📅 2026-yil 6-avgust · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2026 йил 6 август · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 6 августа 2026 г. · Постановления Кабинета Министров
Официальный текст. Официальный документ. Редакционные примечания не включены.
📅 6 August 2026 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
НИЗОМ
НИЗОМ
СХЕМАСИ
СХЕМАСИ
Чорвачилик ҳамда балиқчилик тармоқларини давлат томонидан қўллаб-қувватлашнинг қўшимча чора-тадбирлари тўғрисида
Ўзбекистон Республикаси Президентининг «Балиқчилик тармоғини ривожлантиришга оид қўшимча чора-тадбирлар тўғрисида» 2026 йил 2 июлдаги ПФ-122-сон Фармони ҳамда «Чорвачилик тармоғи ва яйлов хўжалигини замонавий бошқарув тизими ва янгича ёндашувлар асосида ривожлантириш чора-тадбирлари тўғрисида» 2026 йил 12 майдаги ПҚ-179-сон қарори ижросини таъминлаш мақсадида Вазирлар Маҳкамаси қарор қилади:
1. Чорвачилик комплексларини ташкил қилиш, наслли молларни харид қилиш ҳамда балиқчилик лойиҳаларини молиялаштириш учун кредит ажратиш тартиби тўғрисидаги низом 1-иловага мувофиқ тасдиқлансин.
2. Ўзбекистон Республикаси Ҳукуматининг 2-иловага мувофиқ айрим қарорларига ўзгартириш ва қўшимчалар киритилсин.
3. Ушбу қарорнинг бажарилишини назорат қилиш Ўзбекистон Республикаси Бош вазирининг ўринбосари Ж.А. Ходжаев ва қишлоқ хўжалиги вазири И.Ю. Абдурахмонов зиммасига юклансин.
Вазирлар Маҳкамасининг 2026 йил 6 августдаги 435-сон қарорига 1-ИЛОВА
Чорвачилик комплексларини ташкил қилиш, наслли молларни харид қилиш ҳамда балиқчилик лойиҳаларини молиялаштириш учун кредит ажратиш тартиби тўғрисида
1-боб. Умумий қоидалар
1. Ушбу Низом Ўзбекистон Республикаси Иқтисодиёт ва молия вазирлиги ҳузуридаги Қишлоқ хўжалигини давлат томонидан қўллаб-қувватлаш жамғармаси (кейинги ўринларда — Жамғарма)нинг кредит ресурслари ҳисобидан тижорат банклари томонидан чорвачилик ва балиқчилик соҳаларида фаолият юритувчи тадбиркорлик субъектларига (кейинги ўринларда — қарз олувчи) чорвачилик ва балиқчилик мажмуаларини ташкил этиш, наслли йирик ва майда шохли молларни харид қилиш, шунингдек, чорвачиликда наслли буқалар уруғини етиштирадиган корхонани ташкил қиладиган тадбиркорлик субъектларига қурилиш, асбоб-ускуналар ва наслли буқаларни сотиб олиш ҳамда балиқчилик лойиҳалари, шу жумладан, наслли балиқларни етиштириш харажатлари (кейинги ўринларда — чорвачилик ва балиқчилик лойиҳалари харажатлари)ни молиялаштириш учун кредит ажратиш тартибини белгилайди.
2. Жамғарма ва тижорат банки ўртасида чорвачилик ва балиқчилик лойиҳалари харажатларини молиялаштириш учун кредит ажратиш мақсадида ресурс жойлаштириш тўғрисида ҳар молия йили учун битим тузилади.
3. Тижорат банклари чорвачилик ва балиқчилик лойиҳалари харажатларини молиялаштириш учун кредит ажратиш юзасидан ижобий қарор қабул қилинган лойиҳалар бўйича Жамғармага кредит буюртманомаларини тақдим этади.
2-боб. Жамғарма кредит ресурсларини тижорат банкига жойлаштириш
4. Жамғарма тижорат банки билан тузган битимга мувофиқ қарз олувчининг чорвачилик ва балиқчилик лойиҳалари харажатларини молиялаштиришга кредит ажратиш учун 10 йил муддатга, 4 йиллик имтиёзли давр билан, қолган даврда ойма-ой тенг улушларда қайтариш шарти билан, йиллик 6 фоиз ставкада кредит ресурсларини жойлаштиради.
Бунда кредит ресурслари тижорат банки билан қарз олувчининг келишувига асосан ажратиладиган кредитнинг муддати ва имтиёзли даврига мутаносиб равишда жойлаштирилади.
Ҳар бир лойиҳа учун Жамғарма томонидан ажратилган кредит ресурсларини қайтариш муддатининг бошланиши сифатида ушбу ресурсларнинг дастлабки ажратилган санаси (ой) ҳисобланади.
5. Тижорат банки томонидан кредит ресурслари битимда белгиланган муддатда қайтарилмаса, ресурсларнинг қайтарилмаган қисмига фоизлар Ўзбекистон Республикаси Марказий банки асосий ставкасининг 1,5 баробаридан 4 фоиз пунктига камайтирилган миқдорида ҳисобланади ва тижорат банки томонидан Жамғармага тўланади.
Назорат тадбирларида ажратилган кредитдан мақсадсиз фойдаланиш ҳолатлари аниқланган тақдирда, кредитнинг мақсадсиз ишлатилган қисми учун Ўзбекистон Республикаси Марказий банкининг асосий ставкаси миқдорида Жамғарма фойдасига жарима қўлланади.
Тижорат банкига жойлаштирилган кредит ресурсларининг ўттиз календарь куни давомида ишлатилмаган қисми тижорат банки томонидан бир банк иш кунидан кечиктирилмасдан Жамғармага қайтарилади ҳамда ушбу маблағлар учун қайта буюртма тақдим этилмайди.
Жамғарма томонидан ажратилган кредит ресурсларининг мақсадли ишлатилиши ва белгиланган муддатда Жамғармага қайтарилиши ҳамда тақдим этилаётган буюртманомаларнинг ҳаққонийлигига тижорат банки масъул ва жавобгар ҳисобланади.
3-боб. Тижорат банки томонидан қарз олувчининг аризасини кўриб чиқиш
6. Кредитлар тижорат банкининг кредит сиёсати ҳамда Ўзбекистон Республикаси Марказий банкининг норматив-ҳуқуқий ҳужжатлари талабларига мувофиқ ажратилади.
7. Қарз олувчи кредит олиш учун унинг асосий талаб қилиб олингунча сақланадиган депозит ҳисобварағига хизмат кўрсатаётган тижорат банкига Ўзбекистон Республикаси Қишлоқ хўжалиги вазирлигининг «Рақамли қишлоқ хўжалиги» ягона интеграцион платформаси таркибига кирувчи «Агроплатформа» ахборот тизими орқали ариза билан бирга тегишли ҳужжатларни тақдим этади.
8. Қарз олувчининг тўлов интизоми, молиявий ҳолати ҳамда кредит тарихидан келиб чиққан ҳолда кредит таъминоти сифатида қуйидаги таъминот турларидан бири қабул қилинади:
мол-мулк гарови (қонунчилик ҳужжатларига мувофиқ ундирув қаратилиши мумкин бўлмаган мол-мулклар бундан мустасно);
қарз олувчига расмийлаштирилган кредитни қайтармаслик хатарининг тижорат банки фойдасига суғурта қилингани тўғрисидаги суғурта полиси;
мажбуриятларни бажаришга молиявий жиҳатдан тўловга лаёқатли бўлган учинчи шахсларнинг кафиллиги;
қонунчилик ҳужжатларида назарда тутилган бошқа таъминот турлари.
9. Ушбу Низомнинг 8-бандида назарда тутилган ва унга илова қилинган ҳужжатлар тўлиқ тақдим этилган кундан бошлаб тижорат банки қарз олувчининг аризасини банк кредит сиёсатида белгиланган муддатларда кўриб чиқади.
Қарз олувчининг аризаси бўйича ижобий қарор қабул қилинган тақдирда, тижорат банки ва қарз олувчи ўртасида кредит шартномаси тузилади.
Кредит ажратиш рад этилган тақдирда, тижорат банки рад этиш сабабларини асослантирган ҳолда бир банк иш куни ичида қарз олувчини ёзма шаклда хабардор қилади.
4-боб. Қарз олувчига кредит ажратиш
10. Кредит шартномаси кучга киргандан сўнг кейинги банк иш кунидан кечиктирилмасдан қарз олувчига кредит ҳисобварағи очилади.
11. Тижорат банки қарз олувчи билан тузилган кредит шартномасига мувофиқ Жамғарманинг кредит ресурслари ҳисобидан йиллик 10 фоиз ставкада (шундан банк маржаси — 4 фоиз), 4 йиллик имтиёзли давр билан, қолган даврда ойма-ой тенг улушларда қайтариш шарти асосида, 10 йилгача муддатга, кредит муддатини узайтириш ҳуқуқисиз қуйидаги йўналишларда кредит ажратади:
а) чорвачилик ва балиқчилик мажмуаларини ташкил қилиш (қуриш, реконструкция қилиш, мукаммал таъмирлаш), наслдор йирик ва майда шохли моллар ҳамда наслли балиқларни харид қилиш лойиҳаларини молиялаштириш учун 5 миллиард сўмгача;
б) чорвачиликда наслли буқалар уруғини етиштирадиган корхонани ташкил қиладиган тадбиркорлик субъектларига қурилиш, асбоб-ускуналар ва наслли қорамоллар сотиб олиш ҳамда балиқчилик лойиҳалари, шу жумладан, наслли балиқларни етиштириш лойиҳаларини молиялаштириш учун 20 миллиард сўмгача.
12. Қарз олувчи кредитни кредит шартномасида белгиланган муддатларда қайтармаган тақдирда, кредитнинг белгиланган муддатда қайтарилмаган қисми тижорат банкининг ўз маблағлари ҳисобидан тижорат кредити сифатида қайта расмийлаштирилади ва ушбу ресурс Жамғармага қайтарилади.
5-боб. Кредит мониторинги ва уларни сўндириш
13. Кредит ҳисобварағидан тўловлар қарз олувчининг тўлов топшириқномалари ҳамда электрон тўлов воситаси асосида амалга оширилади.
14. Жамғарма маблағлари айланадиган ҳисобварақларга қонунчилик ҳужжатларига мувофиқ инкассо топшириқномалари қўйилишига, шунингдек, уларни ундириб олиш ва тақиқ қўйишга йўл қўйилмайди.
15. Тижорат банки қарз олувчига ажратилган кредитнинг мақсадли сарфланиши ҳамда белгиланган муддатда қайтарилиши юзасидан доимий мониторинг ўтказади.
16. Тижорат банки томонидан қарз олувчи номига кредит ва унга ҳисобланган фоиз тўловларини сўндириш учун 23210 ҳисобварағи очилади.
Қарз олувчи томонидан 23210 ҳисобварағига тушган маблағлар ҳисобидан, биринчи навбатда, чорвачилик ва балиқчилик харажатлари учун олинган кредит ва унга ҳисобланган фоиз тўловлари сўндирилади.
17. Чорвачилик ва балиқчилик лойиҳалари харажатларини молиялаштириш учун ажратилган кредит ва унга ҳисобланган фоиз тўловлари тўлиқ сўндирилгандан сўнг тижорат банки 23210 ҳисобварағида қолган маблағлар қарз олувчининг асосий талаб қилиб олингунча сақланадиган депозит ҳисобварағига ўтказилади, қарз олувчи ушбу маблағлардан эркин фойдаланади.
18. Қарз олувчи кредит ва унга ҳисобланган фоизларни муддатидан олдин тўлиқ ёки қисман сўндириш ҳуқуқига эга.
6-боб. Якунловчи қоидалар
19. Тижорат банклари кредитларнинг мақсадли сарфланиши бўйича мониторинг юритиш ҳамда Жамғарманинг кредит ресурсларини белгиланган муддатда қайтарилиши юзасидан масъул ва жавобгар ҳисобланади.
20. Тижорат банкларига жойлаштирилган кредит ресурсларидан мақсадли фойдаланилиши устидан назорат Ўзбекистон Республикаси Бош прокуратураси ҳузуридаги Иқтисодий жиноятчиликка қарши курашиш департаментининг Давлат молиявий назорати инспекцияси томонидан амалга оширилади.
21. Ушбу Низом талаблари бузилишида айбдор бўлган шахслар қонунчилик ҳужжатларига мувофиқ жавоб беради.
Вазирлар Маҳкамасининг 2026 йил 6 августдаги 435-сон қарорига 2-ИЛОВА
Ўзбекистон Республикаси Ҳукуматининг айрим қарорларига киритилаётган ўзгартириш ва қўшимчалар
1. Вазирлар Маҳкамасининг 2025 йил 24 июлдаги 466-сон қарори билан тасдиқланган Пахта хомашёси етиштириш ва йиғим-теримини молиялаштириш учун ажратилган кредитлар бўйича фоиз тўловларининг бир қисмини қоплаб бериш тартиби тўғрисидаги вақтинчалик низомнинг 1-банди иккинчи хатбошиси қуйидаги таҳрирда баён этилсин:
«Фоиз тўловлари ушбу Низом кучга кирган санадан бошлаб 2026 йилнинг тўртинчи чораги охиригача бўлган давр учун тақдим этиладиган буюртмаларга асосан 2027 йилнинг январь ойи якунига қадар қоплаб берилади».
2. Вазирлар Маҳкамасининг «Аграр ва озиқ-овқат соҳаларини давлат томонидан қўллаб-қувватлаш тизимини тубдан такомиллаштириш чора-тадбирлари тўғрисида» 2026 йил 28 апрелдаги 206-сон қарорида :
а) 1-бандда:
ўн тўққизинчи хатбоши қуйидаги таҳрирда баён этилсин:
«Буғдой етиштириш учун ажратилган имтиёзли кредитларни ҳосил йилининг 1 августига қадар қайтарган қишлоқ хўжалиги субъектларига ушбу кредит бўйича тўланган фоиз тўловларининг бир қисмини субсидия сифатида қайтариш тартиби тўғрисидаги низом 17 1 -иловага мувофиқ»;
қуйидаги мазмундаги йигирманчи хатбоши билан тўлдирилсин:
«Сунъий уруғлантирувчи техник-осеменаторлар ўқув курсларига сарфланган харажатларнинг бир қисмини қоплаш ҳамда аҳоли хонадонларида наслли қорамолларни кўпайтиришни рағбатлантириш учун субсидия ажратиш тартиби тўғрисидаги низом 17 2 -иловага мувофиқ тасдиқлансин»;
б) 8-илованинг 9-банди «а» кичик банди қуйидаги таҳрирда баён этилсин:
«а) лизинг ёки кредит шартномаси бўйича:
қишлоқ хўжалиги техникаси харидида Ўзбекистон Республикаси Президентининг «Чирчиқ шаҳрида қишлоқ хўжалиги машинасозлик кластерини ташкил қилиш чора-тадбирлари тўғрисида» 2021 йил 11 ноябрдаги ПҚ-7-сон қарорининг 8-банди учинчи хатбошисида белгиланган миқдорларда;
автопилот ускунасини харид қилишда фоиз харажатларининг 14 фоизлик пунктидан юқори, бироқ 8 фоизлик пунктидан ошмаган қисмини»;
в) қуйидаги мазмундаги 17 2 -илова билан тўлдирилсин:
«Вазирлар Маҳкамасининг 2026 йил 28 апрелдаги 206-сон қарорига 17 2 -ИЛОВА
Сунъий уруғлантирувчи техник-осеменаторлар ўқув курсларига сарфланган харажатларнинг бир қисмини қоплаш ҳамда аҳоли хонадонларида наслли қорамолларни кўпайтиришни рағбатлантириш учун субсидия ажратиш тартиби тўғрисида
1-боб. Умумий қоидалар
1. Ушбу Низом сунъий уруғлантирувчи техник-осеменаторлар ўқув курсларига сарфланган харажатларнинг бир қисмини қоплаш ҳамда аҳоли хонадонларида идентификация қилинган сигирлардан наслли бузоқ олган ҳолда наслли қорамолларни кўпайтиришни рағбатлантириш учун субсидия ажратиш тартибини белгилайди.
2. Ушбу Низомда қуйидаги асосий тушунчалардан фойдаланилади:
Агропортал — Қишлоқ хўжалиги вазирлигининг «Рақамли қишлоқ хўжалиги» ягона интеграцион платформаси;
идентификация қилинган сигир — ягона ахборот тизимида рўйхатдан ўтказилган ва бирка (ID)га эга ҳайвон;
наслли бузоқ — идентификация қилинган сигирдан олинган ва белгиланган тартибда рўйхатдан ўтказилган бузоқ;
олий таълим ташкилотлари — Тошкент давлат аграр университети, Қишлоқ хўжалиги соҳаси кадрларининг малакасини ошириш ва қайта тайёрлаш институти, Самарқанд давлат ветеринария медицинаси, чорвачилик ва биотехнологиялар университети, унинг Қорақалпоғистон Республикаси ва Тошкент шаҳридаги филиаллари ҳамда Андижон қишлоқ хўжалиги ва агротехнологиялар институти;
субсидия — сунъий уруғлантирувчи техник-осеменаторлар ўқув курсларига сарфланган харажатларнинг бир қисмини қоплаш ҳамда аҳоли хонадонларида идентификация қилинган сигирлардан наслли бузоқ олган ҳолда наслли қорамолларни кўпайтиришни рағбатлантириш учун Ўзбекистон Республикаси Давлат бюджетидан ажратиладиган маблағ;
сунъий уруғлантириш — махсус ҳужжатга эга ( махсус сертификатга эга бўлган) мутахассис томонидан амалга оширилган сунъий уруғлантириш хизмати;
эмбрион трансплантацияси — махсус ҳужжатга эга (махсус сертификатга эга бўлган) мутахассис томонидан илғор биотехнология асосида амалга оширилган эмбрион кўчириш жараёни;
«VIS Chinor» — Идентификация қилинган ҳайвонлар ягона электрон маълумотлар базаси ахборот тизими.
3. Субсидия ҳисоби Ўзбекистон Республикаси Қишлоқ хўжалиги вазирлиги ҳузуридаги Аграр соҳада тўловлар агентлигининг (кейинги ўринларда — Агентлик) Иқтисодиёт ва молия вазирлиги ҳузуридаги Ғазначилик хизмати қўмитасида очилган махсус шахсий ғазна ҳисобварағида юритилади.
4. Озиқ-овқат маҳсулотлари хавфсизлиги қўмитаси ҳамда Чорвачилик ва яйлов хўжалигини ривожлантириш агентлиги Қорақалпоғистон Республикаси Вазирлар Кенгаши, Тошкент шаҳри ва вилоятлар ҳокимликлари билан биргаликда ҳар йили 1 июлга қадар келгуси йилда субсидия ажратиш мақсадида ҳудудлар кесимида талаб этиладиган субсидиянинг прогноз кўрсаткичларини Қишлоқ хўжалиги вазирлигига тақдим этади.
5. Ўзбекистон Республикаси Қишлоқ хўжалиги вазирлиги Агентлик билан биргаликда ҳар календарь йилнинг 20 июлига қадар Озиқ-овқат маҳсулотлари хавфсизлиги қўмитаси, Чорвачилик ва яйлов хўжалигини ривожлантириш агентлиги томонидан тақдим этилган прогноз кўрсаткичларини ўрганиб чиқади ҳамда бюджет параметрларини шакллантиришда инобатга олиш учун ҳисоб-китобларни Иқтисодиёт ва молия вазирлигига тақдим қилади.
Иқтисодиёт ва молия вазирлиги келгуси йил учун Ўзбекистон Республикаси Давлат бюджети параметрларини шакллантиришда субсидия учун зарур маблағларни назарда тутади.
6. Субсидия қуйидаги йўналишларда ажратилади:
2026 йил 1 июлдан 2028 йил 31 декабрига қадар сунъий уруғлантирувчи техник-осеменаторлар ўқув курсларига сарфланган харажатларнинг бир қисмини қоплаш учун — 2 миллион сўм;
2026 йил 1 июлдан 2030 йил 1 январга қадар сунъий уруғлантириш орқали олинган наслли бузоқ учун — 500 минг сўм, эмбрион трансплантацияси орқали олинган наслли бузоқ учун — 700 минг сўм.
2-боб. Сунъий уруғлантирувчи техник-осеменаторлар ўқув курсларига сарфланган харажатларнинг бир қисмини қоплаш
7. Сунъий уруғлантирувчи техник-осеменаторлар ўқув курсларига сарфланган харажатларнинг бир қисмини қоплаш ушбу Низомга 1-иловада келтирилган схемага мувофиқ Агропортал орқали амалга оширилади.
8. Сунъий уруғлантирувчи техник-осеменаторлар (кейинги ўринларда — осеменатор) ўқув курсларини муваффақиятли тамомлаб, сертификат олгандан сўнг техник-осеменатор ўқув курсларига сарфланган харажатларининг бир қисмини қоплаб бериш учун Агентликка Агропортал орқали ариза билан қуйидаги ҳужжатларни илова қилган ҳолда мурожаат қилади:
паспорт ёки идентификацияловчи ID-картаси нусхаси;
банк реквизитлари (банк бўлими номи, МФО ва талаб қилиб олингунча сақланадиган депозит ҳисобварағи);
ўқув курсларини муваффақиятли тугатганлик тўғрисида олий таълим ташкилотлари томонидан берилган маълумотнома ва сертификат нусхаси.
Осеменатордан ушбу бандда кўрсатилган ҳужжатлардан бошқа ҳужжатларни талаб қилишга йўл қўйилмайди.
Аризадаги маълумотлар ва тақдим қилинган ҳужжатларнинг тўғрилиги ҳамда ҳаққонийлиги бўйича осеменатор жавобгар ҳисобланади.
9. Агентлик бир иш кунида осеменатор томонидан берилган ариза ва унга илова қилинган ҳужжатларни Чорвачилик ва яйлов хўжалигини ривожлантириш агентлигига юборади.
10. Чорвачилик ва яйлов хўжалигини ривожлантириш агентлиги Агентлик томонидан юборилган аризага илова қилинган ҳужжатларни беш иш кунида кўриб чиқади ва осеменаторга субсидия ажратиш мақсадга мувофиқлиги ёки уни рад этиш тўғрисидаги хулосани электрон рақамли имзо билан тасдиқлайди.
Чорвачилик ва яйлов хўжалигини ривожлантириш агентлиги хулосанинг тўғри расмийлаштирилгани ва ҳаққонийлиги учун масъул ҳисобланади.
11. Субсидия ажратиш қуйидаги асосларга кўра рад этилади:
ушбу Низомнинг 8-банди талаблари бажарилмаганда;
Чорвачилик ва яйлов хўжалигини ривожлантириш агентлиги томонидан ўтказиладиган ўрганишлар натижасида субсидия олувчи томонидан сохта ҳужжатлар, нотўғри ёки ёлғон маълумотлар тақдим этиш ҳолатлари аниқланганда.
Субсидия ажратиш рад этилган тақдирда, осеменатор бир ой муддатда Чорвачилик ва яйлов хўжалигини ривожлантириш агентлиги хулосасида кўрсатилган камчиликларни тўлиқ бартараф қилган ҳолда, Агропортал орқали субсидия ажратиш тўғрисида қайта мурожаат қилиши мумкин.
Осеменатор Чорвачилик ва яйлов хўжалигини ривожлантириш агентлигининг субсидия ажратишни рад этиш тўғрисидаги хулосасидан норози бўлган тақдирда, юқори турувчи органга ёки судга шикоят қилиши мумкин.
12. Чорвачилик ва яйлов хўжалигини ривожлантириш агентлиги субсидия ажратиш мақсадга мувофиқлиги тўғрисидаги хулосани расмийлаштиргандан сўнг бир иш куни ичида тасдиқланган хулосани Агропортал орқали Агентликка юборади.
Агентлик Чорвачилик ва яйлов хўжалигини ривожлантириш агентлигининг субсидия ажратиш тўғрисидаги хулосасига асосан субсидияни осеменаторнинг аризасида кўрсатилган тижорат банкидаги талаб қилиб олингунча сақланадиган депозит ҳисобварағига ўтказиб беради.
3-боб. Сунъий уруғлантириладиган сигирларни рўйхатга олиш ва сунъий уруғлантириш
13. Осеменатор аҳоли хонадонларидаги сигирларни идентификация қилингани ҳамда «VIS Chinor» ахборот тизимига (кейинги ўринларда — ахборот тизими) киритилганини текшириб, ушбу сигир идентификация қилинмаган ҳамда ахборот тизимига киритилмаган бўлса, хонадон эгасини ушбу сигирни идентификация қилиш ҳамда ахборот тизимига киритиш бўйича огоҳлантиради.
14. Уруғлантириладиган сигир идентификация қилинган ҳамда ахборот тизимига киритилган бўлса, осеменатор томонидан эмбрион трансплантацияси амалга оширилади ёки сунъий уруғлантирилади.
Осеменатор сигир уруғлантирилгани бўйича маълумотларни (уруғлантирилган сана, уруғ ёки эмбрионнинг келиб чиқиши тўғрисидаги маълумотларни) ахборот тизимига киритади.
Осеменатор уч ойдан сўнг сунъий уруғлантирилган ёки эмбрион трансплантацияси амалга оширилган сигир ҳақиқатда бўғозлиги ёки бўғоз эмаслиги бўйича ахборот тизимига хулоса киритади.
15. Хонадон эгаси эмбрион трансплантацияси амалга оширилган ёки сунъий уруғлантирилган сигири бузоқлаган куни бу ҳақда Ҳайвонларни идентификация қилиш, рўйхатга олиш ва кузатиш марказининг туманлардаги масъул ходимларини хабардор қилади.
Ҳайвонларни идентификация қилиш, рўйхатга олиш ва кузатиш марказининг туманлардаги масъул ходимлари ва осеменатор ўз навбатида хонадон эгасига туғилган наслли бузоқ учун субсидия олиш имконияти ва тартиби тўғрисида тавсиявий маълумот беради.
Ҳайвонларни идентификация қилиш, рўйхатга олиш ва кузатиш марказининг туманлардаги масъул ходими ушбу туғилган наслли бузоқнинг идентификация қилингани ҳамда туғилган наслли бузоқ ҳақиқатан ҳам (бўғозлик муддати ва зотдорлигининг мослигига кўра) айнан эмбрион трансплантацияси ёки сунъий уруғлантириш орқали туғилгани ҳақидаги тасдиқловчи якуний хулосани ахборот тизимига киритади.
4-боб. Эмбрион трансплантацияси ёки сунъий уруғлантириш орқали туғилган наслдор бузоқ учун субсидия ажратиш
16. Эмбрион трансплантацияси ёки сунъий уруғлантириш орқали туғилган наслли бузоқ учун субсидия ушбу Низомга 2-иловада келтирилган схемага мувофиқ Агропортал орқали ажратилади.
17. Хонадон эгаси эмбрион трансплантацияси ёки сунъий уруғлантириш орқали туғилган наслли бузоқ учун субсидия олиш мақсадида бузоқ идентификация қилинган кундан бошлаб ўттиз кун ичида Агропортал орқали Агентликка аризага қуйидаги маълумотларни киритган ҳолда мурожаат қилади:
паспорт ёки идентификацияловчи ID-картаси нусхаси;
банк реквизитлари (банк бўлими номи, МФО ва талаб қилиб олингунча сақланадиган депозит ҳисобварағи);
туғилган наслли бузоқнинг идентификация қилингани бўйича фотолавҳаси.
Хонадон эгасидан ушбу бандда кўрсатилган ҳужжатлардан бошқа ҳужжатларни талаб қилишга йўл қўйилмайди.
Аризадаги маълумотлар ва тақдим қилинган ҳужжатларнинг тўғрилиги ҳамда ҳаққонийлиги бўйича хонадон эгаси жавобгар ҳисобланади.
18. Агентлик эмбрион трансплантацияси ёки сунъий уруғлантириш орқали туғилган наслли бузоқ тўғрисидаги маълумотларни (сигир ва бузоқнинг идентификация рақамлари, қачон ва қайси осеменатор томонидан эмбрион трансплантацияси ёки сунъий уруғлантириш амалга оширилгани, уруғнинг келиб чиқиши тўғрисидаги маълумотларни) ахборот тизимидан ўзаро интеграция орқали олади.
19. Агентлик хонадон эгаси томонидан тақдим этилган ҳужжатлар ушбу Низом талабларига мос бўлганда, субсидияни бир иш кунида хонадон эгасининг аризада кўрсатилган тижорат банкдаги талаб қилиб олингунча сақланадиган депозит ҳисобварағига ўтказиб берилади.
Субсидия миқдори ахборот тизимидан интеграция орқали олинган маълумотлар асосида Агропорталда автомат равишда аниқланади.
5-боб. Субсидия маблағларини мониторинг қилиш
20. Хонадон эгаси эмбрион трансплантацияси ёки сунъий уруғлантириш орқали туғилган наслли бузоқларни камида 2 ой давомида сақлаши шарт.
Агентлик Агропортал орқали эмбрион трансплантацияси ёки сунъий уруғлантириш орқали туғилган наслли бузоқлар учун субсидия олган хонадон эгалари тўғрисидаги маълумотларни Озиқ-овқат маҳсулотлари хавфсизлиги қўмитасига юборади.
Бунда Озиқ-овқат маҳсулотлари хавфсизлиги қўмитаси эмбрион трансплантацияси ёки сунъий уруғлантириш орқали туғилган наслли бузоқларнинг 2 ой давомида сақланишини ҳар ойда мониторинг қилиб боради.
Озиқ-овқат маҳсулотлари хавфсизлиги қўмитаси томонидан мониторинг жараёнида ушбу шарт бажарилмагани бўйича ҳолатлар аниқланганда, Агентликни Агропортал орқали бу ҳақда хабардор қилади. Агентлик мазкур ҳолатда субсидияни қайтариш чораларини кўради ёки ҳуқуқни муҳофаза қилувчи органларга мурожаат қилади.
Бундан эмбрион трансплантацияси ёки сунъий уруғлантириш орқали туғилган наслли бузоқлар ҳақиқатда нобуд бўлгани тўғрисида Озиқ-овқат маҳсулотлари хавфсизлиги қўмитаси томонидан тузилган далолатномалар мавжуд бўлган ҳолатлар мустасно.
6-боб. Якунловчи қоидалар
21. Субсидия ажратиш бўйича юзага келадиган келишмовчиликлар томонлар ўртасида музокаралар ўтказиш орқали ҳал қилинади.
Бунда тарафлар ўртасида келишмовчиликлар музокаралар ўтказиш орқали ҳал этилмаган тақдирда, низолар суд тартибида ҳал қилинади.
22. Бош прокуратура ҳузуридаги Иқтисодий жиноятларга қарши курашиш департаментининг Давлат молиявий назорати инспекцияси субсидияларнинг тўғри тайинланиши ва ажратилишини назорат қилади.
23. Ушбу Низом талаблари бузилишида айбдор бўлган шахслар қонунчилик ҳужжатларига мувофиқ жавоб беради.
Сунъий уруғлантирувчи техник-осеменаторлар ўқув курсларига сарфланган харажатларнинг бир қисмини қоплаш ҳамда аҳоли хонадонларида наслли қорамолларни кўпайтиришни рағбатлантириш учун субсидия ажратиш тартиби тўғрисидаги низомга 1-ИЛОВА
Сунъий уруғлантирувчи техник-осеменаторлар ўқув курсларига сарфланган харажатларнинг бир қисмини қоплаш учун субсидия ажратиш
Босқичлар Субъектлар Тадбирлар Бажариш муддатлари 1-босқич Осеменатор Субсидия олиш учун Агропортал орқали аризага Низомнинг 8-бандида келтирилган ҳужжатларни илова қилган ҳолда мурожаат қилади. Техник-осеменаторлар ўқув курсларини муваффақиятли тамомлаб, сертификат олгандан сўнг 2-босқич Аграр соҳада тўловлар агентлиги Осеменатор томонидан берилган ариза ва унга илова қилинган маълумотларни Чорвачилик ва яйлов хўжалигини ривожлантириш агентлигига юборади. 1 иш куни ичида 3-босқич Чорвачилик ва яйлов хўжалигини ривожлантириш агентлиги Агентлик томонидан юборилган аризага илова қилинган ҳужжатларни кўриб чиқади, субсидия ажратишнинг мақсадга мувофиқлиги ёки уни рад этиш тўғрисидаги хулосани электрон рақамли имзо билан тасдиқлайди. 5 иш куни ичида 4-босқич Агентлик Чорвачилик ва яйлов хўжалигини ривожлантириш агентлигининг ижобий хулосасига асосан осеменаторнинг аризада кўрсатилган тижорат банкидаги талаб қилиб олингунча сақланадиган депозит ҳисобварағига субсидия ажратади. 1 иш куни ичида
Сунъий уруғлантирувчи техник-осеменаторлар ўқув курсларига сарфланган харажатларнинг бир қисмини қоплаш ҳамда аҳоли хонадонларида наслли қорамолларни кўпайтиришни рағбатлантириш учун субсидия ажратиш тартиби тўғрисидаги низомга 2-ИЛОВА
Эмбрион трансплантацияси ёки сунъий уруғлантириш орқали туғилган наслли бузоқ учун субсидия ажратиш
Босқичлар Субъектлар Амалга ошириладиган тадбирлар Бажариш муддати 1-босқич Хонадон эгаси Эмбрион трансплантацияси ёки сунъий уруғлантириш орқали туғилган наслли бузоқ идентификация қилингандан сўнг субсидия олиш учун Агропортал орқали аризага Низомнинг 17-бандида келтирилган маълумотларни илова қилган ҳолда мурожаат қилади. 30 кун ичида 2-босқич Аграр соҳада тўловлар агентлиги Эмбрион трансплантацияси ёки сунъий уруғлантириш орқали туғилган наслли бузоқ тўғрисидаги маълумотларни ахборот тизимидан интеграция орқали шакллантиради ва талабгор хонадон эгаси томонидан тақдим этилган ҳужжатлар ушбу Низом талабларига мувофиқ бўлганда хонадон эгасининг аризасида кўрсатилган тижорат банкидаги талаб қилиб олингунча сақланадиган депозит ҳисобварағига субсидияни ўтказиб беради. 1 иш куни ичида » .
Ўзбекистон Республикасини Бош вазири А. АРИПОВ
Тошкент ш.,
2026 йил 6 август,
435 -сон
Oʻzbekiston Respublikasi Vazirlar Mahkamasining
qarori
NIZOM
NIZOM
SXEMASI
SXEMASI
Chorvachilik hamda baliqchilik tarmoqlarini davlat tomonidan qoʻllab-quvvatlashning qoʻshimcha chora-tadbirlari toʻgʻrisida
Oʻzbekiston Respublikasi Prezidentining “Baliqchilik tarmogʻini rivojlantirishga oid qoʻshimcha chora-tadbirlar toʻgʻrisida” 2026-yil 2-iyuldagi PF-122-son Farmoni hamda “Chorvachilik tarmogʻi va yaylov xoʻjaligini zamonaviy boshqaruv tizimi va yangicha yondashuvlar asosida rivojlantirish chora-tadbirlari toʻgʻrisida” 2026-yil 12-maydagi PQ-179-son qarori ijrosini taʼminlash maqsadida Vazirlar Mahkamasi qaror qiladi:
1. Chorvachilik komplekslarini tashkil qilish, naslli mollarni xarid qilish hamda baliqchilik loyihalarini moliyalashtirish uchun kredit ajratish tartibi toʻgʻrisidagi nizom 1-ilovaga muvofiq tasdiqlansin.
2. Oʻzbekiston Respublikasi Hukumatining 2-ilovaga muvofiq ayrim qarorlariga oʻzgartirish va qoʻshimchalar kiritilsin.
3. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari J.A. Xodjayev va qishloq xoʻjaligi vaziri I.Yu. Abduraxmonov zimmasiga yuklansin.
Vazirlar Mahkamasining 2026-yil 6-avgustdagi 435-son qaroriga 1-ILOVA
Chorvachilik komplekslarini tashkil qilish, naslli mollarni xarid qilish hamda baliqchilik loyihalarini moliyalashtirish uchun kredit ajratish tartibi toʻgʻrisida
1-bob. Umumiy qoidalar
1. Ushbu Nizom Oʻzbekiston Respublikasi Iqtisodiyot va moliya vazirligi huzuridagi Qishloq xoʻjaligini davlat tomonidan qoʻllab-quvvatlash jamgʻarmasi (keyingi oʻrinlarda — Jamgʻarma)ning kredit resurslari hisobidan tijorat banklari tomonidan chorvachilik va baliqchilik sohalarida faoliyat yurituvchi tadbirkorlik subyektlariga (keyingi oʻrinlarda — qarz oluvchi) chorvachilik va baliqchilik majmualarini tashkil etish, naslli yirik va mayda shoxli mollarni xarid qilish, shuningdek, chorvachilikda naslli buqalar urugʻini yetishtiradigan korxonani tashkil qiladigan tadbirkorlik subyektlariga qurilish, asbob-uskunalar va naslli buqalarni sotib olish hamda baliqchilik loyihalari, shu jumladan, naslli baliqlarni yetishtirish xarajatlari (keyingi oʻrinlarda — chorvachilik va baliqchilik loyihalari xarajatlari)ni moliyalashtirish uchun kredit ajratish tartibini belgilaydi.
2. Jamgʻarma va tijorat banki oʻrtasida chorvachilik va baliqchilik loyihalari xarajatlarini moliyalashtirish uchun kredit ajratish maqsadida resurs joylashtirish toʻgʻrisida har moliya yili uchun bitim tuziladi.
3. Tijorat banklari chorvachilik va baliqchilik loyihalari xarajatlarini moliyalashtirish uchun kredit ajratish yuzasidan ijobiy qaror qabul qilingan loyihalar boʻyicha Jamgʻarmaga kredit buyurtmanomalarini taqdim etadi.
2-bob. Jamgʻarma kredit resurslarini tijorat bankiga joylashtirish
4. Jamgʻarma tijorat banki bilan tuzgan bitimga muvofiq qarz oluvchining chorvachilik va baliqchilik loyihalari xarajatlarini moliyalashtirishga kredit ajratish uchun 10 yil muddatga, 4 yillik imtiyozli davr bilan, qolgan davrda oyma-oy teng ulushlarda qaytarish sharti bilan, yillik 6 foiz stavkada kredit resurslarini joylashtiradi.
Bunda kredit resurslari tijorat banki bilan qarz oluvchining kelishuviga asosan ajratiladigan kreditning muddati va imtiyozli davriga mutanosib ravishda joylashtiriladi.
Har bir loyiha uchun Jamgʻarma tomonidan ajratilgan kredit resurslarini qaytarish muddatining boshlanishi sifatida ushbu resurslarning dastlabki ajratilgan sanasi (oy) hisoblanadi.
5. Tijorat banki tomonidan kredit resurslari bitimda belgilangan muddatda qaytarilmasa, resurslarning qaytarilmagan qismiga foizlar Oʻzbekiston Respublikasi Markaziy banki asosiy stavkasining 1,5 barobaridan 4 foiz punktiga kamaytirilgan miqdorida hisoblanadi va tijorat banki tomonidan Jamgʻarmaga toʻlanadi.
Nazorat tadbirlarida ajratilgan kreditdan maqsadsiz foydalanish holatlari aniqlangan taqdirda, kreditning maqsadsiz ishlatilgan qismi uchun Oʻzbekiston Respublikasi Markaziy bankining asosiy stavkasi miqdorida Jamgʻarma foydasiga jarima qoʻllanadi.
Tijorat bankiga joylashtirilgan kredit resurslarining oʻttiz kalendar kuni davomida ishlatilmagan qismi tijorat banki tomonidan bir bank ish kunidan kechiktirilmasdan Jamgʻarmaga qaytariladi hamda ushbu mablagʻlar uchun qayta buyurtma taqdim etilmaydi.
Jamgʻarma tomonidan ajratilgan kredit resurslarining maqsadli ishlatilishi va belgilangan muddatda Jamgʻarmaga qaytarilishi hamda taqdim etilayotgan buyurtmanomalarning haqqoniyligiga tijorat banki masʼul va javobgar hisoblanadi.
3-bob. Tijorat banki tomonidan qarz oluvchining arizasini koʻrib chiqish
6. Kreditlar tijorat bankining kredit siyosati hamda Oʻzbekiston Respublikasi Markaziy bankining normativ-huquqiy hujjatlari talablariga muvofiq ajratiladi.
7. Qarz oluvchi kredit olish uchun uning asosiy talab qilib olinguncha saqlanadigan depozit hisobvaragʻiga xizmat koʻrsatayotgan tijorat bankiga Oʻzbekiston Respublikasi Qishloq xoʻjaligi vazirligining “Raqamli qishloq xoʻjaligi” yagona integratsion platformasi tarkibiga kiruvchi “Agroplatforma” axborot tizimi orqali ariza bilan birga tegishli hujjatlarni taqdim etadi.
8. Qarz oluvchining toʻlov intizomi, moliyaviy holati hamda kredit tarixidan kelib chiqqan holda kredit taʼminoti sifatida quyidagi taʼminot turlaridan biri qabul qilinadi:
mol-mulk garovi (qonunchilik hujjatlariga muvofiq undiruv qaratilishi mumkin boʻlmagan mol-mulklar bundan mustasno);
qarz oluvchiga rasmiylashtirilgan kreditni qaytarmaslik xatarining tijorat banki foydasiga sugʻurta qilingani toʻgʻrisidagi sugʻurta polisi;
majburiyatlarni bajarishga moliyaviy jihatdan toʻlovga layoqatli boʻlgan uchinchi shaxslarning kafilligi;
qonunchilik hujjatlarida nazarda tutilgan boshqa taʼminot turlari.
9. Ushbu Nizomning 8-bandida nazarda tutilgan va unga ilova qilingan hujjatlar toʻliq taqdim etilgan kundan boshlab tijorat banki qarz oluvchining arizasini bank kredit siyosatida belgilangan muddatlarda koʻrib chiqadi.
Qarz oluvchining arizasi boʻyicha ijobiy qaror qabul qilingan taqdirda, tijorat banki va qarz oluvchi oʻrtasida kredit shartnomasi tuziladi.
Kredit ajratish rad etilgan taqdirda, tijorat banki rad etish sabablarini asoslantirgan holda bir bank ish kuni ichida qarz oluvchini yozma shaklda xabardor qiladi.
4-bob. Qarz oluvchiga kredit ajratish
10. Kredit shartnomasi kuchga kirgandan soʻng keyingi bank ish kunidan kechiktirilmasdan qarz oluvchiga kredit hisobvaragʻi ochiladi.
11. Tijorat banki qarz oluvchi bilan tuzilgan kredit shartnomasiga muvofiq Jamgʻarmaning kredit resurslari hisobidan yillik 10 foiz stavkada (shundan bank marjasi — 4 foiz), 4 yillik imtiyozli davr bilan, qolgan davrda oyma-oy teng ulushlarda qaytarish sharti asosida, 10 yilgacha muddatga, kredit muddatini uzaytirish huquqisiz quyidagi yoʻnalishlarda kredit ajratadi:
a) chorvachilik va baliqchilik majmualarini tashkil qilish (qurish, rekonstruksiya qilish, mukammal taʼmirlash), nasldor yirik va mayda shoxli mollar hamda naslli baliqlarni xarid qilish loyihalarini moliyalashtirish uchun 5 milliard soʻmgacha;
b) chorvachilikda naslli buqalar urugʻini yetishtiradigan korxonani tashkil qiladigan tadbirkorlik subyektlariga qurilish, asbob-uskunalar va naslli qoramollar sotib olish hamda baliqchilik loyihalari, shu jumladan, naslli baliqlarni yetishtirish loyihalarini moliyalashtirish uchun 20 milliard soʻmgacha.
12. Qarz oluvchi kreditni kredit shartnomasida belgilangan muddatlarda qaytarmagan taqdirda, kreditning belgilangan muddatda qaytarilmagan qismi tijorat bankining oʻz mablagʻlari hisobidan tijorat krediti sifatida qayta rasmiylashtiriladi va ushbu resurs Jamgʻarmaga qaytariladi.
5-bob. Kredit monitoringi va ularni soʻndirish
13. Kredit hisobvaragʻidan toʻlovlar qarz oluvchining toʻlov topshiriqnomalari hamda elektron toʻlov vositasi asosida amalga oshiriladi.
14. Jamgʻarma mablagʻlari aylanadigan hisobvaraqlarga qonunchilik hujjatlariga muvofiq inkasso topshiriqnomalari qoʻyilishiga, shuningdek, ularni undirib olish va taqiq qoʻyishga yoʻl qoʻyilmaydi.
15. Tijorat banki qarz oluvchiga ajratilgan kreditning maqsadli sarflanishi hamda belgilangan muddatda qaytarilishi yuzasidan doimiy monitoring oʻtkazadi.
16. Tijorat banki tomonidan qarz oluvchi nomiga kredit va unga hisoblangan foiz toʻlovlarini soʻndirish uchun 23210 hisobvaragʻi ochiladi.
Qarz oluvchi tomonidan 23210 hisobvaragʻiga tushgan mablagʻlar hisobidan, birinchi navbatda, chorvachilik va baliqchilik xarajatlari uchun olingan kredit va unga hisoblangan foiz toʻlovlari soʻndiriladi.
17. Chorvachilik va baliqchilik loyihalari xarajatlarini moliyalashtirish uchun ajratilgan kredit va unga hisoblangan foiz toʻlovlari toʻliq soʻndirilgandan soʻng tijorat banki 23210 hisobvaragʻida qolgan mablagʻlar qarz oluvchining asosiy talab qilib olinguncha saqlanadigan depozit hisobvaragʻiga oʻtkaziladi, qarz oluvchi ushbu mablagʻlardan erkin foydalanadi.
18. Qarz oluvchi kredit va unga hisoblangan foizlarni muddatidan oldin toʻliq yoki qisman soʻndirish huquqiga ega.
6-bob. Yakunlovchi qoidalar
19. Tijorat banklari kreditlarning maqsadli sarflanishi boʻyicha monitoring yuritish hamda Jamgʻarmaning kredit resurslarini belgilangan muddatda qaytarilishi yuzasidan masʼul va javobgar hisoblanadi.
20. Tijorat banklariga joylashtirilgan kredit resurslaridan maqsadli foydalanilishi ustidan nazorat Oʻzbekiston Respublikasi Bosh prokuraturasi huzuridagi Iqtisodiy jinoyatchilikka qarshi kurashish departamentining Davlat moliyaviy nazorati inspeksiyasi tomonidan amalga oshiriladi.
21. Ushbu Nizom talablari buzilishida aybdor boʻlgan shaxslar qonunchilik hujjatlariga muvofiq javob beradi.
Vazirlar Mahkamasining 2026-yil 6-avgustdagi 435-son qaroriga 2-ILOVA
Oʻzbekiston Respublikasi Hukumatining ayrim qarorlariga kiritilayotgan oʻzgartirish va qoʻshimchalar
1. Vazirlar Mahkamasining 2025-yil 24-iyuldagi 466-son qarori bilan tasdiqlangan Paxta xomashyosi yetishtirish va yigʻim-terimini moliyalashtirish uchun ajratilgan kreditlar boʻyicha foiz toʻlovlarining bir qismini qoplab berish tartibi toʻgʻrisidagi vaqtinchalik nizomning 1-bandi ikkinchi xatboshisi quyidagi tahrirda bayon etilsin:
“Foiz toʻlovlari ushbu Nizom kuchga kirgan sanadan boshlab 2026-yilning toʻrtinchi choragi oxirigacha boʻlgan davr uchun taqdim etiladigan buyurtmalarga asosan 2027-yilning yanvar oyi yakuniga qadar qoplab beriladi”.
2. Vazirlar Mahkamasining “Agrar va oziq-ovqat sohalarini davlat tomonidan qoʻllab-quvvatlash tizimini tubdan takomillashtirish chora-tadbirlari toʻgʻrisida” 2026-yil 28-apreldagi 206-son qarorida :
a) 1-bandda:
oʻn toʻqqizinchi xatboshi quyidagi tahrirda bayon etilsin:
“Bugʻdoy yetishtirish uchun ajratilgan imtiyozli kreditlarni hosil yilining 1-avgustiga qadar qaytargan qishloq xoʻjaligi subyektlariga ushbu kredit boʻyicha toʻlangan foiz toʻlovlarining bir qismini subsidiya sifatida qaytarish tartibi toʻgʻrisidagi nizom 17 1 -ilovaga muvofiq”;
quyidagi mazmundagi yigirmanchi xatboshi bilan toʻldirilsin:
“Sunʼiy urugʻlantiruvchi texnik-osemenatorlar oʻquv kurslariga sarflangan xarajatlarning bir qismini qoplash hamda aholi xonadonlarida naslli qoramollarni koʻpaytirishni ragʻbatlantirish uchun subsidiya ajratish tartibi toʻgʻrisidagi nizom 17 2 -ilovaga muvofiq tasdiqlansin”;
b) 8-ilovaning 9-bandi “a” kichik bandi quyidagi tahrirda bayon etilsin:
“a) lizing yoki kredit shartnomasi boʻyicha:
qishloq xoʻjaligi texnikasi xaridida Oʻzbekiston Respublikasi Prezidentining “Chirchiq shahrida qishloq xoʻjaligi mashinasozlik klasterini tashkil qilish chora-tadbirlari toʻgʻrisida” 2021-yil 11-noyabrdagi PQ-7-son qarorining 8-bandi uchinchi xatboshisida belgilangan miqdorlarda;
avtopilot uskunasini xarid qilishda foiz xarajatlarining 14 foizlik punktidan yuqori, biroq 8 foizlik punktidan oshmagan qismini”;
v) quyidagi mazmundagi 17 2 -ilova bilan toʻldirilsin:
“Vazirlar Mahkamasining 2026-yil 28-apreldagi 206-son qaroriga 17 2 -ILOVA
Sunʼiy urugʻlantiruvchi texnik-osemenatorlar oʻquv kurslariga sarflangan xarajatlarning bir qismini qoplash hamda aholi xonadonlarida naslli qoramollarni koʻpaytirishni ragʻbatlantirish uchun subsidiya ajratish tartibi toʻgʻrisida
1-bob. Umumiy qoidalar
1. Ushbu Nizom sunʼiy urugʻlantiruvchi texnik-osemenatorlar oʻquv kurslariga sarflangan xarajatlarning bir qismini qoplash hamda aholi xonadonlarida identifikatsiya qilingan sigirlardan naslli buzoq olgan holda naslli qoramollarni koʻpaytirishni ragʻbatlantirish uchun subsidiya ajratish tartibini belgilaydi.
2. Ushbu Nizomda quyidagi asosiy tushunchalardan foydalaniladi:
Agroportal — Qishloq xoʻjaligi vazirligining “Raqamli qishloq xoʻjaligi” yagona integratsion platformasi;
identifikatsiya qilingan sigir — yagona axborot tizimida roʻyxatdan oʻtkazilgan va birka (ID)ga ega hayvon;
naslli buzoq — identifikatsiya qilingan sigirdan olingan va belgilangan tartibda roʻyxatdan oʻtkazilgan buzoq;
oliy taʼlim tashkilotlari — Toshkent davlat agrar universiteti, Qishloq xoʻjaligi sohasi kadrlarining malakasini oshirish va qayta tayyorlash instituti, Samarqand davlat veterinariya meditsinasi, chorvachilik va biotexnologiyalar universiteti, uning Qoraqalpogʻiston Respublikasi va Toshkent shahridagi filiallari hamda Andijon qishloq xoʻjaligi va agrotexnologiyalar instituti;
subsidiya — sunʼiy urugʻlantiruvchi texnik-osemenatorlar oʻquv kurslariga sarflangan xarajatlarning bir qismini qoplash hamda aholi xonadonlarida identifikatsiya qilingan sigirlardan naslli buzoq olgan holda naslli qoramollarni koʻpaytirishni ragʻbatlantirish uchun Oʻzbekiston Respublikasi Davlat budjetidan ajratiladigan mablagʻ;
sunʼiy urugʻlantirish — maxsus hujjatga ega ( maxsus sertifikatga ega boʻlgan) mutaxassis tomonidan amalga oshirilgan sunʼiy urugʻlantirish xizmati;
embrion transplantatsiyasi — maxsus hujjatga ega (maxsus sertifikatga ega boʻlgan) mutaxassis tomonidan ilgʻor biotexnologiya asosida amalga oshirilgan embrion koʻchirish jarayoni;
“VIS Chinor” — Identifikatsiya qilingan hayvonlar yagona elektron maʼlumotlar bazasi axborot tizimi.
3. Subsidiya hisobi Oʻzbekiston Respublikasi Qishloq xoʻjaligi vazirligi huzuridagi Agrar sohada toʻlovlar agentligining (keyingi oʻrinlarda — Agentlik) Iqtisodiyot va moliya vazirligi huzuridagi Gʻaznachilik xizmati qoʻmitasida ochilgan maxsus shaxsiy gʻazna hisobvaragʻida yuritiladi.
4. Oziq-ovqat mahsulotlari xavfsizligi qoʻmitasi hamda Chorvachilik va yaylov xoʻjaligini rivojlantirish agentligi Qoraqalpogʻiston Respublikasi Vazirlar Kengashi, Toshkent shahri va viloyatlar hokimliklari bilan birgalikda har yili 1-iyulga qadar kelgusi yilda subsidiya ajratish maqsadida hududlar kesimida talab etiladigan subsidiyaning prognoz koʻrsatkichlarini Qishloq xoʻjaligi vazirligiga taqdim etadi.
5. Oʻzbekiston Respublikasi Qishloq xoʻjaligi vazirligi Agentlik bilan birgalikda har kalendar yilning 20-iyuliga qadar Oziq-ovqat mahsulotlari xavfsizligi qoʻmitasi, Chorvachilik va yaylov xoʻjaligini rivojlantirish agentligi tomonidan taqdim etilgan prognoz koʻrsatkichlarini oʻrganib chiqadi hamda budjet parametrlarini shakllantirishda inobatga olish uchun hisob-kitoblarni Iqtisodiyot va moliya vazirligiga taqdim qiladi.
Iqtisodiyot va moliya vazirligi kelgusi yil uchun Oʻzbekiston Respublikasi Davlat budjeti parametrlarini shakllantirishda subsidiya uchun zarur mablagʻlarni nazarda tutadi.
6. Subsidiya quyidagi yoʻnalishlarda ajratiladi:
2026-yil 1-iyuldan 2028-yil 31-dekabriga qadar sunʼiy urugʻlantiruvchi texnik-osemenatorlar oʻquv kurslariga sarflangan xarajatlarning bir qismini qoplash uchun — 2 million soʻm;
2026-yil 1-iyuldan 2030-yil 1-yanvarga qadar sunʼiy urugʻlantirish orqali olingan naslli buzoq uchun — 500 ming soʻm, embrion transplantatsiyasi orqali olingan naslli buzoq uchun — 700 ming soʻm.
2-bob. Sunʼiy urugʻlantiruvchi texnik-osemenatorlar oʻquv kurslariga sarflangan xarajatlarning bir qismini qoplash
7. Sunʼiy urugʻlantiruvchi texnik-osemenatorlar oʻquv kurslariga sarflangan xarajatlarning bir qismini qoplash ushbu Nizomga 1-ilovada keltirilgan sxemaga muvofiq Agroportal orqali amalga oshiriladi.
8. Sunʼiy urugʻlantiruvchi texnik-osemenatorlar (keyingi oʻrinlarda — osemenator) oʻquv kurslarini muvaffaqiyatli tamomlab, sertifikat olgandan soʻng texnik-osemenator oʻquv kurslariga sarflangan xarajatlarining bir qismini qoplab berish uchun Agentlikka Agroportal orqali ariza bilan quyidagi hujjatlarni ilova qilgan holda murojaat qiladi:
pasport yoki identifikatsiyalovchi ID-kartasi nusxasi;
bank rekvizitlari (bank boʻlimi nomi, MFO va talab qilib olinguncha saqlanadigan depozit hisobvaragʻi);
oʻquv kurslarini muvaffaqiyatli tugatganlik toʻgʻrisida oliy taʼlim tashkilotlari tomonidan berilgan maʼlumotnoma va sertifikat nusxasi.
Osemenatordan ushbu bandda koʻrsatilgan hujjatlardan boshqa hujjatlarni talab qilishga yoʻl qoʻyilmaydi.
Arizadagi maʼlumotlar va taqdim qilingan hujjatlarning toʻgʻriligi hamda haqqoniyligi boʻyicha osemenator javobgar hisoblanadi.
9. Agentlik bir ish kunida osemenator tomonidan berilgan ariza va unga ilova qilingan hujjatlarni Chorvachilik va yaylov xoʻjaligini rivojlantirish agentligiga yuboradi.
10. Chorvachilik va yaylov xoʻjaligini rivojlantirish agentligi Agentlik tomonidan yuborilgan arizaga ilova qilingan hujjatlarni besh ish kunida koʻrib chiqadi va osemenatorga subsidiya ajratish maqsadga muvofiqligi yoki uni rad etish toʻgʻrisidagi xulosani elektron raqamli imzo bilan tasdiqlaydi.
Chorvachilik va yaylov xoʻjaligini rivojlantirish agentligi xulosaning toʻgʻri rasmiylashtirilgani va haqqoniyligi uchun masʼul hisoblanadi.
11. Subsidiya ajratish quyidagi asoslarga koʻra rad etiladi:
ushbu Nizomning 8-bandi talablari bajarilmaganda;
Chorvachilik va yaylov xoʻjaligini rivojlantirish agentligi tomonidan oʻtkaziladigan oʻrganishlar natijasida subsidiya oluvchi tomonidan soxta hujjatlar, notoʻgʻri yoki yolgʻon maʼlumotlar taqdim etish holatlari aniqlanganda.
Subsidiya ajratish rad etilgan taqdirda, osemenator bir oy muddatda Chorvachilik va yaylov xoʻjaligini rivojlantirish agentligi xulosasida koʻrsatilgan kamchiliklarni toʻliq bartaraf qilgan holda, Agroportal orqali subsidiya ajratish toʻgʻrisida qayta murojaat qilishi mumkin.
Osemenator Chorvachilik va yaylov xoʻjaligini rivojlantirish agentligining subsidiya ajratishni rad etish toʻgʻrisidagi xulosasidan norozi boʻlgan taqdirda, yuqori turuvchi organga yoki sudga shikoyat qilishi mumkin.
12. Chorvachilik va yaylov xoʻjaligini rivojlantirish agentligi subsidiya ajratish maqsadga muvofiqligi toʻgʻrisidagi xulosani rasmiylashtirgandan soʻng bir ish kuni ichida tasdiqlangan xulosani Agroportal orqali Agentlikka yuboradi.
Agentlik Chorvachilik va yaylov xoʻjaligini rivojlantirish agentligining subsidiya ajratish toʻgʻrisidagi xulosasiga asosan subsidiyani osemenatorning arizasida koʻrsatilgan tijorat bankidagi talab qilib olinguncha saqlanadigan depozit hisobvaragʻiga oʻtkazib beradi.
3-bob. Sunʼiy urugʻlantiriladigan sigirlarni roʻyxatga olish va sunʼiy urugʻlantirish
13. Osemenator aholi xonadonlaridagi sigirlarni identifikatsiya qilingani hamda “VIS Chinor” axborot tizimiga (keyingi oʻrinlarda — axborot tizimi) kiritilganini tekshirib, ushbu sigir identifikatsiya qilinmagan hamda axborot tizimiga kiritilmagan boʻlsa, xonadon egasini ushbu sigirni identifikatsiya qilish hamda axborot tizimiga kiritish boʻyicha ogohlantiradi.
14. Urugʻlantiriladigan sigir identifikatsiya qilingan hamda axborot tizimiga kiritilgan boʻlsa, osemenator tomonidan embrion transplantatsiyasi amalga oshiriladi yoki sunʼiy urugʻlantiriladi.
Osemenator sigir urugʻlantirilgani boʻyicha maʼlumotlarni (urugʻlantirilgan sana, urugʻ yoki embrionning kelib chiqishi toʻgʻrisidagi maʼlumotlarni) axborot tizimiga kiritadi.
Osemenator uch oydan soʻng sunʼiy urugʻlantirilgan yoki embrion transplantatsiyasi amalga oshirilgan sigir haqiqatda boʻgʻozligi yoki boʻgʻoz emasligi boʻyicha axborot tizimiga xulosa kiritadi.
15. Xonadon egasi embrion transplantatsiyasi amalga oshirilgan yoki sunʼiy urugʻlantirilgan sigiri buzoqlagan kuni bu haqda Hayvonlarni identifikatsiya qilish, roʻyxatga olish va kuzatish markazining tumanlardagi masʼul xodimlarini xabardor qiladi.
Hayvonlarni identifikatsiya qilish, roʻyxatga olish va kuzatish markazining tumanlardagi masʼul xodimlari va osemenator oʻz navbatida xonadon egasiga tugʻilgan naslli buzoq uchun subsidiya olish imkoniyati va tartibi toʻgʻrisida tavsiyaviy maʼlumot beradi.
Hayvonlarni identifikatsiya qilish, roʻyxatga olish va kuzatish markazining tumanlardagi masʼul xodimi ushbu tugʻilgan naslli buzoqning identifikatsiya qilingani hamda tugʻilgan naslli buzoq haqiqatan ham (boʻgʻozlik muddati va zotdorligining mosligiga koʻra) aynan embrion transplantatsiyasi yoki sunʼiy urugʻlantirish orqali tugʻilgani haqidagi tasdiqlovchi yakuniy xulosani axborot tizimiga kiritadi.
4-bob. Embrion transplantatsiyasi yoki sunʼiy urugʻlantirish orqali tugʻilgan nasldor buzoq uchun subsidiya ajratish
16. Embrion transplantatsiyasi yoki sunʼiy urugʻlantirish orqali tugʻilgan naslli buzoq uchun subsidiya ushbu Nizomga 2-ilovada keltirilgan sxemaga muvofiq Agroportal orqali ajratiladi.
17. Xonadon egasi embrion transplantatsiyasi yoki sunʼiy urugʻlantirish orqali tugʻilgan naslli buzoq uchun subsidiya olish maqsadida buzoq identifikatsiya qilingan kundan boshlab oʻttiz kun ichida Agroportal orqali Agentlikka arizaga quyidagi maʼlumotlarni kiritgan holda murojaat qiladi:
pasport yoki identifikatsiyalovchi ID-kartasi nusxasi;
bank rekvizitlari (bank boʻlimi nomi, MFO va talab qilib olinguncha saqlanadigan depozit hisobvaragʻi);
tugʻilgan naslli buzoqning identifikatsiya qilingani boʻyicha fotolavhasi.
Xonadon egasidan ushbu bandda koʻrsatilgan hujjatlardan boshqa hujjatlarni talab qilishga yoʻl qoʻyilmaydi.
Arizadagi maʼlumotlar va taqdim qilingan hujjatlarning toʻgʻriligi hamda haqqoniyligi boʻyicha xonadon egasi javobgar hisoblanadi.
18. Agentlik embrion transplantatsiyasi yoki sunʼiy urugʻlantirish orqali tugʻilgan naslli buzoq toʻgʻrisidagi maʼlumotlarni (sigir va buzoqning identifikatsiya raqamlari, qachon va qaysi osemenator tomonidan embrion transplantatsiyasi yoki sunʼiy urugʻlantirish amalga oshirilgani, urugʻning kelib chiqishi toʻgʻrisidagi maʼlumotlarni) axborot tizimidan oʻzaro integratsiya orqali oladi.
19. Agentlik xonadon egasi tomonidan taqdim etilgan hujjatlar ushbu Nizom talablariga mos boʻlganda, subsidiyani bir ish kunida xonadon egasining arizada koʻrsatilgan tijorat bankdagi talab qilib olinguncha saqlanadigan depozit hisobvaragʻiga oʻtkazib beriladi.
Subsidiya miqdori axborot tizimidan integratsiya orqali olingan maʼlumotlar asosida Agroportalda avtomat ravishda aniqlanadi.
5-bob. Subsidiya mablagʻlarini monitoring qilish
20. Xonadon egasi embrion transplantatsiyasi yoki sunʼiy urugʻlantirish orqali tugʻilgan naslli buzoqlarni kamida 2 oy davomida saqlashi shart.
Agentlik Agroportal orqali embrion transplantatsiyasi yoki sunʼiy urugʻlantirish orqali tugʻilgan naslli buzoqlar uchun subsidiya olgan xonadon egalari toʻgʻrisidagi maʼlumotlarni Oziq-ovqat mahsulotlari xavfsizligi qoʻmitasiga yuboradi.
Bunda Oziq-ovqat mahsulotlari xavfsizligi qoʻmitasi embrion transplantatsiyasi yoki sunʼiy urugʻlantirish orqali tugʻilgan naslli buzoqlarning 2 oy davomida saqlanishini har oyda monitoring qilib boradi.
Oziq-ovqat mahsulotlari xavfsizligi qoʻmitasi tomonidan monitoring jarayonida ushbu shart bajarilmagani boʻyicha holatlar aniqlanganda, Agentlikni Agroportal orqali bu haqda xabardor qiladi. Agentlik mazkur holatda subsidiyani qaytarish choralarini koʻradi yoki huquqni muhofaza qiluvchi organlarga murojaat qiladi.
Bundan embrion transplantatsiyasi yoki sunʼiy urugʻlantirish orqali tugʻilgan naslli buzoqlar haqiqatda nobud boʻlgani toʻgʻrisida Oziq-ovqat mahsulotlari xavfsizligi qoʻmitasi tomonidan tuzilgan dalolatnomalar mavjud boʻlgan holatlar mustasno.
6-bob. Yakunlovchi qoidalar
21. Subsidiya ajratish boʻyicha yuzaga keladigan kelishmovchiliklar tomonlar oʻrtasida muzokaralar oʻtkazish orqali hal qilinadi.
Bunda taraflar oʻrtasida kelishmovchiliklar muzokaralar oʻtkazish orqali hal etilmagan taqdirda, nizolar sud tartibida hal qilinadi.
22. Bosh prokuratura huzuridagi Iqtisodiy jinoyatlarga qarshi kurashish departamentining Davlat moliyaviy nazorati inspeksiyasi subsidiyalarning toʻgʻri tayinlanishi va ajratilishini nazorat qiladi.
23. Ushbu Nizom talablari buzilishida aybdor boʻlgan shaxslar qonunchilik hujjatlariga muvofiq javob beradi.
Sunʼiy urugʻlantiruvchi texnik-osemenatorlar oʻquv kurslariga sarflangan xarajatlarning bir qismini qoplash hamda aholi xonadonlarida naslli qoramollarni koʻpaytirishni ragʻbatlantirish uchun subsidiya ajratish tartibi toʻgʻrisidagi nizomga 1-ILOVA
Sunʼiy urugʻlantiruvchi texnik-osemenatorlar oʻquv kurslariga sarflangan xarajatlarning bir qismini qoplash uchun subsidiya ajratish
Bosqichlar Subyektlar Tadbirlar Bajarish muddatlari 1-bosqich Osemenator Subsidiya olish uchun Agroportal orqali arizaga Nizomning 8-bandida keltirilgan hujjatlarni ilova qilgan holda murojaat qiladi. Texnik-osemenatorlar oʻquv kurslarini muvaffaqiyatli tamomlab, sertifikat olgandan soʻng 2-bosqich Agrar sohada toʻlovlar agentligi Osemenator tomonidan berilgan ariza va unga ilova qilingan maʼlumotlarni Chorvachilik va yaylov xoʻjaligini rivojlantirish agentligiga yuboradi. 1 ish kuni ichida 3-bosqich Chorvachilik va yaylov xoʻjaligini rivojlantirish agentligi Agentlik tomonidan yuborilgan arizaga ilova qilingan hujjatlarni koʻrib chiqadi, subsidiya ajratishning maqsadga muvofiqligi yoki uni rad etish toʻgʻrisidagi xulosani elektron raqamli imzo bilan tasdiqlaydi. 5 ish kuni ichida 4-bosqich Agentlik Chorvachilik va yaylov xoʻjaligini rivojlantirish agentligining ijobiy xulosasiga asosan osemenatorning arizada koʻrsatilgan tijorat bankidagi talab qilib olinguncha saqlanadigan depozit hisobvaragʻiga subsidiya ajratadi. 1 ish kuni ichida
Sunʼiy urugʻlantiruvchi texnik-osemenatorlar oʻquv kurslariga sarflangan xarajatlarning bir qismini qoplash hamda aholi xonadonlarida naslli qoramollarni koʻpaytirishni ragʻbatlantirish uchun subsidiya ajratish tartibi toʻgʻrisidagi nizomga 2-ILOVA
Embrion transplantatsiyasi yoki sunʼiy urugʻlantirish orqali tugʻilgan naslli buzoq uchun subsidiya ajratish
Bosqichlar Subyektlar Amalga oshiriladigan tadbirlar Bajarish muddati 1-bosqich Xonadon egasi Embrion transplantatsiyasi yoki sunʼiy urugʻlantirish orqali tugʻilgan naslli buzoq identifikatsiya qilingandan soʻng subsidiya olish uchun Agroportal orqali arizaga Nizomning 17-bandida keltirilgan maʼlumotlarni ilova qilgan holda murojaat qiladi. 30 kun ichida 2-bosqich Agrar sohada toʻlovlar agentligi Embrion transplantatsiyasi yoki sunʼiy urugʻlantirish orqali tugʻilgan naslli buzoq toʻgʻrisidagi maʼlumotlarni axborot tizimidan integratsiya orqali shakllantiradi va talabgor xonadon egasi tomonidan taqdim etilgan hujjatlar ushbu Nizom talablariga muvofiq boʻlganda xonadon egasining arizasida koʻrsatilgan tijorat bankidagi talab qilib olinguncha saqlanadigan depozit hisobvaragʻiga subsidiyani oʻtkazib beradi. 1 ish kuni ichida ” .
Oʻzbekiston Respublikasini Bosh vaziri A. ARIPOV
Toshkent sh.,
2026-yil 6-avgust,
435 -son