📅 2026-yil 18-avgust · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2026 йил 18 август · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 18 августа 2026 г. · Постановления Кабинета Министров
Официальный текст. Официальный документ. Редакционные примечания не включены.
📅 18 August 2026 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Тошкент шаҳрида Мактабгача таълимни ривожлантириш минтақавий марказини ташкил этиш тўғрисида
Мактабгача таълим соҳасида Ўзбекистоннинг эришган ютуқларини халқаро ҳамжамиятга етказиш, ушбу соҳада минтақавий ва халқаро ҳамкорлигини ривожлантириш, шунингдек, илғор тажрибалар ҳамда илм-фан ютуқларини амалиётга жорий этиш орқали мактабгача таълимнинг самарали тизимини яратиш мақсадида Вазирлар Маҳкамаси қарор қилади:
1. Куйидагилар:
ЮНЕСКО Бош конференциясининг 2025 йил 30 октябрь — 13 ноябрь кунлари Самарқанд шаҳрида ўтказилган 43-сессиясида Тошкент шаҳридаги Мактабгача таълим ташкилотлари директор ва мутахассисларини қайта тайёрлаш ва уларнинг малакасини ошириш институтига (кейинги ўринларда — Институт) ЮНЕСКО шафелигидаги II тоифали институт мақомини бериш бўйича қарор қабул қилингани;
2026 йил 25 март куни Париж шаҳрида Ўзбекистон Республикаси Ҳукумати ва ЮНЕСКО ўртасида Ўзбекистонда ЮНЕСКО шафелигидаги II тоифали мактабгача таълим марказини очиш тўғрисидаги битим имзолангани маълумот учун қабул қилинсин.
2. Институт ҳузурида юридик шахс мақомига эга бўлмаган Мактабгача таълимни ривожлантириш минтақавий маркази (кейинги ўринларда — Марказ) ташкил этилсин.
3. Қуйидагилар Марказнинг асосий вазифалари этиб белгилансин:
мактабгача таълим соҳасидаги минтақавий ва халқаро ҳамкорликни ривожлантириш;
ЮНЕСКОга аъзо мамлакатларнинг мактабгача таълим дастурлари ва усуллари билан боғлиқ қўшма тадқиқотлар ўтказиш;
болаларни эрта ривожлантиришга қаратилган таълим дастурларини ишлаб чиқиш ва жорий этишда иштирок этиш;
2030 йилгача мактабгача таълим соҳасидаги Тошкент декларацияси ижроси юзасидан мониторингни амалга ошириш ва даврий ҳисоботлар тайёрлаш;
мактабгача таълим соҳасида педагог кадрларни қайта тайёрлашда янги ёндашувларни жорий этиш бўйича таклифлар ишлаб чиқиш, шунингдек, халқаро тренинг, семинар ва конференцияларни ташкил этиш.
4. Белгилансинки:
Марказга Мактабгача ва мактаб таълими вазирлиги тизими ходимларининг белгиланган умумий штат бирликлари доирасида 16 та бошқарув штат бирликлари ажратилади;
Марказ фаолиятини мувофиқлаштириш учун Бошқарув кенгаши ташкил этилади;
Марказга Ўзбекистон Республикаси мактабгача ва мактаб таълими вазири томонидан тайинланадиган ва лавозимидан озод этиладиган директор раҳбарлик қилади;
Марказ директорига Институт проректори, Марказ ходимларига тегишлича Институт ходимлари учун белгиланган меҳнатга ҳақ тўлаш ва моддий рағбатлантириш шартлари татбиқ этилади.
5. Мазкур қарор ижроси билан боғлиқ харажатларни бюджет маблағлари ҳисобидан молиялаштириш 2026 йилда Ўзбекистон Республикасининг республика бюджетидан биринчи даражали бюджет маблағларини тақсимловчи сифатида Мактабгача ва мактаб таълими вазирлигига ажратиладиган маблағлар доирасида амалга оширилади, 2027 йилдан бошлаб эса Давлат бюджети параметрларида назарда тутилади.
6. Марказ Тошкент шаҳри Яккасарой тумани, Юсуф Хос Ҳожиб кўчаси 64-уй манзилида жойлашган Институт биносига текин фойдаланиш ҳуқуқи асосида жойлаштирилсин.
7. Мактабгача ва мактаб таълими вазирлиги:
бир ой муддатда Марказнинг тузилмаси ва низомини тасдиқласин;
икки ой муддатда манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни ушбу қарорга мувофиқлаштирсин.
8. Ушбу қарорнинг бажарилишини назорат қилиш Ўзбекистон Республикаси мактабгача ва мактаб таълими вазири Э.Г. Каримова зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2026 йил 18 август,
446 -сон
Oʻzbekiston Respublikasi Vazirlar Mahkamasining
qarori
Toshkent shahrida Maktabgacha taʼlimni rivojlantirish mintaqaviy markazini tashkil etish toʻgʻrisida
Maktabgacha taʼlim sohasida Oʻzbekistonning erishgan yutuqlarini xalqaro hamjamiyatga yetkazish, ushbu sohada mintaqaviy va xalqaro hamkorligini rivojlantirish, shuningdek, ilgʻor tajribalar hamda ilm-fan yutuqlarini amaliyotga joriy etish orqali maktabgacha taʼlimning samarali tizimini yaratish maqsadida Vazirlar Mahkamasi qaror qiladi:
1. Kuyidagilar:
YUNESKO Bosh konferensiyasining 2025-yil 30-oktabr — 13-noyabr kunlari Samarqand shahrida oʻtkazilgan 43-sessiyasida Toshkent shahridagi Maktabgacha taʼlim tashkilotlari direktor va mutaxassislarini qayta tayyorlash va ularning malakasini oshirish institutiga (keyingi oʻrinlarda — Institut) YUNESKO shafeligidagi II toifali institut maqomini berish boʻyicha qaror qabul qilingani;
2026-yil 25-mart kuni Parij shahrida Oʻzbekiston Respublikasi Hukumati va YUNESKO oʻrtasida Oʻzbekistonda YUNESKO shafeligidagi II toifali maktabgacha taʼlim markazini ochish toʻgʻrisidagi bitim imzolangani maʼlumot uchun qabul qilinsin.
2. Institut huzurida yuridik shaxs maqomiga ega boʻlmagan Maktabgacha taʼlimni rivojlantirish mintaqaviy markazi (keyingi oʻrinlarda — Markaz) tashkil etilsin.
3. Quyidagilar Markazning asosiy vazifalari etib belgilansin:
maktabgacha taʼlim sohasidagi mintaqaviy va xalqaro hamkorlikni rivojlantirish;
YUNESKOga aʼzo mamlakatlarning maktabgacha taʼlim dasturlari va usullari bilan bogʻliq qoʻshma tadqiqotlar oʻtkazish;
bolalarni erta rivojlantirishga qaratilgan taʼlim dasturlarini ishlab chiqish va joriy etishda ishtirok etish;
2030-yilgacha maktabgacha taʼlim sohasidagi Toshkent deklaratsiyasi ijrosi yuzasidan monitoringni amalga oshirish va davriy hisobotlar tayyorlash;
maktabgacha taʼlim sohasida pedagog kadrlarni qayta tayyorlashda yangi yondashuvlarni joriy etish boʻyicha takliflar ishlab chiqish, shuningdek, xalqaro trening, seminar va konferensiyalarni tashkil etish.
4. Belgilansinki:
Markazga Maktabgacha va maktab taʼlimi vazirligi tizimi xodimlarining belgilangan umumiy shtat birliklari doirasida 16 ta boshqaruv shtat birliklari ajratiladi;
Markaz faoliyatini muvofiqlashtirish uchun Boshqaruv kengashi tashkil etiladi;
Markazga Oʻzbekiston Respublikasi maktabgacha va maktab taʼlimi vaziri tomonidan tayinlanadigan va lavozimidan ozod etiladigan direktor rahbarlik qiladi;
Markaz direktoriga Institut prorektori, Markaz xodimlariga tegishlicha Institut xodimlari uchun belgilangan mehnatga haq toʻlash va moddiy ragʻbatlantirish shartlari tatbiq etiladi.
5. Mazkur qaror ijrosi bilan bogʻliq xarajatlarni budjet mablagʻlari hisobidan moliyalashtirish 2026-yilda Oʻzbekiston Respublikasining respublika budjetidan birinchi darajali budjet mablagʻlarini taqsimlovchi sifatida Maktabgacha va maktab taʼlimi vazirligiga ajratiladigan mablagʻlar doirasida amalga oshiriladi, 2027-yildan boshlab esa Davlat budjeti parametrlarida nazarda tutiladi.
6. Markaz Toshkent shahri Yakkasaroy tumani, Yusuf Xos Hojib koʻchasi 64-uy manzilida joylashgan Institut binosiga tekin foydalanish huquqi asosida joylashtirilsin.
7. Maktabgacha va maktab taʼlimi vazirligi:
bir oy muddatda Markazning tuzilmasi va nizomini tasdiqlasin;
ikki oy muddatda manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni ushbu qarorga muvofiqlashtirsin.
8. Ushbu qarorning bajarilishini nazorat qilish Oʻzbekiston Respublikasi maktabgacha va maktab taʼlimi vaziri E.G. Karimova zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2026-yil 18-avgust,
446 -son