📅 2026-yil 7-iyul · Qonunlar va kodekslar
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2026 йил 7 июль · Қонунлар ва кодекслар
Расмий матн. Расмий ҳужжат. Таҳририй изоҳлар киритилмаган.
📅 7 июля 2026 г. · Законы и кодексы
Официальный текст. Официальный документ. Редакционные примечания не включены.
📅 7 July 2026 · Laws and codes
Official text. Official document. Editorial notes are not included.
Ўзбекистон Республикасининг Қонуни
Ўзбекистон Республикасининг айрим қонун ҳужжатларига креатив иқтисодиётни ривожлантиришга қаратилган ўзгартириш ва қўшимчалар киритиш тўғрисида
Қонунчилик палатаси томонидан 2026 йил 17 мартда қабул қилинган Сенат томонидан 2026 йил 19 майда маъқулланган
Кейинги йилларда мамлакатимизда креатив индустрияни, иқтисодиётимизни инновацион жиҳатдан ривожлантиришни рағбатлантиришга, мазкур соҳадаги ижодий салоҳиятни иқтисодий қийматга айлантиришга, шу соҳада янги иш ўринларини яратишга, ёшлар ва тадбиркорларнинг ижодий ташаббусларини қўллаб-қувватлашга қаратилган кенг кўламли ишлар амалга оширилмоқда.
Шу билан бирга креатив иқтисодиётнинг изчил ривожлантирилишини таъминлаш ушбу соҳа субъектлари учун янада қулай шарт-шароитлар, рағбатлантирувчи механизмлар яратилишини ва имтиёзлар берилишини тақозо этмоқда.
Ушбу Қонун билан Ўзбекистон Республикасининг айрим қонун ҳужжатларига Маданият ва санъатни ривожлантириш жамғармаси ҳамда Креатив индустрия парки резидентлари томонидан амалга ошириладиган лойиҳаларга жалб қилинган мутахассислар учун айрим солиқ имтиёзлари берилишини назарда тутувчи ўзгартириш ва қўшимчалар киритилмоқда.
Шунингдек креатив индустрия соҳасида янги ташкил этилган (рўйхатдан ўтказилган) субъектларни креатив индустрия паркининг резидентлигига қабул қилишда енгилликлар яратиш, маданият ва санъат бўйича халқаро ҳамда давлатлараро тадбирларни ташкил этиш ва ўтказиш билан боғлиқ харажатларни тўғридан-тўғри шартномалар бўйича амалга ошириш имконияти яратилмоқда.
Мазкур Қонун креатив индустрия соҳасидаги халқаро ҳамкорликни кенгайтиришга, маданий тадбирларнинг сифати ва кўламини оширишга, мамлакатимизнинг халқаро майдондаги маданий нуфузини юксалтиришга хизмат қилади.
1-модда. Ўзбекистон Республикасининг 2019 йил 30 декабрда қабул қилинган ЎРҚ-599-сонли Қонуни билан янги таҳрирда тасдиқланган Ўзбекистон Республикасининг Солиқ кодекси (Ўзбекистон Республикаси Олий Мажлиси палаталарининг Ахборотномаси, 2019 йил, 12-сонга 1-илова; 2020 йил, № 3, 198-модда, № 10, 593-модда, № 11, 652-модда, № 12, 690, 691-моддалар; 2021 йил, № 1, 6-модда, № 4, 294-модда, 4-сонга илова, № 8, 800-модда, № 9, 901-модда, № 10, 968, 969, 972, 973-моддалар, № 12, 1199-модда; 2022 йил, № 2, 79-модда, № 3, 215, 216-моддалар, № 5, 461, 464, 467-моддалар, № 6, 570-модда, № 7, 664, 666-моддалар, № 12, 1190-модда; 2023 йил, № 6, 444, 446-моддалар, № 7, 540-модда, № 12, 1011-модда; 2024 йил, № 2, 106, 110, 111-моддалар, № 4, 346-модда, № 5, 458, 459-моддалар, № 8, 822, 831-моддалар, № 9, 958-модда, № 10, 1076-модда, № 11, 1190-модда, № 12, 1283, 1284, 1296, 1297-моддалар; 2025 йил, № 2, 188, 194-моддалар, № 4, 519, 520, 521, 522-моддалар, № 5, 644, 645-моддалар, № 6, 729, 731-моддалар, № 8, 971-модда, № 10, 1153-модда, № 12, 1322, 1324, 1328, 1329-моддалар; 2026 йил, № 2, 132-модда) 483-моддасига қуйидаги ўзгартириш ва қўшимча киритилсин:
саксон бешинчи қисмнинг биринчи хатбошисидаги «Креатив паркнинг» деган сўзлар «Креатив индустрия паркининг» деган сўзлар билан алмаштирилсин;
қуйидаги мазмундаги бир юз тўртинчи қисм билан тўлдирилсин:
«2026 йил 1 январдан 2030 йил 1 январга қадар бўлган даврда Ўзбекистон Республикаси Президенти Администрацияси ҳузуридаги Маданият ва санъатни ривожлантириш жамғармаси ҳамда Креатив индустрия парки резидентлари томонидан амалга ошириладиган лойиҳаларга жалб қилинган чет эл контрагентлари қўшилган қиймат солиғини, тўлов манбаида фойда солиғини ва жисмоний шахслардан олинадиган даромад солиғини тўлашдан озод қилинади. Бунда ушбу имтиёз чет эл контрагентлари креатив индустрия соҳасига бевосита боғлиқ бўлган ишларни бажариш, хизматлар кўрсатиш учун жалб этилганда қўлланилади».
2-модда. Ўзбекистон Республикасининг 2021 йил 22 апрелда қабул қилинган «Давлат харидлари тўғрисида»ги ЎРҚ-684-сонли Қонуни (Ўзбекистон Республикаси Олий Мажлис палаталарининг Ахборотномаси, 2021 йил, № 4, 289-модда; 2024 йил, № 2, 111-модда, № 11, 1288-модда; 2025 йил, № 2, 188-модда, № 4, 519-модда, № 6, 730-модда) 71-моддасининг биринчи қисми қуйидаги мазмундаги 22-банд билан тўлдирилсин:
«22) маданият ва санъат бўйича халқаро ҳамда давлатлараро даражадаги тадбирларни ташкил этиш ва ўтказиш билан боғлиқ давлат хариди. Бунда бундай тадбирларнинг даражалари қонунчиликда белгиланган тартибда аниқланади».
3-модда. Ўзбекистон Республикасининг 2024 йил 3 октябрда қабул қилинган «Креатив иқтисодиёт тўғрисида»ги ЎРҚ-970-сонли Қонунига (Ўзбекистон Республикаси Олий Мажлиси палаталарининг Ахборотномаси, 2024 йил, № 10, 1069-модда; 2025 йил, № 12, 1329-модда) қуйидаги қўшимча ва ўзгартиришлар киритилсин:
1) 14-модда :
қуйидаги мазмундаги тўртинчи қисм билан тўлдирилсин:
«Республика кенгашининг зиммасига қонунчилик ҳужжатларига мувофиқ бошқа вазифалар ҳам юклатилиши мумкин»;
тўртинчи қисми бешинчи қисм деб ҳисоблансин;
2) 28-модда :
қуйидаги мазмундаги иккинчи қисм билан тўлдирилсин:
«Янги ташкил этилган (рўйхатдан ўтказилган) креатив индустрия субъектларини креатив индустрия паркининг резидентлигига қабул қилишда ушбу модданинг биринчи қисмида назарда тутилган креатив индустрия соҳасидаги фаолиятидан олинган даромаднинг минимал миқдори бўйича шартлар инобатга олинмайди. Бунда ушбу модданинг биринчи қисмида назарда тутилган шартлар молия йилининг якунларига кўра бажарилмаган тақдирда, фойдаланилган имтиёзлар суммаси солиқ тўғрисидаги қонунчиликка асосан қайта ҳисобланади ва бюджетга ундирилади»;
иккинчи ва учинчи қисмлари тегишинча учинчи ва тўртинчи қисмлар деб ҳисоблансин.
4-модда. Ўзбекистон Республикаси Иқтисодиёт ва молия вазирлиги, Маданият вазирлиги ҳамда Ўзбекистон Республикаси Президенти Администрацияси ҳузуридаги Маданият ва санъатни ривожлантириш жамғармаси ушбу Қонуннинг ижросини, ижрочиларга етказилишини ҳамда моҳияти ва аҳамияти аҳоли ўртасида тушунтирилишини таъминласин.
5-модда. Ўзбекистон Республикаси Вазирлар Маҳкамаси:
ҳукумат қарорларини ушбу Қонунга мувофиқлаштирсин;
республика ижро этувчи ҳокимият органлари ушбу Қонунга зид бўлган ўз норматив-ҳуқуқий ҳужжатларини қайта кўриб чиқишлари ва бекор қилишларини таъминласин.
6-модда. Ушбу Қонун расмий эълон қилинган кундан эътиборан кучга киради.
Ушбу Қонун 1-моддаси тўртинчи хатбошисининг ва 3-моддаси 2-банди учинчи хатбошисининг қоидалари 2026 йил 1 январдан эътиборан юзага келган муносабатларга нисбатан ҳам татбиқ этилади.
Ўзбекистон Республикасининг Президенти Ш. МИРЗИЁЕВ
Тошкент ш.,
2026 йил 7 июль,
ЎРҚ- 1157 -сон
Oʻzbekiston Respublikasining Qonuni
Oʻzbekiston Respublikasining ayrim qonun hujjatlariga kreativ iqtisodiyotni rivojlantirishga qaratilgan oʻzgartirish va qoʻshimchalar kiritish toʻgʻrisida
Qonunchilik palatasi tomonidan 2026-yil 17-martda qabul qilingan Senat tomonidan 2026-yil 19-mayda maʼqullangan
Keyingi yillarda mamlakatimizda kreativ industriyani, iqtisodiyotimizni innovatsion jihatdan rivojlantirishni ragʻbatlantirishga, mazkur sohadagi ijodiy salohiyatni iqtisodiy qiymatga aylantirishga, shu sohada yangi ish oʻrinlarini yaratishga, yoshlar va tadbirkorlarning ijodiy tashabbuslarini qoʻllab-quvvatlashga qaratilgan keng koʻlamli ishlar amalga oshirilmoqda.
Shu bilan birga kreativ iqtisodiyotning izchil rivojlantirilishini taʼminlash ushbu soha subyektlari uchun yanada qulay shart-sharoitlar, ragʻbatlantiruvchi mexanizmlar yaratilishini va imtiyozlar berilishini taqozo etmoqda.
Ushbu Qonun bilan Oʻzbekiston Respublikasining ayrim qonun hujjatlariga Madaniyat va sanʼatni rivojlantirish jamgʻarmasi hamda Kreativ industriya parki rezidentlari tomonidan amalga oshiriladigan loyihalarga jalb qilingan mutaxassislar uchun ayrim soliq imtiyozlari berilishini nazarda tutuvchi oʻzgartirish va qoʻshimchalar kiritilmoqda.
Shuningdek kreativ industriya sohasida yangi tashkil etilgan (roʻyxatdan oʻtkazilgan) subyektlarni kreativ industriya parkining rezidentligiga qabul qilishda yengilliklar yaratish, madaniyat va sanʼat boʻyicha xalqaro hamda davlatlararo tadbirlarni tashkil etish va oʻtkazish bilan bogʻliq xarajatlarni toʻgʻridan-toʻgʻri shartnomalar boʻyicha amalga oshirish imkoniyati yaratilmoqda.
Mazkur Qonun kreativ industriya sohasidagi xalqaro hamkorlikni kengaytirishga, madaniy tadbirlarning sifati va koʻlamini oshirishga, mamlakatimizning xalqaro maydondagi madaniy nufuzini yuksaltirishga xizmat qiladi.
1-modda. Oʻzbekiston Respublikasining 2019-yil 30-dekabrda qabul qilingan OʻRQ-599-sonli Qonuni bilan yangi tahrirda tasdiqlangan Oʻzbekiston Respublikasining Soliq kodeksi (Oʻzbekiston Respublikasi Oliy Majlisi palatalarining Axborotnomasi, 2019-yil, 12-songa 1-ilova; 2020-yil, № 3, 198-modda, № 10, 593-modda, № 11, 652-modda, № 12, 690, 691-moddalar; 2021-yil, № 1, 6-modda, № 4, 294-modda, 4-songa ilova, № 8, 800-modda, № 9, 901-modda, № 10, 968, 969, 972, 973-moddalar, № 12, 1199-modda; 2022-yil, № 2, 79-modda, № 3, 215, 216-moddalar, № 5, 461, 464, 467-moddalar, № 6, 570-modda, № 7, 664, 666-moddalar, № 12, 1190-modda; 2023-yil, № 6, 444, 446-moddalar, № 7, 540-modda, № 12, 1011-modda; 2024-yil, № 2, 106, 110, 111-moddalar, № 4, 346-modda, № 5, 458, 459-moddalar, № 8, 822, 831-moddalar, № 9, 958-modda, № 10, 1076-modda, № 11, 1190-modda, № 12, 1283, 1284, 1296, 1297-moddalar; 2025-yil, № 2, 188, 194-moddalar, № 4, 519, 520, 521, 522-moddalar, № 5, 644, 645-moddalar, № 6, 729, 731-moddalar, № 8, 971-modda, № 10, 1153-modda, № 12, 1322, 1324, 1328, 1329-moddalar; 2026-yil, № 2, 132-modda) 483-moddasiga quyidagi oʻzgartirish va qoʻshimcha kiritilsin:
sakson beshinchi qismning birinchi xatboshisidagi “Kreativ parkning” degan soʻzlar “Kreativ industriya parkining” degan soʻzlar bilan almashtirilsin;
quyidagi mazmundagi bir yuz toʻrtinchi qism bilan toʻldirilsin:
“2026-yil 1-yanvardan 2030-yil 1-yanvarga qadar boʻlgan davrda Oʻzbekiston Respublikasi Prezidenti Administratsiyasi huzuridagi Madaniyat va sanʼatni rivojlantirish jamgʻarmasi hamda Kreativ industriya parki rezidentlari tomonidan amalga oshiriladigan loyihalarga jalb qilingan chet el kontragentlari qoʻshilgan qiymat soligʻini, toʻlov manbaida foyda soligʻini va jismoniy shaxslardan olinadigan daromad soligʻini toʻlashdan ozod qilinadi. Bunda ushbu imtiyoz chet el kontragentlari kreativ industriya sohasiga bevosita bogʻliq boʻlgan ishlarni bajarish, xizmatlar koʻrsatish uchun jalb etilganda qoʻllaniladi”.
2-modda. Oʻzbekiston Respublikasining 2021-yil 22-aprelda qabul qilingan “Davlat xaridlari toʻgʻrisida”gi OʻRQ-684-sonli Qonuni (Oʻzbekiston Respublikasi Oliy Majlis palatalarining Axborotnomasi, 2021-yil, № 4, 289-modda; 2024-yil, № 2, 111-modda, № 11, 1288-modda; 2025-yil, № 2, 188-modda, № 4, 519-modda, № 6, 730-modda) 71-moddasining birinchi qismi quyidagi mazmundagi 22-band bilan toʻldirilsin:
“22) madaniyat va sanʼat boʻyicha xalqaro hamda davlatlararo darajadagi tadbirlarni tashkil etish va oʻtkazish bilan bogʻliq davlat xaridi. Bunda bunday tadbirlarning darajalari qonunchilikda belgilangan tartibda aniqlanadi”.
3-modda. Oʻzbekiston Respublikasining 2024-yil 3-oktabrda qabul qilingan “Kreativ iqtisodiyot toʻgʻrisida”gi OʻRQ-970-sonli Qonuniga (Oʻzbekiston Respublikasi Oliy Majlisi palatalarining Axborotnomasi, 2024-yil, № 10, 1069-modda; 2025-yil, № 12, 1329-modda) quyidagi qoʻshimcha va oʻzgartirishlar kiritilsin:
1) 14-modda :
quyidagi mazmundagi toʻrtinchi qism bilan toʻldirilsin:
“Respublika kengashining zimmasiga qonunchilik hujjatlariga muvofiq boshqa vazifalar ham yuklatilishi mumkin”;
toʻrtinchi qismi beshinchi qism deb hisoblansin;
2) 28-modda :
quyidagi mazmundagi ikkinchi qism bilan toʻldirilsin:
“Yangi tashkil etilgan (roʻyxatdan oʻtkazilgan) kreativ industriya subyektlarini kreativ industriya parkining rezidentligiga qabul qilishda ushbu moddaning birinchi qismida nazarda tutilgan kreativ industriya sohasidagi faoliyatidan olingan daromadning minimal miqdori boʻyicha shartlar inobatga olinmaydi. Bunda ushbu moddaning birinchi qismida nazarda tutilgan shartlar moliya yilining yakunlariga koʻra bajarilmagan taqdirda, foydalanilgan imtiyozlar summasi soliq toʻgʻrisidagi qonunchilikka asosan qayta hisoblanadi va budjetga undiriladi”;
ikkinchi va uchinchi qismlari tegishincha uchinchi va toʻrtinchi qismlar deb hisoblansin.
4-modda. Oʻzbekiston Respublikasi Iqtisodiyot va moliya vazirligi, Madaniyat vazirligi hamda Oʻzbekiston Respublikasi Prezidenti Administratsiyasi huzuridagi Madaniyat va sanʼatni rivojlantirish jamgʻarmasi ushbu Qonunning ijrosini, ijrochilarga yetkazilishini hamda mohiyati va ahamiyati aholi oʻrtasida tushuntirilishini taʼminlasin.
5-modda. Oʻzbekiston Respublikasi Vazirlar Mahkamasi:
hukumat qarorlarini ushbu Qonunga muvofiqlashtirsin;
respublika ijro etuvchi hokimiyat organlari ushbu Qonunga zid boʻlgan oʻz normativ-huquqiy hujjatlarini qayta koʻrib chiqishlari va bekor qilishlarini taʼminlasin.
6-modda. Ushbu Qonun rasmiy eʼlon qilingan kundan eʼtiboran kuchga kiradi.
Ushbu Qonun 1-moddasi toʻrtinchi xatboshisining va 3-moddasi 2-bandi uchinchi xatboshisining qoidalari 2026-yil 1-yanvardan eʼtiboran yuzaga kelgan munosabatlarga nisbatan ham tatbiq etiladi.
Oʻzbekiston Respublikasining Prezidenti Sh. MIRZIYOYEV
Toshkent sh.,
2026-yil 7-iyul,
OʻRQ- 1157 -son