UzbekAI

ЎЗБЕКИСТОН РЕСПУБЛИКАСИ ВАЗИРЛАР МАҲКАМАСИНИНГ

ҚАРОРИ

НИЗОМ

НИЗОМ

Ўзбекистон Республикаси Қишлоқ хўжалиги вазирлиги ҳузуридаги Чорвачилик ва яйлов хўжалигини ривожлантириш агентлиги фаолиятини тартибга солувчи норматив-ҳуқуқий ҳужжатларни тасдиқлаш тўғрисида

Ўзбекистон Республикаси Президентининг «Озиқ-овқат маҳсулотлари хавфсизлиги, фитосанитария ва ветеринария бўйича ягона давлат бошқаруви ва назорат тизимини жорий этиш чора-тадбирлари тўғрисида» 2026 йил 12 майдаги ПФ-84-сон Фармони ҳамда «Чорвачилик тармоғи ва яйлов хўжалигини замонавий бошқарув тизими ва янгича ёндашувлар асосида ривожлантириш чора-тадбирлари тўғрисида» 2025 йил 12 майдаги ПҚ-179-сон қарори ижросини таъминлаш мақсадида Вазирлар Маҳкамаси қарор қилади:

1. Ўзбекистон Республикаси Президентининг «Озиқ-овқат маҳсулотлари хавфсизлиги, фитосанитария ва ветеринария бўйича ягона давлат бошқаруви ва назорат тизимини жорий этиш чора-тадбирлари тўғрисида» 2026 йил 12 майдаги ПФ-84-сон Фармонига мувофиқ:

Қишлоқ хўжалиги вазирлиги ҳузурида Чорвачилик ва яйлов хўжалигини ривожлантириш агентлиги (кейинги ўринларда — Агентлик) ташкил этилгани;

Агентлик чорвачилик, шу жумладан, наслчиликни ривожлантириш, яйловлардан фойдаланиш ва уларни муҳофаза қилиш қисмида Ветеринария ва чорвачиликни ривожлантириш қўмитасининг функциялари, ҳуқуқлари, мажбуриятлари, шартномалари ва халқаро битимлари бўйича ҳуқуқий вориси этиб белгилангани маълумот учун қабул қилинсин.

2. Қуйидагилар:

Ўзбекистон Республикаси Қишлоқ хўжалиги вазирлиги ҳузуридаги Чорвачилик ва яйлов хўжалигини ривожлантириш агентлиги тўғрисидаги низом 1-иловага мувофиқ;

Чорвачилик ва яйлов хўжалигини ривожлантириш агентлиги ҳузуридаги Чорвачилик тармоқларини қўллаб-қувватлаш жамғармаси маблағларини шакллантириш ва улардан фойдаланиш тартиби тўғрисидаги низом 2-иловага мувофиқ тасдиқлансин.

3. Ушбу қарорнинг бажарилишини назорат қилиш Ўзбекистон Республикаси Бош вазирининг ўринбосари Ж.А. Ходжаев ҳамда қишлоқ хўжалиги вазири И.Ю. Абдурахмонов зиммасига юклансин.

Вазирлар Маҳкамасининг 2026 йил 31 июлдаги 426-сон қарорига 1-ИЛОВА

Ўзбекистон Республикаси Қишлоқ хўжалиги вазирлиги ҳузуридаги Чорвачилик ва яйлов хўжалигини ривожлантириш агентлиги тўғрисида

1-боб. Умумий қоидалар

1. Ушбу Низом Ўзбекистон Республикаси Қишлоқ хўжалиги вазирлиги ҳузуридаги Чорвачилик ва яйлов хўжалигини ривожлантириш агентлигининг (кейинги ўринларда — Агентлик) мақоми, асосий вазифалари, функциялари, ҳуқуқлари ва жавобгарлигини, фаолиятини ташкил этиш ва ҳисобот бериш тартибини, шунингдек, унинг раҳбарларининг функционал вазифалари ва масъулиятини белгилайди.

2. Агентлик республикада чорвачилик соҳасини ривожлантириш, яйловлардан оқилона ва самарали фойдаланиш бўйича стратегик режалаштириш, ҳудудлар кесимида соҳа йўналишларини белгилаш ҳамда чорвачилик маҳсулотлари ишлаб чиқаришни кўпайтиришга оид бизнес лойиҳаларни қўллаб-қувватлаш, методологик таъминлаш ҳамда мониторингини юритишда республика ижро этувчи ҳокимият органи ҳисобланади.

3. Агентлик ўз фаолияти бўйича Вазирлар Маҳкамаси ва Ўзбекистон Республикаси Қишлоқ хўжалиги вазирлигига ҳисобот беради.

4. Агентлик ўз фаолиятида Ўзбекистон Республикаси Конституцияси ва қонунларига, Ўзбекистон Республикаси Олий Мажлиси палаталарининг қарорларига, Ўзбекистон Республикаси Президентининг фармонлари, қарорлари ва фармойишларига, Вазирлар Маҳкамасининг қарорлари ва фармойишларига, Ўзбекистон Республикаси Қишлоқ хўжалиги вазирлигининг буйруқлари ҳамда ушбу Низомга, шунингдек, бошқа қонунчилик ҳужжатларига амал қилади.

5. Агентлик, унинг таркибидаги Қорақалпоғистон Республикаси ва вилоятлар бошқармалари (кейинги ўринларда — ҳудудий бошқармалар) юридик шахс ҳисобланади, Ўзбекистон Республикаси Давлат герби тасвири туширилган ва ўз номи давлат тилида ёзилган муҳрга ва бланкаларга, мустақил балансга, Ўзбекистон Республикаси Иқтисодиёт ва молия вазирлиги ҳузуридаги Ғазначилик хизмати қўмитасида шахсий ғазна ҳисобварақларига, шу жумладан, хорижий валютадаги шахсий ғазна ҳисобварақларига эга бўлади.

6. Агентликнинг расмий номи:

а) давлат тилида:

тўлиқ номи — Ўзбекистон Республикаси Қишлоқ хўжалиги вазирлиги ҳузуридаги Чорвачилик ва яйлов хўжалигини ривожлантириш агентлиги;

қисқартирилган номи — Чорвачилик агентлиги;

б) рус тилида:

тўлиқ номи — Агентство по развитию животновдства и пастбищного хозяйства при Министерстве сельского хозяйства Республики Узбекистан;

қисқартирилган номи — Агентство по животноводству;

в) инглиз тилида:

тўлиқ номи — Agency for the Development of Livestock and Pasture Management under the Ministry of Agriculture of the Republic of Uzbekistan;

қисқартирилган номи — Agency for Livestock Development.

7. Агентлик жойлашган жой (почта манзили): 100123, Тошкент шаҳри, Чилонзор тумани, Кичик ҳалқа йўли кўчаси, 21а-уй.

2-боб. Агентликнинг тузилмаси, унинг асосий вазифалари ва функциялари

8. Агентлик тузилмасига қуйидагилар киради:

Агентликнинг марказий аппарати;

ҳудудий бошқармалар ва туман (шаҳар)лардаги вакиллари;

Наслчилик илмий-ишлаб чиқариш маркази.

9. Қуйидагилар Агентликнинг асосий вазифалари ҳисобланади:

чорвачиликнинг барча тармоқларини ривожлантириш, наслчилик-селекция ишларини такомиллаштириш, сунъий уруғлантиришни ташкил этиш, чорвачилик маҳсулотлари ишлаб чиқариш ҳажмларини кўпайтириш, чорва озуқа базасини мустаҳкамлаш;

соҳанинг ривожлантириш дастурлари ва «йўл хариталари»ни тайёрлаш, ҳудудлар кесимида устувор йўналишлар ва уларнинг ихтисослашувини белгилаш;

чорвачилик тармоқлари инфратузилмасини, жумладан, сунъий уруғлантириш пунктлари, сўйиш майдончалари, сут қабул қилиш пунктлари, лабораториялар, омборлар, чорвачилик мажмуалари, қайта ишлаш корхоналари ҳамда логистикани ривожлантириш;

чорвачилик тармоқларида самарали бизнес моделларини жорий қилиш, тармоқларнинг инвестиция жозибадорлигини ошириш, қайта ишлаш ва қўшилган қиймат занжирларини ривожлантириш, хорижий инвестициялар ва грантларни жалб қилиш;

чорвачилик тармоқларида замонавий технологиялар ва инновацияларни жорий этиш, рақамли ечимлар, автоматлаштириш тизимлари, шунингдек, чорва молларини парваришлаш, озиқлантириш ва кўпайтиришнинг замонавий усулларини кенг татбиқ қилиш;

чорвачиликда соф генофондни сақлаб қолиш ва ривожлантириш, илмий-тадқиқот муассасалари томонидан ишлаб чиқилган наслчилик-селекция дастурларини амалиётга татбиқ этиш ва мувофиқлаштириш;

чорвачиликда наслдорлик ва маҳсулдорлик кўрсаткичларини яхшилаш мақсадида наслчилик ресурсларини яратиш, сақлаш, такрор кўпайтириш ва улардан оқилона фойдаланиш;

чорва моллари бош сони, маҳсулдорлик, ишлаб чиқариш ҳажми, нархлар, инвестициялар ва экспорт кўрсаткичлари ҳамда тегишли ер участкаларида озуқабоп экинлар етиштирилиши бўйича маълумотларни йиғиш, таҳлил қилиш ва мониторинг қилиш;

яйлов ерларидан самарали ва мақсадли фойдаланиш, уларни муҳофаза қилиш, деградациянинг олдини олиш, ўсимликлар табиий плантацияларини яратишга қаратилган чора-тадбирлар ишлаб чиқиш;

яйловларда ўсимликлар уруғчилигини ривожлантириш, яйлов ерларини ижарага беришни ташкил этиш, шартномавий муносабатларни мониторинг қилиш;

қоракўл зотининг генофондини сақлаш, такрор кўпайтириш, селекция-наслчилик ишлари режаларини амалиётга татбиқ этиш ҳамда инфратузилмаларни яхшилаш бўйича таклифлар ишлаб чиқиш.

Агентликка қонунчилик ҳужжатларига мувофиқ бошқа вазифалар ҳам юкланиши мумкин.

10. Агентлик ўзига юкланган вазифаларга мувофиқ қуйидаги функцияларни амалга оширади:

а) чорвачиликнинг барча тармоқларини ривожлантириш, наслчилик-селекция ишларини такомиллаштириш, сунъий уруғлантиришни ташкил этиш, чорвачилик маҳсулотлари ишлаб чиқариш ҳажмларини кўпайтириш, чорва озуқа базасини мустаҳкамлашда :

республикада қорамолчилик, қўйчилик, эчкичилик, паррандачилик, йилқичилик, туячилик, қуёнчилик, асаларичилик, қоракўлчилик ва бошқа ёндош тармоқларни ривожлантириш;

чорвачилик соҳасида наслчилик-селекция ишларини такомиллаштириш ва наслчилик ресурсларини кўпайтириш ҳамда маҳсулдорликни ошириш;

наслни яхшиловчи юқори генетик маҳсулдорлик хусусиятига эга бўлган турли зотлардаги наслдор чорва молларидан олинган уруғ билан чорва молларини сунъий уруғлантириш;

янги озуқа-ем ишлаб чиқариш қувватларини ташкил этиш, мавжуд ишлаб чиқариш қувватларини модернизация қилиш ҳамда таркиби кучайтирилган озуқа-ем ишлаб чиқариш ҳажмларини кўпайтириш бўйича таклифлар ишлаб чиқиш;

чорвачилик соҳасида озуқа-ем базасини мустаҳкамлаш ва озуқабоп экинлар уруғчилигини йўлга қўйиш;

Ўзбекистон Республикаси Конституцияси ва қонунлари, Ўзбекистон Республикаси Олий Мажлиси палаталарининг қарорлари, Ўзбекистон Республикаси Президентининг фармонлари, қарорлари ва фармойишлари, Вазирлар Маҳкамасининг қарорлари ва фармойишлари, Ўзбекистон Республикаси Қишлоқ хўжалиги вазирлигининг буйруқлари ҳамда ушбу Низом талаблари ҳудудий бошқармалар ва тизим ташкилотларида бажарилишини ўрганиш, мониторингини юритиш ва амалий ёрдам кўрсатиш;

соҳани ривожлантириш ва маҳсулот ишлаб чиқариш ҳажмини кўпайтиришга оид дастурлар ҳамда норматив-ҳуқуқий ва бошқа ҳужжатлар лойиҳаларини ишлаб чиқиш, шунингдек, ўз ваколатлари доирасида уларнинг ижросини таъминлаш;

б) соҳани ривожлантириш дастурлари ва «йўл хариталари»ни тайёрлаш, ҳудудлар кесимида устувор йўналишлар ва уларнинг ихтисослашувини белгилашда :

соҳани ривожлантиришга оид материаллар ва ахборотларни тизимли равишда йиғиш, соҳа ривожланишига салбий таъсир кўрсатаётган муаммо ва камчиликларни республика ва маҳаллий ижро этувчи ҳокимият органлари билан биргаликда ўрганиш, таҳлил қилиш ҳамда уларни бартараф этиш юзасидан таклифлар ишлаб чиқиш;

чорвачилик соҳаси ва яйлов хўжалигини ривожлантиришга оид ўрта ва узоқ муддатли стратегияларни ҳамда уларни амалга ошириш концепциясини ишлаб чиқиш;

наслчилик-селекция дастурлари, услубий қўлланмалар ва тавсияларни ишлаб чиқиш ҳамда уларни амалиётга жорий қилиш;

в) чорвачилик тармоқлари инфратузилмасини, жумладан, сунъий уруғлантириш пунктлари, сўйиш майдончалари, сут қабул қилиш пунктлари, лабораториялар, омборлар, чорвачилик мажмуалари, қайта ишлаш корхоналари ҳамда логистикани ривожлантиришда :

республика ва маҳаллий ижро этувчи ҳокимият органлари билан биргаликда мавжуд маҳсулот ишлаб чиқариш қувватларидан самарали фойдаланиш, паст рентабелли корхоналарни иқтисодий соғломлаштириш бўйича таклифлар тайёрлаш;

чорвачилик тармоқлари инфратузилмасини яхшилаш, жумладан, сўйиш майдончалари, сутни қабул қилиш пунктлари, чорвачилик мажмуалари ҳамда логистикани ривожлантириш;

чорва молларини сунъий уруғлантириш, замонавий селекция ва биотехнология усулларини, жумладан, эмбрион кўчириб ўтказиш технологияларини кенг жорий қилиш, наслчилик материаллари ишлаб чиқаришни кўпайтириш орқали чорва молларида наслдорлик ва маҳсулдорликнинг сифат кўрсаткичларини яхшилаш;

г) чорвачилик тармоқларида самарали бизнес моделларини жорий қилиш, тармоқларнинг инвестиция жозибадорлигини ошириш, қайта ишлаш ва қўшилган қиймат занжирларини ривожлантириш, хорижий инвестициялар ва грантларни жалб қилишда :

ҳудудлар кесимида соҳа тармоқларини ривожлантиришни белгилаш ва чорвачилик маҳсулотлари ишлаб чиқаришни кўпайтиришга оид бизнес лойиҳаларни қўллаб-қувватлаш ҳамда соҳани методологик таъминлаш;

соҳада самарали бизнес моделларини республика ва маҳаллий ижро этувчи ҳокимият органлари билан биргаликда жорий қилиш, соҳа тармоқларида инвестиция жозибадорлигини ошириш, хомашёни чуқур қайта ишлаш ва қўшилган қиймат занжирини ривожлантириш;

соҳани давлат томонидан қўллаб-қувватлаш механизмларини ўрганиш ва такомиллаштиришга оид таклифлар ишлаб чиқиш;

соҳага хорижий инвестициялар ва грантларни жалб қилиш;

д) чорвачилик тармоқларига замонавий технологиялар ва инновацияларни жорий этиш, рақамли ечимлар, автоматлаштириш тизимлари, шунингдек, чорва молларини парваришлаш, озиқлантириш ва кўпайтиришнинг замонавий усулларини кенг татбиқ қилишда :

чорвачилик соҳасини стратегик режалаштириш, замонавий технологиялар ва инновацияларни жорий қилиш;

сунъий интеллектдан фойдаланган ҳолда рақамли ечимлар, автоматлаштириш тизимларининг хорижий илғор тажрибаларини амалиётга татбиқ этиш;

чорва молларини парваришлаш, озиқлантириш ва кўпайтиришнинг хорижий илғор тажрибаларини соҳага татбиқ этиш;

халқаро талаблар асосида чорвачилик маҳсулотларини сертификатлаш ва стандартлаш бўйича таклифлар ишлаб чиқиш, сифат менежментининг замонавий усулларини жорий қилиш;

е) чорвачиликда соф генофондни сақлаб қолиш ва ривожлантириш, илмий-тадқиқот муассасалари томонидан ишлаб чиқилган наслчилик-селекция дастурларини амалиётга татбиқ этиш ва мувофиқлаштиришда :

наслчилик ресурсларини яратиш, чорва моллари соф генофондини сақлаш, такрор кўпайтириш ва улардан самарали фойдаланишни ташкил этиш;

Наслчилик илмий-ишлаб чиқариш маркази ва наслчилик корхоналари билан биргаликда чорвачилик субъектлари ва аҳолини наслчилик материаллари билан таъминлаш;

илмий ташкилотлар билан биргаликда соҳани ривожлантиришга қаратилган илмий лойиҳаларни шакллантириш ва амалга оширишда иштирок этиш;

хорижий давлатларнинг илғор илмий-технологик ишланмалари, инновацион ғоялари, технологиялари ва тажрибаларини ўрганиш ҳамда уларни соҳа тармоқларига жорий қилиш;

сунъий уруғлантириш бўйича мутахассисларнинг малакасини оширишни ташкил этиш ҳамда соҳа бўйича етакчи хорижий илмий-тадқиқот институтлари ва марказлари билан ҳамкорликни ривожлантириш;

хорижий давлатларнинг наслчилик соҳасидаги илм-фан ютуқлари ва илғор тажрибаларини ўрганиш ҳамда уларни ҳудудларда жорий қилишга кўмаклашиш, соҳага оид семинар ва кўргазмаларни ташкил этиш;

ж) чорвачиликда наслдорлик ва маҳсулдорлик кўрсаткичларини яхшилаш мақсадида наслчилик ресурсларини яратиш, сақлаш, такрор кўпайтириш ва улардан оқилона фойдаланишда :

наслчилик билан шуғулланувчи субъектларга қонунчилик ҳужжатларида белгиланган тартибда наслчилик хўжалиги мақомини бериш;

наслдор чорва молларини урчитиш, наслли маҳсулотлар (материаллар) етиштириш ва улардан фойдаланишни тизимли йўлга қўйиш;

чорва моллари сонини кўпайтириш, уларнинг маҳсулдорлигини ошириш ва насл сифатини яхшилаш мақсадида хўжаликларда наслчилик ишларининг тизимли амалга оширилишини таъминлаш;

з) чорва моллари бош сони, маҳсулдорлик, ишлаб чиқариш ҳажми, нархлар, инвестициялар ва экспорт кўрсаткичлари ҳамда тегишли ер участкаларида озуқабоп экинлар етиштирилиши бўйича маълумотларни йиғиш, таҳлил қилиш ва мониторинг қилишда :

республикада чорва моллари бош сонини кўпайтириш, наслчилик-селекция ишларини тизимли ташкил этиш орқали маҳсулдорликни ошириш;

ҳудудлар кесимида соҳа тармоқларини таҳлил қилган ҳолда чорвачилик маҳсулотлари ишлаб чиқариш ҳажмини оширишга қаратилган ҳудудий дастурлар ишлаб чиқиш;

ички ва ташқи бозор эҳтиёжидан келиб чиққан ҳолда чорвачилик маҳсулотлари экспорти ва импортини тизимли таҳлил қилиш ҳамда маҳаллий ишлаб чиқарувчиларни қўллаб-қувватлаш юзасидан таклифлар тайёрлаш;

республика ва маҳаллий ижро этувчи ҳокимият органлари билан биргаликда чорвачилик субъектларига шартли мол бош сонидан келиб чиққан ҳолда экин ерлари ажратиш, шунингдек, уларга зарур озуқа экинлари уруғлари, ёнилғи-мойлаш материаллари, минерал ўғитлар ва кимёвий воситалар ва бошқа моддий ресурсларни етказиб беришни йўлга қўйиш;

республика ва маҳаллий ижро этувчи ҳокимият органлари билан биргаликда экин ерларига асосий, такрорий ва оралиқ озуқа экинларини жойлаштириш ва экиш ишларини ташкил этиш ҳамда алмашлаб экиш тизимини жорий қилиш;

озуқа экинлари етиштиришнинг самарали агротехнологиялари ҳамда чорва молларини озиқлантиришнинг илғор усуллари ва илмий ишланмаларини амалиётга татбиқ этиш;

и) яйлов ерларидан самарали ва мақсадли фойдаланиш, уларни муҳофаза қилиш, деградациянинг олдини олиш, ўсимликлар табиий плантацияларини яратишга қаратилган чора-тадбирлар ишлаб чиқишда :

яйловлар ҳолатини яхшилаш, улардан фойдаланишни истиқболли режалаштириш ҳамда маданий яйловларни барпо этиш бўйича таклифлар тайёрлаш;

яйловлардан мақсадли ва самарали фойдаланиш ҳамда уларни муҳофаза қилиш бўйича дастурлар ишлаб чиқиш;

яйловлар деградациясининг олдини олиш, тиклаш ва ўсимликлар плантацияларини яратиш бўйича чора-тадбирларни амалга ошириш;

яйловлардан алмашлаб фойдаланишни йўлга қўйиш, пичан ўриш ва чорва молларини боқиш нормалари ҳамда муддатларини белгилаш;

яйлов хўжалигини ривожлантириш билан боғлиқ масалаларни муҳокама қилиб бориш ҳамда бу борадаги мавжуд муаммоларни ҳал қилишга қаратилган чора-тадбирларни ишлаб чиқиш;

к) яйловларда ўсимликлар уруғчилигини ривожлантириш, яйлов ерларини ижарага беришни ташкил этиш, шартномавий муносабатларни мониторинг қилишда :

яйлов ўсимликлари уруғчилиги тизими ривожланган мамлакатларнинг тажрибасини ўрганиш;

чорвачилик субъектларига ажратилган ер майдонларида чўл-яйлов ўсимликлари уруғчилигини йўлга қўйиш ва мониторингини юритиш;

чорвачилик билан шуғулланувчи субъектларга қонунчилик ҳужжатларига мувофиқ яйловларни ижарага беришни тизимли йўлга қўйиш;

чорвачилик субъектлари ўртасида хўжалик шартномаларини тузиш, бажариш, ўзгартириш ва бекор қилиш вақтида юзага келадиган муносабатларни тартибга солиш;

л) қоракўл зотининг генофондини сақлаш, такрор кўпайтириш, селекция-наслчилик ишлари режаларини амалиётга татбиқ этиш ҳамда инфратузилмаларни яхшилаш бўйича таклифлар ишлаб чиқишда :

қоракўлчилик йўналишида республика ижро этувчи ҳокимият органлари, хўжалик бирлашмалари, маҳаллий ижро этувчи ҳокимият органлари билан ушбу йўналишдаги тадбиркорлик субъектларининг ўзаро ҳамкорлигини таъминлаш;

қоракўлчилик соҳасини ривожлантириш билан боғлиқ масалаларни мунтазам равишда муҳокама қилиб бориш ҳамда бу борадаги мавжуд муаммоларни ҳал қилишга қаратилган чоралар кўриб бориш;

қоракўлчилик фаолиятини илмий асосда йўлга қўйиш, илмий-тадқиқотлар, инновацион ишланмалар ва селекция-наслчилик ишлари натижалари амалиётга кенг кўламда жорий этилишини таъминлаш;

яйловларни тиклаш ҳамда чорва молларини суғориш учун сув иншоотларини (қудуқларни) барпо этиш бўйича таклифлар ишлаб чиқиш.

Агентлик қонунчилик ҳужжатларига мувофиқ бошқа функцияларни ҳам амалга ошириши мумкин.

3-боб. Агентликнинг ҳуқуқлари ва жавобгарлиги

11. Агентлик ўзига юкланган вазифалар ва функцияларни амалга оширишда қуйидаги ҳуқуқларга эга:

республика ва маҳаллий ижро этувчи ҳокимият органлари ҳамда бошқа ташкилотлардан Агентлик ваколатига кирадиган масалаларни ҳал этиш учун зарур бўладиган маълумотларни белгиланган тартибда сўраб олиш;

статистика органларидан зарур статистик маълумотларни сўраш ва бепул олиш;

ҳудудий бошқармалар орқали яйлов ерларини ижарага беришни ташкил этиш ва шартномавий муносабатларни юритиш;

Агентлик ваколатига кирадиган масалаларни ҳал қилиш учун илмий, консалтинг ва аудит ташкилотлари, олимлар, зооинженерлар, соҳага алоқадор мутахассислар, шу жумладан, хорижий олимлар, зооинженерлар ва мутахассисларни шартнома ёки фуқаролик-ҳуқуқий тусдаги шартномалар асосида жалб қилиш;

Агентлик ваколатига кирадиган масалалар доирасида хорижий давлатларнинг соҳага оид ташкилотлари билан ҳамкорлик қилиш ва шартномалар тузиш;

жисмоний ва юридик шахслар билан битим ва келишувлар асосида чорвачилик соҳасида ва яйлов хўжаликларини ривожлантириш бўйича ҳамкорликда лойиҳаларни амалга ошириш;

жисмоний ва юридик шахслар учун Ўзбекистон Республикасида ва хорижий давлатларда тренинг, семинар ва бошқа таълим дастурларини ташкил этиш;

соҳада жорий ва стратегик вазифалар, олиб борилаётган ишлар ва эришилган натижаларни ёритиш, услубий қўлланма ва буклетларни нашр қилиш учун белгиланган тартибда ноширлик фаолиятини амалга ошириш;

озуқа экинлари учун ажратилган ер участкаларидан ер участкасининг рухсат этилган фойдаланиш турига номувофиқ фойдаланилганда ёки улардан оқилона фойдаланилмаганда, ушбу ер участкаларини қайтариб олиш бўйича тегишли ваколатли органларга ёки туман (шаҳар) ҳокимликларига тақдимномалар киритиб бориш;

озуқа қўшимчаларининг рўйхатдан ўтказилгани тўғрисидаги гувоҳномани олиш учун тақдим этилган ҳужжатлар ва уларнинг синов натижаларини ҳамда тайёрланаётган соҳага оид қўлланмалар, тавсияномалар ва йўриқномаларни ўрганиш, шунингдек, ишлаб чиқилган техник қоидалар ва нормаларни кўриб чиқиш.

12. Агентлик:

юкланган вазифалар ва функцияларнинг самарали амалга оширилиши;

норматив-ҳуқуқий ҳужжатлар талаблари, шунингдек, Ўзбекистон Республикаси Президенти, Вазирлар Маҳкамаси ҳамда Қишлоқ хўжалиги вазирлигининг топшириқларини ўз вақтида бажарилиши учун жавоб беради.

Агентлик ўзига юкланган вазифа ва функцияларни бевосита, шунингдек, таркибига кирувчи илмий муассасалар ҳамда «Паррандасаноат», «Ўзбекистон асаларичилари» ва «Яйлов хўжалигини ривожлантириш» уюшмалари билан ҳамкорликда амалга оширади.

4-боб. Агентлик фаолиятини ташкил қилиш

13. Агентликка Вазирлар Маҳкамасининг тақдимномасига асосан Ўзбекистон Республикаси Президенти томонидан лавозимга тайинланадиган ва лавозимидан озод этиладиган директор раҳбарлик қилади.

14. Агентлик директори бир вақтнинг ўзида Ўзбекистон Республикаси қишлоқ хўжалиги вазирининг ўринбосари ҳисобланади ва ушбу лавозимда ўриндошлик асосида фаолият юритади.

15. Агентлик директори Ўзбекистон Республикаси қишлоқ хўжалиги вазирининг тақдимномасига биноан, белгиланган тартибда Вазирлар Маҳкамаси томонидан лавозимга тайинланадиган ва лавозимидан озод этиладиган икки нафар ўринбосарга, шу жумладан, бир нафар биринчи ўринбосарга эга бўлади.

Агентлик директори бўлмаган даврда, директор вазифасини унинг биринчи ўринбосари бажаради.

Агентлик директори ва директорнинг биринчи ўринбосари бўлмаган даврда, директор вазифасини Агентлик директори ўринбосари бажаради.

5-боб. Агентлик директори, директор ўринбосарлари ва Агентлик таркибий бўлинмаларининг асосий функционал вазифалари

16. Қуйидагилар Агентлик директорининг асосий функционал вазифалари ҳисобланади:

Агентлик фаолиятига умумий раҳбарлик қилиш;

Агентликка қонунчилик ҳужжатлари билан юкланган вазифалар ва функциялар бажарилишини ташкил қилиш;

Ўзбекистон Республикаси Конституцияси ва қонунлари, Ўзбекистон Республикаси Олий Мажлиси палаталарининг қарорлари, Ўзбекистон Республикаси Президентининг фармонлари, қарорлари ва фармойишлари, Вазирлар Маҳкамасининг қарорлари ва фармойишлари, Ўзбекистон Республикаси Қишлоқ хўжалиги вазирлигининг буйруқлари ижросини таъминлаш ҳамда мониторингини юритишнинг амалий тизимини ташкил этиш;

Агентликнинг ваколатига кирадиган масалалар бўйича тегишли давлат органлари ва ташкилотлари билан ўзаро ҳамкорлик қилиш;

Агентлик тизимидаги ташкилотларнинг мансабдор шахслари ваколатлари ва шахсий жавобгарлиги даражасини белгилаш;

ўз ваколати доирасида Агентлик тизими ходимлари учун мажбурий бўлган буйруқлар чиқариш ва кўрсатмалар бериш;

Агентликнинг марказий аппарати харажатлари сметаси ва штатлар жадвалини юқори турувчи идорага тақдим этиш;

Агентликнинг марказий аппарати таркибий бўлинмалари ва тизим ташкилотлари тўғрисидаги низомларни тасдиқлаш;

чорвачилик соҳаси ва яйлов хўжаликларини ривожлантиришга оид норматив-ҳуқуқий ҳужжатлар лойиҳаларини ишлаб чиқишда иштирок этиш;

Агентлик ходимларини рағбатлантириш ва интизомий жавобгарликка тортиш масалаларини ҳал қилиш, шу жумладан, улар эгаллаб турган лавозимда қолиши мақсадга мувофиқлиги тўғрисидаги масалаларни кўриб чиқиш, уларнинг шахсий жавобгарлигини оширишга қаратилган тадбирларни амалга ошириш.

Агентлик директори қонунчилик ҳужжатларига мувофиқ бошқа функционал вазифаларни ҳам бажариши мумкин.

17. Агентлик директорининг ўринбосарларининг асосий функционал вазифалари қуйидагилар ҳисобланади:

таркибий бўлинмалар фаолиятига бевосита раҳбарлик қилади, ушбу бўлинмаларга юкланган вазифалар ва функциялар бажарилишини ташкил этиш;

Ўзбекистон Республикаси Конституцияси ва қонунлари, Ўзбекистон Республикаси Олий Мажлиси палаталарининг қарорлари, Ўзбекистон Республикаси Президентининг фармонлари, қарорлари ва фармойишлари, Вазирлар Маҳкамасининг қарорлари ва фармойишлари, Ўзбекистон Республикаси қишлоқ хўжалиги вазирлигининг буйруқлари, Агентлик директорининг буйруқлари ва топшириқлари ўз вақтида ҳамда сифатли бажарилишини таъминлаш;

таркибий бўлинмаларга юкланган вазифалар бажарилишини назорат қилиш ва мувофиқлаштириш;

таркибий бўлинмалар фаолиятини такомиллаштириш бўйича таклифлар ишлаб чиқиш ва уларни кўриб чиқиш учун Агентлик директорига киритиш;

Агентлик директорига таркибий бўлинмаларда ходимларни танлаш ва жой-жойига қўйиш бўйича таклифлар киритиш, уларнинг касбий маҳорати, малакаси, амалий тажрибаси, ишчанлик ва ахлоқий фазилатлари юқори даражада бўлишини таъминлаш, касбий малакаларини ошириш, таркибий бўлинмаларда кадрлар захирасини шакллантириш чораларини кўриш;

Агентликнинг таркибий бўлинмалари ходимлари фаолиятининг самарадорлиги (KPI) ва натижадорлигини тизимли танқидий таҳлил қилиш, йиғилишларда уларнинг шахсий ҳисоботларини эшитиш, якунлари бўйича зарур чоралар кўриш;

Агентлик директори вақтинча бўлмаганда тегишли буйруқ асосида унинг вазифаларини бажариш.

Агентлик директори ўринбосарлари қонунчилик ҳужжатларига мувофиқ бошқа функционал вазифаларни ҳам бажариши мумкин.

18. Агентликнинг марказий аппарати таркибий бўлинмалари ҳамда ҳудудий бошқармалари раҳбарларининг асосий функционал вазифалари қуйидагилардан иборат:

ўзига юкланган вазифаларнинг сифатли ва ўз вақтида бажарилишини таъминлаш;

Агентлик раҳбарияти топшириқларининг тўлиқ бажарилишини назорат қилиш ва таъминлаш;

Агентлик фаолияти билан боғлиқ прогноз кўрсаткичларига эришишни таъминлаш бўйича зарур тадбирларни амалга ошириш;

Ўзбекистон Республикаси Конституцияси ва қонунлари, Ўзбекистон Республикаси Олий Мажлиси палаталарининг қарорлари, Ўзбекистон Республикаси Президентининг фармонлари, қарорлари ва фармойишлари, Вазирлар Маҳкамасининг қарорлари ва фармойишлари, Ўзбекистон Республикаси Қишлоқ хўжалиги вазирлигининг буйруқлари ижросини таъминлаш, қонунчилик ҳужжатларига мувофиқ таркибий бўлинмалар ва ҳудудий бошқармалар ходимларининг ижро интизомини мустаҳкамлаш бўйича амалий чоралар кўриш ҳамда топшириқларнинг ўз вақтида ва сифатли бажарилишини ташкил этиш;

одоб-ахлоқ қоидалари талабларига риоя этиш;

ташкилот ходимлари фаолияти самарадорлигини таҳлил қилиш.

Агентликнинг марказий аппарати таркибий бўлинмалари ҳамда ҳудудий бошқармалари раҳбарлари қонунчилик ҳужжатларига мувофиқ бошқа функционал вазифаларни ҳам бажариши мумкин.

6-боб. Агентлик раҳбарларининг жавобгарлиги

19. Агентлик директори:

Агентликка юкланган вазифалар ва функцияларнинг бажарилиши;

Агентликнинг Чорвачилик тармоқларини қўллаб-қувватлаш жамғармаси маблағларининг мақсадли сарфланиши;

ушбу Низомнинг 16-бандида белгиланган ўз функционал вазифаларининг сифатли бажарилиши учун шахсан жавоб беради.

20. Агентлик директори ўринбосарлари:

мутасаддилик қилинадиган йўналиш ва таркибий бўлинмаларда Агентликка юкланган вазифалар ва функцияларнинг бажарилиши;

ушбу Низомнинг 17-бандида белгиланган ўз функционал вазифаларининг сифатли бажарилиши учун шахсан жавоб беради.

7-боб. Агентлик фаолиятини молиялаштириш ва моддий-техник таъминоти, ходимлар меҳнатига ҳақ тўлаш ва уларни моддий рағбатлантириш

21. Агентлик фаолияти Ўзбекистон Республикаси Давлат бюджети маблағлари ҳамда қонунчилик ҳужжатларида тақиқланмаган бошқа манбалар ҳисобидан молиялаштирилади.

Агентликда бюджет ташкилотларининг бюджетдан ташқари жамғармаси шаклидаги Чорвачилик тармоқларини қўллаб-қувватлаш жамғармаси (кейинги ўринларда — Жамғарма) ташкил этилади.

Жамғарма юридик шахс ҳисобланмайди ва унинг маблағлари ҳисоби Ўзбекистон Республикаси Иқтисодиёт ва молия вазирлиги ҳузуридаги Ғазначилик хизмати қўмитасида очилган ягона шахсий ғазна ҳисобварағида юритилади.

Жамғарма маблағлари Агентлик ходимларини моддий рағбатлантириш ва ижтимоий муҳофаза қилиш, шунингдек, Агентликнинг моддий-техник базасини ривожлантириш ҳамда рақамлаштириш (ахборот тизимлари ва дастурий маҳсулотларни харид қилиш ҳамда уларни техник жиҳатдан қўллаб-қувватлаш харажатлари) билан боғлиқ тадбирларга йўналтирилади.

22. Агентлик фаолиятини молиялаштириш манбаларига қуйидагилар киради:

Ўзбекистон Республикаси Давлат бюджети маблағлари;

Жамғарма маблағлари;

қонунчилик ҳужжатларида тақиқланмаган бошқа манбалар.

23. Агентликка 3 та хизмат енгил автотранспорт воситасини сақлашга лимит ажратилади.

24. Агентлик ва унинг тизим ташкилотлари ходимлари ҳамда шартнома асосида жалб қилинган мутахассислар меҳнатига ҳақ тўлаш, моддий рағбатлантириш ва уларнинг кўп йиллик меҳнати учун ҳар ойлик устамалар (рағбатлантириш коэффициентини ҳисобга олган ҳолда), уларга моддий ёрдам кўрсатиш, лавозим маошига белгиланган коэффициентлар, шунингдек, қўшимча ҳақ, устамалар, мукофотлар, ижтимоий ва бошқа тўловлар, идоравий мансуб ташкилотларнинг моддий-техник базасини мустаҳкамлаш, фаолиятини амалга ошириш ва марказий аппарат таъминоти билан боғлиқ харажатлар Ўзбекистон Республикаси Давлат бюджети ҳамда Жамғарма маблағлари ва қонунчилик ҳужжатларида тақиқланмаган бошқа манбалар ҳисобидан молиялаштирилади.

25. Агентлик ва унинг тизим ташкилотлари ходимлари ҳамда шартнома асосида жалб қилинган мутахассислар меҳнатига ҳақ тўлаш ва уларни моддий рағбатлантириш шартлари:

а) Ўзбекистон Республикаси Қишлоқ хўжалиги вазирлиги тизимидаги ходимларни моддий қўллаб-қувватлаш тартиби қўлланади. Бунда Ўзбекистон Республикаси республика бюджетидан:

Ягона тариф сеткаси бўйича тасдиқланган разрядларга мувофиқ лавозим маоши, бунда Агентлик марказий аппарати ҳамда ҳудудий бошқармалари ходимлари меҳнатига ҳақ тўлашда тасдиқланган разрядларга мувофиқ лавозим маошини белгилашда тариф коэффициентларини 1,4 бараварга оширилади;

лавозим маошининг 40 фоизи миқдорида устама (меҳнатни рағбатлантириш коэффициенти);

йилда бир марта ойлик меҳнатга ҳақ тўлаш фонди миқдорида моддий ёрдам;

ўз вазифаларини виждонан, шунингдек, алоҳида муҳим ва масъулиятли ишларни бажараётган ходимларга икки ойлик меҳнат ҳақи фонди миқдорида мукофот;

кўп йиллик хизмати учун лавозим маошига (рағбатлантириш коэффициентини ҳисобга олган ҳолда) 20 фоиздан 100 фоизгача миқдорда устама, бунда:

1 йилдан 5 йилгача — 20 фоиз;

5 йилдан 10 йилгача — 30 фоиз;

10 йилдан 15 йилгача — 40 фоиз;

15 йилдан 20 йилгача — 60 фоиз;

20 йилдан 25 йилгача — 80 фоиз;

25 йилдан ортиқ — 100 фоиз миқдорида устама тўланади;

б) Жамғармага маблағлари ҳисобидан:

Агентлик марказий аппарати ходимларига ўз хизмат вазифаларини виждонан бажарганликлари учун Агентлик директори томонидан лавозим маошининг (рағбатлантирувчи коэффициентни ҳисобга олган ҳолда) 300 фоизгача ҳамда ҳудудий бошқармалари ходимларига 200 фоизгача миқдорда ҳар ойлик устамалар;

алоҳида ўрнак кўрсатган Агентлик марказий аппарати ходимларига лавозим маошининг (рағбатлантирувчи коэффициентни ҳисобга олган ҳолда) 100 фоизигача миқдорда ойлик устамалар;

ходимларни ижтимоий муҳофаза қилиш ва уларнинг меҳнати самарадорлигини ошириш мақсадида ҳар ойда (жамоа шартномасига мувофиқ) транспорт харажатлари учун базавий ҳисоблаш миқдорининг бир баравари ҳамда овқатланиш харажатларини қоплаш учун базавий ҳисоблаш миқдорининг икки баробаригача миқдорида тўловлар;

Агентлик ва унинг тизим ташкилотлари ходимларига расман байрам деб эълон қилинган кунлар (1 январь — Янги йил, 8 март — Хотин-қизлар куни, 21 март — Наврўз байрами, 9 май — Хотира ва қадрлаш куни, 1 сентябрь — Мустақиллик куни, 1 октябрь — Ўқитувчи ва мураббийлар куни, 8 декабрь — Ўзбекистон Республикаси Конституцияси куни, диний байрамлар — Рўза ҳайити (Ийд-ал-Фитр) ва Қурбон ҳайити (Ийд-ал-Адҳа)) ҳамда қишлоқ хўжалиги ходимларининг касб байрамлари муносабати билан лавозим маошининг (рағбатлантирувчи коэффициентни ҳисобга олган ҳолда) икки баравари миқдорида мукофот;

қишлоқ хўжалиги маҳсулотларини харид қилиш учун ходимларга бир йилда бир маротаба базавий ҳисоблаш миқдорининг ўн бараваригача миқдоридаги тўловлар тўланади.

Заруратга кўра ходимлар ва (ёки) уларнинг оила аъзоларига қуйидаги ҳолларда базавий ҳисоблаш миқдорининг ўн бараваригача миқдоридаги моддий ёрдам тўлаб берилади:

ходим вафот этганда — бунда моддий ёрдам хотинига (эрига) тўлаб берилади, агар ходимнинг хотини (эри) бўлмаса, моддий ёрдам фарзандларига ёки қонуний вакилларига (васийлари ва ҳомийларига) ёхуд уларнинг вояга етмаган фарзандларини асраб олган шахсларга тўлаб берилади, шунингдек, ходим турмуш қурмаган бўлса, моддий ёрдам ота-онаси ёки боқимандалар ўртасида тенг улушларда тақсимланади;

яқин қариндоши (ота, она, турмуш ўртоғи, фарзанди) вафот этганда (вафоти тўғрисида гувоҳнома нусхаси тақдим этилганда);

турмуш қурганда, 50, 55, 60 юбилей ёши муносабати билан, шунингдек, пенсияга чиққанда;

алоҳида заруратга кўра (бахтсиз ҳодиса, фалокат, узоқ муддатли касаллик сабабли даволаниш ва соғлиғини тиклаш, оиланинг кам таъминлангани ва молиявий ҳолатининг оғирлиги учун).

Жамғарма маблағлари ҳисобидан сақланиши белгиланган штат бирликларига ушбу банднинг «а» ва «б» кичик бандларида назарда тутилган барча тўловлар Жамғарма маблағлари ҳисобидан молиялаштирилади.

26. Ўзбекистон Республикаси норезидентлари бўлган Агентликнинг жалб этилган ходимлари, экспертлари ва маслаҳатчилари хизматларига тузилган шартнома шартларига мувофиқ қонунчилик ҳужжатларида белгиланган тартибда ҳақ тўланади.

Бунда рағбатлантирувчи устамалар ва қўшимча тўловлар Агентлик директори томонидан имзоланадиган меҳнат шартномаларига мувофиқ тўланади.

8-боб. Якунловчи қоидалар

27. Агентлик қонунчилик ҳужжатларида белгиланган тартибда қайта ташкил этилади ва тугатилади.

28. Ушбу Низом талаблари бузилишида айбдор бўлган шахслар қонунчилик ҳужжатларида белгиланган тартибда жавоб берадилар.

Вазирлар Маҳкамасининг 2026 йил 31 июлдаги 426-сон қарорига 2-ИЛОВА

Чорвачилик ва яйлов хўжалигини ривожлантириш агентлиги ҳузуридаги Чорвачилик тармоқларини қўллаб-қувватлаш жамғармаси маблағларини шакллантириш ва улардан фойдаланиш тартиби тўғрисида

1-боб. Умумий қоидалар

1. Ушбу Низом Ўзбекистон Республикаси Қишлоқ хўжалиги вазирлиги ҳузуридаги Чорвачилик ва яйлов хўжалигини ривожлантириш агентлигининг (кейинги ўринларда — Агентлик) Чорвачилик тармоқларини қўллаб-қувватлаш жамғармасини (кейинги ўринларда — Жамғарма) бошқариш, шунингдек, унинг маблағларини шакллантириш ва улардан фойдаланиш тартибини белгилайди.

2. Жамғарма юридик шахс мақомига эга бўлмаган ҳолда ташкил этилади ҳамда унинг маблағлари Иқтисодиёт ва молия вазирлиги ҳузуридаги Ғазначилик хизмати қўмитасида очиладиган шахсий ғазна ҳисобварақларида жамланади.

2-боб. Жамғарма маблағларини шакллантириш

3. Жамғарма маблағлари қуйидаги манбалар ҳисобидан шакллантирилади:

Чегара озиқ-овқат маҳсулотлари хавфсизлиги назорати инспекцияси ҳамда Ўсимликларни ҳимоя қилиш ва ветеринария дори воситалари таҳлил марказининг хизматлар кўрсатишдан тушадиган маблағларининг республика бюджети ҳамда тегишли хизмат кўрсатувчи ташкилотларга йўналтириладиган қисми чегирилганидан кейин қоладиган маблағларнинг 20 фоизи;

собиқ Ветеринария ва чорвачиликни ривожлантириш қўмитаси ҳузуридаги Ветеринария хизмати ва чорвачиликни ривожлантириш жамғармасининг қолдиқ маблағларидан 20 млрд сўм қисми;

халқаро молия институтлари ва хорижий ҳукумат молия ташкилотларининг грантлари;

Жамғарманинг вақтинча бўш турган маблағларини тижорат банкларининг депозитига жойлаштириш ҳисобидан тушадиган фоизлар;

қонунчилик ҳужжатларида тақиқланмаган бошқа манбалар.

3-боб. Жамғарма маблағларидан фойдаланиш

4. Жамғарма маблағларидан қуйидаги мақсадларда фойдаланилади:

чорвачилик соҳаси, жумладан, қорамолчилик, қўйчилик, қоракўлчилик, эчкичилик, йилқичилик, туячилик, паррандачилик, балиқчилик, асаларичилик ва қуёнчиликни ривожлантириш, наслчилик-селекция ишларида (кейинги ўринларда — чорвачилик соҳаси) инновацион ва стартап лойиҳалар ҳамда янги ишланмаларни молиялаштириш ҳамда грантлар ажратиш;

яйлов ерлари деградациясининг олдини олиш, ўсимликлар табиий плантацияларини яратиш, зарур техника ва ускуналарни сотиб олиш, яйловларда ўсимликлар уруғчилигини ривожлантиришни молиялаштириш ҳамда грантлар ажратиш;

Агентлик ва унинг тизим ташкилотлари ҳамда ҳудудий бошқармалари моддий-техника базасини мустаҳкамлаш, ривожлантириш ва уларга молиявий ёрдам кўрсатиш;

Агентлик ходимларининг хизмат сафарлари харажатларини молиялаштириш, ойлик иш ҳақига тенглаштирилган тўловлар, шу жумладан, устамалар, мукофотлар, қўшимча ҳақ, компенсациялар ва бошқа барча турдаги тўловларни тўлаш (рағбатлантирувчи коэффициентларни ҳисобга олган ҳолда);

Агентлик ва унинг тизим ташкилотлари ҳамда ҳудудий бошқармалари ходимлари ҳамда чорвачилик соҳасидаги ва яйлов хўжалигини ривожлантириш бўйича кадрларни касбий тайёрлаш, қайта тайёрлаш ҳамда маҳаллий ва хорижий таълим муассасаларида тажриба орттиришини ташкил этиш билан боғлиқ харажатларни қоплаш;

аудит хизматлари, Агентликка юкланган вазифалар ва функцияларни бажаришда хорижий етакчи ташкилотлар мутахассисларини ва экспертларини маслаҳатчи сифатида жалб қилиш;

Агентлик ва унинг тизим ташкилотлари ҳамда ҳудудий бошқармалари бино ва иншоотларини сақлаш, улардан фойдаланиш, уларни қуриш ва таъмирлаш, мебель, алоқа тармоқлари, компьютер ҳамда бошқа зарур ускуна ва жиҳозлар билан жиҳозлаш харажатларини молиялаштириш;

Агентлик ташаббуси билан ташкил этиладиган чорвачилик соҳасига оид конференциялар, семинарлар, форумлар ва бошқа тадбирлар харажатларини молиялаштириш;

Агентлик ва унинг тизим ташкилотлари, ҳудудий бошқармалари ҳамда ҳамкорликда фаолият олиб бораётган уюшмалар ходимларига мамлакат ҳудудига ва хорижий давлатларга чиқиш учун авиачипталар харид қилиш, хизмат сафарлари харажатларини қоплаш, вакиллик харажатлари, совғалар харид қилиш ва бошқалар учун миллий ва чет эл валютасида маблағлар ажратиш;

чорвачилик соҳасининг инфратузилма объектларини ташкил этиш ва инвестиция лойиҳаларининг лойиҳаолди ҳужжатларини тайёрлаш;

чорвачилик соҳасига оид касбий ва олий таълим муассасаларининг иқтидорли, шунингдек, ижтимоий ҳимояга муҳтож, чин етим ва ногиронлиги бўлган талабалари (ўқувчилари)ни қўллаб-қувватлаш мақсадида стипендиялар белгилаш;

Агентлик фаолияти билан боғлиқ норматив-ҳуқуқий ҳужжатларда белгиланган бошқа тадбирларни амалга ошириш;

ходимларга иш вақтидан ташқари ишлар, дам олиш кунлари ва байрам кунларида ишга жалб этилгани учун тўловлар ҳамда бошқа пулли компенсациялар тўлаш, моддий ёрдам, транспорт ва овқатланиш харажатларини тўлаш орқали уларни ижтимоий муҳофаза қилиш;

Агентлик тизимида ташкил этилган ташкилот ва корхоналар томонидан қонунчилик ҳужжатларида белгиланган тартибда шартнома асосида бажарилган ишлар (хизматлар) учун тўловларни амалга ошириш;

чорвачилик соҳасини рақамлаштириш бўйича ишларни амалга ошириш, соҳага ахборот тизимларини жорий қилиш, уларни юритиш ва техник қўллаб-қувватлаш;

наслчилик ишларида фаол иштирок этган, сунъий уруғлантириш орқали наслли бузоқ олиш натижаларига эришган техник осеменаторларни базавий ҳисоблаш миқдорининг 25 бараваригача мукофотлаш. Бунда ушбу харажатлар Ўзбекистон Республикаси Қишлоқ хўжалиги вазирлиги томонидан белгиланадиган номзодларга татбиқ этилади;

соҳада ҳамкорликда олиб борилаётган нодавлат нотижорат ташкилотларига беғараз молиявий кўмак бериш ҳамда халқаро ташкилотларга аъзолик бадалларини тўлаш;

хорижий ва халқаро ташкилотлар раҳбарлари ва мутахассисларини Ўзбекистон Республикасида бўлиш даврида уларни қабул қилиш ва кузатиш билан боғлиқ харажатлар;

босма нашр маҳсулотларини, электрон дастурларни ишлаб чиқиш, шунингдек, чорвачилик соҳасига оид бланкаларни тайёрлаш;

қонунчилик ҳужжатларида тақиқланмаган бошқа харажатларни молиялаштириш.

5. Жамғарма маблағлари Агентлик директори томонидан тасдиқланадиган даромадлар ва харажатлар сметасига мувофиқ тасарруф этилади.

6. Агентлик директори:

Жамғарма маблағларини ушбу Низомга ҳамда Жамғарманинг даромадлар ва харажатлар сметасига мувофиқ тасарруф этади ва унинг маблағларидан белгиланган мақсадларда фойдаланилиши учун жавоб беради;

қонунчилик ҳужжатларида белгиланган тартибда Жамғарма маблағларидан молиялаштириладиган товарлар (ишлар ва хизматлар)ни харид қилиш учун шартномалар тузади;

Жамғарма томонидан молиялаштирилган маблағлар бўйича, шу жумладан, шартнома шартларига қўшимча киритиш, тўлдириш, амал қилиш муддатини ўзгартириш (узайтириш) бўйича қарорлар қабул қилади;

Жамғарма даромадлари ва харажатлари ҳисоби юритилишини, Жамғарма маблағларидан ушбу маблағларни олувчилар томонидан белгиланган мақсадларда фойдаланилиши мониторингини таъминлайди;

ўз ваколати доирасида бошқа масалалар юзасидан қарорлар қабул қилади.

4-боб. Жамғарма маблағларидан фойдаланишни ҳисобга олиш, ҳисобот бериш, назорат қилиш ва жавобгарлик

7. Агентлик ҳар бир йўналиш бўйича Жамғарма маблағлари тушуми ва ҳаракатининг алоҳида ҳисобини юритади.

8. Агентлик директори ва бош ҳисобчиси Жамғармага келиб тушадиган маблағлар ва уларнинг сарфланишига оид бухгалтерлик ҳисобини юритиш, ҳисоботларни тайёрлаш ва тақдим этиш учун жавобгардир.

9. Жамғарма Ўзбекистон Республикаси республика бюджетидан олинган маблағлар бўйича даромадлар ва харажатлар тўғрисидаги чораклик ва йиллик ҳисоботларни Ўзбекистон Республикаси Иқтисодиёт ва молия вазирлигига белгиланган шакллар ва муддатларда тақдим қилиб боради.

10. Жамғарма маблағларидан белгиланган мақсадларда фойдаланиш ваколатли органлар томонидан қонунчилик ҳужжатларига мувофиқ назорат қилинади.

11. Жамғарма маблағлари ҳисобидан бошқа давлат идоралари ва ташкилотларининг (Агентлик тизимига кирмайдиган) жамғармалари ҳамда харажатларини молиялаштириш тақиқланади.

5-боб. Якунловчи қоидалар

12. Жамғарма маблағларининг мақсадли ишлатилиши Давлат молиявий назорат инспекцияси томонидан назорат қилинади.

13. Ушбу Низом талабларини бажаришда юзага келадиган низолар қонунчилик ҳужжатларида белгиланган тартибда ҳал этилади.

14. Ушбу Низом талаблари бузилишида айбдор бўлган шахслар қонунчилик ҳужжатларида белгиланган тартибда жавоб берадилар.

Ўзбекистон Республикасининг Бош вазири А. АРИПОВ

Тошкент ш.,

2026 йил 31 июль,

426 -сон

(Қонунчилик маълумотлари миллий базаси, 01.08.2026 й., 09/26/426/0806-сон)

lex.uz

OʻZBEKISTON RESPUBLIKASI VAZIRLAR MAHKAMASINING

QARORI

NIZOM

NIZOM

Oʻzbekiston Respublikasi Qishloq xoʻjaligi vazirligi huzuridagi Chorvachilik va yaylov xoʻjaligini rivojlantirish agentligi faoliyatini tartibga soluvchi normativ-huquqiy hujjatlarni tasdiqlash toʻgʻrisida

Oʻzbekiston Respublikasi Prezidentining “Oziq-ovqat mahsulotlari xavfsizligi, fitosanitariya va veterinariya boʻyicha yagona davlat boshqaruvi va nazorat tizimini joriy etish chora-tadbirlari toʻgʻrisida” 2026-yil 12-maydagi PF-84-son Farmoni hamda “Chorvachilik tarmogʻi va yaylov xoʻjaligini zamonaviy boshqaruv tizimi va yangicha yondashuvlar asosida rivojlantirish chora-tadbirlari toʻgʻrisida” 2025-yil 12-maydagi PQ-179-son qarori ijrosini taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining “Oziq-ovqat mahsulotlari xavfsizligi, fitosanitariya va veterinariya boʻyicha yagona davlat boshqaruvi va nazorat tizimini joriy etish chora-tadbirlari toʻgʻrisida” 2026-yil 12-maydagi PF-84-son Farmoniga muvofiq:

Qishloq xoʻjaligi vazirligi huzurida Chorvachilik va yaylov xoʻjaligini rivojlantirish agentligi (keyingi oʻrinlarda — Agentlik) tashkil etilgani;

Agentlik chorvachilik, shu jumladan, naslchilikni rivojlantirish, yaylovlardan foydalanish va ularni muhofaza qilish qismida Veterinariya va chorvachilikni rivojlantirish qoʻmitasining funksiyalari, huquqlari, majburiyatlari, shartnomalari va xalqaro bitimlari boʻyicha huquqiy vorisi etib belgilangani maʼlumot uchun qabul qilinsin.

2. Quyidagilar:

Oʻzbekiston Respublikasi Qishloq xoʻjaligi vazirligi huzuridagi Chorvachilik va yaylov xoʻjaligini rivojlantirish agentligi toʻgʻrisidagi nizom 1-ilovaga muvofiq;

Chorvachilik va yaylov xoʻjaligini rivojlantirish agentligi huzuridagi Chorvachilik tarmoqlarini qoʻllab-quvvatlash jamgʻarmasi mablagʻlarini shakllantirish va ulardan foydalanish tartibi toʻgʻrisidagi nizom 2-ilovaga muvofiq tasdiqlansin.

3. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari J.A. Xodjayev hamda qishloq xoʻjaligi vaziri I.Yu. Abduraxmonov zimmasiga yuklansin.

Vazirlar Mahkamasining 2026-yil 31-iyuldagi 426-son qaroriga 1-ILOVA

Oʻzbekiston Respublikasi Qishloq xoʻjaligi vazirligi huzuridagi Chorvachilik va yaylov xoʻjaligini rivojlantirish agentligi toʻgʻrisida

1-bob. Umumiy qoidalar

1. Ushbu Nizom Oʻzbekiston Respublikasi Qishloq xoʻjaligi vazirligi huzuridagi Chorvachilik va yaylov xoʻjaligini rivojlantirish agentligining (keyingi oʻrinlarda — Agentlik) maqomi, asosiy vazifalari, funksiyalari, huquqlari va javobgarligini, faoliyatini tashkil etish va hisobot berish tartibini, shuningdek, uning rahbarlarining funksional vazifalari va masʼuliyatini belgilaydi.

2. Agentlik respublikada chorvachilik sohasini rivojlantirish, yaylovlardan oqilona va samarali foydalanish boʻyicha strategik rejalashtirish, hududlar kesimida soha yoʻnalishlarini belgilash hamda chorvachilik mahsulotlari ishlab chiqarishni koʻpaytirishga oid biznes loyihalarni qoʻllab-quvvatlash, metodologik taʼminlash hamda monitoringini yuritishda respublika ijro etuvchi hokimiyat organi hisoblanadi.

3. Agentlik oʻz faoliyati boʻyicha Vazirlar Mahkamasi va Oʻzbekiston Respublikasi Qishloq xoʻjaligi vazirligiga hisobot beradi.

4. Agentlik oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlari va farmoyishlariga, Oʻzbekiston Respublikasi Qishloq xoʻjaligi vazirligining buyruqlari hamda ushbu Nizomga, shuningdek, boshqa qonunchilik hujjatlariga amal qiladi.

5. Agentlik, uning tarkibidagi Qoraqalpogʻiston Respublikasi va viloyatlar boshqarmalari (keyingi oʻrinlarda — hududiy boshqarmalar) yuridik shaxs hisoblanadi, Oʻzbekiston Respublikasi Davlat gerbi tasviri tushirilgan va oʻz nomi davlat tilida yozilgan muhrga va blankalarga, mustaqil balansga, Oʻzbekiston Respublikasi Iqtisodiyot va moliya vazirligi huzuridagi Gʻaznachilik xizmati qoʻmitasida shaxsiy gʻazna hisobvaraqlariga, shu jumladan, xorijiy valyutadagi shaxsiy gʻazna hisobvaraqlariga ega boʻladi.

6. Agentlikning rasmiy nomi:

a) davlat tilida:

toʻliq nomi — Oʻzbekiston Respublikasi Qishloq xoʻjaligi vazirligi huzuridagi Chorvachilik va yaylov xoʻjaligini rivojlantirish agentligi;

qisqartirilgan nomi — Chorvachilik agentligi;

b) rus tilida:

toʻliq nomi — Agentstvo po razvitiyu jivotnovdstva i pastbishnogo xozyaystva pri Ministerstve selskogo xozyaystva Respubliki Uzbekistan;

qisqartirilgan nomi — Agentstvo po jivotnovodstvu;

v) ingliz tilida:

toʻliq nomi — Agency for the Development of Livestock and Pasture Management under the Ministry of Agriculture of the Republic of Uzbekistan;

qisqartirilgan nomi — Agency for Livestock Development.

7. Agentlik joylashgan joy (pochta manzili): 100123, Toshkent shahri, Chilonzor tumani, Kichik halqa yoʻli koʻchasi, 21a-uy.

2-bob. Agentlikning tuzilmasi, uning asosiy vazifalari va funksiyalari

8. Agentlik tuzilmasiga quyidagilar kiradi:

Agentlikning markaziy apparati;

hududiy boshqarmalar va tuman (shahar)lardagi vakillari;

Naslchilik ilmiy-ishlab chiqarish markazi.

9. Quyidagilar Agentlikning asosiy vazifalari hisoblanadi:

chorvachilikning barcha tarmoqlarini rivojlantirish, naslchilik-seleksiya ishlarini takomillashtirish, sunʼiy urugʻlantirishni tashkil etish, chorvachilik mahsulotlari ishlab chiqarish hajmlarini koʻpaytirish, chorva ozuqa bazasini mustahkamlash;

sohaning rivojlantirish dasturlari va “yoʻl xaritalari”ni tayyorlash, hududlar kesimida ustuvor yoʻnalishlar va ularning ixtisoslashuvini belgilash;

chorvachilik tarmoqlari infratuzilmasini, jumladan, sunʼiy urugʻlantirish punktlari, soʻyish maydonchalari, sut qabul qilish punktlari, laboratoriyalar, omborlar, chorvachilik majmualari, qayta ishlash korxonalari hamda logistikani rivojlantirish;

chorvachilik tarmoqlarida samarali biznes modellarini joriy qilish, tarmoqlarning investitsiya jozibadorligini oshirish, qayta ishlash va qoʻshilgan qiymat zanjirlarini rivojlantirish, xorijiy investitsiyalar va grantlarni jalb qilish;

chorvachilik tarmoqlarida zamonaviy texnologiyalar va innovatsiyalarni joriy etish, raqamli yechimlar, avtomatlashtirish tizimlari, shuningdek, chorva mollarini parvarishlash, oziqlantirish va koʻpaytirishning zamonaviy usullarini keng tatbiq qilish;

chorvachilikda sof genofondni saqlab qolish va rivojlantirish, ilmiy-tadqiqot muassasalari tomonidan ishlab chiqilgan naslchilik-seleksiya dasturlarini amaliyotga tatbiq etish va muvofiqlashtirish;

chorvachilikda nasldorlik va mahsuldorlik koʻrsatkichlarini yaxshilash maqsadida naslchilik resurslarini yaratish, saqlash, takror koʻpaytirish va ulardan oqilona foydalanish;

chorva mollari bosh soni, mahsuldorlik, ishlab chiqarish hajmi, narxlar, investitsiyalar va eksport koʻrsatkichlari hamda tegishli yer uchastkalarida ozuqabop ekinlar yetishtirilishi boʻyicha maʼlumotlarni yigʻish, tahlil qilish va monitoring qilish;

yaylov yerlaridan samarali va maqsadli foydalanish, ularni muhofaza qilish, degradatsiyaning oldini olish, oʻsimliklar tabiiy plantatsiyalarini yaratishga qaratilgan chora-tadbirlar ishlab chiqish;

yaylovlarda oʻsimliklar urugʻchiligini rivojlantirish, yaylov yerlarini ijaraga berishni tashkil etish, shartnomaviy munosabatlarni monitoring qilish;

qorakoʻl zotining genofondini saqlash, takror koʻpaytirish, seleksiya-naslchilik ishlari rejalarini amaliyotga tatbiq etish hamda infratuzilmalarni yaxshilash boʻyicha takliflar ishlab chiqish.

Agentlikka qonunchilik hujjatlariga muvofiq boshqa vazifalar ham yuklanishi mumkin.

10. Agentlik oʻziga yuklangan vazifalarga muvofiq quyidagi funksiyalarni amalga oshiradi:

a) chorvachilikning barcha tarmoqlarini rivojlantirish, naslchilik-seleksiya ishlarini takomillashtirish, sunʼiy urugʻlantirishni tashkil etish, chorvachilik mahsulotlari ishlab chiqarish hajmlarini koʻpaytirish, chorva ozuqa bazasini mustahkamlashda :

respublikada qoramolchilik, qoʻychilik, echkichilik, parrandachilik, yilqichilik, tuyachilik, quyonchilik, asalarichilik, qorakoʻlchilik va boshqa yondosh tarmoqlarni rivojlantirish;

chorvachilik sohasida naslchilik-seleksiya ishlarini takomillashtirish va naslchilik resurslarini koʻpaytirish hamda mahsuldorlikni oshirish;

naslni yaxshilovchi yuqori genetik mahsuldorlik xususiyatiga ega boʻlgan turli zotlardagi nasldor chorva mollaridan olingan urugʻ bilan chorva mollarini sunʼiy urugʻlantirish;

yangi ozuqa-yem ishlab chiqarish quvvatlarini tashkil etish, mavjud ishlab chiqarish quvvatlarini modernizatsiya qilish hamda tarkibi kuchaytirilgan ozuqa-yem ishlab chiqarish hajmlarini koʻpaytirish boʻyicha takliflar ishlab chiqish;

chorvachilik sohasida ozuqa-yem bazasini mustahkamlash va ozuqabop ekinlar urugʻchiligini yoʻlga qoʻyish;

Oʻzbekiston Respublikasi Konstitutsiyasi va qonunlari, Oʻzbekiston Respublikasi Oliy Majlisi palatalarining qarorlari, Oʻzbekiston Respublikasi Prezidentining farmonlari, qarorlari va farmoyishlari, Vazirlar Mahkamasining qarorlari va farmoyishlari, Oʻzbekiston Respublikasi Qishloq xoʻjaligi vazirligining buyruqlari hamda ushbu Nizom talablari hududiy boshqarmalar va tizim tashkilotlarida bajarilishini oʻrganish, monitoringini yuritish va amaliy yordam koʻrsatish;

sohani rivojlantirish va mahsulot ishlab chiqarish hajmini koʻpaytirishga oid dasturlar hamda normativ-huquqiy va boshqa hujjatlar loyihalarini ishlab chiqish, shuningdek, oʻz vakolatlari doirasida ularning ijrosini taʼminlash;

b) sohani rivojlantirish dasturlari va “yoʻl xaritalari”ni tayyorlash, hududlar kesimida ustuvor yoʻnalishlar va ularning ixtisoslashuvini belgilashda :

sohani rivojlantirishga oid materiallar va axborotlarni tizimli ravishda yigʻish, soha rivojlanishiga salbiy taʼsir koʻrsatayotgan muammo va kamchiliklarni respublika va mahalliy ijro etuvchi hokimiyat organlari bilan birgalikda oʻrganish, tahlil qilish hamda ularni bartaraf etish yuzasidan takliflar ishlab chiqish;

chorvachilik sohasi va yaylov xoʻjaligini rivojlantirishga oid oʻrta va uzoq muddatli strategiyalarni hamda ularni amalga oshirish konsepsiyasini ishlab chiqish;

naslchilik-seleksiya dasturlari, uslubiy qoʻllanmalar va tavsiyalarni ishlab chiqish hamda ularni amaliyotga joriy qilish;

v) chorvachilik tarmoqlari infratuzilmasini, jumladan, sunʼiy urugʻlantirish punktlari, soʻyish maydonchalari, sut qabul qilish punktlari, laboratoriyalar, omborlar, chorvachilik majmualari, qayta ishlash korxonalari hamda logistikani rivojlantirishda :

respublika va mahalliy ijro etuvchi hokimiyat organlari bilan birgalikda mavjud mahsulot ishlab chiqarish quvvatlaridan samarali foydalanish, past rentabelli korxonalarni iqtisodiy sogʻlomlashtirish boʻyicha takliflar tayyorlash;

chorvachilik tarmoqlari infratuzilmasini yaxshilash, jumladan, soʻyish maydonchalari, sutni qabul qilish punktlari, chorvachilik majmualari hamda logistikani rivojlantirish;

chorva mollarini sunʼiy urugʻlantirish, zamonaviy seleksiya va biotexnologiya usullarini, jumladan, embrion koʻchirib oʻtkazish texnologiyalarini keng joriy qilish, naslchilik materiallari ishlab chiqarishni koʻpaytirish orqali chorva mollarida nasldorlik va mahsuldorlikning sifat koʻrsatkichlarini yaxshilash;

g) chorvachilik tarmoqlarida samarali biznes modellarini joriy qilish, tarmoqlarning investitsiya jozibadorligini oshirish, qayta ishlash va qoʻshilgan qiymat zanjirlarini rivojlantirish, xorijiy investitsiyalar va grantlarni jalb qilishda :

hududlar kesimida soha tarmoqlarini rivojlantirishni belgilash va chorvachilik mahsulotlari ishlab chiqarishni koʻpaytirishga oid biznes loyihalarni qoʻllab-quvvatlash hamda sohani metodologik taʼminlash;

sohada samarali biznes modellarini respublika va mahalliy ijro etuvchi hokimiyat organlari bilan birgalikda joriy qilish, soha tarmoqlarida investitsiya jozibadorligini oshirish, xomashyoni chuqur qayta ishlash va qoʻshilgan qiymat zanjirini rivojlantirish;

sohani davlat tomonidan qoʻllab-quvvatlash mexanizmlarini oʻrganish va takomillashtirishga oid takliflar ishlab chiqish;

sohaga xorijiy investitsiyalar va grantlarni jalb qilish;

d) chorvachilik tarmoqlariga zamonaviy texnologiyalar va innovatsiyalarni joriy etish, raqamli yechimlar, avtomatlashtirish tizimlari, shuningdek, chorva mollarini parvarishlash, oziqlantirish va koʻpaytirishning zamonaviy usullarini keng tatbiq qilishda :

chorvachilik sohasini strategik rejalashtirish, zamonaviy texnologiyalar va innovatsiyalarni joriy qilish;

sunʼiy intellektdan foydalangan holda raqamli yechimlar, avtomatlashtirish tizimlarining xorijiy ilgʻor tajribalarini amaliyotga tatbiq etish;

chorva mollarini parvarishlash, oziqlantirish va koʻpaytirishning xorijiy ilgʻor tajribalarini sohaga tatbiq etish;

xalqaro talablar asosida chorvachilik mahsulotlarini sertifikatlash va standartlash boʻyicha takliflar ishlab chiqish, sifat menejmentining zamonaviy usullarini joriy qilish;

e) chorvachilikda sof genofondni saqlab qolish va rivojlantirish, ilmiy-tadqiqot muassasalari tomonidan ishlab chiqilgan naslchilik-seleksiya dasturlarini amaliyotga tatbiq etish va muvofiqlashtirishda :

naslchilik resurslarini yaratish, chorva mollari sof genofondini saqlash, takror koʻpaytirish va ulardan samarali foydalanishni tashkil etish;

Naslchilik ilmiy-ishlab chiqarish markazi va naslchilik korxonalari bilan birgalikda chorvachilik subyektlari va aholini naslchilik materiallari bilan taʼminlash;

ilmiy tashkilotlar bilan birgalikda sohani rivojlantirishga qaratilgan ilmiy loyihalarni shakllantirish va amalga oshirishda ishtirok etish;

xorijiy davlatlarning ilgʻor ilmiy-texnologik ishlanmalari, innovatsion gʻoyalari, texnologiyalari va tajribalarini oʻrganish hamda ularni soha tarmoqlariga joriy qilish;

sunʼiy urugʻlantirish boʻyicha mutaxassislarning malakasini oshirishni tashkil etish hamda soha boʻyicha yetakchi xorijiy ilmiy-tadqiqot institutlari va markazlari bilan hamkorlikni rivojlantirish;

xorijiy davlatlarning naslchilik sohasidagi ilm-fan yutuqlari va ilgʻor tajribalarini oʻrganish hamda ularni hududlarda joriy qilishga koʻmaklashish, sohaga oid seminar va koʻrgazmalarni tashkil etish;

j) chorvachilikda nasldorlik va mahsuldorlik koʻrsatkichlarini yaxshilash maqsadida naslchilik resurslarini yaratish, saqlash, takror koʻpaytirish va ulardan oqilona foydalanishda :

naslchilik bilan shugʻullanuvchi subyektlarga qonunchilik hujjatlarida belgilangan tartibda naslchilik xoʻjaligi maqomini berish;

nasldor chorva mollarini urchitish, naslli mahsulotlar (materiallar) yetishtirish va ulardan foydalanishni tizimli yoʻlga qoʻyish;

chorva mollari sonini koʻpaytirish, ularning mahsuldorligini oshirish va nasl sifatini yaxshilash maqsadida xoʻjaliklarda naslchilik ishlarining tizimli amalga oshirilishini taʼminlash;

z) chorva mollari bosh soni, mahsuldorlik, ishlab chiqarish hajmi, narxlar, investitsiyalar va eksport koʻrsatkichlari hamda tegishli yer uchastkalarida ozuqabop ekinlar yetishtirilishi boʻyicha maʼlumotlarni yigʻish, tahlil qilish va monitoring qilishda :

respublikada chorva mollari bosh sonini koʻpaytirish, naslchilik-seleksiya ishlarini tizimli tashkil etish orqali mahsuldorlikni oshirish;

hududlar kesimida soha tarmoqlarini tahlil qilgan holda chorvachilik mahsulotlari ishlab chiqarish hajmini oshirishga qaratilgan hududiy dasturlar ishlab chiqish;

ichki va tashqi bozor ehtiyojidan kelib chiqqan holda chorvachilik mahsulotlari eksporti va importini tizimli tahlil qilish hamda mahalliy ishlab chiqaruvchilarni qoʻllab-quvvatlash yuzasidan takliflar tayyorlash;

respublika va mahalliy ijro etuvchi hokimiyat organlari bilan birgalikda chorvachilik subyektlariga shartli mol bosh sonidan kelib chiqqan holda ekin yerlari ajratish, shuningdek, ularga zarur ozuqa ekinlari urugʻlari, yonilgʻi-moylash materiallari, mineral oʻgʻitlar va kimyoviy vositalar va boshqa moddiy resurslarni yetkazib berishni yoʻlga qoʻyish;

respublika va mahalliy ijro etuvchi hokimiyat organlari bilan birgalikda ekin yerlariga asosiy, takroriy va oraliq ozuqa ekinlarini joylashtirish va ekish ishlarini tashkil etish hamda almashlab ekish tizimini joriy qilish;

ozuqa ekinlari yetishtirishning samarali agrotexnologiyalari hamda chorva mollarini oziqlantirishning ilgʻor usullari va ilmiy ishlanmalarini amaliyotga tatbiq etish;

i) yaylov yerlaridan samarali va maqsadli foydalanish, ularni muhofaza qilish, degradatsiyaning oldini olish, oʻsimliklar tabiiy plantatsiyalarini yaratishga qaratilgan chora-tadbirlar ishlab chiqishda :

yaylovlar holatini yaxshilash, ulardan foydalanishni istiqbolli rejalashtirish hamda madaniy yaylovlarni barpo etish boʻyicha takliflar tayyorlash;

yaylovlardan maqsadli va samarali foydalanish hamda ularni muhofaza qilish boʻyicha dasturlar ishlab chiqish;

yaylovlar degradatsiyasining oldini olish, tiklash va oʻsimliklar plantatsiyalarini yaratish boʻyicha chora-tadbirlarni amalga oshirish;

yaylovlardan almashlab foydalanishni yoʻlga qoʻyish, pichan oʻrish va chorva mollarini boqish normalari hamda muddatlarini belgilash;

yaylov xoʻjaligini rivojlantirish bilan bogʻliq masalalarni muhokama qilib borish hamda bu boradagi mavjud muammolarni hal qilishga qaratilgan chora-tadbirlarni ishlab chiqish;

k) yaylovlarda oʻsimliklar urugʻchiligini rivojlantirish, yaylov yerlarini ijaraga berishni tashkil etish, shartnomaviy munosabatlarni monitoring qilishda :

yaylov oʻsimliklari urugʻchiligi tizimi rivojlangan mamlakatlarning tajribasini oʻrganish;

chorvachilik subyektlariga ajratilgan yer maydonlarida choʻl-yaylov oʻsimliklari urugʻchiligini yoʻlga qoʻyish va monitoringini yuritish;

chorvachilik bilan shugʻullanuvchi subyektlarga qonunchilik hujjatlariga muvofiq yaylovlarni ijaraga berishni tizimli yoʻlga qoʻyish;

chorvachilik subyektlari oʻrtasida xoʻjalik shartnomalarini tuzish, bajarish, oʻzgartirish va bekor qilish vaqtida yuzaga keladigan munosabatlarni tartibga solish;

l) qorakoʻl zotining genofondini saqlash, takror koʻpaytirish, seleksiya-naslchilik ishlari rejalarini amaliyotga tatbiq etish hamda infratuzilmalarni yaxshilash boʻyicha takliflar ishlab chiqishda :

qorakoʻlchilik yoʻnalishida respublika ijro etuvchi hokimiyat organlari, xoʻjalik birlashmalari, mahalliy ijro etuvchi hokimiyat organlari bilan ushbu yoʻnalishdagi tadbirkorlik subyektlarining oʻzaro hamkorligini taʼminlash;

qorakoʻlchilik sohasini rivojlantirish bilan bogʻliq masalalarni muntazam ravishda muhokama qilib borish hamda bu boradagi mavjud muammolarni hal qilishga qaratilgan choralar koʻrib borish;

qorakoʻlchilik faoliyatini ilmiy asosda yoʻlga qoʻyish, ilmiy-tadqiqotlar, innovatsion ishlanmalar va seleksiya-naslchilik ishlari natijalari amaliyotga keng koʻlamda joriy etilishini taʼminlash;

yaylovlarni tiklash hamda chorva mollarini sugʻorish uchun suv inshootlarini (quduqlarni) barpo etish boʻyicha takliflar ishlab chiqish.

Agentlik qonunchilik hujjatlariga muvofiq boshqa funksiyalarni ham amalga oshirishi mumkin.

3-bob. Agentlikning huquqlari va javobgarligi

11. Agentlik oʻziga yuklangan vazifalar va funksiyalarni amalga oshirishda quyidagi huquqlarga ega:

respublika va mahalliy ijro etuvchi hokimiyat organlari hamda boshqa tashkilotlardan Agentlik vakolatiga kiradigan masalalarni hal etish uchun zarur boʻladigan maʼlumotlarni belgilangan tartibda soʻrab olish;

statistika organlaridan zarur statistik maʼlumotlarni soʻrash va bepul olish;

hududiy boshqarmalar orqali yaylov yerlarini ijaraga berishni tashkil etish va shartnomaviy munosabatlarni yuritish;

Agentlik vakolatiga kiradigan masalalarni hal qilish uchun ilmiy, konsalting va audit tashkilotlari, olimlar, zooinjenerlar, sohaga aloqador mutaxassislar, shu jumladan, xorijiy olimlar, zooinjenerlar va mutaxassislarni shartnoma yoki fuqarolik-huquqiy tusdagi shartnomalar asosida jalb qilish;

Agentlik vakolatiga kiradigan masalalar doirasida xorijiy davlatlarning sohaga oid tashkilotlari bilan hamkorlik qilish va shartnomalar tuzish;

jismoniy va yuridik shaxslar bilan bitim va kelishuvlar asosida chorvachilik sohasida va yaylov xoʻjaliklarini rivojlantirish boʻyicha hamkorlikda loyihalarni amalga oshirish;

jismoniy va yuridik shaxslar uchun Oʻzbekiston Respublikasida va xorijiy davlatlarda trening, seminar va boshqa taʼlim dasturlarini tashkil etish;

sohada joriy va strategik vazifalar, olib borilayotgan ishlar va erishilgan natijalarni yoritish, uslubiy qoʻllanma va bukletlarni nashr qilish uchun belgilangan tartibda noshirlik faoliyatini amalga oshirish;

ozuqa ekinlari uchun ajratilgan yer uchastkalaridan yer uchastkasining ruxsat etilgan foydalanish turiga nomuvofiq foydalanilganda yoki ulardan oqilona foydalanilmaganda, ushbu yer uchastkalarini qaytarib olish boʻyicha tegishli vakolatli organlarga yoki tuman (shahar) hokimliklariga taqdimnomalar kiritib borish;

ozuqa qoʻshimchalarining roʻyxatdan oʻtkazilgani toʻgʻrisidagi guvohnomani olish uchun taqdim etilgan hujjatlar va ularning sinov natijalarini hamda tayyorlanayotgan sohaga oid qoʻllanmalar, tavsiyanomalar va yoʻriqnomalarni oʻrganish, shuningdek, ishlab chiqilgan texnik qoidalar va normalarni koʻrib chiqish.

12. Agentlik:

yuklangan vazifalar va funksiyalarning samarali amalga oshirilishi;

normativ-huquqiy hujjatlar talablari, shuningdek, Oʻzbekiston Respublikasi Prezidenti, Vazirlar Mahkamasi hamda Qishloq xoʻjaligi vazirligining topshiriqlarini oʻz vaqtida bajarilishi uchun javob beradi.

Agentlik oʻziga yuklangan vazifa va funksiyalarni bevosita, shuningdek, tarkibiga kiruvchi ilmiy muassasalar hamda “Parrandasanoat”, “Oʻzbekiston asalarichilari” va “Yaylov xoʻjaligini rivojlantirish” uyushmalari bilan hamkorlikda amalga oshiradi.

4-bob. Agentlik faoliyatini tashkil qilish

13. Agentlikka Vazirlar Mahkamasining taqdimnomasiga asosan Oʻzbekiston Respublikasi Prezidenti tomonidan lavozimga tayinlanadigan va lavozimidan ozod etiladigan direktor rahbarlik qiladi.

14. Agentlik direktori bir vaqtning oʻzida Oʻzbekiston Respublikasi qishloq xoʻjaligi vazirining oʻrinbosari hisoblanadi va ushbu lavozimda oʻrindoshlik asosida faoliyat yuritadi.

15. Agentlik direktori Oʻzbekiston Respublikasi qishloq xoʻjaligi vazirining taqdimnomasiga binoan, belgilangan tartibda Vazirlar Mahkamasi tomonidan lavozimga tayinlanadigan va lavozimidan ozod etiladigan ikki nafar oʻrinbosarga, shu jumladan, bir nafar birinchi oʻrinbosarga ega boʻladi.

Agentlik direktori boʻlmagan davrda, direktor vazifasini uning birinchi oʻrinbosari bajaradi.

Agentlik direktori va direktorning birinchi oʻrinbosari boʻlmagan davrda, direktor vazifasini Agentlik direktori oʻrinbosari bajaradi.

5-bob. Agentlik direktori, direktor oʻrinbosarlari va Agentlik tarkibiy boʻlinmalarining asosiy funksional vazifalari

16. Quyidagilar Agentlik direktorining asosiy funksional vazifalari hisoblanadi:

Agentlik faoliyatiga umumiy rahbarlik qilish;

Agentlikka qonunchilik hujjatlari bilan yuklangan vazifalar va funksiyalar bajarilishini tashkil qilish;

Oʻzbekiston Respublikasi Konstitutsiyasi va qonunlari, Oʻzbekiston Respublikasi Oliy Majlisi palatalarining qarorlari, Oʻzbekiston Respublikasi Prezidentining farmonlari, qarorlari va farmoyishlari, Vazirlar Mahkamasining qarorlari va farmoyishlari, Oʻzbekiston Respublikasi Qishloq xoʻjaligi vazirligining buyruqlari ijrosini taʼminlash hamda monitoringini yuritishning amaliy tizimini tashkil etish;

Agentlikning vakolatiga kiradigan masalalar boʻyicha tegishli davlat organlari va tashkilotlari bilan oʻzaro hamkorlik qilish;

Agentlik tizimidagi tashkilotlarning mansabdor shaxslari vakolatlari va shaxsiy javobgarligi darajasini belgilash;

oʻz vakolati doirasida Agentlik tizimi xodimlari uchun majburiy boʻlgan buyruqlar chiqarish va koʻrsatmalar berish;

Agentlikning markaziy apparati xarajatlari smetasi va shtatlar jadvalini yuqori turuvchi idoraga taqdim etish;

Agentlikning markaziy apparati tarkibiy boʻlinmalari va tizim tashkilotlari toʻgʻrisidagi nizomlarni tasdiqlash;

chorvachilik sohasi va yaylov xoʻjaliklarini rivojlantirishga oid normativ-huquqiy hujjatlar loyihalarini ishlab chiqishda ishtirok etish;

Agentlik xodimlarini ragʻbatlantirish va intizomiy javobgarlikka tortish masalalarini hal qilish, shu jumladan, ular egallab turgan lavozimda qolishi maqsadga muvofiqligi toʻgʻrisidagi masalalarni koʻrib chiqish, ularning shaxsiy javobgarligini oshirishga qaratilgan tadbirlarni amalga oshirish.

Agentlik direktori qonunchilik hujjatlariga muvofiq boshqa funksional vazifalarni ham bajarishi mumkin.

17. Agentlik direktorining oʻrinbosarlarining asosiy funksional vazifalari quyidagilar hisoblanadi:

tarkibiy boʻlinmalar faoliyatiga bevosita rahbarlik qiladi, ushbu boʻlinmalarga yuklangan vazifalar va funksiyalar bajarilishini tashkil etish;

Oʻzbekiston Respublikasi Konstitutsiyasi va qonunlari, Oʻzbekiston Respublikasi Oliy Majlisi palatalarining qarorlari, Oʻzbekiston Respublikasi Prezidentining farmonlari, qarorlari va farmoyishlari, Vazirlar Mahkamasining qarorlari va farmoyishlari, Oʻzbekiston Respublikasi qishloq xoʻjaligi vazirligining buyruqlari, Agentlik direktorining buyruqlari va topshiriqlari oʻz vaqtida hamda sifatli bajarilishini taʼminlash;

tarkibiy boʻlinmalarga yuklangan vazifalar bajarilishini nazorat qilish va muvofiqlashtirish;

tarkibiy boʻlinmalar faoliyatini takomillashtirish boʻyicha takliflar ishlab chiqish va ularni koʻrib chiqish uchun Agentlik direktoriga kiritish;

Agentlik direktoriga tarkibiy boʻlinmalarda xodimlarni tanlash va joy-joyiga qoʻyish boʻyicha takliflar kiritish, ularning kasbiy mahorati, malakasi, amaliy tajribasi, ishchanlik va axloqiy fazilatlari yuqori darajada boʻlishini taʼminlash, kasbiy malakalarini oshirish, tarkibiy boʻlinmalarda kadrlar zaxirasini shakllantirish choralarini koʻrish;

Agentlikning tarkibiy boʻlinmalari xodimlari faoliyatining samaradorligi (KPI) va natijadorligini tizimli tanqidiy tahlil qilish, yigʻilishlarda ularning shaxsiy hisobotlarini eshitish, yakunlari boʻyicha zarur choralar koʻrish;

Agentlik direktori vaqtincha boʻlmaganda tegishli buyruq asosida uning vazifalarini bajarish.

Agentlik direktori oʻrinbosarlari qonunchilik hujjatlariga muvofiq boshqa funksional vazifalarni ham bajarishi mumkin.

18. Agentlikning markaziy apparati tarkibiy boʻlinmalari hamda hududiy boshqarmalari rahbarlarining asosiy funksional vazifalari quyidagilardan iborat:

oʻziga yuklangan vazifalarning sifatli va oʻz vaqtida bajarilishini taʼminlash;

Agentlik rahbariyati topshiriqlarining toʻliq bajarilishini nazorat qilish va taʼminlash;

Agentlik faoliyati bilan bogʻliq prognoz koʻrsatkichlariga erishishni taʼminlash boʻyicha zarur tadbirlarni amalga oshirish;

Oʻzbekiston Respublikasi Konstitutsiyasi va qonunlari, Oʻzbekiston Respublikasi Oliy Majlisi palatalarining qarorlari, Oʻzbekiston Respublikasi Prezidentining farmonlari, qarorlari va farmoyishlari, Vazirlar Mahkamasining qarorlari va farmoyishlari, Oʻzbekiston Respublikasi Qishloq xoʻjaligi vazirligining buyruqlari ijrosini taʼminlash, qonunchilik hujjatlariga muvofiq tarkibiy boʻlinmalar va hududiy boshqarmalar xodimlarining ijro intizomini mustahkamlash boʻyicha amaliy choralar koʻrish hamda topshiriqlarning oʻz vaqtida va sifatli bajarilishini tashkil etish;

odob-axloq qoidalari talablariga rioya etish;

tashkilot xodimlari faoliyati samaradorligini tahlil qilish.

Agentlikning markaziy apparati tarkibiy boʻlinmalari hamda hududiy boshqarmalari rahbarlari qonunchilik hujjatlariga muvofiq boshqa funksional vazifalarni ham bajarishi mumkin.

6-bob. Agentlik rahbarlarining javobgarligi

19. Agentlik direktori:

Agentlikka yuklangan vazifalar va funksiyalarning bajarilishi;

Agentlikning Chorvachilik tarmoqlarini qoʻllab-quvvatlash jamgʻarmasi mablagʻlarining maqsadli sarflanishi;

ushbu Nizomning 16-bandida belgilangan oʻz funksional vazifalarining sifatli bajarilishi uchun shaxsan javob beradi.

20. Agentlik direktori oʻrinbosarlari:

mutasaddilik qilinadigan yoʻnalish va tarkibiy boʻlinmalarda Agentlikka yuklangan vazifalar va funksiyalarning bajarilishi;

ushbu Nizomning 17-bandida belgilangan oʻz funksional vazifalarining sifatli bajarilishi uchun shaxsan javob beradi.

7-bob. Agentlik faoliyatini moliyalashtirish va moddiy-texnik taʼminoti, xodimlar mehnatiga haq toʻlash va ularni moddiy ragʻbatlantirish

21. Agentlik faoliyati Oʻzbekiston Respublikasi Davlat budjeti mablagʻlari hamda qonunchilik hujjatlarida taqiqlanmagan boshqa manbalar hisobidan moliyalashtiriladi.

Agentlikda budjet tashkilotlarining budjetdan tashqari jamgʻarmasi shaklidagi Chorvachilik tarmoqlarini qoʻllab-quvvatlash jamgʻarmasi (keyingi oʻrinlarda — Jamgʻarma) tashkil etiladi.

Jamgʻarma yuridik shaxs hisoblanmaydi va uning mablagʻlari hisobi Oʻzbekiston Respublikasi Iqtisodiyot va moliya vazirligi huzuridagi Gʻaznachilik xizmati qoʻmitasida ochilgan yagona shaxsiy gʻazna hisobvaragʻida yuritiladi.

Jamgʻarma mablagʻlari Agentlik xodimlarini moddiy ragʻbatlantirish va ijtimoiy muhofaza qilish, shuningdek, Agentlikning moddiy-texnik bazasini rivojlantirish hamda raqamlashtirish (axborot tizimlari va dasturiy mahsulotlarni xarid qilish hamda ularni texnik jihatdan qoʻllab-quvvatlash xarajatlari) bilan bogʻliq tadbirlarga yoʻnaltiriladi.

22. Agentlik faoliyatini moliyalashtirish manbalariga quyidagilar kiradi:

Oʻzbekiston Respublikasi Davlat budjeti mablagʻlari;

Jamgʻarma mablagʻlari;

qonunchilik hujjatlarida taqiqlanmagan boshqa manbalar.

23. Agentlikka 3 ta xizmat yengil avtotransport vositasini saqlashga limit ajratiladi.

24. Agentlik va uning tizim tashkilotlari xodimlari hamda shartnoma asosida jalb qilingan mutaxassislar mehnatiga haq toʻlash, moddiy ragʻbatlantirish va ularning koʻp yillik mehnati uchun har oylik ustamalar (ragʻbatlantirish koeffitsiyentini hisobga olgan holda), ularga moddiy yordam koʻrsatish, lavozim maoshiga belgilangan koeffitsiyentlar, shuningdek, qoʻshimcha haq, ustamalar, mukofotlar, ijtimoiy va boshqa toʻlovlar, idoraviy mansub tashkilotlarning moddiy-texnik bazasini mustahkamlash, faoliyatini amalga oshirish va markaziy apparat taʼminoti bilan bogʻliq xarajatlar Oʻzbekiston Respublikasi Davlat budjeti hamda Jamgʻarma mablagʻlari va qonunchilik hujjatlarida taqiqlanmagan boshqa manbalar hisobidan moliyalashtiriladi.

25. Agentlik va uning tizim tashkilotlari xodimlari hamda shartnoma asosida jalb qilingan mutaxassislar mehnatiga haq toʻlash va ularni moddiy ragʻbatlantirish shartlari:

a) Oʻzbekiston Respublikasi Qishloq xoʻjaligi vazirligi tizimidagi xodimlarni moddiy qoʻllab-quvvatlash tartibi qoʻllanadi. Bunda Oʻzbekiston Respublikasi respublika budjetidan:

Yagona tarif setkasi boʻyicha tasdiqlangan razryadlarga muvofiq lavozim maoshi, bunda Agentlik markaziy apparati hamda hududiy boshqarmalari xodimlari mehnatiga haq toʻlashda tasdiqlangan razryadlarga muvofiq lavozim maoshini belgilashda tarif koeffitsiyentlarini 1,4 baravarga oshiriladi;

lavozim maoshining 40 foizi miqdorida ustama (mehnatni ragʻbatlantirish koeffitsiyenti);

yilda bir marta oylik mehnatga haq toʻlash fondi miqdorida moddiy yordam;

oʻz vazifalarini vijdonan, shuningdek, alohida muhim va masʼuliyatli ishlarni bajarayotgan xodimlarga ikki oylik mehnat haqi fondi miqdorida mukofot;

koʻp yillik xizmati uchun lavozim maoshiga (ragʻbatlantirish koeffitsiyentini hisobga olgan holda) 20 foizdan 100 foizgacha miqdorda ustama, bunda:

1 yildan 5 yilgacha — 20 foiz;

5 yildan 10 yilgacha — 30 foiz;

10 yildan 15 yilgacha — 40 foiz;

15 yildan 20 yilgacha — 60 foiz;

20 yildan 25 yilgacha — 80 foiz;

25 yildan ortiq — 100 foiz miqdorida ustama toʻlanadi;

b) Jamgʻarmaga mablagʻlari hisobidan:

Agentlik markaziy apparati xodimlariga oʻz xizmat vazifalarini vijdonan bajarganliklari uchun Agentlik direktori tomonidan lavozim maoshining (ragʻbatlantiruvchi koeffitsiyentni hisobga olgan holda) 300 foizgacha hamda hududiy boshqarmalari xodimlariga 200 foizgacha miqdorda har oylik ustamalar;

alohida oʻrnak koʻrsatgan Agentlik markaziy apparati xodimlariga lavozim maoshining (ragʻbatlantiruvchi koeffitsiyentni hisobga olgan holda) 100 foizigacha miqdorda oylik ustamalar;

xodimlarni ijtimoiy muhofaza qilish va ularning mehnati samaradorligini oshirish maqsadida har oyda (jamoa shartnomasiga muvofiq) transport xarajatlari uchun bazaviy hisoblash miqdorining bir baravari hamda ovqatlanish xarajatlarini qoplash uchun bazaviy hisoblash miqdorining ikki barobarigacha miqdorida toʻlovlar;

Agentlik va uning tizim tashkilotlari xodimlariga rasman bayram deb eʼlon qilingan kunlar (1-yanvar — Yangi yil, 8-mart — Xotin-qizlar kuni, 21-mart — Navroʻz bayrami, 9-may — Xotira va qadrlash kuni, 1-sentabr — Mustaqillik kuni, 1-oktabr — Oʻqituvchi va murabbiylar kuni, 8-dekabr — Oʻzbekiston Respublikasi Konstitutsiyasi kuni, diniy bayramlar — Roʻza hayiti (Iyd-al-Fitr) va Qurbon hayiti (Iyd-al-Adha)) hamda qishloq xoʻjaligi xodimlarining kasb bayramlari munosabati bilan lavozim maoshining (ragʻbatlantiruvchi koeffitsiyentni hisobga olgan holda) ikki baravari miqdorida mukofot;

qishloq xoʻjaligi mahsulotlarini xarid qilish uchun xodimlarga bir yilda bir marotaba bazaviy hisoblash miqdorining oʻn baravarigacha miqdoridagi toʻlovlar toʻlanadi.

Zaruratga koʻra xodimlar va (yoki) ularning oila aʼzolariga quyidagi hollarda bazaviy hisoblash miqdorining oʻn baravarigacha miqdoridagi moddiy yordam toʻlab beriladi:

xodim vafot etganda — bunda moddiy yordam xotiniga (eriga) toʻlab beriladi, agar xodimning xotini (eri) boʻlmasa, moddiy yordam farzandlariga yoki qonuniy vakillariga (vasiylari va homiylariga) yoxud ularning voyaga yetmagan farzandlarini asrab olgan shaxslarga toʻlab beriladi, shuningdek, xodim turmush qurmagan boʻlsa, moddiy yordam ota-onasi yoki boqimandalar oʻrtasida teng ulushlarda taqsimlanadi;

yaqin qarindoshi (ota, ona, turmush oʻrtogʻi, farzandi) vafot etganda (vafoti toʻgʻrisida guvohnoma nusxasi taqdim etilganda);

turmush qurganda, 50, 55, 60 yubiley yoshi munosabati bilan, shuningdek, pensiyaga chiqqanda;

alohida zaruratga koʻra (baxtsiz hodisa, falokat, uzoq muddatli kasallik sababli davolanish va sogʻligʻini tiklash, oilaning kam taʼminlangani va moliyaviy holatining ogʻirligi uchun).

Jamgʻarma mablagʻlari hisobidan saqlanishi belgilangan shtat birliklariga ushbu bandning “a” va “b” kichik bandlarida nazarda tutilgan barcha toʻlovlar Jamgʻarma mablagʻlari hisobidan moliyalashtiriladi.

26. Oʻzbekiston Respublikasi norezidentlari boʻlgan Agentlikning jalb etilgan xodimlari, ekspertlari va maslahatchilari xizmatlariga tuzilgan shartnoma shartlariga muvofiq qonunchilik hujjatlarida belgilangan tartibda haq toʻlanadi.

Bunda ragʻbatlantiruvchi ustamalar va qoʻshimcha toʻlovlar Agentlik direktori tomonidan imzolanadigan mehnat shartnomalariga muvofiq toʻlanadi.

8-bob. Yakunlovchi qoidalar

27. Agentlik qonunchilik hujjatlarida belgilangan tartibda qayta tashkil etiladi va tugatiladi.

28. Ushbu Nizom talablari buzilishida aybdor boʻlgan shaxslar qonunchilik hujjatlarida belgilangan tartibda javob beradilar.

Vazirlar Mahkamasining 2026-yil 31-iyuldagi 426-son qaroriga 2-ILOVA

Chorvachilik va yaylov xoʻjaligini rivojlantirish agentligi huzuridagi Chorvachilik tarmoqlarini qoʻllab-quvvatlash jamgʻarmasi mablagʻlarini shakllantirish va ulardan foydalanish tartibi toʻgʻrisida

1-bob. Umumiy qoidalar

1. Ushbu Nizom Oʻzbekiston Respublikasi Qishloq xoʻjaligi vazirligi huzuridagi Chorvachilik va yaylov xoʻjaligini rivojlantirish agentligining (keyingi oʻrinlarda — Agentlik) Chorvachilik tarmoqlarini qoʻllab-quvvatlash jamgʻarmasini (keyingi oʻrinlarda — Jamgʻarma) boshqarish, shuningdek, uning mablagʻlarini shakllantirish va ulardan foydalanish tartibini belgilaydi.

2. Jamgʻarma yuridik shaxs maqomiga ega boʻlmagan holda tashkil etiladi hamda uning mablagʻlari Iqtisodiyot va moliya vazirligi huzuridagi Gʻaznachilik xizmati qoʻmitasida ochiladigan shaxsiy gʻazna hisobvaraqlarida jamlanadi.

2-bob. Jamgʻarma mablagʻlarini shakllantirish

3. Jamgʻarma mablagʻlari quyidagi manbalar hisobidan shakllantiriladi:

Chegara oziq-ovqat mahsulotlari xavfsizligi nazorati inspeksiyasi hamda Oʻsimliklarni himoya qilish va veterinariya dori vositalari tahlil markazining xizmatlar koʻrsatishdan tushadigan mablagʻlarining respublika budjeti hamda tegishli xizmat koʻrsatuvchi tashkilotlarga yoʻnaltiriladigan qismi chegirilganidan keyin qoladigan mablagʻlarning 20 foizi;

sobiq Veterinariya va chorvachilikni rivojlantirish qoʻmitasi huzuridagi Veterinariya xizmati va chorvachilikni rivojlantirish jamgʻarmasining qoldiq mablagʻlaridan 20 mlrd soʻm qismi;

xalqaro moliya institutlari va xorijiy hukumat moliya tashkilotlarining grantlari;

Jamgʻarmaning vaqtincha boʻsh turgan mablagʻlarini tijorat banklarining depozitiga joylashtirish hisobidan tushadigan foizlar;

qonunchilik hujjatlarida taqiqlanmagan boshqa manbalar.

3-bob. Jamgʻarma mablagʻlaridan foydalanish

4. Jamgʻarma mablagʻlaridan quyidagi maqsadlarda foydalaniladi:

chorvachilik sohasi, jumladan, qoramolchilik, qoʻychilik, qorakoʻlchilik, echkichilik, yilqichilik, tuyachilik, parrandachilik, baliqchilik, asalarichilik va quyonchilikni rivojlantirish, naslchilik-seleksiya ishlarida (keyingi oʻrinlarda — chorvachilik sohasi) innovatsion va startap loyihalar hamda yangi ishlanmalarni moliyalashtirish hamda grantlar ajratish;

yaylov yerlari degradatsiyasining oldini olish, oʻsimliklar tabiiy plantatsiyalarini yaratish, zarur texnika va uskunalarni sotib olish, yaylovlarda oʻsimliklar urugʻchiligini rivojlantirishni moliyalashtirish hamda grantlar ajratish;

Agentlik va uning tizim tashkilotlari hamda hududiy boshqarmalari moddiy-texnika bazasini mustahkamlash, rivojlantirish va ularga moliyaviy yordam koʻrsatish;

Agentlik xodimlarining xizmat safarlari xarajatlarini moliyalashtirish, oylik ish haqiga tenglashtirilgan toʻlovlar, shu jumladan, ustamalar, mukofotlar, qoʻshimcha haq, kompensatsiyalar va boshqa barcha turdagi toʻlovlarni toʻlash (ragʻbatlantiruvchi koeffitsiyentlarni hisobga olgan holda);

Agentlik va uning tizim tashkilotlari hamda hududiy boshqarmalari xodimlari hamda chorvachilik sohasidagi va yaylov xoʻjaligini rivojlantirish boʻyicha kadrlarni kasbiy tayyorlash, qayta tayyorlash hamda mahalliy va xorijiy taʼlim muassasalarida tajriba orttirishini tashkil etish bilan bogʻliq xarajatlarni qoplash;

audit xizmatlari, Agentlikka yuklangan vazifalar va funksiyalarni bajarishda xorijiy yetakchi tashkilotlar mutaxassislarini va ekspertlarini maslahatchi sifatida jalb qilish;

Agentlik va uning tizim tashkilotlari hamda hududiy boshqarmalari bino va inshootlarini saqlash, ulardan foydalanish, ularni qurish va taʼmirlash, mebel, aloqa tarmoqlari, kompyuter hamda boshqa zarur uskuna va jihozlar bilan jihozlash xarajatlarini moliyalashtirish;

Agentlik tashabbusi bilan tashkil etiladigan chorvachilik sohasiga oid konferensiyalar, seminarlar, forumlar va boshqa tadbirlar xarajatlarini moliyalashtirish;

Agentlik va uning tizim tashkilotlari, hududiy boshqarmalari hamda hamkorlikda faoliyat olib borayotgan uyushmalar xodimlariga mamlakat hududiga va xorijiy davlatlarga chiqish uchun aviachiptalar xarid qilish, xizmat safarlari xarajatlarini qoplash, vakillik xarajatlari, sovgʻalar xarid qilish va boshqalar uchun milliy va chet el valyutasida mablagʻlar ajratish;

chorvachilik sohasining infratuzilma obyektlarini tashkil etish va investitsiya loyihalarining loyihaoldi hujjatlarini tayyorlash;

chorvachilik sohasiga oid kasbiy va oliy taʼlim muassasalarining iqtidorli, shuningdek, ijtimoiy himoyaga muhtoj, chin yetim va nogironligi boʻlgan talabalari (oʻquvchilari)ni qoʻllab-quvvatlash maqsadida stipendiyalar belgilash;

Agentlik faoliyati bilan bogʻliq normativ-huquqiy hujjatlarda belgilangan boshqa tadbirlarni amalga oshirish;

xodimlarga ish vaqtidan tashqari ishlar, dam olish kunlari va bayram kunlarida ishga jalb etilgani uchun toʻlovlar hamda boshqa pulli kompensatsiyalar toʻlash, moddiy yordam, transport va ovqatlanish xarajatlarini toʻlash orqali ularni ijtimoiy muhofaza qilish;

Agentlik tizimida tashkil etilgan tashkilot va korxonalar tomonidan qonunchilik hujjatlarida belgilangan tartibda shartnoma asosida bajarilgan ishlar (xizmatlar) uchun toʻlovlarni amalga oshirish;

chorvachilik sohasini raqamlashtirish boʻyicha ishlarni amalga oshirish, sohaga axborot tizimlarini joriy qilish, ularni yuritish va texnik qoʻllab-quvvatlash;

naslchilik ishlarida faol ishtirok etgan, sunʼiy urugʻlantirish orqali naslli buzoq olish natijalariga erishgan texnik osemenatorlarni bazaviy hisoblash miqdorining 25 baravarigacha mukofotlash. Bunda ushbu xarajatlar Oʻzbekiston Respublikasi Qishloq xoʻjaligi vazirligi tomonidan belgilanadigan nomzodlarga tatbiq etiladi;

sohada hamkorlikda olib borilayotgan nodavlat notijorat tashkilotlariga begʻaraz moliyaviy koʻmak berish hamda xalqaro tashkilotlarga aʼzolik badallarini toʻlash;

xorijiy va xalqaro tashkilotlar rahbarlari va mutaxassislarini Oʻzbekiston Respublikasida boʻlish davrida ularni qabul qilish va kuzatish bilan bogʻliq xarajatlar;

bosma nashr mahsulotlarini, elektron dasturlarni ishlab chiqish, shuningdek, chorvachilik sohasiga oid blankalarni tayyorlash;

qonunchilik hujjatlarida taqiqlanmagan boshqa xarajatlarni moliyalashtirish.

5. Jamgʻarma mablagʻlari Agentlik direktori tomonidan tasdiqlanadigan daromadlar va xarajatlar smetasiga muvofiq tasarruf etiladi.

6. Agentlik direktori:

Jamgʻarma mablagʻlarini ushbu Nizomga hamda Jamgʻarmaning daromadlar va xarajatlar smetasiga muvofiq tasarruf etadi va uning mablagʻlaridan belgilangan maqsadlarda foydalanilishi uchun javob beradi;

qonunchilik hujjatlarida belgilangan tartibda Jamgʻarma mablagʻlaridan moliyalashtiriladigan tovarlar (ishlar va xizmatlar)ni xarid qilish uchun shartnomalar tuzadi;

Jamgʻarma tomonidan moliyalashtirilgan mablagʻlar boʻyicha, shu jumladan, shartnoma shartlariga qoʻshimcha kiritish, toʻldirish, amal qilish muddatini oʻzgartirish (uzaytirish) boʻyicha qarorlar qabul qiladi;

Jamgʻarma daromadlari va xarajatlari hisobi yuritilishini, Jamgʻarma mablagʻlaridan ushbu mablagʻlarni oluvchilar tomonidan belgilangan maqsadlarda foydalanilishi monitoringini taʼminlaydi;

oʻz vakolati doirasida boshqa masalalar yuzasidan qarorlar qabul qiladi.

4-bob. Jamgʻarma mablagʻlaridan foydalanishni hisobga olish, hisobot berish, nazorat qilish va javobgarlik

7. Agentlik har bir yoʻnalish boʻyicha Jamgʻarma mablagʻlari tushumi va harakatining alohida hisobini yuritadi.

8. Agentlik direktori va bosh hisobchisi Jamgʻarmaga kelib tushadigan mablagʻlar va ularning sarflanishiga oid buxgalterlik hisobini yuritish, hisobotlarni tayyorlash va taqdim etish uchun javobgardir.

9. Jamgʻarma Oʻzbekiston Respublikasi respublika budjetidan olingan mablagʻlar boʻyicha daromadlar va xarajatlar toʻgʻrisidagi choraklik va yillik hisobotlarni Oʻzbekiston Respublikasi Iqtisodiyot va moliya vazirligiga belgilangan shakllar va muddatlarda taqdim qilib boradi.

10. Jamgʻarma mablagʻlaridan belgilangan maqsadlarda foydalanish vakolatli organlar tomonidan qonunchilik hujjatlariga muvofiq nazorat qilinadi.

11. Jamgʻarma mablagʻlari hisobidan boshqa davlat idoralari va tashkilotlarining (Agentlik tizimiga kirmaydigan) jamgʻarmalari hamda xarajatlarini moliyalashtirish taqiqlanadi.

5-bob. Yakunlovchi qoidalar

12. Jamgʻarma mablagʻlarining maqsadli ishlatilishi Davlat moliyaviy nazorat inspeksiyasi tomonidan nazorat qilinadi.

13. Ushbu Nizom talablarini bajarishda yuzaga keladigan nizolar qonunchilik hujjatlarida belgilangan tartibda hal etiladi.

14. Ushbu Nizom talablari buzilishida aybdor boʻlgan shaxslar qonunchilik hujjatlarida belgilangan tartibda javob beradilar.

Oʻzbekiston Respublikasining Bosh vaziri A. ARIPOV

Toshkent sh.,

2026-yil 31-iyul,

426 -son

(Qonunchilik maʼlumotlari milliy bazasi, 01.08.2026-y., 09/26/426/0806-son)

lex.uz