📅 2026-yil 7-iyul · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2026 йил 7 июль · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 7 июля 2026 г. · Постановления Кабинета Министров
Официальный текст. Официальный документ. Редакционные примечания не включены.
📅 7 July 2026 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Вазирлар Маҳкамасининг «Ўзбекистон Республикаси Қуролли Кучларининг ҳарбий хизматчиларига ҳамда Ватан ҳимояси ва эл-юрт тинчлиги йўлида ҳалок бўлган ҳарбий хизматчилар ва ходимларнинг оила аъзоларига турар жойни ижарага олганлик (ижарада турганлик) учун ҳар ойлик пул компенсацияси тўлаш тартиби тўғрисида» 2005 йил 25 июлдаги 169-сон қарорига ўзгартиришлар киритиш ҳақида
Ўзбекистон Республикаси Президентининг «Қуролли Кучлар ҳарбий хизматчилари ва айрим фуқаро ходимларининг ижтимоий ҳимоясини кучайтиришга қаратилган қўшимча чора-тадбирлар тўғрисида» 2026 йил 8 июндаги ПҚ-214-сон қарори ижросини таъминлаш мақсадида Вазирлар Маҳкамаси қарор қилади:
1. Вазирлар Маҳкамасининг «Ўзбекистон Республикаси Қуролли Кучларининг ҳарбий хизматчиларига ҳамда Ватан ҳимояси ва эл-юрт тинчлиги йўлида ҳалок бўлган ҳарбий хизматчилар ва ходимларнинг оила аъзоларига турар жойни ижарага олганлик (ижарада турганлик) учун ҳар ойлик пул компенсацияси тўлаш тартиби тўғрисида» 2005 йил 25 июлдаги 169-сон қарорига иловага мувофиқ Тошкент ва Самарқанд шаҳарларида ҳарбий хизматчиларга турар жойни ижарага олганлик (ижарада турганлик) учун тўланадиган ҳар ойлик пул компенсацияси миқдорини 25 фоизга оширишни назарда тутувчи ўзгартиришлар киритилсин.
2. Ушбу қарорнинг ижросини назорат қилиш Ўзбекистон Республикаси Бош вазирининг ўринбосари — иқтисодиёт ва молия вазири Ж.А. Қўчқоров зиммасига юклансин.
Вазирлар Маҳкамасининг 2026 йил 7 июлдаги 369-сон қарорига ИЛОВА
Вазирлар Маҳкамасининг «Ўзбекистон Республикаси Қуролли Кучларининг ҳарбий хизматчиларига ҳамда Ватан ҳимояси ва эл-юрт тинчлиги йўлида ҳалок бўлган ҳарбий хизматчилар ва ходимларнинг оила аъзоларига турар жойни ижарага олганлик (ижарада турганлик) учун ҳар ойлик пул компенсацияси тўлаш тартиби тўғрисида» 2005 йил 25 июлдаги 169-сон қарорига киритилаётган ўзгартиришлар
1. 1-илованинг 1-банди қуйидаги таҳрирда баён этилсин:
«1. Турар жойни ижарага олганлик (ижарада турганлик) учун пул компенсацияси контракт бўйича хизмат қилаётган, Ўзбекистон Республикаси вазирликлари ва идоралари йўналиши бўйича турар жой билан таъминланмаган оддий аскар, сержант ва офицерлар таркибидаги ҳарбий хизматчиларга амалдаги сарф-харажатлар доирасида (коммунал хизматлар ҳақи бундан мустасно):
Тошкент шаҳрида — базавий ҳисоблаш миқдорининг 6 бараваригача миқдорда;
Самарқанд шаҳрида — базавий ҳисоблаш миқдорининг 4,5 бараваригача миқдорда;
Нукус шаҳри ва бошқа вилоятлар марказларида — базавий ҳисоблаш миқдорининг 3,6 бараваригача миқдорда;
Ўзбекистон Республикасининг бошқа шаҳарлари, туманлар марказлари ва аҳоли пунктларида — базавий ҳисоблаш миқдорининг 2,4 бараваригача миқдорда тўланади.
Оила аъзолари уч киши ва ундан ортиқ бўлган тақдирда (ҳарбий хизматчининг ўзини ҳисобламаган ҳолда), ушбу пул компенсацияси миқдорлари 50 фоизга оширилади. Бунда ҳарбий хизматчининг ҳарбий хизматни ўташ жойига келган оила аъзолари: хотини (эри), уларнинг фарзандлари ва ота-оналари, шунингдек, қонунчиликка мувофиқ ижарага олувчининг оила аъзолари деб эътироф этилган бошқа шахслар ҳисобга олинади.
Амалдаги қонунчиликка мувофиқ олдинги яшаш жойида уй-жой майдонини бронь қилган ва бронь қилинган уй-жой майдонига уй-жой майдони билан таъминланмаган бошқа ҳарбий хизматчиларни жойлаштирган ёхуд уй-жой майдонини ушбу мақсадлар учун Ўзбекистон Республикасининг тегишли вазирликлари ва идораларининг квартира органларига берган ҳарбий хизматчиларга ҳам пул компенсацияси мана шу миқдорларда тўланади.
Тошкент ва Нукус шаҳарлари ҳамда вилоят марказлари маъмурий чегараларига бевосита яқин жойлашган, бир гарнизон ҳудудига кирувчи туман аҳамиятига эга аҳоли яшаш пунктларидаги ҳарбий қисм ва муассасалар ҳарбий хизматчиларига, ушбу шаҳарлар (пойтахт ва вилоят марказлари) яқинида турар жойни ижарага олганлиги (ижарада турганлиги) учун пул компенсацияси, амалдаги сарф-харажатлар доирасида (коммунал хизматлар ҳақи бундан мустасно), ҳарбий хизматчи ҳақиқатда яшаётган ҳудудий бирлик учун белгиланган миқдорларда тўланади.
Ҳар ойлик пул компенсацияси тўловлари миқдори ҳудудлар кесимида турар жой ижарасининг бозор нархларидан келиб чиққан ҳолда ҳар йил Вазирлар Маҳкамасининг қарори билан белгилаб борилади. Бунда турар жой ижарасининг бозор нархларини қайта белгилашда Солиқ қўмитасининг ҳар йил 1 октябрь ҳолатига кўра солиқ органлари автоматлаштирилган ахборот тизимига ҳисобга қўйилган кўчмас мулк ижара шартномаси бўйича берган маълумоти асос ҳисобланади. Турар жой ижарасининг бозор қиймати мазкур бандда кўрсатилган ҳар ойлик компенсация меъёрларидан кам миқдорларни ташкил этса, ҳар ойлик компенсациянинг ушбу Низомда белгиланган меъёрлари ўзгартирилмайди ва уни ўзгартириш ҳақида Вазирлар Маҳкамасининг тегишли қарори қабул қилингунига қадар тўланади».
2. 2-илованинг 8-банди қуйидаги таҳрирда баён этилсин:
«8. Турар жойни ижарага олганлик (ижарада турганлик) учун пул компенсацияси ҳалок бўлган ҳарбий хизматчининг (ходимнинг) оила аъзоларига амалдаги сарф-харажатлар доирасида (коммунал хизматлар ҳақи бундан мустасно):
Тошкент шаҳрида — базавий ҳисоблаш миқдорининг 6 бараваригача миқдорда;
Самарқанд шаҳрида — базавий ҳисоблаш миқдорининг 4,5 бараваригача миқдорда;
Нукус шаҳри ва бошқа вилоятлар марказларида — базавий ҳисоблаш миқдорининг 3,6 бараваригача миқдорда;
Ўзбекистон Республикасининг бошқа шаҳарлари, туманлари марказлари ва аҳоли пунктларида — базавий ҳисоблаш миқдорининг 2,4 бараваригача миқдорда тўланади.
Пул компенсациясини олувчи ҳалок бўлган ҳарбий хизматчининг (ходимнинг) оила аъзоси (турмуш ўртоғи, ота-онасидан бири) билан бирга яшайдиган оила таркиби уч киши ва ундан ортиқ бўлган тақдирда (пул компенсацияси олувчи шахсни ҳисобламаган ҳолда), пул компенсацияси миқдорлари 50 фоизга оширилади. Бунда пул компенсацияси олувчи оила аъзоси билан бирга яшайдиган шахслар (ҳалок бўлган ҳарбий хизматчининг (ходимнинг) фарзандлари, ҳарбий хизматчи (ходим) ҳаётлигида фарзандликка олган шахслар, ҳалок бўлган ҳарбий хизматчининг (ходимнинг) оила аъзолари томонидан фарзандликка олинган шахслар, ҳарбий хизматчининг (ходимнинг) қарамоғидаги ота-онаси, шу жумладан, турмуш ўртоғининг ота-онаси) ҳисобга олинади.
Ҳар ойлик пул компенсацияси тўловлари миқдори ҳудудлар кесимида турар жой ижарасининг бозор нархларидан келиб чиққан ҳолда ҳар йил Вазирлар Маҳкамасининг қарори билан белгилаб борилади. Бунда турар жой ижарасининг бозор нархларини қайта белгилашда Солиқ қўмитасининг ҳар йил 1 октябрь ҳолатига кўра солиқ органлари автоматлаштирилган ахборот тизимига ҳисобга қўйилган кўчмас мулк ижара шартномаси бўйича берган маълумоти асос ҳисобланади. Турар жой ижарасининг бозор қиймати мазкур бандда кўрсатилган ҳар ойлик компенсация меъёрларидан кам миқдорларни ташкил этса, ҳар ойлик компенсациянинг ушбу Низомда белгиланган меъёрлари ўзгартирилмайди ва уни ўзгартириш ҳақида Вазирлар Маҳкамасининг тегишли қарори қабул қилингунига қадар тўланади».
Ўзбекистон Республикасининг Бош вазири А. АРИПОВ
Тошкент ш.,
2026 йил 7 июль,
369 -сон
Oʻzbekiston Respublikasi Vazirlar Mahkamasining
qarori
Vazirlar Mahkamasining “Oʻzbekiston Respublikasi Qurolli Kuchlarining harbiy xizmatchilariga hamda Vatan himoyasi va el-yurt tinchligi yoʻlida halok boʻlgan harbiy xizmatchilar va xodimlarning oila aʼzolariga turar joyni ijaraga olganlik (ijarada turganlik) uchun har oylik pul kompensatsiyasi toʻlash tartibi toʻgʻrisida” 2005-yil 25-iyuldagi 169-son qaroriga oʻzgartirishlar kiritish haqida
Oʻzbekiston Respublikasi Prezidentining “Qurolli Kuchlar harbiy xizmatchilari va ayrim fuqaro xodimlarining ijtimoiy himoyasini kuchaytirishga qaratilgan qoʻshimcha chora-tadbirlar toʻgʻrisida” 2026-yil 8-iyundagi PQ-214-son qarori ijrosini taʼminlash maqsadida Vazirlar Mahkamasi qaror qiladi:
1. Vazirlar Mahkamasining “Oʻzbekiston Respublikasi Qurolli Kuchlarining harbiy xizmatchilariga hamda Vatan himoyasi va el-yurt tinchligi yoʻlida halok boʻlgan harbiy xizmatchilar va xodimlarning oila aʼzolariga turar joyni ijaraga olganlik (ijarada turganlik) uchun har oylik pul kompensatsiyasi toʻlash tartibi toʻgʻrisida” 2005-yil 25-iyuldagi 169-son qaroriga ilovaga muvofiq Toshkent va Samarqand shaharlarida harbiy xizmatchilarga turar joyni ijaraga olganlik (ijarada turganlik) uchun toʻlanadigan har oylik pul kompensatsiyasi miqdorini 25 foizga oshirishni nazarda tutuvchi oʻzgartirishlar kiritilsin.
2. Ushbu qarorning ijrosini nazorat qilish Oʻzbekiston Respublikasi Bosh vazirining oʻrinbosari — iqtisodiyot va moliya vaziri J.A. Qoʻchqorov zimmasiga yuklansin.
Vazirlar Mahkamasining 2026-yil 7-iyuldagi 369-son qaroriga ILOVA
Vazirlar Mahkamasining “Oʻzbekiston Respublikasi Qurolli Kuchlarining harbiy xizmatchilariga hamda Vatan himoyasi va el-yurt tinchligi yoʻlida halok boʻlgan harbiy xizmatchilar va xodimlarning oila aʼzolariga turar joyni ijaraga olganlik (ijarada turganlik) uchun har oylik pul kompensatsiyasi toʻlash tartibi toʻgʻrisida” 2005-yil 25-iyuldagi 169-son qaroriga kiritilayotgan oʻzgartirishlar
1. 1-ilovaning 1-bandi quyidagi tahrirda bayon etilsin:
“1. Turar joyni ijaraga olganlik (ijarada turganlik) uchun pul kompensatsiyasi kontrakt boʻyicha xizmat qilayotgan, Oʻzbekiston Respublikasi vazirliklari va idoralari yoʻnalishi boʻyicha turar joy bilan taʼminlanmagan oddiy askar, serjant va ofitserlar tarkibidagi harbiy xizmatchilarga amaldagi sarf-xarajatlar doirasida (kommunal xizmatlar haqi bundan mustasno):
Toshkent shahrida — bazaviy hisoblash miqdorining 6 baravarigacha miqdorda;
Samarqand shahrida — bazaviy hisoblash miqdorining 4,5 baravarigacha miqdorda;
Nukus shahri va boshqa viloyatlar markazlarida — bazaviy hisoblash miqdorining 3,6 baravarigacha miqdorda;
Oʻzbekiston Respublikasining boshqa shaharlari, tumanlar markazlari va aholi punktlarida — bazaviy hisoblash miqdorining 2,4 baravarigacha miqdorda toʻlanadi.
Oila aʼzolari uch kishi va undan ortiq boʻlgan taqdirda (harbiy xizmatchining oʻzini hisoblamagan holda), ushbu pul kompensatsiyasi miqdorlari 50 foizga oshiriladi. Bunda harbiy xizmatchining harbiy xizmatni oʻtash joyiga kelgan oila aʼzolari: xotini (eri), ularning farzandlari va ota-onalari, shuningdek, qonunchilikka muvofiq ijaraga oluvchining oila aʼzolari deb eʼtirof etilgan boshqa shaxslar hisobga olinadi.
Amaldagi qonunchilikka muvofiq oldingi yashash joyida uy-joy maydonini bron qilgan va bron qilingan uy-joy maydoniga uy-joy maydoni bilan taʼminlanmagan boshqa harbiy xizmatchilarni joylashtirgan yoxud uy-joy maydonini ushbu maqsadlar uchun Oʻzbekiston Respublikasining tegishli vazirliklari va idoralarining kvartira organlariga bergan harbiy xizmatchilarga ham pul kompensatsiyasi mana shu miqdorlarda toʻlanadi.
Toshkent va Nukus shaharlari hamda viloyat markazlari maʼmuriy chegaralariga bevosita yaqin joylashgan, bir garnizon hududiga kiruvchi tuman ahamiyatiga ega aholi yashash punktlaridagi harbiy qism va muassasalar harbiy xizmatchilariga, ushbu shaharlar (poytaxt va viloyat markazlari) yaqinida turar joyni ijaraga olganligi (ijarada turganligi) uchun pul kompensatsiyasi, amaldagi sarf-xarajatlar doirasida (kommunal xizmatlar haqi bundan mustasno), harbiy xizmatchi haqiqatda yashayotgan hududiy birlik uchun belgilangan miqdorlarda toʻlanadi.
Har oylik pul kompensatsiyasi toʻlovlari miqdori hududlar kesimida turar joy ijarasining bozor narxlaridan kelib chiqqan holda har yil Vazirlar Mahkamasining qarori bilan belgilab boriladi. Bunda turar joy ijarasining bozor narxlarini qayta belgilashda Soliq qoʻmitasining har yil 1-oktabr holatiga koʻra soliq organlari avtomatlashtirilgan axborot tizimiga hisobga qoʻyilgan koʻchmas mulk ijara shartnomasi boʻyicha bergan maʼlumoti asos hisoblanadi. Turar joy ijarasining bozor qiymati mazkur bandda koʻrsatilgan har oylik kompensatsiya meʼyorlaridan kam miqdorlarni tashkil etsa, har oylik kompensatsiyaning ushbu Nizomda belgilangan meʼyorlari oʻzgartirilmaydi va uni oʻzgartirish haqida Vazirlar Mahkamasining tegishli qarori qabul qilinguniga qadar toʻlanadi”.
2. 2-ilovaning 8-bandi quyidagi tahrirda bayon etilsin:
“8. Turar joyni ijaraga olganlik (ijarada turganlik) uchun pul kompensatsiyasi halok boʻlgan harbiy xizmatchining (xodimning) oila aʼzolariga amaldagi sarf-xarajatlar doirasida (kommunal xizmatlar haqi bundan mustasno):
Toshkent shahrida — bazaviy hisoblash miqdorining 6 baravarigacha miqdorda;
Samarqand shahrida — bazaviy hisoblash miqdorining 4,5 baravarigacha miqdorda;
Nukus shahri va boshqa viloyatlar markazlarida — bazaviy hisoblash miqdorining 3,6 baravarigacha miqdorda;
Oʻzbekiston Respublikasining boshqa shaharlari, tumanlari markazlari va aholi punktlarida — bazaviy hisoblash miqdorining 2,4 baravarigacha miqdorda toʻlanadi.
Pul kompensatsiyasini oluvchi halok boʻlgan harbiy xizmatchining (xodimning) oila aʼzosi (turmush oʻrtogʻi, ota-onasidan biri) bilan birga yashaydigan oila tarkibi uch kishi va undan ortiq boʻlgan taqdirda (pul kompensatsiyasi oluvchi shaxsni hisoblamagan holda), pul kompensatsiyasi miqdorlari 50 foizga oshiriladi. Bunda pul kompensatsiyasi oluvchi oila aʼzosi bilan birga yashaydigan shaxslar (halok boʻlgan harbiy xizmatchining (xodimning) farzandlari, harbiy xizmatchi (xodim) hayotligida farzandlikka olgan shaxslar, halok boʻlgan harbiy xizmatchining (xodimning) oila aʼzolari tomonidan farzandlikka olingan shaxslar, harbiy xizmatchining (xodimning) qaramogʻidagi ota-onasi, shu jumladan, turmush oʻrtogʻining ota-onasi) hisobga olinadi.
Har oylik pul kompensatsiyasi toʻlovlari miqdori hududlar kesimida turar joy ijarasining bozor narxlaridan kelib chiqqan holda har yil Vazirlar Mahkamasining qarori bilan belgilab boriladi. Bunda turar joy ijarasining bozor narxlarini qayta belgilashda Soliq qoʻmitasining har yil 1-oktabr holatiga koʻra soliq organlari avtomatlashtirilgan axborot tizimiga hisobga qoʻyilgan koʻchmas mulk ijara shartnomasi boʻyicha bergan maʼlumoti asos hisoblanadi. Turar joy ijarasining bozor qiymati mazkur bandda koʻrsatilgan har oylik kompensatsiya meʼyorlaridan kam miqdorlarni tashkil etsa, har oylik kompensatsiyaning ushbu Nizomda belgilangan meʼyorlari oʻzgartirilmaydi va uni oʻzgartirish haqida Vazirlar Mahkamasining tegishli qarori qabul qilinguniga qadar toʻlanadi”.
Oʻzbekiston Respublikasining Bosh vaziri A. ARIPOV
Toshkent sh.,
2026-yil 7-iyul,
369 -son