UzbekAI

Ўзбекистон Республикаси Вазирлар Маҳкамасининг

қарори

НИЗОМ

Таълим ва спорт йўналишлари бўйича ўтказиладиган фан олимпиадаси ва спорт мусобақаси ғолибларини «Ўзбекистон бўйлаб саёҳат» йўлланмасини тақдим этиш орқали рағбатлантириш тартиби тўғрисидаги низомни тасдиқлаш ҳақида

Ўзбекистон Республикаси Президентининг «2025-2026 йилларда сайёҳлар оқимини кескин кўпайтириш ва туристик хизматлар кўламини жадал кенгайтириш орқали туризмнинг иқтисодиётдаги ўрни ва аҳамиятини ошириш чора-тадбирлари тўғрисида» 2025 йил 15 майдаги ПФ-87-сон Фармони ижросини таъминлаш мақсадида Вазирлар Маҳкамаси қарор қилади:

1. Ўзбекистон Республикаси Президентининг 2025 йил 15 майдаги ПФ-87-сон Фармонига мувофиқ республика, вилоят, туман (шаҳар) даражасида таълим ва спорт йўналишларида ўтказиладиган фан олимпиадаси ва спорт мусобақаси ғолибларига «Ўзбекистон бўйлаб саёҳат» йўлланмасини совға қилиш тартибини белгилаш назарда тутилгани маълумот учун қабул қилинсин.

2. Қуйидагиларни назарда тутувчи Таълим ва спорт йўналишлари бўйича ўтказиладиган фан олимпиадаси ва спорт мусобақаси ғолибларини «Ўзбекистон бўйлаб саёҳат» йўлланмасини тақдим этиш орқали рағбатлантириш тартиби тўғрисидаги низом иловага мувофиқ тасдиқлансин:

«Ўзбекистон бўйлаб саёҳат» йўлланмасини тақдим қилиш тартиби;

«Ўзбекистон бўйлаб саёҳат» йўлланмаси бўйича саёҳатлар ташкил этиш тартиби;

саёҳат ташкилотчиларининг вазифалари;

саёҳатчиларнинг ҳуқуқлари ва мажбуриятлари.

3. Мактабгача ва мактаб таълими вазирлиги, Олий таълим, фан ва инновациялар вазирлиги, Спорт вазирлиги манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.

4. Ушбу қарорнинг бажарилишини назорат қилиш Ўзбекистон Республикаси мактабгача ва мактаб таълими вазири Э.Г. Каримова, олий таълим, фан ва инновациялар вазири К.А. Шарипов ҳамда спорт вазири А.И. Икрамов зиммасига юклансин.

Вазирлар Маҳкамасининг 2026 йил 24 июлдаги 406-сон қарорига ИЛОВА

1-боб. Умумий қоидалар

1. Ушбу Низом республика ва вилоят даражасида таълим ва спорт йўналишлари бўйича ўтказиладиган фан олимпиадаси ва спорт мусобақаси ғолибларини «Ўзбекистон бўйлаб саёҳат» йўлланмасини тақдим этиш орқали рағбатлантириш тартибини белгилайди.

2. Ушбу Низомда қуйидаги асосий тушунчалардан фойдаланилади:

саёҳат — ушбу Низом доирасида фан олимпиадаси ва спорт мусобақасида ғолиб бўлган ёшларнинг ҳудудлардаги маданий мерос объектлари, музейлар, миллий боғлар ва дам олиш масканларига ташрифини ўз ичига олган ҳолда ташкил этиладиган маданий тадбир;

саёҳатчилар — ушбу Низомга мувофиқ «Ўзбекистон бўйлаб саёҳат» йўлланмаси тақдим этилган ўқувчи-ёшлар;

туроператор хизматлари — туристик маҳсулотни тарғиб қилиш ва реализация қилиш бўйича хизматлар (ташиш, жойлаштириш, овқатланиш, ахборотга оид хизматлар кўрсатиш бўйича хизматлар мажмуи (шу жумладан, гид (экскурсия етакчиси), гид-таржимон ва (ёки) йўриқчи-йўл бошловчининг хизматлари) ва шартнома бўйича кўрсатиладиган бошқа туристик хизматлар);

фан олимпиадаси ва спорт мусобақаси ташкилотчиси (кейинги ўринларда — ташкилотчи) — таълим ва спорт йўналишларида фан олимпиадаси ёки спорт мусобақаси ўтказаётган ва бундай тадбирни тайёрлаш ҳамда ўтказишни ташкилий, молиявий ва моддий жиҳатдан таъминлашни амалга ошираётган юридик шахс;

ғолиб — фан олимпиадаси ва (ёки) спорт мусобақасида биринчи ўринни қўлга киритган ўқувчи-ёшлар.

3. «Ўзбекистон бўйлаб саёҳат» йўлланмаси (кейинги ўринларда — йўлланма) республика ва вилоят даражасида:

давлат ва нодавлат умумий ўрта таълим ташкилотлари, академик лицей ва касбий таълим ташкилотлари ўқувчилари ўртасида ўтказиладиган умумтаълим фанлари бўйича олимпиадалар ва (ёки) спорт мусобақалари ғолибларига;

олий таълим ташкилотлари талабалари ўртасида ўтказиладиган республика фан олимпиадалари ва спорт мусобақалари ғолибларига;

ўсмирлар ва ёшлар ўртасида ўтказиладиган «Янги Ўзбекистон Олимпия чўққилари» спорт мусобақаларида ғолиб бўлган спортчиларга тақдим этилади.

2-боб. Йўлланмани тақдим этиш тартиби

4. Таълим ва спорт йўналишлари бўйича ўтказиладиган фан олимпиадаси ва спорт мусобақаси ғолибларига қуйидаги йўлланмалар тақдим этилади:

республика даражасида — республика босқичида ғолиб бўлган ўқувчи-ёшларга Ўзбекистон Республикаси ҳудудидаги туристик объектларга уч кунлик саёҳат;

вилоят даражасида — ҳудудий босқичда ғолиб бўлган ўқувчи-ёшларга бошқа вилоят ҳудудидаги туристик объектларга икки кунлик саёҳат.

5. Йўлланма ташкилотчи томонидан фан олимпиадаси ёки спорт мусобақаси якуни бўйича ғолибларни тақдирлаш жараёнида тақдим этилади.

6. Ўзбекистон Республикаси Мактабгача ва мактаб таълими вазирлиги, Олий таълим, фан ва инновациялар вазирлиги ҳамда Спорт вазирлиги ҳар йили апрель ойининг 15-санасига қадар ўз йўналишлари бўйича фан олимпиадаси ва спорт мусобақаси ғолибларининг саёҳат тадбирлари режа-жадвалини тасдиқлайди.

7. Тасдиқланган саёҳат тадбирлари режа-жадвалига мувофиқ ташкилотчилар томонидан ҳар йили июнь ва июль ойларида йўлланмага эга бўлган шахслар иштирокида туроператор хизматларидан фойдаланган ҳолда саёҳатлар ташкил этилади.

8. Туроператор ва ташкилотчи ўртасида саёҳат тадбирларини ташкил этиш ва хизмат кўрсатиш бўйича (йўлланмалар даражаси кесимида) белгиланган тартибда шартнома тузилади.

9. Туроператорлар томонидан йўлланмаларнинг даражасига қараб ташкилотчиларга ўзаро келишувга кўра чегирмалар тақдим этилиши мумкин.

10. Ташкилотчи томонидан саёҳат тадбирлари ташкил этилишидан ўн кун олдин йўлланмага эга бўлган шахсларга белгиланган тартибда саёҳат тадбирлари ташкил этиладиган кун ва жой тўғрисида хабардор қилинади.

11. Ташкилотчилар томонидан ҳар йили саёҳат харажатларига транспорт хизмати, яшаш ва овқатлантириш, экскурсиялар (гид хизмати ва туризм объектларига кириш чиптаси) ва саёҳат суғуртаси билан боғлиқ харажатлар киритилади.

Саёҳат харажатларини қоплаш ташкилотчиларнинг маблағлари ҳамда жисмоний ва юридик шахсларнинг ҳомийлик хайриялари ҳисобидан амалга оширилади.

12. Туроператор билан тузилган шартномага мувофиқ ташкилотчилар томонидан саёҳатчиларнинг хавфсизлиги ва яшаш манзилларига етиб бориши таъминлангани назорат қилиб борилади.

3-боб. Ташкилотчиларнинг вазифалари

13. Ташкилотчилар:

саёҳатчиларга саёҳатни ташкил этади, уларнинг ҳуқуқлари ва мажбуриятлари тўғрисида тўлиқ маълумот беради;

саёҳатчиларга сифатли туроператорлик хизматлари кўрсатилишини таъминлайди;

саёҳат тадбирларини маданий мерос объектлари, музейлар, миллий боғлар, дам олиш масканларига ташрифни ўз ичига олган тарзда ташкил этади;

саёҳатчиларнинг хавфсизлигини таъминлайди ва туроператорлар томонидан саёҳатчиларнинг ўз манзилларига етказилишини таъминлайди;

саёҳатчилар томонидан етказилган ҳар қандай кўринишдаги зарарни қоплашни талаб қилади;

туризм ресурсларини сақлаш чораларини кўради.

4-боб. Саёҳатчиларнинг ҳуқуқлари ва мажбуриятлари

14. Саёҳатчилар қуйидаги ҳуқуқларга эга:

шартномада кўрсатилган хизматларни олиш;

саёҳат билан боғлиқ тўлиқ ва ишончли маълумотларни, шу жумладан, маданий мерос объектлари, муҳофаза қилинадиган табиий ҳудудлар ва туризм объектлари, атроф-муҳит ҳолати тўғрисидаги маълумотларни олиш;

шахсий хавфсизлиги, ўз ҳуқуқлари ва қонуний манфаатлари ҳимоя қилинишини, шунингдек, ўз мол-мулкининг бут сақланиши таъминланишини талаб қилиш;

шошилинч тиббий ёрдам олиш.

15. Саёҳатчилар:

саёҳат тадбирларида иштирок этиш учун ўз соғлиғи ҳолати тўғрисидаги маълумотларни туроператорнинг талабига кўра тақдим этиши;

саёҳат тадбирлари давомида атроф-муҳитга, муҳофаза этиладиган табиий ҳудудлар ва маданий мерос объектларига зарар етказмаслиги;

шахсий хавфсизлик қоидаларига риоя этиши шарт.

5-боб. Якунловчи қоидалар

16. Ушбу Низомни қўллашда юзага келадиган низолар қонунчилик ҳужжатларида белгиланган тартибда ҳал этилади.

17. Ушбу Низом талабларининг бузилишида айбдор бўлган шахслар қонунчилик ҳужжатларида белгиланган тартибда жавоб беради.

Ўзбекистон Республикасининг Бош вазири А. АРИПОВ

Тошкент ш.,

2026 йил 24 июль,

406 -сон

(Қонунчилик маълумотлари миллий базаси, 24.07.2026 й., 09/26/406/0784-сон)

lex.uz

Oʻzbekiston Respublikasi Vazirlar Mahkamasining

qarori

NIZOM

Taʼlim va sport yoʻnalishlari boʻyicha oʻtkaziladigan fan olimpiadasi va sport musobaqasi gʻoliblarini “Oʻzbekiston boʻylab sayohat” yoʻllanmasini taqdim etish orqali ragʻbatlantirish tartibi toʻgʻrisidagi nizomni tasdiqlash haqida

Oʻzbekiston Respublikasi Prezidentining “2025-2026-yillarda sayyohlar oqimini keskin koʻpaytirish va turistik xizmatlar koʻlamini jadal kengaytirish orqali turizmning iqtisodiyotdagi oʻrni va ahamiyatini oshirish chora-tadbirlari toʻgʻrisida” 2025-yil 15-maydagi PF-87-son Farmoni ijrosini taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining 2025-yil 15-maydagi PF-87-son Farmoniga muvofiq respublika, viloyat, tuman (shahar) darajasida taʼlim va sport yoʻnalishlarida oʻtkaziladigan fan olimpiadasi va sport musobaqasi gʻoliblariga “Oʻzbekiston boʻylab sayohat” yoʻllanmasini sovgʻa qilish tartibini belgilash nazarda tutilgani maʼlumot uchun qabul qilinsin.

2. Quyidagilarni nazarda tutuvchi Taʼlim va sport yoʻnalishlari boʻyicha oʻtkaziladigan fan olimpiadasi va sport musobaqasi gʻoliblarini “Oʻzbekiston boʻylab sayohat” yoʻllanmasini taqdim etish orqali ragʻbatlantirish tartibi toʻgʻrisidagi nizom ilovaga muvofiq tasdiqlansin:

“Oʻzbekiston boʻylab sayohat” yoʻllanmasini taqdim qilish tartibi;

“Oʻzbekiston boʻylab sayohat” yoʻllanmasi boʻyicha sayohatlar tashkil etish tartibi;

sayohat tashkilotchilarining vazifalari;

sayohatchilarning huquqlari va majburiyatlari.

3. Maktabgacha va maktab taʼlimi vazirligi, Oliy taʼlim, fan va innovatsiyalar vazirligi, Sport vazirligi manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

4. Ushbu qarorning bajarilishini nazorat qilish Oʻzbekiston Respublikasi maktabgacha va maktab taʼlimi vaziri E.G. Karimova, oliy taʼlim, fan va innovatsiyalar vaziri K.A. Sharipov hamda sport vaziri A.I. Ikramov zimmasiga yuklansin.

Vazirlar Mahkamasining 2026-yil 24-iyuldagi 406-son qaroriga ILOVA

1-bob. Umumiy qoidalar

1. Ushbu Nizom respublika va viloyat darajasida taʼlim va sport yoʻnalishlari boʻyicha oʻtkaziladigan fan olimpiadasi va sport musobaqasi gʻoliblarini “Oʻzbekiston boʻylab sayohat” yoʻllanmasini taqdim etish orqali ragʻbatlantirish tartibini belgilaydi.

2. Ushbu Nizomda quyidagi asosiy tushunchalardan foydalaniladi:

sayohat — ushbu Nizom doirasida fan olimpiadasi va sport musobaqasida gʻolib boʻlgan yoshlarning hududlardagi madaniy meros obyektlari, muzeylar, milliy bogʻlar va dam olish maskanlariga tashrifini oʻz ichiga olgan holda tashkil etiladigan madaniy tadbir;

sayohatchilar — ushbu Nizomga muvofiq “Oʻzbekiston boʻylab sayohat” yoʻllanmasi taqdim etilgan oʻquvchi-yoshlar;

turoperator xizmatlari — turistik mahsulotni targʻib qilish va realizatsiya qilish boʻyicha xizmatlar (tashish, joylashtirish, ovqatlanish, axborotga oid xizmatlar koʻrsatish boʻyicha xizmatlar majmui (shu jumladan, gid (ekskursiya yetakchisi), gid-tarjimon va (yoki) yoʻriqchi-yoʻl boshlovchining xizmatlari) va shartnoma boʻyicha koʻrsatiladigan boshqa turistik xizmatlar);

fan olimpiadasi va sport musobaqasi tashkilotchisi (keyingi oʻrinlarda — tashkilotchi) — taʼlim va sport yoʻnalishlarida fan olimpiadasi yoki sport musobaqasi oʻtkazayotgan va bunday tadbirni tayyorlash hamda oʻtkazishni tashkiliy, moliyaviy va moddiy jihatdan taʼminlashni amalga oshirayotgan yuridik shaxs;

gʻolib — fan olimpiadasi va (yoki) sport musobaqasida birinchi oʻrinni qoʻlga kiritgan oʻquvchi-yoshlar.

3. “Oʻzbekiston boʻylab sayohat” yoʻllanmasi (keyingi oʻrinlarda — yoʻllanma) respublika va viloyat darajasida:

davlat va nodavlat umumiy oʻrta taʼlim tashkilotlari, akademik litsey va kasbiy taʼlim tashkilotlari oʻquvchilari oʻrtasida oʻtkaziladigan umumtaʼlim fanlari boʻyicha olimpiadalar va (yoki) sport musobaqalari gʻoliblariga;

oliy taʼlim tashkilotlari talabalari oʻrtasida oʻtkaziladigan respublika fan olimpiadalari va sport musobaqalari gʻoliblariga;

oʻsmirlar va yoshlar oʻrtasida oʻtkaziladigan “Yangi Oʻzbekiston Olimpiya choʻqqilari” sport musobaqalarida gʻolib boʻlgan sportchilarga taqdim etiladi.

2-bob. Yoʻllanmani taqdim etish tartibi

4. Taʼlim va sport yoʻnalishlari boʻyicha oʻtkaziladigan fan olimpiadasi va sport musobaqasi gʻoliblariga quyidagi yoʻllanmalar taqdim etiladi:

respublika darajasida — respublika bosqichida gʻolib boʻlgan oʻquvchi-yoshlarga Oʻzbekiston Respublikasi hududidagi turistik obyektlarga uch kunlik sayohat;

viloyat darajasida — hududiy bosqichda gʻolib boʻlgan oʻquvchi-yoshlarga boshqa viloyat hududidagi turistik obyektlarga ikki kunlik sayohat.

5. Yoʻllanma tashkilotchi tomonidan fan olimpiadasi yoki sport musobaqasi yakuni boʻyicha gʻoliblarni taqdirlash jarayonida taqdim etiladi.

6. Oʻzbekiston Respublikasi Maktabgacha va maktab taʼlimi vazirligi, Oliy taʼlim, fan va innovatsiyalar vazirligi hamda Sport vazirligi har yili aprel oyining 15-sanasiga qadar oʻz yoʻnalishlari boʻyicha fan olimpiadasi va sport musobaqasi gʻoliblarining sayohat tadbirlari reja-jadvalini tasdiqlaydi.

7. Tasdiqlangan sayohat tadbirlari reja-jadvaliga muvofiq tashkilotchilar tomonidan har yili iyun va iyul oylarida yoʻllanmaga ega boʻlgan shaxslar ishtirokida turoperator xizmatlaridan foydalangan holda sayohatlar tashkil etiladi.

8. Turoperator va tashkilotchi oʻrtasida sayohat tadbirlarini tashkil etish va xizmat koʻrsatish boʻyicha (yoʻllanmalar darajasi kesimida) belgilangan tartibda shartnoma tuziladi.

9. Turoperatorlar tomonidan yoʻllanmalarning darajasiga qarab tashkilotchilarga oʻzaro kelishuvga koʻra chegirmalar taqdim etilishi mumkin.

10. Tashkilotchi tomonidan sayohat tadbirlari tashkil etilishidan oʻn kun oldin yoʻllanmaga ega boʻlgan shaxslarga belgilangan tartibda sayohat tadbirlari tashkil etiladigan kun va joy toʻgʻrisida xabardor qilinadi.

11. Tashkilotchilar tomonidan har yili sayohat xarajatlariga transport xizmati, yashash va ovqatlantirish, ekskursiyalar (gid xizmati va turizm obyektlariga kirish chiptasi) va sayohat sugʻurtasi bilan bogʻliq xarajatlar kiritiladi.

Sayohat xarajatlarini qoplash tashkilotchilarning mablagʻlari hamda jismoniy va yuridik shaxslarning homiylik xayriyalari hisobidan amalga oshiriladi.

12. Turoperator bilan tuzilgan shartnomaga muvofiq tashkilotchilar tomonidan sayohatchilarning xavfsizligi va yashash manzillariga yetib borishi taʼminlangani nazorat qilib boriladi.

3-bob. Tashkilotchilarning vazifalari

13. Tashkilotchilar:

sayohatchilarga sayohatni tashkil etadi, ularning huquqlari va majburiyatlari toʻgʻrisida toʻliq maʼlumot beradi;

sayohatchilarga sifatli turoperatorlik xizmatlari koʻrsatilishini taʼminlaydi;

sayohat tadbirlarini madaniy meros obyektlari, muzeylar, milliy bogʻlar, dam olish maskanlariga tashrifni oʻz ichiga olgan tarzda tashkil etadi;

sayohatchilarning xavfsizligini taʼminlaydi va turoperatorlar tomonidan sayohatchilarning oʻz manzillariga yetkazilishini taʼminlaydi;

sayohatchilar tomonidan yetkazilgan har qanday koʻrinishdagi zararni qoplashni talab qiladi;

turizm resurslarini saqlash choralarini koʻradi.

4-bob. Sayohatchilarning huquqlari va majburiyatlari

14. Sayohatchilar quyidagi huquqlarga ega:

shartnomada koʻrsatilgan xizmatlarni olish;

sayohat bilan bogʻliq toʻliq va ishonchli maʼlumotlarni, shu jumladan, madaniy meros obyektlari, muhofaza qilinadigan tabiiy hududlar va turizm obyektlari, atrof-muhit holati toʻgʻrisidagi maʼlumotlarni olish;

shaxsiy xavfsizligi, oʻz huquqlari va qonuniy manfaatlari himoya qilinishini, shuningdek, oʻz mol-mulkining but saqlanishi taʼminlanishini talab qilish;

shoshilinch tibbiy yordam olish.

15. Sayohatchilar:

sayohat tadbirlarida ishtirok etish uchun oʻz sogʻligʻi holati toʻgʻrisidagi maʼlumotlarni turoperatorning talabiga koʻra taqdim etishi;

sayohat tadbirlari davomida atrof-muhitga, muhofaza etiladigan tabiiy hududlar va madaniy meros obyektlariga zarar yetkazmasligi;

shaxsiy xavfsizlik qoidalariga rioya etishi shart.

5-bob. Yakunlovchi qoidalar

16. Ushbu Nizomni qoʻllashda yuzaga keladigan nizolar qonunchilik hujjatlarida belgilangan tartibda hal etiladi.

17. Ushbu Nizom talablarining buzilishida aybdor boʻlgan shaxslar qonunchilik hujjatlarida belgilangan tartibda javob beradi.

Oʻzbekiston Respublikasining Bosh vaziri A. ARIPOV

Toshkent sh.,

2026-yil 24-iyul,

406 -son

(Qonunchilik maʼlumotlari milliy bazasi, 24.07.2026-y., 09/26/406/0784-son)

lex.uz