруғига ИЛОВА
Фавқулодда вазиятлар юзага келишининг олдини олиш ҳамда ёнғин хавфсизлиги талабларига риоя қилиниши устидан назоратни амалга оширишда «Хавфни таҳлил қилиш» электрон тизимини жорий этиш тартиби тўғрисидаги
Мазкур Низом Ўзбекистон Республикаси Фавқулодда вазиятлар вазирлиги (бундан буён матнда Фавқулодда вазиятлар вазирлиги деб юритилади) ваколатига кирадиган масалаларга доир фавқулодда вазиятлар юзага келишининг олдини олиш ҳамда ёнғин хавфсизлиги талабларига риоя қилиниши устидан назоратни амалга оширишда «Хавфни таҳлил қилиш» электрон тизимини жорий этиш тартибини белгилайди.
1-боб. Умумий қоидалар
1. Ушбу Низомда қуйидаги асосий тушунчалардан фойдаланилади:
тадбиркорлик субъекти — белгиланган тартибда давлат рўйхатидан ўтган ҳамда тадбиркорлик фаолиятини амалга ошираётган юридик ва жисмоний шахслар;
текширув — тадбиркорлик субъекти томонидан фаолиятни тартибга солувчи қонунчиликка қай даражада риоя этилаётганлигини керакли материаллар, ҳужжатлар ёки уларнинг фаолиятига доир маълумотларни олиш ҳамда муайян ҳаракатларни амалга ошириш орқали Фавқулодда вазиятлар вазирлиги ваколати доирасида ўтказиладиган назорат тадбири;
«Хавфни таҳлил қилиш» электрон тизими — Фавқулодда вазиятлар вазирлиги томонидан тегишли назорат соҳаси бўйича аниқ мезонларга асосланиб, тадбиркорлик субъекти фаолиятида қонунчилик бузилиш хавфи даражасини аниқлаш электрон тизими.
2. Фавқулодда вазиятлар вазирлиги томонидан «Хавфни таҳлил қилиш» электрон тизими Ўзбекистон Республикаси Вазирлар Маҳкамасининг 2022 йил 19 октябрдаги 611-сон қарори билан тасдиқланган Назорат қилувчи органларнинг «Хавфни таҳлил этиш» тизимларига қўйиладиган минимал талабларга мувофиқ ишлаб чиқилиши лозим.
3. «Хавфни таҳлил қилиш» электрон тизими асосида аниқланган ҳуқуқбузарлик хавфи қай даражада бўлишидан қатъий назар, тадбиркорлик субъектига нисбатан таъсир чораларини қўллашга асос бўла олмайди .
2-боб. Хавф даражасини таҳлил қилишга доир умумий талаблар
4. Тадбиркорлик субъектининг қонунни бузиш хавфи даражасини таҳлил қилиш жараёни тадбиркорлик субъекти фаолиятини тўхтатиб туриш, унга тўсқинлик қилиш ёки фаолиятини амалга оширишга тўғридан-тўғри аралашишни назарда тутувчи хатти-ҳаракатларни ўз ичига олмаслиги зарур .
5. Хавф даражасининг таҳлили қуйидаги маълумотларни ўрганиш асосида амалга оширилиши мумкин :
маъмурий маълумотлар (лицензия, рухсат этувчи ва давлат органларида мавжуд бошқа ҳужжатлар);
даврий статистика маълумотлари, шу жумладан аввал ҳуқуқбузарлик ҳолатлари аниқланган тадбиркорлик субъектини умумлаштирувчи белгилар, хабарлар ва бошқа корреляцион таҳлил натижалари ;
юридик ва жисмоний шахслардан келиб тушган мурожаатлар ;
оммавий ахборот воситаларидан ёки бошқа ташқи манбалардан (ижтимоий тармоқлар, веб-сайтлар) олинган маълумотлар;
жойига чиққан ҳолда кўздан кечириш орқали олинган маълумотлар;
қонунчиликда тақиқланмаган бошқа манбалардан ва тадбиркорлик субъектининг одатий фаолиятига бевосита ёки билвосита таъсир кўрсатмаган ҳолда, давлат органлари ва бошқа ташкилотлардан олиниши мумкин бўлган бошқа маълумотлар .
6. Хавф даражаси таҳлили жараёнида тадбиркорлик субъектидан ҳужжатлар ва ахборотлар талаб қилинишига йўл қўйилмайди .
7. Назорат ваколатига кирмайдиган тадбиркорлик субъектлари фаолиятини таҳлил қилиш ва баҳолаш тақиқланади .
3-боб. Хавф даражаси таснифи ва уларнинг мезонларига доир талаблар
8. «Хавфни таҳлил қилиш» электрон тизимида хавф даражасини баҳолаш ўрганиладиган маълумотлар асосида шакллантирилган мазкур Низомнинг 1 ва 2-иловасид а кўрсатилган асосий кўрсаткичлар (суб-кўрсаткичлар) бўйича тадбиркорлик субъекти фаолиятининг мувофиқлигини «балл» тизими асосида баҳолаш орқали амалга оширилади.
Бунда суб-кўрсаткичлар мавжуд бўлганда ҳар бир асосий кўрсаткичнинг баҳоси ушбу кўрсаткич остидаги суб-кўрсаткичлар баҳосининг йиғиндисидан келиб чиқади.
9. Хавф даражасини баҳолаш учун қуйидаги асосий кўрсаткичлар ва суб-кўрсаткичлар «Хавфни таҳлил қилиш» электрон тизимига киритилади:
мазкур Низомнинг 1-иловасига мувофиқ Ёнғин хавфсизлиги соҳасидаги қонунчилик бузилиши хавфини аниқлаш кўрсаткичлари;
мазкур Низомнинг 2-иловасига мувофиқ 1-гуруҳга мансуб объектларда ёнғин хавфсизлиги соҳасида қонунчилик бузилиши хавфини аниқлаш кўрсаткичлари.
Бунда табдиркорлик субъектларининг хавф даражаси мазкур банднинг иккинчи ва учинчи хатбошиларида назарда тутилган асосий кўрсаткичлар (суб-кўрсаткичлар) бўйича «Хавфни таҳлил қилиш» электрон тизимида автоматик равишда алоҳида аниқланади.
10. «Хавфни таҳлил қилиш» электрон тизимида тадбиркорлик субъектлари фаолиятида ҳуқуқбузарлик содир этиш хавфи паст, ўрта ва юқори даражаларга таснифланади.
Бунда баҳолаш натижасида аниқланган хавф даражасининг умумий баллари асосида тадбиркорлик субъекти томонидан ҳуқуқбузарлик содир этиш хавфи қуйидаги уч хил тоифага таснифланади:
хавф даражаси юқори — баҳолаш натижалари бўйича 81 баллдан 100 баллгача бўлган балларни ташкил этувчи тадбиркорлик субъектлари;
хавф даражаси ўрта — баҳолаш натижалари бўйича 61 баллдан 80 баллгача бўлган балларни ташкил этувчи тадбиркорлик субъектлари;
хавф даражаси паст — баҳолаш натижалари бўйича 60 баллгача бўлган балларни ташкил этувчи тадбиркорлик субъектлари.
11. Баҳолаш натижаларига мувофиқ ҳуқуқбузарлик хавфи юқори ва ўрта таснифидаги тадбиркорлик субъектларида профилактика тадбирлари ва текширувларни ўтказиш амалдаги қонунчилик ҳужжатлари, жумладан Ўзбекистон Республикаси Президентининг 2024 йил 14 ноябрдаги ПФ-184-сон «Тадбиркорлар ҳуқуқлари ва қонуний манфаатларини ишончли ҳимоя қилиш чора-тадбирлари тўғрисида»ги Фармони , 2022 йил 13 сентябрдаги ПҚ-374-сон қарори билан тасдиқланган Назорат қилувчи органлар томонидан тадбиркорлик субъектлари фаолиятида текширувлар ва профилактика тадбирларини ўтказиш тартиби тўғрисидаги низом ва Ўзбекистон Республикаси Вазирлар Маҳкамасининг 2022 йил 19 октябрдаги 611-сон қарори билан тасдиқланган Назорат қилувчи органларнинг «Хавфни таҳлил этиш» тизимларига қўйиладиган минимал талаблар асосида амалга оширилади.
12. Хавф даражаси паст бўлган тадбиркорлик субъектлари фаолиятида текширувлар ўтказилмайди .
4-боб. Якуний қоидалар
13. Хавфни таҳлил этиш натижаларидан норози бўлган шахслар қонунчиликда белгиланган тартибда юқори турувчи органга ёки судга шикоят қилишга ҳақли.
14. Мазкур Низом талабларининг бузилишида айбдор бўлган шахслар белгиланган тартибда жавобгар бўладилар.
Фавқулодда вазиятлар юзага келишининг олдини олиш ҳамда ёнғин хавфсизлиги талабларига риоя қилиниши устидан назоратни амалга оширишда «Хавфни таҳлил қилиш» электрон тизимини жорий этиш тартиби тўғрисидаги низомга 1-ИЛОВА
Ёнғин хавфсизлиги соҳасидаги қонунчилик бузилиши хавфини аниқлаш
Т/р Хавф даражасини баҳолаш кўрсаткичлари Балл Таҳлил якунига кўра қўйилган балл 1. Ёнувчи муҳитни ҳосил қилувчи омиллар мавжудлиги 25 1.1 Чордоқ ва ертўлалар, техник қават, вентиляция каналлари ва бошқа техник хоналарда ёнадиган маҳсулотлар, ускуна, мебель ва бошқа ёнувчи буюмларнинг сақланиши 5 1.2 Объект ҳудуди ва унга туташ қисми, омбор ва ёрдамчи хоналарнинг ахлатлар, қадоқ, хазон, қуруқ ўт ва бошқа ёнувчи буюмлардан тозаланмаганлиги 5 1.3 Объектдаги шамоллатиш камералари, циклон, фильтрлар, ҳаво ўтказгич ва бошқа технологик ускуналарнинг белгиланган муддатларда ёнувчи чанг ҳамда ишлаб чиқариш чиқиндиларидан тозаланмаганлиги 5 1.4 Ёнувчи ва енгил алангаланувчи суюқликлар, ёнувчи газ, босим остидаги сиғим ва технологик ускуналардан фойдаланишда ёнғин хавфсизлиги қоидаларига риоя қилинмаганлиги 5 1.5 Модда ва материалларни биргаликда сақлаш қоидаларига риоя қилинмаганлиги 5 2. Ёндириш манбаларини ҳосил қилувчи омиллар мавжудлиги 30 2.1 Объектда ёнғинга қарши режимга риоя қилинмаганлиги ва ёнғин хавфи юқори бўлган ишларни амалга оширишда хавфсизлик қоидаларига риоя этилмаганлиги 6 2.2 Электр кабель ва симлар ҳимоя қобиқларининг қаршиликка чидамлилигини синовдан ўтказилмаганлиги 6 2.3 Электр ускуналари электр ускуналарининг тузилиши қоидалари ва бошқа норматив ҳужжатлар талабларига мувофиқ ўрнатилмаганлиги, ортиқча юкланишдан ва қисқа туташувлардан ҳимояланмаганлиги ҳамда улардан фойдаланишда ёнғин хавфсизлиги қоидаларига риоя қилинмаганлиги 6 2.4 Иситиш печларини, шу жумладан газдан фойдаланиш ускунасини ишлатишда ёнғин хавфсизлиги қоидаларига риоя қилинмаганлиги 6 2.5 Газ ва маиший электр асбобларидан, маиший-кимё воситаларидан фойдаланишда, енгил алангаланувчи ва ёнувчи суюқликлар ҳамда ёнғин хавфлилиги жиҳатидан хавфли бўлган бошқа моддалар, материаллар ва ускуналар ёрдамида ишларни бажаришда эҳтиёткорлик чораларининг кўрилмаганлиги 6 3. Ёнғиннинг тарқалишига олиб келувчи омилларнинг мавжудлиги 15 3.1 Биноларнинг ёғоч қурилиш конструкцияларига ёниш хусусиятини пасайтирувчи ёнғинга қарши кимёвий суюқлик билан ишлов берилмаганлиги 3 3.2 Бино ва иншоотлар ўртасидаги ёнғинга қарши оралиқларда турли буюмлар, асбоб-ускуналар, қадоқлар ва транспорт воситаларини сақлашга, шунингдек ушбу оралиқларда бино ва иншоотларни жойлаштиришга йўл қўйилганлиги, шунингдек омборхоналарда товар-моддий бойликларни сақлашда белгиланган ёнғинга қарши оралиқ масофаларига риоя этилмаганлиги 3 3.3 Эвакуация йўлларида деворлар, шифтлар, зинапоялар ва зина катаклари ҳамда полларни қоплашда, пардозлашда, бўёқлашда ёнувчи материаллардан фойдаланилганлиги 3 3.4 Ёнғин сигнализацияси ҳамда ёнғиндан хабар бериш ва эвакуацияни бошқариш тизимларига қўйиладиган талаблар бажарилмаганлиги 3 3.5 Автоматик ёнғинни ўчириш қурилмаларига қўйиладиган талаблар бажарилмаганлиги 3 4. Ёнғинда одамлар ҳаётига катта хавф солувчи омилларнинг мавжудлиги 15 4.1 Эвакуация чиқиш жойларининг сони, уларнинг ўлчамлари, ёритиш ва тутундан ҳимояланиш таъминланмаганлиги, шунингдек эвакуация йўлларининг узунлиги шаҳарсозлик нормалари ва қоидаларидаги ёнғин хавфсизлиги талабларига мувофиқ эмаслиги 3 4.2 Йўлаклар, тамбурлар, галерея, лифт холлари, зинапоялар олдидаги майдонларни, зинанинг қаватлар орасидаги қисмини (марш) ва қопқоқли туйникларни (люкларни) мебель, асбоб-ускуна, ҳар хил буюмлар билан тўсиб қўйиш, шунингдек, эвакуация эшикларини михлаб (беркитиб) ташланганлиги 3 4.3 Бино ва иншоотларда ҳамда улардан чиқиш эшикларининг устки қисмида эвакуация йўлларини ва чиқиш жойларини кўрсатувчи ёнғин хавфсизлиги белгилари ўрнатилмаганлиги 3 4.4 Ёнғинга қарши сув таъминоти ташкил этилмаганлиги 3 4.5 Шамоллатиш ва совитиш тизимларига қўйиладиган ёнғин хавфсизлиги талабларининг бажарилмаганлиги 3 5. Ёнғинни бартараф этишни қийинлаштирувчи омилларнинг мавжудлиги 15 5.1 Ёнғинни ўчиришнинг бирламчи воситаларига қўйиладиган талаблар бажарилмаганлиги 3 5.2 Ёнғинга қарши техник ҳимоя воситаларига қўйиладиган талаблар бажарилмаганлиги 3 5.3 Оловли ишларга қўйиладиган ёнғин хавфсизлиги талаблари бажарилмаганлиги 3 5.4 Объект ҳудуди ҳамда ундаги бино ва иншоотларга ёнғин ўчириш техникаларининг эркин кириб бориши ва ёнғин ўчириш ҳамда авария-қутқарув ишларини амалга ошириш имконияти таъминланмаганлиги 3 5.5 Объектнинг ёнғин хавфсизлиги паспорти тузилмаганлиги 3 Жами балл йиғиндиси 100
Фавқулодда вазиятлар юзага келишининг олдини олиш ҳамда ёнғин хавфсизлиги талабларига риоя қилиниши устидан назоратни амалга оширишда «Хавфни таҳлил қилиш» электрон тизимини жорий этиш тартиби тўғрисидаги низомга 2-ИЛОВА
1-гуруҳга мансуб объектларда ёнғин хавфсизлиги соҳасида қонунчилик бузилиши хавфини аниқлаш
Т/р Хавф даражасини баҳолаш кўрсаткичлари Балл Таҳлил якунига кўра қўйилган балл 1. 1-гуруҳга мансуб объектлар бир йилда кўпи билан бир марта батафсил ва назорат тартибида текширувдан ўтказилмаганлиги 80 2. Норматив-ҳуқуқий ҳужжатлар, шунингдек норматив ҳужжатлар, давлат ёнғин назоратининг ҳужжатлари ва ёнғин хавфсизлиги қоидаларига амал қилинмаганлиги 10 3. Соз ҳолатдаги ёнғинга қарши техник ҳимоя воситалари, ёнғинни ўчиришнинг бирламчи воситалари ва ёнғин техникаси, шунингдек тезкор алоқа воситалари билан таъминланмаганлиги 5 4. Газ ва маиший электр асбобларидан, маиший-кимё воситаларидан фойдаланишда, енгил алангаланувчи ва ёнувчи суюқликлар билан ҳамда ёнғин хавфлилиги жиҳатидан хавфли бўлган бошқа моддалар, материаллар ва ускуналар ёрдамида ишларни бажаришда ёнғин хавфсизлиги қоидалари бузилганлиги 5
Вазир А. ИКРАМОВ
Тадбиркорларнинг ҳуқуқларини ҳимоя қилиш бўйича вакил А. БУРИЕВ
Савдо-саноат палатаси раиси Д. ВАХАБОВ
Тошкент ш.,
2026 йил 6 июль,
2026 йил 25 июнь
2026 йил 16 июнь
137-сон
Oʻzbekiston Respublikasi favqulodda vaziyatlar vazirining
buyrugʻi
NIZOM
KOʻRSATKICHLARI
KOʻRSATKICHLARI *
Favqulodda vaziyatlar yuzaga kelishining oldini olish hamda yongʻin xavfsizligi talablariga rioya qilinishi ustidan nazoratni amalga oshirishda “Xavfni tahlil qilish” elektron tizimini joriy etish tartibi toʻgʻrisidagi nizomni tasdiqlash haqida
Oʻzbekiston Respublikasining “Yongʻin xavfsizligi toʻgʻrisida”gi Qonuni , Oʻzbekiston Respublikasi Prezidentining 2024-yil 14-noyabrdagi PF-184-son “Tadbirkorlar huquqlari va qonuniy manfaatlarini ishonchli himoya qilish chora-tadbirlari toʻgʻrisida”gi Farmoni hamda 2022-yil 13-sentabrdagi PQ-374-son “Tadbirkorlik subyektlari faoliyatida tekshiruvlar oʻtkazishni muvofiqlashtirish tartibini takomillashtirish chora-tadbirlari toʻgʻrisida”gi qarori , Oʻzbekiston Respublikasi Vazirlar Mahkamasining 2013-yil 4-oktabrdagi 272-son “ Davlat yongʻin nazorati toʻgʻrisidagi nizomni tasdiqlash haqida ”gi va 2022-yil 19-oktabrdagi 611-son “ Nazorat qiluvchi organlar tomonidan tadbirkorlik subyektlari faoliyatida davlat nazoratini tashkil etish boʻyicha qoʻshimcha chora-tadbirlar toʻgʻrisida ”gi qarorlariga muvofiq buyuraman:
1. Favqulodda vaziyatlar yuzaga kelishining oldini olish hamda yongʻin xavfsizligi talablariga rioya qilinishi ustidan nazoratni amalga oshirishda “Xavfni tahlil qilish” elektron tizimini joriy etish tartibi toʻgʻrisidagi nizom ilovaga muvofiq tasdiqlansin.
2. Mazkur buyruq Oʻzbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish boʻyicha vakil hamda Oʻzbekiston Respublikasi Savdo-sanoat palatasi bilan kelishilgan.
3. Mazkur buyruq rasmiy eʼlon qilingan kundan eʼtiboran uch oy oʻtgach kuchga kiradi.
Kelishildi:
Oʻzbekiston Respublikasi favqulodda vaziyatlar vazirining 2026-yil 6-iyuldagi 137-son buyrugʻiga ILOVA
Favqulodda vaziyatlar yuzaga kelishining oldini olish hamda yongʻin xavfsizligi talablariga rioya qilinishi ustidan nazoratni amalga oshirishda “Xavfni tahlil qilish” elektron tizimini joriy etish tartibi toʻgʻrisidagi
Mazkur Nizom Oʻzbekiston Respublikasi Favqulodda vaziyatlar vazirligi (bundan buyon matnda Favqulodda vaziyatlar vazirligi deb yuritiladi) vakolatiga kiradigan masalalarga doir favqulodda vaziyatlar yuzaga kelishining oldini olish hamda yongʻin xavfsizligi talablariga rioya qilinishi ustidan nazoratni amalga oshirishda “Xavfni tahlil qilish” elektron tizimini joriy etish tartibini belgilaydi.
1-bob. Umumiy qoidalar
1. Ushbu Nizomda quyidagi asosiy tushunchalardan foydalaniladi:
tadbirkorlik subyekti — belgilangan tartibda davlat roʻyxatidan oʻtgan hamda tadbirkorlik faoliyatini amalga oshirayotgan yuridik va jismoniy shaxslar;
tekshiruv — tadbirkorlik subyekti tomonidan faoliyatni tartibga soluvchi qonunchilikka qay darajada rioya etilayotganligini kerakli materiallar, hujjatlar yoki ularning faoliyatiga doir maʼlumotlarni olish hamda muayyan harakatlarni amalga oshirish orqali Favqulodda vaziyatlar vazirligi vakolati doirasida oʻtkaziladigan nazorat tadbiri;
“Xavfni tahlil qilish” elektron tizimi — Favqulodda vaziyatlar vazirligi tomonidan tegishli nazorat sohasi boʻyicha aniq mezonlarga asoslanib, tadbirkorlik subyekti faoliyatida qonunchilik buzilish xavfi darajasini aniqlash elektron tizimi.
2. Favqulodda vaziyatlar vazirligi tomonidan “Xavfni tahlil qilish” elektron tizimi Oʻzbekiston Respublikasi Vazirlar Mahkamasining 2022-yil 19-oktabrdagi 611-son qarori bilan tasdiqlangan Nazorat qiluvchi organlarning “Xavfni tahlil etish” tizimlariga qoʻyiladigan minimal talablarga muvofiq ishlab chiqilishi lozim.
3. “Xavfni tahlil qilish” elektron tizimi asosida aniqlangan huquqbuzarlik xavfi qay darajada boʻlishidan qatʼiy nazar, tadbirkorlik subyektiga nisbatan taʼsir choralarini qoʻllashga asos boʻla olmaydi .
2-bob. Xavf darajasini tahlil qilishga doir umumiy talablar
4. Tadbirkorlik subyektining qonunni buzish xavfi darajasini tahlil qilish jarayoni tadbirkorlik subyekti faoliyatini toʻxtatib turish, unga toʻsqinlik qilish yoki faoliyatini amalga oshirishga toʻgʻridan-toʻgʻri aralashishni nazarda tutuvchi xatti-harakatlarni oʻz ichiga olmasligi zarur .
5. Xavf darajasining tahlili quyidagi maʼlumotlarni oʻrganish asosida amalga oshirilishi mumkin :
maʼmuriy maʼlumotlar (litsenziya, ruxsat etuvchi va davlat organlarida mavjud boshqa hujjatlar);
davriy statistika maʼlumotlari, shu jumladan avval huquqbuzarlik holatlari aniqlangan tadbirkorlik subyektini umumlashtiruvchi belgilar, xabarlar va boshqa korrelyatsion tahlil natijalari ;
yuridik va jismoniy shaxslardan kelib tushgan murojaatlar ;
ommaviy axborot vositalaridan yoki boshqa tashqi manbalardan (ijtimoiy tarmoqlar, veb-saytlar) olingan maʼlumotlar;
joyiga chiqqan holda koʻzdan kechirish orqali olingan maʼlumotlar;
qonunchilikda taqiqlanmagan boshqa manbalardan va tadbirkorlik subyektining odatiy faoliyatiga bevosita yoki bilvosita taʼsir koʻrsatmagan holda, davlat organlari va boshqa tashkilotlardan olinishi mumkin boʻlgan boshqa maʼlumotlar .
6. Xavf darajasi tahlili jarayonida tadbirkorlik subyektidan hujjatlar va axborotlar talab qilinishiga yoʻl qoʻyilmaydi .
7. Nazorat vakolatiga kirmaydigan tadbirkorlik subyektlari faoliyatini tahlil qilish va baholash taqiqlanadi .
3-bob. Xavf darajasi tasnifi va ularning mezonlariga doir talablar
8. “Xavfni tahlil qilish” elektron tizimida xavf darajasini baholash oʻrganiladigan maʼlumotlar asosida shakllantirilgan mazkur Nizomning 1 va 2-ilovasid a koʻrsatilgan asosiy koʻrsatkichlar (sub-koʻrsatkichlar) boʻyicha tadbirkorlik subyekti faoliyatining muvofiqligini “ball” tizimi asosida baholash orqali amalga oshiriladi.
Bunda sub-koʻrsatkichlar mavjud boʻlganda har bir asosiy koʻrsatkichning bahosi ushbu koʻrsatkich ostidagi sub-koʻrsatkichlar bahosining yigʻindisidan kelib chiqadi.
9. Xavf darajasini baholash uchun quyidagi asosiy koʻrsatkichlar va sub-koʻrsatkichlar “Xavfni tahlil qilish” elektron tizimiga kiritiladi:
mazkur Nizomning 1-ilovasiga muvofiq Yongʻin xavfsizligi sohasidagi qonunchilik buzilishi xavfini aniqlash koʻrsatkichlari;
mazkur Nizomning 2-ilovasiga muvofiq 1-guruhga mansub obyektlarda yongʻin xavfsizligi sohasida qonunchilik buzilishi xavfini aniqlash koʻrsatkichlari.
Bunda tabdirkorlik subyektlarining xavf darajasi mazkur bandning ikkinchi va uchinchi xatboshilarida nazarda tutilgan asosiy koʻrsatkichlar (sub-koʻrsatkichlar) boʻyicha “Xavfni tahlil qilish” elektron tizimida avtomatik ravishda alohida aniqlanadi.
10. “Xavfni tahlil qilish” elektron tizimida tadbirkorlik subyektlari faoliyatida huquqbuzarlik sodir etish xavfi past, oʻrta va yuqori darajalarga tasniflanadi.
Bunda baholash natijasida aniqlangan xavf darajasining umumiy ballari asosida tadbirkorlik subyekti tomonidan huquqbuzarlik sodir etish xavfi quyidagi uch xil toifaga tasniflanadi:
xavf darajasi yuqori — baholash natijalari boʻyicha 81 balldan 100 ballgacha boʻlgan ballarni tashkil etuvchi tadbirkorlik subyektlari;
xavf darajasi oʻrta — baholash natijalari boʻyicha 61 balldan 80 ballgacha boʻlgan ballarni tashkil etuvchi tadbirkorlik subyektlari;
xavf darajasi past — baholash natijalari boʻyicha 60 ballgacha boʻlgan ballarni tashkil etuvchi tadbirkorlik subyektlari.
11. Baholash natijalariga muvofiq huquqbuzarlik xavfi yuqori va oʻrta tasnifidagi tadbirkorlik subyektlarida profilaktika tadbirlari va tekshiruvlarni oʻtkazish amaldagi qonunchilik hujjatlari, jumladan Oʻzbekiston Respublikasi Prezidentining 2024-yil 14-noyabrdagi PF-184-son “Tadbirkorlar huquqlari va qonuniy manfaatlarini ishonchli himoya qilish chora-tadbirlari toʻgʻrisida”gi Farmoni , 2022-yil 13-sentabrdagi PQ-374-son qarori bilan tasdiqlangan Nazorat qiluvchi organlar tomonidan tadbirkorlik subyektlari faoliyatida tekshiruvlar va profilaktika tadbirlarini oʻtkazish tartibi toʻgʻrisidagi nizom va Oʻzbekiston Respublikasi Vazirlar Mahkamasining 2022-yil 19-oktabrdagi 611-son qarori bilan tasdiqlangan Nazorat qiluvchi organlarning “Xavfni tahlil etish” tizimlariga qoʻyiladigan minimal talablar asosida amalga oshiriladi.
12. Xavf darajasi past boʻlgan tadbirkorlik subyektlari faoliyatida tekshiruvlar oʻtkazilmaydi .
4-bob. Yakuniy qoidalar
13. Xavfni tahlil etish natijalaridan norozi boʻlgan shaxslar qonunchilikda belgilangan tartibda yuqori turuvchi organga yoki sudga shikoyat qilishga haqli.
14. Mazkur Nizom talablarining buzilishida aybdor boʻlgan shaxslar belgilangan tartibda javobgar boʻladilar.
Favqulodda vaziyatlar yuzaga kelishining oldini olish hamda yongʻin xavfsizligi talablariga rioya qilinishi ustidan nazoratni amalga oshirishda “Xavfni tahlil qilish” elektron tizimini joriy etish tartibi toʻgʻrisidagi nizomga 1-ILOVA
Yongʻin xavfsizligi sohasidagi qonunchilik buzilishi xavfini aniqlash
T/r Xavf darajasini baholash koʻrsatkichlari Ball Tahlil yakuniga koʻra qoʻyilgan ball 1. Yonuvchi muhitni hosil qiluvchi omillar mavjudligi 25 1.1 Chordoq va yertoʻlalar, texnik qavat, ventilyatsiya kanallari va boshqa texnik xonalarda yonadigan mahsulotlar, uskuna, mebel va boshqa yonuvchi buyumlarning saqlanishi 5 1.2 Obyekt hududi va unga tutash qismi, ombor va yordamchi xonalarning axlatlar, qadoq, xazon, quruq oʻt va boshqa yonuvchi buyumlardan tozalanmaganligi 5 1.3 Obyektdagi shamollatish kameralari, siklon, filtrlar, havo oʻtkazgich va boshqa texnologik uskunalarning belgilangan muddatlarda yonuvchi chang hamda ishlab chiqarish chiqindilaridan tozalanmaganligi 5 1.4 Yonuvchi va yengil alangalanuvchi suyuqliklar, yonuvchi gaz, bosim ostidagi sigʻim va texnologik uskunalardan foydalanishda yongʻin xavfsizligi qoidalariga rioya qilinmaganligi 5 1.5 Modda va materiallarni birgalikda saqlash qoidalariga rioya qilinmaganligi 5 2. Yondirish manbalarini hosil qiluvchi omillar mavjudligi 30 2.1 Obyektda yongʻinga qarshi rejimga rioya qilinmaganligi va yongʻin xavfi yuqori boʻlgan ishlarni amalga oshirishda xavfsizlik qoidalariga rioya etilmaganligi 6 2.2 Elektr kabel va simlar himoya qobiqlarining qarshilikka chidamliligini sinovdan oʻtkazilmaganligi 6 2.3 Elektr uskunalari elektr uskunalarining tuzilishi qoidalari va boshqa normativ hujjatlar talablariga muvofiq oʻrnatilmaganligi, ortiqcha yuklanishdan va qisqa tutashuvlardan himoyalanmaganligi hamda ulardan foydalanishda yongʻin xavfsizligi qoidalariga rioya qilinmaganligi 6 2.4 Isitish pechlarini, shu jumladan gazdan foydalanish uskunasini ishlatishda yongʻin xavfsizligi qoidalariga rioya qilinmaganligi 6 2.5 Gaz va maishiy elektr asboblaridan, maishiy-kimyo vositalaridan foydalanishda, yengil alangalanuvchi va yonuvchi suyuqliklar hamda yongʻin xavfliligi jihatidan xavfli boʻlgan boshqa moddalar, materiallar va uskunalar yordamida ishlarni bajarishda ehtiyotkorlik choralarining koʻrilmaganligi 6 3. Yongʻinning tarqalishiga olib keluvchi omillarning mavjudligi 15 3.1 Binolarning yogʻoch qurilish konstruksiyalariga yonish xususiyatini pasaytiruvchi yongʻinga qarshi kimyoviy suyuqlik bilan ishlov berilmaganligi 3 3.2 Bino va inshootlar oʻrtasidagi yongʻinga qarshi oraliqlarda turli buyumlar, asbob-uskunalar, qadoqlar va transport vositalarini saqlashga, shuningdek ushbu oraliqlarda bino va inshootlarni joylashtirishga yoʻl qoʻyilganligi, shuningdek omborxonalarda tovar-moddiy boyliklarni saqlashda belgilangan yongʻinga qarshi oraliq masofalariga rioya etilmaganligi 3 3.3 Evakuatsiya yoʻllarida devorlar, shiftlar, zinapoyalar va zina kataklari hamda pollarni qoplashda, pardozlashda, boʻyoqlashda yonuvchi materiallardan foydalanilganligi 3 3.4 Yongʻin signalizatsiyasi hamda yongʻindan xabar berish va evakuatsiyani boshqarish tizimlariga qoʻyiladigan talablar bajarilmaganligi 3 3.5 Avtomatik yongʻinni oʻchirish qurilmalariga qoʻyiladigan talablar bajarilmaganligi 3 4. Yongʻinda odamlar hayotiga katta xavf soluvchi omillarning mavjudligi 15 4.1 Evakuatsiya chiqish joylarining soni, ularning oʻlchamlari, yoritish va tutundan himoyalanish taʼminlanmaganligi, shuningdek evakuatsiya yoʻllarining uzunligi shaharsozlik normalari va qoidalaridagi yongʻin xavfsizligi talablariga muvofiq emasligi 3 4.2 Yoʻlaklar, tamburlar, galereya, lift xollari, zinapoyalar oldidagi maydonlarni, zinaning qavatlar orasidagi qismini (marsh) va qopqoqli tuyniklarni (lyuklarni) mebel, asbob-uskuna, har xil buyumlar bilan toʻsib qoʻyish, shuningdek, evakuatsiya eshiklarini mixlab (berkitib) tashlanganligi 3 4.3 Bino va inshootlarda hamda ulardan chiqish eshiklarining ustki qismida evakuatsiya yoʻllarini va chiqish joylarini koʻrsatuvchi yongʻin xavfsizligi belgilari oʻrnatilmaganligi 3 4.4 Yongʻinga qarshi suv taʼminoti tashkil etilmaganligi 3 4.5 Shamollatish va sovitish tizimlariga qoʻyiladigan yongʻin xavfsizligi talablarining bajarilmaganligi 3 5. Yongʻinni bartaraf etishni qiyinlashtiruvchi omillarning mavjudligi 15 5.1 Yongʻinni oʻchirishning birlamchi vositalariga qoʻyiladigan talablar bajarilmaganligi 3 5.2 Yongʻinga qarshi texnik himoya vositalariga qoʻyiladigan talablar bajarilmaganligi 3 5.3 Olovli ishlarga qoʻyiladigan yongʻin xavfsizligi talablari bajarilmaganligi 3 5.4 Obyekt hududi hamda undagi bino va inshootlarga yongʻin oʻchirish texnikalarining erkin kirib borishi va yongʻin oʻchirish hamda avariya-qutqaruv ishlarini amalga oshirish imkoniyati taʼminlanmaganligi 3 5.5 Obyektning yongʻin xavfsizligi pasporti tuzilmaganligi 3 Jami ball yigʻindisi 100
Favqulodda vaziyatlar yuzaga kelishining oldini olish hamda yongʻin xavfsizligi talablariga rioya qilinishi ustidan nazoratni amalga oshirishda “Xavfni tahlil qilish” elektron tizimini joriy etish tartibi toʻgʻrisidagi nizomga 2-ILOVA
1-guruhga mansub obyektlarda yongʻin xavfsizligi sohasida qonunchilik buzilishi xavfini aniqlash
T/r Xavf darajasini baholash koʻrsatkichlari Ball Tahlil yakuniga koʻra qoʻyilgan ball 1. 1-guruhga mansub obyektlar bir yilda koʻpi bilan bir marta batafsil va nazorat tartibida tekshiruvdan oʻtkazilmaganligi 80 2. Normativ-huquqiy hujjatlar, shuningdek normativ hujjatlar, davlat yongʻin nazoratining hujjatlari va yongʻin xavfsizligi qoidalariga amal qilinmaganligi 10 3. Soz holatdagi yongʻinga qarshi texnik himoya vositalari, yongʻinni oʻchirishning birlamchi vositalari va yongʻin texnikasi, shuningdek tezkor aloqa vositalari bilan taʼminlanmaganligi 5 4. Gaz va maishiy elektr asboblaridan, maishiy-kimyo vositalaridan foydalanishda, yengil alangalanuvchi va yonuvchi suyuqliklar bilan hamda yongʻin xavfliligi jihatidan xavfli boʻlgan boshqa moddalar, materiallar va uskunalar yordamida ishlarni bajarishda yongʻin xavfsizligi qoidalari buzilganligi 5
Vazir A. IKRAMOV
Tadbirkorlarning huquqlarini himoya qilish boʻyicha vakil A. BURIYEV
Savdo-sanoat palatasi raisi D. VAXABOV
Toshkent sh.,
2026-yil 6-iyul,
2026-yil 25-iyun
2026-yil 16-iyun
137-son