UzbekAI

Ўзбекистон Республикаси Вазирлар Маҳкамасининг

қарори

НИЗОМ

РЎЙХАТИ

Ўзбекистон Республикаси Вазирлар Маҳкамаси ҳузуридаги Ўзбекистон аккредитация маркази тўғрисидаги низомни тасдиқлаш ҳақида

Ўзбекистон Республикаси Президентининг «Техник жиҳатдан тартибга солиш соҳасидаги ислоҳотларни илғор халқаро амалиёт асосида жадаллаштириш чора-тадбирлари тўғрисида» 2026 йил 16 февралдаги ПФ-25-сон Фармони ижросини таъминлаш мақсадида Вазирлар Маҳкамаси қарор қилади:

1. Ўзбекистон Республикаси Президентининг 2026 йил 16 февралдаги ПФ-25-сон Фармонига асосан Ўзбекистон техник жиҳатдан тартибга солиш агентлиги тизимидаги Ўзбекистон аккредитация маркази, амалдаги фаолият йўналиши, штат бирликлари, мол-мулки ҳамда молиялаштириш тартиби ва манбалари сақлаб қолинган ҳолда, Вазирлар Маҳкамаси бўйсунувига ўтказилгани маълумот учун қабул қилинсин.

2. Қуйидагиларни назарда тутувчи Ўзбекистон Республикаси Вазирлар Маҳкамаси ҳузуридаги «Ўзбекистон аккредитация маркази» давлат муассасаси (кейинги ўринларда — Аккредитация маркази) тўғрисидаги низом 1-иловага мувофиқ тасдиқлансин:

Аккредитация марказининг асосий вазифалари ҳамда функциялари;

Аккредитация марказининг ҳуқуқлари ва жавобгарлиги;

Аккредитация марказини молиялаштириш ва моддий-техник таъминлаш, унинг ходимларининг меҳнатига ҳақ тўлаш ҳамда уларни моддий рағбатлантириш тартиби.

3. Ўзбекистон Республикаси Ҳукуматининг 2-иловага мувофиқ айрим қарорлари ўз кучини йўқотган деб ҳисоблансин.

4. Ушбу қарорнинг бажарилишини назорат қилиш Ўзбекистон Республикаси Бош вазирининг ўринбосари Ж.А. Ходжаев зиммасига юклансин.

Вазирлар Маҳкамасининг 2026 йил 4 сентябрдаги 460-сон қарорига 1-ИЛОВА

Вазирлар Маҳкамаси ҳузуридаги Ўзбекистон аккредитация маркази давлат муассасаси тўғрисида

1-боб. Умумий қоидалар

1. Мазкур Низом Ўзбекистон Республикаси Вазирлар Маҳкамаси ҳузуридаги «Ўзбекистон аккредитация маркази» давлат муассасасининг (кейинги ўринларда — Аккредитация маркази) мақоми, асосий вазифалари ва функциялари, шунингдек, фаолиятини ташкил этиш тартибини белгилайди.

2. Аккредитация маркази ўз фаолиятида Ўзбекистон Республикаси Конституцияси ва қонунларига, Ўзбекистон Республикаси Олий Мажлиси палаталари қарорларига, Ўзбекистон Республикаси Президенти фармонлари, қарорлари ва фармойишлари ҳамда Вазирлар Маҳкамасининг қарорларига ва фармойишларига, шунингдек, ушбу Низомга амал қилади.

3. Аккредитация маркази мувофиқликни баҳолаш органларини аккредитациядан ўтказадиган Аккредитация органи ҳисобланиб, Вазирлар Маҳкамаси Аккредитация маркази муассиси (кейинги ўринларда — Муассис) ҳисобланади.

4. Аккредитация маркази мустақил балансга, Иқтисодиёт ва молия вазирлиги ҳузуридаги Ғазначилик хизмати қўмитасида шахсий ғазна ҳисобварақларига, шунингдек, банкларда миллий ва хорижий валютада ҳисобварақларига, Ўзбекистон Республикасининг Давлат герби тасвири туширилган ва ўз номи ёзилган муҳрлар, штамплар ва қонунчилик ҳужжатларига мувофиқ фаолиятини амалга ошириш учун зарур бўлган бошқа реквизитларга эга бўлади.

5. Аккредитация маркази белгиланган тартибда ўз номидан мулкий ва шахсий номулкий ҳуқуқларни олиши ва амалга ошириши, шунингдек, мажбуриятлар олиши, судда даъвогар ва жавобгар бўлиши мумкин.

6. Аккредитация маркази юридик шахс сифатида алоҳида мулкка, мустақил балансга эга бўлади, ўзига бириктирилган мулкка нисбатан қонунчилик ҳужжатларида белгиланган доирада ўз фаолияти мақсадларига, Муассис топшириқларига ва мулкнинг мақсадига мувофиқ эгалик қилиш, фойдаланиш ва тасарруф этиш ҳуқуқини амалга оширади.

7. Аккредитация марказининг расмий номи:

а) давлат тилида:

тўлиқ номи — Ўзбекистон Республикаси Вазирлар Маҳкамаси ҳузуридаги «Ўзбекистон аккредитация маркази» давлат муассасаси;

қисқартирилган номи — «Ўзбекистон аккредитация маркази» ДМ (аббревиатураси «ЎЗАКК»);

б) рус тилида:

тўлиқ номи — Государственное учреждение Узбекский центр аккредитации при Кабинете Министров Республики Узбекистан;

қисқартирилган номи — ГУ «Узбекский центр аккредитации»;

(аббревиатура «УЗАКК»).

в) инглиз тилида:

тўлиқ номи — «Uzbek center for Accreditation» State Institution under the Cabinet of Ministers of the Republic of Uzbekistan;

қисқартирилган номи — «Uzbek Center for Accreditation» SI (аббревиатура «UzAKK»);

8. Аккредитация марказининг жойлашган жойи (почта манзили): 100169, Ўзбекистон Республикаси, Тошкент шаҳри, Шайхонтоҳур тумани, Зафаробод кўчаси, 7а-уй.

2-боб. Аккредитация марказининг асосий вазифалари ва функциялари

9. Қуйидагилар Аккредитация марказининг асосий вазифалари ҳисобланади:

мувофиқликни баҳолаш органларини аккредитациядан ўтказиш соҳасида ягона давлат сиёсатини амалга ошириш;

мувофиқликни баҳолаш органларини халқаро стандартларга кўра аккредитациядан ўтказиш, шунингдек, мувофиқликни баҳолаш бўйича аккредитациядан ўтказилган субъектларнинг белгиланган шартлар ва талабларни бажаришини даврий баҳолаш;

халқаро ва миллий аккредитация органлари билан фаол ҳамкорлик қилиш, ушбу соҳада халқаро стандартлар ва техник регламентларни жорий этиш;

мувофиқликни баҳолаш органларини аккредитациядан ўтказиш соҳасида миллий ва халқаро илмий-тадқиқот, таълим ва бошқа муассасалар томонидан амалга оширилаётган давлат илмий-техник дастурлар ва лойиҳаларининг ягона буюртмачиси вазифаларини бажариш.

10. Аккредитация маркази ўзига юкланган вазифаларга мувофиқ қуйидаги функцияларни бажаради:

а) Мувофиқликни баҳолаш органларини аккредитациядан ўтказиш соҳасида ягона давлат сиёсатини амалга ошириш соҳасида:

миллий аккредитация тизимини ривожлантиришга оид таклифларни Ўзбекистон Республикаси Вазирлар Маҳкамасига киритади;

ISO/IEC 17011 халқаро стандарти талаблари асосида фаолият юритади ва унинг талабларига риоя қилади;

халқаро стандартларга, шунингдек, аккредитация бўйича халқаро ташкилотлар талаблари ва тавсияларига мувофиқ аккредитация тартиботлари бўйича қоидалар, тартиб-таомиллар, йўриқномалар ва низомларни ишлаб чиқади ва тасдиқлайди;

аккредитация соҳасидаги давлат дастурларининг, шунингдек, соҳада ислоҳотларнинг амалга оширилишини тизимли таҳлил қилади, ўтган давр билан қиёсий ўрганади ва истиқболни белгилайди;

аккредитация соҳасининг ривожланиш тенденциялари бўйича чора-тадбирларни ишлаб чиқади;

б) мувофиқликни баҳолаш органларини халқаро стандартларга кўра аккредитациядан ўтказиш, шунингдек, мувофиқликни баҳолаш бўйича аккредитациядан ўтказилган субъектларнинг белгиланган шартлар ва талабларни бажаришини даврий баҳолаш соҳасида:

мувофиқликни баҳолаш органларининг ваколатлилигига оид талабларни ва мезонларни белгиловчи стандартларни қабул қилиш юзасидан таклифларни миллий стандартлаштириш органига киритади;

аккредитацияни, такрорий аккредитациядан ўтказади ҳамда ариза берувчини ваколатлилигига оид белгиланган талабларга ва мезонларга мувофиқ бўлган тақдирда, аккредитациядан ўтказиш тўғрисида қарор қабул қилади;

аккредитация тўғрисидаги гувоҳномаларни расмийлаштиради, уларга ўзгартишлар ва (ёки) қўшимчалар киритади;

даврий баҳолаш ишларини амалга оширади;

аккредитация тўғрисидаги гувоҳноманинг шаклини, шунингдек, аккредитация белгисининг шаклини ва уни қўллаш тартибини белгилайди;

аккредитация тўғрисидаги гувоҳноманинг амал қилишини тўхтатиб туради, қайта тиклайди ёки тугатади;

гувоҳлик баҳолаш, мувофиқликни баҳолаш ишлари якунлангандан кейин уларнинг натижадорлигини ўрганиш ҳамда огоҳлантиришсиз ташриф орқали белгиланган шартлар ва талаблар бажарилишини баҳолаб боради;

аккредитациядан ўтказилган субъектлар билан аккредитациядан кейинги шартномалар тузади;

аккредитация белгисидан фойдаланишни мониторинг қилади;

в) халқаро ва миллий аккредитация органлари билан фаол ҳамкорлик қилиш, ушбу соҳада халқаро стандартлар ва техник регламентларни жорий этиш соҳасида:

аккредитация миллий тизимини халқаро нормалар ва мезонларга мувофиқ доимий равишда ривожлантириш ва қўллаб-қувватлаш мақсадида ўз фаолиятига халқаро стандартларни жорий этади;

Ўзбекистон Республикасининг халқаро шартномалари асосида аккредитация ишлари натижаларининг хорижий мамлакатлар томонидан эътироф этилишини таъминлаш юзасидан зарур чораларни кўради;

аккредитация соҳасида идоралараро хусусиятга эга, шу жумладан, хорижда аккредитация ишлари натижалари эътироф этилишини таъминлашга қаратилган халқаро шартномаларни белгиланган тартибда тузади;

аккредитация соҳасида ўз ваколатлари доирасида халқаро шартномалар, шу жумладан, хорижий миллий аккредитация органлари билан ҳамкорлик қилиш юзасидан шартномалар, меморандумлар тузади;

халқаро аккредитация ташкилотлари, шу жумладан, хорижий аккредитация органлари томонидан ташкил этилган йиғилиш, семинар, конференция, симпозиумларда ва бошқа тадбирларда фаол иштирок этади;

г) мувофиқликни баҳолаш органларини аккредитациядан ўтказиш соҳасида миллий ва халқаро илмий-тадқиқот, таълим ва бошқа муассасалар томонидан амалга оширилаётган давлат илмий-техник дастурлари ва лойиҳаларининг ягона буюртмачиси вазифаларини бажариш соҳасида:

аккредитация соҳасида кадрлар малакасини ошириш, уларни қайта тайёрлашни, уларнинг тажриба орттиришини, шу жумладан, чет элда малака оширишини таъминлайди;

аккредитациядан ўтказилган субъектлар ходимларини мунтазам қайта тайёрлаш ва уларнинг малакасини ошириш юзасидан кўрсатмалар беради;

аккредитация бўйича баҳоловчилар ва техник экспертларни фуқаролик-ҳуқуқий шартнома асосида жалб қилади, уларнинг малакасини баҳолайди ҳамда уларнинг рўйхатини юритади;

тренинглар, семинарлар, конференция, симпозиумлар ва бошқа тадбирларни ўтказади ҳамда баҳоловчилар, техник экспертлар, шунингдек, мувофиқликни баҳолаш соҳасида иштирок этувчи мутахассислар малакасини баҳолайди.

11. Аккредитация маркази ўзига юкланган вазифалар доирасида бошқа функцияларни ҳам бажариши мумкин.

3-боб. Аккредитация марказининг ҳуқуқлари ва жавобгарлиги

12. Аккредитация маркази ўзига юкланган вазифа ва функцияларни бажариш учун қуйидаги ҳуқуқларга эга:

норматив-ҳуқуқий ҳужжатлар лойиҳаларини ишлаб чиқиш ва белгиланган тартибда Вазирлар Маҳкамасига киритиш;

ўз ваколати доирасига кирадиган масалаларда республика ижро этувчи ҳокимият органлари ва хўжалик бирлашмалари, маҳаллий ижро этувчи ҳокимият органлари фаолиятини белгиланган тартибда мувофиқлаштириш;

ўз ваколати доирасига кирадиган масалаларни ҳал қилиш учун зарур ахборотни республика ижро этувчи ҳокимият органлари ва хўжалик бирлашмалари, маҳаллий ижро этувчи ҳокимият органларидан белгиланган тартибда сўраб олиш;

ўз ваколати доирасига кирадиган масалалар бўйича зарур статистика ахборотини статистика органларидан бепул олиш;

Аккредитация маркази ходимларини улар томонидан тегишли соҳада ўз фаолиятининг асосий кўрсаткичлари параметрлари бажарилишини ҳисобга олган ҳолда моддий рағбатлантириш тартиби, миқдорлари ва шартларини белгилаш;

ўз ваколати доирасига кирадиган масалалар бўйича таклифларни кўриб чиқиш учун Вазирлар Маҳкамасига, республика ва маҳаллий ижро этувчи ҳокимият органларига киритиш;

ўз ваколати доирасига кирадиган масалалар бўйича қонунчиликда белгиланган тартибда халқаро шартномаларни тузиш;

Аккредитация маркази ваколатига кирувчи масалалар бўйича халқаро даражада Ўзбекистон Республикаси манфаатларини белгиланган тартибда ифодалаш;

аккредитация соҳасидаги тадбирлар ўтказилишини белгиланган тартибда ташкил этиш;

зарур техник ускуна, инвентарь ва бошқа зарур жиҳозларни белгиланган тартибда харид қилиш;

пулли хизматлар кўрсатиш тартибини, уларнинг нархларини ишлаб чиқиш ва белгиланган тартибда тасдиқлаш. Бунда қўлланадиган янги нархларни (тарифларни) жорий нархлар (тарифлар) ўзгартирилишидан камида ўн беш кун олдин эълон қилади ва кейинги чорак давомида нархлар ўзгартирилганда, нархлар ўзгариши тўғрисида Рақобатни ривожлантириш ва истеъмолчилар ҳуқуқларини ҳимоя қилиш қўмитасини ўн кун олдин хабардор қилади;

аккредитация соҳасидаги халқаро ва республика тадбирларини ўтказишда ғолиб ва совриндорларни, номинантларни мукофотлаш учун зарур миқдорда дипломлар ва совринларни белгиланган тартибда харид қилиш;

аккредитация соҳаси вакилларини кўкрак нишонлари, дипломлар, ёрлиқлар ва совринлар билан мукофотлаш;

ўз ваколати доирасида конференциялар, семинарлар, симпозиумлар, кўргазмалар, ярмаркалар ва бошқа тадбирларни ўтказиш, шунингдек, бошқа ташкилотлар томонидан ўтказиладиган шу каби тадбирларда иштирок этиш;

аккредитация соҳасини ривожлантиришга қаратилган тадбирларни биргаликда ишлаб чиқиш мақсадида халқаро, хорижий ва республика ташкилотлари билан белгиланган тартибда алоқаларни йўлга қўйиш;

алоҳида фидокорлик, меҳнатсеварликни намоён қилган, ўзининг профессионал фаолиятида юксак натижаларга эришган аккредитация соҳасидаги намояндалар ва ходимларнинг номзодларини белгиланган тартибда давлат мукофотларига тақдим этиш юзасидан таклифлар киритиш;

аккредитациядан ўтказилган ташкилотлар ва уларнинг аккредитация соҳаси тўғрисидаги маълумотлар базасининг шакллантирилиши ҳамда долзарб ҳолатда сақланишини, шунингдек, тегишли ахборотнинг махфийлигига риоя қилган ҳолда жамоатчиликнинг улардан фойдаланишини таъминлаш;

миллий аккредитация тизимининг реестрини шакллантириш ва юритиш тартибини белгилаш;

Аккредитация маркази ўз расмий веб-сайтида ўзининг номи, фаолият тури, функция ва ваколатлари ҳамда раҳбарлари тўғрисидаги маълумотларни жойлаштириш ва уларнинг доимий равишда янгилаб борилишини таъминлаш;

очиқ маълумотлар порталида фойдаланувчилар учун қулай форматларда кўриш имкониятини яратган ҳолда муассасанинг юқори турувчи ташкилоти, кўчмас мулк объектлари, қурилиши тугалланмаган объектлари ва автотранспорт воситалари, режалаштирилган ва амалга оширилган харажатлар таркиби ҳақидаги ва бошқа маълумотларни (тижорат сири мавжуд ёки чекланган ҳолда тарқатиладиган маълумотлар бундан мустасно) эълон қилиб бориш;

энг яхши амалиётларга мувофиқ мустақил маслаҳатчилар ва экспертларни, шу жумладан, хорижий маслаҳатчилар ва экспертларни шартнома асосида жалб қилиш;

ўзига юкланган вазифаларни бажаришда республика ижро этувчи ҳокимият органлари ва хўжалик бирлашмалари, маҳаллий ижро этувчи ҳокимият органлари , давлат ва нодавлат ташкилотлар, лойиҳа институтлари, инжиниринг ва консалтинг компаниялар, илмий-таълим муассасалар, шунингдек, халқаро ташкилотлар, чет эл ва маҳаллий компаниялар билан ҳамкорлик қилиш.

Аккредитация марказига қонунчилик ҳужжатларига мувофиқ бошқа ҳуқуқларга ҳам эга бўлиши мумкин.

13. Аккредитация маркази:

унга юкланган вазифалар ва функцияларнинг самарали бажарилиши;

ўз фаолияти билан боғлиқ прогноз кўрсаткичларга сўзсиз эришилиши;

Вазирлар Маҳкамасига киритиладиган норматив-ҳуқуқий ҳужжатлар ва бошқа ҳужжатларнинг лойиҳаларини ўз муддатларида ва сифатли тайёрлаши;

аккредитация соҳасини ривожлантириш, муаммоли масалаларни ҳал қилиш бўйича дастурлар, тадбирлар режалари, «йўл хариталари» ва бошқа дастурий ҳужжатлар самарали амалга оширилиши учун жавоб беради.

4-боб. Аккредитация маркази директорининг ҳуқуқ ва мажбуриятлари

14. Аккредитация маркази директори қуйидаги ҳуқуқларга эга:

Аккредитация маркази фаолиятига умумий раҳбарлик қилади ҳамда Аккредитация марказига юкланган вазифа ва функцияларнинг бажарилиши учун шахсан жавоб беради;

Аккредитация маркази тузилмасини, ходимларининг штат жадвали ва иш ҳақи миқдорини тасдиқлайди;

юқори малакали хорижий ва маҳаллий мутахассисларни ишга қабул қилади ҳамда уларга қонунчилик ҳужжатларига мувофиқ иш ҳақи ва бошқа тўловлар миқдорини белгилайди;

Ўзбекистон Республикасидаги ва ундан ташқаридаги барча ташкилотларда Аккредитация маркази манфаатларини ифодалайди, Аккредитация маркази номидан шартномаларни тузади, ўзгартиради ва бекор қилади;

Аккредитация марказининг таркибий бўлинмалари тўғрисидаги низомларни, Аккредитация маркази ходимларининг лавозим мажбуриятларини тасдиқлайди;

ойлик қўшимча ҳақлар, рағбатлантириш, конпенсация тўловлари, шу жумладан, юқори малака, профессионализм ва иш сифати учун ойлик ва чораклик қўшимча ҳақлар ва мукофот пулларини белгилайди;

қонунчилик ҳужжатларига мувофиқ ходимлар билан меҳнат шартномаларини тузади, ўзгартиради ва бекор қилади.

ўз ваколати доирасида Аккредитация маркази ходимлари бажариши шарт бўлган буйруқ ва фармойишлар чиқаради, кўрсатмалар беради;

Аккредитация маркази номидан иш юритиш учун белгиланган тартибда ишончномалар беради;

Аккредитация маркази директори қонунчилик ҳужжатларида назарда тутилган бошқа ҳуқуқларга ҳам эга бўлиши мумкин.

15. Аккредитация маркази директорининг мажбуриятлари:

Ўзбекистон Республикаси Конституцияси ва қонунлари, шунингдек, бошқа норматив-ҳуқуқий ҳужжатлар талабларига риоя қилиши;

Ўзбекистон Республикаси Президентининг тегишли ҳужжатлари, Вазирлар Маҳкамасининг қарорлари ва бошқа қонунчилик ҳужжатлари билан Аккредитация марказига юкланган вазифа ва функциялар бажарилишини ташкил этиши;

Аккредитация маркази олдига қўйилган вазифаларнинг бажарилишини ташкил этиши ва назорат қилиши;

давлат сирига оид маълумотлар ва махфий ахборот билан ишлашда қонунчилик ҳужжатлари талабларига риоя қилиши;

ўз фаолияти билан боғлиқ прогноз кўрсаткичлар, даврий иш режалари ва фаолияти самарадорлигини баҳолаш кўрсаткичлари ҳамда мезонларига сўзсиз эришилишини таъминлаши;

фаолиятни ривожлантириш бўйича дастурлар, чора-тадбирлар режаси, «йўл хариталари» ва бошқа дастурий ҳужжатларни самарали амалга ошириши;

фуқаролар ва тадбиркорлик субъектларининг ҳуқуқлари ҳамда қонуний манфаатларини ҳимоя қилиши шарт.

Аккредитация маркази директори қонунчилик ҳужжатларида назарда тутилган бошқа мажбуриятларни ҳам бажаради.

16. Аккредитация маркази директори ўз ҳуқуқлари ва мажбуриятларини бажаришда давлат ва Аккредитация маркази манфаатларини кўзлаб ҳаракат қилиши керак.

5-боб. Аккредитация маркази директорининг жавобгарлиги

17. Аккредитация маркази директори Аккредитация марказига юкланган вазифа ва функцияларнинг бажарилиши, Аккредитация марказининг ушбу Низомда кўрсатилган жавобгарлик соҳалари бўйича ҳамда ўз функционал вазифалари сифатли бажарилиши учун шахсан жавоб беради.

18. Аккредитация маркази директори ўзининг ҳаракати (ҳаракатсизлиги) туфайли Ўзбекистон Республикаси Давлат бюджетига ва давлат мақсадли жамғармаларига тўловларнинг, иш ҳақининг ўз вақтида тўланиши, меҳнат ҳуқуқлари ва муносабатларидан ҳамда уларга тенглаштирилган тўловлардан келиб чиқадиган барча талабларнинг қаноатлантирилиши, ишлаб чиқариш фаолияти билан бевосита боғлиқ бўлган эҳтиёжлар учун маблағларнинг ўтказилмагани, шу жумладан, Аккредитация марказига берилган мол-мулк йўқолган тақдирда, етказилган зарар учун қонунчилик ҳужжатларида белгиланган тартибда жавоб беради.

19. Аккредитация маркази директори зиммасига юкланган вазифалар, шунингдек, Аккредитация марказига берилган мол-мулкининг бутлиги ва ундан мақсадли фойдаланилиши учун қонунчилик ҳужжатларида белгиланган тартибда жавоб беради.

6-боб. Аккредитация маркази фаолиятини ташкил этиш

20. Аккредитация марказининг жорий фаолиятига белгиланган тартибда Ўзбекистон Республикаси Президенти Администрацияси билан келишилган ҳолда Вазирлар Маҳкамаси томонидан лавозимга тайинланадиган ва лавозимдан озод этиладиган директор раҳбарлик қилади.

21. Аккредитация маркази директорининг уч нафар ўринбосари бўлади. Директор ўринбосарлари Аккредитация маркази директори томонидан лавозимга тайинланади ва лавозимдан озод этилади.

22. Аккредитация маркази директорининг маслаҳатчилари белгиланган тартибда Аккредитация маркази директори томонидан лавозимга тайинланади ва лавозимдан озод этилади;

23. Аккредитация маркази директори бўлмаган вақтда унинг ваколатлари директорнинг тегишли буйруғига асосан унинг ўринбосарларидан бири томонидан бажарилади.

24. Аккредитация маркази директори ички идоравий ҳужжатларни белгиланган тартибда тасдиқлайди.

7-боб. Аккредитация маркази фаолияти самарадорлиги ва натижадорлигини баҳолаш мезонлари ва иш индикаторлари

25. Аккредитация маркази фаолиятининг самарадорлиги мунтазам баҳоланиши лозим.

26. Аккредитация маркази фаолияти самарадорлиги ва натижадорлигига берилган баҳолар белгиланган тартибда тасдиқланадиган Аккредитация маркази фаолияти самарадорлиги ва натижадорлигини баҳолаш мезонлари ва иш индикаторларига асосланади.

27. Аккредитация маркази фаолияти самарадорлиги ва натижадорлигини баҳолаш якунлари бўйича:

раҳбарлар ва ходимларни рағбатлантириш (мукофотлаш) ёки интизомий жавобгарликка тортиш;

Аккредитация маркази фаолиятида аниқланган камчиликларни бартараф этиш ва унинг фаолиятини янада такомиллаштириш чоралари кўрилади.

Аккредитация маркази фаолияти самарадорлиги ва натижадорлигини баҳолаш тартиби ва методикаси қонунчилик ҳужжатларига мувофиқ белгиланади.

8-боб. Аккредитация марказини молиялаштириш ва моддий-техник таъминлаш, унинг ходимларининг меҳнатига ҳақ тўлаш ва уларни моддий рағбатлантириш

28. Аккредитация маркази фаолиятини молиялаштириш ва унинг ходимларини моддий рағбатлантириш қонунчилик ҳужжатларига мувофиқ амалга оширилади.

29. Қуйидагилар Аккредитация марказининг мулки ҳисобланади:

Муассис томонидан Аккредитация марказига оператив бошқариш ҳуқуқи билан бириктирилган мулк;

қонунчилик ҳужжатларига зид бўлмаган бошқа манбалар ҳисобидан шакллантирилган мулклар.

Агар таъсис ҳужжатларига мувофиқ Аккредитация марказига даромад келтирадиган фаолият билан шуғулланиш ҳуқуқи берилган бўлса, бундай фаолиятдан олинган даромад ва бу даромад ҳисобидан сотиб олинган мол-мулк муассасанинг мустақил тасарруфига ўтади ва алоҳида балансда ҳисобга олинади.

30. Аккредитация маркази мулки бўлинмас мулк ҳисобланади ва улушлар, пайлар бўйича, шу жумладан, Аккредитация маркази ходимлари ўртасида тақсимланиши мумкин эмас.

31. Аккредитация маркази директори Муассис билан келишган ҳолда, Аккредитация маркази мулкини қуйидаги ҳолларда тасарруф этиши мумкин:

асосий воситаларни сотиш, ҳисобдан чиқариш (бино ва иншоотлар, шу жумладан, қурилиши тугалланмаган бино ва иншоотлардан ташқари);

Ўзбекистон Республикаси Иқтисодиёт ва молия вазирлиги ёки унинг ҳудудий бўлинмалари розилиги билан автотранспорт воситаларини харид қилиш, бино ва иншоотларни сотиб олиш ва (ёки) қуриш;

мулкни Аккредитация маркази фаолияти мақсадларига мувофиқ бўлган бошқача тарзда тасарруф этиш.

32. Аккредитация марказининг оператив бошқарувида бўлган мол-мулкдан фойдаланишдан олинган даромадлар, шунингдек, Аккредитация марказининг шартнома бўйича ёхуд бошқа асосларда вужудга келган мол-мулки ҳам унинг оператив бошқарувига ўтади.

33. Қуйидагилар Аккредитация маркази фаолиятини молиялаштириш манбалари этиб белгиланади:

кўрсатилган хизматлардан олинган даромадлар;

аккредитация белгисидан фойдаланганлик учун аккредитациядан ўтказилган субъектлардан тушадиган ажратмалар;

Муассис томонидан Аккредитация марказини таъминлаш учун йўналтирилган маблағлар ёки мулк;

Ўзбекистон Республикаси қонунчилик ҳужжатлари билан тақиқланмаган бошқа манбалар.

34. Аккредитация маркази ходимларининг меҳнатига ҳақ тўлаш фонди, лавозим маоши, узоқ муддат узлуксиз хизмати учун устама ҳақлар, мукофотлар, қўшимча ҳақлар ва устамалар, рағбатлантириш тўловларидан, шунингдек, қонунчилик ҳужжатларида назарда тутилган бошқа тўловлардан иборат. Аккредитация марказининг ходимлари меҳнатига ҳақ тўлаш ва уларни моддий рағбатлантириш тартиби қонунчилик ҳамда ички ҳужжатларда белгиланади.

35. Аккредитация маркази ходимларининг лавозим маоши икки баравар миқдордаги коэффициентни қўлланган ҳолда, Ягона тариф сеткаси бўйича меҳнатга ҳақ тўлашга доир тасдиқланган разрядларга мувофиқ белгиланади.

36. Молиявий имкониятлари ҳисобга олинган ҳолда, Аккредитация маркази ходимларига ўз маблағлари ҳисобидан:

қуйидаги миқдорларда кўп йиллик хизмати учун ойлик устама ҳақлари тўланади (рағбатлантириш коэффициентини ҳисобга олган ҳолда, лавозим маошига нисбатан коэффициентларда):

1 йилдан 3 йилгача — 0,3;

3 йилдан 5 йилгача — 0,6;

5 йилдан 10 йилгача — 0,8;

10 йилдан 15 йилгача — 1,0;

15 йилдан 20 йилгача — 1,2;

20 йилдан ортиқ — 1,5.

Бунда кўп йиллик хизмати учун ойлик устама ҳақлари коэффициентини ҳисоблашда Аккредитация маркази ходимларининг ташкилий-ҳуқуқий шаклидан қатъи назар (якка тадбиркор ва ўзини ўзи банд қилган шахс сифатида ишлаган давридан ташқари), барча ташкилотлардаги меҳнат фаолияти даври ҳисобга олинади;

лавозим маошининг икки баравари миқдоригача бўлган миқдорда ҳар ойлик устамалар, шунингдек, хизмат вазифаларини виждонан ва самарали бажараётган ходимларга қонунчилик талабларидан келиб чиқиб, қўшимча ҳақ, мукофотлаш ва бошқа рағбатлантириш ҳамда компенсациялар тўланади.

37. Аккредитация маркази қонунчиликда белгиланган тартибда бюджетдан ташқари жамғармаларга эга бўлиши мумкин.

9-боб. Аккредитация марказининг Вазирлар Маҳкамасига ҳисобот бериши

38. Аккредитация маркази раҳбарлари ўз фаолияти тўғрисида Вазирлар Маҳкамасига ҳисобот беради.

10-боб. Якунловчи қоидалар

39. Ушбу Низом қоидалари қўлланиши билан боғлиқ низолар қонунчилик ҳужжатларида белгиланган тартибда ҳал этилади.

40. Ушбу Низом талаблари бузилишида айбдор бўлган шахслар қонунчилик ҳужжатларида белгиланган тартибда жавобгар бўладилар.

41. Аккредитация маркази қонунчилик ҳужжатларида белгиланган тартибда қайта ташкил этилади ва тугатилади.

Вазирлар Маҳкамасининг 2026 йил 4 сентябрдаги 460-сон қарорига 2-ИЛОВА

Ўзбекистон Республикаси Ҳукуматининг ўз кучини йўқотган деб ҳисобланаётган айрим қарорлари

1. Вазирлар Маҳкамасининг «Мувофиқликни баҳолаш органларини аккредитациядан ўтказиш соҳасидаги ишларни такомиллаштиришга доир қўшимча чора-тадбирлар тўғрисида» 2019 йил 24 апрелдаги 349-сон қарори .

2. Вазирлар Маҳкамасининг «Ўзбекистон Республикаси Инвестициялар ва ташқи савдо вазирлиги ҳузуридаги Ўзбекистон техник жиҳатдан тартибга солиш агентлиги тўғрисидаги ва Ўзбекистон техник жиҳатдан тартибга солиш агентлигининг Техник жиҳатдан тартибга солиш, стандартлаштириш, сертификатлаштириш ва метрология соҳасида давлат назорати департаменти тўғрисидаги низомларни тасдиқлаш ҳақида» 2022 йил 11 мартдаги 114-сон қарорига илованинг 24-банди .

3. Вазирлар Маҳкамасининг «Техник жиҳатдан тартибга солиш соҳасидаги давлат бошқаруви такомиллаштирилиши муносабати билан Ўзбекистон Республикаси Ҳукуматининг айрим қарорларига ўзгартириш ва қўшимчалар киритиш тўғрисида» 2024 йил 1 июлдаги 371-сон қарорига илованинг 6-банди .

4. Вазирлар Маҳкамасининг «Ўзбекистон Республикасининг «Мувофиқликни баҳолаш органларини аккредитация қилиш тўғрисида»ги Қонуни қабул қилиниши муносабати билан Вазирлар Маҳкамасининг «Мувофиқликни баҳолаш органларини аккредитациядан ўтказиш соҳасидаги ишларни такомиллаштиришга доир қўшимча чора-тадбирлар тўғрисида» 2019 йил 24 апрелдаги 349-сон қарорига ўзгартириш ва қўшимчалар киритиш ҳақида» 2024 йил 2 июлдаги 372-сон қарори .

Ўзбекистон Республикасининг Бош вазири А. АРИПОВ

Тошкент ш.,

2026 йил 4 сентябрь,

460-сон

(Қонунчилик маълумотлари миллий базаси, 05.09.2026 й., 09/26/460/0889-сон)

lex.uz

Oʻzbekiston Respublikasi Vazirlar Mahkamasining

qarori

NIZOM

ROʻYXATI

Oʻzbekiston Respublikasi Vazirlar Mahkamasi huzuridagi Oʻzbekiston akkreditatsiya markazi toʻgʻrisidagi nizomni tasdiqlash haqida

Oʻzbekiston Respublikasi Prezidentining “Texnik jihatdan tartibga solish sohasidagi islohotlarni ilgʻor xalqaro amaliyot asosida jadallashtirish chora-tadbirlari toʻgʻrisida” 2026-yil 16-fevraldagi PF-25-son Farmoni ijrosini taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining 2026-yil 16-fevraldagi PF-25-son Farmoniga asosan Oʻzbekiston texnik jihatdan tartibga solish agentligi tizimidagi Oʻzbekiston akkreditatsiya markazi, amaldagi faoliyat yoʻnalishi, shtat birliklari, mol-mulki hamda moliyalashtirish tartibi va manbalari saqlab qolingan holda, Vazirlar Mahkamasi boʻysunuviga oʻtkazilgani maʼlumot uchun qabul qilinsin.

2. Quyidagilarni nazarda tutuvchi Oʻzbekiston Respublikasi Vazirlar Mahkamasi huzuridagi “Oʻzbekiston akkreditatsiya markazi” davlat muassasasi (keyingi oʻrinlarda — Akkreditatsiya markazi) toʻgʻrisidagi nizom 1-ilovaga muvofiq tasdiqlansin:

Akkreditatsiya markazining asosiy vazifalari hamda funksiyalari;

Akkreditatsiya markazining huquqlari va javobgarligi;

Akkreditatsiya markazini moliyalashtirish va moddiy-texnik taʼminlash, uning xodimlarining mehnatiga haq toʻlash hamda ularni moddiy ragʻbatlantirish tartibi.

3. Oʻzbekiston Respublikasi Hukumatining 2-ilovaga muvofiq ayrim qarorlari oʻz kuchini yoʻqotgan deb hisoblansin.

4. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari J.A. Xodjayev zimmasiga yuklansin.

Vazirlar Mahkamasining 2026-yil 4-sentabrdagi 460-son qaroriga 1-ILOVA

Vazirlar Mahkamasi huzuridagi Oʻzbekiston akkreditatsiya markazi davlat muassasasi toʻgʻrisida

1-bob. Umumiy qoidalar

1. Mazkur Nizom Oʻzbekiston Respublikasi Vazirlar Mahkamasi huzuridagi “Oʻzbekiston akkreditatsiya markazi” davlat muassasasining (keyingi oʻrinlarda — Akkreditatsiya markazi) maqomi, asosiy vazifalari va funksiyalari, shuningdek, faoliyatini tashkil etish tartibini belgilaydi.

2. Akkreditatsiya markazi oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalari qarorlariga, Oʻzbekiston Respublikasi Prezidenti farmonlari, qarorlari va farmoyishlari hamda Vazirlar Mahkamasining qarorlariga va farmoyishlariga, shuningdek, ushbu Nizomga amal qiladi.

3. Akkreditatsiya markazi muvofiqlikni baholash organlarini akkreditatsiyadan oʻtkazadigan Akkreditatsiya organi hisoblanib, Vazirlar Mahkamasi Akkreditatsiya markazi muassisi (keyingi oʻrinlarda — Muassis) hisoblanadi.

4. Akkreditatsiya markazi mustaqil balansga, Iqtisodiyot va moliya vazirligi huzuridagi Gʻaznachilik xizmati qoʻmitasida shaxsiy gʻazna hisobvaraqlariga, shuningdek, banklarda milliy va xorijiy valyutada hisobvaraqlariga, Oʻzbekiston Respublikasining Davlat gerbi tasviri tushirilgan va oʻz nomi yozilgan muhrlar, shtamplar va qonunchilik hujjatlariga muvofiq faoliyatini amalga oshirish uchun zarur boʻlgan boshqa rekvizitlarga ega boʻladi.

5. Akkreditatsiya markazi belgilangan tartibda oʻz nomidan mulkiy va shaxsiy nomulkiy huquqlarni olishi va amalga oshirishi, shuningdek, majburiyatlar olishi, sudda daʼvogar va javobgar boʻlishi mumkin.

6. Akkreditatsiya markazi yuridik shaxs sifatida alohida mulkka, mustaqil balansga ega boʻladi, oʻziga biriktirilgan mulkka nisbatan qonunchilik hujjatlarida belgilangan doirada oʻz faoliyati maqsadlariga, Muassis topshiriqlariga va mulkning maqsadiga muvofiq egalik qilish, foydalanish va tasarruf etish huquqini amalga oshiradi.

7. Akkreditatsiya markazining rasmiy nomi:

a) davlat tilida:

toʻliq nomi — Oʻzbekiston Respublikasi Vazirlar Mahkamasi huzuridagi “Oʻzbekiston akkreditatsiya markazi” davlat muassasasi;

qisqartirilgan nomi — “Oʻzbekiston akkreditatsiya markazi” DM (abbreviaturasi “OʻZAKK”);

b) rus tilida:

toʻliq nomi — Gosudarstvennoye uchrejdeniye Uzbekskiy sentr akkreditatsii pri Kabinete Ministrov Respubliki Uzbekistan;

qisqartirilgan nomi — GU “Uzbekskiy sentr akkreditatsii”;

(abbreviatura “UZAKK”).

v) ingliz tilida:

toʻliq nomi — “Uzbek center for Accreditation” State Institution under the Cabinet of Ministers of the Republic of Uzbekistan;

qisqartirilgan nomi — “Uzbek Center for Accreditation” SI (abbreviatura “UzAKK”);

8. Akkreditatsiya markazining joylashgan joyi (pochta manzili): 100169, Oʻzbekiston Respublikasi, Toshkent shahri, Shayxontohur tumani, Zafarobod koʻchasi, 7a-uy.

2-bob. Akkreditatsiya markazining asosiy vazifalari va funksiyalari

9. Quyidagilar Akkreditatsiya markazining asosiy vazifalari hisoblanadi:

muvofiqlikni baholash organlarini akkreditatsiyadan oʻtkazish sohasida yagona davlat siyosatini amalga oshirish;

muvofiqlikni baholash organlarini xalqaro standartlarga koʻra akkreditatsiyadan oʻtkazish, shuningdek, muvofiqlikni baholash boʻyicha akkreditatsiyadan oʻtkazilgan subyektlarning belgilangan shartlar va talablarni bajarishini davriy baholash;

xalqaro va milliy akkreditatsiya organlari bilan faol hamkorlik qilish, ushbu sohada xalqaro standartlar va texnik reglamentlarni joriy etish;

muvofiqlikni baholash organlarini akkreditatsiyadan oʻtkazish sohasida milliy va xalqaro ilmiy-tadqiqot, taʼlim va boshqa muassasalar tomonidan amalga oshirilayotgan davlat ilmiy-texnik dasturlar va loyihalarining yagona buyurtmachisi vazifalarini bajarish.

10. Akkreditatsiya markazi oʻziga yuklangan vazifalarga muvofiq quyidagi funksiyalarni bajaradi:

a) Muvofiqlikni baholash organlarini akkreditatsiyadan oʻtkazish sohasida yagona davlat siyosatini amalga oshirish sohasida:

milliy akkreditatsiya tizimini rivojlantirishga oid takliflarni Oʻzbekiston Respublikasi Vazirlar Mahkamasiga kiritadi;

ISO/IEC 17011 xalqaro standarti talablari asosida faoliyat yuritadi va uning talablariga rioya qiladi;

xalqaro standartlarga, shuningdek, akkreditatsiya boʻyicha xalqaro tashkilotlar talablari va tavsiyalariga muvofiq akkreditatsiya tartibotlari boʻyicha qoidalar, tartib-taomillar, yoʻriqnomalar va nizomlarni ishlab chiqadi va tasdiqlaydi;

akkreditatsiya sohasidagi davlat dasturlarining, shuningdek, sohada islohotlarning amalga oshirilishini tizimli tahlil qiladi, oʻtgan davr bilan qiyosiy oʻrganadi va istiqbolni belgilaydi;

akkreditatsiya sohasining rivojlanish tendensiyalari boʻyicha chora-tadbirlarni ishlab chiqadi;

b) muvofiqlikni baholash organlarini xalqaro standartlarga koʻra akkreditatsiyadan oʻtkazish, shuningdek, muvofiqlikni baholash boʻyicha akkreditatsiyadan oʻtkazilgan subyektlarning belgilangan shartlar va talablarni bajarishini davriy baholash sohasida:

muvofiqlikni baholash organlarining vakolatliligiga oid talablarni va mezonlarni belgilovchi standartlarni qabul qilish yuzasidan takliflarni milliy standartlashtirish organiga kiritadi;

akkreditatsiyani, takroriy akkreditatsiyadan oʻtkazadi hamda ariza beruvchini vakolatliligiga oid belgilangan talablarga va mezonlarga muvofiq boʻlgan taqdirda, akkreditatsiyadan oʻtkazish toʻgʻrisida qaror qabul qiladi;

akkreditatsiya toʻgʻrisidagi guvohnomalarni rasmiylashtiradi, ularga oʻzgartishlar va (yoki) qoʻshimchalar kiritadi;

davriy baholash ishlarini amalga oshiradi;

akkreditatsiya toʻgʻrisidagi guvohnomaning shaklini, shuningdek, akkreditatsiya belgisining shaklini va uni qoʻllash tartibini belgilaydi;

akkreditatsiya toʻgʻrisidagi guvohnomaning amal qilishini toʻxtatib turadi, qayta tiklaydi yoki tugatadi;

guvohlik baholash, muvofiqlikni baholash ishlari yakunlangandan keyin ularning natijadorligini oʻrganish hamda ogohlantirishsiz tashrif orqali belgilangan shartlar va talablar bajarilishini baholab boradi;

akkreditatsiyadan oʻtkazilgan subyektlar bilan akkreditatsiyadan keyingi shartnomalar tuzadi;

akkreditatsiya belgisidan foydalanishni monitoring qiladi;

v) xalqaro va milliy akkreditatsiya organlari bilan faol hamkorlik qilish, ushbu sohada xalqaro standartlar va texnik reglamentlarni joriy etish sohasida:

akkreditatsiya milliy tizimini xalqaro normalar va mezonlarga muvofiq doimiy ravishda rivojlantirish va qoʻllab-quvvatlash maqsadida oʻz faoliyatiga xalqaro standartlarni joriy etadi;

Oʻzbekiston Respublikasining xalqaro shartnomalari asosida akkreditatsiya ishlari natijalarining xorijiy mamlakatlar tomonidan eʼtirof etilishini taʼminlash yuzasidan zarur choralarni koʻradi;

akkreditatsiya sohasida idoralararo xususiyatga ega, shu jumladan, xorijda akkreditatsiya ishlari natijalari eʼtirof etilishini taʼminlashga qaratilgan xalqaro shartnomalarni belgilangan tartibda tuzadi;

akkreditatsiya sohasida oʻz vakolatlari doirasida xalqaro shartnomalar, shu jumladan, xorijiy milliy akkreditatsiya organlari bilan hamkorlik qilish yuzasidan shartnomalar, memorandumlar tuzadi;

xalqaro akkreditatsiya tashkilotlari, shu jumladan, xorijiy akkreditatsiya organlari tomonidan tashkil etilgan yigʻilish, seminar, konferensiya, simpoziumlarda va boshqa tadbirlarda faol ishtirok etadi;

g) muvofiqlikni baholash organlarini akkreditatsiyadan oʻtkazish sohasida milliy va xalqaro ilmiy-tadqiqot, taʼlim va boshqa muassasalar tomonidan amalga oshirilayotgan davlat ilmiy-texnik dasturlari va loyihalarining yagona buyurtmachisi vazifalarini bajarish sohasida:

akkreditatsiya sohasida kadrlar malakasini oshirish, ularni qayta tayyorlashni, ularning tajriba orttirishini, shu jumladan, chet elda malaka oshirishini taʼminlaydi;

akkreditatsiyadan oʻtkazilgan subyektlar xodimlarini muntazam qayta tayyorlash va ularning malakasini oshirish yuzasidan koʻrsatmalar beradi;

akkreditatsiya boʻyicha baholovchilar va texnik ekspertlarni fuqarolik-huquqiy shartnoma asosida jalb qiladi, ularning malakasini baholaydi hamda ularning roʻyxatini yuritadi;

treninglar, seminarlar, konferensiya, simpoziumlar va boshqa tadbirlarni oʻtkazadi hamda baholovchilar, texnik ekspertlar, shuningdek, muvofiqlikni baholash sohasida ishtirok etuvchi mutaxassislar malakasini baholaydi.

11. Akkreditatsiya markazi oʻziga yuklangan vazifalar doirasida boshqa funksiyalarni ham bajarishi mumkin.

3-bob. Akkreditatsiya markazining huquqlari va javobgarligi

12. Akkreditatsiya markazi oʻziga yuklangan vazifa va funksiyalarni bajarish uchun quyidagi huquqlarga ega:

normativ-huquqiy hujjatlar loyihalarini ishlab chiqish va belgilangan tartibda Vazirlar Mahkamasiga kiritish;

oʻz vakolati doirasiga kiradigan masalalarda respublika ijro etuvchi hokimiyat organlari va xoʻjalik birlashmalari, mahalliy ijro etuvchi hokimiyat organlari faoliyatini belgilangan tartibda muvofiqlashtirish;

oʻz vakolati doirasiga kiradigan masalalarni hal qilish uchun zarur axborotni respublika ijro etuvchi hokimiyat organlari va xoʻjalik birlashmalari, mahalliy ijro etuvchi hokimiyat organlaridan belgilangan tartibda soʻrab olish;

oʻz vakolati doirasiga kiradigan masalalar boʻyicha zarur statistika axborotini statistika organlaridan bepul olish;

Akkreditatsiya markazi xodimlarini ular tomonidan tegishli sohada oʻz faoliyatining asosiy koʻrsatkichlari parametrlari bajarilishini hisobga olgan holda moddiy ragʻbatlantirish tartibi, miqdorlari va shartlarini belgilash;

oʻz vakolati doirasiga kiradigan masalalar boʻyicha takliflarni koʻrib chiqish uchun Vazirlar Mahkamasiga, respublika va mahalliy ijro etuvchi hokimiyat organlariga kiritish;

oʻz vakolati doirasiga kiradigan masalalar boʻyicha qonunchilikda belgilangan tartibda xalqaro shartnomalarni tuzish;

Akkreditatsiya markazi vakolatiga kiruvchi masalalar boʻyicha xalqaro darajada Oʻzbekiston Respublikasi manfaatlarini belgilangan tartibda ifodalash;

akkreditatsiya sohasidagi tadbirlar oʻtkazilishini belgilangan tartibda tashkil etish;

zarur texnik uskuna, inventar va boshqa zarur jihozlarni belgilangan tartibda xarid qilish;

pulli xizmatlar koʻrsatish tartibini, ularning narxlarini ishlab chiqish va belgilangan tartibda tasdiqlash. Bunda qoʻllanadigan yangi narxlarni (tariflarni) joriy narxlar (tariflar) oʻzgartirilishidan kamida oʻn besh kun oldin eʼlon qiladi va keyingi chorak davomida narxlar oʻzgartirilganda, narxlar oʻzgarishi toʻgʻrisida Raqobatni rivojlantirish va isteʼmolchilar huquqlarini himoya qilish qoʻmitasini oʻn kun oldin xabardor qiladi;

akkreditatsiya sohasidagi xalqaro va respublika tadbirlarini oʻtkazishda gʻolib va sovrindorlarni, nominantlarni mukofotlash uchun zarur miqdorda diplomlar va sovrinlarni belgilangan tartibda xarid qilish;

akkreditatsiya sohasi vakillarini koʻkrak nishonlari, diplomlar, yorliqlar va sovrinlar bilan mukofotlash;

oʻz vakolati doirasida konferensiyalar, seminarlar, simpoziumlar, koʻrgazmalar, yarmarkalar va boshqa tadbirlarni oʻtkazish, shuningdek, boshqa tashkilotlar tomonidan oʻtkaziladigan shu kabi tadbirlarda ishtirok etish;

akkreditatsiya sohasini rivojlantirishga qaratilgan tadbirlarni birgalikda ishlab chiqish maqsadida xalqaro, xorijiy va respublika tashkilotlari bilan belgilangan tartibda aloqalarni yoʻlga qoʻyish;

alohida fidokorlik, mehnatsevarlikni namoyon qilgan, oʻzining professional faoliyatida yuksak natijalarga erishgan akkreditatsiya sohasidagi namoyandalar va xodimlarning nomzodlarini belgilangan tartibda davlat mukofotlariga taqdim etish yuzasidan takliflar kiritish;

akkreditatsiyadan oʻtkazilgan tashkilotlar va ularning akkreditatsiya sohasi toʻgʻrisidagi maʼlumotlar bazasining shakllantirilishi hamda dolzarb holatda saqlanishini, shuningdek, tegishli axborotning maxfiyligiga rioya qilgan holda jamoatchilikning ulardan foydalanishini taʼminlash;

milliy akkreditatsiya tizimining reyestrini shakllantirish va yuritish tartibini belgilash;

Akkreditatsiya markazi oʻz rasmiy veb-saytida oʻzining nomi, faoliyat turi, funksiya va vakolatlari hamda rahbarlari toʻgʻrisidagi maʼlumotlarni joylashtirish va ularning doimiy ravishda yangilab borilishini taʼminlash;

ochiq maʼlumotlar portalida foydalanuvchilar uchun qulay formatlarda koʻrish imkoniyatini yaratgan holda muassasaning yuqori turuvchi tashkiloti, koʻchmas mulk obyektlari, qurilishi tugallanmagan obyektlari va avtotransport vositalari, rejalashtirilgan va amalga oshirilgan xarajatlar tarkibi haqidagi va boshqa maʼlumotlarni (tijorat siri mavjud yoki cheklangan holda tarqatiladigan maʼlumotlar bundan mustasno) eʼlon qilib borish;

eng yaxshi amaliyotlarga muvofiq mustaqil maslahatchilar va ekspertlarni, shu jumladan, xorijiy maslahatchilar va ekspertlarni shartnoma asosida jalb qilish;

oʻziga yuklangan vazifalarni bajarishda respublika ijro etuvchi hokimiyat organlari va xoʻjalik birlashmalari, mahalliy ijro etuvchi hokimiyat organlari , davlat va nodavlat tashkilotlar, loyiha institutlari, injiniring va konsalting kompaniyalar, ilmiy-taʼlim muassasalar, shuningdek, xalqaro tashkilotlar, chet el va mahalliy kompaniyalar bilan hamkorlik qilish.

Akkreditatsiya markaziga qonunchilik hujjatlariga muvofiq boshqa huquqlarga ham ega boʻlishi mumkin.

13. Akkreditatsiya markazi:

unga yuklangan vazifalar va funksiyalarning samarali bajarilishi;

oʻz faoliyati bilan bogʻliq prognoz koʻrsatkichlarga soʻzsiz erishilishi;

Vazirlar Mahkamasiga kiritiladigan normativ-huquqiy hujjatlar va boshqa hujjatlarning loyihalarini oʻz muddatlarida va sifatli tayyorlashi;

akkreditatsiya sohasini rivojlantirish, muammoli masalalarni hal qilish boʻyicha dasturlar, tadbirlar rejalari, “yoʻl xaritalari” va boshqa dasturiy hujjatlar samarali amalga oshirilishi uchun javob beradi.

4-bob. Akkreditatsiya markazi direktorining huquq va majburiyatlari

14. Akkreditatsiya markazi direktori quyidagi huquqlarga ega:

Akkreditatsiya markazi faoliyatiga umumiy rahbarlik qiladi hamda Akkreditatsiya markaziga yuklangan vazifa va funksiyalarning bajarilishi uchun shaxsan javob beradi;

Akkreditatsiya markazi tuzilmasini, xodimlarining shtat jadvali va ish haqi miqdorini tasdiqlaydi;

yuqori malakali xorijiy va mahalliy mutaxassislarni ishga qabul qiladi hamda ularga qonunchilik hujjatlariga muvofiq ish haqi va boshqa toʻlovlar miqdorini belgilaydi;

Oʻzbekiston Respublikasidagi va undan tashqaridagi barcha tashkilotlarda Akkreditatsiya markazi manfaatlarini ifodalaydi, Akkreditatsiya markazi nomidan shartnomalarni tuzadi, oʻzgartiradi va bekor qiladi;

Akkreditatsiya markazining tarkibiy boʻlinmalari toʻgʻrisidagi nizomlarni, Akkreditatsiya markazi xodimlarining lavozim majburiyatlarini tasdiqlaydi;

oylik qoʻshimcha haqlar, ragʻbatlantirish, konpensatsiya toʻlovlari, shu jumladan, yuqori malaka, professionalizm va ish sifati uchun oylik va choraklik qoʻshimcha haqlar va mukofot pullarini belgilaydi;

qonunchilik hujjatlariga muvofiq xodimlar bilan mehnat shartnomalarini tuzadi, oʻzgartiradi va bekor qiladi.

oʻz vakolati doirasida Akkreditatsiya markazi xodimlari bajarishi shart boʻlgan buyruq va farmoyishlar chiqaradi, koʻrsatmalar beradi;

Akkreditatsiya markazi nomidan ish yuritish uchun belgilangan tartibda ishonchnomalar beradi;

Akkreditatsiya markazi direktori qonunchilik hujjatlarida nazarda tutilgan boshqa huquqlarga ham ega boʻlishi mumkin.

15. Akkreditatsiya markazi direktorining majburiyatlari:

Oʻzbekiston Respublikasi Konstitutsiyasi va qonunlari, shuningdek, boshqa normativ-huquqiy hujjatlar talablariga rioya qilishi;

Oʻzbekiston Respublikasi Prezidentining tegishli hujjatlari, Vazirlar Mahkamasining qarorlari va boshqa qonunchilik hujjatlari bilan Akkreditatsiya markaziga yuklangan vazifa va funksiyalar bajarilishini tashkil etishi;

Akkreditatsiya markazi oldiga qoʻyilgan vazifalarning bajarilishini tashkil etishi va nazorat qilishi;

davlat siriga oid maʼlumotlar va maxfiy axborot bilan ishlashda qonunchilik hujjatlari talablariga rioya qilishi;

oʻz faoliyati bilan bogʻliq prognoz koʻrsatkichlar, davriy ish rejalari va faoliyati samaradorligini baholash koʻrsatkichlari hamda mezonlariga soʻzsiz erishilishini taʼminlashi;

faoliyatni rivojlantirish boʻyicha dasturlar, chora-tadbirlar rejasi, “yoʻl xaritalari” va boshqa dasturiy hujjatlarni samarali amalga oshirishi;

fuqarolar va tadbirkorlik subyektlarining huquqlari hamda qonuniy manfaatlarini himoya qilishi shart.

Akkreditatsiya markazi direktori qonunchilik hujjatlarida nazarda tutilgan boshqa majburiyatlarni ham bajaradi.

16. Akkreditatsiya markazi direktori oʻz huquqlari va majburiyatlarini bajarishda davlat va Akkreditatsiya markazi manfaatlarini koʻzlab harakat qilishi kerak.

5-bob. Akkreditatsiya markazi direktorining javobgarligi

17. Akkreditatsiya markazi direktori Akkreditatsiya markaziga yuklangan vazifa va funksiyalarning bajarilishi, Akkreditatsiya markazining ushbu Nizomda koʻrsatilgan javobgarlik sohalari boʻyicha hamda oʻz funksional vazifalari sifatli bajarilishi uchun shaxsan javob beradi.

18. Akkreditatsiya markazi direktori oʻzining harakati (harakatsizligi) tufayli Oʻzbekiston Respublikasi Davlat budjetiga va davlat maqsadli jamgʻarmalariga toʻlovlarning, ish haqining oʻz vaqtida toʻlanishi, mehnat huquqlari va munosabatlaridan hamda ularga tenglashtirilgan toʻlovlardan kelib chiqadigan barcha talablarning qanoatlantirilishi, ishlab chiqarish faoliyati bilan bevosita bogʻliq boʻlgan ehtiyojlar uchun mablagʻlarning oʻtkazilmagani, shu jumladan, Akkreditatsiya markaziga berilgan mol-mulk yoʻqolgan taqdirda, yetkazilgan zarar uchun qonunchilik hujjatlarida belgilangan tartibda javob beradi.

19. Akkreditatsiya markazi direktori zimmasiga yuklangan vazifalar, shuningdek, Akkreditatsiya markaziga berilgan mol-mulkining butligi va undan maqsadli foydalanilishi uchun qonunchilik hujjatlarida belgilangan tartibda javob beradi.

6-bob. Akkreditatsiya markazi faoliyatini tashkil etish

20. Akkreditatsiya markazining joriy faoliyatiga belgilangan tartibda Oʻzbekiston Respublikasi Prezidenti Administratsiyasi bilan kelishilgan holda Vazirlar Mahkamasi tomonidan lavozimga tayinlanadigan va lavozimdan ozod etiladigan direktor rahbarlik qiladi.

21. Akkreditatsiya markazi direktorining uch nafar oʻrinbosari boʻladi. Direktor oʻrinbosarlari Akkreditatsiya markazi direktori tomonidan lavozimga tayinlanadi va lavozimdan ozod etiladi.

22. Akkreditatsiya markazi direktorining maslahatchilari belgilangan tartibda Akkreditatsiya markazi direktori tomonidan lavozimga tayinlanadi va lavozimdan ozod etiladi;

23. Akkreditatsiya markazi direktori boʻlmagan vaqtda uning vakolatlari direktorning tegishli buyrugʻiga asosan uning oʻrinbosarlaridan biri tomonidan bajariladi.

24. Akkreditatsiya markazi direktori ichki idoraviy hujjatlarni belgilangan tartibda tasdiqlaydi.

7-bob. Akkreditatsiya markazi faoliyati samaradorligi va natijadorligini baholash mezonlari va ish indikatorlari

25. Akkreditatsiya markazi faoliyatining samaradorligi muntazam baholanishi lozim.

26. Akkreditatsiya markazi faoliyati samaradorligi va natijadorligiga berilgan baholar belgilangan tartibda tasdiqlanadigan Akkreditatsiya markazi faoliyati samaradorligi va natijadorligini baholash mezonlari va ish indikatorlariga asoslanadi.

27. Akkreditatsiya markazi faoliyati samaradorligi va natijadorligini baholash yakunlari boʻyicha:

rahbarlar va xodimlarni ragʻbatlantirish (mukofotlash) yoki intizomiy javobgarlikka tortish;

Akkreditatsiya markazi faoliyatida aniqlangan kamchiliklarni bartaraf etish va uning faoliyatini yanada takomillashtirish choralari koʻriladi.

Akkreditatsiya markazi faoliyati samaradorligi va natijadorligini baholash tartibi va metodikasi qonunchilik hujjatlariga muvofiq belgilanadi.

8-bob. Akkreditatsiya markazini moliyalashtirish va moddiy-texnik taʼminlash, uning xodimlarining mehnatiga haq toʻlash va ularni moddiy ragʻbatlantirish

28. Akkreditatsiya markazi faoliyatini moliyalashtirish va uning xodimlarini moddiy ragʻbatlantirish qonunchilik hujjatlariga muvofiq amalga oshiriladi.

29. Quyidagilar Akkreditatsiya markazining mulki hisoblanadi:

Muassis tomonidan Akkreditatsiya markaziga operativ boshqarish huquqi bilan biriktirilgan mulk;

qonunchilik hujjatlariga zid boʻlmagan boshqa manbalar hisobidan shakllantirilgan mulklar.

Agar taʼsis hujjatlariga muvofiq Akkreditatsiya markaziga daromad keltiradigan faoliyat bilan shugʻullanish huquqi berilgan boʻlsa, bunday faoliyatdan olingan daromad va bu daromad hisobidan sotib olingan mol-mulk muassasaning mustaqil tasarrufiga oʻtadi va alohida balansda hisobga olinadi.

30. Akkreditatsiya markazi mulki boʻlinmas mulk hisoblanadi va ulushlar, paylar boʻyicha, shu jumladan, Akkreditatsiya markazi xodimlari oʻrtasida taqsimlanishi mumkin emas.

31. Akkreditatsiya markazi direktori Muassis bilan kelishgan holda, Akkreditatsiya markazi mulkini quyidagi hollarda tasarruf etishi mumkin:

asosiy vositalarni sotish, hisobdan chiqarish (bino va inshootlar, shu jumladan, qurilishi tugallanmagan bino va inshootlardan tashqari);

Oʻzbekiston Respublikasi Iqtisodiyot va moliya vazirligi yoki uning hududiy boʻlinmalari roziligi bilan avtotransport vositalarini xarid qilish, bino va inshootlarni sotib olish va (yoki) qurish;

mulkni Akkreditatsiya markazi faoliyati maqsadlariga muvofiq boʻlgan boshqacha tarzda tasarruf etish.

32. Akkreditatsiya markazining operativ boshqaruvida boʻlgan mol-mulkdan foydalanishdan olingan daromadlar, shuningdek, Akkreditatsiya markazining shartnoma boʻyicha yoxud boshqa asoslarda vujudga kelgan mol-mulki ham uning operativ boshqaruviga oʻtadi.

33. Quyidagilar Akkreditatsiya markazi faoliyatini moliyalashtirish manbalari etib belgilanadi:

koʻrsatilgan xizmatlardan olingan daromadlar;

akkreditatsiya belgisidan foydalanganlik uchun akkreditatsiyadan oʻtkazilgan subyektlardan tushadigan ajratmalar;

Muassis tomonidan Akkreditatsiya markazini taʼminlash uchun yoʻnaltirilgan mablagʻlar yoki mulk;

Oʻzbekiston Respublikasi qonunchilik hujjatlari bilan taqiqlanmagan boshqa manbalar.

34. Akkreditatsiya markazi xodimlarining mehnatiga haq toʻlash fondi, lavozim maoshi, uzoq muddat uzluksiz xizmati uchun ustama haqlar, mukofotlar, qoʻshimcha haqlar va ustamalar, ragʻbatlantirish toʻlovlaridan, shuningdek, qonunchilik hujjatlarida nazarda tutilgan boshqa toʻlovlardan iborat. Akkreditatsiya markazining xodimlari mehnatiga haq toʻlash va ularni moddiy ragʻbatlantirish tartibi qonunchilik hamda ichki hujjatlarda belgilanadi.

35. Akkreditatsiya markazi xodimlarining lavozim maoshi ikki baravar miqdordagi koeffitsiyentni qoʻllangan holda, Yagona tarif setkasi boʻyicha mehnatga haq toʻlashga doir tasdiqlangan razryadlarga muvofiq belgilanadi.

36. Moliyaviy imkoniyatlari hisobga olingan holda, Akkreditatsiya markazi xodimlariga oʻz mablagʻlari hisobidan:

quyidagi miqdorlarda koʻp yillik xizmati uchun oylik ustama haqlari toʻlanadi (ragʻbatlantirish koeffitsiyentini hisobga olgan holda, lavozim maoshiga nisbatan koeffitsiyentlarda):

1 yildan 3 yilgacha — 0,3;

3 yildan 5 yilgacha — 0,6;

5 yildan 10 yilgacha — 0,8;

10 yildan 15 yilgacha — 1,0;

15 yildan 20 yilgacha — 1,2;

20 yildan ortiq — 1,5.

Bunda koʻp yillik xizmati uchun oylik ustama haqlari koeffitsiyentini hisoblashda Akkreditatsiya markazi xodimlarining tashkiliy-huquqiy shaklidan qatʼi nazar (yakka tadbirkor va oʻzini oʻzi band qilgan shaxs sifatida ishlagan davridan tashqari), barcha tashkilotlardagi mehnat faoliyati davri hisobga olinadi;

lavozim maoshining ikki baravari miqdorigacha boʻlgan miqdorda har oylik ustamalar, shuningdek, xizmat vazifalarini vijdonan va samarali bajarayotgan xodimlarga qonunchilik talablaridan kelib chiqib, qoʻshimcha haq, mukofotlash va boshqa ragʻbatlantirish hamda kompensatsiyalar toʻlanadi.

37. Akkreditatsiya markazi qonunchilikda belgilangan tartibda budjetdan tashqari jamgʻarmalarga ega boʻlishi mumkin.

9-bob. Akkreditatsiya markazining Vazirlar Mahkamasiga hisobot berishi

38. Akkreditatsiya markazi rahbarlari oʻz faoliyati toʻgʻrisida Vazirlar Mahkamasiga hisobot beradi.

10-bob. Yakunlovchi qoidalar

39. Ushbu Nizom qoidalari qoʻllanishi bilan bogʻliq nizolar qonunchilik hujjatlarida belgilangan tartibda hal etiladi.

40. Ushbu Nizom talablari buzilishida aybdor boʻlgan shaxslar qonunchilik hujjatlarida belgilangan tartibda javobgar boʻladilar.

41. Akkreditatsiya markazi qonunchilik hujjatlarida belgilangan tartibda qayta tashkil etiladi va tugatiladi.

Vazirlar Mahkamasining 2026-yil 4-sentabrdagi 460-son qaroriga 2-ILOVA

Oʻzbekiston Respublikasi Hukumatining oʻz kuchini yoʻqotgan deb hisoblanayotgan ayrim qarorlari

1. Vazirlar Mahkamasining “Muvofiqlikni baholash organlarini akkreditatsiyadan oʻtkazish sohasidagi ishlarni takomillashtirishga doir qoʻshimcha chora-tadbirlar toʻgʻrisida” 2019-yil 24-apreldagi 349-son qarori .

2. Vazirlar Mahkamasining “Oʻzbekiston Respublikasi Investitsiyalar va tashqi savdo vazirligi huzuridagi Oʻzbekiston texnik jihatdan tartibga solish agentligi toʻgʻrisidagi va Oʻzbekiston texnik jihatdan tartibga solish agentligining Texnik jihatdan tartibga solish, standartlashtirish, sertifikatlashtirish va metrologiya sohasida davlat nazorati departamenti toʻgʻrisidagi nizomlarni tasdiqlash haqida” 2022-yil 11-martdagi 114-son qaroriga ilovaning 24-bandi .

3. Vazirlar Mahkamasining “Texnik jihatdan tartibga solish sohasidagi davlat boshqaruvi takomillashtirilishi munosabati bilan Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida” 2024-yil 1-iyuldagi 371-son qaroriga ilovaning 6-bandi .

4. Vazirlar Mahkamasining “Oʻzbekiston Respublikasining “Muvofiqlikni baholash organlarini akkreditatsiya qilish toʻgʻrisida”gi Qonuni qabul qilinishi munosabati bilan Vazirlar Mahkamasining “Muvofiqlikni baholash organlarini akkreditatsiyadan oʻtkazish sohasidagi ishlarni takomillashtirishga doir qoʻshimcha chora-tadbirlar toʻgʻrisida” 2019-yil 24-apreldagi 349-son qaroriga oʻzgartirish va qoʻshimchalar kiritish haqida” 2024-yil 2-iyuldagi 372-son qarori .

Oʻzbekiston Respublikasining Bosh vaziri A. ARIPOV

Toshkent sh.,

2026-yil 4-sentabr,

460-son

(Qonunchilik maʼlumotlari milliy bazasi, 05.09.2026-y., 09/26/460/0889-son)

lex.uz