📅 2026-yil 30-iyun · Vazirlik va idoralar hujjatlari · Qishloq xoʻjaligi vaziri
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2026 йил 30 июнь · Вазирлик ва идоралар ҳужжатлари · Қишлоқ хўжалиги вазири
Расмий матн. Расмий ҳужжат. Таҳририй изоҳлар киритилмаган.
📅 30 июня 2026 г. · Документы министерств и ведомств · Министр сельского хозяйства
Официальный текст. Официальный документ. Редакционные примечания не включены.
📅 30 June 2026 · Ministry and agency documents · Qishloq xoʻjaligi vaziri
Official text. Official document. Editorial notes are not included.
ЎЗБЕКИСТОН РЕСПУБЛИКАСИ ҚИШЛОҚ ХЎЖАЛИГИ ВАЗИРИНИНГ
БУЙРУҒИ
ВАҚТИНЧАЛИК НИЗОМ
Қишлоқ хўжалиги корхоналари томонидан биржа савдолари орқали харид қилинган дизель ёқилғиси қийматининг бир қисмини қоплаш учун субсидия ажратиш тартиби тўғрисидаги вақтинчалик низомни тасдиқлаш ҳақида
Ўзбекистон Республикаси Президентининг 2026 йил 8 майдаги ПФ-82-сон «Пахта ва буғдой етиштирувчиларни молиявий қўллаб-қувватлашнинг қўшимча чора-тадбирлари тўғрисида»ги Фармонига мувофиқ буюраман:
1. Қишлоқ хўжалиги корхоналари томонидан биржа савдолари орқали харид қилинган дизель ёқилғиси қийматининг бир қисмини қоплаш учун субсидия ажратиш тартиби тўғрисидаги вақтинчалик низом иловага мувофиқ тасдиқлансин.
2. Мазкур буйруқ Ўзбекистон Республикаси Бош прокуратураси, Иқтисодиёт ва молия вазирлиги, Ўзбекистон Республикаси Президенти ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил ҳамда Савдо-саноат палатаси билан келишилган.
3. Мазкур буйруқ расмий эълон қилинган кундан эътиборан кучга киради.
4. Мазкур буйруқ 2027 йил 1 январга қадар амал қилади.
Келишилди:
Ўзбекистон Республикаси қишлоқ хўжалиги вазирининг 2026 йил 30 июндаги 51-сон буйруғига ИЛОВА
Қишлоқ хўжалиги корхоналари томонидан биржа савдолари орқали харид қилинган дизель ёқилғиси қийматининг бир қисмини қоплаш учун субсидия ажратиш тартиби тўғрисидаги
Мазкур Низом қишлоқ хўжалиги корхоналари (бундан буён матнда истеъмолчи деб юритилади) томонидан биржа савдолари орқали харид қилинган дизель ёқилғиси қийматининг бир қисмини қоплаш учун субсидия ажратишнинг вақтинчалик тартибини белгилайди.
1-боб. Умумий қоидалар
1. Мазкур Низомда қуйидаги асосий тушунчалардан фойдаланилади:
Агропортал — Ўзбекистон Республикаси Қишлоқ хўжалиги вазирлигининг «Рақамли қишлоқ хўжалиги» ягона интеграцион платформаси ;
агротехнологик харита — 2022 — 2026 йиллар учун ишлаб чиқилган ҳамда мавсум давомида барча қилинадиган ишлар ва тахминий харажатларни (ойлар кесимида ) акс эттирувчи ҳужжат;
биржа — «Ўзбекистон республика товар-хомашё биржаси » АЖ;
субсидия — қишлоқ хўжалиги маҳсулотларини етиштириш учун мазкур Низомда белгиланган муддатларда биржа савдолари орқали харид қилинган ва Ўзбекистон Республикаси Солиқ қўмитасининг маълумотлар базасида рўйхатга олинган электрон ҳисобварақ-фактурага асосан дизель ёқилғиси қийматининг бир қисмини қоплаш учун Ўзбекистон Республикаси Давлат бюджетидан бир марталик ажратиладиган маблағлар;
истеъмолчи — пахта ва буғдой (бундан буён матнда қишлоқ хўжалиги экинлари деб юритилади) етиштиришда биржа орқали дизель ёқилғисини харид қилган қишлоқ хўжалиги маҳсулотларини етиштирувчи юридик шахс;
2. Субсидиянинг ҳисоби Ўзбекистон Республикаси Қишлоқ хўжалиги вазирлиги ҳузуридаги Аграр соҳада тўловлар агентлигининг (бундан буён матнда Агентлик деб юритилади) Ўзбекистон Республикаси Иқтисодиёт ва молия вазирлиги ҳузуридаги Ғазначилик хизмати қўмитасида очилган махсус шахсий ғазна ҳисобварағида юритилади.
3. Субсидия агротехнологик харитада назарда тутилган пахта ва буғдой етиштириш ҳамда ҳосилни йиғиб-териб олишга оид агротехник тадбирларни амалга ошириш учун истеъмолчи томонидан биржа савдолари орқали харид қилинган дизель ёқилғисининг ҳар бир тоннаси учун қуйидаги миқдорларда проактив шаклда ажратилади:
2026 йил 1 апрелдан 1 июлга қадар — унинг қийматининг 13 миллион сўмдан ошган қисми учун, бироқ 2 миллион сўмдан кўп бўлмаган миқдорда;
2026 йил 1 июлдан 1 декабрга қадар — унинг қийматининг 15 миллион сўмдан ошган қисми учун, бироқ 2 миллион сўмдан кўп бўлмаган миқдорда.
Бунда истеъмолчи субсидияни олиш учун ўзига тегишли экин ер майдонларини контурлар ҳамда қишлоқ хўжалиги маҳсулотлари турлари кесимида белгиланган тартибда Агропорталга киритган бўлиши лозим.
2-боб. Истеъмолчилар рўйхатини шакллантириш ва субсидияни ажратиш
4. Биржа истеъмолчилар томонидан 2026 йил 1 апрелдан 2026 йил 1 июлга қадар ҳар бир тоннаси 13 миллион сўмдан, 2026 йил 1 июлдан 2026 йил 1 декабрга қадар ҳар бир тоннаси 15 миллион сўмдан юқори нархда харид қилинган дизель ёқилғиси бўйича тузилган биржа шартномалари, шунингдек мазкур шартномаларга мувофиқ солиқ органлари тасдиқлаган электрон ҳисобварақ-фактуралар асосида дизель ёқилғиси ҳажмлари юзасидан истеъмолчилар кесимида шакллантирилган маълумотларни тасдиқлайди ҳамда уларни электрон шаклда Агропортал орқали Агентликка юборади.
5. Биржа томонидан маълумотлар тақдим қилингандан сўнг Ўзбекистон Республикаси Қишлоқ хўжалиги вазирлиги агротехнологик харита доирасида ҳар бир қишлоқ хўжалиги экинлари учун 2026 йил апрель — июнь ва (ёки) 2026 йил июль — ноябрь ойларида сарфланиши белгиланган дизель ёқилғиси миқдорини Агропортал орқали жойлаштиради.
Бунда истеъмолчи томонидан харид қилинган дизель ёқилғиси миқдори билан агротехнологик харитада белгиланган дизель ёқилғиси миқдори Агропорталда солиштирилади ҳамда субсидия суммаси автоматик тарзда ҳисобланади.
6. Биржа томонидан истеъмолчилар кесимида шакллантирилган маълумотлар Агропортал орқали Агентликка юборилганда, техник носозлик ёки ахборот тизимлари ўртасидаги маълумот алмашинувидаги узилишлар натижасида айрим истеъмолчилар маълумотлари юборилмай қолган тақдирда, истеъмолчи Агентликка ёзма ёки электрон шаклда (Агропортал орқали) мурожаат қилиши мумкин.
7. Агентлик истеъмолчининг мурожаатини олган кундан эътиборан уч иш куни ичида Биржа ва Агропортал оператори билан ҳамкорликда истеъмолчини мазкур рўйхатга киритиш билан боғлиқ ҳолатни ўрганади ҳамда маълумотлар тасдиқланган тақдирда, истеъмолчини Агропортал рўйхатига киритади ва субсидия ҳисоб-китобини мазкур Низомнинг 9 ва 10-бандлари талабларига мувофиқ амалга оширади.
8. Истеъмолчининг мурожаатини кўриб чиқиш натижалари хулоса қабул қилинган кундан бошлаб Агентлик томонидан Агропортал орқали ёки электрон шаклда истеъмолчига уч иш куни ичида юборилади.
9. Субсидия ажратиладиган дизель ёқилғиси миқдори қуйидаги формула асосида аниқланади:
Д=(П×Кп)+(Г×Кг)
Бунда:
Д — субсидия ҳисобланадиган дизель ёқилғиси миқдори;
П — истеъмолчи томонидан амалда экилган пахта майдони (гектарда);
Г — истеъмолчи томонидан амалда экилган буғдой майдони (гектарда);
Кп — пахта хомашёсини етиштиришда агротехнологик харита бўйича апрель — июнь ва (ёки) июль — ноябрь ойларида сарфланадиган дизель ёқилғиси меъёри (тонна/гектар);
Кг — буғдойни етиштиришда агротехнологик харита бўйича апрель — июнь ва (ёки) июль — ноябрь ойларида сарфланадиган дизель ёқилғиси меъёри (тонна/гектар).
10. Субсидия суммаси қуйидаги формула асосида ҳисобланади:
С=Д×(Н-Б)
Бунда:
С — субсидия миқдори;
Н — бир тонна дизель ёқилғисининг амалда харид қилинган нархи;
Б — бир тонна дизель ёқилғисининг базавий нархи (апрель — июнь ойлари учун 13 000 000 сўм, июль — ноябрь ойлари учун 15 000 000 сўм).
Субсидия миқдорини ҳисоблашда:
истеъмолчи томонидан белгиланган муддатда харид қилинган субсидия ажратилиши ҳисобга олинадиган дизель ёқилғиси миқдори (Д) агротехнологик харитада белгиланган меъёрдан кам бўлса, ҳисоб-китобларда амалда харид қилинган дизель ёқилғиси миқдори, белгиланган меъёрдан ортиқ бўлса, агротехнологик харитада белгиланган меъёр миқдори;
дизель ёқилғиси нархининг базавий нархдан ошган қисми ҳар бир тонна учун 2 миллион сўмдан ортиқ бўлган тақдирда, 2 миллион сўм деб қабул қилинади.
11. Субсидия ажратилганидан кейин субсидия миқдорига таъсир қилувчи, шу жумладан экин майдони, дизель ёқилғисининг харид қилинган миқдори ва нархи, электрон ҳисобварақ-фактура, биржа шартномалари, агротехнологик харита маълумотларида хатолик аниқланган ёки уларга ўзгартириш киритилган тақдирда, Агентлик субсидия миқдорини қайта ҳисоблайди ҳамда бу ҳақда истеъмолчига Агропортал орқали учиш куни ичида электрон шаклда хабар юборади.
12. Субсидия қуйидаги ҳолларда ажратилмайди:
истеъмолчи дизель ёқилғисини биржа савдоларидан ташқари харид қилганда;
истеъмолчи томонидан етиштирилаётган қишлоқ хўжалиги экинлари бўйича Агропорталга контурлар кесимида маълумотлар жойлаштирилмаганда;
дизель ёқилғиси агротехнологик харитада бошқа ойларда амалга оширилиши назарда тутилган агротехник тадбирларни бажариш мақсадида апрель — июнь ҳамда июль — ноябрь ойларида харид қилинганда.
Субсидия беришни ушбу бандда кўрсатилмаган асослар бўйича рад этишга йўл қўйилмайди.
13. Истеъмолчиларга субсидия ажратиш рад этилган тақдирда, субсидия ажратишни рад этиш тўғрисидаги хулосада рад этиш учун асос бўлган сабаблар аниқ кўрсатилиши лозим.
14. Агентлик Агропортал орқали автоматик тарзда ҳисобланган субсидия суммасини у ҳисобланган кундан эътиборан уч иш куни ичида истеъмолчининг тижорат банкидаги махсус ҳисобварағига (23210) ўтказиб беради ҳамда бу ҳақда шу куннинг ўзида истеъмолчини Агропортал орқали хабардор қилади.
3-боб. Субсидия маблағларидан фойдаланиш
15. Тижорат банки истеъмолчининг махсус ҳисобварағига (23210) келиб тушган субсидия маблағларини, биринчи навбатда, қишлоқ хўжалиги маҳсулотларини етиштириш харажатларини молиялаштириш учун ажратилган имтиёзли кредитлар ва уларга ҳисобланган фоизлар, шунингдек олдинги йилларда ажратилган имтиёзли кредитлар бўйича мавжуд қарздорликларни сўндиришга йўналтиради.
Имтиёзли кредитлар ва уларга ҳисобланган фоизлар, шунингдек олдинги йилларда ажратилган имтиёзли кредитлар бўйича қарздорликлар тўлиқ сўндирилгандан сўнг субсидия маблағларининг қолган қисми, биринчи навбатда, солиқлар ва мажбурий тўловлар бўйича мавжуд қарздорликларни, сўнгра лизинг тўловлари бўйича жорий қарздорликларни сўндиришга йўналтирилади.
Бунда солиқлар ва мажбурий тўловлар бўйича олдиндан тўловни амалга оширишга йўл қўйилмайди.
16. Имтиёзли кредитлар ва уларга ҳисобланган фоизлар, олдинги йилларда ажратилган имтиёзли кредитлар бўйича қарздорликлар, солиқлар ва мажбурий тўловлар ҳамда лизинг тўловлари бўйича жорий қарздорликлар мавжуд бўлмаган тақдирда, субсидия маблағлари қишлоқ хўжалиги маҳсулотларини етиштирувчининг асосий ҳисобварағига ўтказилади ҳамда мазкур маблағлардан қишлоқ хўжалиги маҳсулотларини етиштирувчи эркин фойдаланади.
4-боб. Якуний қоида
17. Мазкур Низом талабларининг бузилишида айбдор шахслар қонунчилик ҳужжатларига мувофиқ жавобгар бўлади.
Вазир И. АБДУРАХМОНОВ
Иқтисодиёт ва молия вазири Ж. КУЧКАРОВ
Савдо-саноат палатаси р аиси Д. ВАХАБОВ
Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил А. БУРИЕВ
Бош прокурор Н. ЙЎЛДОШЕВ
Тошкент ш.,
2026 йил 30 июнь,
2026 йил 24 июнь
2026 йил 18 июнь
2026 йил 22 июнь
2026 йил 19 июнь
51-сон
OʻZBEKISTON RESPUBLIKASI QISHLOQ XOʻJALIGI VAZIRINING
BUYRUGʻI
VAQTINCHALIK NIZOM
Qishloq xoʻjaligi korxonalari tomonidan birja savdolari orqali xarid qilingan dizel yoqilgʻisi qiymatining bir qismini qoplash uchun subsidiya ajratish tartibi toʻgʻrisidagi vaqtinchalik nizomni tasdiqlash haqida
Oʻzbekiston Respublikasi Prezidentining 2026-yil 8-maydagi PF-82-son “Paxta va bugʻdoy yetishtiruvchilarni moliyaviy qoʻllab-quvvatlashning qoʻshimcha chora-tadbirlari toʻgʻrisida”gi Farmoniga muvofiq buyuraman:
1. Qishloq xoʻjaligi korxonalari tomonidan birja savdolari orqali xarid qilingan dizel yoqilgʻisi qiymatining bir qismini qoplash uchun subsidiya ajratish tartibi toʻgʻrisidagi vaqtinchalik nizom ilovaga muvofiq tasdiqlansin.
2. Mazkur buyruq Oʻzbekiston Respublikasi Bosh prokuraturasi, Iqtisodiyot va moliya vazirligi, Oʻzbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish boʻyicha vakil hamda Savdo-sanoat palatasi bilan kelishilgan.
3. Mazkur buyruq rasmiy eʼlon qilingan kundan eʼtiboran kuchga kiradi.
4. Mazkur buyruq 2027-yil 1-yanvarga qadar amal qiladi.
Kelishildi:
Oʻzbekiston Respublikasi qishloq xoʻjaligi vazirining 2026-yil 30-iyundagi 51-son buyrugʻiga ILOVA
Qishloq xoʻjaligi korxonalari tomonidan birja savdolari orqali xarid qilingan dizel yoqilgʻisi qiymatining bir qismini qoplash uchun subsidiya ajratish tartibi toʻgʻrisidagi
Mazkur Nizom qishloq xoʻjaligi korxonalari (bundan buyon matnda isteʼmolchi deb yuritiladi) tomonidan birja savdolari orqali xarid qilingan dizel yoqilgʻisi qiymatining bir qismini qoplash uchun subsidiya ajratishning vaqtinchalik tartibini belgilaydi.
1-bob. Umumiy qoidalar
1. Mazkur Nizomda quyidagi asosiy tushunchalardan foydalaniladi:
Agroportal — Oʻzbekiston Respublikasi Qishloq xoʻjaligi vazirligining “Raqamli qishloq xoʻjaligi” yagona integratsion platformasi ;
agrotexnologik xarita — 2022 — 2026-yillar uchun ishlab chiqilgan hamda mavsum davomida barcha qilinadigan ishlar va taxminiy xarajatlarni (oylar kesimida ) aks ettiruvchi hujjat;
birja — “Oʻzbekiston respublika tovar-xomashyo birjasi ” AJ;
subsidiya — qishloq xoʻjaligi mahsulotlarini yetishtirish uchun mazkur Nizomda belgilangan muddatlarda birja savdolari orqali xarid qilingan va Oʻzbekiston Respublikasi Soliq qoʻmitasining maʼlumotlar bazasida roʻyxatga olingan elektron hisobvaraq-fakturaga asosan dizel yoqilgʻisi qiymatining bir qismini qoplash uchun Oʻzbekiston Respublikasi Davlat budjetidan bir martalik ajratiladigan mablagʻlar;
isteʼmolchi — paxta va bugʻdoy (bundan buyon matnda qishloq xoʻjaligi ekinlari deb yuritiladi) yetishtirishda birja orqali dizel yoqilgʻisini xarid qilgan qishloq xoʻjaligi mahsulotlarini yetishtiruvchi yuridik shaxs;
2. Subsidiyaning hisobi Oʻzbekiston Respublikasi Qishloq xoʻjaligi vazirligi huzuridagi Agrar sohada toʻlovlar agentligining (bundan buyon matnda Agentlik deb yuritiladi) Oʻzbekiston Respublikasi Iqtisodiyot va moliya vazirligi huzuridagi Gʻaznachilik xizmati qoʻmitasida ochilgan maxsus shaxsiy gʻazna hisobvaragʻida yuritiladi.
3. Subsidiya agrotexnologik xaritada nazarda tutilgan paxta va bugʻdoy yetishtirish hamda hosilni yigʻib-terib olishga oid agrotexnik tadbirlarni amalga oshirish uchun isteʼmolchi tomonidan birja savdolari orqali xarid qilingan dizel yoqilgʻisining har bir tonnasi uchun quyidagi miqdorlarda proaktiv shaklda ajratiladi:
2026-yil 1-apreldan 1-iyulga qadar — uning qiymatining 13 million soʻmdan oshgan qismi uchun, biroq 2 million soʻmdan koʻp boʻlmagan miqdorda;
2026-yil 1-iyuldan 1-dekabrga qadar — uning qiymatining 15 million soʻmdan oshgan qismi uchun, biroq 2 million soʻmdan koʻp boʻlmagan miqdorda.
Bunda isteʼmolchi subsidiyani olish uchun oʻziga tegishli ekin yer maydonlarini konturlar hamda qishloq xoʻjaligi mahsulotlari turlari kesimida belgilangan tartibda Agroportalga kiritgan boʻlishi lozim.
2-bob. Isteʼmolchilar roʻyxatini shakllantirish va subsidiyani ajratish
4. Birja isteʼmolchilar tomonidan 2026-yil 1-apreldan 2026-yil 1-iyulga qadar har bir tonnasi 13 million soʻmdan, 2026-yil 1-iyuldan 2026-yil 1-dekabrga qadar har bir tonnasi 15 million soʻmdan yuqori narxda xarid qilingan dizel yoqilgʻisi boʻyicha tuzilgan birja shartnomalari, shuningdek mazkur shartnomalarga muvofiq soliq organlari tasdiqlagan elektron hisobvaraq-fakturalar asosida dizel yoqilgʻisi hajmlari yuzasidan isteʼmolchilar kesimida shakllantirilgan maʼlumotlarni tasdiqlaydi hamda ularni elektron shaklda Agroportal orqali Agentlikka yuboradi.
5. Birja tomonidan maʼlumotlar taqdim qilingandan soʻng Oʻzbekiston Respublikasi Qishloq xoʻjaligi vazirligi agrotexnologik xarita doirasida har bir qishloq xoʻjaligi ekinlari uchun 2026-yil aprel — iyun va (yoki) 2026-yil iyul — noyabr oylarida sarflanishi belgilangan dizel yoqilgʻisi miqdorini Agroportal orqali joylashtiradi.
Bunda isteʼmolchi tomonidan xarid qilingan dizel yoqilgʻisi miqdori bilan agrotexnologik xaritada belgilangan dizel yoqilgʻisi miqdori Agroportalda solishtiriladi hamda subsidiya summasi avtomatik tarzda hisoblanadi.
6. Birja tomonidan isteʼmolchilar kesimida shakllantirilgan maʼlumotlar Agroportal orqali Agentlikka yuborilganda, texnik nosozlik yoki axborot tizimlari oʻrtasidagi maʼlumot almashinuvidagi uzilishlar natijasida ayrim isteʼmolchilar maʼlumotlari yuborilmay qolgan taqdirda, isteʼmolchi Agentlikka yozma yoki elektron shaklda (Agroportal orqali) murojaat qilishi mumkin.
7. Agentlik isteʼmolchining murojaatini olgan kundan eʼtiboran uch ish kuni ichida Birja va Agroportal operatori bilan hamkorlikda isteʼmolchini mazkur roʻyxatga kiritish bilan bogʻliq holatni oʻrganadi hamda maʼlumotlar tasdiqlangan taqdirda, isteʼmolchini Agroportal roʻyxatiga kiritadi va subsidiya hisob-kitobini mazkur Nizomning 9 va 10-bandlari talablariga muvofiq amalga oshiradi.
8. Isteʼmolchining murojaatini koʻrib chiqish natijalari xulosa qabul qilingan kundan boshlab Agentlik tomonidan Agroportal orqali yoki elektron shaklda isteʼmolchiga uch ish kuni ichida yuboriladi.
9. Subsidiya ajratiladigan dizel yoqilgʻisi miqdori quyidagi formula asosida aniqlanadi:
D=(P×Kp)+(G×Kg)
Bunda:
D — subsidiya hisoblanadigan dizel yoqilgʻisi miqdori;
P — isteʼmolchi tomonidan amalda ekilgan paxta maydoni (gektarda);
G — isteʼmolchi tomonidan amalda ekilgan bugʻdoy maydoni (gektarda);
Kp — paxta xomashyosini yetishtirishda agrotexnologik xarita boʻyicha aprel — iyun va (yoki) iyul — noyabr oylarida sarflanadigan dizel yoqilgʻisi meʼyori (tonna/gektar);
Kg — bugʻdoyni yetishtirishda agrotexnologik xarita boʻyicha aprel — iyun va (yoki) iyul — noyabr oylarida sarflanadigan dizel yoqilgʻisi meʼyori (tonna/gektar).
10. Subsidiya summasi quyidagi formula asosida hisoblanadi:
S=D×(N-B)
Bunda:
S — subsidiya miqdori;
N — bir tonna dizel yoqilgʻisining amalda xarid qilingan narxi;
B — bir tonna dizel yoqilgʻisining bazaviy narxi (aprel — iyun oylari uchun 13 000 000 soʻm, iyul — noyabr oylari uchun 15 000 000 soʻm).
Subsidiya miqdorini hisoblashda:
isteʼmolchi tomonidan belgilangan muddatda xarid qilingan subsidiya ajratilishi hisobga olinadigan dizel yoqilgʻisi miqdori (D) agrotexnologik xaritada belgilangan meʼyordan kam boʻlsa, hisob-kitoblarda amalda xarid qilingan dizel yoqilgʻisi miqdori, belgilangan meʼyordan ortiq boʻlsa, agrotexnologik xaritada belgilangan meʼyor miqdori;
dizel yoqilgʻisi narxining bazaviy narxdan oshgan qismi har bir tonna uchun 2 million soʻmdan ortiq boʻlgan taqdirda, 2 million soʻm deb qabul qilinadi.
11. Subsidiya ajratilganidan keyin subsidiya miqdoriga taʼsir qiluvchi, shu jumladan ekin maydoni, dizel yoqilgʻisining xarid qilingan miqdori va narxi, elektron hisobvaraq-faktura, birja shartnomalari, agrotexnologik xarita maʼlumotlarida xatolik aniqlangan yoki ularga oʻzgartirish kiritilgan taqdirda, Agentlik subsidiya miqdorini qayta hisoblaydi hamda bu haqda isteʼmolchiga Agroportal orqali uchish kuni ichida elektron shaklda xabar yuboradi.
12. Subsidiya quyidagi hollarda ajratilmaydi:
isteʼmolchi dizel yoqilgʻisini birja savdolaridan tashqari xarid qilganda;
isteʼmolchi tomonidan yetishtirilayotgan qishloq xoʻjaligi ekinlari boʻyicha Agroportalga konturlar kesimida maʼlumotlar joylashtirilmaganda;
dizel yoqilgʻisi agrotexnologik xaritada boshqa oylarda amalga oshirilishi nazarda tutilgan agrotexnik tadbirlarni bajarish maqsadida aprel — iyun hamda iyul — noyabr oylarida xarid qilinganda.
Subsidiya berishni ushbu bandda koʻrsatilmagan asoslar boʻyicha rad etishga yoʻl qoʻyilmaydi.
13. Isteʼmolchilarga subsidiya ajratish rad etilgan taqdirda, subsidiya ajratishni rad etish toʻgʻrisidagi xulosada rad etish uchun asos boʻlgan sabablar aniq koʻrsatilishi lozim.
14. Agentlik Agroportal orqali avtomatik tarzda hisoblangan subsidiya summasini u hisoblangan kundan eʼtiboran uch ish kuni ichida isteʼmolchining tijorat bankidagi maxsus hisobvaragʻiga (23210) oʻtkazib beradi hamda bu haqda shu kunning oʻzida isteʼmolchini Agroportal orqali xabardor qiladi.
3-bob. Subsidiya mablagʻlaridan foydalanish
15. Tijorat banki isteʼmolchining maxsus hisobvaragʻiga (23210) kelib tushgan subsidiya mablagʻlarini, birinchi navbatda, qishloq xoʻjaligi mahsulotlarini yetishtirish xarajatlarini moliyalashtirish uchun ajratilgan imtiyozli kreditlar va ularga hisoblangan foizlar, shuningdek oldingi yillarda ajratilgan imtiyozli kreditlar boʻyicha mavjud qarzdorliklarni soʻndirishga yoʻnaltiradi.
Imtiyozli kreditlar va ularga hisoblangan foizlar, shuningdek oldingi yillarda ajratilgan imtiyozli kreditlar boʻyicha qarzdorliklar toʻliq soʻndirilgandan soʻng subsidiya mablagʻlarining qolgan qismi, birinchi navbatda, soliqlar va majburiy toʻlovlar boʻyicha mavjud qarzdorliklarni, soʻngra lizing toʻlovlari boʻyicha joriy qarzdorliklarni soʻndirishga yoʻnaltiriladi.
Bunda soliqlar va majburiy toʻlovlar boʻyicha oldindan toʻlovni amalga oshirishga yoʻl qoʻyilmaydi.
16. Imtiyozli kreditlar va ularga hisoblangan foizlar, oldingi yillarda ajratilgan imtiyozli kreditlar boʻyicha qarzdorliklar, soliqlar va majburiy toʻlovlar hamda lizing toʻlovlari boʻyicha joriy qarzdorliklar mavjud boʻlmagan taqdirda, subsidiya mablagʻlari qishloq xoʻjaligi mahsulotlarini yetishtiruvchining asosiy hisobvaragʻiga oʻtkaziladi hamda mazkur mablagʻlardan qishloq xoʻjaligi mahsulotlarini yetishtiruvchi erkin foydalanadi.
4-bob. Yakuniy qoida
17. Mazkur Nizom talablarining buzilishida aybdor shaxslar qonunchilik hujjatlariga muvofiq javobgar boʻladi.
Vazir I. ABDURAXMONOV
Iqtisodiyot va moliya vaziri J. KUCHKAROV
Savdo-sanoat palatasi r aisi D. VAXABOV
Tadbirkorlik subyektlarining huquqlari va qonuniy manfaatlarini himoya qilish boʻyicha vakil A. BURIYEV
Bosh prokuror N. YOʻLDOSHEV
Toshkent sh.,
2026-yil 30-iyun,
2026-yil 24-iyun
2026-yil 18-iyun
2026-yil 22-iyun
2026-yil 19-iyun
51-son