📅 2026-yil 22-avgust · Prezident farmonlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2026 йил 22 август · Президент фармонлари
Расмий матн. Расмий ҳужжат. Таҳририй изоҳлар киритилмаган.
📅 22 августа 2026 г. · Указы Президента
Официальный текст. Официальный документ. Редакционные примечания не включены.
📅 22 August 2026 · Presidential decrees
Official text. Official document. Editorial notes are not included.
ЎЗБЕКИСТОН РЕСПУБЛИКАСИ ПРЕЗИДЕНТИНИНГ
ФАРМОНИ
«Ўзбекистон Республикаси мустақиллигининг 35 йиллиги» эсдалик нишони билан тақдирлаш тўғрисида
Ўзбекистон Республикаси мустақиллигининг ўттиз беш йиллик байрами халқимизнинг фидокорона меҳнати, улкан иродаси ва бунёдкорлик салоҳияти билан истиқлол даврида босиб ўтган ғоят мураккаб ва шарафли миллий тараққиёт йўлимизнинг ёрқин кўзгусидир. Айни вақтда ушбу сана сўнгги ўн йилда Янги Ўзбекистонни барпо этиш жараёнида эришаётган том маънодаги тарихий ютуқларимизни ҳар томонлама таҳлил қилиб, келгуси режаларимизни янада аниқ белгилаб олишда муҳим ўрин тутадиган, эл-юртимизни янги марралар сари илҳомлантирадиган буюк сиёсий-ижтимоий аҳамиятга молик воқеадир.
Бугунги кунда мамлакатимизни ҳар томонлама ривожлантириш, инсон қадрини улуғлаш, халқимиз фаровонлигини ошириш борасидаги туб ислоҳотлар жараёнида меҳнаткаш, мард ва олижаноб юртдошларимиз ўзининг куч-ғайрати, истеъдод ва маҳорати, билим ва тажрибаси ҳамда эзгу ташаббуслари билан фаол иштирок этмоқда. Уларнинг эл-юрт олдидаги муносиб хизматларини, ибратли фазилатларини юксак қадрлаш ва рағбатлантириш кўпмиллатли жамиятимиз аъзолари, айниқса, ёш авлод қалбига Ватанга муҳаббат ва садоқат, миллий ва умумбашарий қадриятларга ҳурмат туйғуларини сингдиришда, ҳеч шубҳасиз, беқиёс ўрин тутади.
Мамлакатимизнинг иқтисодий қудратини ошириш, тадбиркорлик ва хусусий секторни ривожлантириш, янги иш ўринларини яратиш, аҳоли фаровонлигини, давлат ва жамият ҳаётининг барча соҳаларида ислоҳотлар самарасини таъминлашда жонбозлик кўрсатиб келаётган, ёш авлодни ватанпарварлик руҳида тарбиялаш, юртимизда тинчлик-осойишталик, миллатлараро тотувлик ва бағрикенглик муҳитини мустаҳкамлаш, Янги Ўзбекистоннинг халқаро миқёсдаги обрў-эътиборини юксалтиришга муносиб ҳисса қўшаётган ватандошларимизни «Ўзбекистон Республикаси мустақиллигининг 35 йиллиги» эсдалик нишони билан тақдирлаш мақсадида:
1. Ўзбекистон Республикаси Вазирлар Маҳкамаси «Ўзбекистон Республикаси мустақиллигининг 35 йиллиги» эсдалик нишони билан тақдирлаш бўйича давлат органлари ва ташкилотлари, жамоат бирлашмалари ва бошқа марказий идоралар ҳамда Қорақалпоғистон Республикаси Жўқорғи Кенгеси, вилоятлар ва Тошкент шаҳар ҳокимликлари томонидан тақдим этилган рўйхатларни белгиланган тартибда кўриб чиқсин ва тасдиқласин.
2. Ўзбекистон Республикаси Олий Мажлиси Сенатининг Раиси, Ўзбекистон Республикаси Олий Мажлиси Қонунчилик палатасининг Спикери, Ўзбекистон Республикаси Бош вазири, вазирлик ва идоралар, жамоат бирлашмаларининг республика органлари раҳбарлари, Қорақалпоғистон Республикаси Жўқорғи Кенгеси Раиси, вилоятлар ва Тошкент шаҳар ҳокимлари ҳамда бошқа мутасадди раҳбарлар «Ўзбекистон Республикаси мустақиллигининг 35 йиллиги» эсдалик нишонларини Мустақиллик байрами муносабати билан ўтказиладиган тадбирларда Ўзбекистон Республикаси Президенти номидан тантанали вазиятда топширишни таъминласин.
3. Ўзбекистон Миллий телерадиокомпанияси, Ўзбекистон Миллий ахборот агентлиги ва бошқа оммавий ахборот воситаларига «Ўзбекистон Республикаси мустақиллигининг 35 йиллиги» эсдалик нишонларини топширишга бағишланган тадбирларни кенг ёритиш тавсия этилсин.
4. Мазкур Фармоннинг ижросини назорат қилиш Ўзбекистон Республикаси Бош вазири А.Н. Арипов ва Ўзбекистон Республикаси Президенти Администрацияси Раҳбари С.Ш. Мирзиёева зиммасига юклансин.
Ўзбекистон Республикаси Президенти Ш. МИРЗИЁЕВ
Тошкент ш.,
2026 йил 22 август,
ПФ- 168 -сон
OʻZBEKISTON RESPUBLIKASI PREZIDENTINING
FARMONI
“Oʻzbekiston Respublikasi mustaqilligining 35 yilligi” esdalik nishoni bilan taqdirlash toʻgʻrisida
Oʻzbekiston Respublikasi mustaqilligining oʻttiz besh yillik bayrami xalqimizning fidokorona mehnati, ulkan irodasi va bunyodkorlik salohiyati bilan istiqlol davrida bosib oʻtgan gʻoyat murakkab va sharafli milliy taraqqiyot yoʻlimizning yorqin koʻzgusidir. Ayni vaqtda ushbu sana soʻnggi oʻn yilda Yangi Oʻzbekistonni barpo etish jarayonida erishayotgan tom maʼnodagi tarixiy yutuqlarimizni har tomonlama tahlil qilib, kelgusi rejalarimizni yanada aniq belgilab olishda muhim oʻrin tutadigan, el-yurtimizni yangi marralar sari ilhomlantiradigan buyuk siyosiy-ijtimoiy ahamiyatga molik voqeadir.
Bugungi kunda mamlakatimizni har tomonlama rivojlantirish, inson qadrini ulugʻlash, xalqimiz farovonligini oshirish borasidagi tub islohotlar jarayonida mehnatkash, mard va olijanob yurtdoshlarimiz oʻzining kuch-gʻayrati, isteʼdod va mahorati, bilim va tajribasi hamda ezgu tashabbuslari bilan faol ishtirok etmoqda. Ularning el-yurt oldidagi munosib xizmatlarini, ibratli fazilatlarini yuksak qadrlash va ragʻbatlantirish koʻpmillatli jamiyatimiz aʼzolari, ayniqsa, yosh avlod qalbiga Vatanga muhabbat va sadoqat, milliy va umumbashariy qadriyatlarga hurmat tuygʻularini singdirishda, hech shubhasiz, beqiyos oʻrin tutadi.
Mamlakatimizning iqtisodiy qudratini oshirish, tadbirkorlik va xususiy sektorni rivojlantirish, yangi ish oʻrinlarini yaratish, aholi farovonligini, davlat va jamiyat hayotining barcha sohalarida islohotlar samarasini taʼminlashda jonbozlik koʻrsatib kelayotgan, yosh avlodni vatanparvarlik ruhida tarbiyalash, yurtimizda tinchlik-osoyishtalik, millatlararo totuvlik va bagʻrikenglik muhitini mustahkamlash, Yangi Oʻzbekistonning xalqaro miqyosdagi obroʻ-eʼtiborini yuksaltirishga munosib hissa qoʻshayotgan vatandoshlarimizni “Oʻzbekiston Respublikasi mustaqilligining 35 yilligi” esdalik nishoni bilan taqdirlash maqsadida:
1. Oʻzbekiston Respublikasi Vazirlar Mahkamasi “Oʻzbekiston Respublikasi mustaqilligining 35 yilligi” esdalik nishoni bilan taqdirlash boʻyicha davlat organlari va tashkilotlari, jamoat birlashmalari va boshqa markaziy idoralar hamda Qoraqalpogʻiston Respublikasi Joʻqorgʻi Kengesi, viloyatlar va Toshkent shahar hokimliklari tomonidan taqdim etilgan roʻyxatlarni belgilangan tartibda koʻrib chiqsin va tasdiqlasin.
2. Oʻzbekiston Respublikasi Oliy Majlisi Senatining Raisi, Oʻzbekiston Respublikasi Oliy Majlisi Qonunchilik palatasining Spikeri, Oʻzbekiston Respublikasi Bosh vaziri, vazirlik va idoralar, jamoat birlashmalarining respublika organlari rahbarlari, Qoraqalpogʻiston Respublikasi Joʻqorgʻi Kengesi Raisi, viloyatlar va Toshkent shahar hokimlari hamda boshqa mutasaddi rahbarlar “Oʻzbekiston Respublikasi mustaqilligining 35 yilligi” esdalik nishonlarini Mustaqillik bayrami munosabati bilan oʻtkaziladigan tadbirlarda Oʻzbekiston Respublikasi Prezidenti nomidan tantanali vaziyatda topshirishni taʼminlasin.
3. Oʻzbekiston Milliy teleradiokompaniyasi, Oʻzbekiston Milliy axborot agentligi va boshqa ommaviy axborot vositalariga “Oʻzbekiston Respublikasi mustaqilligining 35 yilligi” esdalik nishonlarini topshirishga bagʻishlangan tadbirlarni keng yoritish tavsiya etilsin.
4. Mazkur Farmonning ijrosini nazorat qilish Oʻzbekiston Respublikasi Bosh vaziri A.N. Aripov va Oʻzbekiston Respublikasi Prezidenti Administratsiyasi Rahbari S.Sh. Mirziyoyeva zimmasiga yuklansin.
Oʻzbekiston Respublikasi Prezidenti Sh. MIRZIYOYEV
Toshkent sh.,
2026-yil 22-avgust,
PF- 168 -son