📅 2026-yil 16-iyul · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2026 йил 16 июль · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 16 июля 2026 г. · Постановления Кабинета Министров
Официальный текст. Официальный документ. Редакционные примечания не включены.
📅 16 July 2026 · Cabinet of Ministers resolutions
Official text. Official document. Editorial notes are not included.
ЎЗБЕКИСТОН РЕСПУБЛИКАСИ ВАЗИРЛАР МАҲКАМАСИНИНГ
ҚАРОРИ
ВАҚТИНЧАЛИК НИЗОМ
ВАҚТИНЧАЛИК НИЗОМ
Бонд омборлари фаолиятини ташкил этиш ва улар орқали товарларни сотиш тартиби тўғрисида
Ўзбекистон Республикаси Президентининг «Ўзбекистон Республикасида электрон тижорат соҳасини янада ривожлантириш учун қулай шарт-шароитлар яратишга доир чора-тадбирлар тўғрисида» 2026 йил 13 апрелдаги ПҚ-136-сон қарори ижросини таъминлаш, шунингдек, товарларни бонд омборлари орқали сотишни йўлга қўйиш мақсадида Вазирлар Маҳкамаси қарор қилади:
1. Қуйидагилар:
Бонд омбори фаолиятини ташкил этиш ва амалга ошириш тартиби тўғрисидаги вақтинчалик низом 1-иловага мувофиқ;
Махсус электрон савдо платформалари орқали жисмоний шахсларга товарларни чакана сотиш тартиби тўғрисидаги вақтинчалик низом 2-иловага мувофиқ тасдиқлансин.
2. Белгилансинки:
Ўзбекистон Республикаси Иқтисодиёт ва молия вазирлиги ҳузуридаги Божхона қўмитаси бонд омборлари реестрини шакллантириш ва юритиш бўйича ваколатли орган ҳисобланади;
Ўзбекистон Республикаси Истиқболли лойиҳалар миллий агентлиги Махсус электрон савдо платформалари реестрини шакллантириш ва юритиш бўйича ваколатли орган ҳисобланади.
3. Товарлар истеъмолчига етказиб берилгунга қадар уларни жисмоний шахсларга сотиш жараёни тўғрисидаги маълумотлар реал вақт режимида мониторинг қилиб борилишини таъминлаш мақсадида ушбу қарорнинг 2-бандида кўрсатилган реестрларга киритиш учун ариза берилган кундан эътиборан икки ой муддатда:
Ўзбекистон Республикаси Иқтисодиёт ва молия вазирлиги ҳузуридаги Божхона қўмитаси ўз ахборот тизимларини — бонд омборлари операторларининг ахборот тизимлари билан;
Ўзбекистон Республикаси Солиқ қўмитаси ўз ахборот тизимларини — махсус электрон савдо платформасининг ахборот тизимлари билан интеграция қилинишини таъминласин.
4. Ушбу қарорнинг бажарилишини назорат қилиш Ўзбекистон Республикаси Бош вазирининг ўринбосари — иқтисодиёт ва молия вазири Ж.А. Қўчқоров зиммасига юклансин.
Вазирлар Маҳкамасининг 2026 йил 16 июлдаги 388-сон қарорига 1-ИЛОВА
Бонд омбори фаолиятини ташкил этиш ва амалга ошириш тартиби тўғрисида
1-боб. Умумий қоидалар
1. Ушбу Низом бонд омбори фаолиятини ташкил этиш, унга қўйиладиган талаблар ҳамда бонд омборига товарларни жойлаштиришда божхона назорати ва расмийлаштирувини ташкил этиш тартибини белгилайди.
2. Бонд омборига жойлаштирилган товарларга Ўзбекистон Республикасининг ташқи иқтисодий фаолият соҳасидаги қонунчилик ҳужжатлари ва ушбу Низом асосида белгиланган тартиблар, тақиқлар ва чекловлар қўлланади.
3. Мазкур Низомда қуйидаги асосий тушунчалардан фойдаланилади:
бонд омбори — хорижий товарларни «эркин омбор» божхона режимида божхона назорати остида сақлаш ҳамда резидентлар ва норезидентлар томонидан махсус электрон савдо платформалари орқали жисмоний шахсларга нотижорат мақсадларда ўз эҳтиёжлари учун чакана сотишга мўлжалланган, бинолар ва (ёки) очиқ майдонлар, шу жумладан, эркин омбор ҳудудини ўз ичига олган махсус жиҳозланган ва белгиланган жой;
бонд омбори оператори — мазкур Низом талабларига мувофиқ бонд омборига жойлаштирилган товарлар божхона назорати остида турган товар мақомини йўқотгунига қадар уларни сақлаш бўйича хизматлар кўрсатувчи ва мазкур товарлар учун жавобгар бўлган Ўзбекистон Республикаси резиденти — юридик шахс;
бонд омборлари реестри — Ўзбекистон Республикаси Иқтисодиёт ва молия вазирлиги ҳузуридаги Божхона қўмитаси (кейинги ўринларда — Божхона қўмитаси) томонидан шакллантириладиган бонд омборлари рўйхати;
омбор бошқарув тизими — бонд омбори операторининг бонд омборига келиб тушган, сақланаётган, сотилган, қайтарилган ва омбордан чиқариладиган товарлар ҳаракатини такрорланмайдиган штрих-код ёки бошқа идентификатор орқали ҳисобга олувчи ва божхона органлари ахборот тизимлари билан интеграция қилинган ахборот тизими;
товар эгаси — товарларни қабул қилиб олувчи ва ўзи ҳақидаги маълумотлар транспорт ҳужжатларида кўрсатилган шахс.
4. Бонд омбори фаолиятини амалга оширишга эркин омбор фаолиятини лицензиялаш тартиби асосида ҳамда белгиланган тартибда бонд омборлари реестрига киритилган тақдирда рухсат этилади.
5. Бонд омборига жойлаштирилган товарлар билан қуйидаги операциялар бажарилиши мумкин:
махсус электрон савдо платформалари орқали жисмоний шахсларга сотиладиган чет эл товарларини сақлаш;
товарнинг ўзгармас ҳолатда бут сақланишини таъминлаш операциялари;
товарларни сотиш ва ташишга тайёрлаш бўйича операциялар, шу жумладан, саралаш, партияларни шакллантириш, қадоқлаш, қайта қадоқлаш, маркировкалаш (акциз маркаларидан ташқари) ва шу каби бошқа операциялар;
оддий йиғиш операциялари.
Бонд омборига жойлаштирилган товар билан жисмоний шахсларга нотижорат мақсадларда ўз эҳтиёжлари учун махсус электрон савдо платформаси орқали чакана савдо операцияларини амалга оширишга йўл қўйилади.
2-боб. Бонд омбори фаолиятини ташкил этиш тартиби
6. Бонд омборлари реестрига киритиш талаблари:
бонд омбори жойлашган ҳудудда амалдаги лицензияга эга эркин омбор мавжудлиги;
махсус электрон савдо платформаси билан ўзаро ҳамкорлик ёки шериклик тўғрисида шартнома мавжудлиги;
божхона органларининг ахборот тизимлари билан интеграция қилинган, назорат қилинадиган товарлар бонд омборига келиб тушган пайтдан бошлаб божхона назоратидан чиқарилгунига қадар уларнинг барча ҳаракат жараёнларини тўлиқ назорат қила оладиган автоматлаштирилган электрон ҳисоб юритиш тизимининг мавжудлиги;
мулк ҳуқуқи, эгалик қилиш, фойдаланиш ёки ижара ҳуқуқлари асосида умумий майдони камида 15 000 квадрат метр бўлган яхлит эркин омборга эга бўлиш.
7. Бонд омбори фаолиятини ташкил этиш учун юридик шахс ушбу Низомга иловага мувофиқ Божхона қўмитасига ёзма ёки электрон шаклдаги аризани ва ушбу Низомнинг 6-бандида белгиланган талаблар бажарилганини тасдиқловчи ҳужжатларни юборади.
8. Божхона қўмитаси ариза келиб тушган кундан бошлаб 10 иш куни ичида аризани ва унга илова қилинган ҳужжатларни кўриб чиқади ҳамда ариза берувчига уни бонд омборлари реестрига киритиш ёки киритишни рад этиш тўғрисида жавоб хатини ёзма ёки электрон шаклда юборади.
9. Бонд омбори ушбу Низомнинг 6-бандида белгиланган талабларга жавоб бермаса ва унинг оператори ушбу Низомда белгиланган мажбуриятларни бажармаса, Божхона қўмитаси бонд омборини бонд омборлари реестридан чиқаради.
Бонд омбори бонд омборлари реестридан чиқарилган санадан эътиборан уларда сақланаётган товарларга вақтинча сақлаш божхона режимида турган товарлар сифатида қаралади ҳамда товарларни сақлаш учун бонд омборига жойлаштиришга ва уларни сотишга йўл қўйилмайди.
Вақтинча сақлаш божхона режимида турган товарлар Ўзбекистон Республикаси Божхона кодекси талаблари асосида умумбелгиланган тартибда божхона расмийлаштирувидан ўтказилади.
3-боб. Товарларни республика ҳудудига олиб кириш ва бонд омборига жойлаштириш тартиби
10. Бонд омборига жойлаштириладиган товарлар исталган транспорт тури орқали республика ҳудудига олиб кирилиши мумкин. Бунда ушбу товарлар умумбелгиланган тартибда чегара божхона постидан олиб ўтилади ва бонд омборига етказилади.
11. Транспорт воситаларининг манзилга етиб боргани бонд омбори оператори ёки унинг ваколатли шахси томонидан Вазирлар Маҳкамасининг 2021 йил 20 августдаги 531-сон қарори билан тасдиқланган Божхона назорати остидаги товарларга нисбатан юк операцияларини амалга ошириш тартиби тўғрисидаги низом талаблари асосида тасдиқланади.
12. Ахборот тизимида транспорт воситаларининг бонд омборига етиб келгани тасдиқланиши билан товарларнинг тўлиқ сақланишини таъминлаш бўйича жавобгарлик бонд омбори операторига ўтади.
13. Бонд омборига етказилган товарлар бўйича товар эгаси томонидан улар етказилган вақтдан эътиборан 15 календарь кун мобайнида божхона органларига «эркин омбор» божхона режимига жойлаштириш учун божхона юк декларацияси (кейинги ўринларда — БЮД) тақдим этилади.
Бунда БЮД қуйидаги қўшимча хусусиятларни инобатга олган ҳолда тўлдирилади:
а) 1-графа. «Декларация тури».
Графанинг биринчи бўлмасида «ИМ» белгиси кўрсатилади.
Графанинг иккинчи бўлмасида Божхона режимлари таснифлагичига мувофиқ «73» коди кўрсатилади.
Графанинг учинчи бўлмасида «БО» белгиси кўрсатилади;
б) 31-графа. «Юк жойлари ва товар тавсифи».
Графада ҳар бир товар бўйича унинг идентификация коди кўрсатилади;
в) 49-графа. «Омбор номи».
Графада эркин омборни таъсис этиш учун берилган лицензия рақами ва санаси кўрсатилади.
14. Бонд омборига жойлаштириладиган ва ундан олиб чиқиладиган барча товарлар учун тақдим этиладиган декларацияларда қўшимча равишда товарларни чакана сотишда қўлланадиган ўлчов бирликдаги миқдори (дона, жуфт, комплект) кўрсатилиши шарт.
15. Бонд омборига товар миқдори ва ҳаракатини масофадан туриб назорат қилиш имконсиз бўлган, чакана сотиш учун қадоқланмаган, тортиладиган ёки ўлчанадиган барча товарларни жойлаштириш тақиқланади.
16. Бонд омборига етказилган товарларни декларант томонидан кўздан кечиришга ҳамда БЮД тақдим этилмагунига қадар товарлар билан юк операцияларини амалга оширишга йўл қўйилмайди (бонд омбори оператори томонидан омбор бошқарув тизимида товарларни идентификация қилиш, ҳар бир товар бирлиги бўйича такрорланмайдиган идентификация кодларини шакллантириш билан боғлиқ товарнинг номи, миқдори, вазни, қиймати, ҳолати ва қадоғини ўзгартирмайдиган операциялар бундан мустасно).
17. Тақдим этилган БЮД божхона органлари томонидан Хавфларни бошқариш тизими (кейинги ўринларда — ХБТ) орқали белгиланган йўлаклар асосида расмийлаштирилади ва товарларга нисбатан нотариф тартиботлар қўлланилмайди ҳамда рухсат этиш хусусиятига эга ҳужжатлар мавжуд эканлиги божхона органлари томонидан текширилмайди (фитосанитар назорати остидаги товарлар бундан мустасно).
Товарларнинг техник жиҳатдан тартибга солиш, санитария ва ветеринария соҳасидаги қонунчилик ҳужжатлари талабларига мувофиқлигини таъминлаш бўйича жавобгарлик бонд омбори операторига юкланади.
4-боб. Товарларни бонд омборидан чиқариш тартиби
1-§. Бонд омборидан республика ҳудудига чиқариладиган товарларни расмийлаштириш тартиби
18. Махсус электрон савдо платформаси орқали жисмоний шахсларга нотижорат мақсадларда ўз эҳтиёжлари учун чакана сотилган чет эл товарлари божхона органларига тақдим этилган ва расмийлаштирилган жўнатмалар декларацияси асосида бонд омбори ҳудудидан чиқарилади.
Бунда жўнатмалар декларацияси божхона органларига товар эгаси ёки унинг номидан божхона брокери томонидан тақдим этилади.
Мазкур банднинг биринчи хатбошисида назарда тутилмаган бошқа ҳолларда товарлар бонд омборидан Ўзбекистон Республикаси Божхона кодекси талаблари асосида умумбелгиланган тартибда божхона расмийлаштирувидан ўтказиш орқали олиб чиқилади.
19. Қонунчилик ҳужжатларида белгиланган божхона тўловлари тўлиқ тўланиб, жўнатмалар декларацияси расмийлаштирилгандан сўнг товарларни чиқаришга рухсат этилади.
Бунда божхона тўловлари товар эгаси томонидан тақдим этилган жўнатмалар декларацияси маълумотларидан автоматик шаклланган умумий шаклдаги божхона кирим ордери (кейинги ўринларда — БКО) асосида ундирилади.
БКО 1-графанинг учинчи бўлмасида «БО» белгиси кўрсатилади.
Қонунчилик ҳужжатларида белгиланган божхона тўловларини тўлаш бўйича мажбурият махсус электрон савдо платформаси операторига юкланади.
20. Товар бўйича тақдим этилган жўнатмалар декларацияси ёки БЮД расмийлаштирилган кундан эътиборан мазкур товарлар уч кун ичида бонд омбори ҳудудидан олиб чиқилиши керак.
21. Жўнатмалар декларацияси товарни чиқаришга рухсат берилгунга қадар тузатилиши ёки бекор қилиниши мумкин.
Жўнатмалар декларацияси асосида расмийлаштирилган ва чиқарилган товарлар Ўзбекистон товари мақомини олади.
Ушбу товарлар учун расмийлаштирилган жўнатмалар декларациясини бекор қилишга ва товарларни бонд омборига қайта жойлаштиришга йўл қўйилмайди ҳамда ундирилган божхона тўловлари қайтарилмайди.
2-§. Бонд омборидан хорижий мамлакат ҳудудига чиқариладиган товарларни расмийлаштириш тартиби
22. Махсус электрон савдо платформаси орқали хорижий мамлакат ҳудудидаги жисмоний шахсларга чакана сотилган товарлар божхона органларига тақдим этилган жўнатмалар декларацияси асосида расмийлаштирилади.
Бунда жўнатмалар декларацияси божхона органларига товар эгаси ёки унинг номидан божхона брокери томонидан тақдим этилиши мумкин.
23. Жўнатмалар декларацияси асосида расмийлаштирилган товарлар бонд омбори оператори томонидан бонд омбори ҳудудидаги махсус жойда сақланади ва ушбу товарлар жамланмасига расмийлаштирилган транзит декларацияси орқали чегара божхона постига юборилади.
24. Жўнатмалар декларацияси асосида расмийлаштирилган чет эл товарлари чет эл товари мақомини сақлаб қолади.
Ушбу товарлар учун расмийлаштирилган жўнатмалар декларациясини бекор қилишга ва товарларни бонд омборига қайта жойлаштиришга йўл қўйилмайди.
Қонунчилик ҳужжатларида республика ҳудудидан олиб чиқиладиган товарларга божхона тўловлари тўланиши назарда тутилган ҳолатларда божхона тўловлари тўлиқ тўланиб, жўнатмалар декларацияси расмийлаштирилгандан сўнг товарларни чиқаришга рухсат этилади.
25. Товар бўйича тақдим этилган жўнатмалар декларацияси ёки БЮД расмийлаштирилган кундан эътиборан уч кун ичида товар бонд омбори ҳудудидан олиб чиқилиши керак.
5-боб. Иштирокчиларнинг ҳуқуқлари
26. Божхона назорати ва расмийлаштирувини амалга оширишда бонд омбори оператори ва товар эгаси қуйидаги ҳуқуқларга эга:
божхона органларининг божхона назорати ва расмийлаштируви жараёнидаги ноқонуний хатти-ҳаракати юзасидан шикоят қилишга;
товарларнинг божхона назорати ва расмийлаштируви жараёнлари юзасидан божхона органларидан қонуний тушунтиришлар олишга;
жўнатмалар декларациясини шакллантириш ва божхона органларига тақдим этиш имконияти мавжуд бўлган, божхона органлари ахборот тизимлари билан интеграция қилинган электрон дастурлардан фойдаланишга ҳамда ушбу электрон дастур орқали жўнатмаларнинг ҳолати ва белгиланган хавф даражаси ҳақида маълумот олишга;
товарларнинг божхона назорати ва расмийлаштируви ҳамда ушбу жараёнда қўлланадиган электрон дастурлар бўйича таклифлар беришга;
улар томонидан тақдим этилган жўнатмалар декларацияси расмийлаштирилган санадан бошлаб бир ой муддатда юклаб олиш ҳамда қоғозда ёзма шаклини чоп этишга.
Бонд омбори оператори учун қонунчилик ҳужжатлари билан бошқа ҳуқуқлар ҳам белгиланиши мумкин.
27. Божхона назорати ва расмийлаштирувини амалга оширишда божхона органи ходими қуйидаги ҳуқуқларга эга:
тақдим этилган жўнатмалар декларациясида номувофиқликлар аниқланганда, божхона хизмати органлари, ҳуқуқни муҳофаза қилувчи органлар, хорижий давлатлар ёки халқаро ташкилотлардан олинган маълумотлар ҳамда тезкор-қидирув натижалари асосида белгиланган хавфни камайтириш чораларини ўзгартириш ва қўшимча тадбирларни амалга ошириш;
аниқланган хатолик ёки номувофиқликлар (тафовутлар) ҳолатлари сабабларини ўрганиш мақсадида тақдим этилаётган электрон ҳужжатларга қўшимча ҳужжатларни талаб қилиш;
агар ўрганиш давомида қонунчиликда назарда тутилган жиноят аломатлари мавжудлиги аниқланса, терговга қадар текширув ҳаракатларини олиб бориш;
товарларни қонунчилик ҳужжатлари асосида кўздан кечириш;
ваколатли шахслардан кўздан кечириш учун товарларни, шунингдек, зарур ҳужжатларни тақдим этишни талаб қилиш;
божхона назоратидан ўтказиш мақсадида товарлар ҳамда бошқа буюмлардан намуна ва нусхалар олиш;
товар эгаси, бонд омбори оператори ва махсус электрон савдо платформасидан божхона мақсадлари учун зарур бўлган маълумотларни олиш;
божхона ҳақидаги қонунчилик ҳужжатларининг бузилишига доир материалларни белгиланган тартибда кўриб чиқиш ҳамда ваколатли шахсларни қонунчилик ҳужжатларига мувофиқ жавобгарликка тортиш.
Божхона органи ходими қонунчилик ҳужжатларида назарда тутилган бошқа ҳуқуқларга ҳам эга бўлиши мумкин.
6-боб. Иштирокчиларнинг мажбуриятлари
29. Божхона назорати ва расмийлаштируви жараёнида қуйидагилар бонд омбори операторининг мажбуриятлари ҳисобланади:
товарларни сақлаш ва сотишда барча хавфсизлик қоидаларига риоя этиш;
бонд омбори ҳудуди ва божхона назорати зонасига рухсат этилмаган (омбор ходимлари бўлмаган, товарларга нисбатан ваколатга эга бўлмаган) шахсларни киритмаслик;
божхона органлари томонидан тасдиқланган технологик схема асосида товарларни божхона назоратидан ўтказиш учун барча зарур техник воситалар билан жиҳозлаш ва божхона расмийлаштирувини амалга ошириш учун зарур шарт-шароитларни яратиш;
бонд омборида сақланаётган товарларни божхона расмийлаштируви якунланмасдан ёки божхона органларининг рухсатисиз чиқариб юборишга, товарларни бошқасига алмаштиришга ёхуд мазкур ҳудудда товарлар билан тақиқланган операциялар амалга оширилишига йўл қўймаслик;
тегишли ахборот тизимлари орқали бонд омборларида сақланаётган ва сотилган товарлар бўйича реал вақт режимида шаклланиб борувчи ҳисобот шаклини божхона органларига тақдим этиб бориш;
бонд омборига жойлаштирилган товарлар божхона органининг рухсатисиз бериб юборилган ёки йўқолган, божхона тўловлари тўланиши учун бонд омбори оператори жавобгар бўладиган, божхона ҳақидаги қонунчилик ҳужжатларида назарда тутиладиган бошқа ҳолатларда божхона тўловларини тўлаш.
Бонд омбори операторига қонунчиликда белгиланган бошқа мажбуриятлар ҳам юкланиши мумкин.
30. Божхона назорати ва расмийлаштируви жараёнида қуйидагилар товар эгасининг мажбуриятлари ҳисобланади:
божхона органларига ўз вақтида БЮД ва жўнатмалар декларацияси тақдим этилишини таъминлаш;
декларацияланган товарларни белгиланган муддатларда чиқариб юбориш.
Товар эгасига қонунчиликда белгиланган бошқа мажбуриятлар ҳам юкланиши мумкин.
31. Божхона назорати ва расмийлаштирувини амалга оширишда қуйидагилар божхона органларининг мажбуриятлари ҳисобланади:
декларациялаш ва расмийлаштирув давомида Хавфни бошқариш тизимининг топшириғидаги божхона операцияларини бажариш;
хавфни камайтириш чораларини ўзгартириш натижасида божхона кўригини ўтказиш зарурати мавжуд бўлганда, бу тўғрисида товар эгасини хабардор этиш;
товар эгасининг божхона назорати ва расмийлаштируви бўйича тақдим этган ёзма мурожаатларини кўриб чиқиш;
ўз хизмат вазифаларини бажариш натижасида ўзига маълум бўлиб қолган тижорат сири ҳисобланган ахборотни ҳамда шахсга доир конфиденциал маълумотларни ошкор этмаслик, қонунда белгиланган ҳоллар бундан мустасно.
Божхона органига қонунчиликда белгиланган бошқа мажбуриятлар ҳам юкланиши мумкин.
7-боб. Якунловчи қоидалар
33. Бонд омборига жойлаштирилган товарлар махсус электрон савдо платформаси орқали икки йил муддатда сотилмаган тақдирда, ушбу муддат якунлангандан сўнг бир ой мобайнида умумбелгиланган тартибда реэкспорт, йўқ қилиш, давлат фойдасига воз кечиш ёки божхона тўловларини тўлаган ҳолда эркин муомалага чиқариш божхона режимларидан бирига жойлаштирилади.
34. Мазкур Низом талабларини бажаришдан келиб чиқадиган ҳар қандай низо ва келишмовчиликлар қонунчилик ҳужжатларида белгиланган тартибда ҳал қилинади.
35. Ушбу Низом талабларини бузган шахслар қонунчилик ҳужжатларида белгиланган тартибда жавоб берадилар.
Бонд омбори фаолиятини ташкил этиш ва амалга ошириш тартиби тўғрисидаги вақтинчалик низомга ИЛОВА
Ўзбекистон Республикаси Иқтисодиёт ва молия вазирлиги ҳузуридаги Божхона қўмитасига __________ ___-сон Бонд омборлари реестрига киритиш учун АРИЗА Бонд омбори фаолиятини ташкил этиш ва амалга ошириш тартиби тўғрисидаги вақтинчалик низомга мувофиқ __________________________________________________________________________ (юридик шахснинг ташкилий-ҳуқуқий шакли ва номи) қуйидаги манзилда жойлашган: _______________________________________ (омбор манзили) омборни бонд омборлари реестрига киритишни сўрайди. Илова: ____ варақда (бонд омборлари реестрига киритиш талабларига мувофиқлигини тасдиқловчи ҳужжатлар) . Ариза берувчи Ф.И.О.
Вазирлар Маҳкамасининг 2026 йил 16 июлдаги 388-сон қарорига 2-ИЛОВА
Махсус электрон савдо платформалари орқали жисмоний шахсларга товарларни чакана сотиш тартиби тўғрисида
1-боб. Умумий қоидалар
1. Ушбу Низом Ўзбекистон Республикасининг « Электрон тижорат тўғрисида »ги, « Электрон ҳужжат айланиши тўғрисида »ги қонунлари ва бошқа норматив-ҳуқуқий ҳужжатлар талабларига мувофиқ товарларни бонд омборидан махсус электрон савдо платформалари орқали жисмоний шахсларга сотиш тартибини белгилайди.
2. Ушбу Низомда қуйидаги асосий тушунчалардан фойдаланилади:
бонд омбори — хорижий товарларни «эркин омбор» божхона режимида божхона назорати остида сақлаш ҳамда резидентлар ва норезидентлар томонидан махсус электрон савдо платформалари орқали жисмоний шахсларга нотижорат мақсадларда ўз эҳтиёжлари учун чакана сотишга мўлжалланган, бинолар ва (ёки) очиқ майдонлар, шу жумладан, эркин омбор ҳудудини ўз ичига олган махсус жиҳозланган ва белгиланган жой;
буюртмаларни топшириш пункти — махсус электрон савдо платформаси орқали сотиб олинган товарларни топшириш, қабул қилиш, етказиб бериш, жўнатиш, сақлаш ва қайтариш учун мўлжалланган логистика инфратузилмаси объекти (Ўзбекистон Республикаси ҳудудида жойлашган нотурар жой);
махсус электрон савдо платформаси — бонд омборига жойлаштирилган товарларни сотиш учун мўлжалланган ҳамда қонунчилик ҳужжатлари билан белгиланган талабларга мос келадиган электрон савдо платформаси тури;
Махсус электрон савдо платформалари реестри — Ўзбекистон Республикаси Истиқболли лойиҳалар миллий агентлиги (кейинги ўринларда — Агентлик) томонидан шакллантириладиган махсус электрон савдо платформалари рўйхати;
операцион омбор — махсус электрон савдо платформаси операторининг харидор буюртма берган пайтдан бошлаб, уни харидорга жўнатишгача бўлган даврда товарни сақлаш, қадоқлаш, маркировкалаш, саралаш ва жўнатиш (қабул қилиш) учун мўлжалланган нотурар биноси.
2-боб. Товарларни махсус электрон савдо платформалари орқали жисмоний шахсларга бонд омбори орқали чакана сотишни ташкил этиш тартиби
3. Махсус электрон савдо платформалари реестрига киритиш талаблари:
а) Ўзбекистон Республикасининг юридик шахси шаклида давлат рўйхатидан ўтказиш;
б) Ўзбекистон Республикасининг шахсга доир маълумотлар тўғрисидаги қонунчилик талабларига риоя этилишини таъминлаш;
в) қуйидагилардан иборат инфратузилманинг мавжудлиги:
онлайн назорат-касса машинаси ёки виртуал касса;
республика ҳудуди бўйича етказиб бериш хизматини кўрсатувчи ташкилот (ташкилотлар) билан шартноманинг мавжудлиги ёки бутун мамлакат бўйлаб буюртмаларни етказиб беришни таъминлайдиган, юк ташиш учун мўлжалланган ўзининг (мулк, ижара ёки лизинг ҳуқуқи асосидаги) транспорт воситаларининг мавжудлиги;
мулк ҳуқуқи, эгалик қилиш, фойдаланиш ёки ижара ҳуқуқлари асосида бонд омборига эга бўлиши ёхуд бонд омборлари реестрига киритилган операторлар билан омбор хизматларини кўрсатиш бўйича шартномага эга бўлиш;
республика ҳудуди бўйича шаҳар ва туманларда буюртмаларни топшириш пунктлари, шунингдек, операцион омборлар (шу жумладан, саралаш марказлари (агар мавжуд бўлса) ва бошқа логистика инфратузилмаси мавжудлиги.
4. Махсус электрон савдо платформалари реестрига киритиш учун юридик шахс ушбу Низомга иловага мувофиқ Агентликка ёзма ёки электрон шаклдаги аризани ва ушбу Низомнинг 3-бандида белгиланган талаблар бажарилганини тасдиқловчи ҳужжатларни юборади.
5. Агентлик ариза келиб тушган кундан бошлаб 10 иш куни ичида аризани ва унга илова қилинган ҳужжатларни кўриб чиқади, уни бонд омборлари реестрига киритиш ёки киритишни рад этиш тўғрисида жавоб хатини ариза берувчига ёзма ёки электрон шаклда юборади.
6. Махсус электрон савдо платформаси Ўзбекистон Республикаси ҳудудида товарларни сотиш бўйича учинчи шахсларнинг (махсус электрон савдо платформасида жойлаштириладиган товарлар сотувчиларининг) агенти (субагенти, комиссионери) сифатида, шунингдек, ўзининг (ҳам ўзи ишлаб чиқарган, ҳам қайта сотиш учун харид қилинган) товарларининг сотувчиси сифатида ҳам иштирок этиши мумкин.
7. Махсус электрон савдо платформаси ушбу Низомнинг 3-бандида белгиланган талабларга жавоб бермаса, Агентлик махсус электрон савдо платформасини Махсус электрон савдо платформалари реестридан чиқаради.
8. Сотувчи махсус электрон савдо платформаси оператори томонидан белгиланган талабларга мувофиқ махсус электрон савдо платформасида рўйхатдан ўтказилади.
9. Жисмоний шахслар томонидан товарлар махсус электрон савдо платформаси орқали харид қилиниб, Ўзбекистон Республикасининг истеъмолчилар ҳуқуқларини ҳимоя қилиш тўғрисидаги қонунчилик ҳужжатларида белгиланган тартибда қайтарилган тақдирда:
товарлар бонд омборига қайтарилмайди ва келгусида маҳаллий бозорда сотиш мақсадида махсус электрон савдо платформасининг операцион омборига кирим қилинади;
қайтарилган товар бўйича Ўзбекистон Республикаси Давлат бюджетига тўланган божхона тўловлари қайтарилмайди;
ушбу товарлар бонд омбори оператори, махсус электрон савдо платформаси оператори ва сотувчи ўртасида тузилган шартномага (келишувга) асосан тасарруф этилади.
3-боб. Махсус электрон савдо платформалари операторларнинг мажбуриятлари
10. Махсус электрон савдо платформаси операторининг мажбуриятлари қуйидагилардан иборат:
сотилган товарлар учун жисмоний шахслар билан шартнома асосида (шу жумладан, офертага қўшилиш орқали) ҳисоб-китобларни амалга ошириш;
жисмоний шахсларга сотиладиган товарлар тўғрисидаги зарур маълумотларни кузатиб бориш учун Ўзбекистон Республикаси Солиқ қўмитасининг ахборот тизимлари билан интеграция қилиш.
11. Операцион омборга жойлаштирилган товарлар билан қуйидаги операциялар амалга оширилади:
товарни сақлаш операциялари;
товарларни сотиш ва ташишга тайёрлаш операциялари, жумладан, саралаш, партияларни шакллантириш, қадоқлаш, қайта қадоқлаш, маркировкалаш (акциз маркаларидан ташқари) ва бошқа шунга ўхшаш операциялар;
оддий йиғиш операциялари.
Қонунчилик ҳужжатларига мувофиқ операцион омборга жойлаштирилган товарлар билан айрим операцияларни амалга оширишга тақиқлар ва чекловлар белгиланиши мумкин.
4-боб. Якунловчи қоидалар
12. Ушбу Низом талабларини бажаришда келиб чиқадиган ҳар қандай низо ва келишмовчиликлар қонунчилик ҳужжатларида белгиланган тартибда ҳал қилинади.
13. Ушбу Низом талабларини бузган шахслар қонунчилик ҳужжатларида белгиланган тартибда жавоб берадилар.
Махсус электрон савдо платформалари орқали жисмоний шахсларга товарларни чакана сотиш тартиби тўғрисидаги вақтинчалик низомга ИЛОВА
Ўзбекистон Республикаси Истиқболли лойиҳалар миллий агентлигига __________ ___-сон Махсус электрон савдо платформалари реестрига киритиш учун АРИЗА Махсус электрон савдо платформалари орқали товарларни жисмоний шахсларга чакана сотиш тартиби тўғрисидаги вақтинчалик низомга мувофиқ «________________________________________________________________» ______________ (юридик шахснинг ташкилий-ҳуқуқий шакли ва номи) махсус электрон савдо платформаларини реестрга киритишни сўрайди. Илова: ___ варақда (махсус электрон савдо платформалари реестрига киритиш талабларига мувофиқлигини тасдиқловчи ҳужжатлар) . Ариза берувчи Ф.И.О.
Ўзбекистон Республикасининг Бош вазири А. АРИПОВ
Тошкент ш.,
2026 йил 16 июль,
388 -сон
OʻZBEKISTON RESPUBLIKASI VAZIRLAR MAHKAMASINING
QARORI
VAQTINCHALIK NIZOM
VAQTINCHALIK NIZOM
Bond omborlari faoliyatini tashkil etish va ular orqali tovarlarni sotish tartibi toʻgʻrisida
Oʻzbekiston Respublikasi Prezidentining “Oʻzbekiston Respublikasida elektron tijorat sohasini yanada rivojlantirish uchun qulay shart-sharoitlar yaratishga doir chora-tadbirlar toʻgʻrisida” 2026-yil 13-apreldagi PQ-136-son qarori ijrosini taʼminlash, shuningdek, tovarlarni bond omborlari orqali sotishni yoʻlga qoʻyish maqsadida Vazirlar Mahkamasi qaror qiladi:
1. Quyidagilar:
Bond ombori faoliyatini tashkil etish va amalga oshirish tartibi toʻgʻrisidagi vaqtinchalik nizom 1-ilovaga muvofiq;
Maxsus elektron savdo platformalari orqali jismoniy shaxslarga tovarlarni chakana sotish tartibi toʻgʻrisidagi vaqtinchalik nizom 2-ilovaga muvofiq tasdiqlansin.
2. Belgilansinki:
Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasi bond omborlari reyestrini shakllantirish va yuritish boʻyicha vakolatli organ hisoblanadi;
Oʻzbekiston Respublikasi Istiqbolli loyihalar milliy agentligi Maxsus elektron savdo platformalari reyestrini shakllantirish va yuritish boʻyicha vakolatli organ hisoblanadi.
3. Tovarlar isteʼmolchiga yetkazib berilgunga qadar ularni jismoniy shaxslarga sotish jarayoni toʻgʻrisidagi maʼlumotlar real vaqt rejimida monitoring qilib borilishini taʼminlash maqsadida ushbu qarorning 2-bandida koʻrsatilgan reyestrlarga kiritish uchun ariza berilgan kundan eʼtiboran ikki oy muddatda:
Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasi oʻz axborot tizimlarini — bond omborlari operatorlarining axborot tizimlari bilan;
Oʻzbekiston Respublikasi Soliq qoʻmitasi oʻz axborot tizimlarini — maxsus elektron savdo platformasining axborot tizimlari bilan integratsiya qilinishini taʼminlasin.
4. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari — iqtisodiyot va moliya vaziri J.A. Qoʻchqorov zimmasiga yuklansin.
Vazirlar Mahkamasining 2026-yil 16-iyuldagi 388-son qaroriga 1-ILOVA
Bond ombori faoliyatini tashkil etish va amalga oshirish tartibi toʻgʻrisida
1-bob. Umumiy qoidalar
1. Ushbu Nizom bond ombori faoliyatini tashkil etish, unga qoʻyiladigan talablar hamda bond omboriga tovarlarni joylashtirishda bojxona nazorati va rasmiylashtiruvini tashkil etish tartibini belgilaydi.
2. Bond omboriga joylashtirilgan tovarlarga Oʻzbekiston Respublikasining tashqi iqtisodiy faoliyat sohasidagi qonunchilik hujjatlari va ushbu Nizom asosida belgilangan tartiblar, taqiqlar va cheklovlar qoʻllanadi.
3. Mazkur Nizomda quyidagi asosiy tushunchalardan foydalaniladi:
bond ombori — xorijiy tovarlarni “erkin ombor” bojxona rejimida bojxona nazorati ostida saqlash hamda rezidentlar va norezidentlar tomonidan maxsus elektron savdo platformalari orqali jismoniy shaxslarga notijorat maqsadlarda oʻz ehtiyojlari uchun chakana sotishga moʻljallangan, binolar va (yoki) ochiq maydonlar, shu jumladan, erkin ombor hududini oʻz ichiga olgan maxsus jihozlangan va belgilangan joy;
bond ombori operatori — mazkur Nizom talablariga muvofiq bond omboriga joylashtirilgan tovarlar bojxona nazorati ostida turgan tovar maqomini yoʻqotguniga qadar ularni saqlash boʻyicha xizmatlar koʻrsatuvchi va mazkur tovarlar uchun javobgar boʻlgan Oʻzbekiston Respublikasi rezidenti — yuridik shaxs;
bond omborlari reyestri — Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasi (keyingi oʻrinlarda — Bojxona qoʻmitasi) tomonidan shakllantiriladigan bond omborlari roʻyxati;
ombor boshqaruv tizimi — bond ombori operatorining bond omboriga kelib tushgan, saqlanayotgan, sotilgan, qaytarilgan va ombordan chiqariladigan tovarlar harakatini takrorlanmaydigan shtrix-kod yoki boshqa identifikator orqali hisobga oluvchi va bojxona organlari axborot tizimlari bilan integratsiya qilingan axborot tizimi;
tovar egasi — tovarlarni qabul qilib oluvchi va oʻzi haqidagi maʼlumotlar transport hujjatlarida koʻrsatilgan shaxs.
4. Bond ombori faoliyatini amalga oshirishga erkin ombor faoliyatini litsenziyalash tartibi asosida hamda belgilangan tartibda bond omborlari reyestriga kiritilgan taqdirda ruxsat etiladi.
5. Bond omboriga joylashtirilgan tovarlar bilan quyidagi operatsiyalar bajarilishi mumkin:
maxsus elektron savdo platformalari orqali jismoniy shaxslarga sotiladigan chet el tovarlarini saqlash;
tovarning oʻzgarmas holatda but saqlanishini taʼminlash operatsiyalari;
tovarlarni sotish va tashishga tayyorlash boʻyicha operatsiyalar, shu jumladan, saralash, partiyalarni shakllantirish, qadoqlash, qayta qadoqlash, markirovkalash (aksiz markalaridan tashqari) va shu kabi boshqa operatsiyalar;
oddiy yigʻish operatsiyalari.
Bond omboriga joylashtirilgan tovar bilan jismoniy shaxslarga notijorat maqsadlarda oʻz ehtiyojlari uchun maxsus elektron savdo platformasi orqali chakana savdo operatsiyalarini amalga oshirishga yoʻl qoʻyiladi.
2-bob. Bond ombori faoliyatini tashkil etish tartibi
6. Bond omborlari reyestriga kiritish talablari:
bond ombori joylashgan hududda amaldagi litsenziyaga ega erkin ombor mavjudligi;
maxsus elektron savdo platformasi bilan oʻzaro hamkorlik yoki sheriklik toʻgʻrisida shartnoma mavjudligi;
bojxona organlarining axborot tizimlari bilan integratsiya qilingan, nazorat qilinadigan tovarlar bond omboriga kelib tushgan paytdan boshlab bojxona nazoratidan chiqarilguniga qadar ularning barcha harakat jarayonlarini toʻliq nazorat qila oladigan avtomatlashtirilgan elektron hisob yuritish tizimining mavjudligi;
mulk huquqi, egalik qilish, foydalanish yoki ijara huquqlari asosida umumiy maydoni kamida 15 000 kvadrat metr boʻlgan yaxlit erkin omborga ega boʻlish.
7. Bond ombori faoliyatini tashkil etish uchun yuridik shaxs ushbu Nizomga ilovaga muvofiq Bojxona qoʻmitasiga yozma yoki elektron shakldagi arizani va ushbu Nizomning 6-bandida belgilangan talablar bajarilganini tasdiqlovchi hujjatlarni yuboradi.
8. Bojxona qoʻmitasi ariza kelib tushgan kundan boshlab 10 ish kuni ichida arizani va unga ilova qilingan hujjatlarni koʻrib chiqadi hamda ariza beruvchiga uni bond omborlari reyestriga kiritish yoki kiritishni rad etish toʻgʻrisida javob xatini yozma yoki elektron shaklda yuboradi.
9. Bond ombori ushbu Nizomning 6-bandida belgilangan talablarga javob bermasa va uning operatori ushbu Nizomda belgilangan majburiyatlarni bajarmasa, Bojxona qoʻmitasi bond omborini bond omborlari reyestridan chiqaradi.
Bond ombori bond omborlari reyestridan chiqarilgan sanadan eʼtiboran ularda saqlanayotgan tovarlarga vaqtincha saqlash bojxona rejimida turgan tovarlar sifatida qaraladi hamda tovarlarni saqlash uchun bond omboriga joylashtirishga va ularni sotishga yoʻl qoʻyilmaydi.
Vaqtincha saqlash bojxona rejimida turgan tovarlar Oʻzbekiston Respublikasi Bojxona kodeksi talablari asosida umumbelgilangan tartibda bojxona rasmiylashtiruvidan oʻtkaziladi.
3-bob. Tovarlarni respublika hududiga olib kirish va bond omboriga joylashtirish tartibi
10. Bond omboriga joylashtiriladigan tovarlar istalgan transport turi orqali respublika hududiga olib kirilishi mumkin. Bunda ushbu tovarlar umumbelgilangan tartibda chegara bojxona postidan olib oʻtiladi va bond omboriga yetkaziladi.
11. Transport vositalarining manzilga yetib borgani bond ombori operatori yoki uning vakolatli shaxsi tomonidan Vazirlar Mahkamasining 2021-yil 20-avgustdagi 531-son qarori bilan tasdiqlangan Bojxona nazorati ostidagi tovarlarga nisbatan yuk operatsiyalarini amalga oshirish tartibi toʻgʻrisidagi nizom talablari asosida tasdiqlanadi.
12. Axborot tizimida transport vositalarining bond omboriga yetib kelgani tasdiqlanishi bilan tovarlarning toʻliq saqlanishini taʼminlash boʻyicha javobgarlik bond ombori operatoriga oʻtadi.
13. Bond omboriga yetkazilgan tovarlar boʻyicha tovar egasi tomonidan ular yetkazilgan vaqtdan eʼtiboran 15 kalendar kun mobaynida bojxona organlariga “erkin ombor” bojxona rejimiga joylashtirish uchun bojxona yuk deklaratsiyasi (keyingi oʻrinlarda — BYD) taqdim etiladi.
Bunda BYD quyidagi qoʻshimcha xususiyatlarni inobatga olgan holda toʻldiriladi:
a) 1-grafa. “Deklaratsiya turi”.
Grafaning birinchi boʻlmasida “IM” belgisi koʻrsatiladi.
Grafaning ikkinchi boʻlmasida Bojxona rejimlari tasniflagichiga muvofiq “73” kodi koʻrsatiladi.
Grafaning uchinchi boʻlmasida “BO” belgisi koʻrsatiladi;
b) 31-grafa. “Yuk joylari va tovar tavsifi”.
Grafada har bir tovar boʻyicha uning identifikatsiya kodi koʻrsatiladi;
v) 49-grafa. “Ombor nomi”.
Grafada erkin omborni taʼsis etish uchun berilgan litsenziya raqami va sanasi koʻrsatiladi.
14. Bond omboriga joylashtiriladigan va undan olib chiqiladigan barcha tovarlar uchun taqdim etiladigan deklaratsiyalarda qoʻshimcha ravishda tovarlarni chakana sotishda qoʻllanadigan oʻlchov birlikdagi miqdori (dona, juft, komplekt) koʻrsatilishi shart.
15. Bond omboriga tovar miqdori va harakatini masofadan turib nazorat qilish imkonsiz boʻlgan, chakana sotish uchun qadoqlanmagan, tortiladigan yoki oʻlchanadigan barcha tovarlarni joylashtirish taqiqlanadi.
16. Bond omboriga yetkazilgan tovarlarni deklarant tomonidan koʻzdan kechirishga hamda BYD taqdim etilmaguniga qadar tovarlar bilan yuk operatsiyalarini amalga oshirishga yoʻl qoʻyilmaydi (bond ombori operatori tomonidan ombor boshqaruv tizimida tovarlarni identifikatsiya qilish, har bir tovar birligi boʻyicha takrorlanmaydigan identifikatsiya kodlarini shakllantirish bilan bogʻliq tovarning nomi, miqdori, vazni, qiymati, holati va qadogʻini oʻzgartirmaydigan operatsiyalar bundan mustasno).
17. Taqdim etilgan BYD bojxona organlari tomonidan Xavflarni boshqarish tizimi (keyingi oʻrinlarda — XBT) orqali belgilangan yoʻlaklar asosida rasmiylashtiriladi va tovarlarga nisbatan notarif tartibotlar qoʻllanilmaydi hamda ruxsat etish xususiyatiga ega hujjatlar mavjud ekanligi bojxona organlari tomonidan tekshirilmaydi (fitosanitar nazorati ostidagi tovarlar bundan mustasno).
Tovarlarning texnik jihatdan tartibga solish, sanitariya va veterinariya sohasidagi qonunchilik hujjatlari talablariga muvofiqligini taʼminlash boʻyicha javobgarlik bond ombori operatoriga yuklanadi.
4-bob. Tovarlarni bond omboridan chiqarish tartibi
1-§. Bond omboridan respublika hududiga chiqariladigan tovarlarni rasmiylashtirish tartibi
18. Maxsus elektron savdo platformasi orqali jismoniy shaxslarga notijorat maqsadlarda oʻz ehtiyojlari uchun chakana sotilgan chet el tovarlari bojxona organlariga taqdim etilgan va rasmiylashtirilgan joʻnatmalar deklaratsiyasi asosida bond ombori hududidan chiqariladi.
Bunda joʻnatmalar deklaratsiyasi bojxona organlariga tovar egasi yoki uning nomidan bojxona brokeri tomonidan taqdim etiladi.
Mazkur bandning birinchi xatboshisida nazarda tutilmagan boshqa hollarda tovarlar bond omboridan Oʻzbekiston Respublikasi Bojxona kodeksi talablari asosida umumbelgilangan tartibda bojxona rasmiylashtiruvidan oʻtkazish orqali olib chiqiladi.
19. Qonunchilik hujjatlarida belgilangan bojxona toʻlovlari toʻliq toʻlanib, joʻnatmalar deklaratsiyasi rasmiylashtirilgandan soʻng tovarlarni chiqarishga ruxsat etiladi.
Bunda bojxona toʻlovlari tovar egasi tomonidan taqdim etilgan joʻnatmalar deklaratsiyasi maʼlumotlaridan avtomatik shakllangan umumiy shakldagi bojxona kirim orderi (keyingi oʻrinlarda — BKO) asosida undiriladi.
BKO 1-grafaning uchinchi boʻlmasida “BO” belgisi koʻrsatiladi.
Qonunchilik hujjatlarida belgilangan bojxona toʻlovlarini toʻlash boʻyicha majburiyat maxsus elektron savdo platformasi operatoriga yuklanadi.
20. Tovar boʻyicha taqdim etilgan joʻnatmalar deklaratsiyasi yoki BYD rasmiylashtirilgan kundan eʼtiboran mazkur tovarlar uch kun ichida bond ombori hududidan olib chiqilishi kerak.
21. Joʻnatmalar deklaratsiyasi tovarni chiqarishga ruxsat berilgunga qadar tuzatilishi yoki bekor qilinishi mumkin.
Joʻnatmalar deklaratsiyasi asosida rasmiylashtirilgan va chiqarilgan tovarlar Oʻzbekiston tovari maqomini oladi.
Ushbu tovarlar uchun rasmiylashtirilgan joʻnatmalar deklaratsiyasini bekor qilishga va tovarlarni bond omboriga qayta joylashtirishga yoʻl qoʻyilmaydi hamda undirilgan bojxona toʻlovlari qaytarilmaydi.
2-§. Bond omboridan xorijiy mamlakat hududiga chiqariladigan tovarlarni rasmiylashtirish tartibi
22. Maxsus elektron savdo platformasi orqali xorijiy mamlakat hududidagi jismoniy shaxslarga chakana sotilgan tovarlar bojxona organlariga taqdim etilgan joʻnatmalar deklaratsiyasi asosida rasmiylashtiriladi.
Bunda joʻnatmalar deklaratsiyasi bojxona organlariga tovar egasi yoki uning nomidan bojxona brokeri tomonidan taqdim etilishi mumkin.
23. Joʻnatmalar deklaratsiyasi asosida rasmiylashtirilgan tovarlar bond ombori operatori tomonidan bond ombori hududidagi maxsus joyda saqlanadi va ushbu tovarlar jamlanmasiga rasmiylashtirilgan tranzit deklaratsiyasi orqali chegara bojxona postiga yuboriladi.
24. Joʻnatmalar deklaratsiyasi asosida rasmiylashtirilgan chet el tovarlari chet el tovari maqomini saqlab qoladi.
Ushbu tovarlar uchun rasmiylashtirilgan joʻnatmalar deklaratsiyasini bekor qilishga va tovarlarni bond omboriga qayta joylashtirishga yoʻl qoʻyilmaydi.
Qonunchilik hujjatlarida respublika hududidan olib chiqiladigan tovarlarga bojxona toʻlovlari toʻlanishi nazarda tutilgan holatlarda bojxona toʻlovlari toʻliq toʻlanib, joʻnatmalar deklaratsiyasi rasmiylashtirilgandan soʻng tovarlarni chiqarishga ruxsat etiladi.
25. Tovar boʻyicha taqdim etilgan joʻnatmalar deklaratsiyasi yoki BYD rasmiylashtirilgan kundan eʼtiboran uch kun ichida tovar bond ombori hududidan olib chiqilishi kerak.
5-bob. Ishtirokchilarning huquqlari
26. Bojxona nazorati va rasmiylashtiruvini amalga oshirishda bond ombori operatori va tovar egasi quyidagi huquqlarga ega:
bojxona organlarining bojxona nazorati va rasmiylashtiruvi jarayonidagi noqonuniy xatti-harakati yuzasidan shikoyat qilishga;
tovarlarning bojxona nazorati va rasmiylashtiruvi jarayonlari yuzasidan bojxona organlaridan qonuniy tushuntirishlar olishga;
joʻnatmalar deklaratsiyasini shakllantirish va bojxona organlariga taqdim etish imkoniyati mavjud boʻlgan, bojxona organlari axborot tizimlari bilan integratsiya qilingan elektron dasturlardan foydalanishga hamda ushbu elektron dastur orqali joʻnatmalarning holati va belgilangan xavf darajasi haqida maʼlumot olishga;
tovarlarning bojxona nazorati va rasmiylashtiruvi hamda ushbu jarayonda qoʻllanadigan elektron dasturlar boʻyicha takliflar berishga;
ular tomonidan taqdim etilgan joʻnatmalar deklaratsiyasi rasmiylashtirilgan sanadan boshlab bir oy muddatda yuklab olish hamda qogʻozda yozma shaklini chop etishga.
Bond ombori operatori uchun qonunchilik hujjatlari bilan boshqa huquqlar ham belgilanishi mumkin.
27. Bojxona nazorati va rasmiylashtiruvini amalga oshirishda bojxona organi xodimi quyidagi huquqlarga ega:
taqdim etilgan joʻnatmalar deklaratsiyasida nomuvofiqliklar aniqlanganda, bojxona xizmati organlari, huquqni muhofaza qiluvchi organlar, xorijiy davlatlar yoki xalqaro tashkilotlardan olingan maʼlumotlar hamda tezkor-qidiruv natijalari asosida belgilangan xavfni kamaytirish choralarini oʻzgartirish va qoʻshimcha tadbirlarni amalga oshirish;
aniqlangan xatolik yoki nomuvofiqliklar (tafovutlar) holatlari sabablarini oʻrganish maqsadida taqdim etilayotgan elektron hujjatlarga qoʻshimcha hujjatlarni talab qilish;
agar oʻrganish davomida qonunchilikda nazarda tutilgan jinoyat alomatlari mavjudligi aniqlansa, tergovga qadar tekshiruv harakatlarini olib borish;
tovarlarni qonunchilik hujjatlari asosida koʻzdan kechirish;
vakolatli shaxslardan koʻzdan kechirish uchun tovarlarni, shuningdek, zarur hujjatlarni taqdim etishni talab qilish;
bojxona nazoratidan oʻtkazish maqsadida tovarlar hamda boshqa buyumlardan namuna va nusxalar olish;
tovar egasi, bond ombori operatori va maxsus elektron savdo platformasidan bojxona maqsadlari uchun zarur boʻlgan maʼlumotlarni olish;
bojxona haqidagi qonunchilik hujjatlarining buzilishiga doir materiallarni belgilangan tartibda koʻrib chiqish hamda vakolatli shaxslarni qonunchilik hujjatlariga muvofiq javobgarlikka tortish.
Bojxona organi xodimi qonunchilik hujjatlarida nazarda tutilgan boshqa huquqlarga ham ega boʻlishi mumkin.
6-bob. Ishtirokchilarning majburiyatlari
29. Bojxona nazorati va rasmiylashtiruvi jarayonida quyidagilar bond ombori operatorining majburiyatlari hisoblanadi:
tovarlarni saqlash va sotishda barcha xavfsizlik qoidalariga rioya etish;
bond ombori hududi va bojxona nazorati zonasiga ruxsat etilmagan (ombor xodimlari boʻlmagan, tovarlarga nisbatan vakolatga ega boʻlmagan) shaxslarni kiritmaslik;
bojxona organlari tomonidan tasdiqlangan texnologik sxema asosida tovarlarni bojxona nazoratidan oʻtkazish uchun barcha zarur texnik vositalar bilan jihozlash va bojxona rasmiylashtiruvini amalga oshirish uchun zarur shart-sharoitlarni yaratish;
bond omborida saqlanayotgan tovarlarni bojxona rasmiylashtiruvi yakunlanmasdan yoki bojxona organlarining ruxsatisiz chiqarib yuborishga, tovarlarni boshqasiga almashtirishga yoxud mazkur hududda tovarlar bilan taqiqlangan operatsiyalar amalga oshirilishiga yoʻl qoʻymaslik;
tegishli axborot tizimlari orqali bond omborlarida saqlanayotgan va sotilgan tovarlar boʻyicha real vaqt rejimida shakllanib boruvchi hisobot shaklini bojxona organlariga taqdim etib borish;
bond omboriga joylashtirilgan tovarlar bojxona organining ruxsatisiz berib yuborilgan yoki yoʻqolgan, bojxona toʻlovlari toʻlanishi uchun bond ombori operatori javobgar boʻladigan, bojxona haqidagi qonunchilik hujjatlarida nazarda tutiladigan boshqa holatlarda bojxona toʻlovlarini toʻlash.
Bond ombori operatoriga qonunchilikda belgilangan boshqa majburiyatlar ham yuklanishi mumkin.
30. Bojxona nazorati va rasmiylashtiruvi jarayonida quyidagilar tovar egasining majburiyatlari hisoblanadi:
bojxona organlariga oʻz vaqtida BYD va joʻnatmalar deklaratsiyasi taqdim etilishini taʼminlash;
deklaratsiyalangan tovarlarni belgilangan muddatlarda chiqarib yuborish.
Tovar egasiga qonunchilikda belgilangan boshqa majburiyatlar ham yuklanishi mumkin.
31. Bojxona nazorati va rasmiylashtiruvini amalga oshirishda quyidagilar bojxona organlarining majburiyatlari hisoblanadi:
deklaratsiyalash va rasmiylashtiruv davomida Xavfni boshqarish tizimining topshirigʻidagi bojxona operatsiyalarini bajarish;
xavfni kamaytirish choralarini oʻzgartirish natijasida bojxona koʻrigini oʻtkazish zarurati mavjud boʻlganda, bu toʻgʻrisida tovar egasini xabardor etish;
tovar egasining bojxona nazorati va rasmiylashtiruvi boʻyicha taqdim etgan yozma murojaatlarini koʻrib chiqish;
oʻz xizmat vazifalarini bajarish natijasida oʻziga maʼlum boʻlib qolgan tijorat siri hisoblangan axborotni hamda shaxsga doir konfidensial maʼlumotlarni oshkor etmaslik, qonunda belgilangan hollar bundan mustasno.
Bojxona organiga qonunchilikda belgilangan boshqa majburiyatlar ham yuklanishi mumkin.
7-bob. Yakunlovchi qoidalar
33. Bond omboriga joylashtirilgan tovarlar maxsus elektron savdo platformasi orqali ikki yil muddatda sotilmagan taqdirda, ushbu muddat yakunlangandan soʻng bir oy mobaynida umumbelgilangan tartibda reeksport, yoʻq qilish, davlat foydasiga voz kechish yoki bojxona toʻlovlarini toʻlagan holda erkin muomalaga chiqarish bojxona rejimlaridan biriga joylashtiriladi.
34. Mazkur Nizom talablarini bajarishdan kelib chiqadigan har qanday nizo va kelishmovchiliklar qonunchilik hujjatlarida belgilangan tartibda hal qilinadi.
35. Ushbu Nizom talablarini buzgan shaxslar qonunchilik hujjatlarida belgilangan tartibda javob beradilar.
Bond ombori faoliyatini tashkil etish va amalga oshirish tartibi toʻgʻrisidagi vaqtinchalik nizomga ILOVA
Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasiga __________ ___-son Bond omborlari reyestriga kiritish uchun ARIZA Bond ombori faoliyatini tashkil etish va amalga oshirish tartibi toʻgʻrisidagi vaqtinchalik nizomga muvofiq __________________________________________________________________________ (yuridik shaxsning tashkiliy-huquqiy shakli va nomi) quyidagi manzilda joylashgan: _______________________________________ (ombor manzili) omborni bond omborlari reyestriga kiritishni soʻraydi. Ilova: ____ varaqda (bond omborlari reyestriga kiritish talablariga muvofiqligini tasdiqlovchi hujjatlar) . Ariza beruvchi F.I.O.
Vazirlar Mahkamasining 2026-yil 16-iyuldagi 388-son qaroriga 2-ILOVA
Maxsus elektron savdo platformalari orqali jismoniy shaxslarga tovarlarni chakana sotish tartibi toʻgʻrisida
1-bob. Umumiy qoidalar
1. Ushbu Nizom Oʻzbekiston Respublikasining “ Elektron tijorat toʻgʻrisida ”gi, “ Elektron hujjat aylanishi toʻgʻrisida ”gi qonunlari va boshqa normativ-huquqiy hujjatlar talablariga muvofiq tovarlarni bond omboridan maxsus elektron savdo platformalari orqali jismoniy shaxslarga sotish tartibini belgilaydi.
2. Ushbu Nizomda quyidagi asosiy tushunchalardan foydalaniladi:
bond ombori — xorijiy tovarlarni “erkin ombor” bojxona rejimida bojxona nazorati ostida saqlash hamda rezidentlar va norezidentlar tomonidan maxsus elektron savdo platformalari orqali jismoniy shaxslarga notijorat maqsadlarda oʻz ehtiyojlari uchun chakana sotishga moʻljallangan, binolar va (yoki) ochiq maydonlar, shu jumladan, erkin ombor hududini oʻz ichiga olgan maxsus jihozlangan va belgilangan joy;
buyurtmalarni topshirish punkti — maxsus elektron savdo platformasi orqali sotib olingan tovarlarni topshirish, qabul qilish, yetkazib berish, joʻnatish, saqlash va qaytarish uchun moʻljallangan logistika infratuzilmasi obyekti (Oʻzbekiston Respublikasi hududida joylashgan noturar joy);
maxsus elektron savdo platformasi — bond omboriga joylashtirilgan tovarlarni sotish uchun moʻljallangan hamda qonunchilik hujjatlari bilan belgilangan talablarga mos keladigan elektron savdo platformasi turi;
Maxsus elektron savdo platformalari reyestri — Oʻzbekiston Respublikasi Istiqbolli loyihalar milliy agentligi (keyingi oʻrinlarda — Agentlik) tomonidan shakllantiriladigan maxsus elektron savdo platformalari roʻyxati;
operatsion ombor — maxsus elektron savdo platformasi operatorining xaridor buyurtma bergan paytdan boshlab, uni xaridorga joʻnatishgacha boʻlgan davrda tovarni saqlash, qadoqlash, markirovkalash, saralash va joʻnatish (qabul qilish) uchun moʻljallangan noturar binosi.
2-bob. Tovarlarni maxsus elektron savdo platformalari orqali jismoniy shaxslarga bond ombori orqali chakana sotishni tashkil etish tartibi
3. Maxsus elektron savdo platformalari reyestriga kiritish talablari:
a) Oʻzbekiston Respublikasining yuridik shaxsi shaklida davlat roʻyxatidan oʻtkazish;
b) Oʻzbekiston Respublikasining shaxsga doir maʼlumotlar toʻgʻrisidagi qonunchilik talablariga rioya etilishini taʼminlash;
v) quyidagilardan iborat infratuzilmaning mavjudligi:
onlayn nazorat-kassa mashinasi yoki virtual kassa;
respublika hududi boʻyicha yetkazib berish xizmatini koʻrsatuvchi tashkilot (tashkilotlar) bilan shartnomaning mavjudligi yoki butun mamlakat boʻylab buyurtmalarni yetkazib berishni taʼminlaydigan, yuk tashish uchun moʻljallangan oʻzining (mulk, ijara yoki lizing huquqi asosidagi) transport vositalarining mavjudligi;
mulk huquqi, egalik qilish, foydalanish yoki ijara huquqlari asosida bond omboriga ega boʻlishi yoxud bond omborlari reyestriga kiritilgan operatorlar bilan ombor xizmatlarini koʻrsatish boʻyicha shartnomaga ega boʻlish;
respublika hududi boʻyicha shahar va tumanlarda buyurtmalarni topshirish punktlari, shuningdek, operatsion omborlar (shu jumladan, saralash markazlari (agar mavjud boʻlsa) va boshqa logistika infratuzilmasi mavjudligi.
4. Maxsus elektron savdo platformalari reyestriga kiritish uchun yuridik shaxs ushbu Nizomga ilovaga muvofiq Agentlikka yozma yoki elektron shakldagi arizani va ushbu Nizomning 3-bandida belgilangan talablar bajarilganini tasdiqlovchi hujjatlarni yuboradi.
5. Agentlik ariza kelib tushgan kundan boshlab 10 ish kuni ichida arizani va unga ilova qilingan hujjatlarni koʻrib chiqadi, uni bond omborlari reyestriga kiritish yoki kiritishni rad etish toʻgʻrisida javob xatini ariza beruvchiga yozma yoki elektron shaklda yuboradi.
6. Maxsus elektron savdo platformasi Oʻzbekiston Respublikasi hududida tovarlarni sotish boʻyicha uchinchi shaxslarning (maxsus elektron savdo platformasida joylashtiriladigan tovarlar sotuvchilarining) agenti (subagenti, komissioneri) sifatida, shuningdek, oʻzining (ham oʻzi ishlab chiqargan, ham qayta sotish uchun xarid qilingan) tovarlarining sotuvchisi sifatida ham ishtirok etishi mumkin.
7. Maxsus elektron savdo platformasi ushbu Nizomning 3-bandida belgilangan talablarga javob bermasa, Agentlik maxsus elektron savdo platformasini Maxsus elektron savdo platformalari reyestridan chiqaradi.
8. Sotuvchi maxsus elektron savdo platformasi operatori tomonidan belgilangan talablarga muvofiq maxsus elektron savdo platformasida roʻyxatdan oʻtkaziladi.
9. Jismoniy shaxslar tomonidan tovarlar maxsus elektron savdo platformasi orqali xarid qilinib, Oʻzbekiston Respublikasining isteʼmolchilar huquqlarini himoya qilish toʻgʻrisidagi qonunchilik hujjatlarida belgilangan tartibda qaytarilgan taqdirda:
tovarlar bond omboriga qaytarilmaydi va kelgusida mahalliy bozorda sotish maqsadida maxsus elektron savdo platformasining operatsion omboriga kirim qilinadi;
qaytarilgan tovar boʻyicha Oʻzbekiston Respublikasi Davlat budjetiga toʻlangan bojxona toʻlovlari qaytarilmaydi;
ushbu tovarlar bond ombori operatori, maxsus elektron savdo platformasi operatori va sotuvchi oʻrtasida tuzilgan shartnomaga (kelishuvga) asosan tasarruf etiladi.
3-bob. Maxsus elektron savdo platformalari operatorlarning majburiyatlari
10. Maxsus elektron savdo platformasi operatorining majburiyatlari quyidagilardan iborat:
sotilgan tovarlar uchun jismoniy shaxslar bilan shartnoma asosida (shu jumladan, ofertaga qoʻshilish orqali) hisob-kitoblarni amalga oshirish;
jismoniy shaxslarga sotiladigan tovarlar toʻgʻrisidagi zarur maʼlumotlarni kuzatib borish uchun Oʻzbekiston Respublikasi Soliq qoʻmitasining axborot tizimlari bilan integratsiya qilish.
11. Operatsion omborga joylashtirilgan tovarlar bilan quyidagi operatsiyalar amalga oshiriladi:
tovarni saqlash operatsiyalari;
tovarlarni sotish va tashishga tayyorlash operatsiyalari, jumladan, saralash, partiyalarni shakllantirish, qadoqlash, qayta qadoqlash, markirovkalash (aksiz markalaridan tashqari) va boshqa shunga oʻxshash operatsiyalar;
oddiy yigʻish operatsiyalari.
Qonunchilik hujjatlariga muvofiq operatsion omborga joylashtirilgan tovarlar bilan ayrim operatsiyalarni amalga oshirishga taqiqlar va cheklovlar belgilanishi mumkin.
4-bob. Yakunlovchi qoidalar
12. Ushbu Nizom talablarini bajarishda kelib chiqadigan har qanday nizo va kelishmovchiliklar qonunchilik hujjatlarida belgilangan tartibda hal qilinadi.
13. Ushbu Nizom talablarini buzgan shaxslar qonunchilik hujjatlarida belgilangan tartibda javob beradilar.
Maxsus elektron savdo platformalari orqali jismoniy shaxslarga tovarlarni chakana sotish tartibi toʻgʻrisidagi vaqtinchalik nizomga ILOVA
Oʻzbekiston Respublikasi Istiqbolli loyihalar milliy agentligiga __________ ___-son Maxsus elektron savdo platformalari reyestriga kiritish uchun ARIZA Maxsus elektron savdo platformalari orqali tovarlarni jismoniy shaxslarga chakana sotish tartibi toʻgʻrisidagi vaqtinchalik nizomga muvofiq “________________________________________________________________” ______________ (yuridik shaxsning tashkiliy-huquqiy shakli va nomi) maxsus elektron savdo platformalarini reyestrga kiritishni soʻraydi. Ilova: ___ varaqda (maxsus elektron savdo platformalari reyestriga kiritish talablariga muvofiqligini tasdiqlovchi hujjatlar) . Ariza beruvchi F.I.O.
Oʻzbekiston Respublikasining Bosh vaziri A. ARIPOV
Toshkent sh.,
2026-yil 16-iyul,
388 -son