📅 2026-yil 29-iyul · Prezident qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2026 йил 29 июль · Президент қарорлари
Расмий матн. Расмий ҳужжат. Таҳририй изоҳлар киритилмаган.
📅 29 июля 2026 г. · Постановления Президента
Официальный текст. Официальный документ. Редакционные примечания не включены.
📅 29 July 2026 · Presidential resolutions
Official text. Official document. Editorial notes are not included.
Ўзбекистон Республикаси Президентининг
қарори
ВАЗИФАЛАР
«ЙЎЛ ХАРИТАСИ»
«Нукус шаҳрининг «РК-1» қозонхонасини когенерация технологиялари асосида модернизация қилиш» лойиҳасини давлат-хусусий шериклик шартлари асосида амалга ошириш чора-тадбирлари тўғрисида
Аҳоли ва иқтисодиёт тармоқларини энергия ресурслари билан барқарор таъминлаш, электр энергияси ва иссиқ сувни ишлаб чиқаришда табиий газдан фойдаланиш ҳажмини камайтириш, шунингдек, иссиқлик таъминоти тизимини ривожлантиришга тўғридан-тўғри хорижий инвестицияларни фаол жалб этиш мақсадида қарор қиламан:
I. Мақсадлар
1. Қуйидагилар «Нукус шаҳрининг «РК-1» қозонхонасини когенерация технологиялари асосида модернизация қилиш» лойиҳасини (кейинги ўринларда — Лойиҳа) давлат-хусусий шериклик шартлари асосида амалга оширишнинг асосий мақсадлари этиб белгилансин:
(а) Нукус шаҳрида марказлашган иссиқлик таъминоти тизимини замонавий энергия тежамкор когенерация технологиялари асосида модернизация қилиш орқали аҳоли ва иқтисодиёт тармоқларини барқарор электр ва иссиқлик энергияси билан таъминлаш;
(б) Лойиҳани амалга ошириш доирасида инфратузилмани барпо этиш мақсадида 28 км иссиқлик тармоқларини қуриш ва 189 та индивидуал иссиқлик пунктларини ўрнатиш билан ёпиқ тизимга ўтказиш орқали 10 320 нафар аҳолини электр, 22 880 нафар аҳолини иссиқлик энергияси билан таъминлаш;
(в) электр энергияси ва иссиқ сув ишлаб чиқаришда табиий газ сарфини оптималлаштириш, иссиқлик тармоқларидаги йўқотишларни 30 фоизгача камайтириш ва энергия самарадорлигини 10 фоизга ошириш;
(г) иссиқлик таъминоти соҳасида давлат-хусусий шериклик механизмларини жорий этиш ҳамда ушбу йўналишга тўғридан-тўғри хорижий инвестицияларни жалб қилиш.
2. «Нукус шаҳрининг «РК-1» қозонхонасини когенерация технологиялари асосида модернизация қилиш» лойиҳасини амалга оширишдаги устувор вазифалар 1-иловага мувофиқ тасдиқлансин.
3. Лойиҳа доирасида:
(а) қуйидагилар:
(i) Саудия Арабистони Қироллигининг «Saudi Tabreed District Cooling» компанияси (кейинги ўринларда — Инвестор) томонидан 20,3 миллион АҚШ доллари миқдорида хорижий инвестиция маблағлари жалб этилиши;
(ii) «Иссиқликтаъминоти» АЖ давлат шериги ҳамда Инвестор томонидан масъулияти чекланган жамият шаклида ташкил этиладиган махсус лойиҳа компанияси хусусий шерик этиб белгиланиши маълумот учун қабул қилинсин;
(б) қуйидагилар хусусий шерикнинг мажбуриятлари этиб белгилансин:
(i) Нукус шаҳрининг «РК-1» қозонхонасини когенерация технологиялари асосида модернизация қилиш;
(ii) электр ва иссиқлик энергиясини ишлаб чиқариш ва давлат шеригига белгиланган қувват ҳамда келишилган нархлар бўйича етказиб бериш;
(в) қуйидагилар давлат шеригининг мажбуриятлари этиб белгилансин:
(i) зарур ер участкаларини давлат-хусусий шериклик тўғрисидаги битимнинг (кейинги ўринларда — Битим) амал қилиш муддатига — 27 йилга ижарага бериш;
(ii) Битим доирасида хусусий шерикка юкланган мажбуриятлар тўлиқ ва ўз вақтида бажарилиши устидан мониторинг қилинишини назорат қилиш;
(iii) Лойиҳани амалга ошириш мобайнида хусусий шерикдан электр ва иссиқлик энергиясини белгиланган қувват ҳамда келишилган нархлар асосида харид қилиш;
(iv) Лойиҳани Битим имзолангандан бошлаб 2 йиллик қурилиш даври билан 27 йил муддатда амалга ошириш.
II. Когенерация технологиялари асосида электр ва иссиқлик энергияси ишлаб чиқаришни ташкил этиш чора-тадбирлари
4. Давлат шериги когенерация қурилмаси орқали ишлаб чиқариладиган электр ва иссиқлик энергиясини Битим шартларига мувофиқ харид қилсин.
5. Давлат шериги Лойиҳани давлат-хусусий шериклик шартлари асосида амалга ошириш бўйича Инвестор билан тўғридан-тўғри музокаралар олиб борсин.
6. Давлат шериги икки ой муддатда Иқтисодиёт ва молия вазирлиги билан келишилган ҳолда хусусий шерик билан иссиқлик тармоқлари, насос станциялари, ҳисоблагичлар ва индивидуал иситиш пунктларини, шунингдек, Лойиҳа доирасида зарур бўлган бошқа ёрдамчи инфратузилма объектларини лойиҳалаш ва қуриш ишларини молиялаштириш бўйича тегишли келишувни имзоласин ҳамда мазкур ишларни ташкил этиш бўйича манзилли рўйхатни тасдиқласин. Бунда иссиқлик тизимларини модернизация қилиш ишлари доирасида қуйидагиларга, истисно тариқасида, рухсат берилади:
(а) «Иссиқликтаъминоти» АЖни мазкур ишлар бўйича ягона буюртмачи сифатида белгилаш;
(б) лойиҳа ва пудрат ташкилотларини «таклиф сўрови» харид қилиш тартиб-таомиллари асосида аниқлаш;
(в) 2027 йил 31 декабрга қадар босқичма-босқич тайёрланадиган лойиҳа асосида қурилиш-монтаж ишларини амалга ошириш.
7. Битимда қуйидагилар инобатга олинсин:
(а) хусусий шерик томонидан 21,5 МВт электр қуввати ва 52,5 Гкал иссиқлик қувватига эга когенерация қурилмасини лойиҳалаштириш, молиялаштириш, қуриш, ишга тушириш, тўлиқ эксплуатация қилиш, техник хизмат кўрсатиш ҳамда Битим муддати якунлангач тизимни соз ҳолатда ва баланс қиймати бўйича давлат шеригига бепул топшириш;
(б) хусусий шерик томонидан когенерация жараёни натижасида ҳосил бўладиган 18,1 Гкалгача иссиқлик энергиясини давлат шеригига бепул асосда етказиб бериш;
(в) хусусий шерик қурилиш давридаги ўз мажбуриятлари лозим даражада бажарилишининг таъминоти сифатида 500 минг АҚШ доллари миқдорида биринчи даражали банк кафолатини тақдим этиши;
(г) хусусий шерикка электр ва иссиқлик энергияси учун тўловлар Битимда белгиланган механизмга мувофиқ чет эл валютасида деноминацияланган қатъий тариф бўйича миллий валютада амалга оширилиши;
(д) давлат шериги томонидан Лойиҳани амалга ошириш жараёнида хусусий шерикдан электр ва иссиқлик энергияси «сотиб олиш ёки тўлаб бериш» тамойили асосида харид қилиниши.
8. Қуйидагилар:
(а) Қорақалпоғистон Республикаси Вазирлар Кенгаши ва Нукус шаҳри ҳокимлиги давлат шериги билан биргаликда «Қорақалпоғистон Республикаси коммунал иссиқлик таъминоти» МЧЖга доимий фойдаланиш ҳуқуқи асосида ажратилган Нукус шаҳри «Қурилиш» МФЙ Абу-Райҳон Беруний кўчасидаги ер участкасининг Лойиҳани амалга ошириш учун танланган 0,75 га қисмига нисбатан мавжуд ҳуқуқлари бекор қилиниши ва ушбу ер майдони Нукус шаҳри ҳокимлиги тасарруфидаги бўш турган ер участкаси сифатида ҳисобга олинишини таъминласин;
(б) Қорақалпоғистон Республикаси Вазирлар Кенгаши Нукус шаҳри ҳокимлиги тасарруфида бўш турган ер участкаси сифатида рўйхатга олинган мазкур ер участкаси Қорақалпоғистон Республикаси Вазирлар Кенгаши ҳузуридаги Тадбиркорликка кўмаклашиш дирекциясига (кейинги ўринларда — Дирекция) доимий фойдаланиш ҳуқуқи асосида ажратилишини таъминласин;
(в) Дирекция ер участкаси хусусий шерикка Битимда кўрсатилган муддат ва шартлар асосида ижарага берилишини таъминласин;
(г) Битимнинг амал қилиш муддати тугаганда ёки муддатидан аввал бекор қилинганда, лойиҳа ҳудудидаги барча мол-мулк, шу жумладан, хусусий шерикнинг мол-мулки давлат шеригига Битим шартларига мувофиқ ўтказилиши белгилансин. Бунда Битимнинг амал қилиш муддати тугаганда давлат шеригига бепул топшириладиган объектлар Солиқ кодексининг 243 ва 304-моддаларига мувофиқ солиқ солишдан озод этилиши ва даромад сифатида ҳисобга олинмаслиги маълумот учун қабул қилинсин;
(д) Иқтисодиёт ва молия вазирлиги бир ой муддатда Лойиҳа ҳудудидаги кўп квартирали уйларнинг ички иссиқлик тизимларини модернизация қилиш ишлари учун зарур маблағларни Ўзбекистон Республикаси республика бюджетининг 2026 йилдаги қўшимча манбаи ҳисобидан ажратиш чораларини кўрсин.
9. Лойиҳани амалга ошириш даврида давлат шеригига қуйидаги ҳуқуқлар берилсин:
(а) хусусий шерик билан биргаликда Лойиҳани амалга ошириш учун мустақил инжиниринг компаниялари, шунингдек, бошқа техник ва юридик маслаҳатчиларни танлаш ва уларни «таклиф сўрови» харид қилиш тартиб-таомили асосида жалб қилиш;
(б) Иссиқлик ва электр энергиясини сотиб олиш тўғрисидаги битим бўйича тўлов мажбуриятларининг бажарилиши таъминоти сифатида хусусий шерик фойдасига чет эл банкининг чет эл валютасида тасдиқланган тикланувчи аккредитивини очиш;
(в) Битим муддатидан олдин бекор қилинган тақдирда, унга мувофиқ хусусий шерикка тўланиши лозим бўлган қолдиқ тўловлар ва Битимни бекор қилиш билан боғлиқ компенсация тўловларини хусусий шерик кўрсатган хорижий банк ҳисобварағига тегишли чет эл валютасида бевосита ўтказиш;
(г) хусусий шерикдан электр энергиясини сотиб олиш ҳамда уни электр энергиясини марказлашган тартибда харид қилиш ва сотиш бўйича ваколатли корхоналарга тўғридан-тўғри сотиш;
(д) «Ҳудудгазтаъминот» акциядорлик жамияти ва «Ўзсувтаъминот» акциядорлик жамияти билан Битимда кўзда тутилган ҳажмларга ва параметрларга мувофиқ хусусий шерикни етказиб берувчи сифатида табиий газ ва ичимлик суви билан таъминлаш бўйича шартномаларни имзолаш.
10. Лойиҳани молиялаштириш доирасида хусусий шерикка қуйидаги ҳуқуқлар берилсин:
(а) Ўзбекистон Республикасидан ташқарида жойлашган чет эл банкларида банк ҳисобварақларини очиш ва юритиш, маблағларни қабул қилиш, фойдаланиш ва ўтказиш (шу жумладан, ўзининг Ўзбекистондаги банк ҳисобварақларидан), шунингдек, дивидендлар, қарз мажбурияти бўйича тўловлар ва бошқа маблағларни чет эл валютасида ўтказиш бўйича операцияларни эркин амалга ошириш;
(б) барча солиқлар ва йиғимлар тўланган ҳолда Ўзбекистон Республикасидан ташқарида бўлган чет эл пудрат ташкилотлари, етказиб берувчилари ёки кредиторларига тўловларни Ўзбекистон Республикасидаги банк ҳисобварақлари орқали ўтказмасдан, тўғридан-тўғри амалга ошириш;
(в) 2027 йил 31 декабрга қадар босқичма-босқич тайёрланадиган лойиҳа асосида қурилиш-монтаж ишларини амалга ошириш.
11. Хусусий шерик 2030 йил 1 январга қадар:
(а) белгиланган тартибда Вазирлар Маҳкамаси томонидан тасдиқланган рўйхати бўйича:
(i) чет элдан олиб келинадиган, Ўзбекистон Республикасида ишлаб чиқарилмайдиган хомашё ва материаллар, ускуна, махсус техника, уларнинг эҳтиёт ва бутловчи қисмлари, приборлар, техник ва лойиҳа ҳужжатлари, дастурий таъминотлар учун божхона божи ҳамда қўшилган қиймат солиғини тўлашдан;
(ii) вақтинча олиб кириш божхона режимида олиб кириладиган ускуна ва махсус техникалар, приборлар учун божхона божини тўлашдан;
(б) республикада тегишли аккредитация қилинган мувофиқликни баҳолаш органлари мавжуд бўлмаган тақдирда, чет элдан олиб кириладиган махсус техника ва ускуналарни мажбурий сертификатлашдан озод этилсин.
12. Энергетика вазирлиги ҳамда Иқтисодиёт ва молия вазирлиги:
(а) «Ўзбекистон миллий электр тармоқлари» АЖ ва «Ҳудудгазтаъминот» АЖ билан биргаликда Лойиҳа ҳудудигача электр ва газ тармоқларини қуриш ишларини ташкил этсин. Бунда Иқтисодиёт ва молия вазирлиги зарур маблағларни бир ой муддатда Ўзбекистон Республикаси республика бюджетининг 2026 йилдаги қўшимча манбаи ҳисобидан ажратиш чораларини кўрсин;
(б) «Ҳудудгазтаъминот» АЖ, «Ўзбекистон миллий электр тармоқлари» АЖ, «Ўзэнергосотиш» АЖ ва «Ўзсувтаъминот» АЖ билан биргаликда Битимда назарда тутилган ҳажмлар ва параметрларга мувофиқ табиий газ ва ичимлик суви етказиб берилмаслиги натижасида давлат шериги томонидан хусусий шерикка тўланадиган зарар, жарималар, бой берилган фойда ва бошқа компенсация суммаларини қоплаш мажбурияти юзага келган тақдирда, агар тегишли шартномаларда бошқа қоидалар назарда тутилмаган бўлса, табиий газ ва ичимлик сувини етказиб берувчи ташкилотлар давлат шериги олдида қонунчилик ҳужжатларига мувофиқ субсидиар тартибида жавобгар бўлиши белгилансин. Бунда истеъмолчилар томонидан кўрсатилган хизматлар учун тўловлар ўз вақтида амалга оширилмаганлиги сабабли тармоқдан узиш, шунингдек, табиий газ ва ичимлик суви тармоқларидаги режали ва авариявий узилишлар натижасида юзага келган ҳолатлар субсидиар тартибда жавобгарликни келтириб чиқармайди.
13. Энергетика вазирлиги, Иқтисодиёт ва молия вазирлиги, «Ҳудудгазтаъминот» АЖ, «Ўзбекистон миллий электр тармоқлари» АЖ, «Ўзэнергосотиш» АЖ ва «Ўзсувтаъминот» АЖга Лойиҳа доирасидаги когенерация қурилмасини ягона электр тармоғига ўз вақтида улаш, шунингдек, хусусий шерик томонидан ишлаб чиқарилган электр энергияси ягона электр тармоғига сотилиши жараёнида ягона электр тармоғига уланиш, электр энергиясини харид қилиш ва ҳисоб-китобларни амалга ошириш масалалари бўйича комплекс мувофиқлаштириш ва назоратни таъминлаш вазифаси юклансин.
14. Қорақалпоғистон Республикаси Вазирлар Кенгаши давлат шериги билан биргаликда бир ой муддатда Лойиҳа қамровига кирувчи Нукус шаҳридаги кўп квартирали уйларнинг ички иссиқлик тизимларини модернизация қилиш ишлари бўйича манзилли рўйхатни тасдиқласин. Бунда ички иссиқлик тизимларини модернизация қилиш ишлари доирасида қуйидагиларга рухсат берилади:
(а) лойиҳа ва пудрат ташкилотларини «таклиф сўрови» харид қилиш тартиб-таомиллари асосида аниқлаш;
(б) 2027 йил 31 декабрга қадар босқичма-босқич тайёрланадиган лойиҳа асосида қурилиш-монтаж ишларини амалга ошириш.
15. «Нукус шаҳрининг «РК-1» қозонхонасини когенерация технологиялари асосида модернизация қилиш» лойиҳасини амалга ошириш бўйича «йўл харитаси» 2-иловага мувофиқ тасдиқлансин.
III. Қарор ижросини ташкил этиш, таъминлаш ва назорат
16. Қурилиш ва уй-жой коммунал хўжалиги вазирлиги Иқтисодиёт ва молия вазирлиги ва Энергетика вазирлиги билан биргаликда Лойиҳани амалга ошириш, шунингдек, томонларнинг Битим ва келишувлар доирасидаги мажбуриятларини бажариши устидан доимий мониторинг ўрнатсин.
17. «Иссиқликтаъминоти» АЖ бошқарув раиси И.Х. Тураевга Нукус шаҳрида кўрсатилган иссиқлик таъминоти хизматлари учун истеъмолчилардан тўловларни белгиланган муддатда ундириш бўйича шахсий масъулият юклатилсин.
18. Лойиҳа доирасида молиявий мажбуриятлар, тарифлар бўйича компенсация механизмлари, давлат томонидан қўллаб-қувватлаш учун масъул ва шахсан жавобгар этиб Бош вазир ўринбосари — иқтисодиёт ва молия вазири Ж.А. Қўчқоров белгилансин.
19. Мазкур қарор ижросини самарали ташкил қилишга масъул ва шахсан жавобгар этиб қурилиш ва уй-жой коммунал хўжалиги вазири Ш.С. Хидоятов, энергетика вазири Ш.Х. Ходжаев ва «Иссиқликтаъминоти» АЖ бошқаруви раиси И.Х. Тураев белгилансин.
20. Қарор ижросини назорат қилиш ва ижро учун масъул ташкилотлар фаолиятини мувофиқлаштириш Ўзбекистон Республикаси Бош вазири А.Н. Арипов зиммасига юклансин.
Ўзбекистон Республикаси Президентининг 2026 йил 29 июлдаги ПҚ-284-сон қарорига 1-ИЛОВА
«Нукус шаҳрининг «РК-1» қозонхонасини когенерация технологиялари асосида модернизация қилиш» лойиҳасини амалга оширишдаги устувор
1. Когенерация қурилмасидан ишлаб чиқариладиган электр энергияси ва иссиқлик энергиясини хусусий шерикдан битимнинг бутун амал қилиш муддатида харид қилиш ҳамда «Ўзбекистон миллий электр тармоқлари» АЖга ва иссиқлик тармоқларига етказиб берилишини таъминлаш.
2. Қорақалпоғистон Республикаси Вазирлар Кенгаши томонидан давлат шериги билан биргаликда аҳоли ва объектларда қўлланилаётган қўлбола иситиш воситаларини босқичма-босқич хавфсиз ва самарадор иситиш тизимларига ўтказиш.
3. Энергия самарадорлигини ошириш ва ҳисоб-китоблар шаффофлигини таъминлаш мақсадида Қорақалпоғистон Республикаси Вазирлар Кенгаши томонидан давлат шериги билан биргаликда лойиҳа қурилиш ишлари якунига қадар қуйидагилар таъминланади:
(а) ёпиқ иссиқлик таъминоти тизимига ўтиш, бунда кўп квартирали уйларда ва объектларда индивидуал иссиқлик пунктларини ўрнатиш, ички тизимларни янгилаш, автоматика ва бошқарув элементларини жорий этиш;
(б) когенерация қурилмаси ҳудудидаги иссиқлик, табиий газ ва сув ҳисоблагичлари ҳамда бошқа ўлчов воситаларини ўрнатиш, шунингдек, автоматлаштирилган диспетчерлик тизимини жорий этиш, тезкор бошқарув пунктини ташкил қилиш ва хусусий шерик томонидан лойиҳа доирасида амалга ошириладиган рақамлаштирилган бошқарув тизимларининг ягона автоматлаштирилган диспетчерлик марказига интеграциясини ташкил этиш, масофавий мониторингни таъминлаш;
(в) иссиқлик тармоқларида йўқотишларни камайтириш учун олдиндан изоляцияланган қувурлардан фойдаланган ҳолда иссиқлик тармоқларини қуриш ва реконструкция қилиш, гидравлик синов ҳамда баланслаш ишларини ташкил этиш.
4. Хусусий шерик томонидан когенерация қурилмасида, шу жумладан, уни автоматлаштириш ва SCADA тизимидан фойдаланиш бўйича иссиқлик таъминоти ходимларини ўқитишни таъминлаш.
Ўзбекистон Республикаси Президентининг 2026 йил 29 июлдаги ПҚ-284-сон қарорига 2-ИЛОВА
«Нукус шаҳрининг «РК-1» қозонхонасини когенерация технологиялари асосида модернизация қилиш» лойиҳасини амалга ошириш бўйича
Т/р Чора-тадбирлар номи Ижро муддати Масъул ижрочилар 1. Хусусий шерик билан биргаликда лойиҳа концепцияси ва лойиҳани баҳолаш ҳужжатларини ишлаб чиқиб, келишиш учун Иқтисодиёт ва молия вазирлигига киритиш. 2026 йил сентябрь «Иссиқликтаъминоти» АЖ, Қурилиш ва уй-жой коммунал хўжалиги вазирлиги, Иқтисодиёт ва молия вазирлиги 2. Хусусий шерик ва давлат шериги томонидан ишлаб чиқилган ҳужжатлар асосида лойиҳа концепцияси ва баҳолаш ҳужжатини келишиб, тасдиқлаш учун Вазирлар Маҳкамасига киритиш. 2026 йил сентябрь Иқтисодиёт ва молия вазирлиги, «Иссиқликтаъминоти» АЖ, Қурилиш ва уй-жой коммунал хўжалиги вазирлиги 3. Хусусий шерик билан давлат-хусусий шериклик лойиҳасини амалга ошириш учун мазкур қарорда белгиланган шартлар асосида давлат-хусусий шериклик тўғрисидаги битим имзоланишини ташкил этиш. 2026 йил сентябрь «Иссиқликтаъминоти» АЖ, Қурилиш ва уй-жой коммунал хўжалиги вазирлиги, Энергетика вазирлиги, Иқтисодиёт ва молия вазирлиги 4. Хусусий шерик билан давлат томонидан қўллаб-қувватлаш тўғрисидаги битим имзоланишини таъминлаш. 2026 йил октябрь Иқтисодиёт ва молия вазирлиги, «Иссиқликтаъминоти» АЖ, Қурилиш ва уй-жой коммунал хўжалиги вазирлиги 5. Имзоланган давлат-хусусий шериклик тўғрисидаги битим ва давлат томонидан қўллаб-қувватлаш тўғрисидаги битимни белгиланган тартибда тасдиқлаш юзасидан қарор лойиҳасини ишлаб чиқиш ва Вазирлар Маҳкамасига киритиш. 2026 йил октябрь Иқтисодиёт ва молия вазирлиги, «Иссиқликтаъминоти» АЖ, Қурилиш ва уй-жой коммунал хўжалиги вазирлиги 6. Давлат шериги томонидан хусусий шерикдан харид қилинадиган иссиқлик энергияси тўловларни аҳолига пасайтирилган тарифларни қўллаш натижасида маҳаллий бюджетдан қопланадиган субсидия маблағларида инобатга олинишини таъминлаш. Доимий Иқтисодиёт ва молия вазирлиги, «Иссиқликтаъминоти» АЖ, Қурилиш ва уй-жой коммунал хўжалиги вазирлиги 7. Давлат шеригига бошқа зарур лицензиялар қаторида электр энергияси савдоси фаолиятини амалга ошириш учун лицензияни олиш жараёнлари билан боғлиқ зарур чора-тадбирларни амалга оширишда кўмаклашиш. 2027 йил сентябрь Энергетика бозорини ривожлантириш ва тартибга солиш агентлиги, «Иссиқликтаъминоти» АЖ, Рақобатни ривожлантириш ва истеъмолчилар ҳуқуқларини ҳимоя қилиш қўмитаси, Энергетика вазирлиги 8. Давлат шериги ва «Ўзэнергосотиш» АЖ ўртасида электр энергиясини харид қилиш тўғрисидаги битим тўғридан-тўғри тузилишини ташкил этиш. Бунда хусусий шерикдан сотиб олинган электр энергиясининг бир қисмини давлат шериги ўз эҳтиёжлари учун ишлатишини ва ортиқча қисми эса «Ўзэнергосотиш» АЖга сотилишини таъминлаш. 2027 йил сентябрь «Ўзэнергосотиш» АЖ, «Иссиқликтаъминоти» АЖ, Энергетика вазирлиги, Саноат кооперацияси ва давлат харидлари агентлиги 9. Лойиҳани амалга ошириш учун газ, иссиқлик, ҳаво электр узатиш тармоқларини ва электр инфратузилмаси қурилмаларини қуриш учун зарур ер участкаларини танлаб олиш ҳамда уларнинг чегараларига аниқлик киритиш, тегишлилиги бўйича оммавий сервитут белгилаш ва заруратга кўра ер фонди тоифасини ўзгартириш юзасидан Қишлоқ хўжалигига мўлжалланган ва ўрмон фонди ерларининг ер фонди тоифаларини ўзгартириш масалаларини кўриб чиқиш бўйича Ҳукумат комиссиясига таклифларни киритиш. 2026 йил декабрь Қорақалпоғистон Республикаси Вазирлар Кенгаши, «Иссиқликтаъминоти» АЖ, Энергетика вазирлиги, Қишлоқ хўжалигига мўлжалланган ва ўрмон фонди ерларининг ер фонди тоифаларини ўзгартириш масалаларини кўриб чиқиш бўйича Ҳукумат комиссияси, Қишлоқ хўжалиги вазирлиги, Қурилиш ва уй-жой коммунал хўжалиги вазирлиги, Кадастр агентлиги, «Ҳудудгазтаъминот» АЖ, «Ўзбекистон миллий электр тармоқлари» АЖ, «Миллий диспетчерлик маркази» давлат унитар корхонаси 10. Хусусий шерикнинг буюртманомасига асосан жалб қилинадиган хорижий мутахассислар ҳамда уларнинг оила аъзолари учун кириш визаларини, зарур ҳолларда, И.Каримов номидаги Тошкент халқаро аэропортида белгиланган тартибда расмийлаштириш. Доимий Ташқи ишлар вазирлиги 11. Хусусий шерикнинг буюртманомасига асосан жалб этиладиган хорижий мутахассислар ва уларнинг оила аъзоларига кўп марталик визалар бериш ва унинг муддатини узайтириш, шунингдек, вақтинча турган жойи бўйича рўйхатга олиш ва унинг муддати узайтириш. Доимий Ички ишлар вазирлиги 12. Хусусий шерикнинг буюртманомасига асосан хорижий фуқароларга Ўзбекистон Республикаси ҳудудида меҳнат фаолияти билан шуғулланиш ҳуқуқини берувчи тасдиқномалар бериш. Доимий Камбағалликни қисқартириш ва бандлик вазирлиги 13. Заруриятга кўра, лойиҳани амалга ошириш учун зарур бўлган лойиҳа майдонида жойлашган мавжуд бинолар, иншоотлар ва бошқа активларни хатловдан ўтказишни ҳамда уларни битим шартларига мувофиқ эгалик қилиш ва фойдаланиш ҳуқуқи асосида хусусий шерикка беришни таъминлаш. 2026 йил сентябрь Қорақалпоғистон Республикаси Вазирлар Кенгаши, Қорақалпоғистон Республикаси «Коммунал иссиқлик таъминоти» МЧЖ, «Иссиқликтаъминоти» АЖ 14. Лойиҳа доирасида ер участкаларини ажратиш, сервитутлар белгилаш, ер тоифаларини ўзгартириш, кадастр ишлари ҳамда қонунчиликда назарда тутилган бошқа ер-мулк билан боғлиқ харажатларни қоплаш ишларини белгиланган тартибда амалга ошириш. 2026 йил декабрь Қорақалпоғистон Республикаси Вазирлар Кенгаши 15. Когенерация қурилмаси учун ер майдонини бўшатиш ва кейинчалик хусусий шерикка ижарага берилишини таъминлаш мақсадида лойиҳа майдонида жойлашган эскирган иншоотлар ва бошқа активларни истисно тариқасида демонтаж қилмасдан олдин мустақил баҳоловчи ташкилот томонидан баҳолатиб, сўнг аукцион савдосига чиқариб сотиш чораларини кўриш. 2026 йил сентябрь Қорақалпоғистон Республикаси Вазирлар Кенгаши, Қорақалпоғистон Республикаси «Коммунал иссиқлик таъминоти» МЧЖ, «Иссиқликтаъминоти» АЖ 16. Лойиҳани амалга ошириш доирасида қурилиш ва модернизация қилиш ишлари давомида барча ҳудудлардаги кўп йиллик ва қимматбаҳо дарахтларни сақлаб қолиш мақсадида уларни хатловдан ўтказиш ҳамда электрон платформага киритиш, шунингдек, дарахт-буталар ва яшил майдонларга зарар етказмаслик бўйича зарур чораларни кўриш. Бунда қурилиш жараёнларида ҳосил бўладиган маиший ва қурилиш чиқиндиларини ўз вақтида йиғиш, олиб чиқиш ва бартараф этиш, чанг тарқалишини камайтириш ҳамда объект атрофини доимий тозалаш бўйича чораларни кўриш. 2026 йил октябрь Қорақалпоғистон Республикаси Вазирлар Кенгаши, Қорақалпоғистон Республикаси «Коммунал иссиқлик таъминоти» МЧЖ, «Иссиқликтаъминоти» АЖ 17. Битимда назарда тутилган ҳажм ва параметрларга мувофиқ хусусий шерикнинг эҳтиёжлари учун табиий газни ва ичимлик сувини етказиб бериш бўйича тегишли шартномалар имзоланишини ташкил этиш. 2027 йил март «Ҳудудгазтаъминот» АЖ, «Ўзсувтаъминот» АЖ, «Иссиқликтаъминоти» АЖ, Энергетика вазирлиги, Қурилиш ва уй-жой коммунал хўжалиги вазирлиги 18. Когенерация қурилмасидан ишлаб чиқариладиган электр энергиясини марказий тармоққа боғловчи объектларни 35 кВ электр тармоғига улаш бўйича зарур тадбирларни ташкиллаштириш. 2027 йил сентябрь Энергетика вазирлиги, «Ўзбекистон миллий электр тармоқлари» АЖ, «Миллий диспетчерлик маркази» давлат унитар корхонаси 19. 1. Қорақалпоғистон Республикаси туман ва шаҳарларидаги кўп квартирали уйларни иссиқлик электр энергиясига бўлган талабини ўрганиш мақсадида хатловдан ўтказиш. 2026 йил сентябрь Қорақалпоғистон Республикаси Вазирлар Кенгаши, Қурилиш ва уй-жой коммунал хўжалиги вазирлиги, «Иссиқликтаъминоти» АЖ, 2. Ўтказилган хатлов натижасига кўра, Қорақалпоғистон Республикаси ах,олисини когенерация технологиялари асосида марказлашган иссиқлик энергияси билан таъминлаш лойиҳасини молиялаштириш учун 200 миллион АҚШ доллари миқдорида инвестицияларни жалб этиш, истиқболли инвесторлар ва халқаро молия институтлари билан музокаралар ўтказиб, келишувларга эришиш. 2026 йил октябрь Вазирлар Маҳкамаси (Ж. Ходжаев), Инвестиция, саноат ва савдо вазирлиги 3. Келишув натижаларига кўра, Ўзбекистон Республикаси Президенти қарори лойиҳасини ишлаб чиқиш. Бунда 5 йиллик дастур доирасида Қорақалпоғистон Республикаси аҳолисини тўлиқ марказлашган иссиқлик энергияси билан таъминлашни назарда тутиш. 2026 йил ноябрь Қурилиш ва уй-жой коммунал хўжалиги вазирлиги, Қорақалпоғистон Республикаси Вазирлар Кенгаши, «Иссиқликтаъминоти» АЖ
Ўзбекистон Республикаси Президенти Ш. МИРЗИЁЕВ
Тошкент ш.,
2026 йил 29 июль,
ПҚ-284-сон
Oʻzbekiston Respublikasi Prezidentining
qarori
VAZIFALAR
“YOʻL XARITASI”
“Nukus shahrining “RK-1” qozonxonasini kogeneratsiya texnologiyalari asosida modernizatsiya qilish” loyihasini davlat-xususiy sheriklik shartlari asosida amalga oshirish chora-tadbirlari toʻgʻrisida
Aholi va iqtisodiyot tarmoqlarini energiya resurslari bilan barqaror taʼminlash, elektr energiyasi va issiq suvni ishlab chiqarishda tabiiy gazdan foydalanish hajmini kamaytirish, shuningdek, issiqlik taʼminoti tizimini rivojlantirishga toʻgʻridan-toʻgʻri xorijiy investitsiyalarni faol jalb etish maqsadida qaror qilaman:
I. Maqsadlar
1. Quyidagilar “Nukus shahrining “RK-1” qozonxonasini kogeneratsiya texnologiyalari asosida modernizatsiya qilish” loyihasini (keyingi oʻrinlarda — Loyiha) davlat-xususiy sheriklik shartlari asosida amalga oshirishning asosiy maqsadlari etib belgilansin:
(a) Nukus shahrida markazlashgan issiqlik taʼminoti tizimini zamonaviy energiya tejamkor kogeneratsiya texnologiyalari asosida modernizatsiya qilish orqali aholi va iqtisodiyot tarmoqlarini barqaror elektr va issiqlik energiyasi bilan taʼminlash;
(b) Loyihani amalga oshirish doirasida infratuzilmani barpo etish maqsadida 28 km issiqlik tarmoqlarini qurish va 189 ta individual issiqlik punktlarini oʻrnatish bilan yopiq tizimga oʻtkazish orqali 10 320 nafar aholini elektr, 22 880 nafar aholini issiqlik energiyasi bilan taʼminlash;
(v) elektr energiyasi va issiq suv ishlab chiqarishda tabiiy gaz sarfini optimallashtirish, issiqlik tarmoqlaridagi yoʻqotishlarni 30 foizgacha kamaytirish va energiya samaradorligini 10 foizga oshirish;
(g) issiqlik taʼminoti sohasida davlat-xususiy sheriklik mexanizmlarini joriy etish hamda ushbu yoʻnalishga toʻgʻridan-toʻgʻri xorijiy investitsiyalarni jalb qilish.
2. “Nukus shahrining “RK-1” qozonxonasini kogeneratsiya texnologiyalari asosida modernizatsiya qilish” loyihasini amalga oshirishdagi ustuvor vazifalar 1-ilovaga muvofiq tasdiqlansin.
3. Loyiha doirasida:
(a) quyidagilar:
(i) Saudiya Arabistoni Qirolligining “Saudi Tabreed District Cooling” kompaniyasi (keyingi oʻrinlarda — Investor) tomonidan 20,3 million AQSH dollari miqdorida xorijiy investitsiya mablagʻlari jalb etilishi;
(ii) “Issiqliktaʼminoti” AJ davlat sherigi hamda Investor tomonidan masʼuliyati cheklangan jamiyat shaklida tashkil etiladigan maxsus loyiha kompaniyasi xususiy sherik etib belgilanishi maʼlumot uchun qabul qilinsin;
(b) quyidagilar xususiy sherikning majburiyatlari etib belgilansin:
(i) Nukus shahrining “RK-1” qozonxonasini kogeneratsiya texnologiyalari asosida modernizatsiya qilish;
(ii) elektr va issiqlik energiyasini ishlab chiqarish va davlat sherigiga belgilangan quvvat hamda kelishilgan narxlar boʻyicha yetkazib berish;
(v) quyidagilar davlat sherigining majburiyatlari etib belgilansin:
(i) zarur yer uchastkalarini davlat-xususiy sheriklik toʻgʻrisidagi bitimning (keyingi oʻrinlarda — Bitim) amal qilish muddatiga — 27 yilga ijaraga berish;
(ii) Bitim doirasida xususiy sherikka yuklangan majburiyatlar toʻliq va oʻz vaqtida bajarilishi ustidan monitoring qilinishini nazorat qilish;
(iii) Loyihani amalga oshirish mobaynida xususiy sherikdan elektr va issiqlik energiyasini belgilangan quvvat hamda kelishilgan narxlar asosida xarid qilish;
(iv) Loyihani Bitim imzolangandan boshlab 2 yillik qurilish davri bilan 27 yil muddatda amalga oshirish.
II. Kogeneratsiya texnologiyalari asosida elektr va issiqlik energiyasi ishlab chiqarishni tashkil etish chora-tadbirlari
4. Davlat sherigi kogeneratsiya qurilmasi orqali ishlab chiqariladigan elektr va issiqlik energiyasini Bitim shartlariga muvofiq xarid qilsin.
5. Davlat sherigi Loyihani davlat-xususiy sheriklik shartlari asosida amalga oshirish boʻyicha Investor bilan toʻgʻridan-toʻgʻri muzokaralar olib borsin.
6. Davlat sherigi ikki oy muddatda Iqtisodiyot va moliya vazirligi bilan kelishilgan holda xususiy sherik bilan issiqlik tarmoqlari, nasos stansiyalari, hisoblagichlar va individual isitish punktlarini, shuningdek, Loyiha doirasida zarur boʻlgan boshqa yordamchi infratuzilma obyektlarini loyihalash va qurish ishlarini moliyalashtirish boʻyicha tegishli kelishuvni imzolasin hamda mazkur ishlarni tashkil etish boʻyicha manzilli roʻyxatni tasdiqlasin. Bunda issiqlik tizimlarini modernizatsiya qilish ishlari doirasida quyidagilarga, istisno tariqasida, ruxsat beriladi:
(a) “Issiqliktaʼminoti” AJni mazkur ishlar boʻyicha yagona buyurtmachi sifatida belgilash;
(b) loyiha va pudrat tashkilotlarini “taklif soʻrovi” xarid qilish tartib-taomillari asosida aniqlash;
(v) 2027-yil 31-dekabrga qadar bosqichma-bosqich tayyorlanadigan loyiha asosida qurilish-montaj ishlarini amalga oshirish.
7. Bitimda quyidagilar inobatga olinsin:
(a) xususiy sherik tomonidan 21,5 MVt elektr quvvati va 52,5 Gkal issiqlik quvvatiga ega kogeneratsiya qurilmasini loyihalashtirish, moliyalashtirish, qurish, ishga tushirish, toʻliq ekspluatatsiya qilish, texnik xizmat koʻrsatish hamda Bitim muddati yakunlangach tizimni soz holatda va balans qiymati boʻyicha davlat sherigiga bepul topshirish;
(b) xususiy sherik tomonidan kogeneratsiya jarayoni natijasida hosil boʻladigan 18,1 Gkalgacha issiqlik energiyasini davlat sherigiga bepul asosda yetkazib berish;
(v) xususiy sherik qurilish davridagi oʻz majburiyatlari lozim darajada bajarilishining taʼminoti sifatida 500 ming AQSH dollari miqdorida birinchi darajali bank kafolatini taqdim etishi;
(g) xususiy sherikka elektr va issiqlik energiyasi uchun toʻlovlar Bitimda belgilangan mexanizmga muvofiq chet el valyutasida denominatsiyalangan qatʼiy tarif boʻyicha milliy valyutada amalga oshirilishi;
(d) davlat sherigi tomonidan Loyihani amalga oshirish jarayonida xususiy sherikdan elektr va issiqlik energiyasi “sotib olish yoki toʻlab berish” tamoyili asosida xarid qilinishi.
8. Quyidagilar:
(a) Qoraqalpogʻiston Respublikasi Vazirlar Kengashi va Nukus shahri hokimligi davlat sherigi bilan birgalikda “Qoraqalpogʻiston Respublikasi kommunal issiqlik taʼminoti” MCHJga doimiy foydalanish huquqi asosida ajratilgan Nukus shahri “Qurilish” MFY Abu-Rayhon Beruniy koʻchasidagi yer uchastkasining Loyihani amalga oshirish uchun tanlangan 0,75 ga qismiga nisbatan mavjud huquqlari bekor qilinishi va ushbu yer maydoni Nukus shahri hokimligi tasarrufidagi boʻsh turgan yer uchastkasi sifatida hisobga olinishini taʼminlasin;
(b) Qoraqalpogʻiston Respublikasi Vazirlar Kengashi Nukus shahri hokimligi tasarrufida boʻsh turgan yer uchastkasi sifatida roʻyxatga olingan mazkur yer uchastkasi Qoraqalpogʻiston Respublikasi Vazirlar Kengashi huzuridagi Tadbirkorlikka koʻmaklashish direksiyasiga (keyingi oʻrinlarda — Direksiya) doimiy foydalanish huquqi asosida ajratilishini taʼminlasin;
(v) Direksiya yer uchastkasi xususiy sherikka Bitimda koʻrsatilgan muddat va shartlar asosida ijaraga berilishini taʼminlasin;
(g) Bitimning amal qilish muddati tugaganda yoki muddatidan avval bekor qilinganda, loyiha hududidagi barcha mol-mulk, shu jumladan, xususiy sherikning mol-mulki davlat sherigiga Bitim shartlariga muvofiq oʻtkazilishi belgilansin. Bunda Bitimning amal qilish muddati tugaganda davlat sherigiga bepul topshiriladigan obyektlar Soliq kodeksining 243 va 304-moddalariga muvofiq soliq solishdan ozod etilishi va daromad sifatida hisobga olinmasligi maʼlumot uchun qabul qilinsin;
(d) Iqtisodiyot va moliya vazirligi bir oy muddatda Loyiha hududidagi koʻp kvartirali uylarning ichki issiqlik tizimlarini modernizatsiya qilish ishlari uchun zarur mablagʻlarni Oʻzbekiston Respublikasi respublika budjetining 2026-yildagi qoʻshimcha manbai hisobidan ajratish choralarini koʻrsin.
9. Loyihani amalga oshirish davrida davlat sherigiga quyidagi huquqlar berilsin:
(a) xususiy sherik bilan birgalikda Loyihani amalga oshirish uchun mustaqil injiniring kompaniyalari, shuningdek, boshqa texnik va yuridik maslahatchilarni tanlash va ularni “taklif soʻrovi” xarid qilish tartib-taomili asosida jalb qilish;
(b) Issiqlik va elektr energiyasini sotib olish toʻgʻrisidagi bitim boʻyicha toʻlov majburiyatlarining bajarilishi taʼminoti sifatida xususiy sherik foydasiga chet el bankining chet el valyutasida tasdiqlangan tiklanuvchi akkreditivini ochish;
(v) Bitim muddatidan oldin bekor qilingan taqdirda, unga muvofiq xususiy sherikka toʻlanishi lozim boʻlgan qoldiq toʻlovlar va Bitimni bekor qilish bilan bogʻliq kompensatsiya toʻlovlarini xususiy sherik koʻrsatgan xorijiy bank hisobvaragʻiga tegishli chet el valyutasida bevosita oʻtkazish;
(g) xususiy sherikdan elektr energiyasini sotib olish hamda uni elektr energiyasini markazlashgan tartibda xarid qilish va sotish boʻyicha vakolatli korxonalarga toʻgʻridan-toʻgʻri sotish;
(d) “Hududgaztaʼminot” aksiyadorlik jamiyati va “Oʻzsuvtaʼminot” aksiyadorlik jamiyati bilan Bitimda koʻzda tutilgan hajmlarga va parametrlarga muvofiq xususiy sherikni yetkazib beruvchi sifatida tabiiy gaz va ichimlik suvi bilan taʼminlash boʻyicha shartnomalarni imzolash.
10. Loyihani moliyalashtirish doirasida xususiy sherikka quyidagi huquqlar berilsin:
(a) Oʻzbekiston Respublikasidan tashqarida joylashgan chet el banklarida bank hisobvaraqlarini ochish va yuritish, mablagʻlarni qabul qilish, foydalanish va oʻtkazish (shu jumladan, oʻzining Oʻzbekistondagi bank hisobvaraqlaridan), shuningdek, dividendlar, qarz majburiyati boʻyicha toʻlovlar va boshqa mablagʻlarni chet el valyutasida oʻtkazish boʻyicha operatsiyalarni erkin amalga oshirish;
(b) barcha soliqlar va yigʻimlar toʻlangan holda Oʻzbekiston Respublikasidan tashqarida boʻlgan chet el pudrat tashkilotlari, yetkazib beruvchilari yoki kreditorlariga toʻlovlarni Oʻzbekiston Respublikasidagi bank hisobvaraqlari orqali oʻtkazmasdan, toʻgʻridan-toʻgʻri amalga oshirish;
(v) 2027-yil 31-dekabrga qadar bosqichma-bosqich tayyorlanadigan loyiha asosida qurilish-montaj ishlarini amalga oshirish.
11. Xususiy sherik 2030-yil 1-yanvarga qadar:
(a) belgilangan tartibda Vazirlar Mahkamasi tomonidan tasdiqlangan roʻyxati boʻyicha:
(i) chet eldan olib kelinadigan, Oʻzbekiston Respublikasida ishlab chiqarilmaydigan xomashyo va materiallar, uskuna, maxsus texnika, ularning ehtiyot va butlovchi qismlari, priborlar, texnik va loyiha hujjatlari, dasturiy taʼminotlar uchun bojxona boji hamda qoʻshilgan qiymat soligʻini toʻlashdan;
(ii) vaqtincha olib kirish bojxona rejimida olib kiriladigan uskuna va maxsus texnikalar, priborlar uchun bojxona bojini toʻlashdan;
(b) respublikada tegishli akkreditatsiya qilingan muvofiqlikni baholash organlari mavjud boʻlmagan taqdirda, chet eldan olib kiriladigan maxsus texnika va uskunalarni majburiy sertifikatlashdan ozod etilsin.
12. Energetika vazirligi hamda Iqtisodiyot va moliya vazirligi:
(a) “Oʻzbekiston milliy elektr tarmoqlari” AJ va “Hududgaztaʼminot” AJ bilan birgalikda Loyiha hududigacha elektr va gaz tarmoqlarini qurish ishlarini tashkil etsin. Bunda Iqtisodiyot va moliya vazirligi zarur mablagʻlarni bir oy muddatda Oʻzbekiston Respublikasi respublika budjetining 2026-yildagi qoʻshimcha manbai hisobidan ajratish choralarini koʻrsin;
(b) “Hududgaztaʼminot” AJ, “Oʻzbekiston milliy elektr tarmoqlari” AJ, “Oʻzenergosotish” AJ va “Oʻzsuvtaʼminot” AJ bilan birgalikda Bitimda nazarda tutilgan hajmlar va parametrlarga muvofiq tabiiy gaz va ichimlik suvi yetkazib berilmasligi natijasida davlat sherigi tomonidan xususiy sherikka toʻlanadigan zarar, jarimalar, boy berilgan foyda va boshqa kompensatsiya summalarini qoplash majburiyati yuzaga kelgan taqdirda, agar tegishli shartnomalarda boshqa qoidalar nazarda tutilmagan boʻlsa, tabiiy gaz va ichimlik suvini yetkazib beruvchi tashkilotlar davlat sherigi oldida qonunchilik hujjatlariga muvofiq subsidiar tartibida javobgar boʻlishi belgilansin. Bunda isteʼmolchilar tomonidan koʻrsatilgan xizmatlar uchun toʻlovlar oʻz vaqtida amalga oshirilmaganligi sababli tarmoqdan uzish, shuningdek, tabiiy gaz va ichimlik suvi tarmoqlaridagi rejali va avariyaviy uzilishlar natijasida yuzaga kelgan holatlar subsidiar tartibda javobgarlikni keltirib chiqarmaydi.
13. Energetika vazirligi, Iqtisodiyot va moliya vazirligi, “Hududgaztaʼminot” AJ, “Oʻzbekiston milliy elektr tarmoqlari” AJ, “Oʻzenergosotish” AJ va “Oʻzsuvtaʼminot” AJga Loyiha doirasidagi kogeneratsiya qurilmasini yagona elektr tarmogʻiga oʻz vaqtida ulash, shuningdek, xususiy sherik tomonidan ishlab chiqarilgan elektr energiyasi yagona elektr tarmogʻiga sotilishi jarayonida yagona elektr tarmogʻiga ulanish, elektr energiyasini xarid qilish va hisob-kitoblarni amalga oshirish masalalari boʻyicha kompleks muvofiqlashtirish va nazoratni taʼminlash vazifasi yuklansin.
14. Qoraqalpogʻiston Respublikasi Vazirlar Kengashi davlat sherigi bilan birgalikda bir oy muddatda Loyiha qamroviga kiruvchi Nukus shahridagi koʻp kvartirali uylarning ichki issiqlik tizimlarini modernizatsiya qilish ishlari boʻyicha manzilli roʻyxatni tasdiqlasin. Bunda ichki issiqlik tizimlarini modernizatsiya qilish ishlari doirasida quyidagilarga ruxsat beriladi:
(a) loyiha va pudrat tashkilotlarini “taklif soʻrovi” xarid qilish tartib-taomillari asosida aniqlash;
(b) 2027-yil 31-dekabrga qadar bosqichma-bosqich tayyorlanadigan loyiha asosida qurilish-montaj ishlarini amalga oshirish.
15. “Nukus shahrining “RK-1” qozonxonasini kogeneratsiya texnologiyalari asosida modernizatsiya qilish” loyihasini amalga oshirish boʻyicha “yoʻl xaritasi” 2-ilovaga muvofiq tasdiqlansin.
III. Qaror ijrosini tashkil etish, taʼminlash va nazorat
16. Qurilish va uy-joy kommunal xoʻjaligi vazirligi Iqtisodiyot va moliya vazirligi va Energetika vazirligi bilan birgalikda Loyihani amalga oshirish, shuningdek, tomonlarning Bitim va kelishuvlar doirasidagi majburiyatlarini bajarishi ustidan doimiy monitoring oʻrnatsin.
17. “Issiqliktaʼminoti” AJ boshqaruv raisi I.X. Turayevga Nukus shahrida koʻrsatilgan issiqlik taʼminoti xizmatlari uchun isteʼmolchilardan toʻlovlarni belgilangan muddatda undirish boʻyicha shaxsiy masʼuliyat yuklatilsin.
18. Loyiha doirasida moliyaviy majburiyatlar, tariflar boʻyicha kompensatsiya mexanizmlari, davlat tomonidan qoʻllab-quvvatlash uchun masʼul va shaxsan javobgar etib Bosh vazir oʻrinbosari — iqtisodiyot va moliya vaziri J.A. Qoʻchqorov belgilansin.
19. Mazkur qaror ijrosini samarali tashkil qilishga masʼul va shaxsan javobgar etib qurilish va uy-joy kommunal xoʻjaligi vaziri Sh.S. Xidoyatov, energetika vaziri Sh.X. Xodjayev va “Issiqliktaʼminoti” AJ boshqaruvi raisi I.X. Turayev belgilansin.
20. Qaror ijrosini nazorat qilish va ijro uchun masʼul tashkilotlar faoliyatini muvofiqlashtirish Oʻzbekiston Respublikasi Bosh vaziri A.N. Aripov zimmasiga yuklansin.
Oʻzbekiston Respublikasi Prezidentining 2026-yil 29-iyuldagi PQ-284-son qaroriga 1-ILOVA
“Nukus shahrining “RK-1” qozonxonasini kogeneratsiya texnologiyalari asosida modernizatsiya qilish” loyihasini amalga oshirishdagi ustuvor
1. Kogeneratsiya qurilmasidan ishlab chiqariladigan elektr energiyasi va issiqlik energiyasini xususiy sherikdan bitimning butun amal qilish muddatida xarid qilish hamda “Oʻzbekiston milliy elektr tarmoqlari” AJga va issiqlik tarmoqlariga yetkazib berilishini taʼminlash.
2. Qoraqalpogʻiston Respublikasi Vazirlar Kengashi tomonidan davlat sherigi bilan birgalikda aholi va obyektlarda qoʻllanilayotgan qoʻlbola isitish vositalarini bosqichma-bosqich xavfsiz va samarador isitish tizimlariga oʻtkazish.
3. Energiya samaradorligini oshirish va hisob-kitoblar shaffofligini taʼminlash maqsadida Qoraqalpogʻiston Respublikasi Vazirlar Kengashi tomonidan davlat sherigi bilan birgalikda loyiha qurilish ishlari yakuniga qadar quyidagilar taʼminlanadi:
(a) yopiq issiqlik taʼminoti tizimiga oʻtish, bunda koʻp kvartirali uylarda va obyektlarda individual issiqlik punktlarini oʻrnatish, ichki tizimlarni yangilash, avtomatika va boshqaruv elementlarini joriy etish;
(b) kogeneratsiya qurilmasi hududidagi issiqlik, tabiiy gaz va suv hisoblagichlari hamda boshqa oʻlchov vositalarini oʻrnatish, shuningdek, avtomatlashtirilgan dispetcherlik tizimini joriy etish, tezkor boshqaruv punktini tashkil qilish va xususiy sherik tomonidan loyiha doirasida amalga oshiriladigan raqamlashtirilgan boshqaruv tizimlarining yagona avtomatlashtirilgan dispetcherlik markaziga integratsiyasini tashkil etish, masofaviy monitoringni taʼminlash;
(v) issiqlik tarmoqlarida yoʻqotishlarni kamaytirish uchun oldindan izolyatsiyalangan quvurlardan foydalangan holda issiqlik tarmoqlarini qurish va rekonstruksiya qilish, gidravlik sinov hamda balanslash ishlarini tashkil etish.
4. Xususiy sherik tomonidan kogeneratsiya qurilmasida, shu jumladan, uni avtomatlashtirish va SCADA tizimidan foydalanish boʻyicha issiqlik taʼminoti xodimlarini oʻqitishni taʼminlash.
Oʻzbekiston Respublikasi Prezidentining 2026-yil 29-iyuldagi PQ-284-son qaroriga 2-ILOVA
“Nukus shahrining “RK-1” qozonxonasini kogeneratsiya texnologiyalari asosida modernizatsiya qilish” loyihasini amalga oshirish boʻyicha
T/r Chora-tadbirlar nomi Ijro muddati Masʼul ijrochilar 1. Xususiy sherik bilan birgalikda loyiha konsepsiyasi va loyihani baholash hujjatlarini ishlab chiqib, kelishish uchun Iqtisodiyot va moliya vazirligiga kiritish. 2026-yil sentabr “Issiqliktaʼminoti” AJ, Qurilish va uy-joy kommunal xoʻjaligi vazirligi, Iqtisodiyot va moliya vazirligi 2. Xususiy sherik va davlat sherigi tomonidan ishlab chiqilgan hujjatlar asosida loyiha konsepsiyasi va baholash hujjatini kelishib, tasdiqlash uchun Vazirlar Mahkamasiga kiritish. 2026-yil sentabr Iqtisodiyot va moliya vazirligi, “Issiqliktaʼminoti” AJ, Qurilish va uy-joy kommunal xoʻjaligi vazirligi 3. Xususiy sherik bilan davlat-xususiy sheriklik loyihasini amalga oshirish uchun mazkur qarorda belgilangan shartlar asosida davlat-xususiy sheriklik toʻgʻrisidagi bitim imzolanishini tashkil etish. 2026-yil sentabr “Issiqliktaʼminoti” AJ, Qurilish va uy-joy kommunal xoʻjaligi vazirligi, Energetika vazirligi, Iqtisodiyot va moliya vazirligi 4. Xususiy sherik bilan davlat tomonidan qoʻllab-quvvatlash toʻgʻrisidagi bitim imzolanishini taʼminlash. 2026-yil oktabr Iqtisodiyot va moliya vazirligi, “Issiqliktaʼminoti” AJ, Qurilish va uy-joy kommunal xoʻjaligi vazirligi 5. Imzolangan davlat-xususiy sheriklik toʻgʻrisidagi bitim va davlat tomonidan qoʻllab-quvvatlash toʻgʻrisidagi bitimni belgilangan tartibda tasdiqlash yuzasidan qaror loyihasini ishlab chiqish va Vazirlar Mahkamasiga kiritish. 2026-yil oktabr Iqtisodiyot va moliya vazirligi, “Issiqliktaʼminoti” AJ, Qurilish va uy-joy kommunal xoʻjaligi vazirligi 6. Davlat sherigi tomonidan xususiy sherikdan xarid qilinadigan issiqlik energiyasi toʻlovlarni aholiga pasaytirilgan tariflarni qoʻllash natijasida mahalliy budjetdan qoplanadigan subsidiya mablagʻlarida inobatga olinishini taʼminlash. Doimiy Iqtisodiyot va moliya vazirligi, “Issiqliktaʼminoti” AJ, Qurilish va uy-joy kommunal xoʻjaligi vazirligi 7. Davlat sherigiga boshqa zarur litsenziyalar qatorida elektr energiyasi savdosi faoliyatini amalga oshirish uchun litsenziyani olish jarayonlari bilan bogʻliq zarur chora-tadbirlarni amalga oshirishda koʻmaklashish. 2027-yil sentabr Energetika bozorini rivojlantirish va tartibga solish agentligi, “Issiqliktaʼminoti” AJ, Raqobatni rivojlantirish va isteʼmolchilar huquqlarini himoya qilish qoʻmitasi, Energetika vazirligi 8. Davlat sherigi va “Oʻzenergosotish” AJ oʻrtasida elektr energiyasini xarid qilish toʻgʻrisidagi bitim toʻgʻridan-toʻgʻri tuzilishini tashkil etish. Bunda xususiy sherikdan sotib olingan elektr energiyasining bir qismini davlat sherigi oʻz ehtiyojlari uchun ishlatishini va ortiqcha qismi esa “Oʻzenergosotish” AJga sotilishini taʼminlash. 2027-yil sentabr “Oʻzenergosotish” AJ, “Issiqliktaʼminoti” AJ, Energetika vazirligi, Sanoat kooperatsiyasi va davlat xaridlari agentligi 9. Loyihani amalga oshirish uchun gaz, issiqlik, havo elektr uzatish tarmoqlarini va elektr infratuzilmasi qurilmalarini qurish uchun zarur yer uchastkalarini tanlab olish hamda ularning chegaralariga aniqlik kiritish, tegishliligi boʻyicha ommaviy servitut belgilash va zaruratga koʻra yer fondi toifasini oʻzgartirish yuzasidan Qishloq xoʻjaligiga moʻljallangan va oʻrmon fondi yerlarining yer fondi toifalarini oʻzgartirish masalalarini koʻrib chiqish boʻyicha Hukumat komissiyasiga takliflarni kiritish. 2026-yil dekabr Qoraqalpogʻiston Respublikasi Vazirlar Kengashi, “Issiqliktaʼminoti” AJ, Energetika vazirligi, Qishloq xoʻjaligiga moʻljallangan va oʻrmon fondi yerlarining yer fondi toifalarini oʻzgartirish masalalarini koʻrib chiqish boʻyicha Hukumat komissiyasi, Qishloq xoʻjaligi vazirligi, Qurilish va uy-joy kommunal xoʻjaligi vazirligi, Kadastr agentligi, “Hududgaztaʼminot” AJ, “Oʻzbekiston milliy elektr tarmoqlari” AJ, “Milliy dispetcherlik markazi” davlat unitar korxonasi 10. Xususiy sherikning buyurtmanomasiga asosan jalb qilinadigan xorijiy mutaxassislar hamda ularning oila aʼzolari uchun kirish vizalarini, zarur hollarda, I.Karimov nomidagi Toshkent xalqaro aeroportida belgilangan tartibda rasmiylashtirish. Doimiy Tashqi ishlar vazirligi 11. Xususiy sherikning buyurtmanomasiga asosan jalb etiladigan xorijiy mutaxassislar va ularning oila aʼzolariga koʻp martalik vizalar berish va uning muddatini uzaytirish, shuningdek, vaqtincha turgan joyi boʻyicha roʻyxatga olish va uning muddati uzaytirish. Doimiy Ichki ishlar vazirligi 12. Xususiy sherikning buyurtmanomasiga asosan xorijiy fuqarolarga Oʻzbekiston Respublikasi hududida mehnat faoliyati bilan shugʻullanish huquqini beruvchi tasdiqnomalar berish. Doimiy Kambagʻallikni qisqartirish va bandlik vazirligi 13. Zaruriyatga koʻra, loyihani amalga oshirish uchun zarur boʻlgan loyiha maydonida joylashgan mavjud binolar, inshootlar va boshqa aktivlarni xatlovdan oʻtkazishni hamda ularni bitim shartlariga muvofiq egalik qilish va foydalanish huquqi asosida xususiy sherikka berishni taʼminlash. 2026-yil sentabr Qoraqalpogʻiston Respublikasi Vazirlar Kengashi, Qoraqalpogʻiston Respublikasi “Kommunal issiqlik taʼminoti” MCHJ, “Issiqliktaʼminoti” AJ 14. Loyiha doirasida yer uchastkalarini ajratish, servitutlar belgilash, yer toifalarini oʻzgartirish, kadastr ishlari hamda qonunchilikda nazarda tutilgan boshqa yer-mulk bilan bogʻliq xarajatlarni qoplash ishlarini belgilangan tartibda amalga oshirish. 2026-yil dekabr Qoraqalpogʻiston Respublikasi Vazirlar Kengashi 15. Kogeneratsiya qurilmasi uchun yer maydonini boʻshatish va keyinchalik xususiy sherikka ijaraga berilishini taʼminlash maqsadida loyiha maydonida joylashgan eskirgan inshootlar va boshqa aktivlarni istisno tariqasida demontaj qilmasdan oldin mustaqil baholovchi tashkilot tomonidan baholatib, soʻng auksion savdosiga chiqarib sotish choralarini koʻrish. 2026-yil sentabr Qoraqalpogʻiston Respublikasi Vazirlar Kengashi, Qoraqalpogʻiston Respublikasi “Kommunal issiqlik taʼminoti” MCHJ, “Issiqliktaʼminoti” AJ 16. Loyihani amalga oshirish doirasida qurilish va modernizatsiya qilish ishlari davomida barcha hududlardagi koʻp yillik va qimmatbaho daraxtlarni saqlab qolish maqsadida ularni xatlovdan oʻtkazish hamda elektron platformaga kiritish, shuningdek, daraxt-butalar va yashil maydonlarga zarar yetkazmaslik boʻyicha zarur choralarni koʻrish. Bunda qurilish jarayonlarida hosil boʻladigan maishiy va qurilish chiqindilarini oʻz vaqtida yigʻish, olib chiqish va bartaraf etish, chang tarqalishini kamaytirish hamda obyekt atrofini doimiy tozalash boʻyicha choralarni koʻrish. 2026-yil oktabr Qoraqalpogʻiston Respublikasi Vazirlar Kengashi, Qoraqalpogʻiston Respublikasi “Kommunal issiqlik taʼminoti” MCHJ, “Issiqliktaʼminoti” AJ 17. Bitimda nazarda tutilgan hajm va parametrlarga muvofiq xususiy sherikning ehtiyojlari uchun tabiiy gazni va ichimlik suvini yetkazib berish boʻyicha tegishli shartnomalar imzolanishini tashkil etish. 2027-yil mart “Hududgaztaʼminot” AJ, “Oʻzsuvtaʼminot” AJ, “Issiqliktaʼminoti” AJ, Energetika vazirligi, Qurilish va uy-joy kommunal xoʻjaligi vazirligi 18. Kogeneratsiya qurilmasidan ishlab chiqariladigan elektr energiyasini markaziy tarmoqqa bogʻlovchi obyektlarni 35 kV elektr tarmogʻiga ulash boʻyicha zarur tadbirlarni tashkillashtirish. 2027-yil sentabr Energetika vazirligi, “Oʻzbekiston milliy elektr tarmoqlari” AJ, “Milliy dispetcherlik markazi” davlat unitar korxonasi 19. 1. Qoraqalpogʻiston Respublikasi tuman va shaharlaridagi koʻp kvartirali uylarni issiqlik elektr energiyasiga boʻlgan talabini oʻrganish maqsadida xatlovdan oʻtkazish. 2026-yil sentabr Qoraqalpogʻiston Respublikasi Vazirlar Kengashi, Qurilish va uy-joy kommunal xoʻjaligi vazirligi, “Issiqliktaʼminoti” AJ, 2. Oʻtkazilgan xatlov natijasiga koʻra, Qoraqalpogʻiston Respublikasi ax,olisini kogeneratsiya texnologiyalari asosida markazlashgan issiqlik energiyasi bilan taʼminlash loyihasini moliyalashtirish uchun 200 million AQSH dollari miqdorida investitsiyalarni jalb etish, istiqbolli investorlar va xalqaro moliya institutlari bilan muzokaralar oʻtkazib, kelishuvlarga erishish. 2026-yil oktabr Vazirlar Mahkamasi (J. Xodjayev), Investitsiya, sanoat va savdo vazirligi 3. Kelishuv natijalariga koʻra, Oʻzbekiston Respublikasi Prezidenti qarori loyihasini ishlab chiqish. Bunda 5 yillik dastur doirasida Qoraqalpogʻiston Respublikasi aholisini toʻliq markazlashgan issiqlik energiyasi bilan taʼminlashni nazarda tutish. 2026-yil noyabr Qurilish va uy-joy kommunal xoʻjaligi vazirligi, Qoraqalpogʻiston Respublikasi Vazirlar Kengashi, “Issiqliktaʼminoti” AJ
Oʻzbekiston Respublikasi Prezidenti Sh. MIRZIYOYEV
Toshkent sh.,
2026-yil 29-iyul,
PQ-284-son