UzbekAI

Ўзбекистон Республикасининг Конституциявий Қонуни

Ўзбекистон Республикаси Президенти Администрацияси тўғрисида

Қонунчилик палатаси томонидан 2026 йил 6 августда қабул қилинган Сенат томонидан 2026 йил 7 августда маъқулланган

1-боб. Умумий қоидалар

1-модда. Ушбу Конституциявий Қонуннинг мақсади

Ушбу Конституциявий Қонуннинг мақсади Ўзбекистон Республикаси Президенти Администрациясининг (бундан буён матнда Администрация деб юритилади) фаолиятини тартибга солишдан иборат.

2-модда. Администрация тўғрисидаги қонунчилик

Администрация тўғрисидаги қонунчилик Ўзбекистон Республикасининг Конституцияси , ушбу Конституциявий Қонун, Ўзбекистон Республикаси Президентининг фармонлари ва қарорлари, шунингдек бошқа қонунчилик ҳужжатларидан иборатдир.

3-модда. Администрациянинг ҳуқуқий мақоми

Администрация Ўзбекистон Республикаси Президентининг давлат бошлиғи сифатида давлат ҳокимияти органларининг келишилган ҳолда фаолият юритишини ва ҳамкорлигини таъминлашига кўмаклашадиган, Ўзбекистон Республикаси Президентининг ваколатларини амалга оширишни ташкилий, ҳуқуқий ва таҳлилий жиҳатдан таъминлайдиган давлат органидир.

Администрация Ўзбекистон Республикаси Президентининг фармонлари, қарорлари, фармойишлари ва топшириқлари ижроси доирасида давлат органларининг ва ташкилотларининг, давлат иштирокидаги корхоналарнинг (бундан буён матнда давлат органлари ва ташкилотлари деб юритилади) фаолиятини мувофиқлаштиради, мазкур ҳужжатларнинг ижросини мониторинг қилади ва назоратини ташкил этади.

Администрация ўз фаолиятида бевосита Ўзбекистон Республикаси Президентига бўйсунади ва унга ҳисобдордир.

Администрация юридик шахс ҳисобланади, у Ўзбекистон Республикаси Давлат герби тасвири туширилган ҳамда ўз номи давлат тилида ёзилган муҳрга ва бланкаларга эга бўлади.

4-модда. Администрация фаолиятининг асосий принциплари

Администрация фаолиятининг асосий принциплари Ўзбекистон Республикаси Конституцияси ва қонунларининг устунлиги, инсон ҳуқуқлари ва эркинликларининг устуворлиги, холислик, мустақиллик, очиқлик ҳамда шаффофликдан иборат.

5-модда. Администрацияни шакллантириш

Администрация Ўзбекистон Республикаси Президенти томонидан шакллантирилади.

Администрацияга Ўзбекистон Республикаси Президенти томонидан лавозимга тайинланадиган ва лавозимидан озод этиладиган Администрация Раҳбари бошчилик қилади.

Администрация ўз фаолиятини Ўзбекистон Республикаси Президенти томонидан белгиланадиган асосий йўналишлар доирасида амалга оширади.

Администрация Раҳбари ва унинг шартнома асосида жалб қилинадиган маслаҳатчилари, Ўзбекистон Республикаси Президентининг ёрдамчиси, Администрация Раҳбарининг ўринбосарлари, Администрация Раҳбари котибияти мудири, Ўзбекистон Республикаси Президентининг маслаҳатчилари, уларнинг биринчи ўринбосарлари ва ўринбосарлари, Ўзбекистон Республикаси Президентининг вакиллари, Администрация таркибий бўлинмаларининг бошлиқлари ҳамда уларнинг биринчи ўринбосарлари ва ўринбосарлари Администрациянинг мансабдор шахслари (бундан буён матнда Администрациянинг мансабдор шахслари деб юритилади) ҳисобланади.

Администрация бошқарув ва хизматчи ходимларининг лавозимлари рўйхати Администрация тўғрисидаги низомда белгиланади.

Администрациянинг регламенти, Ўзбекистон Республикаси Президенти ҳузуридаги давлат органлари ва ташкилотлари тўғрисидаги низомлар Ўзбекистон Республикаси Президенти томонидан, Администрация тўғрисидаги низом, Администрация ҳузуридаги давлат органлари ва ташкилотлари тўғрисидаги низомлар, Администрация таркибий бўлинмалари фаолиятининг асосий йўналишлари ва Администрация ходимларининг штатлар жадвали Администрация Раҳбари томонидан тасдиқланади.

Администрациянинг таркибий бўлинмалари тўғрисидаги низомлар, Администрация ходимларининг функционал вазифалари ва Администрация таркибий бўлинмаларининг тузилмалари Администрация таркибий бўлинмаларининг бошлиқлари томонидан тасдиқланади.

6-модда. Администрациянинг асосий вазифалари

Администрациянинг асосий вазифалари қуйидагилардан иборат:

Ўзбекистон Республикаси Президентининг фаолиятини ташкилий, ҳуқуқий ва таҳлилий жиҳатдан таъминлаш;

мамлакатнинг ижтимоий-иқтисодий ва ижтимоий-сиёсий ривожланиши ҳолатини таҳлил қилиш, Ўзбекистон Республикаси Президенти томонидан амалга оширилаётган ислоҳотларни ташкилий, ҳуқуқий ва таҳлилий жиҳатдан таъминлаш ҳамда янги муҳим ташаббусларни ишлаб чиқиш;

мамлакатда қонунийликни ва ҳуқуқ-тартиботни, фуқароларнинг ҳуқуқ ва эркинликларига, Ўзбекистон Республикасининг Конституцияси ва қонунларига риоя этилишини таъминлашга ҳамда суд-ҳуқуқ тизимини ислоҳ қилишга кўмаклашиш;

ҳуқуқни муҳофаза қилувчи ва назорат қилувчи органлар, куч ишлатишга ваколатли тузилмалар ҳамда Ўзбекистон Республикаси Президентига бевосита бўйсунувчи (ҳисобдор) давлат органлари ва ташкилотлари, мансабдор шахслар фаолиятини мувофиқлаштириш;

давлат ички ва ташқи сиёсатининг асосий йўналишлари, Ўзбекистон Республикасининг суверенитетини ҳимоя қилиш, унинг хавфсизлигини ва ҳудудий яхлитлигини таъминлаш бўйича таклифлар ишлаб чиқиш;

аҳоли ва тадбиркорлик субъектлари билан очиқ ва тўғридан-тўғри мулоқотни ташкил этиш ҳамда халқ фаровонлигини юксалтириш, жисмоний ва юридик шахсларнинг Ўзбекистон Республикаси Президентига мурожаат қилиш ҳуқуқлари амалга оширилиши учун шарт-шароитлар яратиш;

давлат ҳокимияти вакиллик органлари ва фуқаролик жамияти институтлари билан демократик ҳуқуқий давлат ва очиқ фуқаролик жамиятини барпо этишда уларнинг ролини кучайтиришга қаратилган самарали ҳамкорликни ташкил этиш, умуммиллий ҳамжиҳатликни мустаҳкамлаш;

ягона давлат кадрлар сиёсати амалга оширилишини ва давлат хизмати ишларининг бошқарилишини таъминлаш;

Ўзбекистон Республикаси Президенти ва Администрация ҳузуридаги давлат органлари ва ташкилотларининг, шунингдек Ўзбекистон Республикаси Президентининг ваколатларини амалга оширишга кўмаклашувчи маслаҳат-кенгаш органларининг фаолиятини ташкил этиш ҳамда Ўзбекистон Республикаси Президенти ҳузуридаги Хавфсизлик кенгашининг фаолияти Ўзбекистон Республикаси Президенти томонидан мувофиқлаштирилишини ташкилий, ҳуқуқий ва таҳлилий жиҳатдан таъминлаш;

Ўзбекистон Республикаси Президентининг қонунчилик сиёсати соҳасидаги ваколатлари амалга оширилишини ташкил этиш ва таъминлаш;

Ўзбекистон Республикаси Президентининг инсон ҳуқуқларига ва Ўзбекистон Республикаси Конституциясига риоя этилишининг кафили сифатидаги, давлат суверенитетини, хавфсизлигини ва ҳудудий яхлитлигини таъминлаш ваколатлари амалга оширилишини ташкил этиш;

Ўзбекистон Республикаси Президентининг давлат ҳокимияти органларининг келишилган ҳолда фаолият юритишини ва ҳамкорлигини таъминлаш бўйича ваколатлари амалга оширилишини ташкил этиш;

Ўзбекистон Республикаси Президентининг халқаро муносабатлар билан боғлиқ фаолиятига оид ваколатлари амалга оширилишини таъминлаш;

Ўзбекистон Республикаси Президентининг Ўзбекистон Республикаси халқига ҳамда Олий Мажлисига мамлакат ички ва ташқи сиёсатини амалга оширишнинг энг муҳим масалалари юзасидан мурожаат қилиш ҳуқуқи амалга оширилишини таъминлаш;

Ўзбекистон Республикаси Президентининг фуқаролик ва сиёсий бошпана бериш, амнистия ва судлар томонидан ҳукм қилинган шахсларни афв этишга оид масалаларни кўриб чиқиш бўйича ваколатлари амалга оширилишини таъминлаш;

қонунлар ва Ўзбекистон Республикаси Президентининг фармонлари, қарорлари, фармойишлари ва топшириқларининг, Администрация Раҳбари фармойишлари ва топшириқларининг ижро этилишини ташкил этиш, назоратини олиб бориш ҳамда уларни амалга оширишга кўмаклашиш.

2-боб. Администрациянинг фаолиятини ташкил этиш

7-модда. Администрациянинг асосий ваколатлари

Администрация ўз зиммасига юклатилган вазифаларни бажариш учун қуйидаги асосий ваколатларга эга бўлади:

Администрацияга белгиланган тартибда киритилган қонунчилик ҳужжатларини, Ўзбекистон Республикаси Президентининг ва Ўзбекистон Республикаси Вазирлар Маҳкамасининг фармойишлари лойиҳаларини якуний ишлаб чиқишни ташкил этиш;

Ўзбекистон Республикаси Президентининг фармонлари, қарорлари ва фармойишлари, Администрация Раҳбарининг фармойишлари ҳамда Ўзбекистон Республикаси Вазирлар Маҳкамасининг қарорлари ва фармойишлари лойиҳаларини мустақил равишда ишлаб чиқиш;

мамлакатни ижтимоий-иқтисодий ва ижтимоий-сиёсий ривожлантиришнинг долзарб йўналишларини ўрганиш ҳамда таклифлар ишлаб чиқиш учун давлат органлари ва ташкилотларининг раҳбарлари, шу жумладан ҳокимлар бошчилигида ишчи комиссиялар ва ишчи гуруҳлар тузиш;

зарур материаллар ва маълумотларни давлат органлари ва ташкилотларидан сўраш ҳамда олиш, шу жумладан қонунчилик ҳужжатларида белгиланган тартибда доимий асосда олиш, барча давлат органлари ва ташкилотларининг ахборот тизимларидан, маълумотлар базаларидан, ахборот-маълумот қайдларидан, архивларидан, маълумотларга ишлов беришнинг автоматлаштирилган тизимларидан ҳамда бошқа ахборот ресурсларидан фойдаланиш;

Ўзбекистон Республикаси Президентига бевосита бўйсунувчи (ҳисобдор) давлат органлари ва ташкилотлари, Ўзбекистон Республикаси Президенти ва Администрация ҳузуридаги давлат органлари ва ташкилотлари фаолиятини мувофиқлаштириш ҳамда назорат қилиш;

давлат органлари ва ташкилотлари раҳбарларига бажарилиши мажбурий бўлган кўрсатмалар ҳамда топшириқлар бериш, уларнинг бажарилиши ва натижалари тўғрисида батафсил маълумот талаб қилиш;

қонунларни ва Ўзбекистон Республикаси Президентининг фармонларини, қарорлари, фармойишлари ва топшириқларини, Администрация Раҳбарининг фармойишлари ва топшириқларини амалга ошириш юзасидан давлат органлари ва ташкилотларининг фаолиятини қонунчилик ҳужжатларига мувофиқ ўрганиш, шунингдек ўрганиш натижалари бўйича материалларни аниқланган қоидабузарликларни ва камчиликларни бартараф этиш учун ушбу давлат органлари ва ташкилотларининг раҳбарларига юбориш;

давлат органлари ва ташкилотларининг мансабдор шахслари фаолияти самарадорлигини, улар томонидан қонунларнинг ва Ўзбекистон Республикаси Президенти фармонлари, қарорлари, фармойишлари ва топшириқларининг, Администрация Раҳбари фармойишлари ва топшириқларининг ижросини таъминлаш ҳолатини баҳолаш, шунингдек бу борада ўз зиммасига юклатилган вазифаларни бажармаганлиги ёки лозим даражада бажармаганлиги учун ушбу мансабдор шахсларни интизомий жавобгарликка тортиш, шу жумладан эгаллаб турган лавозимидан озод этишгача бўлган масала юзасидан ташаббус кўрсатиш;

давлат органлари ва ташкилотлари зиммасига юклатилган вазифаларнинг ижроси ва уларга бириктирилган тармоқ (соҳа) бўйича аниқ натижаларга эришишнинг боришини кўриб чиқиш ҳамда муҳокама қилиш мақсадида навбатдан ташқари ҳайъатларни (йиғилишларни) чақириш юзасидан таклифлар киритиш;

ахборот-таҳлилий материалларни, шунингдек норматив-ҳуқуқий ҳужжатлар лойиҳаларини тайёрлаш доирасида давлат органлари ва ташкилотларининг, шунингдек бошқа ташкилотларнинг мансабдор шахсларини ва мутахассисларини жалб этиш;

давлат органлари ва ташкилотларининг комплаенс ва коррупцияга қарши ички назорат тузилмалари фаолиятини ташкил этиш ҳамда қонунчилик ҳужжатлари билан ушбу тузилмалар зиммасига юклатилган вазифаларнинг улар томонидан амалга оширилишини мувофиқлаштириш;

Администрацияга ишга қабул қилиш учун номзодларни давлат органларидан ва ташкилотларидан мустақил равишда танлаб олишни амалга ошириш;

жисмоний ва юридик шахсларнинг Администрацияга келиб тушадиган мурожаатлари кўриб чиқилишини, шу жумладан Ўзбекистон Республикаси Президентининг Халқ қабулхонаси томонидан кўриб чиқилишини ташкил этиш;

Ўзбекистон Республикасининг давлат мукофотлари билан мукофотлаш, кўкрак нишонлари билан тақдирлаш учун номзодларнинг ўрганилишини ташкил этиш;

ўз зиммасига юклатилган вазифаларнинг бажарилишини таъминлаш соҳасидаги давлат сирларини ташкил этувчи архив маълумотларини ҳамда бошқа маълумотларни сақлаш, расмийлаштириш, улардан фойдаланиш ва уларни беришнинг алоҳида тартибини белгилаш, зарур ахборот тизимларини яратиш, шунингдек махфийлик режимини мустақил равишда таъминлаш, унга риоя этилишини назорат қилиш ҳамда тегишли норматив-ҳуқуқий ҳужжатларнинг талаблари бажарилишини текшириш тадбирларини ташкил этиш.

Администрация қонунчилик ҳужжатларига мувофиқ бошқа ваколатларга ҳам эга бўлиши мумкин.

8-модда. Администрация Раҳбарининг ҳуқуқий мақоми

Администрациянинг фаолияти мазкур Конституциявий Қонун ва Ўзбекистон Республикаси Президенти томонидан Администрация зиммасига юклатилган вазифаларга ва асосий йўналишларга мувофиқ Администрация Раҳбари томонидан ташкил этилади ҳамда мувофиқлаштирилади.

Администрация Раҳбари Ўзбекистон Республикаси Президентининг Ўзбекистон Республикаси Конституциясида ва бошқа қонунчилик ҳужжатларида белгиланган ваколатларини, шу жумладан давлат ҳокимияти органларининг келишилган ҳолда фаолият юритишини ва ҳамкорлигини таъминлашга оид ваколатларини амалга оширишни ташкилий, ҳуқуқий ва таҳлилий жиҳатдан таъминлашни ташкил этиш учун масъул мансабдор шахс ҳисобланади.

9-модда. Администрация Раҳбарининг ваколатлари

Администрация Раҳбари:

Ўзбекистон Республикаси Конституциясига мувофиқ Ўзбекистон Республикаси Президентининг давлат бошлиғи сифатида давлат ҳокимияти органларининг келишилган ҳолда фаолият юритишини ҳамда ҳамкорлигини таъминлашга оид фаолиятини ташкилий, ҳуқуқий ва таҳлилий жиҳатдан таъминлашга раҳбарлик қилади;

Ўзбекистон Республикаси Президенти мувофиқлаштирувида Администрация фаолиятига раҳбарлик қилади, Администрация таркибий бўлинмаларининг тизимли фаолиятини таъминлайди, Администрациянинг фаолиятини ташкил этишга доир фармойишлар чиқаради;

Администрациянинг ташкилий тузилмасига қўшимча штат бирликларини киритади ва қисқартиради, тегишли соҳалар ва тармоқларни ривожлантириш бўйича лойиҳа офисларини ташкил этади ҳамда тугатади;

Ўзбекистон Республикаси Президентининг Ўзбекистон Республикаси Олий Мажлиси палаталари (бундан буён матнда Олий Мажлис палаталари деб юритилади), суд ҳокимияти ҳамда судьялар ҳамжамияти органлари билан ҳамкорлигини ташкилий, ҳуқуқий ва таҳлилий жиҳатдан таъминлаш чораларини кўради, Ўзбекистон Республикаси Вазирлар Маҳкамаси, ҳуқуқни муҳофаза қилувчи ва назорат қилувчи органлар ҳамда куч ишлатишга ваколатли тузилмалар фаолиятига оид ваколатлари амалга оширилишини таъминлаш чораларини кўради;

Ўзбекистон Республикаси Президентига бевосита бўйсунувчи (ҳисобдор) давлат органлари ва ташкилотлари раҳбарлари фаолиятини назорат қилади, мувофиқлаштиради ҳамда унинг натижадорлигини баҳолашни ташкил этади;

Ўзбекистон Республикаси Президентига бевосита бўйсунувчи (ҳисобдор) давлат органлари ва ташкилотлари раҳбарларига ўз ваколатлари доирасида топшириқлар беради ҳамда уларнинг ижросини ташкил этади;

Ўзбекистон Республикаси Президенти учун ахборот-таҳлилий ва ташкилий материалларни тайёрлашни ташкил этади, жамият ва давлат ҳаёти учун муҳим бўлган масалалар юзасидан Ўзбекистон Республикаси Президентига таҳлилий ахборот киритади;

Ўзбекистон Республикаси Президенти ҳузуридаги маслаҳат-кенгаш органлари фаолиятини ташкил этади;

Ўзбекистон Республикаси Президентининг қонунчилик ташаббуси ҳуқуқлари амалга оширилишини таъминлаш чораларини кўради, Ўзбекистон Республикаси Президенти томонидан қабул қилинадиган норматив-ҳуқуқий тусдаги ва бошқа ҳужжатлар лойиҳаларини тайёрлашни мувофиқлаштиради, шунингдек Ўзбекистон Республикаси Президентининг қонунчилик ташаббуси ҳуқуқи асосида киритилган қонун лойиҳаларини Олий Мажлис палаталарида кўриб чиқиш жараёнларида ўз вакиллари орқали иштирок этади;

республика ва маҳаллий ижро этувчи ҳокимият органларида маъмурий ислоҳотларнинг амалга оширилишини мувофиқлаштиради ва назорат қилади, шунингдек давлат бошқаруви тизимини такомиллаштириш бўйича Ўзбекистон Республикаси Президентига таклифлар киритади;

давлат органлари ва ташкилотларининг қонунчилик ҳужжатларида белгиланган тартибда Ўзбекистон Республикаси Президенти билан келишиши талаб этиладиган масалаларни кўриб чиқишни ташкил этади;

ҳудудий ривожланиш дастурларини амалга оширишни мувофиқлаштиради ва ҳудудларнинг ижтимоий-иқтисодий ривожланиши ҳолатини мониторинг қилади, шунингдек ҳудудларни ривожлантиришдаги тизимли муаммоларни ҳал этиш бўйича Ўзбекистон Республикаси Президентига таклифлар киритади;

Ўзбекистон Республикаси Президенти фармонлари, қарорлари, фармойишлари ва топшириқларининг ижроси устидан назоратни ташкил этади;

республика ва маҳаллий ижро этувчи ҳокимият органлари раҳбарларининг Ўзбекистон Республикаси Президентининг фармонлари, қарорлари, фармойишлари ва топшириқлари ижроси тўғрисидаги ҳисоботларини қабул қилади, уларни лозим даражада бажармаган мансабдор шахсларга нисбатан лавозимдан озод этишгача бўлган интизомий таъсир чораларини қўллашни ташкил этади, ушбу масалалар бўйича Ўзбекистон Республикаси Президентига таклифлар киритади;

давлат органлари учун асосий самарадорлик кўрсаткичлари тизимининг жорий этилишига ва амал қилишига кўмаклашади;

белгиланган тартибда давлат органлари ва ташкилотлари томонидан киритилган Ўзбекистон Республикаси Президенти фармонлари, қарорлари ва фармойишлари лойиҳаларининг ҳуқуқий, молиявий, коррупцияга қарши ҳамда бошқа турдаги экспертизаларини ташкил этади;

жисмоний ва юридик шахсларнинг Ўзбекистон Республикаси Президенти номига келиб тушган мурожаатларига оид масалалар билан боғлиқ ишларнинг, шунингдек давлат сиёсатини амалга ошириш масалалари бўйича жамоатчилик фикри мониторингининг амалга оширилишини, аҳоли ва тадбиркорлик субъектларининг долзарб муаммолари ўрганилишини ташкил этади;

Ўзбекистон Республикаси Президентининг топшириғига кўра мамлакат ичида ва халқаро муносабатларда Ўзбекистон Республикаси Президенти манфаатларини ифода этади, халқаро музокаралар ва тадбирларда иштирок этади;

Администрациянинг давлат органлари ва ташкилотлари билан боғлиқ фаолиятини тартибга солишга ҳамда бу борада уларнинг фаолиятини ташкил этишга оид норматив-ҳуқуқий ҳужжат тусига эга фармойишларни имзолайди;

тегишли давлат органлари ва ташкилотлари раҳбарлари лавозимларига номзодлар бўйича ҳамда ушбу лавозимдаги раҳбарларни озод этиш тўғрисида Ўзбекистон Республикаси Президентига таклифлар киритади;

Ўзбекистон Республикаси Президенти томонидан белгиланган тартибга мувофиқ давлат органлари ва ташкилотларининг мансабдор шахсларини лавозимга тайинлайди ҳамда лавозимидан озод этади, шунингдек давлат кадрлар сиёсати амалга оширилишини ташкил этади;

Ўзбекистон Республикаси Президенти томонидан белгиланган масалалар бўйича халқаро мажбуриятларнинг бажарилишини мувофиқлаштиради;

Ўзбекистон Республикаси Президенти томонидан белгиланган тартиб асосида давлат органлари ва ташкилотларида комплаенс назорати хизмати тузилмаларини, шунингдек улар раҳбарларининг комплаенс ва коррупцияга қарши ички назорат бўйича ўринбосари (маслаҳатчи) лавозимларини жорий этади ва тугатади;

Администрация мажлисларида раислик қилади, уларда кўриб чиқилган масалалар юзасидан топшириқларнинг баённомаларини имзолайди;

Администрациянинг мансабдор шахсларини, бошқарув ва хизматчи ходимларини қонунчиликда белгиланган тартибда хорижий давлатларга хизмат сафарларига юборади.

Администрация Раҳбари қонунчилик ҳужжатларига мувофиқ бошқа ваколатларга ҳам эга бўлиши мумкин.

Администрация Раҳбари ўзига тақдим этилган ҳужжатларни ўрганиб чиқиб, таклифлар тайёрлашда, Администрация Раҳбарининг топшириқлари амалга оширилишини ташкил этиш ва ижросини назорат қилиб боришда, Администрация фаолиятининг марказлашган ҳолда бошқарилишини таъминлашда ҳамда бошқа вазифаларни амалга оширишда кўмаклашиш учун шартнома асосида мустақил маслаҳатчиларни жалб қилиши мумкин.

10-модда. Администрациянинг таркибий бўлинмалари

Администрация Раҳбарининг котибияти, Ўзбекистон Республикаси Президентининг қабулхонаси, Администрация Раҳбарининг ўринбосарлари бўлинмалари, Ўзбекистон Республикаси Президенти маслаҳатчилари ва вакиллари бўлинмалари, Ўзбекистон Республикаси Президенти ҳузуридаги Хавфсизлик кенгаши котибияти, Ўзбекистон Республикаси Президенти протоколи, Администрация департаментлари, Комплаенс хизмати, Ишлар бошқармаси ва Администрациянинг ташкилий тузилмасига кирувчи бошқа бўлинмалар Администрациянинг таркибий бўлинмаларидир.

Администрация таркибий бўлинмаларининг асосий вазифалари, фаолияти йўналишлари ва иш тартиби Администрация Раҳбари томонидан тасдиқланадиган Администрация тўғрисидаги низом билан белгиланади.

Администрация таркибий бўлинмаларининг мақсадли иш фаолияти ҳар йили Администрация Раҳбари томонидан тасдиқланадиган ҳамда Администрациянинг таркибий бўлинмалари учун чораклик, ярим йиллик ва йиллик амалий натижаларни ўзида акс эттирадиган Администрациянинг фаолият дастурига мувофиқ амалга оширилади.

Администрацияда иш юритиш Администрация Раҳбари томонидан тасдиқланадиган Ҳужжатлар билан ишлаш қоидаларига мувофиқ амалга оширилади.

Ўзбекистон Республикаси Президенти ҳамда Администрация ҳузурида тегишли соҳалар ва фаолият йўналишлари бўйича давлат органлари ва ташкилотлари ташкил этилиши мумкин.

11-модда. Администрациянинг мансабдор шахсларини, бошқарув ва хизматчи ходимларини лавозимга тайинлаш ва лавозимидан озод этиш

Администрация Раҳбари, Ўзбекистон Республикаси Президентининг ёрдамчиси, Администрация Раҳбарининг ўринбосарлари, Администрация Раҳбари котибиятининг мудири, Ўзбекистон Республикаси Президентининг маслаҳатчилари, Ўзбекистон Республикаси Президентининг вакиллари, Администрациянинг бошқа таркибий бўлинмалари бошлиқлари, Ўзбекистон Республикаси Президенти ҳузуридаги давлат органлари ва ташкилотлари раҳбарлари ҳамда уларнинг ўринбосарлари Ўзбекистон Республикаси Президенти томонидан белгиланган тартиб асосида лавозимга тайинланади ва лавозимидан озод этилади.

Ўзбекистон Республикаси Президенти маслаҳатчиларининг биринчи ўринбосарини ва ўринбосарларини ҳамда Администрация таркибий бўлинмалари бошлиқларининг биринчи ўринбосарини ва ўринбосарларини, Комплаенс хизмати бошлиғини, Канцелярия мудирини ҳамда Администрациянинг бошқарув ва хизматчи ходимларини, шунингдек Администрация ҳузуридаги давлат органлари ва ташкилотлари раҳбарларини ҳамда уларнинг ўринбосарларини лавозимга тайинлаш ва лавозимидан озод этиш Администрация Раҳбари томонидан амалга оширилади.

Администрациянинг мансабдор шахсларига, бошқарув ва хизматчи ходимларига Администрация регламентида белгиланган тартибда хизмат гувоҳномаси берилади.

Хизмат гувоҳномаси ходимнинг Администрацияга мансублигини, унинг шахсини ва лавозимини тасдиқловчи ҳужжат ҳисобланади.

Хизмат гувоҳномаси Администрация ходимининг ушбу Конституциявий Қонунда кўрсатилган ҳуқуқларга эга эканлигини ва ваколатлардан фойдаланишини тасдиқлайди.

Администрация ҳузуридаги давлат органлари ва ташкилотлари ходимлари ушбу ташкилотлар раҳбарлари томонидан лавозимга тайинланади ва лавозимидан озод этилади.

Администрация Раҳбари билан келишилган ҳолда Администрация ҳузуридаги давлат органлари ва ташкилотларидаги лавозимларга тайинланган ҳуқуқни муҳофаза қилувчи ва назорат қилувчи органларнинг, ҳарбий бўлинмаларнинг ҳарбий хизматчилари (ходимлари) ушбу идораларда ҳарбий хизматда қолдирилиши (кадрларнинг амалдаги захирасига киритилиши) мумкин.

12-модда. Администрация ҳужжатлари

Администрация Раҳбари Ўзбекистон Республикаси Президентининг фармонлари, қарорлари, фармойишлари, топшириқлари ва ташаббуслари ижросини ташкил этиш мақсадида, шунингдек Администрация Раҳбарининг ваколатларига оид масалалар бўйича ва қонунчилик ҳужжатларига мувофиқ Ўзбекистон Республикасининг бутун ҳудудида барча давлат органлари, корхоналар, муассасалар, ташкилотлар, мансабдор шахслар томонидан бажарилиши мажбурий бўлган фармойишлар ёки топшириқлар чиқаради.

Администрация Раҳбарининг фармойишлари, агар уларнинг ўзида кечроқ муддат кўрсатилмаган бўлса, имзоланган кундан эътиборан кучга киради.

Ўзбекистон Республикаси Президенти Администрация Раҳбарининг фармойишлари ва топшириқларини тўхтатиб туриши, бекор қилиши мумкин.

Администрация Раҳбари ўзи қабул қилган ҳужжатларнинг бажарилиши устидан назоратни бевосита, Администрация таркибий бўлинмалари раҳбарлари ёки республика ижро этувчи ҳокимият органлари орқали амалга оширади.

Администрация Раҳбарининг фармойишлари ва топшириқларини ишлаб чиқиш, келишиш ва Администрация Раҳбарига имзолаш учун киритиш ҳамда Администрация Раҳбарининг фармойишларини эълон қилиш тартиби Администрациянинг регламентида белгиланади.

13-модда. Ўзбекистон Республикаси Президентининг фармонлари, қарорлари ва фармойишлари лойиҳаларини ишлаб чиқиш, Ўзбекистон Республикаси Президентининг фармонлари, қарорлари ва фармойишларининг ижросини ташкил этиш ҳамда мониторинг қилиш

Ўзбекистон Республикаси Президентининг фармонлари, қарорлари ва фармойишлари лойиҳалари қонунчилик ҳужжатларининг ижроси юзасидан, Ўзбекистон Республикаси Президентининг ёки Администрация Раҳбарининг топшириғига кўра, шунингдек давлат органлари ва ташкилотларининг ташаббуси бўйича, ушбу органлар ва ташкилотлар зиммасига юклатилган вазифаларнинг ижроси юзасидан ишлаб чиқилади.

Администрация Ўзбекистон Республикаси Президентининг фармонлари, қарорлари ва фармойишлари лойиҳаларини мустақил равишда ишлаб чиқишга ҳақли.

Ўзбекистон Республикаси Президентининг фармонлари, қарорлари ва фармойишлари лойиҳаларини тайёрлаш, кўриб чиқиш, имзолаш ҳамда эълон қилиш Администрациянинг регламентига мувофиқ амалга оширилади.

Ўзбекистон Республикаси Президентининг фармонлари, қарорлари ва фармойишлари лойиҳаларини вазирликлар ва идоралар томонидан ишлаб чиқиш, келишиш ҳамда Администрацияга киритиш қонунчилик ҳужжатларида белгиланган тартибда амалга оширилади.

Ўзбекистон Республикаси Президентининг фармонлари, қарорлари, фармойишлари ва топшириқлари ижросини ташкил этиш, назорат қилиш ҳамда бажариш юзасидан ижро интизомининг ҳолатини тизимли равишда ва танқидий жиҳатдан таҳлил қилиш қонунчилик ҳужжатларига ҳамда Администрациянинг регламентига мувофиқ амалга оширилади.

Ўзбекистон Республикаси Президентининг фармонлари, қарорлари, фармойишлари ва топшириқлари ижросини назорат қилиш қонунчилик ҳужжатларида белгиланган тартибда амалга оширилади.

Ўзбекистон Республикаси Президенти фармонлари, қарорлари, фармойишлари ва топшириқларининг, Администрация Раҳбари фармойишлари ва топшириқларининг ижросини таъминлаш бўйича ишларни бевосита назорат қилиш ҳамда мувофиқлаштириш мақсадида Администрация Раҳбари барча даражадаги давлат органлари ва ташкилотларида ҳамда Ўзбекистон Республикасининг хорижий давлатлардаги дипломатик муассасаларида Администрация Раҳбарининг вакили лавозимини заруратга кўра жорий этишга ҳақли.

Администрация Раҳбарининг вакиллари Администрация Раҳбари томонидан лавозимга тайинланади ва лавозимидан озод этилади.

14-модда. Ўзбекистон Республикаси Президенти ҳузуридаги Хавфсизлик кенгаши фаолиятини ташкил этиш

Ҳуқуқни муҳофаза қилувчи ва назорат қилувчи органлар, куч ишлатишга ваколатли тузилмалар ҳамда ҳарбий тузилмалар, шунингдек ташқи ишлар сиёсати учун масъул идоралар Ўзбекистон Республикаси Президенти ҳузуридаги Хавфсизлик кенгаши таркибига киритилади ҳамда мазкур кенгаш уларнинг асосий фаолиятини мақсадли бошқарувчи ва уйғунликдаги ҳамкорлигини таъминловчи олий мувофиқлаштирувчи орган ҳисобланади.

Ўзбекистон Республикаси Президенти Ўзбекистон Республикаси Президенти ҳузуридаги Хавфсизлик кенгашининг раиси ҳисобланади ҳамда унга бошчилик қилади.

Администрация Раҳбари Ўзбекистон Республикаси Президенти ҳузуридаги Хавфсизлик кенгаши раисининг ўринбосари ҳисобланади ҳамда ушбу кенгаш аъзоларининг фаолиятини ташкил этади ва мувофиқлаштиради.

Ўзбекистон Республикаси Президенти ҳузуридаги Хавфсизлик кенгашининг ишчи органи Ўзбекистон Республикаси Президенти ҳузуридаги Хавфсизлик кенгаши котибияти ҳисобланади.

Администрация Ўзбекистон Республикаси Президенти ҳузуридаги Хавфсизлик кенгаши котибияти орқали Ўзбекистон Республикаси Президентининг Қуролли Кучларга, мудофаага, сафарбарликка, хавфсизликка ва фавқулодда вазиятларга оид конституциявий ваколатларини таъминлайди.

Ўзбекистон Республикаси Президенти ҳузуридаги Хавфсизлик кенгашининг фаолиятини ташкил этиш ва мувофиқлаштириш тартиби қонунчилик ҳужжатларига мувофиқ белгиланади.

15-модда. Ўзбекистон Республикаси Президенти томонидан устувор ёки стратегик деб белгиланган инвестиция, инфратузилма, саноат, энергетика, транспорт бўйича лойиҳаларнинг, ижтимоий ва бошқа лойиҳаларнинг амалга оширилишини мувофиқлаштириш, мониторинг ва назорат қилиш

Администрация Ўзбекистон Республикаси Президенти томонидан устувор ёки стратегик деб белгиланган инвестиция, инфратузилма, саноат, энергетика, транспорт бўйича лойиҳаларнинг, ижтимоий ва бошқа лойиҳаларнинг ўз вақтида, сифатли ҳамда натижали тарзда амалга оширилишини мувофиқлаштиради, мониторинг ва назорат қилади.

Ўзбекистон Республикаси Президенти томонидан устувор ёки стратегик деб белгиланган инвестиция, инфратузилма, саноат, энергетика, транспорт бўйича лойиҳаларнинг, ижтимоий ва бошқа лойиҳаларнинг рўйхати, уларнинг мақсадли кўрсаткичлари, асосий босқичлари ҳамда якуний муддатлари Ўзбекистон Республикаси Президентининг фармонларига, қарорларига, фармойишларига ёки топшириғига асосан Администрация Раҳбари томонидан тасдиқланади.

16-модда. Администрациянинг Олий Мажлис палаталари билан ҳамкорлиги

Администрация Олий Мажлис палаталари билан ҳамкорлик доирасида:

Олий Мажлис палаталари билан давлат сиёсатининг устувор йўналишлари бўйича доимий мулоқотни таъминлайди;

Ўзбекистон Республикаси Президентининг қонунчилик ташаббуси ҳуқуқи амалга оширилишини таъминлайди;

Ўзбекистон Республикаси Президенти томонидан Олий Мажлис палаталарига киритиладиган дастурий ҳужжатларни ва бошқа масалаларни тайёрлашни мувофиқлаштиради;

Ўзбекистон Республикаси Президентининг тегишлилиги бўйича Олий Мажлис палаталарига Ўзбекистон Республикаси Конституциясига ва бошқа қонунчилик ҳужжатларига мувофиқ тақдим этадиган лавозимларга номзодлар ҳамда бошқа масалалар бўйича ваколатларини ташкилий, ҳуқуқий ва таҳлилий жиҳатдан таъминлайди;

Ўзбекистон Республикаси Олий Мажлиси томонидан Ўзбекистон Республикаси Президентига қонун ҳужжатларида белгиланган тартибда юборилган қонунларнинг Ўзбекистон Республикаси Президентига кўриб чиқиш учун тақдим этилишини таъминлайди;

Ўзбекистон Республикаси Президентининг қонунни ўз эътирозлари билан Ўзбекистон Республикаси Олий Мажлисига қайтаришга оид ҳуқуқи амалга оширилишини таъминлайди.

Администрациянинг Олий Мажлис палаталари билан ҳамкорлиги қонунчилик ҳужжатларида ва Администрациянинг регламентида назарда тутилган бошқа масалалар бўйича ҳам амалга оширилиши мумкин.

17-модда. Администрациянинг Ўзбекистон Республикаси Вазирлар Маҳкамаси ва унинг бўйсунувидаги давлат органлари ҳамда ташкилотлари билан алоқалари

Администрация Ўзбекистон Республикаси Президентининг Ўзбекистон Республикаси Вазирлар Маҳкамаси (бундан буён матнда Вазирлар Маҳкамаси деб юритилади) ва унинг бўйсунувидаги давлат органлари ҳамда ташкилотлари билан алоқалари доирасида:

Ўзбекистон Республикаси Президенти фармонлари, қарорлари, фармойишлари ва топшириқларининг ижросини ташкил этиш доирасида Вазирлар Маҳкамаси ҳамда унинг бўйсунувидаги давлат органлари ва ташкилотларининг идоралараро ҳамкорлигини мувофиқлаштиради, мазкур ҳужжатларнинг ижросини мониторинг қилади ва назоратини ташкил этади;

Ўзбекистон Республикаси Президентининг Ўзбекистон Республикаси халқига ҳамда Олий Мажлисига мурожаатномасида баён этилган топшириқларнинг Вазирлар Маҳкамаси ва унинг бўйсунувидаги давлат органлари ҳамда ташкилотлари томонидан самарали ижро этилишини таъминлаш чора-тадбирларининг мониторингини ташкил этади;

Ўзбекистон Республикаси Президентининг республика ижро этувчи ҳокимият органларини тузиш ҳамда тугатиш, уларнинг раҳбарларини қонунчилик ҳужжатларига мувофиқ лавозимга тайинлаш ва лавозимидан озод этиш, республика ижро этувчи ҳокимият органларининг ҳужжатларини тўхтатиш, бекор қилиш бўйича ваколатларини ташкилий, ҳуқуқий ва таҳлилий жиҳатдан таъминлайди;

миллий ривожланиш стратегиялари, давлат дастурлари ва миллий лойиҳаларнинг республика ижро этувчи ҳокимият органлари томонидан амалга оширилиши бўйича мониторингни ташкил этади;

Вазирлар Маҳкамаси ва унинг бўйсунувидаги давлат органлари ҳамда ташкилотлари фаолияти самарадорлигини таҳлил қилишда иштирок этади;

Ўзбекистон Республикаси Президенти иштирокида ўтказиладиган Вазирлар Маҳкамаси фаолиятига оид йиғилишлар ва муҳокамаларнинг ташкилий, ҳуқуқий ва таҳлилий жиҳатдан тайёрланишини таъминлайди;

Ўзбекистон Республикаси Бош вазири томонидан кадрлар сиёсатига оид таклифларнинг Ўзбекистон Республикаси Президентига қонунчилик ҳужжатларига мувофиқ тақдим этилишини таъминлайди.

Администрация Раҳбари ёки Администрациянинг ваколат берилган мансабдор шахси Вазирлар Маҳкамаси, унинг Раёсати, комиссиялари, кенгашлари, давлат органлари ва ташкилотларининг ҳайъатлари ҳамда бошқа коллегиал органлари мажлисларида ўз фикр ва мулоҳазалари билан иштирок этишга ҳақли.

Администрациянинг Вазирлар Маҳкамаси билан алоқалари қонунчилик ҳужжатларида ва Администрациянинг регламентида назарда тутилган бошқа масалалар бўйича ҳам амалга оширилиши мумкин.

18-модда. Администрациянинг Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари билан алоқалари

Администрация Ўзбекистон Республикаси Президентининг ҳудудларни ижтимоий-иқтисодий ривожлантириш борасидаги фармонлари, қарорлари, фармойишлари ва топшириқлари ижросини таъминлаш ҳамда давлат сиёсатини амалга ошириш масалалари бўйича Қорақалпоғистон Республикаси Вазирлар Кенгаши фаолиятига кўмаклашади, вилоятлар ва Тошкент шаҳар ҳокимликлари фаолиятини мувофиқлаштиради, мониторинг ва назорат қилади.

Администрация:

Ўзбекистон Республикаси Президенти фармонлари, қарорлари, фармойишлари ва топшириқларининг ҳудудларда ижро этилиши юзасидан мониторингни ташкил этади;

Ўзбекистон Республикаси Президентининг вилоятлар ҳокимларини ва Тошкент шаҳар ҳокимини тайинлаш ҳамда лавозимидан озод этиш, Ўзбекистон Республикаси Конституциясини , қонунларини бузган ёки ҳокимнинг шаъни ва қадр-қимматига доғ туширадиган хатти-ҳаракатлар содир этган туман ва шаҳар ҳокимларини лавозимидан озод этиш, ҳокимларнинг ҳужжатларини тўхтатиш, бекор қилиш бўйича ваколатлари амалга оширилишини ташкилий, ҳуқуқий ва таҳлилий жиҳатдан таъминлайди;

ҳудудларни ижтимоий-иқтисодий ривожлантириш ҳолатини мониторинг қилади;

ҳудудларнинг иқтисодий, ижтимоий, инфратузилмавий ва экологик ривожланиш ҳолати, аҳолининг турмуш даражаси ҳамда ҳудудлар ўртасидаги тафовутлар тизимли равишда таҳлил қилинишини таъминлайди, аниқланган муаммоларнинг ечими бўйича Ўзбекистон Республикаси Президентига асосланган таклифлар киритади;

Ўзбекистон Республикаси Президентининг ҳудудларни ижтимоий-иқтисодий ривожлантиришга доир ташрифлари, йиғилишлари ва қарорларини тайёрлашни, республика ижро этувчи ҳокимият органлари ҳамда маҳаллий ижро этувчи ҳокимият органлари ўртасидаги ҳамкорликни ташкил этади.

Администрациянинг Ўзбекистон Республикаси Президентининг Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари фаолиятига оид ваколатларини ташкил этиш ҳамда таъминлашга оид бошқа масалалар қонунчилик ҳужжатларида ва Администрациянинг регламентида белгиланган тартибга мувофиқ амалга оширилади.

19-модда. Администрациянинг суд ҳокимияти ва судьялар ҳамжамияти органлари билан ҳамкорлиги

Администрация суд ҳокимияти ва судьялар ҳамжамияти органлари билан ҳамкорлик доирасида:

Ўзбекистон Республикаси Президентига ҳамкорликка оид масалалар бўйича таклифлар ва таҳлилий материаллар тайёрлайди;

Ўзбекистон Республикаси Президентининг Ўзбекистон Республикаси Конституциясида назарда тутилган суд ҳокимияти ва судьялар ҳамжамияти органлари билан ҳамкорлигига оид ваколатларини ташкилий, ҳуқуқий ва таҳлилий жиҳатдан таъминлайди;

суд-ҳуқуқ соҳасидаги ислоҳотларни мувофиқлаштиради;

суд тизимини ислоҳ қилишга доир таклифларни ишлаб чиқади;

судлар ва судьялар ҳамжамияти органлари фаолияти учун зарур ташкилий ва ҳуқуқий шарт-шароитларни яхшилаш бўйича таклифлар ишлаб чиқилишини таъминлайди.

Администрация қонунчилик ҳужжатларида назарда тутилган бошқа масалалар бўйича ҳам суд ҳокимияти ва судьялар ҳамжамияти органлари билан ҳамкорликни амалга ошириши мумкин.

20-модда. Администрациянинг Ўзбекистон Республикаси Президентига бевосита бўйсунувчи (ҳисобдор) давлат органлари ва ташкилотлари билан алоқалари

Ўзбекистон Республикаси Президентига бевосита бўйсунувчи (ҳисобдор) давлат органлари ва ташкилотларининг, мансабдор шахсларнинг фаолиятини қонунчилик ҳужжатларига биноан мувофиқлаштириш ва унинг натижадорлигини баҳолашни ташкил этиш Администрация томонидан амалга оширилади.

Администрация Ўзбекистон Республикаси Президентига бевосита бўйсунувчи (ҳисобдор) давлат органлари ва ташкилотларининг, мансабдор шахсларнинг фаолиятини мувофиқлаштириш доирасида:

Ўзбекистон Республикаси Президентига бевосита бўйсунувчи (ҳисобдор) давлат органлари ва ташкилотларининг, мансабдор шахсларнинг фаолияти самарадорлигини таҳлил қилади, соҳаларга оид давлат сиёсатини амалга ошириш мониторингини олиб боради;

Ўзбекистон Республикаси Президентига бевосита бўйсунувчи (ҳисобдор) давлат органлари ва ташкилотлари мансабдор шахсларининг ҳисоботларини ўз ваколатлари доирасида кўриб чиқади, уларнинг фаолиятини баҳолайди ва унинг самарадорлигини ошириш бўйича чора-тадбирларни белгилайди;

Ўзбекистон Республикаси Президентига бевосита бўйсунувчи (ҳисобдор) давлат органлари ва ташкилотларининг, мансабдор шахсларнинг фаолиятини такомиллаштириш бўйича таклифлар тайёрлайди ҳамда Ўзбекистон Республикаси Президентига киритади.

Администрация Ўзбекистон Республикаси Президентига бевосита бўйсунувчи (ҳисобдор) давлат органлари ва ташкилотларининг, мансабдор шахсларнинг фаолиятини қонунчилик ҳужжатларида назарда тутилган бошқа йўналишлар бўйича ҳам мувофиқлаштиради.

21-модда. Администрациянинг давлат органлари ва ташкилотларининг комплаенс ва коррупцияга қарши ички назорат тузилмалари билан алоқалари

Давлат органлари ва ташкилотларида коррупцияга қарши курашиш самарадорлигини ошириш, манфаатлар тўқнашувининг ҳамда коррупциявий ҳолатларнинг олдини олиш чораларини кучайтириш мақсадида ташкил этиладиган давлат органлари ва ташкилотларининг комплаенс ва коррупцияга қарши ички назорат тузилмалари фаолияти Администрациянинг Комплаенс хизмати томонидан мувофиқлаштирилади.

Республика даражасидаги давлат органлари ва ташкилотлари раҳбарларининг комплаенс ва коррупцияга қарши ички назорат бўйича ўринбосарлари (маслаҳатчилари) Администрация Раҳбари томонидан лавозимга тайинланади ва лавозимидан озод этилади ҳамда улар ўз фаолияти давомида Администрациянинг вакили мақомига эга бўлади.

Администрация Комплаенс хизматининг давлат органлари ва ташкилотларининг комплаенс ва коррупцияга қарши ички назорат тузилмалари билан алоқалари Ўзбекистон Республикаси Президенти томонидан белгиланган тартибда ҳамда «Коррупцияга қарши курашиш тўғрисида»ги Ўзбекистон Республикаси Қонунига мувофиқ амалга оширилади.

3-боб. Администрациянинг мансабдор шахслари, бошқарув ва хизматчи ходимлари фаолиятининг кафолатлари

22-модда. Администрациянинг мансабдор шахсларини, бошқарув ва хизматчи ходимларини моддий рағбатлантириш

Администрация мансабдор шахсларининг, бошқарув ва хизматчи ходимларининг иш ҳақи лавозим маошидан ҳамда қонунчилик ҳужжатларида назарда тутилган бошқа тўловлардан иборатдир.

Администрациянинг мансабдор шахсларини, бошқарув ва хизматчи ходимларини моддий рағбатлантириш қонунчилик ҳужжатларига мувофиқ амалга оширилади.

23-модда. Администрация мансабдор шахсларининг, бошқарув ва хизматчи ходимларининг ижтимоий таъминоти

Администрациянинг мансабдор шахсларига, бошқарув ва хизматчи ходимларига ҳақ тўланадиган йиллик таътиллар берилади.

Администрациянинг ишлаш учун бошқа ҳудудлардан таклиф қилинган ҳамда Тошкент шаҳрида уй-жойга эга бўлмаган мансабдор шахсларига, бошқарув ва хизматчи ходимларига лавозимда бўлиш вақтида заруратга кўра, уларнинг аризасига биноан хизмат уй-жойи берилади.

Администрациянинг мансабдор шахсларини, бошқарув ва хизматчи ходимларини ижтимоий ҳимоя қилиш тизими кафолатланган тиббий ёрдамдан ҳамда санаторий-соғломлаштириш хизматларидан ушбу мансабдор шахслар, ходимлар ва уларнинг оила аъзолари (турмуш ўртоғи, фарзандлари ва ота-онаси) томонидан фойдаланиш ҳамда бошқа ижтимоий ёрдам кўрсатиш орқали амалга оширилади.

Администрациянинг мансабдор шахслари, бошқарув ва хизматчи ходимлари учун аввалги иш жойида берилган ҳарбий ва махсус унвонлар (мартаба (малака) даражалари, малака тоифалари, дипломатик даражалар ва бошқалар) учун берилган устамалар ва қўшимча тўловлар сақлаб қолинади.

Администрация мансабдор шахсларининг, бошқарув ва хизматчи ходимларининг Администрациядаги узоқ муддатли хизматлари учун қўшимча устамалар белгилашда уларнинг бошқа органлар, ташкилотлар ва муассасалардаги иш стажи (хизмат даври) инобатга олинади.

Администрациянинг мансабдор шахслари, бошқарув ва хизматчи ходимлари аввалги иш жойи бўйича ходимлар учун белгиланган барча имтиёзлар, моддий ва ижтимоий ҳимоя чораларидан Администрация таркибий бўлинмаларида амалда бўлган меҳнат шароитлари ҳисобга олинган ҳолда ҳамда лавозим маоши ва бошқа тўловлар миқдорлари сақланган ҳолда фойдаланади.

Администрациянинг таркибий бўлинмаларида ишланган давр ҳарбий ва махсус унвонларни (мартаба (малака) даражаларини, малака тоифаларини, дипломатик даражаларни ва бошқаларни) олиш учун зарур бўлган иш стажига қўшилади.

Қонунчилик ҳужжатларига мувофиқ Администрациянинг мансабдор шахслари, бошқарув ва хизматчи ходимлари учун қўшимча ижтимоий таъминот чоралари белгиланиши мумкин.

24-модда. Администрациянинг мансабдор шахсларини ва бошқарув ходимларини ҳуқуқий жиҳатдан ҳимоя қилиш кафолатлари

Администрациянинг мансабдор шахслари ва бошқарув ходимлари ўз зиммасига юклатилган вазифаларни бажариши чоғида давлат ҳимоясида бўлади.

Администрация мансабдор шахсларининг ва бошқарув ходимларининг ўз зиммасига юклатилган вазифаларни бажаришига монелик қилиш, уларнинг шаъни ва қадр-қимматини ҳақорат қилиш, уларга нисбатан таҳдид ёки зўрлик қилиш, ўз фаолиятини амалга ошириши муносабати билан уларнинг ҳаётига, соғлиғига ва мол-мулкига тажовуз қилиш қонунда белгиланган жавобгарликка сабаб бўлади.

Администрациянинг мансабдор шахсларига ва уларнинг оила аъзоларига (турмуш ўртоғига, фарзандларига ва ота-онасига) умрбод, Администрациянинг бошқарув ходимларига Администрациядаги фаолияти даврига Ўзбекистон Республикаси Президенти томонидан белгиланган тартибда биометрик дипломатик паспортлар берилади.

Администрациянинг мансабдор шахслари ва бошқарув ходимлари ҳамда уларнинг оила аъзолари (турмуш ўртоғи, фарзандлари ва ота-онаси) хавфсизлигини таъминлаш Ўзбекистон Республикаси Президенти томонидан белгиланадиган тартибда амалга оширилади.

25-модда. Администрация мансабдор шахсларининг ва бошқарув ходимларининг дахлсизлик кафолатлари

Администрациянинг мансабдор шахслари ва бошқарув ходимлари дахлсизликка ҳамда иммунитетга эга бўлади.

Администрация мансабдор шахсларининг ва бошқарув ходимларининг дахлсизлиги уларнинг ва улар оила аъзоларининг (турмуш ўртоғининг, фарзандларининг ва ота-онасининг) шахсий ҳаётига, турар жойига, хизмат хонасига, улар фойдаланадиган шахсий ва хизмат транспорт воситасига ҳамда алоқа ва коммуникация воситасига, хат-хабарларига, ёзишмаларига, электрон маълумотларига, уларга тегишли ашёлар ва ҳужжатларга нисбатан татбиқ этилади.

Администрациянинг мансабдор шахсларига нисбатан жиноят иши қўзғатишга, уларни жиноий жавобгарликка тортишга, уларнинг ҳуқуқлари ва эркинликларини чеклайдиган бошқа ҳар қандай процессуал мажбурлов чораларини қўллашга, тезкор-қидирув фаолиятини амалга оширишга, суриштирув, тергов ҳаракатлари ўтказишга ёки маъмурий қамоқ жазо чорасини қўллашга йўл қўйилмайди.

Администрациянинг бошқарув ходимлари ўз зиммасига юклатилган вазифаларни бажариш ҳамда ваколатларини амалга ошириш билан боғлиқ ҳолда қабул қилган қарорлари, содир этган ҳаракатлари ёки ҳаракатсизлиги, билдирган фикрлари ва берган кўрсатмалари учун жиноий, маъмурий ёки фуқаровий жавобгарликка тортилмайди.

Администрацияда ўз зиммасига юклатилган вазифаларни бажариш ҳамда ваколатларини амалга ошириш билан боғлиқ бўлмаган ҳаракат ёки ҳаракатсизлик учун Администрациянинг бошқарув ходимларига нисбатан Ўзбекистон Республикаси Президентининг ёзма розилигисиз жиноят ишини қўзғатиш, уларни жиноий жавобгарликка тортиш, уларнинг ҳуқуқлари ва эркинликларини чеклайдиган бошқа ҳар қандай процессуал мажбурлов чораларини қўллаш, тезкор-қидирув фаолиятини амалга ошириш, суриштирув, тергов ҳаракатлари ўтказиш ёки суд тартибида маъмурий жазо ва ҳуқуқий таъсир чораларини қўллашга йўл қўйилмайди.

Администрациянинг бошқарув ходими Администрацияда ишлаб турганида ва (ёки) ишдан бўшатилганидан кейин унга нисбатан жиноят иши фақат Ўзбекистон Республикаси Бош прокурори томонидан қўзғатилиши мумкин.

Администрациянинг бошқарув ходимига нисбатан Администрацияда ишлаб турганида ва (ёки) ишдан бўшатилганидан кейин қўзғатилган жиноят иши Ўзбекистон Республикаси Олий судининг судловига тегишлидир.

Администрациянинг мансабдор шахслари, бошқарув ва хизматчи ходимлари қонунчилик ҳужжатларига мувофиқ тезкор-қидирув фаолиятини амалга оширувчи ваколатли давлат органлари томонидан махфийлик асосида ҳамкорликка жалб қилиниши, шу жумладан Администрациядан бўшатилганидан кейин ҳам жалб қилиниши тақиқланади.

Администрациянинг мансабдор шахслари ушбу Конституциявий Қонунда белгиланган дахлсизлик ва иммунитетни Администрациядан бўшатилганидан кейин умрбод, бошқарув ходимлари эса Администрациядан бўшатилганидан кейин беш йил давомида сақлаб қолади.

Ушбу моддада белгиланган қоидаларни бузган ҳолда олинган далиллар қонун ҳужжатларини бузган ҳолда олинган деб ҳисобланади ва номақбул далиллар деб топилади.

Қонунчилик ҳужжатларига ушбу моддада назарда тутилган дахлсизликка оид қоидаларни бекор қилишга, оғирлаштиришга ёки дахлсизлик қўлланиладиган шахсларнинг ҳолатини ёмонлаштиришга олиб келадиган ўзгартириш ва қўшимчалар киритилган тақдирда, бундай ўзгартиришлар Администрациянинг ушбу Конституциявий Қонунда белгиланган қоидалар қўлланиладиган мансабдор шахсларига ва бошқарув ходимларига нисбатан татбиқ этилмайди, шу жумладан улар Администрациядан бўшатилганидан кейин ҳам татбиқ этилмайди.

26-модда. Администрациянинг мансабдор шахсларини ва бошқарув ходимларини ишга жойлаштириш кафолатлари

Администрациянинг мансабдор шахслари ва бошқарув ходимлари Администрациядаги лавозимидан озод этилган ҳолларда уларга Администрацияга ишга келгунига қадар эгаллаб турган аввалги лавозимидан камида бир поғона юқори даражадаги лавозим берилади, аввалги лавозимидан юқори лавозим мавжуд (бўш) бўлмаганда эса аввалги лавозимига тенг лавозими ёки уларнинг мутахассислиги ҳисобга олинган ҳолда Ўзбекистон Республикаси давлат органлари ва ташкилотларидаги камида бир поғона юқори ёки тенг даражадаги лавозим биринчи навбатда берилади, бундан сайланадиган ёки Ўзбекистон Республикаси Президентининг фармонлари ва қарорлари билан тайинланадиган лавозимлардан Администрацияга ишга ўтганлик, меҳнат интизомини бузганлик учун ишдан бўшатилиш ҳоллари мустасно.

4-боб. Якунловчи қоидалар

27-модда. Администрациянинг фаолиятини молиялаштириш

Администрациянинг фаолияти Ўзбекистон Республикасининг республика бюджети маблағлари, шунингдек қонунчилик ҳужжатларида тақиқланмаган бошқа манбалар ҳисобидан молиялаштирилади.

Администрацияда бюджетдан ташқари жамғармалар тузилиши мумкин, уларни шакллантириш ва улардан фойдаланиш тартиби қонунчилик ҳужжатларига мувофиқ белгиланади.

Администрация қонунчилик ҳужжатларида белгиланган тартибда шакллантириладиган хизмат уй-жой фондига эга бўлиши мумкин.

Администрация ўз фаолиятини амалга ошириш учун ахборот-коммуникация тизимларини ва ахборот базаларини, шунингдек ахборотнинг ҳимоя воситаларини, шу жумладан криптографик ҳимоя воситаларини ишлаб чиқади, яратади ҳамда улардан фойдаланади, Ўзбекистон Республикаси давлат органлари ва ташкилотларининг шу каби тизимларидан ва ахборот базаларидан Администрация ишини самарали равишда амалга ошириш мақсадида, қонунчилик ҳужжатларида белгиланган тартибда фойдаланади.

28-модда. Администрацияда маълумотларни ҳимоя қилиш

Администрацияда давлат сирларини ташкил этувчи маълумотларнинг ҳимоя қилиниши, шу жумладан криптографик воситаларни қўллаган ҳолда техник жиҳатдан ҳимоя қилиниши таъминланади.

Администрацияда махфий иш юритиш давлат сирлари тўғрисидаги қонунчиликка мувофиқ амалга оширилади. Бунда Администрацияда махфийлик режимини таъминлаш, унга риоя этилиши устидан назоратни ташкил этиш ҳамда тегишли норматив-ҳуқуқий ҳужжатлар талабларини бажариш юзасидан текшириш тадбирларини ўтказиш Администрациянинг Комплаенс хизмати томонидан амалга оширилади.

29-модда. Администрациянинг ҳужжатлари устидан, Администрация мансабдор шахсларининг, бошқарув ва хизматчи ходимларининг ҳаракатлари (ҳаракатсизлиги) устидан шикоят қилиш

Администрациянинг ҳужжатлари устидан, Администрация мансабдор шахсларининг, бошқарув ва хизматчи ходимларининг ҳаракатлари (ҳаракатсизлиги) устидан қонунда белгиланган тартибда шикоят қилиниши мумкин.

30-модда. Администрация тўғрисидаги қонунчиликни бузганлик учун жавобгарлик

Администрация тўғрисидаги қонунчиликни бузганликда айбдор шахслар белгиланган тартибда жавобгар бўлади.

31-модда. Ўзбекистон Республикасининг айрим қонун ҳужжатларига ўзгартириш ва қўшимчалар киритиш

1. Ўзбекистон Республикасининг 1993 йил 2 сентябрда қабул қилинган «Маҳаллий давлат ҳокимияти тўғрисида»ги 913-XII-сонли Қонуни (Ўзбекистон Республикаси Олий Кенгашининг Ахборотномаси, 1993 йил, № 9, 320-модда; Ўзбекистон Республикаси Олий Мажлисининг Ахборотномаси, 1997 йил, № 9, 241-модда; 1999 йил, № 1, 20-модда; 2005 йил, № 1, 18-модда; Ўзбекистон Республикаси Олий Мажлиси палаталарининг Ахборотномаси, 2005 йил, № 12, 418-модда; 2007 йил, № 4, 163-модда, № 9, 420-модда; 2008 йил, № 12, 640-модда; 2013 йил, № 12, 350-модда; 2014 йил, № 4, 86-модда, № 5, 130-модда; 2015 йил, № 6, 228-модда; 2017 йил, № 6, 300-модда, № 8, 383-модда, № 9, 510-модда, № 12, 772-модда; 2018 йил, № 7, 431-модда; 2019 йил, № 1, 4-модда, № 11, 792-модда, № 12, 891-модда; 2020 йил, № 9, 537-модда; 2021 йил, № 1, 3, 7, 13-моддалар, 4-сонга илова, № 8, 800-модда, № 12, 1198-модда; 2022 йил, № 3, 213-модда, № 6, 570, 577-моддалар, № 10, 984-модда; 2023 йил, № 1, 2-модда, № 10, 794-модда, № 12, 1003-модда; 2024 йил, № 8, 823-модда, № 10, 1075-модда; 2026 йил, № 4, 365-модда) 21-моддасининг тўртинчи қисмидаги «Ўзбекистон Республикасининг Президенти билан келишилган ҳолда» деган сўзлар «Ўзбекистон Республикасининг Президенти томонидан белгиланадиган тартибда» деган сўзлар билан алмаштирилсин.

2. Ўзбекистон Республикасининг 1997 йил 29 августда қабул қилинган «Давлат солиқ хизмати тўғрисида»ги 474-I-сонли Қонуни (Ўзбекистон Республикаси Олий Мажлисининг Ахборотномаси, 1997 йил, № 9, 232-модда; 1998 йил, № 5-6, 102-модда; 1999 йил, № 9, 229-модда; 2000 йил, № 7-8, 217-модда; 2001 йил, № 5, 89-модда, № 9-10, 182-модда; 2003 йил, № 1, 8-модда, № 5, 67-модда; 2004 йил, № 9, 171-модда; 2005 йил, № 1, 18-модда; Ўзбекистон Республикаси Олий Мажлиси палаталарининг Ахборотномаси, 2005 йил, № 5, 152-модда, № 9, 312-модда, № 12, 415-модда; 2006 йил, № 10, 536-модда; 2007 йил, № 12, 608-модда; 2008 йил, № 12, 640-модда; 2009 йил, № 12, 474-модда; 2010 йил, № 9, 336-модда; 2012 йил, № 4, 105-модда; 2014 йил, № 9, 244-модда; 2015 йил, № 12, 452-модда; 2016 йил, № 12, 385-модда; 2017 йил, № 6, 300-модда, № 12, 773-модда; 2018 йил, № 1, 1, 4-моддалар; 2019 йил, № 1, 1, 5-моддалар, № 2, 47-модда, № 3, 166-модда, № 5, 267-модда; 2021 йил, 4-сонга илова; 2022 йил, № 3, 215-модда; 2026 йил, № 6, 625-модда) 10-моддасининг иккинчи қисмидаги «Ўзбекистон Республикаси Президенти томонидан» деган сўзлар «Ўзбекистон Республикаси Президенти томонидан белгиланадиган тартибда лавозимга» деган сўзлар билан алмаштирилсин.

3. Ўзбекистон Республикасининг 2012 йил 25 декабрда қабул қилинган «Тезкор-қидирув фаолияти тўғрисида»ги ЎРҚ-344-сонли Қонуни (Ўзбекистон Республикаси Олий Мажлиси палаталарининг Ахборотномаси, 2012 йил, № 12, 335-модда; 2016 йил, № 4, 125-модда; 2017 йил, № 9, 506-модда, № 10, 605-модда; 2019 йил, № 1, 5-модда, № 2, 47-модда, № 9, 589-модда, № 12, 891-модда; 2020 йил, № 12, 689-модда; 2021 йил, 4-сонга илова, № 6, 524-модда; 2024 йил, № 3, 244-модда) 17-моддасининг иккинчи қисми «судьялар» деган сўздан кейин «Ўзбекистон Республикаси Президенти Администрациясининг ходимлари» деган сўзлар билан тўлдирилсин.

4. Ўзбекистон Республикасининг 2016 йил 16 сентябрда қабул қилинган «Ички ишлар органлари тўғрисида»ги ЎРҚ-407-сонли Қонуни (Ўзбекистон Республикаси Олий Мажлиси палаталарининг Ахборотномаси, 2016 йил, № 9, 272-модда; 2017 йил, № 6, 300-модда, № 9, 510-модда; 2019 йил, № 2, 47-модда, № 5, 267-модда, № 9, 588, 591-моддалар, № 10, 674-модда, № 12, 891-модда; 2021 йил, 4-сонга илова; 2022 йил, № 3, 216-модда, № 5, 466-модда, № 6, 570-модда, № 10, 984-модда; 2023 йил, № 7, 537-модда; 2024 йил, № 3, 244-модда, № 9, 958, 964-моддалар, № 11, 1291-модда; 2025 йил, № 12, 1329-модда; 2026 йил, № 1, 2-модда, № 4, 355-модда, № 5, 499-модда) 14-моддасининг иккинчи қисмидаги «Ўзбекистон Республикаси Президенти томонидан» деган сўзлар «Ўзбекистон Республикаси Президенти томонидан белгиланадиган тартибда» деган сўзлар билан алмаштирилсин.

5. Ўзбекистон Республикасининг 2021 йил 20 апрелда қабул қилинган «Норматив-ҳуқуқий ҳужжатлар тўғрисида»ги ЎРҚ-682-сонли Қонунига (Ўзбекистон Республикаси Олий Мажлиси палаталарининг Ахборотномаси, 2021 йил, № 4, 288-модда; 2022 йил, № 3, 213-модда, № 8, 788-модда, № 10, 983-модда; 2023 йил, № 8, 629-модда, № 11, 923-модда; 2024 йил, № 2, 109-модда, № 9, 955-модда, № 10, 1075, 1076-моддалар; 2025 йил, № 4, 516-модда; 2026 йил, № 3, 256-модда) қуйидаги қўшимча ва ўзгартиришлар киритилсин:

1) 6-модда :

қуйидаги мазмундаги олтинчи хатбоши билан тўлдирилсин:

«Ўзбекистон Республикаси Президенти Администрацияси Раҳбарининг фармойишлари»;

олтинчи , еттинчи ва саккизинчи хатбошилари тегишинча еттинчи, саккизинчи ва тўққизинчи хатбошилар деб ҳисоблансин;

2) қуйидаги мазмундаги 12 1 -модда билан тўлдирилсин:

« 12 1 -модда. Ўзбекистон Республикаси Президенти Администрацияси Раҳбарининг фармойишлари

Ўзбекистон Республикаси Президенти Администрациясининг Раҳбари Ўзбекистон Республикаси Конституцияси ва қонунлари, Ўзбекистон Республикаси Президентининг фармонлари, қарорлари, фармойишлари ва топшириқлари асосида ҳамда уларнинг ижросини, Администрациянинг фаолиятини самарали ташкил этиш учун Ўзбекистон Республикасининг бутун ҳудудидаги барча давлат органлари, корхоналар, муассасалар, ташкилотлар, мансабдор шахслар томонидан бажарилиши мажбурий бўлган фармойишлар қабул қилади»;

3) 16-модданинг учинчи қисми «Ўзбекистон Республикаси Президентининг фармонлари, қарорлари ва фармойишлари» деган сўзлардан кейин «Ўзбекистон Республикаси Президенти Администрацияси Раҳбарининг фармойишлари» деган сўзлар билан тўлдирилсин;

4) 36-модда :

қуйидаги мазмундаги олтинчи хатбоши билан тўлдирилсин:

«Ўзбекистон Республикаси Президенти Администрацияси Раҳбарининг фармойишларига нисбатан — Ўзбекистон Республикаси Президенти Администрацияси Раҳбари»;

олтинчи — тўққизинчи хатбошилари тегишинча еттинчи — ўнинчи хатбошилар деб ҳисоблансин.

6. Ўзбекистон Республикасининг 2024 йил 25 октябрда қабул қилинган «Ўзбекистон Республикаси Вазирлар Маҳкамаси тўғрисида»ги ЎРҚ-982-сонли Қонунининг (Ўзбекистон Республикаси Олий Мажлиси палаталарининг Ахборотномаси, 2024 йил, № 10, 1081-модда; 2025 йил, № 12, 1327-модда; 2026 йил, № 4, 365-модда) 20-моддасига қуйидаги ўзгартиришлар ва қўшимча киритилсин:

еттинчи қисм қуйидаги таҳрирда баён этилсин:

«Республика ижро этувчи ҳокимият органларининг раҳбарлари Ўзбекистон Республикаси Президенти томонидан лавозимга тайинланади ва лавозимидан озод этилади»;

қуйидаги мазмундаги саккизинчи қисм билан тўлдирилсин:

«Республика ижро этувчи ҳокимият органлари раҳбарларининг ўринбосарлари Ўзбекистон Республикаси Президенти томонидан белгиланадиган тартибда лавозимга тайинланади ва лавозимидан озод этилади»;

саккизинчи — ўн учинчи қисмлар тегишинча тўққизинчи — ўн тўртинчи қисмлар деб ҳисоблансин.

32-модда. Ушбу Конституциявий Қонуннинг ижросини, етказилишини, моҳияти ва аҳамияти тушунтирилишини таъминлаш

Ўзбекистон Республикаси Адлия вазирлиги ва бошқа манфаатдор ташкилотлар ушбу Конституциявий Қонуннинг ижросини, ижрочиларга етказилишини ҳамда моҳияти ва аҳамияти аҳоли ўртасида тушунтирилишини таъминласин.

33-модда. Қонунчиликни ушбу Конституциявий Қонунга мувофиқлаштириш

Ўзбекистон Республикаси Вазирлар Маҳкамаси:

ҳукумат қарорларини ушбу Конституциявий Қонунга мувофиқлаштирсин;

республика ижро этувчи ҳокимият органлари ушбу Конституциявий Қонунга зид бўлган ўз норматив-ҳуқуқий ҳужжатларини қайта кўриб чиқишлари ва бекор қилишларини таъминласин.

34-модда. Ушбу Конституциявий Қонуннинг кучга кириши

Ушбу Конституциявий Қонун расмий эълон қилинган кундан эътиборан кучга киради.

Ўзбекистон Республикасининг Президенти Ш. МИРЗИЁЕВ

Тошкент ш.,

2026 йил 14 август,

ЎРҚ- 1166 -сон

(Қонунчилик маълумотлари миллий базаси, 14.08.2026 й., 03/26/1166/0842-сон)

lex.uz

Oʻzbekiston Respublikasining Konstitutsiyaviy Qonuni

Oʻzbekiston Respublikasi Prezidenti Administratsiyasi toʻgʻrisida

Qonunchilik palatasi tomonidan 2026-yil 6-avgustda qabul qilingan Senat tomonidan 2026-yil 7-avgustda maʼqullangan

1-bob. Umumiy qoidalar

1-modda. Ushbu Konstitutsiyaviy Qonunning maqsadi

Ushbu Konstitutsiyaviy Qonunning maqsadi Oʻzbekiston Respublikasi Prezidenti Administratsiyasining (bundan buyon matnda Administratsiya deb yuritiladi) faoliyatini tartibga solishdan iborat.

2-modda. Administratsiya toʻgʻrisidagi qonunchilik

Administratsiya toʻgʻrisidagi qonunchilik Oʻzbekiston Respublikasining Konstitutsiyasi , ushbu Konstitutsiyaviy Qonun, Oʻzbekiston Respublikasi Prezidentining farmonlari va qarorlari, shuningdek boshqa qonunchilik hujjatlaridan iboratdir.

3-modda. Administratsiyaning huquqiy maqomi

Administratsiya Oʻzbekiston Respublikasi Prezidentining davlat boshligʻi sifatida davlat hokimiyati organlarining kelishilgan holda faoliyat yuritishini va hamkorligini taʼminlashiga koʻmaklashadigan, Oʻzbekiston Respublikasi Prezidentining vakolatlarini amalga oshirishni tashkiliy, huquqiy va tahliliy jihatdan taʼminlaydigan davlat organidir.

Administratsiya Oʻzbekiston Respublikasi Prezidentining farmonlari, qarorlari, farmoyishlari va topshiriqlari ijrosi doirasida davlat organlarining va tashkilotlarining, davlat ishtirokidagi korxonalarning (bundan buyon matnda davlat organlari va tashkilotlari deb yuritiladi) faoliyatini muvofiqlashtiradi, mazkur hujjatlarning ijrosini monitoring qiladi va nazoratini tashkil etadi.

Administratsiya oʻz faoliyatida bevosita Oʻzbekiston Respublikasi Prezidentiga boʻysunadi va unga hisobdordir.

Administratsiya yuridik shaxs hisoblanadi, u Oʻzbekiston Respublikasi Davlat gerbi tasviri tushirilgan hamda oʻz nomi davlat tilida yozilgan muhrga va blankalarga ega boʻladi.

4-modda. Administratsiya faoliyatining asosiy prinsiplari

Administratsiya faoliyatining asosiy prinsiplari Oʻzbekiston Respublikasi Konstitutsiyasi va qonunlarining ustunligi, inson huquqlari va erkinliklarining ustuvorligi, xolislik, mustaqillik, ochiqlik hamda shaffoflikdan iborat.

5-modda. Administratsiyani shakllantirish

Administratsiya Oʻzbekiston Respublikasi Prezidenti tomonidan shakllantiriladi.

Administratsiyaga Oʻzbekiston Respublikasi Prezidenti tomonidan lavozimga tayinlanadigan va lavozimidan ozod etiladigan Administratsiya Rahbari boshchilik qiladi.

Administratsiya oʻz faoliyatini Oʻzbekiston Respublikasi Prezidenti tomonidan belgilanadigan asosiy yoʻnalishlar doirasida amalga oshiradi.

Administratsiya Rahbari va uning shartnoma asosida jalb qilinadigan maslahatchilari, Oʻzbekiston Respublikasi Prezidentining yordamchisi, Administratsiya Rahbarining oʻrinbosarlari, Administratsiya Rahbari kotibiyati mudiri, Oʻzbekiston Respublikasi Prezidentining maslahatchilari, ularning birinchi oʻrinbosarlari va oʻrinbosarlari, Oʻzbekiston Respublikasi Prezidentining vakillari, Administratsiya tarkibiy boʻlinmalarining boshliqlari hamda ularning birinchi oʻrinbosarlari va oʻrinbosarlari Administratsiyaning mansabdor shaxslari (bundan buyon matnda Administratsiyaning mansabdor shaxslari deb yuritiladi) hisoblanadi.

Administratsiya boshqaruv va xizmatchi xodimlarining lavozimlari roʻyxati Administratsiya toʻgʻrisidagi nizomda belgilanadi.

Administratsiyaning reglamenti, Oʻzbekiston Respublikasi Prezidenti huzuridagi davlat organlari va tashkilotlari toʻgʻrisidagi nizomlar Oʻzbekiston Respublikasi Prezidenti tomonidan, Administratsiya toʻgʻrisidagi nizom, Administratsiya huzuridagi davlat organlari va tashkilotlari toʻgʻrisidagi nizomlar, Administratsiya tarkibiy boʻlinmalari faoliyatining asosiy yoʻnalishlari va Administratsiya xodimlarining shtatlar jadvali Administratsiya Rahbari tomonidan tasdiqlanadi.

Administratsiyaning tarkibiy boʻlinmalari toʻgʻrisidagi nizomlar, Administratsiya xodimlarining funksional vazifalari va Administratsiya tarkibiy boʻlinmalarining tuzilmalari Administratsiya tarkibiy boʻlinmalarining boshliqlari tomonidan tasdiqlanadi.

6-modda. Administratsiyaning asosiy vazifalari

Administratsiyaning asosiy vazifalari quyidagilardan iborat:

Oʻzbekiston Respublikasi Prezidentining faoliyatini tashkiliy, huquqiy va tahliliy jihatdan taʼminlash;

mamlakatning ijtimoiy-iqtisodiy va ijtimoiy-siyosiy rivojlanishi holatini tahlil qilish, Oʻzbekiston Respublikasi Prezidenti tomonidan amalga oshirilayotgan islohotlarni tashkiliy, huquqiy va tahliliy jihatdan taʼminlash hamda yangi muhim tashabbuslarni ishlab chiqish;

mamlakatda qonuniylikni va huquq-tartibotni, fuqarolarning huquq va erkinliklariga, Oʻzbekiston Respublikasining Konstitutsiyasi va qonunlariga rioya etilishini taʼminlashga hamda sud-huquq tizimini isloh qilishga koʻmaklashish;

huquqni muhofaza qiluvchi va nazorat qiluvchi organlar, kuch ishlatishga vakolatli tuzilmalar hamda Oʻzbekiston Respublikasi Prezidentiga bevosita boʻysunuvchi (hisobdor) davlat organlari va tashkilotlari, mansabdor shaxslar faoliyatini muvofiqlashtirish;

davlat ichki va tashqi siyosatining asosiy yoʻnalishlari, Oʻzbekiston Respublikasining suverenitetini himoya qilish, uning xavfsizligini va hududiy yaxlitligini taʼminlash boʻyicha takliflar ishlab chiqish;

aholi va tadbirkorlik subyektlari bilan ochiq va toʻgʻridan-toʻgʻri muloqotni tashkil etish hamda xalq farovonligini yuksaltirish, jismoniy va yuridik shaxslarning Oʻzbekiston Respublikasi Prezidentiga murojaat qilish huquqlari amalga oshirilishi uchun shart-sharoitlar yaratish;

davlat hokimiyati vakillik organlari va fuqarolik jamiyati institutlari bilan demokratik huquqiy davlat va ochiq fuqarolik jamiyatini barpo etishda ularning rolini kuchaytirishga qaratilgan samarali hamkorlikni tashkil etish, umummilliy hamjihatlikni mustahkamlash;

yagona davlat kadrlar siyosati amalga oshirilishini va davlat xizmati ishlarining boshqarilishini taʼminlash;

Oʻzbekiston Respublikasi Prezidenti va Administratsiya huzuridagi davlat organlari va tashkilotlarining, shuningdek Oʻzbekiston Respublikasi Prezidentining vakolatlarini amalga oshirishga koʻmaklashuvchi maslahat-kengash organlarining faoliyatini tashkil etish hamda Oʻzbekiston Respublikasi Prezidenti huzuridagi Xavfsizlik kengashining faoliyati Oʻzbekiston Respublikasi Prezidenti tomonidan muvofiqlashtirilishini tashkiliy, huquqiy va tahliliy jihatdan taʼminlash;

Oʻzbekiston Respublikasi Prezidentining qonunchilik siyosati sohasidagi vakolatlari amalga oshirilishini tashkil etish va taʼminlash;

Oʻzbekiston Respublikasi Prezidentining inson huquqlariga va Oʻzbekiston Respublikasi Konstitutsiyasiga rioya etilishining kafili sifatidagi, davlat suverenitetini, xavfsizligini va hududiy yaxlitligini taʼminlash vakolatlari amalga oshirilishini tashkil etish;

Oʻzbekiston Respublikasi Prezidentining davlat hokimiyati organlarining kelishilgan holda faoliyat yuritishini va hamkorligini taʼminlash boʻyicha vakolatlari amalga oshirilishini tashkil etish;

Oʻzbekiston Respublikasi Prezidentining xalqaro munosabatlar bilan bogʻliq faoliyatiga oid vakolatlari amalga oshirilishini taʼminlash;

Oʻzbekiston Respublikasi Prezidentining Oʻzbekiston Respublikasi xalqiga hamda Oliy Majlisiga mamlakat ichki va tashqi siyosatini amalga oshirishning eng muhim masalalari yuzasidan murojaat qilish huquqi amalga oshirilishini taʼminlash;

Oʻzbekiston Respublikasi Prezidentining fuqarolik va siyosiy boshpana berish, amnistiya va sudlar tomonidan hukm qilingan shaxslarni afv etishga oid masalalarni koʻrib chiqish boʻyicha vakolatlari amalga oshirilishini taʼminlash;

qonunlar va Oʻzbekiston Respublikasi Prezidentining farmonlari, qarorlari, farmoyishlari va topshiriqlarining, Administratsiya Rahbari farmoyishlari va topshiriqlarining ijro etilishini tashkil etish, nazoratini olib borish hamda ularni amalga oshirishga koʻmaklashish.

2-bob. Administratsiyaning faoliyatini tashkil etish

7-modda. Administratsiyaning asosiy vakolatlari

Administratsiya oʻz zimmasiga yuklatilgan vazifalarni bajarish uchun quyidagi asosiy vakolatlarga ega boʻladi:

Administratsiyaga belgilangan tartibda kiritilgan qonunchilik hujjatlarini, Oʻzbekiston Respublikasi Prezidentining va Oʻzbekiston Respublikasi Vazirlar Mahkamasining farmoyishlari loyihalarini yakuniy ishlab chiqishni tashkil etish;

Oʻzbekiston Respublikasi Prezidentining farmonlari, qarorlari va farmoyishlari, Administratsiya Rahbarining farmoyishlari hamda Oʻzbekiston Respublikasi Vazirlar Mahkamasining qarorlari va farmoyishlari loyihalarini mustaqil ravishda ishlab chiqish;

mamlakatni ijtimoiy-iqtisodiy va ijtimoiy-siyosiy rivojlantirishning dolzarb yoʻnalishlarini oʻrganish hamda takliflar ishlab chiqish uchun davlat organlari va tashkilotlarining rahbarlari, shu jumladan hokimlar boshchiligida ishchi komissiyalar va ishchi guruhlar tuzish;

zarur materiallar va maʼlumotlarni davlat organlari va tashkilotlaridan soʻrash hamda olish, shu jumladan qonunchilik hujjatlarida belgilangan tartibda doimiy asosda olish, barcha davlat organlari va tashkilotlarining axborot tizimlaridan, maʼlumotlar bazalaridan, axborot-maʼlumot qaydlaridan, arxivlaridan, maʼlumotlarga ishlov berishning avtomatlashtirilgan tizimlaridan hamda boshqa axborot resurslaridan foydalanish;

Oʻzbekiston Respublikasi Prezidentiga bevosita boʻysunuvchi (hisobdor) davlat organlari va tashkilotlari, Oʻzbekiston Respublikasi Prezidenti va Administratsiya huzuridagi davlat organlari va tashkilotlari faoliyatini muvofiqlashtirish hamda nazorat qilish;

davlat organlari va tashkilotlari rahbarlariga bajarilishi majburiy boʻlgan koʻrsatmalar hamda topshiriqlar berish, ularning bajarilishi va natijalari toʻgʻrisida batafsil maʼlumot talab qilish;

qonunlarni va Oʻzbekiston Respublikasi Prezidentining farmonlarini, qarorlari, farmoyishlari va topshiriqlarini, Administratsiya Rahbarining farmoyishlari va topshiriqlarini amalga oshirish yuzasidan davlat organlari va tashkilotlarining faoliyatini qonunchilik hujjatlariga muvofiq oʻrganish, shuningdek oʻrganish natijalari boʻyicha materiallarni aniqlangan qoidabuzarliklarni va kamchiliklarni bartaraf etish uchun ushbu davlat organlari va tashkilotlarining rahbarlariga yuborish;

davlat organlari va tashkilotlarining mansabdor shaxslari faoliyati samaradorligini, ular tomonidan qonunlarning va Oʻzbekiston Respublikasi Prezidenti farmonlari, qarorlari, farmoyishlari va topshiriqlarining, Administratsiya Rahbari farmoyishlari va topshiriqlarining ijrosini taʼminlash holatini baholash, shuningdek bu borada oʻz zimmasiga yuklatilgan vazifalarni bajarmaganligi yoki lozim darajada bajarmaganligi uchun ushbu mansabdor shaxslarni intizomiy javobgarlikka tortish, shu jumladan egallab turgan lavozimidan ozod etishgacha boʻlgan masala yuzasidan tashabbus koʻrsatish;

davlat organlari va tashkilotlari zimmasiga yuklatilgan vazifalarning ijrosi va ularga biriktirilgan tarmoq (soha) boʻyicha aniq natijalarga erishishning borishini koʻrib chiqish hamda muhokama qilish maqsadida navbatdan tashqari hayʼatlarni (yigʻilishlarni) chaqirish yuzasidan takliflar kiritish;

axborot-tahliliy materiallarni, shuningdek normativ-huquqiy hujjatlar loyihalarini tayyorlash doirasida davlat organlari va tashkilotlarining, shuningdek boshqa tashkilotlarning mansabdor shaxslarini va mutaxassislarini jalb etish;

davlat organlari va tashkilotlarining komplayens va korrupsiyaga qarshi ichki nazorat tuzilmalari faoliyatini tashkil etish hamda qonunchilik hujjatlari bilan ushbu tuzilmalar zimmasiga yuklatilgan vazifalarning ular tomonidan amalga oshirilishini muvofiqlashtirish;

Administratsiyaga ishga qabul qilish uchun nomzodlarni davlat organlaridan va tashkilotlaridan mustaqil ravishda tanlab olishni amalga oshirish;

jismoniy va yuridik shaxslarning Administratsiyaga kelib tushadigan murojaatlari koʻrib chiqilishini, shu jumladan Oʻzbekiston Respublikasi Prezidentining Xalq qabulxonasi tomonidan koʻrib chiqilishini tashkil etish;

Oʻzbekiston Respublikasining davlat mukofotlari bilan mukofotlash, koʻkrak nishonlari bilan taqdirlash uchun nomzodlarning oʻrganilishini tashkil etish;

oʻz zimmasiga yuklatilgan vazifalarning bajarilishini taʼminlash sohasidagi davlat sirlarini tashkil etuvchi arxiv maʼlumotlarini hamda boshqa maʼlumotlarni saqlash, rasmiylashtirish, ulardan foydalanish va ularni berishning alohida tartibini belgilash, zarur axborot tizimlarini yaratish, shuningdek maxfiylik rejimini mustaqil ravishda taʼminlash, unga rioya etilishini nazorat qilish hamda tegishli normativ-huquqiy hujjatlarning talablari bajarilishini tekshirish tadbirlarini tashkil etish.

Administratsiya qonunchilik hujjatlariga muvofiq boshqa vakolatlarga ham ega boʻlishi mumkin.

8-modda. Administratsiya Rahbarining huquqiy maqomi

Administratsiyaning faoliyati mazkur Konstitutsiyaviy Qonun va Oʻzbekiston Respublikasi Prezidenti tomonidan Administratsiya zimmasiga yuklatilgan vazifalarga va asosiy yoʻnalishlarga muvofiq Administratsiya Rahbari tomonidan tashkil etiladi hamda muvofiqlashtiriladi.

Administratsiya Rahbari Oʻzbekiston Respublikasi Prezidentining Oʻzbekiston Respublikasi Konstitutsiyasida va boshqa qonunchilik hujjatlarida belgilangan vakolatlarini, shu jumladan davlat hokimiyati organlarining kelishilgan holda faoliyat yuritishini va hamkorligini taʼminlashga oid vakolatlarini amalga oshirishni tashkiliy, huquqiy va tahliliy jihatdan taʼminlashni tashkil etish uchun masʼul mansabdor shaxs hisoblanadi.

9-modda. Administratsiya Rahbarining vakolatlari

Administratsiya Rahbari:

Oʻzbekiston Respublikasi Konstitutsiyasiga muvofiq Oʻzbekiston Respublikasi Prezidentining davlat boshligʻi sifatida davlat hokimiyati organlarining kelishilgan holda faoliyat yuritishini hamda hamkorligini taʼminlashga oid faoliyatini tashkiliy, huquqiy va tahliliy jihatdan taʼminlashga rahbarlik qiladi;

Oʻzbekiston Respublikasi Prezidenti muvofiqlashtiruvida Administratsiya faoliyatiga rahbarlik qiladi, Administratsiya tarkibiy boʻlinmalarining tizimli faoliyatini taʼminlaydi, Administratsiyaning faoliyatini tashkil etishga doir farmoyishlar chiqaradi;

Administratsiyaning tashkiliy tuzilmasiga qoʻshimcha shtat birliklarini kiritadi va qisqartiradi, tegishli sohalar va tarmoqlarni rivojlantirish boʻyicha loyiha ofislarini tashkil etadi hamda tugatadi;

Oʻzbekiston Respublikasi Prezidentining Oʻzbekiston Respublikasi Oliy Majlisi palatalari (bundan buyon matnda Oliy Majlis palatalari deb yuritiladi), sud hokimiyati hamda sudyalar hamjamiyati organlari bilan hamkorligini tashkiliy, huquqiy va tahliliy jihatdan taʼminlash choralarini koʻradi, Oʻzbekiston Respublikasi Vazirlar Mahkamasi, huquqni muhofaza qiluvchi va nazorat qiluvchi organlar hamda kuch ishlatishga vakolatli tuzilmalar faoliyatiga oid vakolatlari amalga oshirilishini taʼminlash choralarini koʻradi;

Oʻzbekiston Respublikasi Prezidentiga bevosita boʻysunuvchi (hisobdor) davlat organlari va tashkilotlari rahbarlari faoliyatini nazorat qiladi, muvofiqlashtiradi hamda uning natijadorligini baholashni tashkil etadi;

Oʻzbekiston Respublikasi Prezidentiga bevosita boʻysunuvchi (hisobdor) davlat organlari va tashkilotlari rahbarlariga oʻz vakolatlari doirasida topshiriqlar beradi hamda ularning ijrosini tashkil etadi;

Oʻzbekiston Respublikasi Prezidenti uchun axborot-tahliliy va tashkiliy materiallarni tayyorlashni tashkil etadi, jamiyat va davlat hayoti uchun muhim boʻlgan masalalar yuzasidan Oʻzbekiston Respublikasi Prezidentiga tahliliy axborot kiritadi;

Oʻzbekiston Respublikasi Prezidenti huzuridagi maslahat-kengash organlari faoliyatini tashkil etadi;

Oʻzbekiston Respublikasi Prezidentining qonunchilik tashabbusi huquqlari amalga oshirilishini taʼminlash choralarini koʻradi, Oʻzbekiston Respublikasi Prezidenti tomonidan qabul qilinadigan normativ-huquqiy tusdagi va boshqa hujjatlar loyihalarini tayyorlashni muvofiqlashtiradi, shuningdek Oʻzbekiston Respublikasi Prezidentining qonunchilik tashabbusi huquqi asosida kiritilgan qonun loyihalarini Oliy Majlis palatalarida koʻrib chiqish jarayonlarida oʻz vakillari orqali ishtirok etadi;

respublika va mahalliy ijro etuvchi hokimiyat organlarida maʼmuriy islohotlarning amalga oshirilishini muvofiqlashtiradi va nazorat qiladi, shuningdek davlat boshqaruvi tizimini takomillashtirish boʻyicha Oʻzbekiston Respublikasi Prezidentiga takliflar kiritadi;

davlat organlari va tashkilotlarining qonunchilik hujjatlarida belgilangan tartibda Oʻzbekiston Respublikasi Prezidenti bilan kelishishi talab etiladigan masalalarni koʻrib chiqishni tashkil etadi;

hududiy rivojlanish dasturlarini amalga oshirishni muvofiqlashtiradi va hududlarning ijtimoiy-iqtisodiy rivojlanishi holatini monitoring qiladi, shuningdek hududlarni rivojlantirishdagi tizimli muammolarni hal etish boʻyicha Oʻzbekiston Respublikasi Prezidentiga takliflar kiritadi;

Oʻzbekiston Respublikasi Prezidenti farmonlari, qarorlari, farmoyishlari va topshiriqlarining ijrosi ustidan nazoratni tashkil etadi;

respublika va mahalliy ijro etuvchi hokimiyat organlari rahbarlarining Oʻzbekiston Respublikasi Prezidentining farmonlari, qarorlari, farmoyishlari va topshiriqlari ijrosi toʻgʻrisidagi hisobotlarini qabul qiladi, ularni lozim darajada bajarmagan mansabdor shaxslarga nisbatan lavozimdan ozod etishgacha boʻlgan intizomiy taʼsir choralarini qoʻllashni tashkil etadi, ushbu masalalar boʻyicha Oʻzbekiston Respublikasi Prezidentiga takliflar kiritadi;

davlat organlari uchun asosiy samaradorlik koʻrsatkichlari tizimining joriy etilishiga va amal qilishiga koʻmaklashadi;

belgilangan tartibda davlat organlari va tashkilotlari tomonidan kiritilgan Oʻzbekiston Respublikasi Prezidenti farmonlari, qarorlari va farmoyishlari loyihalarining huquqiy, moliyaviy, korrupsiyaga qarshi hamda boshqa turdagi ekspertizalarini tashkil etadi;

jismoniy va yuridik shaxslarning Oʻzbekiston Respublikasi Prezidenti nomiga kelib tushgan murojaatlariga oid masalalar bilan bogʻliq ishlarning, shuningdek davlat siyosatini amalga oshirish masalalari boʻyicha jamoatchilik fikri monitoringining amalga oshirilishini, aholi va tadbirkorlik subyektlarining dolzarb muammolari oʻrganilishini tashkil etadi;

Oʻzbekiston Respublikasi Prezidentining topshirigʻiga koʻra mamlakat ichida va xalqaro munosabatlarda Oʻzbekiston Respublikasi Prezidenti manfaatlarini ifoda etadi, xalqaro muzokaralar va tadbirlarda ishtirok etadi;

Administratsiyaning davlat organlari va tashkilotlari bilan bogʻliq faoliyatini tartibga solishga hamda bu borada ularning faoliyatini tashkil etishga oid normativ-huquqiy hujjat tusiga ega farmoyishlarni imzolaydi;

tegishli davlat organlari va tashkilotlari rahbarlari lavozimlariga nomzodlar boʻyicha hamda ushbu lavozimdagi rahbarlarni ozod etish toʻgʻrisida Oʻzbekiston Respublikasi Prezidentiga takliflar kiritadi;

Oʻzbekiston Respublikasi Prezidenti tomonidan belgilangan tartibga muvofiq davlat organlari va tashkilotlarining mansabdor shaxslarini lavozimga tayinlaydi hamda lavozimidan ozod etadi, shuningdek davlat kadrlar siyosati amalga oshirilishini tashkil etadi;

Oʻzbekiston Respublikasi Prezidenti tomonidan belgilangan masalalar boʻyicha xalqaro majburiyatlarning bajarilishini muvofiqlashtiradi;

Oʻzbekiston Respublikasi Prezidenti tomonidan belgilangan tartib asosida davlat organlari va tashkilotlarida komplayens nazorati xizmati tuzilmalarini, shuningdek ular rahbarlarining komplayens va korrupsiyaga qarshi ichki nazorat boʻyicha oʻrinbosari (maslahatchi) lavozimlarini joriy etadi va tugatadi;

Administratsiya majlislarida raislik qiladi, ularda koʻrib chiqilgan masalalar yuzasidan topshiriqlarning bayonnomalarini imzolaydi;

Administratsiyaning mansabdor shaxslarini, boshqaruv va xizmatchi xodimlarini qonunchilikda belgilangan tartibda xorijiy davlatlarga xizmat safarlariga yuboradi.

Administratsiya Rahbari qonunchilik hujjatlariga muvofiq boshqa vakolatlarga ham ega boʻlishi mumkin.

Administratsiya Rahbari oʻziga taqdim etilgan hujjatlarni oʻrganib chiqib, takliflar tayyorlashda, Administratsiya Rahbarining topshiriqlari amalga oshirilishini tashkil etish va ijrosini nazorat qilib borishda, Administratsiya faoliyatining markazlashgan holda boshqarilishini taʼminlashda hamda boshqa vazifalarni amalga oshirishda koʻmaklashish uchun shartnoma asosida mustaqil maslahatchilarni jalb qilishi mumkin.

10-modda. Administratsiyaning tarkibiy boʻlinmalari

Administratsiya Rahbarining kotibiyati, Oʻzbekiston Respublikasi Prezidentining qabulxonasi, Administratsiya Rahbarining oʻrinbosarlari boʻlinmalari, Oʻzbekiston Respublikasi Prezidenti maslahatchilari va vakillari boʻlinmalari, Oʻzbekiston Respublikasi Prezidenti huzuridagi Xavfsizlik kengashi kotibiyati, Oʻzbekiston Respublikasi Prezidenti protokoli, Administratsiya departamentlari, Komplayens xizmati, Ishlar boshqarmasi va Administratsiyaning tashkiliy tuzilmasiga kiruvchi boshqa boʻlinmalar Administratsiyaning tarkibiy boʻlinmalaridir.

Administratsiya tarkibiy boʻlinmalarining asosiy vazifalari, faoliyati yoʻnalishlari va ish tartibi Administratsiya Rahbari tomonidan tasdiqlanadigan Administratsiya toʻgʻrisidagi nizom bilan belgilanadi.

Administratsiya tarkibiy boʻlinmalarining maqsadli ish faoliyati har yili Administratsiya Rahbari tomonidan tasdiqlanadigan hamda Administratsiyaning tarkibiy boʻlinmalari uchun choraklik, yarim yillik va yillik amaliy natijalarni oʻzida aks ettiradigan Administratsiyaning faoliyat dasturiga muvofiq amalga oshiriladi.

Administratsiyada ish yuritish Administratsiya Rahbari tomonidan tasdiqlanadigan Hujjatlar bilan ishlash qoidalariga muvofiq amalga oshiriladi.

Oʻzbekiston Respublikasi Prezidenti hamda Administratsiya huzurida tegishli sohalar va faoliyat yoʻnalishlari boʻyicha davlat organlari va tashkilotlari tashkil etilishi mumkin.

11-modda. Administratsiyaning mansabdor shaxslarini, boshqaruv va xizmatchi xodimlarini lavozimga tayinlash va lavozimidan ozod etish

Administratsiya Rahbari, Oʻzbekiston Respublikasi Prezidentining yordamchisi, Administratsiya Rahbarining oʻrinbosarlari, Administratsiya Rahbari kotibiyatining mudiri, Oʻzbekiston Respublikasi Prezidentining maslahatchilari, Oʻzbekiston Respublikasi Prezidentining vakillari, Administratsiyaning boshqa tarkibiy boʻlinmalari boshliqlari, Oʻzbekiston Respublikasi Prezidenti huzuridagi davlat organlari va tashkilotlari rahbarlari hamda ularning oʻrinbosarlari Oʻzbekiston Respublikasi Prezidenti tomonidan belgilangan tartib asosida lavozimga tayinlanadi va lavozimidan ozod etiladi.

Oʻzbekiston Respublikasi Prezidenti maslahatchilarining birinchi oʻrinbosarini va oʻrinbosarlarini hamda Administratsiya tarkibiy boʻlinmalari boshliqlarining birinchi oʻrinbosarini va oʻrinbosarlarini, Komplayens xizmati boshligʻini, Kanselyariya mudirini hamda Administratsiyaning boshqaruv va xizmatchi xodimlarini, shuningdek Administratsiya huzuridagi davlat organlari va tashkilotlari rahbarlarini hamda ularning oʻrinbosarlarini lavozimga tayinlash va lavozimidan ozod etish Administratsiya Rahbari tomonidan amalga oshiriladi.

Administratsiyaning mansabdor shaxslariga, boshqaruv va xizmatchi xodimlariga Administratsiya reglamentida belgilangan tartibda xizmat guvohnomasi beriladi.

Xizmat guvohnomasi xodimning Administratsiyaga mansubligini, uning shaxsini va lavozimini tasdiqlovchi hujjat hisoblanadi.

Xizmat guvohnomasi Administratsiya xodimining ushbu Konstitutsiyaviy Qonunda koʻrsatilgan huquqlarga ega ekanligini va vakolatlardan foydalanishini tasdiqlaydi.

Administratsiya huzuridagi davlat organlari va tashkilotlari xodimlari ushbu tashkilotlar rahbarlari tomonidan lavozimga tayinlanadi va lavozimidan ozod etiladi.

Administratsiya Rahbari bilan kelishilgan holda Administratsiya huzuridagi davlat organlari va tashkilotlaridagi lavozimlarga tayinlangan huquqni muhofaza qiluvchi va nazorat qiluvchi organlarning, harbiy boʻlinmalarning harbiy xizmatchilari (xodimlari) ushbu idoralarda harbiy xizmatda qoldirilishi (kadrlarning amaldagi zaxirasiga kiritilishi) mumkin.

12-modda. Administratsiya hujjatlari

Administratsiya Rahbari Oʻzbekiston Respublikasi Prezidentining farmonlari, qarorlari, farmoyishlari, topshiriqlari va tashabbuslari ijrosini tashkil etish maqsadida, shuningdek Administratsiya Rahbarining vakolatlariga oid masalalar boʻyicha va qonunchilik hujjatlariga muvofiq Oʻzbekiston Respublikasining butun hududida barcha davlat organlari, korxonalar, muassasalar, tashkilotlar, mansabdor shaxslar tomonidan bajarilishi majburiy boʻlgan farmoyishlar yoki topshiriqlar chiqaradi.

Administratsiya Rahbarining farmoyishlari, agar ularning oʻzida kechroq muddat koʻrsatilmagan boʻlsa, imzolangan kundan eʼtiboran kuchga kiradi.

Oʻzbekiston Respublikasi Prezidenti Administratsiya Rahbarining farmoyishlari va topshiriqlarini toʻxtatib turishi, bekor qilishi mumkin.

Administratsiya Rahbari oʻzi qabul qilgan hujjatlarning bajarilishi ustidan nazoratni bevosita, Administratsiya tarkibiy boʻlinmalari rahbarlari yoki respublika ijro etuvchi hokimiyat organlari orqali amalga oshiradi.

Administratsiya Rahbarining farmoyishlari va topshiriqlarini ishlab chiqish, kelishish va Administratsiya Rahbariga imzolash uchun kiritish hamda Administratsiya Rahbarining farmoyishlarini eʼlon qilish tartibi Administratsiyaning reglamentida belgilanadi.

13-modda. Oʻzbekiston Respublikasi Prezidentining farmonlari, qarorlari va farmoyishlari loyihalarini ishlab chiqish, Oʻzbekiston Respublikasi Prezidentining farmonlari, qarorlari va farmoyishlarining ijrosini tashkil etish hamda monitoring qilish

Oʻzbekiston Respublikasi Prezidentining farmonlari, qarorlari va farmoyishlari loyihalari qonunchilik hujjatlarining ijrosi yuzasidan, Oʻzbekiston Respublikasi Prezidentining yoki Administratsiya Rahbarining topshirigʻiga koʻra, shuningdek davlat organlari va tashkilotlarining tashabbusi boʻyicha, ushbu organlar va tashkilotlar zimmasiga yuklatilgan vazifalarning ijrosi yuzasidan ishlab chiqiladi.

Administratsiya Oʻzbekiston Respublikasi Prezidentining farmonlari, qarorlari va farmoyishlari loyihalarini mustaqil ravishda ishlab chiqishga haqli.

Oʻzbekiston Respublikasi Prezidentining farmonlari, qarorlari va farmoyishlari loyihalarini tayyorlash, koʻrib chiqish, imzolash hamda eʼlon qilish Administratsiyaning reglamentiga muvofiq amalga oshiriladi.

Oʻzbekiston Respublikasi Prezidentining farmonlari, qarorlari va farmoyishlari loyihalarini vazirliklar va idoralar tomonidan ishlab chiqish, kelishish hamda Administratsiyaga kiritish qonunchilik hujjatlarida belgilangan tartibda amalga oshiriladi.

Oʻzbekiston Respublikasi Prezidentining farmonlari, qarorlari, farmoyishlari va topshiriqlari ijrosini tashkil etish, nazorat qilish hamda bajarish yuzasidan ijro intizomining holatini tizimli ravishda va tanqidiy jihatdan tahlil qilish qonunchilik hujjatlariga hamda Administratsiyaning reglamentiga muvofiq amalga oshiriladi.

Oʻzbekiston Respublikasi Prezidentining farmonlari, qarorlari, farmoyishlari va topshiriqlari ijrosini nazorat qilish qonunchilik hujjatlarida belgilangan tartibda amalga oshiriladi.

Oʻzbekiston Respublikasi Prezidenti farmonlari, qarorlari, farmoyishlari va topshiriqlarining, Administratsiya Rahbari farmoyishlari va topshiriqlarining ijrosini taʼminlash boʻyicha ishlarni bevosita nazorat qilish hamda muvofiqlashtirish maqsadida Administratsiya Rahbari barcha darajadagi davlat organlari va tashkilotlarida hamda Oʻzbekiston Respublikasining xorijiy davlatlardagi diplomatik muassasalarida Administratsiya Rahbarining vakili lavozimini zaruratga koʻra joriy etishga haqli.

Administratsiya Rahbarining vakillari Administratsiya Rahbari tomonidan lavozimga tayinlanadi va lavozimidan ozod etiladi.

14-modda. Oʻzbekiston Respublikasi Prezidenti huzuridagi Xavfsizlik kengashi faoliyatini tashkil etish

Huquqni muhofaza qiluvchi va nazorat qiluvchi organlar, kuch ishlatishga vakolatli tuzilmalar hamda harbiy tuzilmalar, shuningdek tashqi ishlar siyosati uchun masʼul idoralar Oʻzbekiston Respublikasi Prezidenti huzuridagi Xavfsizlik kengashi tarkibiga kiritiladi hamda mazkur kengash ularning asosiy faoliyatini maqsadli boshqaruvchi va uygʻunlikdagi hamkorligini taʼminlovchi oliy muvofiqlashtiruvchi organ hisoblanadi.

Oʻzbekiston Respublikasi Prezidenti Oʻzbekiston Respublikasi Prezidenti huzuridagi Xavfsizlik kengashining raisi hisoblanadi hamda unga boshchilik qiladi.

Administratsiya Rahbari Oʻzbekiston Respublikasi Prezidenti huzuridagi Xavfsizlik kengashi raisining oʻrinbosari hisoblanadi hamda ushbu kengash aʼzolarining faoliyatini tashkil etadi va muvofiqlashtiradi.

Oʻzbekiston Respublikasi Prezidenti huzuridagi Xavfsizlik kengashining ishchi organi Oʻzbekiston Respublikasi Prezidenti huzuridagi Xavfsizlik kengashi kotibiyati hisoblanadi.

Administratsiya Oʻzbekiston Respublikasi Prezidenti huzuridagi Xavfsizlik kengashi kotibiyati orqali Oʻzbekiston Respublikasi Prezidentining Qurolli Kuchlarga, mudofaaga, safarbarlikka, xavfsizlikka va favqulodda vaziyatlarga oid konstitutsiyaviy vakolatlarini taʼminlaydi.

Oʻzbekiston Respublikasi Prezidenti huzuridagi Xavfsizlik kengashining faoliyatini tashkil etish va muvofiqlashtirish tartibi qonunchilik hujjatlariga muvofiq belgilanadi.

15-modda. Oʻzbekiston Respublikasi Prezidenti tomonidan ustuvor yoki strategik deb belgilangan investitsiya, infratuzilma, sanoat, energetika, transport boʻyicha loyihalarning, ijtimoiy va boshqa loyihalarning amalga oshirilishini muvofiqlashtirish, monitoring va nazorat qilish

Administratsiya Oʻzbekiston Respublikasi Prezidenti tomonidan ustuvor yoki strategik deb belgilangan investitsiya, infratuzilma, sanoat, energetika, transport boʻyicha loyihalarning, ijtimoiy va boshqa loyihalarning oʻz vaqtida, sifatli hamda natijali tarzda amalga oshirilishini muvofiqlashtiradi, monitoring va nazorat qiladi.

Oʻzbekiston Respublikasi Prezidenti tomonidan ustuvor yoki strategik deb belgilangan investitsiya, infratuzilma, sanoat, energetika, transport boʻyicha loyihalarning, ijtimoiy va boshqa loyihalarning roʻyxati, ularning maqsadli koʻrsatkichlari, asosiy bosqichlari hamda yakuniy muddatlari Oʻzbekiston Respublikasi Prezidentining farmonlariga, qarorlariga, farmoyishlariga yoki topshirigʻiga asosan Administratsiya Rahbari tomonidan tasdiqlanadi.

16-modda. Administratsiyaning Oliy Majlis palatalari bilan hamkorligi

Administratsiya Oliy Majlis palatalari bilan hamkorlik doirasida:

Oliy Majlis palatalari bilan davlat siyosatining ustuvor yoʻnalishlari boʻyicha doimiy muloqotni taʼminlaydi;

Oʻzbekiston Respublikasi Prezidentining qonunchilik tashabbusi huquqi amalga oshirilishini taʼminlaydi;

Oʻzbekiston Respublikasi Prezidenti tomonidan Oliy Majlis palatalariga kiritiladigan dasturiy hujjatlarni va boshqa masalalarni tayyorlashni muvofiqlashtiradi;

Oʻzbekiston Respublikasi Prezidentining tegishliligi boʻyicha Oliy Majlis palatalariga Oʻzbekiston Respublikasi Konstitutsiyasiga va boshqa qonunchilik hujjatlariga muvofiq taqdim etadigan lavozimlarga nomzodlar hamda boshqa masalalar boʻyicha vakolatlarini tashkiliy, huquqiy va tahliliy jihatdan taʼminlaydi;

Oʻzbekiston Respublikasi Oliy Majlisi tomonidan Oʻzbekiston Respublikasi Prezidentiga qonun hujjatlarida belgilangan tartibda yuborilgan qonunlarning Oʻzbekiston Respublikasi Prezidentiga koʻrib chiqish uchun taqdim etilishini taʼminlaydi;

Oʻzbekiston Respublikasi Prezidentining qonunni oʻz eʼtirozlari bilan Oʻzbekiston Respublikasi Oliy Majlisiga qaytarishga oid huquqi amalga oshirilishini taʼminlaydi.

Administratsiyaning Oliy Majlis palatalari bilan hamkorligi qonunchilik hujjatlarida va Administratsiyaning reglamentida nazarda tutilgan boshqa masalalar boʻyicha ham amalga oshirilishi mumkin.

17-modda. Administratsiyaning Oʻzbekiston Respublikasi Vazirlar Mahkamasi va uning boʻysunuvidagi davlat organlari hamda tashkilotlari bilan aloqalari

Administratsiya Oʻzbekiston Respublikasi Prezidentining Oʻzbekiston Respublikasi Vazirlar Mahkamasi (bundan buyon matnda Vazirlar Mahkamasi deb yuritiladi) va uning boʻysunuvidagi davlat organlari hamda tashkilotlari bilan aloqalari doirasida:

Oʻzbekiston Respublikasi Prezidenti farmonlari, qarorlari, farmoyishlari va topshiriqlarining ijrosini tashkil etish doirasida Vazirlar Mahkamasi hamda uning boʻysunuvidagi davlat organlari va tashkilotlarining idoralararo hamkorligini muvofiqlashtiradi, mazkur hujjatlarning ijrosini monitoring qiladi va nazoratini tashkil etadi;

Oʻzbekiston Respublikasi Prezidentining Oʻzbekiston Respublikasi xalqiga hamda Oliy Majlisiga murojaatnomasida bayon etilgan topshiriqlarning Vazirlar Mahkamasi va uning boʻysunuvidagi davlat organlari hamda tashkilotlari tomonidan samarali ijro etilishini taʼminlash chora-tadbirlarining monitoringini tashkil etadi;

Oʻzbekiston Respublikasi Prezidentining respublika ijro etuvchi hokimiyat organlarini tuzish hamda tugatish, ularning rahbarlarini qonunchilik hujjatlariga muvofiq lavozimga tayinlash va lavozimidan ozod etish, respublika ijro etuvchi hokimiyat organlarining hujjatlarini toʻxtatish, bekor qilish boʻyicha vakolatlarini tashkiliy, huquqiy va tahliliy jihatdan taʼminlaydi;

milliy rivojlanish strategiyalari, davlat dasturlari va milliy loyihalarning respublika ijro etuvchi hokimiyat organlari tomonidan amalga oshirilishi boʻyicha monitoringni tashkil etadi;

Vazirlar Mahkamasi va uning boʻysunuvidagi davlat organlari hamda tashkilotlari faoliyati samaradorligini tahlil qilishda ishtirok etadi;

Oʻzbekiston Respublikasi Prezidenti ishtirokida oʻtkaziladigan Vazirlar Mahkamasi faoliyatiga oid yigʻilishlar va muhokamalarning tashkiliy, huquqiy va tahliliy jihatdan tayyorlanishini taʼminlaydi;

Oʻzbekiston Respublikasi Bosh vaziri tomonidan kadrlar siyosatiga oid takliflarning Oʻzbekiston Respublikasi Prezidentiga qonunchilik hujjatlariga muvofiq taqdim etilishini taʼminlaydi.

Administratsiya Rahbari yoki Administratsiyaning vakolat berilgan mansabdor shaxsi Vazirlar Mahkamasi, uning Rayosati, komissiyalari, kengashlari, davlat organlari va tashkilotlarining hayʼatlari hamda boshqa kollegial organlari majlislarida oʻz fikr va mulohazalari bilan ishtirok etishga haqli.

Administratsiyaning Vazirlar Mahkamasi bilan aloqalari qonunchilik hujjatlarida va Administratsiyaning reglamentida nazarda tutilgan boshqa masalalar boʻyicha ham amalga oshirilishi mumkin.

18-modda. Administratsiyaning Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan aloqalari

Administratsiya Oʻzbekiston Respublikasi Prezidentining hududlarni ijtimoiy-iqtisodiy rivojlantirish borasidagi farmonlari, qarorlari, farmoyishlari va topshiriqlari ijrosini taʼminlash hamda davlat siyosatini amalga oshirish masalalari boʻyicha Qoraqalpogʻiston Respublikasi Vazirlar Kengashi faoliyatiga koʻmaklashadi, viloyatlar va Toshkent shahar hokimliklari faoliyatini muvofiqlashtiradi, monitoring va nazorat qiladi.

Administratsiya:

Oʻzbekiston Respublikasi Prezidenti farmonlari, qarorlari, farmoyishlari va topshiriqlarining hududlarda ijro etilishi yuzasidan monitoringni tashkil etadi;

Oʻzbekiston Respublikasi Prezidentining viloyatlar hokimlarini va Toshkent shahar hokimini tayinlash hamda lavozimidan ozod etish, Oʻzbekiston Respublikasi Konstitutsiyasini , qonunlarini buzgan yoki hokimning shaʼni va qadr-qimmatiga dogʻ tushiradigan xatti-harakatlar sodir etgan tuman va shahar hokimlarini lavozimidan ozod etish, hokimlarning hujjatlarini toʻxtatish, bekor qilish boʻyicha vakolatlari amalga oshirilishini tashkiliy, huquqiy va tahliliy jihatdan taʼminlaydi;

hududlarni ijtimoiy-iqtisodiy rivojlantirish holatini monitoring qiladi;

hududlarning iqtisodiy, ijtimoiy, infratuzilmaviy va ekologik rivojlanish holati, aholining turmush darajasi hamda hududlar oʻrtasidagi tafovutlar tizimli ravishda tahlil qilinishini taʼminlaydi, aniqlangan muammolarning yechimi boʻyicha Oʻzbekiston Respublikasi Prezidentiga asoslangan takliflar kiritadi;

Oʻzbekiston Respublikasi Prezidentining hududlarni ijtimoiy-iqtisodiy rivojlantirishga doir tashriflari, yigʻilishlari va qarorlarini tayyorlashni, respublika ijro etuvchi hokimiyat organlari hamda mahalliy ijro etuvchi hokimiyat organlari oʻrtasidagi hamkorlikni tashkil etadi.

Administratsiyaning Oʻzbekiston Respublikasi Prezidentining Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari faoliyatiga oid vakolatlarini tashkil etish hamda taʼminlashga oid boshqa masalalar qonunchilik hujjatlarida va Administratsiyaning reglamentida belgilangan tartibga muvofiq amalga oshiriladi.

19-modda. Administratsiyaning sud hokimiyati va sudyalar hamjamiyati organlari bilan hamkorligi

Administratsiya sud hokimiyati va sudyalar hamjamiyati organlari bilan hamkorlik doirasida:

Oʻzbekiston Respublikasi Prezidentiga hamkorlikka oid masalalar boʻyicha takliflar va tahliliy materiallar tayyorlaydi;

Oʻzbekiston Respublikasi Prezidentining Oʻzbekiston Respublikasi Konstitutsiyasida nazarda tutilgan sud hokimiyati va sudyalar hamjamiyati organlari bilan hamkorligiga oid vakolatlarini tashkiliy, huquqiy va tahliliy jihatdan taʼminlaydi;

sud-huquq sohasidagi islohotlarni muvofiqlashtiradi;

sud tizimini isloh qilishga doir takliflarni ishlab chiqadi;

sudlar va sudyalar hamjamiyati organlari faoliyati uchun zarur tashkiliy va huquqiy shart-sharoitlarni yaxshilash boʻyicha takliflar ishlab chiqilishini taʼminlaydi.

Administratsiya qonunchilik hujjatlarida nazarda tutilgan boshqa masalalar boʻyicha ham sud hokimiyati va sudyalar hamjamiyati organlari bilan hamkorlikni amalga oshirishi mumkin.

20-modda. Administratsiyaning Oʻzbekiston Respublikasi Prezidentiga bevosita boʻysunuvchi (hisobdor) davlat organlari va tashkilotlari bilan aloqalari

Oʻzbekiston Respublikasi Prezidentiga bevosita boʻysunuvchi (hisobdor) davlat organlari va tashkilotlarining, mansabdor shaxslarning faoliyatini qonunchilik hujjatlariga binoan muvofiqlashtirish va uning natijadorligini baholashni tashkil etish Administratsiya tomonidan amalga oshiriladi.

Administratsiya Oʻzbekiston Respublikasi Prezidentiga bevosita boʻysunuvchi (hisobdor) davlat organlari va tashkilotlarining, mansabdor shaxslarning faoliyatini muvofiqlashtirish doirasida:

Oʻzbekiston Respublikasi Prezidentiga bevosita boʻysunuvchi (hisobdor) davlat organlari va tashkilotlarining, mansabdor shaxslarning faoliyati samaradorligini tahlil qiladi, sohalarga oid davlat siyosatini amalga oshirish monitoringini olib boradi;

Oʻzbekiston Respublikasi Prezidentiga bevosita boʻysunuvchi (hisobdor) davlat organlari va tashkilotlari mansabdor shaxslarining hisobotlarini oʻz vakolatlari doirasida koʻrib chiqadi, ularning faoliyatini baholaydi va uning samaradorligini oshirish boʻyicha chora-tadbirlarni belgilaydi;

Oʻzbekiston Respublikasi Prezidentiga bevosita boʻysunuvchi (hisobdor) davlat organlari va tashkilotlarining, mansabdor shaxslarning faoliyatini takomillashtirish boʻyicha takliflar tayyorlaydi hamda Oʻzbekiston Respublikasi Prezidentiga kiritadi.

Administratsiya Oʻzbekiston Respublikasi Prezidentiga bevosita boʻysunuvchi (hisobdor) davlat organlari va tashkilotlarining, mansabdor shaxslarning faoliyatini qonunchilik hujjatlarida nazarda tutilgan boshqa yoʻnalishlar boʻyicha ham muvofiqlashtiradi.

21-modda. Administratsiyaning davlat organlari va tashkilotlarining komplayens va korrupsiyaga qarshi ichki nazorat tuzilmalari bilan aloqalari

Davlat organlari va tashkilotlarida korrupsiyaga qarshi kurashish samaradorligini oshirish, manfaatlar toʻqnashuvining hamda korrupsiyaviy holatlarning oldini olish choralarini kuchaytirish maqsadida tashkil etiladigan davlat organlari va tashkilotlarining komplayens va korrupsiyaga qarshi ichki nazorat tuzilmalari faoliyati Administratsiyaning Komplayens xizmati tomonidan muvofiqlashtiriladi.

Respublika darajasidagi davlat organlari va tashkilotlari rahbarlarining komplayens va korrupsiyaga qarshi ichki nazorat boʻyicha oʻrinbosarlari (maslahatchilari) Administratsiya Rahbari tomonidan lavozimga tayinlanadi va lavozimidan ozod etiladi hamda ular oʻz faoliyati davomida Administratsiyaning vakili maqomiga ega boʻladi.

Administratsiya Komplayens xizmatining davlat organlari va tashkilotlarining komplayens va korrupsiyaga qarshi ichki nazorat tuzilmalari bilan aloqalari Oʻzbekiston Respublikasi Prezidenti tomonidan belgilangan tartibda hamda “Korrupsiyaga qarshi kurashish toʻgʻrisida”gi Oʻzbekiston Respublikasi Qonuniga muvofiq amalga oshiriladi.

3-bob. Administratsiyaning mansabdor shaxslari, boshqaruv va xizmatchi xodimlari faoliyatining kafolatlari

22-modda. Administratsiyaning mansabdor shaxslarini, boshqaruv va xizmatchi xodimlarini moddiy ragʻbatlantirish

Administratsiya mansabdor shaxslarining, boshqaruv va xizmatchi xodimlarining ish haqi lavozim maoshidan hamda qonunchilik hujjatlarida nazarda tutilgan boshqa toʻlovlardan iboratdir.

Administratsiyaning mansabdor shaxslarini, boshqaruv va xizmatchi xodimlarini moddiy ragʻbatlantirish qonunchilik hujjatlariga muvofiq amalga oshiriladi.

23-modda. Administratsiya mansabdor shaxslarining, boshqaruv va xizmatchi xodimlarining ijtimoiy taʼminoti

Administratsiyaning mansabdor shaxslariga, boshqaruv va xizmatchi xodimlariga haq toʻlanadigan yillik taʼtillar beriladi.

Administratsiyaning ishlash uchun boshqa hududlardan taklif qilingan hamda Toshkent shahrida uy-joyga ega boʻlmagan mansabdor shaxslariga, boshqaruv va xizmatchi xodimlariga lavozimda boʻlish vaqtida zaruratga koʻra, ularning arizasiga binoan xizmat uy-joyi beriladi.

Administratsiyaning mansabdor shaxslarini, boshqaruv va xizmatchi xodimlarini ijtimoiy himoya qilish tizimi kafolatlangan tibbiy yordamdan hamda sanatoriy-sogʻlomlashtirish xizmatlaridan ushbu mansabdor shaxslar, xodimlar va ularning oila aʼzolari (turmush oʻrtogʻi, farzandlari va ota-onasi) tomonidan foydalanish hamda boshqa ijtimoiy yordam koʻrsatish orqali amalga oshiriladi.

Administratsiyaning mansabdor shaxslari, boshqaruv va xizmatchi xodimlari uchun avvalgi ish joyida berilgan harbiy va maxsus unvonlar (martaba (malaka) darajalari, malaka toifalari, diplomatik darajalar va boshqalar) uchun berilgan ustamalar va qoʻshimcha toʻlovlar saqlab qolinadi.

Administratsiya mansabdor shaxslarining, boshqaruv va xizmatchi xodimlarining Administratsiyadagi uzoq muddatli xizmatlari uchun qoʻshimcha ustamalar belgilashda ularning boshqa organlar, tashkilotlar va muassasalardagi ish staji (xizmat davri) inobatga olinadi.

Administratsiyaning mansabdor shaxslari, boshqaruv va xizmatchi xodimlari avvalgi ish joyi boʻyicha xodimlar uchun belgilangan barcha imtiyozlar, moddiy va ijtimoiy himoya choralaridan Administratsiya tarkibiy boʻlinmalarida amalda boʻlgan mehnat sharoitlari hisobga olingan holda hamda lavozim maoshi va boshqa toʻlovlar miqdorlari saqlangan holda foydalanadi.

Administratsiyaning tarkibiy boʻlinmalarida ishlangan davr harbiy va maxsus unvonlarni (martaba (malaka) darajalarini, malaka toifalarini, diplomatik darajalarni va boshqalarni) olish uchun zarur boʻlgan ish stajiga qoʻshiladi.

Qonunchilik hujjatlariga muvofiq Administratsiyaning mansabdor shaxslari, boshqaruv va xizmatchi xodimlari uchun qoʻshimcha ijtimoiy taʼminot choralari belgilanishi mumkin.

24-modda. Administratsiyaning mansabdor shaxslarini va boshqaruv xodimlarini huquqiy jihatdan himoya qilish kafolatlari

Administratsiyaning mansabdor shaxslari va boshqaruv xodimlari oʻz zimmasiga yuklatilgan vazifalarni bajarishi chogʻida davlat himoyasida boʻladi.

Administratsiya mansabdor shaxslarining va boshqaruv xodimlarining oʻz zimmasiga yuklatilgan vazifalarni bajarishiga monelik qilish, ularning shaʼni va qadr-qimmatini haqorat qilish, ularga nisbatan tahdid yoki zoʻrlik qilish, oʻz faoliyatini amalga oshirishi munosabati bilan ularning hayotiga, sogʻligʻiga va mol-mulkiga tajovuz qilish qonunda belgilangan javobgarlikka sabab boʻladi.

Administratsiyaning mansabdor shaxslariga va ularning oila aʼzolariga (turmush oʻrtogʻiga, farzandlariga va ota-onasiga) umrbod, Administratsiyaning boshqaruv xodimlariga Administratsiyadagi faoliyati davriga Oʻzbekiston Respublikasi Prezidenti tomonidan belgilangan tartibda biometrik diplomatik pasportlar beriladi.

Administratsiyaning mansabdor shaxslari va boshqaruv xodimlari hamda ularning oila aʼzolari (turmush oʻrtogʻi, farzandlari va ota-onasi) xavfsizligini taʼminlash Oʻzbekiston Respublikasi Prezidenti tomonidan belgilanadigan tartibda amalga oshiriladi.

25-modda. Administratsiya mansabdor shaxslarining va boshqaruv xodimlarining daxlsizlik kafolatlari

Administratsiyaning mansabdor shaxslari va boshqaruv xodimlari daxlsizlikka hamda immunitetga ega boʻladi.

Administratsiya mansabdor shaxslarining va boshqaruv xodimlarining daxlsizligi ularning va ular oila aʼzolarining (turmush oʻrtogʻining, farzandlarining va ota-onasining) shaxsiy hayotiga, turar joyiga, xizmat xonasiga, ular foydalanadigan shaxsiy va xizmat transport vositasiga hamda aloqa va kommunikatsiya vositasiga, xat-xabarlariga, yozishmalariga, elektron maʼlumotlariga, ularga tegishli ashyolar va hujjatlarga nisbatan tatbiq etiladi.

Administratsiyaning mansabdor shaxslariga nisbatan jinoyat ishi qoʻzgʻatishga, ularni jinoiy javobgarlikka tortishga, ularning huquqlari va erkinliklarini cheklaydigan boshqa har qanday protsessual majburlov choralarini qoʻllashga, tezkor-qidiruv faoliyatini amalga oshirishga, surishtiruv, tergov harakatlari oʻtkazishga yoki maʼmuriy qamoq jazo chorasini qoʻllashga yoʻl qoʻyilmaydi.

Administratsiyaning boshqaruv xodimlari oʻz zimmasiga yuklatilgan vazifalarni bajarish hamda vakolatlarini amalga oshirish bilan bogʻliq holda qabul qilgan qarorlari, sodir etgan harakatlari yoki harakatsizligi, bildirgan fikrlari va bergan koʻrsatmalari uchun jinoiy, maʼmuriy yoki fuqaroviy javobgarlikka tortilmaydi.

Administratsiyada oʻz zimmasiga yuklatilgan vazifalarni bajarish hamda vakolatlarini amalga oshirish bilan bogʻliq boʻlmagan harakat yoki harakatsizlik uchun Administratsiyaning boshqaruv xodimlariga nisbatan Oʻzbekiston Respublikasi Prezidentining yozma roziligisiz jinoyat ishini qoʻzgʻatish, ularni jinoiy javobgarlikka tortish, ularning huquqlari va erkinliklarini cheklaydigan boshqa har qanday protsessual majburlov choralarini qoʻllash, tezkor-qidiruv faoliyatini amalga oshirish, surishtiruv, tergov harakatlari oʻtkazish yoki sud tartibida maʼmuriy jazo va huquqiy taʼsir choralarini qoʻllashga yoʻl qoʻyilmaydi.

Administratsiyaning boshqaruv xodimi Administratsiyada ishlab turganida va (yoki) ishdan boʻshatilganidan keyin unga nisbatan jinoyat ishi faqat Oʻzbekiston Respublikasi Bosh prokurori tomonidan qoʻzgʻatilishi mumkin.

Administratsiyaning boshqaruv xodimiga nisbatan Administratsiyada ishlab turganida va (yoki) ishdan boʻshatilganidan keyin qoʻzgʻatilgan jinoyat ishi Oʻzbekiston Respublikasi Oliy sudining sudloviga tegishlidir.

Administratsiyaning mansabdor shaxslari, boshqaruv va xizmatchi xodimlari qonunchilik hujjatlariga muvofiq tezkor-qidiruv faoliyatini amalga oshiruvchi vakolatli davlat organlari tomonidan maxfiylik asosida hamkorlikka jalb qilinishi, shu jumladan Administratsiyadan boʻshatilganidan keyin ham jalb qilinishi taqiqlanadi.

Administratsiyaning mansabdor shaxslari ushbu Konstitutsiyaviy Qonunda belgilangan daxlsizlik va immunitetni Administratsiyadan boʻshatilganidan keyin umrbod, boshqaruv xodimlari esa Administratsiyadan boʻshatilganidan keyin besh yil davomida saqlab qoladi.

Ushbu moddada belgilangan qoidalarni buzgan holda olingan dalillar qonun hujjatlarini buzgan holda olingan deb hisoblanadi va nomaqbul dalillar deb topiladi.

Qonunchilik hujjatlariga ushbu moddada nazarda tutilgan daxlsizlikka oid qoidalarni bekor qilishga, ogʻirlashtirishga yoki daxlsizlik qoʻllaniladigan shaxslarning holatini yomonlashtirishga olib keladigan oʻzgartirish va qoʻshimchalar kiritilgan taqdirda, bunday oʻzgartirishlar Administratsiyaning ushbu Konstitutsiyaviy Qonunda belgilangan qoidalar qoʻllaniladigan mansabdor shaxslariga va boshqaruv xodimlariga nisbatan tatbiq etilmaydi, shu jumladan ular Administratsiyadan boʻshatilganidan keyin ham tatbiq etilmaydi.

26-modda. Administratsiyaning mansabdor shaxslarini va boshqaruv xodimlarini ishga joylashtirish kafolatlari

Administratsiyaning mansabdor shaxslari va boshqaruv xodimlari Administratsiyadagi lavozimidan ozod etilgan hollarda ularga Administratsiyaga ishga kelguniga qadar egallab turgan avvalgi lavozimidan kamida bir pogʻona yuqori darajadagi lavozim beriladi, avvalgi lavozimidan yuqori lavozim mavjud (boʻsh) boʻlmaganda esa avvalgi lavozimiga teng lavozimi yoki ularning mutaxassisligi hisobga olingan holda Oʻzbekiston Respublikasi davlat organlari va tashkilotlaridagi kamida bir pogʻona yuqori yoki teng darajadagi lavozim birinchi navbatda beriladi, bundan saylanadigan yoki Oʻzbekiston Respublikasi Prezidentining farmonlari va qarorlari bilan tayinlanadigan lavozimlardan Administratsiyaga ishga oʻtganlik, mehnat intizomini buzganlik uchun ishdan boʻshatilish hollari mustasno.

4-bob. Yakunlovchi qoidalar

27-modda. Administratsiyaning faoliyatini moliyalashtirish

Administratsiyaning faoliyati Oʻzbekiston Respublikasining respublika budjeti mablagʻlari, shuningdek qonunchilik hujjatlarida taqiqlanmagan boshqa manbalar hisobidan moliyalashtiriladi.

Administratsiyada budjetdan tashqari jamgʻarmalar tuzilishi mumkin, ularni shakllantirish va ulardan foydalanish tartibi qonunchilik hujjatlariga muvofiq belgilanadi.

Administratsiya qonunchilik hujjatlarida belgilangan tartibda shakllantiriladigan xizmat uy-joy fondiga ega boʻlishi mumkin.

Administratsiya oʻz faoliyatini amalga oshirish uchun axborot-kommunikatsiya tizimlarini va axborot bazalarini, shuningdek axborotning himoya vositalarini, shu jumladan kriptografik himoya vositalarini ishlab chiqadi, yaratadi hamda ulardan foydalanadi, Oʻzbekiston Respublikasi davlat organlari va tashkilotlarining shu kabi tizimlaridan va axborot bazalaridan Administratsiya ishini samarali ravishda amalga oshirish maqsadida, qonunchilik hujjatlarida belgilangan tartibda foydalanadi.

28-modda. Administratsiyada maʼlumotlarni himoya qilish

Administratsiyada davlat sirlarini tashkil etuvchi maʼlumotlarning himoya qilinishi, shu jumladan kriptografik vositalarni qoʻllagan holda texnik jihatdan himoya qilinishi taʼminlanadi.

Administratsiyada maxfiy ish yuritish davlat sirlari toʻgʻrisidagi qonunchilikka muvofiq amalga oshiriladi. Bunda Administratsiyada maxfiylik rejimini taʼminlash, unga rioya etilishi ustidan nazoratni tashkil etish hamda tegishli normativ-huquqiy hujjatlar talablarini bajarish yuzasidan tekshirish tadbirlarini oʻtkazish Administratsiyaning Komplayens xizmati tomonidan amalga oshiriladi.

29-modda. Administratsiyaning hujjatlari ustidan, Administratsiya mansabdor shaxslarining, boshqaruv va xizmatchi xodimlarining harakatlari (harakatsizligi) ustidan shikoyat qilish

Administratsiyaning hujjatlari ustidan, Administratsiya mansabdor shaxslarining, boshqaruv va xizmatchi xodimlarining harakatlari (harakatsizligi) ustidan qonunda belgilangan tartibda shikoyat qilinishi mumkin.

30-modda. Administratsiya toʻgʻrisidagi qonunchilikni buzganlik uchun javobgarlik

Administratsiya toʻgʻrisidagi qonunchilikni buzganlikda aybdor shaxslar belgilangan tartibda javobgar boʻladi.

31-modda. Oʻzbekiston Respublikasining ayrim qonun hujjatlariga oʻzgartirish va qoʻshimchalar kiritish

1. Oʻzbekiston Respublikasining 1993-yil 2-sentabrda qabul qilingan “Mahalliy davlat hokimiyati toʻgʻrisida”gi 913-XII-sonli Qonuni (Oʻzbekiston Respublikasi Oliy Kengashining Axborotnomasi, 1993-yil, № 9, 320-modda; Oʻzbekiston Respublikasi Oliy Majlisining Axborotnomasi, 1997-yil, № 9, 241-modda; 1999-yil, № 1, 20-modda; 2005-yil, № 1, 18-modda; Oʻzbekiston Respublikasi Oliy Majlisi palatalarining Axborotnomasi, 2005-yil, № 12, 418-modda; 2007-yil, № 4, 163-modda, № 9, 420-modda; 2008-yil, № 12, 640-modda; 2013-yil, № 12, 350-modda; 2014-yil, № 4, 86-modda, № 5, 130-modda; 2015-yil, № 6, 228-modda; 2017-yil, № 6, 300-modda, № 8, 383-modda, № 9, 510-modda, № 12, 772-modda; 2018-yil, № 7, 431-modda; 2019-yil, № 1, 4-modda, № 11, 792-modda, № 12, 891-modda; 2020-yil, № 9, 537-modda; 2021-yil, № 1, 3, 7, 13-moddalar, 4-songa ilova, № 8, 800-modda, № 12, 1198-modda; 2022-yil, № 3, 213-modda, № 6, 570, 577-moddalar, № 10, 984-modda; 2023-yil, № 1, 2-modda, № 10, 794-modda, № 12, 1003-modda; 2024-yil, № 8, 823-modda, № 10, 1075-modda; 2026-yil, № 4, 365-modda) 21-moddasining toʻrtinchi qismidagi “Oʻzbekiston Respublikasining Prezidenti bilan kelishilgan holda” degan soʻzlar “Oʻzbekiston Respublikasining Prezidenti tomonidan belgilanadigan tartibda” degan soʻzlar bilan almashtirilsin.

2. Oʻzbekiston Respublikasining 1997-yil 29-avgustda qabul qilingan “Davlat soliq xizmati toʻgʻrisida”gi 474-I-sonli Qonuni (Oʻzbekiston Respublikasi Oliy Majlisining Axborotnomasi, 1997-yil, № 9, 232-modda; 1998-yil, № 5-6, 102-modda; 1999-yil, № 9, 229-modda; 2000-yil, № 7-8, 217-modda; 2001-yil, № 5, 89-modda, № 9-10, 182-modda; 2003-yil, № 1, 8-modda, № 5, 67-modda; 2004-yil, № 9, 171-modda; 2005-yil, № 1, 18-modda; Oʻzbekiston Respublikasi Oliy Majlisi palatalarining Axborotnomasi, 2005-yil, № 5, 152-modda, № 9, 312-modda, № 12, 415-modda; 2006-yil, № 10, 536-modda; 2007-yil, № 12, 608-modda; 2008-yil, № 12, 640-modda; 2009-yil, № 12, 474-modda; 2010-yil, № 9, 336-modda; 2012-yil, № 4, 105-modda; 2014-yil, № 9, 244-modda; 2015-yil, № 12, 452-modda; 2016-yil, № 12, 385-modda; 2017-yil, № 6, 300-modda, № 12, 773-modda; 2018-yil, № 1, 1, 4-moddalar; 2019-yil, № 1, 1, 5-moddalar, № 2, 47-modda, № 3, 166-modda, № 5, 267-modda; 2021-yil, 4-songa ilova; 2022-yil, № 3, 215-modda; 2026-yil, № 6, 625-modda) 10-moddasining ikkinchi qismidagi “Oʻzbekiston Respublikasi Prezidenti tomonidan” degan soʻzlar “Oʻzbekiston Respublikasi Prezidenti tomonidan belgilanadigan tartibda lavozimga” degan soʻzlar bilan almashtirilsin.

3. Oʻzbekiston Respublikasining 2012-yil 25-dekabrda qabul qilingan “Tezkor-qidiruv faoliyati toʻgʻrisida”gi OʻRQ-344-sonli Qonuni (Oʻzbekiston Respublikasi Oliy Majlisi palatalarining Axborotnomasi, 2012-yil, № 12, 335-modda; 2016-yil, № 4, 125-modda; 2017-yil, № 9, 506-modda, № 10, 605-modda; 2019-yil, № 1, 5-modda, № 2, 47-modda, № 9, 589-modda, № 12, 891-modda; 2020-yil, № 12, 689-modda; 2021-yil, 4-songa ilova, № 6, 524-modda; 2024-yil, № 3, 244-modda) 17-moddasining ikkinchi qismi “sudyalar” degan soʻzdan keyin “Oʻzbekiston Respublikasi Prezidenti Administratsiyasining xodimlari” degan soʻzlar bilan toʻldirilsin.

4. Oʻzbekiston Respublikasining 2016-yil 16-sentabrda qabul qilingan “Ichki ishlar organlari toʻgʻrisida”gi OʻRQ-407-sonli Qonuni (Oʻzbekiston Respublikasi Oliy Majlisi palatalarining Axborotnomasi, 2016-yil, № 9, 272-modda; 2017-yil, № 6, 300-modda, № 9, 510-modda; 2019-yil, № 2, 47-modda, № 5, 267-modda, № 9, 588, 591-moddalar, № 10, 674-modda, № 12, 891-modda; 2021-yil, 4-songa ilova; 2022-yil, № 3, 216-modda, № 5, 466-modda, № 6, 570-modda, № 10, 984-modda; 2023-yil, № 7, 537-modda; 2024-yil, № 3, 244-modda, № 9, 958, 964-moddalar, № 11, 1291-modda; 2025-yil, № 12, 1329-modda; 2026-yil, № 1, 2-modda, № 4, 355-modda, № 5, 499-modda) 14-moddasining ikkinchi qismidagi “Oʻzbekiston Respublikasi Prezidenti tomonidan” degan soʻzlar “Oʻzbekiston Respublikasi Prezidenti tomonidan belgilanadigan tartibda” degan soʻzlar bilan almashtirilsin.

5. Oʻzbekiston Respublikasining 2021-yil 20-aprelda qabul qilingan “Normativ-huquqiy hujjatlar toʻgʻrisida”gi OʻRQ-682-sonli Qonuniga (Oʻzbekiston Respublikasi Oliy Majlisi palatalarining Axborotnomasi, 2021-yil, № 4, 288-modda; 2022-yil, № 3, 213-modda, № 8, 788-modda, № 10, 983-modda; 2023-yil, № 8, 629-modda, № 11, 923-modda; 2024-yil, № 2, 109-modda, № 9, 955-modda, № 10, 1075, 1076-moddalar; 2025-yil, № 4, 516-modda; 2026-yil, № 3, 256-modda) quyidagi qoʻshimcha va oʻzgartirishlar kiritilsin:

1) 6-modda :

quyidagi mazmundagi oltinchi xatboshi bilan toʻldirilsin:

“Oʻzbekiston Respublikasi Prezidenti Administratsiyasi Rahbarining farmoyishlari”;

oltinchi , yettinchi va sakkizinchi xatboshilari tegishincha yettinchi, sakkizinchi va toʻqqizinchi xatboshilar deb hisoblansin;

2) quyidagi mazmundagi 12 1 -modda bilan toʻldirilsin:

“ 12 1 -modda. Oʻzbekiston Respublikasi Prezidenti Administratsiyasi Rahbarining farmoyishlari

Oʻzbekiston Respublikasi Prezidenti Administratsiyasining Rahbari Oʻzbekiston Respublikasi Konstitutsiyasi va qonunlari, Oʻzbekiston Respublikasi Prezidentining farmonlari, qarorlari, farmoyishlari va topshiriqlari asosida hamda ularning ijrosini, Administratsiyaning faoliyatini samarali tashkil etish uchun Oʻzbekiston Respublikasining butun hududidagi barcha davlat organlari, korxonalar, muassasalar, tashkilotlar, mansabdor shaxslar tomonidan bajarilishi majburiy boʻlgan farmoyishlar qabul qiladi”;

3) 16-moddaning uchinchi qismi “Oʻzbekiston Respublikasi Prezidentining farmonlari, qarorlari va farmoyishlari” degan soʻzlardan keyin “Oʻzbekiston Respublikasi Prezidenti Administratsiyasi Rahbarining farmoyishlari” degan soʻzlar bilan toʻldirilsin;

4) 36-modda :

quyidagi mazmundagi oltinchi xatboshi bilan toʻldirilsin:

“Oʻzbekiston Respublikasi Prezidenti Administratsiyasi Rahbarining farmoyishlariga nisbatan — Oʻzbekiston Respublikasi Prezidenti Administratsiyasi Rahbari”;

oltinchi — toʻqqizinchi xatboshilari tegishincha yettinchi — oʻninchi xatboshilar deb hisoblansin.

6. Oʻzbekiston Respublikasining 2024-yil 25-oktabrda qabul qilingan “Oʻzbekiston Respublikasi Vazirlar Mahkamasi toʻgʻrisida”gi OʻRQ-982-sonli Qonunining (Oʻzbekiston Respublikasi Oliy Majlisi palatalarining Axborotnomasi, 2024-yil, № 10, 1081-modda; 2025-yil, № 12, 1327-modda; 2026-yil, № 4, 365-modda) 20-moddasiga quyidagi oʻzgartirishlar va qoʻshimcha kiritilsin:

yettinchi qism quyidagi tahrirda bayon etilsin:

“Respublika ijro etuvchi hokimiyat organlarining rahbarlari Oʻzbekiston Respublikasi Prezidenti tomonidan lavozimga tayinlanadi va lavozimidan ozod etiladi”;

quyidagi mazmundagi sakkizinchi qism bilan toʻldirilsin:

“Respublika ijro etuvchi hokimiyat organlari rahbarlarining oʻrinbosarlari Oʻzbekiston Respublikasi Prezidenti tomonidan belgilanadigan tartibda lavozimga tayinlanadi va lavozimidan ozod etiladi”;

sakkizinchi — oʻn uchinchi qismlar tegishincha toʻqqizinchi — oʻn toʻrtinchi qismlar deb hisoblansin.

32-modda. Ushbu Konstitutsiyaviy Qonunning ijrosini, yetkazilishini, mohiyati va ahamiyati tushuntirilishini taʼminlash

Oʻzbekiston Respublikasi Adliya vazirligi va boshqa manfaatdor tashkilotlar ushbu Konstitutsiyaviy Qonunning ijrosini, ijrochilarga yetkazilishini hamda mohiyati va ahamiyati aholi oʻrtasida tushuntirilishini taʼminlasin.

33-modda. Qonunchilikni ushbu Konstitutsiyaviy Qonunga muvofiqlashtirish

Oʻzbekiston Respublikasi Vazirlar Mahkamasi:

hukumat qarorlarini ushbu Konstitutsiyaviy Qonunga muvofiqlashtirsin;

respublika ijro etuvchi hokimiyat organlari ushbu Konstitutsiyaviy Qonunga zid boʻlgan oʻz normativ-huquqiy hujjatlarini qayta koʻrib chiqishlari va bekor qilishlarini taʼminlasin.

34-modda. Ushbu Konstitutsiyaviy Qonunning kuchga kirishi

Ushbu Konstitutsiyaviy Qonun rasmiy eʼlon qilingan kundan eʼtiboran kuchga kiradi.

Oʻzbekiston Respublikasining Prezidenti Sh. MIRZIYOYEV

Toshkent sh.,

2026-yil 14-avgust,

OʻRQ- 1166 -son

(Qonunchilik maʼlumotlari milliy bazasi, 14.08.2026-y., 03/26/1166/0842-son)

lex.uz